ខេត្តសៀមរាប៖បុរសញៀនស្រាម្នាក់បានសម្រេចចិត្តចងក សម្លាប់ខ្លួន។ នេះបើតាមសមត្ថកិច្ចស្រុកកន្លាញ់បានប្រាប់សៀមរាប ប៉ុស្តិ៍។

សមត្ថកិច្ចស្រុកក្រឡាញ់បានឱ្យដឹងថា ហេតុការណ៍ភ្ញាក់ផ្អើល នៅវថ្ងៃទី១៤ ខែមករា ឆ្នាំ២០២៣ស្ថិតនៅភូមិគោកកី ឃុំសែនសុខ ស្រុកក្រឡាញ់ ខេត្តសៀមរាប។ ជនរងគ្រោះ សពឈ្មោះ ឈឿន គឿន ភេទប្រុសអាយុ៤៦ឆ្នាំ បានសម្លាប់ខ្លួន ចងដោយក្រម៉ានិងដើមថ្កូវក្បែរផ្ទះ។

សមត្ថកិច្ចបានបញ្ជាក់ថា ករណីនេះ មូលហេតុៈ ផឹកស្រា សរជាប្រចាំ។ បើ តាមការធ្វើកោសល្យវិច័យរបស់សមត្ថកិច្ចជំនាញ ជនរងគ្រោះពិតជាស្លាប់ដោយចង កសម្លាប់ខ្លួនប្រាកដមែន៕SRP

ខេត្តសៀមរាប៖យុវជនជាសិស្សសាលាម្នាក់បានសម្រេចបញ្ចប់ជីវិតនៅនឹងដើមស្វាយដោយសារតែ តូចចិត្តនិងឪពុកម្ដាយស្ដីបន្ទោស។

សមត្ថកិច្ចស្រុកប្រាសាទបាគង បានរាយការណ៍ ប្រាប់សៀមរាប ប៉ុស្តិ៍ ថា ហេតុការណ៍បានកើតឡើង
នៅថ្ងៃទី១៣ ខែមករា ឆ្នាំ២០២៣នៅចំណុចដើមស្វាយក្បែរផ្ទះ ចំងាយ១.៥ ម៉ែត្រ ស្ថិតក្នុងភូមិត្រពាំងទឹម ឃុំកណ្ដែក ស្រុកប្រាសាទបាគង ខេត្តសៀមរាប។

សមត្ថកិច្ចបានបន្តថា ជនរងគ្រោះឈ្មោះ ភន់ ភីត ភេទស្រី អាយុ១៨ឆ្នាំ មុខរបរ(សិស្ស) មានទីលំនៅ ស្ថិតក្នុងភូមិត្រពាំងទឹម ឃុំកណ្ដែក ស្រុកប្រាសាទបាគង ខេត្តសៀមរាប។ បើតាមសមត្ថកិច្ច មូលហេតុជនរងគ្រោះតូចចិត្តខឹងនិងឪពុក ស្ដីបន្ទោសឲ្យខ្លួន។ តាមការធ្វើកោសល្យវិចយ័របស់សមត្ថកិច្ចជំនាញ ជនរងគ្រោះស្លាប់ដោយសារចងក ពិតប្រាកដមែនពុំពាក់ពន្ធ័បទល្មើព្រហ្មទណ្ឌឡើយ៕SRP

រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ លោក អូន ព័ន្ធមុនីរ័ត្ន ដែលជាគណកម្មការគ្រប់គ្រងល្បែងពាណិជ្ជកម្មកម្ពុជា បានផ្ដល់អាជ្ញាបណ្ណឲ្យមានល្បែងឆ្នោតឡូតូស្របច្បាប់។ ក្នុងអាជ្ញាបណ្ណដែលចុះហត្ថលេខាដោយលោក អូន ព័ន្ធមុនីរ័ត្ន​ បានបញ្ជាក់ជូន ភាពស្របច្បាប់របស់អាជីវកម្មឆ្នោត_ឡូតូ របស់ក្រុមហ៊ុន លាភមហាសម្បត្តិ ឡូតូ ឯ.ក LEAPMORHASAMBATH LOTTO CO.LTD ដែលមានអ្នកឈរឈ្មោះ  កែវ ចំរើន៕SRP

ក្រុមមន្ដ្រីមួយចំនួននៅក្រសួងអភិវឌ្ឍន៍ជនបទ និងក្រុមហ៊ុនអនុវត្តគម្រោងមួយចំនួនបានទម្លាយឲ្យដឹងថា គម្រោងអភិវឌ្ឍន៍នានា របស់ក្រសួងអភិវឌ្ឍន៍ជនបទ ត្រូវបាន លោកភួង សោភា រដ្ឋលេខាធិការក្រសួងអភិវឌ្ឍន៍ជនបទ បានកាត់ភាគរយប្រមូលយកផលប្រយោជន៍ដាក់ហោប៉ៅ គឺរហូតដល់ប្រមាណ ២០ភាគរយឯណោះ ជាពិសេសចំពោះគម្រោងអភិវឌ្ឍន៍ ដែលប្រើប្រាស់ថវិការដ្ឋ។

ចំពោះការបែកធ្លាយរឿងស្រូវបែបនេះ សៀមរាប ប៉ុស្ដិ៍ មិនទាន់ទទួលបានការបំភ្លឺពីលោក លោកភួង សោភា រដ្ឋលេខាធិការក្រសួងអភិវឌ្ឍន៍ជនបទ នៅឡើយទេ។ ប៉ុន្តែករណីនេះត្រូវបានអ្នកនាំពាក្យក្រសួងអភិវឌ្ឍន៍ជនបទ បានអះអាងថា ការចោទប្រកាន់នេះ គឺជាការមិនពិត ហើយការកាត់ ២០ភាគរយ ក៏មិនអាចធ្វើទៅរួចទេ។

លោក ចាន់ ដារ៉ុង អ្នកនាំពាក្យក្រសួងអភិវឌ្ឍន៍ជនបទ បានថ្លែងប្រាប់អ្នកសារព័ត៌មាននៅសៅរិ៍នេះថា «ព័ត៌មាននេះមិនពិតទេ ហើយនៅក្នុងការងារនេះ គឺសុទ្ធតែមានគណៈកម្មកា​រ លទ្ធកម្ម របស់គេត្រឹមត្រូវ ដែលមានតំណាងក្រសួងសេដ្ឋកិច្ច និងហិរញ្ញវត្ថុ ហើយក្រុមការងាររបស់ក្រសួងអភិវឌ្ឍន៍ជនបទ» ហើយអារឿងការកាត់នឹងមិនមានទៀត តាមការយល់ឃើញរបស់ខ្ញុំ មិនអាចធ្វើទៅរួចទេ ព្រោះអីសុទ្ធតែអនុវត្តទៅតាមក្រុមការងារទាំងអស់”៕SRP

ខេត្តសៀមរាប៖ក្នុងកិច្ចប្រជុំបូកសរុបលទ្ធផលការងារឆ្នាំ២០២២ និង ផែនការឆ្នាំ២០២៣របស់គណៈកម្មាធិការសាខាកាកបាទក្រហមកម្ពុជាខេត្តនៅថ្ងៃសុក្រម្សិលមិញ ឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាបបានថ្លែងថា៖ ក្នុងតួនាទីជាជំនួយការឲ្យអាជ្ញាធរសាធារណៈ ជាស្ថាប័ននាំមុខគេក្នុងវិស័យមនុស្សធម៌ ត្រូវបន្តខិតខំពង្រឹក ពង្រីកសម្មភាពនៃចលនាកាកបាទក្រហម សំដៅជួយសង្គ្រោះជនរងគ្រោះ និង ងាយរងគ្រោះបំផុត។

ឯកឧត្តមទៀ សីហា ក៏បានលើកផងដែរពីផែនការសកម្មភាព និងផែនការថវិកា ត្រូវគត់គូរឱ្យបានហ្មត់ចត់ ដោយផ្អែកលើការអនុវត្តតាមបណ្ដាឆ្នាំកន្លងមក និងត្រូវគិតពីស្ថានភាព ក៏ដូចជាភូមិសាស្ត្រខេត្តដែរ។ ម៉្យាងទៀត រាល់ថវិកាដែលទទួលបានពីសប្បុរជននានា ក៏ត្រូវយកទៅ ធ្វើឲ្យចំគោលដៅ នៃចលនាមនុស្សធម៌ និងទាន់ពេលវេលា ដើមី្បឲ្យម្ចាស់សប្បុរសជន មានទឹកចិត្តចូលរួមក្នុងការឧបត្ថម្ភ ដល់ចលនាកាកបាទក្រហមកម្ពុជា នៅខេត្តសៀមរាប។

ឯកឧត្តម ទៀ សីហា ក៏បាន ជំរុញដល់សាខា ក៏ដូចអនុសាខា ក្រុង ស្រុក ធ្វើសកម្មភាពផ្សព្វផ្សាយបន្តដល់មូលដ្ឋានជំរុញប្រជាពលរដ្ឋឱ្យទៅចាក់វ៉ាក់សាំងនូវដូស បន្តបន្ទាប់ ព្រមទាំងបន្ត អនុវត្តនូវវិធានការរបស់រាជរដ្ឋាភិបាល ៣កុំ ៣ការពារ ឲ្យបានជាប្រចាំ ទោះបីបងប្អូនចាក់វ៉ាក់សាំងគ្រប់ដូសហើយក្តី និង បន្តផ្សព្វផ្សាយពីច្បាប់ចរាចរណ៍ជើងគោក នៅគ្រប់គ្រឹះស្ថានសិក្សា តាមរយៈយុវជនកាកបាទក្រហមកម្ពុជា ក៏ដូចនៅតាម មូលដ្ឋានផងដែរ។

ក្នុងកិច្ចប្រជុំឯកឧត្តមអ្នកឧកញ៉ាបណ្ឌិត សៀង ណាំ ប្រធានកិត្តិយសាខា ក៏បានធ្វើការវាយតម្លៃខ្ពស់ ទៅលើលទ្ធផលសកម្មភាព ការងារប្រចាំឆ្នាំ២០២២ និង ការដាក់ទិសដៅអនុវត្តបន្តឆ្នាំ២០២៣ របស់គណៈកម្មាធិការសាខា ព្រមទាំងបានផ្តល់អនុសាសន៍ល្អៗមួយចំនួន ដើមី្បក្នុងការគៀងគរមូលនិធិពីសប្បុរសជន ក្នុងការទ្រទ្រង់ចលនា មនុស្សធម៌ របស់កាកបាទក្រហមកម្ពុជា។

សូមជម្រាបថាខ្លឹមសារនៃកិច្ចប្រជុំនេះ បានផ្ដោតសំខាន់លើរបៀបវរៈមួយចំនួន ក្នុងការឆ្លង និង អនុម័តរបាយការណ៍សរុបលទ្ធផលសកម្មភាពសាខាឆ្នាំ២០២២ និងទិសដៅឆ្នាំ២០២៣ និង ការអនុម័តរបាយការណ៍ថវិកាឆ្នាំ២០២២ និងផែនការថវិកាឆ្នាំ២០២៣ ព្រមទាំងត្រៀមប្រារព្ធខួបលើកទី១៦០ ទិវាកាកបាទក្រហម  អឌ្ឍចន្ទក្រហមនៅខេត្តសៀមរាប។

សូមបញ្ជាក់ថា កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានលើកផែនការ គឺបានយកយុទ្ធសាស្ត្រ២០២១-២០៣០ របស់កាកបាទក្រហមកម្ពុជា ជាគោលដោយផ្ដោតលើវិស័យអាទិភាពចំនួន ៤គឺ៖ ទី១. វិស័យអាទិភាពការគ្រប់គ្រងគ្រោះមហន្តរាយ វិបត្តិភ័យ និងការប្រែប្រួលអាកាសធាតុ ,ទី២. វិស័យអាទិភាពសុខភាព និងការថែទាំសុខភាពក្នុងសហគមន៍ ,ទី៣. វិស័យអាទិភាពលើកកម្ពស់គោលការណ៍គ្រឹះ និង តម្លៃមនុស្សធម៌ និងទី៤. វិស័យអាទិភាពអភិវឌ្ឍស្ថាប័ន និងធនធាន៕SRP

ភ្មំពេញ៖ថ្ងៃនេះគឺ ខួបទី៣៨ឆ្នាំ នៃការកាន់តំណែងជានាយករដ្ឋមន្ត្រីរបស់សម្ដេចតេជោ ហ៊ុន សែន។

នៅថ្ងៃទី១៤ ខែមករា ឆ្នាំ ២០២៣ នេះ គឺជាខួបទី៣៨ឆ្នាំ នៃការកាន់តំណែងជានាយករដ្ឋមន្ត្រីរបស់ សម្ដេចអគ្គមហាសេនាបតីតេជោ ហ៊ុន សែន (១៤ មករា ១៩៨៥-១៤ មករា ២០២៣) ដែលពេលនោះ សម្ដេចជានាយករដ្ឋមន្រ្តីដែលមានវ័យក្មេងជាងគេបំផុតនៅក្នុងពិភពលោក។

មកដល់ថ្ងៃនេះ សម្តេច ហ៊ុន សែន គឺជានាយករដ្ឋមន្រ្តីដែលពលរដ្ឋគោរពស្រឡាញ់ និងគាំទ្រខ្លាំងបំផុត ហើយដែលរក្សាតំណែងជានាយករដ្ឋមន្រ្តីបានយូរជាងគេបំផុតនៅក្នុងពិភពលោក។

៣៨ឆ្នាំកន្លងទៅនេះ កម្ពុជាបានឆ្លងកាត់មហាឧបសគ្គធំៗរាប់មិនអស់ ប៉ុន្តែប្រមុខដឹកនាំដ៏វៃឆ្លាត និងមានបទពិសោធន៍ បំផុតរបស់កម្ពុជាបានដឹកនាំកសាងអភិវឌ្ឍន៍ប្រទេសជាតិអោយមានការរីកចម្រើនលើគ្រប់វិស័យ និងមានមុខមាត់លើឆាកអន្តរជាតិមកទល់សព្វថ្ងៃ។

នៅក្នុងឱកាសដ៏វិសេសវិសាលថ្លៃថ្លានេះ ប្រជាពលរដ្ឋខ្មែរនៅទូទាំងប្រទេស សូមអបអរសាទរ សូមគោរពជូនពរ សម្ដេចតេជោនាយករដ្ឋមន្រ្តី មានសុខភាពល្អ ដើម្បីបន្តដឹកនាំកម្ពុជាអោយកាន់តែរីកចម្រើនរុងរឿង និងដើម្បីផ្តល់ជាម្លប់ដ៏កក់ក្តៅបំផុតសម្រាប់ប្រទេសជាតិទាំងមូល៕SRP

ខេត្តបន្ទាយមានជ័យ៖នៅទីបំផុតអភិបាលរងខេត្តបន្ទាយមានជ័យ លោកលី សារី បានដឹកនាំកម្លាំងអាជ្ញាធរពាក់ព័ន្ធ ចុះផ្អាកសកម្មភាពរបស់ក្រុមហ៊ុន ម៉ន ដានី ដែលធ្វើសកម្មភាពអត់ច្បាប់លក់ដីឡូតិ៍មួយចំនួន នៃគម្រោងរាប់សិបហិកតា ដែលបង្កហានីយភ័យឬគ្រោះថ្នាក់ដល់ប្រជាពលរដ្ឋដែលជាអតិថិជន។ ការចុះផ្អាកនេះ នៅថ្ងៃទី១២ ខែមករា ឆ្នាំ២០២៣។

ទីតាំងដីក្រុមហ៊ុន KP MORN DANY Land & House ឬ ម៉ន ដានី លក់ដីឡូតិ៍នៅផ្លូវជាតិលេខ៥ នៅភូមិ/សង្កាត់ទឹកថ្លា ក្រុងសិរីសោភ័ណ និងភូមិសាលាក្រហម ឃុំសំរោង ស្រុកអូរជ្រៅ គឺបន្តល្មើសច្បាប់តាំងពីចាប់ផ្តើមហើយនៅតែប្រព្រឹត្តបន្ត។

លោកលី សារី បានបញ្ជាក់ថា មូលហេតុនិងបំណងដែលចុះទៅពិនិត្យមើលនេះ គឺដោយសារមានលិខិតស្នើសុំចាក់ដីរបស់ឈ្មោះ ម៉ន ដានី គឺពាក្យស្នើសុំអនុញ្ញាតច្បាប់បំពេញអាចម៍ដីកម្មសិទ្ធិឯកជន ( ចាក់ដី ) ហើយមិនទាន់មានលិខិតអនុញ្ញាត បានធ្វើ សកម្មភាព ចាក់ដីសងសំណង់ ផ្សព្វផ្សាយកក្រើកមេឃកក្រើកដីលក់ដីលំនៅឋាន និងវិឡា។

សូមជម្រាបថាកន្លងសៀមរាប ប៉ុស្ដិ៍ បានចុះផ្សាយរឿងក្រុមហ៊ុន KP MORN DANY Land & House ឬ ម៉ន ដានី លក់ដីអត់ច្បាប់ផងដែរ៕SRP

ខេត្តកំពង់ចាម៖ក្នុងកិច្ចប្រជុំសាមញ្ញលើកទី៤៤ អាណត្តិទី៣ របស់ក្រុមប្រឹក្សាខេត្តកំពង់ចាម នៅថ្ងៃ ទី១២ ខែមករា ឆ្នាំ២០២៣ នេះ លោក អ៊ុន ចាន់ដា អភិបាលខេត្តកំពង់ចាម បានថ្លែងថា បច្ចុប្បន្ន យើងបានជាប់កិច្ចសន្យាសាកល្បងជាមួយក្រុមហ៊ុន ស៊ីនទ្រី ក្នុងការកែប្រែរបៀបប្រមូលសំរាម បើ បងប្អូនប្រជាពលរដ្ឋ មិនពេញចិត្តនឹងតម្លៃសេវាទេនោះ សូមអញ្ជើញមកតវ៉ានៅសាលាក្រុងកំពង់ចាម ដើម្បី ជជែកគ្នារកដំណោះស្រាយឲ្យបានសមស្រប។

អភិបាលខេត្ត បានបញ្ជាក់ថា ក្នុងដំណាក់កាលជាប់កិច្ចសន្យាសាកល្បងជាមួយក្រុមហ៊ុន ស៊ីនទ្រី ដើម្បីកែប្រែរបៀបប្រមូលសំរាមថ្មីនេះដែរ គឺយើងធ្វើឡើងត្រឹមតែរយៈពេល៦ខែប៉ុណ្ណោះ សម្រាប់នៅក្រុងកំពង់ចាម និងនៅតាមបណ្តាស្រុកមួយចំនូនទៀត ហើយបើឃើញថាល្អ គឺយើង នឹងបន្តទៅមុខទៀត ដោយមានក្រុមការងារចំនួន៣ សម្រាប់ដោះស្រាយនូវបញ្ហាផ្សេងៗទៀងផង ទី១-គឺក្រុមការងារតាមដានការប្រមូលសំរាម ទី២-ក្រុមការងារគ្រប់គ្រងការប្រមូលសំរាម និងការ ប្រមូលថវិកា និងទី៣-ក្រុមការងារដោះស្រាយនូវវិវាទផ្សេងៗ ដូច្នេះសូមឲ្យមានការចូលរួមទាំងអស់គា្ន ដើម្បីទីក្រុងមានសោភ័ណភាពល្អស្អាត និងថែរក្សាធនធានធម្មជាតិប្រកបដោយនិរន្តរភាព។​

គួររំលឹកថា ការសាកល្បងកែប្រែរបៀបប្រមូលសំរាមថ្មីនេះ គឺត្រូវកំណត់ឲ្យ ក្រុមហ៊ុន ស៊ីនទ្រី ធ្វើ ការប្រមូលសំរាម ថ្លឹងគីឡូលក់ទៅឲ្យក្រុមហ៊ុនផ្សេងមួយទៀត ក្នុង១តោនប្រមាណជា ១៨ដុល្លារ ហើយប្រជាពលរដ្ឋនៅគ្រប់ខ្នងផ្ទះ ត្រូវប្រើប្រាស់ប្រព័ន្ធអែប ដើម្បីបង់ប្រាក់ថ្លៃសេវាប្រមូលសំរាម តាមវិក្កយបត្រ ដោយមានការសម្របសម្រួលពីអាជ្ញាធរមូលដ្ឋាន ពោលគឺក្រុមហ៊ុន ស៊ីនទ្រី មាន ភារកិច្ចត្រឹមប្រមូលសំរាមថ្លឹងគីឡូហើយលក់យកលុយ ចំពោះការប្រមូលថវិកាគឺស្ថិតនៅលើអាជ្ញាធរ។

ក្នុងកិច្ចប្រជុំនេះដែរ លោក ខ្លូត ផន ប្រធានក្រុមប្រឹក្សាខេត្តកំពង់ចាម បានលើកយកសេចក្តី ព្រាងរបៀបវារៈសំខាន់ៗ មកពិភាក្សា រួមមាន៖ ១-ពិនិត្យ និងអនុម័តសេចក្តីព្រាងកំណត់ហេតុន កិច្ចប្រជុំសាមញ្ញលើកទី៤៣ អាណត្តិទី៣ របស់ក្រុមប្រឹក្សាខេត្តកំពង់ចាម។ ២-ពិនិត្យ ពិភាក្សា និងអនុម័តសេចក្ដីព្រាងរបាយការណ៍បូកសរុបលទ្ធផលការងារប្រចាំឆ្នាំ២០២២ និងលើកទិសដៅការងារប្រចាំឆ្នាំ២០២៣ របស់រដ្ឋបាលខេត្តកំពង់ចាម។ ៣-ពិនិត្យ ពិភាក្សា និងអនុម័តសេចក្ដីព្រាងផែនការសកម្មភាពរយៈពេល៣ខែ(មករា កុម្ភៈ មីនា) ឆ្នាំ២០២៣ របស់រដ្ឋបាលខេត្តកំពង់ចាម​៕SRP

ខេត្តសៀមរាប៖ជនបរទេស ព្រមទាំងអាជីវករ ដែលប្រកបរបរផ្សេងៗ នៅក្នុងតំបន់ផ្សាររាត្រី (PUB STREET) ក្នុងក្រុងសៀមរាប បានសម្តែងនៅការមិនពេញចិត្ត និងត្រៀមដាក់ពាក្យបណ្តឹងប្រធានអង្គភាពនគរបាលទេសចរណ៍ប្រចាំខេត្តសៀមរាប ទៅស្ថានទូតនិងដូចជាក្រសួងមហាផ្ទៃ។

ការត្រៀមដាក់ពាក្យបណ្ដឹង ទៅស្ថានទូតនិងដូចជាក្រសួងមហាផ្ទៃ ប្ដឹងលោកវរសេនីយ៍ទោ ទី សុឡែន ប្រធានអង្គភាពនគរបាលទេសចរណ៍ យ៉ាងដូច្នេះ បន្ទាប់ពីមានការផ្ទុះរឿងអាស្រូវ របស់ប្រធានអង្គភាពនគរបាលទេសចរណ៍ប្រចាំខេត្តសៀមរាប រូបនេះ ចុះអនុវត្តន៍ការងារខុសនិតិវិធី។ នេះបើតាមការផ្សព្វផ្សាយសារព័ត៌មានក្នុងស្រុកកាលពីយប់ថ្ងៃទី ១១ ខែមករា ឆ្នាំ២០២៣។

យោងតាមប្រភពព័ត៌មានបានឲ្យដឹងថា លោកវរសេនីយ៍ទោ ទី សុឡែន ប្រធានអង្គភាពនគរបាលទេសចរណ៍ ដែលទើបនឹងឡើងកាន់តំណែងថ្មីៗ នេះ ត្រូវបានគេរាយការណ៍មកថាចុះអនុវត្តការងារខុសនីតិវិធី ព្រោះចង់បានលាភសក្ការៈ។

ប្រភពព័ត៌មានដដែលបន្តថា ប្រធានអង្គភាពនគរបាលទេសចរណ៍ ដែលមាន លោកវរសេនីយ៍ទោ ទី សុឡែន ជាប្រធានបានរៀបគម្រោងដើម្បីដាក់ខែ តាមហាងមួយចំនួន និងយកលុយពីជនពិការលេងភ្លេងនៅតំបន់ pub street យ៉ាងគគ្លើន។ ចំណែកមន្ត្រីរាជការមួយចំនួននៅក្នុងអង្គភាពនេះ បានសម្តែងការមិនពេញចិត្តចំពោះប្រធានអង្គភាពនគរបាលទេសចរណ៍ ដែលមាន លោកវរសេនីយ៍ទោ ទី សុឡែន ដែលប្រព្រឹត្តិខុសនឹងច្បាប់កំណត់បែបនេះ។ ដោយពេលខ្លះភ្ញៀវទេសចរ ដែលបានមកកម្សាន្តនៅតំបន់អង្គរ ហើយជ្រុះបាត់សម្ភារៈ និងបានមកសុំធ្វើលិខិតបញ្ជាក់ថា បានបាត់ពិតប្រាកដមែននោះ ក៏លោកប្រធានអង្គភាពនគរបាលទេសចរណ៍ តម្រូវឲ្យយកលុយពីភ្ញៀវទេសចរណ៍ផងដែរ។

ប្រភពបានបញ្ជាក់ទៀតបន្តថា នៅក្នុងអង្គភាពមួយនេះ មានមន្ត្រីប្រមាណជាង៣០នាក់ ប៉ុន្តែមិនសូវមុខ មកនម្រើការងារនោះទេ ពោលគឺដាក់ព្យួរឈ្មោះដើម្បីទុកលុយដាក់ហោប៉ៅ។

ជុំវិញការលើកឡើងរបស់អាជីវករបែបនេះ «អង្គភាពសៀមរាប ប៉ុស្តិ៍» នៅមិនទាន់ទទួលបានការបំភ្លឺ ពីប្រធានអង្គភាពនគរបាលទេសចរណ៍ លោកវរសេនីយ៍ទោ ទី សុឡែន នៅឡើយទេ។ ប៉ុន្តែលោកវរសេនីយ៍ទោទី សុឡែន បានប្រាប់អ្នកសារព័ត៌មានថា៖ ករណីនេះលោក មិនចង់តបតឬ ក៏ប្តឹងផ្តល់ជាមួយខាងព័ត៌មាននោះទេ ហើយការដែលលោកចុះមករៀបចំសណ្ដាប់ធ្នាប់នៅតំបន់នេះ គឺទៅតាមបណ្ដឹងរបស់អាជីវករតែប៉ុណ្ណោះ។ លោកថា បើចង់ដឹងព័ត៌មាន សូមទៅកាន់អង្គភាព ដើម្បីជជែកគ្នាឲ្យដឹងព័ត៌មានច្បាស់៕SRP

អង្គភាពប្រឆាំងអំពើពុករលួយឲ្យ លោក ពៅ សោមាណាក់ ប្រធានមន្ទីរបរិស្ថាន ខេត្តកណ្ដាល ធ្វើការបំភ្លឺករណីពីភាពមិនប្រក្រតីមួយចំនួនពាក់ព័ន្ធនឹងសកម្មភាពបំពេញតួនាទីភារកិច្ច។

ការឲ្យបំភ្លឺនេះ គឺយោងពាក្យប្ដឹងដែលអង្គភាពប្រឆាំងអំពើពុករលួយ ទទួលបានកាលពីថ្ងៃទី១៥ ខែធ្នូ ឆ្នាំ ២០២២៕SRP

ភ្នំពេញ៖ស.ជ.ណ​ដែលបានបញ្ជាឲ្យនាំខ្លួន លោកស្រី សៀង ចាន់ហេង និងបក្ខពួក នៅថ្ងៃនេះ សម្ដេចតេជោ ហ៊ុន សែន បានសម្រេចលុបចោលស.ជ.ណ ថ្ងៃទី៥មករា ឆ្នាំ ២០២៣។

សម្ដេចហ៊ុន សែន បានបញ្ជាក់តាមប្រព័ន្ធផេកសហ្វេសប៊ុកថា៖ថ្ងៃនេះមានការផ្សាយយ៉ាងព្រោងព្រាត

នូវស.ជ.ណទាក់ទងជាមួយលោកស្រី

សៀង ចាន់ហេង តាមសំណើររបស់

សម្តេចស ខេង និងការសម្រេចរបស់ខ្ញុំ

កាលពីថ្ងៃ២៩ធ្នូ២០២២។

នៅថ្ងៃទី៩មករា២០២៣តាមសំណើររបស់

លោកស្រីសៀង ចាន់ហេង ខ្ញុំបានប្រគល់

ជូនឯកឧត្តមជា សុផារា ផ្តល់មតិដែលឯកសារនេះមិនត្រូវបានផ្សព្វផ្សាយទេ។

ដើម្បីបញ្ចប់នូវភាពមិនច្បាស់លាស់មុន

ពេលឯកឧត្តមជា សុផារ៉ាផ្តល់មតិខ្ញុំសម្រេចលប់ចោលស.ជ.ណលេខ១៨មយ

ថ្ងៃទី៥មករា២០២៣ចាប់ពីម៉ោងនេះតទៅ។

ការសម្រេចយ៉ាងណាទៀតនិងធ្វើក្រោយ

ពេលឯកឧត្តមជា សុផារ៉ាផ្តល់មតិ៕SRP

ខេត្តបន្ទាយមានជ័យ៖បើទោះបីជាមានការអះអាងពីមន្ត្រីជំនាញសុរិយោដី ជំនាញសំណង់និងអាជ្ញាធរដែនដីថា ក្រុមហ៊ុន«KP MORN DANY Land & House ឬម៉ន ដានី» បន្តលក់ដីឡូតិ៍ អត់មានច្បាប់យ៉ាងណាក៏ដោយក៏រហូតមកដល់ពេលនេះ ក្រុមហ៊ុនមួយនេះ នៅតែបន្តផ្សព្វផ្សាយលក់ដីរបស់ខ្លួន ទាំងងងើលដោយមិនខ្លាចច្បាប់បន្តិចសោះឡើយ។

ជាមួយនឹងការអះអាងពីមន្ត្រីជំនាញសុរិយោដី ជំនាញសំណង់និងអាជ្ញាធរដែនដីថា ក្រុមហ៊ុន«KP MORN DANY Land & House ឬម៉ន ដានី» លក់ដីឡូតិ៍ អត់មានច្បាប់បែបនេះ​ បណ្ដាញសារព័ត៌មានក្នុងស្រុក បានចុះផ្សាយជាបន្តបន្ទាប់ ខណៈមន្ត្រីជំនាញនិងអាជ្ញាធរពាក់ព័ន្ធមិន​ទាន់ចាត់វិធានការក្ដៅ។

សូមជម្រាបថាអាជ្ញាធរនិងមន្ត្រីជំនាញ បានកោះប្រជុំ២លើក នៅថ្ងៃទី ១០ មករា២០២៣ ប៉ុន្តែករណីនេះ មិនមានតំណាងឬថៅកែមកចូលរួមប្រជុំនោះទេ ពោលទុកតែបុគ្គលិកផ្នែកលក់២-៣នាក់  ដែលមិនមែនជាអ្នកទទួលខុសត្រូវផ្នែកច្បាប់។

បើតាមមន្ត្រីជំនាញសុរិយោដី សំណង់និងអាជ្ញាធរដែនដីថា ក្រុមហ៊ុនKP MORN DANY Land & House ឬម៉ន ដានី លក់ដីឡូតិ៍ អត់មានច្បាប់នៅឡើយទេ ហើយលេងឆៅតែម្តង ក្នុងការបើកគម្រោងអាជីវកម្មនិងលក់គម្រោងខ្លួន។ កាលពីថ្ងៃទី១២ខែធ្នូ ក្រុមហ៊ុន មួយនេះ បានសម្ពោធគម្រោងផ្ទះវីឡាទោលនិងដីលំនៅឋាននៅផ្លូវជាតិលេខ៥ ចំណុចព្រំប្រទល់ក្រុងសិរីសោភ័ណ (ភូមិ/ឃុំទឹកថ្លា) ស្រុកអូរជ្រៅ (ភូមិសាលាក្រហមឃុំសំរោង) តែបញ្ឆោតថា នៅក្រុងប៉ោយប៉ែត។ នេះបើយោងតាមបណ្ដាញព័ត៌មានបានបង្ហោះចែកចាយ។

បណ្ដាញព័ត៌មានបានបន្តថា លោកស្រីម៉ន ដានី និងដៃគូ បុរសជនជាតិថៃ របស់លោកស្រី បានប្រកាសអបអរសាទរថ្ងៃបើក សម្ពោធគម្រោង ផ្ទះវីឡាទោល និង ដីលំនៅឋាន បន្ទាយមានជ័យ – ក្រុងប៉ោយប៉ែត ជាផ្លូវការ។ ដោយ ថ្ងៃនេះ ក្រុមហ៊ុន ជូនកាដូរ មហាពិសេស ទិញ1 ថែមជូន1 ក្នុងតម្លៃត្រឹមតែ២៤.០០០ដុល្លារ ទទួលចុះឈ្មោះ ១០នាក់ដំបូង។ ក្នុងការប្រកាស ក្រុមហ៊ុនបង្ហាញពីគម្រោងផ្ទះវីឡាទោល និងដីលំនៅឋានជាង១ម៉ឺនឡូតិ៍ លើផ្ទៃដីរជាច្រើនហិកតា។

ឯនៅលើផ្ទាំងនិងសន្លឹក ផ្សព្វផ្សាយពាណិជ្ជកម្ម ក្រុមហ៊ុននេះ បានសរសេអក្សរធំៗ លេចច្បាស់ នៅផ្នែកខាងលើ ក៏មានគម្រោងដីអាជីវកម្ម ដែលដាក់ថា “គម្រោងដីអាជីវកម្ម បើកថ្មីនៅក្រុងប៉ោយប៉ែត “។

“គម្រោង១៥.០០០ឡូតិ៍ ជាប់ផ្លូវជាតិលេខ៥ ក្នុងក្រុងប៉ោយប៉ែត “.ដែលមានគម្រោងផ្សារ រោងចក្រ ហាងទំនិញ ចំណតឡានក្រុង ជាដើម ។ ប៉ុន្តែបានសរសេរអក្សរតូច ព៌ណមិនសូវលេចនៅចុងផ្នែកខាងក្រោមថា វាស្ថិតនៅភូមិទឹកថ្លា សង្កាត់ទឹកថ្លាក្រុងសិរីសោភ័ណ (ជាប់ព្រំប្រទល់ស្រុកអូរជ្រៅ) ហើយភ្ជាប់នឹងលេខទូរស័ព្ទ ជាច្រើនខ្សែសម្រាប់ទំនាក់ទំនង។

ករណីនេះ លោកឡុង វុធ អនុប្រធានមន្ទីររៀបចំដែនដី នគរោបនីយកម្ម សំណង់និងសុរិយោដីខេត្តបន្ទាយមានជ័យ ទទួលបន្ទុកសំណង់ប្រាប់អ្នកកាសែត កាលពីថ្ងៃទី១២ខែធ្នូថា៖ “គម្រោងលក់ដីល្វែងនិងផ្ទះម៉ន ដានីនេះ លេងឆៅតែម្តង។ មិនមានការអនុញ្ញាតិច្បាប់ទេ មិនមានសុំអីទាំងអស់។ អីក៏អត់ៗ “។

លោកអនុប្រធានបានបន្តថា៖ ករណីអង្កន់ដីល្វែងកណ្តាលភ្នែកមហាជននេះ លោកប្រធានមន្ទីរ (អាង ណារឹទ្ធ) បានបញ្ជូនមន្ត្រីអោយចុះពិនិត្យ និងធ្វើរបាយណ៍សុំគោលការណ៍ រដ្ឋបាលខេត្តដើម្បីបិទសកម្មភាពតែម្តង។

សូមរំលឹកថា កាលពីថ្ងៃទី០៥ខែធ្នូ ឆ្នាំ ២០២២ ក្រុមការងារនៃការិយាល័យរៀបចំដែនដី នគរូបនីយកម្ម និងសំណង់ ដែលដឹកនាំដោយ លោក ប៉ង់ រ៉ុម ប្រធានការិយាល័យដែនដី នគរោបនីយកម្មនិងសំណង់(ដ.ន.ស )បានដឹកនាំក្រុមការងារត្រួតពិនិត្យសំណង់ ចុះត្រួតពិនិត្យការដ្ឋានសំណង់ គម្រោងសាងសង់ អគារពាក់កណ្តាលភូមិគ្រឹះ និងផ្ទះល្វែង របស់ឈ្មោះ ម៉ន ដានី (សមត្ថកិច្ចក្រសួង) ដែលក្រឡាផ្ទៃសរុប ៨៤០០០ ម៉ែត្រក្រឡា (ជាង៨ហិចតា)ស្ថិតនៅភូមិទឹកថ្លា សង្កាតទឹកថ្លា ក្រុងសិរីសោភ័ណ។

លោកបានធ្វើរបាយការណ៍ជូនលោកប្រធានមន្ទីរពីការដ្ឋានសំណង់ បានសាងសង់របស់ឈ្មោះ ម៉ន ដានី ដោយគ្មានលិខិតអនុញ្ញាតសាងសង់ និងលិខិតអនុញ្ញាតបើកការដ្ឋានសាងសង់។ មានប្លង់ស្ថាបត្យកម្ម និងប្លង់គ្រឿងផ្គុំសំណង់ តែគ្មានវិស្វករប្រចាំការដ្ឋាន។ ឯក្រុមជាងម៉ៅការសាងសង់ ពុំមានច្បាប់ប្រកបអាជីវកម្មសាងសង់ឡើយ។

ចំពោះគម្លាតនគរូបនីយកម្មដែលក្រុមការងារចុះពិនិត្យឃើញថា គម្លាតខាងមុខៈ ៥ ម៉ែត្រពីព្រំដី។ គម្លាតខាងក្រោយៈ ១ ម៉ែត្រពីព្រំដីគម្លាតខាងស្តាំៈ ១ ម៉ែត្រពីព្រំដី។គម្លាតខាងឆ្វេងៈ ១ ម៉ែត្រពីព្រំដីជាដើម។

ចំណែកលោករ៉ូ បូរ៉ា អនុប្រធានមន្ទីររៀបចំដែនដី នគរោបនីយកម្ម សំណង់និងសុរិយោដីខេត្តបន្ទាយមានជ័យ ទទួលបន្ទុកសុរិយោដី បានប្រាប់អ្នកកាសែត ថា៖ គម្រោងក្រុមហ៊ុនKP MORN DANY Land & House ឬម៉ន ដានី លក់ដីឡូតិ៍ នេះ មានទីតាំងនៅក្រុងសិរីសោភ័ណនិងស្រុកអូរជ្រៅ (មិនមែននៅក្រុងប៉ោយប៉ែត ដូចដែលក្រុមហ៊ុនប្រកាសប្រាប់អតិថិជន)ទេ។

លោកបន្ត:ថា បន្ថែមលើនោះ គម្រោងនេះ មិនមានការស្នើសុំច្បាប់ មកការិយាល័យភូមិបាល និងមន្ទីរនៅឡើយទេ។ ពោលគឺអត់ច្បាប់ទាំងលើ :ទី១-ការបំបែកក្បាលដី ទី២- ការស្នើសុំប្តូរប្រភេទដី (ពីដីស្រែទៅដីលំនៅឋាននិងសំណង់។ទី៣- ខេត្តក៏មិនសុំ ។ក៏មិនសុំច្បាប់ដល់ក្រសួងផងដែរ។

ចំណែកអភិបាលខេត្តបន្ទាយមានជ័យ ក៏ដូចអភិបាលក្រុងសិរីសោភ័ណ ធ្លាប់បានកាសែតកន្លងមកថា៖ គម្រោងដីធ្លីមួយនេះ ខាងក្រុមហ៊ុនមិនទាន់បានបំពេញបែបបទ ឯកសារអីមកដល់អាជ្ញាធរនៅឡើយទេ។ ទោះយ៉ាងណា អាជ្ញាធរលើកទឹកចិត្តដល់អ្នកវិនិយោគ អោយសុំគោលការណ៍និងច្បាប់។

រហូតមកដល់ថ្ងៃពុធនេះ សៀមរាបប៉ុស្ដិ៍ នៅមិនទាន់ទទួលបានការបកស្រាយបំភ្លឺពីក្រុមហ៊ុន «KP MORN DANY Land & House ឬម៉ន ដានី» នៅឡើយទេ៕SRP