ខេត្តសៀមរាប៖អាជ្ញាធរស្រុកអង្គរជុំ បានរាយការណ៍ថា ផ្ទះចំនួន២ខ្នង ត្រូវបានអគ្គិភ័យឆេះផ្ទះអស់ទាំងស្រុង ដោយបំផ្លាញ ទ្រព្យសម្បត្តិ រាប់សិបលានរៀល។

ហេតុការណ៍បានកើតឡើងវេលាម៉ោង ១៤ និង ១០នាទី ថ្ងៃទី ២០ ខែមករា ឆ្នាំ២០២១ នៅភូមិដូនស្វា ឃុំចារឈូក ស្រុកអង្គរជុំ ខេត្តសៀមរាប។

អាជ្ញាធរបន្តថាម្ចាស់ផ្ទះទី១
ឈ្មោះ ឈិន ណឺ ភេទប្រុស អាយុ៥២ឆ្នាំ ឈើលើ ថ្មក្រោម ប្រក់ក្បឿង ទំហំ៨ គុណ១២ម៉ែត្រ
ឆេះទាំងស្រុង រួមទាំងទ្រព្យសម្បត្តិជាច្រើនរួមមាន : គ្រែធំៗ ៦ (ប្រភេទឈើធ្នង់) ស្មើ១៦០០០$
-សាឡុង ១ឈុត (ឈើធ្នង់) ស្មើ១៥០០$
-ប្រាក់ខ្មែរ សរុប ៣០លាន
-ប្រាក់ដុល្លា ១៨០០០ដុល្លា
-រថយន្ត ២គ្រ. (កាមរី៩១ – អ៊ីស៊ូស៊ុយ ) ឆេះអស់40%
-ម៉ាស៊ីនត្រជាក់ ទូរទឹកកក សម្លៀកបំពាក់..។

ទី២ឈ្មោះ ទុំ មករា ភេទប្រុស អាយុ៣១ឆ្នាំ ឈើលើ ថ្មក្រោម (ផ្ទះលក់ទូរស័ព្ទដៃ) ប្រក់ក្បឿង ទំហំ ១៥ គុណ៩ម ឆេះទាំងស្រុង និងអស់ទ្រព្យសម្បត្តិរួមមាន :
-គ្រែអស់ ៣ (ប្រភេទឈើធ្នង់)
-ម៉ាស៊ីនត្រជាក់ ទូរទឹកកក
-សម្លៀកបំពាក់
-មាស ប្រាក់ (ពុំមានបាត់បង់ទេ) ។
មូលហេតុតាមការសន្និដ្ឋាន បណ្តាលមកពីឆ្លងចរន្តអគ្គីសនី។

ករណីនេះការចុះអន្តរាគមន៍ ប្រើប្រាស់ឡានទឹក ៣គ្រឿង ប្រើអស់ទឹកសរុប ៧ឡាន រួមមាន៖
-ឡានទឹកអធិការដ្ឋានស្រុកអង្គរជុំ ១គ្រឿង (ប្រើប្រាស់អស់ទឹក៤ឡាន)
-ឡានទឹកអធិការដ្ឋានស្រុកពួក ១គ្រឿ (ប្រើប្រាស់អស់ទឹក ២ឡាន)
-ឡានទឹកអធិការដ្ឋានស្រុកក្រឡាញ់ ១គ្រឿង (ប្រើប្រាស់អស់ទឹក ១ឡាន)។ ដោយបានពន្លត់រលត់ទៅវិញនៅវេលាម៉ោង ១៥និង៤៥នាទី៕SRP

ខេត្តត្បូងឃ្មុំ៖សម្តេចអគ្គមហាពញាចក្រី ហេង សំរិន ប្រធានកិត្តិយសគណប្រជាជនកម្ពុជា និងជាប្រធានរដ្ឋសភា បានជំរុញឲ្យមន្រ្តីគណបក្សគ្រប់ថ្នាក់ គ្រប់ផ្នែកមានភាពស្មោះត្រង់ និងបម្រើជាតិ និងប្រជាជនអស់ពីចិត្តពីថ្លើម ប្តេជ្ញា ការពារគណបក្សនៅគ្រប់កាលៈទេសៈ រាំងស្កាត់បាតុភាពអសកម្មរបស់មន្រ្តីគណបក្ស ដោយភាពម៉ឺងម៉ាត់តាមអភិក្រម “ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់” ។

សម្តេចបានលើកឡើងដូច្នេះនៅក្នុងឱកាសអញ្ជើញជាអធិបតីភាពដ៍ខ្ពង់ខ្ពស់ក្នុងការបិទកិច្ចប្រជុំផ្សព្វផ្សាយរបាយការណ៍របស់គណៈអចិន្ត្រៃយ៍គណៈកម្មាធិការកណ្តាលស្តីពី សភាពការណ៍ទូទៅ និងការងារគណបក្ស ឆ្នាំ២០២០ និងទិសដៅភារកិច្ចឆ្នាំ២០២១ របស់ក្រុមការងារគណបក្សថ្នាក់កណ្តាលចុះជួយខេត្តត្បូងឃ្មុំ នាថ្ងៃទី២០ ខែកុម្ភៈឆ្នាំ២០២១ នៅក្នុងខេត្តត្បូងឃ្មុំ។

សម្តេចបានកោតសរសើរនិងវាយតម្លៃខ្ពស់ចំពោះគណៈកម្មាធិការគណបក្សខេត្ត ក្រុង ស្រុក ឃុំ សង្កាត់ ក៏ដូចជាក្រុមការងារចុះជួយមូលដ្ឋានទូទាំងខេត្ត ដែលបានយកចិត្តទុកដាក់បំពេញភារកិច្ចបម្រើប្រជាជននាពេលកន្លងមក។ សម្តេចបានគូសបញ្ជាក់ថា គណបក្សប្រជាជនកម្ពុជា ត្រូវរៀបចំសន្និបាតគណៈកម្មាធិការកណ្តាលលើកទី៤៣ ដើម្បីពិនិត្យ ពិភាក្សា និងវាយតម្លៃអំពីសភាពការណ៍ទូទៅ និងការងាររបស់ គណបក្សនៅឆ្នាំ២០២០ កន្លងមក និងកំណត់ទិសដៅភារកិច្ចឆ្នាំ២០២១ ។ ប៉ុន្តែអាស្រ័យដោយការរាតត្បាតនៃជម្ងឺកូវីត-១៩ ទើបគណបក្សមិនអាចរៀបចំសន្និបាតគណៈកម្មាធិការកណ្តាលលើកទី៤៣នេះបាន។

ហេតុនេះគណៈអចិន្រ្តៃយ៍នៃគណៈកម្មាធិការកណ្តាល ត្រូវរៀបចំរបាយការណ៍បូកសរុបខាងលើ សម្រាប់ជាត្រីវិស័យជូនដល់គណៈកម្មាធិការ គណបក្សគ្រប់ថ្នាក់ គ្រប់ផ្នែក មន្រ្តីសមាជិក សមាជិកាគណបក្សទាំងអស់ជ្រួតជ្រាប ដោយមានការឯកភាពគ្នា អំពីការវាយតម្លៃសភាពការណ៍ទូទៅ និងការងារគណបក្សឆ្នាំ២០២០ និងកំណត់ទិសដៅភារកិច្ចសម្រាប់អនុវត្តន៍នៅឆ្នាំ២០២១ ។

សម្តេចប្រធានកិត្តិយសគណបក្ស បានលើកទឹកចិត្តសមាជិកទាំងអស់ បន្តកសាងពង្រឹង លើកកម្ពស់សមត្ថភាព ប្រសិទ្ធិភាពការងាររបស់ កម្មាធិការគណបក្សគ្រប់ថ្នាក់ ក្នុងការដឹកនាំអនុវត្តន៍រាល់ភារកិច្ច នយោបាយដោយប្រកាន់ខ្ជាប់គោលការណ៍សមូហភាពដឹកនាំម្នាក់ៗ ទទួលខុសត្រូវ មានរបៀបរបបធ្វើការងារច្បាស់លាស់ និងប្រជុំជីវភាពបក្សទៀងទាត់ ផ្សាភ្ជាប់ជិតស្និទ្ធជាមួយ សមាជិកគណបក្ស និងមហាជន ។

សម្តេចស្នើឲ្យក្រុមការងារបន្តពង្រឹង ស្ថាប័នជំនួយការរបស់ គណបក្សគ្រប់ថ្នាក់ ដើម្បីធានានិរន្តរភាពការងារ និងជួរមន្រ្តីជំនាញបន្តវេន បន្តជំរុញរៀបចំរចនាសម្ព័ន្ធយុវជនគណបក្សគ្រប់ថ្នាក់ សំដៅជួយគណបក្សក្នុងការគ្រប់គ្រងសមាជិកបក្សជាយុវជនលើការងារនយោបាយ សតិអារម្មណ៍ និងចាត់តាំងសំដៅរួមចំណែកធានានូវប្រសិទ្ធភាពនៃការដឹកនាំរបស់គណបក្ស ។ បន្តជំរុញការកសាង ពង្រីកសមាជិកគណបក្សដោយយកចិត្តទុកដាក់ អំពីគុណភាព ស្របតាមសំណូមពរនៃយុទ្ធសាស្រ្តរបស់គណបក្សគឺ “សមាជិកគណបក្សមួយរូប ជាសំឡេងឆ្នោតគាំទ្រគណបក្សមួយសន្លឹក” ។

កិច្ចប្រជុំកិច្ចក្រុមការងារគណបក្សថ្នាក់កណ្តាលចុះជួយខេត្តត្បូងឃ្មុំ បានបិទបញ្ចប់ ក្រោយបរិយាកាសរីករាយនិងការប្តេជ្ញាចិត្តខ្ពស់នៅក្នុងការនាំមកនូវភាពជោគជ័យជូនគណបក្សទៀត ក្នុងការបោះឆ្នោតជ្រើសរើសឃុំ សង្កាត់ អាណត្តិទី៥ ឆ្នាំ២០២២ និងការបោះឆ្នោតជ្រើសតាំងតំណាងរាស្រ្តនីតិកាលទី៧ ឆ្នាំ២០២៣ នាពេលខាងមុខនោះ៕SRP

ភ្នំពេញ៖នាយករដ្ឋមន្រ្តីនៃព្រះរាជាណាចក្រកម្ពុជា សម្តេច ហ៊ុន សែន នៅថ្ងៃទី២០ ខែកុម្ភៈ ឆ្នាំ២០២១នេះ បានអញ្ជើញថ្លែងសារពិសេស ទៅកាន់ ប្រជាពលរដ្ឋ ទូទាំងប្រទេស ពាក់ព័ន្ធស្ថានភាពឆ្លងជំងឺកូវីដ១៩ថ្មី ដែលសម្តេច ហ៊ុន សែន បានដាក់ប្រសិទ្ធនាមថា ជាករណីឆ្លងសហគមន៍២០កុម្ភៈ ដោយក្រសួងបានរកឃើញឆ្លងសហគមន៍រហូតដល់៣២ករណី។

នាយករដ្ឋមន្ត្រី ហ៊ុន សែន បានមានប្រសាសន៍ថា ក្រសួងសុខាភិបាលបានរកឃើញករណី ឆ្លងចូលសហគមន៍ រហូតដល់ចំនួន៣២ករណី។
សម្តេចតេជោ ចាត់ទុកថា ការរកឃើញកូវីដ១៩ថ្មីនេះ ជាព្រឹត្តិការណ៍អាក្រក់និងធ្ងន់ធ្ងរ ដែលយើងត្រូវតែបង្កើនការការពារបន្ថែមទៀត។

ពាក់ព័ន្ធទៅនឹងការឮឆ្លងចូលសហគមន៍ ២០កុម្ភៈនេះ សម្តេច ហ៊ុន សែន ចេញបទបញ្ជា និងអំពាវនាវឱ្យពលរដ្ឋខ្មែរចំនួន៦ចំណុចដូចតទៅ៖

១-សម្តេចតេជោស្នើសុំការយោគយល់ពីអ្នកធុរកិច្ច និងការស្នាក់ការនៅរបស់ពលរដ្ឋ ដែលតម្រូវឱ្យមានការបិទអគារ ក្លឹបកម្សាន្តN8 និងតំបន់មួយចំនួនដែលផ្ទុះករណីកូវីដ១៩ ជាចាំបាច់ ដោយមិនអនុញ្ញាតអោយចេញ-ចូល លើកលែងតែអ្នកដែលជាម្ចាស់ផ្ទះក្នុងតំបន់នោះ គឺអោយចូល តែមិនអនុញ្ញាតអោយចេញ ។

២- បន្តយកសំណាកធ្វើតេស្តសម្រាប់អ្នកនៅក្នុងតំបន់មានផ្ទុះកូវីដ១៩ ហើយបន្ទាប់ពីធ្វើតេស្តហើយត្រូវធ្វើចត្តាឡីស័ក ១៤ថ្ងៃ ដែលចំនួននៃការធ្វើតេស្តអាចនឹងមានចំនួនច្រើន។

៣- អាជ្ញាធរត្រូវបន្តស្វែងរកអ្នកពាក់ព័ន្ធនឹងក្លឹប N8 ទោះទៅដល់ទីណាក៏ដោយ ដើម្បីស្វែងរកមកធ្វើតេស្ត នឹងការធ្វើចត្តាឡីស័កឲ្យបានត្រឹមត្រូវ។

៤- ត្រូវធ្វើចត្តាឡីស័កសម្រាប់អ្នកដែលមានការពាក់ព័ន្ធទាំងអស់ និងត្រូវយកសំណាករបស់ពួកគាត់មកធ្វើតេស្តផងដែរ

៥- សម្តេចតេជោ ហ៊ុន សែន បានអំពាវនាវដល់អ្នកពាក់ព័ន្ធនឹងក្លឹប N8 ទាំងអស់ និងពាក់ព័ន្ធនឹងអ្នកមានជំងឺកូវីដ១៩ ទាំង៣២នាក់នេះ ម្ចាស់ការមកឱ្យពិនិត្យសំណាកជាចាំបាច់បំផុត។

៦- សម្តេចតេជោ ហ៊ុន សែន អំពាវនាវដល់ពលរដ្ឋនៅភ្នំពេញ និងតំបន់ដទៃទៀត ត្រូវបង្កើនការប្រុងប្រយ័ត្ន ហើយរឹតបន្តឹងក្នុងការអនុវត្តវិធានការ៣ការពារ និង៣កុំ ឲ្យបានជាប់លាប់ល្អតាមការណែនាំរបស់ក្រសួងសុខាភិបាល។

ទាក់ទងទៅនឹងការផ្ទុះនៃព្រឹត្តិការណ៍២០ កុម្ភៈនេះ សម្តេចតេជោ មិនទាន់ចេញបញ្ជាបិទពិធីមង្គលការ សាលារៀន ឬកន្លែងផ្សេងទៀត ប៉ុន្តែសង្ឃឹមថា ប្រជាពលរដ្ឋទាំងអស់បន្តចូលរួមជាមួយវិធានការ «៣ការពារ ៣កុំ» នេះឲ្យបានល្អប្រសើរ។

សម្តេចតេជោ ជំរុញឲ្យពាក់ម៉ាស់នៅកន្លែងសាធារណៈទាំងអស់ ហើយរក្សាគម្លាតសុវត្ថិភាពឲ្យបានល្អប្រសើរ ហើយបើប្រជាពលរដ្ឋ គ្មានការចាំបាច់ សូមកុំចេញពីផ្ទះ។

ទោះជាមានការផ្ទុះនៃព្រឹត្តិការណ៍ ២០កុម្ភៈនេះក៏ដោយ សម្តេចតេជោមិនលុបចោលកម្មវិធីចូលរួមសន្និបាតក្រសួងមហាផ្ទៃ និងសម្ពោធសណ្ឋាគារហៃយ៉ាត់ នៅក្នុងសប្តាហ៍ក្រោយនេះនោះទេនោះទេ។ សម្តេចតេជោ ហ៊ុន សែន ផ្តាំកុំឱ្យពលករខ្មែរត្រឡប់ពីប្រទេសថៃដើម្បីមកចូលរួមបុណ្យចូលឆ្នាំខ្មែរ នៅខែមេសាខាងមុខនេះ ព្រោះនឹងត្រូវជាប់ធ្វើចត្តាឡីស័ក មិនបានចូលឆ្នាំនឹងគេទេ។

សម្តេច ហ៊ុន សែន សង្ឃឹមថា ព្រឹត្តិការណ៍ឆ្លងក្នុងសហគមន៍២០កុម្ភៈ នឹងត្រូវបិទបញ្ចប់នៅអំឡុងពេល១ខែ នៅពេលប្រជាពលរដ្ឋ និងភាគីពាក់ព័ន្ធទាំងអស់ ចូលរួមសហការ និងអនុវត្តវិធានការទាំងអស់គ្នាដោយយកចិត្តទុកដាក់៕SRP

ខេត្តកំពង់ធំ៖លោកគន់ គីម អនុប្រធាន អគ្គលេខាធិការសមាគមអតីត យុទ្ធជនកម្ពុជា បានព្រមានថាអ្នកមកចាប់ដីយក ក្នុងបរិវេណដីសម្បទានសង្គមកិច្ច និងត្រូវដកហូតមកជូនរដ្ឋវិញ ដើម្បីបង្វែរជូន អតីតយុទ្ធជន។ ដោយឡែកអ្នកដើរចាប់ដី ដើរចង្អុលដី និងឈ្មួញមកលួចឈូសឆាយដី និងអ្នកបង្កើតក្រុមតវ៉ា ដោយអណាធិបតេយ្យ និងត្រូវចាត់វិធានការតាមផ្លូវច្បាប់ ដោយមិនមានការលើកលែង។

លោក គន់ គីម បានបន្តថា សម្រាប់អតីតយុទ្ធជន ឬប្រជាពលរដ្ឋ ដែលមានប័ណ្ណក្រីក្រ និងអ្នករស់នៅ ក្នុងមូលដ្ឋាន ត្រូវដាក់ពាក្យស្នើសុំពីគណៈកម្មការ រៀបចំដី សម្បទានសង្គមកិច្ចដើម្បីពិចារណា។

លោក គន់ គីម បានបន្តទៀតថា សម្តេចតេជោ ហ៊ុន សែន និងភរិយា បានយកចិត្តទុកដាក់ ចំពោះជីវភាព រស់នៅ របស់ក្រុមគ្រួសារអតីតយុទ្ធជន ដែលបានផ្តល់ថវិកា សាងសង់ផ្លូវ ដែលមានចម្ងាយ១២គីឡូម៉ែត្រ សម្រាប់បង្កើតផ្លូវក្នុងហេដ្ឋារចនាសម្ព័ន្ឋ ក្នុងភូមិតេជោហ៊ុនសែន គ្រយា។ ក្នុងនោះ មានអណ្តូងទឹក មួយកន្លែងសម្រាប់ប្រើ៥ផ្ទះ រួមទាំងផ្ទះចំនួន១៥៦ខ្នង។

សូមជម្រាបថានៅព្រឹកមិញនេះ លោក គន់ គីម
អមដំណើរដោយ លោក សុខ លូ អភិបាលខេត្តកំពង់ធំ ប្រធានកិត្តិយសសមាគមអតីតយុទ្ធជនកម្ពុជាខេត្តកំពង់ធំ និងឧត្តមសេនីយ៍ទោ សោម ស៊ុន ប្រធានសមាគមអតីតយុទ្ធជនកម្ពុជា ខេត្តកំពង់ធំ ព្រមទាំងប្រតិភូរួមដំណើរ ក្នុងបេសកម្ម ចុះពិនិត្យទីតាំងដី ដើម្បីត្រៀមបង្កើតជាភូមិលំនៅដ្ឋាន ជូនដល់បងប្អូនអតីតយុទ្ធជន យុទ្ធជនពិការ។

ទីតាំងដីដែលត្រៀម បង្កើតភូមិ ស្ថិតនៅឃុំគ្រយា ស្រុកសន្ទុក ខេត្តកំពង់ធំ គឺជាដី សម្បទានសង្គមកិច្ចនេះ គឺសម្រាប់ ចែកជូនដល់អតីតយុទ្ធជន ដែលមានជីវភាពលំបាកខ្វះខាត។ ដោយពលរដ្ឋ ទទួលបានផ្ទះមួយខ្នង និងដីមួយហិកតាកន្លះ ដោយរៀបចំហេដ្ឋា រចនាសម្ព័ន្ឋ ភូមិ ឲ្យមានលូប្រព័ន្ឋទឹក ផ្លូវមេ៨ម៉ែត្រ ផ្លូវតាមផ្ទះដីឡូត៍៦ម៉ែត្រ មានទឹក មានភ្លើង មានប៉ុស្តិ៍ការពារសុវត្តិភាព មានផ្សារ សាលារៀន មន្ទីរពេទ្យ វត្តអារាម សម្រាប់សម្រួល ភាពងាយស្រួល ដល់បងប្អូនអតីតយុទ្ធជន៕SRP

ខេត្តត្បូងឃ្មុំ៖លោកអូន ពន្ធ័មុន្នីរត្ន័ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានថ្លែងនូវការកោតសរសើរ ចំពោះ លោកប្រធានសាខាគយ និងរដ្ឋាករខេត្ត ប្រធានការិយាល័យគយត្រពាំងផ្លុង និងគ្រប់ច្រកទូទាំងខេត្ត រួមទាំងមន្ត្រីគយទាំងអស់ ដែលខិតខំបំពេញ ការងារប្រមូលពន្ធគយជូនរដ្ឋ សម្រាប់ជាប្រភពចំណូលមួយផ្នែកយ៉ាងធំសម្រាប់រដ្ឋ ខណៈការប្រមូលពន្ធ នៃការិយាល័យគយ និងរដ្ឋាករត្រពាំងផ្លុង នៅតែបន្តកើនឡើងជាងឆ្នាំមុន លើសពីផែនការកំណត់ ជាចំណុចដ៏សំខាន់ ដែល សម្តេចតេជោ ហ៊ុន សែន ធ្លាប់ឡើងថា ជាការល្អបំផុត សម្រាប់ការងារប្រមូលពន្ធគយ គ្រប់តាមផែនការកំណត់ ហើយ បើប្រមូលលើសផែនការកំណត់ នេះជាប្រសិទ្ធភាព នៃការងារ ដែលគួរតែលើកសរសើរ។

លោករដ្ឋមន្ត្រីសេដ្ឋកិច្ចថ្លែងយ៉ាងដូច្នេះ នៅថ្ងៃទី១៩ ខែកុម្ភៈ ឆ្នាំ២០២១ ព្រឹកមិញនេះ ក្នុងឱកាសសម្ពោធដាក់ឲ្យប្រើប្រាស់ ជាផ្លូវការនូវអគាររដ្ឋបាល និងហេដ្ឋារចនាសម្ព័ន្ធនានា​ ក្នុងការិយាល័យគយ និងរដ្ឋាករត្រពាំងផ្លុង ស្ថិត​នៅ​មាត់ច្រកទ្វារ ព្រំដែនអន្តរជាតិ ត្រពាំងផ្លុង ក្នុងស្រុកពញាក្រែក ខេត្តត្បូងឃ្មុំ។

ពិធីនេះក៏មានកាចូលរួមពីប្រតិភូអមដំណើរ រដ្ឋលេខាធិការ អនុរដ្ឋលេខាធិការក្រសួងសេដ្ឋកិច្ច អគ្គនាយក-អគ្គនាយករងគយ និងពន្ធដារ រួមទាំងថ្នាក់ដឹកនាំជាន់ខ្ពស់ ព្រមទាំងលោកជាម ច័ន្ទសោភ័ណ អភិបាលខេត្ត​ត្បូងឃ្មុំ​ ប្រធានសាខាគយខេត្ត ប្រធានការិយាល័យគយតាមមាត់ច្រកទ្វារព្រំដែន មន្ទីរ-អង្គភាពពាក់ព័ន្ធ និងមន្ត្រីគយជាច្រេីនរូបផងដែរ​។

ជាមួយគ្នានេះដែរ លោក អូន ពន្ធ័មុន្នីរត្ន័ និងប្រតិភូគណៈអធិបតី បានអញ្ជើញពិនិត្យអគាររដ្ឋបាល និងហេដ្ឋារចនាសម្ព័ន្ធ ទាំងអស់ដែលបានដាក់សម្ពោធនាថ្ងៃនេះ ដោយអគ្គបណ្ឌិតសភាចារ្យ បានកោតសរសើរចំពោះស្នាដៃថ្មី ដែលបានផុសរូបរាងឡើងយ៉ាងប្រណិត តាមស្តង់ដារ ដែលជាការជួយបង្កបរិយាកាស ការងារកាន់តែល្អដល់មន្ត្រីគយ បន្តបំពេញការងារប្រមូលពន្ធកាន់តែល្អទ្វេរឡើង។

បើតាមលោក អួន សុវណ្ណារ៉ា ប្រធានការិយាល័យគយ និងរដ្ឋាករត្រពាំងផ្លុង ឲ្យដឹងថា ការិយាល័យគយ និងរដ្ឋាករត្រពាំងផ្លុង ស្ថិតនៅព្រំដែនកម្ពុជា-វៀតណាម (ខេត្តតៃនិញ) ត្រង់បង្គោលលាក់លេខ១១៨ ក្នុងឃុំត្រពាំងផ្លុង ស្រុកពញាក្រែក ដែលការិយាល័យនេះមានផ្ទៃដីសរុប ៨,៤៧១ម៉ែត្រក្រឡា។

លោក អួន សុវណ្ណារ៉ា បន្តឲ្យដឹងទៀតថា ចាប់តាំងពីឆ្នាំ២០១៦ រហូតដល់បច្ចុប្បន្ន សមិទ្ធផលដែលត្រូវសម្ពោធដាក់ឲ្យប្រើប្រាស់ជាផ្លូវការនាថ្ងៃនេះ រួមមាន អគាររដ្ឋបាលថ្មី កំពស់១ជាន់កន្លះ មានទំហំ២៣គុណនឹង២០ម៉ែត្រ​ អគារស្នាក់នៅកម្ពស់២ជាន់១ខ្នង និង១ជាន់១ខ្នង សរុប៣១បន្ទប់, ចំណតរថយន្ត, ឃ្លាំងស្តុកទំនិញ, អាងស្តុកទឹក, អាហារដ្ឋាន, ចាក់ដីបំពេញ ចាក់បេតុង កែលម្អសួចច្បារ និងកន្លែងលេងកីឡាវាយសីផងដែរ៕SRP