ខេត្តកំពង់ចាម៖លោកអ៊ុន ចាន់ដា អភិបាល​ខេត្តកំពង់ចាម​ និង​ជា​ប្រធានគណៈកម្មាធិការសាខា​កាកបាទក្រហម​កម្ពុជា​ខេត្ត​ នៅព្រឹកថ្ងៃទី២៤ ម្សិលមិញ
បានអញ្ជើញចុះសាកសួរសុខទុក្ខ និងនាំយកអំណោយមនុស្សធម៌ដ៏ថ្លៃថ្លារបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ចែកជូនដល់ប្រជាពលរដ្ឋ ចំនួន៦៩គ្រួសារ​ នៅស្រុកស្រីសន្ធរ។​
នាឱកាសនោះដែរលោក​​ អ៊ុន​ ចាន់ដា​ ​បានពាំនាំនូវប្រសាសន៍ផ្ដាំផ្ញើសាកសួរសុខទុក្ខ ពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ​ ​ដល់​បងប្អូន​ប្រជាពលរដ្ឋ​ ផងដែរ។
លោកអភិបាលខេត្តក៏បានថ្លែងដល់ពលរដ្ឋឲ្យ​បន្ត​ការ​ប្រុងប្រយ័ត្ន​ចំពោះ​ការ​ឆ្លង​រីករាល​ដាល​នៃ​ជំងឺ​កូវីដ​១៩​ គឺ​ត្រូវ​ធ្វើ​អនាម័យ​ជា​ប្រចាំ​ តាម​ការណែនាំ​​​របស់​ក្រសួង​សុខាភិបាល​ ដោយ​រស់នៅ​ស្អាត​ ហូប​ស្អាត​ និង​ផឹក​ស្អាត​​ ព្រមទាំង​ចូលរួម​គោរព​ច្បាប់​ចរាចរ​ឲ្យ​បាន​ខ្ជាប់ខ្ជួន​ផងដែរ​។ លោកថា ការ​ថែទាំ​សុខភាព​ ចៀសផុតពីជំងឺដង្កាត់ផ្សេងៗ និង​ការចូលរួមគោរពច្បាប់ចរាចរណ៍ ព្រមជាមួយ​ការ​បេីកបរ​ដោយ​ប្រយ័ត្ន​ខ្ពស់​ ក៏ជា​ការ​រួមចំណែក​កាត់បន្ថយ​ភាព​ក្រីក្រ​បាន​យ៉ាង​ល្អ​ប្រសើរ​ផង​ដែរ​។
​អំណោយមនុស្សធម៌កាកបាទក្រហមកម្ពុជា ដែលត្រូវចែកជូនដល់បងប្អូនប្រជាពលរដ្ឋងាយរងគ្រោះ ដែល​មាន​ចាស់ជរាគ្មានទីពឹង ជនពិការភាព ស្រ្តីម៉េម៉ាយមានកូនច្រើន អ្នកជំងឺរាំរ៉ៃ ចំនួន៦០គ្រួសារ ដោយក្នុង១ គ្រួសារៗទទួលបាន៖ អង្ករ២៥គីឡូ,ទឹកសុីអុីវ១យួរ,ទឹកត្រី១យួរ,ត្រីខកំប៉ុង១យួរ, ម៉ាស់៥ និងថវិកា២០,០០០រៀល​។
ដោយឡែក​ ប្រជាពលរដ្ឋ​ដែល​​រុះរើផ្ទះដោយការបាក់ស្រុតច្រាំងទន្លេចំនួន៩គ្រួសារ នៅឃុំកោះអណ្តែត ស្រុកស្រីសន្ធរ ដោយក្នុង០១គ្រួសារទទួលបាន តង់០១ អង្ករ៥០គីឡូក្រាម មី២កេស ត្រីខកំប៉ុង២យួរ ទឹកស៊ីអុីវ២យួរ ទឹកត្រី២យួរ ថវិកា២០ម៉ឺនរៀល និងប្រគេនបច្ច័យ៤០ម៉ឺនរៀល​ ដល់វត្ត​ក្រូច​សេីច​ ផងដែរ​៕SRP

ភ្នំពេញ៖សម្ដេចតេជោ ហ៊ុន សែនបានលើកឡើងថាក្នុងនាមខ្ញុំ ជានាយករដ្ឋមន្ត្រី នៃព្រះរាជាណាចក្រកម្ពុជា និងភរិយា ខ្ញុំសូមអបអរសាទរ និង សូមជូនពរជ័យ សិរីសួស្ដី សុភមង្គល បវរល្អមហាប្រសើរ ជូនដល់បងប្អូនសាសនិកខ្មែរឥស្លាមកម្ពុជា ក្នុង និងក្រៅប្រទេស រួមទាំងបងប្អូនសាសនិកឥស្លាមនៅទូទាំងពិភព លោកផងដែរ ដែលបានបញ្ចប់នូវពិធីអំណត់បួសខែរ៉ម៉ាឌនប្រកបដោយជោគជ័យ​ និង អារម្មណ៍ជ្រះថ្លា​ ហើយនឹងរីករាយស្វាគមន៍បុណ្យរ៉យ៉ាហ្វ៊ីទ្រី​ នៅថ្ងៃអាទិត្យ ទី ១ ខែ ស្ហាវ៉ាល់ ឆ្នាំ ១៤៤១ មូហាំម៉ាត់សករាជ ត្រូវនឹងថ្ងៃ ៣កើត ខែជេស្ឋ​ ឆ្នាំជូត​ ទោស័ក​ ព.ស ២៥៦៤ ដែលត្រូវនឹងថ្ងៃទី ២៤ ខែឧសភា​ ឆ្នាំ២០២០ ។

សម្ដេចបានបន្តថាខ្ញុំសូមផ្ញើនូវក្តីនឹករលឹក និង អរគុណយ៉ាងជ្រាលជ្រៅបំផុតចំពោះបងប្អូនខ្មែរឥស្លាមកម្ពុជា ដែលបានចូលរួមថែរក្សាសន្តិភាព រួមគ្នានឹងប្រជាជនកម្ពុជា ដែលប្រកាន់យកសាសនាផ្សេងៗ ហើយមានជំនឿជឿជាក់លើការដឹកនាំរបស់ខ្ញុំ និង គណបក្ស ប្រជាជនកម្ពុជា តាំងពីដើម តរៀងមក ជាពិសេសបានចូលរួមជាមួយរាជរដ្ឋាភិបាល​ ក្នុងការទប់ស្កាត់ការរីករាលដាលជំងឺកូវីដ-១៩ ដោយគោរពអនុវត្តបាន យ៉ាងខ្ជាប់ខ្ជួនទៅតាមសារាចរណែនាំ និង សេចក្ដីណែនាំទៅតាមវិធានការនាៗ របស់រាជរដ្ឋាភិបាល ។

ជាមួយគ្នានេះដែរ ក្នុងនាមនាយករដ្ឋមន្ត្រី សម្ដេចតេជោ ហ៊ុន សែន បានបន្ថែមថាខ្ញុំក៏សូមអំពាវនាវ​ឱ្យបងប្អូនបន្តអនុវត្តតាមនូវរាល់វិធានការនានារបស់រាជរដ្ឋាភិបាល​ ក្នុងការការពារពីជំងឺកូវីដ-១៩នេះ​ ទោះបីអ្នកជំងឺកូវីដ-១៩បានជាសះស្បើយ​អស់​ ១២២ នាក់កន្លងមក ហើយទើបមាន នាំចូល មកថ្មីពីរ នាក់ក៏ដោយ ដែលគិតត្រឹមថ្ងៃទី២៣​ ខែឧសភា​ ឆ្នាំ២០២០នេះ គឺយើងមិនត្រូវមានការធ្វេសប្រហែស មើលស្រាលចំពោះជំងឺឆ្លងដ៍កាចសាហាវនេះ នោះឡើយ ។
ខ្ញុំ និង ភរិយា សូមបួងសួងអោយបងប្អូនទាំងអស់​ ទទួលបាននូវសេចក្កីសុខ​ស្លាម៉ាត់ ករុណារ៉ស់ម៉ាត់ ចំរើនព្ហារ៉កាត់ សុភមង្គល​ ក្ដីមេត្តាករុណា និង អាណិត ស្រឡាញ់​ពីអល់ឡោះគ្រប់ៗគ្នា និង សុំអោយអល់ឡោះ ទទួលយកនូវកុសលផល បុណ្យទាំងឡាយនៃខែបួសរ៉ម៉ាឌនដែលបងប្អូនបានប្រតិបត្តិកុំបីអាក់ខានឡើយ ៕SRP

ភ្នំពេញ៖ប្រមុខដឹកនាំកម្ពុជាសម្ដេចតេជោហ៊ុន សែន នាយករដ្ឋមន្ត្រី នៅរសៀលថ្ងៃនេះ បានបន្តអំពាវនាវដល់បងប្អូនប្រជាពលរដ្ឋឲ្យមានការប្រុងប្រយ័ត្នខ្ពស់ចំពោះជំងឺកូវីដ19។
ប្រមុខដឹកនាំកម្ពុជារូបនេះបានលើកឡើងថាកាលពីសប្តាហ៍មុនប្រទេសយើងបានព្យាបាលអ្នកឆ្លងជំងឺកូវីដ-១៩ បានជាសះស្បើយទាំង១២២នាក់។ ប៉ុន្តែក្នុងសប្តាហ៍នេះ យើងក៏មានអ្នកឆ្លងជំងឺកូវីដ-១៩ ថ្មីចំនួន២នាក់មកវិញ។ ស្ថិតិអ្នកឆ្លងជំងឺកូវីដ១៩ តាមការបញ្ជាក់របស់អង្គការសុខភាពពិភពលោក (WHO) មកទល់ពេលនេះ គឺបានកើនឡើងរហូតដល់ជិត៥លាននាក់ (៤,៩៩៥,៩៩៦) ដែលមានអ្នកស្លាប់ជាង៣០ម៉ឺននាក់ (៣២៧,៨២១) ។ ជំងឺរលាកផ្លូវដង្ហើមកូវីដ១៩ នេះគឺកាចសាហាវខ្លាំងណាស់ដែលកំពុងវាយលុកលើ ២១៦ ប្រទេស។
នាយករដ្ឋមន្ត្រីបានបន្តថាប្រជាពលរដ្ឋត្រូវមានការយល់ដឹងខ្ពស់អំពីជំងឺឆ្លងដ៏កាចសាហាវនេះ។ ត្រូវបង្កើនអនាម័យសុខភាពរស់នៅអោយបានល្អ គឺត្រូវពាក់ម៉ាស ឬក្រម៉ា ហើយត្រូវដុសលាងសម្អាតដៃអោយបានស្អាតជាប្រចាំជាមួយសាប៊ូ, ទឹកអាល់កុលឬ ចឹលកម្ចាត់មេរោគនិងបាក់តេរីផ្សេងៗ។ បើមានការសង្ស័យទៅលើអ្នកណាម្នាក់ ឬចំពោះខ្លួនឯងផ្ទាល់ សូមទូរស័ព្វមកលេខ ១១៥។ សូមកុំចម្លងរោគពីយើងទៅគេ ហើយក៏កុំចម្លងរោគពីគេមកក្រុមគ្រួសារយើងផងដែរ។ កន្លែងណាដែលមិនចាំបាច់ទៅ សូមកុំទៅ ជាពិសេសទីកន្លែងដែលមានក្រុមមនុស្សច្រើន។ សូមស្តាប់នឹងធ្វើតាមការណែនាំរបស់ក្រសួងសុខាភិបាលអោយបានជាប់ជានិច្ច។សូមជូនពរបងប្អូនជនរួមជាតិជួបតែសេចក្តីសុខ និងសំណាងល្អក្នុងថ្ងៃឈប់សម្រាកចុងសប្តាហ៍៕SRP

ខេត្តសៀមរាប៖លំនៅដ្ឋានរបស់ប្រជាពលរដ្ឋជាង៣០ខ្នង ក្នុងខេត្តសៀមរាប បានរងការប៉ះពាល់ដោយខ្យល់កន្ត្រាក់។តាមសេចក្ដីរាយការណ៍ថាករណីនេះស្រុកក្រឡាញ់ ក្នុងឃុំសែនសុខ មានចំនួន០៤ខ្នងក្នុងនោះធ្លាក់ពីជើងសសរចំនួន០២ខ្នងរបើកដំបូលចំនួន០២ខ្នង និងតូបលក់០១តូប៖

ភូមិតាប៉ាង ចំនួន០១ខ្នងធ្លាក់ពីលើជើងសសរ។
ភូមិក្សី០១ខ្នងធ្លាក់ពីលើជើងសសរ ។ និងតូបលក់០១ខ្នង (របើកដំបូលតូបលក់ទាំងស្រុង)។ដោយឡែក០២ខ្នងទៀតស្ថិតនៅភូមិស្វាយឃំុសែនសុខស្រុកក្រឡាញ់ខេត្តសៀមរាប។
១. ផ្ទះឈើប្រកសង្ក័សី(របើកដូល)។
២. បើកសំយ៉ាបដែកប្រកសង្ក័សី។
ដោយឡែកនៅភូមិបុស្សក្រឡាញ់ សង្កាត់ជ្រាវ ក្រុងសៀមរាប ដួលលំផ្ទះចំនួន០៣ខ្នង របេីកដំបូល២៦ខ្នងនិងរបួសមនុស្សម្នាក់ស្រាល។

សូមបញ្ជាក់ថាគ្រោះធម្មជាតិនេះបានកើតឡើងនៅលងាចថ្ងៃទី២២ខែឧសភាឆ្នាំ ២០២០ បន្ទាប់ពីមានភ្លៀងនិងខ្យល់កន្ត្រាក់ទើបបណ្ដាលឲ្យឲ្យលំនៅដ្ឋានខាងលើរងការខូចខាតបែបនេះ៕SRP

ខេត្តសៀមរាប៖បុរសម្នាក់ត្រូវបានកំលាំងមូលដ្ឋានកងរាជអាវុធហត្ថស្រុកសូទ្រនិគម ឃាត់ខ្លួនករណីគ្រឿងញៀន។
ហេតុការណ៍ធ្វើឡើងវេលាម៉ោង១៦ ថ្ងៃទី២២ ខែឧសភា ឆ្នាំ២០២០ នៅចំណុចភូមិបុស្ស ឃុំដំដែក ស្រុកសូទ្រនិគម ដឹកនាំដោយលោកវរសេនីយ៍ត្រីអ៉ឹម មុន្នី មេបញ្ជាការស្រុក។

ជនសង្ស័យ ឈ្មោះ ជា លាប ភេទប្រុស អាយុ១៧ឆ្នាំ ទីលំនៅភូមិតាអី ឃុំត្រពាំងធំ ស្រុកប្រាសាទបាគង ខេត្តសៀមរាប និងដកហូតវត្ថុតាងរួមមាន ម្សៅក្រាមសថ្លា(ម៉ាទឹកកក)ចំនួន០២កញ្ចប់ និងទូរស័ព្ទដៃ ០១គ្រឿង ។
ជនសង្ស័យ និងវត្ថុតាង បញ្ជូនទៅ ការិយាល័យប្រឆាំងគ្រឿងញៀនកងរាជអាវុធហត្ថខេត្តសៀមរាប បន្តនីតិវិធី៕SRP

ខេត្តកំពង់ចាម៖រដ្ឋបាលខេត្ត បានចែកម៉ាសជូនដល់បងប្អូនប្រជាពលរដ្ឋ ដែលមកកំសាន្តនៅសួនសាធារណៈនានាក្នុងក្រុងកំពង់ចាម​។
ការចែកនេះចាប់​ពី​ថ្ងៃ​ទី​២២​តទៅ​ ដែល​ធ្វើ​ឡើង​ជារៀង​រាល់​ថ្ងៃ​ រហូត​គ្រប់​ចំនួន​១ម៉ឺន​ម៉ាស​។
សូមបញ្ជាក់ថាលោក​អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មការខេត្តប្រយុទ្ធប្រឆាំងនឹងជម្ងឺកូវីដ១៩ បាន​ធ្វើ​ការ​ណែនាំ​ដល់​មន្ត្រី​ពាក់ព័ន្ធ​ ឲ្យ​បន្តការផ្សព្វផ្សាយ​សារ​អប់រំ​អំពី​វិធានការ​បង្ការ​ទប់ស្កាត់​ការ​ឆ្លង​រីករាល​ដាល​នៃ​ជំងឺ​កូវីដ​១៩។
ជាមួយគ្នា​នោះ​ដែរ​ រដ្ឋបាល​ខេត្ត​​ បាន​ធ្វេី​សេចក្ដី​ណែនាំ​ដល់​
១- ម្ចាស់អាជីវកម្មភោជនីយដ្ឋាន អាហារដ្ឋាន គណៈអាជីវករ ម្ចាស់មីនីម៉ាត ម្ចាស់ម៉ាត ម្ចាស់ ចំណតរថយន្តក្រុង ចំណតរថយន្ត ម្ចាស់រថយន្តឈ្នួលទាំងអស់ នៅខេត្តកំពង់ចាម ត្រូវ​មាន​ការ​ប្រុងប្រយ័ត្ន​ និង​គោរព ឱ្យបានត្រឹមត្រូវតាមការណែនាំរបស់ក្រសួងសុខាភិបាល ស្តីពីផែនការទប់ស្កាត់ការរីករាលដាល នៃជម្ងឺកូវីដ-១៩(Covid-19)។
២ -ម្ចាស់អាជីវកម្មភោជនីយដ្ឋាន អាហារដ្ឋាន ត្រូវរៀបចំឱ្យមានទឹកអាល់កុល ឬដែល សម្រាប់ លាងដៃ នៅមុខ ច្រកចេញ-ចូល និងចាត់តាំងបុគ្គលិកធ្វើការវាស់កំដៅភ្ញៀវទាំងអស់ មុននឹង អនុញ្ញាតឱ្យចូលក្នុងភោជនីយដ្ឋាន អាហារដ្ឋាន ។

៣-ម្ចាស់អាជីវកម្មមីនីម៉ាត ម៉ាត អ្នកគ្រប់គ្រងចំណតរថយន្តក្រុង ត្រូវរៀបចំឱ្យមានទឹកអាល់កុល ឬជែល សម្រាប់លាងដៃ នៅមុខច្រកចេញ-ចូល ហើយកន្លែងរង់ចាំរបស់អ្នកដំណើរ ត្រូវចាត់ តាំងបុគ្គលិកធ្វើការវាស់កំដៅភ្ញៀវ ទាំងអស់ មុននឹងអនុញ្ញាតឱ្យចូលក្នុងមីនីម៉ាត និងអង្គុយរង់ចាំរថយន្ត។ សម្រាប់ម្ចាស់ចំណតរថយន្តក្រុង នៅកន្លែងរង់ចាំ ត្រូវបាញ់អាល់កុលសំលាប់មេរោគ និងក្នុងរថយន្តរបស់ខ្លួន មុនពេល និងក្រោយពេលដែលអ្នកដំណើរចាក ចេញ ឬចូលក្នុងរថយន្ត។
៤-ម្ចាស់អាជីវកម្ម​ អាជីវកទាំងអស់​ ត្រូវ​រក្សា​គម្លាត​សុវត្ថិភាព​​ឲ្យ​បាន​ត្រឹម​ត្រូវ​តាម​ការ​ណែនាំ​របស់ក្រសួងសុខាភិបាល។
៥-គណៈអាជីវករ ត្រូវធ្វើការណែនាំ ទឹកអាល់កុល ឬដែល ឲ្យបានជាប់ជាប្រចាំដល់អាជីវករនៅតាមទីផ្សារ ឲ្យរៀបចំ សម្រាប់លាងដៃ ក្រោយពីអតិថិជនមកទិញទំនិញ និងត្រូវមានការ ប្រុងប្រយ័ត្នខ្ពស់ដោយគិតពីគម្លាតរវាងអតិថិជន និងអ្នកលក់ដូរ។
៦-អ្នក​គ្រង់គ្រងចំណតរថយន្តឈ្នួល និងម្ចាស់រថយន្តឈ្នួលទាំងអស់ ត្រូវមានទឹកអាល់កុល ឬ ដែលសម្រាប់លាងដៃ និងត្រូវបាញ់អាល់កុលសំលាប់មេរោគមុនពេល និងក្រោយពេលភ្ញៀវ ចូល និងចាកចេញពីរថយន្តផងដែរ​៕SRP

ខេត្តសៀមរាប៖មនុស្សម្នាក់បានស្លាប់និងពីរនាក់ទៀតបានរងរបួសករណីគ្រោះថ្នាក់ចរាចណ៍។

ហេតុការណ៍បានកើតឡើងនៅវេលាម៉ោង១៨និង៣០នាទី ថ្ងៃទី២២ ខែឧសភា ឆ្នាំ២០២០ នៅចំណុចភូមិតាអួស ឃុំកំពង់ឃ្លាំង ស្រុកសូទ្រនិគម ខេត្តសៀមរាប។រវាងម៉ូតូនិងម៉ូតូម៉ាកC១២៥ហុងដាឌ្រីម ពណ៌ខ្មៅ ពាក់ស្លាកលេខ កំពង់ធំ១E២៣២៥និងម៉ូតូ ម៉ាកC១២៥ហុងដាឌ្រីម ពណ៌ខ្មៅ ពាក់ស្លាកលេខ ភ្នំពេញ១CV៨៨៩៩។

អ្នកស្លាប់ ឈ្មោះ ឡូន ធាវី ភេទស្រី អាយុ១៧ឆ្នាំ ទីលំនៅភូមិព្រែកស្រម៉ោច ឃុំកំពង់ឃ្លាំង ស្រុកសូទ្រនិគម ខេត្តសៀមរាប (ជាអ្នកបើកបរម៉ូតូពាក់ស្លាកលេខកំពង់ធំ១E២៣២៥)។
អ្នករបួស ៖

១/ឈ្មោះឡៃ សារី ភេទស្រី អាយុ២០ឆ្នាំ ទីលំនៅភូមិព្រែកស្រម៉ោច ឃុំកំពង់ឃ្លាំង ស្រុកសូទ្រនិគម ខេត្តសៀមរាប ជាអ្នករួមដំណើរ ជាមួយអ្នកស្លាប់។

២/ឈ្មោះរុន សូជីអូរ ភេទប្រុសអាយុ១៩ឆ្នាំ នៅភូមិព្រះត្រពាំង ឃុំដំដែក ស្រុកសូទ្រនិគម ខេត្តសៀមរាប របួសស្រាលជាអ្នកបើកបរម៉ូតូ ពាក់ស្លាកលេខ១CV៨៨៩៩។

ករណីនេះជនរងគ្រោះប្រគល់អោយក្រុមគ្រួសារធ្វើបុណ្យតាមប្រពៃណី។ចំណែក អ្នករបួសបញ្ជូនទៅមន្ទីពេទ្យស្រុក។ឯ ម៉ូតូរក្សារទុកកន្លែងនគរបាលស្រុកដើម្បីរងចាំការដោះស្រាយ៕SRP

ខេត្តសៀមរាប៖សិប្បកម្មកែច្នៃឈើចំនួន០៤ទីតាំងត្រូវបានសមត្ថកិច្ចចុះត្រួតពិនិត្យ។
ហេតុការណ៍បានកើតឡើងវេលាម៉ោង១៥រសៀល ថ្ងៃទី២១ខែឧសភាឆ្នាំ២០២០ដឹកនាំដោយលោកសូ ផល្លា នាយផ្នែករដ្ឋបាលព្រៃឈើជីក្រែង។
ទីតាំងសិប្បកម្មទាំង០៤ស្ថិតនៅភូមិប្រាសាទ ឃុំកំពង់ក្ដី ស្រុកជីក្រែង ខេត្តសៀមរាប។ មានឈ្មោះ
– ឃ្លាំង សុខ ( មានច្បាប់ )
– សម្បត្តិ ពិសី ( មានច្បាប់រួម )
– សម្បត្តិ ពិសិដ្ឋ ( មានច្បាប់រួម )
– ហេង ឈុនហុង ( មានច្បាប់រួម )
អ្នកទាំង០៤នាក់មានទីលំនៅភូមិ ឃុំខាងលើ។ ជាមួយគ្នានេះសមត្ថកិច្ច
ដកហូតឈើខុសច្បាប់ចម្រុះចំនួន៦៥ដុំ។
វត្ថុតាងត្រូវបានយកមករក្សាទុកនៅផ្នែករដ្ឋបាលព្រៃឈើជីក្រែងដើម្បីអនុវត្តតាមផ្លូវច្បាប់៕SRP

ខេត្តសៀមរាប៖សេចក្ដីរាយការណ៍ព័ត៌មានបឋមបានឲ្យដឹងថារថយន្តសណ្តោងស៊ីតែនមួយគ្រឿងត្រូវបានកម្លាំងអាវុធហត្ថខេត្តសៀមរាបបង្ក្រាបបាន។ហេតុការណ៍បានធ្វើនៅវេលាម៉ោង១៦និង៣០នាទី​ ថ្ងៃ​ទី​២២​ ខែឧសភា​ ឆ្នាំ២០២០​ នៅ​ចំណុច​ ភូមិ​ធ្ល​កអណ្តូង​ សង្កាត់​ស្ល​ក្រាម​ ក្រុង​សៀមរាប​​​ ខេត្តសៀមរាប។

ការបង្ក្រាបនេះដឹក​នាំ​ដោយ​លោក​ ​វរសេនីយ៍ឯក​ សេង​ វុទ្ធី​ មេបញ្ជាការរងអាវុធហត្ថខេត្តសៀមរាប។
សមត្ថកិច្ចបានឲ្យដឹងថារថយន្តដឹកឈើនេះម៉ាក FUSO សណ្តោង​ស៊ីតែន​ ស្លាក​លេខ​ភ្នំពេញ​ 3C-2859 ពណ៌​ស​ ឆ្នូត​ ក្រហម​ខៀវ។
បើតាមប្រភពបានឲ្យដឹងថារថយន្តដឹកឈើនេះចេញ​ពី​ខេត្ត​បន្ទាយមានជ័យ​ ចូលមកខេត្តសៀមរាប។ដោយឡែកអ្នកបេីកបរគេចខ្លួនបាត់។ ក្រោយ​ពី​ធ្វើការ​ត្រួត​ពិនិត្យ​ ឃើញ​ឃើញប្រភេទឈើដុំមួយចំនួន។
បច្ចុប្បន្ន​រថយន្ត​និង​ឈេី​ខាង​លើ​ បាន​ប្រគល់អោយ​​រដ្ឋបាល​ព្រៃឈើ​ បន្ទាយ​ស្រី​ រក្សាទុក​ ដេីម្បី​ត្រួតពិនិត្យ​នៅ​ព្រឹក​ថ្ងៃ​ទី​២៣​ស្អែកនេះ៕SRP

ខេត្តកំពង់ធំ៖គ្រឿងក្នុងជ្រូកជាង៩០០គីឡូ សមត្ថកិច្ចខេត្តកំពង់ធំ ដុតកំទេច ចោល នៅរសៀលថ្ងៃទី២២ខែឧសភានេះ។ ការដុតនេះមានការចូលរួម ពី លោកប៉ែន វណ្ណរិទ្ធ ប្រធានមន្ទីរកសិកម្ម ខេត្តកំពង់ធំ និងលោកឌួងសារ៉ន ព្រះរាជអាជ្ញារង អមសាលាដំបូងខេត្តកំពង់ធំ និងលោក ឧត្តមសេនីយ៍ទោ អ៊ុក.កុសល ស្នងការដ្ឋាននគរបាលខេត្តកំពង់ធំ លោកឃុនប៊ុនហូរ មេបញ្ជាការរង កងរាជអាវុធហត្ថ ខេត្តកំពង់ធំ និងលោកតាន់.ម៉េងឆាង ប្រធានការិយាល័យ ផលិតកម្ម និងបសុព្យាបាលសត្វ ខេត្តកំពង់ធំ។ ដែលធ្វើស្ថិតនៅ ខាងក្រោយ ការិយាល័យ ផលិតកម្ម និងបសុព្យាបាលសត្វ ស្ថិតក្នុងភូមិបាល័ង្គ ក្រុងស្ទឹងសែន។

ទំនិញដែលត្រូវបានដុតកម្ទេចក្នុងថ្ងៃនេះ មានដូចជា ពោះជ្រូក ថ្លើមជ្រូក ស្លឹកត្រចៀកជ្រូក ឆ្អឹងជំនីជ្រូក និងគ្រឿងក្នុងជ្រូកមួយចំនួនទៀត។
សូមបញ្ជាក់ថាទំនិញទាំងនេះត្រូវបាននាំចូលពី ប្រទេសថៃ នាំយកមកចែកចាយនៅក្នុងប្រទេសកម្ពុជា ត្រូវការិយាល័យ ផលិតកម្ម និងបសុព្យាបាលសត្វ និងនគរបាលខេត្តកំពង់ធំ បង្ក្រាបបាន កាលពីថ្ងៃទី២០ខែឧសភា ឆ្នាំ ២០២០ កន្លងមកនេះ៕SRP

ខេត្តកំពង់ចាម៖ក្រុមហ៊ុន​ហេងហ៊ី​គ្រុប​
នៅព្រឹកមិញនេះបាន​ឧបត្ថម្ភ​ម៉ាស​ចំនួន​២ម៉ឺន​ម៉ាស ដល់រដ្ឋបាលខេត្តកំពង់ចាម សម្រាប់​បម្រើ​ក្នុង​យុទ្ធនាការ​ផ្សព្វផ្សាយ​សារ​អប់រំ​អំពី​វិធានការ​បង្ការ​ទប់ស្កាត់​ការ​ឆ្លង​រីករាល​ដាល​នៃ​ជំងឺ​កូវីដ​១៩​ និង​សម្រាប់​ធ្វើការ​ចែក​ជូន​បងប្អូន​ប្រជាពលរដ្ឋ​ ដែល​មក​លម្ហែ​កាយ​កម្សាន្ត​ នៅ​សួន​ស្មៅ​មុខ​សាលា​ខេត្ត​កំពង់ចាម​ ក្រោម​ការ​ណែនាំ​របស់​លោក​​ អ៊ុន​ ចាន់ដា​ អភិបាលខេត្តកំពង់ចាម​។

គួរ​បញ្ជាក់​ផង​ដែរ​ថា​ ​ក្រោយ​ពីមានការព្យាបាលអ្នកជម្ងឺកូវីដ-១៩​ ជាសះស្បើយ នៅកម្ពុជា រដ្ឋបាលខេត្តកំពង់ចាម សង្កេតឃើញថា ប្រជាពលរដ្ឋមិនមានការភ័យខ្លាច និង​បាត់បង់​ការ​ប្រុងប្រយ័ត្នចំពោះ ជម្ងឺកូវីដ-១៩ ហើយនៅតាមភោជនីយដ្ឋាន អាហារដ្ឋាន ទីផ្សារ មីនីម៉ាត និងចំណតរថយន្តមួយចំនួនខ្វះការប្រុងប្រយ័ត្ន​ ទាំងម្ចាស់ភោជនីយដ្ឋាន អាជីវករ ម្ចាស់រថយន្ត និងភ្ញៀវ ដោយពុំបានអនុវត្តតាមការណែនាំរបស់ក្រសួងសុខាភិបាល និងអង្គការសុខភាពពិភពលោកឡេីយ។ ដូច្នេះ ដើម្បីចូលរួមបង្ការ និងទប់ស្កាត់ ការរីករាលដាល នៃជម្ងឺកូវីដ-១៩​ ឲ្យ​កាន់តែ មានប្រសិទ្ធភាព​ខ្ពស់​ថែមទៀតនោះ រដ្ឋបាលខេត្តកំពង់ចាម សូម​អំពាវនាវ​ដល់ម្ចាស់ភោជនីយដ្ឋាន អាហារដ្ឋាន គណៈអាជីវករ ម្ចាស់មីនីម៉ាត ម្ចាស់ម៉ាត ម្ចាស់ចំណតរថយន្តក្រុង ចំណតរថយន្ត ម្ចាស់រថយន្តឈ្នួល ទាំងអស់ ត្រូវ​បន្ត​ការ​ប្រុងប្រយ័ត្ន​​ និង​គោរពឲ្យ​បានត្រឹមត្រូវតាមការណែនាំរបស់ក្រសួងសុខាភិបាល ស្តីពីផែនការទប់ស្កាត់ការឆ្លងរីករាលដាល នៃជម្ងឺកូវីដ-១៩៕SRP

ខេត្តសៀមរាប៖ប្រជាកសិករមកពីភូមិចំនួនបីនៃសង្កាត់ជ្រាវ ប្រមាណជា៥០ទៅ៦០នាក់ បាននាំគ្នាបិទប្រឡាយដើម្បីយកទឹកបញ្ចូលស្រែ។ ប៉ុន្តែករណីនេះ សហគមន៍បឹងពារាំង មិនអនុញាតឡើយ។

ហេតុការណ៍នេះ បានកើតឡើងនាព្រឹកថ្ងៃទី២២ខែឧសភាឆ្នាំ២០២០ នៅចំណុចប្រឡាយទឹក ផ្លូវទៅកាន់បឹងពារាំង នៃព្រំប្រទល់ភូមិចំនួន៣ក្នុងសង្កាត់ជ្រាវ គឺភូមិវាល ភូមិក្រសាំង និងភូមិបឹង។

ហេតុការណ៍នេះ គឺប្រជាកសិករ បានបិទទំនប់ប្រឡាយដើម្បីបង្ហៀរទឹកបញ្ចូលស្រែ សង្គ្រោះស្រូវច្រើនរយហិកតា ដែលកំពុងរងការស្វិតងាប់ជាបណ្តើៗ ដោយសាតែខ្វះទឹក។ ជាមួយគ្នានោះ ក៏ត្រូវបានហាមឃាត់ដោយក្រុមមន្ត្រីសហគមន៍បឹងពារាំង ត្បិតទឹកដែលនាំយកតាមប្រឡាយខាងលើ ត្រូវបានអះអាងថា គឺសម្រាប់បញ្ចូលទៅក្នុងបឹងពារាំង ដើម្បីជួយសង្គ្រោះត្រីមេពូជតែប៉ុណ្ណោះ។

ទោះយ៉ាងណាបាតុភាពនេះ មិនមានការបង្កហិង្សាទាំងទ្វេរភាគី ប៉ុន្តែគូភាគីប្រកាន់ជំហរដោយទាមទារយកទឹករៀងៗងខ្លួនអោយខាងតែបាន។

ជួបសម្ភាសន៍ផ្ទាល់ជាមួយកសិករ លោកមួង សាន បានលើកឡើងថា ស្រូវជាច្រើនរយហិកតាក្នុងតំបន់នេះកំពុងរងការស្វិតងាប់ជាបណ្តើៗ។ហេតុដូច្នេះហើយទើបពួកគាត់សម្រេចបិទប្រឡាយបង្ហៀរទឹកបញ្ចូលស្រែបែបនេះ។ លោកសានបន្តថា ការនាំយកទឹកមកដល់ចំណុចនេះ គឺក្រោមការជួយស្តារប្រឡាយនិងពុះពារគ្រប់យ៉ាងរបស់ប្រជាកសិករ។ ប៉ុន្តែពេលនាំយកទឹកបានហើយ បែជាក្រុមសហគមន៍ ទាមទារបង្ហូរទៅកាន់បងពារាំងទាំងអស់ នេះហើយដែលជាចំណុចនាំអោយពួកគាត់បង្ខំចិត្តបិទប្រឡាយ ដើម្បីយកទឹកបែបនេះ។

ក្នុងពេលតែមួយ មន្ត្រីសហគមន៍បឹងពារាំង លោក ឈឿម សំបូ បានប្រាប់អ្នកសារព័ត៌មានថា ទឹកដែលបង្ហូរមកនេះ គឺខាងសហគមន៍ ជាអ្នកស្នើសុំពីមន្ទីរធនធានទឹក ដោយនាំយកបញ្ចូលទៅបឹងពារាំង ដើម្បីសង្គ្រោះត្រីមេពូជ។ត្បិតរដូវប្រាំងកំពុងគំរាមកំហែងយ៉ាងខ្លាំងក្នុងការផ្តាច់ជីវិតត្រីមេពូជនិងសត្វស្លាបទឹងរាប់រយប្រភេទ។ហេតុផលនេះហើយ ដែលនាំអោយខាងសហគមន៍ រារាំងក្នុងការបិទផ្លូវទឹករបស់ប្រជាកសិករ។

ជាមួយការលើកហេតុផលអំពីការដណ្តើមគ្នាយកទឹកនេះ មន្ត្រីក្រុមប្រឹក្សាសង្កាត់ជ្រាវ និងនគរបាលមូលដ្ឋាន បានសម្រេចអោយគូភាគី រក្សាភាពស្ងប់ស្ងាត់ ហើយរងចាំដំណោះស្រាយពីអាជ្ញាធរសង្កាត់ នៅរសៀលថ្ងៃផងដែរ៕SRP