ខេត្តសៀមរាប៖ស្ត្រីម្នាក់បានស្លាប់ភ្លាមៗ ដោយសារគ្រោះថ្នាក់ចរាចរណ៍ រវាងម៉ូតូនិងម៉ូតូ។

ហេតុការណ៍បានកើតឡើងនៅវេលាម៉ោង១៨ និង៣០ ថ្ងៃទី១៥ខែធ្នូ ឆ្នាំ២០២០ នៅលើកំណាត់ផ្លូវជាតិលេខ៦៧ ត្រង់ចំណុចភូមិឃុនរាម ឃុំឃុនរាម ស្រុកបន្ទាយស្រី ខេត្តសៀមរាប។

សមត្ថកិច្ចស្រុកបន្ទាយស្រីបានឲ្យដឹងថា ស្ត្រីដែលស្លាប់ មានឈ្មោះ រូ សុនី អាយុ៣១ឆ្នាំរស់នៅភូមិកំព្រហ្ម ឃុំឃុនរាម ស្រុកបន្ទាយស្រីខេត្តសៀមរាប។

សមត្ថកិច្ចបានបញ្ជាក់ថាករណីនេះក៏បណ្ដាលឲ្យខូចខាតម៉ូតូចំនួន២គ្រឿងផងដែរ។  មូលហេតុ ម៉ូតូc125 ពណ៌ខ្មៅពាក់ស្លាកលេខ ឧត្តរមានជ័យ1B 3652 ចតលើចញ្ចើមផ្លូវនឹងម៉ូតូពាក់ស្លាកលេខ សៀមមរាប1A 5572 បើកល្បឿនលឿនខ្វះការប្រុងប្រយ័ត្ន។

ពាក់ព័ន្ធករណីគ្រោះថ្នាក់ចរាចរណ៍នេះ អធិការនគរបាលស្រុកបន្ទាយស្រី លោកវរសេនីយ៍ឯកឡុង សំណាង មិនអាចបញ្ជាក់បំភ្លឺ បានទេ ដោយលោកថា ជាប់រវល់បើករថយន្ត បើទោះបី ជា បណ្ដាញសារព័ត៌មាន «សៀមរាបប៉ុស្តិ៍» បានព្យាយាម សុំការបំភ្លឺបន្ថែមយ៉ាងណាក៏ដោយ៕SRP

ខេត្តបាត់ដំបង៖«ដីភ្នំវត្តតាមាឃ» ត្រូវប្រជាពលរដ្ឋ រាយការណ៍ថា គ្រឿងចក្រកំពុងតែធ្វើការកាយយកអាចម៍ដី យ៉ាងគគ្រេឹកគគ្រេង ហើយកំពុងប្រឈមទៅនឹងរលាយបាត់ពីផែនដីផងដែរ។

ដីភ្នំវត្តតាមាឃ គឺស្ថិតនៅត្រង់ចំណុច ភូមិលៀវ ឃុំអណ្តើកហែប ស្រុករតនមណ្ឌល ខេត្តបាត់ដំបង។

ពលរដ្ឋថាដីភ្នំវត្តតាមាឃ នេះ ត្រូវបានគ្រឿងចក្ររបស់អង្គភាពសុីម៉ាក់ ចូលទន្ទ្រានកាយយកអាចម៍ដី ស្ទើរអស់ពាក់កណ្តាលភ្នំទៅហើយ។

ប្រជាពលរដ្ឋ រស់នៅក្បែរទៅនឹងទីតាំងខាងលើបានប្រាប់ អ្នកសារព័ត៌មាន៖ ជារៀងរាល់ថ្ងៃពួកគាត់ ឃើញរថយន្តដឹកដី ចេញពីភ្នំវត្តតាមាឃ ដោយមិនដឹងថាការដឹកជញ្ជូនកាយនោះមានលិខិតអនុញ្ញាតដែរឬយ៉ាងណានោះទេ។

ជុំវិញការកាយដី ភ្នំវត្តតាមាឃ នេះ លោក នៅ រតនា ប្រធានអង្គភាពកំចាត់មីន(សុីម៉ាក់) បានប្រាប់អ្នកសារព័ត៌មាន ថា៖ គ្រឿងចក្រខាងលើ ជារបស់អង្គភាព របស់គាត់ ហើយការចូលយកអាចម៍ដី គឺជាប្រូសេស របស់ខេត្តស្នើសុំ ហើយក្រុមហ៊ុនអភិវឌ្ឈ របស់គាត់។ គ្រឿងចក្រ នេះ មិនមែន ឯកជនទេ គឺជារបស់រដ្ឋនិងការស្នើសុំ ពីខាងភូមិ ឃុំ ស្រុក និងមានការឯកភាពពីខេត្តត្រឹមត្រូវ។ ចំណែក ការយកដីគ្រួស ទៅធ្វើផ្លូវនោះ មានប្រវែង៣០គីឡូម៉ែត្ររយ:ពេលនៃការជួសជុសផ្លូវ មួយឆ្នាំពេញ និងមានដៃគូជាមួយក្រុមហ៊ុនជប៉ុន ហើយត្រូវបញ្ចប់នៅខែ១ឆ្នាំ២០២១។

ទោះជាយ៉ាងណា លោក អ៊ាន មាឃ ប្រធានមន្ទីររ៉ែនិងថាមពលខេត្ត បានថ្លៃថា ពាក់ព័ន្ធ គ្រឿងចក្រ ចូលយកដីភ្នំ នៅចំណុច«វត្តតាមាឃ» ខាងមន្ទីរមិនទាន់ បានទទួល លិខិតស្នាម ពីខាងឃុំ ស្រុកនៅឡើយទេ។

លោកប្រធានមន្ទីរថា៖ បញ្ហានេះ លោកនឹងចាត់ឲ្យមន្ត្រី ចុះទៅពិនិត្យ មើលជាក់ស្តែងនៅព្រឹកនេះ៕SRPដោយប៊ុនថេត

ខេត្តឧត្តរមានជ័យ៖លោកឧត្តមសេនីយ៍ទោ ហួត សុធី ស្នងការ នៃស្នងការដ្ឋានគរបាលខេត្តឧត្ដរមានជ័យ បានចូលរួមឧបត្ថម្ភនូវថវិកាចំនួន ៣,០០០,០០០ រៀល (បីលានរៀល) តាមរយ: លោក ប៉ែន កុសល្យ អភិបាលខេត្តឧត្តរមានជ័យ ជូនដល់ រាជរដ្ឋាភិបាលដើម្បីទិញវ៉ាក់សាំងការពារជំងឺ COVID-19 សម្រាប់ចាក់ជូន ប្រជាពលរដ្ឋកម្ពុជា៕SRP

ខេត្តសៀមរាប៖លោកជំទាវឧកញ៉ាបណ្ឌិត លី អ៊ុំអេង អនុប្រធានសភាពាណិជ្ជកម្ម ខេត្តសៀមរាប-ឧត្តរមានជ័យ សូមចូលរួមបួងសួងជូនពរ សម្តេចកិត្តិព្រឹទ្ធបណ្ឌិត ប៊ុន រ៉ានីហ៊ុន សែន ឧត្តមភរិយា សម្តេចតេជោ ហ៊ុន សែន នាយករដ្ឋមន្រ្តី នៅក្នុងថ្ងៃខួបកំណើតគម្រប់៦៦ឆ្នាំឈានចូល៦៧ឆ្នាំ- ១៥/១២/២០២០ ។

សូមសម្ដេចកិត្តិព្រឹទ្ធបណ្ឌិត ប៊ុនរ៉ានី​ ហ៊ុនសែន​ ព្រមទាំងសម្ដេចអគ្គមហាសេនាបតីតេជោ​ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងបុត្រា-បុត្រី ចៅប្រុស-ចៅស្រីជាទីស្រទ្បាញ់ទាំងអស់ជួបតែសុភមង្គល វិបុលសុខ គ្រប់ប្រការ និងប្រកបដោយពុទ្ធពរ ទាំងបួនប្រការគឺ៖ អាយុ វណ្ណះ សុខះ ពលះកុំបីឃ្លៀងឃ្លាតទ្បើយ ។

សូមគោរពជូនពរពី លោកជំទាវ ឧកញ៉ា បណ្ឌិត លី អ៊ុំអេង អនុប្រធានសភាពាណិជ្ជកម្ម ខេត្តសៀមរាប-ឧត្តរមានជ័យ៕SRP

ខេត្តកំពង់ចាម៖ឯកឧត្តម​ អ៊ុន ចាន់ដា​ អភិបាលខេត្តកំពង់ចាម និងជាប្រធានសាខាកាកបាទក្រហមកម្ពុជា ខេត្តកំពង់ចាម ព្រមទាំងសមាជិក-សមាជិកាទាំងអស់ សូមសម្ដែងនូវអំណរសាទរឥតឧបមា ក្នុងថ្ងៃចម្រើនជន្មាយុរបស់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា គម្រប់ ៦៦ឆ្នាំ ឈានចូល ៦៧ឆ្នាំ ដែលប្រព្រឹត្តទៅនាថ្ងៃទី១៥ ខែធ្នូ ឆ្នាំ២០២០នេះ។

នាឱកាសដ៏ប្រពៃថ្លៃថ្លាប្រកបដោយក្ដីសោមនស្សរីករាយនេះ យើងខ្ញុំទាំងអស់គ្នា សូមគោរពជូនពរ សម្តេចកិត្តិព្រឹទ្ធបណ្ឌិត សូមបានប្រកបដោយសុខភាពល្អបរិបូរណ៍ បញ្ញាញាណភ្លឺថ្លា កម្លាំងពលំមាំមួន អាយុយឺនយូរ ដើម្បីបន្តដឹកនាំកាកបាទក្រហមកម្ពុជា ទទួលបាននូវជ័យជំនះថ្មីៗធំធេងថែមទៀត ជាពិសេសការស្វះស្វែងរក ជំនួយមនុស្សធម៌ពីគ្រប់មជ្ឈដ្ឋានជាតិ និងអន្តរជាតិ ដើម្បីជួយដល់ជនងាយរងគ្រោះ ទុរគតជន ជនចាស់ជរា កុមារកំព្រា ជនគរថ្លង់ យុទ្ធជន របួស ជនពិការ ព្រមទាំងជនរងគ្រោះដោយសារគ្រោះមហន្តរាយ និងគ្រោះធម្មជាតិផ្សេងៗ។

ជាថ្មីម្ដងទៀត យើងខ្ញុំទាំងអស់គ្នា សូមលំឱនកាយវាចាចិត្តលើកហត្ថប្រណមបួងសួងដល់ គុណបុណ្យព្រះរតនត្រ័យ វត្ថុស័ក្តិសិទ្ធិទាំងឡាយក្នុងលោក សូមជួយបីបាច់ថែរក្សា និងប្រោះព្រំសព្ទសាធុការពរ សិរីសួស្ដីជ័យមង្គលបវរមហាប្រសើរជូនចំពោះ សម្តេចកិត្តិព្រឹទ្ធបណ្ឌិត និង សម្តេចតេជោ នាយករដ្ឋមន្រ្តី ព្រមទាំងបុត្រា-បុត្រី និងចៅប្រុស-ចៅស្រីជាទីស្រឡាញ់ទាំងអស់ សូមបានប្រកបនូវពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ ជានិច្ចនិរន្តរ៍៕SRP

លោកឧត្តមសេនីយ៍ត្រី អ៊ុំ អមរា ស្នងការរងខេត្តសៀមរាប ទទួលផែនការងារ ប្រឆាំងគ្រឿងញៀន សូមបួងសួងដល់វត្ថុសក្តិសិទ្ធិក្នុងលោក តាមបីបាច់ថែរក្សា និងប្រសិទ្ធពរជ័យ សិរីមង្គល បវរមហាប្រសើរ ជូនសម្តេច​កិត្តិ​ព្រឹទ្ធបណ្ឌិត ប៊ុន រ៉ានី ហ៊ុន សែន ប្រធាន​កាកបាទក្រហមកម្ពុជា ក្នុងឱកាសបុណ្យខួបកំណើតគម្រប់ ៦៦ ឈានចូល ៦៧ឆ្នាំ៕SRP

ខេត្តកំពង់ចាម៖នៅព្រឹកថ្ងៃទី១៥ ខែធ្នូ​ ឆ្នាំ​២០២០​នេះ​ លោក​ឧត្ដមសេនីយ៍​ទោ​ ឯម​ កុសល​ ស្នងការ​នគរបាល​ខេត្ត​កំពង់ចាម​ និង​សហការី​​ បាន​នាំយក​នូវថវិកា​ ចំនួន​១១.២៥០.០០០៛ (ដប់មួយលានម្ភៃប្រាំម៉ឺនរៀល) ប្រគល់​ជូន​លោក​ អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មការខេត្តប្រយុទ្ធប្រឆាំងនឹងជំងឺកូវីដ-១៩ ដើម្បីចូលរួមទិញវ៉ាក់សាំងកូវី-១៩ សម្រាប់​ចាក់ជូនប្រជាពលរដ្ឋ កម្ពុជាដោយឥតគិតថ្លៃ។

ការឧបត្ថម្ភនេះ ដើម្បីចូលរួមជាមួយ សម្តេច ហ៊ុន​ សែន​ នាយករដ្ឋមន្ត្រី​នៃ​កម្ពុជា​ ក្នុងការ​ប្រយុទ្ធ​ប្រឆាំងនឹងជំងឺកូវីដ-១៩។

លោក​​ អ៊ុន​ ចាន់ដា​ បាន​ថ្លែង​អរគុណ​យ៉ាង​ជ្រាលជ្រៅ​​​ ចំពោះថ្នាក់ដឹកនាំ ក៏ដូចជា​កងកម្លាំង​នគរបាល​ ខេត្តកំពង់ចាមទាំងអស់ ដែលបាន​ចូលរួមយ៉ាងសកម្មក្នុងការប្រយុទ្ធប្រឆាំងនឹងការរីករាលដាលនៃ​ជំងឺ​កូវីដ១៩​ ព្រមទាំង​បានឧបត្ថម្ភ​ នូវថវិកា ​ដេីម្បី​ទិញ​វ៉ាក់សាំង​កូវីដ-១៩​ រួម​ជាមួយ​ការ​អនុវត្តតួនាទីភារកិច្ច ក្នុងការថែរក្សាសន្តិសុខ សណ្តាប់ធ្នាប់សាធារណៈ​ ជូន​ប្រជាពលរដ្ឋ​ បានល្អប្រសើរផងដែរ។

គួរ​បញ្ជាក់​ផង​ដែរ​ថា សម្តេហ៊ុន សែន​ កាលពី​ល្ងាចថ្ងៃទី០៧ ខែធ្នូ ឆ្នាំ២០២០​ បានប្រកាសពីការត្រៀមបម្រុងថវិកា សម្រាប់ទិញវ៉ាក់សាំងយកមកចាក់ ជូនប្រជាជនដោយឥតគិតថ្លៃ ជាជំហានដំបូងចំនួន ១លានដូស ដើម្បីចាក់ជូនដល់ប្រជាពលរដ្ឋប្រមាណ ៥០ម៉ឺននាក់​៕SRP

ខេត្តសៀមរាប៖មន្ត្រីយោធាម្នាក់ បានសម្រេចចិត្ត«ចងក» សម្លាប់ខ្លួនបង្កឲ្យមានការភ្ញាក់ផ្អើលយ៉ាងខ្លាំង។ _ហេតុកាណ៍បានកើតឡើងនៅថ្ងៃទី១៥ ខែធ្នូ ឆ្នាំ២០២០  វេលាម៉ោង១០និង៣០នាទីព្រឹក ចំណុចភូមិអំពិលពាម ឃុំខ្នាត ស្រុកពួក ខេត្តសៀមរាប។

សមត្ថកិច្ចស្រុកពួកបានឲ្យដឹងថាជនរងគ្រោះ មានឈ្មោះ សុខ រុន ភេទ ប្រុស អាយុ២៨ឆ្នាំ រស់នៅភូមិអំពិលពាម ឃុំខ្នាត ស្រុកពួក ខេត្តសៀមរាប មុខរបរយោធា នៅអង្គភាពកងពលធំលេខ០២ កងពលតូចអន្តរាគមន៍លេខ០៤។

សមត្ថកិច្ចបានបន្តថាតាមការពិនិត្យលើ សាកសព គឺជនរងគ្រោះ បាន«ចងក» នៅដើមឬស្សីខាងកើតផ្ទះប្រហែល២៥ម៉ែត្រ កម្ពស់១.៨០សង់ទីម៉ែត្រពីដី ដោយចងនឹងខ្សែភ្លើងពណ៌ខ្មៅឆ្នួតបៃតង ប្រវែង១.៨០សងទីម៉ែត្រ។ មូលហេតុ ជនរងគ្រោះ សង្ស័យផឹកស្រាជាប្រចាំនិងអាចលេបថ្នាំសសៃប្រាសាទផងដែរ។ ទោះយ៉ាងណា  . ជំនាញបញ្ជាក់ថាពុំមានពាក់ព័ន្ធនិងបទល្មើសព្រហ្មទណ្ឌឡើយ៕SRP

ភ្នំពេញ៖មានការលើកឡើងថាការដឹកជញ្ជូនទំនិញគ្រប់ប្រភេទ គឺមានក្រុមហ៊ុន និងឈ្មួញជាច្រើន បានបង្វែរទិសដៅ ទៅតាមច្រកបាវិត ខេត្តស្វាយរៀង ខណៈការម៉ៅក្នុងការដឹកជញ្ជូន តម្លៃក្នុងមួយកុងតឺន័រ ថោកជាងគេ ចាប់ពី១៥០០ដុល្លារ ដល់២០០០ដុល្លារ(បញ្ចុះសេវារត់ការ) នេះជាការលើកឡើងពីក្រុមឃ្លាទំនិញ ។

ប្រភពបានរាយការណ៍មកថា៖ ចំពោះបញ្ហាដឹកជញ្ជូនទំនិញ ឆ្លងកាត់ច្រកអន្តរជាតិបាវិត ខេត្តស្វាយរៀង ទោះជាមានការបង់ពន្ធត្រឹមត្រូវក៏ពិតមែន។ ក៏ប៉ុន្តែតើមានទំនិញមួយចំនួនធំ បានលោតឆ័ត្រតាមច្រករបៀង ដែលគេដាក់ភាពសង្ស័យថា ជាអំពើរត់ពន្ធទាំងនេះ គឺជាប្រភពសេដ្ឋកិច្ចយ៉ាងច្រើន សម្រាប់បុគ្គល លោក ផែន ភឿន ប្រធានការិយាល័យស្រាវជ្រាវអំពើរត់ពន្ធតំបន់២ នៃអគ្គនាយកដ្ឋានគយនិងរដ្ឋាករ កម្ពុជា។

សូមបញ្ជាក់ថា៖លោក ផែន ភឿន ប្រធានការិយាល័យស្រាវជ្រាវ អំពើរត់ពន្ធតំបន់ ២ គឺបានគ្រប់គ្រងទៅលើខេត្តជាច្រើនដូចជា៖ ខេត្តស្វាយរៀង ខេត្តកណ្ដាល ខេត្តតាកែវ ខេត្តព្រៃវែង និងខេត្តមួយទៀត។

ទន្ទឹមនឹងឥទ្ធិពល ក្នុងការគ្រប់គ្រង តាមបណ្តាខេត្តទាំងនោះ ក៏មានការលេចឮថា លោក ផែន ភឿន ឆ្លៀតរកឱកាស ដើម្បីប្រមូលសេដ្ឋកិច្ចពីការដឹកជញ្ជូនទំនិញបង់ពន្ធស្របច្បាប់ ទំនិញពាក់កណ្ដាលគេចពន្ធ និងទំនិញរត់ពន្ធ។ បើទោះជាគេមិនបានបញ្ជាក់អំពីតួលេខពិតប្រាកដយ៉ាងណាក៏ដោយ ប៉ុន្តែមានអ្នកដឹកទំនិញខ្លះលួចបង្ហើបថា បើទំនិញដែលបានបង់ពន្ធរួចហើយក៏ដោយ នៅតែបង់ប្រាក់ឱ្យលោកផែនខ្លួន ក្នុងមួយឡានចំនួន ១០០ដុល្លារទៅ ១៥០ដុល្លារ។ ដោយឡែកចំពោះការដឹកជញ្ជូនទំនិញ ចាក់ទុកថាលោតឆ័ត្រ ឬប្រកាសពន្ធប្រភេទអេឡិចត្រូនិច ប្រភេទទំនិញនាំចូលបង់ពន្ធថ្លៃ តែបង់ពន្ធប្រភេទជាកែវជ័រ ចាប់ហួយ ជាវសំឡីអនាម័យ ក្រដាសអនាម័យ នោះគឺលោក ផែន ភឿន បានតម្រូវឱ្យបង់ក្នុងមួយឡាន យ៉ាងតិចចាប់ពី ៣០០ដុល្លារ ទៅ ៥០០ដុល្លារ។ ក្នុងនោះការបង្កប់ដឹកប្រេងម៉ាស៊ីនច្រើនផងដែរ។ ប៉ុន្តែចំពោះការដឹកជញ្ជូនទំនិញ ដែលបានបង់ពន្ធពិតប្រាកដ គេក៏ឆ្ងល់ថា ហេតុអី្វក៏លោក ផែន ភឿន នៅតែទទួលបាន សេវាបង់ថ្លៃក្បាលឡានក្នុងមួយឡាន ១០០ដុល្លារទៅ ១៥០ដុល្លារ នេះជាចំណុចមួយ ក្លាយជាចម្ងល់សង្ស័យថា ការដឹកជញ្ជូននេះ បង់ពន្ធពិតប្រាកដក៏ដោយ តែអាចបង់ពន្ធមិនគ្រប់ ឬបង់ពន្ធក្លែងភេទទំនិញ ប្រកាស(គោ) បង់ពន្ធ( កណ្ដុរ)ក៏អាចថាបាន។

ក្រុមឈ្មួញបានលើកឡើងថា មួយរយៈចុងក្រោយនេះ គឺមានទំនិញច្រើន ត្រូវឆ្លងកាត់ក្នុងតំបន់ដែល លោក ផែន ភឿន គ្រប់គ្រង ទាំងខេត្តស្វាយរៀង ខេត្តព្រៃវែង ខេត្តកណ្ដាល ខេត្តតាកែវ នឹងខេត្តមួយចំនួនទៀត មានទាំងទំនិញតាមផ្លូវគោក និងតាមផ្លូវទឹក។ អ្នកដឹកជញ្ជូនទំនិញចៀសមិនផុតទេ ពីការបង់ប្រាក់ឱ្យលោក ផែន ភឿន ដែលជាមេគយ ដ៏ចាស់វស្សា និងប្រមូលសេដ្ឋកិច្ចនោះទេ។

ដូច្នេះលោក បណ្ឌិត គុណ ញឹម ប្រតិភូរាជរដ្ឋាភិបាល ទទួលបន្ទុកអគ្គនាយក នៃអគ្គនាយកគយនិងរដ្ឋាករកម្ពុជា សុំជួយពិនិត្យមើល ភាពមិនប្រក្រតី របស់ លោកផែន ភឿន ប្រធានការិយាល័យស្រាវជ្រាវ អំពើរត់ពន្ធតំបន់២ផង។

ជុំវិញការលើកឡើងនេះ បណ្ដាញសៀមរាបប៉ុស្ដិ៍ នៅមិនទាន់ទទួលបានការបកស្រាយបំភ្លឺពីលោកផែន ភឿន ប្រធានការិយាល័យស្រាវជ្រាវអំពើរត់ពន្ធតំបន់២ នៅឡើយទេ ដោយមិនមានលេខទំនាក់ទំនង។ ប៉ុន្តែលោកធ្លាប់បានប្រាប់សារព័ត៌មានក្នុងស្រុកមួយ កាលពីរសៀលថ្ងៃទី៦ ខែធ្នូ ឆ្នាំ ២០២០ តាមទូរស័ព្ទយ៉ាងដូច្នេះថា៖ «ខ្ញុំគ្មានធ្វើចឹងៗ យកលុយពីគេទេ កុំជឿគេចោទប្រកាន់មកលើខ្ញុំ»……រួចក៏បិទទូរស័ព្ទ ខលលែងចូលតែម្តង៕SRP

ខេត្តសៀមរាប៖បុរសម្នាក់ត្រូវបានសមត្ថកិច្ចចាប់ខ្លួនពាក់ព័ន្ធ អំពើលួចដោយមានស្ថានទម្ងន់ទោស។ ហេតុការណ៍ វាយយកម៉ូតូ នៅវេលាម៉ោង ១៤និង៣០នាទី ថ្ងៃទី១៣ ខែធ្នូ ឆ្នាំ២០២០ នៅចំណុចភូមិអញ្ចាញ សង្កាត់នគរធំ ក្រុងសៀមរាប ខេត្តសៀមរាប។ ការចាប់ខ្លួនធ្វើឡើង នៅវេលាម៉ោង ១១និង៣០នាទី ថ្ងៃទី១៤ ខែធ្នូ ឆ្នាំ២០២០ ម្សិលមិញ នៅចំណុចភូមិដូង ឃុំបឹងរាំង ស្រុកកំរៀង ខេត្តបាត់ដំបង ខណៈជិះម៉ូតូ ដែលវាយយកពី ជនរងគ្រោះ គេចខ្លួនពីខេត្តសៀមរាប។

លោកអនុសេនីយ៍ទោ សៀក សោភា នាយការិយាល័យព្រហ្មទណ្ឌ កងរាជអាវុធហត្ថ ខេត្តសៀមរាប បានឲ្យដឹងថាក្រោយពីបានទទួលពាក្យបណ្តឹង ពីជនរងគ្រោះ ដោយបានទទួលបទបញ្ជាពីលោកឧត្តមសេនីយ៍ត្រី ប៉ោ វណ្ណនិត មេបញ្ជាការកងរាជអាវុធហត្ថខេត្តសៀមរាប និងលោក វរសេនីយ៍ឯក ថា ដាលុច មេបញ្ជាការរងទទួលការងារស្រាវជ្រាវ និងបង្ក្រាបបទល្មើស បានបញ្ជាផ្ទាល់មកកម្លាំង ជំនាញ ការិយាល័យព្រហ្មទណ្ឌ ឲ្យចុះស្រាវជា្រវស៊ើបអង្កេតបទល្មើសជាក់ស្តែង នឹង ដោយមានការសម្របសម្រួលពី លោក កើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាប និងលោក គឺ ប៊ុណ្ណារ៉ា ព្រះរាជអាជ្ញាអមសាលាដំបូងខេត្តបាត់ដំបង លោកបានដឹកនាំកម្លាំងសហការ ជាមួយកម្លាំងជំនាញ មូលដ្ឋានកងរាជអាវុធហត្ថ ស្រុកកំរៀង នៃកងរាជអាវុធហត្ថខេត្តបាត់ដំបង ឈានដល់ការចាប់ខ្លួន បុរសរូបនេះ មានឈ្មោះ ហុន វិជាតិ អាយុ៤៣ឆ្នាំ មុខរបរ មិនពិតប្រាកដ មានទីលំនៅបច្ចុប្បន្ន ភូមិបឹងដូបប៉ា សង្កាត់ស្លក្រាម ក្រុងសៀមរាប ខេត្តសៀមរាប។

លោកបានបន្តថាក្រោយពីបានសាកសួរ ជនសង្ស័យ បានសារភាពថា ខ្លួនពិតជាបានវាយជនរងគ្រោះ យកម៉ូតូពិតប្រាកដមែន។ ជាមួយគ្នានេះ ដកហូតវត្ថុតាងរួមមាន៖ ១.ម៉ូតូ០១គ្រឿង ម៉ាកហុងដាឌ្រីម សេ១២៥ សេរីឆ្នាំ២០០៧ ពណ៌ខ្មៅ លេខតួ+លេខម៉ាស៊ីន ៨១៩៦៨៧៦ ពាក់ស្លាកលេខ សៀមរាប ១B-៨៧៧៧ (ម៉ូតូដែលជនសង្ស័យវាយកពីជនរងគ្រោះ)។

បច្ចុប្បន្ន៖ កម្លាំងមូលដ្ឋានកងរាជអាវុធហត្ថ ស្រុកកំរៀង បានប្រគល់ជនសង្ស័យ និងវត្ថុតាង ឲ្យការិយាល័យព្រហ្មទណ្ឌកងរាជអាវុធហត្ថខេត្តសៀមរាប ដើម្បីបន្តអនុវត្តន៍តាមនីតិវិធី៕SRP

ភ្នំពេញ៖ក្រសួងមហាផ្ទៃ នៅថ្ងៃទី១៥ ខែធ្នូ ឆ្នាំ២០២០ នេះ បានចេញសេចក្តីប្រកាសមួយ អនុញ្ញាតឲ្យ មន្ត្រី ថ្នាក់ដឹកនាំ មន្ត្រីរាជការស៊ីវិល មន្ត្រីនគរបាលជាតិ និងមន្ត្រីពន្ធនាគារ ដែលបម្រើការងារ ក្នុងបរិវេណទីស្តីការក្រសួងមហាផ្ទៃ ចាប់ពីថ្ងៃទី១៥ ខែធ្នូ ឆ្នាំ២០២០នេះតទៅ សម្រាប់ថ្នាក់ដឹកនាំ និងមន្ត្រីដែលបានធ្វើតេស្ត៣លើករួចរាល់ ហើយអវិជ្ជមានកូវីដ១៩។

ក្រសួងក៏បានណែនាំដល់ថ្នាក់ដឹកនាំ និងមន្ត្រីដែលចូលធ្វើការ ត្រូវធ្វើអនាម័យក្នុងជីវភាពរស់នៅប្រចាំថ្ងៃ និងនៅកន្លែងធ្វើការ ដោយអនុវត្តវិធានការការពារជំងឺកូវីដ១៩ ឲ្យបានត្រឹមត្រូវ ហ្មត់ចត់បំផុត តាមគោលការណ៍ណែនាំរបស់ក្រសួងសុខាភិបាល ជាពិសេសការពាក់ម៉ាស់ ការលាងសម្អាតដៃឲ្យបានញឹកញាប់ និងរក្សាគម្លាតសុវត្ថិភាពបុគ្គល។

សូមជម្រាបថា ក្រសួងមហាផ្ទៃ បានបិទការចេញ-ចូល មួយរយៈបន្ទាប់មានផ្ទុះព្រឹត្តិការណ៍២៨វិច្ឆិកា ដើម្បីបាញ់ថ្នាំការពារ ទប់ស្កាត់ ការឆ្លងរីករាលដាលកូវីដ១៩ ក្នុងលក្ខណៈឆ្លងសហគមន៍។

ជាមួយគ្នានេះ ក្រសួងក៏បានណែនាំក្រើនរំលឹកចំពោះថ្នាក់ដឹកនាំ មន្ត្រីរាជការស៊ីវិល មន្ត្រីនគរបាលជាតិ និងមន្ត្រីពន្ធនាគារ ត្រូវបន្តធ្វើចត្តាឡីស័កឲ្យបានត្រឹមត្រូវហ្មត់ចត់បំផុត ហើយត្រូវមកធ្វើតេស្តជាលើកទី៣ ជាបន្តទៀត ដែលកំណត់កាលបរិច្ឆេទ និងពេលវេលាដោយក្រសួងសុខាភិបាល៕SRP