ខេត្តសៀមរាប – Page 75

ខេត្តសៀមរាប៖នៅទីបំផុតចៅក្រមស៊ើបសួរបៃសាលាដំបូងខេត្តសៀមរាប បានសម្រេចឃុំខ្លួនស្ត្រីសកម្មជនរបស់គណបក្ស LDP ចំនួន ៦នាក់ ដាក់ពន្ធនាគារ ពីបទប្រឆាំងអ្នករាជការសាធារណៈ។

ព្រះរាជអាជ្ញារង នៃអយ្យការអមសាលាដំបូងខេត្តសៀមរាប លោក ថេង សំណាង បានប្រាប់អ្នកសារព័ត៌មាន នៅថ្ងៃទី២ ខែកញ្ញា ម្សិលមិញថា ស្ត្រីទាំង ៦នាក់ របស់គណបក្ស LDP ដែលសមត្ថកិច្ចឃាត់ខ្លួនបាននៅមុខចំការ របស់លោក ខឹម វាសនា នោះត្រូវបានសម្រេច ឱ្យឃុំខ្លួនបណ្តោះអាសន្ន ដាក់នៅពន្ធនាគារ ខេត្តសៀមរាបហើយ។

លោក ថេង សំណាង បានបញ្ជាក់ថា ការឃាត់ខ្លួនមនុស្សចំនួន ៦នាក់ ដែលជាសកម្មជន អ្នកគាំទ្រគណបក្សសម្ព័ន្ធដើម្បីប្រជាធិបតេយ្យ ដែលបានបើករថយន្តគេចពីបារ៉ាស់ទី១ រួចទៅបុកបារ៉ាសទី២ របស់សមត្ថកិច្ច និងប្រឆាំងសមត្ថកិច្ចកំពុងប្រតិបត្តិការ ហើយករណីខាងលើយើងចោទពីបទ “ប្រឆាំងអ្នករាជការសាធារណៈ តាមមាត្រា ៥០៣ និង ៥០៥ នៃក្រមព្រហ្មទណ្ឌ។

លោកបន្តថា ការឃាត់ខ្លួននេះ ធ្វើឡើងនៅល្ងាចថ្ងៃទី១ ខែកញ្ញា ឆ្នាំ២០២២ ស្ថិតនៅចំណុចប៉ុស្តិ៍ហាម ឃាត់មុខ ដីចម្ការម្រេចរបស់លោកខឹម វាសនា ក្នុងឃុំត្បែង ស្រុកបន្ទាយស្រី ខេត្តសៀមរាប។

បើតាមលោកឡុង សំណាង អធិការស្រុកបន្ទាយស្រី បានប្រាប់ឱ្យដឹងនៅថ្ងៃទី០២ ខែកញ្ញា ថា៖ ពិតជាមានការឃាត់មនុស្សចំនួន ៦នាក់ ពិតប្រាកដមែន នៅចំណុចប៉ុស្តិ៍ហាមឃាត់ មុខដីចម្ការ លោក ខឹម វាសនា ក្នុងឃុំត្បែង ស្រុកបន្ទាយស្រី កាលពីល្ងាចថ្ងៃទី០១ ខែកញ្ញា ក្រោមការដឹកនាំបញ្ជាផ្ទាល់ពីព្រះរាជអាជ្ញានៃអយ្យការ អមសាលាដំបូងខេត្តសៀមរាប។

មនុស្សទាំង ៦ នាក់ ដែលឃាត់ខ្លួនក្នុងនោះមាន៖ ទី១ /ឈ្មោះ ឈិត ស្រីឡាង,។ ទី២ /ឈ្មោះ ថុង ដារ៉ាស៊ី ។ ទី៣/ឈ្មោះ អ៊ី សូជីង។ ទី៤ ឈ្មោះ ជុំ ខុម,។ ទី៥/ ឈ្មោះ ភួង សម្ភស្សបូផា និង ទី៦/ ឈ្មោះ កូវ ឡោ ។ អ្នកទាំង៦នាក់ ត្រូវបានបញ្ជូនមកកាន់ការិ យាល័យ នគរបាលព្រហ្មទណ្ឌកម្រិតធ្ងន់ នៃស្នងការនគរបាលខេត្តសៀមរាប កាល ពីល្ងាចថ្ងៃទី១ ខែកញ្ញា ឆ្នាំ២០២២។

លោក អធិការស្រុកបន្ទាយស្រី បានបញ្ជាក់ទៀតថា ការឃាត់ខ្លួន គឺមនុស្សស្រីទាំង ៦នាក់ បានជិះរថយន្តរួមគ្នាដឹកបន្លែចូលតំបន់ហាមឃាត់ ហើយជននោះបានជិះរថយន្តទៅបុកបារ៉ាស់របស់សមត្ថកិច្ច បាក់អស់ ២កន្លែងថែមទៀតផង។ ក្រោយមកបានប្រើហិង្សាមកលើសមត្ថកិច្ច ថែមទាំងធ្វើការរេរាំងក្នុងប្រតិបត្តិការរបស់សមត្ថកិច្ច ថែមទាំងជេរទៀតផង ទើបសមត្ថកិច្ចអនុវត្តវិធានការច្បាប់៕SRP

ខេត្តកំពង់ចាម៖ក្នុងឱកាសអញ្ជើញចុះពិនិត្យស្ថានភាពស្រូវប្រជាកសិករនៅថ្ងៃទី១ ខែកញ្ញា ឆ្នាំ២០២២នេះ លោក អ៊ុន ចាន់ដា អភិបាលខេត្តកំពង់ចាម បានបញ្ជាឲ្យមន្ត្រីពាក់ព័ន្ធ និងអាជ្ញាធរមូលដ្ឋាន ប្រេីប្រាស់គ្រឿងចក្រ កាយសម្រួលផ្លូវទឹក ដេីម្បីសង្គ្រោះស្រូវប្រជាពលរដ្ឋ ដែលកំពុងរងការលិចលង់ដោយជំនន់ទឹកភ្លៀង ប្រមាណជាង៣០ហិកតា នៅភូមិពង្រ ឃុំស្តេីងជ័យ ស្រុកជើងព្រៃ។

ចុះពិនិត្យស្ថានភាពស្រូវប្រជាកសិករ លោក អ៊ុន ចាន់ដា ក៏បានជំរុញដល់មន្ត្រីពាក់ព័ន្ធ ឲ្យសហការគ្នាធ្វើយ៉ាងណា ត្រូវជួយសង្គ្រោះដំណាំស្រូវប្រជាពលរដ្ឋ ឲ្យបានទាន់ពេលវេលា ចៀសវាងការត្រាំក្នុងទឹកយូរអង្វែង ដែលអាចរងការខូចខាតធ្ងន់ធ្ងរ ពោលគឺត្រូវសហការជាមួយម្ចាស់អាហារដ្ឋាន មហាលាភ ដេីម្បីកាយពង្រីកមុខលូ ផ្នែកខាងក្រោម ឲ្យបានធំទូលាយ និងជ្រៅជាងមុន កុំមានការលិចលង់នៅឆ្នាំក្រោយបន្តទៀត គឺត្រូវធ្វើការរំដោះជំនាន់ទឹកភ្លៀងនេះឲ្យបានជោគជ័យផងដែរ។

បើតាម លោក ប្រាក់ សារុំ មេឃុំស្ដើងជ័យ បានឲ្យដឹងថា ដំណាំស្រូវរបស់ប្រជាពលរដ្ឋ ប្រមាណជា ៣១ហិកតា ដែលកំពុងទទួលរងការលិចលង់ដោយជំនន់ទឹកភ្លៀង មានរយៈពេលជាង១០ថ្ងៃមកហេីយ ចំពោះកិច្ចអន្តរាគមន៍ ពីសំណាក់ឯកឧត្ដមអភិបាលខេត្តនាពេលនេះ គឺអាចជួយសង្គ្រោះបានប្រមាណជា ៧០%។ ជំនួសមុខឲ្យបងប្អូនប្រជាពលរដ្ឋ ក្នុងភូមិពង្រ ទាំងជាង ១០០គ្រួសារ លោក មេឃុំស្តើងជ័យ ក៏បានថ្លែងអំណរគុណ ចំពោះ ឯកឧត្តម អ៊ុន ចាន់ដា អភិបាលខេត្តកំពង់ចាម និងក្រុមការងារទាំងអស់ ដែលបានអញ្ជើញចុះអន្តរាគមន៍ ដោយផ្ទាល់ ដើម្បីជួយសង្គ្រោះដំណាំស្រូវ របស់ប្រជាកសិករយើង៕SRP

Sponsored

ខេត្តសៀមរាប៖គណបក្សសម្ព័ន្ធដើម្បីប្រជាធិបតេយ្យ LDP របស់ លោក ខឹម វាសនា បានឲ្យដឹងថា នឹងបន្តការជួបជុំសមាជិកបក្សរបស់ខ្លួន នឹងត្រូវបន្តរហូតដល់ដំណាច់ខែកញ្ញា ឆ្នាំ២០២២។

យោងតាមលិខិតរបស់គណបក្ស LDP ប្រចាំខេត្តសៀមរាប គោរពជូនអភិបាលខេត្តសៀមរាប នៅពីថ្ងៃទី៣០ ខែសីហា ឆ្នាំ២០២២នេះ បានលើកឡើងថា គណបក្សសម្ព័ន្ធដើម្បីប្រជាធិបតេយ្យ បានប្រារព្ធកម្មវិធីជួបជុំសមាជិកគណបក្ស ស្ថិតក្នុង បរិវេណចម្ការ នៅភូមិថ្មជល់ ឃុំត្បែង ស្រុកបន្ទាយស្រី ខេត្តសៀមរាប។ ចំពោះការជួបជុំនេះ គណបក្សបានសហការ យ៉ាងជាប់លាប់ជាមួយអាជ្ញាធរមូលដ្ឋាន ហើយបានដាក់លិខិតជូនដំណឹងទៅរដ្ឋបាលឃុំត្បែងដើម្បីជ្រាបជាដំណឹង កាលពីថ្ងៃទី២៧ ខែសីហា ឆ្នាំ២០២២ និងបានអនុញ្ញាតឱ្យសមត្ថកិច្ចអាចចេញចូលដើម្បីត្រួតពិនិត្យក្នុងបរិវេណទី តាំងជួបជុំរាល់ពេលវេលា។

សម្រាប់ការជួបជុំនេះ គណបក្សបានរៀបចំរក្សាសណ្តាប់ធ្នាប់យ៉ាងមានរបៀបរៀបរយ ហើយរក្សាអនាម័យបានល្អ និងបានអនុវត្តតាមវិធានការចុងក្រោយ របស់ក្រសួងសុខាភិបាលអំពីការការពារពីការឆ្លងជំងឺកូវីដ-១៩។ ចំពោះសំណង់នានាក្នុងបរិវេណចម្ការដែលជាកម្មសិទ្ធិស្របច្បាប់ គ្រាន់តែជាសំណង់ស្រាល សម្រាប់សម្រាកក្នុងរយៈពេលខ្លី ពុំមែនជាសំណង់រឹងមាំឡើយ ហើយរយៈពេលនៃការជួបជុំរបស់គណបក្សក្នុងបរិវេណចម្ការនេះ បានបញ្ជាក់ច្បាស់លាស់ ក្នុងលិខិតជូនដំណឹងទៅរដ្ឋបាលឃុំតែ្បង រួចរាល់ហើយ គឺនឹងបញ្ចប់នៅដំណាច់ខែកញ្ញា ឆ្នាំ២០២២។ គណបក្សសម្ព័ន្ធដើម្បីប្រជាធិបតេយ្យ គឺជាគណបក្សនយោបាយស្របច្បាប់ មានប្រកាសទទួល ស្គាល់ជាផ្លូវការពីក្រសួងមហាផ្ទៃ ដូច្នេះការជួបជុំសមាជិករបស់គណបក្សដែលបានធ្វើមកនេះ ពុំមានអ្វីដែលផ្ទុយនឹងច្បាប់នៃព្រះរាជាណាចក្រកម្ពុជាឡើយ។

បើទោះបីជាមានលិខិតជូនដំណឹងនេះក្តី អាជ្ញាធរខេត្តសៀមរាប នៅមិនទាន់ឆ្លើយតបយ៉ាងណានៅឡើយនោះទេ។ ប៉ុន្តែនៅរសៀលថ្ងៃទី៣០ ខែសីហានេះ អភិបាលស្រុកបន្ទាយស្រី លោក ឃឹម ហ្វីណង់ មានប្រសាសន៍ប្រាប់អ្នកសារព័ត៌មានថា រហូតមកដល់រសៀលថ្ងៃទី៣០ ខែសីហានេះ លោកនៅមិនទាន់ឃើញក្រុមប្រជាពលរដ្ឋ ដែលមកជួបជុំគ្នានោះ បានរុះរើដើម្បីរំសាយ ឬក៏មានបំណងចាកចេញពីកន្លែងជួបប្រជុំនៅឡើយទេ។ អាជ្ញាធរស្រុកបន្ទាយស្រី បានដាក់បញ្ជារយ៉ាងតឹងតែង នៅរសៀលថ្ងៃនេះ ដោយមិនអនុញ្ញាតឱ្យក្រុមអ្នកលក់ដូរចំណីអាហារ ឬក៏របស់របរប្រើប្រាស់ទាំងឡាយអាចចូលទៅលក់ ដែលជាហេតុអាចនាំឱ្យទ្រង់ទ្រាយ នៃការជួបប្រជុំនោះ កាន់តែរីកធំនោះទេ។

សូមជម្រាបថាតាំងពីទៀបភ្លឺថ្ងៃទី៣០ ខែសីហា សមត្ថកិច្ចចម្រុះដែលមានកម្លាំងនគរបាល កងរាជអាវុធហត្ថ និងទាហានផង បានរាយបណ្ដាក់នៅលើដងផ្លូវសំខាន់ៗ ចំនួន៥កន្លែង។ ការដាក់ពង្រាយកម្លាំងសមត្ថកិច្ចនោះ គឺគោលបំណងរារាំងអ្នកចំណូលថ្មីទាំងអស់ មិនឱ្យចូលទៅកាន់តំបន់ជួបប្រជុំបានទៀតទេ ប៉ុន្តែសម្រប់អ្នកដែលចង់ចាកចេញ គឺសមត្ថកិច្ចអនុញ្ញាត។

សូមបញ្ជាក់ថា ចាប់ពីថ្ងៃទី២៣ ខែសីហា លោក ខឹម វាសនា មេបក្សសម្ព័ន្ធដើម្បីប្រជាធិបតេយ្យ បានសរសេរនៅលើបណ្ដាញសង្គម ហ្វេសប៊ុករបស់ខ្លួនថា តាមការធ្វើវិបស្សនារបស់លោកឃើញថា ភពផែនដីនឹងត្រូវជន់លិចនៅពេលខាងមុខ ហើយលោកអំពាវនាវឲ្យអ្នកដែលគាំទ្រទៅជួបជុំគ្នានៅលើដីចំការរបស់លោក ឯជើងភ្នំគូលែន នៃខេត្តសៀមរាប ទើបអាចរួចផុតពីគ្រោះមហន្តរាយនេះ។ បន្ទាប់ពីការសរសេរលើបណ្ដាញសង្គមរបស់មេបក្សរូបនោះមក ក៏មានពលរដ្ឋជិត ២ម៉ឺននាក់ បាននាំក្រុមគ្រួសារធ្វើដំណើរខ្លះតាមរថយន្ត ខ្លះតាមម៉ូតូ ទៅកាន់តំបន់ជើងភ្នំគូលែន។ ចំណែកពលករខ្មែរខ្លះ ដែលកំពុងធ្វើការនៅក្រៅប្រទេស ក៏ប្រញាប់ប្រញាល់វិលត្រឡប់មកកម្ពុជា ដោយបោះបង់ការងាររបស់ខ្លួនដែរ។

អភិបាលខេត្តសៀមរាប លោក ទៀត សីហា នៅថ្ងៃទី២៩ ខែសីហា បានសរសេរលិខិតមួយផ្ញើជូន លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ ដោយក្នុងលិខិតនោះបញ្ជាក់ថា ការជួបជុំនេះពុំបានសុំកិច្ចសហការ និងមានការអនុញ្ញាតពីអាជ្ញាធរមានសមត្ថកិច្ចឡើយ និងបានធ្វើឱ្យប៉ះពាល់ដល់សន្តិសុខ សណ្តាប់ធ្នាប់សាធារណៈ បរិស្ថាន អនាម័យ និងវិធានការបង្កាប់ស្កាត់ជំងឺកូវីដ-១៩។ ដូច្នេះ ដើម្បីកុំឱ្យការប្រមូលផ្តុំ ការជួបជុំ និងការបោះតង់ស្នាក់នៅខាងលើ ធ្វើឱ្យប៉ះពាល់ដល់អនាម័យ បរិស្ថាន ការរីករាលដាលនៃការឆ្លងជំងឺកូវីដ-១៩ និងសុខុមាលភាពរបស់ក្មេង ចាស់ជរា បងប្អូនប្រជាពលរដ្ឋ រដ្ឋបាលខេត្តសៀមរាប សុំឱ្យបញ្ឈប់ការប្រមូលផ្តុំ និងរំសាយការជួបជុំ ចាប់ពីថ្ងៃទី៣០ ខែសីហា ឆ្នាំ២០២២ វេលាម៉ោង ២៤៖០០នាទីយប់ និងរាល់សំណង់ដែលបានសាងសង់ ត្រូវដាក់ពាក្យស្នើសុំអនុញ្ញាតពីអាជ្ញាធរ។ បើទោះបីជាមានលិខិតព្រមានពីអាជ្ញាធរខេត្តសៀមរាប ក៏ដោយក៏រហូតមកដល់ពេលនេះ គេមិនទាន់ឃើញមានការឆ្លើយតប ពីលោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ យ៉ាងណានៅឡើយទេ។ តាមព័ត៌មានចុងក្រោយ ឱ្យដឹងថាគណបក្សសម្ព័ន្ធប្រជាធិបតេយ្យ មិនមានគំរោងរំសាយការជួបប្រជុំនេះនៅឡើយទេ ដោយគេបានដាក់ពាក្យស្នើសុំទៅអាជ្ញាធរឃុំត្បែង របស់ស្រុកបន្ទាយស្រី ដើម្បីសុំបន្តការជួបប្រជុំគ្នា រហូតដល់ខែកញ្ញាខាងមុខ៕SRP

ខេត្តសៀមរាប៖ស្ត្រីម្នាក់បានទះកំភ្លៀងទៅលើ ស្ត្រីម្នាក់ទៀត ខណ:មន្ត្រីចុះស្រង់ព័តមាន ក្បាលដី របស់ប្រជាពលរដ្ឋ ១៦ “ករណីនេះ ជនរងគ្រោះ សម្រេចប្ដឹងទាមទារសំណង១០០លានរៀល”។

ជនរងគ្រោះមានឈ្មោះពេជ្រ សាលី ភេទស្រី អាយុ៤៦ឆ្នាំ រស់នៅភូមិប្រិយ៍ថ្មី សង្កាត់ទឹកវិល ក្រុងសៀមរាប។ ចំណែកជនសង្ស័យដែលរងការបណ្ដឹង ឈ្មោះ យីង សុភាព ភេទស្រី ។

ក្រោយពីមានករណីហិង្សាបែបនេះ ស្ត្រី ដែលជាជនសង្ស័យ ឈ្មោះ យីង សុភាព មិនត្រូវបានសមត្ថកិច្ចឃាត់ខ្លួននោះទេ គ្រាន់ហៅមកសាកសួរនៅប៉ុស្តិ៍រដ្ឋបាលនគរបាលសង្កាត់ទឹកវិល ហើយឲ្យត្រឡប់ទៅវិញ។

ហេតុការណ៍អំពើហិង្សា នៅផ្សារទឹកវិល ភូមិប្រិយ៍សង្កាត់ទឹកវិល ក្រុងសៀមរាប ខេត្តសៀមរាប នៅព្រឹកថ្ងៃ ទ៏២៨ ខែសីហា ឆ្នាំ២០២២ ខណ:មន្ត្រីចុះស្រង់ព័តមានក្បាលដី របស់ប្រជាពលរដ្ឋ ១៦ គ្រួសារនៅផ្សារទឹកវិល។

បន្ទាប់ពីកើតហេតុ ជនរងគ្រោះឈ្មោះ ពេជ្រ សាលី បានទៅប្ដឹងនៅរដ្ឋបាលសង្កាត់ទឹកវិល ដើម្បីឲ្យនគរបាលជួយអន្តរាគមន៍ផងដែរ។

សុំបញ្ជាក់ថាទីតាំងដីខាងលើ មានផ្ទះ១៦ គ្រួសារ ដែលមានឯកសារត្រឹមត្រូវតាមច្បាប់ ហើយក្រុមការងារបានចុះវាស់វែងក្បាលដី ដើម្បីយកព័ត៌មាន ប៉ុន្តែត្រូវបានស្ត្រី ឈ្មោះ យីង សុភាព និងបក្សពួក មកប្រាប់ក្រុមមការងារបានចុះវាស់វែងក្បាលដី ថា ក្បាលដីទាំង១៦ គ្រួសារនេះ ជាដីកំពុងមានទំនាស់ទៅវិញ។

ជុំវិញការលើកឡើងរបស់ភាគី ១៦ គ្រួសារ ភាគីខាង ឈ្មោះ យីង សុភាព បានប្រាប់ទីភ្នាក់ងារសារព័ត៌មានសៀមរាបប៉ុស្ដិ៍ tvonline ថា គ្រួសាររបស់ខ្លួន មិនបានធ្វើការរារាំងមន្ត្រីឲ្យមិនចុះវាស់វែងយកព័ត៌មានក្បាលដីខាងលើនោះទេ គ្រាន់តែប្រាប់ថាដីខាងលើកំពុងមានទំនាស់នឹងប្ដឹងផ្ដល់គ្នានៅស្ថាប័នតុលាការ។

ទោះជាយ៉ាងណាភាគីប្រជាពលរដ្ឋ ទាំង ១៦ គ្រួសារ
បានបញ្ជាក់ថា ដីរបស់ពួកគេមានឯកសារត្រឹមត្រូវនិងមានលិខិតពីសាលាកំពូល បញ្ជាក់ថា សាលដីកានេះបានចូលជាស្ថាពរ និងមានអានុភាពអនុវត្ត ចាប់ពីថ្ងៃទី ៣១ ខែមីនា ឆ្នាំ២០២២។ នេះបើតាមប្រភពពីប្រជាពលរដ្ឋប្រាប់ ទីភ្នាក់ងារសារព័ត៌មានសៀមរាបប៉ុស្ដិ៍។

រហូតដល់ព្រឹកថ្ងៃទី ២៩ ខែសីហាឆ្នាំ ២០២២ នេះ ទីភ្នាក់ងារសារព័ត៌មានសៀមរាបប៉ុស្តិ៍ tv online នៅមិនទាន់ទទួលបានការបំភ្លឺ ពីឈ្មោះ យីង សុភាព នៅឡើយទេ។

តាមប្រភពព័ត៌មានបន្តថា មូលហេតុដែលនាំឲ្យកើតមានអំពើហិង្សា គឺស្ត្រី ជនសង្ស័យនិងស្ត្រីរងគ្រោះបានប្រកែកគ្នា នៅទីតាំងដែលមន្ត្រីចុះវាស់វែងដីដើម្បីយកព័ត៌មានក្បាលដី ហើយក៏ឈានដល់ការប្រើប្រាស់ហិង្សាតែម្ដង។ ករណីនេះគ្រួសារខាងជនរងគ្រោះ បានប្ដឹងទាមទារសំណង១០០លានរៀល និងសុំអោយផ្តន្ទាទោសជនល្មើសតាមច្បាប់ជាធរមាន។

នាយប៉ុស្តីស្ដីទីសង្កាត់ទឹកវិលបានប្រាប់សារព័ត៌មានសៀមរាប ប៉ុស្ដិ៍ តាមទូរស័ព្ទថា ករណីខាងលើមិនបានឃាត់ខ្លួនស្ត្រីនោះទេគ្រាន់តែហៅមកសាកសួរ ហើយទទួលពាក្យបណ្ដឹងបញ្ជូនទៅថ្នាក់លើ។ សំឡេងនាយប៉ុស្តិ៍ស្ដីទីសង្កាត់ទឹកវិល៖

បើតាមនាយប៉ុស្ដិ៍ស្ដីទី ថា ស្ត្រីដែលរងការចោទប្រកាន់បានប្រើអំពើហិង្សារនោះ ពិតជាបានទះកំភ្លៀងទៅលើស្ត្រីម្នាក់ទៀតប្រាកដមែន៕SRP

ខេត្តសៀមរាប៖មនុស្សពីរនាក់បានស្លាប់បាត់បង់ជីវិតដោយសារគ្រោះថ្នាក់ចរាចរណ៍ពីរផ្សេងគ្នា។

អាជ្ញាធរខេត្តសៀមរាប បានប្រាប់ភ្នាក់ងារសារព័ត៌មានសៀមរាបប៉ុស្តិ៍ ថា ករណីទីមួយ នៅវេលាម៉ោង ១៤និង០០នាទី ថ្ងៃទី២៨ ខែសីហា ឆ្នាំ២០២២ ស្ថិតនៅភូមិគោកត្រុំ ឃុំស្រណាល ស្រុកក្រឡាញ់ ខេត្តសៀមរាប លើផ្លូវលេខ ៦ ត្រង់ចំណុចចន្លោះគីឡូម៉ែត្រលេខ 360និង361 មានរថយន្ដដឹកដីមួយគ្រឿងម៉ាក Hyundai ពណ៌ខៀវ គ្មានផ្លាកលេខ បើកបរដោយឈ្មោះ មិនស្គាល់អត្តសញ្ញាណ បើកបរក្នុងទិសដៅពីលិចទៅកើត បានបុករថយន្តមួយគ្រឿង ម៉ាក TOYOTA CAMRY ពាក់ផ្លាកលេខ សៀមរាប 2A.5147 បើកបរដោយឈ្មោះ សោភ័ណ រតនះ ភេទប្រុស អាយុ36ឆ្នាំ រស់នៅភូមិត្រពាំងច្រាំង ឃុំក្រឡាញ់ ស្រុកក្រឡាញ់ ខេត្តសៀមរាប បើកពីកើតទៅលិចបណ្ដាលឲ្យស្លាប់។ បើកគោយន្តកៃច្នៃដឹកដីបានចុះរត់គេចខ្លួនពីកន្លែងកើតហេតុបាត់។ ករណីនេះខូចរថយន្តធ្ងន់ ១គ្រឿង និងរថយន្តច្នៃដឹកដី ស្រាល មួយគ្រឿង។ មូលហេតុគ្រោះថ្នាក់ចចរាចរណ៍បណ្តាលមកពី អ្នកបើកបរថយន្តទាំងពីរបើកបរមានល្បឿនលឿន។

ករណីទី២នៅម៉ោង១៨និង ៤០ ថ្ងៃទី ២៧ ខែសីហា ឆ្នាំ២០២២ នៅលេីកំណាត់ផ្លូវក្រាលកៅស៊ូ ស្ថិតក្នុងភូមិត្រពាំងស្វាយ ឃុំរើល ស្រុកពួក ម៉ូតូ ម៉ាកហុងដាឌ្រីម ពណ៌ខ្មៅ ពាក់ស្លាកលេខ សៀមរាប 1AF-9600 បុកនិងគោយន្តកន្ត្រៃ ម៉ាកគូប៊ូតា ពណ៌ក្រហមដឹកឈើ បណ្តាលឲ្យស្លាប់ ឈ្មោះ វឿន ម៉ៃជូ ភេទប្រុស អាយុ ១៩ឆ្នាំ រស់នៅភូមិទន្លេស ឃុំនគរភាស ស្រុកអង្គរជុំ។

មូលហេតុ អ្នកបើកបរគោយន្តកន្ត្រៃ បត់ឆ្វេងខ្វះការប្រុងប្រយ័ត្ន ទើបបណ្តាលឲ្យកើតមានគ្រោះថ្នាក់កើតឡើង។

ក្រោយពេលកើតហេតុ អ្នកបើកបរគោយន្តកន្ត្រៃបានរត់គេចខ្លួនបាត់ុំ ចំណែកវត្ថុតាងសមត្ថកិច្ច រក្សាទុកនៅប៉ុស្តិ៍នគរបាលរដ្ឋបាល ឃុំរើល ដើម្បីអនុវត្តន៍បន្តតាមនីតិវិធី៕SRP

ខេត្តសៀមរាប៖ក្រុមក្មេងទំនើង២ក្រុមបានចូលផឹកស៊ី នៅហាងសែនត្រជាក់២ ចេញមកវិញដេញកាប់ចាក់គ្នានៅផ្លូវជន្លង់ បណ្ដាលឱ្យរងរបួស ត្រូវបានឃាត់ខ្លួនមនុស្សចំនួន ៦នាក់។

ប្រភពពីសមត្ថកិច្ចនគរបាលបានដឹងថា ការឃាត់ខ្លួនធ្វើឡើង នៅថ្ងៃទី ២៧ ខែសីហា ឆ្នាំ២០២២ ដោយកម្លាំងការិយាល័យនគរបាលព្រហ្មទណ្ឌកម្រិតធ្ងន់។ ចំណែកករណីហិង្សា កើតឡើងនៅយប់ ឈានចូលថ្ងៃទី២៦ ខែសីហា ឆ្នាំ២០២២ នៅចំណុចភូមិជន្លង់ សង្កាត់ សាលាកំរើក ក្រុងសៀមរាប។

ជនសង្ស័យទាំងទាំង៦នាក់ដូចខាងក្រោម៖

១. ឈ្មោះ ហ៊ឹម ដាលីន ភេទប្រុស អាយុ ១៩ឆ្នាំ មុខរបរៈ កម្មករដឹកទឹកក រស់នៅភូមិបន្ទាយចាស់ សង្កាត់ស្លក្រាម ក្រុងសៀមរាប។

២.ឈ្មោះ សេង សូធីសី ភេទប្រុស អាយុ ២២ឆ្នាំ មុខរបរៈ មិនពិតប្រាកដ រស់ភូមិបន្ទាយចាស់ សង្កាត់ស្លក្រាម ក្រុងសៀមរាប។

៣.ឈ្មោះ ចេវ ទី ភេទប្រុស អាយុ ១៧ឆ្នាំ មុខរបរៈ គ្មាន រស់នៅភូមិបន្ទាយចាស់ សង្កាត់ស្លក្រាម ក្រុងសៀមរាប។

៤.ឈ្មោះ តឹក ប៉េងលាង ភេទប្រុស អាយុ ១៧ឆ្នាំ មុខរបរៈ គ្មាន រស់នៅភូមិវត្តដំណាក់ សង្កាត់សាលាកំរើក ក្រុងសៀមរាប។

៥.ឈ្មោះ វ៉ង ស៊ីនដាវីត ភេទប្រុស អាយុ ១៨ឆ្នាំ មុខរបរៈ គ្មាន រស់នៅភូមិសាលាកន្សែង សង្កាត់ស្វាយដង្គំ ក្រុងសៀមរាប។

៦.ឈ្មោះ ផាន បូរី ភេទប្រុស អាយុ ១៨ឆ្នាំ មុខរបរៈ គ្មាន រស់នៅភូមិសាលាកន្សែង សង្កាត់ស្វាយដង្គំ ក្រុងសៀមរាប។

គូរបញ្ជាក់ថាកាលពីវេលាម៉ោង ១៩ ថ្ងៃទី២៥ ខែសីហា ឆ្នាំ២០២២ ឈ្មោះ ចិន ត្រា ភេទប្រុស អាយុ ២៦ឆ្នាំ បានបើកម៉ូតូរបស់ខ្លួនម៉ាកទ្រីម ទៅឌុបឈ្មោះ ហ៊ូវ រាក់ ហៅនឿម ភេទប្រុស អាយុ១៩ឆ្នាំ និងឈ្មោះ ប៉ុច ធី ភេទប្រុស អាយុ២៧ឆ្នាំ ចេញពីផ្ទះនៅភូមិបុស្សក្រឡាញ់ សង្កាត់ជ្រាវ ក្រុងសៀមរាប ទៅលេងនៅផ្លូវ៦០ម៉ែត្រ។ លុះដល់ម៉ោង២១ពួកគេទាំង ៣នាក់ បានចូលទៅផឹកស៊ីនៅ ហាងសែនត្រជាក់២ ស្ថិតនៅភូមិជន្លង់ ដោយចូលទៅអង្គុយនៅកញ្ចុះ លេខ២ រហូតដល់ម៉ោង ២៣និង០០នាទី ក៏មានមនុស្សប្រុសមួយក្រុមទៀត មានគ្នា ៥នាក់ បានចូលទៅផឹកស៊ីក្នុងហាងខាងលើដែរ អង្គុយកញ្ចុះលេខ១ ជាប់និងកញ្ចុះរបស់ជនរងគ្រោះ។ ចន្លោះពេលនៃការផឹកស៊ី ក៏មានទំនាស់គ្នាដោយ ក្រុមជនបង្ក បានសម្លឹងមុខ ស្រែកជេរឌឺដងទៅលើក្រុមជនរងគ្រោះ ហើយនៅពេលជនរងគ្រោះ ដើរទៅបន្ទប់ទឹក ក្រុមជនបង្កស្រែកសួរថា “មើលមុខអញ់ចង់យ៉ាងម៉េច?” ជនរងគ្រោះក៏តបវិញថា “អញ់មើលក៏បាន វាថីឯង?” លុះដល់ម៉ោង២ និង០០នាទី រំលងអាធ្រាត ឈានចូលថ្ងៃទី២៦ ខែសីហា ឆ្នាំ២០២២ ហាងដល់ម៉ោងបិទក្រោយពេលគិតលុយហើយឈ្មោះ ចិន ត្រា បានបើកម៉ូតូឌុបមិត្តភ័ក្ក្រ ក្នុងគោលបំណងទៅផ្ទះនៅភូមិបុស្សក្រឡាញ់ ពេលបើកហួសផ្លូវបំបែក ស្តុបជន្លង់ ក៏បើកត្រឡប់មកហាងផឹកស៊ីខាងលើវិញ ដើម្បីរកគូរទំនាស់ ពេលនោះស្រាប់តែឃើញក្រុមគូរទំនាស់ទាំង៥នាក់ ជិះម៉ូតូ៣គ្រឿង មានម៉ាកទ្រីមសង ពណ៌ខ្មៅ ២គ្រឿង និងម៉ាក់ខ្លិចពណ៌ស ១គ្រឿង ក្នុងចំណោមពួកគេ មានម្នាក់ អង្គុយក្រោយប្រដាប់ដោយកាំបិតខ្វែវ បើកសំដៅមកពួកខួន ភ្លាមនោះជនរងគ្រោះ បានបត់ម៉ូតូ ហើយបើកយ៉ាងលឿនទៅទិសខាងកើត ដើម្បីគេចខ្លួន ជិតដល់ស្តុបជន្លង់ក៏បើកឡើងឃឿនចិញ្ចើមផ្លូវបណ្តាលឲ្យដួលម៉ូតូ ហើយក្រុមជនបង្កបាន កាប់ទៅលើជនរងគ្រោះឈ្មោះ ប៉ុច ធី ត្រូវត្រង់ចង្កះ១កាំបិតខ្វែវ បន្ទាប់មកគេចខ្លួនបាត់។

ក្នុងករណីគ្រោះថ្នាក់នេះុំបណ្តាលឲ្យជនរងគ្រោះឈ្មោះ ហ៊ូវ រាក់ ហៅនឿម រងរបួសបាក់ភ្លៅខាងស្តាំ, បាក់ឆ្អឹងស្នងជើងខាងឆ្វេង និងដាច់រលាត់ត្រង់កែងដៃខាងស្តាំ។ ចំណែកជនរងគ្រោះឈ្មោះ ចិន ត្រា រងរបបួសបាក់ភ្លៅខាងឆ្វេង និងដាច់រលាត់ជើងខាងស្តាំ ក្រោយពេលធ្វើសកម្មភាពហើយ ក្រុមជនសង្ស័យ បានគេចខ្លួនបាត់។

ជនសង្ស័យ បានឆ្លើយសារភាពថាពួកខ្លួននិងបក្សពួក ពិតជាបានធ្វើសកម្មភាព ករណីខាងលើនេះ ពិតប្រាកដមែន។ បច្ចុប្បន្ន ជនសង្ស័យត្រូវបានកម្លាំងជំនាញរៀបចំសុំណុំរឿង បញ្ជូនទៅតុលាការ ចាត់ការទៅតាមផ្លូវច្បាប់៕SRP