ខេត្តព្រះវិហារ៖យ៉ាងហោចណាស់កម្មករចំនួនបីនាក់បានស្លាប់បាត់បង់ជីវិត នៅតំបន់រំដេង ខេត្តព្រះវិហារ ខណៈថៅកែនិងមន្ត្រីព្យាយាមបិទព័ត៌មាន។

ហេតុការណ៍នេះបានកើតឡើង នៅតំបន់រំដេង ក្នុងស្រុករវៀង ខេត្តព្រះវិហារ នៅរសៀលថ្ងៃទី២០ខែឆ្នូ ឆ្នាំ២០២២។

យោងតាមសេចក្ដីរាយការណ៍ពីខេត្តព្រះវិហារបានឲ្យដឹងថា ករណីនេះកម្មករចំនួន២នាក់ រុករករ៉ែមាស នៅតំបន់រំដេង បានស្លាប់បាត់បង់ជីវិតដោយសារខ្សែភ្លើងឆក់ ក្នុងរណ្តៅរ៉ែមាស របស់ថៅកែឈ្មោះ( ធា) នឹងម្នាក់ទៀតបានខ្យល់គរស្លាប់ ក្រោយចេញពីក្នុងរណ្ដៅរ៉ែមាស របស់ថៅកែឈ្មោះ កាឆយ។ ចំណុចរណ្ដៅរ៉ែមាសរបស់ថៅកែ ទាំង២នាក់ខាងលើ គេសង្ស័យថា មិនមានបច្ចេកទេស គ្រប់គ្រាន់ និងមិនមានជំនាញច្បាស់លាស់ តាមបច្ចេកទេសឬ(គ្មានច្បាប់អនុញាតនោះទេ)។

ប្រភពបានបន្តថា៖ជនរងគ្រោះ ទី
១ ឈ្មោះ និង បូរី ភេទប្រុសអាយុ៣៧ឆ្នាំ(ប្អូនថ្លៃ)។ ទី
២ ឈ្មោះ យ៉ន យឿន ភេទប្រុសអាយុ៣៥ឆ្នាំ(ក្មួយ)។ អ្នកទាំង២ រស់នៅភូមិត្រពាំងទន្ទឹម ឃុំរមទម ស្រុករវៀង ខេត្តព្រះវិហារ (ជាកម្មករ) របស់ថៅកែឈ្មោះធា។ បានឆក់ខ្សែភ្លើងនៅក្នុងរណ្ដៅរ៉ែមាស ដែលកំពុងជញ្ជូនអាចម៍ដី ពីក្នុងរណ្ដៅយកមកខាងលើ តែខ្វះបច្ចេកទេស បានបណ្ដាលឲ្យឆក់ស្លាប់នៅក្នុងរណ្ដៅដីនោះតែម្ដង។

ទី៣ ឈ្មោះ ប៉ែន ស្រេង អាយុ៥៣ឆ្នាំ មានស្រុកកំណើតភូមិខ្សាច់ទុក ឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ បានស្លាប់ ក្រោយបញ្ជូន មកកាន់មណ្ឌលសុខភាពភ្នំដែក ឃុំរមណីយ៍ ស្រុករវៀង ខេត្តព្រះវិហារ (កម្មករ) ថៅកែមាន ឈ្មោះ វណ្ណា ជាប្រពន្ធ ឈ្មោះឆយ (កាឆយ)។

ប្រភពបានបន្តទៀតថា តាមការបំភ្លឺពីកូនជនរងគ្រោះថា៖ មុនកើតហេតុ ជនរងគ្រោះ ជាឪពុក បានចេញពីក្នុងរណ្តៅការដ្ឋានរុករករ៉ែ របស់ថៅកែមាសឈ្មោះ កាឆយ ក្នុងសភាពអស់កម្លាំងខ្លាំង ក៏ស្រាប់តែទៅងូតទឹក ក្នុងស្រះ ក្បែរនោះដូចសព្វមួយដង ខណៈងូតទឹកបានមួយភ្លែត ក៏បានឃើញឪពុកលិចចូលស្រះនោះទៅ ពេលនោះកូនរបស់គាត់ក៏បានចុះទៅក្នុងស្រះស្រង់ឡើងមកលើគោក និងដឹកមកសង្រ្គោះនៅមណ្ឌលសុខភាព តែជាអកុសល ជនរងគ្រោះ បានបាត់បង់ជីវិត៕SRP

ភ្នំពេញ៖រថយន្តរបស់តារាចម្រៀង ម្នាក់ ត្រូវបានជនជាតិចិនបេីករថយន្តទំនេីប​ បុកគូថពីក្រោយ បណ្ដាលឱ្យរងការខូចខាតយ៉ាងដំណំ។

ហេតុការណ៍បានកើតឡើងនៅរំលងអធ្រាត្រ ឈានចូលថ្ងៃទី២១ ខែធ្នូ ឆ្នាំ២០២២ តាមបណ្ដោយផ្លូវ៣០ម៉ែត្រ កែងនឹងមហាវិថីចោមចៅ (ចំណុចភ្លើងស្តុបសេះមាស) ស្ថិតក្នុងសង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។

ប្រភពបានឲ្យដឹងថាករណីខាងលើគឺរថយន្តតារាចម្រៀងស្រី គង់ កែវមរកត ត្រូវបានជនជាតិចិនបេីករថយន្តទំនេីប​ PORSCHE​ បុកគូថពីក្រោយ៕SRP

ខេត្តកំពង់ចាម​៖ក្នុង​ឱកាស​ប្រារព្ធទិវាជាតិប្រឆាំងការជួញដូរមនុស្ស ក្រោមប្រធានបទ «រួមគ្នាលុបបំបាត់អំពើជួញដូរមនុស្ស ឆ្ពោះទៅសម្រេចគោលដៅអភិវឌ្ឍជាតិ ប្រកបដោយចីរភាព» ដែល​បាន​ធ្វើឡើង​នៅ​ស្រុកស្ទឹងត្រង់​ នៅថ្ងៃអង្គារនេះ លោក អ៊ុន​ ចាន់ដា​ អភិបាលខេត្តកំពង់ចាម​ បានព្រមានថា​ លោកនឹងមិនលើកលែងជាដាច់ខាត ចំពោះជនទាំងឡាយណា ដែលលូកដៃអន្តរាគមន៍ ឲ្យមានការដោះលែងជនល្មើស ក្នុងអំពើជួញដូរមនុស្ស​ ហេីយលោកនឹងមានវិធានការយ៉ាងតឹងរឹងបំផុត ចំពោះជនជាមេខ្យល់ទាំងឡាយនោះ។

អភិបាលខេត្ត​បានថ្លែងថា​ គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស តែងតែប្រារព្ធទិវាជាតិនេះឡើង ជារៀងរាល់ឆ្នាំ ទាំងនៅថ្នាក់ជាតិ និងថ្នាក់ក្រោមជាតិ រួមទាំង ការផ្សព្វផ្សាយខិតប័ណ្ណ តាមសាលារៀន និងទិសាធារណៈនានា នៅទូទាំងខេត្ត ដែលមានអ្នកចូលរួម និងទទួលបាននូវខិតប័ណ្ណ រហូតដល់រាប់សែននាក់ ដើម្បីបំផុសការយល់ដឹងយ៉ាងទូលំទូលាយ អំពីព្រឹត្តិការណ៍ ស្ថានភាព និងនិន្នាការ នៃអំពើរជួញដូរមនុស្ស ដែលបង្កគ្រោះមហន្តរាយ ដល់មនុស្ស ក្មេង ចាស់ ប្រុស ស្រី និងដល់សង្គមជាតិ ឥតឈប់ឈរ ទាំងនៅក្នុងព្រះរាជាណាចក្រកម្ពុជា ទាំងនៅតាមមូលដ្ឋាននានា។ ក្រៅពីនោះ ការរៀបចំកម្មវិធីនេះ ក៏ជាឱកាសមួយ ក្នុងការដាស់តឿន ដល់ប្រជាពលរដ្ឋគ្រប់រូប គ្រប់វ័យ គ្រប់ស្ថានភាព គ្រប់មជ្ឈដ្ឋាន ឲ្យប្រុងប្រយ័ត្ន ចំពោះល្បិចកលថ្មីៗ របស់ជនល្មើសជូញដូរមនុស្ស ផងដែរ។

អភិបាលខេត្តកំពង់ចាម​ រូបនេះ ក៏បានធ្វើការអំពាវនាវ ដល់បងប្អូន​ប្រជាពលរដ្ឋ​ ជាពិសេសកងកម្លាំងមានសមត្ថកិច្ច នៅមូលដ្ឋាន សូមចូលរួមឲ្យបានកាន់តែសកម្ម ថែមទៀត ដើម្បីរួមគ្នាប្រយុទ្ធប្រឆាំងនឹងអំពើជួញដូរមនុស្ស តាមគ្រប់ទម្រង់ និងគ្រប់រូបភាព ព្រមទាំង​សូមចូលរួម ទាំងអស់គ្នា បន្តទៀត ដើម្បី ភូមិ ឃុំ មានសុវត្ថិភាព នោះគឺការចូលរួមអនុវត្តនូវគោលនយោបាយ របស់រាជរដ្ឋាភិបាល ឲ្យមានប្រសិទ្ធភាព និងទទួលបានប្រសិទ្ធផលគឺ៖ ១.គ្មានបទល្មើសលួច ឆក់ ប្លន់ គ្រឿងញៀន ល្បែងស៊ីសងខុសច្បាប់ និងបទល្មើសគ្រប់ប្រភេទ។ ២.មានសណ្ដាប់ធ្នាប់សាធារណៈល្អ ពិសេស គ្មានគ្រោះថ្នាក់ចរាចរណ៍។ ៣.គ្មានអំពើអនាចារ គ្មានការជួញដូរមនុស្ស ពិសេស ស្ត្រី និងកុមារ គ្មានអំពើហឹង្សាក្នុងគ្រួសារ និងគ្មានក្មេងទំនើង។ និង៤.មានអនាម័យ មានសោភ័ណភាពល្អ និងមានបរិស្ថានល្អ៕SRP

ខេត្តសៀមរាប៖ក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តសៀមរាប អាណត្តិទី៣ ឆ្នាំ២០២២ គោលដៅទី៣ សម្រាប់ស្រុកអង្គរធំ និងស្រុកបន្ទាយស្រី ថ្ងៃអង្គារនេះ លោក អ៊ាន ឃុន ប្រធានក្រុមប្រឹក្សាខេត្ត បានលើកឡើងថា៖ នេះជា​ការលើកទឹកចិត្ត ដល់បងប្អូនប្រជាពលរដ្ឋ អាចលើកឡើងនូវទុក្ខកង្វល់ បញ្ហាប្រឈម និងសំណូមពរនានា ក្នុងវេទិកានេះ ឲ្យបានច្រើន តាមរយៈការលើកឡើងផ្ទាល់មាត់ និងការសរសេរ ដើម្បីឲ្យក្រុមការងារ ប្រមូលនូវរាល់មតិយោបល់ បញ្ហាប្រឈម និងសំណូមពរ ទាំងនោះ មកធ្វើការស្រាយបំភ្លឺ ប្រកបដោយតម្លាភាព នឹងឈានទៅរកការដោះស្រាយជូនបានចំគោលដៅ មានប្រសិទ្ធិភាព និងទាន់ពេលវេលា។

លោក អ៊ាន ឃុន បានបន្តថា វេទិកាផ្សព្វផ្សាយ និងពិគ្រោះយោបល់នាពេលនេះ គឺធ្វើឡើងក្នុងគោលបំណងដើម្បីផ្ដល់ព័ត៌មាន ជូនប្រជាពលរដ្ឋ អំពីសមិទ្ធផលនានា ដែលក្រុមប្រឹក្សាសម្រេចបានកន្លងមក និងបញ្ហាប្រឈម ដែលត្រូវដោះស្រាយ បន្ត នឹងទទួលសំណួរ សំណូមពរ របស់ ប្រជាពលរដ្ឋ ដែលមានបញ្ហា និងក្ដីកង្វល់ ដើម្បីធ្វើការឆ្លើយតប និងដោះស្រាយជូនម្ចាស់សំណួរ សំណូមពរ ក្នុងការបង្កើនភាពជិតស្និត រវាងប្រជាពលរដ្ឋ និងអាជ្ញាធរ ដែលជាការផ្ដល់សេវាសាធារណៈ នានាជូនពលរដ្ឋ ក្នុងមូលដ្ឋានកាន់តែមានភាពល្អប្រសើរឡើង។

លោក អ៊ាន ឃុន បានគូសបញ្ជាក់ថាវេទិកាសាធារណៈនេះ ពិតជាមានសារៈ សំខាន់ណាស់ ក្នុងការជួយជំរុញដល់ដល់ការអនុវត្ត មុខងាររបស់អ្នកពាក់ព័ន្ធ រួមនឹងអាជ្ញាធរមូលដ្ឋានឲ្យកាន់តែមានប្រសិទ្ធភាព បន្ថែមទៀត ស្របតាមច្បាប់លិខិតបទដ្ឋានគតិយុត្តនៅថ្នាក់មូលដ្ឋាន។ ក្នុងនោះការពិនិត្យ និងដោះស្រាយបញ្ហា សំណូរ-សំណូមពរបស់ប្រជាពលរដ្ឋ នឹងជួយជំរុញដល់ការអភិវឌ្ឍសេដ្ឋកិច្ចសង្គម សំដៅលើកកម្ពស់ គុណភាពជីវិត កាត់បន្ថយភាពក្រីក្រ របស់ប្រជាពលរដ្ឋ នៅតាមបណ្ដាក្រុង-ស្រុក នៃខេត្តសៀមរាប ទាំងមូល។

សូមជម្រាបថា វេទិកាផ្សព្វផ្សាយ និងពិគ្រោះយោបល់
ទៅព្រឹកមិញនេះ ក្រុមការងារបានទទួលនូវសំណួរ-សំណូមពរ ផ្ទាល់មាត់ចំនួន​ ១១ ដោយផ្តោតទៅលើបញ្ហាបរិស្ថាន , ព្រៃសហគមន៍ , គម្រកព្រៃឈើ , ហេដ្ឋារចនាសម្ព័ន្ធផ្លូវថ្នល់ , តម្លៃកសិផល (លើសត្វជ្រូក មាន់ទាក្នុងស្រុក) តម្លៃប្រើប្រាស់អគ្គិសនី , អគារសិក្សា , កង្វះ គ្រូបង្រៀន និង ករណីអាជីវកម្មបូមខ្សាច់ ម្យ៉ាងទៀត ក្រុមការងារទទួលបានសំណួរ​ សំណូមពរជាលាយល័ក្ខអក្សរ មាន៣៣សំណួរ សំណូមពរដែលនឹងជូនដំណឹងនៅពេលក្រោយផងដែរ។

វេទិកាក៏បានធ្វេីការផ្សព្វផ្សាយ ដល់បងប្អូនប្រជាពលរដ្ឋ ទាំងអស់ ដែលប្រកបមុខរបរ កសិកម្មដូចជាចិញ្ចឹមមាន់​ ចិញ្ចឹមសត្វផ្សេងៗ ត្រូវអនុញ្ញាតឲ្យប្រើប្រាស់ នៅពេលយប់ (ចាប់ពីម៉ោង២១ដល់ម៉ោង៦ព្រឹក មានតម្លៃ៤៨០រៀល ក្នុង១គីឡូវ៉ាត់ម៉ោង )៕SRP

ខេត្តកំពង់ចាម៖អាជ្ញាធររដ្ឋនឹងចំណាយថវិកា ប្រមាណជាង ២២លានដុល្លារ សម្រាប់គ្រោងសាងសង់ប្រព័ន្ធលូ​ និងស្ថានីយ៍ចម្រោះទឹកកខ្វក់ នៅក្រុងកំពង់ចាម​។

លោក អ៊ុន ចាន់ដា អភិបាលខេត្តកំពង់ចាម ថ្ងៃចន្ទម្សិលមិញ បានដឹកនាំកិច្ចប្រជុំពិភាក្សា​ កាងារ​សាងសង់​​ប្រព័ន្ធលូ​ និងស្ថានីយ៍ចម្រោះទឹកកខ្វក់ នៅក្រុងកំពង់ចាម​ ក្នុង​រង្វង់ទឹកប្រាក់​ប្រមាណ​​ជាង ២២លានដុល្លារអាមេរិក ​ដែល​នឹង​បេីក​ការដ្ឋាន​សាងសង់​នាពេលឆាប់ៗខាងមុខនេះ។

បើតាម លោក ហូ រដ្ឋា មន្ត្រីក្រុមប្រឹក្សាបច្ចេកទេស បានឲ្យដឹងថា គម្រោងសាងសង់ស្ថានីយ៍ចម្រោះទឹកកខ្វក់ ក្នុងក្រុងកំពង់ចាម គឺបែងចែកជាតំបន់ ដែលត្រូវប្រមូលទឹកកខ្វក់ ចេញពីផ្ទះប្រជាពលរដ្ឋ និងតំបន់អាគារពាណិជ្ជកម្ម ចូលទៅក្នុងតំបន់ធំមួយចំនួន ដើម្បី ចម្រោះទឹកស្អុយ ដែលអាចយកមកប្រើប្រាស់ស្រោចស្របបាន ដូចទឹកធម្មជាតិដែរ ដែលផ្ដល់នូវអត្ថប្រយោជន៍យ៉ាងសំខាន់ សម្រាប់ប្រជាពលរដ្ឋ ក៏ដូចជា ទីក្រុងកំពង់ចាម ទាំងមូល នាពេលស្ថានីយ៍ចម្រោះទឹកកខ្វក់នេះ បានសាងសង់រួចនោះ។ ទោះជាយ៉ាងណា ក្នុងដំណើរការសាងសង់ អាចមានផលប៉ះពាល់លំនៅដ្ឋាន របស់ប្រជាពលរដ្ឋខ្លះៗ ដែលតម្រូវឲ្យមានការសម្របសម្រួល ពីអាជ្ញាធរ ដើម្បី ប្រជាពលរដ្ឋ សហការ ជាមួយនឹងក្រុមការងារ ក្នុងន័យឲ្យគម្រោង ដំណើរការសាងសង់ បានទៅដោយរលូនទៅមុខ។

ដោយឡែក លោក រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានមានប្រសាសន៍ថា ការបរិច្ឆេទច្បាស់លាស់ នៃដំណើរការសាងសង់ប្រព័ន្ធ ចម្រោះទឹកក្រខ្វក់នេះ ត្រូវរងចាំ សម្ដេចហ៊ុន​ សែន រៀបចំពិធី ដើម្បី ប្រកាសដាក់ឲ្យដំណើរការ។ ប៉ុន្តែ សូមឲ្យរដ្ឋបាលខេត្តកំពង់ចាម ត្រៀមជាស្រេច ដើម្បី ចាប់ផ្ដើមដំណើរការផងដែរ។

រដ្ឋលេខាធិការ រូបនេះ ក៏បានក្រើនរំលឹកដល់អាជ្ញាធរខេត្តកំពង់ចាម សូមឱ្យត្រៀមរៀបចំធនធានមនុស្ស ទុកជាស្រេច ដើម្បី ចូលទៅគ្រប់គ្រងសមិទ្ធផល នាពេលគម្រោងដំណើរការរួចរាល់ ជាស្ថាពរនោះ។ ពីព្រោះបញ្ហានេះ បានកើតមានឡើង នៅតាមបណ្ដាខេត្តផ្សេងៗ ដែលក្រោយពេលទទួលសមិទ្ធផលហើយ បានជួបបញ្ហា រៀបចំធនធានមនុស្សដើម្បីគ្រប់គ្រង៕SRP

ខេត្តសៀមរាប៖ប្រមុខរាជរដ្ឋាភិបាលកម្ពុជាសម្ដេចតេជោហ៊ុន សែន បានសម្រេចប្ដូរចេញ ចៅហ្វាយស្រុក ចំនួន ៣ស្រុក ក្នុងខេត្តសៀមរាប ឲ្យទៅបម្រើការងារនៅរដ្ឋបាលសាលាខេត្តសៀមរាប វិញ ខណៈអភិបាលស្រុកបន្ទាយស្រី ត្រូវបានតែតែងតាំងជំនួសលោកឃឹម ហ្វីណង់ ហើយ។

នេះបើយោងតាមអនុក្រឹត្យសម្ដេចតេជោហ៊ុន សែន ចុះនៅថ្ងៃទី ៥ ខែធ្នូ ឆ្នាំ ២០២២ សៀមរាបប៉ុស្តិ៍ ទើបទទួលបាននូវរសៀលថ្ងៃចន្ទនេះ។

សេចក្ដីសម្រេចបានបញ្ជាក់ថា មាត្រា ១ : ផ្ទេរភារកិច្ចមន្ដ្រីរាជការចំនួន ០៤រូប នៅក្នុងខេត្តសៀមរាប ដូចមានរាយនាមខាងក្រោម៖

១- លោក ឡុង រដ្ឋរក្យ ឋានន្តរស័ក្តិឧត្តមមន្ត្រី ថ្នាក់លេខ៦ ពីអភិបាល នៃគណៈអភិបាលស្រុក អង្គរធំ ទៅបម្រើការងារនៅរដ្ឋបាលខេត្តសៀមរាប។

២- លោក លុក ផុស ឋានន្តរស័ក្តិវរមន្ត្រី ថ្នាក់លេខ១ ពីអភិបាល នៃគណៈអភិបាលស្រុក អង្គរជុំ ទៅបម្រើការងារនៅរដ្ឋបាលខេត្តសៀមរាប។

៣- លោក ម៉ក់ ប្រុស ឋានន្តរស័ក្តិវរមន្ត្រី ថ្នាក់លេខ១ ពីអភិបាល នៃគណៈអភិបាលស្រុក សូទ្រនិគម ទៅបម្រើការងារនៅរដ្ឋបាលខេត្តសៀមរាប។

៤- លោក ពៅ ប៊ុនធឿន ឋានន្តរស័ក្តិវរមន្ត្រី ថ្នាក់លេខ២ ពីអភិបាល នៃគណៈអភិបាលស្រុក ជីក្រែង ទៅជាអភិបាល នៃគណៈអភិបាលស្រុកអង្គរធំ។

មាត្រា ២ : តែងតាំងមន្ត្រីរាជការចំនួន ០៥រូប ឱ្យកាន់មុខតំណែងជាអភិបាល នៃគណៈអភិបាលស្រុកនៅក្នុងខេត្ត សៀមរាប ដូចមានរាយនាមខាងក្រោម៖

១- លោក រិន ឡូត ឋានន្តរស័ក្តិឧត្តមមន្ត្រី ថ្នាក់លេខ៥ ជាអភិបាល នៃគណៈអភិបាល ស្រុកបន្ទាយស្រី។

២ – លោក គិម វណ្ណៈ ឋានន្តរស័ក្តិឧត្តមមន្ត្រី ថ្នាក់លេខ៦ ជាអភិបាល នៃគណៈអភិបាលស្រុកសូទ្រនិគម។

៣- លោក សុខ ណារ៉ត – ឋានន្តរស័ក្តិវរមន្ត្រី ថ្នាក់លេខ១ ជាអភិបាល នៃគណៈអភិបាលស្រុកក្រឡាញ់។

៤- លោក គន់ សុខុម ឋានន្តរស័ក្តិវរមន្ត្រី ថ្នាក់លេខ២ ជាអភិបាល នៃគណៈអភិបាលស្រុក អង្គរជុំ។

៥- លោក បូ ម៉េងទ្រី ឋានន្តរស័ក្ដិអនុមន្ត្រី ថ្នាក់លេខ១ ជាអភិបាល នៃគណៈអភិបាលស្រុកជីក្រែង៕SRP

ខេត្តកំពង់ចាម៖ក្នុងនាមអាជ្ញាធរខេត្ត លោក
អ៊ុន​ ចាន់ដា​ អភិបាលខេត្តកំពង់ចាម​ បានថ្លែងអំណរគុណ​យ៉ាង​ជ្រាលជ្រៅ​ ចំពោះ ឯកឧត្ដម មេបញ្ជាការកងពល «ង» ៧០ ដែលបានឧបត្ថម្ភរថយន្តសង្គ្រោះបន្ទាន់ចំនួន ០១គ្រឿង ដល់រដ្ឋបាលខេត្តកំពង់ចាម និងបន្តជូនមណ្ឌលសុខភាពស្តៅ​ ស្រុកកងមាស​ សម្រាប់​ប្រេីប្រាស់ជាមធ្យោបាយដឹកបញ្ជូន អ្នកជម្ងឺទៅសង្គ្រោះ នៅមន្ទីពេទ្យបង្អែកខេត្ត ក៏ដូចជាមន្ទីពេទ្យនានានៅរាជធានីភ្នំពេញ។

ក្នុង​ពិធី​ប្រគល់​ និង​ទទួល​ រថយន្ត​សង្គ្រោះ​បន្ទាន់​មកពីប្រទេសកូរ៉េខាងត្បូង​ ម៉ាក HYUNDAI STAREX AMBULANCE ពណ៌ស ផលិតឆ្នាំ២០១២ មួយ​គ្រឿង​នេះ​ដែរ​ អភិបាលខេត្ត​ ក៏បាន​​សម្ដែង​នូវការ​គោរពជូនពរដល់ឯកឧត្តមមេបញ្ជាការ ព្រមទាំងសហការី​ ឲ្យជួបប្រទះនូវពុទ្ធពរ ៤ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ​៕SRP

ខេត្តកំពង់ចាម​៖លោកអ៊ុន​ ចាន់ដា​ អភិបាលខេត្តកំពង់ចាម​ បានថ្លែងថា​ គ្មានទេការរើងអើងចំពោះ ជនមានពិការភាព ហើយសិទ្ធិរបស់ ជនមានពិការភាព ត្រូវបានការពារដោយច្បាប់ជាតិ​ និងអន្ដរជាតិ ដើម្បីធានាដល់សិទ្ធិស្មើភាពគ្នា រវាងជនមានពិការភាព និងមិនមានពិការភាព។​

លោកថ្លែង​បែប​នេះ​ក្នុង​ឱកាស​ប្រារព្ធ​ទិវាជនមានពិការភាពកម្ពុជាលើកទី២៤ និងអន្តរជាតិលើកទី៤០ ក្រោមប្រធានបទ «ពិការភាពទាំងអស់ មិនអាចកំណត់ ដោយការមើលនឹងភ្នែកនោះទេ» ដែលបានធ្វើឡើងនៅសាលា​ស្រុកកំពង់សៀម​ នៅថ្ងៃចន្ទនេះ។

ក្នុងពិធី លោក អ៊ុន​ ចាន់ដា​ បានអាននូវសារលិខិតរបស់ សម្ដេចតេជោ ហ៊ុន សេន នាយករដ្ឋមន្រ្តី នៃកម្ពុជា ដោយបញ្ជាក់ថា​ រាជរដ្ឋាភិបាល បានដាក់ចេញនូវផែនការ យុទ្ធសាស្ត្រជាតិ ស្តីពីពិការភាព ២០១៩-២០២៣ ដោយបានគិត យ៉ាងល្អិតល្អន់ អំពីការដោះស្រាយ ជូនជនមានពិការភាព​ ដើម្បីបង្កើនការងារ​ និងសន្តិសុខសេដ្ឋកិច្ច ក្នុងគោលដៅ កាត់បន្ថយភាពក្រីក្រ តាមរយៈការលើកកម្ពស់កំណើនការងារសមស្រប និងការពង្រីកអាជីព​ និងមុខរបរ​ ដើម្បីបង្កើនជីវភាព រស់នៅបានសមរម្យជូនជនមានពិការភាព។

ទន្ទឹមនឹងនេះ ការផ្ដល់លទ្ធភាពទទួលបានការអប់រំ​ និងបណ្ដុះបណ្ដាល បច្ចេកទេសជំនាញ និងវិជ្ជាជីវៈ ការលើកកម្ពស់ការអប់រំដល់ជនមានពិការភាព​ ប្រកបដោយគុណភាព បរិយាបន្ន សមភាព សមធម៌ និងពេញមួយជីវិត គឺជាការធ្វើវិនិយោគមួយ ដ៏មានសារៈប្រយោជន៍​ និងនិរន្តភាព។

កន្លងទៅនេះ រាជរដ្ឋាភិបាលក៏បានដាក់ចេញនូវបទដ្ឋានបច្ចេកទេស ហេដ្ឋារចនាសម្ព័ន្ធ រូបវន្តបង្កលក្ខណៈ ងាយស្រួលសម្រាប់ជនមានពិការភាព សំដៅជំរុញឱ្យមានការកែលម្អហេដ្ឋារចនាសម្ព័ន្ធ រូបវន្ត ដែលមានស្រាប់​ និងគ្រោងសាងសង់ថ្មីឱ្យមានការរៀបចំការបង្កលក្ខណៈងាយស្រួល (ផាសុកវត្ថុ) សម្រាប់ជនមានពិការភាព ដូចជាជម្រាល បង្កាន់ដៃ ជណ្តើរយន្ត ជណ្តើរយោង បង្គន់អនាម័យ ជាដើម ដែលជនមានពិការភាពអាចប្រើប្រាស់បាន។

ក្រៅពីនេះ ប្រកាសអន្តរក្រសួងរវាងក្រសួងសាធារណការនិងដឹកជញ្ជូន ក្រសួងសុខាភិបាល និងក្រសួងសង្គមកិច្ច អតីតយុទ្ធជន និងយុវនីតិសម្បទា ស្តីពី “លក្ខខណ្ឌនៃការចេញបណ្ណបើកបរសម្រាប់ ជនមានពិការភាព ក៏ត្រូវបាន ដាក់ឱ្យប្រើជាផ្លូវការដើម្បីបង្កលក្ខណៈងាយស្រួលជូនជនមានពិការភាពស្នើសុំបណ្ណបើកបរបានស្របតាមលទ្ធភាព សមត្ថភាព និងលក្ខណៈបច្ចេកទេសយានយន្តរបស់ខ្លួន។

ដើម្បីឱ្យសង្គមមួយមានបរិយាបន្ន តាមរយៈការលើកកម្ពស់ការចូលរួមរបស់ជនមានពិការភាពក្នុងជីវភាព សាធារណៈ ជីវភាពនយោបាយ សកម្មភាពសង្គម វប្បធម៌ សិល្បៈ សាសនា កីឡា ការសម្រាក លម្ភៃ និងសកម្មភាពផ្សេងៗទៀត ចាំបាច់ត្រូវមានការបង្កឱកាសស្មើភាពគ្នារវាងជនមានពិការភាព និងមិនមានពិការភាព។ ជាមួយគ្នានេះ ការលើកកម្ពស់ ក្នុងការផ្តល់សេវាយុត្តិធម៌ ជូនជនមានពិការភាព ការធានាសមភាពយេនឌ័រ ភាពអង់អាចរបស់ ស្ត្រី និងក្មេងស្រីមានពិការភាព ចាំបាច់ទាមទារឱ្យមានការចូលរួមពីគ្រប់ដៃគូពាក់ព័ន្ធទាំងអស់​៕SRP

ភ្នំពេញ៖សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានីហ៊ុនសែន នៅព្រឹកថ្ងៃចន្ទ នេះ បានអញ្ជើញទទួលពានរង្វាន់ «សមិទ្ធផលពេញមួយជីវិតរបស់មេដឹកនាំឆ្នើម» ដែលពិធីប្រគល់ និងទទួលពានរង្វាន់សមិទ្ធផលពេញមួយជីវិតរបស់ មេដឹកនាំឆ្នើមនេះ ត្រូវប្រព្រឹទ្ធទៅនៅវិមានសន្តិភាព។

ពានរង្វាន់សមិទ្ធផលពេញមួយជីវិតរបស់មេដឹកនាំឆ្នើម ត្រូវបានប្រគល់ជូនពីកិច្ចប្រជុំកំពូលបច្ចេកវិទ្យានិងសេដ្ឋកិច្ចចិនសកល និងវិទ្យាស្ថានយុទ្ធសាស្ត្រសម្រាប់តំបន់អាស៊ី-ប៉ាស៊ីហ្វិក (KSI)។

ការសម្រេចផ្តល់ពានរង្វាន់ «សមិទ្ធផលពេញមួយជីវិតរបស់មេដឹកនាំឆ្នើម» ជូនសម្តេចតេជោនាយករដ្ឋមន្ត្រីកម្ពុជា បានធ្វើឡើងបន្ទាប់ពីវិទ្យាស្ថាន បានសិក្សា និងវាយតម្លៃយ៉ាងល្អិតល្អន់ ទៅលើលក្ខណៈសម្បត្តិនៃការដឹកនាំ និងសមិទ្ធផលទាំងឡាយ ដែលកើតចេញពីការដឹកនាំរបស់សម្តេចតេជោ ហ៊ុន សែន។

វិទ្យាស្ថាន បានកត់សម្គាល់ពីភាពប៉ិនប្រសព្វ ឈ្លាសវៃ និងពោរពេញដោយឆន្ទៈមនសិការ ភក្តីភាពយ៉ាងមុតមាំចំពោះជាតិ និងប្រជាជន ហើយបានធ្វើពលីកម្មដោយមិនចេះនឿយហត់ ដើម្បីនាំមកនូវសុខសន្តិភាព ភាពក្សេមក្សាន្ត វឌ្ឍនភាព ភាពរីកចម្រើន និងវិបុលភាពសម្រាប់ជាតិ និងប្រជាជាតិកម្ពុជា។

ខាងក្រោមនេះ គឺជាសុន្ទរកថា ទាំងស្រុង របស់សម្ដេចអគ្គមហាសេនាបតីតេជោហ៊ុន សែននាយករដ្ឋមន្ត្រី នៃព្រះរាជាណាចក្រកម្ពុជា ថ្លែងក្នុងពិធីទទួលពានរង្វាន់សមិទ្ធផលពេញមួយជីវិតរបស់មេដឹកនាំឆ្នើមពិភពលោក៖

ខេត្តសៀមរាប៖ព្រះករុណា ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា មានព្រះរាជបន្ទូលថា “មណ្ឌលព្រះកម្មដ្ឋាន ព្រះករុណាព្រះមហាក្សត្រ សីហមុនី”នេះ ជាកន្លែងសម្រាប់អប់រំចិត្តរបស់ពុទ្ធបរិស័ទ ហើយវានឹងផ្តល់នូវភាពកក់ក្តៅ ដល់ពុទ្ធបរិស័ទ ទាំងឡាយ ដែលប្រាថ្នានូវសេចក្តីសុខ តាមរយៈព្រះធម៌ ដ៏ឧត្តុង្គឧត្តម ដែលព្រះសម្មាសម្ពុធព្រះបរមគ្រូនៃយើង ដែលព្រះអង្គ បានផ្តល់ឱវាទ គឺមិនមានសេចក្តីសុខណាស្មើសេចក្តីស្ងប់ឡើយ។ ព្រះករុណាជាអម្ចាស់មានព្រះរាជបន្ទូលទៀតថា សេចក្តីស្ងប់ជាសេចក្តីសុខដ៏ប្រសើរបំផុត សម្រាប់អប់រំផ្លូវចិត្តចំពោះពុទ្ធបរិស័ទ ដែលប្រតិបត្តិយ៉ាងខ្ជាប់ខ្ជួនតាមព្រះធម៌វិន័យ។

ព្រះរាជបន្ទូល ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នៅថ្ងៃ អាទិត្យ ម្សិលមិញ ក្នុងឱកាសបានសព្វព្រះរាជប្ញទ័យ ស្តេចយាងសម្ពោធមណ្ឌលព្រះកម្មដ្ឋាន ព្រះករុណាព្រះមហាក្សត្រ សីហមុនី ដែលស្ថិតនៅក្នុងភូមិគោកបេង សង្កាត់គោកចក ក្រុងសៀមរាប ខេត្តសៀមរាប។

សម្តេចអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជ នៃគណៈធម្មយុត្តិកនិកាយ នៃព្រះរាជាណាចក្រកម្ពុជា បានមានបន្ទូលថា៖ មណ្ឌលព្រះកម្មដ្ឋាន ព្រះករុណាព្រះមហាក្សត្រ សីហមុនី នេះអាចសាងសង់ឡើងបានអស្រ័យ ដោយមានការចូលរួមពីសំណាក់ ពុទ្ធបរិស័ទពីគ្រប់ទិសទី។

សម្តេចមានបន្ទូលបន្តថា មណ្ឌលនេះ នឹងបម្រើផលប្រយោជន៍ ព្រះពុទ្ធសាសនា និងសង្គមជាតិទាំងមូលដ៏ធំធេង ស្របតាមមាគ៌ា នយោបាយ របស់សម្តេចប្រមុខរាជរដ្ឋាភិបាលកម្ពុជា។

សម្តេច មានព្រះបន្ទូលទៀតថា បន្ទាប់ពីព្រះករុណាជាអម្ចាស់យាង កាត់ខ្សែមង្គល ខ្សែបូរដាក់ឱ្យប្រើប្រាស់ ទីតាំងមណ្ឌលព្រះកម្មដ្ឋាន ព្រះករុណាព្រះមហាក្សត្រ សីហមុនីនេះ នឹងបានជួយអប់រំ ដល់មនុស្សគ្រប់វ័យលើផ្នែកចិត្តវិញ្ញាណ ដែលជាមូលដ្ឋានជីវិតមួយដ៏សំខាន់ នៅក្នុងការគ្រប់គ្រង សរីរាង្គកាយ របស់មនុស្សទាំងមូល។

សូមបញ្ជាក់ថា វិស័យព្រះពុទ្ធសាសនា អប់រំសិក្សាធិការ សង្គមកិច្ច និងការងារកិច្ចការបរទេសនាពេលកន្លងមក ដែលពិតជាបានរួមចំណែកយ៉ាងសំខាន់ ក្នុងការលើកកម្ពស់កិត្យានុភាព របស់ព្រះរាជាណាចក្រកម្ពុជា ការស្តារ ការអភិវឌ្ឍ ការកែទម្រង់រដ្ឋស៊ីជម្រៅ លើគ្រប់វិស័យ ដើម្បីកំណើនការងារ សមធម៌ និងប្រសិទ្ធភាព ក្នុងការកាត់បន្ថយភាពក្រីក្រ របស់ប្រជាពលរដ្ឋ សុខុមាលភាព និងជីវភាពរស់នៅ របស់ ប្រជាពលរដ្ឋ ដែលបានធ្វើឱ្យមាតុភូមិអង្គរ ជាទីស្នេហាមានការរីកចម្រើនជឿនលឿនយ៉ាងឆាប់រហ័ស៕SRP

ខេត្តបាត់ដំបង៖បុរសចំនួនពីរនាក់ត្រូវបាន នគរបាលចាប់ករណីកាប់ទន្ទ្រនដីរដ្ឋខុសច្បាប់នៅស្រុកគាស់ក្រឡ។

ភពពីសមត្ថកិច្ចបានដឹងថា បុរសទាំងពីរនាក់ ជា
មេខ្លោង ២នាក់​ ពាក់ព័ន្ធករណីកាប់ទន្រ្ទានយកដីរដ្ឋខុសច្បាប់​ នៅត្រង់ចំណុ​ច​ភ្នំស្នរ​ ភូមិតានួត​ ឃុំព្រះផុស​ ស្រុកគា​ស់​ក្រឡ​ ខេត្តបាត់ដំបង​ និងបានបញ្ជូនទៅសាលាដំបូងខេត្តបាត់​ដំបង​ នៅថ្ងៃទី១៨ ខែធ្នូ ឆ្នាំ ២០២២នេះ​។​

ជនសង្ស័យទាំង​ ២នាក់​ រួមមាន​ ៖​ ១-ឈ្មោះ​ មឿន រឿន ភេទប្រុស អាយុ៤៥ឆ្នាំ មុខ​របរ ធ្វើស្រែ និង២-ឈ្មោះ​ វុិត សាមឿន ភេទប្រុស អាយុ ៣២ ឆ្នាំ មានទីលំនៅក្នុងភូមិតានួត ឃុំព្រះ​ផុស ស្រុកគាស់ក្រឡ​ ខេត្តបាត់ដំបង៕SRP