ខេត្តកំពង់ចាម – Page 62

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម បានថ្លែងថា ការជួបជុំគ្នាប្រកបដោយទឹកមុខសប្បាយរីករាយ ក្នុងថ្ងៃនេះ គឺបានមកដោយសារប្រទេសជាតិយើង មានសុខសន្តិភាព ខណៈកត្តាសុខសន្តិភាព ជាម្លប់នៃក្តីសង្ឃឹមរបស់យើងទាំងអស់គ្នា ធ្វើឲ្យយើងអាចជួបជុំគ្នាបានគ្រប់ពេលវេលា គ្រប់ទីកន្លែង។ ហេីយក៏បានផ្ដល់នូវការអភិវឌ្ឍរីកចម្រើន នៅក្នុងភូមិ ឃុំ របស់យើង ជាពិសេសបានចូលរួមយ៉ាងសំខាន់ក្នុងការលើកកម្ពស់កម្រិតជីវភាព របស់ប្រជាពលរដ្ឋយើង ពោលគឺ មានសន្តិភាព ទេីបមានការអភិវឌ្ឍទាំងពុទ្ធិចក្រ និងអាណាចក្រ ប្រជាពលរដ្ឋ មានជីវភាពធូធារ និងមានឱកាសគ្រប់គ្រាន់ សម្រាប់ធ្វើបុណ្យ ដាក់ទានតាមសទ្ធាជ្រះថ្លារៀងៗខ្លួន។

ការថ្លែងបែបនេះក្នុងពិធីបុណ្យចម្រេីនព្រះជន្ម៩០ព្រះវស្សា និងស្រោចសុគន្ធវ៉ារី ព្រះទេពសោភ័ណ្ឌ ហ៊ាប គន់ ព្រះអនុគណស្រុកកោះសូទិន និងជាព្រះចៅអធិការវត្តជោតនារាម (វត្តដំណាក់ព្រីង) ស្ថិតក្នុងឃុំមហាលាភ ស្រុកកោះសូទិន នៅរសៀលថ្ងៃទី៧ ខែកក្កដា ឆ្នាំ២០២២។

លោក អ៊ុន ចាន់ដា បានថ្លែងថា ថ្វីត្បិតតែជំងឺកូវីដ-១៩ បានធូរស្រាលហើយ ត្រូវបានរាជរដ្ឋាភិបាល បានបើកប្រទេសឲ្យដំណើរការឡើងវិញ.ឲ្យប្រជាពលរដ្ឋ អាចប្រកបមុខរបរបានជាធម្មតា និងអនុញ្ញាតឱ្យមានការជួបជុំប្រជាពលរដ្ឋធ្វើបុណ្យតាមទាវត្តអារាម នានា នឹងប្រារព្ធពិធីផ្សេងៗ បានផងដែរ។

អភិបាលខេត្តបញ្ជាក់ថា ការជួបជុំគ្នាប្រកបដោយទឹកមុខសប្បាយរីករាយ នៅថ្ងៃនេះ ដោយសារតែបងប្អូន ប្រជាពលរដ្ឋយើង បានរួមគ្នាយកឈ្នះលើជំងឺកូវីដ១៩ ដោយបានទៅចូលរួមចាក់វ៉ាក់សាំងស្ទើរតែគ្រប់គ្នានៅក្នុងខេត្តកំពង់ចាម។ ទន្ទឹមនឹងនេះ ដើម្បីប្រជាពលរដ្ឋយើង អាចជួបជុំគ្នាបាននៅគ្រប់កម្មវិធី បន្តទៅទៀត សូមបងប្អូនប្រជាពលរដ្ឋ អញ្ជើញទៅចាក់វ៉ាក់សាំងដូសជំរុញ ទី៣,ទី៤, និងទី៥ ជាបន្តបន្ទាប់តាមការកំណត់របស់គ្រូពេទ្យ ឱ្យបានគ្រប់ៗគ្នា ដើម្បីបន្តយកឈ្នះលើជំងឺកូវីដ១៩នេះ បន្តទៀត និងប្រជាពលរដ្ឋយើង អាចជួបជុំគ្នាបានរាល់កម្មវិធីផ្សេងៗនាពេលខាងមុខទៀតបាន៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម បានអំពាវនាវដល់ ព្រះមន្ត្រីសង្ឈ អង្គភាពនានា អាជ្ញាធរមូលដ្ឋានគ្រប់លំដាប់ថ្នាក់ គ្រប់គ្រឹះស្ថានសិក្សា ទីអារាមទាំងអស់ និងបងប្អូនប្រជាពលរដ្ឋគ្រប់ៗរូប មេត្តាយកចិត្តទុកដាក់បន្តបង្កើនការបណ្តុះ និងដាំកូនឈើឲ្យបានច្រើនបន្ថែមទៀត ពីមួយឆ្នាំទៅមួយឆ្នាំ ពោលគឺត្រូវដាំពូជឈើល្អៗគ្រប់ប្រភេទ ឲ្យបានកាន់តែច្រើនឡើង នៅលើដីទំនេរ ទីទួល ទីទំនាប តាមទីអារាម ស្ថាប័ន គ្រឹះស្ថានសិក្សា ភូមិដ្ឋាន និងតាមទីសាធារណៈផ្សេងៗ ឲ្យបានច្រើនផងដែរ។

អំពាវនាវបែបនេះ ក្នុងឱកាសប្រារព្ធពិធីរុក្ខទិវា ៩ កក្កដា នៅថ្ងៃទី៧ ខែកក្កដា ឆ្នាំ២០២២នេះ។

លោក អ៊ុន ចាន់ដា ក៏បានអំពាវនាវ ដល់អង្គការជាតិ-អន្តរជាតិ ដៃគូរអភិវឌ្ឍន៍នានា អាជ្ញាធរមូលដ្ឋានគ្រប់លំដាប់ថ្នាក់ អង្គភាពពាក់ព័ន្ធ ឲ្យបន្តកិច្ចសហប្រតិបត្តិការ តាមគ្រប់រូបភាព ក្នុងការថែរក្សាធនធានព្រៃឈើ និងដាំកូនឈើ ឲ្យបានជាអតិបរមា ពីព្រោះថាដើមឈើ ដែលដុះដាល រីកចម្រើនច្រើន វាជាពហុប្រយោជន៍។ ចំពោះការគ្រប់គ្រងព្រៃឈើ ទាំងព្រៃធម្មជាតិ ទាំងព្រៃដាំ និងការអភិវឌ្ឍន៍ ក្នុងវិស័យព្រៃឈើ ត្រូវមានការចូលរួមជាចាំបាច់ពីគ្រប់ភាគី ទាំងអស់ ជាពិសេសប្រជាពលរដ្ឋមូលដ្ឋាន។ នៅតាមវត្តអារាម សាលារៀន សួនច្បារ មានដើមឈើច្រើននោះ វានឹងធ្វើឲ្យក្លាយទៅជារមណីយដ្ឋាន ក្លាយជាតំបន់ទេសចរណ៍ និងសាលារៀនមានទីធ្លា ប្រកបដោយម្លប់ឈើត្រឈឹងត្រឈៃ ជាទីមនោរម្យសម្រាប់សិស្សានុសិស្ស សម្រាករៀនសូត្រ និងលេងកំសាន្តថែមទៀតផង។

បើតាម លោក ស៊ឹម ថាវរៈ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ចាម បានគូសបញ្ជាក់ថា ការប្រារព្ធពិធី រុក្ខទិវាថ្ងៃនេះ គឺបានកំណត់យកទីតាំង នៅក្នុងបរិវេណ វត្តបភាវត្យារាមគគរ ស្ថិតក្នុងឃុំគគរ ស្រុកកំពង់សៀម ដែលបានជ្រើសរើសយកប្រភេទឈើល្អៗមានតម្លៃ សម្រាប់ធ្វើការដាំដុះ សរុបចំនួន ១.៣០០ដើម ក្នុងនោះជាប្រភេទ កូនក្រញូង បេង ធ្នង់ ឈើទាល និងកូនក្ងោក។ ក្រៅពីនោះ ក៏មានកូនឈើសម្រាប់ចែកចាយ ទៅដល់មន្ទីរ អង្គភាព សាលារៀន ប្រជាពលរដ្ឋ ចំនួន ១.០០០ដើម ដើម្បី យកទៅដាំដុះ ផងដែរ៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម បានស្នើដល់សមាជិក្រុមប្រឹក្សា.ឃុំ សង្កាត់ ជាប់ឆ្នោតថ្មី ត្រូវរក្សាគោលចំហរសាមគ្គីភាព ដេីម្បីបម្រើផលប្រយោជន៍ និងសេចក្តីត្រូវការរបស់ ប្រជាពលរដ្ឋទាំងអស់ ដោយស្មើភាព និងយុត្តិធម៌ ពុំមានការប្រកាន់និន្នាការនយោបាយ ព្រមទាំងអនុវត្តឲ្យបានស្របតាមច្បាប់ និងលិខិតបទដ្ឋានគតិយុត្តកំណត់ផងដែរ៊

ការថ្លែងបែបនេះក្នុងពិធីប្រកាសសុពលភាពសមាជិកក្រុមប្រឹក្សាឃុំចំការអណ្តូង ស្រុកចំការលើ នៅថ្ងៃទី៥ ខែកក្កដា ឆ្នាំ២០២២។

លោក អ៊ុន ចាន់ដា បានលើកឡើងថា បន្ទាប់ពីការប្រកាសលទ្ធផលជាផ្លូវការនៃការបោះឆ្នោត បេក្ខជនជាប់ឆ្នោតមកពីគណបក្ស នយោបាយនានា ដែលបានប្រកួតប្រជែង ក្នុងពេលបោះឆ្នោត នឹងក្លាយជាក្រុមប្រឹក្សាឃុំ សង្កាត់ ជាអាជ្ញាធរសាធារណៈ ដែលមានកាតព្វកិច្ចតាមផ្លូវច្បាប់ធ្វើជាតំណាងឲ្យ ប្រជាពលរដ្ឋទាំងអស់នៅក្នុងឃុំ សង្កាត់ របស់ខ្លួន ដែលត្រូវការពារ និងបម្រើផលប្រយោជន៍ ប្រជាពលរដ្ឋគ្រប់ៗរូប គឺមិនតំណាងឲ្យតែប្រជាពលរដ្ឋ ដែលគាំទ្រគណបក្សរបស់ខ្លួននោះឡើយ។

លោកអភិបាលខេត្ត បានបន្តថា សមាជិកក្រុមប្រឹក្សាឃុំ សង្កាត់ដែលមកពីគណបក្សផ្សេងៗ គ្នា ត្រូវខិតខំរួបរួមសាមគ្គី សហការធ្វើការជាមួយគ្នាប្រកដោយការទទួលខុសត្រូវ ដើម្បីបម្រើប្រជាពលរដ្ឋ នៅក្នុងឃុំ សង្កាត់របស់ខ្លួន ដោយមិនត្រូវមានការរើសអើង បែងចែកពណ៌សម្បុរ ឬនិន្នាការនយោបាយនោះឡើយ។ ជាមួយគ្នានេះដែរ ប្រជាពលរដ្ឋដែលបានចូលរួមធ្វើសកម្មភាពគាំទ្រគណបក្សនយោបាយផ្សេងៗគ្នា ដែលបានប្រកួតប្រជែងគ្នា ក្នុងពេលបោះឆ្នោត ក៏មិនត្រូវធ្វើការបែងចែក ការគុំគួន ការរើសអើងខាងនយោបាយដាក់គ្នានោះឡើយ។ ពោលគឺត្រូវរួមសាមគ្គីសហការគ្នា ជួយឧបត្ថម្ភគាំទ្រគ្នាទៅវិញទៅមក ឲ្យបានល្អនៅតាមសហគមន៍ មូលដ្ឋាននានា និងត្រូវសហការចូលរួមជាមួយក្រុមប្រឹក្សាឃុំ សង្កាត់ ជាប់ឆ្នោត ដើម្បីអភិវឌ្ឍ មូលដ្ឋានរបស់ខ្លួនឲ្យកាន់តែមានការរីកចម្រើនបន្តទៀត។

លោក អ៊ុន ចាន់ដា ក៏បានស្នើដល់សមាជិកក្រុមប្រឹក្សាឃុំ សង្កាត់ជាប់ឆ្នោតថ្មី គណបក្សនយោបាយនានា និងប្រជាពលរដ្ឋ ទាំងអស់ត្រូវខិតខំរួមគ្នាលើកកម្ពស់ វប្បធម៌នៃលទ្ធិប្រជាធិបតេយ្យ សេរីពហុបក្ស ដើម្បីរស់នៅ និងបំពេញការងាររួមគ្នា ប្រកបដោយភាពសុខដុមរមនា ក្នុងសង្គម សម្រាប់ជាមូលដ្ឋាន ក្នុងការធានាចីរភាពដំណើរការនៃលទ្ធិប្រជាធិបតេយ្យ សេរីពហុបក្ស ការបោះឆ្នោត និងការអភិវឌ្ឍសង្គមឲ្យកាន់តែមានការអភិវឌ្ឍរីកចម្រើន បន្តទៀតផងដែរ៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម បានលេីកឡេីងថា ដើម្បីឆ្លើយតប និងដោះស្រាយនូវសំណើ សំណូមពរ និងតម្រូវការចាំបាច់នានារបស់ប្រជាពលរដ្ឋ នឹង ដើម្បីធានាបាននូវប្រសិទ្ធភាព នៃការផ្តល់សេវានានានៅមូលដ្ឋាន បញ្ហាគន្លឹះសំខាន់គឺការបំពេញតួនាទី ភារកិច្ចរបស់តួអង្គស្នូលសំខាន់ចំនួន៥ ដែលក្នុងនោះមានគឺ(១)មេឃុំ ចៅសង្កាត់, (២)ស្មៀនឃុំ សង្កាត់, (៣)ប៉ុស្តិ៍នគរបាលរដ្ឋបាលឃុំ សង្កាត់ (៤)មណ្ឌលសុខភាព ឬប៉ុស្តិ៍សុខភាព និង(៥)មេភូមិ ដូច្នេះស្នើឲ្យតួអង្គទាំង ០៥ខាងលើនេះ ខិតខំយកចិត្តទុកដាក់អនុវត្តតួនាទី ភារកិច្ចរបស់ខ្លួនក្នុងការផ្តល់សេវាសាធារណៈ នានាជូនប្រជាពលរដ្ឋ ក្នុងមូលដ្ឋានរបស់ខ្លួនឲ្យបានល្អប្រសើរ ប្រកបដោយក្រមសីលធម៌ វិជ្ជាជីវៈ និងកែលម្អឥរិយាបថ ក្នុងការប្រាស្រ័យទាក់ទងជាមួយប្រជាពលរដ្ឋ ដោយតម្លាភាព គណនេយ្យភាព និងយុត្តិធម៌ ដោយមិនត្រូវមានការរើសអើង ការបែងចែកបក្សពួក គ្រួសារនិយម និងនិន្នាការនយោបាយ ដើម្បីបង្កើនជំនឿទុកចិត្ត និងការគាំទ្រពីប្រជាពលរដ្ឋ ព្រមទាំងត្រូវអនុវត្តឲ្យស្របតាមច្បាប់ និងលិខិតបទដ្ឋានគតិយុត្ត កំណត់ផងដែរ។

លោក អ៊ុន ចាន់ដា ក៏បានលើកឡើងថា ការផ្តល់សេវាសាធារណៈ លើគ្រប់វិស័យជូនប្រជាពលរដ្ឋ គឺជាតួនាទី និងការទទួលខុសត្រូវដ៏សំខាន់មួយក្នុងចំណោម តួនាទី និងការទទួលខុសត្រូវសំខាន់ៗនានារបស់រដ្ឋបាលឃុំ សង្កាត់នីមួយៗ។

លោកមានប្រសាសន៍យ៉ាងដូច្នេះក្ក្នងពិធី ប្រកាសសុពលភាព ចៅសង្កាត់វាលវង់ ក្រុងកំពង់ចាម នៅរសៀលថ្ងៃចន្ទម្សិលមិញ៕SRP

ខេត្តកំពង់ចាម៖ក្នុងពិធីប្រកាសសុពលភាព លោកស្រី ឃាង ស៊ីផាន ជា ចៅសង្កាត់សំមួរមាស ក្រុងកំពង់ចាម នៅចន្ទនេះ លោក អ៊ុន ចាន់ដា អភិបាលខេត្តកំពង់ចាម បានផ្តាំផ្ញេីដល់មេឃុំ ចៅសង្កាត់ថ្មី ឲ្យរក្សាគោលចំហរអព្យាក្រឹត ដេីម្បីរួមគ្នាបម្រើប្រជាពលរដ្ឋ ដោយពុំមានការប្រកាន់ និន្នាការ គណបក្សនយោបាយផ្សេងគ្នា ពោលគឺត្រូវយកចិត្ដទុកដាក់អនុវត្ដឲ្យបានត្រឹមត្រូវតាមគោលនយោបាយច្បាប់ និងលិខិតបទដ្ឋានគតិយុត្ដិនានារបស់ រាជរដ្ឋាភិបាល ឲ្យបានម៉ត់ចត់ រួមទាំងការធានាបាននូវសាមគ្គីភាពផ្ទៃក្នុង និងការយោគយល់គ្នា នៅក្នុងការបំពេញការងាររបស់ខ្លួន។

អភិបាលខេត្ត បានថ្លែងថា ការបោះឆ្នោតជ្រើសរើសក្រុមប្រឹក្សានៅថ្នាក់ឃុំ សង្កាត់ គឺជាការជំរុញកិច្ចដំណើរការអនុវត្តកំណែទម្រង់វិមជ្ឈការ និងវិសហមជ្ឈការនៅរដ្ឋបាលថ្នាក់ក្រោមជាតិ ដែលកំណែទម្រង់នេះបានដើរតួនាទីយ៉ាងសំខាន់ ក្នុងការលើកកម្ពស់អភិបាលកិច្ចនៅថ្នាក់ឃុំ សង្កាត់ តាមគោលការណ៍អភិវឌ្ឍ តាមបែបប្រជាធិបតេយ្យនៅថ្នាក់មូលដ្ឋាន។

លោក អ៊ុន ចាន់ដា បានបន្តថា អភិបាលកិច្ចល្អតម្រូវឲ្យក្រុមប្រឹក្សាឃុំ សង្កាត់ ធ្វើជាតំណាងឲ្យផលប្រយោជន៍ របស់ប្រជាពលរដ្ឋ ទាំងអស់នៅមូលដ្ឋាន ដូចនេះក្រុមប្រឹក្សាឃុំ សង្កាត់នីមួយៗ ត្រូវមានតួនាទី និងភារកិច្ចក្នុងការឆ្លើយតបទៅនឹងតម្រូវការចាំបាច់របស់ប្រជាពលរដ្ឋនៅក្នុងមូលដ្ឋានរបស់ខ្លួន តាមរយៈការអភិវឌ្ឍ ការលើកកម្ពស់គុណភាពនៃជីវភាពរស់នៅតាមរយៈការផ្តល់សេវាសង្គម ការកសាង និងពង្រឹងពង្រីកហេដ្ឋារចនាសម្ព័ន្ធសាធាណៈដែលសំខាន់ចាំបាច់ឲ្យបានកាន់តែប្រសើរឡើង និងប្រកបដោយសមធម៌ បរិយាប័ន្ន និងមានចីរភាព ដើម្បីឈានឆ្ពោះទៅរួមចំណែកក្នុងការកាត់បន្ថយភាពក្រីក្ររបស់ប្រជាពលរដ្ឋ។

អភិបាលខេត្ត ក៏បានលេីកឡើងថា ចំពោះដំណើរការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៥ កាលពីថ្ងៃទី០៥ ខែមិថុនា ឆ្នាំ២០២២កន្លងមកនេះ ត្រូវបានវាយតម្លៃថាមានលក្ខណៈសេរី ត្រឹមត្រូវ យុត្តិធម៌ និងគ្មានអំពើហិង្សា ហើយលទ្ធផលនៃការបោះឆ្នោតត្រូវបានទទួលស្គាល់ពីគណបក្សនយោបាយនានា ដែលបានចូលរួមក្នុងការបោបោះឆ្នោតនេះផងដែរ៕SRP