ខេត្តសៀមរាប – Page 81

ខេត្តសៀមរាប៖ប៉ូលិសក្រុងសៀមរាបមួយរូបបានស្លាប់ភ្លាមៗ ខណ:កំពុងជិះម៉ូតូត្រូវបានបុកប៉ះចូលក្រោមរថយន្តចំពេញទំហឹង។

ជនរងគ្រោះមានឈ្មោះ រឿន នរៈសត្យា មុខរបរនគរបាល ភេទប្រុស អាយុ ២២ឆ្នាំ រស់នៅភូមិព្រៃវែង ឃុំសំរោងយា ស្រុកពួក ខេត្តសៀមរាប។

ហេតុការណ៍បានកើតឡើងនៅថ្ងៃទី២៨ ខែមិថុនា ២០២២ វេលាម៉ោង១៤ និង០០នាទី ចំណុចទល់មុខរដ្ឋបាលគយ ស្ថិតនៅភូមិសណ្តាន់ សង្កាត់ ទឹកវិល ក្រុងសៀមរាប ខេត្តសៀមរាប ផ្លូវជាតិលេខ៦។

របាយការណ៍របស់ការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តសៀមរាប បានឲ្យដឹងថា ករណីគ្រោះថ្នាក់ចរាចរណ៍នេះរវាងរថយន្តដឹកទំនិញ និងម៉ូតូ។ ម៉ូតូមួយគ្រឿងម៉ាក HONDA DREAM ពណ៌ខ្មៅ ពាក់ផ្លាកលេខសៀមរាប1Y.7424 អ្នកបើកបរដោយជនរងគ្រោះ ឈ្មោះរឿន នរៈសត្យា មានទិសដៅពីលិច ទៅកើត បានបុកជាមួយរថយន្តមួយគ្រឿងម៉ាក HYUNDAI ពណ៌ស ពាក់ផ្លាកលេខ ភ្នំពេញ 3F 3537 អ្នកបើកបរ មិនទាន់ស្គាល់អត្តសញ្ញាណ បើកបរមានទិសដៅពីត្បូង បត់ឆ្វេងទៅលិច។

របាយការណ៍បន្តថា ហេតុការណ៍នេះបណ្តាលអោយស្លាប់ ឈ្មោះ រឿន នរៈសត្យា(អ្នកបេីកបរម៉ូតូមានពាក់មួកសុវត្ថភាព)នគរបាល និងខូតខាតម៉ូតូធ្ងន់១គ្រឿង និងរថយន្តស្រាល១គ្រឿង។

ចំណែកអ្នកបើកបររថយន្តក្រោយពេលគ្រោះថ្នាក់រួច បានរត់គេចចេញពីកន្លែងកើតហេតុ។ មូលហេតុអ្នកបើកបររថយន្តបត់ឆ្វេងខ្វះការប្រុង ប្រយ័ត្ន និងអ្នកបើកបរម៉ូតូបើកបរក្នុងល្បឿនលឿន។

កម្លាំងជំនាញកំពុងស្រាវជ្រាវ និងកសាងសំណុំរឿងបញ្ជូនទៅតុលាការ។ ដោយឡែកវត្ថុតាងរក្សាទុកនៅការិយាល័យនគរបាលចរាចរណ៍ផ្លូវគោក៕SRP

ខេត្តសៀមរាប៖បុរសម្នាក់បានស្លាប់ភ្លាមៗ ខណ:ឡើងឡើងផ្សាដែកធ្វើទ្វារ ខ្វះការប្រុងប្រយ័ត្ន។

ហេតុការណ៍បានកើតឡើងនៅវេលាម៉ោង១០និង១៥នាទីថ្ងៃអង្គារ ថ្ងៃទី២៨ខែមិថុនាឆ្នាំ២០២២ នៅចំណុច មុខស្តង់លក់គ្រឿងសំណង់ ស្ថិតនៅក្នុងភូមិព្រៃគុយ ឃុំអំពិល ស្រុកប្រាសាទបាគង ខេត្តសៀមរាប។

លោក លឹម សម្បត្តិ អធិការនគរបាលស្រុកប្រាសាទបាគង បានឲ្យដឹងថា ជនរងគ្រោះមាន
ឈ្មោះតាប់ មី ភេទប្រុសអាយុ៣២ឆ្នាំ នៅភូមិជ្រៃឃុំកណ្ដែក ស្រុកប្រាសាទបា
គង ខេត្តសៀមរាប។

លោក លឹម សម្បត្តិ បន្តថាតាមការបំភ្លឺពីឈ្មោះ ជា ជេន ភេទប្រុសអាយុ២៤ឆ្នាំ មានទីលំនៅភូមិជ្រៃ ឃុំកណ្ដែកស្រុកប្រាសាទបាគង ខេត្តសៀមរាប ដែលត្រូវជាប្អូនថ្លៃសព បានឱ្យដឹងថា៖ នៅថ្ងៃទី២៨ខែមិថុនាឆ្នាំ២០២២ វេលាម៉ោង៧ព្រឹករូបគាត់និងឈ្មោះសួ កុសលភេទប្រុស ឈ្មោះតាប់ មី ភេទប្រុស (សព) នៅភូមិជ្រៃឃុំកណ្ដែក ស្រុកប្រាសាទបាគងខេត្តសៀមរាប ជាមួយគ្នាបាននាំគ្នាទៅស៊ីឈ្នួលផ្សាដែកធ្វើទ្វារអោយឈ្មោះយ៉ន យិន ភេទប្រុស នៅភូមិឃុំកើតហេតុខាងលើ។ ចំណែករូបគាត់និងឈ្មោះតាប់ មី(សព) បានឡើងទៅលើអន្ទារដែកទាំងពីរនាក់ ដែលមានកម្ពស់ ២.៥ ស.ម។ ចំណែកឈ្មោះសួ កុសល នៅកាត់ដែកហុចពីក្រោម រហូតដល់វេលាម៉ោង១០ជាងព្រឹក ពេលនោះឈ្មោះតាប់ មី(សព) បានទាញដែកពីក្រោមឡើងមកលើ ដើម្បីយកមកផ្សា ស្រាប់តែពេលនោះដែកបានប៉ាស់ទៅនឹងខ្សែភ្លើងស្រាតអគ្គីសនី ក៏ឆក់ឈ្មោះតាប់ មី(សព) ធ្លាក់ពីលើអន្ទារ មកដីបាក់កស្លាប់តែម្ដង។

លោក លឹម សម្បត្តិ បញ្ជាក់ថា
ការពិនិត្យសាកសព
-ផ្នែកក្បាលមានស្នាមបែកដាច់រលាត់០.៥ស ម
-ផ្នែក ថ្ពាល់ខាងស្ដាំនិងពុកចង្កា មានស្នាមដាច់រលាត់០.២ ស.ម
-ផ្នែក កដៃឆ្វេងនិងកដៃស្ដាំ មានស្នាមខ្លោចដាច់រលាត់០.៤ ស.ម ក្រៅពីនោះគ្រប់អវយវ:ពុំមានស្លាកស្នាមអ្វីពាក់ព័ន្ធនឹងបទល្មើសព្រហ្មទណ្ឌនោះទេ។

តាមសន្និដ្ឋាន ផ្អែកតាមកាបំភ្លឺពីសាក្សី និងកាពិនិត្យរបស់កម្លាំងជំនាញពិនិត្យវិភាគកន្លែងកើតហេតុ ឃើញថា សពខាងលើពិតជាបានស្លាប់ដោយសាឆក់ខ្សែរភ្លើងពិតប្រាកដ្ឋមែន។
មូលហេតុ ខ្វះការប្រុងប្រយ័ត្នដោយខ្លួនឯង៕SRP

ខេត្តសៀមរាប៖អាជ្ញាធរខេត្តសៀមរាប បានស្នើសុំ អាជ្ញាធរជាតិអប្សរា ផ្អាកការរុះរើ សំណង់ខុសច្បាប់របស់ប្រជាពលរដ្ឋនៅក្នុងតំបន់១ នឹងតំបន់ ២។

នេះបើយោងតាមលិខិតរបស់ អាជ្ញាធរខេត្តសៀមរាប ដែលចុះហត្ថលេខាដោយលោក ប្រាក់ សោភ័ណ អភិបាលរងខេត្ត។

សូមជម្រាបថាកន្លងមកក៏ដូចថ្មីៗនេះ កម្លាំងអាជ្ញាធរជាតិអប្សរា បានចុះរុះរើផ្ទះសំណង់របស់ប្រជាពលរដ្ឋ យ៉ាងច្រើនផុសផុល រហូតធ្វើឲ្យការរុះរើនៅតំបន់ខ្លះ ត្រូវបានពលរដ្ឋ លើកគ្នា តវ៉ាផងដែរ។ ការចុះរុះរើរបស់អាជ្ញាធរជាតិអប្សរា គឺផ្អែកលើគោលការណ៍ ថាសំណង់ទាំងនោះបានសាងសង់ឡើង ដោយខុសច្បាប់ ដែលជាតំបន់អភិរក្សឬក្នុងតំបន់រមណីយដ្ឋានអង្គរ។

ទោះជាយ៉ាងណា គេសង្កេតឃើញនៅក្នុងតំបន់រមណីយដ្ឋានអង្គរ មានសំណង់ជាច្រើនបានផុសឡើង បើទោះបីជាមានការរឹតបន្តឹងពីអាជ្ញាធរជាតិអប្សរាយ៉ាងណាក៏ដោយ ក៏មានសំណង់ខ្លះបានសាងសង់រួចរាល់ផងដែរ៕SRP

ខេត្តសៀមរាប៖មនុស្សមួយក្រុមជិះម៉ូតូ៣គ្រឿងតាមកាប់ភាគីម្ខាងទៀតដែលជិះម៉ូតូ ២គ្រឿងបណ្ដាលឲ្យរងរបួស។

ហេតុការណ៍បានកើតឡើងនៅថ្ងៃទី២៥ ខែមិថុនា ឆ្នាំ២០២២ វេលាម៉ោង២១ និង២០នាទី ចំណុចផ្លូវកៅស៊ូ មុខវត្តព្រះអង្គទ្រង់ ស្តិតនៅនៅភូមិព្រះអង្គទ្រង់ ឃុំល្វា ស្រុកពួក ខេត្តសៀមរាប។

ប្រភពបានឲ្យដឹងថាករណីហិង្សាដោយចេតនាមានស្ថានទំងន់ទោស (កាប់និងកាំបិត) នេះ បង្កឡើងដោយបក្ខពួកជនសង្ស័យមិនស្គាល់អត្តសញ្ញាណមានគ្នា៥ ទៅ៦នាក់ ជិះម៉ូតូ៣គ្រឿង មិនស្គាល់ម៉ាក បានកាប់ទៅលើជនរងគ្រោះចំនួន២នាក់ ដែលជិះម៉ូតូម្នាក់មួយគ្រឿងក្នុងទិសដៅស្របគ្នពីត្បូងទៅជើង។

ប្រភពបន្តថា ជនរងគ្រោះ ទី១ ឈ្មោះ ខុង សារ៉ង ភេទប្រុស អាយុ៣០ ឆ្នាំ មុខរបរកម្មករសំណង់ រស់នៅភូមិគោកភ្នៅ ឃុំដូនកែវ ស្រុកពួក ខេត្តសៀមរាប ជិះម៉ូតូ ម៉ាកហុងទ្រីសេរីចាស់ រងរបួសដាច់រយះស្បែកក្បាលផ្នែកខាងឆ្វេង ប្រវែង ២១ ស.ម កំពុងសម្រាកព្យាបាលនៅពេទ្យបង្អែកស្រុកពួក។

ជនរងគ្រោះទី២ ឈ្មោះ ប្រុន រស់ ភេទប្រុស អាយុ ៣៨ឆ្នាំ មុខរបរ កម្មកសំណង់ រស់នៅភូមិត្រពាំងឬស្សី ឃុំរើល ស្រុកពួក ខេត្តសៀមរាប រងរបួសរយះចំនួន៣កន្លែង។ ស្មាខាងស្តាំប្រវែង ប្រវែង ៩ ស.ម
_សាច់ដុំដៃស្តាំប្រវែង៣ ស.ម
_ស្លាបប្រជៀង ប្រវែង ៥ ស.ម
។ ជិះម៉ូតូ ម៉ាកហុងដាទ្រី សេរីឆ្នាំ១៩៩៩ ពណ៌ខ្មៅ ពាក់ផ្លាកលេខ សៀមរាប ១I.៤២៣៧ កំពុងសម្រាកព្យាបាលនៅពេទ្យបង្អែកស្រុកពួក។ ដោយឡែកក្រុមជនសង្ស័យក្រោយធ្វើសកម្មភាពរួចបានជិះម៉ូតូគេចខ្លួនអស់តែម្ដង៕SRP

ខេត្តសៀមរាប៖រថយន្តមួយគ្រឿង បានបុកអ្នកជិះម៉ូតូ បណ្ដាលឲ្យបុរសម្នាក់ស្លាប់ភ្លាមៗ។

ហេតុការណ៍បានកើតឡើងនៅវេលាម៉ោង ១០ ព្រឹកថ្ងៃទី២៣ ខែមិថុនា ឆ្នាំ២០២២ ត្រង់ចំណុចចន្លោះគីឡូម៉ែត្រ លេខ២០-២១ ស្ថិតនៅភូមិត្រពាំងប្រីយ៍ ឃុំពពេល ស្រុកសូទ្រនិគម ខេត្តសៀមរាប។

ប្រភពពីសមត្ថកិច្ចបានឲ្យដឹងថា គ្រោះថ្នាក់ចរាចរណ៍នេះ គឺរថយន្តធុនធំមួយគ្រឿងមិនស្គាល់អត្តសញ្ញាណ បានបើករត់គេចបាត់ បានបើកបរក្នុងទិសដៅ ពីត្បូងទៅជើង បានបុកជាមួយម៉ូតូមួយគ្រឿងម៉ាកហុងដា វ៉េវអាល់ហ្វា (Honda Wave) ពណ៌ខ្មៅ ស្លាកលេខ សៀមរាប ១AL.៤០៥០ បើកបរដោយឈ្មោះ ណាំ នឿន ភេទប្រុស អាយុ៦៨ឆ្នាំ រស់នៅភូមិគោលថ្មី ឃុំពពេល ស្រុកសូទ្រនិគម ខេត្តសៀមរាប បើកបរស្របទិសគ្នាពីត្បូងរួចបត់ឆ្វេង ទៅលិចហើយម៉ូតូជាប់នៅក្រោមរថយន្តអូសចម្ងាយប្រហែល ១៨០០ម៉ែត្រ រួចក៏ធ្លាក់ម៉ូតូនៅខាងឆ្វេងដៃ បណ្ដាលឲ្យជនរងគ្រោះស្លាប់តែម្តង។

ករណីគ្រោះថ្នាក់ចរាចរណ៍នេះ សមត្ថកិច្ចមិនបានបញ្ជាក់អំពីមូលហេតុនៅឡើយទេ៕SRP

Sponsored

ខេត្តសៀមរាប៖សមត្ថកិច្ចនគរបាលចម្រុះបានឃាត់ខ្លួនបុរសម្នាក់ ពាក់ព័ន្ធករឃាតកម្មដ័សាហាវព្រៃផ្សៃ សម្លាប់ប្រពន្ធរបស់ខ្លួន។

ទីតាំងកើតហេតុ នៅភូមិ ចុងស្ពាន ឃុំខ្វាវ ស្រុកជីក្រែងខេត្តសៀមរាប។

នគរបាលព្រហ្មទណ្ឌកំរិតធ្ងន់ បានឲ្យដឹងថា ជនសង្ស័យ ឈ្មោះស៊ុយ ជួរ ភេទប្រុស អាយុ៤៣ឆ្នាំ មុខរបរធ្វើស្រែទីលំនៅសព្វថ្ងៃ ភូមិចុងស្ពាន ឃុំខ្វាវ ស្រុកជីក្រែង ខេត្តសៀមរាប។ចំណែក ជនរងគ្រោះ ជាប្រពន្ធឈ្មោះ សែត ណាន អាយុ៣៧ឆ្នាំ)។

របាយការណ៍បន្តថា នៅថ្ងៃទី ២៣ ខែ មិថុនា ឆ្នាំ២០២២ វេលា ម៉ោ១០និង ៣០នាទី សមត្ថកិច្ចបានទទួលព័ត៌មានថា ឈ្មោះ សែត ណាន ភេទ ស្រី អាយុ៣៧ឆ្នាំ បានស្លាប់ហើយ ហើយឈ្មោះស៊ុយ ជួរ ជាប្តី បានយកទៅកប់នៅក្រោយផ្ទះបាត់ទៅហើយ។ មានការសង្ស័យព្រោះកន្លងមកគ្រួសានេះ ធ្លាប់
ប្រើអំពើហិង្សា ក៏បានរាយការណ៍
ទៅការិយាល័យជំនាញព្រហ្មទណ្ឌកម្រិតធ្ងន់ និង ការិយាល័យ បច្ចេកទេសវិទ្យាសាស្ត្រ នឹងបានមកសហការជាមួយនគរបាលស្រុកជីក្រែង ដើម្បីពិនិត្យសាកសព។

តាមការពិនិត្យសព ឃើញមានស្នាមរឹតក ,បាក់ក និងស្នាមជាំលើដងខ្លូន។ តាមចម្លើយសារភាពរបស់ជនសង្ស័យ បានប្រាប់សមត្ថកិច្ចថា ខ្លួនពិតជាបានសម្លាប់ប្រពន្ធ របស់ខ្លួនពិតមែនតាមរយ: យកខ្សែគោចងរឹតក ព្យួកន្ត្រាក់ទៅលើនិងផ្ទោងខ្ទម នៅវេលាម៉ោង១០ព្រឹកថ្ងៃទី២២ ខែមិថុនា ឆ្នាំ២០២២ រហូតដល់ម៉ោង៥ល្ងាច បានខ្លួនទៅស្រាយខ្សែទំលាក់មកវិញ រួចហើយខ្លូន ក៏ជីករណ្តៅយកសាកសពប្រពន្ធទៅកប់ដោយទំលាក់ក្បាលចុះទៅមុន។

ជុំវិញករណីឃាតកម្មដ៏សាហាវព្រៃផ្សៃបែបនេះ អធិការនគរបាលស្រុកជីក្រែង លោកតាំង លីហេង បានថ្លែងប្រាប់សារព័ត៌មានសៀមរាបប៉ុស្ដិ៍ តាមទូរស័ព្ទនៅព្រឹកនេះថា ករណីឃាតកម្ម ខាងលើ មូលហេតុផ្ដើមចេញពីគ្រួសារមានជម្លោះ ហិង្សាញឹកញាប់ ជាពិសេសគ្រួសារតែងតែពិសារគ្រឿងស្រវឹងទាំងពីរនាក់ផងដែរ ជាហេតុធ្វើឱ្យភាគីប្ដីបាត់បង់ស្មារតី ផ្ដើមចេញពីការផឹកស្រា ទើបឈានដល់ការសម្លាប់ប្រពន្ធយ៉ាងដូច្នេះ៕SRP

ខេត្តសៀមរាប៖សមត្ថកិច្ចបាននាំខ្លួនបុរសម្នាក់ដែលមានប្រពន្ធហើយ តែលួចមានសង្សាជាអ្នកសាឡន ហើយដេកជាមួយសាកសពរហូតហើមស្អុយ យកទៅសាកសួរចម្លើយសង្ស័យពាក់ព័ន្ធអំពើឃាតកម្ម។

ហេតុការណ៍ភ្ញាក់ផ្អើលនៅនៅវេលាម៉ោង១៩និង៣០នាទី ថ្ងៃទី២៣ ខែមិថុនា ឆ្នាំ២០២២ នៅចំណុចបន្ទប់ជួល ស្ថិតក្នុងភូមិចុងកៅស៊ូ សង្កាត់ស្លក្រាម ក្រុងសៀមរាប ខេត្ដសៀមរាប។

ប្រភពពីសមត្ថកិច្ចបានឲ្យដឹងថា ការបែកធ្លាយ ករណីឃាតកម្ម បន្ទាប់ពីប្រជាពលរដ្ឋ រស់នៅក្បែរទីតាំងខាងលើ បានរាយការណ៍មកសមត្ថកិច្ច ថា មានធុំក្លិនស្អុយចេញពីបន្ទប់ជួល។ ករណីនេះ
សមត្ថកិច្ចបានចុះទៅដល់ទីតាំងបន្ទប់ជួលខាងលើ ពិតជាមានធុំក្លិនស្អុយមែន ទើបសមត្ថកិច្ចទម្លុះទ្វារបន្ទប់ចូលពិនិត្យមើល (បន្ទប់ចាក់សោរពីក្រៅ) ទើបប្រទះឃើញសាកសព គ្របភួយ និងជនសង្ស័យដេកក្បែរសាកសពតែម្ដង។

ប្រភពបានបន្តថា៖ ជនរងគ្រោះមានឈ្មោះ ផា រដ្ឋា ភេទស្រី អាយុ២៦ឆ្នាំ មុខរបរ អ្នកសាឡន ស្រុកកំណើត នៅភូមិទ័ពជ័យ ឃុំបឹងមាលា ស្រុកស្វាយលើ ខេត្ដសៀមរាប។ ចំណែកជនសង្ស័យឈ្មោះ សេង គឹមហួរ ភេទប្រុស អាយុ២៧ឆ្នាំ ស្រុកកំណើត នៅភូមិអញ្ចាញ សង្កាត់នគរធំ ក្រុងសៀមរាប ខេត្ដសៀមរាប ទីលំនៅបច្ចុប្បន្ន ភូមិរលួសកើត ឃុំរលួស ស្រុកប្រាសាទបាគង ខេត្ដសៀមរាប (ត្រូវជាសង្សារជនរងគ្រោះ)។

សមត្ថកិច្ចបានសាកសួរជនសង្ស័យ ដោយតាមការឆ្លើយសារភាព របស់ជនសង្ស័យថា ខ្លួនពិតជាបានសម្លាប់ ជនរងគ្រោះពិតប្រាកដមែន ដោយបានយកខ្សែរីដូវាំងនន រឹតក ជនរងគ្រោះបណ្ដាលឱ្យស្លាប់។

តាមការធ្វើកោសល្យវិច័យរបស់សមត្ថកិច្ចជំនាញ បានបញ្ជាក់ថា ជនរងគ្រោះ ស្លាប់ដោយសារការរឹតក (នៅលេីកជនរងគ្រោះមានស្នាម)។

ប្រភពបន្តថាមូលហេតុ ជនសង្ស័យប្រចណ្ឌនឹងជនរងគ្រោះ។ បច្ចុប្បន្នជនសង្ស័យ ត្រូវបានសមត្ថកិច្ចនគរបាលឃាត់ខ្លួន យកទៅអធិការនគរបាលក្រុងសៀមរាប។ ដោយឡែក សពជនរងគ្រោះ ត្រូវបានប្រគល់ ឱ្យក្រុមគ្រួសារយកទៅធ្វើបុណ្យតាមប្រពៃណី៕SRP

ខេត្តសៀមរាប៖យ៉ាងហោចមនុស្សម្នាក់ បានស្លាប់ភ្លាមៗ និង ២នាក់ទៀត រងរបួសធ្ងន់ស្រាល ដោយសារម៉ូតូ២គ្រឿងបុកគ្នា។

ហេតុការណ៍បានកើតឡើងនៅថ្ងៃទីថ្ងៃទី២៣ ខែ មិថុនា ឆ្នាំ២០២២ វេលាម៉ោង ០៤ និង ១០ នាទី ទៀបភ្លឺ ត្រង់ចំណុច ផ្លូវបំបែកជាបួន សាលាអន្តរជាតិ USA ស្ថិតនៅក្នុងភូមិសាលាកន្សែង សង្កាត់ស្វាយដង្គុំ ក្រុងសៀមរាម ខេត្តសៀមរាប លើផ្លូវជាតិ ក្រាលបេតុង ពីស៊ុបរំដួលទៅផ្សារដើមក្រឡាញ់។

របាយការរបស់នគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តសៀមរាប បានឲ្យដឹងថាករណីគ្រោះថ្នាក់ចរាចរណ៍នេះ រវាងម៉ូតូ HOHDA WAVE និង ម៉ូតូ HONDA DREAM។

ករណីនេះម៉ូតូម៉ាក HONDA DREAM ពណ៌ ខ្មៅ ពាក់ស្លាកលេខ សៀមរាប1AL-5499 អ្នកបើកបរឈ្មោះ អុីម សុខឡេត ភេទប្រុស អាយុ២៩ឆ្នាំ រស់នៅភូមិកញ្ចំ ឃុំកញ្ចំ ស្រុកពារំាង ខេត្ត ព្រៃងវែង (ស្លាប់) ទិសដៅពីជើងទៅត្បូង និងអ្នករួមដំណើរឈ្មោះ ឡោម ធារ៉ា ភេទប្រុសអាយុ២១ ឆ្នាំ រស់នៅភូមិឃុំជាមួយគ្នា (របួសស្រាល) បានបុកម៉ូតូមួយគ្រឿងម៉ាកHONDA WAVE ពណ៌ខ្មៅ ពាក់ផ្លាកលេខ សៀមរាប 1Q- 8108 អ្នកបើកបរ ឈ្មោះ ឈឿង ធារ៉ាត់ ភេទប្រុស អាយុ ២៣ ឆ្នាំ រស់នៅភូមិសាលាកន្សែង សង្កាត់សាលាកន្សែង ក្រុងសៀមរាប បើកបរមានទិសដៅ ពីលិច ទៅកើត (របួសធ្ងន់)។ ក្នុងនោះខូតខាតម៉ូតូធ្ងន់ ០២ គ្រឿង។

របាយការណ៍បន្តថា មូលហេតុ អ្នកបើកបរម៉ូតូ HONDA DREAM បើកបរ ក្នុងល្បឿនលឿនខ្វះការប្រុងយ័ត្ន។ កម្លាំងជំនាញកំពុងស្រាវជ្រាវ និងកសាងសំណុំរឿងតាម នីតិវិធី ដើម្បីបញ្ជូនទៅតុលាការ។ ចំណែកវត្ថុតាងរក្សាទុកនៅអធិការដ្ឋាននគរបាលចរាចរណ៏ផ្លូវគោក ខេត្តសៀមរាប ដើម្បីរង់ចាំការដោះស្រាយ៕SRP

ខេត្តសៀមរាប៖លោកទៀ សីហា អភិបាលខេត្តបានស្នើដល់ភាគីរុស្ស៉ីជំរុញការវិនិយោគលើផ្នែកទេសចរណ៍ កសិកម្ម ពាណិជ្ជកម្មមកព្រះរាជាណាចក្រកម្ពុជា ពិសេសខេត្តសៀមរាបផងដែរ។

លោក ទៀ សីហា ស្នើបែបនេះនៅក្នុងជំនួបសម្តែងការគួរសមនិងពិភាក្សាការងាររវាងរដ្ឋបាលខេត្តជាមួយនឹងឯកអគ្គរដ្ឋទូតរុស្ស៊ី ប្រចាំព្រះរាជាណាចក្រកម្ពុជា នៅថ្ងៃពុធម្សិលមិញ។

លោកក្នុងជំនួប លោក ទៀ សីហា បានថ្លែងអំណរគុណយ៉ាងជ្រាលជ្រៅ ចំពោះឯកអគ្គរដ្ឋទូតរុស្ស៊ី និងក្រុមការងារ ដែលបានចំណាយពេលវេលាដ៏មានតម្លៃអញ្ជើញមកជួបពិភាក្សាការងារនេះ។

លោក ទៀ សីហា បានបន្តថាកាលពីឆ្នាំ២០១០ ខេត្តសៀមរាបបានចុះអនុស្សរណៈ នៃការយោគយល់គ្នារ វាងខេត្តសៀមរាប នៃព្រះរាជាណាចក្រកម្ពុជា និង ក្រុងវែលីគីលូវហ្គូរ៉ាដ នៃសហព័ន្ធរុស្សីដោយបានឯកភាពគ្នាបង្កើត ឡើងនូវចំណងមិត្តភាព និង កិច្ចសហប្រតិបត្តិការអន្តរជាតិ ដើម្បីជាមូលដ្ឋានទំនុកចិត្តរវាងគ្នា និង គ្នាសំដៅពង្រឹង ទំនាក់ទំនងមិត្តភាព និងការយោគយល់គ្នា ដើម្បីផ្សព្វផ្សាយវប្បធម៌ អរិយធម៌ និងលើកកម្ពស់ការអភិវឌ្ឍន៍វិស័យ ផ្សេងៗ ឱ្យកាន់តែមានភាពរីកចំរើនថែមទៀតក្នុងខេត្ត-ក្រុងយើងទាំងពីរផងដែរ។

លោក អាណាតូលី បូរ៉ូវីក ឯកអគ្គរដ្ឋទូតនៃសហព័ន្ធរុស្ស៊ីប្រចាំកម្ពុជាក៏ថ្លែងនូវអំណរគុណយ៉ាងជ្រាលជ្រៅផងដែរ ចំពោះលោក អភិបាលខេត្តសៀមរាប លោកទៀ សីហា និងក្រុមការងារខេត្ត ដែលបានចំណាយពេលវេលាដ៏មានតម្លៃជួបសម្តែងការគួរសមនិងពិភាក្សាការងារនាពេលនេះ។

លោកបានបន្តផ្អែកតាមសំណើខាងលើ លោកនឹងជំរុញដល់ផ្នែកពាក់ព័ន្ធឱ្យចូលមកវិនិយោគនៅកម្ពុជាដែលស្របទៅតាមអនុស្សរណៈយោគយល់គ្នាផងដែរ៕SRP

ខេត្តសៀមរាប៖អាជ្ញាធរខេត្តសៀមរាបនិងមន្ត្រីពាក់ព័ន្ធនៅថ្ងៃពុធ ម្សិលមិញបានបើកកិច្ចប្រជុំពិនិត្យគម្រោងស្តារស្ទឹងសៀមរាប ជំហានទី២ (KHM-18) ចាប់ពីចំណុចស្ពានក្រវ៉ាត់ក្រុងរហូតទៅដល់ចុងស្រុក។

កិច្ចប្រជុំធ្វើឡើងនៅរដ្ឋបាលខេត្ត ក្រោមវត្តមាន លោកទៀ សីហា អភិបាលខេត្ត និងលោក វង្ស ពិសិដ្ឋ អនុរដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោង បានដឹកនាំកិច្ចប្រជុំពិនិត្យវឌ្ឍនភាពគម្រោងស្តារស្ទឹងសៀមរាប ជំហានទី២។

សូមបញ្ជាក់ថា គម្រោងស្តារស្ទឹងសៀមរាប ជំហានទី២ ក្រោមឥណទានសម្បទាន របស់ធនាគារអាហរណ៍នីហរណ៍សាធារណរដ្ឋកូរ៉េ ផ្តោតលើការរៀបចំស្តារស្ទឹងសៀមរាប ដើម្បីបញ្ចៀសទឹកលិចក្រុងសៀមរាប។

សូមជម្រាបថា ការស្តារស្ទឹងជំហាន ទី២នេះ គឺចាប់ពីចំណុចស្ពានក្រវ៉ាត់ក្រុងរហូតទៅដល់ចុងស្រុក ដែលការស្តារនេះគឺជារៀបចំសោភណ្ឌភាពស្ទឹងសៀមរាប ឱ្យមានភាពបៃតងនិងស្រស់បំព្រងថែមទៀត ជាពិសេសបញ្ចៀសការលិចទឹកក្នុងក្រុងសៀមរាប ដែលធ្វើឱ្យប៉ះពាល់ដល់សេដ្ឋកិច្ចជាដើម។

ជុំវិញគម្រោងស្តារស្ទឹងសៀមរាបជំហានទី ២នេះ រដ្ឋបាលខេត្តក៏សូមអំពាវនាវដល់បងប្អូនប្រជាពលរដ្ឋ ដែលរស់នៅតាមចំណីស្ទឹង សូមចូលរួមសហការជាមួយអាជ្ញាធរ មានសត្ថកិច្ចដើម្បីរៀបចំស្ទឹងសៀមរាបឱ្យស្របតាមផែនការដែលបានគ្រោងទុក៕SRP