Siem Reap Post – Page 239 – Siem Reap News, Cambodia News

ខេត្តសៀមរាប៖បុរសម្នាក់បានស្លាប់ភ្លាមៗ ខណ:ឡើងឡើងផ្សាដែកធ្វើទ្វារ ខ្វះការប្រុងប្រយ័ត្ន។

ហេតុការណ៍បានកើតឡើងនៅវេលាម៉ោង១០និង១៥នាទីថ្ងៃអង្គារ ថ្ងៃទី២៨ខែមិថុនាឆ្នាំ២០២២ នៅចំណុច មុខស្តង់លក់គ្រឿងសំណង់ ស្ថិតនៅក្នុងភូមិព្រៃគុយ ឃុំអំពិល ស្រុកប្រាសាទបាគង ខេត្តសៀមរាប។

លោក លឹម សម្បត្តិ អធិការនគរបាលស្រុកប្រាសាទបាគង បានឲ្យដឹងថា ជនរងគ្រោះមាន
ឈ្មោះតាប់ មី ភេទប្រុសអាយុ៣២ឆ្នាំ នៅភូមិជ្រៃឃុំកណ្ដែក ស្រុកប្រាសាទបា
គង ខេត្តសៀមរាប។

លោក លឹម សម្បត្តិ បន្តថាតាមការបំភ្លឺពីឈ្មោះ ជា ជេន ភេទប្រុសអាយុ២៤ឆ្នាំ មានទីលំនៅភូមិជ្រៃ ឃុំកណ្ដែកស្រុកប្រាសាទបាគង ខេត្តសៀមរាប ដែលត្រូវជាប្អូនថ្លៃសព បានឱ្យដឹងថា៖ នៅថ្ងៃទី២៨ខែមិថុនាឆ្នាំ២០២២ វេលាម៉ោង៧ព្រឹករូបគាត់និងឈ្មោះសួ កុសលភេទប្រុស ឈ្មោះតាប់ មី ភេទប្រុស (សព) នៅភូមិជ្រៃឃុំកណ្ដែក ស្រុកប្រាសាទបាគងខេត្តសៀមរាប ជាមួយគ្នាបាននាំគ្នាទៅស៊ីឈ្នួលផ្សាដែកធ្វើទ្វារអោយឈ្មោះយ៉ន យិន ភេទប្រុស នៅភូមិឃុំកើតហេតុខាងលើ។ ចំណែករូបគាត់និងឈ្មោះតាប់ មី(សព) បានឡើងទៅលើអន្ទារដែកទាំងពីរនាក់ ដែលមានកម្ពស់ ២.៥ ស.ម។ ចំណែកឈ្មោះសួ កុសល នៅកាត់ដែកហុចពីក្រោម រហូតដល់វេលាម៉ោង១០ជាងព្រឹក ពេលនោះឈ្មោះតាប់ មី(សព) បានទាញដែកពីក្រោមឡើងមកលើ ដើម្បីយកមកផ្សា ស្រាប់តែពេលនោះដែកបានប៉ាស់ទៅនឹងខ្សែភ្លើងស្រាតអគ្គីសនី ក៏ឆក់ឈ្មោះតាប់ មី(សព) ធ្លាក់ពីលើអន្ទារ មកដីបាក់កស្លាប់តែម្ដង។

លោក លឹម សម្បត្តិ បញ្ជាក់ថា
ការពិនិត្យសាកសព
-ផ្នែកក្បាលមានស្នាមបែកដាច់រលាត់០.៥ស ម
-ផ្នែក ថ្ពាល់ខាងស្ដាំនិងពុកចង្កា មានស្នាមដាច់រលាត់០.២ ស.ម
-ផ្នែក កដៃឆ្វេងនិងកដៃស្ដាំ មានស្នាមខ្លោចដាច់រលាត់០.៤ ស.ម ក្រៅពីនោះគ្រប់អវយវ:ពុំមានស្លាកស្នាមអ្វីពាក់ព័ន្ធនឹងបទល្មើសព្រហ្មទណ្ឌនោះទេ។

តាមសន្និដ្ឋាន ផ្អែកតាមកាបំភ្លឺពីសាក្សី និងកាពិនិត្យរបស់កម្លាំងជំនាញពិនិត្យវិភាគកន្លែងកើតហេតុ ឃើញថា សពខាងលើពិតជាបានស្លាប់ដោយសាឆក់ខ្សែរភ្លើងពិតប្រាកដ្ឋមែន។
មូលហេតុ ខ្វះការប្រុងប្រយ័ត្នដោយខ្លួនឯង៕SRP

ខេត្តសៀមរាប៖អាជ្ញាធរខេត្តសៀមរាប បានស្នើសុំ អាជ្ញាធរជាតិអប្សរា ផ្អាកការរុះរើ សំណង់ខុសច្បាប់របស់ប្រជាពលរដ្ឋនៅក្នុងតំបន់១ នឹងតំបន់ ២។

នេះបើយោងតាមលិខិតរបស់ អាជ្ញាធរខេត្តសៀមរាប ដែលចុះហត្ថលេខាដោយលោក ប្រាក់ សោភ័ណ អភិបាលរងខេត្ត។

សូមជម្រាបថាកន្លងមកក៏ដូចថ្មីៗនេះ កម្លាំងអាជ្ញាធរជាតិអប្សរា បានចុះរុះរើផ្ទះសំណង់របស់ប្រជាពលរដ្ឋ យ៉ាងច្រើនផុសផុល រហូតធ្វើឲ្យការរុះរើនៅតំបន់ខ្លះ ត្រូវបានពលរដ្ឋ លើកគ្នា តវ៉ាផងដែរ។ ការចុះរុះរើរបស់អាជ្ញាធរជាតិអប្សរា គឺផ្អែកលើគោលការណ៍ ថាសំណង់ទាំងនោះបានសាងសង់ឡើង ដោយខុសច្បាប់ ដែលជាតំបន់អភិរក្សឬក្នុងតំបន់រមណីយដ្ឋានអង្គរ។

ទោះជាយ៉ាងណា គេសង្កេតឃើញនៅក្នុងតំបន់រមណីយដ្ឋានអង្គរ មានសំណង់ជាច្រើនបានផុសឡើង បើទោះបីជាមានការរឹតបន្តឹងពីអាជ្ញាធរជាតិអប្សរាយ៉ាងណាក៏ដោយ ក៏មានសំណង់ខ្លះបានសាងសង់រួចរាល់ផងដែរ៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម បានបា្រប់មន្ត្រីពាក់ព័ន្ធឲ្យសាងសង់ បង្គន់អនាម័យសាធារណ: ចំនួន២បន្ថែមទៀតចៀសវាង ការបន្ទោរបង់មិនត្រឹមត្រូវ ខណៈនៅតំបន់កម្សាន្តតាមបណ្ដោយ មាត់ទន្លេក្នុងក្រុងកំពង់ចាម មានបន្ទប់ទឹក ចំនួន៤រួចមកហើយ។

ការស្នើឡើងយ៉ាងដូច្នេះក្នុងកិច្ចប្រជុំជាមួយដៃគូរៀបចំគម្រោងអភិវឌ្ឍន៍ឆ្នេរទន្លេមេគង្គក្នុងក្រុងកំពង់ចាម នៅថ្ងៃទី២៨ ខែមិថុនា ឆ្នាំ២០២២នេះ។

បេីតាមប្លង់ទិដ្ឋភាពរបស់ដៃគូអភិវឌ្ឍន៍ បានបង្ហាញឲ្យដឹងថា ការរៀបចំគម្រោងអភិវឌ្ឍន៍ឆ្នេរទន្លេ ក្នុងក្រុងកំពង់ចាមនេះ គឺមានទីតាំងចាប់ពីចំណុចកំពង់សាឡាងចាស់ រហូតដល់ចំណុចជិតវត្តដីដុះ ដែលមានដូចជាការកសាង ផែទេសចរណ៍ អាហារដ្ឋានលេីទឹក កន្លែងហាត់ប្រាណ ស្ទីមសូណា បឹងហ្គាឡូ អាហារដ្ឋាន ផាប ក្លឹប សួនផ្កា សួរកុមារ កន្លែងថតរូបអនុស្សាវរីយ កន្លែងពិចនិច ទីតាំងកញ្ចុះ អង្គុយលេង កម្សាន្ត និងផ្សារលក់ អាហារផងដែរ។

ក្នុងកិច្ចប្រជុំ លោក អ៊ុន ចាន់ដា ក៏បានបានណែនាំគោលការណ៍សំខាន់ៗ ដល់ដៃគូអភិវឌ្ឍន៍ ដើម្បីធ្វើការកែសម្រួលឡើងវិញ ឬបំពេញនូវចំណុចខ្វះខាត មួយចំនួនជាមុនសិន មុននឹងឈានទៅដល់ការចាប់ផ្ដើមចុះកិច្ចព្រមព្រៀងសហការ ក្នុងការអភិវឌ្ឍន៍ឆ្នេរទន្លេក្នុងក្រុងកំពង់ចាម សំដៅធ្វើយ៉ាងណា ឲ្យមានទាំងគុណភាព សោភ័ណភាពស្រស់បំព្រង និងអនាម័យល្អ ឲ្យសាកសម ជាទីក្រុងទទួលជ័យលាភីរំដួល៣ទង នាពេលកន្លងមក និងរក្សាខ្សែក្រវ៉ាត់នេះ បន្តទៅមុខផងដែរ ៕SRP

Sponsored

ខេត្តត្បូងឃ្មុំ៖លោក ជាម ច័ន្ទសោភ័ណ អភិបាលខេត្ត និងជាប្រធានគណៈកម្មាធិការសាខាកាកក្រហមខេត្តត្បូងឃ្មុំ នៅថ្ងៃទី២៧ ខែមិថុនា ឆ្នាំ២០២២ នេះ បាននាំយកអំណោយមនុស្សធម៌ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ចែកជូនដល់ប្រជាពលរដ្ឋ ងាយរងគ្រោះ ចំនួន១៤១គ្រួសារ និងប្រគល់ផ្ទះ២ខ្នង ស្ថិតក្នុងឃុំកក់ ស្រុកពញាក្រែក ខេត្តត្បូងឃ្មុំ។

លោក ជាម ច័ន្ទសោភ័ណ បានអំពាវនាវដល់ប្រជាពលរដ្ឋទាំងអស់ត្រូវជឿជាក់មកលើការដឹកនាំរបស់ រាជរដ្ឋាភិបាល ដែលមាន សម្ដេចតេជោ ហ៊ុន សែន ជាប្រមុខ តែងតែខិតខំលះបង់កំលាំងកាយចិត្តតស៊ូនាំយកសន្តិភាព ថែរក្សាសន្តិភាព និងបន្តអភិវឌ្ឍន៍រីកចម្រើនរហូតដល់សព្វថ្ងៃនេះជាបន្តទៀត ដោយត្រូវទៅបោះឆ្នោតសកលខាងមុខនេះឲ្យបានគ្រប់ៗគ្នា គាំទ្រសម្តេចជានាយករដ្ឋមន្ត្រីគ្រប់ៗអាណត្តិ។

លោក ជាម ច័ន្ទសោភ័ណ ក៏បានលើកឡើងពីយុទ្ធសាស្ត្រស្រោចវ៉ាក់សាំងបានយ៉ាងល្អ របស់សម្តេចតេជោ ដែលធ្វើឲ្យកម្ពុជាជោគជ័យលើការងារប្រយុទ្ធប្រឆាំងជាមួយកូវីដ១៩ បើប្រៀបធៀបទៅនឹងប្រទេសមួយចំនួនធំ។ ព្រមទាំងបានអំពាវនាវដល់បងប្អូន ប្រជាពលរដ្ឋ ឲ្យទៅចាក់វ៉ាក់សាំងការពារជំងឺកូវីដ១៩ ដូសជំរុញដោយឥតគិតថ្លៃ អោយបានគ្រប់ៗគ្នា ដើម្បីបង្ការទប់ស្កាត់ការឆ្លងរីករាលដាល និងឈានទៅលុបបំបាត់ជំងឺនេះផងដែរ។

គូសបញ្ជាក់ថា ៖ អំណោយមុស្សធម៍ដែលប្រគល់ជូនដល់ប្រជាពលរដ្ឋ ងាយរងគ្រោះចំនួន១៤១គ្រួសារ ដោយក្នុង១គ្រួសារៗទទួលបាន អង្ករ២៥គីឡូក្រាម ទឹកស៊ីអ៊ីវ១យួរ ទឹកត្រី១យួរ ត្រីខ១យួរ មី១កេស និងថវិកាមួយចំនួន ដែលបានធ្វើឡើងនៅចំនួន៣ទីតាំងផ្សេងគ្នា រួមមាន ៖ នៅបរិវេណវត្តមុនីរង្សជីមាន់ ក្នុងឃុំកក់ ចំនួន១១១គ្រួសារ នៅភូមិកន្សោមសត្វ ក្នុងឃុំកក់ ចំនួន២០គ្រួសារ និងនៅភូមិត្រពាំងស្ទៀង ឃុំកក់ ស្រុកពញាក្រែក មានចំនួន១០គ្រួសារផងដែរ៕SRP

ខេត្តកំពង់ចាម៖មនុស្សមួយគ្រួសារ មានគ្នា៤នាក់ បានជិះម៉ូតូបុកជាមួយរថយន្តធន់ធំ បញ្ច្រាសទិសគ្នា បណ្តាលឲ្យស្លាប់៣នាក់ និងរងរបួសធ្ងន់ម្នាក់។

ហេតុការណ៍បានកើតឡើងនៅវេលាម៉ោង៣ និង៣០នាទីល្ងាច ថ្ងៃទី់២៦ ខែមិថុនា ឆ្នាំ២០២២ នៅចំណុចផ្លូវកៅស៊ូការ៉ាស់តាកុត ស្ថិតក្នុងភូមិឣូរកណ្តោល ឃុំព្រែកក្របៅ ស្រុកកងមាស ខេត្តកំពង់ចាម។

សមត្ថកិច្ចមូលដ្ឋាន បានឲ្យដឹងថា នៅមុនពេលកេីតហេតុគេបានឃេីញ ឈ្មោះ ស៊ឹម រិទ្ធី ភេទប្រុស អាយុ២០ឆ្នាំ នៅភូមិឣូរកណ្តោល ឃុំព្រែកក្របៅ ស្រុកកងមាស (មិនពាក់មួកសុវត្ថិភាព) ឌុបគ្នា៣នាក់ប្រពន្ធ និងកូន ជិះម៉ូតូ ១គ្រឿង ម៉ាកហុងដាសេ១០០ សេរីឆ្នាំ២០០២ ពណ៌ខ្មៅ ពាក់ស្លាកលេខ កំពត1D.6579 ក្នុងទិសដៅពីកើត ទៅលិច បានបុកជាមួយរថយន្ត ១គ្រឿង ម៉ាកហ៊ីយ៉ាន់ដាយ ពណ៌ស ពាក់ផ្លាកលេខកំពង់ឆ្នាំង

3A.1488 បើកបរដោយឈ្មោះ ស៊ន់ សុភី ភេទប្រុស ឣាយុ២៧ឆ្នាំ មានទីលំនៅភូមិខ្វិតតូច ឃុំជ្រៃវៀន ស្រុកព្រៃឈរ ខេត្តកំពង់ចាម ក្នុងទិសដៅលិច ទៅកេីត បណ្តាលឲ្យស្លាប់នៅកន្លែងកេីតហេតុភ្លាមៗ ៣នាក់ និងរងរបួសធ្ងន់ម្នាក់ ហើយអ្នកបេីកបររថយន្តបានរត់គេចខ្លួនបាត់។

សមត្ថកិច្ចមូលដ្ឋាន បានឲ្យដឹងទៀតថា ជនរងគ្រោះ ដែលជាប្រពន្ធ និងកូនអ្នកបេីកបរម៉ូតូ រួមមាន ១.ឈ្មោះ ទ្រុយ ណាំគា ភេទស្រី អាយុ១៩ឆ្នាំ (មិនពាក់មួកសុវត្ថិភាព ស្លាប់នៅកន្លែងកេីតហេតុ )។ ២.ឈ្មោះ ធី ភ័ក្រ្តា ភេទប្រុស អាយុ៤ឆ្នាំ (រងរបួសធ្ងន់បញ្ជូនទៅសង្គ្រោះនៅមន្ទីរពេទ្យខេត្តកំពង់ចាម)។ ៣.ឈ្មោះ ធី តឿ ភេទប្រុស អាយុ១ឆ្នាំ (ស្លាប់នៅកន្លែងកេីតហេតុ )។

សមត្ថកិច្ចបានបញ្ជាក់ថា ករណីគ្រោះថ្នាក់ចរាចរណ៍នេះមូលហេតុ ឣ្នកបើកម៉ូតូ ខ្វះការប្រុងប្រយ័ត្ន (ជិះមិនប្រកាន់ស្តាំ)។

កម្លាំងជំនាញចរាចរណ៍បានសហការជាមួយជំនាញផ្នែកបច្ចេកទេស ពិនិត្យទៅលេីសាកសព និងបានប្រគល់ទៅឲ្យក្រុមគ្រួសារធ្វេីបុណ្យ តាមប្រពៃណី។ ចំណែកមធ្យោបាយទាំងពីរគ្រឿងទៅរក្សាទុកបណ្ដោះអាសន្ននៅឣធិការដ្ឋាននគរបាលស្រុកកងមាស និងស្រាវជ្រាវរកអ្នកបេីកបររថយន្ត ដើម្បីបំពេញសំណុំរឿងតាមនីតិវិធីផងដែរ៕SRP

ខេត្តសៀមរាប៖មនុស្សមួយក្រុមជិះម៉ូតូ៣គ្រឿងតាមកាប់ភាគីម្ខាងទៀតដែលជិះម៉ូតូ ២គ្រឿងបណ្ដាលឲ្យរងរបួស។

ហេតុការណ៍បានកើតឡើងនៅថ្ងៃទី២៥ ខែមិថុនា ឆ្នាំ២០២២ វេលាម៉ោង២១ និង២០នាទី ចំណុចផ្លូវកៅស៊ូ មុខវត្តព្រះអង្គទ្រង់ ស្តិតនៅនៅភូមិព្រះអង្គទ្រង់ ឃុំល្វា ស្រុកពួក ខេត្តសៀមរាប។

ប្រភពបានឲ្យដឹងថាករណីហិង្សាដោយចេតនាមានស្ថានទំងន់ទោស (កាប់និងកាំបិត) នេះ បង្កឡើងដោយបក្ខពួកជនសង្ស័យមិនស្គាល់អត្តសញ្ញាណមានគ្នា៥ ទៅ៦នាក់ ជិះម៉ូតូ៣គ្រឿង មិនស្គាល់ម៉ាក បានកាប់ទៅលើជនរងគ្រោះចំនួន២នាក់ ដែលជិះម៉ូតូម្នាក់មួយគ្រឿងក្នុងទិសដៅស្របគ្នពីត្បូងទៅជើង។

ប្រភពបន្តថា ជនរងគ្រោះ ទី១ ឈ្មោះ ខុង សារ៉ង ភេទប្រុស អាយុ៣០ ឆ្នាំ មុខរបរកម្មករសំណង់ រស់នៅភូមិគោកភ្នៅ ឃុំដូនកែវ ស្រុកពួក ខេត្តសៀមរាប ជិះម៉ូតូ ម៉ាកហុងទ្រីសេរីចាស់ រងរបួសដាច់រយះស្បែកក្បាលផ្នែកខាងឆ្វេង ប្រវែង ២១ ស.ម កំពុងសម្រាកព្យាបាលនៅពេទ្យបង្អែកស្រុកពួក។

ជនរងគ្រោះទី២ ឈ្មោះ ប្រុន រស់ ភេទប្រុស អាយុ ៣៨ឆ្នាំ មុខរបរ កម្មកសំណង់ រស់នៅភូមិត្រពាំងឬស្សី ឃុំរើល ស្រុកពួក ខេត្តសៀមរាប រងរបួសរយះចំនួន៣កន្លែង។ ស្មាខាងស្តាំប្រវែង ប្រវែង ៩ ស.ម
_សាច់ដុំដៃស្តាំប្រវែង៣ ស.ម
_ស្លាបប្រជៀង ប្រវែង ៥ ស.ម
។ ជិះម៉ូតូ ម៉ាកហុងដាទ្រី សេរីឆ្នាំ១៩៩៩ ពណ៌ខ្មៅ ពាក់ផ្លាកលេខ សៀមរាប ១I.៤២៣៧ កំពុងសម្រាកព្យាបាលនៅពេទ្យបង្អែកស្រុកពួក។ ដោយឡែកក្រុមជនសង្ស័យក្រោយធ្វើសកម្មភាពរួចបានជិះម៉ូតូគេចខ្លួនអស់តែម្ដង៕SRP

Sponsored

ភ្នំពេញ៖លោកសេង ទៀង ជំនួយការផ្ទាល់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅថ្ងៃទី២៥ ខែមិថុនា ឆ្នាំ២០២២នេះ អញ្ជើញនាំយកអំណោយសប្បរសធម៌ របស់សម្ដេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចែកជូនប្រជាពលរដ្ឋសម្រាលទារកភ្លោះបីនាក់ ត្រូវជាចៅៗ របស់សម្តេចតេជោ និងសម្តេចកិត្តិព្រឹទ្ធបណ្ឌិត ដល់ដៃគ្រួសារកូនភ្លោះបី ដែលកំពុងសម្រាកថែទាំសុខភាព នៅមន្ទីរពេទ្យកាល់ម៉ែត រាជធានីភ្នំពេញ។

អំណោយដ៏សប្បុរសធម៌ទាំងនោះរួមមាន ថវិកា៥លានរៀល អង្ករ៥០គីឡូក្រាម ទឹកដោះគោ២កេសធំ ស្កសរ៥គីឡូក្រាម សារុង២ និងក្រម៉ា២។ ទារកភ្លោះទាំងបីនាក់នេះ ប្រសូត្រនៅថ្ងៃទី២១ ខែមិថុនា ឆ្នាំ២០២២ នៅមន្ទីរពេទ្យកាល់ម៉ែត្រ។ ជាកូនលើកទី៣ ម្តាយឈ្មោះ វណ្ណា រចនី អាយុ២៩ឆ្នាំ ឪពុកឈ្មោះ មិន ថារី អ្នកទាំងពីរមានមុខរបរជាកម្មកររោងចក្រ មានទីលំនៅរស់នៅភូមិត្រពាំងស្រែ ឃុំត្រពាំងស្រែ ស្រុកមេសាង ខេត្តព្រៃវែង។

លោក សេង ទៀង បាននាំនូវការផ្តាំផ្ញើរសាកសួរសុខទុក្ខ ដោយសេចក្តីនឹករលឹកយ៉ាងជ្រាលជ្រៅបំផុត ពីសម្តេចតេជោ និងសម្តេចកិត្តិព្រឹទ្ធបណ្ឌិត ដែលជានិច្ចកាលសម្តេចទាំងទ្វេ តែងតែផ្ញើនូវការនឹករលឹកចំពោះប្រជាពលរដ្ឋ នៅគ្រប់ទីកន្លែងទាំងអស់ ក្នុងប្រទេសកម្ពុជា។

លោក បានឲ្យដឹងថា ចាប់តាំងពីឆ្នាំ១៩៩៩ រហូតមកដល់បច្ចុប្បន្ននេះ ពោលគឺរយៈពេលជាង២៣ឆ្នាំកន្លងមកនេះ មានគ្រួសារប្រសូត្រទារកភ្លោះបីនាក់ ឬបួននាក់ចំនួន ៣៨៨គ្រួសារ រួចហើយ បានទទួលអំណោយឧបត្ថម្ភដ៏សប្បរសធម៌ ពីសម្តេចតេជោ និងសម្តេចកិត្តិព្រឹទ្ធបណ្ឌិត ក្នុងការជួយទំនុកបម្រុងដល់ការលំបាកខ្វះខាតក្នុងជីវភាព រស់នៅប្រចាំថ្ងៃ ពិសេសការចិញ្ចឹមបីបាច់ ទារកភ្លោះបីនាក់ ត្រូវជាចៅៗរបស់សម្តេចទាំងទ្វេ នៅពេលឆ្លងទន្លេរួច។

លោកបន្តថា ជំនួយឧបត្ថម្ភទាំងអស់នេះ មិនមែនជាអំណោយ របស់ រាជរដ្ឋាភិបាល អំណោយ របស់ កាកបាទក្រហមកម្ពុជា ឬអំណោយរបស់គណបក្ស ដែលបម្រើឲ្យសកម្មភាពនយោបាយនោះទេ ផ្ទុយទៅវិញអំណោយទាំងអស់នេះ គឺជាអំណោយទានកើត ចេញពីទឹកចិត្តជ្រះថ្លា ប្រកបដោយការ គិតគួរខ្ពស់ របស់សម្តេចតេជោ និងសម្តេចកិត្តិព្រឹទ្ធបណ្ឌិត ដែលបានឈ្វេងយល់ពីការលំបាកពិតប្រាកដ ចំពោះប្រជា ពលរដ្ឋដែលមានប្រសូត្រទារកភ្លោះបីឬបួននាក់៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម បានថ្លែងថា ការគ្រប់គ្រងរដ្ឋបាលឃុំ-សង្កាត់ តាមបែបវិមជ្ឈការ និងលទ្ធិប្រជាធិបតេយ្យ សេរីពហុបក្ស បានផ្តល់ឱកាសឲ្យប្រជាពលរដ្ឋ នៅក្នុងឃុំ-សង្កាត់នីមួយៗ មានសិទ្ធិបោះឆ្នោត ជ្រើសរើសក្រុមប្រឹក្សាឃុំ-សង្កាត់របស់ខ្លួន ព្រមទាំងបានផ្ដល់សិទ្ធិ និងការទទួលខុសត្រូវជូនប្រជាពលរដ្ឋ ក្នុងការចូលរួមយ៉ាងសកម្ម ក្នុងដំណើរការអភិវឌ្ឍ មូលដ្ឋានឃុំសង្កាត់ របស់ខ្លួនផងដែរ។

លោកថ្លែងបែបនេះក្នុងឱកាសបើក សន្និបាត បូកសរុប សម្រាប់ការ បោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ នៅថ្ងៃទី២៤ ខែមិថុនាម្សិលមិញ។

លោក អ៊ុន ចាន់ដា បានបញ្ចាក់ថា ចាប់តាំងពីឆ្នាំ២០០២ មក រាជរដ្ឋាភិបាលកម្ពុជា បានធ្វើកំណែទម្រង់ ការគ្រប់គ្រង រដ្ឋបាលនៅថ្នាក់ឃុំ-សង្កាត់ តាមបែបវិមជ្ឈការ និងបន្ថែមលើការគ្រប់គ្រង ប្រទេស តាមបែបលទ្ធិប្រជាធិបតេយ្យ សេរីពហុបក្ស។ ចាប់ពីពេលនោះមក កម្ពុជា បានរៀបចំការបោះឆ្នោតជាសកល ដើម្បីជ្រើសរើសក្រុមប្រឹក្សាឃុំ សង្កាត់ យ៉ាងទៀងទាត់រៀងរាល់ ៥ឆ្នាំម្តង បានចំនួន ៤លើករួចមកហើយ និងមានចំនួន ៥លើក បើយើងបូកបន្ថែមថ្មីៗ បច្ចុប្បន្ន ដែលបានរៀបចំការបោះឆ្នោត ជ្រើសរើស ក្រុមប្រឹក្សាឃុំ-សង្កាត់ អាណត្តិទី៥ ដែលបានប្រព្រឹត្តកាលពីថ្ងៃអាទិត្យ ទី៥ ខែមិថុនា ឆ្នាំ២០២២ កន្លងមកនេះ។

អភិបាលខេត្ត ក៏បានកោតសរសើរ និងវាយតម្លៃខ្ពស់ ចំពោះការខិតខំប្រឹងប្រែង របស់មន្រ្តីគ្រប់លំដាប់ថ្នាក់ នៃគណៈកម្មការរៀបចំការបោះឆ្នោត ខេត្តកំពង់ចាម កងកម្លាំងប្រដាប់អាវុធគ្រប់ប្រភេទ អាជ្ញាធរ ដែនដី គណបក្ស នយោបាយ អង្គការមិនមែនរដ្ឋាភិបាល និងភាគីពាក់ព័ន្ធទាំងអស់ ដែលបានខិតខំប្រឹងប្រែងជំន្នះ គ្រប់ឧបសគ្គ ដើម្បីការរៀបចំ ការបោះឆ្នោតប្រកបដោយសន្តិសុខ សុវត្ថិភាព សេរីត្រឹមត្រូវ យុត្តិធម៌ តម្លាភាព និងមានភាពសម្ងាត់ ដូចលទ្ធផលដែលយើងទទួលបានថ្មីៗកន្លងមកនេះ៕SRP

ខេត្តសៀមរាប៖រថយន្តមួយគ្រឿង បានបុកអ្នកជិះម៉ូតូ បណ្ដាលឲ្យបុរសម្នាក់ស្លាប់ភ្លាមៗ។

ហេតុការណ៍បានកើតឡើងនៅវេលាម៉ោង ១០ ព្រឹកថ្ងៃទី២៣ ខែមិថុនា ឆ្នាំ២០២២ ត្រង់ចំណុចចន្លោះគីឡូម៉ែត្រ លេខ២០-២១ ស្ថិតនៅភូមិត្រពាំងប្រីយ៍ ឃុំពពេល ស្រុកសូទ្រនិគម ខេត្តសៀមរាប។

ប្រភពពីសមត្ថកិច្ចបានឲ្យដឹងថា គ្រោះថ្នាក់ចរាចរណ៍នេះ គឺរថយន្តធុនធំមួយគ្រឿងមិនស្គាល់អត្តសញ្ញាណ បានបើករត់គេចបាត់ បានបើកបរក្នុងទិសដៅ ពីត្បូងទៅជើង បានបុកជាមួយម៉ូតូមួយគ្រឿងម៉ាកហុងដា វ៉េវអាល់ហ្វា (Honda Wave) ពណ៌ខ្មៅ ស្លាកលេខ សៀមរាប ១AL.៤០៥០ បើកបរដោយឈ្មោះ ណាំ នឿន ភេទប្រុស អាយុ៦៨ឆ្នាំ រស់នៅភូមិគោលថ្មី ឃុំពពេល ស្រុកសូទ្រនិគម ខេត្តសៀមរាប បើកបរស្របទិសគ្នាពីត្បូងរួចបត់ឆ្វេង ទៅលិចហើយម៉ូតូជាប់នៅក្រោមរថយន្តអូសចម្ងាយប្រហែល ១៨០០ម៉ែត្រ រួចក៏ធ្លាក់ម៉ូតូនៅខាងឆ្វេងដៃ បណ្ដាលឲ្យជនរងគ្រោះស្លាប់តែម្តង។

ករណីគ្រោះថ្នាក់ចរាចរណ៍នេះ សមត្ថកិច្ចមិនបានបញ្ជាក់អំពីមូលហេតុនៅឡើយទេ៕SRP

Sponsored

ខេត្តបាត់ដំបង៖អភិបាលខេត្ត បាត់ដំបង លោក សុខ លូ បានថ្លែងប្រាប់មន្ត្រីរដ្ឋបាលស្រុក ចាត់វិធានការជាបន្ទាន់ ទប់ស្កាត់ការដឹកជញ្ជូនលើសទម្ងន់ ដែលបង្កឱ្យមានការខូចខាតផ្លូវ ក៏ដូចជាបង្កឱ្យមានគ្រោះថ្នាក់ចរាចរណ៍ ជាយថាហេតុ និងត្រូវធ្វើការចាត់វិធានការ តាមផ្លូវច្បាប់ដែលបានចែង ដោយមិនត្រូវភ័យខ្លាចអ្នកមានអំណាចណាឡើយ។

លោកសុខ លូ មានប្រសាសន៍ បែបនេះ ក្នុងពិធីប្រកាសចូលកាន់មុខតំណែង អភិបាល នៃគណៈអភិបាលស្រុកកំរៀង នៅថ្ងៃសុក្រនេះ។

លោកសុខ លូ អភិបាលខេត្តបាត់ដំបង ក៏បានមានប្រសាសន៍ណែនាំដល់រដ្ឋបាលគ្រប់លំដាប់ថ្នាក់ ក្នុងនាមគណៈបញ្ជាការឯកភាព រដ្ឋបាលស្រុក រួមមានកងកម្លាំងទាំង៣ និងមន្រ្ដីរាជការក្រោមឱវាទ ត្រូវតែបន្តពង្រឹងសាមគ្គីភាពផ្ទៃក្នុង ចេះគោរពគ្នាទៅវិញទៅមក និងជាពិសេសត្រូវមានការគាំទ្រ និងជួយជ្រោមជ្រែងលោកអភិបាលស្រុកកំរៀងថ្មី ក្នុងន័យដល់រដ្ឋបាលស្រុក មានសកម្មភាពប្រសើរ ក្នុងការបម្រើប្រជាពលរដ្ឋឱ្យកាន់តែមានប្រសិទ្ធិភាពខ្ពស់។

លោក ក៏បានណែនាំដល់អភិបាលស្រុក មន្រ្ដីរាជការ មេឃុំទាំងអស់ បន្តរៀនសូត្របន្ថែមទៀត ដើម្បីធ្វើបច្ចុប្បន្នភាព នៃផ្នត់គំនិតថ្មីៗ យល់ដឹងអំពីលិខិតបទដ្ឋានថ្មីៗ ឬច្បាប់ថ្មីៗដែលរាជរដ្ឋាភិបាលប្រកាសឱ្យប្រើប្រាស់ ដោយមិនត្រូវធ្វើការអនុវត្តរឿងដដែល គ្មានការរីកចម្រើនទៅមុខ និងមិនសមស្រប ទៅតាមបរិបទថ្មីឡើយ។

លោកក៏បានបន្តណែនាំដល់ដល់រដ្ឋបាលស្រុក ពង្រឹងការអនុវត្តគោលនយោបាយភូមិ ឃុំ មានសុវត្ថិភាព ពិសេសបញ្ហាគ្រឿងញៀន ដែលជាបញ្ហាប្រទេសជាតិ កំពុងតែប្រយុទ្ធប្រឆាំងយ៉ាងខ្លាំងខ្លា បញ្ហាគ្រឿងញៀន បានបំផ្លាញសេចក្ដីសុខ ប្រជាពលរដ្ឋ ធ្វើឱ្យមានអំពើចោរកម្មនានា បង្កឱ្យមានជម្លោះក្នុងគ្រួសារ កាប់សម្លាប់ជាដើម។

លោកក៏បានណែនាំឱ្យមានការគិតគូរក្នុងការរៀបចំ ការដាក់ពិន្ទុវាយតម្លៃភូមិ ឃុំ មានសុវត្ថិភាពនៅតាមភូមិឃុំ ដើម្បីពិនិត្យមើលថាតើឃុំណាបានអនុវត្តបានល្អជាងគេ។

លោកក៏បានណែនាំដល់រដ្ឋបាលស្រុក បន្តពន្យល់ណែនាំដល់ប្រជាពលរដ្ឋ ឱ្យមកទទួលការចាក់វ៉ាក់សាំងកូវីដ-១៩ ដែលជាដូសជំរុញពីទី៣ រហូតដល់ទី៥ និងក្រោយរយៈពេល៤ខែឡើង ដើម្បីរក្សាគុណភាពអង់ទីករនៅក្នុងខ្លួនឱ្យមានប្រសិទ្ធិភាពខ្ពស់ បើមិនបានទទួលការចាក់វ៉ាក់សាំងកូវីដ-១៩ ដូសជំរុញបន្ទាប់ពីចាក់រួច៤ខែឡើងហើយ នឹងធ្វើឱ្យគុណភាពអង់ទីករនៅក្នុងខ្លួននឹងកាន់តែធ្លាក់ចុះជាក់ជាមិនខាន ។

លោកក៏បានណែនាំដល់រដ្ឋបាលស្រុក បន្តពង្រឹងសុខសន្ដិភាពព្រោះកាលណាប្រទេសមានសុខសន្ដិភាពហើយ ការអភិវឌ្ឍប្រទេសក៏កើតមានឡើងដែរ ប្រទេសជាតិមានការរីកចម្រើនបានអាស្រ័យលើសន្ដិភាព។

សូមជម្រាបថារាជរដ្ឋាភិបាលកម្ពុជា បានចេញអនុក្រឹត្យ សម្រេចតែងតាំង លោក សុខ ដែន ឋានន្តរស័ក្តិឧត្តមមន្រ្ដី ថ្នាក់លេខ៥ ឱ្យកាន់មុខតំណែង ជាអភិបាល នៃគណៈអភិបាលស្រុកកំរៀង ជំនួសលោក សុខ គឹមខុន ដែលត្រូវបានចូលនិវត្តន៍៕SRP

ខេត្តសៀមរាប៖សមត្ថកិច្ចនគរបាលចម្រុះបានឃាត់ខ្លួនបុរសម្នាក់ ពាក់ព័ន្ធករឃាតកម្មដ័សាហាវព្រៃផ្សៃ សម្លាប់ប្រពន្ធរបស់ខ្លួន។

ទីតាំងកើតហេតុ នៅភូមិ ចុងស្ពាន ឃុំខ្វាវ ស្រុកជីក្រែងខេត្តសៀមរាប។

នគរបាលព្រហ្មទណ្ឌកំរិតធ្ងន់ បានឲ្យដឹងថា ជនសង្ស័យ ឈ្មោះស៊ុយ ជួរ ភេទប្រុស អាយុ៤៣ឆ្នាំ មុខរបរធ្វើស្រែទីលំនៅសព្វថ្ងៃ ភូមិចុងស្ពាន ឃុំខ្វាវ ស្រុកជីក្រែង ខេត្តសៀមរាប។ចំណែក ជនរងគ្រោះ ជាប្រពន្ធឈ្មោះ សែត ណាន អាយុ៣៧ឆ្នាំ)។

របាយការណ៍បន្តថា នៅថ្ងៃទី ២៣ ខែ មិថុនា ឆ្នាំ២០២២ វេលា ម៉ោ១០និង ៣០នាទី សមត្ថកិច្ចបានទទួលព័ត៌មានថា ឈ្មោះ សែត ណាន ភេទ ស្រី អាយុ៣៧ឆ្នាំ បានស្លាប់ហើយ ហើយឈ្មោះស៊ុយ ជួរ ជាប្តី បានយកទៅកប់នៅក្រោយផ្ទះបាត់ទៅហើយ។ មានការសង្ស័យព្រោះកន្លងមកគ្រួសានេះ ធ្លាប់
ប្រើអំពើហិង្សា ក៏បានរាយការណ៍
ទៅការិយាល័យជំនាញព្រហ្មទណ្ឌកម្រិតធ្ងន់ និង ការិយាល័យ បច្ចេកទេសវិទ្យាសាស្ត្រ នឹងបានមកសហការជាមួយនគរបាលស្រុកជីក្រែង ដើម្បីពិនិត្យសាកសព។

តាមការពិនិត្យសព ឃើញមានស្នាមរឹតក ,បាក់ក និងស្នាមជាំលើដងខ្លូន។ តាមចម្លើយសារភាពរបស់ជនសង្ស័យ បានប្រាប់សមត្ថកិច្ចថា ខ្លួនពិតជាបានសម្លាប់ប្រពន្ធ របស់ខ្លួនពិតមែនតាមរយ: យកខ្សែគោចងរឹតក ព្យួកន្ត្រាក់ទៅលើនិងផ្ទោងខ្ទម នៅវេលាម៉ោង១០ព្រឹកថ្ងៃទី២២ ខែមិថុនា ឆ្នាំ២០២២ រហូតដល់ម៉ោង៥ល្ងាច បានខ្លួនទៅស្រាយខ្សែទំលាក់មកវិញ រួចហើយខ្លូន ក៏ជីករណ្តៅយកសាកសពប្រពន្ធទៅកប់ដោយទំលាក់ក្បាលចុះទៅមុន។

ជុំវិញករណីឃាតកម្មដ៏សាហាវព្រៃផ្សៃបែបនេះ អធិការនគរបាលស្រុកជីក្រែង លោកតាំង លីហេង បានថ្លែងប្រាប់សារព័ត៌មានសៀមរាបប៉ុស្ដិ៍ តាមទូរស័ព្ទនៅព្រឹកនេះថា ករណីឃាតកម្ម ខាងលើ មូលហេតុផ្ដើមចេញពីគ្រួសារមានជម្លោះ ហិង្សាញឹកញាប់ ជាពិសេសគ្រួសារតែងតែពិសារគ្រឿងស្រវឹងទាំងពីរនាក់ផងដែរ ជាហេតុធ្វើឱ្យភាគីប្ដីបាត់បង់ស្មារតី ផ្ដើមចេញពីការផឹកស្រា ទើបឈានដល់ការសម្លាប់ប្រពន្ធយ៉ាងដូច្នេះ៕SRP

ខេត្តសៀមរាប៖សមត្ថកិច្ចបាននាំខ្លួនបុរសម្នាក់ដែលមានប្រពន្ធហើយ តែលួចមានសង្សាជាអ្នកសាឡន ហើយដេកជាមួយសាកសពរហូតហើមស្អុយ យកទៅសាកសួរចម្លើយសង្ស័យពាក់ព័ន្ធអំពើឃាតកម្ម។

ហេតុការណ៍ភ្ញាក់ផ្អើលនៅនៅវេលាម៉ោង១៩និង៣០នាទី ថ្ងៃទី២៣ ខែមិថុនា ឆ្នាំ២០២២ នៅចំណុចបន្ទប់ជួល ស្ថិតក្នុងភូមិចុងកៅស៊ូ សង្កាត់ស្លក្រាម ក្រុងសៀមរាប ខេត្ដសៀមរាប។

ប្រភពពីសមត្ថកិច្ចបានឲ្យដឹងថា ការបែកធ្លាយ ករណីឃាតកម្ម បន្ទាប់ពីប្រជាពលរដ្ឋ រស់នៅក្បែរទីតាំងខាងលើ បានរាយការណ៍មកសមត្ថកិច្ច ថា មានធុំក្លិនស្អុយចេញពីបន្ទប់ជួល។ ករណីនេះ
សមត្ថកិច្ចបានចុះទៅដល់ទីតាំងបន្ទប់ជួលខាងលើ ពិតជាមានធុំក្លិនស្អុយមែន ទើបសមត្ថកិច្ចទម្លុះទ្វារបន្ទប់ចូលពិនិត្យមើល (បន្ទប់ចាក់សោរពីក្រៅ) ទើបប្រទះឃើញសាកសព គ្របភួយ និងជនសង្ស័យដេកក្បែរសាកសពតែម្ដង។

ប្រភពបានបន្តថា៖ ជនរងគ្រោះមានឈ្មោះ ផា រដ្ឋា ភេទស្រី អាយុ២៦ឆ្នាំ មុខរបរ អ្នកសាឡន ស្រុកកំណើត នៅភូមិទ័ពជ័យ ឃុំបឹងមាលា ស្រុកស្វាយលើ ខេត្ដសៀមរាប។ ចំណែកជនសង្ស័យឈ្មោះ សេង គឹមហួរ ភេទប្រុស អាយុ២៧ឆ្នាំ ស្រុកកំណើត នៅភូមិអញ្ចាញ សង្កាត់នគរធំ ក្រុងសៀមរាប ខេត្ដសៀមរាប ទីលំនៅបច្ចុប្បន្ន ភូមិរលួសកើត ឃុំរលួស ស្រុកប្រាសាទបាគង ខេត្ដសៀមរាប (ត្រូវជាសង្សារជនរងគ្រោះ)។

សមត្ថកិច្ចបានសាកសួរជនសង្ស័យ ដោយតាមការឆ្លើយសារភាព របស់ជនសង្ស័យថា ខ្លួនពិតជាបានសម្លាប់ ជនរងគ្រោះពិតប្រាកដមែន ដោយបានយកខ្សែរីដូវាំងនន រឹតក ជនរងគ្រោះបណ្ដាលឱ្យស្លាប់។

តាមការធ្វើកោសល្យវិច័យរបស់សមត្ថកិច្ចជំនាញ បានបញ្ជាក់ថា ជនរងគ្រោះ ស្លាប់ដោយសារការរឹតក (នៅលេីកជនរងគ្រោះមានស្នាម)។

ប្រភពបន្តថាមូលហេតុ ជនសង្ស័យប្រចណ្ឌនឹងជនរងគ្រោះ។ បច្ចុប្បន្នជនសង្ស័យ ត្រូវបានសមត្ថកិច្ចនគរបាលឃាត់ខ្លួន យកទៅអធិការនគរបាលក្រុងសៀមរាប។ ដោយឡែក សពជនរងគ្រោះ ត្រូវបានប្រគល់ ឱ្យក្រុមគ្រួសារយកទៅធ្វើបុណ្យតាមប្រពៃណី៕SRP

Sponsored