ខេត្តសៀមរាប៖លោក សូរ ប្លាតុង ប្រធានគណៈកម្មាធិការ អនុសាខា កាកបាទក្រហមកម្ពុជាស្រុកប្រាសាទបាគង នៅថ្ងៃទី ១៧ ខែធ្នូ ឆ្នាំ ២០២០ បានដឹកនាំក្រុមការងាររបស់អនុសាខា និងមានការអញ្ជើញចូលរួមពីអាជ្ញាធរភូមិ ឃុំ សប្បុរសជន បានចុះសំដែងសាកសួរសុខ ទុក្ខ និងនាំយកនូវទេយ្យវត្ថុនិងថវិកាប្រគេនដល់ព្រះគ្រូចៅអធិការវត្តគគីរ ស្ថិតនៅភូមិស្រិតខាងលិច ឃុំកន្ទ្រាំងស្រុកប្រាសាទបាគង ដែលវត្តព្រះអង្គអគ្គិភ័យបាន ឆាបឆេះ កុដិ០១ខ្នងទំហំ៦មx៩ម កំពស់ ៥ម ធ្វើពីឈើ ប្រក់ស៊ីប្រូ កាលពីយប់ថ្ងៃទី១៤ ខែធ្នូ ឆ្នាំ២០២០ វេលាម៉ោង ២១:១៥ នាទី។

ក្នុងឱកាសនោះដែរ លោកប្រធាននិងក្រុមការងារ បានចូលរួមសោកស្តាយយ៉ាងខ្លាំងចំពោះឧបទ្ទវហេតុអគ្គិភ័យខាងលើ ដែលបណ្តាលឲ្យកុដិ០១ខ្នង ឆេះអស់ទាំងស្រុង ដែលជាបាត់បង់ សមិទ្ធផលដ៏ចំណាស់មួយ បន្សល់ទុកតាំងពីជំនាន់ចៅអធិការវត្តមុនៗ ហើយ លោកប្រធានក៏បានពាំនាំនូវប្រសាសន៍ផ្តាំផ្ញើ សួរសុខទុក្ខ របស់ឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជាខេត្តផងដែរថា បន្ទាប់ពី ឯក ឧត្តម បានដឹងដំណឹងនេះតាមរយ:ខ្ញុំព្រះករុណា ឯកឧត្តមប្រធាន ក៏មានការចូលរួម សោកស្តាយ ជាខ្លាំងផងដែរ និងចាត់ឲ្យក្រុមការងារអនុសាខាស្រុកចុះ ជួបសុខទុក្ខ និងនាំយកសម្ភារៈប្រគេនភ្លាមៗ ព្រោះអាធាតុត្រជាក់ បារម្ភព្រះកាយរបស់សង្ឃគ្រប់ព្រះអង្គ មិនមានបច្ច័យ៤ប្រើប្រាស់គ្រប់គ្រាន់។

លោកប្រធានបានបន្ត ទៀតថា ទេយ្យវត្ថុនិងថវិកា ដែលបាននាំយកមក ប្រគេននាពេលនេះ គឺជារបស់សាខាកាកបាទក្រហមកម្ពុជាខេត្ត អនុសាខាកាកបាទក្រហមកម្ពុជាស្រុក រដ្ឋបាលស្រុក និងសប្បុរសជនក្នុងស្រុក ដែលបានបរិច្ចាគ ដើម្បីប្រគេនចំពោះព្រះ សង្ឃផ្ទាល់ សម្រួល ទុក្ខ លំបាក ក្នុងកិច្ចការងារព្រះសង្ឃនាពេលនេះ។

សម្ភារគ្រឿងឧបភោគបរិភោគ និងថវិកា ប្រគេនចំពោះព្រះសង្ឃរួមមាន៖

សម្ភារនិងគ្រឿងឧបភោគបរិភោគ៖
របស់សាខាកាកបាទក្រហមកម្ពុជាខេត្ត: អង្ករ ៦០គក្រ ភួយ២ ត្រីខ២យួរ មុង២ មី២កេស កន្ទេល២។
របស់រដ្ឋបាលស្រុក៖ មុង១០ ត្រីខ៥យួរ អង្ករ៥០ គក្រ ទឹកសុទ្ធ២កេស ភួយ៥
ថវិកា៖សរុប ១,៧១០,០០០រៀលក្នុងនោះ
– អនុសាខា ២០០,០០០រៀល
– លោក សូរ ប្លាតុង ២០០,០០០រៀល
– លោក ឌឿន ង៉ិក ៥០០,០០០រៀល
– លោក ឈួន លន់ ៤០,០០០រៀល
– លោក ស៊ី ហុង ៤០,០០០រៀល
– លោក ប្រាក់ លំអង ៥០,០០០រៀល
– លោក តាន់ វិច្ឆិកា រង្សី ៣០,០០០រៀល
– លោក ហ៊ីង ហាក់ ៥០,០០០រៀល
– លោក សុមន៍ សុវណ្ណ ២៥០,០០០រៀល
– លោក សុង លាងឆាយ ២៥០,០០០រៀល
– លោក ឃាម ឆាង ៥០,០០០រៀល និង
– សមាគមនារីស្រុក ៥០,០០០រៀល៕SRP

ខេត្តព្រៃវែង៖រឿងអាស្រូវពុករលួយរបស់ លោក យូ ស៊ីឡិ ប្រធានការិយាល័យសុខាភិបាល ស្រុកប្រតិបត្តិព្រះស្ដេច ខេត្តព្រៃវែង និងបក្សពួក ត្រូវមន្ត្រីក្រោមឱវាទចំនួន១៦នាក់ នៅមន្ទីរពេទ្យបង្អែក ស្រុកព្រះស្ដេច នាំគ្នាផ្ដិតមេដៃប្ដឹងជាចំហរ បើកមុខ  ទៅ សម្ដេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ ដើម្បីឱ្យចាត់វិធានការ ចំពោះលោក យូ ស៊ីឡិ ដែលបានដឹកនាំ ប្រកាន់បក្ខពួកគ្រួសារនិយម ប្រព្រឹត្តអំពើពុករលួយ គាបយកលុយពីអ្នកជំងឺ និងស៊ីដាច់លុយ របបការងារកូនចៅជាដើម។ល។

ក្នុងលិខគោរពជូន សម្ដេចក្រឡាហោម៖ដែលធ្វើឡើង កាលពីថ្ងៃទី១៥ខែធ្នូ ឆ្នាំ២០២០
ដោយមានភ្ជាប់ស្នាមមេដៃ មន្ត្រីពេទ្យបង្អែកស្រុកព្រះស្ដេច ចំនួន១៦នាក់ ដែលបណ្ដាញសារព័ត៌មាន ទទួលបាននៅថ្ងៃទី១៧
ធ្នូនេះ ថា៖ ក្រុមគ្រូពេទ្យបានស្នើសុំឱ្យសម្ដេចក្រហោម ស ខេង ជួយពិនិត្យ និងចាត់វិធានការចំពោះលោក យូ ស៊ីឡិ ជាប្រធានការិយាល័យសុខាភិបាលស្រុកប្រតិបត្តិព្រះស្ដេច ដែលបានដឹកនាំង្កើតបក្ខពួកនិយម ក្នុងមន្ទីរពេទ្យបង្អែកស្រុកព្រះស្ដេច រួមមាន៖

ទី១៖លោក យូ ស៊ីឡិ ប្រធានODស្រុកព្រះស្ដេច។

២៖លោក យូ ស៊ីណា ប្រធានមន្ទីរពេទ្យបង្អែកស្រុកព្រះស្ដេចត្រូវជា(បងបង្កើតរបស់លោក យូ ស៊ីឡិ)។

៣៖លោក ហាស់ ចំរើន អនុប្រធានប្រធានមន្ទីរពេទ្យបង្អែកស្រុកព្រះស្ដេច។

៤៖លោក ឌៀប សាវរ័ត្ន គណនេយ្យមន្ទីរពេទ្យបង្អែកស្រុកព្រះស្ដេច។

៥៖លោក ជួប សេងវន្នី ទទួលបន្ទុកផ្នែកព័ត៌មានមន្ទីរពេទ្យបង្អែកស្រុកព្រះស្ដេច។

៦៖អៀង ចន្ទរិទ្ធិ ប្រធានរដ្ឋបាលមន្ទីរពេទ្យបង្អែកស្រុកព្រះស្ដេច។

លិខិតនោះបានបញ្ជាក់ទៀតថា៖ អ្នកទាំង៦នាក់ខាងលើ បានឃុបឃិតគ្នាប្រព្រឹត្តអំពើពុករលួយធ្ងន់ធ្ងរ និងកេងប្រវ័ញ្ចលុយក្នុងមន្ទីរពេទ្យ។ រួមមានលុយ.ប.ស.ស.ដែលទូទាត់ថ្លៃសេវាព្យាបាល.មន្ត្រីរាជការ កម្មករ កម្មការិនី និយោជិក កងកម្លាំងប្រដាប់អាវុធ។
ជាសមាជិកបេឡាជាតិ របបសន្តិសុខសង្គម មិនដែលចែកអោយបុគ្គលិកទេ។ ខណៈពួកខ្លួនខិតខំថែទាំព្យាបាល និងផ្ដល់សេវាកម្មដល់អ្នកជំងឺ ក៏ដូចជាអ្នកមកទទួលសេវា ចាប់តាំងពីឆ្នាំ២០១៨ រហូតមកដល់បច្ចុប្បន្ន។ មិនតែប៉ុណ្ណោះ សូម្បីតែលុយក្បាលកូន ដែលសម្ដេច កិត្តិព្រឹទ្ធិបណ្ឌិត ប៊ុន រ៉ានី ហ៊ុន សែន ឧបត្ថម្ភដល់ពេទ្យឆ្មប ក្នុង១ករណី៤០.០០០រៀល តែជាក់ស្ដែងទទួលបានតែ១៦.០០០រៀលតែប៉ុណ្ណោះ។

រីឯប្រាក់ចំណូលដែលបានពីការព្យាបាលជំងឺ ក្នុងមន្ទីរពេទ្យ ០១%សម្រាប់បង់ជូនរដ្ឋ ។
៣៩% សម្រាប់ផ្គត់ផ្គង់ក្នុងមន្ទីរពេទ្យ និង៦០% សម្រាប់បែងចែកដល់បុគ្គលិក។ ប៉ុន្តែជាក់ស្ដែងពួកគេពុំបានបែងចែងឱ្យបុគ្គលិកគ្រប់តាមលក្ខ័ណ្ឌ៦០%នោះទេ។ លើសជាងនេះទៅទៀត លុយវាយតម្លៃប្រចាំត្រីមាស១០០% ដែលមន្ទីរពេទ្យទទួលបាន។ គឺត្រូវបែងចែងឱ្យបុគ្គលិក៨០% និង២០%សម្រាប់ដំណើរការផ្គត់ផ្គង់មន្ទីរពេទ្យ។ លុះជាក់ស្ដែង៖ ពួកគេមិនដែលបែងចែក តាមការកំណត់របស់ក្រសួងសុខាភិបាលឡើយ។ ខណៈពួកគេរៀបគម្រោងធ្វើតារាង២ផ្សេងគ្នា ១ច្បាប់សម្រាប់ទុកឱ្យមន្ទីរសុខាភិបាលត្រួតពិនិត្យ។ រីឯ១ច្បាប់ទៀត ទុកបែងចែកដល់បុគ្គលិក ដែលតារាងទាំង២ច្បាប់នេះ មានតួរលេខខុសគ្នា ។

ចំពោះលុយរបស់មន្ទីរពេទ្យ(៦២០២៨).២៥០លានរៀល ក្នុង១ឆ្នាំៗ ដែលក្រសួងផ្ដល់ឱ្យ។ គឺក្រុមលោក យូ ស៊ីឡិ បានធ្វើវិក្កយបត្រក្លែងក្លាយ ដើម្បីកិបកេងលុយទាំងនោះទុកចែកបក្ខពួកខ្លួន។ ដោយមិនយកមកទិញសម្ភារៈប្រើប្រាស់ក្នុងមន្ទីរពេទ្យឡើយ។

លើសជាងនេះទៅទៀតលោក យូ ស៊ីឡិ បានជ្រើសរើសមន្ត្រីជាប់កិច្ចសន្យា(មន្ត្រីខ្មោច)ចំនួន៤នាក់ ដែលមានតែឈ្មោះ ប៉ុន្តែមិនមកបម្រើការងារ ដើម្បីកិបកេងផលប្រយោជន៍ផ្ទាល់ខ្លួន។ ទង្វើបែបនេះវាបានផ្ទុយទៅនិងគោលការរបស់ក្រសួងសុខាភិបាល យោងតាមអនុក្រឹត្យលេខ៦៥.អ.ន.ក្រ-ប.ក.ចុះថ្ងៃទី០១.ខែមេសាឆ្នាំ២០១៦ របស់រាជរដ្ឋាភិបាល។ ស្ដីអំពីការគ្រប់គ្រងមន្ត្រីរាជការស៊ីវិលនិងមន្ត្រីជាប់កិច្ចសន្យា គឺមិនអនុញ្ញាតឱ្យប្រធានអង្គភាព ឬមន្ត្រីណាម្នាក់កាត់ប្រាក់បៀវត្ស.ម៉ោងយាម.ប្រាក់សម្រាលកូន.ប្រាក់ប៉ះពាល់សុខភាព.របស់បុគ្គលិក.និងលាភសការៈផ្សេងៗរបស់មន្ត្រីរាជការបានឡើយ។

ក្នុងករណីមានពាក្យបណ្ដឹងណាមួយនៅពេលស្ថាប័នមានសមត្ថកិច្ច ហើយរកឃើញថា៖ ប្រធានអង្គភាព ឬមន្ត្រីបានប្រព្រឹត្តកំហុសឆ្លងដូចខាងលើ.គឺនិងត្រូវទទួលខុសត្រូវចំពោះមុខច្បាប់ជាធរមាន។

ជុំវិញការចោទប្រកាន់នេះ សៀមរាបប៉ុស្តិ៍មិនទាន់ទទួលបានការបំភ្លឺ ពីមន្ត្រីពាក់ព័ន្ធ ខាងលើនៅឡើយទេ។ ប៉ុន្តែលោក យូ ស៊ីឡិ ប្រធានការិយាល័យសុខាភិបាលស្រុកប្រតិបត្តិព្រះស្ដេច បានប្រាប់អ្នកសារព័ត៌មានក្នុងស្រុកថា៖ លុយក្បាលកូន១ ករណី៤០.០០០រៀលនោះ។ គឺត្រូវបែងចែកជាមួយបុគ្គលិក ដែលចូលរួមសម្រាលកូន ខណៈឆ្មបបានតែ១៦.០០០រៀលប៉ុណ្ណោះ។ លោកសុំណូមពរថា រឿងនេះកុំផ្សាយអី។ ចំណែក លោក សេង បញ្ញាឬទ្ធិ ប្រធានមន្ទីរសុខាភិបាលខេត្តព្រៃវែង មិនអាចសុំការបកស្រាយ បំភ្លឺបាននៅឡើយទេដោយ
ទូរស័ព្ទចូលហើយ លោកបានចុចបិទ៕SRP

ខេត្តសៀមរាប៖លោកជំទាវ ឧកញ៉ា បណ្ឌិត លី អ៊ុំអេង អគ្គនាយិកាក្រុមហ៊ុន លី អ៊ុំអេង នៅថ្ងៃទី១៧ខែធ្នូ ឆ្នាំ២០២០នេះ បានឧបត្ថម្ភ អង្ករចំនួន ៥តោន ដល់សហភាពសហព័ន្ធយុវជនកម្ពុជា ខេត្តសៀមរាប  ដើម្បី យុទ្ធនាការ អប់រំផ្សព្វផ្សាយ និងប្រឆាំងនូវការរីករាលដាលជំងឺកូវីដ-១៩(COVID-19)។

សហភាពសហព័ន្ធយុវជនកម្ពុជា ខេត្តសៀមរាប  សូមថ្លែងអំណរគុណយ៉ាងជ្រាលជ្រៅបំផុតជូនចំពោះ លោកជំទាវ ឧកញ៉ា បណ្ឌិត លី អ៊ុំអេង អគ្គនាយិកាក្រុមហ៊ុន លី អ៊ុំអេង

ដែលបានចូលរួមចំណែកជា អង្ករ ចំនួន ៥តោន ជាមួយរាជរដ្ឋាភិបាលក្នុងយុទ្ធនាការ អប់រំផ្សព្វផ្សាយ និងប្រឆាំងនូវការរីករាលដាលជំងឺកូវីដ-១៩(COVID-19) តាមរយៈសហភាពសហព័ន្ធយុវជនកម្ពុជាខេត្តសៀមរាប។

សហភាពសហព័ន្ធយុវជនកម្ពុជាខេត្ត សូមកោតសរសើរ និងសូមប្រសិទ្ធពរជ័យ បវរសួស្ដី មហាប្រសើរ និងពុទ្ធពរទាំងបួនប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕SRP

ខេត្តបន្ទាយមានជ័យ៖ដោយអនុវត្តតាមបញ្ជា លោកនាយឧត្ដមសេនិយ៍ សន្តិបណ្ឌិត អគ្គស្នងការនគរបាលជាតិ និង លោកនាយឧត្ដមសេនិយ៍ ម៉ក់ ជីតូ អគ្គស្នងការរងទទួលផែនប្រឆាំងបទល្មើសគ្រឿងញៀន ក្រោមការបញ្ជាដឹកនាំផ្ទាល់ របស់ លោកឧត្ដមសេនីយ៍ឯក ឡឹក វណ្ណៈ នាយកមន្ទីរប្រឆាំងបទល្មើសគ្រឿងញៀន កាលពីថ្ងៃទី៦ ខែធ្នូ ឆ្នាំ២០២០ វេលាម៉ោង ២:៤០នាទីជិតភ្លឺ កម្លាំងជំនាញ (ក៩)របស់មន្ទីរប្រឆាំងបទល្មើសគ្រឿងញៀន ដឹកនាំដោយលោកឧត្តមសេនីយ៍ត្រី យិន បញ្ញារិទ្ធ នាយករងមន្ទីរ និង លោកវរសេនីយ៍ឯក ដុសវណ្ណា សុវឌ្ឍន: នាយការិយាល័យ ព្រមទាំងមានការសម្របសម្រួល ពីលោក អ៊ុំ សុភ័ក្តិ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានបើកការស៊ើបអង្កេត ស្រាវជ្រាវ បង្ក្រាបករណីជួញដូរគ្រឿងញៀនឆ្លងដែន ចូលពីថៃមកកម្ពុជា នៅចំណុចក្បែរ វិមានឈ្នះឈ្នះ ស្ថិតក្នុងសង្កាត់ព្រែកតាសេក ខ័ណ្ឌជ្រោយចង្វារ រាជធានីភ្នំពេញ។
លទ្ធផល៖
ក-ចាប់ខ្លួន:ជនសង្ស័យ ០១នាក់:
-ឈ្មោះ សុរ:ឆៃ ខាំកែវ(SURACHAI KHAMKAEW) ហៅ នឹង ភេទប្រុស អាយុ ៣៧ឆ្នាំ ជនជាតិ ថៃ កាន់អត្តសញ្ញាណប័ណ្ណសញ្ជាតិថៃ លេខ ១ ៥៧៩៩ ៥៤៣២៨ ៩៣ ២ ។
ខ-វត្ថុតាងចាប់យកបាន :
-សារធាតុញៀន ប្រភេទម៉េតំហ្វេតាមីនICE ៥០កញ្ចប់ធំ ទម្ងន់ប្រមាណ ៥០គីឡូក្រាម និង
៨០,២៤ ក្រាម។
-រថយន្តធុន LEXUS៤៧០ ព៌ណទឹកមាស ១គ្រឿង ពាក់ស្លាកលេខ ភ្នំពេញ 2M-7875។

កម្លាំងជំនាញយើងបន្តការស៊ើបអង្កេត ដោយស្រាវជ្រាវរកមុខសញ្ញាពាក់ព័ន្ធ លុះនៅថ្ងៃទី ១៥ ខែធ្នូ ឆ្នាំ ២០២០ នៅវេលាម៉ោង ១៩:១៥នាទី កម្លាំងជំនាញ នៃមន្ទីរប្រឆាំងបទល្មើសគ្រឿងញៀន (ក៩) សហការជាមួយកម្លាំងជំនាញនៃនាយកដ្ឋានស៊ើបការណ៍ខាងក្រៅ និងបច្ចេកទេស និងកម្លាំង ជំនាញ នៃស្នងការដ្ឋាននគរបាលខេត្តបន្ទាយ មានជ័យ ដោយមានការសម្រប សម្រួលពីលោក អ៊ុំ សុភ័ក្តិ ព្រះរាជអាជ្ញារង(រាជធានីភ្នំពេញ) និង លោកមាស ច័ន្ទពិសិដ្ឋ ព្រះរាជអាជ្ញានៃអយ្យការអម សាលាដំបូងខេត្តបន្ទាយមានជ័យ បន្តឈាន ទៅបង្ក្រាបបានបណ្តាញខ្សែរយៈ នៅចំណុចតាមបណ្តោយ ផ្លូវជិតផ្សារអគ្គមុខបេនឡានក្រុង ស្ថិតក្នុង ភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ លទ្ធផលដូចខាងក្រោម ៖
ក-ឃាត់ខ្លួនជនសង្ស័យ ០៣នាក់:
១-ឈ្មោះ សេង ដាលីនសិដ្ឋ ហៅ ចិន ភេទប្រុស កើត ១៩៨០ ជនជាតិខ្មែរ (ទើបចេញពីពន្ធនាគារ)
២-ឈ្មោះ ហុង យៀង ហៅ ទី យៀង ភេទស្រី កើត ១៩៧៥ ជនជាតិ ខ្មែរ
៣-ឈ្មោះ ឯល ហ្វាយុ ហៅ ហុង ម៉េងសឺ ភេទប្រុស កើត ២០០៥ ជនជាតិ ខ្មែរ ។
ខ-វត្ថតាងចាប់យក: គ្រឿងញៀនសរុបទម្ងន់ ៨ គ.ក្រ ៧១៥,៦៧ ក្រាម
១-មេតំហ្វេតាមីន(ICE) ៥៦៨៥,៧២ ក្រាម
២-មេតំហ្វតាមីន(WY) ៣៨៤,៨៧ ក្រាម
៣-ហេរ៉ូអ៊ីន ៣២២,៣៨ ក្រាម
៤-អ៊ិចស្តាស៊ី ១៦៣៥,១៥ ក្រាម
៥-កេតាមីន ៦៧២,៩៧ ក្រាម
៦-នីមេតាហ្សេប៉ាម ១៤,៥៨ ក្រាម

ដោយឡែកសារធាតុមិនច្បាស់លាស់ ៩០២៨,៦៣ ក្រាម ។
អាវុធខ្លី ចំនួន ១ ដើម ម៉ាក Glock ។
បច្ចុប្បន្ន ជនសង្ស័យ និងវត្ថុតាងចាប់យកខាងលើ សមត្ថកិច្ចជំនាញបានកសាងសំណុំ រឿង បញ្ជូនទៅសាលាដំបូងរាជធានីភ្នំពេញ ចាត់ការបន្តតាមនីតិវិធី៕SRP

ខេត្តកំពង់ចាម​៖គណសង្ឃនាយកសាលាគណខេត្តកំពង់ចាម​ និមន្តដឹកនាំដោយព្រះសីលសំវរ​ ប៊ត​ តាំងឆេង​ ព្រះនាគមុនីមេគណខេត្តកំពង់ចាម​ និងចូលរួមនិមន្តមន្ត្រីសង្ឃក្រុង-ស្រុក១០ទូទាំងខេត្ត​ នារសៀល​ថ្ងៃ​ទី​១៧​ ខែធ្នូ​ ឆ្នាំ​២០២០​នេះ​ បាន​នាំយកបច្ច័យមូលនិធិសម្រាប់ រាជរដ្ឋាភិបាលកម្ពុជា តាមរយៈ​ លោក​​ អ៊ុន​ ចាន់ដា​ អភិបាលខេត្តកំពង់ចាម និងជាប្រធានគណៈកម្មការខេត្តប្រយុទ្ធប្រឆាំងនឹងជំងឺកូវីដ-១៩។

លោក​​ អ៊ុន​ ចាន់ដា​ បានថ្លែងអំណរព្រះគុណដល់ព្រះមន្ត្រីសង្ឃដែលបានបរិច្ចារបច្ច័យក្នុងការចូលរួមជាមួយ រាជរដ្ឋាភិបាល កម្ពុជាដេីម្បីបង្ការទប់ស្កាត់ជម្ងឺកូវីដ១៩​ និងបន្តធ្វេីសកម្មភាពមនុស្សធម៌រួមគ្នាបន្តទៀត។

គូសបញ្ជាក់ថា បច្ច័យមូលនិធិ ដែលបានចូលរួមពីតាមបណ្តាលវត្តទូទាំងខេត្ត សរុប៦៣,៧៧៩,០០០រៀល​ ដើម្បីចូលរួមជាមួយសម្ដេចតេជោ ហ៊ុន សែន ក្នុងការទិញវ៉ាក់សាំងប្រឆាំងនឹងវីរុសកូវីដ-១៩ ដើម្បីចាក់ជូនប្រជាពលរដ្ឋកម្ពុជាដោយឥតគិតថ្លៃក្នុងជំហានដំបូង៕SRP

ខេត្តបាត់ដំបង៖អាជីវករ បានរងការរិះគន់ អ្នកគ្រប់គ្រង អប្សរាផ្សារលើ ដោយសារយកប៉ារ៉ាស់បិទផ្លូវ សាធារណ: ហាមមិនអោយរថយន្តតូចធំឆ្លងកាត់ និងមិនអោយមានការលក់ដូរ ប៉ុន្តែបែធ្វើជាកន្លែងផ្ញើរម៉ូតូ ប្រមូលលុយ តាមអំពើចិត្តទៅវិញ។ អប្សរាផ្សារលើ ស្ថិតនៅក្រុមទី១២ភូមិកម្មករ សង្កាត់ស្វាយប៉ោ ក្រុងបាត់ដំបង។

ប្រជាពលរដ្ឋ និងជាអាជីវករ បានប្រាប់ក្រុមអ្នកយកព័ត៌មាន នៅព្រឹកនេះថា ពួកគាត់មានការមិនពេញចិត្ត ចំពោះម្ចាស់គ្រប់គ្រង អប្សរាផ្សារលើ ដែលបានដាក់ប៉ារ៉ាស់បិទផ្លូវ មិនអោយរថយន្តគ្រប់ប្រភេទចរាចរណ៍ ឆ្លងកាត់និងដេញមិនអោយមានការលក់ដូរនៅទីនោះ ដើម្បីការពារ ការបាក់ផ្លូវច្រាំងស្ទឹងបន្ថែម បែជាយកម៉ូតូមកដាក់ផ្ញើ ធ្វើមានធ្វើបានបុគ្គលទៅវិញ។ ការដាក់កន្លែងផ្ញើម៉ូតូបែបនេះ បានបណ្ដាលឲ្យរាំងស្ទះដល់ការងារ ប្រកបរបររកស៊ីរបស់ពួកគាត់ប្រចាំថ្ងៃផងដែរ។ ដូច្នេះពួកគាត់សុំសំណូមពរ ទៅដល់លោកអភិបាលខេត្ត ជួយដោះស្រាយ អោយពួកគាត់បានលក់ដូរ នៅទីនេះផង ហើយបើសិន ជាខាងអាជ្ញាធរចុះរៀបចំធ្វើពេលណា ពួកគាត់ចាកចេញភ្លាម។

ពាក់ព័ន្ធទៅនឹងការរិះគន់នេះ លោក សេង សិរីរតន: ជាអ្នកគ្រប់គ្រង អប្សរាផ្សារលើ បានប្រាប់ថា៖ លោកធ្វើនេះ មិនធ្វើដោយចិត្តឯងទេ គឺធ្វើទៅតាមចំណា របស់ អភិបាលខេត្ត ដោយសារខ្លាចប៉ះពាល់បាក់ច្រាំងស្ទឹង។ ដូច្នេះទើបគាត់សុំធ្វើម៉ិចផ្អាកការលក់ដូរនៅទីនេះ លុះត្រាតែជួសជុលជ្រាំងស្ទឹងហើយ ទើបគិតតាមហ្នឹងទៀត។ ចំពោះការដាក់ផាស៊ីផ្ញើម៉ូតូ លើផ្លូវ លោកថា បើខាងលោកមិនយកម៉ូតូមកដាក់ផ្ញើទេ ពួកគាត់ នឹងមកលក់ដូរនៅទីនោះទៀត។

លោក ផេង សិទ្ធី អភិបាល ក្រុងបាត់ដំបង លោកបានឆ្លើយតបតាមរយៈទូរស័ព្ទថា៖ ពេលនេះ លោកកំពុងជាប់ប្រជុំ ហើយនៅពេលប្រជុំចប់លោកនឹងចុះទៅពិនិត្យមើល។ ដូច្នេះសូមអោយពលរដ្ឋ នៅស្ងៀមសិនទៅ ព្រោះខ្លាចក្រែង ធ្លាក់ទៅវាគ្រោះថ្នាក់ ដល់អាយុជីវិតគាត់ទេ។ ហើយគាត់មិនត្រូវធ្វើអ្វី តាមតែចិត្តគាត់ទេ ពេលប្រជុំចប់ នឹងចុះទៅចាត់ចែងរឿងហ្នឹងហើយ។

គួរបញ្ជាក់ថា យោងតាមលិខិតរដ្ឋបាលខេត្តបាត់ដំបង កាលពីថ្ងៃទី០៧ ខែធ្នូ ឆ្នាំ២០២០ ជម្រាបមកលោកអគ្គនាយកក្រុមហ៊ុន តារ៉ា អុីមផត ខូ.អិលធីឌី(អប្សារាផ្សារលើ) កម្មវត្ថុ ករណីស្នើសុំជួសជុលការបាក់ច្រាំងស្ទឹងនៅខាងកើតផ្សារលើស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់បង យោងលិខិតលេខ ៦៥៦សក.បប ចុះថ្ងៃទី២៥ ខែវិច្ឆិកា ឆ្នាំ២០២០ របស់មន្ទីរសាធារណការនិងដឹកជញ្ជូនខេត្ត តបតាមកម្មវត្ថុ និងយោងខាងលើ សូមជម្រាបមកលោកអគ្គនាយកក្រុមហ៊ុនតារ៉ា អុីមផត ខូ.អិលធីឌី(អប្សារាផ្សារលើ)ជ្រាបថា ករណីការបាក់ច្រាំងស្ទឹងនៅខាងកើតផ្សារលើស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង រដ្ឋបាលខេត្តសម្រេចផ្អាកការធ្វើចរាចរណ៍សម្រាប់ឡានធំនិងការលក់ដូរនៅទីនោះជាបណ្ដោះអាសន្ន ដើម្បីការពារការបាក់ច្រាំងស្ទឹងបន្ថែម ព្រមទាំងសុវត្ថិភាពរបស់ប្រជាពលរដ្ឋក្នុងការធ្វើចរាចរណ៍ទៅមកនិងអាជីវករលក់ដូរនៅទីនោះដែលអាចកើតឡើងជាយថាហេតុមិនខានឡើយ៕SRPដោយប៊ុនថេត

ខេត្តសៀមរាប៖នារីម្នាក់បានស្លាប់ភ្លាមៗ និងម្នាក់ទៀតរងរបួសធ្ងន់ ខណ: កំពុងជិះម៉ូតូ ត្រូវបានរថយន្ត បុកចំពេញទំហឹង។

ហេតុការណ៍បានកើតឡើងនៅថ្ងៃទី ១៦ ខែ ធ្នូ ឆ្នាំ ២០២០ នៅវេលាម៉ោង១៤ និង ៣០ នាទី ត្រង់ចំណុចមុខដីចំការ ឈ្មោះ អាង សំអាត ស្ថិតនៅភូមិចាន់ហៀរ ឃុំបឹងមាលា ស្រុកស្វាយលើ ខេត្តសៀមរាប។

នគរបាលស្រុកស្វាយលើបានឲ្យដឹងថាគ្រោះថ្នាក់ចរាចរណ៍នេះ បង្ក ឡើងរវាង រថយន្តនិងម៉ូតូ ទិសដៅផ្ទុយគ្នា។ រថយន្តម៉ាក
Toyota Hiluxពណ៌ស សេរីឆ្នាំ១៩៩៣ ពាក់ស្លាកលេខ ភ្នំពេញគ.១៨៥៣ភព២ អ្នកបើកបរឈ្មោះ រាំ ភារ័ត្ន ភេទ ប្រុស អាយុ២១ឆ្នាំ រស់នៅភូមិខ្វាវ ឃុំខ្វាវ ស្រុកជីក្រែង ខេត្តសៀមរាប បានបុកជាមួយម៉ូតូម៉ាកហុងដា ពណ៌ខ្មៅ សេរីឆ្នាំ ២០១៥ ស្លាកលេខ សៀមរាប ១T៤៨០៣ អ្នកបើកបរឈ្មោះ មី ស្រីពេជ្រ ភេទស្រី អាយុ២០ឆ្នាំ នៅភូមិចុងស្ពាន ឃុំខ្វាវ ស្រុកជីក្រែង (ស្លាប់នៅនឹងកន្លែងកើតហេតុ) បានពាក់មួកសុវត្ថិភាព និងអ្នករួមដំណើរ ឈ្មោះ អន ថុក ភេទស្រី អាយុ១៩ឆ្នាំ នៅភូមិចុងស្ពាន ឃុំខ្វាវ ស្រុកជីក្រែង(រងរបួសធ្ងន់ បានបញ្ចូនទៅមន្ទីរពេទ្យបង្អែកស្រុកសូទ្រនិគម)បានពាក់មួកសុវត្ថិភាព។ ក្នុងនោះខូចខាតរថយន្ត ១គ្រឿងស្រាល និងម៉ូតូ១គ្រឿងធ្ងន់។

នគរបាលបានបញ្ជាក់ថា មូលហេតុ អ្នកបើកបររថយន្តបើកបរក្នុងល្បឿនលឿន ហើយបានរេចង្កូតទៅបុកម៉ូតូ។

ករណីនេះកម្លាំងជំនាញ បានចុះវាស់វែងនិងប្រគល់សាកសព ទៅអោយក្រុមគ្រួសារ។ ចំណែកវត្ថុតាង យកទៅរក្សាទុក នៅអធិការដ្ឋាននគបាល ស្រុក ដើម្បីចាត់ការតាមនីតិវិធី៕SRP

ខេត្តកណ្ដាល៖នគរបាលស្រុកល្វាឯម បានឃាត់ខ្លួន ស្ដ្រីម្នាក់ ជាអ្នកលក់ឆ្នោតកន្ទុយលេខវៀតណាម បញ្ជូនទៅតុលាការដើម្បីអនុវត្តតាមនីតិវិធី។

ហេតុការណ៍ ធ្វើឡើង នៅចំណុចរោងលក់ទឹកអំពៅ ភូមិក្តីកណ្តាល ឃុំសារិកាកែវ ស្រុកល្វាឯម ខេត្តកណ្តាល នៅទី១៦ខែធ្នូ ម្សិលមិញ។

ស្ត្រីរូបនេះមាន ឈ្មោះ សែ សុខលីស អាយុ៣២ឆ្នាំ ជនជាតិខ្មែរ មុខរបរ កសិករទីលំនៅបច្ចុប្បន្ន ភូមិក្តីកណ្តាល ឃុំសារិកាកែវ ស្រុកល្វាឯម ខេត្តកណ្តាល។

នគរបាលស្រុកល្វាឯម បានឲ្យដឹងថា ករណីនេះដកហូត វត្ថុតាង រួមមាន៖១.ទូរស័ព្ទដៃម៉ាក Samsung A50 ពណ៌ខៀវ ០១
២.ទូរស័ព្ទដៃម៉ាក Samsung Note8 ពណ៌ខ្មៅ ០១
៣.សៀវភៅ០១ក្បាល មានចំនួន៦៧ សន្លឹក មានកត់លេខឆ្នោតចំនួន៣៨សន្លឹក(កត់ឆ្នោតវៀតណាម)
៤.ក្រដាសដានពណ៌ខៀវ០១សន្លឹក
៥.ក្រដាស់តូចៗមួយចំនួន
៦.បុិចចំនួន ០២ដើម
៧.ម៉ាស៊ីនគិតលេខ០១
៨.ប្រាក់រៀលចំនួន៣៨១០០០រៀល
៩.ប្រាក់ដុល្លារ ចំនួន២០ដុល្លា
១០.ក្រដាសកត់លេខឆ្នោតវៀតណាមចំនួន ១១សន្លឹក៕SRP

ភ្នំពេញ៖សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នឹង ឯលោក សាយ សំអាល់ រដ្ឋមន្ត្រីក្រសួងបរិស្ថាន បានចុះហត្ថលេខា រួមគ្នា ស្ដីពីការកែសម្រួល និងបន្ថែមសមាសភាពក្រុមការងារដើម្បីពិនិត្យ និងដាក់បញ្ចូលវិធានការអនាម័យ និងបរិស្ថានទៅក្នុងលក្ខណៈសម្បត្តិនៃគោលនយោបាយភូមិ ឃុំ មានសុវត្ថិភាព៕SRP

ខេត្តព្រះវិហារ៖មន្ត្រីរដ្ឋបាលព្រៃឈើខេត្ត សហការ ជាមួយ ផ្នែករវៀង បង្ក្រាបបានរថយន្តដឹកឈើមួយគ្រឿង។

ការបង្ក្រាប ធ្វើឡើងនៅលើផ្លូវជាតិលេខ៦២ នាវេលាម៉ោងប្រមាណជា ៦ព្រឹក ថ្ងៃទី១៦ ខែធ្នូ ឆ្នាំ២០២០ នៅចំណុចគីឡូម៉ែត្រលេខ៥៩ ស្ថិតក្នុងភូមិរំចេក ឃុំរមណី ស្រុករវៀង ខេត្តព្រះវិហារ។

លោក នួន សុខុម នាយខណ្ឌរដ្ឋបាលព្រៃឈើ ព្រះវិហារ បានឲ្យដឹងថា រថយន្តដឹកឈើ ដែលបានបង្ក្រាបម៉ាក ហាយឡែនឌ័រ ពណ៌ទឹកប្រាក់ ពាក់ស្លាកលេខ ភ្នំពេញ BC-6332 ដឹកចេញពី
ភូមិធ្មារ ស្រុកជ័យសែន ពេលទៅស្រុករវៀង ចាប់បានតែម្តង។ ចំណែក តៃកុងចុះរត់គេចបាត់។

លោក នួន សុខុម បន្តថា ឈើ ដែលផ្ទុកនៅក្នុងរថយន្ត ជាប្រភេទប្រណិតធ្នង់ ប៉ុន្តែ មិនទាន់បានរាប់ចំនួនដុំ និងធ្វើការវាស់វែងនៅឡើយទេ។ ទោះយ៉ាងណា វត្ថុតាងបទល្មើស ទាំងនេះ នឹងត្រូវកសាងសំណុំរឿង ចាត់ការតាមច្បាប់ជាធរមាន៕SRP

ខេត្តសៀមរាប៖សមត្ថកិច្ចចម្រុះ ក្រុងសៀមរាប បានរឹបអូសយកស្រូវពូជ របស់ក្រុមជនល្មើសដែលបានដឹកទៅដាក់នៅលើចុងឈើ ទុកសម្រាប់សាបព្រោះ នៅលើដីលិចទឹកដែលជាតំបន់ហាមឃាត់ បានចំនួនបីតោន។ ជាមួយគ្នានេះ សមត្ថកិច្ចក៏បានរៀបចំកំណត់ហេតុបញ្ជូនវត្ថុតាង (ស្រូវពូជ) ទៅមន្ទីរជំនាញ ដើម្បីរៀបចំសំណុំរឿងបញ្ជូនទៅតុលាការផងដែរ។

ហេតុការណ៍ធ្វើថ្ងៃអង្គារ ទី១៥ ខែធ្នូ ឆ្នាំ២០២០ ម្សិលមិញ ដោយអនុវត្តតាមបទបញ្ជារបស់គណៈបញ្ជាការឯកភាពរដ្ឋបាលក្រុង ដឹកនាំដោយ លោកវរសេនីយ៍ទោ មឿន បុរី អធិការរងនគរបាលក្រុងសៀមរាប និងលោក ហាយ យង់ ប្រធានការិយាល័យសាធារណៈការ អនាម័យ បរិស្ថាន និងសណ្ដាប់ធ្នាប់សាធារណៈក្រុង សហការ ជាមួយ មន្ត្រីមន្ទីរកសិកម្ម បរិស្ថាន នឹងសង្កាត់ស្រង៉ែ សង្កាត់សំបួរ សង្កាត់ក្របីរៀល និងសង្កាត់ស្វាយដង្គំ ផងដែរ។

មន្ត្រីសាលាក្រុងសៀមរាបបានបញ្ជាក់ថា ប្រតិបត្តិការនេះ គឺដោយគោលការណ៍​ចុះទៅបង្ក្រាបបទល្មើស កាប់ទន្ទ្រាន ឈូសឆាយ ព្រៃលិចទឹក នៅភូមិសាស្ត្រវាលត្រពាំងរហាល ត្រពាំងដំរីលេង ត្រពាំងផ្ទោលធំ ដើម្បីធ្វើស្រូវរដូវប្រាំង របស់ជនល្មើសមួយចំនួន៕SRP

ខេត្តកំពង់ចាម​៖លោកស្រី​​ ប៉ាង​ ដានី​ អភិបាល​រង​ខេត្ត នៅថ្ងៃទី១៦ ខែធ្នូ​ ឆ្នាំ​២០២០​ នេះ បាន​អញ្ជើញចុះប្រគល់ផ្ទះ​១ខ្នង​ ទំហំ​៥x៧ម៉ែត្រ​ ដែលជាអំណោយ របស់ លោក អ៊ុន​ ចាន់ដា​ អភិបាលខេត្តកំពង់ចាម ជូនដល់​ស្ត្រី​មេម៉ាយ​ក្រីក្រ​ម្នាក់​ឈ្មោះ​ កាល់ សាម៉ុល អាយុ៥៧ឆ្នាំ នៅ​ភូមិ​បឹង​បាសាក់​ សង្កាត់​សំបួរ​មាស​ ក្រុងកំពង់ចាម​ ដោយមានការ​អញ្ជើញ​ចូលរួម​ពី​សមាជិកក្រុមប្រឹក្សាខេត្ត​ ប្រធាន​មន្ទីរ​ព័ត៌មាន​ខេត្ត​​​ រួមនឹង​​អាជ្ញាធរ​ពាក់ព័ន្ធ​​ជាច្រើនរូបទៀត។

​គួរ​បញ្ជាក់​ថា ក្នុង​អង្គ​វេទិកា​ផ្សព្វផ្សាយ​ និង​ពិគ្រោះយោបល់​លេីក​ទី​២​ អាណត្តិ​ទី​៣​ របស់​ក្រុមប្រឹក្សាខេត្ត ដែល​បាន​ធ្វើ​ឡើង​នៅ​វត្តខេមវ័នបឹងស្នាយ​ សង្កាត់​សំបួរ​មាស​ ក្រុង​កំពង់ចាម​​ កាលពី​ថ្ងៃទី​១២​ ខែវិច្ឆិកា​ ឆ្នាំ​២០២០​ កន្លង​ទៅ​ថ្មីៗ​នេះ​ ស្ត្រីក្រីក្រខាងលេី មានកូនស្រី​ចំនួន​៣នាក់ មានចៅតូច​អាយុ​២ឆ្នាំ​ ចំនួន២នាក់ និងចៅតូច អាយុ៣ខែ​១នាក់​ ដែលព៉ំមានមេគ្រួសារជាបង្គោល ព្រោះជីដូនជាស្រ្តីមេមាយ និងកូនក៏មេម៉ាយ​ ហើយ​ក៏បាន​សំណូមពរ​ដល់​លោក​អភិបាលខេត្ត​ ឲ្យ​ជួយ​សាងសង់​ផ្ទះ​១ខ្នង​នេះឡើង​សម្រាប់​ស្នាក់នៅ​។ ទើបលោកអ៊ុន ចាន់ដាអភិបាលខេត្ត សម្រេចសាងសង់ផ្ទះជូនស្ត្រីគាត់។

ក្នុងឱកាសអញ្ជើញប្រគល់ផ្ទះ លោកស្រី​​ ប៉ាង​ ដានី​  បាន​នាំយក​នូវ​ថវិកា របស់លោកអភិបាលខេត្ត ចំនួន២០០.០០០រៀល និង​សម្លៀកបំពាក់​មួយ​ចំនួន​ សម្រាប់ឧបត្ថម្ភ ដល់គ្រួសារក្រីក្រខាងលើ ព្រមទាំង​បាន​ធ្វេី​ការ​ណែនាំ​ ឲ្យ​មាន​ការ​រស់នៅ​ស្អាត ហូបស្អាត ផឹកស្អាត ជាពិសេស​ ត្រូវអនុវត្តតាមសេចក្តីណែនាំ របស់ក្រសួងសុខាភិបាល ក្នុងការទប់ស្កាត់ការឆ្លងរីករាលដាលនៃជំងឺកូវីដ-១៩​ ផងដែរ​៕SRP