ខេត្តសៀមរាប៖បុរស២នាក់ ត្រូវបានប៉ូលិសខេត្តសៀមរាប ចាប់ខ្លួន ដោយអនុវត្តតាមដីកា បង្គាប់ឲ្យចាប់ខ្លួន របស់សាលាដំបូងខេត្តសៀមរាប លេខ: ០៩,១១ ចុះថ្ងៃទី ១៣ ខែមករា ឆ្នាំ ២០២១ របស់ លោក អ៊ុំ ចាន់ថុល ចៅក្រមស៊ើបសួរ។

ការចាប់ខ្លួនធ្វើឡើង នៅវេលាម៉ោង ១១ និង០០នាទី ថ្ងៃទី ២៩ខែមករា ឆ្នាំ២០២១ នៅស្រុកបន្ទាយស្រី ដោយកម្លាំងនគរបាល ព្រហ្មទណ្ឌកំរិតធ្ងន់ ដឹកនាំដោយ លោកវរសេនីយ៍ទោសុខ ម៉េងអ៊ាង នាយការិយាល័យ នគរបាលព្រហ្មទណ្ឌកម្រិតធ្ងន់ សហការ ជាមួយមួយនគរបាលមូលដ្ឋាន ស្រុកបន្ទាយស្រី។

មន្ត្រីនគរបាលខេត្តសៀមរាបបានថ្លែងថា
ជនត្រូវចោទ
១.ឈ្មោះ ម៉ោញ អំ ភេទប្រុស អាយុ៥៤ឆ្នាំ មុខរបរ កសិករ រស់នៅភូមិរំចេក ឃុំរំចេក ស្រុកបន្ទាយស្រី ដែលបានប្រព្រឹត្តបទល្មើសធ្វើអោយខូចខាតដោយចេតនា នៅថ្ងៃទី១៨ ខែតុលា ឆ្នាំ២០១៩ កន្លែងកើតហេតុ នៅភូមិរំចេក ឃុំរំចេក ស្រុកបន្ទាយស្រី ខេត្តសៀមរាប។

២.ឈ្មោះ អឿន រិទ្ធ ភេទប្រុស អាយុ១៨ឆ្នាំ មុខរបរ កសិករ រស់នៅភូមិរវៀងតាទុំ ឃុំរំចេក ស្រុកបន្ទាយស្រី ខេត្តសៀមរាប។ បានប្រព្រឹត្តបទល្មើសធ្វើអោយខូចខាតដោយចេតនា នៅថ្ងៃទី១៨ ខែតុលា ឆ្នាំ២០១៩ កន្លែងកើតហេតុភូមិរំចេក ឃុំរំចេក ស្រុកបន្ទាយស្រី ខេត្តសៀមរាប។

បើតាមមន្ត្រីនគរបាលបានបញ្ជាក់ថាចំពោះជនត្រូវចោទ ខាងលើ ត្រូវបានការិយាល័យ នគរបាល ព្រហ្មទណ្ឌកម្រិតធ្ងន់ បញ្ជូនទៅតុលាការ នៅរសៀលថ្ងៃនេះ។

សូមជម្រាបថាប្រតិបត្តិការនេះ ក្រោមការណែនាំបស់ លោកឧត្ដមសេនីយ៍ទោទិត្យ ណារ៉ុងស្នងការ និងដោយមានការសម្របសម្រួល ពីលោកឧត្តមសេនីយ៏ត្រីភឹង ចិន្តារ៉េត ស្នងការរង ទទួលផែនការងារ នគរបាល ព្រហ្មទណ្ឌ និងការចង្អុលបង្ហាញ របស់លោកវរសេនីយ៏ឯក ណុប សារ៉ាក់ ស្នងការរងទទួលដឹកនាំការិយាល័យ នគរបាល ព្រហ្មទណ្ឌកំរិតធ្ងន់៕SRP

ខេត្តសៀមរាប៖សមត្ថកិច្ចស្រុកសូទ្រនិគមបានឲ្យដឹងថា ផ្ទះលក់កង់មួយកន្លែង ត្រូវបានភ្លើងឆាបឆេះ បង្កឲ្យមានការភ្ញាក់ផ្អើល នៅរសៀលថ្ងៃនេះ។

ហេតុការណ៍បានកើតឡើងនៅវេលាម៉ោង ១២និង៣០នាទីថ្ងៃត្រង់ ថ្ងៃទី២៩មករា ២០២១ នៅចំណុចភូមិព្រះត្រពាំង ឃុំដំដែក ស្រុកសូទ្រនិគម ខេត្តសៀមរាប។

សមត្ថកិច្ចស្រុកសូទ្រនិគមបានបន្តថា ម្ចាស់ផ្ទះឈ្មោះ សរ ចំរើន ភេទប្រុស អាយុ៦៩ឆ្នាំ មានទីលំនៅភូមិដំដែកផ្សារ ឃុំដំដែក ស្រុកសូទ្រនិគម ខេត្តសៀមរាប។ ករណីនេះ ធ្វើឲ្យផ្ទះ១ខ្នង ទំហំ៩x២៥ម៉ែត្រ ថ្មក្រោម ឈើលើ សំយាបដែក និងសម្ភារប្រើប្រាស់ ក្នុងផ្ទះទាំងស្រុង (ផ្ទះផ្ទុកកង់ និងគ្រឿងកង់សម្រាប់លក់ច្រើនរយគ្រឿង) ខូចខាតទាំងស្រុង។ ក្នុងនោះក៏រងការ ខូចខាតផ្ទះនៅក្បែរ១ខ្នង (ខូច២០%) និងខូចខាត អគារសាលារៀនបឋមសិក្សា៧មករា ១ខ្នង (១៥%)។ តែទោះជាយ៉ាងណា មិនមាន មនុស្សរងរបួសនោះទេ។

តាមការសន្និដ្ឋាន ជាបឋមគឺ បណ្ដាលមកពីឆ្លងចរន្តអគ្គិសនី ព្រោះម្ចាស់ មិននៅទាំងអស់គ្នា ទៅលក់កង់នៅផ្សារបាត់ ផ្ទះបិតទ្វារចោល៕SRP

ខេត្តសៀមរាប៖រដ្ឋមន្រ្តីក្រសួងបរិស្ថាន និងជាអនុប្រធានអចិន្រ្តៃយ៍ (ក.គ.អ.អ.) លោក សាយ សំអាល់ មានប្រសាសន៍ថា «ការផ្តល់ជម្រើសថ្មី និងការលើកកម្ពស់កម្រិតជីវភាពប្រជាសហគមន៍» ចៀសវាងការពឹងអាស្រ័យផល លើធនធានធម្មជាតិ ទាំងស្រុង។

លោកបន្តថា ការពារ និងអភិរក្ស ធនធានធម្មជាតិ ទទួលបានជោគជ័យ លុះត្រាតែមានការចូលរួម ពីប្រជាសហគមន៍ មូលដ្ឋាន ហើយដើម្បី ឱ្យមានការចូលរួម លុះត្រា ប្រជាសហគមន៍ មូលដ្ឋាន ទទួលបាននូវជម្រើសថ្មីក្នុងការរស់នៅ និងមានកម្រិតជីវភាព ល្អប្រសើរ។

លោកសាយ សំអាល់ បានបញ្ជាក់ថា ក្រសួងបរិស្ថាន បាននិងកំពុងផ្តល់នូវជម្រើសថ្មីជូនប្រជាសហគមន៍ តាមរយៈការគាំទ្រ និងការផ្តល់បច្ចេកទេសលើការចិញ្ចឹមសត្វ និងការដាំដំណាំ ហើយបន្តផ្តល់ជូនជម្រើសថ្មី ដល់សហគមន៍ មូលដ្ឋាន ទៅតាមដំណាក់កាលបន្ថែមទៀត។

លោកក៏បានលើកឡើង ពីគោលនយោបាយភូមិ ឃុំ សង្កាត់ មានសុវត្ថិភាព របស់រាជរដ្ឋាភិបាល ផ្សាភ្ជាប់នឹងបរិស្ថាន ដោយក្នុងនោះ
ទី១៖ ការផ្តល់ជម្រើសថ្មីដល់សហគមន៍មូលដ្ឋាន ដូចជាការចិញ្ចឹមសត្វ និងការដាំដំណាំ ដែលឆាប់ទទួលបានផល ដើម្បីធានាបាននូវសន្តិសុខស្បៀង

ទី២៖ ការគិតគូរអំពីអនាម័យបរិស្ថាននៅមូលដ្ឋាន ធានាបានសុខុមាលភាព ប្រជាពលរដ្ឋ និងសហគមន៍។

រដ្ឋមន្រ្តីក៏បាន បានវាយតម្លៃខ្ពស់ ចំពោះវេទិកាជាតិអេកូទេសចរណ៍ លើកទី២ គឺពិតជាមានសារៈសំខាន់ ដែលបានផ្តល់ឱកាស ឱ្យគ្រប់ភាគីពាក់ព័ន្ធជួបជុំគ្នាពិភាក្សា ចែករំលែកបទពិសោធន៍ ចំណេះដឹង តម្រូវការ បញ្ហាប្រឈម និងដាក់ចេញនូវ ដំណោះស្រាយរួម ដើម្បីធ្វើការអភិវឌ្ឍ អេកូទេសចរណ៍ ឱ្យកាន់តែរីកចម្រើន សម្រាប់លើក កម្ពស់ សេដ្ឋកិច្ចមូលដ្ឋាន និងសេដ្ឋកិច្ចជាតិ។

លោកសាយ សំអាល់ ថ្លែងបញ្ជាក់យ៉ាងដូច្នេះ នៅក្នុងពិធីបិទ វេទិកាជាតិ អេកូទេសចរណ៍ លើកទី២ នារសៀលថ្ងៃទី២៨ ខែមករា ឆ្នាំ២០២១ ម្សិលមិញ នៅខេត្តសៀមរាប ដោយមានការចូលរួមពី លោក ថោង ខុន រដ្ឋមន្រ្តីក្រសួងទេសចរណ៍ និងជាប្រធានក្រុមការងារអន្ដរក្រសួងគ្រប់គ្រង និងអភិវឌ្ឍន៍សហគមន៍ទេសចរណ៍ និងអេកូទេសចរណ៍ (ក.គ.អ.អ.)៕SRP

ខេត្តបាត់ដំបង៖លោកនាយឧត្តមសេនីយ៍ ខេង សុមេធ អគ្គស្នងការរង និងជាមេ បញ្ជាការនគរបាលជាតិប្រចាំទិសភូមិ​ភាគទី៤ទី៥ នៅថ្ងៃទី២៨ ខែ មករា ឆ្នាំ២០២១ ម្សិលមិញ បានឧបត្ថម្ភអំណោយ អង្ករចំនួន២,០០០គីឡូក្រាម (ពីរពាន់គីឡូក្រាម)និងថវិកាចំនួន២,០០០,០០០រៀល(ពីរលានរៀល) ជូនដល់អង្គភាពវរសេនាតូចនគរ បាលការពារព្រំដែនគោកលេខ៨១៩ ដែលមានទីបញ្ជាការ​នៅស្រុកកំរៀង ខេត្តបាត់ដំបង ដើម្បីបានប្រើ​ប្រាស់ និងដោះស្រាយ ក្នុងអង្គភាព។

អំណោយដ៏ថ្លៃថ្លានេះ របស់លោកនាយឧត្តមសេ​នីយ៍អគ្គស្នងការរង ខាងលើ គឺ លោកបានចាត់តាំងលោកឧត្តមសេនីយ៍ត្រី ម៉ក់ ពីតូ អនុប្រធាននាយកដ្ឋាន នគរបាល បច្ចេកទេសព្រំដែនជាតំណាង នាំយកមកប្រគល់ជូនដល់ទីបញ្ជាការ៕SRP

ខេត្តព្រះវិហារ៖លោក វុធ សាវី ព្រះរាជអាជ្ញារង ខេត្តព្រះវិហារ វ័យក្មេងបានប្រើកណ្តាប់ដៃ បង្ក្រាបបទល្មើសព្រៃឈើដូចភ្លៀងរលឹម។

ជាក់ស្ដែងនៅរសៀលថ្ងៃទី២៨ ខែមករា ឆ្នាំ២០២១ ម្សិលមិញ លោក វុធ សាវី បានដឹកនាំកំលាំង មន្ត្រីនគរបាលយុត្តិធម៌ សហការណ៍ជាមួយរដ្ឋព្រៃឈើ ចុះបង្រ្កាបរោងសិប្បកម្ម កែច្នៃ ផលអនុផលព្រៃឈើ ដោយគ្មានលិខិតអនុញ្ញាត ពីរដ្ឋបាលព្រៃឈើ មួយកន្លែង ស្ថិតនៅភូមិចំបក់សែនជ័យ ឃុំកន្ទួត ស្រុកជាំក្សាន្ត ខេត្តព្រះវិហារ។ ដោយដកហូតបាន ម៉ាសុីនជ្រៀក ម៉ាសុីនតាប់ ម៉ូទ័រជាច្រើនទៀតផងដែរ។

លោក វុធ សាវី ព្រះរាជអាជ្ញារង ខេត្តព្រះវិហារ ត្រូវបានគេដឹងថា តែងតែចុះបង្ក្រាបបទល្មើស ជាបន្តបន្ទាប់។ ដូចជា ព្រៃឈើ ល្បែង ឆ្នោត ឡូតូ បៀរ គ្រឿងញៀន នឹងបទល្មើសផ្សេងៗទៀត។

លោក វុធ សាវី បានថ្លែងប្រាប់សារព័ត៌មានថា ឈ្មួញរកសុីឈើ បើកសិប្បកម្ម ទាំងនោះ តែងតែជួលផ្ទះ ពលរដ្ឋ ដាក់រោងសិប្បកម្ម ដើម្បីបិទបាំងឈើ កុំអោយសមត្ថកិច្ច មើលឃើញថា សិប្បកម្មមានឈើច្រើន។ ក៏ប៉ុន្តែពួកឈ្មួញទាំងនោះ ពួកគេរកស៊ីលក្ខណៈបន្លំភ្នែកសមត្ថកិច្ច តែប៉ុណ្ណោះ។ ករណីនេះ ដែលចាំបាច់ លោកត្រូវតែបង្ក្រាប ដើម្បីរួមចំណែក ការពារព្រៃឈើ និងបរិស្ថាន៕SRP

ខេត្តសៀមរាប៖ផ្ទះមួយល្វែង នៅក្នុងបុរីអចលនទ្រព្យអង្គរ ដែលម្ចាស់ចាក់សោរទុកចោល ត្រូវបានអគ្គីភ័យឆាបឆេះ។
នេះបើយោងតាម អធិការនគរបាល ស្រុកប្រាសាទបាគង លោកវរសេនីយ៍ឯក លឹម សម្បត្តិ បានប្រាប់អ្នកសារព័ត៌មាន នៅរសៀលថ្ងៃនេះ។

លោកវរសេនីយ៍ឯក លឹម សម្បត្តិ បានបន្តថា ផ្ទះដែលរងឆេះ លេខ៦០ មានម្ចាស់ឈ្មោះ នូវ សុផល អាយុ៣៥ រស់នៅភូមិគោកត្នោត ឃុំ កណ្ដែក ស្រុកប្រាសាទបាគង ខេត្តសៀមរាប នៅតាមបណ្តោយផ្លូវជាតិលេខ៦ ចម្ងាយពីអធិការ១១គីឡូម៉េត្រ។

ករណីនេះឲ្យរងការខូចខាត រួមមាន៖ផ្ទះខ្នងទំហំ៤×២១ម៉ែត្រ កម្ពស់៥ ម៉ែត្រ ប្រក់ស័ង្កសី ជញ្ជាំងថ្ម ឆេះអស់សម្ភារ នៅក្នុងផ្ទះទាំងស្រុង សរុបជាទឹកប្រាក់ប្រហែល ជា១២០០០ ដុល្លារ។ មូលហេតុ មកពី ទុស្សេខ្សែភ្លើងទូរទស្សន៍ ចាប់និងជញ្ជាំង បណ្ដាលឲ្យឆេះតែម្ដង។

សូមបញ្ជាក់ថា ហេតុការណ៍នេះ បានកើតឡើងនៅវេលាម៉ោង១១និង៤៥ នាទីថ្ងៃទី២៨ ខែ  មករាឆ្នាំ២០២១នេះ នៅភូមិគោកត្នោត ឃុំកណ្ដែក ស្រុកប្រាសាទបាគង ខេត្តសៀមរាប៕SRP

ខេត្តសៀមរាប៖រដ្ឋមន្ត្រីក្រសួងចំនួន៨រូប បានអមដំណើរ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មការអន្តរក្រសួង ចុះពិនិត្យវឌ្ឍនភាព ការងារសាងសង់ហេដ្ឋារចនាសម្ព័ន្ធ ផ្លូវចំនួន ៣៨ខ្សែ នៅក្រុងសៀមរាប ខេត្តសៀមរាប នាថ្ងៃទី២៨ខែមករា ព្រឹកមិញនេះ។

1. លោកស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន ជាអនុប្រធានអចិន្ត្រៃយ៍ គណៈកម្មការអន្តរក្រសួង
2. លោក ជា សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ និងជាអនុប្រធានគណៈកម្មការអន្តរក្រសួង
3. លោក បណ្ឌិតសភាចារ្យ អ៊ុក រ៉ាប៊ុន រដ្ឋមន្រ្តី ក្រសួងអភិវឌ្ឍន៍ជនបទ និងជាអនុប្រធានគណៈកម្មការអន្តរក្រសួង
4. លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម និងជាអនុប្រធានគណៈកម្មការអន្តរក្រសួង
5. លោកជំទាវ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ
6. សាយ សំអាល់ រដ្ឋមន្រ្តីក្រសួងបរិស្ថាន
7. ថោង ខុន រដ្ឋមន្រ្តី ក្រសួងទេសចរណ៍
8. លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ ក្រុមការងារគណៈកម្មការ អន្តរក្រសួង ក្រុមការងារបច្ចេកទេស ជំនាញ និងភាគីពាក់ព័ន្ធ។

យោងតាមក្រសួងសាធារណការបានដឹងថាគម្រោងស្ថាបនា ហេដ្ឋារចនាសម្ព័ន្ធ ផ្លូវចំនួន៣៨ខ្សែ ក្នុងក្រុងសៀមរាប ខេត្តសៀមរាប ដែលបានសម្ពោធ បើកការដ្ឋានសាងសង់កាលពីថ្ងៃទី៣០ ខែវិច្ឆិកា ឆ្នាំ២០២០ ក្រោមអធិបតីភាពដ៏ខ្ពង់ខ្ពស់ របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា សម្រេចការងារសាងសង់បានជាង ១៧,៥% ហើយ គិតត្រឹមថ្ងៃទី២៥ ខែមករា ឆ្នាំ២០២១។

ការចុះត្រួតពិនិត្យ ការស្ថាបនាផ្លូវនេះ ធ្វើឡើងក្នុងគោលបំណង ដើម្បីពិនិត្យគុណភាព នៃការសាងសង់ ជំរុញឱ្យអង្គភាព សាងសង់ អនុវត្តតាមលក្ខណៈបច្ចេកទេស សៀវភៅបន្ទុកឱ្យបានត្រឹមត្រូវ និងស្តង់ដារ ដែលអាចទទួលយកបាន ពោលគឺធ្វើផ្លូវឱ្យមានគុណភាព រឹងមាំ អាចប្រើប្រាស់ ជាប់បានយូរអង្វែង និងបញ្ចប់តាមផែនការគ្រោងទុក។

សូមបញ្ជាក់ជូនថា៖ គម្រោងស្ថាបនាហេដ្ឋារចនាសម្ព័ន្ធផ្លូវ៣៨ខ្សែក្នុងទីក្រុងសៀមរាប ខេត្តសៀមរាប ចំនួន៣៨ខ្សែនេះ មានប្រវែងសរុប១០៨,៧៤ គីឡូម៉ែត្រ គ្រោងប្រើប្រាស់ថវិកាជាតិសរុបប្រមាណជាង ១៤០ លានដុល្លារអាមេរិក និងថវិកាប្រមាណជាង៩លានដុល្លារអាមេរិកទៀត សម្រាប់ការងារចាំបាច់ ក្នុងការរៀបចំស្ថាបនាប្រព័ន្ធបង្ហូរទឹកភ្លៀង និងទឹកកខ្វក់ដែលនៅក្រៅគម្រោងសាងសង់ខ្សែផ្លូវទាំង៣៨នេះ ដោយប្រើប្រាស់រយៈពេលសាងសង់ចំនួន១៣ខែ គ្រោងនឹងបញ្ចប់នៅចុងឆ្នាំ២០២១។

គម្រោងនេះ អនុវត្តដោយអង្គភាពសាងសង់ចំនួន០៨រួមមាន៖ ១) កងវិស្វកម្មលេខ១៧៨ស្ពាន-ថ្នល់នៃ នាយកដ្ឋានវិស្វកម្ម ២) កងវិស្វកម្មសម្តេចតេជោ ខេត្តសៀមរាប ៣) កងវិស្វកម្មតេជោ ហ៊ុន សែន សៀមរាប ៤) អគ្គនាយកដ្ឋានសាធារណការ ៥) អគ្គនាយកដ្ឋានប្រព័ន្ធចម្រោះទឹកកខ្វក់ ៦) នាយកដ្ឋានគ្រឿងចក្រ និងស្ថាបនាផ្លូវ ៧) នាយកដ្ឋានជួសជុល និងថែទាំផ្លូវថ្នល់ និង ៨) មន្ទីរសាធារណការ និងដឹកជញ្ជូនខេត្តសៀមរាប។

គម្រោងនេះមានការរៀបចំលើគ្រប់ទិដ្ឋភាព ក្នុងនោះរួមមាន៖ ប្រព័ន្ធលូទឹកកខ្វក់ លូទឹកភ្លៀង ចិញ្ចើមផ្លូវ ផ្លូវថ្មើរជើង ផ្លូវសម្រាប់ជនមានពិការភាព ផ្លូវជិះកង់ ចំណតរថយន្ត ប្រព័ន្ធបំភ្លឺផ្លូវសាធារណៈ ផ្លាកសញ្ញា និងគំនូសចរាចរណ៍ ប្រព័ន្ធកាមេរ៉ាសុវត្ថិភាព អាងចម្រោះទឹកកខ្វក់ និងការធ្វើសួននិងដាំដើមឈើ។

ជាមួយគ្នានេះផងដែរ គម្រោងសាងសង់ហេដ្ឋារចនាសម្ព័ន្ធផ្លូវ ៣៨ខ្សែនេះ មានការគិតគូរយកចិត្តទុកដាក់ខ្ពស់ ក្នុងការសាងសង់ស្រទាប់គ្រឹះផ្លូវប្រកបដោយគុណភាព ជាប់រឹងមាំ ដោយគោរពតាមបទដ្ឋានបច្ចេកទេសសាងសង់ ចៀសវាងការសាងសង់រួច ត្រូវគាស់កកាយ ជួសជុលឡើងវិញដែលនាំឱ្យខាតបង់ថវិកាបន្ថែមទៀត រួមជាមួយការរៀបចំប្រព័ន្ធលូបង្ហូរទឹក ស្របទៅតាមស្តង់ដាបច្ចេកទេស ដើម្បីការពារកុំឱ្យមានការលិចលង់ និងចៀសវាងនាំឱ្យផ្លូវឆាប់ខូច ដោយមានការត្រួតពិនិត្យលក្ខណៈបច្ចេកទេសឱ្យបានល្អិតល្អន់ជាមួយក្រុមការងារត្រួតពិនិត្យបច្ចេកទេស ជាពិសេស គុណភាពនៃសម្ភារបរិក្ខារដែលត្រូវប្រើប្រាស់សម្រាប់ការសាងសង់ ធានាបាននូវការប្រើបាស់សម្ភារបរិក្ខារមានគុណភាព ដើម្បីធានាឱ្យគុណភាពសំណង់មានភាពរឹងមាំអាចទទួលយកបានពីគ្រប់ភាគីពាក់ព័ន្ធទាំងអស់។

ក្រៅពីស្ថាបនាហេដ្ឋារចនាសម្ព័ន្ធផ្លូវ ៣៨ខ្សែហើយនោះ ក៏នៅមានការស្ដារ កែលម្អធ្វើឱ្យប្រសើរឡើងដងស្ទឹងសៀមរាបប្រវែងជាង ៨គីឡូម៉ែត្រ អនុវត្តដោយអគ្គនាយកដ្ឋានប្រព័ន្ធចម្រោះទឹកកខ្វក់ នៃក្រសួងសាធារណការ និងដឹកជញ្ជូន ដើម្បីលើកកម្ពស់សោភ័ណភាពបន្ថែមទៀត ឱ្យស័ក្កិសមជាទីក្រុងទេសចរណ៍ វប្បធម៌ ប្រវត្តិសាស្រ្ដ និងធម្មជាតិ ក៏ដូចជាដើម្បីជួយជំរុញដល់កំណើនសេដ្ឋកិច្ចជាតិផងដែរ៕SRP

ភ្នំពេញ៖សម្ដេចហេង សំរិន ប្រធានរដ្ឋសភាជាតិនៃកម្ពុជា បានសូមប្រជាពុទ្ធបរិស័ទ គ្រប់រូប បានប្រកបដោយ សុខសន្តិភាព ទាំងផ្លូវកាយ និងផ្លូវចិត្ត ស្របតាមមាគ៌ា នៃព្រះសម្មាសម្ពុទ្ធរបស់យើង។

ទំព័រហ្វេសប៊ុក សម្ដេចហេង សំរិន បានលើកឡើងថា ៖សូមអនុមោទនា «បុណ្យមាឃបូជា» ថ្ងៃព្រហស្បតិ៍ ១៥កើត ខែមាឃ ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី២៨ ខែមករា ឆ្នាំ២០២១ គឺជាថ្ងៃបុណ្យមាឃបូជា ជាថ្ងៃប្រកបដោយមហានក្ខឬក្ស និងអត្ថន័យយ៉ាងជ្រាលជ្រៅសម្រាប់យើងគ្រប់រូប ជាពុទ្ធសាសនិក។ ពិធីបុណ្យមាឃបូជា ប្រារព្ធឡើង រំលឹកឡើងវិញនៅព្រឹត្តិការធំៗពីររបស់ព្រះពុទ្ធសាសនាយើង៖

ទី១- ជាថ្ងៃដែលព្រះពុទ្ធបរមគ្រូនៃយើងទ្រង់ធ្វើចតុរង្គសន្និបាតប្រកាសព្រះសាសនាដោយមានការសម្តែងឱវាទប្បាតិមោក្ខ នៅប្រទេសឥណ្ឌាកាលពី៥៨៨ឆ្នាំមុនគ្រិស្តសករាជ នាថ្ងៃ១៥កើត ខែមាឃ បន្ទាប់ពីការត្រាស់ដឹងរបស់ព្រះអង្គបាន០៩ខែគត់។

ទី២-ជាថ្ងៃដែលព្រះបរមគ្រូនៃយើង ទ្រង់ដាក់ព្រះជន្មាយុសង្ខារកំណត់យកពេលវេលាយាងចូលព្រះរិនិពាន្ត។ ក្រោមការយកចិត្តទុកដាក់របស់រាជរដ្ឋាភិបាល វិស័យព្រះពុទ្ធសាសនានិងសាសនាដទៃទៀតនៅក្នុងប្រទេសកម្ពុជាមានការរីកចម្រើនគួរឱ្យគក់សម្គាល់។ ព្រះពុទ្ធសាសនា មិនត្រឹមបម្រើដល់ជំនឿ ជាទីគោរពសក្ការៈ របស់ប្រជាពលរដ្ឋប៉ុណ្ណោះទេ ប៉ុន្តែថែមទាំងបានរួមចំណែកយ៉ាងសំខាន់នៅក្នុងការអប់រំផ្លូវកាយ និងផ្លូវចិត្តដល់ប្រជាពលរដ្ឋ បានរួមរស់ជាមួយគ្នាដោយសុខសាន្ត៕SRP

ខេត្តកំពង់ចាម​៖លោក អ៊ុន​ ចាន់ដា​ អភិបាលខេត្តកំពង់ចាម បានបន្ត​ឧបត្ថម្ភ​នូវ​ប្រាក់បៀរវត្ស រយៈពេល៧ខែ ជូនគណៈកម្មការប្រយុទ្ធប្រឆាំង នឹងជំងឺកូវីដ១៩​។

បេី​តាម​​សារលិខិត​​ទាំងស្រុង​ថា​ ខ្ញុំបាទ អ៊ុន ចាន់ដា អភិបាលនៃគណៈអភិបាលខេត្តកំពង់ចាម​ សូមគោរពជូន​ ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួងដើម្បីប្រយុទ្ធប្រឆាំងនឹងជំងឺកូវីដ-១៩
កម្មវត្ថុ ៖ ស្តីពីការបន្តចូលរួមចំណែកជាថវិកាក្នុងការប្រយុទ្ធប្រឆាំងទៅនឹងជំងឺកូវីដ-១៩។​ សេចក្តីដូចមានគោរពជម្រាបជូនក្នុងកម្មវត្ថុខាងលើ ខ្ញុំបាទ មានកិត្តិយសសូមគោរពជម្រាប ជូន ឯកឧត្តមសាស្រ្តចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរ ក្រសួងដើម្បីប្រយុទ្ធប្រឆាំងនឹងជំងឺកូវីដ-១៩ មេត្តាជ្រាបថា៖ ក្នុងកាលៈទេសៈដែលពិភពលោក រួមទាំង កម្ពុជា បាននឹងកំពុងប្រឈម និងទទួលរងការយាយីពីវីរុសដ៏មហាប្រល័យកូវីដ-១៩។ ខ្ញុំបាទ សូមបន្ត បរិច្ចាគប្រាក់បៀវត្សរបស់ខ្ញុំបាទក្នុងតួនាទីជាអភិបាលនៃគណៈអភិបាលខេត្តកំពង់ចាម ចំនួន០៧ខែ (ប្រាំពីរខែ) ចាប់ពីខែកុម្ភៈ ដល់ខែសីហា ឆ្នាំ២០២១ ជូនដល់គណៈកម្មាធិការជាតិប្រយុទ្ធប្រឆាំងនឹងជំងឺ កូវីដ-១៩ ដើម្បីចូលរួមចំណែកជាមួយរាជរដ្ឋាភិបាលកម្ពុជាក្នុងការប្រយុទ្ធប្រឆាំងនឹងវីរុសកូវដ-១៩។
សេចក្តីដូចបានគោរពជូនខាងលើសូម ឯកឧត្តមរដ្ឋមន្ត្រី មេត្តាទទួលជ្រាប និងចាត់ចែងដោយក្តីអនុគ្រោះ​៕SRP

ខេត្តសៀមរាប៖សមត្ថកិច្ចស្រុកស្រីស្នំបានរាយការណ៍ថាបុរសម្នាក់ ត្រូវបានគេប្រទះឃើញ ដេកស្លាប់នៅក្បែរ អាងទឹក។

ហេតុការណ៍បានកើតឡើង នៅវេលាម៉ោង១០និង៣០នាទី ថ្ងៃទី២៨ ខែមករា ឆ្នាំ២០២១ នេះ នៅចំណុចអាងទឹកចម្ងាយ២០០ម៉ែត្រ ខាងលិចភូមិអំពៅដៀប ឃុំជ្រោយនាងងួន ស្រុកស្រីស្នំ ខេត្តសៀមរាប។

សមត្ថកិច្ចបានបញ្ជាក់ថា ជនរងគ្រោះមានឈ្មោះប៉ក អិ អាយុ៤៥ឆ្នាំ រស់នៅភូមិឃុំខាងលើមុខរបរកសិករ។មូលហេតុ មានជំងឺរុាំរ៉ៃប្រចាំកាយ៕SRP

ខេត្តសៀមរាប៖សមត្ថកិច្ចស្រុកប្រាសាទបាគងបានអះអាងថា បុរសជាប្ដី បានស្លាប់ នៅពេលបញ្ជូនទៅដល់មន្ទីរពេទ្យ។ ចំណែកប្រពន្ធនិងកូន បានរងរបួសធ្ងន់ ខណៈកំពុងលក់ខោអាវ ត្រូវបានរថយន្តមួយគ្រឿងចូលបុក។

ហេតុការណ៍បានកើតឡើងនៅវេលាម៉ោង០៨និង៣០នាទី ថ្ងៃទី ២៨ ខែមករា ឆ្នាំ២០២១ នៅចំណុចផ្លូវជាតិលេខ 265 F ស្ថិតក្នុងភូមិត្រពាំងទឹម ឃុំកណ្ដែក ស្រុកប្រាសាទបាគង ខេត្តសៀមរាប។

សមត្ថកិច្ចស្រុកប្រាសាទបាគងបានបញ្ជាក់ថា គ្រោះថ្នាក់ចរាចរណ៍នេះ បង្កឡើងដោយរថយន្តបង្កហេតុ ford ranger ពណ៌មាស ពាក់ស្លាកលេខ ភ្នំពេញ២AP ៥៦៣១ បើកបរមានទិសដៅ ពីខាងលិច ទៅខាងកើតបានរ៉េចង្កូត ចូលតូបលក់ខោអាវ ចំនួន២។

សមត្ថកិច្ចបានបញ្ជាក់ទៀតថា អ្នកបើកបររថយន្តហ្វត ឈ្មោះ ពៅ អាយុ៣៧ឆ្នាំ នៅភូមិអូរ ឃុំកណ្តែក ស្រុកប្រាសាទបាគង ខេត្តសៀមរាប។

ចំណែកម្ចាស់តូបលក់ខោអាវ ទី១ឈ្មោះ ណូ បូរ៉ា ភេទប្រុសអាយុ២៤ឆ្នាំ រស់នៅភូមិឃុំខាងលើ មិនមាន របួសនោះទេ។

ម្ចាស់តូបទី២ នៅជាប់គ្នាតូបទី១បណ្តាលឲ្យរបួសធ្ងន់ចំនួន៣នាក់។

១.ឈ្មោះ ស៊ីន គាន ភេទប្រុសអាយុ៤១ឆ្នាំ របួសធ្ងន់ ពេលបញ្ជូនទៅមន្ទីរពេទ្យបង្អែកសៀមរាប(ស្លាប់)ត្រូវជាប្តី។

២.ឈ្មោះ ថន រដ្ឋា ភេទស្រីអាយុ៣៦ឆ្នាំ របួសធ្ងន់(ប្រពន្ធ)។

៣.គាន កាក់ការ ភេទស្រីអាយុ០៩ឆ្មាំរបួសធ្ងន់(ធ្ងន់)កូន។

បើតាមសមត្ថកិច្ចបានបញ្ជាក់ថា មូលហេតុ រថយន្តបង្ក បើកលឿន បែកកង់ បណ្តាលឲ្យរេចង្កូតចូលបុកទាំងកំរោលតែម្ដង។

ករណីនេះត្រូវបាននគរបាល នាំយករថយន្តទៅរក្សាទុក នៅអធិការដ្ឋាននគរបាលស្រុកប្រាសាទបាគងដើម្បីរង់ចាំការដោះស្រាយ៕SRP

ខេត្តសៀមរាប៖ជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលនៃអាជ្ញាធរជាតិអប្សរា បានមានប្រសាន៍ថា៖ កន្លងមកនេះ ពេលមានប្រាសាទ ណាមួយ ជួបហានិភ័យ ឧកទាហរណ៍ ដូចជា ខ្យល់ខ្លាំង ធ្វើឱ្យថ្មប្រាសាទ ណាមួយរលំ ឬធ្លាក់ គឺចាំបាច់ ត្រូវឆ្លងទៅ គណៈកម្មាធិការអន្តរជាតិ ដើម្បី សម្របសម្រួលកិច្ចគាំពារ និងអភិវឌ្ឍន៍ រមណីយដ្ឋានប្រវត្តិសាស្ត្រ អង្គរសិន ទើបអាចរៀបចំ និងថែទាំបាន។ ប៉ុន្តែសម្រាប់ អង្គភាពថែទាំប្រាសាទ មួយ ដែលគ្រោងបង្កើតថ្មី ស្ថិតក្រោមការគ្រប់គ្រងនៃនាយកដ្ឋានអភិរក្សប្រាសាទ ក្នុងឧទ្យាន អង្គរនិងបុរាណវិទ្យាបង្ការនេះ គឺពេលប្រាសាទជួបហានិភ័យ គឺមិនចាំបាច់ លើកគម្រោងវែងឆ្ងាយនិងឆ្លងអាយស៊ីស៊ី នោះទេ គឺសម្រាប់ការងារដែលបន្ទាន់ គឺធ្វើបានភ្លាមៗតែ ម្តង។

រដ្ឋមន្ត្រីបញ្ជាក់យ៉ាងដូច្នេះ ក្រោយបញ្ចប់កិច្ចប្រជុំ បច្ចេកទេសលើកទី៣៤ និងកិច្ចប្រជុំពេញអង្គលើកទី២៧ នៃអាយស៊ីស៊ី-អង្គរ កាលពីល្ងាចថ្ងៃទី២៧ ខែមករា ឆ្នាំ២០២១ ថ្លែងប្រាប់អ្នកសាព័ទ៌មាន។

លោកជំទាវបន្តថា ឈរលើមូលដ្ឋាន អចិន្រ្តៃយ៍ និងមានប្រសិទ្ធភាព អង្គភាពមួយនេះ នឹងជួយធានា បាននូវការត្រួតពិនិត្យ ស្ថានភាពនៃការអភិរក្សប្រាសាទ នៅតាមទីតាំង ដែលមានហានិភ័យ ក៏ដូចជាការថែរក្សា ជាប្រចាំនូវប្រាសាទទាំងអស់ ជាពិសេស នូវការអភិរក្សយូរអង្វែង និងសភាពដើម នៃប្រាសាទនានា ក្នុងតំបន់អង្គរ ដែលជាតម្លៃ ដ៏មានសារៈសំខាន់បំផុតក្នុងការរក្សា តំបន់រមណីយដ្ឋានអង្គរ នៅក្នុងបញ្ជីបេតិកភណ្ឌពិភពលោក(យូណេស្កូ)។ កិច្ចការអភិរក្សបេតិកភណ្ឌពិភពលោកអង្គររយៈពេល២៥ឆ្នាំមកនេះ គឺមិនមែនជាកាតព្វកិច្ច របស់ កម្ពុជា តែឯងប៉ុណ្ណោះទេ ប៉ុន្តែក៏ជាកាតព្វកិច្ច របស់អន្តរជាតិដែរ។ ក្នុងន័យនេះ ទោះបីជាមាន វិបត្តិសុខភាព សកល ក្រុមការងារអន្តរជាតិ បានបន្តស្នាក់នៅក្នុងប្រទេសកម្ពុជា ហើយបន្តអនុវត្តគម្រោង ការងារដដែល។ អ្នកជំនាញទាំងនេះ បានជួយសហការ និងដោះស្រាយ បញ្ហាលំបាកជាច្រើនដល់អ្នកជំនាញការខ្មែរផងដែរ។

លោកជំទាវ បានបញ្ជាក់ថា ក្រៅពីការងារអភិរក្សនិងអភិវឌ្ឍ នៅក្នុងតំបន់ រមណីយដ្ឋានអង្គរនេះ អាស៊ីស៊ី ក៏បានគាំទ្រ ចំពោះការអនុវត្ត ផែនការមេទេសចរណ៍ ក្នុងខេត្តសៀមរាប របស់កម្ពុជា ប៉ុន្តែសូមឱ្យការអនុវត្តឱ្យប្រព្រឹត្តិ ទៅតាមរបៀបរបរ ក្នុងតំបន់មួយ ដែលជាតំបន់បេតិកភណ្ឌ ដើម្បីធ្វើការអភិវឌ្ឍ ដោយចេរិភាព នៅតំបន់ខេត្តសៀមរាប អង្គរនេះ។

សូមបញ្ជាក់ថា កិច្ចប្រជុំបច្ចេកទេសលើកទី៣៤និងកិច្ចប្រជុំពេញអង្គ លើកទី២៧ នៃ គណៈកម្មាធិការអន្តរជាតិដើម្បីសម្របសម្រួលកិច្ចគាំពារនិងអភិវឌ្ឍន៍រមណីយដ្ឋានប្រវត្តិសាស្ត្រអង្គរ បានដំណើរការ រយៈពេលពីរថ្ងៃ គឺនៅថ្ងៃទី២៦-២៧ ខែមករា ឆ្នាំ២០២១ នៅខេត្តសៀមរាប ដោយមានលោកជំទាវ Eva Nguyên-Binh ឯកអគ្គរដ្ឋទូតបារាំងប្រចាំនៅកម្ពុជា និងឯកឧត្តម Mikami Masahiro ឯកអគ្គរដ្ឋទូតជប៉ុន ប្រចាំនៅកម្ពុជា ក្នុងនាមសហប្រធាននៃកិច្ចប្រជុំពេញអង្គនេះ៕SRP