ខេត្តកំពង់ចាម – Page 64

ខេត្តកំពង់ចាម៖ក្នុងឱកាសបេីកសន្និបាតបូកសរុប ការងារអប់រំ យុវជន និងកីឡា ខេត្តកំពង់ចាម នៅថ្ងៃទី២៣ ខែមិថុនា ឆ្នាំ២០២២នេះ លោក អ៊ុន ចាន់ដា អភិបាលខេត្តកំពង់ចាម បានស្នេីដល់មន្ទីរអប់រំខេត្ត ឲ្យជម្រុញធ្វើយ៉ាងណាឲ្យយុវជនយេីង ក្នុងម្នាក់ៗ យ៉ាងតិច ត្រូវមានជំនាញឯកទេសមួយច្បាស់លាស់ ដេីម្បីងាយស្រួលក្នុងការរកការងារប្រកបមុខរបរចិញ្ចឹមជីវិត។

ឆ្លៀតក្នុងឱកាសនោះអភិបាល ខេត្តកំពង់ចាម បានសំណូមពរដល់មន្ទីរអប់រំខេត្ត ធ្វើយ៉ាងណាត្រូវលេីកកម្ពស់ថែមទៀតនូវគុណភាពអប់រំ នៅគ្រប់ភូមិសិក្សា ដោយយកចិត្តទុកដាក់ ជាពិសេស ការអនុវត្តកម្មវិធីសាលាកុមារមេត្រី ដើម្បីបណ្តុះបណ្តាល យុវវ័យជំនាន់ក្រោយប្រកបដោយ សមត្ថភាពរីកចម្រើន និងពង្រឹង-ពង្រីកថែមទៀតនូវបរិមាណអប់រំ ដោយយកចិត្តទុកដាក់ ក្នុងការប្រមូល កុមារដល់វ័យសិក្សា ឲ្យចូលរៀន ជាពិសេសកុមារ ដែលជួបការលំបាក និងកុមារ ជនជាតិភាគតិច ក៏ដូចជាកុមារពិការ ឲ្យមានឱកាស បានចូលរៀនគ្រប់ៗគ្នា។ ព្រមទាំងបន្តការលើកកម្ពស់សមត្ថភាព គ្រូបង្រៀន ពង្រឹងការងារគ្រប់គ្រង ការពិនិត្យតាមដាន និងវាយតម្លៃផ្សារភ្ជាប់នឹង ការបណ្តុះបណ្តាលធនធានមនុស្ស សម្រាប់បន្តវេន និងការពង្រាយគ្រូ ទៅកន្លែង ដែលខ្វះគ្រូ ឲ្យបានសមស្របផងដែរ។

បេីតាមលោក លី ម៉េងសាន ប្រធានមន្ទីរអប់រំ យុវជន និងកីឡាខេត្តកំពង់ចាម បានលេីកឡេីងថា គិតត្រឹមឆ្នាំសិក្សា២០២០ -២០២១ យើងមានសាលាមត្តេយ្យសិក្សា ៤៦៣សាលា ក្នុងនោះ មត្តេយ្យសិក្សារដ្ឋ ២៨៩កន្លែង (មត្តេយ្យសិក្សាដាច់ដោយឡែក ០៦កន្លែង) មត្តេយ្យសិក្សាឯកជន ១៤កន្លែង និងមត្តេយ្យសិក្សាសហគមន៍ ១៦៧កន្លែង សាលាបឋមសិក្សា ៤០៩កន្លែង (សាលាបឋមសិក្សា ឯកជន ០៥កន្លែង) អនុវិទ្យាល័យ ៨១កន្លែង និងវិទ្យាល័យ ៤៣កន្លែង (វិទ្យាល័យធនធាន ០២កន្លែង និងវិទ្យាល័យអប់រំពិសេស ០១កន្លែង)។ ដោយសម្តេចហ៊ុន សែន និងសម្តេចកិត្តិព្រឹទ្ធបណ្ឌិត បានសាងសង់អគារសិក្សាបានចំនួន ៣៧៣ខ្នង ស្មើ ២,៣៥០បន្ទប់ (កើន ១៥ខ្នង ស្មើ ១៨៩បន្ទប់)៕SRP

ខេត្តកំពង់ចាម៖សត្វខ្យងមាស ឬខ្យងថៃ កំពុងតែមានទីផ្សារនាំចេញទៅលក់នៅប្រទេសវៀតណាម ខណៈប្រភេទខ្យងនេះតែងតែបំផ្លិចបំផ្លាញ នូវផលដំណាំស្រូវ របស់កសិកផងដែរ។

បេីតាមឈ្មួញកណ្ដាលម្នាក់ឈ្មោះ វណ្ឌី ភេទប្រុស អាយុ៣៣ឆ្នាំ រួមនឹងប្រពន្ធ រស់នៅក្នុងភូមិរអាងលេី ឃុំរអាង ស្រុកកំពង់សៀម ខេត្តកំពង់ចាម បានឲ្យដឹងថា៖ គាត់បានប្រកបមុខរបរទិញ-លក់ ខ្យងមាស ឬខ្យងថៃនេះឡេីងវិញមួយរយៈពេលខ្លីប៉ណ្ណោះ បន្ទាប់ពីជម្ងឺកូវីដ-១៩ ត្រូវបានស្ងប់ស្ងាត់ និងមានការបេីកច្រកព្រំដែនឡេីងវិញ ។

ឈ្មួញកណ្ដាលរូបនេះ បានបន្តថា សម្រាប់ការប្រកបមុខរបរនេះ គឺគាត់ត្រូវជិះម៉ូតូរឺម៉កដើរប្រមូលទិញពីអ្នកភូមិជិតៗ ក្នុងនោះក៏មានអ្នកភូមិមួយចំនួនទៀតបានដឹកជញ្ជួនយកមកលក់ឲ្យគាត់ដល់ផ្ទះតែម្ដង។ ដោយគាត់បានទិញចូលក្នុង១គីឡូក្រាម តម្លៃ៤០០រៀល ហេីយលក់ចេញក្នុង១គីឡូក្រាម តម្លៃ៥០០រៀល ពោលគឺចំណេញបានចំនួន១០០រៀន ក្នុង១គីឡូក្រាម។ ដោយក្នុង១ថ្ងៃគាត់អាចទិញខ្យងបានចាប់ពី១០ ទៅ១២តោនឯណេះ ហើយឈ្មួញមកទិញបន្តជារៀងរាល់ថ្ងៃ ដេីម្បីយកទៅលក់នៅប្រទេសវៀតណាម។

ឈ្មួញកណ្ដាលដដែល បានបញ្ជក់ថា ចំពោះខ្យងស្ងោរក្នុង ៣០០គីឡូ យេីងអាចឆ្កឹះយកតែសាច់ក្បាល បាន៧៥គីឡូក្រាម ដោយក្នុង ១គីឡូ តម្លៃ ២៥០០រៀល ចំណែកឯខ្យងខ្មែរវិញ គឺទិញចូលក្នុង ១គីឡូក្រាម តម្លៃ ៣០០០រៀល និងលក់ចេញបានតម្លៃ ៣៥០០រៀល។ ដែលអ្នកប្រកបមុខរបរធ្វើស្រែចំការ ក៏អាចឆ្លៀតឱកាសដើររកខ្យងលក់ ដេីម្បីរកប្រាក់កម្រៃសម្រាប់ផ្គត់ផ្គង់ជីវភាព ក្នុងគ្រួសារ ហើយមួយផ្នែកទៀត គឺផលដំណាំស្រូវរបស់គាត់ក៏បាននៅល្អ ដោយមិនមានសត្វខ្យង កាត់បំផ្លាញផងដែរ។

សូមជម្រាបថាកន្លងមកក្រសួងកសិកម្ម រុក្ខាប្រមាញ់ និងនិងនេសាទ បានប្រមូលទិញពី ប្រជាពលរដ្ឋ ដេីម្បីយកទៅកំទេចចោល ដែលអាចនិយាយបានថា នេះជាផលចំណេញមួយសម្រាប់រដ្ឋ និងកសិករយើង ហើយក៏ជាឱកាសសម្រាប់បងប្អូន ប្រជាពលរដ្ឋ ក្នុងការរកប្រាក់កម្រៃផ្គត់ផ្គង់ជីវភាព ក្នុងគ្រួសារផងដែរ៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម នៅថ្ងៃទី១៧ ខែមិថុនា ឆ្នាំ២០២២នេះ បានជម្រុញដល់ក្រុមការងារបច្ចេកទេស ឲ្យពន្លឿន ការសាងសង់ វិមានឯករាជ្យ ធ្វើយ៉ាងណា ឲ្យបានរួចរាល់ មុនថ្ងៃទី៩ វិច្ឆិកា ២០២២ ខណៈដែលការស្ថាបនាសម្រេច បានប្រមាណជាង៥០%ហេីយ។

លោក អ៊ុន ចាន់ដា បានថ្លែងថា ការរៀបចំសាងសង់ វិមានឯករាជ្យ ស្ថិតនៅក្នុង ភូមិទី៦ សង្កាត់វាលវង់ ក្រុងកំពង់ចាម នេះ គឺអាជ្ញាធរខេត្ត មានបំណងទុកជាសម្បត្តិវប្បធម៌ទេសចរណ៍ ប្រវត្តិសាស្ត្រ និងលេីកកម្ពស់សោភ័ណ្ឌភាពទីក្រុង សំដៅទៅលើ ខួបកំណើតនៃកងយុទ្ធពលខេមរភូមិន ដែលជាស្នាមព្រហស្ថ របស់ព្រះរមរតនកោដ្ឋ ព្រះបាទ នរោត្ដម សីហនុ ដែលព្រះអង្គបានដណ្ដើមឯករាជ្យ ពីអាណានិគមបារាំង នៅថ្ងៃទី៩ ខែវិច្ឆិកា ឆ្នាំ១៩៥៣។

គួររំលឹកថា ទីតាំងដែលលោកអភិបាលខេត្ត សម្រេចសាងសង់វិមានឯករាជ្យនេះ គឺនៅចំណុចផ្លូវកៅស៊ូ មាត់ច្រកចូល ទៅសាលាគរុកោសល្យ ខេត្តកំពង់ចាម ដោយចំណុចនេះ លោកអភិបាលខេត្ត បានណែនាំឲ្យមន្ត្រីជំនាញពាក់ព័ន្ធ សាងសង់ពង្រីកផ្លូវជាតិ ឲ្យបានធំទូលាយ ចាប់ពីចំណុចនាគព័ន្ធ រហូតមកដល់ចំណុចទន្លេអុំ ដើម្បីបង្កើនសោភ័ណភាព នៃចំណុចវិមានឯករាជ្យ ឲ្យក្លាយទៅជាកន្លែងទេសចរណ៍ សម្រាប់ប្រជាពលរដ្ឋ មកកម្សាន្តផងដែរ។

គួរបញ្ជាក់ថា បន្ទាប់ពីបានពិនិត្យការសាងសង់ វិមានឯករាជ្យខាងលើរួច លោកអភិបាលខេត្ត ក៏បានដឹកនាំក្រុមការងារ អញ្ជើញចុះពិនិត្យការដ្ឋានសាងសង់អាគារពហុបំណង សហភាពសហព័ន្ធយុវជនកម្ពុជា ខេត្តកំពង់ចាម ដែលមានទីតាំងស្ថិតនៅក្នុង ភូមិតាណេង សង្កាត់សំបូរមាស ក្រុងកំពង់ចាម ដេីម្បីពន្លឿនការសាងសង់ឲ្យបានឆាប់រួចរាល់ផងដែរ៕SRP

ខេត្តកំពង់ចាម៖លោកទេសរដ្ឋមន្ត្រី គន់ គីម អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា បានថ្លែងថា គុណចំណាច់របស់ អតីតយុទ្ធជន មិនត្រូវបោះបង់ចោលនោះទេ ពោលគឺមានការយកចិត្តទុកដាក់ខ្ពស់បំផុតពីសំណាក់ រាជរដ្ឋាភិបាល ឲ្យសក្តិសម ទៅនឹងអ្វីដែលបងប្អូនជា អតីតយុទ្ធជន បានលះបង់ពលី ទាំងកំលាំងកាយចឹត្តក្នុងការការពារ បូរណភាពទឹកដី និងប្រជាជនកម្ពុជា។

ការថ្លែងបែបនេះ ក្នុងឱកាសប្រារព្ធទិវាអតីតយុទ្ធជនកម្ពុជា ខួបលើកទី១៥ ថ្ងៃទី២១ ខែមិថុនា ឆ្នាំ២០២២ នៅសាលាខេត្តកំពង់ចាម នាព្រឹកមិញនេះ។

លោកគន់ គីម តំណាងដ៏ខ្ពង់ខ្ពស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានសមាគមអតីតយុទ្ធជនកម្ពុជា បានរំលឹកអំពីវីរភាព និងគុណបំណាច់ដ៏ធំធេងរបស់អតីតយុទ្ធជន ចំពោះជាតិមាតុភូមិ និងប្រជាជនកម្ពុជា ដោយឡែកការប្រារព្ធ ទិវាអតីតយុទ្ធជនកម្ពុជា ២១មិថុនា ដែលបានធ្វើឡើងជារៀងរាល់ឆ្នាំ ក្នុងគោលបំណង ផ្សព្វផ្សាយ ឲ្យប្រជាជន ទូទាំងប្រទេស បានយល់ដឹងកាន់តែទូលំទូលាយបន្ថែមទៀតអំពីអតីតយុទ្ធជនយេីង។

លោក អ៊ុន ចាន់ដា អភិបាលខេត្ត និងជាប្រធានកិត្តិយសសមាគមអតីតយុទ្ធជនខេត្តកំពង់ចាម បានអាននូវសារលិខិតរបស់សម្តេចតេជោ ហ៊ុន សែន ដែលបានបានលើកឡើងពីពលិកម្ម ប្រកបដោយស្មារតី ស្នេហាជាតិរបស់ អតីតយុទ្ធជន យុទ្ធនារី និងប្រជាពលរដ្ឋ កម្ពុជា នៅគ្រប់ដំណាក់កាល នៃប្រវត្តិសាស្ត្រ ដែលបានចូលរួមចំណែក យ៉ាងសំខាន់ ក្នុងកិច្ចការពារ បូរណភាពទឹកដី ក្នុងការកសាងសុខសន្តិភាព និងស្ថិរភាពសង្គមសម្រាប់ ព្រះរាជាណាចក្រកម្ពុជា សំដៅធានាឲ្យមានការអភិវឌ្ឍសេដ្ឋកិច្ច និងសង្គម ដើម្បីជាឧត្តមប្រយោជន៍ សម្រាប់ជាតិមាតុភូមិ និងប្រជាជនកម្ពុជា ផងដែរ។

ក្នុងឱកាសប្រារព្ធទិវាអតីតយុទ្ធជនកម្ពុជា ខួបលើកទី១៥នេះដែរ បងប្អូនអតីតយុទ្ធជន ដែលចូលរួមក្នុងពិធី ត្រូវបានទទួលការឧបត្ថម្ភ ពីសម្តេចហ៊ុន សែន នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ផងដែរ៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម បានថ្លែងអំពាវនាវដល់យុវជន ឲ្យខិតខំសិក្សា រៀនជំនាញឯកទេសពិតប្រាកដ និងសុចរិត ដើម្បីកសាងអនាគត របស់ខ្លួន ខណៈរាជរដ្ឋាភិបាលកម្ពុជា បានបង្កើតសាលាបណ្ដុះបណ្ដាលជំនាញបច្ចេកទេស នៅគ្រប់ទីកន្លែង។

លោកថ្លែងបែបនេះក្នុងឱកាសប្រារព្ធទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈលើកទី៥ ឆ្នាំ២០២២ ក្រោមប្រធានបទ «TVET បង្កើនផលិតភាពការងារ និងភាពប្រកួតប្រជែងខ្ពស់» នៅវិទ្យាស្ថានពហុបច្ចេកទេសខេត្តកំពង់ចាម នៅថ្ងៃទី១៥ ខែមិថុនា ឆ្នាំ២០២២ នេះ។

អភិបាលខេត្តកំពង់ចាមក៏ បានថ្លែងថា រាជរដ្ឋាភិបាលកម្ពុជា ដែលដឹកនាំ ដោយសម្ដេចតេជោ ហ៊ុន សែន ជានបានយកចិតត្តទុកដាក់ជាខ្លាំង ក្នុងកសាងធនធានមនុស្ស ដោយចាប់ផ្ដើមពីកម្រិតជំនាញ ដើម្បីបង្កើននូវមុខរបរ និងការងារ រួមទាំងការចូលរួមប្រកួតប្រជែង ទីផ្សារ ក្នុងគោលបំណង ដើម្បីលើកកម្ពស់ កម្រិតជីវភាព របស់ប្រជាពលរដ្ឋ ដោយរាប់ចាប់តាំងពីពេលដែល យុវជនយើង បញ្ចប់ការសិក្សា ត្រឹមកម្រិតសញ្ញាបត្រមធ្យម សិក្សាទុតិយភូមិទៅ។

លោកបានបញ្ជាក់ថាយ៉ាងណាមិញ ទិវាជាតិឆ្នាំនេះ បានរៀបចំឡើង ក្នុងគោលបំណង លើកកម្ពស់ការ បណ្តុះបណ្តាលបច្ចេកទេស និងវិជ្ជាជីវៈ នឹងធ្វើការផ្សព្វផ្សាយទៅដល់សិស្សានុសិស្ស និស្សិត យុវជន មាតាបិតា អាណាព្យាបាល កម្មករ និយោជិត និយោជក និងផ្នែកឯកជន ព្រមទាំង សាធារណៈជន ឲ្យបានយល់ដឹងកាន់តែច្បាស់អំពីសារៈសំខាន់ នៃការអប់រំបណ្តុះបណ្តាលបច្ចេកទេស និងវិជ្ជាជីវៈ ក្នុងការអភិវឌ្ឍន៍កម្លាំងពលកម្មជំនាញ ប្រកបដោយប្រសិទ្ធភាព ដើម្បីឆ្លើយតបទៅ នឹងតម្រូវការទីផ្សារការងារ នៅក្នុងស្រុក និងក្រៅប្រទេស។

បេីតាមលោក ហាវ ធិន នាយកវិទ្យាស្ថានពហុបច្ចេកទេសខេត្តកំពង់ចាម បានឲ្យដឹងថា បច្ចុប្បន្ន វិទ្យាស្ថានពហុបច្ចេកទេសខេត្ត មានបណ្ដុះបណ្ដាល លើជំនាញ ដូចជា៖ វិស្វករអគ្គិសនី វិស្វករអេឡិចត្រូនិក វិស្វករយន្តសាស្ត្រយន្ត វិស្វកម្មសំណង់ស៊ីវិល បរិក្ខាត្រជាក់ឧស្សហកម្ម វិទ្យសាស្ត្រកុំព្យូទ័រ និងមានជំនាញជាច្រើនទៀត តាមតម្រូវការទីផ្សារការងារ ដោយបណ្ដុះបណ្ដាល ចាប់ពីកម្រិតវិញ្ញាបនបត្រ រហូតដល់កម្រិតបរិញ្ញាបត្រ ដោយសិក្សាចាប់ពី ១សប្ដាហ៍ រហូតដល់ ៥ឆ្នាំ។ ទន្ទឹមនឹងនោះ វិទ្យាស្ថាន ក៏បានខិតខំលើកកម្ពស់ការបណ្ដុះបណ្ដាល និងការងារ ដើម្បី បង្កើនផលិតភាព និងភាពប្រកួរប្រជែង ដោយខិតខំស្វែងរកដៃគូ ដូចជា៖ រោងចក្រ សហគ្រាស ដើម្បី ឲ្យសិស្ស និស្សិតចុះហាត់ការការងារ និងកម្មសិក្សា ជាពិសេស ស្វែងរកការងារជូននិស្សិត ក្រោយបញ្ចប់ការសិក្សា ស្របតាមជំនាញ និងសមត្ថភាពរបស់សិស្ស និស្សិត ផងដែរ៕SRP