ខេត្តកំពង់ចាម៖ភ្នាក់ងារបានរាយការណ៍ថាមនុស្សចំនួន១០នាក់ត្រូវបានឃាត់ខ្លួនករណីបង្ក្រាបល្បែងជល់មាន់។
ហេតុការណ៍ធ្វើឡើងនៅរសៀលថ្ងៃទី១៧ ខែឧសភា​ ឆ្នាំ​២០២០​ ស្ថិត​នៅ​ក្នុង​ភូមិ​រវាង​ ឃុំ​ខ្នុរ​ដំបង​ ស្រុកជេីងព្រៃ។
គួរ​បញ្ជាក់​ផង​ដែរ​ថា​ ក្នុង​ប្រតិបត្តិការ​នេះ​ ត្រូវ​បាន​ធ្វើ​ឡើង​ បន្ទាប់​ពី​មានបទបញ្ជា របស់​គណៈបញ្ជាការឯកភាពខេត្តកំពង់ចាម ​កម្លាំង​សមត្ថកិច្ច​ចម្រុះ​​ ដឹកនាំដោយលោកវរសេនីយ៍ឯក ថាញ់ សុខវ៉ុន នាយការិយាល័យព្រហ្មទណ្ឌកម្រិតស្រាល​ នៃស្នងការដ្ឋាននគរបាលខេត្តកំពង់ចាម​ សហការជាមួយកម្លាំងអធិការដ្ឋាននគរបាលស្រុកជេីងព្រៃ​ ដឹកនាំដោយលោកវរសេនីយ៍ទោ​ កាំង គីមហុង អធិការរងស្រុកជេីងព្រៃ​ និងប៉ុស្តិ៍នគរបាលរដ្ឋបាលខ្នុរដំបង​ ព្រមទាំង​មាន​ការ​សម្របសម្រួលពីលោក សុធា ពិសិដ្ឋ​ ព្រះរាជអាជ្ញារង អមសាលាដំបូងខេត្តកំពង់ចាម។
ក្នុងនោះដកហូតបានវត្ថុតាងរួមមាន ម៉ូតូចំនួន១៣គ្រឿង​ រថយន្ត០៤គ្រឿង មាន់ជល់ចំនួន០២ក្បាល(ងាប់)​ កន្ត្រក់ដាក់មាន់ចំនួន០២​ ស្គត់រុំខ្នាយមាន់មួយចំនួន(ប្រើរួច)​ កញ្ចក់សំរាប់បាំងមាន់ចំនួន០១​ ប្រាក់ដុល្លារចំនួន១,០០០ដុល្លារ (មួយពាន់ដុល្លារ)​ ប្រាក់រៀលចំនួន៣,៥១០,០០០រៀល (បីលានហាសិបមួយមុឺនរៀល)​ ធុងក្លាស្សេចំនួន០១​ និង​ហាន់តោ​សម្រាប់​លេងអាប៉ោងចំនួន០១​ ផងដែរ​។
ចំពោះជនសង្ស័យ​ និងវត្ថុតាងខាងលើ​ ត្រូវ​បានបញ្ជូនទៅស្នងការដ្ឋានរបស់ខេត្តកំពង់ចាម​ ដើម្បីកសាងសំណុំរឿងតាមនីតិវិធីច្បាប់​៕SRP

ខេត្តសៀមរាប៖សមត្ថកិច្ចបានឲ្យដឹងថាបុរសម្នាក់ត្រូវបានរន្ទះបាញ់បណ្ដាលឲ្យសន្លប់។
ហេតុការណ៍បានកើតឡើងនៅវេលាម៉ោង​ ១៦និង២៤​ នាទីថ្ងៃទី១៧ខែឧសភា ឆ្នាំ ២០២០នៅភូមិតាសៀម​ ឃុំតាសៀម​ ស្រុកស្វាយលើ។
សមត្ថកិច្ចថាករណីរន្ទះបាញ់មនុស្សបណ្តាលអោយសន្លប់នេះ ជនរងគ្រោះត្រូវបានបញ្ជូនទៅសង្គ្រោះមណ្ឌលសុខភាព ស្រុកស្វាយលេី។
ជនរងគ្រោះ​ឈ្មោះ​ ទេស​ ណាវ​ ភេទ​ប្រុស​ អាយុ​ ៥៦ឆ្នាំរស់នៅភូមិតាសៀម​ ឃុំតាសៀម​ ស្រុកស្វាយលើ។បើតាមសមត្ថកិច្ចមូល​ហេតុ​បាញ់ដេីមអំពិល​ ក្បែរផ្ទះ របស់ជនរងគ្រោះ៕SRP

ខេត្តសៀមរាប៖ជារើយៗគេតែងតែសង្កេតឃើញថាបុរសនិងស្ត្រីដែលបានស្រលាញ់គ្នានិងឈានដល់ការរួមភេទជាមួយគ្នាដោយការស្រលាញ់គ្មាទៅវិញទៅមកប៉ុន្តែករណីខ្លះបុរសបានក្លាយជាអ្នកទោសស្នេហាទៅវិញ ដោយសារឪពុកម្ដាយខាងស្រីប្ដឹងថាចាប់រំលោភ។ ជាក់ស្ដែងក្មេងប្រុសស្រីពីរនាក់បានទាក់ទងគ្នាតាមfacebookជាង១ឆ្នាំរហូតបានណាត់ជួបគ្នានិងឈានដល់ការរួមរ័ក្សជាមួយគ្នាបានចំនួន០៣ដង តែត្រូវគ្រួសារខាងស្រីប្តឹងឲ្យសមត្ថកិច្ចឃាត់ខ្លួនខាងបុរស។

ហេតុការណ៍ឃាត់ខ្លួនជនសង្ស័យខាងលើនេះធ្វើឡើងនៅប៉ុស្តិ៍រដ្ឋបាលសង្កាត់ជ្រាវ នារសៀលថ្ងៃទី១៦ខែឧសភាឆ្នាំ២០២០ ស្ថិតនៅភូមិជ្រាវ សង្កាត់ជ្រាវ ក្រុងសៀមរាប។សមត្ថកិច្ចបានឲ្យដឹងថា ជនសង្ស័យម្នាក់ ឈ្មោះ អៀង វីរៈឧត្តម ភេទប្រុស អាយុ ១៧ឆ្នាំ មុខរបរៈ សិស្សថ្នាក់ទី១០ រស់នៅក្រុមទី ០១ភូមិខ្នារ សង្កាត់ជ្រាវ ក្រុងសៀមរាប ពាក់ព័ន្ធករណី អំពើរួមភេទជាមួយអនីតិជនអាយុក្រោម១៥ឆ្នាំ។

បើតាមសមត្ថកិច្ចរម្លឹកថានៅថ្ងៃទី១៣ខែឧសភាឆ្នាំ២០២០វេលាម៉ោង១៦និង០០នាទី ឈ្មោះ ស ស ម ភេទស្រី អាយុ១៤ឆ្នាំ(សំបុត្រកំណើតឆ្នាំ២០០៥)មុខរបរសិស្សថ្នាក់ទី១១មានទីលំនៅឃុំកែវពណ៌ស្រុកពួកខេត្តសៀមរាប (ជនរងគ្រោះ) សរសេរសារប្រាប់ឲ្យជនសង្ស័យទៅយករូបខ្លួននៅជិតម្ដុំភ្នំក្រោម។ភ្លាមនោះជនសង្ស័យ បានជិះម៉ូតូចេញពីផ្ទះសំដៅទៅកន្លែងម្តុំភ្នំក្រោមតាមការណាត់គ្នា ក្រោយពីបានជួបគ្នាឈ្មោះ ស ស ម បានឡើងជិះម៉ូតូជាមួយជនសង្ស័យមកអង្គុយលេងក្នុងដីឡូត៍ក្បែរផ្ទះរបស់ជនសង្ស័យរហូតដល់ម៉ោង១៨និង៣០នាទី។ហើយជនសង្ស័យបានឌុបទៅអង្គុយលេងម្ដុំព្រះអង្គចេកព្រះអង្គចមក្រោយពីអង្គុយលេងបានមួយសន្ទុះជនសង្ស័យបានបន្តជិះម៉ូតូមកលេងនៅផ្លូវ៦០ម៉ែត្ររហូតដល់ម៉ោងប្រហែល២១និង០០នាទី ជនសង្ស័យរួមនឹងជនរងគ្រោះបាននាំគ្នាជិះម៉ូតូមកអង្គុយលេងក្នុងដីឡូត៍ក្បែរផ្ទះរបស់ជនសង្ស័យម្ដងទៀត។លុះដល់ម៉ោងប្រហែល២៣និង០០នាទី ជនសង្ស័យបានជិះម៉ូតូនាំ ឈ្មោះ ស ស ម មកផ្ទះរបស់ខ្លួនស្ថិតនៅភូមិខ្នារ សង្កាត់ជ្រាវ ក្រុងសៀមរាប។ រួចជនសង្ស័យបានឲ្យនាងចូលសម្រាកក្នុងបន្ទប់របស់ខ្លួនដោយខ្លួនបានប្រាប់ម្ដាយឪពុករបស់ខ្លួនថានាងគឺជាសង្សាររបស់ខ្លួនត្រូវបានអ្នកផ្ទះរបស់នាងបានដេញចេញពីផ្ទះ ហើយពួកខ្លួនទាំង០២នាក់ បាននាំគ្នាចូលដេកក្នុងបន្ទប់។ពេលនោះជនសង្ស័យបានសុំជនរងគ្រោះរួមភេទតែនាងពុំព្រមបានបន្តិចជនសង្ស័យបានសុំរូបខ្លួនម្ដងទៀតទើបរូបខ្លួនព្រមពេលនោះជនសង្ស័យបានធ្វើសកម្មភាពរួមភេទជាមួយគ្នាបានសម្រេចជាលើកទី០១ ហើយក៏នាំគ្នាសម្រាកក្នុងបន្ទប់របស់ជនសង្ស័យនឹងទៅ។ រហូតដល់ថ្ងៃទី១៤ខែឧសភាឆ្នាំ២០២០ជនសង្ស័យមិនបាននាំគ្នាទៅណាឡើយនៅក្នុងបន្ទប់ហើយពួកខ្លួនបានរួមភេទជាមួយគ្នាបានសម្រេចម្ដងទៀតនៅពេលយប់ពុំចាំពេលវេលាក្នុងបន្ទប់ដដែល។ លុះដល់ថ្ងៃទី១៥ខែឧសភាឆ្នាំ២០២០ពុំចាំម៉ោង ពួកខ្លួនទាំងពីរបានរួមភេទជាមួយគ្នាបានសម្រេចម្ដងទៀតក្នុងបន្ទប់ដដែល។ជនសង្ស័យបានឆ្លើយសារភាពចំពោះមុខសសមត្ថកិច្ចថាខ្លួនពិតជាបាន រួមភេទជាមួយ នឹងឈ្មោះនារីរងគ្រោះ ស ស ម  បានសម្រេចជាមួយគ្នាបានសរុបចំនួន០៣លើ ក្នុងបន្ទប់របស់ជនសង្ស័យពេលយប់ ពិតប្រាកដមែន។ក្នុងករណីនេះគ្រួសារនារីរងគ្រោះបានប្តឹងឲ្យសមត្ថកិច្ចចាត់ការលើជនសង្ស័យតាមច្បាប់និងទាមទារប្រាក់សំណងចំនួន១ម៉ឺនដុល្លារ។ឆ្លងតាមការសាកសួរបុរសនិងក្មេងស្រីរងគ្រោះបាន និយាយថា ពួកគេពិតជាស្រលាញ់គ្នាមែនមិនគួរបំបែកពួកគេទេ។ករណីនេះហាក់មានអាថ៌កំបាំងនៅពីក្រោយ ដោយសារក្មេងស្រីរងគ្រោះរៀនថ្នាក់ទី១១ ហើយមានអាយុក្រោម១៥ឆ្នាំ។ឯក្មេងប្រុសអាយុ១៧ឆ្នាំរៀនថ្នាក់ទី១០ ពួកគេបានទាក់ទងស្រលាញ់គ្នាតាមហ្វេសបុក ជាង១ឆ្នាំមកហើយ៕SRP

ខេត្តសៀមរាប៖សេចក្ដីរាយការណ៍បានឲ្យដឹងថាជាច្រើនខែមកហើយក្រុមហ៊ុនយុវពាណិជ្ជ បានធ្វើសកម្មភាព បូមខ្សាច់យ៉ាងគគ្រឹកគគ្រេងបំផុត នៅក្នុងដែនដី គ្រប់គ្រង ដោយអាជ្ញាធរជាតិអប្សរា។ ដោយក្រុមហ៊ុនយុវពាណិជ្ជ សំអាងថាខ្លួនមានអាជ្ញាប័ណ្ណពីក្រសួងក្នុងស្ដារស្ទឹង។ទីតាំងបូមខ្សាច់នេះស្ថិតនៅភូមិបង្កោង ឃុំអំពិល ស្រុកប្រាសាទបាគង ខេត្តសៀមរាប។ ជុំវិញករណីនេះបើទោះបីមានការផ្សព្វផ្សាយតាមបណ្ដាញសារព័ត៌មានយ៉ាងណាក៏ដោយ រហូតមកដល់ពេលនេះ អាជ្ញាធរជំនាញពាក់ព័ន្ធ ហាកបីរក្សាភាពស្ងប់ស្ងាត់ធ្វើមិនដឹងមិនឮអ្វីទាំងអស់។​

ប្រការដែលអាជ្ញាធរសមត្ថកិច្ចជំនាញពាក់ព័ន្ធ រក្សាភាពស្ងប់ស្ងាត់បែបនេះ គេនៅតែមានចម្ងល់ថាមានមូលហេតុអ្វីបានជាមិនចុះពិនិត្យនូវទីតាំងបូមខ្សាច់មួយនេះ។

ប្រជាពលរដ្ឋ រស់នៅតំបន់ខាងលើចង់ឃើញអាជ្ញាធរជំនាញពាក់ព័ន្ធចុះពិនិត្យទីតាំងបូមខ្សាច់របស់យុវពាណិជ្ជ ឡើងវិញដោយហេតុថាអាជីវកម្មមួយនេះអាចធ្វើឲ្យមានការប៉ះពាល់យ៉ាងខ្លាំងដល់ធនធានធម្មជាតិ។

ការបូមខ្សាច់និងឈូសឆាយព្រៃឈើនៅតំបន់ខាងលើដោយក្រុមហ៊ុនយុវពាណិជ្ជ គឺក្រុមហ៊ុនមានសំអាងរបស់ដោយយោងតាមលិខិតបានបញ្ជាក់ថាទីតាំងបូមខ្សាច់នេះ មានអាជ្ញាបណ្ណចេញដោយក្រសួងរ៉ែនិងថាមពល បានអនុញាតឲ្យក្រុមហ៊ុនយុវពាណិជ្ជ ដែលមានអាសយដ្ឋាននៅភ្នំពេញ ធ្វើអាជីវកម្មខ្សាច់សំណង់នៅតំបន់ស្ទឹងរលួស ភូមិត្រាច ឃុំបល្ល័ង្កនិងឃុំអំពិល ស្រុកប្រាសាទបាគង ខេត្តសៀមរាប ចុះហត្ថលេខាដោយលោកស៊ុយ សែម រដ្ឋមន្ត្រីក្រសួងរ៉ែនិងថាមពល នៅថ្ងៃទី០២ខែមេសាឆ្នាំ២០២០ ដោយមានសុពលភាពមួយឆ្នាំ។ ជាមួយគ្នានេះ អាជ្ញាធរជាតិអប្សរា ក៏បានទទួលស្គាល់ក្រុមហ៊ុនយុ វពាណិជ្ជ ធ្វើអាជីវកម្មតំបន់ខាងលើផងដែរ។ ដោយបានចុះហត្ថលេខាដោយលោកស៊ុំ ម៉ាប់ អតីតប្រធាអាជ្ញាធរជាតិអប្សរា។

សេចក្ដីរាយការណ៍បបានឲ្យដឹងថាទីតាំងអាជីវកម្មបូមខ្សាច់ខាងលើ បានឈូសឆាយពព្រៃឈើផងដែរ ដើម្បីវាទយកកន្លែងកាយបូមខ្សាច់។​ ពាក់ព័ន្ធករណីនេះលោកឡុង កុសល អ្នកនាំពាក្យអាជ្ញាធរជាតិអប្សរា បានបញ្ជាក់តាមប្រព័ន្ធតេលេក្រាមថាចាំមើលលោកសួរនាំសិន ប៉ុន្តែនេះមិនមែនជាគម្រោងរបស់អាជ្ញាធរជាតិអប្សរានោះទេ ការបូមស្ដារប្រហែលជាគម្រោងសំណូមពរ។ ទោះយ៉ាងណាលោកឡុង កុសល នៅមិនទាន់បញ្ជាក់លំអិតនៅឡើយ ជុំវិញការធ្វើអាជីវកម្មបូមខ្សាច់របស់ក្រុមហ៊ុន យុវ ពាណិជ្ជ នេះ។ ដោយឡែកលោកង៉ាន ភិរុណ អភិបាលរង ខេត្តសៀមរាប បានបញ្ជាក់ថាករណីនេះ ក្រុមហ៊ុន មានច្បាប់តាំងពីជំនាន់លោកឃឹម ប៊ុន សុង អតីតអភិបាលខេត្តសៀមរាប។

ទោះយ៉ាងណាប្រជាពលរដ្ឋ រស់នៅតំបន់ខាងលើ សង្ឃឹមថាអាជ្ញាធរគ្រប់ពាក់ព័ន្ធនិងចុះត្រួតពិនិត្យ ទីតាំងខាងលើជាក់ជាមិនខាន ដោយក្នុងនោះរថយន្តដឹកខ្សាច់បានបំផ្លាញផ្លូវក្នុងមូលដ្ឋានពួកគាត់ផងដែរ៕SRP

ខេត្តសៀមរាប៖ផ្ទះប្រជាពលរដ្ឋមួយខ្នង នៅស្រុកជីក្រែង រងការបំផ្លាញ ករណីភ្លៀងធ្លាក់ លាយនិងខ្យល់កន្រ្តាក់។
ហេតុការណ៍បានកើតឡើងវេលាម៉ោង១៨និង០០នាទីថ្ងៃទី១៦ខែឧសភាឆ្នាំ២០២០នៅភូមិជីក្រែង ឃុំជីក្រែង ស្រុកជីក្រែង។
សមត្ថកិច្ចបានឲ្យដឹងថាផ្ទះដែលរលំមាទំហំ៧ម៉ែត្រគុណ១១ម៉ែត្រ ប្រក់ក្បឿង ជញ្ជាំងក្តា ដោយបាន រលំដល់ដីទាំងស្រុង។
សមត្ថកិច្ចថាម្ចាស់ផ្ទះឈ្មោះ គ្រួស យាំ ភេទប្រុសអាយុ៤២ឆ្នាំនិងប្រពន្ធឈ្មោះ សាំង សុឺ អាយុ៤១ឆ្នាំ។ ជនរងគ្រោះរស់នៅភូមិ ឃុំកេីតហេតុខាងលេី។ទោះយ៉ាងណាករណីខាងលេីពុំបណ្ដាលឲ្យមានគ្រោះថ្នាក់
ដល់មនុស្សឡើយ៕SRP

ខេត្តត្បូងឃ្មុំ​៖លោក​បណ្ឌិត ជាម ច័ន្ទសោភ័ណ អភិបាលខេត្តត្បូងឃ្មុំ និងជាប្រធានគណៈកម្មាធិការសាខាកាកបាទក្រហមខេត្ត និងលោកស្រី រួមជាមួយក្រុមការងារ នាព្រឹក​ថ្ងៃ​ទី​១៦​ ខែឧសភា​ ឆ្នាំ​២០២០នេះ​ អញ្ជើញចុះសំណេះសំណាល នាំយកអំណោយសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តាមរយៈសាខាកាកបាទក្រហមខេត្ត ទៅចែកជូនប្រជាពលរដ្ឋជាជនងាយរងគ្រោះ ទីទាល់ក្រ ស្ត្រីមេម៉ាយ និងជនពិការ ចំនួន៥០គ្រួសារ ក្នុងស្រុកអូររាំងឪ ខេត្តត្បូងឃ្មុំ។

ក្នុងឱកាសនោះ លោកស្រី​បណ្ឌិត ជាម ច័ន្ទសោភ័ណ បានពាំនាំប្រសាសន៍ផ្តាំផ្ញើដោយក្តីនឹករលឹកពីសំណាក់ប្រមុខថ្នាក់ដឹកនាំដែលមានសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដល់ប្រជាពលរដ្ឋទាំង៥០គ្រួសារ
ដោយក្តីនឹករលឹក អាណិតអាសូរបំផុត
ដែលជានិច្ចជាកាល តែងតែគិតគូខ្វល់ខ្វាយពីសុខទុក្ខពលរដ្ឋខ្មែរគ្រប់ៗរូប ដោយមិនប្រកាន់ពូជសាសន៍ សាសនា រឺនិន្នាការនយោបាយនោះឡើយ «ពោលគឺទីណាដែលពលរដ្ឋមានទុក្ខលំបាក ទីនោះគឺមានសម្តេចទាំងទ្វេ»។

សូមបញ្ជាក់ដែរថា អំណោយដែលត្រូវបានចែកជូនជនងាយរងគ្រោះទាំង៥០គ្រួសារនោះ ក្នុងមួយគ្រួសារៗ ទទួលបានអង្ករ២៥គីឡូក្រាម ទឹកត្រី ទឹកស៊ីអ៊ីវ ត្រីខ មី ប្រេងឆា ម៉ាស់ អាកុល និងថវិការចំនួន២ម៉ឺនរៀល ក៏ដូចជាផ្តល់ជូននូវស្បៀងអាហារ ម៉ាស់ អាកុល និងថវិការមួយចំនួន ដល់អនុសាខាកាកបាទក្រហមស្រុកអូររាំងឪ សម្រាប់បន្តចែកជូនពលរដ្ឋជនងាយរងគ្រោះផងដែរ។
លោក​បណ្ឌិត ជាម ច័ន្ទសោភ័ណ និងលោកជំទាវ រួមទាំងក្រុមការងារក៏បានបន្តដំណើរចុះទៅត្រួតពិនិត្យទីតាំងចត្តាឡីស័ក្ត ដោយសំណេះសំណាល ផ្តល់ជូនគ្រឿងឧបភោគបរិភោគ ម៉ាស់ អាកុល និងថវិការ១០មុឺនរៀល ក្នុងម្នាក់ៗ ដល់ពលករដែលទើបមកពីក្រៅប្រទេសចំនួន២២នាក់ កំពុងដាក់ខ្លួនឲ្យនៅដាច់ដោយឡែករយៈ១៤ថ្ងៃ ក្នុងស្រុកអូររាំងឪ។

លោក​បណ្ឌិត ជាម ច័ន្ទសោភ័ណ ក៏បានអំពាវនាវឲ្យបងប្អូនប្រជាពលរដ្ឋ បង្កើនការប្រុងប្រយ័ត្ន នៅក្នុងសកម្មភាពប្រចាំថ្ងៃរបស់ខ្លួន ត្រូវរក្សាអនាម័យជាប់ជានិច្ច មិនត្រូវជួបជុំឬប្រមូលផ្តុំគ្នាក្នុងអំឡុងពេលនេះនោះទេ។

លោក​បណ្ឌិត បញ្ជាក់បន្ថែមថា ចំពោះពលករទើបមកពីក្រៅប្រទេស ត្រូវដាក់ខ្លួនឲ្យនៅដាច់ដោយឡែករយៈពេល១៤ថ្ងៃ ដោយអនុវត្តតាមវិធានការកាពាររបស់អាជ្ញាធរមូលដ្ឋាន ក្រសួងសុខាភិបាលកម្ពុជា និងរាជរដ្ឋាភិបាលកម្ពុជា ដើម្បីចូលរួមទប់ស្កាត់ការរីករាលដាលចម្លងបន្តនៃជំងឺកូវីត-១៩ ព្រោះថាជម្ងឺនេះវាអាចឆ្លងយ៉ាងលឿនបំផុតពីមនុស្សម្នាក់ទៅមនុស្សម្នាក់ទៀត និងអាចឲ្យយើងស្លាប់បាន បើទោះបីនាពេលនេះ អ្នកឆ្លងជំងឺនេះនៅកម្ពុជាយើង ត្រូវបានក្រសួងសុខាភិបាល ប្រកាសជាសះស្បើយអស់ហើយក៏ដោយក្តី៕SRP

ខេត្តសៀមរាប៖ នគរបាលប្រឆាំងបទល្មើសសេដ្ឋកិច្ច នៃស្នងការខេត្តសៀមរាប នៅថ្ងៃទី១៥ខែឧសភាម្សិលមិញ បានសហការជាមួយជំនាញពាក់ព័ន្ធបានចុះបង្ក្រាបការដ្ឋានជីកយកអាចម៌ដីចំនួន ០១កន្លែង គ្មានលិខិតអនុញ្ញាត ស្ថិតនៅភូមិសាស្ត្រ ភូមិត្រាវកៀត ឃុំដានរុន ស្រុកសូទ្រនិគម ខេត្តសៀមរាប។

ក្នុងប្រតិបត្តិការនេះ សមត្ថកិច្ចបានមានចំណាត់ការមួយចំនួនដូចជា ៖

– ធ្វើកំណត់ហេតុបិទទីតាំងអាជីវកម្ម ជាបណ្តោះអាសន្ន។
– ចាប់ដកហូតគ្រឿងចក្រចំនួន ០៣គ្រឿង រួមមាន :
+ អេស្ការវ៉ាទ័រចំនួន ០១គ្រឿង
+ ឡានដឹកដីចំនួន ០១គ្រឿង
+ គោយន្ដដឹកដីចំនួន ០១គ្រឿង
– ធ្វើការផាកពិន័យអន្តរការណ៍ យោងតាមច្បាប់ស្តីពី ការគ្រប់គ្រង ការធ្វើអាជីវកម្មធនធានរ៉ែ មាត្រា ៣៥ថ្មី និងធ្វើកិច្ចសន្យាបញ្ឈប់ការជីកអាចម៌ដី គ្មានលិខិតអនុញ្ញាតបន្តទៀត។

ក្នុងករណីម្ចាស់ការដ្ឋានមានបំណងប្រកបអាជីវកម្មជីកអាចម៌ដីលក់ ត្រូវដាក់ពាក្យស្នើសុំលិខិតអនុញ្ញាតពីរដ្ឋបាលខេត្ត ឬក្រសួងរ៉ែ និងថាមពលជាមុនសិន។ចំពោះគ្រឿងចក្រ សមត្ថកិច្ចចម្រុះបានប្រគល់ឲ្យជំនាញ ដើម្បីអនុវត្តបន្ត៕SRP

ខេត្តសៀមរាប៖លោកវរសេនីយ៍ទោ ឆឹង សុភា អធិការរងទទួលការងារផែនសណ្ដាប់ធ្នាប់សាធារណ:និងចរាចរណ៍ក្រុងនៃអធិការដ្ឋាន នគរបាលក្រុងសៀមរាបបានឲ្យដឹងថានៅព្រឹកថ្ងៃទី១៦ ខែឧសភា ឆ្នាំ២០២០នេះខ្ញុំបាទ បានចុះអនុវត្តច្បាប់ផ្ទាល់ជាមួយបងប្អូនកងកម្លាំងជាពិសេសយើងសង្កេតឃើញការគោរពច្បាប់ចរាចរណ៍របស់បងប្អូនប្រជាពលរដ្ឋដែលបានធ្វើចរាចរណ៍លើដងផ្លូវក្នុងការអញ្ជើញមកពីទីជិតឆ្ងាយស្ថិតក្នុងភូមិសាស្ត្ររដ្ឋបាលក្រុងសៀមរាប។
លោកវរសេនីយ៍ទោ ឆឹង សុភា បានបន្តថាខ្ញុំបាទផ្ទាល់ពិតជាសប្បាយចិត្តត្រេកអរយ៉ាងក្រៃលែងដែលបានឃើញបងប្អូនប្រជាពលរដ្ឋយើងស្រឡាញ់ច្បាប់ចរាចរណ៍ ហើយចេះគិតគូពីសុវត្ថិភាពខ្ពស់និងចូលរួមគោរពច្បាប់បានល្អព្រមទាំងមានចម្ងល់ចេះសួរហើយពិភាក្សាជាមួយកម្លាំងនគរបាលចរាចរណ៍យើងដើម្បីឲ្យអស់រាល់ចម្ងល់នូវការសង្ស័យរបស់ប្អូនយើងម្នាក់ៗបាទ។ល។ ចូលរួមគោរពច្បាប់ចរាចរណ៍នាំឲ្យមានសុវត្ថិភាពល្អដល់យើងទាំងអស់គ្នា ថ្ងៃនេះ ថ្ងៃស្អែក សូមកុំមានគ្រោះថ្នាក់ចរាចរណ៍។
សូមរំលឹកថាម្សិលមិញ ប្រមុខដឹកនាំកម្ពុជា បានលើកឡើងថាកម្ពុជារងគ្រោះពេកហើយពីគ្រោះថ្នាក់ចរាចរណ៍ ។ យើងមានប្រជាជនតែ ១៥លាននាក់ តែអ្នកស្លាប់ដោយគ្រោះថ្នាក់ចរាចរណ៍ក្នុងប្រទេសយើងចង់ស្មើនឹងវៀតណាម និង ថៃ ដែលមានប្រជាជន ជិត ៩០ លាននាក់ និង ៧០ លាននាក់។ ហេតុនេះ ការអនុវត្តច្បាប់ចរាចរណ៍គឺមិនដកថយទេ – សម្តេចតេជោ ហ៊ុនសែន ក្នុងសម័យប្រជុំគណៈរដ្ឋមន្ត្រីថ្ងៃសុក្រទី១៥ឧសភា២០២០។ នេះបើតាមសាររបស់លោកខៀវ កាញារីទ្ធ រដ្ឋមន្ត្រីក្រសួងព័ត៌មាន ដែលបានបង្ហោះនៅលើទំព័រហ្វេសប៊ុក៕SRP

ខេត្តសៀមរាប៖ផ្ទះប្រជាពលរដ្ឋចំនួនពីរខ្នងបានរងការខូតខាត ដោយខ្យល់កន្ត្រាក់។
ហេតុការណ៍បានកើតឡើងវេលាម៉ោង២០និង០០នាទី ថ្ងៃទី១៥ខែឧសភា ឆ្នាំ២០២០ នៅចំណុចភូមិត្រាចពក និងភូមិត្រពាំងត្រុំ ឃុំពពេល ស្រុកសូទ្រនិគម ខេត្តសៀមរាប។
សមត្ថកិច្ចបានរាយការណ៍ថាករណីខ្យល់កន្ត្រាក់ នេះ បណ្ដាលអោយរលំផ្ទះ ទាំងស្រុង០១ខ្នង និងរបើកសំយ៉ាបផ្ទះ០១ខ្នង។
១/រលំទាំងស្រុង ផ្ទះជញ្ជាំងក្ដា ប្រក់ក្បឿង ទំហំ០៦មx១២ម ម្ចាស់ផ្ទះឈ្មោះឡាំ លាង ភេទប្រុស អាយុ៣៥ឆ្នាំ ទីលំនៅ ភូមិត្រាចពក.ឃុំពពេល ស្រុកសូទ្រនិគម ខេត្តសៀមរាប ។
២/របើកសំយ៉ាបផ្ទះស័ង្កសី ទំហំ០៤មx០៨ម ម្ចាស់ផ្ទះឈ្មោះសោម អោម ភេទប្រុស អាយុ៥៦ឆ្នាំ ទីលំនៅភូមិត្រពាំងត្រុំ ឃុំពពេល ស្រុកសូទ្រនិគម ខេត្តសៀមរាប។ទោះយ៉ាងណាករណីខាងលើនេះ ពុំមានបណ្ដាលអោយរងរបួសមនុស្សនោះឡើយ៕SRP

ខេត្តសៀមរាប៖រដ្ឋបាលក្រុងសៀមរាបនៅថ្ងៃទី១៥ខែឧសភានេះ បានរៀបចំកិច្ចប្រជុំផ្សព្វផ្សាយផែនការសៀមរាបផ្ទះខ្ញុំ ឆ្នាំ២០២០-២០២៤ ក្រោមអធិបតីភាពលោក ទេព ប៊ុនឆាយ ប្រធានក្រុមប្រឹក្សាក្រុង និងលោក នួន ពុទ្ធារ៉ា អភិបាលក្រុងសៀមរាប  ព្រមទាំងមានការ អញ្ជើញចូលរួមពី សមាជិកក្រុមប្រឹក្សាក្រុង អភិបាលរងក្រុង នាយក-នាយករងរដ្ឋបាលសាលាក្រុង ប្រធានការិយាល័យ អង្គភាពចំណុះក្រុង ចៅសង្កាត់ មេប៉ុស្ត៍ និងមេភូមិគ្រប់ភូមិផងដែរ។  ផែនការសៀមរាបផ្ទះខ្ញុំឆ្នាំ២០២០-២០២៤ បានរៀបចំឡើងដើម្បីអនុវត្តការងារសំខាន់ៗ ចំនួន០៦ រួមមាន៖
០១-ការងារបរិស្ថាន
០២-ការងារបេីកផ្លូវ
០៣-ការងារដោះស្រាយសំណង់មិនរៀបរយនៅលេីផ្លូវ
០៤-ការងារសណ្តាប់ធ្នាប់នឹងសោភណ្ឌ ភាព
០៥-ការងារទេសចរណ៍
០៦-ការងារសន្តិសុខ។
ក្នុងកិច្ចប្រជុំនេះដែរគណៈអធិបតីបានក្រើនរំលឹក និងណែនាំដូចខាងក្រោម៖
០១-ចូលរួមទាំងអស់គ្នាដើម្បីប្រយុទ្ធប្រឆាំងនឹងជំងឺកូវីដ-១៩ និងក្រុមការងារត្រូវបន្តចូលរួមយ៉ាងសកម្មក្នុងការគ្រប់គ្រងបងប្អូនប្រជាពលរដ្ឋចំណូលស្រុកវិញ  ព្រមទាំងផ្តល់អំណោយសប្បុរសធម៌ជូនពួកគាត់ និងប្រជាពលរដ្ឋខ្វះខាត។
០២-អំពាវនាវដល់សមាជិកអង្គប្រជុំធ្វើការគាំទ្រដល់ផែនការ និងចូលរួមអនុវត្តការងារអោយបានព្រមគ្នា ដើម្បីជាស៊ីសង្វាក់ប្រទាក់ក្រឡាគ្នា សំរេចតាមផែនការដែល បានគ្រោងទុក។
០៣-គ្រប់ការិយាល័យ អង្គភាព រដ្ឋបាលសង្កាត់ ប៉ុស្ត៍នគរបាល ត្រូវផ្តល់សេវា សាធារណៈជូនបងប្អូនប្រជាពលរដ្ឋ អោយបានលឿន រហ័ស ទាន់ពេលវេលា ដោយតម្លាភាព និងប្រសិទ្ធភាព។
០៤-គ្រប់កងកម្លាំងប្រដាប់អាវុធ គណៈ បញ្ជាការ ឯកភាពរដ្ឋបាលសង្កាត់ ត្រូវយកចិត្តទុកដាក់អោយបានខ្ពស់នូវការងារ សន្តិសុខ និងសណ្តាប់ធ្នាប់សង្គម៕SRP

ភ្នំពេញ៖សម្ដេចស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ បានអះអាងថា ថ្ងៃនេះខ្ញុំសូមជម្រាបជូនបងប្អូនជនរួមជាតិអំពីលទ្ធផលជាវិជ្ជមានប្រកបដោយនិន្នាការដ៏ល្អចំពោះការរឹតបន្តឹងការអនុវត្តច្បាប់ចរាចរណ៍ផ្លូវគោកដែលធ្វើឲ្យអត្រាអ្នកស្លាប់ អ្នករងរបួស និងគ្រោះថ្នាក់ចរាចរណ៍ក្នុងរយៈពេល២សប្តាហ៍ក្នុងខែឧសភាឆ្នាំ២០២០ មានការថយចុះគួរកត់សម្គាល់បើប្រៀបធៀបនឹងពេលមុនមានការរឹតបន្តឹងការអនុវត្តច្បាប់ចរាចរណ៍ផ្លូវគោកនេះ។
សម្ដេចស ខេង បន្តថា ទិន្នន័យជាផ្លូវការបានបញ្ជាក់ថាចំនួនគ្រោះថ្នាក់ចរាចរណ៍ផ្លូវគោកក្នុងរយៈពេល១៤ថ្ងៃគឺតពីថ្ងៃទី១រហូតដល់ថ្ងៃទី១៤ខែឧសភាឆ្នាំ២០២០នេះបើប្រៀបធៀបពីថ្ងៃទី១ដល់ថ្ងៃទី១៤ខែមេសាឆ្នាំ២០២០ដូចគ្នាគឺចំនួនគ្រោះថ្នាក់ចរាចរណ៍មានការថយចុះ២៦លើក អ្នករងរបួសថយចុះ៨១នាក់និងអ្នកស្លាប់ថយចុះ៤នាក់ ។ ចំនួននេះបើប្រៀបធៀបពីថ្ងៃទី១រហូតដល់ថ្ងៃទី១៤ខែឧសភាឆ្នាំ២០១៩វិញគឺមានការថយចុះកាន់តែច្រើនដូចជាគ្រោះថ្នាក់ចរាចរណ៍ថយចុះ៦៨លើក អ្នករងរបួសថយចុះ៩១នាក់ និងអ្នកស្លាប់ថយចុះ២០នាក់ ដែលនេះគឺបានបង្ហាញយ៉ាងច្បាស់ថាប្រជាពលរដ្ឋយើងពិតជាមានការយល់ដឹង និងបានចូលរួមគោរពច្បាប់ចរាចរណ៍ កាន់តែច្រើន។

ជាថ្មីម្តងទៀតខ្ញុំសូមថ្លែងអំណរគុណដល់បងប្អូនជនរួមជាតិទាំងអស់ជាពិសេសអ្នកប្រើប្រាស់ផ្លូវថ្នល់ដែលបានចូលរួមគោរពអនុវត្តច្បាប់ចរាចរណ៍ផ្លូវគោកយ៉ាងខ្ជាប់ខ្ជួន និងអរគុណដល់កងកម្លាំងមានសមត្ថកិច្ច ក៏ដូចជាមន្ត្រីពាក់ព័ន្ធទាំងអស់ ដែលបានអនុវត្តភារកិច្ចរបស់ខ្លួនបានល្អប្រសើរ ។ ជាមួយគ្នានេះក៏សូមថ្លែងអំណរគុណចំពោះគ្រប់បណ្តាញសារព័ត៌មាន អង្គការក្រៅរដ្ឋាភិបាល និង អាជ្ញាធរមូលដ្ឋានគ្រប់ជាន់ថ្នាក់ ដែលបានចូលរួមផ្សព្វផ្សាយ និង អប់រំអំពីច្បាប់ចរាចរណ៍ផ្លូវគោកនេះជូនប្រជាពលរដ្ឋផងដែរ។
រដ្ឋមន្ត្រីក្រសួងមហាផ្ទៃបញ្ជាក់ថាកន្លងមកនេះមានមតិខ្លះក៏បានលើកឡើងដោយសុំឲ្យមានការពន្យាឬក៏ផ្អាកការរឹតបន្តឹងការអនុវត្តច្បាប់ចរាចរណ៍ផ្លូវគោកនេះដោយមូលហេតុផ្សេងៗ ប៉ុន្តែក្នុងនាមជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកខ្ញុំសូមជម្រាបបញ្ជាក់ជូនបងប្អូនជនរួមជាតិមេត្តាជ្រាបថាតាមលទ្ធផលជាវិជ្ជមានខាងលើនេះបានបង្ហាញថា ការពន្យាឬក៏ផ្អាកការរឹតបន្តឹងការអនុវត្តច្បាប់ចរាចរណ៍ផ្លូវគោកនេះគឺប្រៀបបាននឹងការបណ្តែតបណ្តោយឲ្យប្រជាពលរដ្ឋខ្មែរយេីងនៅតែបន្ត រងរបួស និងស្លាប់បាត់បង់ជីវិតកាន់តែច្រើនឡើងថែមទៀតដោយសារគ្រោះថ្នាក់ចរាចរណ៍ ដែលជាការកេីតឡេីងនូវសោកនាដកម្ម ទាំងចំពោះគ្រួសារ និងសង្គមជាតិ យើង។
សម្ដេចបន្តទៀតថាទោះជាយ៉ាងណាក៏ដោយដើម្បីកាត់បន្ថយ ឬក៏លប់បំបាត់ឲ្យបាននូវ​បាតុភាពអវិជ្ជមានផ្សេងៗក្នុងយុទ្ធនាការ​ ការរឹតបន្តឹងការអនុវត្តច្បាប់ចរាចរណ៍ផ្លូវគោកនេះខ្ញុំក៏សូមក្រើនរំលឹកថែមទៀតដល់កងកម្លាំងមានសមត្ថកិច្ច ក៏ដូចជាមន្ត្រីពាក់ព័ន្ធទាំងអស់ ដែលបានចូលរួមអនុវត្តភារកិច្ចរបស់ខ្លួន ត្រូវតែបន្តការគោរពក្រមសីលធម៌វិជ្ជាជីវៈ និងវិន័យឲ្យបានខ្ជាប់ខ្ជួន ក្នុងការអនុវត្តតួនាទីភារកិច្ចរបស់ខ្លួនដើម្បីបម្រើផលប្រយោជន៍ជាតិ​ និងប្រជាពលរដ្ឋយេីង​៕SRP

ខេត្តកំពង់ចាម​៖លោកស្រី​ ប៉ាង ដានី អភិបាលរងខេត្ត តំណាងលោក​ អ៊ុន​ ចាន់ដា​ អភិបាលខេត្តកំពង់ចាម បានចាត់ទុកថា បងប្អូនដែលបានចូលរួមផ្ដល់ឈាម គឺសុទ្ធតែជាវីរៈជន ដែល​មាន​វីរៈភាពស្នេហាជីវិតមនុស្ស និងសង្គមជាតិ ដោយ​បងប្អូនកំពុងរួមគ្នាធ្វើបុណ្យ ដើម្បីសង្គ្រោះជីវិតមនុស្ស។
ថ្លែងយ៉ាងដូច្នេះ ក្នុងឱកាសចូលរួមបើកយុទ្ធនាការអប់រំ ផ្សព្វផ្សាយ និងទទួលអំណោយឈាម ក្រោមប្រធានបទ ៖«ផ្ដល់ឈាមផ្ដល់សេចក្ដីស្រឡាញ់» ដែលបានរៀបចំឡេីងនៅសាលាស្រុកព្រៃឈរ នាព្រឹកថ្ងៃទី១៥ ខែឧសភា ឆ្នាំ២០២០នេះ ក្រោម​វត្តមានលោកស្រី តោ ពិឡា ទីប្រឹក្សាក្រសួងពាណិជ្ជកម្ម អនុប្រធានក្រុមការងារ ចុះមូលដ្ឋានស្រុកព្រៃឈរ​។

នាឱកាសនោះដែរ​ លោកស្រី​ ប៉ាង ដានី និងលោកស្រី តោ ពិឡា បានថ្លែងអំណរគុណ និងកោតសរសើរ ចំពោះ លោកលោកស្រីបងប្អូនជនរួមជាតិ ទាំងអស់ ដែលបានជួយគាំទ្រ​ក្នុង​យុទ្ធនាការអប់រំ ផ្សព្វផ្សាយ និងទទួលអំណោយឈាម ដែល​ជា​ទឹកចិត្ត​មនុស្សធម៌​ ផ្ដល់សេចក្ដីស្រឡាញ់ តាម​រយៈ​ដំណក់ឈាម នៃក្ដីសង្ឃឹម ជាពិសេស បាននឹងកំពុងបរិច្ចាកឈាម ដោយស្ម័គ្រចិត្ត​ ដើម្បីយកទៅប្រើប្រាស់ ក្នុង​ករណី​សង្គ្រោះបន្ទាន់ និងជួយដល់អ្នកជម្ងឺ ដែលកំពុងខ្វះឈាម និងអ្នកជួបគ្រោះថ្នាក់ផ្សេងៗ ។ ដូច្នេះការបរិច្ចាកឈាម ដើម្បីសង្គ្រោះជីវិតមនុស្ស គឺមានសារៈសំខាន់ណាស់ ពីព្រោះថា ការបរិច្ចាកឈាម គឺដើម្បីបញ្ឈប់បញ្ហាកង្វះឈាម ឬនិន្នាការ នៃការជួញដូរឈាម ដោយខុសច្បាប់ ខណៈដែលតម្រូវការឈាម មានការកើនឡើងជារៀងរាល់ឆ្នាំ ក្នុងរង្វង់ប្រមាណពី ១៥%ទៅ២០%។
បើតាមឲ្យដឹង ពីលោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្ដល់ឈាម បញ្ជាក់ថា ការប្រារព្ធពិធីផ្ដល់ឈាម នាពេលនេះ ដើម្បី ៖ ១.បង្កើតទម្លាប់ និងវប្បធម៌ នៃការបរិច្ចាកឈាមដោយស្ម័គ្រចិត្ត និងជម្រុញលើកកម្ពស់ឲ្យយុវជន ប្រជាជនទូទៅ ចូលរួមធ្វើសកម្មភាព ជាមួយសេវាកម្មជាតិផ្ដល់ឈាម នៅទូទាំងប្រទេស ដើម្បីធានាឲ្យមានការផ្គត់ផ្គង់ឈាមគ្រប់គ្រាន់ សម្រាប់អ្នកជម្ងឺ ដែលកំពុងត្រូវការឈាម នៅគ្រប់មន្ទីរពេទ្យ ដោយគ្មានការរើសអើង និងមប្រកាន់ជាតិសាសន៍ឬសាសនា ។ និង២.ផ្សាភ្ជាប់សកម្មភាព នៃការបរិច្ចាកឈាម ដោយស្ម័គ្រចិត្ត ទៅនឹងសកម្មមនុស្សធម៌ ក្នុងសង្គម ។
គូសបញ្ជាក់ដែរថា ក្នុងយុទ្ធនាការអប់រំផ្សព្វផ្សាយ និងទទួលអំណោយឈាម នេះដែរ គេសង្កេតឃើញថា មានអ្នកស្ម័គ្រចិត្តចូលរួមបរិច្ចាកឈាម សរុបប្រមាណជា ៣២នាក់ និងទទួលបានឈាមចំនួន៣២ប្លោកផងដែរ៕SRP