ខេត្តសៀមរាប៖ឯកឧត្តម ទៀ សីហាអភិបាលខេត្តសៀមរាប បានស្នើដល់ អភិបាលស្រុក ដែលទើបតែងតាំងថ្មី រួមទាំងក្រុមប្រឹក្សា គណៈអភិបាលស្រុក មន្រ្តីរាជការ កងកម្លាំងប្រដាប់អាវុធ និងកម្លាំងមានសមត្ថកិច្ចគ្រប់លំដាប់ថ្នាក់ នៃស្រុកជីក្រែង ត្រូវរួមសហការគ្នាអនុវត្តការងារសំខាន់ៗ ជាអាទិភាពមួយចំនួននោះ គឺ ត្រូវរួមគ្នាថែរក្សាការពារសន្តិភាព ស្ថិរភាពនយោបាយ ស្ថិរភាព សង្គម ឲ្យបានល្អប្រសើរ ក្នុងការតាមដានត្រួតពិនិត្យ និងដោះស្រាយ បាតុភាពអសកម្ម និង ការថ្នាំងថ្នាក់នានានៅមូលដ្ឋានឲ្យមានប្រសិទ្ធភាពខ្ពស់។ ក្នុងនោះត្រូវរួមគ្នាកសាង ពង្រឹងសមត្ថភាពរដ្ឋបាលថ្នាក់ក្រោមជាតិ ជាពិសេស ភូមិ ឃុំ ឲ្យមានភាពធុនទៅនិងវិបត្ត ការប្រែប្រួល នៃព្រឹត្តិការណ៍នានា ជាក់ស្តែងដូចជាយើងកំពុងជួបប្រទះនៅពេលកន្លងមក ដោយឆ្លងរាលដាលនៃមេរោគកូវីដ-១៩ ដោយយើងក៏មិនត្រូវធ្វេសប្រហែស នៃជម្ងឺកូវិដឡើយ គឺ ត្រូវប្រកាន់ឲ្យបានខ្ជាប់ខ្ជួននូវវិធានការរបស់រាជរដ្ឋាភិបាល ៣កុំ និង ៣ការពារ ដើមី្បបន្សាំខ្លួននឹងការរស់នៅតាមគន្លងប្រក្រតីថ្មី នៃបរិបទកូវីដ-១៩ ព្រមទាំងជម្រុញដល់អាជ្ញាធរភូមិ ឃុំ ធ្វើការផ្សព្វផ្សាយ ដល់ប្រជាពលរដ្ឋ ឲ្យទៅចាក់វ៉ាក់សាំងនូវដូសបន្តទៀតផងដែរ។

ឯកឧត្តម ទៀ សីហា អភិបាលខេត្តសៀមរាប ស្នើយ៉ាងដូច្នេះក្នុង ពិធីផ្ទេរ​ និងប្រកាសចូលកាន់មុខតំណែងអភិបាលស្រុកជីក្រែង នៅរសៀលថ្ងៃព្រហស្បតិ៍ ម្សិលមិញ។

អភិបាលខេត្តបានលើកឡើងថា​ ការប្រកាសតែងតាំងចូលកាន់មុខតំណែងនេះ វាជាបែបបទនីតិវិធី ដែលបានកំណត់ក្នុងច្បាប់ ហើយត្រូវបានយកមកអនុវត្តក្នុងប្រព័ន្ធរដ្ឋបាល សំដៅធ្វើយ៉ាងណាឲ្យការគ្រប់គ្រង ដឹកនាំរដ្ឋបាលកាន់តែមានប្រសិទ្ធភាព ក្នុងការឆ្លើយតបនឹងតម្រូវការរបស់មូលដ្ឋាន។

ក្នុងពិធី ឯកឧត្តម ទៀ សីហា ក៏បានផ្តល់នូវអនុសាសន៍ ៨ចំណុច សម្រាប់រដ្ឋបាលស្រុកជីក្រែង បន្តសហការអនុវត្តឲ្យមានប្រសិទ្ធិភាព នូវកម្មវិធីកំណែទម្រង់នានា របស់រាជរដ្ឋាភិបាលឱ្យមានវឌ្ឍនភាព តាមផែនការកំណត់ ជាពិសេសត្រូវត្រៀម សហការអនុវត្ត ជាមួយក្រុមការងារថ្នាក់ជាតិ ថ្នាក់ខេត្ត ថ្នាក់ស្រុក និងឃុំឱ្យទទួលបានជោគជ័យ និង បង្ការ ទប់ស្កាត់ បង្រ្កាបបទល្មើសព្រៃឈើ និងពន្លឿនបញ្ចប់ការកាត់ឆ្វៀលដីតំបន់បី របស់អាជ្ញាធរបឹងទន្លេសាប។ ដើម្បីរួមគ្នាបំពេញការងាររបស់រដ្ឋបាលស្រុកឱ្យកាន់តែមានប្រសិទ្ធភាពថែមទៀត និង ខិតខំពង្រឹងការិយាល័យផែនការ និង គាំទ្រឃុំ និង ទទួលខុសត្រូវក្នុងការគាំទ្របច្ចេកទេសទៅដល់ឃុំ ក្នុងដែនសមត្ថកិច្ចរបស់ខ្លួន និង ធ្វើការបណ្តុះបណ្តាល មន្រ្តីរាជការសាលាស្រុកឲ្យមានសមត្ថភាព គ្រប់គ្រាន់ក្នុងការអនុវត្តតួនាទី ភារកិច្ចរបស់ខ្លួនបានកាន់តែល្អប្រសើរ និង ត្រូវតាមដានត្រួតពិនិត្យជាប្រចាំអំពីបញ្ហាប្រឈមនានា ដែលនឹងអាចកើតមានឡើង ក្នុងការអនុវត្តតួនាទី ភារកិច្ច ដែលបានកំណត់ ព្រមទាំងខិតខំស្វែងរកដំណោះស្រាយ ប្រកបដោយប្រសិទ្ធភាព និងការទទួលខុសត្រូវ ដោយត្រូវប្រកាន់ខ្ជាប់នូវគោលការណ៍ច្បាប់ និងលិខិតបទដ្ឋានគតិយុត្តិនានា ដើម្បីធ្វើយ៉ាងណាត្រូវរក្សាឲ្យបាននូវសាមគ្គីភាព ឯកភាពផ្ទៃក្នុងឲ្យបានល្អប្រសើរ។

សូមជម្រាបថា លោក បូ ម៉េងទ្រី ពីអភិបាលរងក្រុងសៀមរាប ឋានន្តរស័ក្តិអនុមន្ត្រី ថ្នាក់លេខ១ ឱ្យកាន់មុខតំណែងជាអភិបាលស្រុកជីក្រែង ជំនួសលោក ពៅ ប៊ុនធឿន អតីតអភិបាលស្រុក ដែលត្រូវបានផ្ទេរភារកិច្ច ជាអភិបាលស្រុកអង្គរធំ៕SRP

ខេត្តកែប៖មន្ត្រីនគរបាលជាន់ខ្ពស់ ខេត្តកែប បានប្រាប់អ្នកសារព័ត៌មាន ថា ពេលនេះសមត្ថកិច្ច កំពុងស្វែង រកចាប់ខ្លួនអតីតអភិបាលរងខេត្តកែបគឺលោក ភូ លិ ពាក់ព័ន្ធករណីអំពើហិង្សានិងបៀតបៀនកេរ្តិ៍ខ្មាស់លើស្ត្រី២រូបនៅក្នុងកម្មវិធីជប់លៀងមួយ។

ស្នងការរងនគរបាលខេត្តកែបទទួលបន្ទុកផ្នែកព្រហ្មទណ្ឌ លោក ប៉ូង សុខេង បានថ្លែងប្រាប់ប្រព័ន្ធផ្សព្វផ្សាយថា៖ ពេលនេះកម្លាំងនគរបាល កំពុងស៊ើបស្វែងរក អតីតអភិបាលរងខេត្តកែបដែលបានប្រើអំពើហិង្សាធ្ងន់ធ្ងរ និងបៀតបៀនកេរ្តិ៍ខ្មាសទៅលើស្ត្រីខ្មែរជាមន្ត្រីសាខាពន្ធដារខេត្តកែប។

អំពើហិង្សារបស់លោក ភូ លិ បណ្តាល ឲ្យស្រ្តីជាប្រធានការិយាល័យនៃសាខាពន្ធដារខេត្តកែប ត្រូវរបួសធ្ងន់ធ្ងរ ហើយពេលបញ្ជូនទៅសង្គ្រោះបន្ទាន់ ត្រូវគ្រូពេទ្យដេររបួសដល់ទៅ១៦ថ្នេរ។ ចំណែកឯស្រ្តីជាមន្រ្តីពន្ធដារម្នាក់ទៀត ក៏រងការបៀតបៀនពីលោក ភូ លិ ដែរ។ នេះបើតាមព័ត៌មានក្នុងញត្តិរបស់អគ្គនាយកដ្ឋានពន្ធដារ។

អំពើហិង្សានេះកើតឡើងក្នុងពិធីជប់លៀងឡើងតំ ណែងប្រធានថ្មី នៃមន្ទីរបរិស្ថានខេត្តកែបកាលពីយប់ថ្ងៃ ទី២៩ ខែធ្នូ ឆ្នាំ២០២២។

ប្រភពពីមន្ត្រីរាជការក៏ដូចជាប្រជាពលរដ្ឋនៅខេត្តកែប រងចាំមើលឃើញថា ប្រសិនបើសមត្ថកិច្ចមិនដុតដៃដុតជើងឲ្យខ្លាំងក្លាទេនោះ លោក ភូ លិ អាចនឹងរួចផុតពីសំណាញ់ច្បាប់នៅគ្រាដែលប្រជាពលរដ្ឋ រិះគន់ទង្វើរបស់លោក ក្នុងនាមជាអ្នកដឹកនាំខេត្តមួយរូបប៉ុន្តែអត្តចរិតមិនថ្លៃថ្នូរ។

សម្ដេចនាយករដ្ឋមន្ត្រីហ៊ុន សែន នៅថ្ងៃទី៣១ ខែធ្នូ ឆ្នាំ២០២២ សម្រេចបញ្ចប់មុខតំណែង លោក ភូ លិ ចេញពីអភិបាលរងខេត្តកែប ក្រោយមានហេតុការណ៍នេះកើតឡើង៕SRP

ខេត្តកំពង់ចាម​៖ក្នុងឱកាស ចុះបំពេញបេសកកម្ម នៅក្នុងខេត្តកំពង់ចាម លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន អមដំណើរដោយ លោក លី វ៉ាន់ហុង ប្រតិភូរាជរដ្ឋាភិបាល ទទួលបន្ទុកអគ្គនាយកដ្ឋានរដ្ឋបាលហិរញ្ញវត្ថុ នៃក្រសួងព័ត៌មាន បាននាំយកកាមេរ៉ាវីដេអូ ចំនួន ០៦គ្រឿង ផ្ដល់ជូនមន្ទីរព័ត៌មានចំនួន៦ខេត្ត រួមមាន៖
មន្ទីរព័ត៌មានខេត្តកំពង់ចាម ត្បូងឃ្មុំ កំពង់ធំ សៀមរាប ក្រចេះ និងខេត្តស្ទឹងត្រែង។ ការប្រគល់សម្ភារៈទាំងនេះ ត្រូវបានរៀបចំឡេីងនៅមន្ទីរព័ត៌មាន ខេត្តកំពង់ចាម នៅល្ងាចថ្ងៃពុធ ម្សិលមិញ។

លោកខៀវ ញារីទ្ធ មានប្រសាសន៍ថា នេះគឺជាការឆ្លើយតបទៅនឹងតម្រូវការចាំបាច់ ក៏ដូចជា ការជួយ សម្រួលដល់មន្ទីរព័ត៌មាន ជាពិសេស មន្ត្រីជំនាញរបស់មន្ទីរនីមួយៗ ក្នុងការចុះយកព័ត៌មានរូបភាព ដើម្បី ធ្វើការផ្សព្វផ្សាយ ផងដែរ។

រដ្ឋមន្ត្រីរូបនេះក៏ បានផ្ដាំផ្ញើ ចំពោះ ថ្នាក់ដឹកនាំមន្ទីរព័ត៌មានទាំងអស់ បន្ទាប់ពីទទួលនូវសម្ភារៈទាំងនេះហេីយ​ សូមណែនាំដល់មន្ត្រីជំនាញរបស់ខ្លួន ឱ្យយកចិត្តទុកដាក់ថែទាំ ឲ្យបានគត់ហ្មត់ និងទុកដាក់ឲ្យបានត្រឹមត្រូវ ថ្វីក្បិតតែ វាជាគ្រឿងអេឡិចត្រូនិច ប្រសិនបើ អ្នកប្រើប្រាស់ ចេះថែទាំបានល្អប្រសើរ នោះវានឹងជួយសម្រួល ដល់ការប្រើប្រាស់របស់យើង បានយូរអង្វែង។

លោកស្រី សម ផល្លា ប្រធានមន្ទីរព័ត៌មានខេត្តកំពង់ចាម ក្នុងនាមមន្ទីរព័ត៌មានខេត្តទាំង ៦ សូមថ្លែងអំណរគុណ យ៉ាងជ្រាលជ្រៅចំពោះ លោក ខៀវ ញារីទ្ធ ដែលបានផ្ដល់នូវកាមេរ៉ាវីដេអូ សម្រាប់មន្ទីរទុកប្រើប្រាស់ ជាពិសេសការចុះយកព័ត៌មាន អំពីសមិទ្ធផលនានា ក៏ដូចជាសកម្មភាពផ្សេងៗ របស់អាជ្ញាធរ និងរាជរដ្ឋាភិបាល នៅក្នុងមូលដ្ឋាន  ដើម្បីយកទៅផ្សព្វផ្សាយ បង្ហាញទៅដល់សាធារណជនឲ្យបានជ្រួតជ្រាប ផងដែរ។

លោកស្រីសមផល្លា ក៏បានគោរពជូនពរ ដល់រដ្ឋមន្ត្រីក្រសួងព័ត៌មាន​ សូមឲ្យទទួលបានសេចក្ដីសុខចំរើន ប្រកបដោយពរទាំងប្រាំប្រការ គឺ៖ អាយុ វណ្ណៈ សុខៈ ពលៈ និងបដិភាណៈ កុំបីឃ្លៀងឃ្លាតឡើយ។

សូមជម្រាបថា អំណោយដែល លោក ខៀវ ញារីទ្ធ ផ្ដល់ជូនមន្ទីរព័ត៌មាន ទាំង៦ខេត្ត រួមមាន៖កាមេរ៉ាវីដេអូ ១គ្រឿង ជើងកាមេរ៉ា ១ កាបូបដាក់កាមេរ៉ា១ និង Memory ចំនួន២ផងដែរ​៕SRP

ខេត្តកំពង់ធំ៖កម្លាំងកងរាជអាវុធហត្ថខេត្តកំពង់ធំ សហការជាមួយសង្កាត់រដ្ឋបាលព្រៃឈើប្រាសាទសំបូរ បានបង្ក្រាបរថយន្តដឹកឈើមួយគ្រឿង។

ការបង្ក្រាបធ្វើឡើងនៅថ្ងៃទី ៤ ខែមករា នេះនៅ ភូមិតាអោក ឃុំឈូក ស្រុកប្រាសាទសំបូរខេត្តកំពង់ធំ។

មន្ត្រីនៅក្នុងហេតុការណ៍បង្ក្រាបបានប្រាក់ថា រថយន្តដែលដឹកឈើម៉ាក Lexus 470 ពណ៌ទាំងមាសស្លាកលេខ ភ្នំពេញ 2L 4651 បានដឹកឈើ អាជ្រុង ប្រភេទលេខ 1ប្រភេទឈើត្រសេកចំនួន16ដុំ ទាំងរថយន្តនិងវត្ថុតាងឈើត្រូវបានយកទៅរក្សាទុកនៅរដ្ឋបាលព្រៃឈើ ស្រុកប្រាសាទសំបូរ រង់ចាំម្ចាស់ចូលខ្លួនដោះស្រាយតាមនីតិវិធីច្បាប់៕SRP

ខេត្តកំពង់ចាម​៖ក្នុងពិធីបើកប វេសនកាលថ្មីឆ្នាំសិក្សា ២០២២–២០២៣ និងទិវាដឹងគុណគ្រូបង្រៀន នៅវិទ្យាល័យ ជូន ណាត ស្ថិតក្នុងឃុំក្រឡា ស្រុកកំពង់សៀម នៅថ្ងៃទី៤ ខែមករា ឆ្នាំ២០២៣ នេះ លោកអ៊ុន ចាន់ដា អភិបាលខេត្តកំពង់ចាម បានអំពាវនាវដល់មាតាបិតា ឬអាណាព្យាបាល គ្រប់រូប សូមបញ្ជូនកូនចៅ ដែលគ្រប់អាយុ ដល់វ័យសិក្សាឲ្យចូលរៀនបានគ្រប់ៗគ្នា ហើយត្រូវ យកចិត្តទុកដាក់ជំរុញ និងដាស់តឿនកូនចៅ ឲ្យខិតខំសិក្សារៀនសូត្រផង ពោលគឺត្រូវបន្តផ្ដល់ការគាំទ្រ ការលើកទឹកចិត្ត និងជួយបង្រៀនបន្ថែមដល់កូនចៅផងដែរ។

កអភិបាលខេត្តបានថ្លែងថា ប្រមុខរាជរដ្ឋាភិបាលកម្ពុជា ដែលមានសម្តេតេជោ ហ៊ុន សែន បានដាក់ចេញនូវយុទ្ធសាស្រ្តចតុកោណ ដំណាក់កាលទី៤ ក្នុងនោះមាន វិស័យផ្លូវ ទឹក ភ្លើង និងមនុស្ស។ ប៉ុន្តែមកដល់បច្ចុប្បន្ន វិស័យ ធនធានមនុស្សត្រូវបានឈរនៅលំដាប់អទិភាពទី១វិញ ពីព្រោះថាវិស័យធនធាន់មនុស្សនេះ គឺមាន សារៈសំខាន់ណាស់ នៅក្នុងការចូលរួមចំណែកដល់ការអភិវឌ្ឍន៍ប្រទេសជាតិ ឲ្យមានការ រីកចម្រើន បន្ទាប់ពីប្រទេសរបស់យើង មានសុខសន្តិភាពពេញបរិបូរណ៍ហេីយនោះ។

អភិបាលខេត្តកំពង់ចាម បានបន្តថា ជាការពិតណាស់ការអប់រំ និងការកសាង ធនធានមនុស្ស ត្រូវតែឆ្លងកាត់ការបណ្ដុះបណ្ដាល ក្នុងសាលារៀន ដែលមានគ្រូបង្រៀន គឺជាអ្ន កសម្រួចអនាគតរបស់សិស្ស ជាឪពុក ម្តាយទី២ និងជាវិស្វករព្រលឹង នៃយុវជនជំនាន់ក្រោយ។ ប៉ុន្តែត្រូវមានកិច្ចសហការពីមាតាបិតា អាណាព្យាបាល ចាស់ព្រឹទ្ធាចារ្យ និងមហាជនទូទៅ​។​ ក្រៅពីនោះគ្រូបង្រៀន និងអ្នកអប់រំទាំងអស់ សូមបន្តការអនុវត្ត គោលការណ៍ អប់រំមូលដ្ឋាន និងខ្លឹមសារអប់រំវប្បធម៌សន្តិភាព ឲ្យបានជ្រួតជ្រាបដល់សិស្សានុ សិស្សគ្រប់ភូមិសិក្សាឲ្យកាន់តែមានគុណភាព និងប្រសិទ្ធភាពបន្ថែមទៀត ដើម្បីកសាងយុវជន ជំនាន់ថ្មី ប្រកបដោយការរីកចម្រើន​។

អភិបាលខេត្ត ក៏បានក្រើនរំលឹកដល់ ក្មួយៗ សិស្សានុសិស្ស យុវជន យុវ នារីទាំងអស់ សូមបន្តខិតខំរៀនសូត្រ និងស្រាវជ្រាវឲ្យបានខ្ជាប់ខ្ជួន និងចូលរួមឲ្យបានសស្រាក់ សម្រាំក្នុង “អំពើល្អ” ដើម្បីការរីកចម្រើននៅក្នុងគ្រួសារ ក្នុងសង្គម និងប្រទេសជាតិយើងទាំងមូល ជាពិសេសត្រូវនៅឲ្យឆ្ងាយពីគ្រឿងញៀន និងការប្រព្រឹត្តអំពើ អបាយមុខផ្សេងៗ ផងដែរ៕SRP

ខេត្តកំពង់ចាម៖លោកអ៊ុន ចាន់ដា អភិបាលខេត្តកំពង់ចាម បានផ្តល់កំព្យូទ័រយួរដៃ និងថវិកាមួយចំនួន ដល់សិស្សប្រលងជាប់និទ្ទេសA ចំនួន ២១នាក់ នៅក្រុងកំពង់ចាម ដើម្បីលើកទឹកចិត្ត ដល់ក្មួយៗ សិស្សានុសិស្ស ដែលបានខិតខំរៀនសូត រហូតទទួលបាននិទ្ទេសល្អ ដែលពិធីនេះត្រូវបានធ្វើ ឡើងនាព្រឹកថ្ងៃទី៤ ខែមករា ឆ្នាំ២០២៣ នៅសាលាខេត្តកំពង់ចាម។

អភិបាលខេត្តកំពង់ចាម បានថ្លែងថា នេះជាការទឹកចិត្ត របស់លោកផ្ទាល់ ដើម្បីឆ្លើយតបទៅនឹងការខិតខំប្រឹងប្រែង សិក្សារបស់ក្មួយៗ ក្នុងរយៈពេល១២ឆ្នាំកន្លងមក ជាពិសេសនៅពេលខាងមុខនេះ ក្មួយៗ នឹងទទួលបានការអនុញ្ញាតពីសំណាក់សម្តេចតេជោ ហ៊ុន សែន ឲ្យចូលជួបសំណេះសំណាល ទៀតផង។ នេះជាកិត្តិយស សម្រាប់ខ្លួនឯង និងមាតា បិតា ឬអាណាព្យាបាល ក៏ដូចជា លោកគ្រូ អ្នកគ្រូ ឬនាយក សាលា និងជាកិត្តិយស សម្រាប់ខេត្តកំពង់ចាម ផងដែរ។

អភិបាលខេត្ត លើកឡើងថា ទាំងអស់នេះ គឺជាលទ្ធផលជោគជ័យមួយផ្នែក របស់ក្មួយៗ នៅកម្រិតចំណេះដឹងទូទៅ ក៏ប៉ុន្តែ ចំពោះមុខ យើងត្រូវគិតគូអំពីអនាគត ជាពិសេស ត្រូវបន្តកា រសិក្សា លើមុខជំនាញ ក្នុងក្របខ័ណ្ឌបច្ចេកទេស ដើម្បី ចូលរួមប្រកួតប្រជែង ក្នុងទីផ្សារការងារ តាមរយៈ ការប្រលងប្រជែង នៅកម្រិតឧត្តមសិក្សា ទៅតាមការសម្រេចចិត្ត និងទេពកោសល របស់ខ្លួនឯង ពោលគឺ ទៅតាមសមត្ថភាព ដែលខ្លួនឯងមានពិតប្រាកដ។ លើសពីនោះ នៅពេល ដែលក្មួយៗ បានបន្តនៅកម្រិតឧត្តមសិក្សាហើយ សូមក្មួយៗខិតខំព្យាយាមរៀនសូត្រ ឲ្យបានពូែក ធ្វើយ៉ាងណា ឲ្យក្លាយទៅជាបុគ្គលដែលមានសមត្ថភាព ដើម្បីយកចំណេះដឹងដោយមានគុណធម៌ មកបម្រើជាប្រយោជន៍ ដល់សង្គមជាតិ ក៏ដូចជាភាពរីកចំរើន ដល់ក្រុមគ្រួសារ ទន្ទឹមនោះ នៅពេលដែលក្មួយៗ មានចំណេះដឹងហើយ សូមវិលត្រឡប់ មកខេត្តកំពង់ចាមវិញ ដើម្បីរួមគ្នា កសាងអភិវឌ្ឍ ខេត្តរបស់យើង ឲ្យកាន់តែមានការរីកចម្រើនតទៅមុខទៀត។

បើតាមលោក លី ម៉េងសាន ប្រធានមន្ទីរ អប់រំយុវជន និងកីឡា ខេត្តកំពង់ចាម បានឲ្យដឹងថា លទ្ធផលប្រលងសញ្ញាបត្រមធ្យមសិក្សាទុតិយភូមិ សម័យប្រលងថ្ងៃទី៥ ខែធ្នូ ឆ្នាំ២០២២ នៅទូទាំង ខេត្តកំពង់ចាម មានបេក្ខជនមកប្រលងចំនួន ៨.១៧៧នាក់ បេក្ខជនប្រលងជាប់ចំនួន ៥.៧៩៩នាក់ ស្មើនឹង ៧០,៩២% ក្នុងនោះសិស្សប្រឡងជាប់និទ្ទេស A មានចំនួន ៧៣នាក់ ខណៈបេក្ខជនប្រលង ជាប់និទ្ទេស A នៅទូទាំងប្រទេស មានចំនួន ១.០៤៩នាក់។

គួរបញ្ជាក់ថា រង្វាន់លើកទឹកចិត្តដែល អភិបាលខេត្ត បានផ្តល់ជូនសិស្សប្រឡងជាប់និទ្ទេស A នៅក្រុងកំពង់ចាមទាំង ២១នាក់ ក្នុងម្នាក់ៗ ទទួលបាន កំព្យូទ័រយួរដៃ (latop) ១ គ្រឿង, ថវិកា ចំនួន ៤០ម៉ឺនរៀល , សៀវភៅ ២០ក្បាល, ប៊ិច និងខ្មៅដៃ ចំនួន ១០ដើម​ផងដែរ​៕SRP

ខេត្តសៀមរាប៖បុរសម្នាក់ត្រូវបាននគរបាលឃាត់ខ្លួន តាមពាក្យបណ្ដឹងក្រុមគ្រួសាររបស់ក្មេងស្រី ពាក់ព័ន្ធ ករណីរំលោភសេពសន្ថវ:ដោយមានស្ថានទម្ងន់ទោស លើអនីតិជននៅភូមិទទឹងថ្ងៃ ឃុំឫស្សីលក ស្រុកជីក្រែង។

របាយការណ៍របស់សមត្ថកិច្ចនគរបាលខេត្តសៀមរាប ដែល សៀមរាបប៉ុស្តិ៍ ទទួលបាននៅព្រឹកនេះបានបញ្ជាក់ថា ការឃាត់ខ្លួននៅថ្ងៃទី១ ខែមករា ឆ្នាំ២០២៣
នៅភូមិទទឹងថ្ងៃ ឃុំឫស្សីលក ស្រុកជីក្រែងខណ:មានកម្មវិធីការ ម្តាយមីងរបស់ជនរងគ្រោះហើយជនសង្ស័យ ត្រូវបានទៅចូលរួមមង្គលការនោះដែរ។

តាមការបំភ្លឺរបស់ក្មេងរងគ្រោះឈ្មោះវ . ម ភេទស្រីអាយុ១២ឆ្នាំនៅភូមិ. ឃុំ.ស្រុកជីក្រែងខេត្តសៀមរាប បានឲ្យដឹងថា នៅម៉ោងប្រមាណជាង២រសៀល ថ្ងៃទី១ ខែមករា ឆ្នាំ២០២៣ ខ្លួនបានដើរចេញពីរោងការ ទៅបទជើងនៅ
គុម្ពោធព្រៃខាងក្រោយផ្ទះរោងការ ចម្ងាយប្រហែល ១០០ម៉ែត្រ ក្រោយមកស្រាប់តែមានមនុស្សប្រុសម្នាក់ មិនស្គាល់ឈ្មោះពាក់ក្រវ៉ិលពណ៌ស ត្រចៀកខាងស្តាំ  ពាក់អាវយឺតពណ៌សរ ដៃខ្លីខាងក្នុង  អាវដៃវែងពីក្រៅ ស្លៀកខោខាវបយជើងវែង ពាក់ស្បែកជើងប៉ាតា  បានចាប់ដៃជនរងគ្រោះ ដែលកំពុងបទជើង
អូសចូលក្នុងគុម្ពោធព្រៃ ហើយស្រាតខោជនរងគ្រោះ រួចរំលោភសេពសន្ថវ:រហូតបានសម្រេច។

របាយការណ៍បានបន្តថា ក្រោយធ្វើសកម្មភាពរួចជនសង្ស័យ ដើរមកកន្លែងរោងការវិញ រីឯក្មេងរងគ្រោះ បានទៅប្រាប់ម្តាយរបស់ខ្លូន រួចហើយបានរាយការដល់សមត្ថកិច្ច ពេលសមត្ថកិច្ចទៅដល់ បានឲ្យបង្ហាញមុខជនសង្ស័យ ហើយបាននាំជនសង្ស័យមកកន្លែងអធិការដ្ឋានដើម្បីសាកសួរ។

តែជនសង្ស័យ ឈ្មោះឡាយ ឡុង ភេទប្រុសអាយុ១៩ឆ្នាំ នៅភូមិគោកឫស្សី ឃុំដានរុនស្រុកសូទ្រនិគម បានឆ្លើយបដិសេធ។ ប៉ុន្តែដោយផ្អែកតាមចង្អុលបង្ហាញពីជនរងគ្រោះ និង ភស្តតាងមួយចំនួនសុីសង្វាក់ ទើបឯកឧត្តមព្រះរាជអាជ្ញាបញ្ជាឲ្យឃាត់ខ្លួន។ ជនសង្ស័យត្រូវបាននគរបាល បញ្ជូនទៅតុលាការនៅថ្ងៃទី ០៣ មករា ម្សិលមិញ៕SRP

ខេត្តព្រះវិហារ៖ក្រុមហ៊ុន( ភីអិនធី PNT ) បានរងការរិះគន់ថា ជាអ្នកប្រមូលទិញឈើដោយខុសច្បាប់ពីសកម្មភាពកាប់បំផ្លាញព្រៃឈេីនៅក្នុងតំបន់ស្នូលនៃព្រៃឡង់។ ករណីបែបនេះ សហគមន៍ព្រៃឡង់ បានទទូចស្នើសុំអាជ្ញាធរខេត្តព្រះវិហារ អាជ្ញាធរខេត្តកំពង់ធំ ចាត់វិធានការឲ្យមានប្រសិទ្ធិភាព។នេះបើយោងតាមប្រព័ន្ធផ្សព្វផ្សាយក្នុងស្រុកជាច្រើនបានផ្សព្វផ្សាយ។

ប្រព័ន្ធផ្សព្ធផ្សាយបន្តថាបទល្មេីសព្រៃឈេីបានកេីតឡេីងពេញបន្ទុក នៅក្នុងស្រុករវៀង ខេត្តព្រះវិហារ និងស្រុកសណ្ដាន់ ខេត្តកំពង់ធំ ដោយសកម្មភាពកាប់បំផ្លាញព្រៃឈេី នៅក្នុងតំបន់ស្នូលនៃព្រៃឡង់ ហើយធ្វេីការដឹកជញ្ជូនឈេី តាមគោយន្តកន្រ្តៃរាប់សិបគ្រឿង ជាហេតុនាំឲ្យក្រុមហ៊ុន ( ភីអិនធីPNT ) រងការរិះគន់ថា ជាអ្នកចាំប្រមូលទិញឈើជញ្ជូនចូលក្រុមហ៊ុនដោយខុសច្បាប់ បង្វែទៅជាឈើស្របច្បាប់។

ប្រភពបានបន្តថា ក្នុងនោះ ក្រុមហ៊ុនភីអិនធី (PNT Co.,Ltd) បានដាក់ពង្រាយកម្លាំងកម្មករ ជាច្រើនក្រុម ឲ្យធ្វើសកម្មភាពកាប់ឈើ នៅក្នុងតំបន់ស្នូល នៃព្រឡង់ក្នុងស្រុករវៀង ខេត្តព្រះវិហារ ដោយគ្មានបង្ក្រាបពីសមត្ថកិច្ចពាក់ព័ន្ធ។ ដោយសារតែគ្មានការទប់ស្កាត់ ទើបប្រជាពលរដ្ឋ នឹងប្រជាសហគមន៍ព្រៃឡង់ បានសំណូមពរទៅលោក គីម រឹទ្ធី អភិបាលខេត្តព្រះវិហារ នឹងជាប្រធានគណះបញ្ជាការឯកភាពខេត្ត ចាត់វិធានការទប់ស្កាត់ នូវសកម្មភាពកាប់ឈើ របស់ក្រុមហ៊ុនភីអិនធី។

សេចក្តីរាយការណ៍មួយបានឲ្យដឹងថា ចាប់តាំងពីអំឡុងខែវិច្ឆិកា ឆ្នាំ២០២២ រហូតមកដល់ បច្ចុប្បន្ននេះ ក្រុមហ៊ុនភីអិនធី នៅតែបន្តបានដាក់កម្មករជាច្រើនក្រុម ឲ្យចូលកាប់ឈើអារឈើ នៅក្នុងតំបន់ស្នូល នៃព្រៃឡង់ជាច្រើនទីតាំង។ ទីតាំងដែលកម្មករក្រុមហ៊ុន ភីអិនធី កាប់រំលំអារច្រៀកឈើ គឺនៅចំណុចបុស្សរាំង ជ្រាប់ ក្បាលដំរី ស្រែកណ្តាល អូរអាចម៍ដែក ភូមិចាស់ ភ្នំចោត ប្រាសាទគោល ព្រៃស្រឡៅ និងចណុចស្រែតាង៉ុត។ ក្រោយពេលកាប់រំលំ និងអារច្រៀករួច ឈើទាំងនោះ ត្រូវបានក្រុមហ៊ុនភីអិនធី ដឹកចូលទៅកាន់ទីតាំងដីសម្បទាន របស់ខ្លួន ដើម្បីឲ្យក្លាយជាឈើស្របច្បាប់ ដោយជោគជ័យ។

ប្រភពបានបន្តថា ក្រុមហ៊ុន ភីអិនធី បានប្រើប្រាស់រថយន្តបង្កុង រថយន្តរ៉េវ និងគោយន្តរាប់សិបគ្រឿង ដើម្បីដឹកជញ្ជូនឈើ ចេញពីតំបន់ស្នូលព្រៃឡង់ ស្រុករវៀង ចូលទៅទីតាំងក្រុមហ៊ុនរបស់ខ្លួន។ ករណីបែបនេះប្រសិនបើគ្មានការឃុបឃិត ពីសំណាក់សមត្ថកិច្ចពាក់ព័ន្ធ ទេនោះ គឺក្រុមហ៊ុនភីអិនធី មិនអាចកាប់ឈើ អារច្រៀកឈើនៅក្នុងព្រៃឡង់ ហើយដឹកជញ្ជូនចូលទៅទីតាំងក្រុមហ៊ុន យ៉ាងគគ្រឹកគគ្រេង តាមអំពើចិត្តបានឡើយ។

រហូតដល់ព្រឹកថ្ងៃចន្ទនេះ ទីភ្នាក់ងារសារព័ត៌មានសៀមរាប ប៉ុស្ដិ៍ ធីវី អនឡាញ នៅមិនទាន់ទទួលបានការបំភ្លឺពីក្រុមហ៊ុនភីអិនធី ចំពោះការរិះគន់នេះបាននៅឡើយទេ។

ទោះជាយ៉ាងណាក៏ដោយកន្លងមកថ្មីៗនេះគណៈកម្មការជាតិទប់ស្កាត់បទល្មើសធនធានធម្មជាតិដែលមាន លោក នាយឧត្តមសេនីយ៍សៅ សុខា ជាប្រធានបានចេញសេចក្ដីប្រកាសព័ត៌មានថា ខ្លួនមិនបានរកឃើញបទល្មើសព្រៃឈើរបស់ ក្រុមហ៊ុនភីអិនធីនោះទេ ក្រោយព័ត៌មានបានផ្សព្វផ្សាយ៕SRP

នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ​ បានណែនាំដល់មន្ដ្រីនគរបាលទាំងអស់ ត្រូវកែប្រែឥរិយាបថ ពិសេសប៉ុស្ដិ៍នគរបាលរដ្ឋបាល​ និងត្រូវផ្ដល់លេខទូរស័ព្ទទំនាក់ទំនងដល់ប្រជាពលរដ្ឋ ក្នុងមូលដ្ឋានរបស់ខ្លួន ដើម្បីងាយស្រួលទំនាក់ទំនង​ ពេលមានបញ្ហាកើតឡើង ឬពួកគាត់មាន​តម្រូវការ​ ជំនួយណាមួយពីសមត្ថកិច្ច​។

ថ្លែង​បែប​នេះ​​ក្នុងពិធីប្រកាសចូលកាន់មុខតំណែងស្នងការថ្មី នៃស្នងការដ្ឋាននគរបាលខេត្តកំពង់ចាម​ ននៅអង្គារនេះ។

នាយឧត្តមសេនីយ៍ នេត សាវឿន បានចូលរួមអបអរសាទរចំពោះ លោកឧត្តមសេនីយ៍ត្រី ហេង វុទ្ធី អតីត​ស្នងការរងនគរបាលខេត្តកំពង់ចាម ទទួលផែនការងារព្រហ្មទណ្ឌ​ ដែលត្រូវ​បានប្រកាសចូលកាន់តំណែង និងសូមថ្លែងអំណរគុណចំពោះលោកឧត្តមសេនីយ៍ទោ ឯម កុសល អតីតស្នងការ ដែលក្នុងរយៈពេលកាន់តំណែង៦ឆ្នាំមកនេះ បានអនុវត្តតួនាទីភារកិច្ច ក្នុងការដឹកនាំកងកម្លាំងនគរបាលខេត្ដកំពង់ចាម ធានាបាននូវសន្ដិសុខ សណ្ដាប់ធ្នាប់ជូនប្រជាពលរដ្ឋ​ រហូត​ចូលនិវត្តន៍ ហេីយត្រូវបានសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា ចេញអនុក្រឹត្យតែងតាំងជាជំនួយការ ឋានៈស្មើអគ្គនាយករង។

នាយឧត្តមសេនីយ៍ក៏បានណែនាំដល់​ស្នងការដែលទើបប្រកាសចូលកាន់តំណែង ពង្រឹងតួនាទីដឹកនាំ ដែលជាអ្នកទទួលខុសត្រូវមុនគេ ចំពោះមុខរាជរដ្ឋាភិបាល ក្រសួងមហាផ្ទៃ អគ្គស្នងការដ្ឋាននគរបាលជាតិ គណៈបញ្ជាការឯកភាព​ ​ដែលចាត់ទុកជាអ្នកដឹកនាំខ្ពស់ជាងគេទទួលខុសត្រូវ​ និងចាត់ទុកជាមេគ្រួសារ អាណាព្យាបាល ដើម្បីផ្សាភ្ជាប់មនោសញ្ចាតនាជាមួយមេ និងកូនចៅ ដោយយកគំរូតាមសមាគមមិត្តនគរបាល​ ហេីយត្រូវពង្រឹងរបៀបរបបការងារ ត្រូវបែងចែក ប្រជុំ សំដៅពង្រឹងសាមគ្គី​ និងពង្រឹងការងារប្រចាំបញ្ជា ដោយធ្វើឲ្យស្មើភាពគ្នា​។ លេីសពីនោះត្រូវពង្រឹងតួនាទីសេនាធិការគ្រប់ជ្រុងជ្រោយជូនគណៈបញ្ជាការឯកភាព​ និងពង្រឹងអធិការនគរបាលក្រុង ស្រុក ឲ្យរឹងមាំ​ ហេីយត្រូវពង្រឹងគុណភាព សមត្ថភាពកងកម្លាំង តែមិនត្រូវភ្លេចគុណធម៌ និងវិន័យ ចំពោះ​ចំពោះ​ប៉ុស្ដិ៍នគរបាលរដ្ឋបាល និងកម្លាំងសមត្ថកិច្ចដែលនៅតាមដងផ្លូវ នគរបាលចរាចរណ៍ សណ្ដាប់ធ្នាប់ ដោយត្រូវប្រើប្រាស់សម្ដី អាប្បកិរិយាឲ្យបានត្រឹមត្រូវ៕SRP

ភ្នំពេញ៖អគ្គនាយករដ្ឋានពន្ធដារ បានចេញញត្តិគាំទ្រនូវការសម្រេចរបស់សម្ដេចតេជោ ហ៊ុន​ សែន នាយករដ្ឋមន្ត្រី ដែលបានដកមុខតំណែង លោក ភូ​ លិ ចេញពីអភិបាលរងខេត្តកែប បន្ទាប់ពីមានករណីប្រើអំពើហិង្សា៕SRP

ភ្នំពេញ៖រដ្ឋមន្ត្រីក្រសួងព័ត៌មានលោក ខៀវ កាញារីទ្ធ មានប្រសាសន៍លើកឡើងថា ជំនួបរវាងសម្តេចតេជោហ៊ុន សែន និងអ្នកសារព័ត៌មាន គឺមានសារសំខាន់ណាស់ ដើម្បីជំរុញ ការលើកកម្ពស់វិស័យព័ត៌មាន ឱ្យកាន់តែរីកចម្រើនតាមរយៈ ការបង្កើនទំនាក់ ទំនងរវាង អ្នកសារព័ត៌មាននិងអ្នកនាំពាក្យមកពីគ្រប់ក្រសួង ស្ថាប័ន អភិបាលរាជធានី ខេត្ដ អ្នកនាំពាក្យរាជធានី ខេត្ដ និងអ្នកនាំពាក្យតាមមន្ទីររាជធានី ខេត្ដ ដែលអាចធ្វើការផ្ទៀងផ្ទាត់ ឬពិភាក្សាពាក់ព័ន្ធនឹងវិស័យព័ត៌មាន ដើម្បីធ្វើឱ្យព័ត៌មានកាន់តែមានភាពសុក្រឹត្យ ព័ត៌មានពិត និងជាព័ត៌មានផ្ដល់ប្រយោជន៍ដល់សង្គម។

ក្នុងឳកាសដឹកនាំកិច្ចប្រជុំត្រៀមរៀបចំពិធីជួបជុំរវាងសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជាមួយអ្នកសារព័ត៌មានលើកទី៥ ឆ្នាំ២០២៣ នៅថ្ងៃចន្ទម្សិលមិញ​ លោក ខៀវ កាញារីទ្ធ រដ្ឋមន្រ្តី ក្រសួងព័ត៌មាន ​ក៏បានស្នើដល់ក្រុមការងារក្រសួងព័ត៌មាន ត្រូវបន្តរួមសហការសាមគ្គីគ្នា ព្រោះយើងមានបទពិសោធន៍ច្បាស់លាស់ កាលធ្វើរយៈពេល ៤ លើករួចមកហើយ។ ទាំងនេះហើយ សម្រាប់ឱកាសកិច្ចប្រជុំនាពេលនេះ គឺដើម្បីធ្វើយ៉ាងណាអោយការងារសម្របសម្រួល រៀបចំអោយកម្មវិធី ជួបជុំរវាង សម្តេចតេជោ ហ៊ុន សែន ជាមួយអ្នកសារព័ត៌មានលើកទី៥ អោយដំណើរទៅដោយរលូន និងជោគជ័យ។

តាមរបាយការណ៍របស់លោក ឆន ណាវី ទីប្រឹក្សាក្រសួង និងជាអគ្គនាយករងព័ត៌មាននិងសោតទស្សន៍ នៃក្រសួងព័ត៌មាន បានអោយដឹងថា ពិធីជួបជុំរវាងសម្តេចតេជោ ជាមួយអ្នកសារព័ត៌មានលើកទី៥ គ្រោងធ្វើឡើងនៅថ្ងៃទី១៤ ខែមករា ឆ្នាំ២០២៣ មជ្ឈមណ្ឌលសន្និបាត និងពិព័រណ៌កោះពេជ្រ។

សម្រាប់កម្មវិធីខាងមុខនេះ នឹងមានអ្នកសារព័ត៌មាន ចូលរួមប្រមាណជាង ៤ ពាន់នាក់ រូបរួមមាន អង្គការ សមាគម ចំនួន ១៣ អង្គភាព, ទីភ្នាក់ងារបរទេស និងការិយាល័យតំណាង ចំនួន ០១ អង្គភាព ស្មើនឹង ២ រូប , គេហទំព័រ និង TV ONLINE ចំនួន ៣២៨ អង្គភាព, កាសែត ទស្សនាវដ្ដី ចំនួន ៥៤ អង្គភាព, វិទ្យុ និងទូរទស្សន៍៖ វិទ្យុ ១៧ ស្ថានីយ ទូរទស្សន៍ ១៥ ស្ថានីយ, អ្នកនាំពាក្យ និងថ្នាក់ដឹកនាំ ក្រសួង ស្ថាប័ន ចំនួន ៦៣ រូប។

របាយការណ៍បន្តថាក្នុងនោះក៏មានការចុះឈ្មោះចូលរួមពីមន្ត្រីផ្នែកព័ត៌មាន រដ្ឋបាលខណ្ឌនៃរដ្ឋបាលរាជធានីភ្នំពេញ , ក្រុមការងារគេហទំព័រគណបក្សប្រជាជនកម្ពុជា , ក្រុមការងារព័ត៌មានយុវជននៅសហរដ្ឋអាមេរិក , នាយកដ្ឋានព័ត៌មាន និងទំនាក់ទំនងសាធារណៈ គជប។ ជាមួយនេះក៏មាន និស្សិត DMC ,ក្រុម ហ្វេសប៊ុក ព្រំ សាន , សម្ព័ន្ធយុវជនស្ម័គ្រចិត្ត , សម្ព័ន្ធយុវជនស្រឡាញ់សន្តិភាព , ថ្នាក់ដឹកនាំ និងអគ្គនាយកដ្ឋានទាំង៥ ចំណុះក្រសួងព័ត៌មានផងដែរ។

បើតាមរបាយការណ៍ ទាក់ទងចំពោះអនុញ្ញាត្តលចូលរួមក្នុងអង្គពិធី គឺព័ណ៌ខ្សែ និងបណ្ណ ដោយព័ណ៌ ក្រហម៖ សម្រាប់ ក្រសួងព័ត៌មាន និង មន្ទីរព័ត៌មានរាជធានី ខេត្ត ,ទឹកប៊ិច៖ ក្រសួង ស្ថាប័ន និងរដ្ឋបាលរាជធានី ខេត្ត ,ទឹកប្រាក់៖ អ្នកសារព័ត៌មាន , លឿង ៖ ពិធីការ , ស្វាយ៖ ក្រុមសិល្បៈ ,បៃតង៖ បម្រើការ (សម្រាប់ក្រុមចុងភៅ អ្នករត់តុ)។

សូមជម្រាបថាពិធីជំនួបរវាងសម្ដេចតេជោហ៊ុន សែន ជាមួយនឹងអ្នកសារព័ត៌មាន បាន អាក់ខានអស់រយៈពេលពេល២ ឆ្នាំមកហើយ ដោយសារការឆ្លងរីករាលដាលជំងឺកូវីដ-១៩៕SRP

ខេត្តសៀមរាប៖នាយសង្កាត់រដ្ឋបាលព្រៃឈើស្វាយលើ បានចេញលិខិតបដិសេធ ព័ត៌មាន ដែលថាកូនបង្កើតរបស់លោករកស៊ីដឹកឈើខុសច្បាប់។ នេះបើយោងតាមលិខិតចុះថ្ងៃទី២ ខែមករា ឆ្នាំ២០២៣ សៀមរាប ប៉ុស្ដិ៍ ទទួលបាននៅរសៀលថ្ងៃចន្ទនេះ។

ក្នុងលិខិតបញ្ជាក់ថា សង្កាត់រដ្ឋបាលព្រៃឈើស្វាយលើ សេចក្ដីបដិសេធសង្កាត់រដ្ឋបាលព្រៃឈើស្វាយលើសង្កេតឃើញថារយៈពេលប៉ុន្មានថ្ងៃកន្លងមកនេះមានសារព័ត៌មាននិងបណ្ដាញសង្គមមួយចំនួនបានធ្វើការចុះផ្សាយនូវអត្ថបទនិងរូបភាពរថយន្តដឹកអុសមួយគ្រឿងភ្ជាប់ជាមួយរូបថត របស់ លោកម៉ែន វុទ្ធី នាយសង្កាត់រដ្ឋបាលព្រៃឈើស្វាយលើ ដោយបានសរសេរថា« កូនប្រុស លោក ម៉ែន វុទ្ធី នាយសង្កាត់រដ្ឋបាលព្រៃឈើស្រុកស្វាយលើ ដឹកជញ្ជូនឈើយ៉ាងអនាធិបតេយ្យ ចូលក្រុងសៀមរាប »។

ជុំវិញការបង្ហោះផ្សព្ធផ្សាយរបស់សារព័ត៌មាននិងបណ្ដាញសង្គមដែលបានយករូបភាពលោកម៉ែនវុទ្ធីនិងរថយន្តដឹកអុសទៅសរសេរថាជាការដឹកជញ្ជូនឈើដោយខុសច្បាប់នោះរដ្ឋបាលព្រៃឈើសង្កាត់ស្វាយលើសូមបដិសេធច្រានចោលទាំងស្រុង។ ដោយហេតុថារថយន្តដែលបានបង្ហោះផ្សព្ធផ្សាយកាលពីថ្មីៗនេះ ជារថយន្តដឹកអុសរបស់កូន លោក ម៉ែនវុទ្ធី ដឹកអុសយកឲ្យម្ដាយមីង នៅក្រុងសៀមរាប។

លោក ម៉ែន វុទ្ធី បានបញ្ជាក់ថាកូនរបស់លោកបានដឹកអុស មិនមែនដឹកឈើខុសច្បាប់នោះទេ ហើយរថយន្តដែលដឹកអុសនោះកូនរបស់លោកទើបទិញតពីគេបានជាង១ខែមុន។ ចំណែករូបភាពដែលឃើញឈើខុសច្បាប់នៅលើរថយន្តនោះទាំងលោកនិងកូនប្រុសមិនបានដឹងនោះទេ។ដូច្នេះសូមអ្នកសារព័ត៌មាននិងបណ្ដាញសង្គម សាធារណៈជន មេត្តាជ្រាបជាព័ត៌មាន ។

សូមបញ្ជាក់ថាកន្លងមកសង្កាត់រដ្ឋបាលព្រៃឈើស្វាយលើ ដែលមានលោក ម៉ែន វុទ្ធី ជានាយសង្កាត់បានប្រឹងប្រែងធ្វើការទប់ស្កាត់បង្ក្រាបបទល្មើសព្រៃឈើជាច្រើនករណី គួរឲ្យកត់សម្គាល៕SRP