ខេត្តសៀមរាប

ខេត្តសៀមរាប៖មន្ត្រីប៉ូលិសខេត្តសៀមរាប បានអះអាងថាមិនមានករណីចាប់ក្មេងដាក់ចូលរថយន្តនៅក្នុងខេត្តសៀមរាប នោះទេ។

ការអះអាងនេះធ្វើឡើងបន្ទាប់ពីមន្ត្រីប៉ូលិស ខេត្តសៀមរាប ចុះស៊ើបអង្កេត ស្រាវជ្រាវ ដល់ផ្ទះ ក្រុមគ្រួសារឪពុកម្ដាយក្មេងទាំងពីរនាក់ដែលបាត់។

ស្នងការរងទទួលផែនព្រហ្មទណ្ឌស្នងការប៉ូលិសខេត្តសៀមរាប លោក ភឹង ចិន្តារ៉េត បានថ្លែងថាបន្ទាប់ពីឃើញនូវការ បង្ហោះ facebook «ចាប់មនុស្សដាក់ឡាន» នគរបាលខេត្តសៀមរាប បានចុះស៊ើបអង្កេត ជាមួយគ្រួសាររងគ្រោះ។

គ្រួសាររងគ្រោះ បានប្រាប់ប៉ូលិសថា គាត់ផុសហ្វេសប៊ុកបែបនេះ គឺដើម្បីយកចំណាប់អារម្មណ៍ដើម្បីឲ្យសមត្ថកិច្ច ជួយអន្តរាគមន៍តែប៉ុណ្ណោះ។

លោក ភឹង ចិន្តារ៉េត ថ្លែងបន្តថាកូនជ្រូក ដែលម្ដាយសន្សំលុយត្រូវបានកូនវាយបំបែកយកលុយអស់ ចំណែកខោអាវរបស់កូនៗក៏បាត់អស់មួយចំនួនផងដែរ។

បើតាមលោក ភឹង ចិន្តារ៉េត សមត្ថកិច្ចសន្និដ្ឋានថា មិនមែនជាករណីចាប់ក្មេងដាក់ឡាន នោះទេអាចក្មេងរត់ចេញពីផ្ទះ ព្រោះម្ដាយរបស់ក្មេង តែងតែអប់រំ និងវាយពួកគេជាញឹកញាប់ ទើបពួកគេរត់បែបនេះ។ ទោះជាយ៉ាងណានគរបាលកំពុងធ្វើការស្រាវជ្រាវដើម្បីស្វែងរកក្មេងទាំងទាំងពីរនាក់នេះ។

ប៉ូលិសស្រុកប្រាសាទបាគងឲ្យដឹងថា នៅថ្ងៃទី១៣ ខែឧសភា ឆ្នាំ២០២២ ក្រោយទទួលព័ត៌មានពី ឈ្មោះប៉ិច សុខេន ភេទស្រីអាយុ៣៦ឆ្នាំ នៅភូមិល្អក់ ឃុំកណ្ដែក ស្រុកប្រាសាទបាគង ខេត្តសៀមរាប ជាម្ដាយក្មេងរងគ្រោះ បានរាយការណ៍ថា៖
ជាទម្លាប់កូនប្រុសទាំង២នាក់ ឈ្មោះហ៊ុន គឹមហេង អាយុ១៤ឆ្នាំ និងឈ្មោះហ៊ុន សុខវិសាល អាយុ៩ឆ្នាំ ម៉ោង៦.០០នាទី បានចេញទៅរៀន នៅសាលាអនុវិទ្យាល័យធ្លកអណ្ដូង ស្ថិតក្នុងភូមិធ្លកអណ្ដូង សង្កាត់ស្លរក្រាម  ក្រុងសៀមរាប ខេត្តសៀមរាប ហើយតែងតែមកដល់ផ្ទះនៅម៉ោង១២.៣០នាទី លុះនៅថ្ងៃទី១២ ខែឧសភា ឆ្នាំ២០២២  វេលាម៉ោង៦.០០នាទី កូនរបស់គាត់ទាំង២នាក់ បានចេញទៅរៀនតាមទម្លាប់ ដូចរាល់ដង ដោយឌុបគ្នា ជាមួយបងប្អូន ហើយរហូតដល់ម៉ោងជិត១ថ្ងៃ ស្រាប់តែមិនឃើញកូនមក គាត់ក៏បានទូរស័ព្ទទៅកូន តែមិនចូល ដោយប្លែកព្រោះរាល់ដងកូនគាត់មិនដែលបិតទូរស័ព្ទទេ។ ម្ដាយបន្តថាគាត់បានទូរស័ព្ទសួរបងប្អូនថា តែអត់ឃើញ ទើបគាត់និងប្ដីបងប្អូននាំគ្នាដើររកតែដើរកមិនឃើញរហូតមកដល់ថ្ងៃនេះ។ ខាងក្រោមនេះលេខទូរស័ព្ទកូនដែលបាត់មានលេខ ០៦៩ ៦១៣៧០៦៕SRP

ខេត្តសៀមរាប៖បុរស២នាក់ត្រូវបានសមត្ថកិច្ចឃាត់ខ្លួននៅព្រហស្បតិ៍ ម្សិលមិញ ពាក់ព័ន្ធឆក់ទូរស័ព្ទ។

ករណីឆក់កើតឡើង មុខសណ្ឋាគារ រ៉ូយ៉ាល់ ក្រោន ស្ថិតក្នុងភូមិវត្តបូព៌សង្កាត់កំរើក ក្រុងសៀមរាប កាលថ្ងៃទី១០ខែឧសភាឆ្នាំ២០២២ ពីដោយបានយកទូរស័ព្ទ១គ្រឿង Xiaomi 12pro ផលិតនៅប្រទេសចិន ពណ៌ប្រផេះ ស៊ីមកាត២ របស់ជនរងគ្រោះឈ្មោះ Cao Yun Xiong ភេទប្រុស អាយុ២៥ឆ្នាំ ជនជាតិចិន មុខរបរ ជាវិស្វករនៅធ្វើការសង់ព្រលានយន្តហោះថ្មី ខណៈពេលដែលជនរងគ្រោះ និងមិត្តស្រីជាជនជាតិខ្មែរ ដើរចេញពីសណ្ឋាគារ។

សមត្ថកិច្ចប៉ូលិសក្រុងសៀមរាប បានឲ្យដឹងថាជនសង្ស័យទី ១ឈ្មោះជុយ សឿន ហៅស្មី ភេទប្រុស អាយុ៣២ឆ្នាំ មុខរបរលក់ម្ជូរ មានស្រុកកំណើត នៅភូមិត្រពាំងក្រឡឹង ឃុំភ្នំតូច ស្រុកឧត្តុង ខេត្តកំពង់ស្ពឺ ទីលំនៅបច្ចុប្បន្នស្នាក់នៅបន្ទប់ជួលភូមិត្រពាំងសេះ សង្កាត់គោកចក ក្រុងសៀមរាប។ ០២-ឈ្មោះឃ្លី វ៉ាល់លី មុខរបរលក់ម្ជូរ មានស្រុកកំណើតនៅភូមិព្រែករន្ទះ ឃុំពោធិរៀង ស្រុក ពោធិរៀង ខេត្តព្រៃវែង ទីលំនៅបច្ចុប្បន្នស្នាក់នៅបន្ទប់ជួលភូមិត្រពាំងសេះ សង្កាត់គោកចក ក្រុងសៀមរាប។

ជនសង្ស័យបានឆ្លើយថា ខ្លួនពិតជាបានចូលរួមឆក់ទូរស័ព្ទ ជាមួយបក្ខពួកពិតមែន។

វត្ថុតាងនិងជនសង្ស័យ ត្រូវបានបញ្ជូនទៅតុលាការនៅរសៀលថ្ងៃនេះ៕SRP

ខេត្តសៀមរាប៖ផ្ទះរបស់អាជីវករចំនួនពីរនាក់ ត្រូវបានចោរគាស់ផ្ទះយកទ្រព្យសម្បត្តិ គ្មានសល់។

ហេតុការណ៍បានកើតឡើងនៅថ្ងៃ នៅថ្ងៃព្រហស្បតិ៍ ទី១២ ខែឧសភា ឆ្នាំ២០២២ នៅវេលាម៉ោង០០និង១០នាទី ថ្ងៃទី១២ ខែឧសភា ឆ្នាំ២០២២ នៅណុចភូមិបឹងមាលា ឃុំបឹងមាលា ស្រុកស្វាយលើ ខេត្តសៀមរាប។

សមត្ថកិច្ចខេត្តសៀមរាបបានឲ្យដឹងថាករណីនេះបង្កឡើងដោយជនមិនស្គាល់អត្តសញ្ញាណ បានធ្វើសកម្មភាព គាស់ទ្វារផ្ទះរបស់អាជីរករលក់ដូរ ក្បែរប្រសសាទបឹងមេលាចូលលួចសម្ភារៈមានតម្លៃ និងឥវ៉ាន់។

ជនរងគ្រោះ ទី១៖ ឈ្មោះ ម៉ា ភិរម្យ ហៅ ហេង ភេទប្រុស អាយុ ៤៥ឆ្នាំ មុខរបរអាជីវករ ទីលំនៅបច្ចុប្បន្នភូមិបឹងមាលា ឃុំបឹងមាលា ស្រុកស្វាយលើ ខេត្តសៀមរាប។
សម្ភារបាត់បង់រួមមាន៖
– ប្រាក់ចំនួន ២,៣៩០,០០០ រៀល (ពីរលានសាមសិបប្រាំបួនម៉ឺនរៀល)
– កាតទូរស័ព្ទសែលខាត ១$ ចំនួន ១០០ សន្លឹក
– កាតទូរស័ព្ទមិត្តហ្វូន ១$ ចំនួន ១០០ សន្លឹក
– បារីម៉ៃសាវេន ចំនួន៣ សុង។

ជនរងគ្រោះទី២ ឈ្មោះ ម៉ា ភារៈ ភេទប្រុស អាយុ៤០ឆ្នាំ មុខរបរ អាជីវករ ទីលំនៅបច្ចុប្បន្នភូមិបឹងមាលា ឃុំបឹងមាលា ស្រុកស្វាយលើ ខេត្តសៀមរាប។
សម្ភារបាត់បង់រួមមាន៖
– ប្រាក់ចំនួន ៥០,០០០ រៀល (ប្រាំម៉ឺនរៀល)។
ចំណែកជនរងគ្រោះ ទី៣៖
ឈ្មោះ ជា សុកញ្ញា ភេទស្រី អាយុ ២២ឆ្នាំ មុខរបរអាជីវករ ទីលំនៅបច្ចុប្បន្នភូមិទឹកលិច ឃុំបឹងមាលា ស្រុកស្វាយលើ ខេត្តសៀមរាប។
សម្ភារបាត់បង់រួមមាន៖
– ប្រាក់ចំនួន ៥០,០០០ រៀល (ប្រាំម៉ឺនរៀល)។

ជុំវិញហេតុការណ៍នេះកម្លាំងជំនាញកំពុងស្រាវជ្រាវ រកមុខសញ្ញា ដើម្បីចាត់ការទៅតាមនីតិវិធី៕SRP

ខេត្តសៀមរាប៖តាមប្រភពច្បាស់ការណ៍បានឲ្យដឹងថា មានករណីបាត់ក្មេងសិស្សសាលាចំនួន ២នាក់ នៅក្នុងខេត្តសៀមរាប។ ករណីនេះឪពុកជនរងគ្រោះបានប្រាប់សារព័ត៌មានសៀមរាបប៉ុស្តិ៍ នៅព្រឹកថ្ងៃសុក្រនេះថា ពិតជាមានការបាត់កូនរបស់លោកចំនួន២នាក់ពិតប្រាកដមែន។ លោកថាគេឃើញចាប់ក្មេងទាំងពីរនាក់ដាក់ចូលរថយន្ត។ ការបាត់នេះសង្ស័យម្ដុំក្រោយបុរីទេសចព្រោះតំបន់នោះស្ងាត់។

របាយការណ៍របស់សមត្ថកិច្ចខេត្តសៀមរាបបានឲ្យដឹងថា វេលាម៉ោង២១និង៣០នាទីថ្ងៃទី ១២ ខែឧសភា ឆ្នាំ២០២២ មានករណីអំពើបាត់ក្មេងចំនួន២នាក់មត្រូវជាបងប្អួនបង្កើតនឹងគ្នាខណ:ជិះកង់ទៅសាលាបឋមសិក្សាធ្លកអណ្ដូង ស្ថិតក្នុងសង្កាត់ស្លក្រាម ក្រុងសៀមរាប ខេត្តសៀមរាប។

របាយការណ៍បន្តថាតាមការបំភ្លឺរបស់ឪពុកឈ្មោះ ភាច ហ៑ុន អាយុ៣៧ ឆ្នាំមុខរបរ មន្រ្តីរាជការស៊ីវិល រស់នៅភូមិល្អក់ ឃុំកណ្ដែក ស្រុកប្រាសាទបាគង ខេត្តសៀមរាប បានឲ្យដឹងថា៖រូបគាត់មានកូនចំនួន២នាក់ ប្រុសទាំងពីរនាក់៖ ១/ឈ្មោះហ៑ុន គីមហេង ភេទប្រុសអាយុ១៤ឆ្នាំ មុខរបរសិស្សរៀននៅសាលាអនុវិទ្យាលយធ្លកអណ្តូង។ ២/ឈ្មោះហ៑ុន វិសាល ភេទប្រុសអាយុ៩ឆ្នាំ មុខរបរសិស្ស រៀននៅសាលាបឋមសក្សាធ្លកអណ្តូង សង្កាត់ស្លក្រាម ក្រុងសៀមរាម។

ឪពុកបន្តថានៅវេលាម៉ោង៦ព្រឹក កូនរបស់គាត់ទាំង២នាក់ បានជិះកង់ប្រភេទកង់ខ្មែរពណ៌សបានឌុបគ្នា មករៀននៅសាលាបឋមសិក្សធ្លកអណ្ដូង សង្កាត់ស្លក្រាម ក្រុងសៀមរាប ខេត្តសៀមរាប លុះដល់ម៉ោង១២ថ្ងៃត្រង់មិនឃើញត្រឡប់មកផ្ទះវិញ រូបគាត់បានជិះម៉ូតូទៅតាមរកនៅសាលារៀន ហើយបានទៅជួបនាយកសាលាសួរ រកឈ្មោះកូនរបស់គាត់ដែលបានមករៀន តាំងពីរព្រឹកមិនឃើញទៅដល់ផ្ទះសោះ ប៉ុន្តែលោកនាយកសាលា បានឆ្លើយថាមិនឃើញមករៀនតាំងពីរព្រឹកម្ល៉េះ។ ក្រោយមករូបគាត់បានជិះម៉ូតូ តាមរកសួរបងនិងប្អូននៅតែមិនឃើញ សួរតាមមិត្តភ័ក្តរបស់កូនគាត់ក៏រកមិនឃើញ លុះដល់ម៉ោង១៥.០០នាទីគាត់ បានទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលស្លក្រាម។ ក្រោយមកវេលាម៉ោងង២១និង៣០នាទី បានទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាល ឃុំកណ្ដែក ស្រុកប្រាសាទបាគង ដើម្បីជួយស្វែងរកកូនរបស់គាត់។

ឪពុកក្មេងបន្តថាកាលមុនគាត់មានផ្ទះនៅភូមិធ្លកអណ្ដូង ហើយកូនទាំង២នាក់របស់គាត់រៀននៅសាលាធ្លកអណ្ដូង ក្រោយមកគាត់មកនៅភូមិល្អក់ ឃុំកណ្ដែក ស្រុកប្រាសាទបាគង ប៉ុន្តែមិនបានប្ដូរសាលាកូនរៀននោះទេ ពោលគឺកូនទាំងពីរនាក់ ត្រូវជិះកង់ ពីភូមិល្អក់ទៅរៀននៅសាលាធ្លកអណ្ដូង។ ទោះជាយ៉ាងណាករណីផងដែរសមត្ថកិច្ចខេត្តសៀមរាប បានកំពុងស្រាវជ្រាវរកផងដែរ៕SR

ខេត្តសៀមរាប៖សិស្សប្រុសម្នាក់ ត្រូវបានកម្លាំងអាវុធហត្ថស្រុកបន្ទាយស្រី ឃាត់ខ្លួនក្រោយទទួលបានពាក្យបណ្ដឹង ពីឪពុករបស់ជនរងគ្រោះ។

លោកសៀក សោ ភា នាយការិយាល័យ ព្រហ្មទណ្ឌ មន្ទីរយុត្តិធម៌ នៃបញ្ជាការកងរាជអាវុធហត្ថខេត្តសៀមរាបបានថ្លែងប្រាប់ សៀមរាបប៉ុស្ដិ៍ នៅព្រលប់ថ្ងៃទី ១១ ខែឧសភានេះ ថា នៅវេលាម៉ោង ១៦និង៤០នទី ថ្ងៃទី១០ ខែឧសភា ឆ្នាំ២០២២ មានករណី៖ ប៉ុនម៉ងឃាតកម្ម នៅចំណុចចំការស្វាយ ស្ថិតនៅភូមិបន្ទាយស្រី ឃុំខ្នារសណ្ដាយ ស្រុកបន្ទាយស្រី ខេត្តសៀមរាប។

ជនបង្កដោយឈ្មោះ ដៀម វិសាល ភេទប្រុស អាយុ ១៥ឆ្នាំ មុខរបរសិស្ស រស់នៅភូមិទួលក្រឡាញ់ ឃុំខ្នារសណ្ដាយ ស្រុកបន្ទាយស្រី ខេត្តសៀមរាប។

ជនរងគ្រោះឈ្មោះ ប. ម.ល ភេទស្រី អាយុ ១៦ឆ្នាំ មុខរបរសិស្ស រស់នៅឃុំខ្នារសណ្ដាយ ស្រុកបន្ទាយស្រី ខេត្តសៀមរាប។ ជនរងគ្រោះ មានរបួសនៅ ជុំវិញកញ្ចឹងក និងហើមស្មារផ្នែកខាងស្នាំ បច្ចុប្បន្នជនរងគ្រោះកំពុងសម្រាកព្យាបាល នៅមន្ទីរពេទ្យបង្អែកខេត្តសៀមរាប (ដោយស្ថានភាពរបួសធ្ងន់ធ្ងរ មិនអាចសួរនាំបាន) ។

លោក សៀក សោភា បន្តថាក្រោយឃាត់ខ្លួន ជនសង្ស័យបានឆ្លើយសារភាពថា នៅវេលាម៉ោងប្រហែលជា១៤ជាង ថ្ងៃទី១០ ម្សិលមិញ រូបខ្លួន ជិះម៉ូតូឌុប ជនរងគ្រោះ ជាសង្សាដើរលេង បន្ទាប់មក បានឌុបមកផ្ទះ ដោយមកតាមផ្លូវ សង្សាយំ ក្រោយមកគេអោយរូបគេឈប់ម៉ូតូ ហើយបានលួងនាង តែនាងមិនស្តាប់ ហើយរូបគេក៏បានលើកជនរងគ្រោះ ដាក់ម៉ូតូ ពីរទៅបីដងជនរងគ្រោះ នៅតែមិនព្រមឡើងជិះម៉ូតូទៅជាមួយខ្លួនទេ ទើបរូបគេខឹងនាងខ្លាំង ក៏ទាញដំបងនៅក្បែនោះ វាយទៅលើជនរងគ្រោះ ចំកញ្ចឹងក បណ្ដាលឲ្យដួលទៅលើដី បន្ទាប់មករូបខ្លួនបានដោះអាវដៃវែងពណ៌ខៀវ មករឹតកជនរងគ្រោះបន្ថែមទៀត ពេលនោះជនរងគ្រោះបានស្រែកហើយរើបម្រាស់ខ្លាំង រូបខ្លួនភ័យក៏បានជិះម៉ូតូគេចខ្លួនមកផ្ទះ។

ករណីនេះដកហូត
វត្ថុតាង៖១• ដំបងឈើ១ប្រវែង០១•៥៤ សម
២• អាវដៃវែងក្រណាត់ពណ៏ខៀវ០១
៣• ស្បែកជើង១គូ
៤• មួកពណ៏ខ្មៅ០១
៥• ម៉ូតូហុងដាខ្មៅ១២៥ មួយ១គ្រឿង

បច្ចុប្បន្ន ការិយាល័យជំនាញកំពុងកសាងសំណុំរឿងបញ្ចូនជនសង្ស័យទៅអយ្យការសាលាដំបូងខេត្តសៀមរាប៕SRP

ខេត្តសៀមរាប៖មនុស្សមួយក្រុមបានទៅបាញ់សត្វ តែរបុរសម្នាក់បានស្លាប់ដោយសារតែរៀលកៃបាញ់ខ្លួនឯង។

ហេតុការណ៍បានកើតឡើងវេលាម៉ោង ១៥និង០០ នាទី ថ្ងៃទី ១០ ខែឧសភា ឆ្នាំ២០២២ នៅចំណុចបាញ់ខ្លា ស្ថិតនៅភូមិពពេល ឃុំតាសៀម ស្រុកស្វាយលើ ខេត្តសៀមរាប។

របាយការណ៍ររបស់សមត្ថកិច្ចខេត្តសៀមរាបបានដឹងថា ជនរងគ្រោះឈ្មោះ ឆង ឆន ភេទ ប្រុសអាយុ ៣៨ឆ្នាំ រស់នៅភូមិបុស្សធំ ឃុំខ្នារពោធិ៍ ស្រុកសូទ្រនិគម ខេត្តសៀមរាប។

របាយការណ៍បន្តថាយោងតាមការបំភ្លឺរបស់សាក្សីឈ្មោះ ភួង សុផាន់ ភេទប្រុស អាយុ ២៥ឆ្នាំរស់នៅភូមិពពេល ឃុំតាសៀម ស្រុកស្វាយលើ ខេត្តសៀមរាប ត្រូវជាមិត្តភ័ក្តបោះជនរងគ្រោះបានប្រាប់អោយដឹងថា៖ នៅថ្ងៃទី ១០ ខែឧសភា ឆ្នាំ២០២២ វេលាម៉ោង ១៣និង០០នាទីរសៀល ជនរងគ្រោះនិងខ្លួន មានគ្នាចំនួន ០៥នាក់ បានបបួលគ្នាទៅបាញ់រលក នៅក្នុងព្រៃចំណុចបាញ់ខ្លា ស្ថិតក្នុងភូមិពពេល ឃុំតាសៀម ស្រុកស្វាយលើ ខេត្តសៀមរាប។
ដោយមាន៖
១.ឈ្មោះ ឆង ឆន(សព) ភេទប្រុស អាយុ ៣៨ឆ្នាំ។
២.ឈ្មោះ ភួង សុផាន់ ភេទប្រុសអាយុ ២៥ឆ្នាំ
៣.ឈ្មោះ តាន់ ខើ ភេទប្រុស អាយុ ៣៤ឆ្នាំភូមិ ពពេល
៤.ឈ្មោះ ភុង វាសនា ភេទប្រុស អាយុ ២០ ឆ្នាំ
៥.ឈ្មោះ ប៉ិក ផាន់ណា ភេទ អាយុ ២៦ឆ្នាំ អ្នកទាំង៥នាក់ រស់នៅ ឃុំខ្នារពោធិ៍ ស្រុកសូទ្រនិគម ខេត្តសៀមរាប។

សាក្សីបន្តថាពេលទៅដល់ចំណុចត្រូវរកសត្វ នាំគ្នាចុះដើររកសត្វ តែរកមិនមានសត្វ សម្រាប់បាញ់នោះទេ ដល់ម៉ោង ១៥.០០ នាទីរសៀល ក៏បបួលគ្នាមកផ្ទះវិញ និងរៀបចំកាំភ្លើងកែច្នៃដាក់លើគោយន្តកន្ត្រៃវិញ ដោយ ឈ្នោះ តាន់ ខើ ភេទប្រុស កាន់កាំភ្លើងកែច្នៃ ១ដើម។ ២.ឈ្មោះ ភូង សុផាន់ ភេទប្រុស កាន់១ដើម។ ៣.ឈ្មោះ ឆង ឆន ភេទប្រុស (សព) កាន់កាំភ្លើង ២ដើម។ ពួកខ្លួនបានរៀបចំទុកដាក់កាំភ្លើងលើគោយន្តរួច នៅសល់តែឈ្មោះ ឆង ឆន (សព) យកកាំភ្លើងមកក្រោយគេ ស្រាប់តែឮសូរសម្លេងផ្ទុះផាំងពីក្រោយគោយន្ត ភ្លាមៗនោះពួកខ្លួនមើលទៅឃើញគាត់ (សព) ត្រូវរបួសដោយសាររៀលកៃកាំភ្លើងកែច្នៃចំភ្លៅខាងឆ្វេងធ្លាយ ពីម្ខាងទៅម្ខាង និងមានឈាមហូរច្រើន ក៏នាំគ្នាដឹកយកគាត់ទៅមន្ទីរពេទ្យស្រែណូយ។ ពេលទៅដល់ពេទ្យក៏បានសង្គ្រោះបានបន្តិច ពេទ្យក៏ប្រាប់ថាជនរងគ្រោះបានស្លាប់បាត់ទៅហើយ ដោយសារឈាមហូរចេញច្រើនពេក។ រួចពួកខ្លួនក៏ដឹកសពយកមកផ្ទះនៅភូមិបុស្សធំ ឃុំខ្នារពោធិ៍ ស្រុកសូទ្រនិគម ខេត្តសៀមរាប និង រាយការណ៍ជូនសមត្ថកិច្ចតែម្តង។

សមត្ថកិច្ចបញ្ជាក់ថាការពិនិត្យសាកសពផ្នែកក្បាល: ដងខ្លួន និង អវយវៈទាំងអស់ ពុំមានស្លាកស្នាម អ្វីពាក់ព័ន្ធ និងបទល្មេីសព្រហ្មទណ្ទផ្សេងទេ។ យោងតាមកិច្ចសហការរវាងកម្លាំងផ្នែកព្រហ្មទណ្ឌ និង ផ្នែកពិនិត្យ វិភាគកន្លែងកើតហេតុ ព្រមទាំងការបំភ្លឺរបស់សាក្សី សន្និដ្ឋានថា សពបានស្លាប់ដោយសាររៀលកៃកាំភ្លើងកែច្នៃស្លាប់ដោយខ្លួនឯងពិតប្រាកដមែន។ ក្រោយពិនិត្យចប់បានធ្វើកំណត់ហេតុប្រគល់សពឲ្យក្រុមគ្រួសារយកទៅធ្វើបុណ្យតាមប្រពៃណី៕SRP

ខេត្តសៀមរាប៖ការដេញថ្លៃធ្វើផ្លូវចំនួន២ខ្សែ នៅស្រុកសូនិគម ខេត្តសៀមរាប គម្រោងទី១ នៅឃុំដានរុន ជួសជុលផ្លូវដីសក្រាលក្រួសក្រហម ប្រវែង២គ.មទទឹង៥.៤ម៉ែត្រកម្រាស់ ០.១៥ម៉ែត្រ និងស្លាកគម្រោង២ បញ្ជាក់ដីសបំពេញតួ ផ្លូវត្រូវដឹកដាក់និងចាក់ដីក្រួសក្រហមសម្រាប់ជួសជុលផ្លូវ ព្រមទាំងដាក់លូរបាំងការពារផ្លូវនិងលាបថ្នាំ នៅថ្ងៃចន្ទទី ០៩ ខែឧសភាឆ្នាំ ២០២២ ហាក់បីមានភាពមិនប្រក្រតី។

ប្រភពបានឲ្យដឹងថា តម្លៃប៉ាន់ស្មាន.១៦៩.២៦០.៥៨១រៀល គម្រោងមួយនេះ គេសង្កេតឃើញថា មានការប្រកួតប្រជែង រហូតទៅដល់ 7 ក្រុមហ៊ុនឯណ្ណោះ ហើយអ្នកដែលដេញថ្លៃបាន ឈ្មោះម៉ូវ សុីថាយ មកពីក្រុមហ៊ុនម៉ៅការMSTតម្លៃដេញបាន ៩១.៩៩៨.៣០០រៀល គត់ ជាអ្នកទទួលបានគម្រោងហើយក៏អ្នកឈ្នះផងដែរ។

ចំណែកនៅគម្រោងទី 2 ដែលជាគម្រោង មានភាពមិនប្រក្រតីនោះ គឺឃុំកំពង់ឃ្លាំង សាងសង់ផ្លូវបេតុងមេប្រវែង០.២៨៨គ.ម មានទទឹង៥ម. កម្រាស់០.១៥ម ស្លាកសញ្ញាគម្រោង១ បញ្ជាក់.ប្រើប្រាស់ដែកថ្នាំងអំពៅ១០ម.ម តម្លៃប៉ាន់ស្មាន .១៦៤.៦៨៩.១២៩រៀលមានក្រុមហ៊ុនចំនួន 4 ដែលបានចូលដាក់ពាក្យដេញថ្លៃ ក្នងតម្លៃចចារគ្នា ចែកគ្នាស៊ីក្នុងគម្រោងឃុំកំពង់ឃ្លាំងនេះ។

ទី១.ម៉ូវ សុីថាយ មកពីក្រុមហ៊ុនMSTតម្លៃដាក់ដេញថ្លៃ១៦៤.០០០.០០០រៀល

ទី២ អ៊ុង លីសួរ មកពីក្រុមហ៊ុនអ៊ុង លីសួរ តម្លៃដាក់ដេញថ្លៃ១៦៤.៦០០.០០០រៀល

ទី៣ ទាត់ វ៉ាន់ដៀន មកពីក្រុមហ៊ុនអំឡីតម្លៃដាក់ដេញថ្លៃ១៦៤.៤៤៨.០០០រៀល

ទី៤ ហ៊ួរ ឆូយ មកពីក្រុមហ៊ុនហ៊ួរ ឆូយ តម្លៃដាក់ដេញថ្លៃបាន១៦៣.០០០.០០០. រៀលជាតម្លៃត្រូវរូវគ្នា ហើយជាអ្នកទទួលបានគម្រោងនិងជាមេចំណែកបោះលុយទឹកតែផងដែរ គឺក្រុមហ៊ុន ហ៊ួរ ឆូយ ដោយសង្កេតឃើញថា៖ មានតែ៤ ក្រុមហ៊ុន ដែលបានដាក់ដេញថ្លៃនៅក្នុងឃុំកំពង់ឃ្លាំង គឺជាក្រុមហ៊ុនដែលគេនិយាយត្រូវគ្នា និងចែកភាគហ៊ុនទឹកតែគ្នា ហើយជាជាវិញ្ញាសា ចម្លងគ្នាតែប៉ុណ្ណោះ។

ប្រភពបានបន្តថា នៅថ្ងៃដដែល ប្រជាពលរដ្ឋរស់នៅក្នុងឃុំកំពង់ឃ្លាំង ស្រុកសូទ្រនិគមខេត្តសៀមរាប បានឲ្យអ្នកសារព័ត៌មាន ដឹងថាពួកគាត់និងអស់សង្ឃឹមទៅលើអាជ្ញាធរឃុំនិងអាជ្ញាធរស្រុក ហាក់បីរួមគំនិតគ្នា ជាមួយក្រុមហ៊ុនម៉ៅការ ដេញថ្លៃ។

ជុំវិញការបែកធ្លាយគម្រោងដេញថ្លៃធ្វើផ្លូវ ខាងលើនេះ សៀមរាបប៉ុស្តិ៍ នៅពុំទាន់ទទួលបានការបកស្រាយបំភ្លឺពីអាជ្ញាធរនិងក្រុមហ៊ុននៅឡើយទេ៕SRP

ខេត្តសៀមរាប៖លោក នួន ពុទ្ឋារ៉ា អភិបាលក្រុងសៀមរាប ចាត់ទុកនូវសមិទ្ឋផលនៃផ្លូវមួយខ្សែនេះ ថាពិតជាមានអត្ថប្រយោជន៍យ៉ាងធំធេងណាស់ ក្នុងការរួមចំណែកបម្រើផលប្រយោជន៍ បងប្អូនប្រជាពលរដ្ឋក្នុងមូលដ្ឋាន ក៏ដូចជាសាធារណៈជន ទូទៅ ស្របតាមផែនការរបស់រដ្ឋបាលក្រុង រដ្ឋបាលខេត្ត។

លោក បន្តថាបញ្ហាផ្លូវជាអាទិភាពចម្បង  និងស្របតាមគោលនយោបាយ កសាងហេដ្ឋារចនាសម្ព័ន្ឋ របស់រាជរដ្ឋាភិបាល ក្នុងការអភិវឌ្ឍហេដ្ឋារចនាសម្ព័ន្ឋផ្លូវថ្នល់ ដើម្បីសម្រួលដល់ការធ្វើដំណើរ និងលើកស្ទួយកម្រិតជីវភាពរស់នៅរបស់ប្រជាពលរដ្ឋគ្រប់ទីកន្លែងផងដែរ។ ផ្លូវនេះជាឆ្អឹងខ្នង ជាសរសៃឈាមសេដ្ឋកិច្ចមួយយ៉ាងសំខាន់ ជួយលើកកម្ពស់ដល់វិស័យទេសចរណ៍ជាពិសេសរួមចំណែកលើកស្ទួយជីវភាពរស់នៅនិងជួយសម្រួលការធ្វើដំណើររបស់ប្រជាពលរដ្ឋ និងសិស្សានុសិស្ស ក្នុងការធ្វើដំណើរទៅសាលារៀននិងដឹកជញ្ជូនភោគផលផ្សេងៗផងដែរ។

លោកអភិបាលក្រុង ក៏សូមថ្លែងអំណរគុណយ៉ាងជ្រាលជ្រៅចំពោះសម្ដេចតេជោ ហ៊ុន សែន បានផ្ដល់វិកាកសាងហេដ្ឋារចនាសម្ព័ន្ឋផ្លូវ ៣៨ខ្សែ ដែលបានសាងសង់រួចរាល់ហើយនោះ ថាជាចំណងដៃដ៍ថ្លៃថ្លាថ្មីមួយទៀតសម្រាប់អ្នកក្រុងសៀមរាប ហើយសមិទ្ធិផលនោះបានជួយកែលំអរសោភណ្ឌភាពទីក្រុងសៀមរាប ឱ្យក្លាយជាទីក្រុងដ៏ទំនើប ពោរពេញដោយសោភ័ណភាព បរិស្ថានល្អសម្រាប់ការ រស់នៅសក្ដិសមជាទីក្រុងទេសចរណ៍ វប្បធម៌ និងប្រវត្តិសាស្ត្រ អាចទាក់ទាញភ្ញៀវទេសចរណ៍បានកាន់តែច្រើនសំដៅលើកស្ទួយសេដ្ឋកិច្ចជាតិ ឱ្យកាន់តែមានការរីកចម្រើន ព្រមទាំងធ្វើឱ្យប្រសើរឡើងដល់ការតភ្ជាប់ពីទីប្រជុំជនក្រុងសៀមរាបទៅកាន់តំបន់ដាច់ស្រយាលផងដែរ។ 

លោកមានប្រសាសន៍យ៉ាងដូច្នេះ នៅថ្ងៃចន្ទនេះ ក្នុងឱកាស សម្ពោធដាក់ប្រើប្រាស់ជាផ្លូវការ ផ្លូវបេតុងមួយខ្សែ មានប្រវែង ១,៨៧០ម៉ែត្រ ទទឹង៦ម កម្រាស់0,១៦ម៉ែត្រ រួមនឹងហេដ្ឋារចនាសម្ព័ន្ឋ ដូចជាបំពាក់អំពូលសូឡាតាមដងផ្លូវ លូរំដោះទឹកភ្លៀង និងសមទ្ធផលមួយចំនួនទៀត ដែលចំណាយថវិកាអស់ជាង ៣០ម៉ឺនដុល្លារ ស្ថិតនៅភូមិភ្នំក្រោម សង្កាត់សៀមរាប៕SRP

ខេត្តសៀមរាប៖ពិតជាសាហាវព្រៃផ្សៃណាស់ បុរសម្នាក់ត្រូវបានសមត្ថកិច្ចចាប់ខ្លួន ពាក់ព័ន្ធករណីរំលោភសម្លាប់។

អាជ្ញាធរស្រុកក្រឡាញ់បានប្រាប់សៀមរាប ប៉ុស្តិ៍ ថា ហេតុការណ៍ភ្ញាក់ផ្អើលបានកើតឡើង នៅវេលាម៉ោង០៦ និង៣០ នាទីព្រឹកនៅថ្ងៃទី០៩ ខែឧសភា ឆ្នាំ២០២២ នៅត្រង់ចំណុច វាលស្រែខាងជើងត្រពាំងកក់ ស្ថិតនៅភូមិរវៀង ឃុំស្រណាល ស្រុកក្រឡាញ់ ខេត្តសៀមរាប។

ជនរងគ្រោះឈ្មោះ ផុន ឃីម ភេទស្រីអាយុ១៣ឆ្នាំ រស់នៅភូមិរវៀង ឃុំស្រណាល ស្រុកក្រឡាញ់ ខេត្តសៀមរាប។

អាជ្ញាធរបានបន្តថា តាមព័ត៌មានពីឈ្មោះ ខ្វាវ លំ ភេទស្រីអាយុ៦៨ឆ្នាំ ត្រូវជាជីដូនសពបានឱ្យដឹងថា៖ នៅថ្ងៃទី០៨ ខែឧសភាឆ្នាំ២០២២ វេលាម៉ោងប្រហែល២១និង៣០ នាទី ចៅស្រីរបស់គាត់ឈ្មោះ ផុន ឃីម ឆ្នាំ បានចេញទៅឆ្លុះកង្កែបតែម្នាក់ឯងនៅក្នុងភូមិ បានប្រហែលមួយសន្ធុះគាត់ក៏ឃើញចៅស្រីរបស់គាត់បានយកកង្កែបមកទុកនៅផ្ទះ។ពេលនោះចៅស្រីរបស់គាត់បានសុំគាត់ទៅឆ្លុះកង្កែបទៀត ហើយបាននិយាយថាឈ្មោះ វឿ ភេទ ប្រុស បានប្រាប់ថានៅខាងលិចភូមិមានកង្កែបច្រើនណាស់ ពេលនោះចៅស្រីរបស់គាត់ បានទៅឆ្លុះកង្កែបទៀត លុះដល់ម៉ោងប្រហែល៣ ទៀបភ្លឺ គាត់ក៏បានក្រោករកចៅ តែមិនឃើញ ពេលនោះគាត់ក៏បានស្រែកហៅកូនចៅឲ្យជួយតាមរក តែដោយសារយប់ងងឹតពេករកមិនឃើញ លុះដល់ម៉ោង៥ព្រឹកទើបរកឃើញ ចៅស្រីរបស់ខ្លួនដេកស្លាប់នៅវាលស្រែ។

អាជ្ញាធរបានបញ្ជាក់ថាករណីនេះ កម្លាំងសមត្ថកិច្ចបានធ្វើការស្រាវជ្រាវ និងឃាត់ខ្លួនជនសង្ស័យ ជនសង្ស័យឈ្មោះ អុក វឿ ភេទប្រុស អាយុ៣១ ឆ្នាំ ស្រុកកំណើត ភូមិរវៀង ឃុំស្រណាល ស្រុកក្រឡាញ់ ខេត្តសៀមរាប។

បច្ចុប្បន្ន កម្លាំងសមត្ថកិច្ចបានកសាងសំណុំរឿងបញ្ជូនទៅការិយាល័យជំនាញចាត់ការតាមនីតិវិធី៕SRP

ខេត្តសៀមរាប៖ស្ត្រី​មេ​តុងទីន​ម្នាក់​ទើបតែ​ចុះ​ពីលើ​រថយន្ត ​ត្រូវចោរឆក់កាបូបលុយ​អស់ប្រាក់ប្រមាណ ជាង​១​ម៉ឺនដុល្លារ។

បើយោងតាម facebook ឈ្មោះ Veasna Lay និងជាអ្នកសារព័ត៌មាន បានរាយកាណ៍ពីក្រុងសៀមរាបអោយដឹង នៅព្រឹកថ្ងៃទី៨ ខែឧសភា ឆ្នាំ២០២២ថា, មាន​ករណី​ចោរ​មួយ​ក្រុម​បាន​ធ្វើ​សកម្មភាព​ឆក់​កាបូប​លុយ​ពី​ស្ត្រី​មេ​តុងទីន​ម្នាក់ យក​អស់ប្រាក់​ប្រមាណ​ជាង​១​ម៉ឺន​ដុល្លារ​អា​មេ​រិ​ក ខណៈ​ពេល​ស្ត្រី​រូប​នោះ បាន​ចុះ​ពីលើ​រថយន្ត។ សកម្មភាព នៃអំពើ​ឆក់​កាបូប​ខាងលើ​នេះ បាន​កើតឡើង​កាលពី​វេលា​ម៉ោង​៧​និង​៤៣​នាទី​យប់ ថ្ងៃ​ទី​៦ ខែឧសភា ឆ្នាំ​២០២២ កន្លងទៅនៅ​ចំណុច​លើ​ផ្លូវលំ​ក្បែរ​ហាង​ទា​កាញ់​ភូមិ​ខ្ញុំ ស្ថិត​ក្នុងភូមិ​ជន្លង់ សង្កាត់​សាលា​កំរើក ក្រុង​សៀមរាប ខេត្តសៀមរាប។ ហើយទើបនឹងត្រូវទាញពីកាមេរ៉ាសុវត្ថិភាពនៅថ្ងៃនេះ ដើម្បីអោយសមត្ថកិច្ចស្វែងរកចាប់ខ្លួន យកមកផ្តន្ទាទោស។

ជន​រង​គ្រោះ​ខាងលើ​មានឈ្មោះ យឿ​ន ពិសី ភេទ​ស្រី អាយុ​៣២​ឆ្នាំ មុខរបរ​លក់​ចាប់ហួយ និង​ជា​មេ​តុងទីន រស់នៅ​ភូមិ​បឹង សង្កាត់​ជ្រាវ ក្រុង​-​ខេត្តសៀមរាប។ នៅ​វេលា​ម៉ោង​កើតហេតុ​ខាងលើ ជន​រង​គ្រោះ​បាន​ជិះ​រថយន្ត​ធ្វើ​ដំណើរ​យក​ប្រាក់​ទៅ​បើក​ឲ្យ​អ្នកលេង​តុងទីន នៅ​ហាង​លក់​ស៊ុប (​ទា​កាញ់​ភូមិ​ខ្ញុំ​) ហើយ​ពេល​នោះ​ក៏​ស្រាប់តែ​មាន​ចោរ​ស្ទាវ​មួយ​ក្រុម​ មាន​គ្នា​២​នាក់​ជិះ​ម៉ូតូ​១​គ្រឿង ម៉ាក​ឌ្រី​ម ពណ៌​ខ្មៅ កាំ​បន្ទះ បាន​ធ្វើ​សកម្មភាព​ ឆក់​យក​កាបូបស្ពាយ​ចំហៀង​របស់​ជន​រង​គ្រោះ ខណៈ​ពេល​ជន​រង​គ្រោះ​ បាន​ចុះ​ពីលើ​រថយន្ត និង​មាន​កាន់​កាបូប​នៅ​នឹង​ដៃ​ដើរ​ចូល​ទៅ​ហាង ក្នុង​គោលបំណង​យក​លុយ​សម្រាប់​ទៅ​បើក​ឲ្យ​អ្នកលេង​តុងទីន រួម​គ្នា​ជា​ម្ចាស់​ហាង​ទា​កាញ់​ភូមិ​ខ្ញុំ​នោះ។

ប្រភព​ដដែល​បន្ត​ថា នៅ​ក្នុង​កាបូបស្ពាយ​របស់​ជន​រង​គ្រោះ​នោះ គឺ​មាន​ប្រាក់​ចំនួន ៤០ ៧០០ ០០០​រៀល (​គិត​ជា​ដុល្លារ​ប្រហែល ១០ ១៧៥ ដុល្លា​អា​មេ​រិ​ក​) ក្នុង​នោះ​ក៏​មាន​ប្រាក់​ចំនួន​៣៦ លាន​រៀល ត្រូវ​បើក​សម្រាប់​ដេញ​កើប​យក​តុងទីន​ ឲ្យ​ម្ចាស់​ហាង​ទា​កាញ់​ភូមិ​ខ្ញុំ ផង​ដែរ។ ក្រោយ​ធ្វើ​សកម្មភាព​ភាព ក្រុម​ចោរ​បាន​រត់គេច​ខ្លួន​បាត់ តែ​ទោះជា​យ៉ាងណា​ក្តី សមត្ថកិច្ច​បាន​កំណត់​មុខសញ្ញា​ក្រុម​ចោរ​២​នាក់​នោះ​ហើយ​តាម​រយៈ​កាមេរ៉ា​សុវត្ថិភាព ដូច្នោះ​សង្ឃឹមថា ជនល្មើស​មិន​អាច​គេច​ផុត​ពី​សំណាញ់​ច្បាប់​បាន​ទេ គង់តែ​ចូល​អន្ទាក់​សមត្ថកិច្ច​ជាក់​ជា​មិន​ខាន៕SRP

ខេត្តសៀមរាប៖សមត្ថកិច្ចជាន់ខ្ពស់ខេត្តសៀមរាប បានថ្លែងប្រាប់សៀមរាបប៉ុស្តិ៍ នៅថ្ងៃអាទិត្យនេះថា យុវជនម្នាក់ ឈ្មោះ ធរ សុធារិទ្ធ អាយុ ១៦ឆ្នាំ មុខរបរសិស្សថ្នាក់ទី១១ រៀននៅវិទ្យាល័យអង្គរ រស់នៅភូមិសាលាកំរើក សង្កាត់សាលាកំរើក ក្រុងសៀមរាប ត្រូវបានក្រុមចោរវាយប្លន់សម្លាប់ កាលពីម្សិលមិញ ដោយជនរងគ្រោះបានបាត់ទូរស័ព្ទ ១គ្រឿង ម៉ាក oppo ពណ៌ខ្មៅ។

ឃាតកម្ម ដ៏ឃោឃៅនេះ ត្រូវបានប្រជាពលរដ្ឋ ប្រទះឃើញសាកសព នៅក្រោមបង្គោលភ្លើងនៅវេលាម៉ោង០៥និង៣០ នាទី ថ្ងៃទី០៧ ខែឧសភាឆ្នាំ២០២២ នៅចំណុចបង្គោលភ្លើងនៅវាលស្រែស្ថិតនៅភូមិអារញ្ញ សង្កាត់សៀមរាប ក្រុងសៀមរាប។

សមត្ថកិច្ចបានថ្លែងបន្តថា នៅលើសាកសពដោយពិនិត្យឃើញបាក់ដើមដៃខាងស្តាំ និងនៅលើដងខ្លួនមានស្នាមជាំ ផងដែរ។

ករណីនេះសមត្ថកិច្ច បានបំភ្លឺរបស់សាក្សីនៅជិតកន្លែងកេីតហេតុ ដោយបញ្ជាក់ថា ជនរងគ្រោះត្រូវបានក្រុមជនសង្ស័យជិះមូតូ២គ្រឿង បានស្ទាក់វាយជនរងគ្រោះ កំពុងជិះកង់ម្នាក់ឯងនៅមុខផ្ទះរបស់ខ្លួន។

ពាក់ព័ន្ធករណីនេះ នៅវេលាម៉ោង១៤និង២០ នាទី ថ្ងៃទី០៧ ខែឧសភា ឆ្នាំ២០២២ កម្លាំងមន្ទីរស្រាវជ្រាវ និងបង្ក្រាបបទល្មើស និងកម្លាំងកងរាជអាវុធហត្ថ ក្រុងសៀមរាប ដឹកនាំដោយលោកគិម អាង ប្រធានមន្ទីរស្រាវជ្រាវ និងបង្ក្រាបបទល្មើស បានចាប់ខ្លួនជនសង្ស័យម្នាក់ពាក់ព័ន្ធនឹងករណី ឃាតកម្មខាងលើ។

ជនសង្ស័យ ឈ្មោះ សឿន ជីវ័ន ភេទប្រុស អាយុ ១៦ឆ្នាំ មុខរបរ កម្មករសំណង់ រស់នៅភូមិភ្នំក្រោម សង្កាត់សៀមរាប ក្រុងសៀមរាប បានឆ្លើយសារភាពថា រូបខ្លួនមានបក្ខពួក ០៥នាក់ទៀត ភេទប្រុស ពិតជាបាននាំគ្នាកាក់ជនរងគ្រោះ ដែលកំពុងជិះកង់ ដោយបាននាំគ្នាយកដំបងឈើជ្រុងវ៉ៃទៅលើជនរងគ្រោះ ហើយបានដឹកយកទៅទម្លាក់ទុកចោល នៅក្រោមបង្គោលភ្លើង ខាងជើងកន្លែងកើតហេតុមានចំងាយប្រហែល ៥០០ម៉ែត្រ ដោយពុំមានគំនុំអ្វីទេ ដោយមានគោលបំណងចង់យកសម្ភារពីជនរងគ្រោះ។

បច្ចុប្បន្នកម្លាំងជំនាញកសាងសំណុំរឿងបញ្ជូនទៅសាលាដំបូងតាមនីតិវិធី។ ចំណែកបក្សពួក នៅសល់ សមត្ថកិច្ចនិងតាមចាប់ខ្លួនយកមកផ្ដន្ទាទោសតាមផ្លូវច្បាប់។ ករណីនេះក្រោយពីបានឃាត់ខ្លួន ដកហូតវត្ថុតាង៖ ម៉ូតូដែលជនសង្ស័យជិះធ្វើសកម្មភាព២គ្រឿង ទី១. ម៉ាក EXCITER GP ១គ្រឿង។ ទី២. ម៉ាក HONDA DREAM ពណ៌ខ្មៅ ១គ្រឿង៕SRP

ខេត្តសៀមរាប៖សម្តេច ទៀ បាញ់ បានថ្លែងប្រាប់ក្រុមការងារ ឲ្យបន្តចុះតាមខ្នងផ្ទះប្រជាពលរដ្ឋ ដើម្បីឈ្វេងយល់ ពីជីវភាពរស់នៅ និង ពីសុខទុក្ខរបស់ប្រជាជន សំដៅដាក់ចេញគោលការណ៍ វិធានការដោះស្រាយ បានជាក់ស្តែង និង សមស្របជូនបងប្អូន។

សម្តេចទៀ បាញ់ បានលើកឡើងថា៖ ដើម្បីរក្សាឲ្យបាននូវប្រៀបឈ្នះ គឺក្រុមការងារទាំងអស់ ត្រូវបន្តនិងខិតខំចិញ្ចឹមចលនានយោបាយនៅមូលដ្ឋាន តាមរយៈការកសាងសមិទ្ធផលនានា និង ចូលរួមដោះស្រាយបញ្ហាប្រឈមតាមសំណើ និង សំណូមពរនានារបស់ប្រជាពលរដ្ឋ។

សម្តេច ទៀ បាញ់ ក៏បានស្នើដល់ក្រុមការងារគណបក្សប្រជាជនកម្ពុជាខេត្តសៀមរាបទាំងអស់ ត្រូវខិតខំបំផុសចលនាពង្រឹងសមាជិកបក្ស និង អ្នកគាំទ្រគណបក្ស ព្រមទាំងរៀបចំពិធីបញ្ចូលសមាជិកថ្មី ដែលបានកសាងរួចឲ្យបានសកម្មផុលផុសនៅគ្រប់មូលដ្ឋាន និង ត្រួតពិនិត្យ ពង្រឹងការគ្រប់គ្រង សមាជិកបក្សចាស់ ពង្រីកសមាជិកថ្មី ក្នុងមូលដ្ឋានខ្លួន ឲ្យបានច្បាស់លាស់ និង ត្រូវធ្វើការជួបជុំជាមួយសមាជិកបក្ស អ្នកគាំទ្រគណបក្សជាទ្រង់ទ្រាយតូចៗ តាមមូលដ្ឋានរបស់ខ្លួន ដើម្បីផ្សព្វផ្សាយអំពីស្នាដៃសមិទ្ធផល របស់គណបក្ស និង រាជរដ្ឋាភិបាល សំដៅលើកកម្ពស់ជំនឿ របស់សមាជិកបក្ស និង អ្នកគាំទ្រគណបក្សប្រជាជនកម្ពុជា។

សម្តេចបានគូសបញ្ជាក់ថា៖ ការបោះឆ្នោតជ្រើសរើស សមាជិកក្រុមប្រឹក្សាឃុំ-សង្កាត់អាណត្តិទី៥ នឹង ប្រព្រឹត្តទៅនៅថ្ងៃទី០៥ ខែមិថុនា ឆ្នាំ២០២២នេះ។ សម្តេចថា៖ ដើម្បីទទួលបានជ័យជម្នះ ជូនគណបក្សប្រជាជនកម្ពុជា នោះ ក្រុមការងារទាំងអស់ វាមិនមែនជាកិច្ចការដោយឡែករបស់បេក្ខជននោះទេ តែជាការងារដែលត្រូវមានកិច្ចសហការដឹកនាំ ពីក្រុមការងារគណបក្សគ្រប់ជាន់ថ្នាក់ ដើម្បីឲ្យការងារចលនា គណបក្សប្រជាជន នៅតាមមូលដ្ឋានប្រកបដោយប្រសិទ្ធភាព ដោយត្រូវខិតខំអនុវត្តន៍គ្រប់ការងារ ដែលត្រូវធ្វើបន្តតាមការណែនាំ របស់គណៈអចិន្ត្រៃយ៍ នៃគណៈកម្មាធិការកណ្តាល និងផែនការរបស់គណៈកម្មាធិការគណបក្សខេត្ត ក្រុង ស្រុក បានដាក់ចេញផងដែរ។

សម្តេច ក៏បានលើកនូវតួអង្គសំខាន់ចំនួន៤ ដែលនាំឲ្យឈ្នះលើការបោះឆ្នោត ជ្រើសរើសក្រុមប្រឹក្សាឃុំ សង្កាត់ពេលខាងមុខគឺ តួអង្គទី១ / បេក្ខជនឈរឈ្មោះក្រុមប្រឹក្សាឃុំ សង្កាត់ , តួអង្គទី២ /ប្រធានភូមិ អនុប្រធានភូមិ សមាជិកភូមិ , តួអង្គទី៣/នាយ នាយរងប៉ុស្តិ៍ និងមន្ត្រីប៉ុស្តិ៍ និង តួអង្គទី៤/ក្រុមការងារចុះជួយភូមិ ឃុំ សង្កាត់។ សម្តេចបានផ្តាំផ្ញើឲ្យ បេក្ខភាព ទាំងអស់ខិតខំបន្តយកចិត្តទុកដាក់ ផ្ដល់សេវារដ្ឋបាលសាធារណៈ ជូនបងប្អូនប្រជាពលរដ្ឋ ប្រកបដោយប្រសិទ្ធភាព គុណភាព ក្នុងការធ្វើការឲ្យបានល្អ ក្នុងការបម្រើប្រជាពលរដ្ឋឲ្យបានល្អ មានតម្លាភាព ទទួលខុសត្រូវខ្ពស់ និងយុត្តិធម៌ ដោយមិនមានការរើសអើង មិនប្រកាន់និន្នាការនយោបាយនោះឡើយ។

សម្តេចពិជ័យសេនា ទៀ បាញ់ ឧបនាយករដ្ឋមន្ត្រី និង ជាអនុប្រធានគណបក្សប្រជាជនកម្ពុជា និង ជាប្រធានក្រុមការងារថ្នាក់កណ្តាល ចុះជួយខេត្តសៀមរាប មានប្រសាសន៍បញ្ជាក់យ៉ាងដូច្នេះ ក្នុងឱកាសសំណេះសំណាលជាមួយបេក្ខភាពឈរ ឈ្មោះបោះឆ្នោតក្រុមប្រឹក្សាឃុំ-សង្កាត់ នៅថ្ងៃសៅរិ៍ម្សិលមិញ នៅសាលសន្និសិទ្ធ សណ្ឋាគារសុខាសៀមរាប៕SRP