ភ្នំពេញ៖ពីលើទីលានវាយគូនគោលក្រាលគ្របដោយវាលស្មៅខៀវខ្ចី សម្តេចតេជោ ហ៊ុន សែន បានបង្ហាញសំណេរខ្លីមួយថា «ព្រឹកនេះ វាយ កូន គោល មើល ផ្ការីក។ ខ្យល់ត្រជាក់ផ្ការីកគ្រប់រដូវធ្វើឱ្យ ការវាយកាន់តែល្អ»។​សំណេរមួយប្រយោគនេះ ខ្លីមែនពិត តែអត្ថន័យវែងអន្លាយឆ្ងាយ ដល់ នាយ សមុទ្រ ជាមួយទម្ងន់រាប់ពាន់តោនសមល្មមសង្កត់ឱ្យអ្នកនយោបាយ ដែល កំពុង បំផុសពាក្យ «ផ្ការីក» លើបណ្តាញសង្គមក្អួតឈាម។

ក្នុងមួយរយៈនេះ ពាក្យ «ផ្ការីក» កំពុងត្រូវបានជនក្បត់ជាតិតជំនាន់ សម រង្សុី បង្ហោះស្ទើររាល់ថ្ងៃនៅលើបណ្តាញសង្គម។ «ផ្ការីក» ជាចលនាបដិវត្តន៍ មួយ ត្រូវបានគេប្រើប្រាស់ជោគជ័យតាមបណ្តាប្រទេសមួយចំនួន។ដូច្នេះពាក្យ «ផ្ការីក» ដែល សម រង្សុី បំផុសឡើង ក្នុងចេតនាដ៏អាក្រក់ញុះញង់ឱ្យពលរដ្ឋក្រោកឡើង បំផ្លាញក្តីសុខរបស់ជាតិកម្ពុជា។

«វាយ កូន គោល មើល ផ្ការីក។ ខ្យល់ត្រជាក់ផ្ការីកគ្រប់រដូវធ្វើឱ្យ ការវាយ កាន់ តែ ល្អ» ជាសារដែលបង្ហាញច្បាស់ណាស់ថា សម្តេចតេជោ ហ៊ុន សែន មិន ព្រួយ មិនព្រឺចំពោះការបំផុសចលនាបដិវត្តន៍ដោយជនក្បត់ជាតិ តជំនាន់ នេះ ឡើយ។ ផ្ទុយទៅវិញសម្តេចកំពុងរីករាយ មើលការបំផុសដ៏អាក្រក់របស់ជន ក្បត់ជាតិ ហើយត្រៀមកម្ទេចចោលរាល់ចលនាទាំងឡាយ ដែលចង់បំផ្លាញក្តីសុខរបស់កម្ពុជា។

ជនក្បត់ជាតិ សម រង្សុី បានព្យាយាមប៉ុនប៉ងបំផ្លាញកម្ពុជា តាមរយៈផ្តួល ការ ដឹកនាំរបស់សម្តេចតេជោ បន្តរហូតដល់សម្តេចមហាបវរធិបតី ហ៊ុន ម៉ាណែត ប៉ុន្តែបំណងរបស់គេតែងតែបរាជ័យជាបន្តបន្ទាប់ ក្រោមកណ្តាប់ដៃដែករបស់សម្តេចតេជោ និងបន្តដោយសម្តេចធិបតី។ ជាពិសេសពលរដ្ឋជឿជាក់ចំពោះការដឹកនាំរបស់រាជរដ្ឋាភិបាលតាំងពីពេលដឹកនាំដោយសម្តេចតេជោ រហូតដល់សម្តេចមហាបវរធិបតី ដែលត្រូវការសុខសន្តិភាព ដើម្បីភាពរីកចម្រើនរបស់កម្ពុជាទៅមុខជាបន្ត។

ក្រៅពីហេតុផលខាងលើ ភាពបរាជ័យធំបំផុតជាបន្តបន្ទាប់របស់ ជនក្បត់ ជាតិ សម រង្សុី ព្រោះតែភាព កំសាកខ្លាចគុករត់ចោលស្រុក ធ្វើឱ្យបាត់បង់ អស់ អ្នកជឿ និងលែងមានអ្នកធ្វើតាម៕SRP

ខេត្តបាត់ដំបង៖លោកសុខ លូ អភិបាលខេត្តបាត់ដំបង នៅនារសៀលថ្ងៃព្រហស្បតិ៍ នេះ

បានអញ្ជើញដឹកនាំក្រុមការងារជំនាញ និងអ្នកពាក់ព័ន្ធផ្សេងទៀត ប្រជុំគណៈកម្មការរៀបចំ សន្តិសុខ សណ្តាប់ធ្នាប់ និង របៀបរៀបរយជុំវិញតំបន់រមណីយដ្ឋានប្រវត្តិសាស្ត្រ ភ្នំសំពៅ។

ការប្រជុំដើម្បីពិភាក្សា ការងាររៀបចំគម្រោងកសាងឡើងវិញ និងកែលម្អបន្ថែមនៅតំបន់រមណីយដ្ឋានប្រវត្តិសាស្រ្តភ្នំសំពៅ ដើម្បីប្រែក្លាយតំបន់នេះ ជាតំបន់ទេសចរណ៍ដ៏មានសក្តានុពល មួយ យ៉ាងពិតប្រាកដក្នុងខេត្តបាត់ដំបង ក្នុងនោះមានគម្រោងកែលម្អហេដ្ឋារចនាសម្ព័ន្ធ ខឿនសួនច្បារ និងរៀបចំសំណង់មិនរៀបរយមួយចំនួនជុំវិញបរិវេណជើងភ្នំសំពៅ ដែលស្ថិតនៅភូមិភ្នំសំពៅកើត ឃុំភ្នំសំពៅ ស្រុកបាណន់ ខេត្តបាត់ដំបង។

គួរបញ្ជាក់ផងដែរថា ក្នុងគម្រោងសាងសង់ កែលម្អនេះគឺមានការសាទរ ពីបងប្អូនប្រជាពលរដ្ឋយ៉ាងច្រើនកុះករក្នុងការឧបត្ថមថវិកាជាហូហែរក្នុងពិធីបុណ្យផ្កាប្រាក់មហាសាមគ្គី កាលពីថ្ងៃទី៧ ខែធ្នូ ឆ្នាំ២០២៤ ដើម្បីប្រមូលបច្ច័យរៀបចំកសាងបង្ហើយព្រះពុទ្ធរូបអង្គធំ និងកសាងខឿនសួនច្បារជើងភ្នំសំពៅ ត្រូវបានផ្តើមបុណ្យ ដោយសម្តេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ និងលោកជំទាវ ញ៉ែម សាខន សខេង រួមនិងលោកជំទាវ ម៉ៅ ម៉ាល័យ កែ គឹមយ៉ាន  ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ កែ សួនសុភី ព្រមទាំងមន្ត្រីរាជការក្រោមឱវាទ ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងលោកជំទាវ យ៉េត ម៉ូលីន ព្រមទាំងមន្ត្រីរាជការក្រោមឱវាទ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងលោកជំទាវ ឯកឧត្តម នាយឧត្តមសេនីយ៍ ស ថេត អគ្គស្នងការ នៃអគ្គស្នងដ្ឋាននគរបាលជាតិ និងលោកជំទាវ ព្រមទាំងមន្ត្រីរាជការក្រោមឱវាទ ឯកឧត្តម អ៊ុយ រី ប្រធានក្រុមប្រឹក្សាខេត្តបាត់ដំបង និងលោកជំទាវ ឯកឧត្តម សុខ លូ អភិបាល នៃគណៈអភិបាលខេត្ត និងលោកជំទាវ ព្រមទាំងឯកឧត្តម លោកជំទាវ សមាជិកក្រុមប្រឹក្សាខេត្ត អភិបាលរងខេត្ត លោក លោកស្រី ប្រធានមន្ទីរ អង្គភាព គណៈអភិបាលក្រុង ស្រុក និងមន្ត្រីរាជការក្នុងខេត្តបាត់ដំបង មហាឧបាសកពុទ្ធសាសនូបត្ថម្ភក៍ តាំង ម៉េងហ៊ុន ព្រមទាំងកូនចៅ លោកជំទាវឧកញ៉ា ឌី ប្រឹម និងឯកឧត្តម សំ តាំងហន ព្រមទាំងកូនចៅ៕SRP

ខេត្តបាត់ដំបង៖លោកកើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបាត់ដំបង បានអញ្ជើញសំណេះសំណាល ជាមួយអាជីវករផ្សារបឹងឈូក ក្រុងបាត់ដំបង ដែលរងគ្រោះដោយអគ្គិភ័យហើយទទួលបានដំណោះស្រាយដ៏ល្អឥតខ្ចោះ ពីសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ពិធីសំណេះសំណាលនៅថ្ងៃសៅរ៍ ទី៧ ខែធ្នូ ឆ្នាំ២០២៤ ដោយមានការចូលរួមពី លោកសុខ លូ អភិបាលខេត្តបាត់ដំបងនិងសហការីផងដែរ។

ថ្លែងក្នុងឱកាសនោះ លោកកើត រិទ្ធ បានពាំនាំនូវការផ្ដាំផ្ញើរសាកសួរសុខទុក្ខពីសំណាក់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងលោកជំទាវបណ្ឌិត ជូនចំពោះអាជីវករផ្សារបឹងឈូកទាំងអស់។

លោកប្រធានក្រុមការងារ ថ្លែងបញ្ជាក់បន្ថែមថា សម្ដេចមហាបវរធិបតី ហ៊ុន ម៉ាណែត បានជំរុញឱ្យក្រុមការងារសាងសង់ពន្លឿនការជួសជុលផ្សារបឹងឈូកឱ្យបានលឿនបំផុតតាមដែលអាចធ្វើទៅបាន។ 

លោកក៏បានថ្លែងនូវការកោតសរសើរចំពោះលោក សុខ លូ ដែលបានខិតខំប្រឹងប្រែងស្វែងរកដំណោះស្រាយជូនអាជីវករផ្សារបឹងឈូក ជាបន្តបន្ទាប់តាមដំណាក់កាល តាំងពីពេលឆេះរហូតដល់ទទួលបានដំណោះស្រាយដ៏ល្អឥតខ្ចោះពីប្រមុខរាជរដ្ឋាភិបាល។

សូមរំលឹកថាលោកសុខ លូ អភិបាលខេត្តបាត់ដំបង បានណែនាំដល់អាជីវករផ្សារបឹងឈូកដែលលក់ដូរជុំវិញផ្សារឆេះកន្លងមក ត្រូវផ្អាកការលក់ដូរមួយរយៈសិនចាប់ពីថ្ងៃទី៧ ខែធ្នូ ឆ្នាំ២០២៤នេះតទៅដើម្បីក្រុមការងារសាងសង់នឹងពន្លឿនការវាយប្លង់សេ និងជញ្ជាំងដែលខូចខាត យកកំទេចកំទីចេញឱ្យបានឆាប់ដើម្បីបងប្អូនអាចចូលលក់ដូរវិញដោយសុវត្ថិភាព៕SRP

សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នៅរសៀលថ្ងៃទី៤ ខែធ្នូ ឆ្នាំ២០២៤ បានជួបពិភាក្សាទ្វេភាគីជាមួយ ឯកឧត្តមបណ្ឌិត សនសៃ ស៊ីផាន់ដន នាយករដ្ឋមន្ត្រីនៃសាធារណរដ្ឋប្រជាធិបតេយ្យប្រជាមានិតឡាវ នៅវិមានសន្តិភាព។

ក្នុងឱកាសនៃជំនួប សម្ដេចបវរធិបតីបានសម្ដែងនូវការស្វាគមន៍យ៉ាងកក់ក្ដៅចំពោះ ឯកឧត្តមនាយករដ្ឋមន្ត្រី និងគណៈប្រតិភូដែលបានមកបំពេញទស្សនកិច្ចផ្លូវការរយៈពេលពីរថ្ងៃ នៅកម្ពុជា ព្រមទាំងបានអបអរសាទរចំពោះជោគជ័យរបស់ឡាវ ក្នុងនាមជាប្រធានអាស៊ាន ឆ្នាំ២០២៤។ សម្ដេចបវរធិបតីបានបង្ហាញនូវជំនឿជឿជាក់ថា តាមរយៈដំណើរទស្សនកិច្ចផ្លូវការនេះ ចំណងមិត្តភាពកម្ពុជា-ឡាវ នឹងកាន់តែត្រូវបានពូនជ្រុំកាន់រឹងមាំបន្ថែមទៀត។

ឯកឧត្តមនាយករដ្ឋមន្ត្រីឡាវ បានថ្លែងអំណរគុណយ៉ាងជ្រាលជ្រៅជូនរាជរដ្ឋាភិបាល​ និង​ប្រជាជនកម្ពុជា​ ចំពោះការទទួលបដិសណ្ឋារកិច្ចស្វាគមន៍យ៉ាងកក់ក្ដៅជូនចំពោះឯកឧត្តម និងគណៈប្រតិភូ។ ការណ៍នេះបាន​បង្ហាញពីមិត្តភាព​ដ៏ស្និទ្ធស្នាល និងទំនាក់ទំនងជាប្រពៃណីរវាង​ប្រទេស​ និង​ប្រជាជនទាំងពីរ។ ឯកឧត្តមនាយករដ្ឋមន្ត្រី បាន​អបអរសាទរ​ និងកោតសរសេីរកម្ពុជា ដែលរក្សាបាននូវសុខសន្ដិភាព ស្ថិរភាព និងកំណើនសេដ្ឋកិច្ច សម្រេចបានយ៉ាងឆាប់រហ័សនូវការអភិវឌ្ឍសង្គម-សេដ្ឋកិច្ចកម្ពុជា និងបោះជំហានទៅមុខប្រកបដោយភាពស្វាហាប់ ក្រោមការដឹកនាំប្រកបដោយភាពឈ្លាសវៃរបស់សម្ដេចបវរធិបតី។ ទាំងនេះពិតជាបានរួមចំណែកដល់ការលើកកម្ពស់ជីវភាពរបស់ប្រជាពលរដ្ឋកម្ពុជាឱ្យកាន់តែប្រសេីរឡេីង។

ថ្នាក់ដឹកនាំទាំងពីរបានសម្ដែងនូវការពេញចិត្តយ៉ាងខ្លាំង​ ចំពោះវឌ្ឍនភាពនៃទំនាក់ទំនងជាប្រពៃណី ជាអ្នកជិតខាងល្អ និងកិច្ចសហប្រតិបត្តិការក្នុងភាពជាដៃគូយុទ្ធសាស្ត្រគ្រប់ជ្រុងជ្រោយ និងយូរអង្វែង រវាងប្រទេសទាំងពីរ ។ ថ្នាក់ដឹកនាំទាំងពីរក៏បានលើកទឹកចិត្តឱ្យក្រសួង ស្ថាប័ននៃប្រទេសទាំងពីរបន្តជំរុញការពង្រឹងកិច្ចសហប្រតិបត្តិការឱ្យកាន់តែរឹងមាំ និងជិតស្និទថែមទៀត និងគាំទ្រឱ្យមានការផ្លាស់ប្ដូរដំណើរទស្សនកិច្ចរវាងគណៈប្រតិភូនៅគ្រប់កម្រិត រួមទាំងយុវជន និងយុវជនផងដែរ។

ថ្នាក់ដឹកនាំទាំងពីរបានឯកភាពបន្តពង្រឹង និងពង្រីកកិច្ចសហប្រតិបត្តិការលើវិស័យសំខាន់ៗរួមមានជាអាទិ៍៖ វិស័យនយោបាយនិងការទូត សេដ្ឋកិច្ច​ ពាណិជ្ជកម្ម​ វិនិយោគ​ និងហិរញ្ញវត្ថុ​ សន្ដិសុខនិងការពារជាតិ ថាមពល​ ការដឹកជញ្ជូននិងការតភ្ជាប់ហេដ្ឋារចនាសម្ព័ន្ធ​ អប់រំ​ ទេសចរណ៍​ និង​វប្បធម៌ ព្រមទាំងកិច្ចសហការក្នុងក្របខ័ណ្ឌតំបន់ និងអន្តរជាតិ  ។

ឆ្លៀតក្នុងឱកាសនោះ ថ្នាក់ដឹកនាំនៃប្រទេសទាំងពីរក៏បានអញ្ជើញធ្វើជាអធិបតី​ ក្នុងពិធីចុះហត្ថលេខាលើ(១) កិច្ចព្រមព្រៀងស្ដីពី ការលុបបំបាត់ការយកពន្ធត្រួតគ្នា ពាក់ព័ន្ធនឹងពន្ធលើប្រាក់ចំណូល និងការបង្ការការគេចវេះពន្ធ និងការចៀសវាងពន្ធ, (២) អនុស្សរណៈនៃការយោគយល់គ្នាស្ដីពី កិច្ចសហប្រតិបត្តិការលើវិស័យកសិកម្ម និង (៣) អនុស្សរណៈនៃការយោគយល់គ្នាស្ដីពី កិច្ចហប្រតិបត្តិការលើវិស័យវប្បធម៌ និងសិល្បៈ៕SRP

ក្រុមហ៊ុនទឹកពិសា ហាយ ធិច បានបង្កើតយុទ្ធនាការសប្បុរសធម៌ ដើម្បីកុមារកម្ពុជា និងចូលរួមលើកកំពស់វិស័យសុខាភិបាល នៅកម្ពុជា ដោយធ្វើការសហការជាមួយផ្សារទំនើបម៉ាក្រូ។

កម្មវិធីនេះ និងប្រព្រឹត្តធ្វើឡើងរយៈពេល៣ខែ ចាប់ពីថ្ងៃទី២ ខែធ្នូ ឆ្នាំ២០២៤ រហូតដល់ថ្ងៃទី២៨ ខែកុម្ភៈ ឆ្នាំ២០២៥ ដោយលោកអ្នក គ្រាន់តែធ្វើការបញ្ជាទិញទឹកពិសា ហាយ ធិច ចំណុះណាក៏បាន ពីផ្សារទំនើបម៉ាក្រូ នៅគ្រប់សាខាណា ដែលនៅជិតលោកអ្នកបំផុត ដូចជា ផ្សារទំនើបម៉ាក្រូសៀមរាប ផ្សារទំនើប ម៉ាក្រូជ្រោយចង្វា និងផ្សារទំនើបម៉ាក្រូសែនសុខ។

នៅបំណាច់ខែកុម្ភៈ ឆ្នាំ២០២៥ រាល់ការជាវទឹក ពិសា ហាយ ធិច របស់លោកអ្នក ពីផ្សារទំនើបម៉ាក្រូ ក្រុមហ៊ុននឹងធ្វើការបរិច្ចាគទឹកប្រាក់ ចំនួន៥% ទៅកាន់មន្ទីរពេទ្យកុមារ គន្ធបុប្ផាសៀមរាប។ អ្វីដែលកាន់តែពិសេសសម្រាប់អតិថិជន របស់ផ្សារទំនើបម៉ាក្រូ ក្រុមហ៊ុនទឹកពិសា ហាយ ធិច ក៏មានកាដូ លើកទឹកចិត្ត ជូនផងដែរ ដល់ អតិថិជន ដែលមានតម្រូវការច្រើន ដោយគ្រាន់តែជាវទឹក បរិសុទ្ធ ហាយ ធិច ចំនួន ១០កេស នឹងទទួលបានតុក្កតា Labubu ជាវត្ថុអនុស្សាវរីយ៍ ដ៏ស្រស់ស្អាតមួយភ្លាមៗ។ ដូចនេះសូមបងប្អូនទាំងអស់គ្នាចូលរួម ដើម្បីគាំពារនិងគាំទ្រ យុទ្ធនាការដើម្បីកុមារកម្ពុជា។

នៅថ្ងៃទី ២៩ និង ៣០ ខែ វិច្ឆិកា ឆ្នាំ ២០២៤ ទឹកពិសា ហាយ ធិច បានឧបត្ថម្ភជូននូវទឹកបរិសុទ្ធ ចំនួន ៦៤០កេស ក្នុងនោះផ្តល់ជូនមន្ទីរពេទ្យកុមារគន្ធបុប្ផាសៀមរាប ចំនួន២០០កេស មន្ទីរពេទ្យកុមារអង្គរ ចំនួន២០០កេស និងបានផ្តល់ជូនចំនួន ២៤០ កេស បន្ថែមទៀតផងដែរ សម្រាប់ចែកជូនដល់ប្រជាពលរដ្ឋយើងដែលនាំបុត្រធីតា មកព្យាបាលជំងឺនៅមន្ទីរពេទ្យ។

ទឹកពិសា ហាយ ធិច ដើម្បីសុខភាពរបស់យើង ទឹកពិសា ហាយ ធិច ចូលរួមដើម្បីកុមារកម្ពុជា!

ទឹកពិសា ហាយ ធិច ជាទឹកពិសា ដែលមានគុណភាពខ្ពស់ ត្រូវបានផលិត ចេញតាមស្តង់ដា បច្ចេកវិទ្យាអន្តរជាតិ (ISO 9001:2015) (ISO22000:2018) ដោយច្រោះសម្អាត និងសម្លាប់មេរោគ ដោយប្រព័ន្ធ SMART MICRO FILTER ជាបច្ចេកវិទ្យាចុងក្រោយរបស់សហរដ្ឋអាមេរិក និងអាល្លឺម៉ង់។ ទឹកពិសាហាយ-ធិច ទទួលបានពានរង្វាន់ មេដាយមាសចំនួន ៣គ្រឿង រួមគ្នា ពីស្ថាប័នពិភពលោក Monde Selection ដែលជា World Selection of Water and Soft Drink 2024 នេះជាមោទកភាពដ៏អស្ចារ្យរបស់កូនខ្មែរយើង។

ទឹកពិសាហាយ-ធិច តែងតែយកចិត្តទុកដាក់ លើកត្តាគុណភាព និងសុវត្ថិភាព ផលិតផលជាចម្បង និងធ្វើ ការអភិវឌ្ឍដោយឥតឈប់ឈរតាំងពីឆ្នាំ២០០១ ដែលបានបង្កើតឡើងជាង 2ទសវត្សន៍មកហើយ៕SR

ភ្នំពេញ៖អង្គភាពប្រឆាំងអំពើពុករលួយ នៅព្រឹកថ្ងៃទី២៩ ខែវិច្ឆិកា ឆ្នាំ២០២៤នេះ បានចាប់ខ្លួនស្រ្តី២នាក់ ដែលពាក់ព័ន្ធនឹងករណីយកលុយប្រមាណ៣០ម៉ឺនដុល្លារទៅឱ្យលោក មួង ឃីម និងលោក លី សាម៉េត ហៅគ្រូមា ដើម្បីរត់ការក្លាយជាមន្រ្តីគយនៅខេត្តបាត់ដំបង។

ស្ត្រី២នាក់នោះ រួមមាន៖ លោកស្រី ឆាយ​ សុវណ្ណារី​ និងលោកស្រី ហ៊ើងទិត្យរាត្រីល័ក្ខណ៍​ ដែលជាអ្នកនាំយកលុយចរចាជាមួយលោក មួង​ ឃីម និងលោក លី សាម៉េត។

លោក សយ ច័ន្ទវិចិត្រ អ្នកនាំពាក្យអង្គភាពប្រឆាំងអំពើពុករលួយ (ACU)  បានឲ្យដឹងថា ACU បានឃាត់ខ្លួនស្ត្រី២នាក់ ដែលពួកគាត់បានឃុបឃិតគ្នាយកលុយ៣០ម៉ឺនដុល្លារ ទៅលោក មួង ឃីម និងលោក លី សាម៉េត ដើម្បីរត់ការឲ្យកូនចូលជាមន្រ្តីគយ ទៅតុលាការនៅព្រឹកថ្ងៃ២៩ វិច្ឆិកានេះ។

សូមបញ្ជាក់ថា កាលពីថ្ងៃ១៨ វិច្ឆិកាតំណាងអយ្យការ សាលាដំបូងរាជធានីភ្នំពេញ បានសម្រេចចោទ​ប្រកាន់​លើមនុស្សចំនួន ៤នាក់ រួមមាន ៖ លោក លី សាម៉េត ហៅគ្រូមា , លោក មួង ឃីម , លោក ដួង តារា និងលោក​ អ៊ុត ធី ពីបទជំនួញ ​ឥទ្ធិពល សកម្ម ជំនួញឥទ្ធិពលអកម្ម និងសមគំនិតក្នុងបទជំនួញឥទ្ធិ​ពលអកម្មនៃច្បាប់ ស្តីពីការប្រឆាំងអំពើពុករលួយ៕SRP

ខេត្តកំពង់ស្ពឺ៖ពិតជាមិនធម្មតាដូចពាក្យមួយតែងនិយាយថាសេះងាប់ហើយអាចធ្វើឲ្យរស់ឡើងវិញបាន។។

លោក តូច ប៉ូលីវ៉ា អភិបាលរងខេត្តកំពង់ស្ពឺ បានប្រតិកម្មខ្លាំងៗ លើម្ចាស់អាជីវកម្មល្បែងអនឡាញដ៏ធំមួយកន្លែង ដែលនៅតែបើកលេងលើទីតាំងចាស់ផ្គើននិងអាជ្ញាធរ ក្រោយដោះលែងមកវិញ ដែលការប្រតិកម្មខ្លាំងនេះ ក្រោយមានការសាកសួរពីអ្នកព័ត៌មានកាលពីថ្ងៃទី២៧ ខែវិច្ឆិកា ឆ្នាំ២០២៤។

លោក តូច ប៉ូលីវ៉ា បានលើកឡើងថា ទីតាំងបើកលេងល្បែងអនឡាញនេះគឺពិតជាមិនឱ្យតំលៃអាជ្ញាធរខេត្តនោះទេ ដូច្នេះលោកនិងឆ្លងយោបល់អភិបាលខេត្តថាគួរយ៉ាងម៉េចរឿងនិង ព្រោះទីតាំងនេះលោកធ្លាប់ដឹកនាំបង្ក្រាបរួចម្តងមកហើយ បើបង្ក្រាបម្តងនេះទៀតវា២ដងហើយ។

សូមបញ្ជាក់ថា ទីតាំងល្បែងអនឡាញដ៏ធំមួយកន្លែងនេះស្ថិតនៅក្រោយទីបញ្ជាទីបញ្ជាការអាវុធហត្ថខេត្ត ក្បែរផ្សារកំពង់ស្ពឺ ក្នុងភូមិពាណិជ្ជកម្ម សង្កាត់ស្វាយក្រវ៉ាន់ កណ្តាលទីប្រជុំជនក្រុងច្បារមន។ ទីតាំងនេះធ្លាប់ត្រូវបានកម្លាំងកងរាជអាវុធហត្ថខេត្តបង្រ្កាបម្តងរួចមកហើយ ដោយមានការឃាត់ខ្លួនមនុស្សនិងរឹបអូសឧបករណ៍ល្បែង តែការណ៍នេះបានត្រឹមតែមួយដង្ហើមចង្រឹតប៉ុណ្ណោះក៏បានដោះលែងទៅវិញ ដោយមិនបានបញ្ជូនទៅកាន់សាលាដំបូងនោះទេ ហើយករណីនេះឮថាមានការអន្តរាគមន៍ពីថ្នាក់លើ តែមិនដឹងថ្នាក់លើត្រឹមណានោះទេ។ហើយក្រោយដោះលែង អាជីវកម្មអនឡាញនេះក៏បានបើកលេងឡើងវិញលើទីតាំងដដែល២៤ម៉ោង លើ២៤ម៉ោង ដោយបិទបាំងវាំងនននិងមានអង្គុយយាមទ្វារយ៉ាងម៉ត់ចត់បំផុតនិងមានអ្នកចូលលេងមិនចេះដាច់។

ពាក់ព័ន្ធនិងករណីបើកលេងឡើងវិញនេះ លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺនិងជាម្ចាស់ករណីមិនមានការឆ្លើយតបទេ រីឯលោកឧត្តមសេនីយ៍ទោ ឃឹម សុកខៃ បានអះអាងថាចាំឱ្យអធិការក្រុងច្បារមនចុះទៅមើល។ ចំណែកលោក ទឹម ផានូ អភិបាលក្រុងច្បារមនថាចាំចុះទៅឆែកមើលព្រោះលោកអត់ដែលបានទៅតាមផ្លូវហ្នឹង។

ជុំវិញការបើកអាជីវកម្មអនឡានដ៏ធំនេះ មហាជនបានធ្វើការរិះគន់ចំៗថា ឱ្យគេខ្លាចអាជ្ញាធរយ៉ាងម៉េច បើបង្ក្រាបបានហើយដោះលែងទៅវិញត្រឹមតែមួយដង្ហើមចង្រឹត សូម្បីតែឧបករណ៍ល្បែងក៏ប្រគល់ឱ្យគ្មានសល់ មិនបញ្ជូនទៅតុលាការ ខុសពីការបង្ក្រាបអ្នកលេង បៀរ អាប៉ោងតាមភូមិដែលលេងត្រឹមតែ១០០០ ទៅ២០០០រៀល គឺចាប់ហើយបញ្ជូនមកតុលាការអនុវត្តទោសរាប់ខែ ហើយខ្លះរត់ការដោះលែងអស់រាប់ពាន់ដុល្លាដើម្បីមានសេរីភាពឡើងវិញ។

អ្នកវិភាគថានេះជាស្តង់ដារច្បាប់ពីរខុសគ្នា ដែលអ្នកច្បាប់បានអនុវត្តមកលើប្រជាពលរដ្ឋ គេថាគួរតែអនុវត្តឱ្យដូចគ្នាដើម្បីឱ្យមានតម្លាភាពជៀសវាងអ្នកមានលុយមិនខ្លាចអាជ្ញាធរ ដោយដឹងថាលុយអាចសម្រាលសភាពការណ៍និងអាចដោះដូរជាមួយសិរីភាពបាន៕SRP

អង្គភាពប្រឆាំងអំពើពុករលួយបានរកឃើញអ្នកកាន់កាប់ដីព្រៃលិចទឹកខុសច្បាប់ជុំវិញបឹងទន្លេសាប ខេត្តកំពង់ធំ ចំនួន១៧៦នាក់។

ក្រុមប្រឹក្សាជាតិប្រឆាំងអំពើពុករលួយ (ក.ជ.ប.ព) នៅរសៀលថ្ងៃព្រហស្បតិ៍ថ្ងៃទី២៨ ខែវិច្ឆិកា ឆ្នាំ២០២៤ បានបើកកិច្ចប្រជុំ លើកទី៤១ អាណត្តិទី៣ ក្រោមអធិបតីភាពដ៏ខ្ពង់ខ្ពស់ ឯកឧត្តម តុប សំ , សម្តេចកិត្តិសង្គហបណ្ឌិត ម៉ែន សំអន ប្រធាន-អនុប្រធាន ក.ជ.ប.ព ដើម្បើពិនិត្យ និងអនុម័តកំណត់ហេតុកិច្ចប្រជុំ ក.ជ.ប.ព លើកទី៤០ អាណត្តិទី៣ , ស្តាប់របាយការណ៍របស់ អង្គភាពប្រឆាំងអំពើពុករលួយ (អ.ប.ព) និងបញ្ហាផ្សេងៗ។

បើតាមសេចក្តីជូនរបស់អង្គភាពប្រឆាំងអំពើពុករលួយ(អ.ប.ព) ក្រៅពីកិច្ចការប្រកាសទ្រព្យសម្បត្តិ និងបំណុល, ការងារពាក្យបណ្តឹង, ការងារអប់រំ, ការងារបណ្តុះបណ្តាល, ការងារបង្ការ និងទប់ស្កាត់អំពើពុករលួយ គឺមានករណីដីធ្លីរបស់អ្នកវិនិយោគធំៗ នៅតំបន់សេដ្ឋកិច្ចពិសេស(SSEZ) បញ្ហារាំរ៉ៃ នៃបន្តឹងដដែលៗដែលនៅមិនព្រមរលត់ , ករណីដីក្រុមហ៊ុនវិនិយោគព្រលានយន្តហោះសៀមរាប។

សេចក្តីជូនដំណឹងបានឲ្យដឹងទៀតថា អ.ប.ព កំពុង​ពិនិត្យ​ញ្ហា​ដី​ព្រៃ​លិច​ទឹក ជុំវិញ​បឹង​ទន្លេសាប តំបន់៣ តំបន់២ ខេត្តកំពង់ធំ ដែល​អង្គភាព​រក​ឃើញ អ្អ្នកកាន់កាប់ដីធំ​ៗខុសច្បាប់ ចំនួន ១៧៦​នាក់ (​សរុប​ដី​កាន់កាប់​ខុសច្បាប់ ក្នុង​នោះ​មាន ១៥២​នាក់ ស្ម័គ្រចិត្ត​ប្រគល់​ដី​ជូន​រដ្ឋ​វិញ ៣០,១០៩​ហិ​កតា​) ហើយ​ ២៤​នាក់ (​កាន់កាប់​ខុសច្បាប់ ៩,៤៦៣​ហិ​កតា អ្នកខ្លះ​កាន់កាប់​រហូត​ដល់ ២,៥០០​ហិ​កតា​) ប្រកែក​មិន​ប្រគល់​ដី​ជូន​រដ្ឋ​វិញ​។ ករណី​រំលោភ​អំណាច​ក្នុង​ការងារ​លទ្ធកម្ម កិបកេង​ប្រាក់​ជាង ១​ពាន់​លាន​រៀល ពី​គម្រោង​អភិវឌ្ឍន៍ តាម​ឃុំ​ភូមិ​របស់​ឈ្មោះ ហេង វុ​ទ្ធី នាយក​ទីចាត់ការ​ផែនការ និង​វិនិយោគ​សាលាខេត្ត​តាកែវ និង​បក្ខពួក ២​នាក់​ទៀត ។

អ.ប.ព បាន​និង​គំ​ពុង​ពិនិត្យ​ករណី​ជំនួញ​ឥទ្ធិពល​នៅ​ខេត្តកំពង់ឆ្នាំង (​ដោះ​ដូរដីពន្ធនាគារ​ចាស់ សាងសង់​ពន្ធនាគារ​ថ្មី​) ដែល​ឧកញ៉ា អ៊ុត ធី ចំណាយ​ទុន ១.៩​លាន​ដុល្លារ​អា​មេ​រិ​ក ចូល​ហ៊ុន​បន្ថែម​ក្នុង​ក្រុមហ៊ុន អា​ស្នា រិ​ទ្ធ ហើយ​ចំណាយ​ប្រាក់ ៥០​ម៉ឺន​ដុល្លារ​ទៀតឲ្យ​ មួ​ង ឃឹម​, ដួង តារា​, លី សា​ម៉េ​ត ប្រើ​ឥទ្ធិពល​មក​លើ​រដ្ឋបាល​ខេត្តកំពង់ឆ្នាំង យល់ព្រម​តាម​ដំណោះស្រាយ​របស់ ដួង តារា​។

ករណី​ប៉ុនប៉ង​សូកប៉ាន់​ប្រព្រឹត្តដោយ​ឈ្មោះ កន សុខកាយ ចំណាយ​ប្រាក់ ៣០​ម៉ឺន​ដុល្លារ ឲ្យ​មក​ដួង តារា​, ឡា​ច សំរោង​, លី សា​ម៉េ​ត ដើម្បី​ឲ្យ​រូប​ខ្លួន​ទទួល​បានការ​តែងតាំង​ជា​អភិបាលក្រុង​អរិយ​ក្សត្រ (​ប្រគល់​លើក​ទី​១ ចំនួន​១៥​ម៉ឺន ប្រគល់​លើក​ទី​២ ចំនួន​១៥​ម៉ឺន ដួង តារា​, ឡា​ច សំរោង ប្រាប់ លី សា​ម៉េ​ត ជា​ទឹកប្រាក់ កន សុខកាយ ជូន​ដើម្បី​ឲ្យ​បានជា​អភិបាលក្រុង​អរិយ​ក្សត្រ មាន​តែ ១២​ម៉ឺន​ដុល្លារ​)។
ជាមួយ​គ្នា​នោះ​ដែរ អង្គភាព​ប្រឆាំង​អំពើ​ពុក​រលួយ ក៏​បាន​កំពុង​ពិនិត្យករណីប៉ុនប៉ង សូកប៉ាន់​ប្រព្រឹត្តិ​ដោយ​អភិបាលរង​ខេត្តពោធិ៍សាត់ ឡាយ វិសិដ្ឋ (​ចំណាយ ប្រាក់ ៥៧​ម៉ឺន​ដុល្លារ​) ទៅ ឡា​ច សំរោង និង លី សា​ម៉េ​ត , ករណី​ប៉ុនប៉ង​សូកប៉ាន់​ប្រព្រឹត្ត ដោយ មួ​ង ឃឹម និង​បក្ខពួក​ឲ្យ​យុវជន​ម្នាក់​ទើប​ជាប់​បរិញ្ញាបត្រ ឲ្យ​បាន​ចូល​ក្រប​ខណ្ឌ​គយ ហើយ​ឲ្យ​បាន​ធ្វើ​គយ​នៅ​ខេត្តបាត់ដំបង ជា​ថ្នូរនឹង​ប្រាក់​៣០​ម៉ឺន​ដុល្លារ​អា​មេ​រិ​ក​)៕SRP

ខេត្តកំពង់ធំ៖មន្ត្រីប៉ូលិសមួយរូបត្រូវបានបុរសម្នាក់កាប់បណ្តាលឲ្យស្លាប់ភ្លាមៗបន្ទាប់ពីមានជម្លោះពាក្យសម្តីគ្នា។

ហេតុការណ៍នៅម៉ោង ប្រមាណ១០និង៤០នាទីយប់ ថ្ងៃទី ២៧ ខែវិច្ឆិកា ឆ្នាំ២០២៤ នៅចំណុចទួលភ្នៀត ភូមិកំពង់ក្តី ឃុំកំពង់ចិនត្បូង ស្រុកស្ទោង។

សមត្ថកិច្ចបានប្រាប់ថាអំពើឃាតកម្មយ៉ាងព្រៃផ្សៃនេះបង្កដោយជនសង្ស័យ ឈ្មោះ ផន ប៊ុនរិត ភេទប្រុស អាយុ ៣៤ឆ្នាំ ដែលរស់នៅភូមិ/ឃុំកើតហេតុខាងលើ។ ក្រោយបានធ្វើសកម្មភាពរួចជនសង្ស័យបានរត់គេចខ្លួនបាត់ស្រមោល។ ដោយឡែកជនរងគ្រោះ ឈ្មោះម៉េង សេងទ្រី ភេទប្រុស អាយុ៣៧ឆ្នាំ (ជាមន្ត្រីនគរបាល) រស់នៅភូមិឃុំជាមួយជនសង្ស័យ បានស្លាប់នៅកន្លែងកើតហេតុតែម្ដង។

ប្រភពដដែលឲ្យដឹងថា មុនកើតហេតុ ជនរងគ្រោះ បានជិះម៉ូតូមកដល់ចំណុចមុខផ្ទះរបស់ វ៉ាន់ សុជាតិ ភេទស្រី ខណៈជនសង្ស័យកំពុងអង្គុយផឹកស្រាម្នាក់ឯង ពេលជនរងគ្រោះ ចុះពីម៉ូតូមកអង្គុយក្បែរជនសង្ស័យ មានការទាស់ទែងពាក្យសម្តី ជាមួយគ្នា ភ្លាមនោះ រត់ទៅយកផ្គាក់ពីផ្ទះរបស់ខ្លួន មកកាប់ប្រហាជនរងគ្រោះ បណ្តាលឱ្យស្លាប់នៅនឹងកន្លែងតែម្តង។

សមត្ថកិច្ចកំពុងសហការស្រាវជ្រាវបន្តស្វែងរកជនសង្ស័យ ដើម្បីនាំមកផ្តន្ទាទោសតាមនីតិវិធីច្បាប់៕SRP

ខេត្តតាកែវ៖រឿងអាស្រូវរបស់លោក លីវ សំណាង ប្រធានមន្ទីរអភិវឌ្ឍន៍ជនបទខេត្តតាកែវ ត្រូវបានបែកធ្លាយជាសាធារណៈ។ នេះបើតាមសារព័ត៌មានក្នុងស្រុកបានចេញផ្សាយនៅថ្ងៃព្រហស្បតិ៍នេះ។

តាមរយៈសារព័ត៌មានបានចុះផ្សាយថា លោកលីវ សំណាង ប្រធានមន្ទីរអភិវឌ្ឍន៍ជនបទខេត្តតាកែវ មានគ្រឿងចាក់សម្រាប់ប្រតិបត្តិការ ការងាររកស៊ីនៅក្នុងខេត្ត ក៏ដូចជានៅក្នុងមន្ទីរអភិវឌ្ឍន៍ជនបទនិងបញ្ហាញៀនល្បែងនោះ លោកទទួលស្គាល់វាជារឿងពិត។ ក្នុងនោះគឺញៀនល្បែងក៏ជារឿងពិតនិងបញ្ហាមានគ្រឿងចក្រផ្ទាល់ ខ្លួនដើម្បីធ្វើការងាររបស់រដ្ឋ ដែលមន្ទីរអភិវឌ្ឍន៍ជនបទ ត្រូវការធ្វើក៏ជារឿងពិត។ ករណីបែបនេះគេនៅមិនទាន់ដឹងថា ក្រសួងអភិវឌ្ឍន៍ជនបទ នៅបន្តទុកមនុស្សបែបនេះ ឲ្យនៅធ្វើការបានយូរតទៅទៀតឬយ៉ាងណានោះទេ?

ប្រការនេះនាំឲ្យមន្រ្តីរាជការមួយនិងមហាជនរិះគន់ចំៗទៅលើ លោកលីវ សំណាង ប្រធានមន្ទីអភិវឌ្ឍន៍ជនបទខេត្តតាកែវ ថា ជាបុគ្គលញៀននឹងល្បែងជាពិសេសគឺល្បែងជល់មាន់ មិនថា តាមកាស៊ីណូឬតាមមូលដ្ឋានឡើយ។ ក្រុមមន្ត្រីនៅក្រោមឱវាទនេះមន្ទីរអភិវឌ្ឍន៍ជនបទខេត្តតាកែវ បានចោទសួរទៅថ្នាក់ដឹកនាំក្រសួងថា នៅពេលដែលប្រធានមន្ទីរ ក្លាយជាអ្នកញៀនល្បែង តើគាត់អាចដឹកនាំការងារនៅក្នុងមន្ទីរបានយ៉ាងដូចម្ដេចទៅ? សូម្បីតែមន្ត្រីនៅក្នុងមន្ទីរ ក៏នាំគ្នាគ្រវីក្បាលចំពោះរបៀបរបបនៃការដឹកនាំការងាររបស់លោកលីវ សំណាង ប្រធានមន្ទីរនេះដែរ។

យោងតាមប្រភពបន្តទៀតថា ប្រធានមន្ទីរខាងលើ មិនមានប្រាក់ខែច្រើនអស្ចារ្យនោះទេ តែគាត់មានលុយជាច្រើនសម្រាប់លេងល្បែងរាល់ ចុងសប្តាហ៍ជារៀងរហូតមិនដឹងថា បានលុយមកពីណាយកទៅលេងនោះទេ។ មិនត្រឹមតែលេង ល្បែងនោះទេ លោកប្រធានខាងលើ ក៏មានគ្រឿងចក្រផ្ទាល់ខ្លួន សម្រាប់ដេញថ្លៃតាមគម្រោងនានា ជាពិសេសរាល់គម្រោងធ្វើផ្លូវរបស់មន្ទីអភិវឌ្ឍន៏ជនបទតែម្ដង។ ក៏ប៉ុន្តែ បើតាមមន្ត្រីនៅមន្ទីរអភិវឌ្ឍន៍ជនបទខេត្តតាកែវ និយាយថា បញ្ហាមានលុយលេងល្បែងគឺជារឿងឯកជន របស់លោកប្រធានតែប៉ុណ្ណោះ មិនពាក់ព័ន្ធជាមួយមន្ទីរឡើយ។

ជុំវិញករណីនេះទីភ្នាក់ងារសារព័ត៌មាន សៀមរាប ប៉ុស្តិ៍ នៅពុំទាន់ទទួលបានការបំភ្លឺពីលោកលីវ សំណាង ប្រធានមន្ទីរអភិវឌ្ឍន៍ជនបទខេត្តតាកែវបាននៅឡើយទេរហូតដល់ម៉ោងផ្សាយនេះ។ តែទោះជាយ៉ាងណាលោកបានប្រាប់សារព័ត៌មានដែលបានចេញផ្សាយថា ពាក់ពន្ធ័ករណីខាងលើ លោកពិតជាមានគ្រឿងចក្រផ្ទាល់ខ្លួនពិតមែន គឺជាក្រុមហ៊ុនរបស់លោក ហើយនៅពេលមានគម្រោង ឬមានគេជួល គឺលោកទៅធ្វើឲ្យគេហើយ មិនចាំតែធ្វើគម្រោងរបស់មន្ទីរអភិវឌ្ឍន៍ជនបទនោះទេ។ ចំណែកចំពោះបញ្ហាលេងល្បែងស៊ីសង លោកប្រធានមន្ទីរក៏បានឆ្លើយតបថា ចំពោះរឿងដែរលោកដើរលេងល្បែង វាជារឿងឯកជន របស់លោក ហើយការទៅលេងល្បែងលោកទៅតែថ្ងៃឈប់សម្រាកនោះទេ។

បើតាមប្រភពពីក្រុមមន្រ្តីនៃមន្ទីរអភិវឌ្ឍន៍ជនបទខេត្តតាកែវ សុំមិនបញ្ចេញឈ្មោះបានទម្លាយថា លោកលីវ សំណាង ក៏ធ្លាប់ACUកោះហៅ ទៅបំភ្លឺផងដែរជុំវិញការអនុវត្តការងាររបស់លោកកន្លងមក៕SRP

ខេត្តបន្ទាយមានជ័យ៖មានការលើកឡើងថាទំនិញគ្រប់ប្រភេទ ក្នុងនោះម៉ូតូអត់ពន្ធឬបង់ពន្ធមិនគ្រប់ជាច្រើនបាននាំចូលយ៉ាងគគ្រឹកគគ្រេង តាមច្រកបឹងត្រកួន ដោយមិនមានការទប់ស្កាត់ពីជំនាញគយឡើយ។

នេះបើយោងតាមសេចក្តីរាយការណ៍បានឲ្យដឹងថា ម៉ូតូអត់ពន្ធឬបង់ពន្ធមិនគ្រប់ កំពុងនាំចូលយ៉ាងគគ្រឹកគគ្រេង តាមច្រកបឹងត្រកួន ស្ថិតក្នុងស្រុកថ្មពួក ជារៀងរាល់ថ្ងៃ ក្រោមការត្រួតត្រារបស់មេគយ លោក កែវ សារ៉ាត់។

ប្រភពទៀតបន្ថែមថា ម៉ូតូថៃត្រូវបានដឹកជញ្ជូនដាក់លើរថយន្ត រាប់រយគ្រឿងក្នុងមួយថ្ងៃៗ ឆ្លងកាត់ច្រកព្រំដែនបឹងត្រកួន ដែលគេដឹងថា ម៉ូតូទាំងនោះបង់ពន្ធមិនគ្រប់ ឬមួយចំនួនមិនបង់ពន្ធតែម្ដង។ សកម្មភាពបែបនេះគេសង្កេតឃើញកើតមានជារៀងរាល់ថ្ងៃ ជាពិសេសម៉ូតូស៊េរីទំនើបនិងម៉ូតូធំៗភាគច្រើនគឺមិនបានបង់ពន្ធតែម្តង។ ករណីសង្ស័យថា ប្រសិនបើគ្មានការត្រូវរូវឃុបឃិតពីប្រធានគយ លោក កែវ សារ៉ាត់ នោះទេ ម៉ូតូថៃទាំងនោះ មិនអាចឆ្លងដែនចូលក្នុងទឹកដីខ្មែរបានឡើយ។ ក្រៅពីសេចក្តីរាយការណ៍ រឿងករណីម៉ូតូនាំចូលអត់ពន្ធឬបង់ពន្ធមិនគ្រប់ គេក៏សង្កេតឃើញមានទំនិញខូចគុណភាព នៅតែបន្តនាំចូលតាមច្រកបឹងត្រកួន ជារៀងរាល់ថ្ងៃផងដែរ។

ប្រភពបានបង្ហើបប្រាប់ថា ក្រៅពីទំនិញខូចគុណភាពដែលជាប្រភេទ សាច់បង្កកនិងគ្រឿងក្នុង ជាដើមនោះ ក្រុមឈ្មួញគ្រាក់ៗ នៅតែអាចនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់ តាមច្រកបឹងត្រកួន ជាហូរហែបានក៏ព្រោះតែ សង្ស័យមានការឃុបឃិតបិទភ្នែក ជាមួយក្រុមមន្រ្តីគយចល័តខេត្តបន្ទាយមានជ័យ។ ដោយតាមច្រករបៀង ក្បែរៗ ច្រកទ្វារតំបន់បឹងត្រកួន នៅតែមានឈ្មួញនាំចូលទំនិញខុសច្បាប់ និងទំនិញគេចពន្ធ ដែលគេសង្ស័យថា
មានការបើកភ្លើងខៀវពីលោក កែវ សារ៉ាត់ មេគយច្រកបឹងត្រកួន និងសមត្ថកិច្ចពាក់ព័ន្ធមួយចំនួនថែមទៀត។

ប្រភពបន្តថា ម៉ូតូស៊េរីទំនើបៗ មានដូចជាម៉ាកហុងដាស្កូពី, ម៉ូតូដែលមានស៊ីឡាំងធំ និង honda 125cc ជាប្រភេទម៉ូតូត្រូវប៉ាន់បំផុត នៅក្នុងប្រទេស ដែលពួកឈ្មួញកំពុងនាំចូលតាមច្រកព្រំដែនបឹងត្រកួន ម៉ូតូភាគច្រើន ដែលប្រើប្រាស់ នៅលើបណ្ដាខេត្តភាគខាងលិច រួមទាំងក្រុងភ្នំពេញផងនោះ មិនមានការបង់ពន្ធត្រឹមត្រូវ ក៏ដោយសារតែការនាំចូលតាមច្រកបឹងត្រកួននេះដែរ។

បច្ចុប្បន្នរដ្ឋបាលខេត្តបន្ទាយមានជ័យ ហាក់ដូចជាធ្វើ មិនដឹងមិនឮ ចំពោះបញ្ហា ដែលជាចំណុចអសកម្មកំពុងកើតឡើងនៅច្រកព្រំដែនបឹងត្រកួន។ មូលហេតុទាំងនេះហើយដែលជាកត្តា អាចផ្តល់ឱកាសឲ្យលោក កែវ សារ៉ាត់ អាចបិទភ្នែកឲ្យពួកឈ្មួញនាំចូលម៉ូតូស៊េរីទំនើបៗ និងទំនិញគេចពន្ធនិងបង់ពន្ធមិនគ្រប់ពីប្រទេសថៃបានដោយរលូន។

ទីភ្នាក់ងារសារព័ត៌មាន សៀមរាប ប៉ុស្តី មិនទាន់ទទួលបានការបំភ្លឺពីលោកកែវ សារ៉ាត់ មេគយច្រកបឹងត្រកួន
បាននៅឡើយទេរហូតដល់ម៉ោងផ្សាយនេះដោយមិនមានលេខទូរសព្ទទំនាក់ទំនង៕SRP

ប្រធានមន្ទីរសុរិយោដីចំនួនពីរខេត្តត្រូវបានរដ្ឋាភិបាលសម្រេចដកឲ្យមកបម្រើការងារនៅក្រសួងវិញ។

សម្តេចធិបតី ហ៊ុន ម៉ាណែត នាយករដ្ឋមន្ត្រី ចេញអនុក្រឹត្យសម្រួលភារកិច្ចលោក សំ សារឿន ពី​ប្រធានមន្ទីរ​រៀបចំ​ដែនដី នគរូបនីយកម្ម សំណង់ និងសុរិយាដី ខេត្តព្រះវិហារ និងលោក ដាញ់ សារី ពី​ប្រធានមន្ទីរ​រៀបចំ​ដែនដី នគរូបនីយកម្ម សំណង់ និងសុរិយាដី ខេត្តខេត្តកំពត ឲ្យមក​បម្រើ​ការងារ​នៅទីស្តីការ​ក្រសួងរៀបចំដែនដី នគរូបនីយកម្ម និងសំណង់។

តែងតាំងលោក ព្រាប សុផាត ជា​ប្រធានមន្ទីរ​រៀបចំ​ដែនដី នគរូបនីយកម្ម សំណង់ និងសុរិយាដី ខេត្តខេត្តកំពត ជំនួសលោក ដាញ់ សារី ដែលទទួលភារកិច្ចថ្មី។

តែងតាំងលោក ស សាវ៉េត ជា​ប្រធានមន្ទីរ​រៀបចំ​ដែនដី នគរូបនីយកម្ម សំណង់ និងសុរិយាដី ខេត្តព្រះវិហារ ជំនួសលោក សំ សារឿន ដែលត្រូវទទួលភារកិច្ចថ្មី៕SRP