ខេត្តកំពង់ចាម – Page 61

ខេត្តកំពង់ចាម៖លោកឧបនាយករដ្ឋមន្ត្រី យឹម ឆៃលី បានថ្លែងប្រាប់ដល់ក្រុមប្រឹក្សាឃុំ អាណត្តិទី៥ ដោយត្រូវលុបបំបាត់ឲ្យអស់នូវជំងឺបក្សពួកគ្រួសារនិយម ជំងឺពើងទ្រូងដាក់ប្រជាជន និងអំពើពុករលួយគ្រប់រូបភាព នៅក្នុងមូលដ្ឋានរបស់ខ្លួន ហេីយត្រូវគ្រប់គ្រង ប្រកបដោយការយកចិត្តទុកដាក់ និងយុត្តិធម៌ ដល់ប្រជាពលរដ្ឋទូទៅ នៅក្នុងមូលដ្ឋានរបស់ខ្លួន។

លោកថ្លែងបែបនេះក្នុងពិធីជួបសំណេះសំណាល ជាមួយមន្ត្រីគណបក្សប្រជាជនកម្ពុជា ស្រុកស្រីសន្ធរ នៅថ្ងៃអង្គរនេះ ដោយមានការអញ្ជើញចូលរួមពី លោក អ៊ុន ចាន់ដា ប្រធានគណៈកម្មាធិការគណបក្សខេត្ត និងថ្នាក់ដឹកនាំ សមាជិក សមាជិកាបក្សជាច្រើនរូបទៀត។

ក្នុងពិធីនោះដែរ លោកយឹម ឆៃលី ប្រធានក្រុមការងាររាជរដ្ឋាភិបាល ចុះមូលដ្ឋានខេត្តកំពង់ចាម បានថ្លែងអំណរគុណដល់បងប្អូនប្រជាពលរដ្ឋ ដែលបានរក្សាការជឿទុកចិត្ត និងផ្តល់ការគាំទ្រជារៀងរហូត ដល់ សម្ដេចតេជោ និងតែងតែបោះឆ្នោតជូន គណបក្សប្រជាជនកម្ពុជា ឲ្យមានឱកាសបន្ត បំពេញកាតព្វកិច្ចក្នុងការបម្រើប្រជាជន ឲ្យកាន់តែមានជីវភាពសម្បូរសប្បាយ និងដឹកនាំអភិវឌ្ឍឃុំ-សង្កាត់ បន្តទៀតពីឆ្នាំ២០២២ ដល់ឆ្នាំ២០២៧។

លោកក៏បានណែនាំដល់មន្ត្រីបក្សទាំងអស់ ត្រូវបេីកវេទិកាសាធារណៈ ក្នុងមូលដ្ឋានរបស់ខ្លួន ដេីម្បីឲ្យបានដឹងថា ប្រជាពលរដ្ឋខ្វះខាតអ្វី និងត្រូវការអ្វី ហេីយយើងត្រូវដោះស្រាយជូនគាត់។ លេីសពីនោះត្រូវបន្តជំរុញ និងពង្រឹងការអនុវត្តគោលនយោបាយភូមិ ឃុំមានសុវត្ថិភាព គឺត្រូវខិតខំលើកកម្ពស់អភិបាលកិច្ច ធានាការផ្តល់សេវាសាធារណៈ ប្រកបដោយតម្លាភាព ការទទួលខុសត្រូវខ្ពស់ និងឆាប់រហ័សជូនប្រជាពលរដ្ឋ ជាពិសេសត្រូវពង្រឹងយុត្តិធម៌ និងសមធម៌សង្គម ដោយអនុវត្តឲ្យបានម៉ឺងម៉ាត់នូវអភិក្រម “ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់”។ ហើយត្រូវដោះស្រាយវិវាទនៅមូលដ្ឋានក្រៅប្រព័ន្ធតុលាការ ប្រកបដោយគុណភាព និងប្រសិទ្ធភាព។

លោកយឹម ឆៃលី ក៏បានណែនាំដល់ថ្នាក់ដឹកនាំគណបក្សឃុំ និងបក្សភូមិ ត្រូវមានឆន្ទៈស្មោះត្រង់ និងទទួលខុសត្រូវខ្ពស់លើ ការទទួលខុសត្រូវរបស់ខ្លួន ក្នុងគោលដៅលើកកម្ពស់ជីវភាពរស់នៅ របស់ ប្រជាពលរដ្ឋ ព្រមទាំងរៀបចំវិធានការ ស្វ័យតាមដានការងាររបស់ខ្លួន។ ហេីយត្រូវចាត់វិធានការឲ្យមានប្រសិទ្ធភាព លើការលុបបំបាត់ភាពអសកម្មនានាឲ្យដូចភ្លៀងរលឹម។ លេីសពីនោះត្រូវបន្តថែរក្សាសមិទ្ធផលនានា របស់រាជរដ្ឋាភិបាល ដែលមាននៅក្នុងមូលដ្ឋាន និងលើកទឹកចិត្ត ពង្រឹងពង្រីកការ ចូលរួមរបស់ ប្រជាពលរដ្ឋ ក្នុងការថែទាំសមិទ្ធផលផងដែរ៕SRP

ខេត្តកំពង់ចាម៖ដោយទឹកចិត្តសទ្ធាជ្រះថ្លា ក្នុងផ្លូវព្រះពុទ្ឋសាសនា នាឱកាសរដូវចូលព្រះវស្សាឆ្នាំ២០២២ នេះ នៅថ្ងៃទី១៥ ខែកក្កដា ឆ្នាំ២០២២ នេះ លោក ខ្លូត ផន ប្រធានក្រុមប្រឹក្សាខេត្ត លោក អ៊ុន ចាន់ដា អភិបាលខេត្តកំពង់ចាម និងលោកស្រី ញូង ចរិយា ព្រមទាំងលោក លោកស្រី ជាអភិបាលរងខេត្ត ថ្នាក់ដឹកនាំមន្ទីរ អង្គភាព ជុំវិញខេត្ត បាននាំយក ទេយ្យទាន និងទៀនចំណាំព្រះវស្សា ប្រគេនទដល់វត្ត ចំនួន៤ ស្ថិតនៅក្នុងក្រុងកំពង់ចាម ខេត្តកំពង់ចាម។

រួមមាន៖ វត្ត ខេមវ័ន បឹងស្នាយ វត្តបុទុមរតនដីដុះ វត្តសុទស្សនារាម ជ្រោយថ្ម និងវត្តជោតនារាម បឹងកុក ដោយក្នុង ១វត្ត មានទៀនវស្សា ១គូ អង្ករចំនួន ១៥០គក្រ ទឹកសុទ្ធ ៥កេស ទឹកក្រូច ៥កេស ត្រីខ ១កេស ទឹកត្រី ៥យួរ ទឹកស៊ីអ៊ីវ ៥យួរ មី ១កេសធំ ទឹកដោះគោ ១កេសធំ ស្កសរ ៥គក្រ តែ ៥គក្រ និងបច្ច័យ ១លានរៀល។ ក្រៅពីនោះ ប្រគេនព្រះសង្ឃចំនួន ៧អង្គ ក្នុង ១អង្គ ទេយ្យវត្ថុ ១ និងបច្ច័យ ២០០ ០០០រៀល ចង្ហាន់ ១ស្រាក់ និងផ្លែឈើ ១កន្រ្តក។

ក្នុងឱកាសនោះ លោក ខ្លូត ផន លោក អ៊ុន ចាន់ដា និងលោកស្រី ព្រមទាំង ក្រុមការងារ បានអុជធូបថ្វាយបង្គំព្រះរតនត្រ័យ និងវេរប្រគេនទាន ព្រះវស្សា និងទ័យវត្ថុ ដល់ព្រះសង្ឃ ទៅតាមកិច្ចសាសនា ដោយបានឧទ្ទិសបួងសួង សុំឲ្យវត្ថុសក្តិសិទ្ឋិ សូមជួយថែរក្សាប្រទេសកម្ពុជា ឲ្យមានភាពរីកចំរើន មានសន្តិភាព គង់វង្សជានិរន្តរ៍តរៀងទៅអនាគត។

បន្ទាប់មកព្រះសង្ឃ ក៏បានធ្វើបទនមសក្ការប្រោះព្រំឲ្យពរឲ្យជ័យ សេរីសួស្តី ជ័យមង្គលជូនដល់ ឯកឧត្តម លោកជំទាវ និងលោក លោកស្រី ពុទ្ធបរិស័ទ ពិសេស បានឧទ្ទិសកុសលដល់បុព្វការីជន មានមាតា បិតា ជីដូនជីតា ញាតិ្តការទាំង ៧សណ្ដាន ព្រមទាំង ឧទ្ទិសបុណ្យកុសលដល់វីរៈយុទ្ឋជន យុទ្ឋនារី ដែលបានលះបង់ជីវិតក្នុងបុព្វហេតុជាតិ មាតុភូមិ ផងដែរ។

គួរកត់សម្គាល់ដែរថា តាមទំនៀមទម្លាប់ប្រពៃណីព្រះពុទ្ឋសាសនា ក្នុង ១ឆ្នាំ ព្រះសង្ឃត្រូវគង់ចាំព្រះវស្សាចំនួន ៣ខែ ក្នុងទីវត្តអារាម គឺ ចាប់ពីថ្ងៃទី១រោច ខែអាសាឍ ដល់ថ្ងៃ១៥កើត ខែអស្សុជ ដោយមិនអាចនិមន្តបិណ្ឌបាតទៅទីណាឡើយ ។ ហេតុដូចនេះហើយ ទើបពុទ្ធបរិស័ទ ដែលមានសទ្ឋាជ្រះថ្លាក្នុងព្រះពុទ្ឋសាសនា តែងប្រគេនទានព្រះវស្សា និងទ័យវត្ថុផ្សេងៗ ទៅកាន់ទីវត្តអារាម ដើម្បី ព្រះសង្ឃបានអុជបំភ្លឺ និងមានចង្ហាន់ របស់របរប្រើប្រាស់ ក្នុងកំឡុងពេលកាន់ព្រះវស្សា ៣ខែ នេះ។

សូមបន្ថែមដែរថា បើតាមជំនឿ អានិសង្ឃ នៃអ្នកដែលបានប្រគេនទានព្រះវស្សា គឺបានបុណ្យច្រើនណាស់ ដូចជានឹងបានជាមនុស្សដែលមានរូបកាយ ពណ៌សម្បុរល្អ ចិត្តល្អ និងមានទ្រព្យធន មិនខ្វះ។ល។៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម បានសម្តែងការគាំទ្រ យ៉ាងពេញទំហឹង ចំពោះការរៀបចំការប្រកួតកីឡាមហាជនជ្រើសរើសជើងឯក ទូទាំងខេត្តកំពង់ចាម ប្រចាំឆ្នាំ២០២២ របស់មន្ទីរអប់រំ យុវជន និងកីឡាខេត្ត ក្នុងទិសដៅ ដើម្បីជ្រើសរើស រកក្រុមកីឡាករ ឆ្នើម ដែលមានបទពិសោធន៍ បច្ចេកទេស សមត្ថភាព ទេពកោសល្យ និងគោរពនូវក្រមសីលធម៌ បានល្អក្នុងពេលប្រកួត ដើម្បីត្រៀមខ្លួនចូលរួមប្រកួត ជាបន្តបន្ទាប់ទៀតនៅថ្នាក់ភូមិភាគ ថ្នាក់ជាតិ ការប្រកួតដណ្ដើម ពានរង្វាន់នានា និងថ្នាក់តំបន់ (ស៊ីហ្គេមឆ្នាំ២០២៣) ខាងមុខនេះផងដែរ។

លោក អ៊ុន ចាន់ដា មានប្រសាសន៍គាំទ្រ យ៉ាងដូច្នេះក្នុងពិធីបើកការប្រកួតកីឡាមហាជនជ្រើសរើស ជើងឯកទូទាំងខេត្តកំពង់ចាម ប្រចាំឆ្នាំ២០២២ នៅទីលានបាល់ទះ (កីឡដ្ឋាន) ការិយាល័យអប់រំកាយក្រុងកំពង់ចាម នៅថ្ងៃសុក្រនេះ។

អភិបាលខេត្តកំពង់ចាម ក៏បានអំពាវនាវ បានអំពាវនាវដល់ស្រទាប់យុវជនគ្រប់រូប ឲ្យបង្វែចិត្តគំនិតមកលេងកីឡា ដើម្បីសុខភាព និងអភិវឌ្ឍផ្នែករាងកាយ បញ្ញាស្មារតី និងសូមឲ្យមនុស្សម្នាក់ត្រូវចេះលេងកីឡាមួយប្រភេទផងដែរ។

អភិបាលខេត្តបានបន្តថា ជាការពិតណាស់វិស័យអប់រំ កាយ និងកីឡា គឺជាវិស័យមួយ ដែល សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងក្រសួងអប់រំ យុវជន និងកីឡា និងសហព័ន្ធកីឡាគ្រប់ប្រភេទ បានយកចិត្តទុកដាក់យ៉ាងខ្លាំង និងចាត់ទុកថា ជាវិស័យមួយដ៏មានសារៈសំខាន់បំផុតក្នុងការអភិវឌ្ឍ ប្រទេសជាតិ សម្រេចបាននូវសមិទ្ធផលយ៉ាងធំធេង និងច្រើនសន្ធឹកសន្ធាប់ ទាំងផ្នែកហេដ្ឋារចនាសម្ព័ន្ធសេដ្ឋកិច្ច សង្គមកិច្ច វប្បធម៌ សាសនា ការកាត់បន្ថយភាពក្រីក្រ ការពារសិទ្ធិសេរីភាព សេចក្ដីថ្លៃថ្នូររបស់មនុស្ស លទ្ធិប្រជាធិបតេយ្យ រស់នៅសុខសាន្តក្រោមដំបូលសុខសន្តិភាព សុខដុមរមនាត្រជាក់ត្រជុំ ប្រកបដោយសិរីមង្គលវិបុលឧត្ដមថ្លៃថ្លាបំផុត។

លោក អ៊ុន ចាន់ដា ក៏បានសំណូមពរដល់ក្រុមកីឡាករ កីឡាករ កីឡារិនី មន្ត្រីរាជការ កងកម្លាំងប្រដាប់អាវុធ ប្រជាពលរដ្ឋ និងក្មួយៗសិស្សានុ សិស្ស ទាំងអស់ សូមកុំភ្លេចការពារខ្លួន ដើម្បីឲ្យចៀសផុតពីជំងឺកូវីដ-១៩ ដោយបន្តអនុវត្តភិក្រម “៣កុំ និង ៣ការពារ” ព្រមទាំងចូលរួមទប់ស្កាត់ ការឆ្លងចូល ក្នុងសហគមន៍ ផងដែរ៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម បានជំរុញដល់អង្គភាពរដ្ឋាករទឹកខេត្តកំពង់ចាម ឲ្យពន្លឿនការរៀបចំសេវាបង់ប្រាក់ថ្លៃប្រេីប្រាស់ ទឹកស្អាតតាមរយៈអេប ទូរស័ព្ទដៃ (ធនាគារឯកជន) ដើម្បីបង្កលក្ខណៈងាយស្រួល រហ័សទាន់ចិត្ត និងមានសុវត្ថិភាពខ្ពស់បន្ថែមទៀតជូនដល់អតិថិជន។

ការស្នេីឡេីងបែបនេះក្នុងកិច្ចប្រជុំសាមញ្ញលើកទី៣៨ អាណត្តិទី៣ របស់ក្រុមប្រឹក្សាខេត្តកំពង់ចាម នៅថ្ងៃទី១២ ខែកក្កដា ឆ្នាំ២០២២នេះ ក្រោមវត្តមានលោក ខ្លូត ផន ប្រធានក្រុមប្រឹក្សាខេត្ត។

ក្នុងកិច្ចប្រជុ លោក អ៊ុន ចាន់ដា បានថ្លែងថា ខេត្តកំពង់ចាម ជាខេត្តស៊ីវិល័យ មានការអភិវឌ្ឍ សង្គមវប្បធម៌ និងសីលធម៌ ដែលត្រូវបានគេចាត់ទុកថា មានភាពជឿនលឿនជាងមុន។ ដូច្នេះយើងត្រូវពន្លឿនការរៀបចំ សេវាបង់ប្រាក់ថ្លៃប្រេីប្រាស់ទឹកស្អាត តាមរយៈអេប ទូរស័ព្ទដៃ ដែលមានដូចជាធនាគារ អេប៊ីអេ អេស៊ីលីដា ឬវីង ធ្វើយ៉ាងណា ឲ្យប្រជាពលរដ្ឋ កាន់តែមានការងាយស្រួល និងមានលទ្ធភាព បង់ប្រាក់ថ្លៃប្រើប្រាស់ទឹកស្អាត បានគ្រប់ពេលវេលា និងគ្រប់ទីកន្លែង ដូចការបង់ប្រាក់សេវាអគ្គិសនី ដែលមានអេបរួចទៅហើយនោះដែរ។

គួរបញ្ជាក់ថា ក្នុងកិច្ចប្រជុំនេះ ក៏មានការប្រកាសទទួលស្គាល់ ជាមេធាវី ប្រចាំការ នៅរដ្ឋបាលខេត្តកំពង់ចាម ចំនួន៤រូបផងដែរ។
រួមមាន៖ ១. មេធាវី តែ ស៊ាងរ៉ានឹន , ២.មេធាវី ផែន ណាក់ , ៣.មេធាវី សួស ព័រ និង ៤. មេធាវី យូ លឹមហួត។ តាមខ្លឹមសារប្រកាសលេខ ៩៩២ ប្រក.ចុះថ្ងៃទី ២១ ខែមីនា ឆ្នាំ២០២២ ចុះហត្ថលេខា ដោយសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ៕SRP

ខេត្តកំពង់ចាម៖លោកស្រី តោ ពិឡា ប្រធានក្រុមការងារគណបក្សប្រជាជនកម្ពុជា ចុះជួយឃុំបឹងណាយ ស្រុកព្រៃឈរ ខេត្តកំពង់ចាម បានកោតសរសើរ និងថ្លែងអំណរគុណចំពោះក្រុមការងារទាំងអស់ ដែលបានខិតខំប្រឹងប្រែង អស់ពីកម្លាំងកាយចិត្ត ដណ្តើមបានជោគជ័យ ក្នុងការបោះឆ្នោតមេឃុំ-ចៅសង្កាត់ នាពេលកន្លងមក។ លោកស្រី ក៏បានអគុណដល់បងប្អូន ប្រជាពលរដ្ឋក្នុងឃុំបឹណាយ ដែរបានជឿទុកចិត្ត និងបោះឆ្នោតជូនគណបក្សប្រជាជនកម្ពុជា ទទួលបានជោគជ័យ។

លោក ស្រី មានប្រសាសន៍ បែបនេះក្នុងឱកាសបានចុះជួបសំណេះសំណាល និងពិសារអាហារសាមគ្គី ជាលក្ខណ:គ្រួសារ ជាមួយលោក លោកស្រី ក្នុងជួគណៈកម្មាធិការគណបក្សឃុំ ប្រធាន អនុប្រធានសាខាបក្សភូមិ ក្រុមការងារយុវជន សកម្មជន និងបងប្អូនប្រជាពលរដ្ឋ ក្នុងឃុំបឹងណាយ ដែលមានវត្តមានចូលរួម ចំនួន១៦០០នាក់ នៅថ្ងៃទី៩ ខែកក្កដា ម្សិលមិញ។

ក្នុងពិធីជួបជុំពិសារអាហារសាមគ្គីនេះ ដោយចំណាយថវិកាសរុប ៦.០០០ដុល្លារ។

សូមជម្រាបផងដែរថាលោកស្រី តោ ពិឡា ប្រធានក្រុមការងារគណបក្សប្រជាជនកម្ពុជា ចុះជួយឃុំបឹងណាយ បានប្រគេនទៀនវស្សាចំនួន ៣វត្ត ក្នុងឃុំបឹងណាយ ក្នុង១វត្ត ទៀន១គូ ទឹក១កេស ទឹកក្រូច១កេស នំ១ធុងធំ ប្រេងឆា ៥លីត្រ មី ១កេសតូច កាហ្វេ ១ថុងធំ និងបច្ច័យមួយចំនួនផងដែរ៕SRP