ខេត្តសៀមរាប៖លោកទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប នៅថ្ងៃទី២៧ខែមីនាម្សិលមិញ បានដឹកនាំក្រុមមន្ត្រីជំនាញ សហការជាមួយ អាជ្ញាធរមូលដ្ឋានស្រុកសូទ្រនិគម ចុះត្រួតពិនិត្យ ទប់ស្កាត់បទល្មើសជលផលនៅបឹងទន្លេសាប ចាប់ពីចំណុច មាត់ពាមឃ្លាំង ទៅដល់ចំណុច កន្ទូរ ក្នុងភូមិសាស្ត្រឃុំកំពង់ឃ្លាំង ស្រុកសូទ្រនិគម។ ដោយក្រុមសមត្ថកិច្ចបានរកឃើញនិងបានបំផ្លាញឧបករណ៍នេសាទខុសច្បាប់នៅនឹងកន្លែង រួមមាន ឧបករណ៍ ប ចំនួន ៨គ្រឿង របាំងសាច់មង ប្រវែង១ពាន់ម៉ែត្រ ចម្រឹងឈើ៧០០ដើម ព្រលែងកូនត្រីប្រមាណជាង១០គីឡូក្រាម។

ក្នុងឱកាសនោះដែរលោកទា គឹមសុទ្ធ ក៏បានជំរុញដល់មន្ត្រីក្រោមឱវាទ ត្រូវបន្តយកចិត្តទុកដាក់ សហការគ្នា ចេញត្រួតពិនិត្យឱ្យបានញឹកញាប់ ដើម្បីទប់ស្កាត់បទល្មើសជលផល ក្នុងភូមិសាស្ត្ររបស់ខ្លួនឱ្យបានជាប្រចាំផងដែរ៕SRP

ខេត្តសៀមរាប៖អាជ្ញាធរខេត្តសៀមរាប នៅថ្ងៃនេះ បានបង្ហាញថាគិតត្រឹមថ្ងៃទី២៧ ខែមីនា ឆ្នាំ២០២០ ក្រុមការងារបច្ចេកទេសបាននឹងកំពុងដំណើរការសាងសង់ផ្លូវក្រវ៉ាត់ក្រុង ដែលចាប់ពីចំណុចភ្លើងស្តុប​ចុងកៅស៊ូ​រហូតដល់ផ្លូវបំបែកជន្លង់ដោយមានប្រវែង២២៣០ម៉ែត្រ និងមានទទឹង ១៤ម៉ែត្រ។

ជាមួយគ្នានេះ ដំណើរការនៃការសាងសង់អនុវត្តបាន ៨៥% ដោយបានក្រាលកៅស៊ូរួចរាល់ និងការដាក់លូមូលមុខកាត់​១ម៉ែត្រ​តាមបណ្តោយផ្លូវ​ ដែលជាគម្រោងរបស់​ក្រសួងសាធារណការនិងដឹកជញ្ជូន ផ្លូវនេះដែរគឺជាប្រភេទផ្លូវ DBST។ កិច្ចការនៅសេសសល់ខ្លះលើការរៀបចំចិញ្ចើមផ្លូវ និងបណ្តាញបង្ហូរទឹកជាដើម។

ទន្ទឹមនឹងនេះ រដ្ឋបាលខេត្តសៀមរាបក៏សូមធ្វើការយោគយល់ខ្ពស់ពីសំណាក់បងប្អូនប្រជាពលរដ្ឋដែលរស់នៅ និងធ្វើដំណើរតាមផ្លូវនេះដែលមានការប៉ះពាល់ដោយក្រុមការងារសាងសង់៕SRP

ខេត្តកំពង់ចាម៖រដ្ឋបាលខេត្តកំពង់ចាម បានចេញសេចក្ដី ណែនាំ អនុវត្តវិធានការទប់ស្កាត់ការរីករាលដាលជំងឺកូវីដ១៩ ក្នុងភូមិសាស្ត្រ ខេត្តកំពង់ចាម។ សូមអានខ្លឹមសារខាងក្រោម៖

ខេត្តកំពង់ធំ៖(ដោយប៊ុត សុវណ្ណ) ស្ត្រីចំណាស់ម្នាក់បាន ដេកស្លាប់នៅលើអង្រឹងក្នុងខ្ទមតែម្នាក់ឯង សមត្ថកិច្ចសន្និដ្ឋានថាអាចបណ្ដាលមកពីខ្យល់គរ។
ហេតុការណ៍បានកើតឡើង វេលាម៉ោង ១២និង ១៥នាទី ថ្ងៃទី២៦ ខែមីនា ឆ្នាំ២០២០ នៅភូមិ រលួស ឃុំបន្ទាយស្ទោង ស្រុកស្ទោង ខេត្តកំពង់ធំ។
ជនរងគ្រោះឈ្មោះ កង សំ ភេទស្រី អាយុ ៥៧ឆ្នាំ ជនជាតិខ្មែរ នៅភូមិត្រាច ឃុំកំពង់ចិនជើង ស្រុកស្ទោង ខេត្តកំពង់ធំ។
ករណីនេះសមត្ថកិច្ចជំនាញនគរបាលស្រុកស្ទោង សហការជាមួយអាជ្ញាធរមូលដ្ឋាន ភូមិ ឃុំ និងគ្រូពេទ្យមណ្ឌលសុខភាពឃុំបន្ទាយស្ទោង បានចុះដល់ទីកន្លែងកើតហេតុហេតុ ដើម្បីពិនិត្យសព ពុំមានស្លាកស្នាម អ្វី អ្វីពាក់ព័ន្ធនិងករណីឃាតកម្មឡើយ។ ធ្វើការសន្និដ្ឋានថា៖ ការស្លាប់នៃជនរងគ្រោះ គឺកើតខ្យល់គរបណ្តាលអោយស្លាប់តែម្តង។
ក្រោយពីបានពិនិត្យ បានធ្វើកំណត់ហេតុប្រគល់ជូនឈ្មោះ កង កាន ត្រូវជាប្អូនបង្កើត យកទៅធ្វើបុណ្យតាមប្រពៃណី៕SRP

ខេត្តសៀមរាប៖បុរសពីរនាក់បើកម៉ូតូឌុបគ្នា ហើយទៅបុករថយន្តមួយគ្រឿងបណ្ដាលឲ្យរងរបួស។
ហេតុការណ៍បានកើតឡើងវេលាម៉ោង២៣និង០០នាទី ថ្ងៃទី២៧ ខែមីនា ឆ្នាំ២០២០ នៅចំណុចភូមិដាក់ផ្ការ ឃុំតាយ៉ែក ស្រុកសូទ្រនិគម ខេត្តសៀមរាប។
យោងតាមរបាយការណ៍របស់សមត្ថកិច្ចថាគ្រោះថ្នាក់ចរាចរណ៍នេះ បង្កដោយម៉ូតូម៉ាកC១២៥ហុងដាឌ្រីម ពណ៌ខ្មៅ សេរី២០១៣ ពាក់ស្លាកលេខសៀមរាប១R៣១៧៨ បានបុកជាមួយរថយន្ត ម៉ាកកាមរី ពណ៌ស្លែ សេរី៩៣ ពាក់ស្លាកលេខភ្នំពេញ២J៦៨៥៨ អ្នកបើកបរឈ្មោះរ៉េត រើន ភេទប្រុស អាយុ៣៣ឆ្នាំ នៅភូមិតាយ៉ែក ឃុំតាយ៉ែក ស្រុកសូទ្រនិគម។

សមត្ថកិច្ចបានបញ្ជាក់ថាករណីនេះបណ្ដាលអោយរបួស មនុស្ស០២នាក់
០១ឈ្មោះសឿម កុង ភេទប្រុស អាយុ២៦ឆ្នាំ នៅភូមិមានជ័យ សង្កាត់ស្វាយដង្គំ ក្រុងសៀមរាប ខេត្តសៀមរាប (ជាអ្នកបើកបរម៉ូតូ)
០២/ឈ្មោះចាន់ គ្រីត ភេទប្រុស អាយុ២០ឆ្នាំ នៅភូមិមានជ័យ សង្កាត់ស្វាយដង្គំ ក្រុងសៀមរាប ខេត្តសៀមរាប អ្នកជិះជាមួយ។
បច្ចុប្បន្ន អ្នករបួសបញ្ជូនទៅមន្ទីរពេទ្យស្រុក។ ចំណែករថយន្ត និងម៉ូតូរក្សារទុកនៅអធិការនគរបាលស្រុក ដើម្បីរងចាំការដោះស្រាយ៕SRP

ខេត្តសៀមរាប៖សេចក្ដីរាយការណ៍ព័ត៌មានបឋមបានឲ្យដឹងថា ស្ត្រីម្នាក់បានដេកស្លាប់នៅស្រុកអង្គរជុំ សមត្ថកិច្ចសន្និដ្ឋានថា អាចស្លាប់ដោយខ្យល់គរ។
ហេតុការណ៍បានកើតឡើង វេលាម៉ោង០៣និង៣៥នាទី រំលោងអាធ្រាតឈានចូលថ្ងៃទី២៨ខែមីនា ឆ្នាំ២០២០នៅចំណុចភូមិព្រៃទទឹង ឃុំចារឈូក ស្រុកអង្គរជុំ។
ជនរងគ្រោះឈ្មោះ ឆាវ ស៊ាម ភេទស្រី អាយុ៥៨ឆ្នាំ នៅភូមិឃុំកើតហេតុខាងលើ៕SRP

ខេត្តឧត្ដរមានជ័យ៖រថយន្តដឹកឈើមួយគ្រឿងត្រូវបានកម្លាំងរដ្ឋបាលព្រៃឈើខេត្តឧត្តរមានជ័យធ្វើការបង្ក្រាបបាននៅព្រឹកនេះ។
ការបង្ក្រាបធ្វើឡើង ស្ថិតនៅភូមិទួលស្វាយ ឃុំត្រពាំងតាវស្រុកអន្លង់វែង ខេត្តឧត្តរមានជ័យ រដ្ឋបាលព្រៃឈើ សហការ ជាមួយ កម្លាំងអាវុធហត្ថការិយាល័យទី២កងទ័ពជើងគោកនគរបាល ប្រឆាំងបទល្មើសសេដ្ឋកិច្ចក្រសួងមហាផ្ទៃនិងមន្ត្រីមន្ទីរកសិកម្ម បញ្ជាដោយលោក ប៉េង ម៉េងគ័ង ព្រះរាជអាជ្ញារងខេត្តឧត្ដរមានជ័យ។
ពាក់ព័ន្ធករណីនេះ សមត្ថកិច្ចនៅមិនទាន់បញ្ជាក់លម្អិតចំនួនឈើនិង ម្ចាស់ឈឺនៅឡើយទេ៕SRP

ភ្នំពេញ៖សម្ដេច ក្រឡាហោម ស ខេង រដ្ឋមន្ត្រីក្រសួងមហាផ្ទៃ នៅថ្ងៃនេះបានចេញលិខិតជម្រាបជូន ឯកឧត្តម លោកជំទាវ អភិបាលខេត្តនៃគណៈអភិបាលរាជធានី ខេត្ត ស្ដីពីវិធានការគ្រប់គ្រងបងប្អូនប្រជាពលរដ្ឋខ្មែរដែលវិលត្រលប់មកពីប្រទេសថៃចូលមកប្រទេសកម្ពុជាវិញ៕SRP

ភ្នំពេញ៖សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក បានបញ្ជាដល់ថ្នាក់ដឹកនាំ និងមន្ត្រីនគរបាលទូទាំងប្រទេស ត្រូវរឹតបន្តឹងការអនុវត្តច្បាប់ស្ដីពីចរាចរណ៍ផ្លូវគោកប្រកបដោយភាពម៉ឺងម៉ាត់ ដាច់ខាត មិនយោគយល់ និងត្រូវអនុវត្តឱ្យបានត្រឹមត្រូវតាមនីតិវិធីច្បាប់ តម្លាភាព ស្មើភាព និងមិនរើសអើង ហើយត្រូវសហការស្រាវជ្រាវ តាមចាប់ខ្លួនជនបង្កគ្រោះថ្នាក់ចរាចរណ៍ផ្លូវគោក ដែលគេចខ្លួនយកមកផ្ដន្ទាទោសតាមច្បាប់ឱ្យបានជាដាច់ខាត។
សម្ដេចក៏បញ្ជាថ្នាក់ដឹកនាំនគរបាលចរាចរណ៍ទាំងអស់រៀបចំផែនការសកម្មភាព និងរៀបចំកម្លាំងតាមដាន ត្រួតពិនិត្យ និងគាំទ្រប្រតិបត្តិការអនុវត្តច្បាប់របស់មន្ត្រីនគរបាលចរាចរណ៍ក្រោមឱវាទដើម្បីធានាភាពត្រឹត្រូវ។
សម្ដេចបានមានប្រសាសន៍ថាអាស្រ័យដោយប្រទេសជាតិមានសុខសន្តិភាព និងការអភិវឌ្ឍរីកចំរើនគ្រប់វិស័យ ប្រជាពលរដ្ឋកាន់តែច្រើនបានប្រើប្រាស់យានយន្តគ្រប់ប្រភេទកើនឡើងជារៀងរាល់ឆ្នាំ ខណៈរាជរដ្ឋាភិបាលក៏បានខិតខំប្រឹងប្រែងអភិវឌ្ឍន៍ហេដ្ឋារចនាសម្ព័ន្ធផ្លូវថ្នល់ និងខិតខំអប់រំផ្សព្វផ្សាយប្រជាពលរដ្ឋឱ្យបានដឹងពីការអនុវត្តច្បាប់ និងគ្រោះថ្នាក់ចរាចរណ៍ ប៉ុន្តែយ៉ាងណាក៏ដោយ សណ្ដាប់ធ្នាប់ចរាចរណ៍នៅតែជាបញ្ហាស្មុគស្មាញ ពិសេសគ្រោះថ្នាក់ចរាចរណ៍បានបន្តកើនឡើងពីមួយឆ្នាំទៅមួយឆ្នាំ បណ្ដាលឱ្យពលរដ្ឋរងរបួស ស្លាប់ និងខូចខាតទ្រព្យសម្បត្តិទាំងរដ្ឋ និងឯកជនជាច្រើន ។
ជាក់ស្ដែងបើប្រៀធៀបនឹងឆ្នាំ២០១៨ គឺនៅឆ្នាំ២០១៩កន្លងទៅ សម្ដេចបានមានប្រសាសន៍ថាគ្រោះថ្នាក់ចរាចរណ៍បានកើនឡើង៨៥៤លើក ស្មើនឹង២៦ភាគរយ ក្នុងនោះមានអ្នកស្លាប់២២០នាក់ ស្មើនឹង១២ភាគរយ និងអ្នករងរបួស១៣៧១នាក់ ស្មើនឹង២៩ភាគរយ។ ដូច្នេះហើយ ឆ្លើយតបនឹងកំណើននេះ គណៈកម្មាធិការជាតិសុវត្ថិភាពចរាចរណ៍ផ្លូវគោក បានសម្រេចប្រកាសរឹតបន្តឹងការអនុវត្តច្បាប់ចាប់ពីឆ្នាំ២០២០ ។ ដោយផ្អែកលើការសិក្សាលើឥរិយាបទនៃការគោរពច្បាប់ និងបទពិសោធន៍ពីក្រៅប្រទេស រាជរដ្ឋាភិបាលក៏បានធ្វើវិសោធនកម្មអនុក្រឹត្យស្ដីពីការពិន័យអន្តរកាណ៍ ដោយបង្កើនប្រាក់ពិន័យពី៣ទៅ៥ដង ដើម្បីជំរុញការគោរព និងអនុវត្ត ។
សម្ដេចក្រឡាហោម បានអំពាវនាវប្រជាពលរដ្ឋមានការយោគយល់ចំពោះវិធានការច្បាប់ដ៏តឹងរឹងនេះ ហើយដើម្បីចៀសផុតពីការប្រឈមមុខនឹងច្បាប់ សូមប្រជាពលរដ្ឋ គោរពច្បាប់ឱ្យបានខ្ជាប់ខ្ជួន ហើយក្រសួងពាក់ព័ន្ធ អាជ្ញាធរកងកម្លាំងមានសមត្ថកិច្ចគ្រប់លំដាប់ថ្នាក់ អង្គការជាតិ និងអន្តរជាតិ និងប្រព័ន្ធផ្សព្វផ្សាយនានា ត្រូវបន្តចូលរួមគាំទ្រការផ្សព្វផ្សាយច្បាប់ និងកម្រិតទោសពិន័យអន្តរកាណ៍ នៃអំពើល្មើសនឹងច្បាប់ស្ដីពីចរាចរណ៍ផ្លូវគោកឱ្យបានទូលំទូលាយ។ ភាពត្រឹមត្រូវដែលសម្ដេចសំដៅដល់ការប្រកាន់ខ្ជាប់នូវការបន្តពង្រឹងក្រមសីលធម៌ វិន័យ ឱ្យមន្ត្រីក្រោមឱវាទទាំងអស់សក្ដិសមជាមន្ត្រីអនុវត្តច្បាប់ប្រកបដោយគុណធម៌ និងមានមនសិការវិជ្ជាជីវៈ។ ជាមួយគ្នានេះថ្នាក់ដឹកនាំក៏ត្រូវផ្ដល់រង្វាន់តាមការកំណត់របស់រដ្ឋ និងការលើកសរសើរចំពោះអង្គភាព និងមន្ត្រីមានស្នាដៃ និងក៏ត្រូវតែដាក់វិន័យឱ្យបានម៉ឺងម៉ាត់ ចំពោះមន្ត្រីអសកម្ម ឬមន្ត្រីទាំងឡាយណាដែលប្រព្រឹត្តផ្ទុយពីក្រមសីលធម៌វិជ្ជាជីវៈ។
សារថ្លែងយ៉ាងដូច្នេះនៅ ទីស្ដីការក្រសួងមហាផ្ទៃ នាព្រឹកមិញ នាឱកាសសម្ដេច បានអញ្ជើញជាអធិបតីក្នុងពិធីផ្សព្វផ្សាយអនុក្រឹត្យលេខ៣៩ អនក្រ.បក ចុះថ្ងៃទី១៧ ខែមីនា ឆ្នាំ២០២០ ស្ដីពីការកែសម្រួលអនុក្រឹត្យលេខ៤៤ អនក្រ.បក ចុះថ្ងៃទី២១ ខែមីនា ឆ្នាំ២០១៧ ស្ដីពីការពិន័យអន្តរកាណ៍ចំពោះអំពើល្មើសនឹងច្បាប់ស្ដីពីចរាចរណ៍ផ្លូវគោក៕SRP

ខេត្តកំពង់ធំ៖សេចក្ដីរាយការណ៍បានឲ្យដឹងថាមនុស្សចំនួន០២នាក់បានស្លាប់ដោយសារថយន្តមួយគ្រឿងបុកចំពេញទំហឹង។ ចំណែកតៃកុងរត់គេចខ្លួន បន្សល់ទុកតែរថយន្ត។
ហេតុការណ៍បានកើតឡើងនៅព្រឹកថ្ងៃទី២៧ ខែមីនា ឆ្នាំ២០២០ នៅលើផ្លូវជាតិលេខ៦ ចន្លោះគីឡូម៉ែត្រលេខ២០២.២០៣ ភូមិក្រសាំង(ខ) ឃុំសានគរ ស្រុកកំពង់ស្វាយ ខេត្តកំពង់ធំ។
សេចក្ដីរាយការណ៍បានបន្តថាគ្រោះថ្នាក់ចរាចណ៍នេះរថយន្តម៉ាកMITSUBISHI PAJEROSPORT ពណ៌សពាក់ស្លាកលេខបន្ទាយមានជ័យ២B.៨៨៨១ បើកបរពីលិចទៅកើត អ្នកបើកបរមិនស្គាល់អត្តសញ្ញាណ។
ជនរងគ្រោះទី០១. ម៉ូតូម៉ាកហុងដាឌ្រីមC125 ពណ៌ខ្មៅ គ្មានស្លាកលេខ បើកបរដោយឈ្មោះ ហៃ មី ភេទស្រី អាយុ៣៧ឆ្នាំ មុខរបរទិញស្រូវ រស់នៅភូមិក្រសាំង(ខ) ឃុំសានគរ ស្រុកកំពង់ស្វាយ ខេត្តកំពង់ធំ ស្លាប់តាមផ្លូវពេលបញ្ជូនទៅមន្ទីរពេទ្យខេត្តកំពង់ធំ។ ទី០២.ម៉ូតូម៉ាកហុងដាវេវ ពណ៌ខ្មៅ គ្មានស្លាកលេខ បើកបរដោយឈ្មោះ ដែក សុផាត ភេទប្រុស អាយុ៣៦ឆ្នាំ មុខរបរធ្វើស្រែ រស់នៅភូមិក្រសាំង(ខ) ឃុំសានគរ ស្រុកកំពង់ស្វាយ ខេត្តកំពង់ធំ (ស្លាប់នៅនឹងកន្លែងកើតហេតុ)។
សមត្ថកិច្ចបានបញ្ជាក់ថា មូលហេតុបង្កឡើងដោយរថយន្តបើកបរក្នុងស្ថានភាពងងុយដេក ហើយរេចង្កូតទៅខាងឆ្វេងដៃបុកម៉ូតូ ដែលឈប់លើជាយផ្លូវក្នុងទិសដៅផ្ទុយគ្នា។ សមត្ថកិច្ចបាននាំយក វត្ថុតាង ទៅរក្សាទុកនៅអធិការដ្ឋាននគរបាលស្រុកកំពង់ស្វាយ រងចាំការដោះស្រាយតាមផ្លូវច្បាប់៕SRP