ខេត្តសៀមរាប៖​លោក ហ៊ុន ប៉ូគា ប្រធានសមាគមចលនាយុវជនកម្ពុជា (ក្រុម១៥៧) សាខា ខេត្តសៀមរាប នៅថ្ងៃសុក្រ ទី៧ ខែឧសភា ឆ្នាំ២០២១នេះ និងសមាជិក បាននាំយកអំណោយ និងថវិកាមួយចំនួនប្រគល់ជូន លោក កាន់ គា នាយកសាលាបឋមសិក្សា ទៀ បាញ់ សែនជ័យគូលេន ដែលស្ថិតនៅភូមិស្នាតេជោ៣១៧ ឃុំបល្ល័ង្ក ស្រុកប្រាសាទបាគង ខេត្តសៀមរាប។

អំណោយដែលប្រគល់ជូនរួមមាន៖
អាល់កុល ១០លីត្រ ម៉ាសចំនួន ២៥០០ ម៉ាស
ថវិកាចំនួន ៤០មុឺនរៀល សម្រាប់ទិញ អង្គចងចាំ (Hard Disk) សម្រាប់ផ្ទុកទិន្ន័យរបស់សាលា។

លោកហ៊ុន ប៉ូគា ក៏បានជួបសំណេះសំណាល ជាមួយលោកគ្រូអ្នកគ្រូ សិស្សានុសិស្ស ដោយមានមតិផ្ដាំផ្ញើឲ្យយកចិត្តទុកដាក់បានខ្ពស់ នូវអនាម័យក្នុងសាលា។ ជាពិសេសសូមចូលរួមអនុវត្ត(៣កុំ ៣ការពារ) ឲ្យបានដើម្បីចៀសផុតពីជំងឺកូវីដ-១៩។

សូមជម្រាបថា នៅព្រឹកមិញនេះដែរ លោក ផយ ម៉ក់ ប្រធានសមាគមចលនាយុវជនកម្ពុជា (ក្រុម១៥៧) ស្រុកវ៉ារិន បានទទួលការឧបត្ថម្ភ ឪទ្បឹក ចំនួន១តោន ពីលោក គីម សាក់ ម្ចាស់ចំការ តាមរយៈ លោក រ៉េន រក្សា ក្រុមការងារ យុវជនស្រលាញ់សន្តិភាព និងក្រោមការសម្របសម្រួលដោយ លោក ចែម ចន្ថា ប្រធានសមាគមចលនាយុវជនកម្ពុជា(ក្រុម១៥៧) ស្រុកជីក្រែង បានដឹកនាំ សមាជិកនាំយកអំណោយនេះ​ ទៅប្រគល់ជូន រដ្ឋបាលស្រុកវ៉ារិន ក្នុងនោះទឹកសុទ្ធ ៤០យួរផងដែរ៕SRP

ខេត្តកំពង់ចាម៖ពលរដ្ឋចំនួន៧៣០គ្រួសារ ដែល​រស់នៅតំបន់​បិទខ្ទប់​ ក្នុងភូមិសាស្ត្រស្រុកកងមាស បានទទួល អំណោយរបស់ សម្តេច ហ៊ុន​  សែន​ នាយករដ្ឋមន្ត្រី​។

ការអំណោយទទួលបាននៅព្រឹកមិញនេះ តាមរយៈ លោក អ៊ុន​ ចាន់ដា អភិបាលខេត្តកំពង់ចាម។
លោកអ៊ុន ចាន់ដា ក្នុងនាមជាប្រធានគណកម្មការខេត្តប្រយុទ្ធប្រឆាំង​នឹង​ជំងឺ​កូវីដ​-១៩​ បាន​អំពាវនាវ​ដល់ពលរដ្ឋ ឲ្យបង្កេីនការប្រុងប្រយ័ត្នខ្ពស់​ ក្នុងការប្រាស្រ័យទាក់ទងគ្នា​ ជាពិសេស​ត្រូវ​អនុវត្តន៍កាតព្វកិច្ចពាក់ម៉ាស់ និងកាតព្វកិច្ច រក្សាគម្លាត សុវត្ថិភាពបុគ្គល ស្របតាមសេចក្តីជូនដំណឹងរបស់ក្រសួងសុខាភិបាល ដេីម្បី​ឈានដល់ការបញ្ចប់នូវព្រឹត្តិការណ៍២០​កុម្ភៈ​។

អភិបាលខេត្ត ក៏បាន​ណែនាំ​ដល់​ អាជ្ញាធរមូលឃុំ និងអ្នកពាក់ព័ន្ធ ត្រូវបន្តយកចិត្តទុកដាក់តាមដាន លេីការគ្រប់គ្រងពលរដ្ឋចំណូលស្រុក ករណីមកពីតំបន់ហានិភ័យខ្ពស់ ត្រូវនាំទៅយកសំណាកពិនិត្យ និងដាក់​ឲ្យ​ធ្វើចត្តាឡីស័ក នៅមណ្ឌលចត្តាឡីស័ករបស់រដ្ឋបាលខេត្ត ឬនៅតាមផ្ទះរៀងៗខ្លួន។

គួរ​បញ្ជាក់​ថា​ អំណោយ​របស់សម្ដេចតេជោ  និងសម្តេច​កិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន ផ្តល់ជូនប្រជាពលរដ្ឋ ដែលជួបការលំបាក ក្នុងតំបន់បិទខ្ទប់ ក្នុងស្រុកកងមាស ចំនួន ៧៣០គ្រួសារ ដោយក្នុង១គ្រួសារ ទទួល​បានអង្ករ ២៥គក្រ មី១កេស ត្រីខ ១០កំប៉ុង។ ប្រគេនវត្តជួបការលំបាក ក្នុងស្រុកកងមាសចំនួន ៩វត្ត ក្នុង១វត្ត ប្រគេនអង្ករ ១០០គីឡូ មី៥កេស ត្រីខ ៥យួរ និងបច្ច័យ ២០០.០០០រៀល​ ផងដែរ​៕SRP

ខេត្តមណ្ឌលគិរី៖មានការលើកឡើងថាសកម្មភាពកាប់បំផ្លាញព្រៃឈើក្នុងស្រុកកែវសីមា នៅតែបន្តកើតមានឥតឈប់ឈរ បើទោះបីមានការរឹតបន្តឹងពីសំណាក់អាជ្ញាធរជំនាញពាក់ព័ន្ធយ៉ាងណាក៏ដោយ។

សេចក្ដីរាយការណ៍បានឲ្យដឹងថានៅ០៥ខែឧសភា ឆ្នាំ ២០២១ ក្រុមអ្នកសារព័ត៌មាន បានប្រទះឃើញ គំនរឈើប្រភេទឈើលេខ ១ សុក្រំ ដែលមានមុខកាត់ធំៗជាច្រើនកន្លែងសរុបមានចំនួន៤៥ដុំ នៅក្នុងព្រៃជាប់ភូមិស្រែនិញ ឃុំមេម៉ង់ ស្រុកកែវសីម៉ាខេត្តមណ្ឌល គីរី។

សេចក្ដីរាយការណ៍បន្តថាមានការដឹកជញ្ជូនឈើឈើតាមរថយន្ត សាំយ៉ុង ធុនត្រា ឡុងគ្រីស័រ និងរថយន្តកែច្នៃជាច្រើនគ្រឿងយក ទៅ ប្រទេសវៀតណាម ដោយមានឈ្មោះថា លោករិទ្ធ និងណាង ជាអ្នកកាងនាំឈើ។ សូមបញ្ជាក់ (ដែនជម្រកភ្នំព្រិច) ឃុំម៉េម៉ង់ ស្រុកកែវសីម៉ា ខេត្តមណ្ឌលគិរី មេឈ្មួញធំប្រមូលទិញឈើឈ្មោះ យ៉ានិងឈ្មោះ សាក់។ ពាក់ព័ន្ធករណីនេះ បណ្ដាញសៀមរាបប៉ុស្ដិ៍ នៅពុំទាន់ទទួលបានការបំភ្លឺពីអាជ្ញាធរជំនាញពាក់ព័ន្ធ ក្នុងខេត្តមណ្ឌលគិរីនៅឡើយទេ៕SRP

ខេត្តសៀមរាប៖នៅទីបំផុតបុរសជាជនដៃដល់ ដែលបានសម្លាប់ ស្ត្រីអានិកជនខ្មែរ នៅក្រុងសៀមរាប ត្រូវបាន ចាប់ខ្លួនបានហើយ។

ការចាប់ខ្លួនធ្វើឡើងនៅវេលាម៉ោង ១៩និង៥០នាទីថ្ងៃទី០៦ខែឧសភាឆ្នាំ២០២១ នៅភូមិព្រៃតូច ឃុំព្រៃតូច ស្រុកមោងឬស្សី ខេត្តបាត់ដំបង ដោយកម្លាំងការិយាល័យព្រហ្មទណ្ឌអាវុធហត្ថខេត្តសៀមរាប សហការជាមួយអាវុធហត្ថខេត្តបាត់ដំបង។

នាយការិយាល័យព្រហ្មទណ្ឌកងរាជអាវុធហត្ថខេត្តសៀមរាបលោក សៀក សោភា បានប្រាប់«បណ្ដាញសៀមរាបប៉ុស្តិ៍» ថាជនសង្ស័យមានឈ្មោះម៉ឺន វិមល ភេទប្រុស៣៤ឆ្នាំមុខរបរមិនពិតប្រាកដស្រុកំណើតនៅភូមិស្នោរ សង្កាត់រកាក្នុង ក្រុងដូនកែវ ខេត្តតាកែវ។

លោក សៀក សោភា បានបន្តថាតាមការណែនាំរបស់លោកឧត្តមសេនីយ៍ត្រី ប៉ោ វណ្ណនិត មេបញ្ជាការកងរាជអាវុធហត្ថខេត្តសៀមរាប និងនដឹកនាំបញ្ជាផ្ទាល់ពីលោកថា ដាលុច មេបញ្ជាការងកងរាជអាវុធហត្ថខេត្តសៀមរាប  ដោយមានការសម្របសម្រួលពីលោក កើត វណ្ណរ៉េត ព្រះរាជអាជ្ញាខេត្តសៀមរាប កម្លាំងការិយាល័យជំនាញបានសហការណ៍ ជាមួយកំលាំងអាវុធហត្ថលើផ្ទៃប្រទេស អាវុធហត្ថខេត្តកំពង់ឆ្នាំង អាវុធហត្ថខេត្តតាកែវ អាវុធហត្ថខេត្តបាត់ដំបង ឈានដល់ការចាប់ខ្លួនជនដៃដល់តែម្ដង។

លោកបានបន្តថាក្រោយសាកសួរ ជនសង្ស័យបានឆ្លើយសារភាព «ខ្លួនពិតជាបានចាក់សម្លាប់ទៅលើឈ្មោះអ៊ុនចន្ថា ភេទស្រី អាយុ៥៦ឆ្នាំ ជាអានិកជនខ្មែររស់នៅប្រទេសស្វីស កាលពីវេលាម៉ោងប្រហែល ១៩និង០០នាទីថ្ងៃទី២៨ខែមេសាឆ្នាំ២០២១ត្រង់ចំណុចផ្ទះជួលប្រាប្រាកដមែន»។«មូលហេតុជនសង្ស័យចាក់សម្លាប់ជនរងគ្រោះ ដោយសារជនរងគ្រោះ បាននិយាយរករឿងឈ្លោះជាមួយជនសង្ស័យរឿងដែលជនរងគ្រោះ យកខ្លួនធ្វើប្តីដែលខាងបងប្អូនជនរងគ្រោះ មិនពេញចិត្តហើយជនរងគ្រោះ មានការប្រច័ណ្ឌ ដោយជនរងគ្រោះ និយាយរករឿងខ្លួនរហូត ខ្លួនក៏ខឹងទ្រាំមិនបានក៏យកអង្រែវាយក្បាលជនរងគ្រោះសន្លប់ ហើយបានយកកាំបិទចិតបន្លែចាក់សម្លាប់ជនរងគ្រោះតែម្តង។

បើតាមមន្ត្រីអាវុធហត្ថបន្តថាករណីនេះសមត្ថកិច្ចដកហូតវត្ថុតាងនិងសម្ភារ

1.ម៉ូតូម៉ាកហុងដា click ពណ៌សពាក់ស្លាកលេខភ្នំពេញ១HE-៩៦០៣

2.ទូរស័ព្ទម៉ាក០១គ្រឿងម៉ាកPOCO PHONE

-បច្ចុប្បន្នជនសង្ស័យនឹងវត្ថុតាងត្រូវបានកម្លាំងអាវុធហត្ថខេត្តបាត់ដំបងប្រគល់ឲ្យការិយាល័យជំនាញអាវុធហត្ថខេត្តសៀមរាប កសាងសំណុំរឿងបញ្ជូនទៅតុលាការដើម្បីអនុវត្តតាមផ្លូវច្បាប់។

គួរបញ្ជាក់ថាហេតុការណ៍ភ្ញាក់ផ្អើលបានកើតឡើងវេលាម៉ោង១៥និង៣០នាទីថ្ងៃទី០៥ខែឧសភា ឆ្នាំ២០២១នៅចំណុចផ្ទះជួល ស្ថិតនៅភូមិទ្រៀក សង្កាត់សៀមរាប ក្រុងសៀមរាប ខេត្តសៀមរាប៕SRP

ខេត្តកំពង់ចាម​៖ក្នុងឱកាសនាំយកអំណោយសម្តេច​កិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុន​ សែន​ ប្រធានកាកបាទក្រហមកម្ពុជា ចែកជូនប្រជាពលរដ្ឋ​ ដែលរងគ្រោះ​ដោយ​ខ្យល់​កន្ត្រាក់​បណ្តាល​ឲ្យ​ខូចខាត​ផ្ទះ​សំបែង​ ចំនួន ៩០គ្រួសារ​ នៅស្រុកព្រៃឈរ​ និង​ស្រុក​កងមាស​ នៅព្រឹកមិញនេះ​ លោក អ៊ុន ចាន់ដា អភិបាលខេត្តកំពង់ចាម​ និង​ជា​ប្រធានគណៈកម្មាធិការសាខា​កាកបាទក្រហម​ខេត្ត​ បាន​ផ្តាំផ្ញេី​ដល់​បងប្អូន​ប្រជាពលរដ្ឋ​ ឲ្យ​យកអំណោយ​ ដែល​ទទួល​បាន​ក្នុងឱកាស​នេះ​ ទៅ​​ជួសជុល​កសាងផ្ទះឡើង​វិញនឹង ត្រូវបន្ត​ប្រកប​មុខរបរ​ទទួលទាន​ និង​ធ្វើ​ការ​​​បង្កបង្កើនផល ឲ្យ​ទាន់​រដូវ​វស្សា​នេះ​ផងដែរ​។

លោក អ៊ុន​ ចាន់ដា​ ក៏បានណែនាំដល់ពលរដ្ឋ​ ឲ្យ​បង្កេីន​ការ​ប្រុងប្រយ័ត្ន​ខ្ពស់​ នៅ​ពេល​មាន​​ភ្លៀង​ ​ខ្យល់​ ផ្គរ​ រន្ទះ​ ព្រោះកត្តា​​ធម្មជាតិ​ទាំងនេះវា​អាច​បង្ក​គ្រោះថ្នាក់​បាន​គ្រប់​ពេលវេលា​ ចំពោះ​អាយុជីវិត​មនុស្ស​ និង​សត្វ​ ឬ​ទ្រព្យសម្បត្តិ​ផ្សេងៗ​ ជាពិសេស​កូនចៅ​តូចៗ​ កុំ​ឲ្យ​ចេញនៅ​ក្រៅផ្ទះ​ ឬ​នៅ​ទីវាល​។ លោកក៏បានអំពាវនាវ​ឲ្យ​​អនុវត្ត​តាម​វិធានការ​ ៣ការពារ​ ៣កុំ​ និង២ចូលរួម​ ជាពិសេស​ ត្រូវអនុវត្តន៍កាតព្វកិច្ចពាក់ម៉ាស។

គួរ​បញ្ជាក់​ថា​ អំណោយ​ដែល​ត្រូវ​ផ្តល់ជូនប្រជាពលរដ្ឋ ចំនួន ៩០គ្រួសារ នៅទីតាំង២ផ្សេងគ្នា ក្នុងនោះ​ ១០គ្រួសារ នៅក្នុង ឃុំជ្រៃវៀន ស្រុកព្រៃឈរ និង ៨០គ្រួសារទៀត មកពីឃុំទាំង៦ ក្នុងស្រុកកងមាស ដែលរងគ្រោះដោយខ្យល់កន្ត្រាក់ បណ្តាល​ឲ្យ​ប៉ើង និងរបើកដំបូលផ្ទះកាលពីល្ងាច ថ្ងៃទី៦ ខែឧសភា ម្សិលមិញដោយ​​មាន​អង្ករ​ មី​ ទឹក​ត្រី​ ស៊ីអ៊ីវ​ ត្រីខ​ មុង​ ភួយ​ សារុង​ ក្រមា​ អាវ​ និង​ថវិកា​មួយ​ចំនួនទៅ​​តាម​ទំហំ​នៃ​ការ​ខូចខាត​ ដែល​មាន​កំរិត​ធ្ងន់​ និង​ស្រាល​​ផងដែរ​៕SRP

ខេត្តត្បូងឃ្មុំ៖ក្រុមមន្ត្រីខេត្តបាននាំគ្នារៀបចំ លើកដាំដើមពោធិ៍ «អ្នកតាក្រហម ក» ឡើងវិញបន្ទាប់ពីបានដួលរលំដោយសារខ្យល់កន្រ្តាក់ កាលពីល្ងាចម្សិលមិញ។ ការរៀបចំដាំឡើងវិញនេះនៅព្រឹកមិញ តាមតាមការណែនាំរបស់រដ្ឋមន្ត្រីក្រសួងរៀបចំដែនដី លោក ជាសុផារ៉ា។

សូមជម្រាបថាដើមពោធិ៍ «អ្នកតាក្រហម ក»ស្ថិតនៅក្នុងតំបន់ប្រវត្តិសាស្ត្រ ទុំ ទាវ  ភូមិជើងខាល ឃុំមង់រៀវ ស្រុកត្បូងឃ្មុំ ខេត្តត្បូងឃ្មុំ។

ជុំវិញការដួលរលំដើមពោធិ៍នេះ អាជ្ញាធរខេត្តត្បូងឃ្មុំ បដិសេធចោលការដួលរលំ ដើមពោធិ៍ជើងខាល «ប្រវត្តិស្នេហ៍ ទុំ និងទាវ »។

សេចក្ដីប្រកាសបដិសេធនេះ ក្រោយមានបណ្ដាញទំនាក់ទំនងសង្គមហ្វេសប៊ុក នៅល្ងាចថ្ងៃទី០៦ខែឧសភា ឆ្នាំ២០២១ ម្សិលមិញ បានបង្ហោះថា«ពីដើមពោធិ៍ជើងខាល “ ប្រវត្តិស្នេហ៍ទុំ និងទាវ “ ត្រូវបានខ្យល់កន្ត្រាក់ បណ្ដាលឲ្យដួលរលំ។

បើតាមអាជ្ញាធរបញ្ជាក់ថាការដួលរលំដើមពោធិ៍នេះ គឺជាករណីដួលរលំដើមពោធិ៍ ដោយខ្យល់កន្ត្រាក់ នារសៀលថ្ងៃទី០៦ ខែឧសភា ឆ្នាំ២០២១ គឺជាដើមពោធិ៍ “ លោកតាក្រហមក “ មានចម្ងាយ ៧០ម៉ែត្រ ពី ដើមពោធិ៍ជើងខាល “ ប្រវត្តិស្នេហ៍ ទុំ និងទាវ “ មិនមែនដើមពោធិ៍ជើងខាល “ ប្រវត្តិស្នេហ៍ ទុំ និងទាវ “ នោះទេ៕SRP

ភ្នំពេញ៖ថ្ងៃនេះកម្ពុជាបានសម្ពោធជាផ្លូវការនៃការនាំចេញផ្លែស្វាយស្រស់កម្ពុជាចំនួន ៨០តោន ចេញទៅកាន់ទីផ្សារប្រទេសចិនដោយត្រង់។

ការសម្ពោធនេះនៅទីស្នាក់ការក្រុមហ៊ុន ហ៊ុន ទី ដែលមានទីតាំងស្ថិតនៅភូមិសំរោងទាវ សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ នៅព្រឹកមិញនេះ។

ឯកអគ្គរដ្ឋទូតចិនប្រចាំកម្ពុជា លោក Wang Wentain បានថ្លែងនូវអំណរសាទរចំពោះសមិទ្ធផល ថ្មីមួយទៀតដែលប្រទេសទាំងពីរសម្រេចបាន នេះសរបញ្ជាក់ឲ្យឃើញពីការវិវឌ្ឍន៍រីកចម្រើនលើ វិស័យកសិ-ពាណិជ្ជកម្ម ក្នុងបរិបទដែលកម្ពុជាកំពុងតែប្រយុទ្ធប្រឆាំងយ៉ាងពេញសមត្ថភាពជាមួយជំងឺឆ្លងកូវីដ-១៩។

ទាក់ទងនឹងបញ្ហានេះ រដ្ឋាភិបាលចិនក៏បានជួយឧបត្ថម្ភវ៉ាក់សាំងកូវីដ -១៩ ជូនរាជរដ្ឋាភិបាលកម្ពុជា និងដោយឡែកវិស័យកសិកម្មវិញ បានជួយឧបត្ថម្ភ វ៉ាក់សាំងការពារជំងឺឆ្លងគោ-ក្របីផងដែរ។ លោកឯកអគ្គរដ្ឋទូតបានបន្តថា កិច្ចសហការគ្រប់ជ្រុងជ្រោយ រវាងប្រទេសទាំងពីរលើគ្រប់វិស័យ និងជាពិសេសវិស័យកសិកម្ម បាននិងកំពុងមានវឌ្ឍនភាពគួរឲ្យកត់សម្គាល់។ ជាក់ស្តែងកសិផលកម្ពុជា ជាពិសេសផលិតផលផ្លែចេកអំបូងលឿងស្រស់ កម្ពុជាត្រូវបាននាំចេញទៅកាន់ទីផ្សារចិន ហើយបរិមាណនាំចេញហក់ឡើងខ្ពស់ពីមួយឆ្នាំទៅមួយឆ្នាំ។ ​លោកសង្ឃឹម និងជឿជាក់យ៉ាងមុតមាំថា ផលិតផលផ្លែស្វាយស្រស់កម្ពុជាក៏នឹងមានវាសនាដូចផ្លែចេកអំបូងលឿងផងដែរនាពេលអនាគតដ៏ខ្លី។ សមិទ្ធផលនេះ ប្រាកដជានឹងចូលរួមចំណែកផ្តល់ឱកាសឲ្យកសិផលកម្ពុជា ធ្វើដំណើរទៅកាន់ទីផ្សារចិនដោយត្រង់ ដែលសកម្មភាពនេះពិតណាស់នឹងចូលរួមលើកកម្ពស់តម្លៃបន្ថែមកសិផល ពង្រីក និងពង្រឹងខ្សែច្រវាក់ផលិតកម្មដំណាំស្វាយ បង្កើតការងារ បង្កើនប្រាក់ចំណូល និងរក្សាសុខភាពសេដ្ឋកិច្ចគ្រួសារកសិករ និងក្រុមហ៊ុនវិនិយោគក្នុង និងក្រៅប្រទេស។រដ្ឋមន្ត្រីក្រសួងកសិកម្មខ្មែរ​ លោក វេង សាខុន បានថ្លែងអំណរគុណយ៉ាងជ្រាលជ្រៅ ជូនចំពោះ អគ្គរដ្ឋបាលគយ ស្ថានទូតចិន ជាពិសេសរដ្ឋាភិបាលនៃសាធារណរដ្ឋប្រជាមានិតចិន ដែលបានពិនិត្យ និងវាយតម្លៃលើគុណភាព និងលក្ខខណ្ឌតម្រូវភូតគាមអនាម័យ លើផលិតផលផ្លែស្វាយកែវរមៀតកម្ពុជា ហើយឈានទៅសម្រេចអនុញ្ញាតជាផ្លូវការឲ្យផលិតផលនេះ នាំចេញទៅកាន់ទីផ្សារចិន ជាផ្លូវការដូចដែលរាជរដ្ឋាភិបាល ក្រសួងកសិកម្ម រុក្ខាប្រមាញ់ និងនេសាទ និងប្រជាពលរដ្ឋកម្ពុជា ទទួចចង់បានពេលនេះ។

គួរបញ្ជាក់ថាសមិទ្ធផលដែលក្រសួងកសិកម្ម រុក្ខាប្រមាញ់ និងនេសាទសម្រេចបាននាថ្ងៃនេះ គឺប្រាកដណាស់មិនអាចកាត់ផ្តាច់បានពីការជួយជ្រោមជ្រែង និងផ្តល់កិច្ចសហការគ្រប់បែបយ៉ាងពីគ្រប់ភាពគីពាក់ព័ន្ធ ជាពិសេសសម្តេចហ៊ុន សែន នាយករដ្ឋមន្រ្តី ដែលជានិច្ចកាលគាំទ្រ ជំរុញ លើកទឹកចិត្ត និងផ្តល់ការណែនាំឲ្យក្រសួងឈានទៅចុះពិធីសារស្តីពី “លក្ខខណ្ឌតម្រូវភូតគាមអនាម័យសម្រាប់ការ នាំចេញផ្លែស្វាយស្រស់ពីកម្ពុជា ទៅកាន់សាធារណរដ្ឋប្រទេសចិន” កាលពីថ្ងៃទី៩ ខែមិថុនា ឆ្នាំ២០២០ រវាងលោក វេង សាខុន ជាមួយលោក Wang Wentain ឯកអគ្គរដ្ឋទូតនៃសាធារណរដ្ឋប្រជាមានិតចិន។

លោករដ្ឋមន្ត្រីសង្ឃឹមនិងជឿជាក់ថាព្រឹត្តិការណ៍នាពេលនេះ គឺជាការចាប់ផ្តើមជាផ្លូវការនៃផលិតផលផ្លែស្វាយស្រស់របស់កម្ពុជានឹងត្រូវបានហូរចេញជាបណ្តើរដោយត្រង់ទៅកាន់ប្រទេសចិន ព្រមជាមួយអត្ថប្រយោជន៍ជាច្រើនអនេកដែលកសិករ ម្ចាស់ចំការ និងអាជីវករនឹងទទួលបានពីភាពជោគជ័យដ៏ធំធេងនេះ។ លើសពីនេះ វិស័យផលិតកម្មស្វាយស្រស់នឹងត្រូវបានលើក កម្ពស់ និងមានតម្លៃផ្នែកសេដ្ឋកិច្ច និងទីផ្សារជាបណ្តើរៗ ជាពិសេសនឹងស្រូបយកពលកម្មក្នុងស្រុកបានកាន់តែច្រើនផែមទៀត បង្កើតការងារ តម្លៃបន្ថែម និងប្រាក់ចំណូល។ល។

ឆ្លៀតយកឱកាសដ៏ពិសេសនេះ រដ្ឋមន្ត្រី បានអំពាវនាវឲ្យវិស័យឯកជនចូលរួម និងសហការឲ្យបានពេញលេញគ្រប់ខ្សែច្រវាក់ផលិតកម្មទាំងអស់ ធ្វើយ៉ាងណាច្បាមយកឱកាសមាស ដែលកំពុងមានក្នុងដៃឲ្យបាន ដើម្បីជាប្រយោជន៍ក្នុងការជំរុញកំណើនសេដ្ឋកិច្ច និងនិរន្តរភាពផលិតកម្ម ហើយសង្ឃឹមថាកសិផលកម្ពុជាផ្សេងៗទៀត នឹងមានឱកាសបង្ហាញខ្លួននៅលើទីផ្សារអន្តរជាតិកាន់តែច្រើនថែមទៀត ពិសេសទីផ្សារចិន ដោយឈរលើស្តង់ដារគុណភាព សុវត្ថិភាព និងការប្រកួតប្រជែង។ រដ្ឋមន្ត្រី បានធ្វើការណែនាំបន្ថែមចំពោះក្រុមហ៊ុនម្ចាស់ចម្ការ ត្រូវសហការជាមួយអគ្គនាយកដ្ឋានកសិកម្មអនុវត្តវិធានបច្ចេកទេស លក្ខខណ្ឌតម្រូវភូតគាមអនាម័យរបស់ភាគីចិន ធ្វើយ៉ាងណាឲ្យការនាំចេញផលិតផលផ្លែស្វាយស្រស់ប្រកបដោយនិរន្តរភាព៕SRP

ខេត្តសៀមរាប៖អាជ្ញាធរខេត្តត្បូងឃ្មុំ បដិសេធចោលការដួលរលំ ដើមពោធិ៍ជើងខាល «ប្រវត្តិស្នេហ៍ ទុំ និងទាវ »។

សេចក្ដីប្រកាសបដិសេធនេះ ក្រោយមានបណ្ដាញទំនាក់ទំនងសង្គមហ្វេសប៊ុក នៅល្ងាចថ្ងៃទី០៦ខែឧសភា ឆ្នាំ២០២១ ម្សិលមិញ បានបង្ហោះថា«ពីដើមពោធិ៍ជើងខាល “ ប្រវត្តិស្នេហ៍ទុំ និងទាវ “ ត្រូវបានខ្យល់កន្ត្រាក់ បណ្ដាលឲ្យដួលរលំ។

បើតាមអាជ្ញាធរបញ្ជាក់ថាការដួលរលំដើមពោធិ៍នេះ គឺជាករណីដួលរលំដើមពោធិ៍ ដោយខ្យល់កន្ត្រាក់ នារសៀលថ្ងៃទី០៦ ខែឧសភា ឆ្នាំ២០២១ គឺជាដើមពោធិ៍ “ លោកតាក្រហមក “ មានចម្ងាយ ៧០ម៉ែត្រ ពី ដើមពោធិ៍ជើងខាល “ ប្រវត្តិស្នេហ៍ ទុំ និងទាវ “ មិនមែនដើមពោធិ៍ជើងខាល “ ប្រវត្តិស្នេហ៍ ទុំ និងទាវ “ នោះទេ៕SRP

ខេត្តសៀមរាប៖យ៉ាងហោចណាស់មនុស្សចំនួន៣នាក់បានស្លាប់នៅស្រុកសូទ្រនិគម ដោយគ្រោះធម្មជាតិ ក្នុងករណី២ផ្សេងគ្នា។ ករណីទី១ មនុស្សពីរនាក់ បានស្លាប់ដោយរន្ទះបាញ់ នៅព្រលប់ថ្ងៃទី០៦ខែឧសភា ឆ្នាំ២០២១ នៅចំណុចភូមិសំរោង ឃុំខ្នាពោធិ៍ ស្រុកសូទ្រនិគម ខេត្តសៀមរាប។

សមត្ថកិច្ចមូលដ្ឋានស្រុកសូទ្រនិគម បានឲ្យដឹងថាជនរងគ្រោះទី១ឈ្មោះពុធ ធ ភេទប្រុស អាយុ៣៧ឆ្នាំ នៅភូមិគោកចាន់ ឃុំដានរុន ស្រុកសូទ្រនិគម ខេត្តសៀមរាប។ ២ឈ្មោះពុធ ថាន់ ភេទប្រុស អាយុ៣៣ឆ្នាំ នៅភូមិគោកចាន់ ឃុំដានរុន ស្រុកសូទ្រនិគម ខេត្តសៀមរាប «ជាបងប្អូនបង្កើត»។ សមត្ថកិច្ចបន្តថា ករណីនេះមូលហេតុជនរងគ្រោះទាំង០២នាក់ និងគ្រួសារ ទៅផ្ជួដីដាំដំឡូង នៅចំការ។

ករណីទី២នៅវេលាម៉ោង៩យប់ថ្ងៃទី០៦ ខែឧសភា ឆ្នាំ២០២១ នៅចំណុចវាលស្រែអូដាច់ពោះខាងជើង ឈាងខាងកើត ភូមិក្រៀលពង ឃុំពពេល ស្រុកសូទ្រនិគម ខេត្តសៀមរាប មានករណីខ្យល់កន្ត្រាក់ បណ្ដាលអោយរលំដើមស្នួល សង្កត់ខ្ទមស្រែ បណ្ដាលឲ្យមនុស្សស្លាប់១នាក់។ ជនរងគ្រោះមានឈ្មោះដា វណ្ណា ភេទប្រុស អាយុ១៥ឆ្នាំ នៅភមិត្រពាំងត្រុំ ឃុំពពេល ស្រុកសូទ្រនិគម ខេត្តសៀមរាប៕SRP

ខេត្តសៀមរាប៖ស្ត្រីជនបរទេសម្នាក់ត្រូវបានមិត្តរបស់ខ្លួនសម្លាប់រួចជនដៃដល់បានរត់គេចខ្លួនបាត់ស្រមោល។ ហេតុការណ៍ភ្ញាក់ផ្អើលបានកើតឡើងនៅវេលាម៉ោង ១៥និង៣០ នាទី ថ្ងៃទី០៥ ខែឧសភា ឆ្នាំ២០២១ នៅចំណុចផ្ទះជួល ស្ថិតនៅភូមិទ្រៀក សង្កាត់សៀមរាប ក្រុងសៀមរាប ខេត្តសៀមរាប។

សមត្ថកិច្ចខេត្តសៀមរាបបានថ្លែងប្រាប់«បណ្ដាញសៀមរាបប៉ុស្ដិ៍»នៅព្រឹកថ្ងៃទី៧ខែឧសភានេះថាករណី«មិត្តប្រុសសម្លាប់មិត្តស្រី» នេះ ជនរងគ្រោះឈ្មោះ ចន្ថា ហ្គោរ៉េត (CHANTHA GORRET) ភេទស្រី អាយុ ៥២ឆ្នាំ ជនជាតិខ្មែរ សញ្ជាតិស្វីស កាន់លិខិតឆ្លងដែនលេខ X១៨៥៧៩៩៨ មុខរបរចូលនិវត្តន៍ បានមកជួលផ្ទះនៅចំណុចកើតហេតុខាងលើ នៅថ្ងៃទី០១ ខែកុម្ភៈ ឆ្នាំ២០២១។

ផ្អែកតាមការស្រាវជ្រាវរបស់សមត្ថកិច្ចជំនាញ និងលោកគ្រូពេទ្យអមសាលាដំបូងខេត្តសៀមរាប បានសន្និដ្ឋានថា៖ ជនរងគ្រោះស្លាប់ដោយសារបែកលលាដ៏ក្បាល «ករណីឃាតកម្ម ចាក់និងវត្ថុមុតស្រួច វាយនិងវត្ថុរឹងផ្នែកក្បាល រួចអូសទៅផ្កាប់មុខនិងខ្នើយខ្ទប់បណ្តាលឲ្យចេញលាមកស្ទះដង្ហើមស្លាប់»។

សមត្ថកិច្ចដដែលបានបន្តថាតាមការអង្កេតស្រាវជ្រាវ គឺជនដៃដល់ គឺជាមិត្តប្រុសរបស់ជនរងគ្រោះ  ដោយជនដៃដល់មានឈ្មោះ ម៉ឺន វិមុល «មិត្តប្រុសដែលស្នាក់នៅជាមួយគ្នា» ភេទប្រុសអាយុប្រហែល ៣៦ឆ្នាំ មានស្រុកកំណើតនៅខេត្តតាកែវ (រត់គេចខ្លួនបាត់)។

បើតាមសមត្ថកិច្ចបានបញ្ជាក់ថាករណីឃាតកម្មនេះ កម្លាំងសមត្ថកិច្ចខេត្តសៀមរាប កំពុងតែស្រាវជ្រាវរកមុខសញ្ញា ដើម្បីចាប់ខ្លួនយកមកផ្តន្ទាទោសតាមផ្លូវច្បាប់។ ចំណែកសាកសពជនរងគ្រោះ រក្សាទុកនៅកន្លែងកើតហេតុរង់ចាំក្រុមគ្រួសារ យកទៅធ្វើបុណ្យតាមប្រពៃណី៕SRP

ខេត្តសៀមរាប៖អភិបាលខេត្តសៀមរាប បានថ្លែងថា យើងមិនអាចធ្វេសប្រហែសបានឡើយ រហូតមកទល់ពេលនេះ ខេត្តសៀមរាបយើង មានអ្នកវិជ្ជមានជំងឺកូវីដ-១៩ កើនឡើងចំនួន៦១នាក់ហើយ បានព្យាបាលជាសះស្បើយចំនួន១៧នាក់ ស្លាប់១នាក់ និង៤៣នាក់ កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាបនៅឡើយទេ។

ដូច្នេះក្រុមការងារស្រាវជ្រាវ និងតាមដានបុគ្គលសង្ស័យថាមានផ្ទុកជំងឺកូវីដ-១៩ ត្រូវបន្តតាមដាន ស្រាវជ្រាវបន្ថែមទៀត ដើម្បីចាត់វិធានការឆ្លើយតបបន្ទាន់ ក្នុងការទប់ស្កាត់នៃការឆ្លងរាលដាលជំងឺកូវីដ-១៩ ក្នុងសហគមន៍របស់យើង។
លោកក៏បានបង្ហាញថា នៅខេត្តយើង ប៉ុន្មានថ្ងៃចុងក្រោយនេះ ការរកឃើញអ្នកវិជ្ជមានកូវីដ.១៩ កាន់តែច្រើនឡើងៗ ការបិទខ្ទប់ទីតាំងដែលពាក់ព័ន្ធ ឱសថស្ថាន មន្ទីរពេទ្យឯកជន ផ្ទះសំណាក់ ហាង ភោជនីយដ្ឋាន និងផ្សារនានា ក្នុងខេត្តបានបិទខ្ទប់ជាបន្តបន្ទាប់កន្លងមកហើយដែរ។ ចំពោះការរីករាលដាលឆ្លងនៃជំងឺកូវីដ១៩នេះ ប្រសិនបើមិនថបថយទេនោះ ទាំងភូមិសាស្ត្រពាក់ព័ន្ធនិងផ្សារតូចធំមួយចំនួនទៀតនៅក្នុងក្រុងសៀមរាប ត្រូវតែបិទខ្ទប់តែម្តង គឺដើម្បីទប់ស្កាត់នូវការឆ្លងរីករាលបន្តទៀត។

លោកក៏បានអំពាវនាវដល់ប្រជាពលរដ្ឋ រស់នៅក្នុងខេត្តសៀមរាប សូមចូលរួម នឹងបង្កើនការប្រុងប្រយ័ត្នខ្ពស់ ក្នុងការអនុវត្តវិធានការការពារជាពិសេសគឺ.៣.ការពារ .៣.កុំ និងត្រូវអនុវត្តកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាព ត្រូវអនុវត្តវិធានការរដ្ឋបាលខេត្ត និងវិធានការឲ្យធ្វើចត្តាឡីស័ករយ:ពេល១៤ ជាកំហិត។ ចំពោះបុគ្គលទាំងឡាយណាដែលប្រព្រឹត្តល្មើសនឹងវិធានការនេះ នឹងប្រឈមការពិន័យអន្តការណ៍ ឬផ្តន្ទាទោសតាមច្បាប់ ជាធរមាន។

លោកទៀ សីហា មានប្រសាសន៍បញ្ជាក់យ៉ាងដូច្នេះ នាព្រឹកមិញនេះ នៅរដ្ឋបាលខេត្តសៀមរាប ក្នុងកិច្ចប្រជុំក្រុមប្រឹក្សាខេត្តពាក់ព័ន្ធក្នុងព្រឹត្តិការណ៍ការឆ្លងរីករាលដាលជំងឺកូវីដ-១៩ ក្នុងសហគមន៍ ២០កុម្ភៈ។

សូមជម្រាបថា ក្នុងកិច្ចប្រជុំនេះ មានរបៀបវារ:ចំនួន៦ រួមមាន៖
១- ពិនិត្យ ពិភាក្សា និងអនុម័តលើសេចក្តីព្រាងកំណត់ហេតុកិច្ចប្រជុំសាមញ្ញលើកទី២៣ របស់ក្រុមប្រឹក្សាខេត្តសៀមរាប អាណត្តិទី៣ កាលពីថ្ងៃទី០៦ ខែមេសា ឆ្នាំ២០២១។
២- ពិនិត្យ ពិភាក្សា និងអនុម័តលើសេចក្តីព្រាងរបាយការណ៍ប្រចាំខែមេសា ឆ្នាំ២០២១ ស្ដីពីការអនុវត្តការងាររបស់រដ្ឋបាលខេត្តសៀមរាប។ ៦- បញ្ហាផ្សេងៗ ដែលបានលើកឡើងនៅក្នុងកិច្ចប្រជុំនេះ។ ក្នុងកិច្ចប្រជុំនោះ ក៏បានពិនិត្យ ពិភាក្សា និងដោះស្រាយបញ្ហានានា ដែលកើតមានឡើងជុំវិញការអនុវត្តការងាររបស់រដ្ឋបាលខេត្ត មន្ទីរ អង្គភាព អាជ្ញាធរក្រុង-ស្រុកផងដែរ៕SRP

ខេត្តឧត្ដរមានជ័យ៖មានការលើកឡើងថា ដីបឹងរមណីយដ្ឋាន ផ្ទះតាម៉ុក កំពុងត្រូវបានអ្នកមានប្រាក់ និងមានអំណាច បានរំលោភកាយយកធ្វើកម្មសិទ្ធិយ៉ាងអនាធិបតេយ្យ។

សេចក្ដីរាយការណ៍បានឲ្យដឹងថានៅថ្ងៃទី០៦ ខែឧសភា ឆ្នាំ២០២១នេះ ដីបឹងរមណីយដ្ឋានផ្ទះតាម៉ុក មួយកន្លែងស្ថិតនៅក្នុងភូមិអភិវឌ្ឍន៍ ឃុំត្រពាំងប្រិយ៍ ស្រុកអន្លង់វែង ខេត្តឧត្ដរមានជ័យ កំពុងត្រូវបានបុគ្គលមានប្រាក់ និងអំណាចមួយក្ដាប់តូច បានឃុបឃិតគ្នា ជីកកកាយហ៊ុព័ទ្ធយកធ្វើជាកម្មសិទ្ធិទៅតាមទំនើងចិត្ត រំលោភទៅលើដីអនុក្រឹត្យ របស់ប្រមុខរាជរដ្ឋាភិបាល សម្ដេចហ៊ុន សែន។

សេចក្ដីរាយការណ៍ បានបន្តថា ដីនៅទីតាំងខាងលើនេះ ជាច្រើនឆ្នាំមកហើយ គ្មាននណាម្នាក់ ហ៊ានទៅប៉ះពាល់ អាស្រ័យផល ឬ អះអាងថា ជាកម្មសិទ្ធិរបស់ខ្លួនឡើយ ស្រាប់តែនៅដើមខែឧសភា នេះ មានគ្រឿងចក្រចូល ឈូសឆាយ កាយពេញដីបឹង ដើម្បីហ៊ុព័ទ្ធយកធ្វើកម្មសិទ្ធិតែម្ដង។

ជុំវិញករណីទន្ទ្រានយកដីបឹងនេះ បណ្ដាញសៀមរាបប៉ុស្តិ៍ នៅមិនទាន់ទទួលបានការបំភ្លឺ ពីអាជ្ញាធរជំនាញពាក់ព័ន្ធនៅឡើយទេ។ ប៉ុន្តែប្រធានមន្ទីរធនធានទឹក លោក ញ៉ឺន គួន បានប្រាប់អ្នកសារព័ត៌មានក្នុងស្រុកថា ៖ លោកមិនបានដឹងទេ លោកថាហ្នឹងអោយមន្ត្រីទៅមើល បើរកឃើញថា ដីនោះនៅក្នុងដីអនុក្រឹដ្ឋ លោកនឹងអោយកាយលុបវិញ ដើម្បីការពារទ្រព្យសម្បត្តិរដ្ឋ ។ ទោះជាយ៉ាងណា មជ្ឈដ្ឋាននានានៅក្នុងស្រុកអន្លង់វែង ខេត្តឧត្ដរមានជ័យ រំពឹងថាចំណាត់ការរបស់ប្រធានមន្ទីរធនធានទឹកខេត្តឧត្តរមានជ័យ និងរកមុខជនរំលោភយកដីបឹងតាម៉ុកឃើញជាក់ជាពុំខានឡើយ៕SRP