ខេត្តកំពង់ចាម៖ លោក​ អ៊ុន​ ចាន់ដា​ ប្រធាន​គណៈកម្មាធិការ​សាខាកាកបាទក្រហម​កម្ពុជា​ខេត្តកំពង់ចាម​ បានថ្លែងប្រាប់មន្ត្រី​កាកបាទក្រហម​គ្រប់​ថ្នាក់​ ត្រូវ​ធ្វើ​សកម្មភាព​មនុស្សធម៌​ ក៏ដូចជាការងារ​បម្រើ​សង្គម​ ឲ្យ​ចំ​ទិសដៅ​ និង​ខ្លាំងក្លាជាងមុន​បន្ថែម​ទៀត​។

លោកលេីកឡេីង​បែប​នេះ​ ក្នុង​កិច្ច​ប្រជុំ​បូកសរុប​លទ្ធផល​ការងារ​ឆមាស​ទី​១​ និង​លេីក​ទិសដៅ​ការងារ​ឆមាស​ទី​២​ របស់​គណៈកម្មាធិការ​សាខាកាកបាទក្រហម​កម្ពុជា​ខេត្តកំពង់ចាម​ នៅថ្ងៃអង្គារនេះ។ លោក​ អ៊ុន​ ចាន់ដា​ ក៏បានណែនាំ​ដល់​មន្ត្រី​កាកបាទក្រហម​ ត្រូវពិនិត្យ និងត្រៀមគ្រប់លទ្ធភាព ទាំងកម្លាំង មធ្យោបាយថវិកា និងសម្ភារៈ ដើម្បី ជួយអន្តរាគមន៍ ឆ្លើយតបទាន់ពេលវេលា ដល់ជនងាយរងគ្រោះ ពេលមានគ្រោះអាសន្ន គ្រោះមហន្តរាយ កើតឡើង។ ទន្ទឹមនឹងការរៀបចំផែនការ បន្តចុះយុទ្ធនាការ អប់រំផ្សព្វផ្សាយអំពីសុវត្ថិភាពចរាចរណ៍ ផ្លូវគោក ការអប់រំទប់ស្កាត់ ការឆ្លងនៃជម្ងឺរាតត្បាតនានា ទាំងជម្ងឺគ្រុនឈីក គ្រុនឈាម រួមទាំងជម្ងឺកូវីដ-១៩ តាមមូលដ្ឋាន ជាពិសេស​ត្រូវយកចិត្តទុកដាក់ លើកកម្ពស់ សមត្ថភាពមន្ត្រី រួមជាមួយ ការអប់រំថែបំប៉ន យុវជន អ្នកស្ម័គ្រចិត្តបណ្តាញការងារ នៅសហគមន៍ ឲ្យពួកគេក្លាយទៅជា ប្រតិបត្តិករ ដែលមិនអាចខ្វះបាន ក្នុងការបំពេញបេសកកម្ម មនុស្សធម៌ ដ៏ឧត្តុង្គឧត្តម ជូនកាកបាទក្រហមកម្ពុជា។

លោក អ៊ុន ចាន់ដា ក៏បានថ្លែងការកោតសរសើរ និងវាយតម្លៃខ្ពស់ ចំពោះ គណៈកម្មាធិការសាខាទាំងមូល និងមន្ត្រីក្រុមប្រតិបត្តិ ដែលបានខិតខំបំពេញភារកិច្ចយ៉ាងសកម្ម ក្នុងការជំញសកម្មភាព វិស័យអាទិភាពទាំង៤ របស់កាកបាទក្រហមកម្ពុជា ដែលមានហ្លួងម៉ែ ជាព្រះប្រធានកិត្តិយស និងសម្តេចកិត្តិព្រឺទ្ធបណ្ឌិត ប៊ុន រ៉ានី ហ៊ុន សែន ជាប្រធាន សម្រេចបានលទ្ធផល គួរឲ្យកត់សំគាល ពិសេស ការលើកកម្ពស់សកម្មភាពការងារ ឥស្សរជនឆ្នើមថ្នាក់ជាតិ ថ្នាក់សាខា។ ការថែទាំសុខភាពសហគមន៍។ ការត្រៀមបង្ការ ការឆ្លើយតប ការជួយសង្រ្គោះ​ ផ្តល់អំណោយមនុស្សធម៌ ជូនជនរងគ្រោះ និងងាយរងគ្រោះបំផុត បានទាន់ពេលវេលាផងដែរ​។​

គួរ​បញ្ជាក់​ថា​ ក្នុង​កិច្ចប្រជុំ​នេះ​ ក៏មាន​ការ​ប្រកាសសេចក្តីសម្រេច របស់កាកបាទក្រហមកម្ពុជា ស្តីពី ការទទួលស្គាល់​ លោក អ៊ឹង វិសុទ្ធ ជាសមាជិកគណ:កម្មាធិការសាខា​កាកបាទក្រហម​កម្ពុជា​ខេត្តកំពង់ចាម​ ដោយឡែក​ លោក ស៊ាន សុគុន និង លោក សុខ លឹមហៀង ជាសមាជិកបំរុង​ ផងដែរ​៕SRP

ភ្នំពេញ៖សម្ដេចតេជោហ៊ុន សែន នាយករដ្ឋមន្ត្រី បានរំឭក អំពីប្រវត្តិក្រុមហ៊ុនមីនីបៀ ជាពិសេសនៅពេលដែលក្រុមហ៊ុនសម្រេចចិត្តមកវិនិយោគ នៅកម្ពុជាដែលពេលនោះ សម្ដេចតេជោ បានអនុវត្តនូវយុទ្ធសាស្ត្រ ២ នោះគឺត្រីណាមកដល់មុនគឺចាប់យកត្រីនោះ និងត្រូវធ្វើយ៉ាងណា ឲ្យក្រុមហ៊ុនទាំងអស់ ដែលមកកម្ពុជា មានជំនឿចិត្ត ចំពោះកម្ពុជា។

សម្ដេចតេជោមានប្រសាសន៍យ៉ាងដូច្នេះ នៅវិមានសន្តិភាព នាថ្ងៃអង្គារ នេះ ក្នុងឱកាសបានអនុញ្ញាតឱ្យលោក យ៉ូស៊ីហ៉ីសា កៃនុម៉ា (Yoshihisa Kainuma) នាយកប្រតិបត្តិក្រុមហ៊ុនមីនីបៀ (Minebea Mitsumi) ចូលជួបសម្តែងការគួរ និងពិភាក្សាកិច្ចមួយចំនួនពាក់ព័ន្ធការវិនិយោគរបស់ក្រុមហ៊ុននៅកម្ពុជា។

លោក កៃនូម៉ា បានគោរពរាយការណ៍ជូន សម្ដេចតេជោ ពីវឌ្ឍនភាពរបស់ក្រុមហ៊ុន ១០ឆ្នាំកន្លងមក ដែលក្នុងនោះ ក្រុមហ៊ុនបានដាក់ទុនវិនិយោគ សរុបប្រមាណ ១.១២៤ពាន់លានយ៉េន នៅទូទាំងពិភពលោក ដែលមាន ៩៥កន្លែង។

លោក កៃនូម៉ា បានគោរពជម្រាបជូន សម្ដេចតេជោបន្តថា ក្រុមហ៊ុនរបស់លោក គឺយកចិត្តទុកដាក់ខ្លាំងទៅលើគុណភាព តម្លៃ សេដ្ឋកិច្ច សេវាល្អ និងល្បឿនលឿន និងជាពិសេសទៅទៀតនោះ គឺយកចិត្តទុកដាក់ខ្លាំង ទៅលើវិស័យបរិស្ថាន។

លោក កៃនូម៉ា បានបន្ថែមថា រោងចក្ររបស់លោកផលិតភ្លើងអំពូលអិលអ៊ីឌី 100% នៅ កម្ពុជា ហើយបាននាំចេញទៅ លើទីផ្សារទូទាំងពិភពលោក។ ដោយឡែកនៅកម្ពុជាក្រុមហ៊ុនបានតំឡើង អំពូល LED បានចំនួន 18.880 អំពូល ដែលក្នុងនោះ បានជួយដល់ការកាត់បន្ថយការប្រើប្រាស់អគ្គិសនីផង ការកាត់បន្ថយការសាយភាយឧស្ម័ន កាបូនិចផង ព្រមទាំងកាត់បន្ថយ ការចំណាយលើ អគ្គិសនីប្រមាណ១លានដុល្លារក្នុង១ឆ្នាំផង។

ឆ្លៀតក្នុងឱកាសនេះដែរ លោក កៃនូម៉ា បានគោរពថ្លែងអំណរគុណ សម្ដេចតេជោ, មន្ត្រីសុខាភិបាល , ក្រុមគ្រូពេទ្យស្ម័គ្រចិត្តទាំងអស់ ក្រុមគ្រូពេទ្យស្ម័គ្រចិត្ត TYDA ដែលបានយកចិត្តទុកដាក់ជួយដល់កម្មករ ក្រុមហ៊ុនឲ្យរួចផុតពីការរាតត្បាត ពីជំងឺកូវីដ-១៩, ដោយក្នុងចំណោម កម្មករជាង ៦ពាន់នាក់ មានតែកម្មករចំនួន ៧៨នាក់ប៉ុណ្ណោះ ដែលបានឆ្លងជំងឺ covid-19 ហើយរោងចក្ររបស់លោក នៅបន្តដំណើរការជារៀងរហូត ពុំមានការខកខានក្នុងចង្វាក់ផលិតកម្ម និងចង្វាក់ផ្គត់ផ្គង់ឡើយ។ លោកកៃនូម៉ា បានគោរពអញ្ជើញសម្ដេចតេជោជាអធិបតីក្នុង ពិធីខួបទី ១០ឆ្នាំ នៃវត្តមានរបស់ក្រុមហ៊ុន មីនីបៀ នៅកម្ពុជា។

ក្នុងជំនួបពិភាក្សា សម្ដេចតេជោ បានថ្លែងអំណរគុណ ចំពោះលោកកៃនូម៉ា ដែលបានរាយការណ៍ អំពីវឌ្ឍនភាពរបស់ក្រុមហ៊ុន រយៈពេល ១០ឆ្នាំកន្លងមក ហើយបានសម្ដែងនូវការរីករាយនិងសាទរជូនចំពោះ ក្រុមហ៊ុន ដែលរយៈពេល ១០ ឆ្នាំកន្លងមក ទទួលបានជោគជ័យ, ពង្រីកសកម្មភាពរបស់ខ្លួន ជាបន្តបន្ទាប់។

សម្ដេចតេជោ បានថ្លែងអំណរគុណផងដែរ ដល់លោកកៃនូម៉ា ដែលបានចូលរួមចំណែកក្នុងការទប់ស្កាត់ជំងឺកូវីដ19 ហើយសម្តេចតេជោ ក៏បានទទួលយកការអញ្ជើញ ជាអធិបតី ក្នុងពិធីខួប ១០ ឆ្នាំ របស់ក្រុមហ៊ុនមីនេបៀនៅកម្ពុជាផងដែរ៕SRP

ភ្នំពេញ៖ក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងពិធីបិទវគ្គសុក្រឹតការថ្នាក់ដឹកនាំនគរបាល កម្រិត១ និងកម្រិត២ ជំនាន់ទី១ នៅបណ្ឌិត្យសភានគរបាលកម្ពុជា នៅអង្គារនេះ
សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានមានប្រសាសន៍សង្កត់ធ្ងន់ចំៗថា «គ្រប់មន្ត្រីប៉ូលីសដែលមានតួនាទីចាប់ពីអគ្គនាយកដ្ឋានចុះ គឺមិនទុកឱ្យនរណាម្នាក់មិនបានរៀនសូត្រវិជ្ជាជីវៈនគរបាលនោះទេ ហើយបើនរណាមិនព្រមមករៀននោះ សូមដើរចេញពីនគរបាល»។

សម្ដេចស ខេង មានប្រសាសន៍បញ្ជាក់បន្ថែមទៀតថា ការអនុវត្តនេះត្រូវធ្វើឱ្យបានម៉ត់ចត់ ដោយពុំមានការយោគយល់ ផ្អែកលើមនោសញ្ចេតនា គឺត្រូវតែអនុវត្តផ្អែកទៅលើគោលការណ៍ដែលបានរៀបចំ។ ក្នុងករណីដែលមន្ត្រីមានការមមាញឹកក្នុងការងារនៅក្នុងអង្គភាព អាចរៀនព្រឹក ធ្វើការល្ងាចបានតាមភាពជាក់ស្តែងក្នុងអង្គភាពរបស់ខ្លួន ការធ្វើបែបនេះគឺ ដើម្បីឱ្យមន្ត្រីគ្រប់រូបអាចទទួលបានចំណេះដឹង និងបំពេញការងារនៅតាមអង្គភាពបាន។

សម្តេច ស ខេង បានសង្កត់ធ្ងន់បន្ងែមថា ការងាររៀនសូត្រ វគ្គបណ្តុះបណ្តាលវិជ្ជាជីវៈនគរបាលនេះពិតជាមានសារៈសំខាន់ខ្លាំងណាស់ ចំពោះការតែងតាំង និងការតម្លើងតួនាទី ឬការផ្ទេរក្របខណ្ឌផ្សេងៗមកចូលក្របខណ្ឌនគរបាលជាតិនេះ ក្នុងករណីដែលមិនបានចូលរៀនវគ្គបណ្តុះបណ្តាលនេះ វាជាកំហុសរបស់យើង និងជាចំនុចដែលមិនត្រូវមើលរំលងនោះទេ។ ទន្ទឹមនឹងនេះសម្តេចក្រឡាហោមបានថ្លែងនូវការកោតសរសើរ និងអគុណចំពោះបណ្ឌិតសភានគរបាលឯកឧត្តម សន្តិបណ្ឌិតទទួលបន្ទុក និង អគ្គស្នងការនគរបាលដែលបានយកចិត្តទុកដាក់ក្នុងការងារបណ្តុះបណ្តាលនេះផងដែរ៕SRP

ខេត្តសៀមរាប៖លោក លី ធុជ អនុប្រធានទី១ អាជ្ញាធរមីន បានថ្លែងថា៖ អង្គការ HALO Trust គឺជាអង្គការក្រៅរដ្ឋាភិបាលអន្តរជាតិ ដំបូងគេ ដែលមកជួយកម្ពុជា ក្នុងការចាប់ផ្តើមបោសសម្អាតមីន នៅក្នុងប្រទេស និងបានចូលរួមដឹកនាំក្នុងវិស័យនេះរហូតដល់ ពេលបច្ចុប្បន្ន។ ចាប់ពីឆ្នាំ១៩៩៧ ដល់ឆ្នាំ២០២២ អ្នកដោះមីន អង្គការ  HALO Trust បានជួបគ្រោះថ្នាក់ ក្នុងកំឡុងពេលកំពុងប្រតិបត្តិការ ៥០នាក់ ក្នុងនោះបានពលីចំនួន ៩នាក់។

ក្នុងពិធីអបអរសាទរខួបទី ៣០ឆ្នាំ នៃការងារបោសសម្អាតមីន មនុស្សធម៌របស់អង្គការ HALO Trust នៅកម្ពុជា ចាប់ពីឆ្នាំ១៩៩២ ជាមួយលោកជំទាវ Tina Redshaw ឯកអគ្គរាជទូតអង់គ្លេសប្រចាំនៅកម្ពុជា នៅថ្ងៃទី២៥ ខែកក្កដា ឆ្នាំ២០២២ ក្នុងទឹកដីខេត្តសៀមរាប ម្សិលមិញ លោក លី ធុជ បានថ្លែងថា៖ រយៈពេល ៣០ឆ្នាំ ក្នុងបេសកកម្មការបោសសម្អាតមីន មនុស្សធម៌នៅកម្ពុជា អង្គការ  HALO Trust  ប្រចាំនៅកម្ពុជា បានចូលរួមផ្តល់ដីសុវត្ថិភាព ជូនដល់ ប្រជាពលរដ្ឋកម្ពុជានៅតាមសហគមន៍ ប្រមាណជា ១លាននាក់ បោសសម្អាតមីន និងសំណល់ជាតិផ្ទុះពីសង្រ្គោះ ក្នុងទំហំផ្ទៃដី ៤៣៣ គីឡូម៉ែត្រក្រឡា រកឃើញនិងកម្ទេចចោលគ្រាប់មីន ចំនួន ៣២២.៥១៥ និងសំណល់ជាតិផ្ទុះពីសង្គ្រាមចំនួន ២១២.២៦០។

ក្នុងនាមសម្តេចតេជោ ហ៊ុន សែន នាយករដ្ឋមន្រ្តី និងជាប្រធានអាជ្ញាធរមីន លោក លី ធុជ បានបន្តថា៖ ឆ្នាំ១៩៩២ គឺជាការចាប់ផ្តើមបោសសម្អាតមីន មនុស្សធម៌ គ្រប់ជ្រុងជ្រោយនៅកម្ពុជា ដើម្បីចូលរួមជួយដល់ការធានាសន្តិភាព និងការអភិវឌ្ឍ ប្រទេសជាតិ ជាពិសេស ការឆ្លើយតបនឹងតម្រូវការ មនុស្សធម៌ បន្ទាន់មួយ និងដើម្បីមាតុភូមិនិវត្តន៍ និងសុខសុវត្ថិភាព របស់ ប្រជាជនកម្ពុជា ដែលក្រោយមកទៀត សកម្មភាពមីន បានវិវត្តន៍ពីដំណាក់កាល កសាងឡើងវិញ ក្រោយជម្លោះប្រដាប់អាវុធ ទៅជាដំណាក់កាលឆ្លើយតបនឹងការអភិវឌ្ឍ។

លោកថ្លែងថា ក្នុងនាមរាជរដ្ឋាភិបាលកម្ពុជា ខ្ញុំសូមកោតសរសើរ ចំពោះសមត្ថភាពប្រកបដោយវិជ្ជាជីវៈ របស់បុគ្គលិកអង្គការ  HALO Trust ដែលបានលះបង់ និងចូលរួមដល់ការងារបោសសម្អាតមីន និងជួយសង្រ្គោះអាយុជីវិត របស់ ប្រជាពលរដ្ឋកម្ពុជា ទោះបីជាមានស្ថានភាពលំបាកយ៉ាងណាក៏ដោយ។ បច្ចុប្បន្ននេះ អង្គការ  HALO Trust មានបុគ្គលិកជាង ១១០០នាក់ (បរទេស ៦នាក់) ក្នុងនោះបុគ្គលិកជាស្រ្តី ៤៦%។

លោកបានបន្តទៀតថា ក្នុងនាមរាជរដ្ឋាភិបាលកម្ពុជា ប្រជាជនកម្ពុជា និងសម្តេចតេជោ នាយករដ្ឋមន្ត្រី ខ្ញុំសូមថ្លែងអំណរគុណយ៉ាងជ្រាលជ្រៅចំពោះការគាំទ្រដ៏សប្បុរស របស់រាជរដ្ឋាភិបាល និងប្រជាជន នៃចក្រភពអង់គ្លេស ដល់ការចូលរួមគាំទ្រដល់ការងារ បោសសម្អាតមីន និងការរួមចំណែក ដែលមិនអាចខ្វះបានរបស់ អង្គការ HALO Trust ដើម្បីធ្វើការបោសសម្អាតមីន និងសំណល់ជាតិផ្ទុះពីសង្គ្រាមនៅកម្ពុជា។

លោកក៏បានវាយតម្លៃខ្ពស់ ចំពោះការដឹកនាំ និងសម្របសម្រួលរបស់ លោកជំទាវ Tina Redshaw ដែលបានតស៊ូយ៉ាងខ្លាំងក្លា ដើម្បីគាំទ្រដល់សកម្មភាពមីន នៅកម្ពុជា ទោះបីជាចក្រភពអង់គ្លេស បានកាត់បន្ថយថវិកា សម្រាប់សកម្មភាពមីន ជាសាកលក៏ដោយ ក៏លោកជំទាវ Tina បានធ្វើការយ៉ាងស្វិតស្វាញដើម្បីធានាឱ្យមានផលប៉ះពាល់ អប្បបរមាមកលើកម្ពុជា៕SRP

ខេត្តសៀមរាប៖សមត្ថកិច្ចស្រុកស្វាយលើ បានឱ្យដឹងថា នៅថ្ងៃទី ២៥ ខែកក្កដា ឆ្នាំ២០២២ វេលាម៉ោង ១២ នឹង ៣០នាទី មានភ្ញៀវទេសចរណ៍ជនជាតិ ម៉ុងហ្គោលលី (MONGOLIA) ដែលកាន់លិខិតឆ្លងដែនលេខ E 2778114 ឈ្មោះ GANZORIG MYAGMARDORJ ភេទ ប្រុស កើតថ្ងៃទី១២ ខែវិច្ឆិកា ឆ្នាំ១៩៩៦ បានលង់ទឹកស្លាប់នៅចំណុចទឹកធ្លាក់ជាន់ទីបី ស្ថិតក្នុងភូមិព្រះអង្គធំ ឃុំខ្នងភ្នំ ស្រុកស្វាយលើ ខេត្ដសៀមរាប។

សមត្ថកិច្ចបានបន្តថា នៅថ្ងៃទី២៥ ខែកក្កដា ឆ្នាំ២០២២ ជនរងគ្រោះ បានមកលេងទឹកធ្លាក់ព្រះអង្គធំ ជាមួយមិត្តភក្តិម្នាក់ទៀត ដែលកាន់លិខិតឆ្លងដែន E 3056972
ឈ្មោះ OYUNTSENGEL MOHTOJIYGIC កើតថ្ងៃទី២៧ ខែកញ្ញា ឆ្នាំ១៩៧៨ ជាមួយនឹងអ្នកបើក Pass App ឈ្មោះ រឿន រ៉ា ភេទប្រុស អាយុ ៣៤ឆ្នាំ រស់នៅភូមិវត្តដំណាក់ សង្កាត់សាលាកំរើក ខេត្តសៀមរាប។ លុះពេលមកដល់ចំណុចទឹកធ្លាក់ ពួកគេទាំងបីនាក់ បានលេងទឹកជាមួយគ្នា បន្ទាប់ពីលេងបាន១៥នាទី ជនរងគ្រោះ ក៏បានជួយមិត្តភិក្ដស្រី មកទុកនៅមាត់ច្រាំងម្ខាង ហើយខ្លួនក៏បានបបួលអ្នកបើក Pass App ហែលឆ្លងទៅច្រាំងម្ខាងទៀត ពេលហែលទៅដល់ចំណុចផ្ទាំងថ្ម ដែលមានទឹកជ្រៅជនរងគ្រោះ មានសភាពអស់កម្លាំង ហើយក៏តោងផ្ទាំងថ្មដែរ តែដោយសារផ្ទាំងថ្ម មានសភាពស្លែកាន់រអិល ធ្វើឲ្យ ជនរងគ្រោះ តោងមិនជាប់ក៏លេចទៅក្នុងទឹក។ ចំណែកអ្នកបើក Pass App បានខំព្យាយាមស្រវ៉ាជួយចាប់ដៃជនរងគ្រោះ ដែរ តែចាប់មិនទាន់ ដោយសារខ្លួនស្ថិតនៅក្នុងសភាពអស់កម្លាំងដែរ ហើយក៏បានស្រែកឲ្យភ្ញៀវទេសចរណ៍ ដ៏ទៃទៀត ជួយរាវរកជនរងគ្រោះ តែរកពុំឃើញ លុះដល់វេលាម៉ោង ១៣ នឹង១៥នាទី ទើបរាវរកជនរងគ្រោះ ឃើញហើយក៏លើកស្រង់មកដាក់លើគោក បន្ទាប់មកកម្លាំងប៉ុស្តិ៍នគរបាលរដ្ឋបាលខ្នងភ្នំ បានរាយការណ៍ ទៅកម្លាំងជំនាញអធិការដ្ឋាននគរបាល ស្រុកស្វាយលើ ដើម្បីចុះពិនិត្យសពនិងររៀបចំតាមនិតិវិធី៕SRP

ខេត្តសៀមរាប៖ជនជាតិបរទេសម្នាក់បានលង់ទឹកស្លាប់នៅលើភ្នំគូលែន បង្កឲ្យមានការភ្ញាក់ផ្អើល។

ការបានកើតឡើងនៅថ្ងៃទី ២៥ ខែកក្កដាឆ្នាំ ២០២២ នៅទឹកជ្រោះភ្នំគូលែន ចំណុចជាន់ខាងក្រោម ដែលស្ថិតក្នុង ភូមិព្រះអង្គធំ ឃុំខ្នងភ្នំស្រុកស្វាយលើ ខេត្តសៀមរាប។
បើយោងតាមប្រភពព័ត៌មានបឋមពីសមត្ថកិច្ចនៅកន្លែងកើតហេតុ បានប្រាប់សារព័ត៌មាន សៀមរាប ប៉ុស្តិ៍នៅរសៀលថ្ងៃនេះ។

ប្រភបានឲ្យដឹងថា ជនរងគ្រោះជាជនជាតិ ម៉ុងហ្គោល ដែលមានឈ្មោះ GANZORIC MYAGMARDORJ កាន់ប៉ាស្ព័រលេខ E2778114 អាយុ 26 ឆ្នាំ ភេទប្រុស បានលង់ទឹក ក្នុងជ្រោះជាន់ទី ៣។

ជុំវិញហេតុការណ៍នេះសមត្ថកិច្ចនៅពុំទាន់បញ្ជាក់លម្អិតប្រាប់សារព័ត៌មានសៀមរាបប៉ុស្តិ៍នៅឡើយទេ៕SRP

ខេត្តកំពង់ចាម​៖លោក អ៊ុន ចាន់ដា អភិបាលខេត្តកំពង់ចាម បានសម្ដែងការ​គាំទ្រ​ចំពោះ​ សមាគមរាជសីហ៍​ សម្រាប់​សកម្មភាព​មនុស្សធម៌​ តាមរយៈការផ្តល់នូវក្តីស្រលាញ់ ការខ្វាយខ្វល់​ និងការយកចិត្តទុកដាក់ ទៅដល់​ជន​ងាយ​រងគ្រោះ​ នៅខេត្តកំពង់ចាម​។

លោកថ្លែង​បែប​នេះ​ក្នុង​ឱកាស​ជួបពិភាក្សាការងារជាមួយប្រតិភូថ្នាក់ដឹកនាំសមាគមរាជសីហ៍ នៅថ្ងៃចន្ទនេះ។

ក្នុងជំនួបជួបពិភាក្សា លោក ស៊ូម សារឿន ប្រធាន​ សមាគម​រាជសីហ៍​ ​បានលើកឡើងអំពីចក្ខុវិស័យ​របស់​ សមាគម​ សំដៅ​ផ្តល់ក្តីសង្ឃឹមទៅដល់ជនងាយរងគ្រោះ មានដូចជាកុមារកំព្រា ចាស់ជរាគ្មានទីពឹង និងស្ត្រី មេម៉ាយក្រីក្រ នៅតាមសហគមនមូលដ្ឋាន ព្រមទាំងផ្តល់ស្ថានបត្យកម្មព្រលឹងដល់យុវជន នៅក្នុងការ អភិវឌ្ឍសង្គមទៀតផង​។

លោក ស៊ូម សារឿន​ បាន​បន្ត​ថា​ បេសកម្ម របស់យើងគឺ​ ការប្រមូលមូនិធិ ដែលជាជំនួយមនុស្សធម៌ របស់សប្បុរសជនក្នុង និងក្រៅប្រទេស និងប្រើប្រាស់ មូលនិធិទាំងនេះសម្រាប់សកម្មភាពមនុស្សធម និងសប្បុរសធម) ព្រមទាំង​កែលម្អគុណភាពជីវិតរបស់ជនងាយរងគ្រោះនៅក្នុងសង្គម តាមរយៈការផ្តល់នូវក្តីស្រលាញ់ ការខ្វាយខ្វល់​ និងការយកចិត្តទុកដាក់ទៅដល់ពួកគាត់ ដោយមិនគិតពីវប្បធម សាសនា និន្នាការនយោបាយ និនិងស្ថានភាពរបស់បុគ្គល ក្នុងសង្គមនោះឡើយ។

ឱកាសនោះផងដែរ លោក​ អ៊ុន​ ចាន់ដា​ ក៏បាន​ថ្លែងអំណរគុណ​ចំពោះ​ សមាគម​រាជសីហ៍​ ដែល​បាន​ឧបត្ថម្ភ​ ​អង្ករ​ ចំនួន​២តោន​ មី​ ១០០​កេស​ ត្រីខ​ ១០០​យួរ​ និង​ទឹកបរិសុទ្ធ​ ១០០​កេស​ ផ្តល់​ជូន​រដ្ឋបាល​ខេត្តកំពង់ចាម​ សម្រាប់​ប្រេីប្រាស់​ក្នុង​សកម្មភាព​មនុស្សធម៌​​៕SRP

ភ្នំពេញ៖សម្ដេចហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានសម្រេចតែងតាំងឧត្តមសេនីយ៍ឯក ប៊ុនប៉ា ម៉ារីលុច ជាប្រធាននាយកដ្ឋានកណ្ដាលនគរបាលយុត្តិធម៌។

នេះបើយោងតាមអនុក្រឹត្យ ស្តីពី ការតែងតាំងមុខតំណែងមន្ត្រីនគរបាលជាតិកម្ពុជា ចុះហត្ថលេខា ដោយសម្ដេចហ៊ុន សែន។

រាជរដ្ឋាភិបាលសម្រេច៖
មាត្រា១ ៖ តែងតាំងមុខតំណែងលោកឧត្តមសេនីយ៍ឯក ប៊ុនប៉ា ម៉ារីលុច អត្តលេខ ៥៥៥៥៦ ពីអគ្គាធិការរង នៃអគ្គាធិការដ្ឋាន ទៅជាប្រធាននាយកដ្ឋានកណ្តាលនគរបាលយុត្តិធម៌ នៃអគ្គស្នងការដ្ឋាននគរបាលជាតិ។

មាត្រា ២ ៖ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី រដ្ឋមន្ត្រីក្រសួងមហាផ្ទៃ រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ រដ្ឋមន្ត្រី គ្រប់ក្រសួង និងប្រធានគ្រប់ស្ថាប័នដែលពាក់ព័ន្ធ និងសាមីខ្លួនដូចមានចែងក្នុងមាត្រា ១ ខាងលើ ត្រូវទទួល បន្ទុកអនុវត្តអនុក្រឹត្យនេះតាមភារកិច្ចរៀងៗខ្លួនចាប់ពីថ្ងៃចុះហឹត្ថលេខាតទៅ៕SRP

ខេត្តកំពង់ចាម​៖អភិបាលខេត្តកំពង់ចាម​ លោក​ អ៊ុន​ ចាន់ដា បានថ្លែងថា​ ការ​គ្រប់គ្រង​មន្ត្រី​ យេីង​ត្រូវ​ចេះ​អោប​ក្រសោប​ អប់រំ​ណែនាំ​ គឺមិន​ត្រូវ​ប៉ះដៃ​យកដៃ​ប៉ះជេីងយកជេីងនោះទេ​។

លោកលើកឡើង​បែប​នេះ​ ក្នុងកិច្ចប្រជុំផ្សព្វផ្សាយលើសេចក្ដីណែនាំលេខ​ ១៦៩/២២ ស្ដីពីគោលការណ៍បែបបទ និងនីតិវិធីនៃការគ្រប់គ្រងបុគ្គលិករដ្ឋបាលក្រុង ស្រុក​ នៅ​សាលា​ខេត្តកំពង់ចាម​ នៅថ្ងៃចន្ទនេះ។

ក្នុង​កិច្ចប្រជុំ​ លោក​ អ៊ុន​ ចាន់ដា​ បានលើកឡើងថា​ ច្បាប់ស្តីពីការគ្រប់គ្រង រដ្ឋបាលរាជធានី ខេត្ត ក្រុង ស្រុក ខណ្ឌបានផ្ដល់នូវក្របខ័ណ្ឌ គតិយុត្តឲ្យ រាជធានី ខេត្ត ក្រុង ស្រុក ខណ្ឌ ដែលជានីតិបុគ្គលសាធារណៈ ត្រូវគ្រប់គ្រងតាមគោលការណ៍ នៃរដ្ឋបាល ឯកភាព ដើម្បីបង្កើត ជំរុញ និងធ្វើឲ្យមានចិរភាព ដល់ការអភិវឌ្ឍតាមបែបប្រជាធិបតេយ្យ តាមរយៈគោល នយោបាយវិមជ្ឈការ និងវិសហមជ្ឈការ និងដើម្បីសម្របសម្រួលនូវរាល់សកម្មភាពរដ្ឋបាលសាធារណៈនៅ ក្នុងដែនសមត្ថកិច្ចរបស់ខ្លួន។​

អនុលោមតាមគោលការណ៍នេះ តម្រូវឲ្យមានការរៀបចំឡើងវិញនូវ រចនាសម្ព័ន្ធ ប្រព័ន្ធ និងនីតិវិធីអនុវត្តការងាររបស់រាជធានី ខេត្ត ក្រុង ស្រុក ខណ្ឌដែលក្នុងនោះ ការរៀបចំឡើងវិញនូវ ប្រព័ន្ធគ្រប់គ្រង និងអភិវឌ្ឍធនធានមនុស្ស គឺជាកិច្ចការដ៏មានសារៈសំខាន់ និងចាំបាច់មួយ។

អភិបាលខេត្ត​ ក៏បាន​ស្នេីដល់​អង្គភាព​ពាក់ព័ន្ធ​ និង​រដ្ឋបាល​ក្រុង​ ស្រុក​ ត្រូវ​ខិតខំ​អនុវត្ត​មុខងារ​វិស័យមុខងារ ឲ្យ​មាន​ ប្រសិទ្ធិភាព​ និងទទួលបានជោគជ័យ​ ឲ្យ​សាកសម​ទៅនឹង​ការ​ប្រតិភូកម្ម​មុខងារ​ពី​ថ្នាក់ជាតិ​ មក​ឲ្យ​ថ្នាក់​ក្រោម​ជាតិ​​​ ជាពិសេសត្រូវបណ្តុះបណ្តាល មន្ត្រីឲ្យមានចំណេះ ជំនាញច្បាស់លាស់ ក្នុងន័យអនុវត្តការងារជំនាញ នៅតាមអង្គភាព.របស់ខ្លួនបានល្អ ហើយមន្ត្រីរាជការត្រូវ ចងចាំពីលក្ខណៈសម្បត្តិស្នូលទាំង៤​ គឺ ឆន្ទៈម្ចាស់ការ ភក្ដីភាព មនសិកាវិជ្ជាវៈ និងវប្បធម៌សាវាសាធាណៈ​។ ព្រមទាំង​សូមឲ្យអនុវត្តនូវសេចក្តីណែនាំលេខ ១៦៩/២២ មសសណន ចុះថ្ងៃទី១៧ ខែមករា ឆ្នាំ២០២២​ របស់ក្រសួងមុខងារសាធារណៈ ស្ដីពីគោលការណ៍ បែបបទ និងនីតិវិធីនៃការ គ្រប់គ្រងបុគ្គលិករដ្ឋបាលក្រុង ស្រុក ឱ្យបានខ្ជាប់ខ្ជួន និងបានល្អប្រសើរ​ផងដែរ​៕SRP

ភ្នំពេញ៖លោក តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ នៃក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ក្នុងសន្និសីទស្តីពីសមិទ្ធផល សម្រេចបានរយៈពេល៥ឆ្នាំ របស់ក្រសួងកសិកម្ម កាលពីពេលថ្មីៗនេះ ថា ជំងឺដុំពកលើស្បែកគោ-ក្របី( LSD ) បានឆ្លងមកប្រទេស កម្ពុជា កាលពីខែឧសភា ឆ្នាំ២០២១ កន្លងទៅ ដោយក្រុមការងារពាក់ពន្ធ័បាន យកចិត្តទុកដាក់ ចុះអន្តរាគមន៍និងចាត់វិធានការចាំបាច់នានា ដូចជា ការព្យាបាលនិងទិញវ៉ាក់សាំង មកពីបរទេស ដើម្បីទប់ស្កាត់ការរាតត្បាតនៃជំងឺនេះ ដែលរហូតមកដល់បច្ចុប្បន្ន មានសភាពស្ងប់ស្ងាត់ទៅវិញហើយ។

លោកថា បើទោះបីជាជំងឺនេះបានស្ងប់ស្ងាត់ពីក្នុងប្រទេសកម្ពុជា ក៏ពិតមែន ក៏អគ្គនាយកដ្ឋានសុខភាពសត្វ និងផលិតកម្មសត្វ នៃក្រសួងកសិកម្ម រុក្ខាប្រមាញ់ និងនេសាទ នៅតែបន្តធ្វើការណែនាំនិងដាស់តឿន ដល់មន្ទីរកសិកម្ម រាជធានីខេត្តទាំងអស់ ជាពិសេសការិយាល័យផលិតកម្ម និងបសុព្យាបាលរាជធានី-ខេត្ត ដែលនៅជាប់ព្រំដែន ត្រូវបន្តអនុវត្តនិងចូលរួមសហការជាមួយអង្គភាព និងអាជ្ញាធរមូលដ្ឋានពាក់ព័ន្ធជាបន្តទៀត ដើម្បីអាចអន្តរាគមន៍ បានទាន់ពេលវេលា ប្រសិនបើមានករណីផ្ទុះជំងឺសត្វណាមួយ។

ក្នុងនាមក្រសួងកសិកម្ម រុក្ខាប្រមាញ់ និង នេសាទ ក៏បានណែនាំដល់មន្ទីរកសិកម្មទាំង២៥រាជធានី-ខេត្ត ត្រូវបន្តតាមដានជំងឺដុំពកលើស្បែកគោ ក្របី ឱ្យបានជាប់ជាប្រចាំ បើទោះបីជាជំងឺនេះ មានសភាពស្ងប់ស្ងាត់ ហើយក៏ ដោយ ដើម្បីទប់ស្កាត់ការចម្លងឱ្យបានទាន់ពេលវេលា និងមានប្រសិទ្ធភាពខ្ពស់។

លោក បន្តថា «ចំពោះជំងឺដុំពកលើស្បែកគោក្របី LSD នេះ គឺជាជំងឺមួយថ្មី ដែលមិនធ្លាប់មាននៅក្នុងស្រុកដូចគ្នា ដែលវាបានកើតឡើងកាលពីឆ្នាំ២០២១ ហើយជំងឺនេះក៏បានស្ងប់ស្ងាត់ទៅវិញផងដែរ ប៉ុន្តែទោះជាយ៉ាងណាក៏ដោយ ក៏អគ្គនាយកដ្ឋានតែងតែដាស់តឿនទៅដល់មន្ទីរបណ្ដារាជធានីខេត្តទាំង២៥ ដែលមានការិយាល័យផលិតកម្មនិងបសុព្យាបាលរាជធានីខេត្ត គឺនៅតែតាមដានបន្ត បើក្នុងករណីថាមានការផ្ទុះជំងឺសត្វណាមួយ មិននិយាយតែជំងឺដុំពកលើស្បែកនេះទេ វាមានជំងឺផ្សេងៗ ជាច្រើនទៀត ដែលយើងត្រូវតែចុះអន្តរាគមន៍ឱ្យបានទាន់ពេលវេលា ។

សូមបញ្ជាក់ថា ជំងឺដុំពកស្បែកគោ ក្របី (Lumpy Skin Disease-LSD) ជាជំងឺបង្កដោយវីរុសក្នុងក្រុមPoxviridac នៃប្រភេទ Capripoxvirus ដែលបានផ្ទុះឡើងជាលើកដំបូងនៅប្រទេសហ្សំប៊ី (Zambia) នៅឆ្នាំ១៩២៩ ហើយវាបានឆ្លងរាលដាលពាសពេញពិភពលោក ក្នុងនោះ មានទ្វីបអាហ្វ្រិក មជ្ឈឹមបូព៌ា អឺរ៉ុបប៉ែកអាគ្នេយ៍ អាស៊ី កណ្តាល អាស៊ី ខាងត្បូង និងប្រទេសចិន ដែលបង្កផលប៉ះពាល់យ៉ាងធ្ងន់ធ្ងរ ដល់គ្រួសារកសិករចិញ្ចឹមសត្វ និងសេដ្ឋកិច្ចជាតិ៕SRP

ខេត្តក្រចេះ អភិបាលរងស្រុកឈ្នួលលោក នូ សុផល បានជួបគ្រោះថ្នាក់ចរាចរណ៍ ដោយបើករថយន្តខ្លួនឯង ក្រឡាប់ធ្លាក់ពីលើផ្លូវចូលប្រឡាយទឹក បណ្ដាលឲ្យស្លាប់បាត់បង់ជីវិត នៅកន្លែងកើតហេតុ។

ហេតុការណ៍នៅចំណុចផ្លូវជាតិលេខ៧​ (ស្នួល-ក្រចេះ)​ ចន្លោះបង្គោលគីឡូម៉ែត្រលេខ​ ២៦៨ ស្ថិតក្នុងភូមិឃ្សឹមក្រៅ ឃុំឃ្សឹម ស្រុកស្នួល​ ខេត្តក្រចេះ​ នៅវេលាម៉ោង២ និង៣០ ទាបភ្លឺ ឈានចូលថ្ងៃទី២៥ ខែកក្កដា ឆ្នាំ២០២២។

យោងតាមរបាយការណ៍នគរបាលចរាចរណ៍ បានឲ្យដឹងថា លោក នូ សុផល អាយុ ៤៥ឆ្នាំ ជនជាតិខ្មែរ​​ មានទីលំនៅភូមិវត្ត សង្កាត់ក្រចេះ ក្រុងក្រចេះ ខេត្តក្រចេះ ធ្វេីដំណេីរពីទិសខាជេីង ឆ្ពោះទៅទិសខាងត្បូង បើករថយន្ដម៉ាកហាយប្រ៊ីតពណ៌ទឹកប្រាក់​ ពាក់ផ្លាកលេខ ភ្នំពេញ 2R-5300 ដោយបើកបរបរក្នុងល្បឿនលឿន លុះមកដល់ចំណុចកើតហេតុ រថយន្តរបស់លោកបានរ៉េចង្កូតរអិលធ្លាក់ផ្លូវក្រឡាប់ធ្លាក់ចូលក្នុងប្រឡាយទឹក ក្នុងពេលនោះតែម្ដង។

បច្ចុប្បន្ន​ សាកសព ត្រូវបានសមត្ថកិច្ចដឹកបញ្ជូនតាមរថយន្តពេទ្យ ប្រគល់ជូនក្រុមគ្រួសារ នៃសពយកទៅធ្វេីបុណ្យតាមប្រពៃណី​៕SRP

ខេត្តសៀមរាប៖ករណីម្ដាយនិងកូនម្នាក់ដែលបានលង់ទឹកស្លាប់ នៅក្នុងទឹកស្រះ បន្ទាប់ពីបានជិះម៉ូតូធ្លាក់ បង្កឲ្យមានការភ្ញាក់ផ្អើល កាលពីថ្ងៃមិញ ការពិតត្រូវបានបង្ហាញតាមប្រភពរបស់សមត្ថកិច្ច។

យោងតាមរបាយការណ៍របស់នគរបាល ដែលអង្គភាពសៀមរាបប៉ុស្ដិ៍ ទទួលបាន បង្ហាញថា ជនរងគ្រោះ ទី១ឈ្មោះ ធឿង ឈីអឺ  ភេទស្រីអាយុ៣០ឆ្នាំ ជនជាតិខ្មែរ មុខរបរនៅផ្ទះ  មានទីលំនៅភូមិប្រយុទ្ធ សង្កាត់ទឹកវិល ក្រុងសៀមរាប ខេត្តសៀមរាប។ ទី២ ឈ្មោះ ធន់ សុវណ្ណបញ្ញា ភេទប្រុស អាយុ៩ឆ្នាំ ជនជាតិខ្មែរ មុខរបរ សិស្ស មានទីលំនៅភូមិប្រយុទ្ធ សង្កាត់ទឹកវិល ក្រុងសៀមរាប ខេត្តសៀមរាប។

របាយការណ៍បន្តថាយោងតាមការស្ដាប់បំភ្លឺពីប្រជាពលរដ្ឋបានអោយដឹងថា ជនរងគ្រោះថាចង់បានដើមឬស្សី មកធ្វើរបងហ៊ុំព័ទ្ធផ្ទះ ដើម្បីចងភ្ជាប់ជាមួយសំណាញ់ ក៏បានចេញទៅរកកាប់ឬស្សី នៅខាងកើតផ្ទះ ប្រហែល៦០០ម៉ែត្រ។

ប្រភពបន្តថា ជនរងគ្រោះបានបបួលកូន ទៅជាមួយពីរនាក់ ដើម្បីជួយលើកដើមឬស្សី តែកូនបងមិនចង់ទៅទេ ព្រោះមិនស្រួលខ្លួន  ប៉ុន្តែម្ដាយនៅតែ ចង់ឲ្យទៅជាមួយ ទើបកូនឡើងម៉ូតូ ទៅជាមួយ ដោយបានមកខ្ចីកាំបិតផ្គាក់ នៅផ្ទះបងបង្កើតយកទៅ ហើយក្រោយមកក៏បានជិះម៉ូតូ ឌុបកូនទៅកន្លែងកាប់ឬស្សីតែម្ដងទៅ។ ដោយខ្លាចកាប់ឬស្សី បានហើយ យកមកមិនរួច ក៏បាន ឈ្មោះម៉ី ភេទប្រុសអាយុ១២ ឆ្នាំ ទៅជួយសែង។ ប៉ុន្តែនៅពេលដែល ឈ្មោះម៉ី ទៅដល់ស្រាប់តែជនរងគ្រោះប្រាប់ថា កាប់មិនបានទេ ដោយសារផ្គាក់ដែលយកទៅ មិនមុតសោះ ទើបប្រាប់ឲ្យឈ្មោះ ម៉ី មកផ្ទះមុន ហើយឈ្មោះម៉ី ក៏បានជិះកង់មកមុន។ ចំណែកជនរងគ្រោះ ឡើងជិះម៉ូតូឌុបកូនពីរនាក់ ត្រឡប់មកផ្ទះវិញ ស្រាប់តែមកដល់ត្រង់ចំណុចត្រពាំងស្លាកែត ដែលជាត្រពាំងបុរាណទើបនឹងស្ដារ ក៏បានបើកម៉ូតូជ្រុលចង្កូតធ្លាក់ចូលទឹកត្រពាំងតែម្ដង។ តែដោយសារសំណាងល្អ ទើបកូនរបស់គាត់ម្នាក់ ដែលអង្គុយពីមុខបានស្រវ៉ា ឡើងគោកទាន់ ទើបរត់មកប្រាប់ខ្ញុំនឹងយាយថា ម៉ាក់នឹងបងដួលម៉ូតូធ្លាក់ទឹកស្លាប់ហើយ ទើបនាំគ្នាទៅមើលកន្លែងកូនធ្លាក់ ហើយបានទៅស្រវ៉ា រាវរកដែរតែមិនឃើញ ដោយសារមានការរំខានពីប្ដីជនរងគ្រោះទាញ ខ្វែវ ដេញកាប់។ លុះដល់ម៉ោង១០និង៣០នាទី ទើបមានសមត្ថកិច្ច និងប្រជាពលរដ្ឋ នាំគ្នា ផ្អើលទៅមើល និងជួយរាវរក តែនៅតែមិនឃើញ រហូតមកដល់ម៉ោង១២ និង០០នាទី ទើបបានរកប្រទះឃើញសាកសព។

ប្រភពបានបន្តទៀតថាកាលពីមុនជនរងគ្រោះ គឺជាមនុស្សល្អធម្មតាទេ តែពេល ចាប់តាំងពីគាត់មានគ្រួសារ បែកផ្ទះទៅនៅជុំគ្រួសារជាមួយប្ដីមក គាត់មានអាការៈ ចេះតែមិន ស្រួល ដោយសារមានគំនាប ពីប្ដីខ្លាំងពេក សូម្បីតែទៅលេងផ្ទះបងប្អូន ក៏មិនបានដែរ ទើបធ្វើឱ្យគាត់គិតច្រើន មិនហូបបាយទឹក។ ហើយខ្ញុំ ក៏បានយកគាត់ទៅមន្ទីរពេទ្យ ដោយគ្រូពេទ្យ បានប្រាប់គាត់ថា កូនរបស់ខ្ញុំ គិតច្រើនពេកបណ្ដាលឱ្យកើតជំងឺស្ត្រេស និងបូកផ្សំជាមួយនឹងប្ដីរបស់គាត់ធ្វើបាបផ្លូវចិត្តផងដែរ។

បើតាមរបាយការណ៍បញ្ជាក់ថា តាមការពិនិត្យស្លាកស្នាមសពទាំង២ យោងតាមការបំភ្លឺ សនិដ្ឋានរបស់លោកគ្រូពេទ្យ កោសល្យវិច័យខេត្តសៀមរាប  ជនរងគ្រោះស្លាប់ដោយសារ ឈ្លក់ទឹក(លង់ទឹកបណ្ដាលអោយស្លាប់) ប្រាកដមែន។

សូមបញ្ជាក់ថាករណីនេះបានកើតឡើងនៅវេលាម៉ោង១០ និង៥០នាទី ថ្ងៃទី ២៤ ខែកក្ដដា ឆ្នាំ២០២២ នៅចំណុចក្នុងត្រពាំងស្លាកែត ស្ថិតនៅភូមិប្រយុទ្ធ សង្កាត់ទឹកវិល ក្រុងសៀមរាប ខេត្តសៀមរាប៕SRP