ខេត្តសៀមរាប៖អាជ្ញាធរថ្នាក់ជាតិ បានសម្រេចជ្រើសរើសយក ឃុំកំពង់ភ្លុក ជាទីតាំងស្រាវជ្រាវ បង្ក្រាបបទល្មើសជលផល។

ការសម្រេចជ្រើសរើសយប់ឃុំកំពង់ភ្លុក ជាទីតាំងឈរជើងរបស់សមត្ថកិច្ចដើម្បីទប់ស្កាត់និងបង្ក្រាបបទល្មើសជលផលនេះគឺ នៅថ្ងៃអាទិត្យ ទី២៧ ខែមីនា ម្សិលមិញ។

រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោកវេង សាខុន បានឲ្យដឹងថា ដោយមានការសម្របសម្រួលពី លោក នេត សាវឿន អគ្គស្នងការនគរបាលជាតិ លោក វង្ស ពិសេន អគ្គមេបញ្ញាការកងយោធពលខេមរភូមិន្ទ និងលោក សៅ សុខា អគ្គមេបញ្ញាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ក្រុមការងារអន្តរក្រសួង-ស្ថាប័នដឹកនាំដោយ លោក ណៅ ធួក រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងគណ:បញ្ជាការឯកភាពខេត្តសៀមរាប ដែលមានកម្លាំងសរុបចំនួន ៧០នាក់ និងទូកចំនួន ៧គ្រឿង បានចុះពិនិត្យស្ថានភាពបទល្មើសជលផល និងកំណត់ទីតាំងបញ្ជាការឈរជើង របស់ក្រុមអន្តរាគមន៍ថ្នាក់ជាតិ ដើម្បីស្រាវជ្រាវ តាមដាន ត្រួតពិនិត្យជាប្រចាំនូវសកម្មភាពបទល្មើសជលផល។

លោកវេង សាខុន បន្តថា បន្ទាប់ពីការចុះពិនិត្យជាក់ស្តែង ក្រុមការងារអន្តរក្រសួង-ស្ថាប័នបានសម្រេចជ្រើសរើស ទីតាំងបញ្ជាការឈរជើងរបស់ក្រុមអន្តរាគមន៍ថ្នាក់ជាតិ ស្ថិតនៅកន្លែងអភិរក្សជលផលកំពង់ភ្លុក ឃុំកំពង់ភ្លុក ស្រុកប្រាសាទបាគង និងឃុំកំពង់ឃ្លាំង ស្រុកសូទ្រនិគម ខេត្តសៀមរាប។

លោកវេង សាខុន បញ្ជាក់ថាសារៈសំខាន់នៃទីតាំងឈរជើងនេះគឺ អាចចល័តកម្លាំងជួយអន្តរាគមន៍ដល់ភូមិសាស្រ្តខេត្តសៀមរាប ខេត្តបាត់ដំបង និងមួយផ្នែកនៃខេត្តពោធិ៍សាត់បានយ៉ាងងាយស្រួល និងទាន់សភាពការ។ ក្នុងបេសកកម្មនេះ កម្លាំងខណ្ឌរដ្ឋបាលជលផលខេត្តសៀមរាប ក៏បានរឹបអូសទូក ១គ្រឿង និងឧបករណ៍នេសាទម៉ាញ់ ១វង់ ដែលជនល្មើសបានលាក់បង្កប់ក្នុងទឹកនៅចំណុចចុងឃ្នាសផងដែរ៕SRP

ខេត្តបាត់ដំបង៖ក្នុងឱកាសអញ្ជើញចុះសួរសុខទុក្ខ និងចែកអំណោយរបស់សាខាកាកបាទក្រហមកម្ពុជាខេត្តបាត់ដំបង ជូនដល់ប្រជាពលរដ្ឋមានជីវភាពខ្វះខាត និងងាយរងគ្រោះចំនួន ១៨៩គ្រួសារ មកពីឃុំកោះជីវាំង និងឃុំព្រៃចាស់ ស្រុកឯកភ្នំ ខេត្តបាត់ដំបងនៅរសៀលថ្ងៃអាទិត្យនេះ លោក សុខ លូ អភិបាលខេត្តបាត់ដំបង បានផ្តាំផ្ញើដល់បងប្អូនប្រជាពលរដ្ឋទាំងអស់ ត្រូវចូលរួមធ្វើការផ្សព្វផ្សាយ និងជួយទប់ស្កាត់ការនេសាទខុសច្បាប់ និងការធ្វើជំរឿនឧបករណ៍នេសាទ ក្នុងករណីរកឃើញថា មានឧបករណ៍នេសាទដែលខុសច្បាប់ គឺសមត្ថកិច្ចត្រូវតែដកហូត។

លោកក៏បាន សំណូមពរឲ្យប្រជាពលរដ្ឋ បើបានជួបបទល្មើសនេសាទ សូមទាក់ទង និងផ្តល់ព័ត៌មានមកអាជ្ញាធរភូមិ ឃុំ និងសមត្ថកិច្ចជំនាញដើម្បីអនុវត្តទៅតាមច្បាប់។

លោកក៏បានបន្តជំរុញឲ្យប្រជាពលរដ្ឋ ដែលមិនទាន់បានចាក់វ៉ាក់សាំង ឬបានចាក់វ៉ាក់សាំងដូសទី២រួចហើយ សូមរួសរាន់ទៅចាក់វ៉ាក់សាំងដូសទី៣បន្តទៀត ព្រោះថាដើម្បីកាត់បន្ថយការឆ្លង និងហានិភ័យ នៃការស្លាប់ដោយមេរោគកូវីដ-១៩ ខណៈមេរោគបំប្លែងខ្លួនថ្មីអូរមីក្រុង បាននឹងកំពុងផ្ទុះឆ្លងបន្តមកតាមបណ្តាខេត្ត បើមិនមានការចូលរួមអនុវត្តតាមវិធានការសុវត្ថិភាពរបស់ក្រសួងសុខាភិបាល និងគោលការណ៍ ៣កុំ ៣ការពារ ឱ្យបានត្រឹមត្រូវនោះទេ៕SRP

ខេត្តបាត់ដំបង៖លោកសុខ លូ បានព្រមានមន្រ្ដីដែលពាក់ព័ន្ធ បទល្មើសនេសាទ ឲ្យប្រញាប់ដកខ្លួនចេញជាបន្ទាន់។

លោកសុខ លូ បានសង្កត់ធ្ងន់ទៅដល់មន្រ្ដីណាដែលមានការពាក់ព័ន្ធ ទៅនឹងបទល្មើស ត្រូវប្រញាប់ដកខ្លួនចេញជាបន្ទាន់ និងត្រូវសហការជាមួយអាជ្ញាធរមានសមត្ថកិច្ច ហើយមិនត្រូវធ្វើគេចវេសឡើយ បើពុំនោះទេនឹងត្រូវប្រឈមមុខនឹងច្បាប់ដោយមិនត្រូវមានការលើកលែងជាដាច់ខាត។

លោកបានបន្ថែមទៀតថា ត្រូវពិនិត្យមើលបញ្ជីឈ្មោះអ្នកដែលបានប្រព្រឹត្តបទល្មើស ហើយត្រូវកសាងសំណុំរឿងរួចបញ្ជូនទៅតុលាកា ដើម្បីចាត់ការទៅតាមផ្លូវច្បាប់ដោយមិនមានការលើកលែងនោះឡើយ។

លោកក៏ជំរុញឲ្យប្រជាពលរដ្ឋ និងសហគមន៍ បើបានជួបបទល្មើសនេសាទ សូមទាក់ទង និងផ្តល់ព័ត៌មានតាមរយៈលេខ Hotline របស់ក្រសួងកសិកម្ម រុក្ខាប្រមាញ់ និងនេសាទ ដែលមានលេខ ០១២ ៩៩ ៥៦ ៦៥/០១២ ៨៧១ ០៧១ ផងដែរ។

លោកសុខ លូ ក៏បានណែនាំ និងជំរុញដល់ អភិបាលស្រុក មន្រ្ដីជំនាញ កងកម្លាំងប្រដាប់អាវុធ ត្រូវតែប្ដេជ្ញាចូលរួមសហការឲ្យបាន ក្នុងការទប់ស្កាត់បទល្មើសនេសាទ នៅតំបន់បឹងទន្លេសាបនៅក្នុងភូមិសាស្រ្ដនេះ ក្នុងករណីមានបទល្មើសនេសាទ មិនថាទ្រង់ទ្រាយធំ ឬតូច ត្រូវតែធ្វើការទប់ស្កាត់ ដើម្បីរក្សានូវពូជមច្ឆជាតិនៅក្នុងបឹងទន្លេសាបកុំឲ្យបាត់បង់។

លោកសុខ លូ អភិបាលខេត្តបាត់ដំបង លើកឡើងបែបនេះក្នុងឱកាសដឹកនាំកិច្ចប្រជុំផ្សព្វផ្សាយជាមួយក្រុមការងារ កងកម្លាំង មន្ទីរ អង្គភាពពាក់ព័ន្ធ មន្រ្តីជំនាញពាក់ព័ន្ធប្រជាពលរដ្ឋ និងសហគមន៍ និងចុះពិនិត្យស្ថានភាព ការពង្រឹងការបង្ក្រាបបទល្មើសនេសាទ នៅក្នុងភូមិសាស្រ្ត ឃុំកោះជីវាំង ស្រុកឯកភ្នំ ខេត្តបាត់ដំបង នៅអាទិត្យនេះ។

លោសុខ លូ បានមានប្រសាសន៍ថា ដោយអនុវត្តតាមបទបញ្ជាយ៉ាងដាច់ណាត់របស់សម្តេចតេជោ ហ៊ុន សែន កាលពីថ្ងៃទី២៣ ខែមីនា ឆ្នាំ២០២២ កន្លងទៅថ្មីៗនេះ ឱ្យលុបបំបាត់បទល្មើសនេសាទខុសច្បាប់គ្រប់ប្រភេទ នៅបឹងទន្លេសាប ជាពិសេសក្នុងភូមិសាស្រ្តខេត្តបាត់ដំបង ក្នុងនាមអាជ្ញាធរខត្ត និងគណៈបញ្ជាការឯកភាពរដ្ឋបាលខេត្ត ប្រកាន់ជំហរ និងប្តេជ្ញា ក្នុងការសហការបង្ក្រាបបទល្មើសនេសាទ ហើយមកដល់ពេលនេះគឺឈប់លើកលែង និងអប់រំទៀតហើយ សម្រាប់អ្នកដែលមានការពាក់ព័ន្ធនឹងបទល្មើសនេសាទ ដូចជាការឃុបឃិត យកលុយ យកកាក់ជាដើម។

លោកបានបន្តទៀតថា ឱ្យមានការបង្កើតទីបញ្ជាការស្រាលមួយសម្រាប់អនុវត្តការគ្រប់គ្រង និងបង្ក្រាបបទល្មើសនេសាទនេះ ហើយបន្តផ្សព្វផ្សាយ និងចុះធ្វើជំរឿនឧបករណ៍នេសាទជាមួយប្រជាពលរដ្ឋ ក្នុងករណីរកឃើញថាមានឧបករណ៍នេសាទដែលខុសច្បាប់គឺសមត្ថកិច្ចត្រូវតែដកហូតតែម្ដង៕SRP

ខេត្តពង់ចាម​៖លោក​​ អ៊ុន​ ចាន់ដា​ អភិបាលខេត្តកំពង់ចាម​ បានលើកឡើងថាសកម្មភាពទាំងនេះអាចប្រព្រឹត្តទៅបានក៏ដោយសារប្រទេសជាតិយេីងមាន ស្ថេរភាព និងសុខសន្តិភាពពេញលេញ ក្រោមការដឹកនាំប្រកបដោយគតិបណ្ឌិត របស់ សម្តេចតេជោ ហ៊ុន សែន​ ក្នុងការដឹកនាំប្រទេសជាតិ​ ឲ្យមានការ​អភិវឌ្ឍន៍​ រីកចំរើនឥតឈប់ឈរ​ តាម​រយៈ​ការផ្សះផ្សាជាតិបង្រួបបង្រួមជាតិ​ ដូច្នេះ​សូម​ឲ្យ​បងប្អូន​ប្រជាពលរដ្ឋ​ទាំងអស់​ ត្រូវរួមគ្នាថែរក្សាសុខសន្តិភាព និងស្ថេរភាពគោលនយោបាយឈ្នះឈ្នះ របស់សម្តេចតេជោ ឲ្យបានគង់វង្ស​ ដេីម្បី​បន្ត​ការ​អភិវឌ្ឍន៍​ ជាពិសេស​ការ​លើកស្ទួយ​ជីវភាព​រស់នៅ​របស់​ប្រជាពលរដ្ឋ​។

ថ្លែង​បែបនេះ​ក្នុង​ឱកាស​ដឹកនាំ​ក្រុមគ្រូពេទ្យស្ម័គ្រចិត្ត​សាខា​សមាគម​សិស្ស​ និស្សិត​បញ្ញវន្ត​ក្មេង​វត្ត​ ខេត្តកំពង់ចាម​ ចុះពិនិត្យ​ ​ព្យាបាល​ជម្ងឺ​ដោយ​ឥតគិតថ្លៃជូនប្រជាពលរដ្ឋ​ លេីក​ទី​២​ នៅ​ភូមិ​កំពង់រលីង​ សង្កាត់សំបួរមាស​​ ក្រុងកំពង់ចាម​ នៅថ្ងៃអាទិត្យនេះ។

លោក​​ អ៊ុន​ ចាន់ដា​ បានថ្លែងថា ក្រៅ​ពី​ការ​អភិវឌ្ឍន៍​​​កសាងនូវ​ហេដ្ឋារចនាសម្ពន្ធ័​ អាជ្ញាធរ​យើង​បាន​យកចិត្តទុកដាក់​គិតគូរចំពោះ​សុខមាលភាព​ របស់​​បងប្អូនប្រជាពលរដ្ឋ​ តាម​រយៈ​ការ​ចុះពិនិត្យ​ ព្យាបាល​ជម្ងឺ​ដោយ​ឥតគិតថ្លៃដល់​មូលដ្ឋាន​​​ ដើម្បីលើកកម្ពស់កម្រិតជីវភាព​រស់នៅ​ ឲ្យកាន់តែប្រសើរឡើង​បន្ថែមទៀត​។

លោក​ អ៊ុន​ ចាន់ដា​ បាន​ថ្លែងថា​ ​ក្រុមគ្រូពេទ្យស្ម័គ្រចិត្ត​សាខា​សមាគម​សិស្ស​ និស្សិត​បញ្ញវន្ត​ក្មេង​វត្ត​ខេត្តកំពង់ចាម​ សរុប​ចំនួន​២៨នាក់​ ​ដោយ​មាន​ការ​គាំទ្រ​ពី​លោក​ ហ៊ុន​ ម៉ានិត​​ ចុះ​ពិនិត្យ​ ព្យាបាល​ជម្ងឺ​​ដោយ​ឥតគិតថ្លៃជូន​ប្រជាពលរដ្ឋ​ ប្រមាណ​ជា​ង២០០នាក់​ ដេីម្បី​ជាការ​ចូលរួម​កាត់បន្ថយ​ការ​ចំណាយ​របស់​បងប្អូន​ នៅ​ពេល​ដែល​មាន​ជម្ងឺ​ឈឺថ្កាត់​ ដោយមិន​ចាំបាច់​ចំណាយ​ពេលវេលា​ និង​ថវិកា​​ទៅ​មន្ទីរពេទ្យ​រដ្ឋ​ និង​ឃ្លីនីច​​​ឯកជន​ ពោលគឺការ​ពិនិត្យ​ព្យាបាលដោយមិនប្រកាន់បក្សពួក សាសនា ឬនិន្នាការនយោបាយ​អ្វី​ឡេីយ។

លោក​ អ៊ុន​ ចាន់ដា​ ក៏បាន​​លេីកឡេីង​ថា​ ក្នុង​ដំណាក់កាល​ចុងក្រោយ​នេះ​ គឺ​មាន​ការ​ផ្ទុះឡេីងនូវ​រលក​ថ្មី​ នៃវីរុស​ប្រភេទ​អូមេក្រុង​ ដែលឆ្លង​ខ្លាំង​ ប៉ុន្តែ​ពុំមាន​អ្នក​ស្លាប់​បាត់បង់​ជីវិត​ទេ ព្រោះ​ប្រជាពលរដ្ឋ​យើង​ បាន​ចាក់​វ៉ាក់សាំង​ការពារ​ជម្ងឺ​កូវីដ​-១៩​ ដូច្នេះ​សូមឲ្យ​បងប្អូន​ប្រជាពលរដ្ឋ​ ដែល​មិន​ទាន់​បាន​ចាក់​វ៉ាក់សាំង​ដូស​មូលដ្ឋាន​ ឬ​ដូស​ជម្រុញ​គ្រប់​ចំនួន​​ទេនោះ សូម​អញ្ជើញ​មក​ទទួល​ឲ្យ​បាន​គ្រប់ៗគ្នា​​ ផងដែរ​៕SRP

ខេត្តសៀមរាប៖ក្រសួងវប្បធម៌ និងវិចិត្រសិល្បៈមានមោទកភាព ដែលគណៈកម្មាធិការអន្តរជាតិដើម្បីសម្របសម្រួលកិច្ចគាំពារ និងអភិរក្សតំបន់ប្រវត្តិសាស្រ្តអង្គរ ហៅកាត់ថា  ICC-Angkor ប្រកាសបន្តអាណត្តិការងារជួយអភិរក្ស រមណីយដ្ឋានអង្គរ បេតិកភណ្ឌពិភពលោក ១០ឆ្នាំទៀ។

បង្ហាញចំណាប់អារម្មណ៍នៅក្នុង សន្និសីទសារព័ត៌មាន ក្រោយពីបញ្ចប់កិច្ចប្រជុំពេញអង្គលើកទី២៨ របស់អាយស៊ីស៊ី-អង្គរ (ICC Angkor ) ដែលបានប្រព្រឹត្តទៅនៅខេត្តសៀមរាប កាលពីល្ងាច ថ្ងៃទី២៥ ខែមីនា ឆ្នាំ២០២២ លោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលនៃអាជ្ញាធរជាតិអប្សរា  បានលើកឡើងថា លោកជំទាវផ្ទាល់ ក៏ដូចជាប្រជាពលរដ្ឋកម្ពុជា  ពិតជាមានមោទកភាពយ៉ាងខ្លាំង ដែលអាយស៊ីស៊ី-អង្គរ (ICC-Angkor) ប្រកាសបន្តអាណត្តិការងារ រយៈពេល១០ឆ្នាំទៅមុខទៀត ដើម្បីជួយអភិរក្សប្រាសាទបុរាណខ្មែរ។
លោកជំទាវបន្តលើកឡើងទៀតថា សមិទ្ធិផលថ្មីនេះ អាចសម្រេចទៅបាន ដោយសាររាជរដ្ឋាភិបាលកម្ពុជា អ្នកជំនាញអន្តរជាតិ និងភាគីពាក់ព័ន្ធនៃអាយស៊ីស៊ី-អង្គរ (ICC Angkor) បានធ្វើការ ហើយបង្កើតបាននូវទំនុកចិត្តរួមគ្នាជាធ្លុងគ្នាមួយ។ កត្តាសំខាន់មួយទៀត ដែលបណ្តាលឱ្យទទួលបានលទ្ធផលប្រកបដោយមោទកភាពនេះ គឺដោយសារតែប្រទេសកម្ពុជាមានសុខសន្តិភាពពេញលេញ បង្កបានលក្ខណៈងាយស្រួល សម្រាប់កិច្ចការពារ អភិរក្ស និងថែរក្សាប្រាសាទបុរាណ នៃរមណីយដ្ឋានបេតិកភណ្ឌពិភពលោកនានារបស់កម្ពុជា។

ដោយឡែក តំណាងជាន់ខ្ពស់នៃអាយស៊ីស៊ី-អង្គរ (ICC Angkor )  បានពន្យល់បន្ថែមថា  ការសម្រេចបន្តអាណត្តិការងារ សម្រាប់រយៈពេល១០ ឆ្នាំទៅមុខទៀតនេះ   គឺដើម្បីបន្តជួយការងារអភិរក្ស ជួសជុល  និងអភិវឌ្ឍរមណីយដ្ឋានអង្គរ ឱ្យ នៅជាគំរូមួយ សម្រាប់ប្រទេសជាច្រើនផ្សេងទៀតនៅក្នុងពិភពលោក ដែលមានលក្ខខណ្ឌប្រហាក់ប្រហែលនឹងកម្ពុជា។

ទន្ទឹមគ្នានេះ លោក Jacques PELLET និង លោក  MIKAMI Masahiro សហប្រធានបារាំង-ជប៉ុន បានមានប្រសាសន៍បន្តថា  បច្ចុប្បន្ន  អាយស៊ីស៊ី-អង្គរ (ICC-Angkor)   សង្កេតឃើញថា  អ្នកបច្ចេកទេសកម្ពុជា កាន់តែមានសមត្ថភាព និងជំនាញច្បាស់លាស់ លើការងារជួសជុល ការពារ និងអភិរក្សប្រាសាទ បុរាណរួចហើយ។ ប៉ុន្តែ បើទោះបីជាយ៉ាងណាក៏ដោយ ការងារអភិរក្ស និងអភិវឌ្ឍន៍មួយចំនួនទៀត នៅត្រូវការ ការផ្តល់អនុសាសន៍បច្ចេកទេសកម្រិតខ្ពស់នៅឡើយពីអ្នកជំនាញការ Ad Hoc អន្តរជាតិ ហើយដែលនេះក៏ជាមូលហេតុដែលអាយស៊ីស៊ី-អង្គរ (ICC-Angkor) សម្រេចចិត្តបន្តអាណត្តិរបស់ខ្លួនរយៈពេល១០ឆ្នាំទៅមុខទៀត ក្នុងគោលដៅជួយពង្រឹងសមត្ថភាពដល់អ្នកបច្ចេកទេសកម្ពុជា ឱ្យកាន់តែរឹងមាំបន្ថែមទៀត។

ជាទីបញ្ចប់ អាយស៊ីស៊ី-អង្គរ (ICC- Angkor) បញ្ជាក់ជូនថា  សម្រាប់រយៈពេល៣០ឆ្នាំកន្លងមកនេះ  អាយស៊ីស៊ី-អង្គរ (ICC-Angkor) តាមរយៈការដឹកនាំរបស់សហប្រធានបារាំង  និងជប៉ុន និងក្រោមកិច្ចសហការយ៉ាងជិតស្និទ របស់រាជរដ្ឋាភិបាលកម្ពុជា បានអនុវត្តគម្រោងអភិរក្សនៅតំបន់រមណីយដ្ឋានអង្គរ បានច្រើន ជាង១០០ គម្រោង ក្នុងនោះបានចំណាយថវិកា ប្រមាណជាង៦០០លានដុល្លារ។
ថវិកាទាំងអស់នេះ គឺបានមកពីការខំប្រឹងប្រែងរបស់អង្គការ UNESCO អាយស៊ីស៊ី-អង្គរ (ICC-Angkor) តាមរយៈក្រុមអ្នកជំនាញការ ADHOC អន្តរជាតិ ជាសេនាធិការ អំពាវនាវកៀរគរពីប្រទេសម្ចាស់ជំនួយជាច្រើន ដែលចាប់អារម្មណ៍ទៅលើការងារជួសជុល អភិរក្ស និងថែរក្សាប្រាសាទនានា  ក្នុងតំបន់រមណីយដ្ឋានអង្គរបេតិកភណ្ឌពិភពលោក ឱ្យនៅស្ថិតស្ថិរគង់វង្សតទៅទៀត៕SRP

ខេត្តព្រៃវែង៖សមត្ថកិច្ចបានចាប់ខ្លួនមេប៉ុស្តិ៍ឃុំព្នៅទី១ ដែលដកកាំភ្លើងខ្លីបាញ់ប្រពន្ធចុងចំនួន៤គ្រាប់បណ្តាលឱ្យស្លាប់ ក្រោយមានទំនាស់ពាក្យសម្តីពេលចេញពីកន្លែងផឹកស៊ី។

ហេតុការណ៍បានកើតឡើងនៅមុខវត្តផាត់សណ្តោង ឃុំព្នៅទី១ ស្រុកស៊ីធរកណ្តាល ខេត្តព្រៃវែងកាលពីយប់ថ្ងៃទី២៤ ខែមីនា។

មន្រ្តីមូលដ្ឋានបានឱ្យដឹងថា ប្តីនិងប្រពន្ធចុងបានឈ្លោះប្រកែកគ្នាបន្តិចបន្តួច បែរជាធ្វើឱ្យប្តីមានតួនាទីជានាយប៉ុស្តិ៍រដ្ឋបាលផ្ទុះកំហឹងក៏ដកកាំភ្លើងខ្លីម៉ាកk៥៤ បាញ់ប្រពន្ធចុង៤គ្រាប់។ តែផ្ទុះ២គ្រាប់ ត្រូវចំក្បាល ១គ្រាប់និងក១គ្រាប់បណ្តាលឱ្យស្ត្រីរូបនោះដួលស្លាប់តែម្តង។

ជនសង្ស័យឈ្មោះម៉ៅ សុវណ្ណហុង អាយុ៥៣ឆ្នាំ ជានាយប៉ុស្តិ៍នគរបាលឃុំព្នៅទី១ នៅភូមិផាត់សណ្តោង ខេត្តព្រៃវែង។

ចំណែកស្រ្តីដែលស្លាប់ឈ្មោះសុខ មួយ អាយុ៥១ឆ្នាំនៅភូមិឃុំជាមួយគ្នា។ បច្ចុប្បន្នសមត្ថកិច្ចឃាត់ខ្លួននៅអធិការដ្ឋាននគរបាលស្រុកស៊ីធរកណ្តាល ដើម្បីបន្តនីតិវិធី៕SRP

ខេត្តកំពង់ចាម៖លោក​ អ៊ុន ចាន់ដា អភិបាលខេត្តកំពង់ចាម បានថ្លែងកោតសរសើរ និងវាយតម្លៃខ្ពស់ដល់សមត្ថកិច្ច និងអាជ្ញាធរគ្រប់លំដាប់ថ្នាក់ រួមជាមួយនឹងរដ្ឋបាលខេត្ត ទៅបានដោះស្រាយបញ្ហាប្រឈមជាច្រើន ដូចជាការបង្ក្រាបបទល្មើសនានា រួមទាំងបទល្មើសធនធានធម្មជាតិ ល្បែងស៊ីសង និងបានចូលរួមយ៉ាងសកម្មជាមួយក្រុមគ្រូពេទ្យ ក្នុងការប្រយុទ្ធប្រឆាំងនឹងជំងឺកូវីដ-១៩ ផងដែរ។ លើសពីនេះ សម្រាប់​ប៉ុស្តិ៍​នគរបាល​រដ្ឋបាល​ ដែលបាន​ចូលរួម​ប្រឡងប្រណាំង​ចលនា​ភូមិ-ឃុំមានសុវត្ថិភាព​ ក្នុងឆ្នាំ​២០២១កន្លង​ទៅ​នេះ​ គឺទទួលបានជ័យលាភីលេខ១ ទាំង១០៩ឃុំ-សង្កាត់​ លេី​១០៩ឃុំ​-សង្កាត់​ នៅ​ទូទាំង​ខេត្តកំពង់ចាមតែម្តង។

ការលើកឡើងរបស់អភិបាលខេត្តកំពង់ចាម
ក្នុងពិធីសម្ពោធដាក់ឲ្យប្រើប្រាស់​អគារ​ប៉ុស្តិ៍​នគរបាល​រដ្ឋបាល​មហាខ្ញូង និង​ប៉ុស្តិ៍​នគរបាល​រដ្ឋបាលពង្រ នៃអធិការដ្ឋាននគរបាលស្រុកកោះសូទិន នៅថ្ងៃសុក្រម្សិលមិញ។

លោក​ អ៊ុន ចាន់ដា ក៏បានជំរុញដល់​កងកម្លាំង​នគរបាល​ ឲ្យបន្តពង្រឹងសមត្ថភាព ក្នុងការបំពេញការងារប្រកបដោយក្រមសីលធម៌និងវិជ្ជាជីវៈ ហេីយត្រូវ​រួមគ្នាដោះស្រាយសំណូមពរ ឬបញ្ហាប្រឈមនានា នៅមូលដ្ឋានប្រកបដោយប្រសិទ្ធភាព និងការទទួលខុសត្រូវ​ផងដែរ​។

លោក​ អ៊ុន​ ចាន់ដា​ ក៏បានស្នើដល់​កងកម្លាំង​នគរបាល​ទាំងអស់​ ត្រូវបន្តខិតខំធ្វើការងារ ឲ្យប្រជាពលរដ្ឋមានទំនុកចិត្ត និងរៀបចំឥរិយាបថ ឲ្យសក្កិសមជាអ្នកបម្រើប្រជាពលរដ្ឋ និងត្រូវខិតខំធ្វើការងារប្រកបដោយប្រសិទ្ធភាព ធ្វើយ៉ាងណា​ត្រូវ​បម្រើសេវាសន្តិសុខ ជូនប្រជាពលរដ្ឋឲ្យកាន់តែល្អប្រសើរ ឲ្យ​ប្រជាពលរដ្ឋ មានទំនុកចិត្តមកលើ​សមត្ថកិច្ច​អាជ្ញាធរ​យើង ដែលជាមន្ត្រីនគរបាលយុត្តិធម៌ ព្រមទាំង​ខិតខំសម្របសម្រួល បង្កលក្ខណៈងាយស្រួល ជូនប្រជាពលរដ្ឋ ពេលដែលពួកគាត់មកទទួលសេវាផ្សេងៗ។

អភិបាលខេត្តថា ដើម្បីការពារតំណែងជ័យលាភី លេខ១នេះ ឲ្យបានតទៅមុខទៀត ដូច្នេះនគរបាលយុត្តិធម៌ អាជ្ញាធរ ភូមិ ឃុំ ត្រូវខិតខំបន្ថែមទៀតក្នុងការអនុវត្តគោលនយោបាយ ភូមិ-ឃុំ មានសុវត្ថិភាព ធ្វើយ៉ាងណាឲ្យប្រជាពលរដ្ឋកាន់តែមានទំនុកចិត្ត មកលើសមត្ថកិច្ច​ផងដែរ​៕SRP

ខេត្តបាត់ដំបង៖អភិបាលខេត្តលោក សុខ លូ បានមានប្រសាសន៍ថ្លែងនូវការគាំទ្រដល់ការអភិវឌ្ឍន៍ អាកាសយានដ្ឋាន ទៅជាប្រភេទ4C ដើម្បីធ្វើឲ្យទាក់ទាញភ្ញៀវទេសចរក្រៅស្រុក និងក្នុងស្រុកអាចធ្វើដំណើរត្រង់មកខេត្តបាត់ដំបង និងដើម្បីចូលរួមការអភិវឌ្ឍខេត្តបាត់ដំបង ឲ្យកាន់តែមានភាពរីកចម្រើនតទៅមុខទៀត ក្រោយពេលដែលអាកាសយានដ្ឋានប្រភេទ4C ចេញជារូបរាង ជាសមិទ្ធផលកើតចេញមក។

លោកសុខ លូ ក៏បានស្នើឲ្យមានសិក្សាឲ្យច្បាស់លាស់ អំពីគម្រោងនៃការពង្រីកផ្លូវRunway ដែលត្រូវការទំហំដីបន្ថែមទៀត ដើម្បីធ្វើយ៉ាងណាកុំឲ្យប៉ះពាល់ដល់ ប្រជាពលរដ្ឋដែលរស់នៅ។

លោកបានបន្តថា ក្នុងនាមរដ្ឋបាលខេត្តនឹងធ្វើការចូលរួមសហការជានិច្ច ដោះស្រាយបញ្ហានានាដែលធ្វើឲ្យប៉ះពាល់ ដល់កិច្ចអភិវឌ្ឍន៍អាកាសយានដ្ឋាននៅខេត្តបាត់ដំបង ដើម្បីឲ្យអាកាសយានដ្ឋាននេះ លេចរូបរាងឡើងនៅក្នុងទឹកដីកសិកម្មមួយនេះ។

ការលើកឡើងរបស់លោកសុខ លូ យ៉ាងដូច្នេះ ក្នុងកិច្ចប្រជុំពិភាក្សាការងារ ក្រុមបច្ចេកទេសអំពីលទ្ធភាពស្ដារ និងអភិវឌ្ឍន៍អាកាសយានដ្ឋានបាត់ដំបងលំដាប់ថ្នាក់ 4C នៅថ្ងៃសុក្រ ម្សិលមិញ។

ក្នុងកិច្ចប្រជុំនោះផងដែរ លោក សយ សុខាន់ រដ្ឋលេខាធិការនៃលេខាធិការដ្ឋានអាកាសចរស៊ីវិល បានមានប្រសាសន៍ថា ដោយយោងអនុសាសន៍ដ៏ខ្ពង់ខ្ពស់ពីសម្ដេចហ៊ុន សែន បានមានប្រសាន៍ណែនាំដល់ក្រសួងពាក់ព័ន្ធ រដ្ឋបាលខេត្ត អំពីការសិក្សាលទ្ធភាពស្ដារឡើងវិញនូវអាកាសយានដ្ឋានបាត់ដំបង ក្រោយពីត្រូវបានទុកចោលច្រើនឆ្នាំមកហើយ ។

លោកបានបន្តទៀតថា ចំពោះការស្ដារឡើងវិញនូវអាកាសយានដ្ឋាននេះ នឹងអភិវឌ្ឍន៍ពីអាកាសយានដ្ឋានប្រភេទ 3C ទៅជាអាកាសយានដ្ឋានប្រភេទ4C តែម្ដង ដោយផ្អែកទៅតាមតម្រូវការ និងបង្កភាពងាយស្រួលដល់ក្រុមហ៊ុនអាកាសចរក្នុងស្រុក ដែលមានយន្តហោះប្រភេទAirbus ឬBoeing អាចបើកជើងយន្តហោះ មកទីរួមខេត្តបាត់ដំបងបាន និងជាពិសេសអាចមានជើងហោះហើរទៅក្រៅស្រុកបានផងដែរ។ លោកបន្តទៀតថា ក្រោយពីធ្វើការសិក្សារួចមក គឺមានបញ្ហាមួយចំនួនដែលត្រូវដោះស្រាយ ដោយត្រូវដោះស្រាយបញ្ហាប្រជាពលរដ្ឋ ដែលរស់នៅអាស្រ័យផល នៅក្នុងអាកាសយានដ្ឋាន ការពង្រីកផ្លូវRunwayបន្ថែមទៀត និងត្រូវធ្វើការជួសជុល ជាច្រើនទៀត ដោយសារត្រូវបានទុកចោល រាប់ឆ្នាំមកហើយ៕SRP

ខេត្តកំពង់ធំ៖បុរសជាឪពុកយកកាំបិតតោ កាប់កូនស្រី ខណ:នាងគ្រុនកំពុងដេកលង់លក់ បណ្ដាលឲ្យស្លាប់ពេលបញ្ជូនដល់មន្ទីរពេទ្យ។

ហេតុការណ៍កើតឡើងថ្ងៃទី២៥ ខែមីនា ឆ្នាំ២០២២ វេលាម៉ោង ២១និង៤០នាទីយប់ នៅចំណុចផ្ទះឈ្មោះ ទីន ហន អាយុ៥៩ឆ្នាំនៅភូមិព្នៅ ឃុំត្នោតជុំ ស្រុកបារាយណ៍ ខេត្តកំពង់ធំ។

ជនរងគ្រោះឈ្មោះ កំសត់ ឡៃណាង ភេទស្រីអាយុ៨ខែ រស់នៅជាមួយជីដូនឈ្មោះ ចេវ ពៅ។ជនសង្ស័យឈ្មោះ ហ៊ាង សត់ អាយុ៣០ឆ្នាំ រស់នៅភូមិ-ឃុំកើតហេតុ។

យោងតាមរបាយការណ៍បានឲ្យដឹងថា មុនពេលកើតហេតុជនសង្ស័យ ទៅធ្វើការសំណង់ក្បែរផ្ទះហើយ ផឹកស្រាស្រវឹងជោគជាំ រហូតដល់ម៉ោងប្រហែល២១ជាង ត្រឡប់មកផ្ទះ រករឿងឪពុក-ម្ដាយ ខណ:ពេលម្ដាយកំពុងមើលចៅ(សព)គ្រុន ដោយដាក់ចៅអោយដេកក្នុងម៉ុងលើគ្រែក្រោមផ្ទះ ស្រាប់តែជនសង្ស័យ យកកាំបិតប៉ឹងតោស្ទុះទៅកាប់កូនខ្លួនទាំងកំរោល ត្រូវចំផ្ទៃមុខខាងឆ្វេង ១កន្លែង បណ្ដាលអោយរបួសធ្ងន់។ ភ្លាមៗជនសង្ស័យបានយកកាំបិតផ្គាក់ដេញកាប់ឪពុក-ម្ដាយ បងប្អូននៅក្នុងផ្ទះ  តែមិនបង្កឲ្យនណាម្នាក់រងរបួសនោះទេ។មួយសន្ទុះក្រោយមកទើបមានប្រជាពលរដ្ឋ មកជួយអន្តរាគមន៍ ទើបជនសង្ស័យរត់គេចខ្លួនបាត់។

ករណីនេះសមត្ថកិច្ចស្រាវជ្រាវ រហូតឃាត់ខ្លួនជនដៃដល់បាន នៅវេលាម៉ោង៥និង៥៦នាទី នាថ្ងៃទី២៦ ខែមីនា ឆ្នាំ២០២២ នៅចំណុចវាលស្រែ ខាងវាលបឹងវៀន ភូមិព្រែកក្រោល ឃុំត្នោតជុំ ដែលមានចំងាយ១៥០០ម៉ែត្រពីកន្លែងកើតហេតុ។
ផ្នែកព្រហ្មទណ្ទអធិការ នគរបាលស្រុកបារាយណ៍ កសាងសំណុំរឿងទៅតាមនិតិវិធី។មូលហេតុ: ស្រវឹងស្រា៕SRP

ខេត្តសៀមរាប៖សហប្រធានគណៈកម្មាធិការអាយស៊ីស៊ី-អង្គរ បារាំង និងជប៉ុន ប្រកាសជួយជ្រោមជ្រែងការងារអភិរក្ស និងអភិវឌ្ឍន៍ ប្រកបដោយចីរភាព រយៈពេល១០ឆ្នាំទៀត។

សហប្រធានបារាំង និងជប៉ុន បានប្រកាសពីការសម្រេចចិត្ត របស់រដ្ឋាភិបាលនៃប្រទេសទាំងពីរ នៅក្នុងពិធីបើកកិច្ចប្រជុំពេញអង្គលើកទី២៨ នៃកិច្ចប្រជុំរបស់គណៈកម្មាធិការអាយស៊ីស៊ី-អង្គរ នៅសុក្រ ទី២៥ ខែមីនា ឆ្នាំ២០២២ នេះដោយមានវត្តមានរបស់លោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលនៃអាជ្ញាធរជាតិអប្សរា។

ការប្រកាសនៃសេចក្តីសម្រេចចិត្តនេះ ទទួលបានការសាទរយ៉ាងខ្លាំងក្លាពីគ្រប់ភាគីពាក់ព័ន្ធនៃកិច្ចប្រជុំ។ សូមបញ្ជាក់ថា គណៈកម្មាធិការអាយស៊ីស៊ី-អង្គរត្រូវបានបង្កើតឡើងនៅខែធ្នូ ឆ្នាំ១៩៩៣ ហើយនឹងត្រូវបញ្ចប់អាណត្តិទី៣របស់ខ្លួននៅចុងឆ្នាំ២០២៣។ តាមរយៈនៃការប្រកាសនៃសេចក្តីសម្រេចចិត្តនេះ គណៈកម្មាធិការអាយស៊ីស៊ី-អង្គរនឹងបន្តអាណត្តិលើកទី៤រហូតដល់ឆ្នាំ២០៣៣។

ក្នុងរយៈពេល៣០ឆ្នាំមកនេះ គណៈកម្មាធិការអាយស៊ីស៊ី-អង្គរបានទទួលជោគជ័យជាប្រវត្តិសាស្ត្រនូវការធានាបានការជួសជុលប្រាង្គប្រាសាទធ្វើយ៉ាងណាធានាបាននូវភាពរឹងមាំរបស់ប្រាង្គប្រាសាទ ការងារអភិវឌ្ឍន៍ប្រកបដោយចីរភាព ការគ្រប់គ្រងជួសជុល អភិរក្សនិងអភិវឌ្ឍន៍ប្រកបដោយចីរភាព។ ចំពោះរយៈពេល១០ឆ្នាំខាងមុខទៀត គណៈកម្មាធិការអាយស៊ីស៊ី-អង្គរ នឹងផ្តោតទៅលើការងារបេតិកភណ្ឌ និងសហគមន៍ ដើម្បីផ្សារភ្ជាប់នូវទំនាក់ទំនងរវាងបេតិកភណ្ឌ និសហគមន៍ដែលធ្វើឱ្យកិច្ចការអភិរក្ស និងអភិវឌ្ឍតំបន់រមណីយដ្ឋានអង្គរកាន់តែល្អប្រសើរ៕SRP អត្ថបទ៖ កញ្ញា ឆាយ ផាន់នី
រូបភាព៖ លោក ហាប់ គឹមអាន/លោក ហ៊ុំ រិទ្ធី

ខេត្តសៀមរាប៖ជនជាតិអាមេរិកម្នាក់ ត្រូវបានសមត្ថកិច្ចខេត្តសៀមរាបរាយការណ៍ថា បានស្លាប់នៅវេលាម៉ោង១រសៀថ្ងៃទី២៤ ខែមីនា ឆ្នាំ២០២២ នៅចំណុចបន្ទប់ជួលក្រុមទី២ ស្ថិតនៅក្នុងភូមិត្រពាំងត្រែង សង្កាត់សាលាកំរើក ក្រុងសៀមរាប។

សមត្ថកិច្ចជំនាញខេត្តបានឲ្យដឹងថាជនរងគ្រោះមានឈ្មោះNORELL WILLIAM ERNEST  ភេទប្រុស អាយុ៧៣ឆ្នាំ(មុខរបរគ្មាន)ជនជាតិអាមេរិក កាន់លិខិតឆ្លងដែនលេខ522774319 ស្នាក់នៅទីតាំងខាងលើ។

តាមការស្រាវជ្រាវរបស់សមត្ថកិច្ចជំនាញ និងលោកគ្រូពេទ្យអមតុលាការធ្វើកោសល្យវិច័យបានសន្និដ្ឋានថាមូលហេតុ ការស្លាប់របស់ជនរងគ្រោះ ដោយសារស្ទះសសៃឈាមបេះដូង។ បច្ចុប្បន្នសាកសពយកទៅតម្កល់ទុកនៅវត្តស្ទឹងមានជ័យភ្នំពេញ រងចាំការសម្រេចពីក្រុមគ្រួសារនិងស្ថានទូត៕SRP

ខេត្តសៀមរាប៖បុរសម្នាក់បានបើកម៉ូតូបុកគោយន្តចំពេញទំហឹងបណ្ដាលឲ្យស្លាប់ភ្លាមៗ។ ហេតុការណ៍បានកើតឡើងនៅវេលាម៉ោង ៧និង៣០នាទី ថ្ងៃទី២៥ ខែមីនា ឆ្នាំ២០២២ នៅលើផ្លូវមិត្តភាព.កម្ពុជាកូរ៉េ ស្ថិតនៅភូមិបំពេញរាជ្យ ឃុំលាងដៃ ស្រុកអង្គរធំ។

សមត្ថកិច្ចនគរបាលខេត្តសៀមរាបបានឲ្យដឹងថាករណីគ្រោះថ្នាក់ចរាចណ៍នេះរវាងគោយន្តច្នៃពណ៌ខៀវនិងម៉ូតូម៉ាកហុងដា២០១៨ពណ៌ខ្មៅពាក់ស្លាកលេខសៀមរាប1AG-5461ជិះស្របទិសគ្នា ពីជើងទៅត្បូង មកដល់កន្លែងកើតហេតុ គោយន្តកែច្នៃបត់ឆ្វេង ហើយបុរសអ្នកបើកម៉ូតូបុកចំពាក់កណ្តាលគោយន្តកែច្នៃបណ្ដាលឲ្យស្លាប់តែម្ដង។ សមត្ថកិច្ចនគរបាលបន្តថាជនរងគ្រោះ ឈ្មោះ ចាន់ សុខ ភេទប្រុសអាយុ ២២ ឆ្នាំរស់នៅភូមិជប់សោម ឃុំពាក់ស្នែង ស្រុកអង្គរធំ។ ក្នុងនោះខូចខាតម៉ូតូ១គ្រឿង ចំណែកតៃកុងគោយន្តកែច្នៃរត់គេចខ្លួនបាត់។ ក្រោយកើតហេតុសមត្ថកិច្ចនាំយកគោយន្តកែច្នៃយកមករក្សាទុកនៅអធិការដ្ឋាននគបាលស្រុកអង្គរធំ។ គ្រោះថ្នាក់នេះមូលហេតុ អ្នកបើកបរម៉ូតូខ្វះការប្រុងប្រយ័ត្ន៕SRP