ភ្នំពេញ៖លោកធឹម សំផូត មន្ត្រីមន្ទីរមុខងារសាធារណ: ខេត្តសៀមរាប និងជាទីប្រឹក្សាក្រសួងព័ត៌មាន ស្ម័គ្រចិត្ត ផ្ដល់ប្រាក់បៀវត្ស ជូននគណៈកម្មការជាតិ ប្រយុទ្ធនិងជំងឺកូវីដ១៩ រយ:ពេល០២ខែ ៕SRP

ខេត្តកំពង់ចាម៖លោកឆេង ថុង ប្រធានសហគមន៍ សំបូរមានជ័យ បាននាំយកថវិការបស់សមាជិក ក្រុមការងារចំនួន០២លានរៀលផ្តល់ជូន គណៈកម្មការ ប្រយុទ្ធនឹងជំងឺកូវីដ១៩ ខេត្តកំពង់ចាម។ ការផ្ដល់ជូននេះនៅព្រឹកមិញនេះ។
លោ អ៊ុន ចាន់ដា អភិបាលខេត្តកំពង់ចាម បានថ្លែងអំណរគុណចំពោះ សហគមន៍កសិកម្មសំបូរមានជ័យ ដែលបានចូល រួម ចំណែកផ្ដល់ថវិកាជូនដល់ គណៈកម្មការប្រយុទ្ធនឹងជំងឺកូវីដ១៩ខេត្តកំពង់ចាម សម្រាប់យកទៅចាត់ចែងតាមតម្រូវការចាំបាច់ក្នុងយុទ្ធនាការនានា ជាពិសេសក្នុង ការចុះផ្សព្វផ្សាយណែនាំ អំពីវិធានការចាំបាច់ក្នុងការបង្ការទប់ស្កាត់ការរីករាលដាលនៃវីរុសកូរ៉ូណា(កូវីដ ១៩) ជាពិសេសការចុះផ្សព្វផ្សាយ ដល់បងប្អូនពលករ ដែលទើបតែត្រឡប់មកពីក្រៅប្រទេស វិញឲ្យពួកគាត់ស្វែងយល់ អំពីការដាក់ឲ្យនៅដាច់ដោយ ឡែករយៈពេល ១៤ថ្ងៃ ដើម្បីសុខសុវត្ថិភាពក្នុងគ្រួសារ សហគមន៍ និងសង្គមជាតិទាំងមូល៕
គួរកត់សម្គាល់ថាសហគមន៍កសិកម្មសំបូរមានជ័យ មានទីតាំង ស្ថិតក្នុងឃុំសំបូរ ស្រុកស្ទឹងត្រង់ ខេត្តកំពង់ចាម ដែលកន្លងមក បានចូលរួមការងារសង្គមជាច្រើន ដូចជាការយកថវិការមកជួសជុលផ្លូវថ្នល់ ក្នុងមូលដ្ឋានដើម្បី ឲ្យបងប្អូនប្រជាពលរដ្ឋ ដឹកនាំជញ្ជូនកសិករផលទៅកាន់ទីផ្សារ ដែល ជាការចូល រួមចំណែកក្នុងការកាត់បន្ថយភាពក្រីក្រ ដោយ សហគមន៍ បាន ជំរុញ ឲ្យកសិករ ទទួលបានភាពជោគជ័យជាច្រើន ក្នុងការដាំដំណាំផ្សេងៗជាច្រើន ជាពិសេសដំណាំស្លឹកគ្រៃ ដើម្បីបង្កើនប្រាក់ចំណូលបន្ថែមផងដែរ៕SRP

ខេត្តសៀមរាប៖លោកសូរ ប្លាតុង អភិបាលស្រុកប្រាសាទបាគង និងជាប្រធានគណៈកម្មាធិការអនុសាខាកាកបាទក្រហមកម្ពុជាស្រុកប្រាសាទបាគង​ និងក្រុមការងារ​ នៅមិញព្រឹកនេះបានជួបសួរសុខទុក្ខ​ និង​ នាំអំណោយសប្បុរសធម៌​ របស់អនុសាខា​ មកប្រគល់ជូន​ បងស្រី អាន អឿន អាយុ ៥២ឆ្នាំ ជាស្ត្រីមេម៉ាយ មានសមាជិកគ្រួសារ ១នាក់ រស់នៅភូមិស្ទឹង ឃុំបាគង ស្រុកប្រាសាទបាគង ខេត្តសៀមរាប ដែលរងគ្រោះដោយសារខ្យល់កន្ត្រាក់រលំផ្ទះ១ខ្នងកាលពីល្ងាចថ្ងៃទី១២ខែមេសាឆ្នាំ២០២០កន្លងទៅ។ អំណោយ​សង្គ្រោះ​ ដែលនាំមកប្រគល់ជូនគ្រួសាររងគ្រោះនាពេលនេះរួមមាន៖ អង្ករ ២៥គក្រ ទឹកត្រី១យួរ ទឹកស៊ីអ៊ីវ១យួរ ទឹកសុទ្ធវីតាល់១កេស មី១កេស តង់១ ធុង១ កន្ទេល១ មុង១ ឆ្នាំងបាយ១ ភួយ១ ខ្នើយ១ ចានដែក១ ចានសម្ល៥ ចានបាយ៥ ស្លាបព្រា៥ វែកបាយ១ វែកសម្ល១ ចានស្រាក់១ និងថវិកា៥០ម៉ឺនរៀល ផងដែរ៕SRP

ខេត្តសៀមរាប៖អំណោយរបស់ លោកទៀសីហា អភិបាលខេត្តសៀមរាប និងលោកជំទាវ ត្រូវបាន លោកង៉ាន់ ភារុណ អភិបាលរងខេត្ត នាំយកចែកជូនដល់លោកមេភូមិ អនុភូមិ និងសមាជិកភូមិ ចំនួន​២៧ភូមិ​ ក្នុងឃុំចំនួន​២​ គឺឃុំដូនកែវ​ និងឃុំរេីល​ ស្រុកពួក នៅព្រឹកមិញនេះ។
ការចែកអំណោយនេះក៏មានការចូលរួមពីលោក សួស​ សុខចាន់សមាជិកក្រុមប្រឹក្សាខេត្ត អាជ្ញាធរស្រុក​ តំណាង​ ស​ ស​ យ​ ក​ និងអាជ្ញាធរឃុំផងដែរ។
ក្នុងឱកាសនោះដែរ ក្រុមការងាក៏បានសួរសុខទុក្ខ និងជំរុញចាត់វិធានការការពានឹងការឆ្លងរីករាលដាលជំងឺCOViD-19 ដើម្បីទប់ស្កាត់កុំអោយមានការឆ្លងពីភូមិមួយទៅភូមិមួយ ពី ខេត្តមួយទៅខេត្តមួយ។​
សូមបញ្ជាក់ថាអំណោយដែលបានផ្តល់ជូនក្នុងមួយភូមិទទួលបានអង្ករ៤០គីឡូ មីចំនួន០១កេះធំ ម៉ាស់មួយប្រអប់ស្មើនឹង ៥០ម៉ាស់ សាប៊ូលាងដៃ១២ដុំ និងថវិកា ១០មុឺនរៀល៕SRP

ខេត្តកំពង់ចាម ៖លោកស្រី ឈិត ណារី ប្រធានអនុគណៈកម្មាធិការសាខាកាកបាទក្រហមកម្ពុជា ក្រុងកំពង់ចាម បានបន្តដឹកនាំយុទ្ធនាការ អប់រំផ្សព្វផ្សាយ វិធីកាត់បន្ថយហានិភ័យពីការឆ្លងជម្ងឺCovid-19។  យុទ្ធនាការផ្សព្វផ្សាយនេះ បាន ធ្វើឡើង នៅ ថ្ងៃ ទី ១៤ ខែមេសា ឆ្នាំ ២០២០ ដោយ មានការចូលរួមពី មន្រ្តីប្រតិបត្តិអនុសាខាក្រុង ក្រុមកាកបាទក្រហមសង្កាត់សំបួរមាស និង អ្នកស្ម័គ្រចិត្តភូមិ ជាច្រើន រូប ផង ដែរ ។  គួរកត់សម្គាល់ថា ក្នុងយុទ្ធនាការផ្សព្វផ្សាយនោះដែរ លោកស្រី ប្រធានអនុសាខាក្រុង បានបែងចែកក្រុមការងារជា ៣ក្រុម ដោយ ៖ -ក្រុមទី១៖ ចុះអប់រំផ្សព្វផ្សាយនៅ ភូមិកំពង់រលីង មានអ្នកចូលរួមចំនួន២២៨នាក់។ -ក្រុមទី២ ៖ ចុះអប់រំផ្សព្វផ្សាយ នៅភូមិបឹងបាសាក់ មានអ្នកចូលរួម ១០២នាក់។ – និងក្រុមទី៣ ៖ ចុះអប់រំផ្សព្វផ្សាយ នៅភូមិចំការខ្ពប មានអ្នកចូលរួម ៨៩នាក់។ ជាមួយនោះ ក្រុមការងារនីមួយ ៗ បានធ្វើការអប់រំផ្សព្វផ្សាយ តាមគ្រួសារប្រជាពលរដ្ឋ ក្នុងថ្ងៃចូលឆ្នាំ ថ្ងៃទី១ ដោយមានការចាក់មីក្រូចល័ត, ចែកប័ណ្ណប្រកាសខ្នាតតូច បិទផុសស្ទ័រតាមផ្ទះ និងទីសាធារណៈ ចែកសាប៊ូ និងប្រើប្រាស់ទឹកអាកុលលាងដៃ ហើយបានធ្វើការ វាស់កំដៅ ដល់ក្មេង និងមនុស្សចាស់ ព្រមទាំង ធ្វើការណែនាំដល់បងប្អូនប្រជាពលរដ្ឋ តាមខ្នងផ្ទះ ឲ្យយល់ដឹងពី វិធីការពារ ដេីម្បី កាត់បន្ថយហានិភ័យ នៃការឆ្លងជំងឺកូវិត១៩, ដោយការបង្រៀនពីរបៀបលាងសំអាតដៃ ជាមួយសាប៊ូនឺងទឹកស្អាត ហោចណាស់ឲ្យបាន ១នាទី, មិនត្រូវឲ្យមានការជួបជុំ ក្នុងលក្ខណៈប្រមូលផ្តុំគ្នា, ត្រូវពាក់ម៉ាស់ ឬប្រើក្រម៉ា ខ្ទប់ មាត់ ច្រមុះ ពេលចេញក្រៅផ្ទះ។ពិសេស បានអំពាវនាវឲ្យបងប្អូនទាំងអស់ អនុវត្តឲ្យបានខ្ជាប់ខ្ជួន តាមសារអប់រំ សុខភាពនានា របស់ក្រសួងសុខាភិបាល ក្នុងនោះ ត្រូវយកចិត្តទុកដាក់ ជាចម្បង អំពីការថែរក្សាសុខភាព អនាម័យ និងសុវត្ថិភាព ទាំងក្នុងក្រុមគ្រួសារ ទាំងផ្ទាល់ខ្លួនឯង ដើម្បី ជៀសអោយផុត ពីការឆ្លងរាលដាល នៃជម្ងឺ ដ៏កាចសាហាវ នេះ។

ក្នុងឱកាសនោះដែរ លោកស្រីប្រធានអនុសាខាក្រុងកំពង់ចាម បាននាំយកអំណោយមនុស្សធម៌ របស់សាខាខេត្ត រួមមាន៖អង្ករ២៥គក្រ មី១កេស ត្រីខ ១យួរ ទឹកត្រី១យួរ ទឹកសីអ៊ីវ១យួរ ឃីត១ កញ្ចប់ ចែនជូនជនចាស់ជរាគ្មានទីពឹង ១គ្រួសារ ឈ្មោះ លោកតា តាំង ឃន អាយុ ៧៨ឆ្នាំ នៅភូមិកំពង់រលីង សង្កាត់សំបួរមាស។  ទន្ទឹមនឹងនោះដែរ លោកស្រី ឈិត ណារី និងប្រតិភូអមដំណើរ ក៏បាននាំយកម៉ាស់ ទៅចែកជូនសមត្ថកិច្ច ដែលកំពុងឈរជើង នៅក្នុងភូមិសាស្រ្ត នៃក្រុងកំពង់ចាម ខេត្តកំពង់ចាម ផងដែរ៕SRP

ខេត្តសៀមរាប៖នៅទីបំផុតបុរសជនជាតិឥណ្ឌូណេស៊ីចំនួន០២នាក់ ដែលមានជំងឺកូវីដ-១៩ មកពីប្រទេសថៃ ហើយត្រូវបានទទួលការព្យាបាលនៅមន្ទីរពេទ្យបង្អែកខេត្តសៀមរាប ត្រូវបានអនុញ្ញាតឲ្យចេញពីមន្ទីពេទ្យហើយ កាលពីរសៀលថ្ងៃទី១៤ ខែមេសាម្សិលមិញ បន្ទាប់ពីបានជាសះស្បើយពីជំងឺ ក្រោមការយកចិត្តទុកក្នុងការព្យាបាលជំងឺពីសំណាក់ក្រុមគ្រូពេទ្យ នៃមន្ទីរពេទ្យបង្អែកខេត្តសៀមរាប អស់រយៈពេល២២ថ្ងៃកន្លងមក ។

នៅចំពោះមុខក្រុមគ្រូពេទ្យ នៃមន្ទីរពេទ្យបង្អែកខេត្តសៀមរាប និង អ្នកសារព័ត៌មាន បុរសជនជាតិឥណ្ឌូណេស៊ី បានសម្ដែងនូវក្តីរំភើបរីករាយយ៉ាងក្រៃលែង និង កក់ក្តៅបំផុត ព្រមទាំងសម្ដែងនូវការ កោតសរសើរចំពោះគោលនយោបាយនិងទឹកចិត្តមនុស្សធម៌របស់ប្រមុខរាជរដ្ឋាភិបាលកម្ពុជា ដែលបានអនុញ្ញាតចំពោះការស្នាក់នៅព្យាបាលរូបលោកទាំង០២នាក់នៅក្នុងប្រទេសកម្ពុជា និង អរគុណដ៏ជ្រាលជ្រៅបំផុតចំពោះក្រុមគ្រូពេទ្យកម្ពុជា ដែលបានសង្គ្រោះជីវិតរបស់លោក ឆ្លងផុតពីគ្រោះស្លាប់ដោយសារជំងឺកូវីដ-១៩។  ប្រធានមន្ទីរសុខាភិបាលខេត្តសៀម រាបលោកវេជ្ជបណ្ឌិត ក្រុស សារ៉ាត់ បានមានប្រសាសន៍ថា បុរសជនជាតិឥណ្ឌូណេស៊ីទាំង ០២នាក់នេះ ត្រូវបានរកឃើញមានផ្ទុកវារុសកូវីត១៩ កាលពីថ្ងៃទី១៨ ខែមីនាឆ្នាំ២០២០ ដោយមន្ទីរពេទ្យមួយនៅទីក្រុងបាងកក លុះថ្ងៃទី២២ ខែមីនា ពួកគាត់បានធ្វើដំណើរចូលមកប្រទេសកម្ពុជា តាមច្រកទ្វារព្រំដែនអន្តរជាតិប៉ោយប៉ែត មុនមានការបិទព្រំដែន ហើយនៅ ថ្ងៃទី ២៣ ខែមីនា បុរសជនជាតិឥណ្ឌូណេស៊ីទាំង២នាក់នេះ បានមកដល់មន្ទីរពេទ្យបង្អែកខេត្តសៀមរាប។

បើតាមលោកវេជ្ជបណ្ឌិត ក្រុស សារ៉ាត់ បានបញ្ជាក់បន្ថែមថា ថ្វីត្បិតតែបុរសជនជាតិឥណ្ឌូណេស៊ីទាំង២នាក់នេះ ត្រូវបានអនុញ្ញាតឲ្យចេញពីមន្ទីរពេទ្យក៏ពិតមែន ក៏ប៉ុន្តែពួកគេត្រូវស្នាក់នៅក្នុងប្រទេសកម្ពុជាបន្តទៀត ហើយក្រុមគ្រូពេទ្យជំនាញបានណែនាំឲ្យពួកគាត់ដាក់ខ្លួនឲ្យនៅដាច់ដោយឡែកចំនួន១៤ថ្ងៃបន្តទៀត ក្រោមការតាមដានរបស់មិត្តភ័ក្ររបស់ពួកគេដែលជាជនជាតិឥណ្ឌូណេស៊ីដូចគ្នា ហើយកំពុងធ្វើការនៅក្រុងសៀមរាប។

សូមបញ្ជាក់ថា គិតមកទល់ពេលរសៀលថ្ងៃទី១៤ ខែមេសា ឆ្នាំ២០២០ នេះ នៅទូទាំងខេត្តសៀមរាប មានអ្នកឆ្លងជំងឺកូវីដ១៩ សរុបចំនួន ០៧នាក់ ក្នុងនោះបានព្យាបាលជាសះស្បើយ ហើយចេញពីមន្ទីរពេទ្យចំនួន០៥នាក់ និងនៅសល់ចំនួន០២នាក់ទៀត កំពុងសម្រាកព្យាបាល ជំងឺនៅក្នុងមន្ទីរពេទ្យបង្អែកខេត្តសៀមរាប៕SRP

ខេត្តសៀមរាប៖លោកង៉ាន់ ភិរុណ អភិបាលរងខេត្ត នៅរសៀលថ្ងៃទី១៤ ខែមេសា ម្សិលមិញ តំណាងលោក ទៀ សីហា អភិបាលខេត្ត និងលោក សួស សុខចាន់ សមាជិកក្រុមប្រឹក្សាខេត្ត អាជ្ញាធរស្រុក តំណាង ស ស យ ក និងអាជ្ញាធរឃុំ បាននាំយកអំណោយជូនដល់លោកមេភូមិ អនុភូមិ និងសមាជិកភូមិ ក្នុងភូមិចំនួន ៣ រួមមាន ភូមិប្រីយ៍ ភូមិកកោះជ្រុំ និងភូមិបន្ទាយស្រី ក្នុងស្រុកបន្ទាយស្រី។

ជាមួយគ្នានេះ ក្រុមការងាក៏បានសួរសុខទុក និងជំរុញចាត់វិធានការការពានឹងការឆ្លងរីករាលដាលជំងឺCOViD-19 ដើម្បីទប់ស្កាត់កុំអោយមានការឆ្លងពីភូមិមួយទៅភូមិមួយ ពី ខេត្តមួយទៅខេត្តមួយ។

លោកង៉ាន់ ភិរុណ ក៏បានចុះពិនិត្យទីតាំងចត្តឡីស័ក ក្នុងស្រុកបន្ទាយស្រី និងសួរសុខទុក្ខ ប្រជាពលរដ្ឋមួយគ្រួសារមានចំនួន ៣នាក់ ប្តីប្រពន្ធ និងកូន ត្រូវបានដាក់អោយនៅដោយឡែកនៅចត្តឡីស័កចំនួន ១៤ថ្ងៃ ដែលទេីបត្រឡប់មកពីប្រទេសថៃផងដែរ។

អំណោយដែលបានផ្តល់ជូនក្នុងមួយភូមិទទួលបានអង្ករ ៤០គីឡូ មីចំនួន០១កេះធំ ម៉ាស់មួយប្រអប់ស្មើនឹង ៥០ ម៉ាស់ សាប៊ូលាងដៃ១២ដុំ និងថវិកា១០មុឺនរៀល។
សូមបញ្ជាក់ផងដែរថាអំណោយដែលបានផ្តល់ជូននោះ គឺជាអំណោយរបស់លោក ទៀ សីហា អភិបាល និងលោកជំទាវ៕SRP

ខេត្តសៀមរាប៖លោក ទៀ សីហា អភិបាលខេត្តសៀមរាប នៅរសៀលថ្ងៃនេះ បានចុះត្រួតពិនិត្យកម្លាំងចម្រុះដែលកំពុងនៅប្រចាំការលើគោលដៅព្រំប្រទល់ខេត្តសៀមរាបនិងខេត្តបន្ទាយមានជ័យ ក្នុងភូមិសាស្រ្តស្រុកក្រឡាញ់ និង ជួបសំណេះសំណាលជាមួយមេភូមិ អនុភូមិ និង សមាជិកភូមិទាំងអស់ក្នុងស្រុកក្រឡាញ់ ។

លោក ទៀ សីហា អភិបាលខេត្តសៀមរាប បានសម្ដែងនូវការកោតសរសើរចំពោះកងកម្លាំងចម្រុះដែលកំពុងប្រចាំការនៅគោលដៅនេះ ដែលបានយកអស់កម្លាំងកាយចិត្តបំពេញភារកិច្ច តាមតួនាទីរបស់ខ្លួនដោយស្មារតីទទួលខុសត្រូវខ្ពស់ ជាពិសេសការអនុវត្តនូវបទបញ្ជាលេខ០២ របស់រាជរដ្ឋភិបាលកម្ពុជា បានយ៉ាងខ្ជាប់ខ្ជួន ប្រកបដោយប្រសិទ្ធភាព សំដៅរួមចំណែកក្នុងការទប់ស្កាត់ការឆ្លងរាលដាលជំងឺកូវីដ១៩។
លោក ទៀ សីហា បានជួបសំណេះសំណាលជាមួយ​មេភូមិ អនុភូមិ និង សមាជិកភូមិទាំងអស់ក្នុងស្រុកក្រឡាញ់ ព្រមទាំងបានបញ្ជាក់ថា ការចុះជួបសួរសុខទុក្ខនាពេលនេះ គឺស្របពេលមានបទបញ្ជារបស់រាជរដ្ឋាភិបាលកម្ពុជា អំពីវិធានការបង្ការទប់ស្កាត់ជំងឺកូវីដ១៩ នៅតាមបណ្ដាខេត្តនាពេលថ្មីៗកន្លងមក ដូចជាការផ្អាកការប្រាព្ធពិធីបុណ្យចូលឆ្នាំថ្មីប្រពៃណីជាតិខ្មែរ ដើម្បីបញ្ចៀសការជួបជុំ និង ការរឹតបណ្ដឹងការធ្វើដំណើរពីខេត្តមួយទៅខេត្តមួយក្នុងប្រទេស ដែលអាចបង្កឲ្យមានអត្រាអ្នកឆ្លងជំងឺកូវីដ១៩ នៅក្នុងសហគមន៍ ដូច្នេះក្នុងឱកាសនេះ សូមលោកមេភូមិ អនុភូមិ និងសមាជិកភូមិទាំងអស់ បន្តផ្សព្វផ្សាយបន្ថែមដល់ប្រជាពលរដ្ឋនៅតាមមូលដ្ឋាន ត្រូវឲ្យមានការប្រុងប្រយ័ត្នចំពោះករណីឆ្លងថ្មីនៃជំងឺកូវីដ១៩ ទោះបីនៅក្នុងខេត្តសៀមរាប ពុំទាន់មានករណីឆ្លងថ្មី និងមានអ្នកជំងឺកូវីដ១៩ បានជាសះស្បើយជាបន្តបន្ទាប់ក៏ដោយ ក៏ត្រូវតែយកចិត្តទុកខ្ពស់ អំពីបង្ការទប់ស្កាត់ការឆ្លងរីករាលដាលនៃជំងឺនេះ។
សូមជម្រាបថា នាឱកាសនោះដែរ
លោក ទៀ សីហា បានជូនថវិកាមួុយចំនួនដល់កម្លាំង និងបានជូនគ្រឿងឧបភោគបរិភោគ និងថវិកាមួយចំនួនដល់មេភូមិ អនុភូមិ និង សមាជិកភូមិទាំងអស់ផងដែរ៕SRP

ខេត្តសៀមរាប៖លោក គុជ លីណា អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប តំណាងលោក ទៀ សីហា ប្រធានគណៈកម្មាធិការសាខា នៅព្រឹកមិញ បាននាំយកអំណោយមនុស្សធម៌ជូនប្រជាពលរដ្ឋនៅស្រុកជីក្រែងចំនួន៦៣គ្រួសារ ដែលលំនៅដ្ឋានពួកគាត់បានទទួលរងគ្រោះដោយខ្យល់កន្ត្រាក់ ក្នុងនោះនៅឃុំល្វែងឫស្សី រលំផ្ទះចំនួន២ខ្នង និងរបើកដំបូលផ្ទះចំនួន៥៥ខ្នងនិងឃុំស្ពានត្នោត របើកដំបូលផ្ទះចំនួន៦ខ្នង ដែលគ្រួសាររលំផ្ទះ ក្នុងមួយគ្រួសារទទួលបានមុង១ , ភួយ១ , សារុង១ , ក្រមា១ , កន្ទេល១ , អាវយឺត២ , ស័ង្កសី១៦សន្លឹក , មី១កេស , ត្រីខ១យួរ , អង្ករ៣០គីឡូក្រាម និងថវិកា២សែនរៀល និង គ្រួសាររបើកដំបូលផ្ទះក្នុងមួយគ្រួសារទទួលបានមុង១ , ភួយ១ , សារុង១ , ក្រមា១ , កន្ទេល១ , អាវយឺត២ , ស័ង្កសី ១០សន្លឹក , មី១កេស , ត្រីខ១យួរ , អង្ករ៣០គីឡូក្រាម និងថវិកា១សែនរៀល។
នៅក្នុងឱកាសនោះដែរ លោកអនុប្រធានគណៈកម្មាធិការសាខា បានប្រគេនទេយ្យវត្ថុមួយចំនួនដល់វត្តចំនួន២ផងដែរ នៅក្នុងស្រុកជីក្រែងនេះ មានវត្តតាអុង និងវត្តឃ្លាំងបេង ដែលក្នុងមួយវត្តប្រគេន អង្ករ៦០គីឡូក្រាម , មី២កេស ត្រីខ២យួរ , ទឹកត្រី១យួរ , ទឹកស៊ីអ៊ីវ១យួរ , ម៉ាស់២ប្រអប់ និងបច្ច័យមួយចំនួន៕SRP

ខេត្តសៀមរាប៖លោក ទៀ សីហា អភិបាលខេត្តសៀមរាប នៅព្រឹកមិញបានចុះត្រួតពិនិត្យកម្លាំងចម្រុះ
ដែលកំពុងឈរជើងនៅព្រំប្រទល់ខេត្តសៀមរាបនិងខេត្តឧត្ដរមានជ័យ ក្នុងភូមិសាស្រ្តស្រុកស្រីស្នំ។
លោកទៀ សីហា អភិបាល​ខេត្តសៀមរាប បានសម្ដែងនូវការកោតសរសើរចំពោះកងកម្លាំងចម្រុះដែលកំពុងប្រចាំការនៅគោលដៅនេះ ដែលបានយកអស់កម្លាំងកាយចិត្តបំពេញភារកិច្ច តាមតួនាទីរបស់ខ្លួនដោយស្មារតីទទួលខុសត្រូវខ្ពស់ ជាពិសេសការអនុវត្តនូវបទបញ្ជាលេខ០២ របស់រាជរដ្ឋភិបាលកម្ពុជា បានយ៉ាងខ្ជាប់ខ្ជួន ប្រកបដោយប្រសិទ្ធ​ភាព សំដៅរួមចំណែកក្នុងការទប់ស្កាត់ការឆ្លងរាលដាលជំងឺកូវីដ១៩ ខណៈដែលបច្ចុប្បន្ននេះ កំពុងកើតមានឡើងនៅលើសកលលោក បណ្ដាលឲ្យស្លាប់មនុស្សរាប់ម៉ឺននាក់ ។
អភិបាលខេត្តជួបសំណេះសំណាលជាមួយប្រជាពលរដ្ឋដែលទើបត្រឡប់
មកពីប្រទេសថៃ នៅស្រុកស្រីស្នំ ចំនួន១៧នាក់ ដែលកំពុងស្នាក់នៅដាច់ដោយឡែកក្នុងរយៈពេល១៤ថ្ងៃនៅសាលាអនុវិទ្យាល័យប្រីយ៍ ក្នុងឃុំប្រីយ៍ព្រមទាំងចែកអំណោយផងដែរ។
លោកទៀ សីហា បានផ្ដាំផ្ញើដល់បងប្អូនទាំងអស់ សូមស្ដាប់តាមការណែនាំរបស់មន្ត្រីសុខាភិបាល ព្រោះថាប្រសិនបើយើងគ្មានជំងឺ ក្រុមគ្រួសារយើង និង សហគមន៍យើង ក៏មិនមានជំងឺដែរ ដូច្នេះស្ថិតក្នុងដំណាក់កាលនៃសកលលោកកំពុងកើតមានជំងឺកូវីដ​១៩​នេះ សូមបងប្អូនទាំងអស់ត្រូវចេះអំពីវិធីការពារការឆ្លងជំងឺកូវីដ១៩ ដូចជា ៖ លាងដៃឱ្យបានញឹកញាប់ជាមួយសាប៊ូ នឹងទឹកស្អាត ឬទឹក​អាល់កុលលាងដៃ , ខ្ទប់មាត់ និងច្រមុះ នៅពេលក្អក ឬកណ្ដាស់ ដោយកន្សែង ក្រមា ក្រដាស ឬដោយកែងដៃ , ចៀសវាងប៉ះពាល់ជិតស្និទ្ធជាមួយអ្នកដែលមានគ្រុនក្ដៅ និងក្អក ឬផ្ដាសាយ , ចៀស​វាង​ប៉ះពាល់ភ្នែក ច្រមុះ ឬមាត់ , ត្រូវចម្អិនសាច់ ឬស៊ុតឱ្យបានឆ្អិនល្អ និង ចៀសវាងប៉ះពាល់ជាមួយសត្វព្រៃរស់ ឬកន្លែងចិញ្ចឹមសត្វ ដោយគ្មានពាក់សម្ភារការពារខ្លួន។
សូមបញ្ជាក់ដែរថា លោក ទៀ សីហា ក៏បានជូនថវិកាមួយចំនួនដល់កងកម្លាំងចម្រុះ និងគ្រឿងឧបភោគបរិភោគ
ដល់មេភូមិ អនុភូមិ និង សមាជិកភូមិទាំងអស់ក្នុងស្រុកស្រីស្នំ សម្រាប់ដោះស្រាយជីវភាពប្រចាំថ្ងៃ ផងដែរ៕SRP