ខេត្តសៀមរាប៖យើងទាំងអស់គ្នា ប្រហែលជាធ្លាប់បានឮពាក្យចាស់ដែលបានពោលថា ” ប្រសិនបើយើងសែបគប់បណ្ឌិត យើងនឹងក្លាយជាបណ្ឌិត ប្រសិនបើយើងសែបគប់ ជាមួយពាល បើយើងមិនក្លាយជាជនពាល ប្រហែលជាអ្នកគាំទ្រអំពើរបស់ពាល ” ហេតុដូច្នេះហើយទើបយើងឃើញ ភាគច្រើនបំផុត ក្នុងលោកយើងនេះ អ្នកមានរាប់អានអ្នកមាន រីឯ អ្នកក្រ រាប់អានអ្នកក្រ ពីព្រោះពួកគេ ងាយស្រួលនិយាយចូលគ្នា ជាមួយនឹងគំនិតប្រហាក់ប្រហែលគ្នា ឬក៏យើងអាចនិយាយបានថា “ ផ្ទះរស់នៅក្នុងតំបន់់ប្លុកអ្នកមាន ឬផ្ទះរស់នៅ ក្នុងតំបន់ប្លុកអ្នកក្រ។

ចំណុចដែលត្រូវលើកយកមកពិចារណា ទៅលើអត្ថបទនេះ គឺចង់ឱ្យមិត្តអ្នកអាន ងាកមកគិតអំពីខ្លួនឯងផ្ទាល់វិញ អំពីឥទ្ធិពល នៃបរិស្ថានជុំវិញខ្លួន ឥទ្ធិពល នៃទំនាក់ទំនង ជាមួយនិងមនុស្សដទៃទៀត ព្រមទាំង បរិស្ថានរស់នៅផ្ទាល់ខ្លួន ដោយមានសំណួរខ្លះថាតើ :
1: អ្នកនឹងក្លាយជាអ្វីនៅពេលអនាគត? ហើយបរិស្ថានជុំវិញខ្លួន របស់អ្នក និងការរៀបចំខ្លួនរបស់អ្នក ជួយគាំទ្រអ្នកដែរឬទេ?

2: សកម្មភាពបច្ចុប្បន្ន និងទម្លាប់បច្ចុប្បន្ន ឆ្ពោះទៅអ្វីមួយសំរាប់អនាគតដែរឬទេ?

៣: តើអ្នកអាចកត់សម្គាល់ សកម្មភាពនិងឫកពា មួយ ណាជាពាល ហើយ និងឫកពា មួយ ណាជាបណ្ឌិត បានដែរឬទេ?

3 : តើអ្នកអាចកត់សម្គាល់អំពីសកម្មភាព និង ការងាររបស់អ្នក ស្ថិតនៅទីកន្លែងណាមកដល់បច្ចុប្បន្ននេះ?

ជាទូទៅ មនុស្សនៅក្នុងលោកយើងនេះ តែងតែមានភាពច្របូកច្របល់ នៅក្នុងចិត្តគំនិត ហើយបរាជ័យ មិនបានអភិវឌ្ឍខ្លួន ដើម្បីឲ្យបានសម្រេច នូវអ្វីដែលយើងចង់បាននោះទេ មានមនុស្ស មិនច្រើនគ្នាឡើយ ដែលបានដាក់ផែនការចំពោះខ្លួនច្បាស់លាស់ សម្រាប់ពេលអនាគត។
ភាគច្រើននៅក្នុងចំណោម ពួកយើង
បាត់ ភាពក្លាហាន និងជំនឿជឿ ជាក់លើខ្លួនឯង
ដោយសារតែមានសំលេង នៅជុំវិញខ្លួន រួមទាំងផ្នត់គំនិតពីមុនមក មិនឲ្យយើងអភិវឌ្ឍខ្លួន មានដូចជា :

1: ស្លឹកឈើជ្រុះមិនឆ្ងាយពីគល់
2: ពូជយើងជាអ្នកក្រ ឬពាក្យថា ធ្វើម្ដេចបើយើងអ្នកក្រ”
3 : អ្នកគ្មានសមត្ថភាពទេ!

តាមពិត : “ភាពមានបាន ស្តុកស្តម្ភ “មិនមែនជាកម្មសិទ្ធិរបស់អ្នកណាឡើយ”។

ទាំងអស់នោះអាស្រ័យលើគំនិតតែប៉ុណ្ណោះ ” ប្រសិនបើអ្នកផ្លាស់ប្ដូរវិធីគិត អ្នកនឹងមានគំនិតថ្មី ដែលធ្វើឲ្យ បរិស្ថានរស់នៅ និងអ្វីៗជុំវិញខ្លួនរបស់អ្នក មានភាពប្រសើរឡើង ជារៀងរាល់ថ្ងៃ”,៕

និពន្ធដោយ លោកសឿន តុលា
ស្ថាបនិកក្រុមហ៊ុន ផា ផា យ៉ា PAPAYA NEXT STEP CO,.LTD
* PAPAYA REAL ESTATE
( គម្រោងអភិវឌ្ឍន៍អចលនទ្រព្យ)
* PAPAYA HOMESTAY
( គម្រោងលើវិស័យទេសចរណ៍)
* PAPAYA GARDEN
( គម្រោងលើវិស័យកសិកម្មនិងចែកចាយអាហារ)

ខេត្តកំពង់ចាម៖ក្នុងពេលជួបសំណេះសំណាល ជាមួយកងកម្លាំងបោសសំអាត គ្រាប់យុទ្ធភ័ណ និង​កាកសំណល់​សង្គ្រាម​ ដែល​កំពុង​បំពេញ​ បេសកកម្ម ស្រង់យកគ្រាប់យុទ្ធភ័ណ មិនទាន់ផ្ទុះ នៅក្នុង​​ទន្លេមេគង្គ​ សម្តេចស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ​ បានមានប្រសាសន៍ថា ការងារបោសសម្អាតមីន
ជាការងារមួយ ដែលរាជរដ្ឋាភិបាល ជាពិសេសអាជ្ញាធរមីនកម្ពុជា និងប្រតិបត្តិការ សកម្មភាពមីនជាតិ និងអន្តរជាតិ បានយកចិត្តទុកដាក់យ៉ាងខ្លាំងបំផុត ដើម្បីរំដោះផ្ទៃដី ដែលមានមីន និងសំណល់ជាតិផ្ទុះ ពីសង្រ្គាម ដើម្បី​រួមចំណែក​កាត់បន្ថយ​ភាព​ក្រីក្រ​ របស់ប្រជាពលរដ្ឋ តាម​រយៈ​យកដីទាំងនោះ ទៅប្រកបរបរកសិកម្ម។

បេី​តាមរបាយការណ៍ របស់ លោកនាយឧត្តមសេនីយ៍​ សែម​ សុវណ្ណនី​ អគ្គនាយកមជ្ឈមណ្ឌលជាតិ​ បាន​ឲ្យដឹង​ថា ​រហូតមក​ដល់​ថ្ងៃ​ទី១១​ ខែកុម្ភៈ​ ឆ្នាំ​២០២១​ ម្សិលមិញ គ្រាប់យុទ្ធភណ្ឌ ដែលកម្លាំងជំនាញ ប្រមូលបាន ​សរុប​ជាង​៨តោន​​​ ក្នុង​នោះរួមមាន​
១-គ្រាប់មិនទាន់ផ្ទុះ​ ទំហំ៦០-១០៥មីលីម៉ែត្រ​​ ចំនួន​៧២២គ្រាប់​។
២-គ្រាប់​ប្រភេទតូច​ (ប្រភេទកាំភ្លេីងដៃ​ និងកាំភ្លើងយន្ត)​ចំនួន​៥៤,៩២៥គ្រាប់​។
សរុបរួមមាន​ចំនួន​៥៥,៦៩៧គ្រាប់​ ដែលត្រូវបានរុករកឃេីញ នៅក្នុងឃ្លុបទី១ និងនៅ​សល់​៣ឃ្លុបទៀត​ ដែលត្រូវយកចេញជាបន្តបន្ទាប់។​ កម្លាំងជំនាញ ក៏បានរកឃើញ វត្ថុតាង រួមមាន មួកដែក កាំបិតកងទ័ព ស្លាកឈ្មោះរបស់​កងទ័ព​​ ​បំណែក​​ឆ្អឹង​ក្បាល​ ​ឆ្អឹង​ជើង​ ននិងសម្ភារផ្សេងៗមួយចំនួនផងដែរ។

សូមជម្រាបថាពិធីនេះ ធ្វើនៅភូមិវាល ឃុំមានជ័យ​ ស្រុក​ស្រីសន្ធរ​ ខេត្ត​កំពង់ចាម​ នៅថ្ងៃទី១២ ខែកុម្ភៈ​ ព្រឹកមិញ នេះដោយមានការចូលរួមពី លោក ហ៊ុន ណេង សមាជិកអចិន្ត្រៃយ៍រដ្ឋសភា និងជាអ្នកតំណាងរាស្ត្រមណ្ឌលកំពង់ចាម និងលោក អ៊ុន​ ចាន់ដា​ អភិបាលខេត្តកំពង់ចាម​ ព្រមទាំង​ថ្នាក់ដឹកនាំ​ និង​មន្ត្រី​ពាក់ព័ន្ធ​ ​ជា​ច្រើន​រូប​ទៀត៕SRP

ខេត្តបាត់ដំបង៖លោក ព្រួញរិទ្ធថា ត្រូវបាន ប្រកាសតែងតាំង ជាប្រធានមន្ទីរសាធារណការនិងដឹកជញ្ជូនខេត្តថ្មី ជំនួស លោកចាន់ សំបូរ ប្រធានមន្ទីរចាស់ ដែលត្រូវបានផ្លាស់ប្តូរ ទៅបម្រើការងារ នៅក្រសួងសាធារណការ។

ពិធីនេះធ្វើឡើងនាថ្ងៃទី១២ខែកុម្ភ: ឆ្នាំ២០២១ ព្រឹកមិញ នៅសាលាខេត្តបាត់ដំបង អធិបតីភាព លោក ស៊ុយ សាន អនុរដ្ធលេខាធិការ តំណាងលោកស៊ុន ចាន់ ថុល ជារដ្ធមន្ត្រីក្រសួងសាធារណការ និងដឹកជញ្ជូន។

ប្រធានមន្ទីរថ្មី លោក ព្រួញរិទ្ធថា បានឡើងប្តេជ្ញាចិត្តថា ក្នុងនាមលោក ទើបនិងកាន់តំណែងថ្មីនេះ លោកនិងខិតខំប្រែងប្រែង បន្តកិច្ចប្រត្តិបតិការ ដែលក្រសួងដាក់ផែនការ មកឲ្យខាងមន្ទីរ។

លោកខិតខំ ការងារស្ថាបនា ផ្លូវ ថ្នល់ស្ពាននានា ជុំវិញស្រុក ក្រុងមួយចំនួនដែលនៅសល់ កាលគ្រាទឹកជំនន់ រងការខូតខាតជាដើម។ល។

លោក ស៊ុយសាន ក៏បានមានមតិផ្តាំផ្ញើទៅដល់ប្រធានមន្ទីរថ្មី ត្រូវយកចិត្តទុកដាក់ ឲ្យបានល្អប្រសើរ នៅក្នុងអង្គភាពទាំងមូល ពិសេសការងារដែលក្រសួងឬថ្នាក់លើ បានដាក់ឲ្យមកមន្ទីរជាប្រចាំឆ្នាំ និងរួមគ្នាបន្តកិច្ចការជួយសង្គមជាតិយើងទាំងមូល ឲ្យបានល្អប្រសើរជាចាំបាច់បំផុត៕SRPដោយប៊ុនថេត

ខេត្តសៀមរាប៖ស្ត្រីម្នាក់មានវ័យជាង៧០ឆ្នាំម្នាក់ បានដើរដួលបណ្ដាលឲ្យស្លាប់។

ហេតុការណ៍បានកើតឡើង នៅវេលាម៉ោង៦និង៣០នាទី ថ្ងៃទី១២ ខែកុម្ភៈ ឆ្នាំ២០២១ នេះ នៅភូមិបុស្សតាត្រាវ ឃុំស្វាយចេក ស្រុកអង្គរធំ ខេត្តសៀមរាប។

សមត្ថកិច្ចបានដឹងថាជនរងគ្រោះមានឈ្មោះ ធិត ធឿន អាយុ៧៣ ឆ្នាំ រស់នៅភូមិឃុំខាងលើ។

បើតាមសមត្ថកិច្ច បញ្ជាក់ពីក្រុមគ្រួសារនៃសព ថា ម្ដាយរបស់គាត់មានជំងឺ លើសឈាម ជាងមួយឆ្នាំមកហើយ ខណ: ម្ដាយរបស់គាត់ បានអង្គុយក្រោមដើមដូងបត់ជើងតូច ខាងជើងផ្ទះ ក៏ដួលផ្ងាកក្រោយ ទើបបណ្ដាលឲ្យដាច់សរសៃឈាមស្លាប់តែម្ដង។

តាមការត្រួតពិនិត្យ របស់មន្ត្រីជំនាញ ករណីនេះពុំមានពាក់ព័ន្ធនឹងបទល្មើសព្រហ្មទណ្ឌនោះទេ៕SRP

ខេត្តសៀមរាប៖ក្មេងស្រីចំនួន២ នាក់ ត្រូវបានសិស្សអាយុ១៣ឆ្នាំចាប់រំលោភ ប៉ុន្តែជនសង្ស័យ បដិសេធថាមិនបានរំលោភនោះទេ។

យោងតាមរបាយការណ៍របស់សមត្ថកិច្ចបានបង្ហាញថានៅវេលាម៉ោង ១២និង៣០នាទី ១០ខែកុម្ភ: ឆ្នាំ២០២១ ការិយាល័យប្រឆាំងការជួញដូរមនុស្ស បានទទួលបណ្ដឹង ០១ករណី រំលោភសេពសន្ថវះលើអនិតិជន ឡើងកាលថ្ងៃទី០៩ខែ កុម្ភ: ឆ្នាំ២០២១ វេលាម៉ោង ១២និង៣០នាទី នៅចំណុច ផ្ទះជនសង្ស័យ ភូមិវាល សង្កាត់គោកចក ក្រុងសៀមរាប។

របាយការណ៍បានបន្តថា ករណីនេះ ជនរងគ្រោះ ទី១ មាន ឈ្មោះ ន .ស.ល.ក អាយុ ០៧ឆ្នាំ រស់នៅភូមិវាល សង្កាត់គោកចក ក្រុងសៀមរាប។
ទី២មាន ឈ្មោះ រ .ល.ហ្ស. អាយុ០៥ឆ្នាំ ត្រូវជាប្អូនជីដូនមួយ ជាមួយជនរងគ្រោះ ទី១ រស់នៅភូមិវាល សង្កាត់គោកចក ក្រុងសៀមរាប។

របាយការណ៍បានបញ្ជាក់ថា បន្ទាប់ទទួលបណ្ដឹង ការិយាជំនាញ បានប្រគល់ ជនរងគ្រោះ ទាំងពីរអោយទៅ មន្ទីរជំនាញខេត្តសៀមរាប ដើម្បីយកទៅធ្វើកោសល្យវិច័យ នៅមន្ទីរពេទ្យបង្អែក ខេត្តសៀមរាប។ នៅថ្ងៃទី ១១ខែកុម្ភ: ឆ្នាំ២០២១ វេលាម៉ោង ៩ព្រឹក ដោយមានការសម្របសម្រួលពី លោក កើត វណ្ណារ៉េត ព្រះរាជអាជ្ញា អមសាលាដំបូង ខេត្តសៀមរាប កំលាំងជំនាញដឹកនាំដោយលោកវរសេនីយ៍ត្រី អាង សែន នាយការិយាល័យ ចុះដល់កន្លែងកើតហេតុនឹងធ្វើការស្ដាប់ចម្លើយជនសង្ស័យ។

ជនសង្ស័យឈ្មោះ យេត សុខលីម ភេទប្រុស អាយុ ១៣ឆ្នាំ របរសិស្ស បានសារភាពថា ខ្លួនបានត្រឹមតែអោប នឹងបឺតមាត់ ជនរងគ្រោះទាំងពីរនាក់តែប៉ុណ្ណោះ។

ជនសង្ស័យ ត្រូវបានព្រះរាជ អាជ្ញា ប្រគល់អោយអាណាព្យាបាលធ្វើការអប់រំ។ ចំណែកសំណុំរឿងចាត់ការតាមនិតិវីធី បញ្ជូនទៅសាលាដំបូង ខេត្តសៀមរាប៕SRP

ខេត្តសៀមរាប៖មនុស្សចំនួន៣ នាក់ បានរងរបួសធ្ងន់ ខណៈជិះម៉ូតូ២គ្រឿង បុកគ្នា ក្នុងទិសដៅ បញ្រ្ចស់ទិសគ្នា។

ហេតុការណ៍បានកើតឡើង នៅវេលាម៉ោង០៨យប់ ថ្ងៃទី ១១ ខែកុម្ភៈ ឆ្នាំ២០២១ ស្តិតនៅក្នុងភូមិត្រពាំងស្វាយ ឃុំលាងដៃ ស្រុកអង្គរធំ ខេត្តសៀមរាប។

សមត្ថកិច្ចស្រុកអង្គរធំបាន រាយការណ៍ នៅព្រឹកនេះថា ភាគីទី១ម៉ូតូម៉ាក C១៣៥ហុងដា ឆ្នាំ២០១៤ ពណ៌ខ្មៅស្លាកលេខសៀមរាប ១R១២៨៧ ពីជើងទៅត្បូង បើកដោយឈ្មោះ ញឿម ញាក់ ភេទប្រុសអាយុ២២ អ្នកជិះមួយ ឈ្មោះឈ្មោះ ប៉ាវ ប៉ុម ភេទប្រុសអាយុ២១ឆ្នាំ អ្នកទាំងពីរ រស់នៅភូមិពាក់ស្នែង ឃុំពាក់ស្នែង ស្រុកអង្គរធំ ខេត្តសៀមរាប (រងរបួសធ្ងន់ទាំងពីរនាក់)។

ចំណែកភាគីទី២ ម៉ូតូ C១២៥ហុងដា
ឆ្នាំ២០១៥ ពណ៌ខ្មៅ ស្លាកលេខ សៀមរាប ១U៥៣២៨ ទិសដៅពីត្បូងទៅជើង បើកដោយឈ្មោះធូ សាំ ភេទស្រី អាយុ២០ឆ្នាំ នៅភូមិពាក់ស្នែង ឃុំពាក់ស្នែងស្រុកអង្គរធំ ខេត្តសៀមរាប (រងរបួសធ្ងន់)។ ដោយឡែកម៉ូតូទាំង០២គ្រឿង រងការខូចខាត សមត្ថកិច្ច នាំយកទៅរក្សាទុក នៅអធិកាដ្ឋាននគបាលស្រុកអង្គរធំ រងចាំកាដោះស្រាយ។

បើតាមសមត្ថកិច្ចបញ្ជាក់ថាគ្រោះថ្នាក់ចរាចរណ៍នេះ មូលហេតុ អ្នកបើកបរខ្វះការប្រុងប្រយ័ត្នពេលយប់។
ទោះជាយ៉ាងណា ជនរងគ្រោះទាំង៣នាក់ ត្រូវបានគេ បញ្ជួនទៅសង្គ្រោះ នៅមន្ទីរពេទ្យបង្អែកខេត្តសៀមរាប៕SRP

ខេត្តសៀមរាប៖ផ្ទះចំនួន២ខ្នង ត្រូវបានអគ្គីភ័យឆាប់ឆេះ រួមនិងទ្រព្យសម្បត្ដិមួយចំនួន។

ហេតុការណ៍បានកើតឡើងនៅវេលាម៉ោង១៧និង៣០នាទី ថ្ងៃព្រហស្បតិ៍ ថ្ងៃទី១១ ខែកុម្ភៈ ឆ្នាំ២០២១ នេះ នៅចំណុចភូមិអញ្ចាញ សង្កាត់នគរធំ ក្រុងសៀមរាប ខេត្តសៀមរាប។

សមត្ថកិច្ចបានដឹងថា ផ្ទះពលរដ្ឋ ដែលរងការឆេះ
ទាំងស្រុងចំនួន២ខ្នង គឺនៅជាប់គ្នា ក្នុងទីតាំងដីឡូត៍តែមួយ ម្ចាស់តែមួយ ប្រភេទផ្ទះផ្ទាល់ដី ប្រក់ស័ង្កសី ជញ្ជាំងក្ដា ទំហំ៖
-ទី១ ទំហំ ៧x១២ម៉ែត្រ
-ទី២ ទំហំ ៦x១២ម៉ែត្រ។
ម្ចាស់ផ្ទះ ប្ដីមាន ឈ្មោះទេព សំបាន ភេទប្រុស អាយុ៤៦ឆ្នាំ មុខរបរ អាជីវករ ប្រពន្ធឈ្មោះជាតិ សាហៀង ភេទស្រី អាយុ២៣ឆ្នាំ មុខរបរ អាជីវករ។

ករណីនេះបណ្ដាលឲ្យខូចខាត ប្រាក់ដុល្លារចំនួន ៤០០០ដុល្លារអាមេរិច ម៉ូតូចំនួន ៣គ្រឿង រុឺម៉កចំនួន ២គ្រឿង នឹងសម្ភារប្រើប្រាស់ផ្សេងៗក្នុងផ្ទះទាំងស្រុង។

ក្នុងប្រតិបត្តិការ នេះ សមត្ថកិច្ច ជួយពន្លត់ដោយកម្លាំងកងរាជអាវុធហត្ថខេត្ត ក្រុងសៀមរាបចំនួន១៥នាក់ ដឹកនាំដោយលោកវរសេនីយ៍ទោ ប្រាក់ វណ្ណះ មេបញ្ជាការមូលដ្ឋានកងរាជអាវុធហត្ថក្រុងសៀមរាប។

ដោយប្រើប្រាស់រថយន្ដពន្លត់អគ្គីភ័យចំនួន ៧គ្រឿង ប្រើអស់ទឹកចំនួន៤ឡាន ស្មើនឹង១៦០០០លីត្រ។
ក្នុងនោះ រថយន្ដរបស់កងរាជអាវុធហត្ថចំនួន២គ្រឿង ប្រើទឹកអស់១ឡានា្មើ៣០០០លីត្រ។
រថយន្ដរបស់ស្នងការនគរបាល ចំនួន៣គ្រឿង ប្រើទឹកអស់១ឡានស្មើ៦០០០លីត្រ
រថយន្ដរបស់អាជ្ញាធរអប្សរាចំនួន ២គ្រឿង ប្រើទឹកអស់២ឡានស្មើ៧០០០លីត្រ។«មូលហេតុ ទុស្សេខ្សែភ្លើង» ទោះជាយ៉ាងណា ពុំបណ្ដាលឲ្យឆេះរាលដាល ឫរងគ្រោះថ្នាក់ដល់មនុស្ស និងសត្វឡើយ ដោយរលត់វិញទាំងស្រុងនៅវេលាម៉ោង១៨និង៣០នាទី ថ្ងៃដដែល៕SRP

ភ្នំពេញ៖មន្ត្រីគយនៅព្រលានយន្តហោះអន្តរជាតិភ្នំពេញ សហការ ជាមួយ នគរបាលអន្តោប្រវេសន៍ នឹងនគរបាលមន្ទីរប្រឆាំងគ្រឿងញៀន ដោយមានការសម្របសម្រួល នីតិវិធីពីតំណាងអយ្យការ បានឃាត់ខ្លួនជនជាតិអ៊ុយហ្គង់ដា ម្នាក់ រួមជាមួយ ថ្នាំញៀនទម្ងន់ជិត២គីឡូក្រាម បម្រុងនាំឡើងយន្តហោះទៅកាន់ប្រទេសកូរ៉េខាងតបូង។

ប្រតិបត្តិការនេះ ធ្វើឡើងទៅនៅវេលាម៉ោង២១ និង៤៥នាទីយប់ ថ្ងៃទី៩ ខែកុម្ភ: ឆ្នាំ២០២១ នៅចំណុចខាងច្រកចេញដំណើរអន្តរជាតិ។

សមត្ថកិច្ចបានដឹងថា ខណៈមន្ត្រីគយកំពុងពិនិត្យ ទៅលើកញ្ចប់ឥវ៉ាន់ របស់អ្នកដំណើរ ដោយមានការសង្ស័យ ក៏ឆែករកឃើញម្សៅពណ៌សចំនួន២ថង់ ដែលលាក់ទុកក្នុងវ៉ាលីយួរដៃ ដូចគ្រឿងញៀន ក៏សហការជាមួយជំនាញពាក់ព័ន្ធ ឃាត់ខ្លួនម្ចាស់ឥវ៉ាន់ ទើបដឹងថាជាគ្រឿងញៀន មានទម្ងន់សរុប ១,៩២២.៩០ក្រាម(មួយពាន់ប្រាំបួនរយម្ភៃពីរក្បៀសកៅសិបក្រាម ប្រភេទ ថ្នាំញៀនមេតំហ្វេតាមីន។

ជនសង្ស័យ មានឈ្មោះ MUGARWA.JOEL ភេទប្រុស អាយុ៤៣ឆ្នាំ កាន់លិខិតឆ្លងដែនលេខB1322978 ត្រូវធ្វើដំណើរតាមជើងយន្តហោះលេខ(OZ.739)ចេញដំណើរពីភ្នំពេញឆ្ពោះទៅកាន់ប្រទេសកូរ៉េខាងត្បូង។

បច្ចុប្បន្នសមត្ថកិច្ច កសាងសំណុំរឿងបញ្ជូនទៅតុលាការដើម្បីអនុវត្តតាមផ្លូវច្បាប់៕SRP

ខេត្តកំពង់ចាម៖លំនៅឋាន​១ខ្នង​ រួមជាមួយ​នឹង​ទ្រព្យសម្បត្តិ​ ក្នុងផ្ទះ ត្រូវ​បាន​អគ្គីភ័យ​លេប​ត្របាក់ ខណៈ​ម្ចាស់​ផ្ទះ​រៀបចំ​សែន​កុងម៉ា​ ក្នុងឱកាសចូលឆ្នាំចិនថ្ងៃទី១ ហើយ​បិទទ្វារ​ ទៅលេងផ្ទះដន្លង នៅភូមិផ្សេង ដោយ​មិន​បាន​ ពន្លត់ភ្លើងទៀន។ ​​

ហេតុការណ៍​នេះ​ បានកេីតមានឡើងកាលពីវេលាម៉ោង២និង៣០នាទី ​រសៀល​ថ្ងៃទី១១ ខែកុម្ភ: ឆ្នាំ២០២០ ស្ថិតនៅ​ក្នុង​ភូមិសារ៉ាយ ឃុំបុសខ្នុរ ស្រុកចំការលើ ខេត្តកំពង់ចាម។

សមត្ថកិច្ច​បាន​ឲ្យដឹងថា​ ម្ចាស់ផ្ទះ​ដែល​រងគ្រោះ​មានឈ្មោះ សួង រដ្ឋា ភេទប្រុស អាយុ៥៥ឆ្នាំ ជាតិខ្មែរ រស់នៅ​ក្នុង​ភូមិ​កេីតហេតុ​ខាង​លើ​។
ករណីនេះ បណ្ដាលឲ្យផ្ទះទំហំ ៦ម៉ត្រ × ៨ម៉ែត្រ សង់អំពីឈើ ប្រក់ក្បឿង ជញ្ជាំក្ដា ថ្មក្រោម​ ឆេះ​អស់​ទាំងស្រុង​ រួម​នឹង​ទ្រព្យសម្បត្តិ​ មានដូចជា ទូរទស្សន៍០២គ្រឿង ស្រូវ១០បេ ប្រាក់៣០០ដុល្លា ខ្សែរកមាស៥ជី កង់ដៃ២១ធ្វើពីផ្លាកទីន និងសម្ភារប្រើប្រាស់ មួយចំនួនទៀត។

សមត្ថកិច្ច​បាន​បញ្ជាក់​ថា​ ចំពោះ​មូលហេតុ ម្ចាស់ផ្ទះសែនរួច បិតទ្វារ ទៅលេងផ្ទះដន្លង នៅភូមិថ្លុកក្រវ៉ាន់ ឃុំបុសខ្នុរ ដោយ​មិនបានពន្លត់ភ្លើងទៀននៅលើហ៊ឹងកុងម៉ា។

គួរ​បញ្ជាក់​ថា​ ក្នុងកិច្ចប្រតិបត្តិការនេះ លោកឧត្តមសេនីយ៍ស្នងការ ឯម កុសល បានបញ្ជាអោយរថយន្ដពន្លត់អគ្គីភ័យ របស់ស្នងការដ្ឋាននគរបាលខេត្ត ចំនួន០២គ្រឿង និងរថយន្ដរបស់អធិការដ្ឋាននគរបាល ស្រុកកំពង់សៀម ០១គ្រឿង នឹងរថយន្តរបស់នគរបាលស្រុកចំការលើមួយគ្រឿង ចុះជួយអន្ដរាគមន៍ ដោយប្រើប្រាស់ទឹកអស់០៤រថយន្ដ៕SRP

ខេត្តបាត់ដំបង៖ប្ដីប្រពន្ធមួយគូត្រូវបានប៉ូលិស
ខេត្តបាត់ដំបង ឃាត់ខ្លួនពាក់ព័ន្ធលួចយកទ្រព្យសម្បត្តិ។

ការឃាត់ខ្លួននេះធ្វើឡើង នៅ​ថ្ងៃទី​ ១០​ ខែ​ កុម្ភៈ​ ឆ្នាំ​ ២០២១​ ម្សិលមិញ នៅ​ចំណុច​ក្រុមទី​០១​ ភូមិ​វត្តលៀប​ សង្កាត់​ចំការសំរោង​ ក្រុងបាត់ដំបង​ ខេត្ត​បាត់ដំបង ដោយក្រុម​អន្តរាគមន៍​ បង្ការ​ បង្ក្រាប ដឹកនាំដោយលោក​វរសេនីយ៍ឯក​ ឈឿង​ គឹមសុង​ នាយការិយាល័យ​ នគរបាលព្រហ្មទណ្ឌកម្រិតស្រាល។

ជនសង្ស័យទីឈ្មោះ​ វ៉ា​ យ៉ុង​ ភេទប្រុស​ អាយុ​ ៥៣​ ឆ្នាំ​ (ប្ដី) ទី២ឈ្មោះ​ សុខ​ ផល្លា​ ភេទ​ស្រី​ អាយុ​៥៤​ ឆ្នាំ​ (ប្រពន្ធ)។ អ្នកទាំងពីររស់នៅក្រុមទី០១ ភូមិ​វត្តលៀប​ សង្កាត់​ចំការសំរោង​ ក្រុងបាត់ដំបង​ ខេត្តបាត់ដំបង។

សូមរំលឹកថាកាលពី​ថ្ងៃទី​ ០៩​ ខែ​ កុម្ភៈ​ ឆ្នាំ​ ២០២១​ វេលាម៉ោង​១៣និង៤០​នាទី​ នៅ​ចំណុច​ក្នុង​ផ្សារ​បន្លែ​ ភូ​ពុយ​ ស្ថិតក្នុងភូមិ​អញ្ចាញ​ សង្កាត់​អូរចារ​ ក្រុងបាត់ដំបង​ ជនសង្ស័យ ជាស្ត្រី បាន​ទិញចេក របស់ជនរងគ្រោះ ឈ្មោះ​ កាន់​ កុឡាប​ ភេទស្រី​ អាយុ​៥៣​ឆ្នាំ​ នៅ ភូមិ​ថ្នល់​ទទឹង​ ឃុំ​អូរអណ្តូង​ ស្រុក​សាលាក្រៅ​ ខេត្តប៉ៃលិន ជនសង្ស័យ​ បាន​អោយ​ជនរងគ្រោះ​ ច្រកចេកជនសង្ស័យ​ ក៏បានលួចយក កាបូបស្ពាយ ជនរងគ្រោះ ទុកនៅខាងក្រោយខ្នង រួច​ដេីរ​ចេញ​គេចខ្លួន​ ឡេីង​ជិះ​ម៉ូតូ​ជាមួយ​ ប្ដីគេចខ្លួនបាត់។

នគរបាលខេត្តបាត់ដំបងបានដឹងថាករណី
នេះ ដកហូតវត្ថុតាង​រួមមាន៖​
ម៉ូតូ​០១​គ្រឿង​ម៉ាក​ហុងដា​ ១២៥​ ពណ៌​ខ្មៅ​សេរីឆ្នាំ២០២០ លេខ​តួ-​ម៉ាស៊ីន​ 5813865 ពាក់ស្លាកលេខ​ បាត់ដំបង​ 1AL 7138។ កាបូប​ស្ពាយ​ពណ៌​ ដី​០១​ ទូរស័ព្ទ​ដៃ​ម៉ាក​ OPPO​ ០១​ គ្រឿង. ប្រាក់​ដុល្លារ​ ចំនួន​ ៣៧០០​ ដុល្លារ​ .ប្រាក់​បាត​ចំនួន​ ៩០,០០០​ បាត. អាវ​យឺត​ដៃ​វែង​ ពណ៌​លឿង​ ០១​ និង​ខោ​ជេីង​វែង​ពណ៌​ខ្មៅ​ ០១​ ជា​ខោអាវ​ ដែលជនសង្ស័យពាក់ធ្វេីសកម្មភាព។

បច្ចុប្បន្ននគរបាល កសាងសំណុំរឿងដេីម្បីបញ្ជូនទៅសាលាដំបូង​ខេត្ត​បាត់ដំបង​ចាត់ការ​បន្ត​តាម​នីតិវិធី​៕SRP

ភ្នំពេញ៖លោកដួង តារា រដ្ឋលេខាធិការទីស្ដីការគណ:រដ្ឋមន្ត្រី នឹងជាជំនួយការផ្ទាល់ សម្ដេចតេជោ ហ៊ុន សែន នាយករដ្ឋមន្ត្រី បានអះអាងថាក្រោយចាក់វ៉ាក់សាំងកូវីដ-១៩ បាន១ថ្ងៃ សុខភាពខ្ញុំ ពេលនេះល្អធម្មតា គ្មានសញ្ញាអ្វីមករំខានទេ។

តាមទំព័រផេកហ្វេសប៊ុកផ្លូវការរបស់ លោកដួង តារា បានសរសេរដា «តើមានប្រតិកម្មអ្វី បន្ទាប់ពីចាក់វ៉ាក់សាំងកូវីដ-១៩ បាន១ថ្ងៃរួចហើយ?»

លោកបានសរសេរបន្តថា៖ថ្ងៃទី ១១ កុម្ភះ នេះគឺបាន១ថ្ងៃហើយ បន្ទាប់ពីខ្ញុំបានចាក់ថ្នាំការពារកូវីដ-១៩ កាលពីម្សិលមិញ។ សុខភាពខ្ញុំពេលនេះល្អធម្មតា គ្មានសញ្ញាអ្វីមករំខានទេ ក្រៅពីសញ្ញាបញ្ជាក់ក្នុងខ្លួនថា សរីរាង្គរបស់ខ្ញុំត្រូវបានការពារដោយថ្នាំការពារកូវីដ-១៩ រួចហើយ។ ខ្ញុំកាន់តែមានអារម្មណ៍កក់ក្តៅក្នុងខ្លួន។​ ក្រោយពីចាក់ថ្នាំហេីយ​ យេីងទទួលបានកាត (ID card) ចាក់ថ្នាំកូវីដ១៩ ដែលមានសារៈប្រយោជន៍ដ៏សំខាន់សម្រួលដល់ការធ្វើដំណើរទៅក្រៅប្រទេសក្នុងករណីចាំបាច់ណាមួយ។

ដើម្បីសុវត្ថិភាពសុខភាព យើងត្រូវចាក់ថ្នាំការពារជំងឺឆ្លងកូវីដ-១៩​ ទាំងអស់គ្នា។ ដោយសារពេលនេះចំនួនថ្នាំមានកំណត់ សូមបងប្អូនរងចាំទៅតាមដំណាក់កាលនីមួយៗ។ សូមទាក់ទងក្រសួងសុខាភិបាលដើម្បីបានទទួលព័ត៌មានបន្ថែមអំពីការចាក់វ៉ាក់សាំងកូវីដ-១៩។

យើងចូលរួមកសាងអំពើល្អ ចែករំលែកក្តីស្រឡាញ់និងស្នាមញញឹម នឹងសូមមានចិត្តអាណិតស្រឡាញ់ពលរដ្ឋយើងគ្រប់ទីកន្លែងដោយគ្មានការរើសអើង។«ជូនពរថ្ងៃចូលឆ្នាំចិន ២០២១»

សូមជម្រាថានៅថ្ងៃទី១០ខែកុម្ភ: ឆ្នាំ២០២១ ម្សិលមិញ កូនប្រុសរបស់ សម្ដេច ហ៊ុន សែន និងកូនប្រសារ រួមទាំងអភិបាលខេត្តរាជធានី និងមន្ត្រីកងកម្លាំងសមត្ថកិច្ច មួយចំនួនទៀត បានចាក់វ៉ាក់សាំងកូវីដ-១៩ របស់ជំនួយរដ្ឋាភិបាលចិន នៅមន្ទីរពេទ្យក្នុងរាជធានីភ្នំពេញ៕SRP

ខេត្តសៀមរាប៖”ប្រសិនបើអ្នកជឿខ្លួនឯងថា អ្នកនឹងរស់នៅក្នុងភាពស្តុកស្តម្ភ ភាពស្ដុកស្ដម្ភនឹងជឿអ្នក” អត្ថន័យខាងលើនោះ  សូមដៅឲ្យយើងការជឿទៅលើចំណុចវិជ្ជមាន ដែលខ្លួនយើងចង់បានជាពិសេស ឥទ្ធិពលនៃជំនឿ សម្រាប់់ជីវិតរស់នៅនិងការធ្វើអាជីវកម្ម។

រាល់ការធ្វើអាជីវកម្មទាំងអស់ ដែលទទួលបានភាពជោគជ័យ មិនអាចកើតឡើង ដោយធម្មជាតិ ដោយភាពងាយស្រួល ឬដោយភាពចៃដន្យនោះទេ។

គ្រប់យ៉ាងកើតឡើង ចេញពីភាពក្លាហាន ឬក៏យើងហៅថា”ការប្រថុយដែលមានកម្រិតគ្រប់គ្រងបាន” ចេញពីការសម្រេចចិត្ត  ចេញពីភាពប្រឹងប្រែងនិងការរៀនពីកំហុសជាប្រចាំ  ពីព្រោះយើងដឹងហើយថា  ” សូម្បីតែយើង អង្គុយស្ងៀមមិនធ្វើអ្វីមួយ ក៏មានកំហុសទៅលើហេតុផលអ្វីមួយរួចទៅហើយដែរ”។

ដូច្នេះហើយការកែប្រែកំហុសឲ្យមានប្រសិទ្ធភាព  ឱ្យឃើញផ្លែផ្កា រាល់ការងារ ដែលសហគ្រិនជោគជ័យបានធ្វើគឺស្ថិតនៅក្នុងគោលដៅយ៉ាងច្បាស់ ដោយឈរលើខ្សែបន្ទាត់នៃគុណភាព ទំនាក់ទំនង ហើយមិត្តអ្នកអាន សូមចងចាំថា” កម្រិតគុណភាពរបស់សហគ្រិនភាព  អាស្រ័យទៅលើ កម្រិតគុណភាព ទំនាក់ទំនង ដែលពួកគេបានធ្វើឡើង”។

សហគ្រិនដែលបានទទួលជោគជ័យជានិរន្តរ៍ ពួកគាត់បានកំណត់ចក្ខុវិស័យ យ៉ាងច្បាស់លាស់ ដើម្បីឲ្យក្លាយជាអ្វីមួយនៅពេលខាងមុខ   ហើយពួកគេជឿលើចក្ខុវិស័យរបស់ខ្លួន  “ប្រសិនបើអ្នកជឿលើខ្លួនឯង ជោគជ័យនិងចូលរួមជឿលើអ្នក” ពីព្រោះអ្នកជឿលើហេតុផលចេញ ពីក្នុងខ្លួនរបស់អ្នកមក។

ខាងក្រោមនេះ ជាគោលដៅចំបងចម្បង ៥ចំណុច សម្រាប់សហគ្រិនដើម្បីពង្រីកសមត្ថភាពរលើកធុរកិច្ចរបស់ខ្លួន។

១. គិតធំ “ខ្ញុំអាចធ្វើបាន”

“ប្រសិនបើអ្នកគិតថា អាចធ្វើបាន អ្នកនឹងមើលឃើញនូវវិធីជាច្រើនដើម្បីឲ្យសម្រេចបានចំពោះការគិតនោះ”

ការប្រកាន់នៅជំហរថា :គ្មានអ្វីដែលមិនអាចទៅរួចនោះទេ បើអ្នកមិនទាន់ធ្វើវានោះ ពាក្យពេចន៍ទាំងអស់នោះ  មានតម្លៃលើសពីអ្វីដែលអ្នកបានគិត  ក្នុងកម្រិតដែលអ្នកមានអំឡុងពេលពេលបច្ចុប្បន្ន ប៉ុន្តែអ្នកត្រូវ ចាប់ផ្ដើមធ្វើពីឥឡូវនេះទៅ “ប្រសិនបើអ្នកនៅតែបន្តការប្រៀបធៀបការវាយតម្លៃមកលើខ្លួនឯងអ្នកមិនអាចមានចិត្តក្លាហានគិតធំបានឡើយ ហើយការគិតធំនេះ ធ្វើឲ្យអ្នកមានវិន័យដាច់ខាតចំពោះខ្លួនឯង។

២. ប្រកាន់យកការគិតវិជ្ជមាន:

សហគ្រិនជោគជ័យ មានមូលហេតុដែល ពួកគេជោគជ័យ ពីព្រោះ ពួកគេផ្លាស់ប្ដូរផ្នត់គំនិត អវិជ្ជមាន ទាំងឡាយ នៅក្នុងផ្នត់គំនិតចាស់ៗរបស់ពួកគេដោយបញ្ចូលឬជំនួសមកវិញនៅ នូវផ្នត់គំនិតវិជ្ជមាន។

“ប្រសិនបើអ្នកមានការគិតអវិជ្ជមាន អ្នកនឹងមើលឃើញពីពន្លឺនៃភាពជោគជ័យរចេញពីក្នុងខ្លួនរបស់អ្នក “ដូច្នេះហើយ  សូមអ្នក ព្យាយាមកែប្រែគំនិតអវិជ្ជមានចោល ហើយទទួលយកឥរិយាបថល្អៗសម្រាប់ខ្លួនឯងវិញ ” ការ គិតអវិជ្ជមាន គឺជាឧបសគ្គរាំងផ្លូវរបស់អ្នកមិនឲ្យធ្វើដំណើរទៅ ដល់កន្លែងដែលអ្នកចង់ទៅ រីឯការគិតវិជ្ជមាន នឹងពាំនាំរូបអ្នក ទៅដល់ទីកន្លែងតើអ្នកចង់ទៅ ”

៣. គិតអំពី ឈ្នះឈ្នះរួមគ្នា

សហគ្រិនដែលទទួលបានផលធំៗពីព្រោះពួកគេបានគិតធំ ពួកគេតែងតែប្រកាន់យកនូវកិច្ចសហប្រតិបត្តិការ  ដែលជាស្នូលធំមួយក្នុងទិសដៅរួម “ឈ្នះឈ្នះទាំងអស់គ្នា “ប្រសិនបើខ្ញុំបានចំណេញ អ្នកក៏បានចំណេញ គឺគ្មានអ្នកណាខាតឡើយ។

ក្រុមហ៊ុនមួយជោគជ័យ នឹងស្ដុកស្ដម្ភទៅបាន មិនមែនអាស្រ័យទៅលើតែ អតិថិជន ក្នុងរយៈពេលខ្លីនោះទេ គឺការគិតឃើញវែងឆ្ងាយ សម្រាប់មនុស្សជំនាន់ក្រោយ ព្រមទាំង ការសហការជាមួយនឹងដៃគូផ្សេងៗ ដើម្បីចូលរួមភាព  រីកចម្រើនរយៈពេលយូរ ក្នុងទិសដៅ ឈ្នះរួមគ្នា ” ខ្ញុំឈ្នះ  , អ្នកឈ្នះ , យើងឈ្នះ WIN  WIN  ព្រមទាំង

ការបង្កើតវប្បធម៌ រីករាយ និងការសំរេចចិត្តលឿន របស់បុគ្គលិកគ្រប់ផ្នែកនៅក្នុងស្ថាប័នផងដែរដូច្នេះ ហើយ ការប្រកាន់យកភាពត្រឹមត្រូវ និង ការប្រកាន់យកភាពយុត្តិធម៌ គឺជាអ្វីដែលពួកគេត្រូវធ្វើក្នុងបុព្វហេតុនៃសហប្រតិបត្តិការ។

៤.ក្លាហានសារភាពចំពោះកំហុស

“កំហុសពិតប្រាកដរបស់សហគ្រិនគឺកំហុស ដែលបណ្ដោយអោយមានដដែលៗ “កំហុសវាមិនមែនជារឿងធំដែលធ្វើឱ្យអ្នកបាក់ មុខមាត់ដូចអ្នកបានគិតនោះទេ តាមការពិតកំហុសគឺជាគ្រាប់ពូជ នៃភាពវាងវៃ នៃភាពត្រឹមត្រូវ សម្រាប់ជំហានបន្ទាប់ ប្រសិនបើអ្នកទទួលស្គាល់នូវកំហុសនោះ។

នៅក្នុងលោកយើងនេះគ្មានអ្វីដែលឥតខ្ចោះនោះឡើយសូម្បីតែផ្ទាំងគំនូរដ៏ល្អមួយត្រូវបានឆ្លងកាត់ការប្រើខ្មៅដៃ ដែល ដែលត្រូវលុបច្រើនដងសូមមិត្តអ្នកអានចង់ចាំថា “ខ្មៅដៃដែលល្អ គឺខ្មៅដៃដែលមានជ័រលុប”។

៥. ផ្នត់គំនិតនិងការតាំងចិត្តត្រូវតែរឹងមាំ

“គ្មានផលធំទាំងឡាយណា កើតឡើងចំពោះអ្នកគិត ស្រាលៗ ឬលំៗ ដោយគ្មានការតាំងចិត្ត មុតមាំបានឡើយ”

នៅពេលដែលអ្នកដឹងច្បាស់ថា អ្នកចង់បានអ្វីឲ្យប្រាកដនោះ គ្មានអ្វីដែលជាឧបសគ្គសំរាប់អ្នកទៀតឡើយ ពីព្រោះភាពពិតប្រាកដ បានធ្វើឲ្យអ្នកក្លាហានជាងមុនបានធ្វើឲ្យអ្នកលះបង់ទម្លាប់ដែរអត់ប្រយោជន៍ ដើម្បីធ្វើកិច្ចការចាំបាច់ ៗ ហើយនៅពេលនោះនឹងជួបមនុស្សជាច្រើន ដែលមានជំនាញនិងមានគំនិតជួយដល់អ្នក លើកស្ទួយអ្នកឲ្យទទួលបានជោគជ័យ។

ប៉ុន្តែរឿងទាំងអស់នោះ “ពួកគេត្រូវការដំបូងគឺអ្នកត្រូវមានការតាំងចិត្តមុតមាំ”។

និពន្ធដោយ៖ លោកសឿន តុលា ស្ថាបនិកក្រុមហ៊ុនផាផាយ៉ា PAPAYA NEXT STEP CO,.LTD

*PAPAYA REAL ESTATE «គម្រោងអភិវឌ្ឍន៍អចលនទ្រព្យ»

* PAPAYA HOMESTAY «គម្រោងលើវិស័យទេសចរណ៍»

*PAPAYA GARDEN «គម្រោងលើវិស័យកសិកម្មនិងចែកចាយអាហារ»