ខេត្តសៀមរាប៖ជាទូទៅ ភាពរីកចម្រើន កើតចេញពី គំនិត និងសកម្មភាព កែលម្អ គ្មានទីបញ្ចប់ ស្របជាមួយនិង ពាក្យសំដីដែលយើងនិយាយថា ” ជីវិតគឺជាការរៀន ភាពរីកចម្រើនចេញមកពីការរៀន ទាំងទ្រឹស្ដី ទាំងការអនុវត្ត”។

នៅក្នុងអត្ថបទនេះ គឺលើកយក អំពីគំនិត គន្លឹះ និងវិធីនៃការធ្វើអាជីវកម្ម ពីព្រោះ សហគ្រិនមានភារ:កិច្ចជាចម្បងទៅលើការសម្រេចចិត្តព្រមទាំងប្រកាន់ជាប់ជានិច្ចចំពោះការរៀនអ្វីៗដែលនៅជុំវិញខ្លួន ជាពិសេសនោះអំពីការថែទាំមនុស្សដែលទទួលបន្ទុកធ្វើការជំនួសមុខ។
សំរាប់ សម្រាប់សហគ្រិន : មានបច្ច័យសំខាន់5ប្រការដើម្បីបន្តភាពរីកចម្រើននៅក្នុងអាជីវកម្ម:

1. ពេលវេលានិងទីកន្លែង:

” ប្រសិនបើអ្នកយល់អំពី ផលិតផល យល់អំពីទីកន្លែង និង ដឹងពេលវេលា ដែលអតិថិជន ត្រូវការ អ្នកកំពុងតែឈរលើទីតាំងត្រឹមត្រូវ សម្រាប់អាជីវកម្មអ្នក ”

” Things are value because they are in right time and right place”
សម្រាប់ម្ចាស់អាជីវកម្មការយល់ដឹងអំពីផលិតផលរបស់ខ្លួននិងការរៀបចំឲ្យមនុស្សធ្វើការរួមគ្នានោះមិនទាន់គ្រប់គ្រាន់ឡើយ ពីព្រោះពួកគេត្រូវសម្លឹងមើលផ្នែកតម្រូវការអ្នកប្រើប្រាស់នៅក្នុងតំបន់មួយ នឹងពេលវេលានៃតម្រូវការទៅលើផលិតផលនោះ ” ប្រសិនអ្នកយល់អំពីពេលវេលានិង ទីផ្សាររបស់ផលិតផល ក្នុងតំបន់នោះ ” ការដឹងពេលណាអ្នកត្រូវវាយលុក និង ពេលណាអ្នកបំប៉នកម្លាំងថែម ហើយពេលណាអ្នកត្រូវតែកែប្រែដើម្បីភាពជោគជ័យ លុះត្រាតែអ្នកយល់យ៉ាងច្បាស់ភូមិសាស្រ្ត សម្រាប់ទីផ្សារ” ពីព្រោះការធ្វើជំនួញ ជាមួយនឹងការមានគុណភាពការងារខាងក្នុងអង្គភាពមមិនត្រូវបានធានាបានជោគជ័យយូរអង្វែងឡើយ អ្នកត្រូវយល់ដឹងអំពីសភាពការណ៍ខាងក្រៅដែលជាផ្នែកសំខាន់សម្រាប់សុវត្ថិភាព
អាជីវកម្ម និង សន្តិសុខហិរញ្ញវត្ថុ ។

ឧទាហរណ៍ជាក់ស្តែងក្រុមហ៊ុន “Kodark” ដែលជាក្រុមហ៊ុនជោគជ័យធំមួយខាងផ្នែក “ស្វីលថតរូបភាព” ហើយគ្មានវត្តមានដល់ពេលបច្ចុប្បន្ននេះ ដោយសារតែក្រុមហ៊ុនអាក់ខានក្នុងការបត់បែនដើម្បីរត់តាមសម័យកាល “digital age” ដែលមានរហូតដល់បច្ចុប្បន្ននេះ ហើយមានឧទាហរណ៍មួយទៀត គឺ ក្រុមហ៊ុន “Nokia” បានអវត្តមានបង្ហាញមុខ”Smart phone” ដែលស្ថិតក្នុងសម័យកាលប្រើប្រាស់ “Android and IOS” ប៉ុន្តែមាន
អាជីវកម្មតូចនិងក្រុមហ៊ុនជាច្រើនទៀតដែលបានបរាជ័យក្នុងកាទទួលយកភាពប្រែប្រួលនៃពេលវេលា។

2. ការយល់អំពីសមត្ថភាពរបស់មនុស្ស:
” the power of skills and power of human resources ”
” ជំនាញពិតប្រាកដរបស់ សហគ្រិន គឺ ជំនាញ រៀបចំ បង្កើតឲ្យមានមេដឹកនាំ នៅក្នុងប្រព័ន្ធការងារ ”

គ្រប់ម្ចាស់អាជីវកម្មមានមេរៀនដ៏លំបាកមួយដែលធ្វើឲ្យគេត្រូវការ យកមនុស្ស អោយត្រូវ ពីព្រោះ ទាំងអស់គ្នាប្រហែលជាដឹងហើយថាភាពប្រថុយប្រថានដ៏ធំបំផុតគឺ “គុណភាពការងារ” រាល់គុណភាពការងារ គឺកើតឡើងអាស្រ័យលើគុណភាពការងាររបស់មនុស្សអាស្រ័យលើសមត្ថភាពផ្សេងគ្នា ដែលជាកិច្ចការរបស់អាជីវកម្មត្រូវរៀបចំតាមតាមផ្នែកនីមួយ ដូចពាក្យចាស់លោកពោលថា:មនុស្សតែងតែមានប្រយោជន៍នៅពេលដែលយើងដាក់នៅក្នុងការងារ ប៉ុន្តែយើងត្រូវតែរៀនឲ្យយល់ “ឈើកោងគឺសម្រាប់ធ្វើកង់រទេះ ឈើត្រង់សម្រាប់ធ្វើកាំរទេះ” ពេលខ្លះមនុស្សអសមត្ថភាពចំពោះ ការនោះ ប៉ុន្តែពួកគេមានសមត្ថភាពល្អចំពោះកិច្ចការផ្សេងមួយទៀត និយាយរួមការយល់ដឹងអំពីជំនាញហើយរៀបចំមនុស្សឲ្យត្រូវជំនាញ គឺជាកិច្ចការរបស់ម្ចាស់អាជីវកម្ម។

3. វិន័យក្នុងអង្គភាព:

” Nothing works without discipline ”

ក្នុងអង្គភាពការងារត្រូវតែមានវិន័យល្អ ពីព្រោះគ្មានគុណភាពការងារល្អណាកើតឡើងដោយគ្មានវិន័យត្រឹមត្រូវបានឡើយ វិន័យជួយឲ្យពេលវេលាមានតម្លៃខ្លាំងឡើង។ ទោះបីវិន័យត្រូវបានកាត់ផ្តាច់ភាពយោគយល់ ឬ អត់ឱនទោសក្នុងកម្រិតណាមួយក៏ដោយ ប៉ុន្តែអ្វីៗទាំងអស់ផ្តើមចេញ
ពីខ្លួនអ្នក។
” អ្នកមិនអាចសម្រេចអ្វីបានឡើយប្រសិនបើអ្នកមិនដាក់វិន័យកែទំលាប់មិនល្អបាននោះ”។

4. ការត្រៀមខ្លួន:
” the more you prepare, the better you get ‘

ក្នុងការប្រយុទ្ធដែលបរាជ័យមិនមែនដោយសារកម្លាំងខ្លាំង ឬ កម្លាំងខ្សោយឡើយ។
ពួកគេបរាជ័យដោយសារតែពួកគាត់មិនបានបានធ្វើការត្រៀម ឬ រៀបចំទុកជាមុនឲ្យបានល្អ។
” អ្នកត្រៀម អ្នករៀបចំឲ្យបានច្រើនអ្នកកាន់តែទទួលបានជោគជ័យ”។

5. មនុស្សគាំទ្រ: ( supportive systems in every level )

នៅក្នុងលោកយើងនេះមនុស្សត្រូវការអ្នកគាំទ្រសម្រាប់ម្ចាស់អាជីវកម្ម អាជីវកម្មដើម្បីឲ្យចក្ខុវិស័យ ឬ ក្តីសុបិន្តរបស់អ្នកក្លាយជាការពិតអ្នកត្រូវការអ្នកចូលរួមបំពេញ និងគាំទ្រដើម្បីបំពេញកិច្ចការផ្សេង ប៉ុន្តែអ្នកដែលគាំទ្រល្អបំផុត គឺ មនុស្សដែលមានសមត្ថភាពគ្រប់គ្រងដើម្បីធ្វើការទៅលើផ្នែកលម្អិតផ្សេងៗគ្នាដើម្បីជួយគាំទ្រអំំណាចសហគ្រិន ឬ ម្ចាស់អាជីវកម្ម ” ប្រសិនបើអ្នកមានសុបិន្តធំហើយ កសាងកម្លាំងគ្រប់គ្រងបានធំអ្នកនិងទទួលបានលទ្ធផលធំដូចក្នុងក្តីសុបិន្តរបស់អ្នក”៕

និពន្ធដោយលោក សឿន តុលា ស្ថាបនិកក្រុមហ៊ុន ផា ផា យ៉ា
PAPAYA NEXT STEP CO,.LTD
* PAPAYA REAL ESTATE ( គម្រោងអភិវឌ្ឍន៍អចលនទ្រព្យ)
* PAPAYA HOMESTAY ( គម្រោងលើវិស័យទេសចរណ៍)
* PAPAYA GARDEN ( គម្រោងលើវិស័យកសិកម្មនិងចែកចាយអាហារ)

ខេត្តព្រះវិហារ៖ទីតាំងកែច្នៃគ្រឿងសង្ហារឹមមួយកន្លែងត្រូវបានសមត្ថកិច្ច ចម្រុះខេត្តព្រះវិហារចុះបង្ក្រាប។

ការបង្ក្រាបនេះធ្វើឡើងនៅរសៀល ថ្ងៃទី១៧ ខែកុម្ភៈ ឆ្នាំ២០២១ ស្ថិតក្នុងភូមិស្រអែម ឃុំស្រអែម ស្រុកជាំក្សាន្ត ខេត្តព្រះវិហារ នៅទល់រង្វង់មូល ដឹកនាំដោយលោក ស សុភា ក្រឡាបញ្ជីអយ្យការ អមសាលាដំបូង ខេត្តព្រះវិហារ តំណាងលោក វុធ សាវី ព្រះរាជអាជ្ញា រងអមសាលាដំបូងខេត្ត។

មន្ត្រីរដ្ឋបាលព្រៃឈើបានថ្លែងប្រាប់អ្នកសារព័ត៌មានថាការបង្ក្រាបនេះ ដោយសារទីតាំងស្តុកសន្និធិ ផលអនុផលព្រៃឈើ ចែកចាយនឹងកែច្នៃលក់បន្ត ដោយមិនមានច្បាប់ អនុញ្ញាត ដែលមានម្ចាស់ ឈ្មោះ ហួត ផល្លា ហៅក្រៅ(ហា) ភេទប្រុសអាយុ៥៩ឆ្នាំ មុខរបរលក់គ្រឿងសង្ហារឹម។

មន្ត្រីបានបន្តថា វត្ថុតាង ដែលមាននៅក្នុងរោង ស្តុកទាំងនោះ ត្រូវបានរឹបអូស ទាំងអស់យកទៅរក្សាទុកនៅ ផ្នែករដ្ឋបាលព្រៃឈើជាំក្សាន្ត ដើម្បីរៀបចំសំណុំរឿងបញ្ជូនទៅ សាលាដំបូងខេត្តព្រះវិហារ។

សូមជម្រាបថាខេត្តព្រះវិហារ បទល្មើសព្រៃឈើនៅតែបន្តកើតមាន យ៉ាង អណាធិបតេយ្យបើទោះបី មានការបង្ក្រាបពីជំនាញជាបន្តបន្ទាប់យ៉ាងណាក៏ដោយ។ ការដែលមានសកម្មភាពយ៉ាង អណាធិបតេយ្យ ខណ:ដែលសមត្ថកិច្ចបើកប្រតិបត្តិការ បង្ក្រាបយ៉ាងក្ដៅគគុកបែបនេះ គេនៅពុំទាន់ដឹងថា មានអ្វីនៅពីក្រោយខ្នងនោះឡើយ។ ក្នុងនោះត្រូវបានគេដឹងថាការដឹកជញ្ជូនបទល្មើសព្រៃឈើចេញពីខេត្តព្រះវិហារទៅខេត្តកំពង់ធំនឹងចេញពីខេត្តព្រះវិហារទៅខេត្តសៀមរាបដោយគ្មានការបង្ក្រាបផងដែរ៕SRP

ខេត្តសៀមរាប៖ផ្ទះមួយខ្នងនៅស្រុកសូទ្រនិគមបានរងការឆាប់ឆេះទាំងស្រុង។

ហេតុការណ៍បានកើតឡើងវេលាម៉ោង១៦និង៤០នាទី ថ្ងៃទី១៧ ខែកុម្ភ:ឆ្នាំ២០២១ នេះ នៅចំណុចភូមិស្រែប្រិយ៍ ឃុំចាន់ស ស្រុកសូទ្រនិគម ខេត្តសៀមរាប។

អាជ្ញាធរស្រុកសូទ្រនិគមបានឲ្យដឹងថា ម្ចាស់ផ្ទះឈ្មោះគុជ ងុិ ភេទប្រុស អាយុ៣៥ឆ្នាំ នៅភូមិ.ឃុំកើតហេតុខាងលើ។ ករណីបណ្ដាលឲ្យខូចខាតអស់ផ្ទះ០១ខ្នង ទំហំ០៥មx០៧ម ដំបូលស្បូវ ជញ្ជាំងស្លឹក ក្រាលក្ដា (ឆេះទាំងស្រុង);ប្រាក់ខ្មែរ៥០០០០រៀល ,ទូរទស្សន៍០១គ្រឿង,ទូរស័ព្វដៃ០២គ្រឿង,និងសម្ភារប្រើប្រាស់ក្នុងផ្ទះមួយចំនួនផងដែរ។ មូលហេតុ ទុស្សេខ្សែភ្លើង៕SRP

ខេត្តសៀមរាប៖ប៉ូលិសបានចុះទៅដល់ផ្ទះឈ្មោះភា ដោយរកមិនឃើញ មានលេងល្បែងស៊ីសង ដូចការចុះផ្សាយតាមទំព័រហ្វេសប៊ុកនោះទេ។

ខាងក្រោមនេះជាសេចក្ដីបំភ្លឺរបស់នគរបាលប៉ុស្តិ៍ស្លក្រាម៖លិខិតបំភ្លឺ ប៉ុស្តិ៍នគរបាលរដ្ឋបាលសង្កាត់ស្លក្រាម ក្រុងសៀមរាប ខេត្តសៀមរាប

មានកិត្តិយសសូមធ្វើការបកស្រាយបំភ្លឺចំពោះគណនេយ្យហ្វេសប៊ុកដែលមានឈ្មោះ «ប៉ុស្តិ៍មហានគរខ្មែរ ដែលបានសរសេរបង្ហោះថា «បទល្បែងស៊ីសងអាប៉ោងនិងប្រជុលមាន់ដ៏ធំមួយកន្លែងម្ចាស់ឈ្មោះ ភា ស្ថិតនៅ ភូមិថ្លុកអណ្តូង សង្កាត់ ស្លរក្រាម ក្រុងសៀមរាប លោក ទិត្យ ណារ៉ុង មិនហ៊ានបង្ក្រាបសង្ស័យថា…

ប៉ុស្តិ៍នគរបាលរដ្ឋបាលសង្កាត់ស្លក្រាម៖ មានកិត្តិយសសូមគោរពជម្រាបជូន ដល់បងប្អូនអ្នកសារព័ត៌មាននិងមហាជនតាមបណ្តាញសង្គមហ្វេសប៊ុកឲ្យបានជាថាៈ ក្រោយពីទទួលបានព័ត៌មានថាមានករណ៏ ខាងលើ នាយប៉ុស្តិ៍នគរបាលរដ្ឋបាលសង្កាត់ស្លក្រាម បានដឹកនាំមន្ត្រីក្រោមឱវាទចុះទៅធ្វើការត្រួតពិនិត្យទី តាំងខាងលើ នាថ្ងៃទី១៧ ខែកុម្ភៈឆ្នាំ២០២១ វេលាម៉ោង១៣និង៣០នាទី គឺគ្មានបនល្បែងស៊ីសងអាប៉ោងនិង ប្រជល់មាន់ខុសច្បាប់ដូចការចុះផ្សាយរបស់ម្ចាស់គណនេយ្យហ្វេសប៊ុកឈ្មោះ-ប៉ុស្តីមហានគរខ្មែរ »ឡើយ។

អាស្រ័យហេតុនេះសូមសាធារណៈជន អ្នកសារព័ត៌មាន និងអ្នកនិយមប្រើប្រាស់បណ្តាញទំនាក់ទំនង សង្គមសូមមេត្តាកុំមានការយល់ច្រឡំ និងមេត្តាទទួលជ្រាបជាព័ត៌មាន។

ប៉ុស្តិ៍នគរបាលរដ្ឋបាលសង្កាត់ស្លក្រាម៖ សូមថ្លែងអំណរគុណចំពោះកិច្ចសហការល្អរបស់សាធារណៈជន និងជាពិសេសបណ្ដាញទំនាក់ទំនងសង្គម ដែលបានចូលរួមចំណែករក្សាការពារសន្តិសុខ សុវត្ថិភាព សណ្តាប់ធ្នាប់សង្គម និងរិះគន់ក្នុងន័យស្ថាបនា និងទទួលយកជាមូលដ្ឋានធ្វើការកែលម្អនិងក៏សូមអំពាវនាវ ដល់សាធារណៈជន និងបណ្តាញសង្គមចៀសវាងការអត្ថាធិប្បាយ ចងក្រងខ្លឹមសារ រូបភាពសកម្មភាពបំភ្លើស ការពិត ជាហេតុបង្កឲ្យមានភាពវឹកវរបំពុលបរិយាកាសសង្គម ចលាចល បង្កការយល់ច្រឡំក៏ដូចជាភាពភ័យ ខ្លាចដល់ប្រជាពលរដ្ឋ និងអាចប្រឈមចំពោះមុខច្បាប់ជាធរមាន និងដើម្បីចៀសវាងការសន្និដ្ឋាននិងវាយ តម្លៃនោះមានឥទ្ធិពលប៉ះពាល់ដល់កិត្តិយសនិងសេចក្តីថ្លៃថ្នូររបស់បុគ្គលម្នាក់ៗ៕SRP

ភ្នំពេញ៖សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅវិមានសន្តិភាព នាថ្ងៃពុធ ទី ១៧ ខែកុម្ភៈ ឆ្នាំ២០២១ ព្រឹកមិញនេះ បានទទួលជួបពិភាក្សាការងារជាមួយលោកជំទាវ Maria Amelita C.Aquino ឯកអគ្គរដ្ឋទូតថ្មីហ្វីលីពីនថ្មីប្រចាំនៅកម្ពុជា។

នៅក្នុងជំនួបនោះលោកជំទាវ Maria Amelita C.Aquino បានពាំនាំនូវពាក្យផ្ញើសួរសុខទុក្ខពីឯកឧត្តមប្រធានាធិបតីហ្វីលីពីនជូនសម្ដេចតេជោ ហ៊ុន សែន ផងដែរ។ លោកជំទាវបានសម្តែងនូវការអបអរសាទរជូនចំពោះ សម្តេចតេជោ នាយករដ្ឋមន្ត្រី ក៏ដូចជាព្រះរាជាណាចក្រកម្ពុជា និងរាជរដ្ឋាភិបាលកម្ពុជាផងដែរ ដែលបានគ្រប់គ្រងជំងឺកូវីដ១៩បានយ៉ាងល្អប្រសើរ។ ដែលធ្វើអោយកម្ពុជាមានការរីករាលដាលឆ្លងជំងឺកូវីដ១៩នេះយ៉ាងតិចបំផុត។

លោកជំទាវ ក៏បានគោរពថ្លែងអំណរគុណ និងសំដែងនូវការរីករាយយ៉ាងខ្លាំងចំពោះ សម្តេចតេជោ នាយករដ្ឋមន្ត្រី ដែលបានដឹកនាំប្រទេសទទួលបាននូវសុខសន្តិភាព ដែលជាមូលដ្ឋានគ្រឹះនាំកម្ពុជាឱ្យមានកំណើនសេដ្ឋកិច្ចជាច្រើនឆ្នាំកន្លងមកនេះ ។ លោកជំទាវបានគោរពជម្រាបជូន សម្ដេចតេជោ នាយករដ្ឋមន្ត្រីថា បេសកកម្មរបស់លោកជំទាវមកកាន់ព្រះរាជាណាចក្រកម្ពុជានៅពេលនេះ គឺដើម្បីពង្រីក និងពង្រឹងកិច្ចសហប្រតិបត្តិការ រវាងប្រទេសទាំងពីរ ជាពិសេសលើវិស័យពាណិជ្ជកម្ម វិស័យសេដ្ឋកិច្ចនិងវិស័យវិនិយោគ។

លោកជំទាវបានបន្ថែមទៀតថា ការពង្រីក ពង្រឹងទំនាក់ទំនង ជាពិសេសលើវិស័យពាណិជ្ជកម្ម សេដ្ឋកិច្ច វិនិយោគនេះ គឺលោកជំទាវ នឹងយកចិត្តទុកដាក់ទៅលើកិច្ចព្រមព្រៀងដែលមានស្រាប់ដែលបានចុះហត្ថលេខាហើយនោះ។ លោកជំទាវនឹងពិនិត្យមើលលទ្ធភាព និងកិច្ចការផ្សេងៗទៀតដែលប្រទេសយើងទាំងពីរមានរួមគ្នានោះ។ លោកជំទាវក៏បានគោរពជម្រាបជូន សម្ដេចតេជោផងដែរថា នៅពេលខាងមុខ លោកជំទាវបានត្រៀមខ្លួនជាស្រេចដើម្បីធ្វើយ៉ាងណា ចាប់ផ្ដើមដំណើរការទំនាក់ទំនងសកម្មភាពពាណិជ្ជកម្ម សេដ្ឋកិច្ច និងវិនិយោគឡើងវិញ បន្ទាប់ពីជំងឺកូវីត១៩បានសាបរលាបទៅ ដែលកន្លងមកត្រូវបានផ្អាកមួយរយៈនោះ។

សម្ដេចតេជោ ហ៊ុន សែន បានថ្លែងនូវអំណរអរគុណ និងអបអរសាទរជូនចំពោះលោកជំទាវដែលត្រូវបានតែងតាំងជាឯកអគ្គរដ្ឋទូតវិសាមញ្ញ និងពេញសមត្ថភាពនៅព្រះរាជាណាចក្រកម្ពុជា និងក៏បានថ្លែងអំណរគុណចំពោះការនាំមកនូវការផ្តាំផ្ញើសួរសុខទុក្ខរបស់ ឯកឧត្តម ប្រធានាធិបតីហ្វីលីពីន ជូនចំពោះសម្ដេច។ សម្ដេចតេជោក៏បានយល់ស្របជាមួយលោកនឹងជំទាវ និងបានសំដែងនូវការរីករាយចំពោះទំនាក់ទំនងកម្ពុជា និងហ្វីលីពីន ដែលមានការរីកចម្រើន ធំធាត់ជាលំដាប់រហូតដល់ពេលនេះ ។

សម្ដេចតេជោ បានមានប្រសាសន៍ថា ជាការពិតជំងឺកូវីដ១៩ វាពិតជាបានធ្វើឲ្យមានការផ្អាកនៃសកម្មភាពសេដ្ឋកិច្ច វិនិយោគ និងពាណិជ្ជកម្មមួយចំនួនពិតមែន ប៉ុន្តែទោះជាយ៉ាងណាក៏ដោយយើងនឹងការត្រៀមខ្លួនចាប់ផ្ដើមសកម្មភាពទាំងនោះឡើងវិញ ហើយយើងគប្បីណាពិនិត្យមើលសកម្មភាព និងសក្តានុពលដទៃទៀតដែលមានជាពិសេសនៅក្នុងក្របខណ្ឌនៃ ខ័ណ្ឌអាស៊ានChina និង ASEM ផងដែរ។

សម្ដេចតេជោនាយករដ្ឋមន្ត្រី ក៏បានជម្រាបជូនលោកជំទាវ អគ្គរដ្ឋទូតហ្វីលីពីនថា កម្ពុជាយើងមានអង្ករនៅសល់ជាច្រើនប្រមាណ៦លានតោនក្នុងមួយឆ្នាំ ក្នុងន័យនេះ សម្តេចតេជោក៏បានស្នើឲ្យហ្វីលីពីន ពិនិត្យមើលលទ្ធភាពពិចារណា អំពីស្ថិរភាពស្បៀងជាអង្ករ ដែលមាននៅកម្ពុជាសម្រាប់ការនាំចេញទៅ

រទេសហ្វីលីពីន និងក្រៅពីនេះសម្តេចតេជោបានមានប្រសាសន៍ថា ហ្វីលីពីន អាចមកដាក់ទុនវិនិយោគនៅក្នុងកម្ពុជាយើងបាន តាមរយៈការដាក់ទុនលើផ្នែកម៉ាស៊ីនកិនស្រូវ ការសាងសង់ឃ្លាំងស្តុកស្រូវ និងបង្កើតជាបណ្ដាញទិញស្រូវស្តុកទុក ដើម្បីនាំចេញទៅប្រទេសហ្វីលីពីន។ ក្នុងន័យនេះដែរ សម្ដេចតេជោបានមានប្រសាសន៍ផងដែរថា យើងគប្បីណាពិនិត្យមើលសក្តានុពលណាដែលមាននៅក្នុងតំបន់របស់យើង ជាជាងពិនិត្យមើលសក្តានុពល នៅទីឆ្ងាយៗ ពោលគឺយើងអាចធ្វើយ៉ាងណា ទាញយកសក្តានុពលនេះមកប្រើប្រាស់ ហើយបំពេញឲ្យគ្នាទៅវិញទៅមក៕SRP

ខេត្តសៀមរាប៖លោក ទៀ សីហា អភិបាលខេត្តសៀមរាប បានថ្លែងថា ដោយសារតែការរាត្បាត នៃមេរោគកូវីដ-១៩ បានធ្វើឱ្យប្រជាពលរដ្ឋ មានការរងផល ប៉ះពាល់ជាច្រើន ក្នុងនោះប្រជាពលរដ្ឋ ដែលមានជីវភាពក្រីក្រ កាន់តែជួបការលំបាកខ្លាំង។ ហេតុនេះ រដ្ឋបាលស្រុកបន្ទាយស្រី បានសហការ ជាមួយសប្បុរសជន អង្គការដៃគូ និងប្រជាពលរដ្ឋ បានរួមគ្នាធ្វើស្រែសង្គម ដើម្បីយកអង្ករ មកជួយដល់ប្រជាពលរដ្ឋ ក្រីក្រ នៅក្នុងតំបន់នេះ ដែលនេះ គឺជាសកម្មភាពមួយ ជាគំរូមួយដ៏ល្អ និងជួយប្រជាពលរដ្ឋ បានទាន់ពេលវេលានៅពេលដែលពួកគាត់មានតម្រូវការខ្លាំង។

លោកថ្លែងយ៉ាងដូច្នោះនៅក្នុងពិធីចែកអង្ករ ដែលបានមកពីធ្វើស្រែ សង្គម របស់រដ្ឋបាល ស្រុកបន្ទាយស្រី ជូនដល់ ប្រជាពលរដ្ឋ ក្រីក្រទូទាំងស្រុកបន្ទាយស្រី ចំនួន២.៦៦៨គ្រួសារ ជាប្រភេទក្រ១ ក្រ២ និងប្រជាការពារភូមិ នាថ្ងៃទី១៧ខែកុម្ភៈ ព្រឹកមិញនេះ។

អភិបាលស្រុកបន្ទាយស្រី លោក ឃឹម ហ្វីណង់ បានឱ្យដឹងថា អង្ករ ដែលបានធ្វើការចែក ជូនប្រជាពលរដ្ឋក្រីក្រ នៅពេលនេះ គឺបានមកពីការបង្កបង្កើនផល ស្រូវលើផ្ទៃដីសែ្រទំហំ៤០ហិកតា ដែលរដ្ឋបាលស្រុក បានជួលពីបងប្អូន ប្រជាពលរដ្ឋ ក្នុងឃុំព្រះដាក់ ហើយហៅថាស្រែសង្គម ខណៈដែលការជួលដីស្រែ ពីបងប្អូនប្រជាពលរដ្ឋនេះ គឺរដ្ឋបាលស្រុក បានឱ្យថ្លៃឈ្នូលដល់ម្ចាស់ស្រែ ក្នុងមួយគ្រួសារពី ៣ ទៅ៤ការ៉ុងស្រូវ ទៅតាមទំហំដី ដែលបងប្អូន ប្រជាពលរដ្ឋមាន។

បើតាមលោក ឃឹម ហ្វីណង់ ក្រោយពីបង្កបង្កើនស្រូវ ក្នុងរដូវវស្សា រដ្ឋបាលស្រុក បានប្រមូលផលលើផ្ទៃដី៤០ហិកតានេះ បានស្រូវចំនួន៨០តោន រួចយកមកកិនជាអង្ករ បានចំនួន៤៣តោន សម្រាប់ចែកជូនបងប្អូនប្រជាពលរដ្ឋក្រីក្រ ប្រភេទក្រ១ ក្រ២ និងប្រជាការពារ សរុបទាំងអស់ក្នុងទូទាំង ស្រុកបន្ទាយស្រី មានចំនួន២.៦៦៨គ្រួសារ ដោយក្នុងមួយគ្រួសារទទួលបានចំនួន២០គីឡូក្រាម៕SRP

ខេត្តសៀមរាប៖បុរសម្នាក់ត្រូវបានប៉ូលិសក្រុងសៀមរាប ឃាត់ខ្លួន បន្ទាប់ពីបានធ្វើសកម្មភាពលួចយករថយន្ត របស់អ្នកលក់គ្រឿងអគ្គិសនី។ ការឃាត់ខ្លួនធ្វើនៅម៉ោងល្ងាច ថ្ងៃទី១៦ខែកុម្ភៈ ម្សិលមិញ ស្ថិតនៅ ភូមិធ្លកអណ្ដូង សង្កាត់ ស្លក្រាម ក្រុងសៀមរាប។

ជនសង្ស័យ ឈ្មោះ  ភូ  វុទ្ធី អាយុ២៨ឆ្នាំ ជាងជួសជុលរថយន្ត មានស្រុកកំណើតនៅភូមិសូភាស ឃុំសូភាស ស្រុកស្ទឹងត្រង់ ខេត្តកំពង់ចាម។ បច្ចុប្បន្នស្នាក់នៅ ភូមិធ្លកអណ្ដូង សង្កាត់ស្លក្រាម ក្រុងសៀមរាប។

ហេតុការណ៍លួចនៅថ្ងៃទី១៦ ខែកុម្ភៈ ឆ្នាំ២០២១ វេលាម៉ោង០២រសៀល នៅក្នុងចំណុចទល់មុខ កន្លែងលក់គ្រឿងបន្លាសថយន្ត យីហោខ្លាសរ ស្ថិតនៅភូមិធ្លកអណ្ដូង សង្កាត់ស្លក្រាម ក្រុងសៀមរាប។

ស្នងការរងទទួលការងារព្រហ្មទណ្ឌ លោកឧត្តមសេនីយ៍ត្រី ភឹង ចិន្តារ៉េត បានបញ្ជាក់ថាជនរងគ្រោះ ឈ្មោះ ឆាយ រតនៈ ភេទប្រុសអាយុ២១ឆ្នាំ មានទីលំនៅបច្ចុប្បន្ន ភូមិពេជ្ជោរ ឃុំក្រឡាញ់ ស្រុកក្រឡាញ់ ខេត្តសៀមរាប មុខរបរលក់គ្រឿងអគ្គិសនី។ ជនរងគ្រោះ បានបើករថយន្តមួយគ្រឿងម៉ាក toyota តាកូម៉ា ស៊េរីឆ្នាំ២០០៥ ពណ៌ទឹកប្រាក់ ពាក់ស្លាកលេខ សៀមរាប 2C-1975 លេខតួ 5TELU42N35Z098742. លេខម៉ាស៊ីន 1GR0695935 បានចុះមកទិញគ្រឿងបន្លាស់រថយន្ត ដោយមិនបានដកកូនសោរ ចេញពីរថយន្ត ហើយបានដើរចូលទៅទិញគ្រឿងបន្លាស់រថយន្ត។ ភ្លាមៗនោះ ជនសង្ស័យ បានចូលទៅក្នុងរថយន្ត រួចហើយបញ្ឆេះរថយន្ត បើកចេញទៅកើតតាមបណ្ដោយផ្លូវជាតិលេខ៦។  ម្ចាស់រថយន្ត ក៏បានហៅម៉ូតូឌុប ជិះដេញតាមពីក្រោយ បានចម្ងាយប្រហែល៣០០ម៉ែត្រ ដល់ចំណុច ផ្លូវចូល ទៅវត្តត្រាំនាគ ស្ថិតនៅភូមិធ្លក់អណ្ដូង សង្កាត់ស្លក្រាម ក្រុងសៀមរាប ទើបឃាត់រថយន្តបាននឹងរាយការណ៍ មកសមត្ថកិច្ចជួយធ្វើអន្តរាគមន៍។

ក្រោយពីការសាកសួរបុរសរូបនេះ មិនអាចឆ្លើយបំភ្លឺ បាននោះទេ ដោយសារមានសភាពដូចជាមនុស្សបែកថ្នាំ។​សមត្ថកិច្ចបានធ្វើ តេស្តរកសាធាតុញៀន នៅក្នុងទឹកនោម ជាលទ្ធផល ឃើញថា(វិជ្ជមាន)។ បច្ចុប្បន្ន សមត្ថកិច្ចកសាងសំណុំរឿងបញ្ជូនទៅសាលាដំបូងអនុវត្តតាមនីតិវិធី៕SRP

ភ្នំពេញ៖សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានអំពាវនាវចំពោះថ្នាក់ដឹកនាំ មន្ដ្រីរាជការ បុគ្គលិកសុខាភិបាល អ្នកផ្ដល់សេវាទាំងអស់ ត្រូវចូលរួមគាំទ្រការអនុវត្ដគោលនយោបាយ គាំពារសង្គមរបស់រាជរដ្ឋាភិបាល ឱ្យមានប្រសិទ្ធភាពខ្ពស់ ដើម្បីឈានទៅសម្រេចបានគោលដៅរបស់រាជរដ្ឋាភិបាល តាមការកំណត់។

តាមរយៈសាលិខិត អបអរសាទរ ទិវាសុខភាពមាតា ទារក និងកុមារ ថ្ងៃទី២១ ខែកុម្ភៈ ឆ្នាំ២០២១ សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិ នៃផែនការសកម្មភាពរួម អគ្គលេខាធិការអង្គការសហប្រជាជាតិ ដើម្បីសុខភាពស្ដ្រី និងកុមារ បានអំពាវនាវចំពោះថ្នាក់ដឹកនាំ មន្ដ្រីរាជការ បុគ្គលិកសុខាភិបាល អ្នកផ្ដល់សេវាទាំងអស់ ចូលរួមគាំទ្រការអនុវត្ដគោលនយោបាយ គាំពារសង្គមរបស់រាជរដ្ឋាភិបាល ឱ្យមានប្រសិទ្ធភាពខ្ពស់ ដើម្បីឈានទៅសម្រេចបានគោលដៅរបស់រាជរដ្ឋាភិបាល តាមការកំណត់។ ទន្ទឹមគ្នានេះតាមរយៈសាលិខិតដដែល សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ក៏បានអំពាវនាវដល់គ្រប់ស្ថាប័ន ពាក់ព័ន្ធទាំងអស់ ទាំងជាតិ និងអន្ដរជាតិ សូមជួយ និងបន្ដជួយវិនិយោគគាំទ្រ ដល់ការងារសុខភាពមាតា កុមារ និងទារក នៅកម្ពុជា។

សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន សង្ឃឹម និងជឿជាក់ថា រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃ និងប្រកបដោយគតិបណ្ឌិតរបស់ សម្ដេចតេជោ ហ៊ុន សែន នាយករដ្ឋមន្ដ្រី នៃកម្ពុជា នឹងបង្កើនលទ្ធភាពថ្មីៗបន្ថែមទៀត ក្នុងការធ្វើឱ្យកាន់តែប្រសើរឡើង នូវសា្ថនភាពសុខភាពមាតា ទារក និងកុមារនៅកម្ពុជា។

ក្នុងទិវាសុខភាពមាតា ទារក និងកុមារ ថ្ងៃទី២១ ខែកុម្ភៈ ឆ្នាំ២០២១នេះ សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ក៏បានផ្ដល់អនុសាសន៍ក្នុងការថែទាំសុខភាពម្ដាយ និងកូន ក្នុងបរិបទ«រស់នៅធម្មតា»បែបគន្លងថ្មី៕SRP

ខេត្តសៀមរាប៖នៅក្នុងពិភពលោកយើងនេះ មានមនុស្សចំនួនតែ 15 ភាគរយប៉ុណ្ណោះ ដែលហ៊ានសុបិនធំនឹងដាក់គោលដៅត្រូវធ្វើនៅក្នុងជីវិតរបស់ពួកគេ។ ប៉ុន្តែយើងក៏ដឹងហើយថា គ្រប់គ្នាទទួលបានពេលវេលា 24 ម៉ោងក្នុងមួយថ្ងៃ ស្មើគ្នា ប៉ុន្តែតម្លៃនៃការប្រើម៉ោងឬក៏ពេលវេលាមិនដូចគ្នាឡើយ។

មនុស្សដែលបានផ្លាស់ប្ដូរពិភពលោក ពួកគេ ចេះប្រើម៉ោងឱ្យមានតម្លៃហួសពីអ្វីដែលយើងបានគិតនោះដោយសារតែពួកគេ ” គិតធំ “ឬក៏ពួកគេសុបិនធំ មិនត្រឹមតែប៉ុណ្ណោះ ពួកគេត្រូវបានឆ្លងកាត់នូវជីវិតគ្រោតគ្រាតនិងសែនលំបាក ភាគច្រើនបំផុតពួកគេកើតនៅក្នុងត្រកូល ក្រីក្រ ប៉ុន្តែដោយសារតែ ភាពមិនព្រមចុះចាញ់និងឧបសគ្គ ភាពតស៊ូនិងភាពអត់ធ្មត់ពួកគេក្លាយជាអ្នកមានដ៏អស្ចារ្យនៅក្នុងពិភពលោកយើងនេះ ព្រមទាំងផ្ដល់ឱកាសការងារជាច្រើនសម្រាប់មនុស្សលោក និងកែប្រែសេដ្ឋកិច្ចឲ្យរីកចម្រើនទៅដល់មនុស្សជាតិ។ នៅទីនេះសូមលើកយកឧទាហរណ៍មួយចំនួនដើម្បីបញ្ជាក់ជូនដល់មិត្តអ្នកអាន ដើម្បីធ្វើការពិចារណា:

1: Oprah Winfrey .
Oprah Winfrey ត្រូវបានកើតថ្ងៃទី 29 ខែមករា ឆ្នាំ 1954 ជាជនជាតិអាមេរិកាំងនិងជាម្ចាស់កម្មវិធី ” tv show”

ពីអតិតកាលអ្នកស្រីត្រូវបានគេចាប់រំលោភជាច្រើនដងកាលពីគាត់នៅវ័យកុមារភាពហើយត្រូវបានគេដេញចេញទីកម្មវិធី ‘ tv show ” ដោយសារតែរូបរាងរបស់គាត់មិនសាកសមជាមួយនឹងកម្មវិធីក៏ប៉ុន្តែ អ្នកស្រីមិនដែលបោះបង់ចោល ” សុបិនធំ ” របស់គាត់ឡើយគឺគាត់ចង់ផ្លាស់ប្ដូរពិភពលោកតាមរយៈការសម្ដែងនិងការរៀបចំរបស់គាត់ មកទាល់ពេលបច្ចុប្បន្ននេះ Oprah Winfrey មានទឹកប្រាក់ ” Net worth $ 2.6 billions ” ជាង 2 កោដិដុល្លារ ដែលជាស្ត្រីរកលុយតាមសមត្ថភាពនឹងក្លាយជាស្ត្រីអ្នកមានបំផុតក្នុងពិភពលោក នេះដោយយោងទៅតាមទស្សនាវដ្តី Forbes 2020 ។
អ្នកស្រីបានមានប្រសាសន៍នៅក្នុង TV របស់គាត់ថា ”
” នៅក្នុងជីវិត យើងបានបាត់បង់នូវអ្វីៗជាច្រើនប៉ុន្តែសូមកុំឲ្យបាត់ និងបាក់ទឹកចិត្ត យើងឱ្យសោះ”

2: Jack Ma

” គឺជាអ្នកជំនួញនិងជាអ្នកវិនិយោគផ្នែកអ៊ីនធើរណិតរបស់ជនជាតិចិន”
លោក Jack Ma កើតនៅ ឆ្នាំ 1964 ក្នុងគ្រួសារក្រខ្សត់ នៅក្នុងអតីតកាលរបស់គាត់ គាត់ត្រូវបានគេបដិសេធមិនឲ្យធ្វើការរាប់មិនអស់ប៉ុន្តែលោក Jack Ma មិនដែលបាក់ទឹកចិត្តរាល់ការបដិសេធនោះទេហើយគាត់មានសុបិន្តឱ្យក្លាយជាអ្នកបង្កើតការទិញលក់ទំនិញតាមអ៊ីនធឺណិត ខ្នាតយក្សក្នុងប្រទេសចិននិងទូទាំងពិភពលោក។

លោកបានបរាជ័យរាប់មិនអស់ មនុស្សជាច្រើនបានសើចចំអកដាក់លោក ក៏ប៉ុន្តែទាំងអស់នោះ គាត់បានបំលែងការឈឺចាប់ឲ្យក្លាយជាកម្លាំងខ្លាំងឡើង ៗ រហូតដល់ក្រុមហ៊ុនរបស់លោកឈ្មោះ ” ALIBABA ” បានទទួលល្បីល្បាញទូទាំងពិភពលោក ចំពោះការទិញទំនិញតាមប្រព័ន្ធអ៊ីនធឺណិត ។

មកទល់ពេលបច្ចុប្បន្ននេះ លោក Jack Ma មានទ្រព្យ សម្បត្តិជាសាច់ប្រាក់ : Net worth 65.3 billions USD ( Forbes 2020 )
ទាំងអស់នេះគ្រាន់តែជាការលើកឡើង ចំនួនតូចមួយតែប៉ុណ្ណោះ។

សូមចងចាំថា: ការគិតធំធ្វើឲ្យយើងមានការគិតទូលាយ ពង្រីកការយល់ដឹងបានលឿន និងឆាប់យល់អំពីហេតុនិងផល អ្វីៗជុំវិញខ្លួនព្រមទាំងពិភពលោកផងដែរ។
ការគិតធំមិនមែនមានន័យថាយើងប្រថុយធំឬក៏នឹងបាត់បង់ធំនោះឡើយ ផ្ទុយមកវិញ កាកគិតធំធ្វើឲ្យយើងចេះរៀបចំចាត់ចែងការងារតូចៗលំអិត ដែលអាចគ្រប់គ្រងបានដើម្បីឲ្យបានសម្រេចកិច្ចការធំៗ ,។

ពីព្រោះពួកគេយល់ថា ” តើការរៀបចំចាត់ចែងការងារតូចលម្អិតឲ្យបានម៉ត់ចត់គឺជាការទទួលខុសត្រូវដ៏ធំបំផុតចំពោះកិច្ចការធំៗ ដែលនឹងកើតឡើងជាបន្តបន្ទាប់”។ គ្រោះថ្នាក់ទាំងឡាយឬក៏ហានិភ័យធំៗកើតឡើងចំពោះមុខជំនួញ មិនមែនដោយសារតែការគិតធំនោះទេ ភាគច្រើនបំផុតដែលកើតឡើងដោយសារពួកគេចង់បានផ្លែផ្កាលឿនចង់ឃើញលទ្ធផលលឿនដោយប្រើវិធីផ្លូវកាត់ជាច្រើន ជាងការពិចារណាម៉ត់ចត់ ហើយពុំបានយល់ហេតុផលនៃកម្លាំងការងារតូចដើម្បីឱ្យសម្រេចកិច្ចការធំនោះឡើយ។
បំណងនៅក្នុងអត្ថបទថ្ងៃនេះ សូមឱ្យមិត្តអ្នកអានធ្វើការរិះពិចារណាពីព្រោះយើងទាំងអស់គ្នាអាចគិតធំ អាចចូលរួមផ្លាស់ប្ដូរពិភពលោក អាចទទួលបានផលធំ ” តាមរយៈ៉ ការរៀបចំចាត់ចែងការងារតូចៗលម្អិតឲ្យបានមត់ចត់ និង្ ចូលរួមសហការឲ្យបានច្រើនដើម្បីពង្រីកនូវផលបរយោជន៍ទាំងសងខាង ”

ប្រសិនបើគេបានផលប្រយោជន៍ យើងបានផលប្រយោជន៍ ហេតុអ្វីយើងមិនចាប់ដៃគ្នា?

និពន្ធដោយ លោក : សឿន តុលា

ស្ថាបនិកក្រុមហ៊ុន ផា ផា យ៉ា

PAPAYA NEXT STEP CO,.LTD

* PAPAYA REAL ESTATE
(គម្រោងអភិវឌ្ឍន៍អចលនទ្រព្យ)

* PAPAYA HOMESTAY

( គម្រោងលើវិស័យទេសចរណ៍)

* PAPAYA GARDEN

( គម្រោងលើវិស័យកសិកម្មនិងចែកចាយអាហារ)

ភ្នំពេញ៖សម្ដេច ស ខេង រដ្ឋមន្រ្តីក្រសួងមហាផ្ទៃនៅព្រឹកថ្ងៃពុធ ទី១៧ ខែកុម្ភៈ ឆ្នាំ២០២១ នេះ បានអញ្ជើញដឹកនាំកិច្ចប្រជុំឆ្លងខ្លឹមសារសម្រាប់ត្រៀមសន្និបាតក្រសួងមហាផ្ទៃ នៅទីស្ដីការក្រសួងមហាផ្ទៃ។

មានប្រសាសន៍បើកិច្ចប្រជុំ សម្ដេច ស ខេង បានថ្លែងអំណរគុណ និងកោតសរសើរ ថ្នាក់ដឹកនាំគ្រប់អគ្គនាយកដ្ឋាន ដែលបានរៀបចំរបាយការណ៍ ផ្ញើជូនមកកាន់ថ្នាក់ដឹកនាំ និងជាពិសេសថ្លែងអំណរគុណ ក្រុមការងារដឹកនាំដោយ លោក សក់ សេដ្ឋា ដែលបានរៀបចំរបាយការណ៍ទាំងនោះដាក់ឆ្លងកិច្ចប្រជុំនាថ្ងៃនេះ។

លោកនាយឧត្តមសេនីយ៍ ប៉ោង ភក្ដិ អគ្គលេខាធិការ នៃអគ្គលេខាធិការដ្ឋានក្រសួងមហាផ្ទៃ បានធ្វើរបាយការណ៍ស្ដីអំពីដំណើរការរៀបចំខ្លឹមសារសម្រាប់ត្រៀមមហាសន្និបាត មុននឹងសម្ដេចបន្តដឹកនាំកិច្ចប្រជុំពិភាក្សាលើចំណុចសំខាន់ៗ ពាក់ព័ន្ធនឹងសេចក្ដីព្រាងរបៀបវារៈសន្និបាត និងកិច្ចការសំខាន់ៗមួយចំនួនទៀត៕SRP

ខេត្តសៀមរាប៖នគរបាលប្រឆាំង ការជួញដូរមនុស្ស និងការពារអនីតិជន ខេត្តសៀមរាប បានចាប់ខ្លួន បុរសម្នាក់ ករណី រំលោភសេពសន្ថវៈ លើអនីតិជន។

ការចាប់ខ្លួនធ្វើឡើងនៅថ្ងៃទី១៥ ខែកុម្ភៈ ឆ្នាំ ២០២១ បន្ទាប់ពីទទួលបណ្ដឹងពីក្រុមគ្រួសារ របស់ជនរងគ្រោះ។

ជនសង្ស័យ ឈ្មោះ គង់ សំអឿន ភេទប្រុស អាយុ៣០ឆ្នាំ ជនជាតិខ្មែរ មុខរបរ ជាងក្រឡឹងគ្រឿងរថយន្ត មានទីលំនៅបច្ចុប្បន្ន ភូមិសាលាកំរើក សង្កាត់សាលាកំរើក ក្រុងសៀមរាបខេត្តសៀមរាប។

យោងតាមរបាយការណ៍បង្ហាញថានៅថ្ងៃទី ១៤ខែកុម្ភៈ ឆ្នាំ ២០២១ វេលាម៉ោង១៧ នៅចំណុចក្នុងព្រៃ ចំរាក់ភ្នំក្រោម ស្ថិតនៅភូមិភ្នំក្រោម សង្កាត់សៀមរាប (កន្លែងកើតហេតុមិនច្បាស់លាស់ព្រោះយប់ងងឹត) ក្រុង-ខេត្តសៀមរាប ឈ្មោះ គង់ សំអឿន បានបើកម៉ូតូ ឌុបជនរងគ្រោះ ឈ្មោះ ង .ស .ព ភេទស្រី អាយុ១២ឆ្នាំ មុខរបរសិស្ស ស្នាក់នៅក្នុង មណ្ឌលកុមារកំព្រា បាត់ធើផ្លាយ ផារ៉ាដាយ ស្ថិតនៅភូមិកន្ត្រក សង្កាត់ស្វាយដង្កុំ ក្រុងសៀមរាប ជនសង្ស័យ បានឌុប ក្មេងស្រី ទៅដល់ចំណុចខាងលើ ក្នុងព្រៃ ក៏បានធ្វើសកម្មភាព ចាប់បង្ខំ, និងទះកំភ្លៀង ជាច្រើនដៃ រួចធ្វើសកម្មភាព ចាប់ស្រាតខោ របស់ជនរងគ្រោះ រំលោភ បានសម្រេច១ដង ដោយជនសង្ស័យ បាននិយាយមគំរាម ជនរងគ្រោះ មិនឱ្យស្រែក ក្រោយពីធ្វើសកម្មភាព រួមភេទ រួចហើយ ជនសង្ស័យ បើកម៉ូតូឌុប ជនរងគ្រោះមកផ្ទះរបស់គេ រួចហើយ ជនសង្ស័យ បានជិះម៉ូតូគេចខ្លួនបាត់។

របាយការណ៍បន្តថា ក្រោយពីការសាកសួរជនសង្ស័យ បានឆ្លើយសារភាពថា រូបគេ ពិតជាបានធ្វើសកម្មភាព ចាប់បង្ខំ ជនរងគ្រោះ រួមភេទ បានសម្រេច០១ដង ពិតប្រាកដមែន ហើយបាននិយាយ លួងលោម ជនរងគ្រោះ ជិះម៉ូតូមកដល់ផ្ទះរបស់ខ្លួន នឹងបានអោយ ជនរងគ្រោះ ដោះប្តូរខោអាវ រួចយកខោអាវ ប្រពន្ធ របស់ខ្លួនមកអោយជនរងគ្រោះ ស្លៀកពាក់។ ចំណែក ខោអាវរបស់ជនរងគ្រោះ លាក់ទុក នៅក្នុងផ្ទះរបស់គេ ហើយសមត្ថកិច្ច បានធ្វើការដកហូតអាវ របស់ជនរងគ្រោះបានមកវិញ៕SRP

ភ្នំពេញ៖លោកដួង តារា រដ្ឋលេខាធិការ ទីស្ដីការគណ:រដ្ឋមន្ត្រី នឹងជាជំនួយការផ្ទាល់ សម្ដេចតេជោ ហ៊ុន សែន នាយករដ្ឋមន្ត្រី បានលើកឡើងថា «ដាំបង្គោលថ្មលើផ្លូវបែបនេះអាចបង្កគ្រោះថ្នាក់ធំ!»។

លោកដួង តារា បញ្ជាក់ថា កាលពីព្រឹកមិញ ខ្ញុំបានខលនិយាយជាមួយ លោកអភិបាលរងខេត្តបាត់ដំបង ម៉ាទីណាល ព្រោះឮគេថាជាបង្គលថ្មរបស់គាត់ ដែលបានបោះចំ នៅលើកណ្តាលផ្លូវដ៏ធំនេះ។
លោក ម៉ាទីណាល់ បានប្រាប់ខ្ញុំថា មានគេធ្វើផ្លូវរំលោភលើដីម៉ាក់គាត់។ ខ្ញុំមិនមានយោបល់អ្វីទេចំពោះកម្មសិទ្ធិឯកជនរបស់គាត់។ ប៉ុន្តែ ខ្ញុំគ្រាន់តែអាចដឹងថា បើនៅតែបន្តបោះបង្គោលថ្មបែបនេះ នៅចំកណ្តាលផ្លូវដ៏ធំនេះ តទៅទៀតអាចនឹងបង្កគ្រោះថ្នាក់ ដល់ការធ្វើដំណើររបស់ប្រជាពលរដ្ឋមិនខាន ជាពិសេសអ្នកបើកបរពេលយប់។

បើតាមខ្ញុំដឹងថា មេភូមិ មេឃុំ ចៅហ្វាយស្រុក និងចៅហ្វាយខេត្តគាំទ្រអោយដកបង្គោលថ្មចេញពីផ្លូវ ដើម្បីសុវត្ថិភាព ប្រជាពលរដ្ឋ។

យើងចូលរួមកសាងអំពើល្អ ចែករំលែកក្តីស្រឡាញ់និងស្នាមញញឹម នឹងសូមមានចិត្តអាណិតស្រឡាញ់ ពលរដ្ឋយើងគ្រប់ទីកន្លែងដោយគ្មានការរើសអើង៕SRP