ខេត្តសៀមរាប៖មន្ត្រីបានថ្លែងនៅរសៀលថ្ងៃនេះថា ករណីជម្លោះពាក្យសម្តីរហូតឈានដល់វាយតប់គ្នា ទៅវិញទៅមករវាងអ្នកលក់លក់នំប៉័ងនិងអ្នកលក់ពេជ្រ នៅក្រុងសៀមរាប សមត្ថកិច្ចនឹងបញ្ជូនសំណុំរឿងទៅដៃតុលាការ។

មន្ត្រីនគរបាលបានថ្លែងប្រាប់អ្នកសារព័ត៌មានថា  ករណីហិង្សាដោយចេតនានេះ ( វ៉ៃគ្នាទៅមក ) រវាងឈ្មោះលាំង តារា ភេទប្រុស អាយុ៥២ឆ្នាំមុខរបរជាម្ចាស់ហាងនំបុ័ងយីហោនាគព័ន្ធ ស្នាក់នៅភូមិកើតហេតុនឹងឈ្មោះឌឿន សារឿន ភេទប្រុស អាយុ២៨ឆ្នាំមុខរបរជាអ្នកគ្រប់គ្រងហាងពេជ្រយីហោ មុន្និន១៦៨ ដោយមានថៅកែឈ្មោះឈិវ មុន្និន ភេទប្រុស អាយុ២៨ឆ្នាំរស់នៅភូមិកើត។

មន្ត្រីបានថ្លែងបញ្ជាក់ថា មូលហេតុបង្កឲ្យមានករណីខាងលើ គឺឈ្មោះឌឿន សារឿន បានឮសម្លេង របស់ឈ្មោះលាំង តារា និយាយដៀមដាមដោយឈ្មោះឌឿន សារឿន ថាការនិយាយខាងលើគឺសំដៅទៅលើថៅកែរបស់ខ្លួន ទើបមានការប្រតាយប្រតប់នឹងគប់គ្នាតែម្តង។ មន្ត្រីបានបញ្ជាក់ថាករណីនេះកម្លាំងនគរបាលរៀបចំសំណុំរឿងបញ្ជូនទៅតុលាការដើម្បីចាត់ការតាមនីតិវិធី។

បើតាមមន្ត្រីបានបញ្ជាក់ថាជុំវិញហេតុការណ៍នេះ សមត្ថកិច្ចហាក់ពិបាកក្នុងការស៊ើបអង្កេតដោយសារខាងថៅកែលក់នំប៉័ង បានមកប្តឹងនៅប៉ុស្តិ៍នគរបាលសង្កាត់ស្វាយដង្គំ។ ចំណែកភាគី ខាងម្ចាស់ហាងលក់ពេជ្របានទៅដាក់ពាក្យបណ្តឹងនៅអាវុធហត្ថខេត្ត។ ដូច្នោះហើយបានជាសមត្ថកិច្ចមានការពិបាកប្រមូលវត្ថុតាង ទើបត្រូវបញ្ជូនទៅតុលាការ ទុកឲ្យអ្នកកាត់ក្ដីតែម្ដង។

សូមបញ្ជាក់ថាហេតុការណ៍ជម្លោះនេះបានកើតឡើងនៅវេលាម៉ោង១២និង១៥នាទីថ្ងៃទី០៨ខែមិថុនាម្សិលមិញនៅចំណុចហាងពេជ្រយីហោ មុន្និន១៦៨ និងហាងនំបុ័ងយីហោនាគព័ន្ធ ស្ថិតនៅភូមិមណ្ឌល២ សង្កាត់ស្វាយដង្គំ ក្រុងសៀមរាប៕SRP

ខេត្តកំពង់ធំ៖លោក ស៊ូ ចាន់ទ្រី អនុប្រធានមន្ទីរសេដ្ឋកិច្ច និងហិរញ្ញវត្ថុខេត្តកំពង់ធំ ត្រូវបានពលរដ្ឋចោទថា យកលុយ៣៣លានរៀល ដើម្បីធានារត់ការ ដោះមនុស្សពីរនាក់ ឲ្យនៅក្រៅឃុំ តែទំនងស៊ីដាច់ ព្រោះមនុស្សទាំង២នាក់នៅក្នុងឃុំដដែល។

ការចោទប្រកាន់នេះដោយពលរដ្ឋប្រាប់អ្នកសារព័ត៌មាន។នេះបើយោងតាមបណ្ដាញសារព័ត៌មានក្នុងស្រុកនៅល្ងាចថ្ងៃទី០៨ខែមិថុនាម្សិលមិញបានចេញផ្សាយដោយដកស្រង់សម្ដីការលើកឡើងរបស់ពលរដ្ឋចំនួនពីរនាក់ដែលតំណាងឲ្យពលរដ្ឋ១២គ្រួសារ។

យោងតាមការចេញផ្សាយរបស់សារព័ត៌មានបានបញ្ជាក់ថាអ្នកស្រី ចុង សៅនី និងអ្នកស្រី បេន យ៉ង់ រស់នៅភូមិរកា សង្កាត់ស្រយ៉ូវ ក្រុងស្ទឹងសែន ខេត្តកំពង់ធំ ជាតំណាងស្របច្បាប់របស់ប្រជាពលរដ្ឋទាំង១២គ្រួសារ បានប្រាប់អ្នកសារព័ត៌មានផ្ទាល់មាត់ថាមានប្រជាពលរដ្ឋទាំង១២គ្រួសារ ជាសាច់ញាតិរបស់ជនជាប់ចោទកំពុងជាប់ឃុំក្នុងពន្ធនាគារ០២នាក់ ដោយថាលោកស៊ូ ចាន់ទ្រី អនុប្រធានមន្ទីរសេដ្ឋកិច្ច និងហិរញ្ញវត្ថុខេត្តកំពង់ធំ បានយកលុយចំនួន៣៣លានរៀល ធានារត់ការដោះជនជាប់ចោទ ទាំងពីរនាក់ទីមួយ០១.ឈ្មោះ ឆាំ ឆាន ភេទប្រុសអាយុ៣៨ឆ្នាំ ទីពីរ០២.ឈ្មោះ ផន សុគា ភេទប្រុសអាយុ៣៤ឆ្នាំឲ្យនៅក្រៅឃុំជាបណ្ដោះអាសន្ន។ តែមិនដូចការសន្យានោះទេ ពេលពលរដ្ឋសួរនាំដំណឹងម្តងៗលោកស៊ូ ចាន់ទ្រី តែងតែឆ្លើយដោះសារថា បើចង់រួចខ្លួនពីគុកត្រូវប្រគល់ដីស្រែដែលកំពុងអាស្រ័យផលនោះឱ្យគេទៅគេដោះលែងហើយ។

ប្រជាពលរដ្ឋបានលើកឡើងទៀតថាមូលហេតុដែលធ្វើឲ្យពួកគាត់រងគ្រោះយ៉ាងអយុត្តិធម៌រហូតមកដល់សព្វថ្ងៃនេះ ដោយ
កាលពីថ្ងៃទី១៣មេសាឆ្នាំ២០២០ មានសមត្ថកិច្ចជាច្រើននាក់ចុះទៅព័ទ្ធចាប់ខ្លួនពលរដ្ឋពីរនាក់ ដែលបច្ចុប្បន្នអ្នកទាំងពីរនាក់កំពុងជាប់ឃុំនៅពន្ធនាគារ ក្នុងចំណោមប្រជាពលរដ្ឋ១២គ្រួសារ ដែលធ្លាប់អាស្រ័យផលលើដីស្រែប្រាំង ក្នុងចំណុចបឹងត្រសែង ភូមិរកា សង្កាត់ស្រយ៉ូវ ក្រុងស្ទឹងសែន ខេត្តកំពង់ធំ ដែលធ្លាប់អាស្រ័យផលស្រូវជាង ១០ឆ្នាំកន្លងមកហើយ។ ការដែលសមត្ថកិច្ចចាប់ខ្លួនជនជាប់ចោទទាំងពីរនាក់ ធ្វើតាមពាក្យបណ្តឹងរបស់ឈ្មោះ ហេង ឃីន អនុប្រធានភូមិរកា និងឈ្មោះ លន់ គឿន ប្រធានសហគមន៍បឹងត្រសែង និងឈ្មោះ ខ្ចៅ សែន ជាមេឈ្មួញដីធ្លី ដោយចោទប្រកាន់ប្រជាពលរដ្ឋទាំងនោះថា ប៉ុនប៉ងសម្លាប់ពួកគេ កំពុងប្រើគ្រឿងចក្រកាយប្រឡាយ។

ប្រជាពលរដ្ឋបញ្ជាក់ថាបន្ទាប់ពីសមត្ថកិច្ចចាប់ខ្លួនប្រជាពលរដ្ឋ២នាក់ ដែលមានឈ្មោះខាងលើយកទៅដាក់ឃុំរួចមក ឈ្មោះ ស៊ូ ចាន់ទ្រី ដែលមានតួនាទីអនុប្រធានមន្ទីរសេដ្ឋកិច្ច និងហិរញ្ញវត្ថុខេត្តកំពង់ធំប្រាប់ពួកគាត់ថា ឲ្យរកលុយឲ្យគាត់ដើម្បីធានាមនុស្សនៅក្រៅឃុំ។ ប្រជាពលរដ្ឋបញ្ជាក់បន្ថែមថានៅថ្ងៃទី១៨មេសាឆ្នាំ២០២០ ឈ្មោះ ស៊ូ ចាន់ទ្រី បានឲ្យនាងខ្ញុំឈ្មោះ បេន យ៉ង់ យកលុយចំនួន៣៣លានរៀល ទៅប្រគល់ឲ្យគាត់ ដើម្បីយកទៅរត់ការ ធានាមនុស្សដែលមានឈ្មោះដូចខាងលើបាននៅក្រៅឃុំជាបណ្ដោះអាសន្ន ។ ក្រោយពីទទួលបានលុយរួចហើយឈ្មោះ ស៊ូ ចាន់ទ្រី គាត់បានសន្យាថា ដើមខែឧសភា មនុស្សទាំងពីរនាក់ ដែលមានឈ្មោះដូចខាងលើនឹងនៅក្រៅឃុំហើយ។ ក៏ប៉ុន្តែការសន្យារបស់ឈ្មោះ ស៊ូ ចាន់ទ្រី មិនបានសម្រេចរហូតមកដល់ថ្ងៃនេះ។ ទើបធ្វើឲ្យប្រជាពលរដ្ឋទាំង១២ គ្រួសារកើតទុក្ខមិនសុខចិត្ត សុំឲ្យប្រព័ន្ធផ្សព្វផ្សាយជួយផ្សាយដំណឹងនេះ ដល់ថ្នាក់ដឹកនាំគ្រប់លំដាប់ថ្នាក់ ដើម្បីជួយផ្តល់យុត្តិធម៌ដល់ពួកគាត់ផង។

ពាក់ព័ន្ធការចោទប្រកាន់របស់ពលរដ្ឋខាងលើនេះបណ្ដាញសារព័ត៌មានសៀមរាបប៉ុស្ដិ៍ នៅមិនទាន់ទទួលបានការបកស្រាយបំភ្លឺពីលោក ស៊ូ ចាន់ទ្រី អនុប្រធានមន្ទីរសេដ្ឋកិច្ចនិងហិរញ្ញវត្ថុខេត្តកំពង់ធំ នៅឡើយទេនាព្រឹកនេះ។

សូមរំលឹកថាមូលហេតុដែលនាំឲ្យប្រជាពលរដ្ឋឃាត់គ្រឿងចក្ររបស់ក្រុមឈ្មួញដីធ្លី កាលគ្រានោះ គឺដោយសារពួកក្រុមឈ្មួញនាំយកគ្រឿងចក្រទៅកាយប្រឡាយហ៊ុំព័ទ្ធយកដីស្រែរបស់ប្រជាពលរដ្ឋទាំង១២គ្រួសារ ធ្លាប់បានអាស្រ័យផលជាង ១០ឆ្នាំមកហើយថា ជាកម្មសិទ្ធិដីធ្លីរបស់ពួកគេទៅវិញ។ មិនតែប៉ុណ្ណោះ ក្រុមឈ្មួញទាំង០៣នាក់ បានប្តឹងធ្វើទុក្ខបុកម្នេញដេញចាប់ប្រជាពលរដ្ឋ ដាក់ពន្ធនាគារ យ៉ាងអយុត្តិធម៌ ផងដែរ។

ទោះយ៉ាងណាជុំវិញការលើកឡើងរបស់ប្រជាពលរដ្ឋនេះ បណ្ដាញសារព័ត៌មានសៀមរាប៉ុស្ដិ៍ មិនទាន់ទទួលបានការបកស្រាយបំភ្លឺពីឈ្មោះ ហេង ឃីន អនុប្រធានភូមិរកា និងឈ្មោះលន់ គឿន ប្រធានសហគមន៍បឹងត្រសែង និងឈ្មោះ ខ្ចៅ សែន នៅឡើយទេ៕SRP

ខេត្តកំពត៖ ប្រជាកសិករកំពុងមមាញឹកប្រមូលផលអំបិល ខណៈរដូវកាលប្រមូលផលជិតបិទបញ្ចប់។ លោក ប៊ុន បារាំង ប្រធានសហគមន៍ផលិតអំបិលខេត្តកំពត បានមានប្រសាសន៍ប្រាប់វិទ្យុជាតិកម្ពុជាឲ្យដឹងថា ការផលិតអំបិលក្នុងឆ្នាំ២០២០នេះ នៅក្នុងខេត្តកំពត មានការកើនឡើងជាងឆ្នាំទៅ ដោយសារតែមានពលកម្មគ្រប់គ្រាន់ ព្រមទាំងអាកាសធាតុក៍អំណោយផលល្អ។

លោក បន្តថា បច្ចុប្បន្ន ប្រជាកសិករកំពុងតែមមាញឹកប្រមូលផល ខណៈរដូវកាលប្រមូលផលជិតបិទបញ្ចប់នៅពាក់កណ្ដាលខែមិថុនានេះហើយ។ ក្នុងនោះដែរ ការផលិតអំបិល អាចទទួលបានផលប្រហែល៨ម៉ឺនតោន លើផ្ទៃដីជាង៤០០០ហិចតា ដែលមានក្រុមផលិតអំបិលចំនួន២០០ក្រុមសាមគ្គី។
លោកបានបញ្ជាក់ថា ឆ្នាំនេះការផលិតអំបិលរបស់ប្រជាកសិករទទួលបានផលល្អ ដូច្នេះគឺអាចគ្រប់គ្រាន់ក្នុងការផ្គត់ផ្គង់ការប្រើប្រាស់ក្នុងស្រុក។

«សព្វថ្ងៃនេះពួកគាត់កំពុងផលិតផលិតមិនទាន់ចប់ ព្រោះមេឃអំណោយផលល្អយើងនៅផលិតបាន ពួកគាត់កំពុងធ្វើសកម្មភាពផលិត រហូតដល់ខែ៦ហើយ មេឃអត់ទាន់មានភ្លៀងធំ មានតិចតួច អញ្ចឹងយើងអាចផលិតបាន ហើយនៅតែបន្តផលិតរហូតដល់សព្វថ្ងៃនេះ»។

សូមបញ្ជាក់ថា កម្ពុជាត្រូវការអំបិលប្រមាណ១០ម៉ឺនតោនសម្រាប់ប្រើប្រាស់ ក្នុងមួយឆ្នាំៗ។ កាលពីឆ្នាំ២០១៩កន្លងទៅ កម្ពុជាបាននាំអំបិលចូលពីបរទេសប្រមាណ ៥ម៉ឺនតោន ដើម្បីបំពេញបន្ថែមតម្រូវការក្នុងស្រុក។

សហគមន៍អ្នកផលិតអំបិលខេត្តកំពត និងខេត្តកែប ត្រូវបានបង្កើតឡើងនៅឆ្នាំ ២០០៤ ដែលចែកចេញជា ៧ មណ្ឌលគឺ មណ្ឌលបឹងទូក មណ្ឌលត្រើយកោះ មណ្ឌលបឹងរូងទី១ មណ្ឌលបឹងរូងទី២ មណ្ឌលសេះស មណ្ឌលកែប និងមណ្ឌលកំពង់ត្រាច ដែលស្ថិតនៅតាមបណ្តោយឆ្នេរសមុទ្រ ផ្ដើមចេញពីឃុំបឹងទូក ស្រុកទឹកឈូ ទៅភូមិលក ឃុំឫស្សីស្រុកខាងលិច ស្រុកកំពង់ត្រាច ខេត្តកំពត ជាប់ព្រំដែនវៀតណាម៕SRP

ខេត្តកំពង់ចាម​​៖​គម្រោងមូលនិធិឃុំ-សង្កាត់ឆ្នាំ២០២០ របស់​គណៈកម្មការ​ជាតិ​សម្រាប់​ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ​ ក្នុង​ការ​ជួសជុល​និង​សាងសង់​ផ្លូវ​នៅ​មូលដ្ឋាន​​ ​ចំនួន០៦គម្រោង ស្មើ​នឹង​៦ឃុំ​ នៅស្រុកបាធាយត្រូវបានដំណើរការដាក់ដេញថ្លៃ នៅព្រឹកមិញនេះ។
ការដាក់ដេញថ្លៃធ្វើនៅសាលា​ស្រុក​បាធាយ​​​​​​ ដោយមានការចូលរួមពី លោកឡី មិច​​ នាយក​រង​រដ្ឋបាលសាលា​ខេត្ត​កំពង់ចាម​ និងលោកទឹម ដា​ណា​ អភិបាល​រង​ស្រុក​​ រួមជាមួយតំណាងក្រុមហ៊ុនអ្នក​ទទួល​ការ​ជា​ច្រើន​រូប​។

គួរ​បញ្ជាក់​ផង​ដែរ​ថា​ គម្រោង​ដែល​បាន​ដាក់​ឲ្យ​ដេញ​ថ្លៃ​ខាង​លើ​នេះ​ គឺមាន​ផ្លូវ​ចំនួន​០៦ខ្សែ​ ដែល​ត្រូវ​ស្ថាបនា​​ ជូន​ប្រជាពលរដ្ឋ​សម្រាប់​ប្រើប្រាស់​ ក្នុង​នោះ​មាន​
១-ឃុំ​សំបូរ​ សាងសង់ផ្លូវបេតុងអាមេ ប្រវែង៣០៥ម៉ែត្រ​ ទទឹង៥ម៉ែត្រ​ នៅភូមិសង្កើប។
២-ឃុំ​ត្រប់​ សាងសង់ផ្លូវបេតុងអាមេ ប្រវែង៣១២ម ទទឹង៤ម នៅភូមិរោធិ៍។ ​
៣-ឃុំ​ផ្អាវ​ សាងសង់ផ្លូវបេតុងអាមេ ប្រវែង២៩៥ម ទទឹង៤ម នៅភូមិបាកាស ភូមិផ្អាវ។
៤-ឃុំ​មេព្រីង​ សាងសង់ផ្លូវបេតុងអាមេ ប្រវែង២៧៤ម ទទឹង៤ម នៅភូមិតាំងរលៀង និងភូមិតាំងថ្លើង។
៥-ឃុំសណ្តែក​ សាងសង់ផ្លូវបេតុងអាមេ ប្រវែង២៣៣ម ទទឹង៥ម នៅភូមិកំប៉ាល់ ភូមិស្រឹង្គ។
និង​៦-​​ឃុំ​តាំង​ក្រសាំង​ ជួសជុលផ្លូវដីក្រាលថ្មភ្នំ ប្រវែង២.៩៤៧គ.ម​ ទទឹង៤ម និងសាងសង់លូទោល មុខកាត់៦ម ប្រវែង៦ម នៅភូមិជីនាង ភូមិខ្វិត-ភូមិស្តុកធំ។
ក្នុង​ពិធី​នោះ​ ​ប្រធាន​គណៈ​កម្មាការ​ម្ចាស់​លទ្ធកម្ម​ទាំង​០៦ឃុំ បាន​ធ្វើការ​ប្រកាស​ទទួល​យក​ទាំង​​០៦គម្រោង​ ព្រមទាំង​បាន​ធ្វើការ​ផ្តាំផ្ញើរ​ដល់​ក្រុមហ៊ុន​​អ្នក​ទទួល​ការ​ទាំង​អស់​ ត្រូវ​​​អនុវត្តន៍​ការងារ​សាងសង់​ផ្លូវ​ ឲ្យ​មាន​គុណភាពល្អ​ ​និង​ត្រូវ​តាម​ស្តង់ដារ​ ​លក្ខណៈ​បច្ចេកទេស​​​ ប្រយោជន៍​ដល់​ការ​ប្រើប្រាស់​​ផងដែរ​៕SRP

ខេត្តសៀមរាប៖បុរសម្នាក់បានដេកស្លាប់បង្កឲ្យមានការភ្ញាក់ផ្អើល។

ហេតុការណ៍បានកើតឡើងវេលាម៉ោង០៧និង៣០នាទីថ្ងៃទី០៩ខែមិថុនា ឆ្នាំ២០២០នេះ នៅចំណុចភូមិតាច្រនៀង ឃុំកំពង់ឃ្លាំង ស្រុកសូទ្រនិគម ខេត្តសៀមរាប។

សមត្ថកិច្ចបានឲ្យដឹងថាជនរងគ្រោះឈ្មោះឆាយ ឈុន ភេទប្រុស អាយុ៦៣ឆ្នាំ រស់នៅភូមិ ឃុំកើតហេតុខាងលើ។
សមត្ថកិច្ចបានបញ្ជាក់ថាករណីដេកស្លាប់ នេះមូលហេតុ បណ្ដាលមកពីខ្យល់គរ។ តាមការពិនិត្យ ធ្វើកោសល្យវិច្ច័យ របស់មន្ត្រីជំនាញ បញ្ជាក់ថាពុំមានស្លាកស្នាមអ្វី ពាក់ព័ន្ធនិងបទល្មើសនោះទេ៕SRP

ខេត្តសៀមរាប៖លោកសូរ ប្លាតុង អភិបាលស្រុកប្រាសាទបាគង នៅថ្ងៃទី០៨ខែមិថុនានេះចុះពិនិត្យមើល គ្រឿងសម្ភារបរិក្ខារ និង​អគារការិយាល័យច្រកចេញចូលតែមួយ​ នៃរដ្ឋបាលស្រុកប្រាសាទបាគង ដែលទើប​សាងសង់​រួចរាល់​ ត្រៀម​ នឹងរៀបចំពីធីសម្ពោធដាក់អោយប្រើប្រាស់ជាផ្លូវការ​ នាថ្ងៃទី១៦​ ខែមិថុនា​២០២០​ខាងមុខនេះ​។

ក្រោយពីសម្ពោធដាក់អោយប្រើប្រាស់ជាផ្លូវការ​រួចរាល់ការិយាល័យច្រកចេញចូលតែមួយនេះ​ នឹង​រួមចំណែក​យ៉ាងសកម្ម​ ក្នុងការបម្រើសេវាប្រកបដោយ តម្លាភាព រហ័សទាន់ពេលវេលា ស្របតាមតម្រូវការរបស់បងប្អូនប្រជាពលរដ្ឋ​៕SRP

ខេត្តសៀមរាប៖លោក​ ស៊ុំ​ វ៉េ​ ត្រូវបានប្រកាសជាស្មៀនឃុំ នៅឃុំត្រពាំងធំ ស្រុកប្រាសាទបាគង បន្ទាប់ពីស្មៀនឃុំចាស់បានទទួលមរណ:ភភាពកាលពីពេលកន្លងទៅ។
ការប្រកាសនេះធ្វើនៅព្រឹកមិញនេះ ក្រោមវត្តមានលោក នឹម សុវណ្ណ អភិបាលរងស្រុក។
លោក នឹម សុវណ្ណ បានថ្លែងថាលោកស្មៀនឃុំត្រូវខិតខំបំពេញការងារ ស្របតាមតួនាទីភារកិច្ចរបស់ខ្លួន និងតាមការណែនាំពីថ្នាក់ដឹកនាំក្នុងគោលបំណងបម្រើសេវាសាធារណៈជូនបងប្អូនប្រជាពលរដ្ឋនៅក្នុងមូលដ្ឋានអោយបានល្អប្រសើរ។ ស្មៀនឃុំត្រូវធ្វើសេនាធិការដល់ក្រុមប្រឹក្សាឃុំ របស់ខ្លួនក្នុងការកាត់ត្រា និងការថែរក្សា ការពារចលនវត្ថុ និងអចលនវត្ថុទាំងអស់ដែលជាទ្រព្យសម្បត្តិសាធារណៈ និងទ្រព្យសម្បត្តិឯកជនរបស់ឃុំ។ដោយ ស្មៀនឃុំត្រូវធ្វើសេនាធិការអោយក្រុមប្រឹក្សាឃុំ ក្នុងការធ្វើសេចក្តីសម្រេច និងអនុវត្តសេចក្តីសម្រេចនានា ដោយអនុលោមទៅតាមច្បាប់ស្តីពីការគ្រប់គ្រងរដ្ឋបាលឃុំ អនុក្រឹត្យ ប្រកាស និងលិខិតបទដ្ឋាននានា ដែលបានអនុម័តដោយគណៈកម្មាធិការជាតិគាំទ្រ ឃុំ សង្កាត់។
អភិបាលរងក៏បានផ្សព្វផ្សាយពីវិធីការពារជំងឺកូវិដ១៩ សូមកុំធ្វេសប្រហែសខ្លួនអោយសោះព្រោះជំងឺនេះ កាចសាហាវណាស់វាបានរាលដាលលើពិភពលោក ដូចនេះយើងត្រូវចូលរួមការពារនិងអនាម័យអោយបានគ្រប់ៗគ្នា​តាមគោលការណ៍ណែនាំ របស់ក្រសួងសុខាភិបាល ។
សូមបញ្ជាក់ថាពិធីប្រកាសនេះ មានលោកនាយករដ្ឋបាលស្រុក​ មន្ត្រីសាលាស្រុក មេឃុំ ក្រុមការងារថ្នាក់ស្រុកចុះជួយឃុំ មេប៉ុស្តិ៍ ប្រធានមណ្ឌលសុខភាព លោកគ្រូ អ្នកគ្រូនៃវិទ្យាល័យ និងអនុវិទ្យាល័យក្នុងឃុំ តំណាងសមាគម​ អង្គការក្រៅរដ្ឋាភិបាល សរុបប្រមាណ៣៧នាក់ស្រី១៩នាក់ផងដែរ៕SRP

ភ្នំពេញ៖សម្ដេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា នៅថ្ងៃទី០៨ខែមិថុនាឆ្នាំ២០២០នេះ បានសម្រេចតែងតាំង លោកហ៊ុន ម៉ាណែត ឋានៈពីអនុប្រធានទៅជាប្រធានយុវជនគណបក្សប្រជាជនកម្ពុជាថ្នាក់កណ្តាល។នេះបើ យោងតាមសេចក្ដីសម្រេចដែលបណ្ដាញសារព័ត៌មានទទួល បាននៅល្ងាចថ្ងៃនេះ៕SRP

ខេត្តកំពង់ធំ៖ លោកឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ នៅព្រឹកមិញនេះអញ្ជើញបញ្ចុះបឋមសិលាសាងសង់ប៉ុស្តិ៍នគរបាលរដ្ឋបាលស្រឡៅ ស្ថិតក្នុងភូមិ ទោង ឃុំ ស្រឡៅ ស្រុក តាំងគោក ខេត្តកំពង់ធំ។

លោកឧត្តមសេនីយ៍ទោ អ៊ុក កុសល បានថ្លែងថា ដោយមានការយកចិត្តទុកដាក់ ពីសំណាក់ដឹកនាំ ជាពិសេស សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ លោក សុខ លូ អភិបាលខេត្ត កំពង់ធំ ថ្ងៃនេះលោក បានបើកការដ្ឋាន និងបញ្ចុះបឋមសិលា ដើម្បីសាងសង់អាគារប៉ុស្តិ៍នគរបាលរដ្ឋបាលស្រឡៅ ថ្មីស្រឡាងមួយបន្ថែមទៀត ដែលមានលក្ខណៈរឹងមាំុធំទូលំទូលជំនួសអាគារប៉ុស្ដិ៍រដ្ឋបាលដែលសាងសង់អំពីឈើ ដែលមានសភាពចាស់ទ្រុឌទ្រោម តូចចង្អៀត ដំបូលប្រេះស្រាំធ្លុះធ្លាយ នារដូវវស្សាមានទឹកភ្លៀងជោគជាំហូរមកក្នុងអាគារផ្ដល់ផលលំបាកខ្លះៗ ដល់បងប្អូន ក្នុងកាបំពេញភារកិច្ច។

លោកឧត្តមសេនីយ៍ទោ អ៊ុក កុសល បន្តថ្លែងថាអាគារប៉ុស្តិ៍នគរបាលរដ្ឋបាល ដែលត្រូវសាងសង់នេះ មានទំហំ ៦ម៉ែត្រ ×១០ម៉ែត្រ ក្រាលការ៉ូ ជញ្ជាំងឥដ្ឋ ប្រក់ដំបូលសង្ក័សី ដែលជាការឧបត្ថម្ភ គាំទ្រ ពីសំណាក់ថ្នាក់ដឹកនាំ កងកម្លាំងនៃអធិការដ្ឋាននគរបាលស្រុកតាំងគោក និងបងប្អូនសប្បុរសមានសទ្ធាជ្រះថ្លា នៅពេលដែល ឃើញអង្គភាពមានការខ្វះខាត បងប្អូនតែងតែចូលរួមឧបត្ថម្ភ គាំទ្រជាបន្តបន្ទាប់ ដើម្បីអង្គភាពផ្លាស់ប្ដូរមុខមាត់ថ្មី ពីអ្វីដែលមិនល្អ កែប្រែជាទីកន្លែងមានសោភ័ណភាព ល្អស្អាត ដែលជាទីកន្លែងនៅគៀកជិតជាមួយប្រជាពលរដ្ឋ និងជាផ្ដល់សេវាសាធារណៈយ៉ាងមានប្រសិទ្ធភាព ជូនបងប្អូនប្រជាពលរដ្ឋ ដែលមកប្រាស្រ័យទំនាក់ទំនងលើកិច្ចការងារដែលពាក់ព័ន្ធ។​ ឆ្លៀតក្នុងឱកាសនោះដែរលោកឧត្តមសេនីយ៍ទោ អ៊ុក កុសល
បានឧបត្ថម្ភស៊ីម៉ង់ត៍១០តោន ,ឥដ្ឋ ៥.០០០ដុំ និងថវិកាមួយចំនួន។

លោកឧត្តមសេនីយ៍ទោ អ៊ុក កុសល ក៏បានថ្លែងអំណរគុណចំពោះសប្បុរសជននានាដែលបានជួយឧបត្ថម្ភនូវថវិកានិងសម្ភារដើម្បីសាងសង់អគារប៉ុស្ដិ៍ស្រឡៅខាងលើនេះផងដែរ៕SRP

ខេត្តសៀមរាប៖លោកសេង លន នាយសង្កាត់រដ្ឋបាលព្រៃឈើកន្ទួតខ្នាក្រៅនៃខេត្តសៀមរាប បានថ្លែងថាការលបលួចចូលកាប់ឈើនៅក្នុងតំបន់នេះ ត្រូវបានកាត់បន្ថយស្ទើរតែទាំងស្រុង ក៏ប៉ុន្តែអ្វីដែលជាការព្រួយបារម្ភខ្លាំងបំផុតនោះ គឺតំបន់ដីព្រៃក្រៅចំការពូជឈើគ្រញូងនោះ កំពុងទទួលរងនូវគ្រោះថ្នាក់ដ៏ធ្ងន់ធ្ងរ ក្នុងរយៈពេល៣ឆ្នាំចុងក្រោយនេះ  ឆ្នាំ២០១៧-២០១៨និង២០១៩។

លោកសេង លន បន្តថាករណីនេះគឺដោយការកើតឡើងនូវអំពើឃុបឃិតគ្នាជាប្រព័ន្ធ រំលោភវាស់វែងផ្ទេរកម្មសិទ្ធិ លក់ ដូរ ដីព្រៃរបស់រដ្ឋ ដែលគ្រប់គ្រងដោយច្បាប់។
លោកក៏បានអំពាវនាវឲ្យបញ្ឈប់ការផ្ទេរសិទ្ធិរំលោភលើផ្ទៃដីព្រៃរបស់រដ្ឋដែលគ្រប់គ្រងដោយច្បាប់ផងដែរ។
លោកថ្លែងយ៉ាងដូច្នេះក្នុងពេលចុះប្រតិបត្តិការដាក់ពង្រាយកម្លាំងល្បាតព្រៃ និងបំពាក់បំរាមនៅតាមព្រំប្រទល់ រវាងដែនដីព្រៃរបស់រដ្ឋ និងដែនដីព្រៃរបស់សហគមន៍ នៅពីថ្ងៃទី០៦ខែមិថុនា ឆ្នាំ២០២០នេះ។
លោក សេង លន ក៏បានសំណូមពរសុំឲ្យអាជ្ញាធរស្រុកពាក់ព័ន្ធ សហការចូលរួមដោះស្រាយករណីរំលោភច្បាប់ព្រៃឈើដោយការឃុបឃិតគ្នា ខណៈដែលដីព្រៃរបស់រដ្ឋនៅក្នុងតំបន់គ្រប់គ្រងដោយសង្កាត់រដ្ឋបាលព្រៃឈើកន្ទួតខ្នារក្រៅប្រមាណជាង១ម៉ឺន៨ពាន់ហិកតា កំពុងបង្កឲ្យមានគ្រោះបាត់​បង់ដីព្រៃ ដោយការទិញលក់ដីព្រៃរបស់រដ្ឋ ដែលគ្រប់គ្រងដោយច្បាប់ ក្រោមអំពើឃុបឃិតគ្នាជាប្រព័ន្ធ៕SRP

ខេត្តកំពង់ចាម៖:​គម្រោង​មូលនិធិ​ឃុំ​-សង្កាត់​ ​ឆ្នាំ​២០២០​ របស់​គណៈកម្មការ​ជាតិ​សម្រាប់​ការអភិវឌ្ឍន៍​តាម​បែប​ប្រជាធិបតេយ្យ​នៅ​ថ្នាក់​ក្រោម​ជាតិ​ ក្នុង​ការ​ជួសជុល​ និង​សាងសង់​ផ្លូវ​នៅ​តាម​មូលដ្ឋាន​ ត្រូវ​បាន​ដាក់​ឲ្យ​ដំណើរ​ការ​​​ដេញ​ថ្លៃ​ ​ចំនួន១០គម្រោង​ ស្មើ​នឹង​៨ឃុំ​ ទទួលបានជោគជ័យ។
ការដាក់ដេញថ្លៃ​ធ្វេី​ឡើង​​ព្រឹក​ថ្ងៃ​ទី​០៨​ខែខែមិថុនានេះនៅ​សាលា​ស្រុក​ព្រៃឈរ​​​​​ ក្រោម​វត្តមាន​ លោក​ឡោ​ ចាន់​លី​ អភិបាល​ស្រុក​ និង​លោក​អុំ​ ប៉ុណ្ណា​កា​ នាយក​រង​ទីចាត់ការ​ផែនការ​និង​វិនិយោគ​ខេត្តកំពង់ចាម​​ ដោយ​មាន​ការ​ចូលរួម​ពី​ អភិបាល​រង​ស្រុក​​ គណៈកម្មការ​ម្ចាស់​លទ្ធកម្ម​ និង​តំណាង​ក្រុម​ហ៊ុន​ អ្នក​ទទួល​ការ​ ជា​ច្រើន​រូប​ផង​ដែរ​។

​លោក​ ឡោ​ ចាន់​លី​ បាន​ធ្វើ​ការ​ណែនាំ​ជំរុញ​​​ដល់​គណៈកម្មការ​លទ្ធកម្ម​ និង​ក្រុម​ហ៊ុន​ អ្នក​ទទួល​ការ​ទាំងអស់​ ត្រូវ​អនុវត្ត​គម្រោង​ឲ្យ​មាន​តម្លាភាព​ និង​ធ្វើ​ការ​សាងសង់​ឲ្យ​ត្រូវ​តាម​បទដ្ឋាន​លក្ខណៈ​បច្ចេកទេស​ ប្រយោជន៍​ដល់​ការ​ប្រើប្រាស់​បាន​យូរ​អង្វែង​។

គួរ​បញ្ជាក់​ផង​ដែរ​ថា​ គម្រោង​ដែល​បាន​ដាក់​ឲ្យ​ដេញ​ថ្លៃ​ខាង​លើ​នេះ​ គឺមាន​ផ្លូវ​ចំនួន​១០ខ្សែ​ ដែល​ត្រូវ​ស្ថាបនា​​ ជូន​ប្រជាពលរដ្ឋ​សម្រាប់​ប្រើប្រាស់​ ក្នុង​នោះ​មាន​
១-នៅឃុំ​ល្វា មាន​​២គម្រោង​ គឺសាងសង់ផ្លូវបេតុងអាមេ ប្រវែងជាង២០០ម៉ែត្រ​ នៅភូមិតាំងគោក​ និង​ជួសជុលផ្លូវក្រាលក្រួសក្រហម ប្រវែង​ជាង១០០០ម៉ែត្រ​ នៅភូមិស្តុកអន្ទង់-ភូមិល្វា។
២-នៅឃុំជ្រៃវៀន​ មាន​២គម្រោង​ សាងសង់ផ្លូវបេតុងអាមេ ប្រវែងជាង​៤០០ម៉ែត្រ​ នៅភូមិត្រពាំងទូក​ និង​ជួសជុលផ្លូវក្រាលកំទេចថ្ម ប្រវែងជាង៨០០ម៉ែត្រ​​ នៅភូមិខ្វិតតូច-ភូមិក្លែងពណ៌។
៣-ឃុំខ្វិតធំ​ មាន​១គម្រោង​ សាងសង់ផ្លូវបេតុងអាមប្រវែង​ជាង​៣០០ម៉ែត្រ​ នៅភូមិតាង៉ាល។
៤-ឃុំ​ត្រពាំងព្រះ​ មាន​១គម្រោង​ សាងសង់ផ្លូវបេតុងអាមេ ប្រវែងជាង៦០០ម៉ែត្រ​ នៅភូមិគូរ។
៥-ឃុំព្រៃឈ​រ​ មាន​១គម្រោង​ សាងសង់ផ្លូវបេតុងអាមេ ប្រវែងជាង​២០០ម៉ែត្រ​ នៅភូមិសេកយំ។
៦-ឃុំសំរោង​ មាន​១គម្រោង​ សាងសង់ផ្លូវបេតុងអាមេ ប្រវែងជាង៣០០ម៉ែត្រ​ នៅ ភូមិសូដី។
៧-ឃុំ​បារាយណ៍​ មាន​១គម្រោង​ សាងសង់ផ្លូវបេតុងអាមេ ប្រវែងជាង៤០០ម៉ែត្រ​ នៅភូមិលាងខ្សាច់។
និង​៨-ឃុំតុងរ៉ុង មាន​១គម្រោង​ សាងសង់ផ្លូវបេតុងអាមេ ប្រវែងជិត៤០០ម៉ែត្រ​ នៅភូមិផ្ទះខ្ពស់។
ជាមួយ​គ្នា​នោះ​ ​ប្រធាន​គណៈ​កម្មាការ​ម្ចាស់​លទ្ធកម្ម​ឃុំ​ទាំង​៨ឃុំ បាន​ធ្វើការ​ប្រកាស​ទទួល​យក​ទាំង​​១០គម្រោង​ ព្រមទាំង​បាន​ធ្វើការ​ផ្តាំផ្ញើដល់ក្រុមហ៊ុនអ្នកទទួលការទាំងអស់ ត្រូវ​​​អនុវត្តន៍​ការងារ​សាងសង់​ផ្លូវ​ ឲ្យ​មាន​គុណភាពល្អ​ ​និង​ត្រូវ​តាម​ស្តង់ដារ​ ​លក្ខណៈ​បច្ចេកទេស​​​ ប្រយោជន៍​ដល់​ការ​ប្រើប្រាស់​ របស់​ប្រជាពលរដ្ឋ​ ដែល​កំពុងតែ​ទន្ទឹង​រង់ចាំ​ ផងដែរ​៕SRP

ខេត្តមណ្ឌលគិរី៖ មានការលើកឡើងថាសកម្មភាពដឹកជញ្ជូនឈើនៅ ខេត្តមណ្ឌលគិរី ហាក់មានកំរើកឡើងវិញបន្ទាប់ពីបានស្ងប់ស្ងាត់មួយរយ:។

តាមសេចក្ដីរាយការណ៍បានឲ្យដឹងថាការដឹកជញ្ជូនឈើនៅខេត្តមណ្ឌលគិរី ដោយមានឈ្មួញម្នាក់ឈ្មោះឌី ជាឈ្មួញរកស៊ីឈើដ៏សកម្មបំផុត ប៉ុន្តែមិនទាន់មានការបង្ក្រាបពីអាជ្ញាធរនិងសមត្ថកិច្ចជំនាញនោះឡើយ។

សេចក្ដីរាយការណ៍បានបញ្ជាក់ថា ឈ្មួញឈើដែលគេស្គាល់ថាឈ្មោះឌី បានដឹកឈើតាមផ្លូវនៅ ចំណុច ភូមិពូត្រុំ  ក្រុងសែនមនោរម្យ ខេត្តមណ្ឌលគិរី។
ទោះយ៉ាងណាគេសង្ឃឹមថាអាជ្ញាធរសមត្ថកិច្ចជំនាញនឹងបង្ក្រាបការដឹកជញ្ជូនឈើរបស់ឈ្មោះឌី ជាក់ជាមិនខានឡើយ៕SRP