Siem Reap Post – Page 619 – Siem Reap News, Cambodia News

ខេត្តកំពង់ចាម៖លោក មី វ៉ាន់ ប្រធានក្រុមការងារជនបង្គោលយុវជនថ្នាក់ជាតិ ចុះជួយស្រុកកងមាស និងលោកស្រី អមដំណើរដោយមន្ត្រីពាក់ព័ន្ធ និងអជ្ញាធរមូលដ្ឋាន នាព្រឹកថ្ងៃទី២៦ ខែមេសា ឆ្នាំ២០២០នេះ បាននាំយកអំណោយសប្បុរសធម៌ ចុះចែកជូនបងប្អូនប្រជាពលរដ្ឋ ក្រីក្រប្រភេទ១ ចំនួន៥១៦គ្រួសារ នៅក្នុងស្រុកកងមាស ខេត្តកំពង់ចាម ព្រមទាំងបានធ្វេីការផ្សព្វផ្សាយអំពីវិធានការបង្ការទប់ស្កាត់ការឆ្លងរីករាលដាលនៃជំងឺកូវីដ១៩ ផងដែរ។

ក្នុងឱកាសចុះចែកអំណោយនោះដែរ លោក មី វ៉ាន់ បានពាំនាំនូវប្រសាសន៍ផ្ដាំផ្ញើ នូវការសាកសួរសុខទុក្ខ ពីសំណាក់សម្ដេចតេជោ ហ៊ុន សែន សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន និងឯកឧត្ដ ហ៊ុន ម៉ាណែត ដែលលោកតែងតែមានការគិតគូរពីសុខទុក្ខរបស់បងប្អូនប្រជាពលរដ្ឋ ដោយមិនប្រកាន់ពណ៍សម្បុរ ពូជសាសន៍ និងនិន្នាការនយោបាយអ្វីឡើយ។
លោក ក៏បានក្រេីនរំលឹក ដល់បងប្អូនប្រជាពលរដ្ឋ អំពីវិធានការបង្ការ និងទប់ស្កាត់ការឆ្លងរីករាលដាលនៃជំងឺកូវីដ១៩ កុំឲ្យមានការឆ្លងដល់សហគមន៍របស់យើង គឺត្រូវមានការចូលរួមទាំងអស់គ្នា ដោយត្រូវធ្វើអនាម័យ លាងដៃនឹងសាប៊ូ ឬអាល់កុលឲ្យបានញឹកញាប់ ត្រូវពាក់ម៉ាស ឬប្រើប្រាស់ក្រម៉ាជាប្រចាំ ស្របទៅតាមការណែនាំរបស់ក្រសួងសុខាភិបាល។
លោកបានបន្តថា ទោះបីជារយៈពេលប៉ុន្មានថ្ងៃមកនេះ ពិតមែនតែក្រសួងសុខាភិបាលពុំរកឃេីញករណីថ្មីក៏ដោយ សូមបងប្អូនបន្តការប្រយ័ត្នជាប់ជានិច្ច ដោយការធ្វេីអនាម័យ នៅឃ្លាតឆ្ងាយពីគ្នា និងមិនចេញក្រៅផ្ទះបេីគ្មានការចាំបាច់ទេនោះ ព្រោះប្រទេសជិតខាងយេីង និងពិភពលោកកំពុងបន្តការឆ្លងរាតត្បាតនៃមេរោគ កូរ៉ូណា វីរុសប្រភេទថ្មី ឬកូវីដ១៩ ដ៏ខ្លាំងក្លានៅឡេីយ។
គួរបញ្ជាក់ផងដែរថា អំណោយដែលត្រូវចែកជូន បងប្អូនប្រជាពលរដ្ឋ នាឱកាសនោះ រួមមាន ឃុំព្រែកក្របៅ ចំនួន២២៩គ្រួសារ ឃុំអង្គរបាន ៥០គ្រួសារ ឃុំខ្ចៅ២០០គ្រួសារ ឃុំស្តៅ៣០គ្រូសារ និងឃុំរកាគយ៧គ្រួសារ ដោយក្នុង១គ្រួសារ ទទួលបាន អង្ករ២៥គីឡូក្រាម ទឹកស៊ីអ៊ីវ០១យួរ សាប៊ូ០៤ដុំ និងម៉ាសការពារ០២ដុំ ដោយឡែកក្រុមយុវជនឃុំ ក៏បានទទួលការឧបត្ថម្ភ ជាអាល់កុល ក្រម៉ា និងថវិកាមួយចំនួនផងដែរ៕SRP

ខេត្តកំពង់ចាម៖អភិបាលខេត្តកំពង់ចាម លោកអ៊ុន ចាន់ដា នៅព្រឹកថ្ងៃទី២៥ ខែមេសាម្សិលមិញ បានអញ្ជើញចុះពិនិត្យវឌ្ឍនភាពនៃការសាងសង់ង់ស្ពានឆ្លងកាត់ទន្លេមេគង្គ ស្ទឹងត្រង់-ក្រូចឆ្មារ។ដែលបច្ចុប្បន្នសម្រេចបានប្រមាណជា ៧៥% ហេីយ។

គួររំលឹកផងដែរថា ស្ពានស្ទឹងត្រង់-ក្រូចឆ្មារនេះ ត្រូវបានបើកការដ្ឋានសាងសង់ជាផ្លូវការកាលពីថ្ងៃទី៩ ខែកុម្ភៈ ឆ្នាំ២០១៩ ក្រោមអធិបតីភាពសម្តេចនាយករដ្ឋមន្រ្តី ហ៊ុន សែន។ ស្ពាននេះ ឆ្លងកាត់ទន្លេមេគង្គ ពីស្រុកស្ទឹងត្រង់ ខេត្តកំពង់ចាម ទៅស្រុកក្រូចឆ្មារ ខេត្តត្បូងឃ្មុំ និងផ្លូវតភ្ជាប់សងខាង ស្ពាន។ ស្ពាននេះមានប្រវែងសរុប ១១៣១ ម និង ទទឹង១៣,៥០ ម ជាប្រភេទស្ពានបេតុងសរសៃដែក គ្រោងចំណាយថវិកាសរុប ៥៦,៩៩៨ លានដុល្លារសហរដ្ឋអាមេរិក ជាហិរញ្ញប្បទានសម្បទាន ពីរដ្ឋាភិបាលនៃសាធារណរដ្ឋប្រជាមានិតចិន រួមជាមួយថវិកាបដិភាគ របស់រាជរដ្ឋាភិបាលកម្ពុជា សម្រាប់ដោះស្រាយផលប៉ះពាល់ និងបោសសម្អាតយុទ្ធភ័ណ្ឌមិនទាន់ផ្ទុះ។ គម្រោងស្ពាននេះ ត្រូវបានសាងសង់ឡើងដោយក្រុមហ៊ុនសំណង់សៀងហៃគ្រុប (Shanghai Construction Group) និងត្រួតពិនិត្យបច្ចេកទេស ដោយក្រុមហ៊ុនទីប្រឹក្សាបច្ចេកទេស ក្វាងចូវវ៉ានអាន។ តាមគ្រោងការស្ថាបនានេះ នឹងត្រូវចំណាយរយៈពេលចំនួន ៤២ខែ ចាប់ពីខែកុម្ភៈ ឆ្នាំ២០១៨ ដែលគ្រោងបញ្ចប់ការសាងសង់នៅដើមឆ្នាំ២០២១ខាងមុខ។
គួរកត់សម្គាល់ផងដែរថា កន្លងមកបងប្អូនប្រជាពលរដ្ឋទាំងនៅត្រើយខាងកើត និងត្រើយខាងលិច អាចធ្វើដំណើរ និងទំនាក់ទំនងគ្នាទៅវិញទៅមកបានតាមរយៈការជិះទូកដ ឬសាឡាងចម្លងកែច្នៃតូចៗ ដែលពួកគាត់តែងតែជួបនូវការលំបាក គ្រោះថ្នាក់ និងមិនសូវមានប្រសិទ្ធភាព ក្នុងការដឹកជញ្ជូនទំនិញ៕SRP

ខេត្តសៀមរាប៖ មនុស្សម្នាក់បានស្លាប់ភ្លាមៗ និងពីរនាក់ទៀតបានរងរបួសដោយគ្រោះថ្នាក់ចរាចណ៍។ ហេតុការណ៍បានកើតឡើងវេលាម៉ោងជាង០៤រសៀល ថ្ងៃទី២៥ខែមេសាឆ្នាំ២០២០នៅចំណុចលេីផ្លូវក្រាលគ្រួសក្រហមប្រឡាយចិន ក្នុងភូមិថ្នល់ដាច់ ឃុំសង្វេីយ ស្រុកជីក្រែង។ រវាងរថយន្តម៉ាកស្តារិចពណ៌ទឹកបុិចចាស់ ពាក់ស្លាកលេខ សៀមរាប ២B៧១៩៥ ទិសដៅពីជេីងទៅត្បូង។ ចំណែកម៉ូតូម៉ាកC១២៥ពណ៌ខ្មៅ ស្លាកលេខសៀមរាប១T០២៣៩ ក្នុងទិសដៅផ្ទុយគ្នា។ ករណីនេះបណ្តាលឲ្យស្លាប់មនុស្សម្នាក់ របួស០២នាក់។ ជនរងគ្រោះ ៖

១. ឈ្មោះ ឆែម ឈុននី ភេទស្រីអាយុ៣៧ឆ្នាំ អ្នកបេីកបរម៉ូតូ ( ស្លាប់ )។
២. ឈ្មោះ ឆែម ធារី ភេទស្រីអាយុ៣១ឆ្នាំ អ្នករួមដំណេីរ ( របួសធ្ងន់ )។
៣. ឈ្មោះ ឆន នឹត ភេទស្រីអាយុ៤ខែ ( របួសស្រាល )។

រស់នៅភូមិព្រៃធំ ឃុំគោកធ្លកលេី ស្រុកជីក្រែង។ ក្រោយកើតហេតុ សមត្ថកិច្ចបានបញ្ជូនជនរងគ្រោះ ទៅមន្ទីរពេទ្យស្រុក។
ដោយឡែកអ្នកបេីកបររថយន្តគេចខ្លួនបាត់ សមត្តកិច្ចកំពុងស្រាវជ្រាវ។ ចំណែករថយន្តនិងម៉ូតូសមត្ថកិច្ចយកមករក្សាទុកនៅអធិការនគរបាលស្រុកជីក្រែង ដើម្បីរងចាំការដោះស្រាយ៕SRP

ខេត្តកំពង់ស្ពឺ៖មានការលើកឡើងថាគម្រោងអភិវឌ្ឍន៏ ឃុំចំនួនបី នៅឃុំអមលាំង ឃុំយ៉ាអង្គ ស្រុកថ្ពង និងឃុំតាសាល ស្រុកឱរ៉ាល់ ឆ្នាំ២០២០ ដែលចំណាយថវិកាជាតិខ្ទង់ជាង១០០០លានរៀល ទំនងមានភាពមិនប្រក្រតី។
ដោយគេសង្ស័យថា អាចមានមន្ត្រីពាក់ព័ន្ធបានត្រូវរ៉ូវគ្នាមិនធ្វើការដាក់ដេញថ្លៃជាសាធារណៈនោះឡើយ។ ហើយនៅពេលនេះគម្រោងខាងលើ ត្រូវក្រុមហ៊ុនបានចាប់អនុវត្តន៍បានខ្ទង់៥០% ផងដែរ។ នេះបើយោងតាមផេកព័ត៌មានមួយឈ្មោះ(គេហទំព័រ ដែនដីថ្មី PDT-News) បានបង្ហោះចែកចាយនៅថ្ងៃទី២៥ខែមេសានេះ។
ផេក គេហទំព័រ ដែនដីថ្មី PDT-News បានសរសេរយ៉ាងដូច្នេះថា តាមប្រភពបានរាយការណ៍ថា នៅឆ្នាំ២០២០នេះ នៅឃុំអមលាំង មានគម្រោងសាងសងស្ពាន និងផ្លូវ។ សម្រាប់ឃុំយ៉ាអង្គ គម្រោងធ្វើទំនប់ទឹក។ចំណែក ឃុំតាសាល ស្រុកឱរ៉ាល់ មានគម្រោងធ្វើសំណង់ទ្វាទឹក ដែលជាការចំណាយថវិកាជាតិដោយទទួលបានការយល់ព្រមពីក្រសួងមហាផ្ទៃ និងមានថវិកាចំណាយសរុបជាង១០០០លានរៀល ប៉ុន្តែគម្រោងខាងលើ ពុំត្រូវអាជ្ញាធរ ធ្វើការដាក់ដេញថ្លៃជាសាធារណៈនោះទេ ។ ផ្ទុយទៅវិញលោក ចិន សាម៉េត នាយកទីចាត់ការផែនការ និងវិនិយោគ នៃរដ្ឋបាលខេត្តកំពង់ស្ពឺ បានសហការជាមួយមេឃុំទាំងបី ប្ដូពីការដេញថ្លៃ ទៅជាការចចារថ្លៃ ដោយប្រគល់គម្រោងនេះអោយទៅក្រុមហ៊ុន ដែលគេសង្ស័យថា ជាក្រុមហ៊ុន បក្ខពួកមន្ត្រីសាលាខេត្តជាអ្នកទទួលការក្នុងការអនុវត្តន៍គម្រោង ក្រោមលេសថា គម្រោងចាំបាច់ទៅវិញ។ ដូច្នេះតម្លៃចំណាយថវិកាជាតិ ក្នុងការសាងសងនេះ គឺ វាស្ថិតនៅក្រោមបបូម៉ាត់របស់លោក ចិន សាម៉េត នាយកទីចាត់ការផែនការ និងវិនិយោគ និងមេឃុំទាំងបីខាងលើ ថាថ្លៃឬថោក អាចទៅតាមចិត្តរបស់ពួកគេតែប៉ុណ្ណោះ។ ហើយការមិនដាក់ដេញថ្លៃបែបនេះ គឺ តម្លៃគម្រោងមិនអាចចុះថ្លៃបានច្រើនដូចការដេញថ្លៃសាធារណៈឡើយ យ៉ាងច្រើនគេធ្វើការបញ្ចុះត្រឹម ១ឬ២% តែប៉ុណ្ណោះ។

ប្រភពបានបន្តថា គម្រោងអភិវឌ្ឍន៍ឃុំ កន្លងទៅនៅពេលមានការដាក់ដេញថ្លៃ គឺ ឃុំខ្លះបញ្ជុះតម្លៃបានដល់៥០ ឬ ៦០% ដែលជាចំណេញសម្រាប់រដ្ឋយ៉ាងច្រើនប៉ុន្តែបើធ្វើតាមការចចារថ្លៃ គឺវាមិនអាចចុះថ្លៃច្រើន គឺ គេធ្វើការបញ្ចុះតិចតួច ដើម្បីជាលេសថា ពួកគេធ្វើការល្អ ចេះចចារថ្លៃសល់លុយខ្លះពីការចំណាយទាំងនោះ។

ប្រភពបានរាយការណ៍ថា នៅក្នុងខេត្តកំពង់ស្ពឺ ចាប់តាំងពីឆ្នាំ២០១៨ មក គឺមានគម្រោងអភិវឌ្ឍន៍ ឃុំ សង្កាត់ជាច្រើនមិនត្រូវបានដាក់ធ្វើការដេញថ្លៃនោះទេ។ ករណីនេះបាននាំអោយរដ្ឋខាតបង់ថវិកាជាតិយ៉ាងច្រើន ប៉ុន្តែអ្នកដែលចំណេញ គឺ ក្រុមមន្ត្រីដែលមានសិទ្ធិអំណាចក្នុងការសម្រេចមិនដាក់ដេញថ្លៃនេះឯង។ ហើយរឿងមិនដាក់ដេញថ្លៃនេះ ត្រូវបានគេដឹងថា គេកំពុងត្រៀមធ្វើនៅឃុំ សង្កាត់ជាច្រើនទៀត។
ដូច្នេះសូមសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោកទេសរដ្ឋមន្ត្រី ឱម យិនទៀង ប្រធានអង្គភាពប្រឆាំងអំពើពុករលួយ និងលោកឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញវត្ថុ មេត្តាចាត់វិធានស្រាវជ្រាវ និងមានចំណាត់ការផ្លូវច្បាប់ផង។
ជុំវិញការលើកឡើងខាងលើនេះ បណ្ដាញព័ត៌មានសៀមរាបប៉ុស្តិ៍ នៅមិនទាន់ទទួលបាន ការបកស្រាយបំភ្លឺ ពីលោក ចិន សាម៉េត នាយកទីចាត់ការផែនការ និងវិនិយោគ នៃរដ្ឋបាលខេត្តកំពង់ស្ពឺ នៅឡើយទេ នារសៀលថ្ងៃនេះ។ ប៉ុន្តែទាក់ទងព័ត៌មាននេះ លោក ចិន សាម៉េត បានប្រាប់នៅក្នុងអត្ថបទរបស់គេហទំព័រ ដែនដីថ្មី PDT-News ថា
រឿងមិនដាក់ដេញថ្លៃខាងលើនេះ គឺដោយសារមេឃុំ គាត់ស្នើរសុំ ថា ជាគម្រោងចាំបាច់ខ្លាចដាក់ដេញថ្លៃជាសាធារណៈទៅអនុវត្តន៍គម្រោងមិនទាន់នាំអោយខកពេលវេលា៕SRP

Sponsored

ខេត្តសៀមរាប៖សូមអបអរសាទរ សម្រាប់ខេត្តសៀមរាប នៅម៉ោងប្រមាណ១០ព្រឹកថ្ងៃទី២៥ ខែមេសា ឆ្នាំ២០២០នេះ បុរសខ្មែរចុងក្រោយ រស់នៅខេត្តសៀមរាប និងបានផ្ទុកមេរោគកូវីដ១៩ ត្រូវបានព្យាបាលជាសះស្បើយ និងអនុញ្ញាតឲ្យចេញពីមន្ទីរពេទ្យបង្អែកខេត្តសៀមរាប ហើយ បន្ទាប់ពីការពិនិត្យរកមិនឃើញវិជ្ជមានមេរោគកូវីដ១៩ ដំណាក់កាលចុងក្រោយជាច្រើនលើក។

តាមការបញ្ជាក់របស់លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្ត និងជាប្រធានក្រុមការងារចត្តឡីស័កខេត្ត បានប្រាប់អ្នកសារព័ត៌មានថា បុរសខ្មែរចុងក្រោយនេះ បានចូលមកសម្រាកព្យាបាលនៅមន្ទីរពេទ្យបង្អែកខេត្តសៀមរាប កាលពីថ្ងៃទី២៣ ខែមីនា ឆ្នាំ២០២០។ ជាមួយនោះ លោកប្រធានមន្ទីរសុខាភិបាលខេត្ត ក៏បានណែនាំដល់ អ្នកជំងឺកូវីដ១៩ ដែលបានជាសះស្បើយទាំង៧រូប ត្រូវបន្តរក្សាខ្លួនដាក់ដោយឡែក១៤ថ្ងៃបន្ថែមទៀត ទោះបីពួកគេត្រូវបានអនុញ្ញាតឲ្យចាកចេញពីមន្ទីរក៏ដោយ។

ទន្ទឹមនឹងការអបអរសារពីក្រុមគ្រូពេទ្យក្នុងឱកាសនោះ បុរសរូបនេះ បានថ្លែងអំណរគុណដល់ សម្ដេចតេជោ ហ៊ុន សែន ក្រសួងសុខាភិបាល និងអាជ្ញាធរខេត្តទាំងអស់ ដែលបានយកចិត្តទុកដាក់អំឡុងពេលរូបលោកសម្រាកព្យាបាលជំងឺ រហូតដល់បានជាសះស្បើយ។

ក្នុងនោះដែរ លោកសូមអំពាវនាវដល់ប្រជាពលរដ្ឋទូទៅ កុំមានការរើសអើង នឹងអ្នកដែលបានជាសះស្បើយពីជំងឺកូវីដ១៩៕SRP

ខេត្តសៀមរាប៖បុរសពីរនាក់បានស្លាប់ខណៈចុះទៅស្តារអណ្ដូងទឹក។ ហេតុការណ៍បានកើតឡើងវេលាម៉ោង៧ព្រឹកនេះ នាថ្ងៃទី២៥ខែមេសាឆ្នាំ២០២០ នៅភូមិលលៃ ឃុំបាគង ស្រុកប្រាសាទបាគង។ លោកវរសេនីយ៍ទោ លឹម សម្បត្តិ អធិការនគរបាលស្រុកប្រាសាទបាគង បានឲ្យដឹងថានៅថ្ងៃទី២៤ខែមេសាម្សិលមិញ វេលាម៉ោង២រសៀល ឈ្មោះឈុត ស៊ានភេទប្រុសអាយុ៣៩ឆ្នាំនៅភូមិឪឡោក ឃុំបាគង ស្រុកប្រាសាទបាគង បានសុំស៊ីឈ្នួលស្ដារក្នុងតម្លៃ១០ម៉ឺនរៀល ពីឈ្មោះធិត សួនភេទស្រីអាយុ៤៥ឆ្នាំ នៅភូមិលលៃ ឃុំបាគង ស្រុកប្រាសាទបាគង។ អធិការបន្តថាបុរសខាងលើ ដែលមានឈ្មោះឈុត ស៊ាន បាននាំគ្នារបស់គាត់ចំនួនពីរនាក់ទៀត ឈ្មោះយឿម រ៉ាត់ហៅពុំភេទប្រុសអាយុ៤៧ឆ្នាំនិងឈ្មោះសោម រ៉ុងភេទប្រុសអាយុ៤១ឆ្នាំនៅភូមិស្ទឹង ឃុំបាគង ស្រុកប្រាសាទបាគង មកស្ដារអណ្ដូង។ ប៉ុន្តែម្ចាស់អណ្ដូង ដែលមានឈ្មោះធិត សួន មិនអោយស្ដារនោះទេ។ មូលហេតុពួកគេទាំង៣នាក់មានសភាពស្រវិងស្រាខ្លាំង។ លោកអធិការបញ្ជាក់ថាលុះព្រឹកមិញនាថ្ងៃទី២៥ខែមេសានេះ ឈ្មោះខាងលើទាំង៣នាក់បានដំណើរមកស្ដារអណ្ដូងដោយឈ្មោះយឿម រ៉ាត់ បានចុះមុន ពេលចុះដល់បាតអណ្ដូងក៏ប្រកាច់ស្លាប់ពេលនោះឈ្មោះឈុត ស៊ាន បានចុះទៅជួយហើយក៏ស្លាប់ទាំងពីរនាក់។ ចំណែកឈ្មោះឈ្មោះសោម រ៉ុង បានស្រែកហៅអ្នកជិតខាងអោយជួយ។ បើតាមអធិការបញ្ជាក់ថាករណីខាងលើនេះមូលហេតុ តាមការពិនិត្យរបស់ផ្នែកជំនាញកោសលវិច័យនិងវិភាគនៅកន្លែងកើតហេតុ គឺជនរងគ្រោះទាំងពីរនាក់បានស្លាប់ដោយកង្វាស់ខ្យល់ឧកស៊ីសែន៕SRP

ខេត្តសៀមរាប៖កម្លាំងការិយាល័យនគរបាលព្រហ្មទណ្ឌកម្រិតស្រាល បានចុះធ្វើការបង្រ្កាបករណីលេងល្បែងស៊ីសងខុសច្បាប់(ក្រឡុកគ្រាប់ឡូតូ និងបៀរ)ឃាត់ខ្លួនបុរសស្ត្រី១១នាក់។
ហេតុការណ៍បានធ្វើឡើងនៅថ្ងៃទី២៤ ខែមេសា ឆ្នាំ២០២០ វេលាម៉ោង១៥និង៣០នាទី នៅចំណុចតូបជួលលក់ឥវ៉ាន់ចាប់ហ៊ួយ ភូមិតាវៀន សង្កាត់សាលាកំរើក ក្រុងសៀមរាបខេត្តសៀមរាប។
លោកវរសេនីយ៍ឯក ហង្ស សូផាតភីរម្យ នាយការិយាល័យនគរបាលព្រហ្មទណ្ឌកម្រិតស្រាលបានឲ្យដឹងថាការបង្ក្រាបនេះដោយមានការបញ្ជារដោយផ្ទាល់ពីលោកឧត្តមសេនីយ៍ទោស្នងការ នគរបាលខេត្ត និងលោកឧត្តមសេនីយ៍ត្រី ស្នងការរង ទទួលផែនការងារនគរបាលព្រហ្មទណ្ឌ។
ដោយឃាត់ខ្លួនបានអ្នកលេងបានចំនួន១១នាក់៖
១.ឈ្មោះ លាង ស្រីលុច ភេទស្រី អាយុ៣២ឆ្នាំ មុខរបរនៅផ្ទះ ទីលំនៅភូមិអញ្ចាញ សង្កាត់នគរធំ ក្រុង/ខេត្តសៀមរាប។
២.ឈ្មោះ ទ្រុល គឹមហាប់ ភេទស្រី អាយុ២២ឆ្នាំ មុខរបរគ្មាន ទីលំនៅភូមិអញ្ចាញ សង្កាត់នគរធំ ក្រុង/ខេត្តសៀមរាប។
៣.ឈ្មោះ ហ៉ីម សុគ័ន ភេទស្រី អាយុ២៤ឆ្នាំ មុខរបរអតីតបុគ្គលិកខារ៉ាអូខេ ទីលំនៅបន្ទប់ជួល ភូមិតាវៀន សង្កាត់សាលាកំរើក ក្រុង/ខេត្តសៀមរាប។
៤.ឈ្មោះ ឆៅ ស្រីទូច ភេទស្រី អាយុ៣២ឆ្នាំ មុខរបរអតីតមេការហាងក្លាស់ស៉ិក ទីលំនៅបន្ទប់ជួល ភូមិតាវៀន សង្កាត់សាលាកំរើក ក្រុង/ខេត្តសៀមរាប។
៥.ឈ្មោះ ឆេង ពន្លឺ ភេទស្រី អាយុ២៨ឆ្នាំ មុខរបរអតីតបុគ្គលិកខារ៉ាអូខេ ទីលំនៅបន្ទប់ជួល ភូមិតាវៀន សង្កាត់សាលាកំរើក ក្រុង/ខេត្តសៀមរាប។
៦.ឈ្មោះ ហង្ស ដាលីន ភេទស្រី អាយុ២៣ឆ្នាំ មុខរបរអតីតបុគ្គលិកហាងចំប៉ីសៀមរាប ទីលំនៅបន្ទប់ជួល ភូមិតាវៀន សង្កាត់សាលាកំរើក ក្រុង/ខេត្តសៀមរាប។
៧.ឈ្មោះ ឈឿត ហួត ភេទស្រី អាយុ៣៧ឆ្នាំ មុខរបរអតីតបុគ្គលិកហាងសែនសប្បាយ ទីលំនៅភូមិអញ្ចាញ សង្កាត់នគរធំ ក្រុង/ខេត្តសៀមរាប។
៨.ឈ្មោះ ប៉ិន ហាទីន ភេទស្រី អាយុ៣៧ឆ្នាំ មុខរបរនៅផ្ទះ ទីលំនៅបន្ទប់ជួល ភូមិតាវៀន សង្កាត់សាលាកំរើក ក្រុង/ខេត្តសៀមរាប។
៩.ឈ្មោះ អេង ណារ៉ា ភេទប្រុស អាយុ៥៣ឆ្នាំ មុខរបរជាងជួសជុលរថយន្ត ទីលំនៅភូមិតាវៀន សង្កាត់សាលាកំរើក ក្រុង/ខេត្តសៀមរាប។
១០.ឈ្មោះ ទុយ វណ្ណី ភេទប្រុស អាយុ៣៥ឆ្នាំ មុខរបរជាងដែក ទីលំនៅ ន្ទប់ជួល ភូមិតាវៀន សង្កាត់សាលាកំរើក ក្រុង/ខេត្តសៀមរាប។
១១.ឈ្មោះ សែន សុខសំបូរ ភេទប្រុស អាយុ៣៣ឆ្នាំ មុខរបរលក់ដូរ ទីលំនៅបន្ទប់ជួល ភូមិតាវៀន សង្កាត់សាលាកំរើក ក្រុង/ខេត្តសៀមរាប។
ករណីនេះដកហូតវត្ថុតាងរួមមាន៖
១,គ្រាប់ក្រឡុកឡូតូ
២,កាតុងលេងឡូតូចំនួន៣០សន្លឹក(កាតុង)
៣,បៀរចំនួន០៣ហ៊ូរ
៤,ម៉ូតូចំនួន០៤គ្រឿង។
ចំណែកមេស៊ីសងត្រូវបានរត់គេចខ្លួន។
លោកបន្តថាដោយការបង្ក្រាបបានតែអ្នកលេង ហើយក្នុងនោះមានស្រ្តីទើបកូនខ្ចីរួចផងនោះ សុំគោលការណ៍ពី
លោកឧត្តមសេនីយ៍ត្រី ស្នងការរង ធ្វើការអប់រំលើកទី១ អោយត្រឡប់ទៅផ្ទះវិញ៕SRP

ខេត្តសៀមរាប៖រដ្ឋបាលខេត្តបានលើកនូវសំណូមពរដល់អង្គការ IOM ក្នុងការគាំពារដល់កិច្ចការងារមួយចំនួន។
១-ការរៀបចំឲ្យរថយន្តឈ្នួលដឹកជញ្ជូនពលករមកពីក្រៅប្រទេសទាំងអស់ត្រូវមានការកត់ត្រាឈ្មោះអ្នកជិះរថយន្ត ដើម្បីងាយស្រួលស្រាវជ្រាវក្នុងករណីមាន ប្រជាពលរដ្ឋមកពីក្រៅប្រទេសណាម្នាក់មានផ្ទុកវីរុសកូវីដ ១៩។
២-ការគាំទ្រក្នុងការផ្សព្វផ្សាយ ឲ្យមានការប្រុងប្រយ័ត្ននិងយកចិត្តទុកដាក់ខ្ពស់ ពីសំណាក់មន្ត្រីដែលជួបអនុវត្តការងារផ្ទាល់ជាមួយបងប្អូនប្រជាពលរដ្ឋមកពីក្រៅប្រទេស និងសាធារណជនទូទៅ។
៣-ការគាំទ្រជាសម្ភារៈដល់ការ ធ្វើចិត្តាឡីស័ក ដោយការដាក់នៅដាច់ដោយឡែករយៈពេល១៤ថ្ងៃ នៅតាមមណ្ឌលចត្តាឡីស័កក្នុងក្រុង ស្រុកនីមួយៗ។
៤-ការរៀបចំបញ្ជីពលករដោយមានការបញ្ជាក់ពីជំនាញវិជ្ជាជីវៈនានាដែលពួកគាត់បានអនុវត្តនៅក្រៅប្រទេស។

ជំនួបពិភាក្សាការងាររវាងរដ្ឋបាលខេត្តជាមួយ អង្គការ IOM លើការងារប្រជាពលរដ្ឋមកពីក្រៅប្រទេស និងការការពារការីករាលដាលជំងឺកូវីដ១៩ ធ្វើនៅរសៀលថ្ងៃទី២៣ខែមេសាម្សិលមិញ ក្រោមវត្តមានរបស់លោក នាក់ ណេរ៉ុន អភិបាលរងខេត្តនិងជាតំណាង លោកទៀ សីហា អភិបាលខេត្ត។
ឆ្លើយតបនឹងសំណូមពរនេះ IOM នឹងធ្វើកិច្ចការនេះជាមួយគណៈកម្មការកូវីដខេត្ត និងគណៈកម្មការគ្រប់គ្រងប្រជាពលរដ្ឋមកពីក្រៅប្រទេស ដើម្បីពិនិត្យលទ្ធភាពក្នុងការគាំទ្រនានា។ ជាក់ស្តែង IOM នឹងផ្តល់នូវសម្ភារ:មួយចំនួនសម្រាប់មន្ត្រីបំពេញកិច្ចការងារផ្ទាល់ជាមួយពលករ និងការងារទប់ស្កាត់ជំងឺកូវីដ១៩៕SRP

ខេត្តកំពង់ចាម៖អំណោយជាម៉ាស់ចំនួន៣០,០០០ម៉ាស់ និងអាល់កុលចំនួន១២០លីត្រ ស្មើនឹង២៤០ដប របស់គណៈកម្មាធិការប្រជាជនខេត្តតៃនិញនៃសាធារណរដ្ឋ សង្គមនិយមវៀតណាម បានឧបត្ថម្ភដល់រដ្ឋបាលខេត្តកំពង់ចាម។ ការទទួលនាព្រឹកមិញនេះ នៅច្រកទ្វារព្រំដែនអន្តរជាតិត្រពាំងផ្លុង-ស្មាច់ ក្នុងខេត្តត្បូងឃ្មុំ ដោយអនុប្រធាន គណៈកម្មការ ប្រយុទ្ធ នឹង ជំងឺ កូវីដ ១៩ ខេត្តកំពង់ចាម លោក ហាន កុសល អភិបាលរងខេត្ត តំណាង លោក អ៊ុន ចាន់ដា អភិបាលខេត្តកំពង់ចាម។

លោកហាន កុសល បានពាំនាំការផ្តាំផ្ញើ សាកសួរសុខទុក្ខ និងថ្លែងអំណរគុណយ៉ាងជ្រាលជ្រៅបំផុតពីសំណាក់ លោក អ៊ុន ចាន់ដា ប្រធានគណៈកម្មការខេត្ត ប្រយុទ្ធប្រឆាំងនឹងជម្ងឺកូវីដ១៩ ខេត្តកំពង់ចាម ជូនចំពោះថ្នាក់ដឹកនាំ និងប្រជាជនខេត្តតៃនិញ នៃសាធារណរដ្ឋសង្គមនិយមវៀតណាម ដែលបានចូលរួមចែករំលែក និងចូលរួមជាមួយរដ្ឋបាលខេត្តកំពង់ចាម គាំទ្រដល់ការងារប្រយុទ្ធប្រឆាំងនឹងការរីករាលដាលនៃជម្ងឺកូវីដ១៩។នេះជាកាយវិការប្រកបដោយសប្បុរស និងបង្ហាញ ឲ្យឃើញពីសាមគ្គីភាព មិត្តភាព រវាងខេត្តទាំងពីរ (កំពង់ចាម -តៃនិញ) ជួយគ្នាក្នុងគ្រាលំបាក ហើយសម្ភារៈទាំងនេះ ផងដែរ រដ្ឋបាលខេត្តនឹងយកទៅប្រើប្រាស់ បម្រើឲ្យយុទ្ធនាការប្រយុទ្ធប្រឆាំងទប់ស្កាត់ការរាតត្បាតនៃជម្ងឺកូវីដ១៩៕SRP