ភ្នំពេញ៖ព្រះរាជក្រឹត្យ ត្រាស់បង្គាប់តែងតាំង ឯកឧត្តម ង៉ូវ ប៊ុនរិទ្ធ ជារដ្ឋលេខាធិការ ក្រសួងព័ត៌មាន៕SRP

ខេត្តសៀមរាប៖ក្រុមហ៊ុន ម៉េងលី ជេ. គួច អេឌ្យូខេសិន (Mengly J. Quach Education) ជាក្រុមហ៊ុនមួយ ត្រូវបានទទួលស្គាល់យ៉ាងទូលំទូលាយ តាមរយៈសេវាកម្មអប់រំ ដែលមានគុណភាពខ្ពស់ឈានមុខគេនៅ កម្ពុជា បានសម្រេចនូវសមិទ្ធផលដ៏ធំមួយទៀត ក្នុងប្រវត្តិសាស្រ្ត របស់ខ្លួន ជាមួយនឹងការសម្ពោធជាផ្លូវការនូវ អគារសិក្សាថ្មី សន្លាង របស់មជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អាមេរិកាំង សាខាសៀមរាប។

ពាក់ព័ន្ធនឹងកម្មវិធីនេះ កញ្ញា គង់ លក្ខិណា នាយិកាសាខា មជ្ឈមណ្ឌលភាសា អេ អាយ អាយ សាខាសៀមរាប បានលើកឡើងថា អគារសិក្សាថ្មីនេះ បានចូលរួមចំណែកយ៉ាងច្រើន ក្នុងវិស័យអប់រំ ប្រកបដោយសមិទ្ធផលដ៏អស្ចារ្យ និងផាសុកភាពក្នុងការសិក្សា។

បរិក្ខាទំនើបៗ ក្នុងទីតាំងនីមួយៗ បានជំរុញឱ្យសិស្សានុសិស្ស និងលោកគ្រូ អ្នកគ្រូ សិក្សា និងធ្វើការក្នុងសម័យទំនើបជឿនលឿន ដែលអភិវឌ្ឍ និងបណ្តុះ គំនិតបានយ៉ាងទូលំទូលាយ ដើម្បីប្រកួតប្រជែងជាមួយបណ្តាប្រទេសជុំវិញ ពិភពលោក។

កញ្ញា បានអះអាងថា «បើទោះមជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អាមេរិកាំង ដែលមានកេរ្តិ៍ឈ្មោះល្បីល្បាញរួចទៅ ហើយចំពោះសេវាកម្មអប់រំ យើងនឹងបន្តមានគំនិតផ្តួចផ្តើមបង្កើននូវចក្ខុវិស័យដ៏រឹងមាំបំផុតមួយនៅក្នុងប្រទេសកម្ពុជា ហើយយើងនឹងមានគោលដៅ បំពេញតម្រូវការ សម្រាប់ការអប់រំ ប្រកបដោយគុណភាព នៅក្នុងខេត្តសៀមរាប ជាមួយនឹងកម្មវិធី សិក្សា ផ្អែកលើតម្រូវការ របស់សិស្ស ដែលមានសារៈសំខាន់ខ្លាំងណាស់នៅក្នុងបដិវត្តន៍ឧស្សាហកម្មទី៤ និងការអប់រំនៅសតវត្សរ៍ទី២១។

«នាយិកាដដែល បានបញ្ជាក់យ៉ាងដូច្នេះ «យើងបានត្រៀមខ្លួនរួចជាស្រេច ដើម្បីជួយសិស្សានុសិស្ស និងបណ្តានិស្សិត ដែលរស់នៅខេត្តសៀមរាប ក្នុងការសិក្សា និងបង្កើនជំនាញភាសា របស់ពួកគេ ជាមួយនឹងកម្មវិធីសិក្សា ដែលទទួលស្គាល់ជាអន្តរជាតិ និងអ្នកជំនាញខាងអប់រំ ប្របកដោយ សមត្ថភាព និងបទពិសោធច្រើនឆ្នាំ»។អ្នកឧកញ៉ា វេជ្ជបណ្ឌិត គួច ម៉េងលី ដែលត្រូវបានគេស្គាល់ជាទូទៅថា ជាអ្នកជំនាញខាងវិស័យអប់រំ បានថ្លែងថា លោក និងសហការី ពិតជាមានមោទនភាព និងសេចក្តីសោមនស្សក្រៃលែង ចំពោះអគារសិក្សាថ្មីនេះ។

អ្នកឧកញ៉ា វេជ្ជបណ្ឌិត គួច ម៉េងលី បានសង្កត់ធ្ងន់ថា នេះគឺជាសមិទ្ធផលធំមួយទៀត ក្នុងប្រវត្តិសាស្ត្រ របស់ក្រុមហ៊ុន ម៉េងលី ជេ. គួច អេឌ្យូខេសិន បន្ទាប់ពីបើកដំណើរការដាក់ឱ្យប្រើប្រាស់ អគារមជ្ឈមណ្ឌល ភាសា អេ អាយ អាយ និងសាលារៀន អន្តរទ្វីប អាមេរិកាំង ទាំង៦សាខាក្នុងរាជធានីភ្នំពេញ។វាគ្មិនដ៏ល្បី និងមានប្រជាប្រិយភាពរូបនេះ បានគូសបញ្ជាក់ពីភាពជោគជ័យ វេជ្ជបណ្ឌិត គួច ម៉េងលី និងមូលហេតុដែលបានពង្រីកសាខា នៅតាមបណ្ដាខេត្តជាបន្តបន្ទាប់ដូច្នេះ «ភាពរីកចម្រើនយ៉ាងឆាប់រហ័សនេះ គឺកើតឡើងដោយសារមានការគាំទ្រ និងតម្រូវការខ្ពស់ពីសិស្សានុសិស្ស និងអ្នកអាណាព្យាបាល សិស្សនៅគ្រប់ខេត្តរាជធានីទូទាំងប្រទេស។

វេជ្ជបណ្ឌិត គួច ម៉េងលី បន្តថា កន្លងមកនេះ ទោះស្ថិតនៅក្នុងការ រីករាលដាលនៃជំងឺកូវីដ-១៩ នៅទូទាំងប្រទេស តែគ្រឹះស្ថានសិក្សា របស់លោកបានបន្តពង្រីកសាខាជាបន្តបន្ទាប់។

«បើតាមស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃគ្រឹះស្ថានសិក្សាខាងលើ សម្រាប់ឆ្នាំ២០២២ នេះ លោកបានបន្តពង្រីក សាខាឆ្ពោះទៅតាមបណ្ដាខេត្តជាច្រើនទៀត។  ជាក់ ស្តែងនៅថ្ងៃទី១៧ កក្កដានេះ អ្នកវិនិយោគលើវិស័យអប់រំ អ្នកឧកញ៉ា គួច ម៉េងលី បានដាក់សម្ភោធ ឱ្យប្រើប្រាស់ជាផ្លូវការនូវមជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អាមេរិកាំង សាខាសៀមរាប។លោកបានប្រាប់ឱ្យដឹងថា មានសាខាខេត្តតាកែវ ខេត្តកំពង់ចាម បន្ទាយមានជ័យ រតនគិរី ស្ទឹងត្រែង និងសាខាទួលសង្កែ ក៏នឹងគ្រោងសម្ពោធដាក់ឱ្យដំណើរការ ក្នុងពេលខាងមុខជាបន្តបន្ទាប់ផងដែរ។

១. ហើយម្យ៉ាងវិញទៀត មជ្ឈមណ្ឌលភាសា អេ អាយ អាយ មានវគ្គបណ្តុះបណ្តាលផ្នែកភាសាអង់គ្លេស ភាសាចិន ភាសាថៃ គ្រប់កម្រិត វគ្គបណ្តុះបណ្តាល TESOL ថ្នាក់ត្រៀមប្រឡង TOEFL កម្មវិសិក្សាតាមអនឡាញ (i-Learn) និងសេវាកម្មនាំសិស្សទៅសិក្សានៅក្រៅប្រទេស (SOGO) ផងដែរ។

ចំពោះការចុះឈ្មោះសិក្សានៅមជ្ឈមណ្ឌលភាសា អេ អាយ អាយ សាខាសៀមរាប ទទួលបាន អាហារូបករណ៍ដូចខាងក្រោម៖- កម្មវិធីសិក្សាភាសាអង់គ្លេស (ESL Program)- ៤០% សម្រាប់សិស្សម្នាក់ៗ ពេលចុះឈ្មោះ៤នាក់ឡើងទៅ ក្នុងពេលតែមួយ- ៣០% សម្រាប់សិស្សម្នាក់ៗ ពេលចុះឈ្មោះ៣នាក់ ក្នុងពេលតែមួយ- ២០% សម្រាប់សិស្សម្នាក់ៗ ពេលចុះឈ្មោះ២នាក់ ក្នុងពេលតែមួយ- ១០% សម្រាប់សិស្សទូទៅ- សិស្សដែលកំពុងសិក្សានៅសាលារៀន អន្តរទ្វីប អាមេរិកាំង ទទួលបានអាហារូបករណ៍ ៤០% សម្រាប់ការចុះឈ្មោះចូលរៀន នៅមជ្ឈមណ្ឌលភាសា អេ អាយ អាយ។ -សិស្សដែលកំពុងសិក្សានៅសាលារៀន អន្តរទ្វីប អាមេរិកាំង និងមជ្ឈមណ្ឌលភាសា អេ អាយ អាយ ទទួលបានអាហារូបករណ៍ ៥០% សម្រាប់ការចុះឈ្មោះចូលរៀន សិក្សាភាសាចិន នៅមជ្ឈមណ្ឌលភាសា អេ អាយ អាយ។

២. បវេសនកាលឆ្នាំសិក្សាថ្មី២០២២-២០២៣ សម្រាប់សាខាតាមបណ្តាខេត្ត ក៏ដូចជាសាខានៅក្នុងរាជធានីភ្នំពេញ នឹងចូលរៀនថ្ងៃទី០១ ខែវិច្ឆិកា ឆ្នាំ២០២២ ហើយសម្រាប់សាខាសៀមរាបនេះផ្ទាល់អាចចុះឈ្មោះពីពេលនេះ រហូតដល់ត្រឹមថ្ងៃទី១០ ខែកញ្ញា ឆ្នាំ២០២២ នឹងទទួលបាន៖ – ចូលរៀនក្នុងកម្មវិធីរៀនត្រៀមសម្រាប់ឆ្នាំសិក្សាថ្មី២០២២-២០២៣ ដោយឥតគិតថ្លៃ (ថ្នាក់មត្តេយ្យសិក្សា ដល់ថ្នាក់ទី១២ ចាប់ពីថ្ងៃទី០១ ខែកញ្ញា ដល់ថ្ងៃទី១៤ ខែតុលា ឆ្នាំ២០២២)។-បង់ថ្លៃពាក្យសុំចុះឈ្មោះចូលរៀនត្រឹមតែ៥០% ប៉ុណ្ណោះ។-ទទួលបានអាហារូបករណ៍សិក្សាចំនួន១៥%។ -បើចុះឈ្មោះចាប់ពីថ្ងៃទី១១ ខែកញ្ញា ឆ្នាំ២០២២ ទទួលបានតែអាហារូបករណ៍សិក្សាចំនួន១០% ប៉ុណ្ណោះ។

៣. គួររម្លឹកថា មជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អាមេរិកាំង ត្រូវបានបង្កើតឡើងដោយអ្នកឧកញ៉ា វេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន នៅអំឡុងឆ្នាំ២០០៥ ដើម្បីរួមចំណែកជាមួយរាជរដ្ឋាភិបាលកម្ពុជា ក្នុងការបណ្ដុះបណ្ដាលធនធានមនុស្សប្រកបដោយគុណភាព ប្រសិទ្ធភាព និងសក្ដានុពលសម្រាប់អភិវឌ្ឍន៍ប្រទេសជាតិជាមួយរាជរដ្ឋាភិបាលកម្ពុជា។

សូមបញ្ជាក់ថា ពិធីសម្ពោធបានធ្វើឡើងនៅថ្ងៃអាទិត្យ ទី១៧ ខែកក្កដា ឆ្នាំ២០២២ ព្រឹកមិញនេះ ក្រោមអធិបតីភាពរបស់អ្នកឧកញ៉ា វេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃ ក្រុមហ៊ុន ម៉េងលី ជេ. គួច អេឌ្យូខេសិន រួមទាំងថ្នាក់ដឹកនាំជាន់ខ្ពស់ បុគ្គលិក លោកគ្រូ អ្នកគ្រូនិងអ្នកសារព័ត៌មានយ៉ាងច្រើនកុះករ។

អគារសិក្សាថ្មីរបស់មជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អាមេរិកាំង នេះមានទីតាំងស្ថិតនៅតាមបណ្តោយផ្លូវជាតិលេខ៦ ភូមិសាលាកន្សែង សង្កាត់ស្វាយដង្គំ ក្រុងសៀមរាប ខេត្តសៀមរាប៕SRP

ខេត្តកំពង់ចាម​៖ដោយទឹកចិត្តសទ្ធាជ្រះថ្លា ក្នុងផ្លូវព្រះពុទ្ឋសាសនា នាឱកាសរដូវចូលព្រះវស្សាឆ្នាំ​២០២២​ នេះ នៅថ្ងៃទី១៥ ខែកក្កដា ឆ្នាំ២០២២ នេះ​ លោក​ ខ្លូត ផន ប្រធានក្រុមប្រឹក្សាខេត្ត លោក អ៊ុន ចាន់ដា អភិបាលខេត្តកំពង់ចាម និងលោកស្រី ញូង ចរិយា ព្រមទាំងលោក លោកស្រី​ ជាអភិបាលរងខេត្ត ថ្នាក់ដឹកនាំមន្ទីរ អង្គភាព ជុំវិញខេត្ត បាននាំយក ទេយ្យទាន និងទៀនចំណាំព្រះវស្សា ប្រគេនទដល់​វត្ត ចំនួន​៤​ ស្ថិតនៅក្នុងក្រុងកំពង់ចាម ខេត្តកំពង់ចាម។

រួមមាន៖ វត្ត ខេមវ័ន បឹងស្នាយ វត្តបុទុមរតនដីដុះ វត្តសុទស្សនារាម ជ្រោយថ្ម និងវត្តជោតនារាម បឹងកុក ដោយក្នុង ១វត្ត មានទៀនវស្សា ១គូ អង្ករចំនួន ១៥០គក្រ ទឹកសុទ្ធ ៥កេស ទឹកក្រូច ៥កេស ត្រីខ ១កេស ទឹកត្រី ៥យួរ  ទឹកស៊ីអ៊ីវ ៥យួរ មី ១កេសធំ ទឹកដោះគោ ១កេសធំ ស្កសរ ៥គក្រ តែ ៥គក្រ និងបច្ច័យ ១លានរៀល។ ក្រៅពីនោះ ប្រគេនព្រះសង្ឃចំនួន ៧អង្គ ក្នុង ១អង្គ ទេយ្យវត្ថុ ១ និងបច្ច័យ ២០០ ០០០រៀល ចង្ហាន់ ១ស្រាក់ និងផ្លែឈើ ១កន្រ្តក។

ក្នុងឱកាសនោះ លោក ខ្លូត ផន លោក អ៊ុន ចាន់ដា​ និងលោកស្រី ព្រមទាំង ក្រុមការងារ​ បានអុជធូប​ថ្វាយបង្គំ​ព្រះរតនត្រ័យ​ និងវេរប្រគេនទាន ព្រះវស្សា និងទ័យវត្ថុ ដល់ព្រះសង្ឃ ទៅតាមកិច្ចសាសនា ដោយបានឧទ្ទិសបួង​សួង​ សុំឲ្យ​វត្ថុ​សក្តិសិទ្ឋិ សូមជួយថែរក្សា​ប្រទេសកម្ពុជា ឲ្យមានភាពរីកចំរើន មានសន្តិភាព គង់វង្សជានិរន្តរ៍តរៀងទៅអនាគត។

បន្ទាប់មកព្រះសង្ឃ ក៏បាន​ធ្វើ​បទនម​សក្ការ​ប្រោះព្រំឲ្យពរឲ្យជ័យ សេរីសួស្តី ជ័យមង្គលជូនដល់ ឯកឧត្តម លោកជំទាវ និង​លោក លោកស្រី ពុទ្ធបរិស័ទ ពិសេស បានឧទ្ទិសកុសលដល់បុព្វការីជន មានមាតា បិតា ជីដូនជីតា ញាតិ្តការ​ទាំង ៧សណ្ដាន ព្រម​ទាំង​ ឧទ្ទិសបុណ្យកុសលដល់វីរៈយុទ្ឋជន យុទ្ឋនារី ដែលបានលះបង់ជីវិតក្នុងបុព្វ​ហេតុ​​ជាតិ មាតុភូមិ ផងដែរ។

គួរកត់សម្គាល់ដែរថា តាមទំនៀមទម្លាប់ប្រពៃណីព្រះពុទ្ឋសាសនា ក្នុង ១ឆ្នាំ ព្រះសង្ឃត្រូវគង់ចាំព្រះវស្សាចំនួន ៣​ខែ​ ក្នុង​ទីវត្ត​អារាម គឺ ចាប់ពីថ្ងៃទី១រោច ខែអាសាឍ ដល់ថ្ងៃ១៥កើត ខែ​អស្សុជ ដោយមិនអាចនិមន្ត​បិណ្ឌបាត​ទៅ​ទីណាឡើយ ។ ហេតុដូចនេះហើយ ទើបពុទ្ធបរិស័ទ ដែលមានសទ្ឋា​ជ្រះថ្លា​ក្នុងព្រះពុទ្ឋសាសនា តែងប្រគេនទានព្រះវស្សា និងទ័យវត្ថុផ្សេងៗ ទៅកាន់ទីវត្តអារាម​ ដើម្បី​ ព្រះសង្ឃបានអុជបំភ្លឺ និងមាន​ចង្ហាន់ របស់របរប្រើប្រាស់ ក្នុងកំឡុងពេលកាន់ព្រះវស្សា ៣ខែ នេះ។

សូមបន្ថែមដែរថា បើតាមជំនឿ អានិសង្ឃ​ នៃអ្នក​ដែល​បានប្រគេន​ទានព្រះវស្សា គឺបានបុណ្យច្រើនណាស់ ដូចជានឹង​បាន​ជាមនុស្សដែលមានរូបកាយ ពណ៌​សម្បុរ​ល្អ ចិត្តល្អ និងមានទ្រព្យធន មិនខ្វះ។ល។៕SRP

ខេត្តត្បូងឃ្មុំ៖លោក ជាម ច័ន្ទសោភ័ណ អភិបាលខេត្តត្បូងឃ្មុំ បានថ្លែងថាសម្ដេចតេជោ ហ៊ុន សែន សម្រាប់សកម្មភាពមីន <<បានផ្ដល់ដីមានសុវត្ថិភាព បង្កើតស្នាមញញឹម>>  ក្នុងនោះអាជ្ញាធរមីន បានប្រគល់គម្រោងបោសសម្អាតមីន ក្នុងខេត្តត្បូងឃ្មុំ ជូនដល់ប្រតិបត្តិករ NPMEC ធ្វើការបោសសម្អាតចំការមីន អោយអស់ក្នុងរយៈពេល៦ខែ ដើម្បីប្រកាសជាខេត្តអស់មីនមុនដំបូងគេ ក្រោមការគាំទ្រគម្រោងពីសំណាក់សម្តេចតេជោ​ ហ៊ុន​ សែន។

លោកថ្លែង​បែប​នេះ​ក្នុង​ឱកាស​បេីកការដ្ឋានបោសសម្អាតមីន ក្នុងស្រុកមេមត់ ក្រោម​វត្តមាន​លោកទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន តំណាងសម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា និងជាប្រធានអាជ្ញាធរមីន​ នៅថ្ងៃទី១៥ ខែកក្កដា ឆ្នាំ២០២២​។

លោក ជាម ច័ន្ទសោភ័ណ បានថ្លែងអំណរគុណយ៉ាងជ្រាលជ្រៅដល់ សម្តេចតេជោ នាយករដ្ឋមន្ត្រី ដែលបានផ្តល់ថវិកា បោសសំអាតមីន​ ខណៈ​ពលរដ្ឋ ខេត្តត្បូងឃ្មុំដឹងគុណ សម្តេចតេជោ ជាដរាប​ ដែល​បាន​បញ្ជូន​​កម្លាំងបោសសម្អាតមីន នៃមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព បោសសម្អាតមីន និងកាកសំណល់ សង្រ្គាម (NPMEC) ចំនួន១២៦នាក់ ដេីម្បី​ធ្វេីការ​បោស សសម្អាតមីន ក្នុងស្រុកមេមត់ ខេត្ត​ត្បូងឃ្មុំ​។

លោក លី ធុជ បានលើកឡើងថា ខេត្តត្បូងឃ្មុំ ជាខេត្តប្រវត្តិសាស្រ្ត ដែលសម្តេចតេជោ បានសម្រេចចិត្ត និងពលីសាច់ស្រស់ ឈាមស្រស់ ដើម្បីរំដោះប្រទេសជាតិ និងសង្រ្គោះប្រជាពលរដ្ឋ ចេញពីរបបប្រល័យពូជសាសន៍ កាលពីឆ្នាំ១៩៧៧ ហើយខេត្តត្បូងឃ្មុំ ក៏ជាខេត្តមួយដែលរងផលប៉ះពាល់ច្រើនដោយសារគ្រាប់មីន និងសំណល់ជាតិផ្ទុះពីសង្រ្គាម។

លោកទេសរដ្ឋមន្រ្តី បានស្នើសុំឲ្យកងកម្លាំងរក្សាសន្តិភាព NPMEC ត្រូវបោសសម្អាត និងកម្ទេចគ្រាប់មីន ឲ្យអស់ចេញពីទឹកដីដែលពោរពេញដោយប្រវត្តិសាស្រ្តនេះ។

លោកក៏បានវាយតម្លៃខ្ពស់ចំពោះកងកម្លាំងរក្សាសន្តិភាព NPMEC ដែលបាននាំមកនូវកិត្តិយសជូនជាតិមាតុភូមិ និងនាំយកទង់ជាតិកម្ពុជានៅឆាកអន្តរជាតិ ជាពិសេសចូលរួមផ្តល់នូវសុខសុវត្ថិភាព ផ្តល់សេចក្តីសុខ និងផ្តល់សុខដុមរមនាដល់ប្រទេសនិងប្រជាជនទាំងឡាយណា ដែលធ្លាប់រងគ្រោះដោយសារសង្រ្គាមដូចកម្ពុជា និងដល់ប្រទេសណាដែលមានតម្រូវការ ក្នុងក្របខណ្ឌអង្គការសហប្រជាជាតិ។

លោក លី ធុជ ក៏បានបញ្ជាក់បន្ថែមទៀតថា ក្រោមចលនាជាតិរបស់សម្តេចតេជោនាយករដ្ឋមន្រ្តី មានប្រជាជនគ្រប់ទិសទី បានគាំទ្រ និងចូលរួមយ៉ាងផុសផុលបរិច្ចាគវិភាគទានផ្ទាល់ខ្លួន ក្នុងការចូលរួមដោះស្រាយបញ្ហាគ្រាប់មីននៅកម្ពុជា និងឆ្ពោះទៅកម្ពុជាសូន្យមីន នៅឆ្នាំ២០២៥​៕SRP

ខេត្តកំពង់ចាម​៖លោក​ អ៊ុន​ ចាន់ដា​ អភិបាលខេត្តកំពង់ចាម​ បាន​សម្តែង​ការ​គាំទ្រ យ៉ាងពេញទំហឹង ចំពោះការរៀបចំការប្រកួតកីឡាមហាជនជ្រើសរើសជើងឯក ទូទាំងខេត្តកំពង់ចាម ប្រចាំឆ្នាំ២០២២ របស់មន្ទីរអប់រំ យុវជន និងកីឡាខេត្ត ក្នុងទិសដៅ ដើម្បីជ្រើសរើស រកក្រុមកីឡាករ ឆ្នើម ដែលមានបទពិសោធន៍ បច្ចេកទេស សមត្ថភាព ទេពកោសល្យ និងគោរពនូវក្រមសីលធម៌ បានល្អក្នុងពេលប្រកួត ដើម្បីត្រៀមខ្លួនចូលរួមប្រកួត ជាបន្តបន្ទាប់ទៀតនៅថ្នាក់ភូមិភាគ​ ថ្នាក់ជាតិ ការប្រកួតដណ្ដើម ពានរង្វាន់នានា និងថ្នាក់តំបន់ (ស៊ីហ្គេមឆ្នាំ២០២៣) ខាងមុខនេះ​ផងដែរ។​

លោក អ៊ុន ចាន់ដា​ មានប្រសាសន៍គាំទ្រ យ៉ាងដូច្នេះក្នុងពិធីបើកការប្រកួតកីឡាមហាជនជ្រើសរើស ជើងឯកទូទាំងខេត្តកំពង់ចាម​ ប្រចាំឆ្នាំ២០២២​ នៅទីលានបាល់ទះ (កីឡដ្ឋាន) ការិយាល័យ​អប់រំកាយក្រុងកំពង់ចាម​ នៅថ្ងៃសុក្រនេះ។

អភិបាលខេត្តកំពង់ចាម​ ក៏បានអំពាវនាវ​ ​ បានអំពាវនាវ​ដល់​ស្រទាប់​យុវជនគ្រប់រូប ឲ្យបង្វែចិត្តគំនិតមកលេងកីឡា​ ដើម្បីសុខភាព និងអភិវឌ្ឍផ្នែករាងកាយ បញ្ញាស្មារតី​ និង​សូមឲ្យ​មនុស្ស​ម្នាក់​ត្រូវ​ចេះ​លេង​កីឡា​មួយ​ប្រភេទផងដែរ​។ ​ ​

អភិបាលខេត្តបាន​បន្តថា​ ជាការពិតណាស់វិស័យអប់រំ កាយ និងកីឡា គឺជាវិស័យមួយ ដែល សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងក្រសួងអប់រំ យុវជន និងកីឡា និងសហព័ន្ធកីឡាគ្រប់ប្រភេទ បានយកចិត្តទុកដាក់យ៉ាងខ្លាំង និងចាត់ទុកថា ជាវិស័យមួយដ៏មានសារៈសំខាន់បំផុតក្នុងការអភិវឌ្ឍ ប្រទេសជាតិ សម្រេចបាននូវសមិទ្ធផលយ៉ាងធំធេង និងច្រើនសន្ធឹកសន្ធាប់ ទាំងផ្នែកហេដ្ឋារចនាសម្ព័ន្ធសេដ្ឋកិច្ច សង្គមកិច្ច វប្បធម៌ សាសនា ការកាត់បន្ថយភាពក្រីក្រ ការពារសិទ្ធិសេរីភាព សេចក្ដីថ្លៃថ្នូររបស់មនុស្ស លទ្ធិប្រជាធិបតេយ្យ រស់នៅសុខសាន្តក្រោមដំបូលសុខសន្តិភាព សុខដុមរមនាត្រជាក់ត្រជុំ ប្រកបដោយសិរីមង្គលវិបុលឧត្ដមថ្លៃថ្លាបំផុត។​

លោក​ អ៊ុន​ ចាន់ដា​ ក៏បានសំណូមពរដល់ក្រុមកីឡាករ កីឡាករ កីឡារិនី មន្ត្រីរាជការ កងកម្លាំងប្រដាប់អាវុធ ប្រជាពលរដ្ឋ និងក្មួយៗសិស្សានុ សិស្ស ទាំងអស់ សូមកុំភ្លេចការពារខ្លួន​ ដើម្បីឲ្យចៀសផុតពីជំងឺកូវីដ-១៩ ដោយបន្តអនុវត្តភិក្រម “៣កុំ និង ៣ការពារ” ព្រមទាំង​ចូលរួមទប់ស្កាត់ ការឆ្លងចូល ក្នុងសហគមន៍​ ផងដែរ​៕SRP

ភ្នំពេញ៖ពាក់ព័ន្ធនឹងកិច្ចសហប្រតិបត្តិការលើគ្រប់វិស័យ ជាពិសេស លើវិស័យពាណិជ្ជកម្ម សម្តេចតេជោ  ហ៊ុន សែន បានស្នើឲ្យឯកឧត្តម លើកទឹកចិត្តឲ្យអ្នកវិនិយោគបង់ក្លាដេស មកវិនិយោគនៅកម្ពុជា ជាឃ្លាំងម៉ាស៊ីនកិនស្រូវ និងទិញស្រូវផ្ទាល់ពីប្រជាកសិករ សម្រាប់ស្តុកទុក សម្រាប់កិន និងសម្រាប់នាំចេញទៅប្រទេសបង់ក្លាដេស ផ្ទាល់តែម្ដង ឬអាចរៀបចំសហការជាមួយប្រជាកសិករកម្ពុជា ជាធ្វើកសិកម្មតាមបែបកិច្ចសន្យាក៏បាន។

សម្ដេចហ៊ុន សែន នាយករដ្ឋមន្ត្រី ក៏បានថ្លែងអំណរគុណចំពោះឯកឧត្តម អេ ខេ អាប់ឌុល ម៉ូមិន ចំពោះរបាយការណ៍ពាក់ព័ន្ធ នឹងស្ថានភាពជនភៀសខ្លួនរ៉ូហ៊ីងយ៉ា បញ្ហាសេដ្ឋកិច្ច និងបញ្ហាកូវីដ-១៩។ សម្តេចតេជោ បានសម្ដែងការអបអរសាទរ និងវាយតម្លៃខ្ពស់ចំពោះជោគជ័យ របស់រដ្ឋាភិបាលបង់ក្លាដេស ក្នុងការប្រយុទ្ធប្រឆាំងជំងឺកូវីដ-១៩ផងដែរ។

សម្ដេចតេជោ ហ៊ុន សែន មានប្រសាសន៍យ៉ាងដូច្នេះ នៅវិមានសន្តិភាព នៅថ្ងៃសុក្រនេះ ក្នុងឳកាសអនុញាតិឱ្យឯកឧត្ដម បណ្ឌិត អេ ខេ អាប់ឌុល ម៉ូមិន (A.K. Abdul Momen) រដ្ឋមន្រ្តីការបរទេសនៃសាធារណរដ្ឋប្រជាមានិតបង់ក្លាដែស ចូលជួបសម្ដែងការគួរ និងពិភាក្សាការងារ ក្នុងឱកាសដែលឯកឧត្ដម រដ្ឋមន្រ្តីការបរទេសបង់ក្លាដែស ដឹកនាំគណៈប្រតិភូ មកបំពេញទស្សនកិច្ចផ្លូវការនៅព្រះរាជាណាចក្រកម្ពុជា រយៈពេល ៣ថ្ងៃ។

ក្នុងជំនួប ឯកឧត្តម អេ ខេ អាប់ឌុល ម៉ូមិន បានជម្រាបជូនសម្ដេចតេជោ នូវគោលបំណងចង់ពង្រីក កិច្ចសហប្រតិបត្តិការលើគ្រប់វិស័យជាមួយកម្ពុជា ជាពិសេស វិស័យពាណិជ្ជកម្ម ដើម្បីរក្សាសន្តិសុខស្បៀង នៅគ្រាដែលពិភពលោក កំពុងប្រឈមនឹងបញ្ហាស្បៀងឡើងថ្លៃផងដែរ៕SRP

ភ្នំពេញ៖ក្រសួងសុខាភិបាល នៅថ្ងៃទី១៥ ខែកក្កដា ឆ្នាំ២០២២នេះបានចេញសេចក្តីណែនាំ ស្តីពីការត្រៀម និងឆ្លើយតបនៅពេលមានគ្រោះទឹកជំនន់។ នេះបើយោងតាមលិខិត ចុះហត្ថលេខាដោយរដ្ឋមន្ត្រីក្រសួងសុខាភិបាល លោក ម៉ម ប៊ុនហេង៕SRP

ភ្នំពេញ៖ក្រសួងប្រៃសណីយ៍ និង ទូរគមនាគមន៍ នឹងសាងសង់ស្ថានីយអង់តែនបន្ថែមចំនួន ១០០បង្គោល ដើម្បីលើកកម្ពស់គុណភាពសេវា នៅតាមគោលដៅទេសចរណ៍អាទិភាព និងតំបន់ទេសចរណ៍ដាច់ស្រយាល។

នេះបើតាមសេចក្តីប្រកាសព័ត៌មាន របស់ក្រសួងប្រៃសណីយ៍ និងទូរគមនាគមន៍។ ការសាងសង់បន្ថែមនេះ ស្របតាមប្រសាសន៍ នែនាំដ៍ខ្ពង់ខ្ពស់ របស់សម្ដេច តេជោ នាយករដ្ឋមន្ត្រី ហ៊ុន សែន៕SRP

ខេត្តបាត់ដំបង៖លោកសុខ លូ អភិបាលខេត្តបាត់ដំបងនៅថ្ងៃពុធ ម្សិលមិញ បានអញ្ជើញដឹកនាំក្រុមការងារជំនាញ ចុះពិនិត្យការរអិលដីបាក់ស្រុតច្រាំងស្ទឹងសង្កែ ស្ថិតនៅភូមិស្ដីលើ ឃុំព្រែកហ្លួង ស្រុកឯកភ្នំ ខេត្តបាត់ដំបង ដែលរងការខូចខាតមានប្រវែងប្រមាណ ២០០ម៉ែត្រ ដែលបង្កឡើងដោយគ្រោះធម្មជាតិភ្លៀងធ្លាក់ច្រើនបណ្ដាលឱ្យទឹកហូរបុកច្រោះទីតាំងខាងលើនេះ។

ឆ្លៀតក្នុងឱកាសនោះ លោក សុខ លូ បានមានប្រសាសន៍ណែនាំដល់មន្រ្តីជំនាញឱ្យធ្វើការជួសជុលផ្លូវ ដោយកំណត់ឲ្យក្រុមហ៊ុន​ទទួលខុសត្រូវការងារសាងសង់ ត្រូវបុកគ្រឹះនៅទីតាំងដែលកំពុងបាក់ស្រុតខ្លាំងដើម្បីទប់ស្កាត់ការបាក់បន្តទៀតដើម្បីជួយសម្រួលឱ្យបានប្រើប្រាស់ ជាបណ្តោះអាសន្នសិន និង ដើម្បីធ្វើការទប់ស្កាត់ ពីការរអិលបាក់ដីច្រាំងស្ទឹងបន្តកើតមាននៅកន្លែងនេះបន្ថែមទៀត ដែល វាអាចបង្កកាន់តែធ្ងន់ធ្ងរ។

លោកក៏បានជម្រុញដល់រដ្ឋបាលស្រុកឯកភ្នំ មេឃុំនៅទីនោះ ត្រូវដាក់ស្លាកសញ្ញាប្រុងប្រយ័ត្ន ពីការធ្វើដំណើរនិងបើកបរយានជំនិះគ្រប់ប្រភេទ ឲ្យគេបានដឹង និងប្រុងប្រយ័ត្នខ្ពស់ នៅទីនេះ ចៀសវាងការគ្រោះថ្នាក់កើតឡើងជាយថាហេតុ និងបានណែនាំដល់ អភិបាលស្រុកឯកភ្នំត្រូវហាមប្រាមឡានដឹកទំនិញធុនធំដាច់ខាតដោយមិនឲ្យបើកបរឆ្លងកាត់ដឹកកសិផល លើផ្លូវនេះទៀតទេ។ ជាមួយគ្នានេះក៏ត្រូវមានវិធានការរដ្ឋបាល និងត្រូវហាមឃាត់មិនឲ្យមានការសាងសង់សំណង់ឬលំនៅដ្ឋានថ្មីៗខុសច្បាប់ នៅតាមមាត់ស្ទឹងដែលកំពុងកើតមាននៅក្នុងដែនសមត្ថកិច្ចដែលខ្លួនទទួលខុសត្រូវ ៕SRP

ខេត្តបាត់ដំបង៖លោកសុខ លូ អភិបាលខេត្តបាត់ដំបង បានថ្លែងថា បានធ្វើការណែនាំដល់រដ្ឋបាលក្រុងពិនិត្យមើល ដោះស្រាយសំណង់អាណាធិបតេយ្យ ដែលមាននៅក្នុងក្រុងបាត់ដំបង ដើម្បីធ្វើការរៀបចំប្រជាពលរដ្ឋ ដែលរស់នៅសំណង់ អាណាធិបតេយ្យទៅកន្លែងផ្សេង ដែលមានការរៀបចំជូនពួកគាត់ ឱ្យមានរបៀបរៀបរយ បើពុំដូចនោះទេ ក្រុងបាត់ដំបង នឹងក្លាយជាទីក្រុងសំបូរទៅសំណង់ អាណាធិបតេយ្យ បង្កភាពរញ៉េរញ៉ៃគ្មានសណ្ដាប់ធ្នាប់ពេញទីក្រុង។

លោកសុខ លូ ថ្លែងបែបនេះក្នុងឱកាសអញ្ជើញ ដឹកនាំកិច្ចប្រជុំផ្សព្វផ្សាយនិងណែនាំអំពីការរៀបចំសោភ័ណភាព សណ្តាប់ធ្នាប់ ការរៀបចំសំយ៉ាបផ្ទះ ចំណតរថយន្ត ក្នងក្រុងបាត់ដំបងនៅរសៀលថ្ងៃពុធ ម្សិលមិញ។

លោក សុខ លូ ក៏បានមានប្រសាសន៍លើកឡើងអំពីការរៀបចំសណ្ដាប់ធ្នាប់ ការរៀបចំសំយ៉ាបផ្ទះ និងចំណតរថយន្ត ថាគោលបំណង នៃកិច្ចប្រជុំផ្សព្វផ្សាយនេះ គឺដើម្បីផ្សព្វផ្សាយជូនប្រជាពលរដ្ឋ ឱ្យមានការយល់ដឹងជាមុនសិន អំពីការរៀបចំសោភ័ណភាព សណ្ដាប់ធ្នាប់ ការរៀបចំសំយ៉ាបផ្ទះ មុននឹងឱ្យប្រជាពលរដ្ឋ ចូលរួមជាមួយរដ្ឋបាលខេត្តបាត់ដំបង ក្នុងការចូលរួមរៀបចំសំយ៉ាបផ្ទះ ទៅតាមប្លង់គំរូរបស់រដ្ឋបាលខេត្ត ពិសេសផ្ទះប្រជាពលរដ្ឋ តំបន់អភិរក្សផ្ទះបុរាណ ក្នុងគោលបំណងតែមួយគត់គឺដើម្បីទាក់ទាញ ផលប្រយោជន៍មកនូវ ភ្ញៀវទេសចរមកទស្សនាកំសាន្ត បង្កើនចំណូលប្រជាពលរដ្ឋ។

លោកបានក៏បានធ្វើការណែនាំបន្តដល់រដ្ឋបាលក្រុង ក្នុងការរៀបចំមន្រ្ដីជំនាញ ដែលយល់ដឹងច្បាស់ ធ្វើការផ្សព្វផ្សាយជូនប្រជាពលរដ្ឋ តាមរយៈការធ្វើសិក្ខាសាលាផ្សព្វផ្សាយ ផ្សព្វផ្សាយ តាមខ្នងផ្ទះ អំពីគោលបំណងនៃការរៀបចំសណ្ដប់ធ្នាប់ និងសំយ៉ាបផ្ទះនេះ ដើម្បីឱ្យគាត់ចូលរួមទាំងអស់គ្នា ហើយយើងធ្វើគឺស្មើភាពគ្នា ដោយមិនត្រូវលើកលែងផ្ទះណាមួយ គឺត្រូវធ្វើឱ្យស្មើភាពគ្នា តាមស្ដង់ដារដែលបានកំណត់ទាំងអស់គ្នា។

លោកបានបន្តទៀតថា នៅថ្ងៃអនាគត រដ្ឋបាលខេត្តនឹងបន្តសាងសង់ និងជួសជុលក្រាលកៅស៊ូបន្ថែមទៀត ប៉ុន្តែត្រូវរង់ចាំដំណើរការសាងសង់ លូរំដោះទឹកកខ្វក់ ដែលជាគម្រោងរបស់ADB ឱ្យហើយរួចរាល់សិន ទើបយើងអាចបន្តការសាងសង់ ជួសជុលការក្រាលកៅស៊ូ ជាបន្តបន្ទាប់ ព្រោះបើមិនដូច្នេះទេ កាលណាដែលយើងជួសជុលរួចហើយ ហើយចាប់ផ្ដើមធ្វើលូ តាមក្រោយទៀត វាធ្វើឱ្យកាន់តែខាតពេលវេលា និងថវិកា កាន់តែច្រើន។ លោកក៏សំណូមពរដល់ប្រជាពលរដ្ឋ ឱ្យមានការអត់ធ្មត់ដោយស៊ូអត់ធ្មត់ ហើយបានសមិទ្ធផលថ្មី ចំណាយពេលតែមួយដង ក៏គ្រាន់បើជាងចំណាយពេល ដល់ទៅ២ដង៕SRP

ខេត្តត្បូងឃ្មុំ​៖សាលាខេត្តត្បូងឃ្មុំ​ នៅថ្ងៃទី១៣ ខែកក្កដា ឆ្នាំ២០២២នេះ​ បាន​បេីក​កិច្ចប្រជុំពិគ្រោះយោបល់ ស្ដីពីនីតិវិធីនៃការផ្តល់ទិដ្ឋាការសម្រាប់ការផ្លាស់ប្ដូរស្ថានភាព រដ្ឋបាល និងគ្រួសារ របស់មន្ត្រីរាជការស៊ីវិលនៅថ្នាក់ក្រោមជាតិ​ ក្រោម​វត្តមាន​ លោក ថោ សេដ្ឋាណា រដ្ឋលេខាធិការក្រសួងមុខងារសាធារណៈ និងលោក ពាង ណារិទ្ធ អភិបាលរងខេត្ត​ត្បូងឃ្មុំ​។

ថ្លែងក្នុង​កិច្ច​ប្រជុំ​នោះ​ ថោ សេដ្ឋាណា បានលើកឡើងថា បន្ទាប់ពីការធ្វើបទបង្ហាញ សេចក្ដីព្រាងសេចក្ដីណែនាំទាំងនេះ គឺបានផ្តល់នូវធាតុចូល ក្នុងការអនុវត្ត និង ដើម្បីរៀបចំបំពេញបន្ថែម ចំពោះនីតិវិធីទាំងនេះ នូវប្រព័ន្ធគ្រប់គ្រងទិន្នន័យមន្ត្រីរាជការ ថ្មីជាប្រព័ន្ធមានលក្ខណៈអនឡាញ ដែលគាំទ្រដល់ការគ្រប់គ្រងមន្ត្រីរាជការនៅទូទាំងប្រទេស ដើម្បីលើកកម្ពស់ប្រសិទ្ធភាព និងស័ក្ថិសិទ្ធភាពនៃការបំពេញការងាររបស់មន្ត្រីរាជការ ពង្រឹងសមត្ថភាពស្ថាប័នក្នុងរដ្ឋបាលសាធារណៈ និងជួយគាំទ្រការរៀបចំកម្មវិធីជាតិនានាក្នុងវិស័យសាធារណៈ ដើម្បីប្រើប្រាស់បច្ចេកវិទ្យាថ្មី និងមជ្ឈមណ្ឌលទិន្នន័យថ្មីដែលលក្ខណៈស្តង់ដារ និងបានបញ្ចប់នូវម៉ូឌុលសំខាន់ៗចំនួនពីរ ការគ្រប់គ្រងទិន្នន័យសលាកប័ត្រព័ត៌មានមន្ត្រីរាជការ និងតារាងទូទាត់បៀវត្ស។

លោក រដ្ឋលេខាធិការ បន្តថា ក្រសួង ស្ថាប័នថ្នាក់ជាតិ និងថ្នាក់ក្រោមជាតិ ប្រើប្រាស់ប្រព័ន្ធគ្រប់គ្រងទិន្នន័យមន្ត្រីរាជការ ដើម្បីគ្រប់គ្រងមន្ត្រីរាជការ ចាប់តាំងពីការជ្រើសរើសមន្ត្រីរាជការ ការវិវត្តអាជីពរបស់មន្ត្រីរាជការ រួមមានការតែងតាំង ការវាយតម្លៃ ការអនុវត្តការងារ ការពង្រាយមន្ត្រី ការពិពណ៌នាមុខតំណែង ការបណ្តុះបណ្តាល ការវិភាគមុខងារ និងការរៀបចំបៀវត្សនិងប្រាក់ឧបត្ថម្ភផ្សេងៗ រហូតដល់ការចូលនិវត្តន៍។

លោក ថោ សេដ្ឋាណា បានបញ្ជាក់ទៀតថា ការប្រើប្រាស់ប្រព័ន្ធគ្រប់គ្រងទិន្នន័យ នេះ បានផ្តល់ភាពច្បាស់លាស់ ភាពងាយស្រួលក្នុងការរៀបចំរបាយការណ៌ និងស្ថិតិមន្ត្រីរាជការ អាចទាញទិន្នន័យមន្ត្រីរាជការ ស្ថិតិ និងរបាយការណ៍ផ្សេងៗ របស់សាមីក្រសួង- ស្ថាប័ន មកប្រើប្រាស់បានគ្រប់ពេលវេលាជាពិសេសមន្រ្តីរាជការអាចពិនិត្យព័ត៌មានផ្ទាល់ខ្លួនតាមរយៈ Mobile App និងអាចធ្វើបច្ចុប្បន្នភាពព័ត៌មានមួយចំនួនរបស់ខ្លួនបាន ប្រកបដោយប្រសិទ្ធភាព​ផងដែរ​៕SRP

ខេត្តសៀមរាប៖ថ្លែងក្នុងឱកាសពិធីដាំកូនឈើហូបផ្លែចំនួន​ ៨០០ដេីម នៅមជ្ឈមណ្ឌល​សិក្សាស្រាវជ្រាវ​ និងអភិរក្ស​កេសរកូល​ សុខ​ អាន​ ភ្នំ​គូលែនដើម្បីអបអរសាទរ​ទិវាជីវៈចម្រុះអន្តរជាតិ ឆ្នាំ២០២២ នៅរសៀល​ថ្ងៃ​អង្គារ​ ម្សិលមិញ លោក
សាយ សំអាល់ រដ្ឋមន្ត្រីក្រសួងបរិស្ថាន និងជាប្រធានក្រុមប្រឹក្សាជាតិអភិវឌ្ឍន៍ដោយចីរភាព បានមានប្រសាសន៍ថា៖ ឧទ្យានជាតិព្រះជ័យវរ្ម័ន-នរោត្តម​ “ភ្នំគូលែន” មិនត្រឹមតែជាតំបន់ដែលមានជីវៈចម្រុះគ្រប់ប្រភេទនោះទេ ថែមទាំងជាទឹកដីពោរពេញដោយសម្បត្តិវប្បធម៌ អរិយធម៌ពីបុរាណផងដែរ។ ដូច្នេះ យើង នឹងធ្វើឱ្យឧទ្យានជាតិ មួយនេះឱ្យក្លាយជាតំបន់ទេសចរណ៍ផ្សារភ្ជាប់នឹងទឹកដី ដោយធ្វើយ៉ាងណាបង្កើននូវចំណូលជូនប្រជាសហគមន៍ តាមរយៈអេកូទេសចរណ៍ ការចិញ្ចឹមសត្វ ដាំដំណាំកសិកម្ម​ និងការកសាងសេដ្ឋកិច្ចមូលដ្ឋាន គឺពិតជាមានសារៈសំខាន់ណាស់ ក្នុងកិច្ចការពារអភិរក្សធនធានធម្មជាតិ ពីព្រោះថា កាលណាជីវភាពក្នុងសហគមន៍រីកចម្រើន ពួកគាត់មានការងារធ្វើ​ មានប្រាក់ចំណូល នោះពួកគាត់ក៏លែងចូលព្រៃកាប់ឈើ ទន្ទ្រានដី ឬបរបាញ់សត្វទៀតដែរ។

លោក សាយ សំអាល់ ថា៖ជាក់ស្តែងនៅក្នុងឧទ្យានជាតិព្រះជ័យវរ្ម័ន-នរោត្តម​ “ភ្នំគូលែន” យើងបានបង្កើតស្ថានីយបន្សុទ្ធពូជជ្រូកកណ្តុរ សម្រាប់ចែកជូនដល់សហគមន៍ផ្សេងៗ ក្រៅពីទទួលប្រាក់ចំណូល​ ពីអនុផលព្រៃឈើ និងបានជំរុញឱ្យពួកគាត់ចិញ្ចឹមសត្វ ដាំដំណាំបន្លែបង្ការផ្សេងៗរួមផ្សំ​ ដើម្បីបង្កើនប្រាក់ចំណូល និងធានាបាននូវសន្តិសុខស្បៀងសម្រាប់សហគមន៍ ក៏ដូចជាតំបន់ការពារធម្មជាតិដែលពួកគាត់រស់នៅផងដែរ។

រដ្ឋមន្ត្រីបរិស្ថាន បានបន្ថែមថា​៖ ការដើរកម្សាន្ត របស់ភ្ញៀវទេសចរគ្រប់ទីកន្លែងក្នុងប្រទេស ក៏ដូចជា​ ការអភិវឌ្ឍសព្វបែបយ៉ាងដូចពេលបច្ចុប្បន្ននេះ គឺបានមកពីកត្តាសុខសន្តិភាព ស្ថេរភាពនយោបាយ ដែលសម្តេចតេជោ ហ៊ុន សែន នាយករដ្ឋមន្ត្រី រកបានមកដោយកម្រ​ ហេតុនេះក្នុងនាមយើងជាមន្ត្រីរាជការស៊ីវិល និងអ្នកជំនាន់ក្រោយទាំងអស់​ ត្រូវតែថែរក្សាសុខសន្តិភាព ដែលយើងកំពុងមាននេះ បន្តទៅមុខទៀត ដើម្បីបន្តការអភិវឌ្ឍ រីកចម្រើននៃប្រទេសជាតិយើង៕SRP