ខេត្តសៀមរាប៖បុរសម្នាក់បានសម្រេចចិត្តចងកសម្លាប់ខ្លួនបង្កឱ្យមានការភ្ញាក់ផ្អើល។
ហេតុការណ៍បានកើតឡើងនៅវេលាម៉ោង១៣និង ៣០នាទីថ្ងៃទី២៤ ខែឧសភាឆ្នាំ២០២២ ស្ថិតនៅក្នុងភូមិតាវៀន សង្កាត់សាលាកំរើក ក្រុងសៀមរាបខេត្តសៀមរាប។
សមត្ថកិច្ចបានឲ្យដឹងថាជនរងគ្រោះមានឈ្មោះឈា វណ្ណឌី ភេទ ប្រុសអាយុ៣៦ឆ្នាំ។ ករណីនេះមូលហេតុ មានវិបត្តិផ្លូវចិត្ត៕SRP
ខេត្តសៀមរាប៖ដីកប់សពគ្រីស្ទាន ត្រូវបានបុគ្គលមួយក្រុម ឃុបឃិតគ្នាយកដីលក់ ហើយលួចគាស់ផ្នូរសពដោយគ្មានការឯកភាព ពីក្រុមគ្រួសារសពមួយចំនួន។
ករណីបែបនេះ រហូតដល់មានរឿងចម្រូងចម្រាស ប្ដឹងផ្ដល់គ្នាដល់សាលាក្រុងសៀមរាប និងមន្ទីរធម្មការនិងសាសនា តែជាលទ្ធផល មិនមានដំណោះស្រាយណាមួយដែលសមស្រប អាចឲ្យម្ចាស់ផ្នូរសពទទួលយកបានឡើយ។
ដីលប់សពនេះ ស្ថិតក្នុងភូមិបុស្សក្រឡាញ់ សង្កាត់ជ្រាវ ក្រុងសៀមរាប។
ប្រភពបានឲ្យដឹងថា ផ្នូរសពគ្រីស្ទានមួយចុងក្រោយ ដែលសាច់ញាតិក្រុមគ្រួសារសព មិនព្រមគាស់ចេញពីដីកប់សព និងមិនព្រមទទួលយកប្រាក់សូកប៉ាន់ ពីក្រុមអ្នកលក់ដីកប់សព ឥឡូវត្រូវបានគេលួចគាស់ផ្នូរសព រួចយកធាតុបោះចោលទៅក្នុងព្រៃ។
យោងតាមមាត្រា-២៦១ នៃក្រមព្រហ្មទណ្ឌនៃព្រះរាជាណាចក្រកម្ពុជាបានចែងថា អំពើប៉ះពាល់ដល់បូរណភាពនៃសាកសព ត្រូវផ្ដន្ទាទោសដាក់ពន្ធនាគារពី ១(មួយ) ខែ ទៅ ១(មួយ) ឆ្នាំ និងពិន័យជាប្រាក់ពី ១០០,០០០ (មួយសែន)រៀល ទៅ ២,០០០,០០០ (ពីរលាន)រៀល។
ទន្ទឹមនឹងនេះមាត្រា-២៦២ នៃក្រមព្រហ្មទណ្ឌនៃព្រះរាជាណាចក្រកម្ពុជាបានកំណត់ថា អំពើប្រមាថតាមមធ្យោបាយណាមួយក៏ដោយ ទៅលើផ្នូរ ទីបញ្ចុះសព កោដ្ឋ ឬទៅលើសំណង់ដែលកសាងឡើង សម្រាប់រំលឹកវិញ្ញាណក្ខន្ធនៃអ្នកទទួលមរណភាព ត្រូវផ្ដន្ទាទោសដាក់ពន្ធនាគារពី ១ (មួយ) ខែ ទៅ ១ (មួយ) ឆ្នាំ និងពិន័យជាប្រាក់ពី ១០០,០០០ (មួយសែន) រៀល ទៅ ២,០០០,០០០ (ពីរលាន) រៀល ផងដែរ។
ករណីនេះ ម្ចាស់ផ្នូរសពគ្រីស្ទានដង្ហើយសុំអាជ្ញាធរគ្រប់ជាន់ថ្នាក់ សមត្ថកិច្ចពាក់ព័ន្ធ ជាពិសេសតុលាការខេត្តសៀមរាប មេត្តាស៊ើបអង្កេតករណីនេះផង ដើម្បីផ្តល់យត្តិធម៌ដល់គ្រួសារសពផង៕SRP
ខេត្តសៀមរាប៖អាជ្ញាធរជាតិអប្សរា រួមសហការជាមួយសារព័ត៌មានអេឡិចត្រូនិក ថ្មីៗនៅថ្ងៃចន្ទនេះ បានធ្វើពិធីបើកសម្ពោធសៀវភៅ ដែលមានចំណងជើងថា(អ្នកថែអង្គរ)ចំនួន៥០០០ក្បាល ដែលទើបតែបោះពុម្ពរួចរាល់ នៅមុខប្រាសាទអង្គរវត្ត។
សហស្ថាបនិកសារព័ត៌មានអេឡិចត្រូនិកថ្មីៗ លោក គី សុខលីម បានថ្លែងនៅក្នុងពិធីបើកសម្ពោធសៀវភៅអ្នកថែអង្គរនោះថាបន្ទាប់ពីរូបលោកបានជួបសន្ទនាជាច្រើនលើក ជាមួយលោកឡុង កុសល អគ្គនាយករងនៃអាជ្ញាធរជាតិអប្សរា ភាគីទាំងពីរក៏បានផុសចេញនូវគំនិតរួមគ្នាសរសេរជាសៀវភៅនេះឡើង ក្នុងបំណងដើម្បីលើកទឹកចិត្ត និងដឹងគុណដល់អ្នកថែអង្គរទាំងឡាយព្រមទាំងដឹងគុណដល់ដូនតាខ្មែរ ដែលជាអ្នកបានកសាងប្រាសាទជាច្រើនផងដែរ។
លោក គី សុខលីម មានប្រសាសន៍ទៀតថានៅក្នុងសៀវភៅអ្នកថែអង្គរ ដែលបានបោះពុម្ពផ្សាយរួចហើយនេះ អ្នកនិពន្ធចង់បង្ហាញអំពីជីវប្រវត្តិនិងជំនាញរបស់មនុស្សជាច្រើនរូប ដែលបានធ្វើការងារថែរក្សាអង្គរ ខ្លះបានធ្វើការរយៈពេលជាង២០ឆ្នាំនិងខ្លះទៀតបានធ្វើការងារពាក់ព័ន្ធនិងការថែរក្សាអង្គររយៈពេល៣០ឆ្នាំមកហើយ។
សៀវភៅអ្នកថែអង្គរ ដែលមានកម្រាស់ជាង២០០ទំព័រនោះ បានបង្ហាញតួអង្គ អ្នកថែអង្គរមកពីមជ្ឈដ្ឋានផ្សេងៗគ្នាចំនួន១៥រូប ដោយអ្នកថែអង្គរទាំងនោះ មានប្រវត្តិនិងជំនាញផ្សេងៗពីគ្នា ដូចជាអ្នកនរវិទូ អ្នកបុរាណវិទ្យា ស្ថាបត្យករ អ្នកជំនាញខាងរៀបថ្មអង្គរ អ្នកជំនាញផលិតដាវបុរាណ អ្នកជំនាញខាងព្យាបាលថ្មប្រាសាទ អ្នកជំនាញខាងជួសជុលឥដ្ឋ របស់ប្រាសាទ អ្នកជំនាញខាងធ្វើឧបករណ៍ភ្លេងខ្មែរ អ្នកកសិកម្មនៅក្នុងតំបន់អង្គរនិងអ្នកសិល្បៈចម្លាក់ស្បែកបន្តពីវប្បធម៌អង្គរជាដើម។
ប្រធានក្រុមដឹកនាំការស្រាវជ្រាវនិងប្រមូលឯកសារ ដើម្បីយកមកសរសេរសៀវភៅ លោក សៅ ផលនិស្ស័យឱ្យដឹងថា ទម្រាំតែផលិតបានសៀវភៅអ្នកថែរក្សាអង្គរនេះឡើង ក្រុមការងាររបស់លោកបានចាប់ផ្ដើមធ្វើការងារតាំងពីអំឡុងចុងឆ្នាំ២០២០មក ដោយត្រូវធ្វើដំណើរពីទីក្រុងភ្នំពេញ មកកាន់ខេត្តសៀមរាបជាច្រើនលើកច្រើនសារ ដើម្បីប្រមូលយកឯកសារពាក់ព័ន្ធនានា។ ការខិតខំក្នុងការបង្កើតឱ្យចេញជាសៀវភៅនេះឡើង គ្មានបំណងអ្វីក្រៅពីការចង់បង្ហាញឱ្យសាធារណជន បានដឹងអំពីការងារថែរក្សាអង្គរដ៏ច្រើន ហើយក៏ចង់បង្ហាញកេរ្តិ៍ឈ្មោះនិងកិត្តិយសរបស់អ្នកធ្វើការងារថែរក្សាអង្គរទាំងឡាយ ដើម្បីឱ្យសក្តិសមនិងកិច្ចខិតខំប្រឹងប្រែងរបស់ពួកគាត់ផងដែរ។
អគ្គនាយករងនៃអាជ្ញាធរជាតិអប្សរា លោក ឡុង កុសល បានកោតសរសើរចំពោះស្នាដៃនិពន្ធសៀវភៅអ្នកថែអង្គរនេះ ដោយលោកមានប្រសាសន៍ថា ការចងក្រងជាសៀវភៅនេះឡើង គឺជាបេសសកកម្ម មានគោលដៅច្បាស់លាស់ហើយក៏ជាវិថីដែលផ្សាភ្ជាប់ ការយល់ដឹង ការអបរំ លើទស្សនវិស័យរួមគ្នារវាងអាជ្ញាធរជាតិអប្សរានិងសារព័ត៌មានអេឡិចត្រូនិកថ្មីៗដែរ។
លោកឡុង កុសល មានប្រសាសន៍ទៀតថា វត្តមានរបស់អ្នកថែអង្គរ គឺមានសារៈសំខាន់បំផុត ប្រសិនបើមិនមានពួកគាត់ទេ គឺការងារជាច្រើន ដូចជាការជួសជុលការជួយសង្គ្រោះប្រាសាទបុរាណនិងការអភិរក្សរមណីយដ្ឋាននានាប្រាកដជាមិនមានលទ្ធផលល្អ រហូតមកដល់ពេលនេះឡើយ។ «យើងមានតួអង្គអ្នកថែអង្គរជាច្រើន មិនមែនមានតែត្រឹមបង្ហាញនៅក្នុងសៀវភៅនេះទេ ក៏ប៉ុន្តែយើងត្រូវការពេលវេលាថែមទៀត ក្នុងការបង្ហាញតួអង្គអ្នកថែអង្គរឱ្យបានច្រើននាក់នោះ។
សៀវភៅអ្នកថែអង្គរបានបោះពុម្ពផ្សាយជាលើកដំបូង ចំនួន៥០០០ក្បាល ជាភាសាខ្មែរ ហើយនៅពេលអនាគត ក្រុមអ្នកនិពន្ធគ្រោងនឹងបកប្រែសៀវភៅនេះ ទៅជាច្រើនភាសាដូចជាភាសាអង់គ្លេស ភាសាចិននិងភាសានៅក្នុងតំបន់ប្រជាជាតិអាស៊ីអគ្នេយ៍ (ASEAN)ជាដើម។
លោក គី សុខលីម សហស្ថាបនិកសារព័ត៌មានអេឡិចត្រូនិកថ្មីៗ ឱ្យដឹងទៀតថាស្នាដៃនិពន្ធ ដែលសហការជាមួយនិងអាជ្ញាធរជាតិអប្សរា មិនមែនមានតែសៀវភៅអ្នកថែអង្គរតែមួយនេះទេ គឺនៅពេលខាងមុខដ៏ខ្លី ក្រុមរបស់លោកគ្រោងនឹងបោះពុម្ពផ្សាយសៀវភៅថ្មីមួយទៀត ដែលមានចំណងជើងថា(លើសពីអង្គរ)៕SRP
ខេត្តសៀមរាប៖ឪពុកបង្កើតបានយកកាំបិតអារកកូនបង្កើតបណ្ដាលឲ្យរងរបួសធ្ងន់ធ្ងរ។
ហេតុការណ៍បានកើតឡើងវេលាម៉ោង ០៩និង៣០នាទី ថ្ងៃទី ២៣ ខែឧសភា ឆ្នាំ២០២២ នេះស្ថិតនៅភូមិជីក្រែង ឃុំជីក្រែង ស្រុកជីក្រែង។
សមត្ថកិច្ចខេត្តសៀមរាបបានឲ្យដឹងថា ករណី ប៉ុនប៉ងមនុស្សឃាត នេះ ដែលបង្កដោយ
ជនសង្ស័យ ឈ្មោះ សួង ណាក់ ភេទ ប្រុស អាយុ៣៦ឆ្នាំ ជាឪពុកបានយកកាំបិត (កូនកាំបិទចិត្តបន្លែ) អារកកូនប្រុសរបស់ខ្លួនបណ្តាលអោយរបួសធ្ងន់ ត្រងបំពង់ក ត្រូវបានដឹកយកមកព្យាបាលនៅមន្ទីពេទ្យបង្អែកខេត្តសៀមរាប។
ជនរងគ្រោះមាន ឈ្មោះ នី បូរ៉ា ភេទប្រុសអាយុ០៩ឆ្នាំ រស់នៅជាមួយគ្នា។ មូលហេតុ ដោយជនសង្ស័យជាឪពុកជាមនុស្សមានជម្ងឺសសៃប្រាសាទ។
ទោះជាយ៉ាងណា ជនបង្កត្រូវបានប្រជាពលពលរដ្ឋ ឃាត់ខ្លួនប្រគល់អោយនគរបាលដើម្បីអនុវត្តតាមផ្លូវច្បាប់៕SRP
ខេត្តសៀមរាប៖បុរសម្នាក់មុខសញ្ញាឆក់ទូរស័ព្ទ នៅក្រុងសៀមរាប ដ៏សកម្មត្រូវបានឃាត់ខ្លួន។
ការឃាត់ខ្លួនធ្វើឡើង នៅថ្ងៃទី២០ ខែឧសភា ឆ្នាំ២០២២ ស្ថិតនៅ ភូមិទក្សិណខាងត្បូង សង្កាត់គោកចក ក្រុងសៀមរាប ដោយ
នគរបាលសៀមរាប សហការជាមួយប៉ុស្តិ៍គោកចកប្រជាការពារ។
អធិការនគរបាលក្រុងសៀមរាប លោកដា ចំរើន បានឲ្យដឹងថាជនសង្ស័យ ឈ្មោះសូរ សៃ ភេទប្រុស អាយុ២៦ឆ្នាំមុខរបរមិនពីតប្រាកដ មានស្រុកកំណើតនៅភូមិសួង ឃុំត្រពាំងធំ ស្រុកប្រាសាទបាគង។ បច្ចុប្បន្ននៅភូមិវាល សង្កាត់គោកចក ក្រុងសៀមរាប ជាមុខសញ្ញាសកម្មពាក់ព័ន្ធឆក់ទូរស័ព្ទ។
លោកដា ចំរើន បានបន្តថា ជនសង្ស័យ បានធ្វើសកម្មភាពឆក់ទូរស័ព្ទ របស់ជនរងគ្រោះចែម សំនឿន ភេទស្រី អាយុ៣៧ឆ្នាំ ខណៈពេលដែរជនរងគ្រោះ បានឲ្យទូរស័ព្ទ ទៅកូនឈ្មោះហ៊ន់ តេកហុង ភេទប្រុស អាយុ១២ឆ្នាំដើម្បីសិក្សាតាមអនឡាញ។
លោក ដា ចំរើន បានបញ្ជាក់ថា ជនសង្ស័យ បានឆ្លើយសារភាពថារូបគេ ពិតជាបានជិះម៉ូតូមកឆក់ទូរស័ព្ទ ជនរងគ្រោះពិតប្រាកដមែន ហើយធ្លាប់បានធ្វើសកម្មភាពឆក់ នៅក្នុងក្រុងសៀមរាប បានចំនួន៥លើក ផងដែរ។
ក្រោយបានសាកសួរ សមត្ថកិច្ច បានបញ្ជូនសំណុំរឿងទៅតុលាការដើម្បីអនុវត្តតាមផ្លូវច្បាប់៕SRP
ខេត្តសៀមរាប៖នារីដ៏ស្រស់ស្អាតវ័យក្មេងម្នាក់ត្រូវបានការិយាល័យព្រហ្មទណ្ឌ កងរាជអាវុធហត្ថ ខេត្តសៀមរាប សហការជាមួយកងរាជអាវុធហត្ថក្រុងសៀមរាប ធ្វើការឃាត់ខ្លួន ពាក់ព័ន្ធករណីលួចលុយរបស់អាជីវករម្នាក់ជាង ៤ពាន់ដុល្លារ។
របាយការណ៍របស់លោក សៀក សោភា នាយការិយាល័យ ព្រហ្មទណ្ឌ កងរាជអាវុធហត្ថ ខេត្តសៀមរាប បានឲ្យដឹងថានៅវេលាម៉ោង៨:៣០នាទី ថ្ងៃទី២០ ខែឧសភា ឆ្នាំ២០២២មានករណី រំលោភលើទំនុកចិត្ត កើតមាននៅចំណុចតូបលក់ចាបហួយ មួយកន្លែង ស្ថិតនៅភូមិធ្លកអណ្តូង សង្កាត់ស្លក្រាម ក្រុងសៀមរាប ខេត្តសៀមរាប។
របាយការណ៍បន្តថា ជនរងគ្រោះឈ្មោះ តាន់ សុផល ភេទប្រុស អាយុ៣៦ឆ្នាំ មុខរបរអាជីវករ រស់នៅភូមិធ្លកអណ្តូង សង្កាត់ស្លក្រាម ក្រុងសៀមរាប ខេត្តសៀមរាប បានដឹកជនសង្ស័យ ម្នាក់ ឈ្មោះ វេត ចរិយ៉ា ភេទស្រី អាយុ១៨ឆ្នាំ មុខរបរបុគ្គលិកលក់ដូរ (លក់ចាបហួយ អោយខ្លួនគេ បានមកដាក់ពាក្យបណ្ដឹង ទៅលើជនសង្ស័យថា បានលួចប្រាក់របល់ខ្លួន ចំនួន៥៥០០ដុល្លារអាមេរិក។
របាយការណ៍បានបញ្ជាក់ថាកម្លាំងជំនាញបានធ្វើការស្ដាប់ចម្លេីយ ទៅលើ ឈ្មោះ វេត ចរិយ៉ា ភេទស្រី អាយុ១៨ឆ្នាំ ហើយជនសង្ស័យ បានឆ្លើយសារភាពថា ខ្លួនគេពិតជាបានយកប្រាក់របស់ឈ្មោះ តាន់ សុផល ជាមួយមិត្តភក្តិរបស់គេឈ្មោះ ម៉ុន ចាន់ធឿន ភេទស្រី ពិតប្រាកដមែន។ ដោយប្រាក់ដែលខ្លួនយកគឺជាប្រាក់លក់គ្រឿង ចាបហួយ បាន ជារៀងរាល់ថ្ងៃ ក្នុងរយៈពេល១ខែកន្លងមក សរុបទឹកប្រាក់ចំនួន៥៥០០ដុល្លារអាមេរិក ពិតប្រាកដមែន។
បើយោងតាមរបាយការណ៍បានបង្ហាញថា ករណីខាងលើត្រូវបានលោក ស្រី វ៉ា សក្កា ព្រះរាជអាជ្ញាស្តីទី បញ្ជាអោយការិយាល័យព្រហ្មទណ្ឌកសាងសំណុំរឿងបញ្ជូនទៅអយ្យការអមសាលាដំបូងខេត្ត៕SRP
ខេត្តសៀមរាប៖ជនបរទេសម្នាក់ត្រូវបានកម្លាំងនគរបាលខេត្តសៀមរាប ធ្វើការឃាត់ខ្លួនភ្លាមៗ បញ្ជូនយកទៅសាកសួរនៅស្នងការដ្ឋាននគរបាលខេត្តសៀមរាប ពីបទហិង្សាដោយចេតនាមានស្ថានទម្ងន់ទោស (យកញញួរវាយជនរងគ្រោះ)។
ហេតុការណ៍អំពើហិង្សា បានកើតឡើង នៅវេលាម៉ោង១៧និង ២០នាទី ថ្ងៃទី១៨ ខែឧសភា ឆ្នាំ២០២២ នៅចំណុចមុខបន្ទប់ជួល ស្ថិតនៅភូមិបឹងដូនប៉ា សង្កាត់ស្លក្រាម ក្រុង/ខេត្តសៀមរាប។
ស្នងការរងទទួលផែនការងារអន្តោប្រវេសន៍ លោក តូច សុគន្ធ បានថ្លែងប្រាប់សារព័ត៌មានសៀមរាប ប៉ុស្ដិ៍ ថា៖ ជនសង្ស័យឈ្មោះ JON LEON LOV ភេទប្រុស កើតថ្ងៃទី០៦-១០-១៩៦៥ ជនជាតិអង់គ្លេស គ្មានលិខិតឆ្លងដែនជាប់ខ្លួន គ្មានមុខរបរ ស្នាក់នៅទីតាំងកើតហេតុខាងលើ។
លោក តូច សុគន្ធ បានបន្តថា ករណីនេះជនសង្ស័យ បានធ្វើសកម្មភាព យកញញួរក្បាលដែកដងជ័រ វាយទៅលើជនរងគ្រោះ ឈ្មោះ អ៊ុយ សូរិយា ភេទស្រី អាយុ៣៨ឆ្នាំ ជនជាតិខ្មែរ ស្នាក់នៅបន្ទប់ជួលទីតាំងកើតហេតុខាងលើចំនួន០៣ញញួរ (១ញញួរ ត្រូវចំបបូរមាត់លើខាងស្តាំ បណ្តាលឲ្យបែកបបូរមាត់ហូរឈាម និងបាក់ឆ្អឹងថ្គាមខាងស្តាំ ២ញញួរទៀត ត្រូវចំក្បាលផ្នែកខាងក្រោយ បណ្តាលអោយហើមប៉ោង ត្រូវបានក្រុមគ្រួសារនិងសមត្ថកិច្ចបញ្ជូនទៅសម្រាកព្យាបាលនៅគ្លីនិកតាព្រហ្ម(ម្តុំផ្សារលើ)។
ទោះជាយ៉ាងណាពាក់ព័ន្ធនឹងករណីហិង្សាទៅលើស្ត្រីខ្មែរ បណ្ដាលឲ្យរងរបួសធ្ងន់ធ្ងរ
យ៉ាងដូច្នេះ មិនទាន់ដឹងមូលហេតុ
ចំពោះហេតុការណ៍ នេះនៅឡើយទេ ដោយជនសង្ស័យ មិនត្រូវបានសារភាព នៅពេលសមត្ថកិច្ចសាកសួរនៅស្នងការខេត្តសៀមរាប។
បើតាម លោក តូច សុគន្ធ រហូតដល់ល្ងាចថ្ងៃទី២០ ខែឧសភា ឆ្នាំ២០២២ ជនសង្ស័យ ត្រូវបានលោក ស៊ាង ណារ៉ា ចៅក្រមស៊ើបសួរនៃសាលាដំបូងខេត្តសៀមរាប សម្រេចចេញដីកាបង្គាប់អោយឃុំខ្លួនបណ្តោះអាសន្ន នៅពន្ធនាគារខេត្តសៀមរាប ដោយចោទប្រកាន់ពីបទហិង្សាដោយចេតនាមានស្ថានទម្ងន់ទោស៕SRP
ខេត្តសៀមរាប៖សួនរុក្ខជាតិអង្គរដែលជាប្រភេទរមណីយដ្ឋានកែច្នៃ ទំហំជាង១៥ ហិកតារ ក្នុងក្រុងសៀមរាប ដោយអាចចាត់ទុកថាជាសួនមានលក្ខណៈពិសេស លើសសួនកំសាន្តដទៃទៀត នៅក្នុងប្រទេសកម្ពុជា បានបើកសម្ពោធជាផ្លូវការហើយ នៅថ្ងៃព្រហស្បតិ៍ ទី១៩ ខែឧសភា ឆ្នាំ២០២២នេះ។
ពិធីបើកសម្ពោធដាក់ឱ្យប្រើប្រាស់ជាផ្លូវការនេះ ធ្វើឡើងក្រោមអធិបតីភាព ឧបនាយករដ្ឋមន្ត្រីនិងជារដ្ឋមន្ត្រីក្រសួងរៀបចំដែនដីនគរូបនីយកម្មនិងសំណង់ លោកជា សុផារ៉ា ដោយមានការអញ្ជើញចូលរួមពីលោកជំទាវបណ្ឌិតសភាចារ្យ ភឿងសកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងអគ្គនាយកនៃអាជ្ញាធរជាតិអប្សរាព្រមទាំងអភិបាលខេត្តសៀមរាប ផងដែរ។
លោកជំទាវ បណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈនិងជាប្រធានក្រុមប្រឹក្សាភិបាលនៃអាជ្ញាធរជាតិអប្សរា បានថ្លែងដោយមោទនភាព នៅក្នុងឱកាសបើកសម្ពោធជាផ្លូវការសួនរុក្ខជាតិអង្គរនោះថាក្នុងរយៈពេល ១ខែ ឬ១ខែកន្លះ បន្ទាប់ពីបើកសម្ពោធជាផ្លូវការនេះ គឺអាជ្ញាធរអប្សរានឹងបើកឱ្យ សាធារណជនបានចូលទៅទស្សនាដោយឥតគិតថ្លៃ ។បន្ទាប់ពីនោះ គឺមានការលក់សំបុត្រ ឱ្យភ្ញៀវចូលទស្សនាសួនរុក្ខជាតិអង្គរក្នុងតម្លៃមួយដ៏សមរម្យដើម្បីបានថវិកា យកទៅថែរក្សានិងអភិវឌ្ឍន៍សួននេះ ឱ្យកាន់តែប្រសើរ។
សួនរុក្ខជាតិអង្គរជារមណីយដ្ឋានកៃច្នៃនៅក្នុងក្រុងសៀមរាប មានដាំរុក្ខជាតិចម្រុះរាប់ម៉ឺនដើម នៃពូជជាង៥០០ប្រភេទ ដូចជាដើមផ្កា ស្មៅ ឈើហូបផ្លែ ដោយអាចចាត់ទុកថាជាសួនមានលក្ខណៈពិសេសលើសសួនកំសាន្តដទៃទៀត នៅក្នុងប្រទេសកម្ពុជា ដោយសារតែសួននេះ ស្ថិតក្នុងរចនាបទបែបខ្មែរ មានដាំបន្លែចម្រុះជាច្រើនមុខ មានសួនរុក្ខជាតិធ្វើឱសថ សួនគ្រឿងទេស សួនអំបូរត្នោត សួនលំនៅដ្ឋានខ្មែរ សួនព្រៃឈើ និងបន្ថែមលើនេះ ក៏មានសួនសត្វជាច្រើនប្រភេទដូចជាអណ្តើក ក្ងោក ព្រាប ទន្សាយនិងសត្វស្លាបប្រវាំងជាដើមនៅក្នុងនោះដែរ។
កាលពីឆ្នាំ២០០៥ សួនរុក្ខជាតិអង្គរនេះ គឺជាសួនគ្រឿងទេស ដែលមានទំហំដីត្រឹមជាង២ហិកតាប៉ុណ្ណោះ។ នៅឆ្នាំ២០១០ អាជ្ញាធរជាតិអប្សរា បានរៀបចំពង្រីកសួននេះ ឱ្យកាន់តែធំដោយរៀបចំប្រព័ន្ធទឹក ដែលមានប្រភពពីស្ទឹងសៀមរាប ដើម្បីស្រោចស្រព រុក្ខជាតិទាំងនេះ ហើយនៅឆ្នាំ២០១៨ អាជ្ញាធរ ក៏បានដាក់បន្ថែមសត្វជាច្រើនប្រភេទ ដូចជាអណ្តើក ក្ងោក ព្រាប ទន្សាយជាដើម នៅក្នុងសួននេះថែមទៀត។
ក្រុមអ្នកជំនាញនៃអាជ្ញាធរជាតិអប្សរាឱ្យដឹងថា សួនរុក្ខជាតិអង្គរនេះ ត្រូវបានបំផុសគំនិតរៀបចំឡើងឱ្យមានភាពទាក់ទាញខុសប្លែកពីសួនដទៃទៀត ជាច្រើន ជាពិសេសគឺមានដាំដើមឈើនិងរុក្ខជាតិកម្រៗជាច្រើនប្រភេទ ដោយពូជឈើខ្លះ នាំមកពីក្រៅប្រទេ ប្រយោជន៍សម្រាប់ឱ្យកូនខ្មែរនិងអ្នកទេសចរណ៍ជំនាន់ក្រោយៗ បានស្គាល់ និងអាចមកសិក្សាស្រាវជ្រាវបាន។
សួនរុក្ខជាតិអង្គរនេះ បានបែងចែកទៅជា៥ផ្នែក គឺផ្នែកទី១ជាសួនគ្រឿងទេសនិងសួនរុក្ខជាតិឱសថ ផ្នែកទី២គឺជាសួនផ្កាស្មៅនិងផ្កាចម្រុះ ផ្នែកទី៣ជាសួនអំបូរត្នោត ដែលដាំរុក្ខជាតិអំបូរត្នោតច្រើនប្រភេទ។ ចំណែកផ្នែកទី៤ជាសួនខ្មែរ ដែលប្រមូលផ្តុំដោយឈើហូបផ្លែច្រើនប្រភេទមានទាំងឈើហូបផ្លែក្នុងប្រទេសនិងឈើនាំចូលពីបរទេសផង។ ចំពោះផ្នែកទី៥វិញ គឺសួនព្រៃឈើនិងសត្វព្រៃអង្គរ ដែលសួននេះជាផ្នែកមួយនៃព្រៃឈើ ក្នុងតំបន់រមណីយដ្ឋានអង្គរ ប៉ុន្តែវាត្រូវបានកែច្នៃ ឱ្យមានផ្លូវដើរមានទឹកដើម្បីឱ្យកាន់តែមានសម្រស់និងភាពទាក់ទាញថែមទៀត។
ឧបនាយករដ្ឋមន្ត្រីនិងជារដ្ឋមន្ត្រីក្រសួងរៀបចំដែនដីនគរូបនីយកម្មនិងសំណង់ បានគាំទ្រចំពោះក្រសួងវប្បធម៌និងវចិត្រសិល្បៈ ជាមួយនិងអាជ្ញាធរអប្សរាដែលបានបង្កើតជាសួនរុក្ខជាតិអង្គរដ៏មានសារសំខាន់មួយនេះឡើង។
លោកជា សុផារ៉ា មានប្រសាសន៍ថា៖ សួនរុក្ខជាតិអង្គរនេះ មានលក្ខណៈពិសេសណាស់ក្នុងការអភិរក្សរុក្ខជាតិខ្មែរសំខាន់ៗ ជាពិសេស គឺរុក្ខជាតិដែលអាចយកមកផ្សំធ្វើជាឱសថព្យាបាលរោគផងនោះ។ «សួនរុក្ខជាតិអង្គរនេះក្រៅតែពីដាំរុក្ខជាតិអាចផ្សំជាឱសថ ដែលជាគំនិតដ៏សំខាន់នោះ វាក៏មានប្រយោជន៍សំខាន់មួយទៀតគឺជួយដល់វិស័យបរិស្ថាន នៃដំណើរការប្រែប្រួលអាកាសធាតុ ដោយបានផ្ដល់ជាម្លប់និងបញ្ចេញអុកហ្ស៊ីហ្សែន Oxygen សម្រាប់ប្រព័ន្ធដកដង្ហើមផងដែរ»។
លោកជា សុផារ៉ាមានប្រសាសន៍ទៀតថាការផ្ដួចផ្ដើមគំនិតបង្កើតសួនរុក្ខជាតិអង្គរ ដើម្បីជួយដល់ការប្រែប្រួលអាកាសធាតុនៅតំបន់អង្គរនេះ ចាត់ទុកថាជាការលើកស្ទួយដល់វិស័យបរិស្ថានផងនិងលើកស្ទួយដល់សុខភាពសាធារណនិងភ្ញៀវទេសចរណ៍ផង។
លោមជា សុផារ៉ាក៏បានសំណូមពរឱ្យ ក្រសួងវប្បធម៌និងវិចិត្រសិល្បៈ តាមរយៈ អាជ្ញាធរជាតិអប្សរា គួរធ្វើការកិច្ចសហការ ជាមួយក្រសួងកសិកម្ម រុក្ខាប្រមាញ់និងនេសាទ ដើម្បីស្នើសុំឱ្យក្រសួងកសិកម្ម ជួយផ្ដល់ពូជឈើនិងរុក្ខជាតិព្រមទាំងអ្នកបច្ចេកទេសផង ដើម្បីធ្វើការពង្រីកនិងអភិវឌ្ឍន៍សួនរុក្ខជាតិអង្គរនេះ ឱ្យកាន់តែមានទំហំធំព្រមទាំងសំបូរបែប ដោយរុក្ខជាតិបន្ថែមទៀត។
មន្ត្រីអាជ្ញាធរជាតិអប្សរារំពឹងថាសួនរុក្ខជាតិអង្គរនេះ អាចនឹងផ្ដល់ជាផលិតផលទេសចរណ៍ថ្មីថែមទៀតក្នុងការទាក់ទាញភ្ញៀវទេសចរណ៍ដែលមកដល់ទឹកដីខេត្តសៀមរាប ឱ្យចាប់អារម្មណ៍និងចូលមកកំសាន្ត ដើរលំហែរកាយ ក៏ដូចជាការដើរហាត់ប្រាណបន្ទាប់ពីគេបានទៅទស្សនាតំបន់រមណីយដ្ឋានអង្គររួចហើយនោះ។
អាជ្ញាធរជាតិអប្សរាឱ្យដឹងថាសម្រាប់អនាគត គេនៅតែមានគំរោងពង្រីកសួនរុក្ខជាតិអង្គរមួយនេះឱ្យបានទំហំធំ រហូតដល់ ១៣០ហិកតារ គឺលាតសន្ធឹងផ្ទៃដី រហូតទៅដល់ព្រំប្រទល់ កស្សិណទឹកខាងត្បូងនៃប្រាសាទអង្គរវត្ត ដើម្បីព្រលែងសត្វព្រៃឱ្យរស់នៅក្នុងតំបន់សួននោះ បានកាន់តែច្រើន។
សូមជម្រាបថា សួនរុក្ខជាតិអង្គរ ស្ថិតនៅ ទល់មុខសាលាអេសអូអេស តាមបណ្ដោយផ្លូវទៅអង្គរវត្ត៕SRP
ខេត្តសៀមរាប៖រដ្ឋមន្ត្រីក្រសួង រៀបចំដែនដី នគរូបនីយកម្ម និងសំណង់ លោកជា សុផារ៉ា បានថ្លែងកោតសរសើរចំពោះ សាលាបឋមសិក្សា វត្តបូព៌ ថាជាសាលាមួយមានគំរូល្អ មាន សណ្ដាប់ធ្នាប់ របៀបរៀបរយល្អ ហើយបានល្បីនៅទូទាំងប្រទេស។
លោកជានសុផារ៉ា ក៏បានកោតសរសើរចំពោះ អតីតនាយកសាលាបឋមសិក្សាវត្តបូព៌ លោកពឹង គិមឆេន ដែលបានរៀបចំសណ្តាប់ធ្នាប់របៀបរៀបរយ នៅសាលាវត្តបូព៌ បានយ៉ាងល្អប្រសើរកន្លងមកហូតដល់បច្ចុប្បន្ន។
ការថ្លែងរបស់លោកជា សុផារ៉ាធ្វើឡើង នៅថ្ងៃព្រហស្បតិ៍នេះ ក្នុងឱកាសអញ្ជើញសម្ពោធ«សួនរុក្ខជាតិអង្គរ» ដែលមានទីតាំងស្ថិតនៅទល់មុខសាលាអេសអូអេសក្នុងក្រុងសៀមរាប។
សូមជម្រាបថា សាលាបឋមសិក្សាវត្តបូព៌ ស្ថិតនៅភូមិវត្តបូព៌ សង្កាត់សាលាកំរើក ក្រុងសៀមរាប៕SRP
ខេត្តសៀមរាប៖ប្រុសម្នាក់កំពុងធ្វើម៉ូតូត្រូវបានគោយន្តបុកចំពេញទំហឹងបណ្ដាលឲ្យស្លាប់ភ្លាមៗ។
ហេតុការណ៍បានកើតឡើងនៅថ្ងៃ ពុធ ទី១៨ ខែឧសភា ឆ្នាំ២០២២ ស្ថិតនៅចំនុចខាងជើងកែងឈូកចំងាយ១៥ម៉ែត្រ ក្នុងភូមិឈូ ឃុំត្រីញ័រ ស្រុកពួក ខេត្តសៀមរាប។
សមត្ថកិច្ចស្រុកពួកបានអោយដឹងថា ករណីគ្រោះថ្នាក់ចរាចរណ៍ នេះរវាង គោយន្តដឹកថ្ម និងមនុស្សអង្គុយធ្វើម៉ូតូ។ គោយន្តកែច្នៃ ពណ៌ខៀវ បើកបរដោយឈ្មោះ សំ ពេក ភេទប្រុស អាយុ ៣៧ឆ្នាំ នៅភូមិបត់ ឃុំដូនពេង ស្រុកអង្គរជុំ ខេត្តសៀមរាប មុខរបរ គ្រូបង្រៀន បើកបុក មនុស្សកំពុងអង្គុយធ្វើម៉ូតូ ឈ្មោះ ហេង ហ៊ុនលី ភេទប្រុស អាយុ៣៤ឆ្នាំ រស់នៅភូមិឈូក ឃុំត្រីញ័រ ស្រុកពួក ខេត្តសៀមរាប មុខរបរ កសិករ (ស្លាប់)។ក្នុងនោះខូចខាតម៉ូតូ២គ្រឿង ធ្ងន់ផងដែរ។
សមត្ថកិច្ចបានបន្តថា មូលហេតុ ម្ចាស់គោយន្តកែច្នៃ បើកបរខ្វះការប្រុងប្រយ័ត្ន។ ជនរងគ្រោះត្រូវបានក្រុមគ្រួសារធ្វើបុណ្យតាមប្រពៃណី។ ចំណែក តៃកុងគោយន្ត បងក៏ត្រូវបានឃាត់ខ្លួនកសាងសំណុំរឿងតាមផ្លូវច្បាប់៕SRP
ខេត្តសៀមរាប៖រដ្ឋមន្ត្រីក្រសួងរ៉ែ និងថាមពល លោក ស៊ុយ សែម បានថ្លែងថា ក្នុងគោលនយោបាយ ផ្គត់ផ្គង់ថាមពលនេះ កម្ពុជា បានអនុវត្តបាននូវការអូសខ្សែតភ្ជាប់បណ្តាញចរន្តអគ្គិសនី បានចំនួន៩៨ភាគរយ នៃចំនួនភូមិសរុបចំនួប្រមាណ១៤.៣៩០ភូមិនៅទូទាំងប្រទេសកម្ពុជា។
លោកស៊ុយ សែម បានអះអាងថាក្នុងនោះដែរប្រជាពលរដ្ឋចំនួន៨៤ភាគរយ នៃប្រជាពលរដ្ឋប្រមាណជា២លានខ្នងផ្ទះក៏បានតភ្ជាប់បណ្តាញប្រើប្រាស់រួចរាល់ហើយដែរ ខណៈត្រឹមឆ្នាំ២០២២នេះ។ លោកថា ការពង្រីកបណ្តាញផ្គត់ផ្គង់អគ្គិសនីទូទាំងប្រទេស សម្រេចបាន៩៨ ភាគរយ នៃចំនួនភូមិសរុបនៅក្នុងប្រទេសកម្ពុជា។
លោក ស៊ុយ សែម បានបញ្ជាក់ថា ចំពោះភូមិ២ភាគរយ ដែលនៅសេសសល់ មិនទាន់បានបញ្ជូនបណ្តាយអគ្គិសនី ទៅនោះ ជាភូមិដាច់ស្រយាល នៅក្នុងព្រៃ គ្មានផ្លូវចូល ឬជាភូមិបណ្តែតទឹកជាដើម តែទោះជាយ៉ាងណា ក្រសួងនឹងខិតខំរកប្រភពថាមពល ផ្សេងៗដើម្បីផ្គត់ផ្គង់ដល់ភូមិប្រជាពលរដ្ឋទាំងនោះ។
លោកបានបញ្ជាក់ថាបច្ចុប្បន្នកម្ពុជាមានទំបន់ វារីអគ្គិសនីចំនួន៧ ដែលកំពុងដើរតួនាទីជាឆ្អឹងខ្នងនៃវិស័យថាមពលរបស់កម្ពុជា។ ក្រៅពីនោះកម្ពុជាក៏នៅមានរោងចក្រអគ្គិសនី ដែលដើរដោយថាមពលធ្យូងថ្ម និងប្រភពថាមពលដែលទិញពីប្រទេសជិតខាងផងដែរ។
លោកស៊ុយ សែម អះអាងបែបនះក្នុងពិធីប្រកាសចូលកាន់តំណែងលោក ឡេង លាត ជា ប្រធានមន្ទីរ រ៉ែ និងថាមពលខេត្តសៀមរាប នៅថ្ងៃអង្គារម្សិលមិញ នៅសាលាខេត្តសៀមរាប។
បើតាមស៊ុយ សែម បច្ចុប្បន្ននេះប្រទេស កម្ពុជា មានលទ្ធភាពផ្គត់ផ្គត់អគ្គិសនីប្រមាណជា៣៨០០ មេហ្គាវ៉ាត់ ក្នុងនោះ ខេត្តសៀមរាប បានប្រើប្រាស់អស់ប្រមាណជា១០០មេហ្គាវ៉ាត់ ប៉ុន្តែដោយសារវិបត្តិនៃជំងឺកូវីដ-១៩ ការប្រើប្រាស់ចរន្តអគ្គិសនីនៅក្នុងប្រទេសកម្ពុជា បានធ្លាក់មកត្រឹមតែជាង២ពាន់ម៉េហ្គាវ៉ាត់ ដែលកត្តានេះ បានធ្វើឲ្យអគ្គិសនីកម្ពុជាខាតធនយ៉ាងច្រើន។
លោកថា ទោះជាយ៉ាងនេះក្តី គោលនយោបាយរបស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចហ៊ុន សែន បានខិតខំ ស្វែងរកនូវប្រភពថាមពលមកផ្គត់ផ្គង់ ចែកចាយជូនប្រជាពលរដ្ឋ ឲ្យបានគ្រប់គ្រាន់ និងមានស្ថេរភាព និរន្តរភាព និងតម្លៃសមរម្យ៕SRP
ខេត្តសៀមរាប៖លោកនេន មួយអង្គសង្ស័យពាក់ព័ន្ធ គាស់ទ្វារបន្ទប់លោកគ្រូចៅអធិការវត្តល្អក់យកលុយជិត២ម៉ឺនដុល្លារ បានចាប់ខ្លួន។
ការចាប់ខ្លួនធ្វើឡើង នៅថ្ងៃទី ១៣ខែ ឧសភា ឆ្នាំ២០២២ កម្លាំងប៉ូលិសព្រហ្មទណ្ឌកម្រិតធ្ងន់ស្នងការខេត្តសៀមរាប និងនគរបាលស្រុកប្រាសាទបាគង។
ជនសង្ស័យមានឈ្មោះតឹក សំណាង ភេទប្រុស អាយុ១៥ឆ្នាំ នៅភូមិត្រពាំងទឹម ឃុំកណ្ដែក ស្រុកប្រាសាទបាគង ខេត្តសៀមរាប។
ជនសង្ស័យឈ្មោះតឹក សំណាង បាន សូមបដិសេធ មិនបានលួចយកនោះទេ។
តាមការបំភ្លឺរបស់សាក្សី នៅកន្លែងកើតហេតុ ជាច្រើនអង្គ និងពលរដ្ឋបានឲ្យដឹងថា ជនសង្ស័យឈ្មោះតឹក សំណាង ពិតជាជាប់ពាក់ព័ន្ធលួចគាស់ទ្វារកុដ្ឋ បន្ទប់លោកគ្រូចៅអធិការវត្តល្អក់។
ជនសង្ស័យ ត្រូវបាននគរបាលព្រហ្មទណ្ឌកម្រិតធ្ងន់ សម្រេចបញ្ជូនខ្លួនទៅតុលាការដើម្បីអនុវត្តតាមផ្លូវច្បាប់។
សូមជម្រាបថាករណី គាស់ទ្វារកុដ្ឋ បន្ទប់លោកគ្រូចៅអធិការវត្តល្អក់ យកលុយជិត២ម៉ឺនដុល្លារនេះនៅថ្ងៃ ទី១២ ខែឧសភា ឆ្នាំ២០២២ ស្ថិតនៅក្នុងវត្តល្អក់ឃុំកណ្ដែក ស្រុកប្រាសាទបាគង ខេត្តសៀមរាប៕SRP