លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អនុប្រធានអចិន្ត្រៃយ៍កាកបាទក្រហមកម្ពុជា និងជាអគ្គស្នងការសមាគមកាយឫទ្ធិនារីកម្ពុជាបានលើកទ្បើងថា ក្រោយពីសម័យសង្រ្គាម មកវត្តអារាមក្នុងប្រទេសកម្ពុជារីកដុះដាលយ៉ាងច្រើនរហូតជាង៥ពាន់វត្តនៅប្រទេសកម្ពុជា មានព្រះសង្ឃរហូតជាង៧ម៉ឺនអង្គទូទាំងប្រទេស។

លោកជំទាវបណ្ឌិតបន្តថា វត្តអារាមជាទីកន្លែងផ្តល់នូវចំណេះដឹង ជាពិសេក្មេងៗជំនាន់ក្រោយ ព្រោះព្រះសង្ឃ និងទីវត្តអារាម គឺជាកន្លែងអប់រំមនុស្សអោយធ្វើអំពើល្អ តាមរយ: ព្រះសង្ឃអាចបញ្ជ្រៀបដំបូន្មានល្អៗដល់ប្រជាពុទ្ធបរិស័ទ អោយយល់ដឹងអំពី សុជីវធម៌ គុណធម៌ មានមេតា្តធម៌ ដែលទាំងអស់នេះហើយគឺជាគោលការណ៍គ្រឹះក្នុងការរស់នៅរបស់យើងក្នុងជីវភាពប្រចាំថ្ងៃ និងធ្វើអោយប្រទេសជាតិកាន់តែមានសុខសន្តិភាព «ដូច្នេះទីវត្តអារាមអាចជួយអោយប្រជាពលរដ្ឋទទួលបាននៅចំណេះដឹង និងជាទីស្ងប់សុខសម្រាប់ជនគ្រប់រូប»។

ឱកាសដ៏វិសេសវិសាលនេះ លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត បានពាំនាំនូវការនឹករលឹក និងផ្តាំផ្ញើសួរសុខទុក្ខពីសំណាក់ សម្តេចអគ្គមហាសេនាបតីតេជោ ហ៊ុន សែន សម្តេចកិត្តិព្រឹទ្ធិបណ្ឌិត និងសម្តេចមហាបវរធិបតី ហ៊ុន ម៉ាណែត ជូនចំពោះប្រជាពលរដ្ឋ ដែលបានចូលរួម។

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត មានប្រសាសន៍យ៉ាងដូច្នេះ ក្នុងឱកាស អញ្ជើញសម្ពោធសមិទ្ធផល​នៅវត្តវេឡុវ័ន្ត ខេត្តតាកែវនាព្រឹកថ្ងៃទី៨ ខែកុម្ភៈ ឆ្នាំ២០២៥នេះ។

សូមជម្រាបថា លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត បាន​អញ្ជើញ​ជា​អធិបតី សម្ពោធឆ្លងបណ្ណាល័យ និងសមិទ្ធផលនានា ព្រមទាំងស្រោចស្រពសុគន្ធវារី ចម្រើន​ព្រះជន្ម ប្រគេនព្រះអង្គគ្រូធម្មត្ថេរោ សែម សារិន្ទ ព្រះចៅអធិការវត្តវេឡុវ័ន្ត (ហៅវត្ត​ត្រពាំង​ខ្នារ​) ស្ថិតនៅភូមិត្រពាំងខ្នារ ឃុំអង្គតាសោម ស្រុកត្រាំកក់ ខេត្តតាកែវ។

ពិធីនេះ​មានការ និមន្ត និងអញ្ជើញចូលរួមដោយគណៈសង្ឃនាយក នៃព្រះរាជាណាចក្រកម្ពុជា ដឹក​នាំ​ដោយសម្តេចព្រះពុទ្ធជ័យមុនីបណ្ឌិត ឃឹម សន ព្រះប្រធានលេខាធិការដ្ឋាន គណៈ​សង្ឃ​នាយក ព្រះចតុម្មុខមង្គលរង្សី ព្រះមេគណរាជធានីភ្នំពេញ សម្តេចសង្ឃ ព្រះថេរានុ​ថេរៈ​គ្រប់​ព្រះអង្គ ឯកឧត្តម វ៉ី សំណាង អភិបាល នៃគណៈអភិបាល ខេត្តតាកែវ ព្រមទាំងឯកឧត្តម លោក​ជំទាវ ថ្នាក់ដឹកនាំ និងប្រជាពុទ្ធបរិស័ទយ៉ាងច្រើនកុះករផងដែរ។

សូមជម្រាបថាក្នុងឱកាសនេះ លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត បាននាំយកនូវទេយ្យទាន និងប្រគេនបច្ច័យមួយចំនួន ថ្វាយប្រគេនដល់សម្តេចសង្ឃ ព្រះថេរ៉ានុថេរៈគ្រប់ព្រះអង្គ និងជូនថវិកាដល់ តាជី យាយជី យុវជនកាយឬទ្ធ យុវជនកាកបាទក្រហម យុវជន អ.ម.ត លោកគ្រូ អ្នកគ្រូ និងសិស្សានុសិស្ស ផងដែរ៕SRP

នាយករដ្ឋមន្ត្រីហ៊ុន ម៉ាណែត ប្ដូរកន្លែងធ្វើការ លោក ម៉ឹង យូឡេង និងលោក បូរី វង្សសានិត្យ

ភ្នំពេញ៖សម្ដេចធិបតីនាយករដ្ឋមន្ត្រីហ៊ុន ម៉ាណែត បានចេញអនុក្រឹត្យផ្លាស់ប្ដូរប្រធានមន្ទីរសាធារណការនិងដឹកជញ្ជូនចំនួនពីរខេត្ត។

លោក ម៉ឹង យូឡេង ពីប្រធានមន្ទីរសាធារណការដឹកជញ្ជូនខេត្តកណ្ដាល ទៅជាប្រធានមន្ទីរសាធារណៈការដឹកជញ្ជូនខេត្តព្រះសីហនុ។ ចំណែកលោក បូរី វង្សសានិត្យ ប្រធានមន្ទីរសាធារណៈការដឹកជញ្ជូនខេត្តព្រះសីហនុ ទៅជាប្រធានមន្ទីរសាធារណការដឹកជញ្ជូនខេត្តកណ្ដាល៕SRP

លោកហ៊ុន ម៉ានី៖ កូនខ្មែរគ្រប់ៗរូប មានភារកិច្ចបន្តលើកកម្ពស់កិត្យានុភាពជាតិ និងចូលរួមអភិរក្ស ថែរក្សា សិល្បៈ វប្បធម៌ អរិយធម៌ខ្មែរដ៏ផូរផង់ ដែលបុព្វបុរសរបស់យើង បានបន្សល់ទុកឱ្យ ស្មើៗគ្នា ដូចៗគ្នា

លោកហ៊ុន ម៉ានី រដ្ឋមន្ត្រីក្រសួងមុខងារសាធារណៈ បានលើកឡើងថា ព្រះរាជាណាចក្រកម្ពុជា គឺជាទឹកដីដ៏អច្ឆរិយៈ ពោរពេញទៅដោយធនធានមនុស្សដែលមានសក្តានុពល ជាមួយសិល្បៈ វប្បធម៌ អរិយធម៌ ដ៏វិចិត្រល្អឯកគ្មានពីរ និងដើរតួនាទីដ៏មានឥទ្ធិពល ក្នុងការផ្សារភ្ជាប់ទំនាក់ទំនង និងជាអ្នកនាំសារទៅកាន់ពិភពលោក។ វត្តមានរបស់ប្រតិភូសិល្បៈកម្ពុជា នៅក្នុងព្រឹត្តិការណ៍ក្បួនដង្ហែឈីងហ្គេ នៅប្រទេសសិង្ហបុរី ជាបន្តបន្ទាប់ មិនត្រឹមតែជាឱកាសនៃការបង្ហាញភាពរស់រវើកនៃភាពចម្រុះរបស់វប្បធម៌ខ្មែរតែប៉ុណ្ណោះទេ ថែមទាំងជាឱកាសនៃការផ្សារភ្ជាប់ទំនាក់ទំនងដ៏ស្អិតរមួតជាមួយបណ្តាប្រទេសជាមិត្ត ដែលបានចូលរួមចែករំលែកវប្បធម៌ជាមួយគ្នាលើវេទិកាអន្តរជាតិមួយនេះ។

រដ្ឋមន្ត្រីក្រសួងមុខងារសាធារណៈរូបនេះបានបន្តថា
កូនខ្មែរគ្រប់ៗរូប មានភារកិច្ចបន្តលើកកម្ពស់កិត្យានុភាពជាតិ និងចូលរួមអភិរក្ស ថែរក្សា សិល្បៈ វប្បធម៌ អរិយធម៌ខ្មែរដ៏ផូរផង់ ដែលបុព្វបុរសរបស់យើង បានបន្សល់ទុកឱ្យ ស្មើៗគ្នា ដូចៗគ្នា។ កន្លងមក មិនថាព្រឹត្តិការណ៍អង្គរសង្រ្កាន្ត ព្រឹត្តិការណ៍សាទរកម្ពុជា ឬកម្មវិធីវប្បធម៌ដទៃទៀត ដែលយុវជន យុវនារី សមាជិក សមាជិកានៃសហភាពសហព័ន្ធយុវជនកម្ពុជា បានរៀបចំ និងចូលរួមនោះទេ គឺសុទ្ធតែបានកើតចេញក្តីស្រឡាញ់សម្រាប់កម្ពុជា ទឹកចិត្ត ឆន្ទៈ និងស្មារតីទទួលខុសត្រូវក្នុងភាពជាខ្មែរដើម្បីរក្សាថែរកេរតំណែលដ៏រុងរឿងរបស់យើង។

តាមរយៈព្រឹត្តិការណ៍ក្បួនដង្ហែ ឈីងហ្គេឆ្នាំ២០២៥ កម្ពុជាសូមនាំយកចំណែកមួយនៃមោទនភាពរបស់អ្នកទាំងអស់គ្នា និងប្រជាជនកម្ពុជា មកបង្ហាញលើវេទិកាអន្តរជាតិដ៏ស្រស់ស្អាត។ លោកគ្រូ អ្នកគ្រូ សិល្បៈករ សិល្បៈការិនី និងក្រុមការងារទាំងអស់ បានតាំងចិត្តយ៉ាងក្លៀវក្លា ហាត់សមយ៉ាងយកចិត្តទុកដាក់ និងបានត្រៀមលក្ខណៈរួចជាស្រេច ដើម្បីនាំកម្ពុជាឆ្ពោះទៅកាន់ពិភពលោក។

បន្ថែមលើការថែរក្សា និងការពារ សូមយុវជនកម្ពុជា បន្តចូលរួមលើកស្ទួយសិល្បៈ វប្បធម៌ ដ៏អស្ចារ្យរបស់ខ្មែរយើងគ្រប់ទម្រង់ ហើយប្រើប្រាស់សិល្បៈ វប្បធម៌ខ្មែរ ឱ្យក្លាយជាអ្នកនាំសារក្នុងគោលដៅលើកកម្ពស់កិត្យានុភាពជាតិនៅគ្រប់វេទិកាទាំងអស់៕SRP

សម្ដេចតេជោហ៊ុន សែន ថាអាចនិងបង្ហោះសារឆ្លងឆ្លើយទាំង២៩៥ នៃសារក្នុងករណីសេង សារី ឈានហួសបន្ទាត់ក្រហមដោយចាត់ទុកខ្ញុំជាសត្រូវ

សម្ដេចតេជោហ៊ុន សែន ប្រធានព្រឹទ្ធសភាជាតិនៃព្រះរាជាណាចក្រកម្ពុជាបានបង្ហោះសារថាអាចនិងបង្ហោះសារឆ្លងឆ្លើយទាំង២៩៥ នៃសារក្នុងករណីសេង សារី ឈានហួសបន្ទាត់ក្រហមដោយចាត់ទុកខ្ញុំជាសត្រូវ។

សម្ដេចតេជោហ៊ុន សែន នៅព្រឹកថ្ងៃទី 7 ខែកុម្ភៈ
ឆ្នាំ 2025 នេះបានសរសេរថា ក្នុងការបង្ហាះសារយប់មុិញខ្ញុំបាននិយាយថាមិនបញ្ចេញនូវសារឆ្លងឆ្លើយរវាងខ្ញុំនិងសេង សារីទេដោយយល់ដល់ទំនាក់ទំនងឪពុកនិងកូន។

សម្ដេចបានសរសេរបន្ត ប៉ុន្តែខ្ញុំក៏អាចនិងបង្ហោះសារឆ្លងឆ្លើយទាំង២៩៥នៃសារក្នុងករណីសេង សារី
ឈានហួសបន្ទាត់ក្រហមដោយចាត់ទុកខ្ញុំជាសត្រូវ។
នៅពេលខ្ញុំបញ្ចេញនូវសារនេះទាំង
សម្លេងទាំងសំណេរខ្ញុំនិងបញ្ចេញតាម
Channel telegram របស់ខ្ញុំដែល
សមាជិកជាង៨០មុឺននាក់។
សហការីរបស់ខ្ញុំបានតម្រៀបសារទាំង
នេះតាមលំដាប់លំដោយរួចហើយខ្ញុំ
គ្រាន់តែforward ចូលទៅchannel telegram ជាការស្រេច។ ពេលសារចេញទៅគេអាចវាយតម្លៃ
បានប្រៀបជាមួយការនិយាយរបស់
សេង សារីជាមួយអាសុីសេរីយប់មិញ
នេះ៕SRP

ខេត្តសៀមរាប៖អភិបាលខេត្តសៀមរាប ឯកឧត្តមប្រាក់ សោភ័ណ បានធ្វើការអំពាវនាវ «សូមបងប្អូនទាំងអស់ ជួយរាយការណ៍ រាល់ករណី ដែលកើតមាននៅក្នុងមូលដ្ឋានរបស់បងប្អូន រាល់ការរាយការណ៍របស់បងប្អូន គឺជាការចូលរួមជួយខេត្តយើងអោយមានសុខ សុវត្ថិភាព»។

ឯកឧត្តមប្រាក់ សោភ័ណ អភិបាលខេត្តសៀមរាប ក៏បានអះអាងថា ខេត្តសៀមរាបមិនអនុញ្ញាតឲ្យរួចខ្លួនទេរាល់ករណីក្មេងទំនើង ករណីគ្រឿងញៀន ល្បែងសុីសងទាំងអស់ ករណីឆរបោកគ្រប់ប្រភេទ។

ការអះអាងរបស់ឯកឧត្តមអភិបាលខេត្តសៀមរាបយ៉ាងដូច្នេះបានធ្វើឡើងនៅក្នុងគ្រុបតេឡេក្រាម « ព័ត៌មាន មហាជន សៀមរាប ប៉ុស្តិ៍ » នៅល្ងាចថ្ងៃព្រហស្បតិ៍ ទី 6 ខែកុម្ភៈ ឆ្នាំ 2025។

សូមជម្រាបផងដែរថា ខេត្តសៀមរាបដែលជាខេត្តតំបន់ទេសចរណ៍ គេសង្កេតឃើញ មានសន្តិសុខស្ដាប់ធ្នាប់មានល្អប្រសើរផងដែរ ក្រោមការដឹកនាំឯកឧត្តមប្រាក់ សោភ័ណ អភិបាលខេត្តសៀមរាបនិងជាប្រធានគណៈបញ្ជាការឯកភាពខេត្តសៀមរាប៕SRP

សម្ដេចតេជោហ៊ុន សែន បានបង្ហោះសារមួយទំនាក់ទំនងជាមួយ លោកសេង សារី។

សម្ដេចតេជោហ៊ុន សែន បានសរសេរថា
ខ្ញុំកំពុងស្ថិតនៅរដ្ឋធាវីវៀងចន្ទប្រទេស
ឡាវ។ខ្ញុំទើបបញ្ចប់ការស្តាប់បទសម្ភាស់រវាងលោកចន្ទ័ ជុនបុត្រជាមួយលោកសេង សារី។
ខ្ញុំមានឯកសារជាអក្សរជាសម្លេងជាច្រើនរាប់ការនិយាយតាមទូរសព្វ័ដែលសេង សារីសុំលុយទៅអាមេរិក
ដើម្បីចូលគៀកជាមួយមួ សុខហួ
អេង ឆៃអៀងនិងការសុំជួយបង្កើត
គណបក្សផ្ទាល់ផងដែរ។
ខ្ញុំមិនដែលចាត់ទុកសេង សារីជាចារកម្ម ឬជាចំណាប់ខ្មាំងនោះឡើយតែចាត់ទុកជាអ្នកពិគ្រោះនយោបាយ
មួយរូប។ខ្ញុំមិនដែលគំរាមសេង សារី
តាមរយះការបញ្ចេញការនិយាយឆ្លងឆ្លើយនោះឡើយ។ប្រសិនសេង សារីមានសម្លេងសូមបញ្ចេញឲ្យខ្ញុំបានស្តាប់
ផង។ សម្លេងបែកធ្លាយនេះវាស្រាលណាស់បើប្រៀបធៀបជាមួយសម្លេងនិងសារឆ្លងឆ្លើយដែលកំពុងរក្សាទុក។
បើទោះសេង សារីនិយាយខុសការពិត
ក៏ខ្ញុំមិនបញ្ចេញនូវឯកសារទាំងនេះដែរ
ព្រោះទោះយ៉ាងណាក៏សេង សារីហៅ
ខ្ញុំថាពុករយៈពេល៤ឆ្នាំហើយដែរ។ឯ
ចំណែកខ្ញុំវិញក៏ផ្តល់ការអាណិតចំពោះ
សេង សារី និងគ្រួសារពេលដែល
សេង សារីនៅបាងកក។ខ្ញុំផ្តល់ឲ្យ
សេង សារីនូវប្រាក់បង់រំលោះផ្ទះដែល
នៅជំពាក់គេនិងផ្តល់ឲ្យសេង សារី
នូវថវិកា១មុឺនដុល្លារក្នុងមួយខែរយៈ
ពេល១២ខែស្មើ១២មុឺនដុល្លារនេះមិនទាន់គិតពីថវិកាដែលសេង សារីស្នើសុំពីអូស្ត្រាលីដើម្បីធ្វើដំណើរទៅអាមេរិកនិងត្រៀមបង្កើតគណបក្ស។
សេង សារីពុកមិនដែលចាត់ទុកកូនជា
ចារកម្មឬជាចំណាប់ខ្មាំងនោះទេ ពុក
គោរពដល់ការសម្រេចចិត្តរបស់កូនដូចជាកូនសុំបង្កើតបក្សស្នើឱ្យពុកគាំទ្រពុកផ្តល់ការគាំទ្រ។កូននៅចាំទេ
កូននៅអូស្ត្រាលីចុះហត្ថលេខាដាក់ថា
ធ្វើនៅភ្នំពេញ។ក្រសួងមហាផ្ទៃបដិសេធជាការត្រឹមត្រូវ។កូនសួរពុកថាតើធ្វើបែបណាទៀតពុក?ពុកប្រាប់ថារក
មនុស្សនៅក្នុងប្រទេសចុះហត្ថលេខា
បង្កើតគណបក្សទៅ។នេះជាប្រភេទពិគ្រោះយោបល់មិនមែនជាចារកម្មនោះទេ។
បទសម្ភាសន៍របស់កូនគឺវាយទម្លាក់តម្លៃខ្លួនឯងទេ។
ពុកប្រាប់ចុងក្រោយកូនអាចភូតអ្នក
ដ៏ទៃបានតែកុំភូតខ្លួនឯងនិងកុំភូត
ឯកសារសម្ងាត់ដែលមានក្នុងដៃពុក៕SRP

ខេត្តសៀមរាប៖បុរសម្នាក់ត្រូវបាន នាយកដ្ឋានប្រឆាំងបទល្មើសបច្ចេកវិទ្យា សហការជាមួយ ស្នងការដ្ឋាននគរបាលខេត្តសៀមរាប ធ្វើការចាប់ខ្លួន ករណីលក់កាំភ្លើង តាមបណ្តាញសង្គម។

ការបង្ក្រាបធ្វើឡើង នៅថ្ងៃទី០៥ ខែកុម្ភៈ ឆ្នាំ២០២៥ នាយកដ្ឋានប្រឆាំងបទល្មើសបច្ចេកវិទ្យា បានបើកការស៊ើបអង្កេត ស្រាវជ្រាវករណី ការជួញដូរអាវុធតាមប្រព័ន្ធតេឡេក្រាម។ ជាលទ្ធផល នាយកដ្ឋាន បានសហការជាមួយស្នងការដ្ឋាននគរបាលខេត្តសៀមរាប និងមានការសម្របសម្រួលពីអយ្យការអមសាលាដំបូងខេត្តសៀមរាប បានធ្វើការឃាត់ខ្លួនជនសង្ស័យឈ្មោះ ស.ច.រ ភេទប្រុស នៅផ្ទះរបស់ជនសង្ស័យដែលមានអាសយដ្ឋានស្ថិតនៅភូមិតាវៀន សង្កាត់សាលាកំរើក ក្រុងសៀមរាប ខេត្តសៀមរាប ដោយរឹបអូសបានវត្ថុតាងរួមមាន កាំភ្លើងកែច្នៃបាញ់គ្រាប់ពិត និងកាំភ្លើងប្រើហ្គាស ចំនួន០៧ដើម ព្រមទាំងគ្រាប់មួយចំនួនផងដែរ។

តាមការសួរចម្លើយរបស់សមត្ថកិច្ច ជនសង្ស័យខាងលើបានសារភាពថា ខ្លួនពិតជាបានបង្កើត channel telegram និងទាក់ទងតាមបណ្ដាញសង្គមនានាដើម្បីអូសទាញឲ្យគេកម្មង់ទិញ គ្រឿងសពាវុធទាំងនោះ។ដោយបង្គាប់ឲ្យគេផ្ទេរប្រាក់មកជាមុន។ បន្ទាប់ពីទទួលបានប្រាក់រួចហើយ គេក៏ធ្វើការផ្តាច់ទំនាក់ទំនងជាមួយអតិថិជនទាំងនោះ ដែលទង្វើនេះគឺជាអំពើឆបោក។

បច្ចុប្បន្ន ស្នងការដ្ឋាននគរបាលខេត្តសៀមរាប បានធ្វើការចោទប្រកាន់ពីបទ រក្សាទុក ចរាចរណ៍ និងជួញដូរ អាវុធខុសច្បាស់ ព្រមទាំង ឆបោកតាមបណ្តាញទំនាក់ទំនងសង្គម និងកំពុងបន្តនីតិវិធីកសាងសំណុំរឿងដើម្បីបញ្ជូនជនសង្ស័យខាងលើទៅកាន់សាលាដំបូងខេត្តសៀមរាប៕SRP

ខេត្តបាត់ដំបង៖មនុស្សចំនួន 7 នាក់ ត្រូវបានកម្លាំងអាវុធហត្ថខេត្តបាត់ដំបងធ្វើការចាប់ខ្លួនពាក់ព័ន្ធករណីគ្រឿងញៀន។

ការចាប់ខ្លួនធ្វើឡើង នៅរសៀល ថ្ងៃទី ០៥ ខែកុម្ភៈ ឆ្នាំ២០២៥ នៅភូមិបឹងព្រីង ឃុំព្រៃតូច ស្រុកមោងឬស្សី ខេត្តបាត់ដំបង ដោយកម្លាំងការិយាល័យ ជំនាញ អនុវត្តតាម បទបញ្ជាលោកឧត្តមសេនីយ៍ ហែម វុទ្ធី មេបញ្ជាការកងរាជអាវុធហត្ថខេត្តបាត់ដំបង។

ករណីជួញដូរដោយខុសច្បាប់នូវសាធាតុញៀន និងអនុវត្តន៍ដីកាបង្គាប់ឲ្យចាប់ខ្លួន បានធ្វើការឃាត់ខ្លួនជនសង្ស័យចំនួន ០៧នាក់:
១.ឈ្មោះ គឹម វណ្ណៈ ហៅ សៀ ភេទប្រុស អាយុ ៤៥ឆ្នាំ មុខរបរកម្មករ រស់នៅភូមិព្រៃដំរី ឃុំព្រៃតូច ស្រុកមោងឬស្សី ខេត្តបាត់ដំបង ។ (មានដីកាបង្គាប់ឲ្យចាប់ខ្លួន ចំនួន ០២ដីកា)
២.ឈ្មោះ ដន ដេត ហៅ អាសុង ភេទប្រុស អាយុ ៣១ឆ្នាំ មុខរបរ ធ្វើស្រែ រស់នៅភូមិកូនព្រំ ឃុំធិបតី ស្រុកគាស់ក្រឡ ខេត្តបាត់ដំបង។
៣.ឈ្មោះ រឿត រឿន ភេទប្រុស អាយុ ២៧ឆ្នាំ មុខរបរ ធ្វើស្រែ រស់នៅភូមិបឹងព្រីង ឃុំព្រៃតូច ស្រុកមោងឬស្សី ខេត្តបាត់ដំបង។
៤.ឈ្មោះ វឿន សុជៀន ភេទប្រុស អាយុ ២៥ឆ្នាំ មុខរបរ កម្មករ រស់នៅភូមិចក ឃុំកកោះ ស្រុកមោងឬស្សី ខេត្តបាត់ដំបង។
៥.ឈ្មោះ សឿត ស៊ាង ភេទប្រុស អាយុ ៣១ឆ្នាំ មុខរបរ ចាក់បាស់ ភូមិកូនព្រំ ឃុំធិបតី ស្រុកគាស់ក្រឡ ខេត្តបាត់ដំបង។
៦.ថាច់ ដូង ភេទប្រុស អាយុ ១៧ឆ្នាំ មុខរបរ ធ្វើស្រែ មុខរបរ ធ្វើស្រែ រស់នៅភូមិសំបុកអក ឃុំកំពង់ព្រៀង ស្រុកសង្កែ ខេត្តបាត់ដំបង។
៧.ឈ្មោះ ណាន សុភក្តី ភេទ ស្រី អាយុ ២៩ឆ្នាំ មុខរបរ មិនពិតប្រាកដ រស់នៅភូមិត្រពាំងស្រែ ឃុំត្រពាំងស្រែ ស្រុកមេសាង ខេត្តព្រៃវែង។
វត្ថុតាងដកហូតរួមមាន :
-គ្រឿងញៀនប្រភេទម្សៅក្រាមពណ៍សថ្លា( ice ) ចំនួន០២ កញ្ចប់ ទម្ងន់ ១.០៧ ក្រាម ( ថ្លឹងទាំងសំបក )
-ទូរស័ព្ទ ចំនួន ០៥ គ្រឿង
-កាំភ្លើង ហ្គាស ចំនួន ០១ដើម
-ឧបករណ៍ប្រើប្រាស់គ្រឿងញៀនមួយចំនួន
-ថង់សម្រាប់វេចខ្ចប់គ្រឿងញៀនមួយចំនួន
-ពូថៅ ចំនួន ០១ ដើម
-កាំបិត ចំនួន ០២ដើម
-ទែម៉ូម៉ែត ចំនួន ០២
-ផ្លាកលេខម៉ូតូ ចំនួន ០៣
-ជញ្ជឹងសម្រប់ថ្លឹងគ្រឿងញៀន ចំនួន ០១
-ម៉ាស៊ីនបូមទឹក ០១ គ្រឿង
-ម៉ាស៊ីនគោយន្ត ០១ គ្រឿង
-ម៉ូទ័របូមទឹក ០១ គ្រឿង
-អាគុយ ០៦ គ្រឿង
-ម៉ាស៊ីនបូមខ្យល់ ០១ គ្រឿង
-អាំងវិចទ័របញ្ចូលអាគុយ ០១ គ្រឿង
-ឧបករណ៍ផ្សាដែក ០១ គ្រឿង
-ម៉ូតូ ០៨ គ្រឿង

សម្ភារវត្ថុតាងដកហូតខា ជំនាញកំពុងស្រាវជ្រាវពាក់ព័ន្ធបទល្មើស ទទួលផលចោរកម្ម និងស្វែងរកម្ចាស់សម្ភារទាំងនោះ ដើម្បីមានចំណាត់ការបន្តទៀត។ បច្ចុប្បន្ន ជនសង្ស័យ និងវត្ថុតាង កំពុងឃាត់ខ្លួននៅការិយាល័យជំនាញ ចាត់ការតាមនិតិវិធី៕SRP

សម្តេចតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា នៅព្រឹក ថ្ងៃព្រហស្បតិ៍ ទី៦ ខែកុម្ភៈឆ្នាំ២០២៥ នេះ បានអញ្ជើញដឹកនាំគណៈប្រតិភូជាន់ខ្ពស់កម្ពុជា អញ្ជើញបំពេញទស្សនកិច្ចផ្លូវការ ទៅកាន់សាធារណរដ្ឋប្រជាធិបតេយ្យប្រជាមានិតឡាវ ចាប់ពីថ្ងៃទី០៦ ដល់ថ្ងៃទី០៧ ខែកុម្ភៈ ឆ្នាំ២០២៥។ យោងតាមសេចក្តីប្រកាសព័ត៌មាន របស់ព្រឹទ្ធសភាកម្ពុជា បានឲ្យដឹងថា សម្តេចតេជោ ហ៊ុន សែន ដឹកនាំគណៈប្រតិភូជាន់ខ្ពស់កម្ពុជា អញ្ជើញទស្សនកិច្ចផ្លូវការទៅកាន់ប្រទេសឡាវ គឺតបតាមការអញ្ជើញរបស់ លោក សាយសំផន ភុមវិហាន ប្រធានរដ្ឋសភាឡាវ។

សមាសភាពគណៈប្រតិភូអមដំណើរ សម្តេចតេជោ ក្នុងទស្សនកិច្ច រួមមាន សម្តេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ និងជាអនុប្រធានគណបក្សប្រជាជនកម្ពុជា សម្តេចពិជ័យសេនា ទៀ បាញ់ ឧត្តមប្រឹក្សាផ្ទាល់ព្រះមហាក្សត្រ និងជាអនុប្រធានគណបក្សប្រជាជនកម្ពុជា សម្តេចកិតិ្តសង្ហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ និងជាអនុប្រធានគណបក្សប្រជាជនកម្ពុជា ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ និងជាប្រធានគណៈទាក់ទងបរទេសនៃគណបក្សប្រជាជនកម្ពុជា ព្រមទាំងសមាជិកព្រឹទ្ធសភា-រដ្ឋសភា និងថ្នាក់ដឹកនាំសំខាន់ៗនៃស្ថាប័ននីតិប្បញ្ញត្តិកម្ពុជា និងគណបក្សប្រជាជនកម្ពុជា។

នៅក្នុងឱកាសទស្សនកិច្ចនេះ សម្តេចតេជោ នឹងមានជំនួបទ្វេភាគីជាមួយ ឯកឧត្តម សាយសំផន កុមវិហាន ប្រធានរដ្ឋសភាឡាវ ជួបពិភាក្សាការងារជាមួយ ឯកឧត្តម សនសៃ ស៊ី ផាន់ដន នាយករដ្ឋមន្ត្រីឡាវ និងធ្វើជាសហប្រធានជាមួយ ឯកឧត្តម ថងលុន ស៊ីសុលីត ប្រធានរដ្ឋឡាវ និងជាអគ្គលេខាធិការគណបក្សប្រជាជនបដិវត្តន៍ឡាវ ដឹកនាំកិច្ចប្រជុំកំពូលលើកទី១៥ រវាងគណបក្ស ប្រជាជនកម្ពុជានិងគណបក្សប្រជាជនបដិវត្តន៍ឡាវ។

គួរបញ្ជាក់ដែរថា តាមរយៈដំណើរទស្សនកិច្ចទៅកាន់ប្រទេសឡាវនាពេលនេះ ត្រូវបានសម្តេចតេជោ ហ៊ុន សែន នឹងផ្តល់សន្ទុះថ្មីក្នុងការពង្រឹង និងលើកកម្ពស់ភាពជាដៃគូយុទ្ធសាស្ត្រគ្រប់ជ្រុងជ្រោយ និងយូរអង្វែង រវាងព្រះរាជាណាចក្រកម្ពុជានិងសាធារណរដ្ឋប្រជាធិបតេយ្យប្រជាមានិតឡាវ ឱ្យកាន់តែ រឹងមាំស៊ីជម្រៅ និងប្រកបដោយផ្លែផ្កាបន្ថែមទៀត៕SRP

ខេត្តសៀមរាប៖ស្រូវប្រាំងរបស់ប្រជាកសិករជាង ១០០០ ហិកតា ក្នុងសង្កាត់ចុងឃ្នៀស និងសង្កាត់សៀមរាប ក្រុងសៀមរាប ត្រូវបានអាជ្ញាធរខេត្ដ ធ្វើការចុះទៅបើកទឹកស្ទឹងសៀមរាប ដើម្បីជួយសង្គ្រោះ។

ការជួយសង្គ្រោះនេះ នៅថ្ងៃទី០៤ ខែកុម្ភៈ ឆ្នាំ២០២៥នេះ តាមការណែនាំរបស់ឯកឧត្តម ប្រាក់ សោភ័ណ អភិបាលខេត្ដសៀមរាប ដែលបានជំរុញឱ្យអាជ្ញាធរជំនាញ សម្របសម្រួល ជាមួយក្រុមហ៊ុនស្ថាបនាដងស្ទឹងសៀមរាប បើកទឹកជួយសង្គ្រោះស្រូវប្រាំងប្រជាកសិករ។

តាមការរាយការណ៍ពីប្រជាកសិករថា ស្រូវស្រែប្រាំងរបស់ពួកគាត់នាឆ្នាំនេះ ប្រឈមនឹងស្វិតស្រពោន ហើយអាចបាត់បង់ទិន្នផលបើសិនជាគ្មានទឹកគ្រប់គ្រាន់។ ពួកគាត់ថា ការកង្វះទឹកធ្វើស្រែឆ្នាំនេះ ដោយសារស្ថានភាពទឹកទន្លេតិច ហើយទឹកស្ទឹងសៀមរាប ដែលជាប្រភពទឹកហូរធ្លាក់ចូលស្រែជារៀងរាល់ឆ្នាំក៏មានការខ្វះខាត ខណៈដែលស្ទឹងសៀមរាប កំពុងកែលម្អផង។ ប៉ុន្ដែមកដល់ថ្ងៃនេះ អាជ្ញាធរខេត្ដ និងមន្ទីរអង្គភាពពាក់ព័ន្ធ បានបើកទឹកស្ទឹងសៀមរាប បូមដាក់ស្រែទៅតាមតម្រូវការជាបណ្ដើរៗហើយ។ ជាមួយគ្នានេះ ប្រជាកសិករក៏បានថ្លែងអំណរគុណដល់រាជរដ្ឋាភិបាល ជាពិសេសអាជ្ញាធរខេត្ដ និងមន្ទីរអង្គភាពពាក់ព័ន្ធ ដែលផ្ដល់ទឹកជួយសង្គ្រោះស្រូវរបស់គាត់បានចំពេល និងទាន់ពេលវេលា ដែលនេះបង្ហាញពីការយកចិត្ដទុកដាក់ដល់សុខទុក្ខរបស់ប្រជាកសិករពីសំណាក់ថ្នាក់ដឹកនាំគ្រប់ជាថ្នាក់។

ក្នុងពេលចុះជួយសង្គ្រោះ លោក អុឹង គឹមលាង អភិបាលរងខេត្ត បានណែនាំដល់ប្រជាពលរដ្ឋ អំពីការយកចិត្តទុកដាក់ របស់រាជរដ្ឋាភិបាល ក៏ដូចជាអាជ្ញាធរពាក់ព័ន្ធក្នុងការ ជួយសង្គ្រោះ ដំណាំស្រូវ របស់ពលរដ្ឋឱ្យអស់ពីលទ្ធភាព។ តែទោះយ៉ាងនេះក្តី ក្នុងនាមអាជ្ញាធរខេត្ត លោកក៏បានទទូចសុំដល់ពលរដ្ឋកុំធ្វើស្រែប្រាំងជាលើកទី២ ព្រោះស្ថានភាពទឹកមិនអំណោយផលនោះទេសម្រាប់ឆ្នាំនេះ៕SRP

ភ្នំពេញ៖យ៉ាងហោចណាស់មនុស្សចំនួន២ នាក់បានស្លាប់និង ៥ នាក់ទៀតបានរងរបួសធ្ងន់ ក្នុងហេតុការណ៍ អគ្គីភ័យឆេះក្លឹបកម្សាន្តមួយកន្លែងយីហោ « មីតណាយក្លឹប »។

ហេតុការណ៍អគ្គិភ័យនេះ បានកើតឡើងនៅវេលាម៉ោង១០ និង៣០នាទីព្រឹកថ្ងៃទី០៥ ខែកុម្ភៈ ឆ្នាំ២០២៥នេះ នៅតាមបណ្តោយផ្លូវ៣០ម៉ែត្រ ក្បែរស្តុបឬស្សីផ្អែម ស្ថិតក្នុងសង្កាត់ព្រៃស ខណ្ឌដង្កោ រាជធានីភ្នំពេញ។

យោងតាមប្រភព័ត៌មានឱ្យដឹងថា នៅមុនកើតហេតុ មានជាងមួយក្រុមបានធ្វើការផ្សារ​ដែក​នៅ​ក្នុង​ក្លឹប​ខាងលើ ខណៈក្រុមបុគ្គលិកមួយចំនួនកំពុងសម្រាកនៅក្នុងទីតាំង ។ ស្រាប់តែមួយសន្ទុះ​ក្រោយ​មក ក៏លិចចេញជា​អណ្តាត​ភ្លើង​ឆាប​ឆេះ​ឡើង​មក​លាយ​លំជាមួយ​ផ្សែង​ខ្មួរខ្មាញ់យ៉ាងសន្ធោរសន្ធៅ បង្កឱ្យមានការភ្ញាក់ផ្អើលជាខ្លាំងតែម្តងទៅ។

ភ្លាមៗ បន្ទាប់ពីកើតហេតុ កម្លាំងអាជ្ញាធរមូលដ្ឋាន រួមទាំងរថយន្តពន្លត់អគ្គិភ័យមកពីតាមអង្គភាពពាក់ព័ន្ធជាច្រើន បានចុះធ្វើការអន្តរាគមន៍បាញ់​ទឹកទប់​ស្កាត់អណ្តាតភ្លើង។ ក្រោយការអន្តរាគមន៍យ៉ាងយកចិត្តទុកដាក់ ការឆាបឆេះត្រូវគ្រប់គ្រងបានប្រសើរឡើងវិញ ក្នុងរយៈពេលជាង១ម៉ោង។

បើតាមការបញ្ជាក់ពី ឧត្តមសេនីយ៍ឯក នេត វន្ថា ប្រធាននាយកដ្ឋានបង្ការពន្លត់អគ្គិភ័យ និង​សង្គ្រោះ នៃអគ្គស្នងការដ្ឋាននគរបាលជាតិបានឱ្យថា គិតត្រឹមម៉ោង១២ថ្ងៃត្រង់នេះ មានមនុស្ស​០៤​នាក់​ហើយបានស្លាប់នៅហ្នឹងកន្លែង និង០៥នាក់ផ្សេងទៀតរងរបួសធ្ងន់ធ្ងរ ត្រូវបញ្ចូន​ទៅ​សង្គ្រោះ​បន្ទាន់​នៅមន្ទីរពេទ្យ ។

ជុំវិញហេតុការណ៍គ្រោះអគ្គិភ័យខាងលើនេះដែរ ពុំទាន់មានប្រភពព័ត៌មានបញ្ជាក់ពីមូលហេតុ ដែល​នាំឱ្យកើតជាការឆាបឆេះនៅឡើយនោះទេ ក៏ពុំទាន់មានការបញ្ជាក់ថា អាចនឹងមានមនុស្សជាប់គាំងបន្ថែមនៅខាងក្នុងទីតាំង ឬអាចប៉ះពាល់ដល់អាយុជីវិតប៉ុន្មាននាក់នៅឡើយដែរ ខណៈកម្លាំងសមត្ថ កិច្ចជំនាញ កំពុងបន្តប្រតិបត្តិការបាញ់ទឹកពន្លត់បន្ថែម និងប្រើយុទ្ធវិធីដើម្បីចូលទៅខាងក្នុងទីតាំងដែលមានការឆាបឆេះនោះ៕SRP

ខេត្តបាត់ដំបង៖អភិបាលខេត្តបាត់ដំបងបានប្រាប់មន្ត្រីពាក់ព័ន្ធទាំងអស់ចូលរួមទប់ស្កាត់បង្ក្រាបគ្រឿងញៀននិងកុំពាក់ព័ន្ធជាមួយគ្រឿងញៀន។

លោកសុខ លូ មានប្រសាសន៍ផ្តាំផ្ញើថា បញ្ហាគ្រឿងញៀន ជាបញ្ហាប្រឈមមួយ ក្នុងសង្គម និងជារឿងចាំបាច់ត្រូវតែយកចិត្តទុកដាក់ ក្នុងការដោះស្រាយ ហើយរឿងនេះ អាចលុបបំបាត់បាន និងទប់ស្កាត់បានលុះត្រាតែ មានការចូលរួមពីសំណាក់យើងទាំងអស់គ្នា មិនត្រូវឃុបឃិត នឹងបទល្មើសគ្រឿងញៀន ជាដាច់ខាត ហើយត្រូវមានស្មារតីភ្ញាក់រលឹកទាំងអស់គ្នាបង្កើនការយកចិត្តទុកដាក់ ក្នុងការទប់ស្កាត់ និងផ្សព្វផ្សាយ ឱ្យបានទូលំទូលាយបំផុត។

លោកសុខ លូ អភិបាលខេត្តបាត់ដំបង និងជាប្រធានគណៈកម្មាធិការត្រួតពិនិត្យគ្រឿងញៀនខេត្តបាត់ដំបង មានប្រសាសន៍យ៉ាងដូច្នេះ ក្នុងឱកាសអញ្ជើញជាធិបតី ពិធីផ្សព្វផ្សាយចំណេះដឹងជាមូលដ្ឋានស្ដីពីបញ្ហាគ្រឿងញៀនដល់អាជ្ញធរ សមត្ថកិច្ច ក្នុងខេត្តបាត់ដំបង នាព្រឹកថ្ងៃទី០៥ ខែកុម្ភ: ឆ្នាំ ២០២៥។

នៅសាលប្រជុំសាលាខេត្តបាត់ដំបង សុខ លូ មានមតិបើកពិធីផ្សព្វផ្សាយចំណេះដឹងជា មូលដ្ឋានស្ដីពីបញ្ហាគ្រឿងញៀន ដល់អាជ្ញធរ សមត្ថកិច្ច ក្នុងខេត្ត ត្រូវតែយកចិត្តទុកដាក់ឱ្យបានខ្ពស់ ដែលការផ្សព្វផ្សាយនេះមានសារ:សំខាន់ណាស់ ក៏ដូចជាការរំលឹកដល់សមត្ថកិច្ច ពាក់ព័ន្ធ ទាំងអស់ ដែលជាចំណេះដឹង មូលដ្ឋានគ្រិះ បង្កើនស្មារតី ប្រយុទ្ធប្រឆាំងបទល្មើសគ្រឿងញៀន និងខិតខំអនុវត្ត ទប់ស្កាត់ ករណីគ្រឿងញៀន បារីអេឡិចត្រូនិចផ្សេងៗ ត្រូវបង្កើនការផ្សព្វផ្សាយ ឱ្យបានដល់ប្រជាពលរដ្ឋគ្រប់ស្រទាប់វណ្ណៈ និងទូលំទូលាយជាពិសេសនៅតាមសាលារៀន ទីសាធារណៈ ប្រជុំជនជាដើម ត្រូវធ្វើការបង្រ្កាបឲ្យអស់នៅតាមមូលដ្ឋាន ដែលខ្លួនទទួលខុសត្រូវ ដើម្បីខេត្តយើង និងដើម្បីប្រទេសជាតិមានសុខសុវត្តិភាព។

លោក ធូ ភា អភិបាលរងខេត្តនិងជាប្រធានលេខាធិការដ្ឋាននៃគណ:កម្មាធិការត្រួតពិនិត្យគ្រឿងញៀនខេត្តបាត់ដំបង បានឡើងធ្វើបទបង្ហាញក្នុងកិច្ចប្រជុំផ្សព្វផ្សាយ ចំណេះដឹង ជាមូលដ្ឋានស្ដីពីបញ្ហាគ្រឿងញៀន ដល់អាជ្ញធរ សមត្ថកិច្ច កងកម្លាំងទាំងបី ក្នុងខេត្តបាត់ដំបង។

ឆ្លៀតក្នុងឱកាសនោះដែរ លោក ធូ ភា បានលើកពីបញ្ហាប្រឈម នៃការ ជួញដូរគ្រឿង ចែកចាយ គ្រឿងញៀន តាមគ្រប់រូបភាព ដែលធ្វើឲ្យ កងកម្លាំង អាជ្ញាធរ បង្រ្កាបបានជាបន្តបន្ទាប់ និងជួបការលំបាកផ្សេងៗ ក្នុងការបង្រ្កាបបទល្មើស ព្រោះជនល្មើសទាំងនោះឈានដល់ការជួញដូរគ្រឿងញៀន តាមរយ:ប្រព័ន្ធអនឡានជាដើម៕SRP