ខេត្តកំពង់ចាម – Page 58

ខេត្តកំពង់ចាម៖រឿងរ៉ាវដ៏កំសត់មួយកើតឡើងចំពោះប្អូនស្រី ទូច កញ្ចនា អាយុ៣១ឆ្នាំ មានកូនប្រុស២នាក់ក្នុងបន្ទុក និងមានមុខរបរជាជាងកាត់ដេរ។ ប្អូនស្រីបានរៀបការជាមួយប្តីឈ្មោះ ឡៃ វិរៈ កាលពីឆ្នាំ ២០១១ មានមុខរបរជាងជួសជុលរថយន្ត ជាអកុសលប្តីប្អូនស្រីបានទទួលមរណភាពដោយសារជម្ងឺគាំងបេះដូងកាលពីឆ្នាំ ២០១៧។ មុនពេលមរណៈភាព ពីរនាក់ប្តីប្រពន្ធបានខិតខំរកសុីសន្សំប្រាក់បានមួយចំនួនហើយបានទិញដីមួយកន្លែងទំហំ១៧ម x ៥៧.៣០ម ស្ថិតនៅភូមិអូលើ ឃុំមេសរជ្រៃ ស្រុក ស្ទឹងត្រង់ ខេត្តកំពង់ចាម (លេខរៀងក្នុងបញ្ជី ៣៥៨)។ ក្នុងពេលទិញដីនោះ ពីរនាក់ប្តីប្រពន្ធបានខ្ចីលុយឪពុកម្តាយក្មេក (ឪពុកម្តាយរបស់ប្តី) មួយចំនួន ហើយបន្ទាប់មកក៏បានសងគាត់គ្រប់ចំនួនវិញអស់ហើយដែរ។ ថ្លៃទិញដីសរុបមានចំនួនជាង៦ពាន់ដុល្លារ ហើយពេលនោះឪពុកម្តាយក្មេកក៏បានជួយលុយមួយចំនួនតូចដើម្បីបង្រ្គប់ថ្លៃទិញដីអោយកូនបានរស់នៅក្រោយពេលរៀបការ។

ក្រោយពីប្តីស្លាប់ទៅ ឪពុកម្តាយក្មេកក៏បានមកទាមទារយកដីនោះពីកូនប្រសារវិញ ដោយអះអាងថាជាដីគាត់បានទិញយូរហើយ ដោយបានបញ្ជាក់ថាគាត់មានប្លង់រឹងទៀតផង(ធ្វើតាំងពីឆ្នាំ២០១៥) ទើបធ្វើអោយមានវិវាទកើតមានឡើងរវាងកូនប្រសារស្រី និងឪពុកម្តាយក្មេកហើយបានក្តីក្តាំគ្នាតាមផ្លូវតុលាការមកដល់ពេលនេះ។

ក្នុងលិខិតទិញដីគឺដាក់ឈ្មោះប្តី ឡៃ វិរៈ និង បងស្រី ឡៃ ធីតា (មិនមានឈ្មោះប្រពន្ធ)។ ពេលនោះឪពុកម្តាយក្មេកជាអ្នករក្សាទុកក្រដាសស្នាមទិញលក់នៅគាត់។ លោកមេឃុំមេសរជ្រៃក៏បានចេញលិខិតបញ្ជាក់ទិញដីថាពិតជាដីរបស់កូនប្រាកដមែន។ ទន្ទឹមនឹងនោះដែរ លោកមេភូមិអូលើ ឈ្មោះ វ៉ាន វី និង លោកមេឃុំមេសរជ្រៃឈ្មោះ ប៊ីន ថៃលាង និងសាក្សី១០នាក់ទៀតក៏បានបញ្ជាក់អះអាងថា ទូច កញ្ចនា ពិតជាប្រពន្ធ ដែលបានរស់នៅជាមួយប្តីលើដីក្នុងអាស័យដ្ឋានខាងលើពិតប្រាកដអស់រយៈពេល៦ឆ្នាំ (២០១១-២០១៧) ពិតប្រាកដមែន។ ដោយភាពទាល់ច្រកខ្លាចបាត់បង់ទីកន្លែងជ្រកកោនសម្រាប់ខ្លួន និងកូនៗ កាលពីថ្ងៃទី ១៤ កញ្ញា ២០២០ ប្អូនស្រី ទូច កញ្ចនា បានដាក់ពាក្យគោរពសុំសម្តេចតេជោនាយករដ្ឋមន្រ្តីមេត្តាជួយផ្តល់យុត្តិធម៌ដល់រូបគាត់និងកូនតូចៗទាំង២។

រឿងរ៉ាវក្តីក្តាំនេះពិតជាគួរអោយសង្វេគណាស់ ព្រោះជីវិតក្មេងៗ២នាក់ដែលឪពុកស្លាប់បាត់ទៅ ត្រូវនៅក្នុងបន្ទុកម្តាយមេម៉ាយចិញ្ចឹមបីបាច់ថែរក្សា ហើយពេលនេះកំពុងប្រឈមនឹងក្តីក្តាំជាមួយជីដូនជីតានិងជាឪពុកម្តាយក្មេក។ បើឈ្នះក្តី គឺនឹងមានដំបូលស្នាក់នៅបន្តជាមួយម៉ែកូនទាំង២តទៅទៀត ប៉ុន្តែបើចាញ់ក្តីគឺនឹងត្រូវប្រឈមនឹងបាត់បង់ទីកន្លែងជ្រកកោន និងអត់ផ្ទះសម្បែងស្នាក់នៅ រួមទាំងបញ្ហាមួយចំនួនធំទៀត។

ពេលនេះ តុលាការកំពូលបានស្តាប់ហេតុផលគ្រប់យ៉ាង រួមទាំងទទួលស្គាល់ថាប្តីប្រពន្ធជាអ្នកទិញពិតប្រាកដ។ តុលាការកំពូលក៏បានបញ្ជូនសំណុំរឿងនេះទៅឧទ្ធរអោយកាត់ក្តីឡើងវិញ ដើម្បីផ្តល់យុត្តិធម៌ត្រឹមត្រូវជូនពលរដ្ឋរងគ្រោះពិតប្រាកដ។ សង្ឃឹមថាប្អូនស្រីនិងកូនទាំង២ នឹងទទួលបានយុត្តិធម៌ពិតប្រាកដនាពេលដ៏ខ្លីខាងមុខ។ សច្ចធម៌ យុត្តិធម៌ និងមេត្តាធម៌ ត្រូវដើរទន្ទឹមគ្នា ទើបពលរដ្ឋអាចរស់នៅប្រកបដោយសេចក្តីសុខ ក្រោមដំបូលសន្តិភាព។

យើងចូលរួមកសាងអំពើល្អ ចែករំលែកក្តីស្រឡាញ់និងស្នាមញញឹម នឹងសូមមានចិត្តអាណិតស្រឡាញ់ពលរដ្ឋយើងគ្រប់ទីកន្លែងដោយគ្មានការរើសអើង។
អត្ថបទរបស់លោកដួង តារា ជំនួយការផ្ទាល់សម្តេចតេជោហ៊ុន សែន និងជារដ្ឋលេខាធិការទីស្តីការគណរដ្ឋមន្ត្រី៕SRP

ខេត្តកំពង់ចាម៖ក្នុងកិច្ចប្រជុំពិភាក្សា លេីគម្រោងរៀបចំ សួនកុមារសន្តិភាព និងកន្លែងកំសាន្ត ស្ថិតនៅក្នុងភូមិទី៧ សង្កាត់កំពង់ចាម លោក អ៊ុន ចាន់ដា អភិបាលខេត្តកំពង់ចាម បានថ្លែងថា
មិនតម្រូវ ឲ្យមានការ លក់សំបុត្រយកលុយ ពីអ្នកចូលទស្សនា កម្សាន្តនោះទេ។ ប៉ុន្តែអនុញ្ញាត ឲ្យត្រឹមយកលុយសេវា ថែទាំ ពេលចុះលេងក្នុងអាងហែលទឹកតែប៉ុណ្ណោះ។

កិច្ចប្រជុំនេះ បានធ្វេីឡើងនៅថ្ងៃទី១ ខែកុម្ភៈ ឆ្នាំ២០២១ នៅសាលាខេត្តកំពង់ចាម។

លោក អ៊ុន ចាន់ដា បានបន្តថា នេះជាគម្រោង កែលម្អ សួនកុមារ ក្នុងក្រុងកំពង់ចាម ដើម្បីលើកកម្ពស់ សោភ័ណភាពក្រុង និងរៀបចំទីតាំងកម្សាន្ត របស់ ប្រជាពលរដ្ឋ ដោយធានាផាសុកភាព សោភ័ណភាព និងសុវត្ថិភាព ពោលគឺធ្វើយ៉ាងណា
ឲ្យសក្តិសម ជាក្រុង ដែលទទួលបានជ័យលាភី រំដួលបីទង។

បេីតាមគម្រោង របស់អ្នកវិនិយោគ ក្នុងដំណាក់កាលទី១ ចាប់ពីខែ មិនា ឆ្នាំ២០២១ នេះទៅ ត្រូវបានដំណើរការសាងសង់រួមមាន រៀបចំកែលម្អ សួនឡើងវិញ រៀបចំប្រព័ន្ធលូ ប្រព័ន្ធទឹក និងអាងហែលទឹក ចំនួន៣ ដែលមានទំហំ៣០x៣០ម៉ែត្រ ២៥x៣០ម៉ែត្រ និង១០x២០ម៉ែត្រ ហេីយត្រូវ រៀបចំរបងថ្មីជុំវិញ៦០០ម៉ែត្រ ក្រាលការ៉ូ ក្នុងបរិវេណទីធ្លា សាងសង់ កន្លែងក្មេងកំសាន្ត និងបំពាក់សម្ភារបរិក្ខារ សាងសង់អគារអាហារដ្ឋាន និងMinimart និងក្រាលការ៉ូឡាឬការ៉ូជុំវិញបរិវេណកំសាន្ត។

ដោឡែកដំណាក់កាលទី២ ចាប់ពីខែ មករា ឆ្នាំ២០២២ ត្រូវបានដំណើរ ការសាងសងរួមមាន អគារអាហារដ្ឋាន និងMinimart រៀបចំប្រព័ន្ធទឹកស្អាត និងសាងសង់ បង្គន់អនាម័យស្តង់ដារ សាងសង់ខ្លោងទ្វារ និងច្រកសុវត្ថិភាព រៀបចំបណ្តាញអគ្គិសនី និងដាំបង្គោលភ្លើង សាងសង់ បន្ទប់ ប្ដូរសំលៀកបំពាក់ រៀបចំ និងថែរក្សាទុកដើមឈើ ធំឲ្យនៅដដែល និងការគ្រប់គ្រង សំរាមអោយមានអនាម័យល្អ ផងដែរ៕SRP

ខេត្តកំពង់ចាម៖លោកខៀវ កាញារីទ្ធ ប្រធានក្រុមការងារ ថ្នាក់កណ្តាល ចុះជួយស្រុកកោះសូទិន បានក្រើនរំលឹកដល់ អាណាព្យាបាល ត្រូវនាំកូនចៅឲ្យចូលសាលារៀនបានគ្រប់ៗគ្នា។

លោកបន្តថាស្របពេល ជាមួយនឹងរាជរដ្ឋាភិបាល ដែលមានសម្ដេចតេជោ ហ៊ុន សែន ជានាយករដ្ឋមន្ត្រី បានខិតខំសាងសង់សាលារៀន មានច្រើនកម្រិត នៅតាមមូលដ្ឋាន ដើម្បីឆ្លើយតប ទៅនឹងតម្រូវការ របស់សិស្សានុសិស្ស កុំឲ្យពិបាក ក្នុងការទៅសិក្សា នៅឆ្ងាយពីផ្ទះ។ ហើយប្រការដែល ឲ្យកូនចៅបានសិក្សារៀនសូត្រ គឺធ្វើឲ្យពួកគាត់មានចំណេះដឹង ព្រោះថាមានតែចំណេះដឹងនេះហើយ ដែលរុញច្រាន ឲ្យពួកគាត់ឆ្លងផុត ពីភាពល្ងង់ខ្លៅ និងចាកផុតពីភាពក្រីក្រ បានផងដែរ។

លោកអំពាវនាវយ៉ាងដូច្នេះ នៅថ្ងៃទី៣១ ខែមករា ព្រឹកមិញ នេះ ក្នុងឱកាសអញ្ជើញជាអធិបតី ពិធីសម្ពោធ ដាក់ឲ្យប្រេីប្រាស់ អគារស្នាក់ការគណបក្សប្រជាជនកម្ពុជាឃុំល្វេ ស្រុកកោះសូទិន ខេត្តកំពង់ចាម៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម បានបន្តឧបត្ថម្ភនូវប្រាក់បៀរវត្ស រយៈពេល៧ខែ ជូនគណៈកម្មការប្រយុទ្ធប្រឆាំង នឹងជំងឺកូវីដ១៩។

បេីតាមសារលិខិតទាំងស្រុងថា ខ្ញុំបាទ អ៊ុន ចាន់ដា អភិបាលនៃគណៈអភិបាលខេត្តកំពង់ចាម សូមគោរពជូន ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួងដើម្បីប្រយុទ្ធប្រឆាំងនឹងជំងឺកូវីដ-១៩
កម្មវត្ថុ ៖ ស្តីពីការបន្តចូលរួមចំណែកជាថវិកាក្នុងការប្រយុទ្ធប្រឆាំងទៅនឹងជំងឺកូវីដ-១៩។ សេចក្តីដូចមានគោរពជម្រាបជូនក្នុងកម្មវត្ថុខាងលើ ខ្ញុំបាទ មានកិត្តិយសសូមគោរពជម្រាប ជូន ឯកឧត្តមសាស្រ្តចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរ ក្រសួងដើម្បីប្រយុទ្ធប្រឆាំងនឹងជំងឺកូវីដ-១៩ មេត្តាជ្រាបថា៖ ក្នុងកាលៈទេសៈដែលពិភពលោក រួមទាំង កម្ពុជា បាននឹងកំពុងប្រឈម និងទទួលរងការយាយីពីវីរុសដ៏មហាប្រល័យកូវីដ-១៩។ ខ្ញុំបាទ សូមបន្ត បរិច្ចាគប្រាក់បៀវត្សរបស់ខ្ញុំបាទក្នុងតួនាទីជាអភិបាលនៃគណៈអភិបាលខេត្តកំពង់ចាម ចំនួន០៧ខែ (ប្រាំពីរខែ) ចាប់ពីខែកុម្ភៈ ដល់ខែសីហា ឆ្នាំ២០២១ ជូនដល់គណៈកម្មាធិការជាតិប្រយុទ្ធប្រឆាំងនឹងជំងឺ កូវីដ-១៩ ដើម្បីចូលរួមចំណែកជាមួយរាជរដ្ឋាភិបាលកម្ពុជាក្នុងការប្រយុទ្ធប្រឆាំងនឹងវីរុសកូវដ-១៩។
សេចក្តីដូចបានគោរពជូនខាងលើសូម ឯកឧត្តមរដ្ឋមន្ត្រី មេត្តាទទួលជ្រាប និងចាត់ចែងដោយក្តីអនុគ្រោះ៕SRP

ខេត្តកំពង់ចាម៖សមត្ថកិច្ចបានចាប់ខ្លួន ជនដៃដល់ ដែលបានកាប់សម្លាប់គ្នា ជាប្អូនជីដូនមួយ។

ករណីឃាតកម្មនេះ កើតឡើងនៅយប់ថ្ងៃទី២៣ ខែមករា ឆ្នាំ២០២១ ចំណុចភូមិតាំងជ្រៃ ឃុំសណ្ដែក ស្រុកបាធាយ ខេត្តកំពង់ចាម។

ជនរងគ្រោះឈ្មោះ ឌឿន តូច អាយុ៣១ឆ្នាំ មានទីលំនៅនៅភូមិ-ឃុំកើតហេតុខាងលើ។ ចំណែកជនដៃដល់ ឈ្មោះ តឿន ទុំ អាយុ១៩ឆ្នាំ រស់នៅភូមិ-ឃុំ ជាមួយគ្នា។

សមត្ថកិច្ខនគរបាលស្រុកបាធាយបានឲ្យដឹងថា
ការកាប់ប្រហារ ទៅលើជនរងគ្រោះ នេះ បន្ទាប់ពីជនរងគ្រោះ ដើរចេញពីរោងការ មួយកន្លែងទៅយកម៉ូតូ ដែលផ្ញើទុកនៅនឹងផ្ទះពលរដ្ឋ នៅខាងត្បូងរោងការ ដោយដើរតាមផ្លូវលំបានប្រហែល៧០ម៉ែត្រ បម្រុងទៅយកម៉ូតូត្រឡប់ ទៅផ្ទះវិញ ក៏ត្រូវជនល្មើស លបកាប់នឹងកាំបិតបណ្ដាលឲ្យរងរបួសផ្នែកមុខ ជាច្រើន ត្រូវកំភួនដៃ និងដាច់កដៃខាងឆ្វេង។

ក្រោយធ្វើសកម្មភាព ជនដៃដល់ បានរត់គេចខ្លួនបាត់។
ដោយមានការស្រាវជ្រាវ និងយកចិត្តទុកដាក់ នៅវេលាម៉ោង៨និង៣០នាទី យប់ ថ្ងៃទី២៥ មករា ២០២១ កម្លាំងជំនាញបានឃាត់ខ្លួនជនដៃដល់បានជោគជ័យ។

ជនដៃដល់បានឆ្លើយសារភាពថា ខ្លួនពិតជាបានធ្វើសកម្មភាព យកដាវ កាប់ទៅលើ ជនរងគ្រោះ ដែលត្រូវជាបងជីដូនមួយ នេះ ពិតប្រាកដមែន។

មូលហេតុកាប់ច្រឡំ រឿងគំនុំពីថ្ងៃ ជាមួយភ្ញៀវខាងកូនកំលោះ។ ករណីនជំនាញដកហូតបាន ដាវចំនួន០១ ជាវត្ថុតាង។

បច្ចុប្បន្ន អធិការដ្ឋាននគរបាល ស្រុកបាធាយ កសាងសំណុំរឿងតាមនីតិវិធី៕SRP

ខេត្តកំពង់ចាម៖ថ្លែងក្នុងកិច្ចប្រជុំបូកសរុបលទ្ធផលការងារប្រចាំឆ្នាំ២០២០ និងលើកទិសដៅបន្ត ឆ្នាំ២០២១ របស់សាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ ខេត្តកំពង់ចាម កាលពីរសៀលថ្ងៃទី២៥ ខែមករា ម្សិលមិញ លោកស្រី ញូង ចរិយា អ៊ុន ចាន់ដា បានសាទរ លទ្ធផលរបស់សាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្តកំពង់ចាម សម្រចបានទាំងអស់ គឺបានឆ្លុះបញ្ចាំងអំពីការចូលរួមចំណែកគាំទ្រ គោលនយោបាយ របស់រាជរដ្ឋាភិបាល។

លោកស្រីញូង ចរិយា អ៊ុន ចាន់ដា ប្រធានកិត្តិយសសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ខេត្ត បានថ្លែងនូវការកោតសរសើរចំពោះថ្នាក់ដឹកនាំសាខា ដែលបានដឹកនាំ និងខិតខំប្រឹងប្រែង ជម្នះពុះពារបំពេញភារកិច្ចបានយ៉ាងល្អ ក្នុងការសម្រួលទុក្ខលំបាករបស់ស្រ្តី និងជនងាយរងគ្រោះ ក្នុងខេត្តកំពង់ចាម។ លទ្ធផលទាំងអស់នេះ គឺឆ្លុះបញ្ចាំងអំពីការចូលរួមចំណែកគាំទ្រគោលនយោបាយ របស់រាជរដ្ឋាភិបាល ក៏ដូចជាគណបក្សប្រជាជនកម្ពុជា ផងដែរ។

លោកស្រី ក៏បានសំណូមពរ ដល់ថ្នាក់ដឹកនាំ សមាជិកាសាខា សមាគមនារីកម្ពុជា ដើម្បីសន្តិភាព និងអភិវឌ្ឍន៍ ខេត្តកំពង់ចាម ឲ្យយកចិត្តទុកដាក់ ផ្តោតលើការងារសំខាន់ៗ គឺត្រូវចេះការពារខ្លួន និងធ្វើអនាម័យជាប្រចាំ ដើម្បីចៀសផុតពីជម្ងឺគ្រប់ប្រភេទ ពិសេសជម្ងឺ COVID-19 នឹង ត្រូវបន្តអនុវត្តឲ្យបានជោគជ័យនូវទិសដៅការងារឆ្នាំ២០២១ របស់សាខា និងពង្រឹងរចនាសម្ព័ន្ធ រក្សាស្មារតី សាមគ្គីភាព ឯកភាពផ្ទៃក្នុងឲ្យកាន់តែរឹងមាំ ព្រមទាំងរួមគ្នាថែរក្សា សុខសន្តិភាព និងទប់ស្កាត់ឲ្យបាននូវមហិច្ឆតាអាក្រក់ទាំងឡាយ ដែលប៉ុនប៉ងបង្កចលាចល បំផ្លាញសន្តិសុខសណ្តាប់ធ្នាប់សង្គម៕SRP

ខេត្តកំពង់ចាម៖ក្រុកម្លាំងបោសសម្អាត បានរកឃើញ គ្រាប់យុទ្ធភ័ណ មិនទាន់ផ្ទុះជាង៦តោន នឹងសម្ភារមួយចំនួន នៅនាវាច្បាំងបន្សល់ទុកពីសម័យសាធារណរដ្ឋខ្មែរ ឆ្នាំ១៩៧០-១៩៧៥។

ការរកឃើញនេះ នៅក្នុងទឹកទន្លេមេគង្គ ស្ថិតក្នុងភូមិវាល ឃុំមានជ័យ ស្រុកស្រីសន្ធរ ខេត្តកំពង់ចាម។

លោកឧត្តមសេនីយ៍ទោ ម៉ី សុភា មេបញ្ជាការបោសសម្អាត គ្រាប់មិនទាន់ផ្ទុះ នៃមជ្ឈមណ្ឌលជាតិគ្រប់គ្រង កងកម្លាំងរក្សាសន្តិភាព បោសសម្អាតមីន និងកាកសំណល់សង្គ្រាម (NPMEC) បានថ្លែងគ្រាប់យុទ្ធភណ្ឌ ដែលកម្លាំងជំនាញប្រមូលបានជាង ៦តោននេះ រួមមាន គ្រាប់ត្បាល់ ៨១មីលីម៉ែត្រ គ្រាប់ត្បាល់៦០មីលីម៉ែត្រ និងគ្រាប់កាំភ្លើងយន្ត ១២,៧មីលីម៉ែត្រ។ ក្នុងនោះក៏បាន រកឃើញវត្ថុតាងរួមមាន មួកដែក កាំបិតកងទ័ព ស្លាកឈ្មោះរបស់ទាហាន លន់ ណុល ផងដែរ។

លោកឧត្តមសេនីយ៍ទោ ម៉ី សុភា ក៏បានលើកឡើងអំពីបញ្ហា និងឧបសគ្គ មួយចំនួន ដែលតម្រូវ ឲ្យក្រុមការងារជំនាញ សិក្សាបន្ថែម ព្រោះមានគល់ឈើ គល់ឬស្សី ព្រមទាំងសំណល់ឧបករណ៍ នេសាទចាស់ៗ ជាច្រើន បានដាច់ មកតោងជាប់នឹងនាវា។ ជាហេតុធ្វើឲ្យមានការលំបាក ក្នុងការប្រមូល កាក់សំណល់សង្គ្រាម គ្រាប់យុទ្ធភ័ណ មិនទាន់ផ្ទុះចេញពីខ្មោចនាវាចម្បាំងនេះ។ ទោះជាយ៉ាងណារហូតមកដល់ពេលនេះ គឺកម្លាំងជំនាញ បាននិងកំពុងប្រតិបត្តិការ លេីការងារនេះ យ៉ាងក្តៅគគុក ដោយបានបោសសម្អាត គ្រាប់យុទ្ធភណ្ឌមិនទាន់ផ្ទុះ នៅក្រោមផ្ទៃទឹកជុំវិញ ទីតាំងនាវាលិចនេះ មានទំហំ១,០០០ម៉ែត្រ គុណ ១,៥០០ម៉ែត្រ នៅតាមបណ្តោយដងទន្លេ ប្រមាណជា១៥០ហិកតា។

គួររំលឹកថា បន្ទាប់ពីក្រុមហ៊ុន គ្លូបប៊លហ្គ្រីន បានបូមខ្សាច់ នៅតំបន់នោះ ដេីម្បីដឹកយកទៅរាជធានីភ្នំពេញ បានប្រទះឃើញ គ្រាប់យុទ្ធភ័ណមិនទាន់ផ្ទុះ ជាច្រើនគ្រាប់ គឺមាន ១-គ្រាប់AK57ចំនួន៣គីឡូក្រាម ២-គ្រាប់៦០មីលីម៉ែត្រ ចំនួន១៦គ្រាប់ និងគ្រាប់៨០មីលីម៉ែត្រ ១គ្រាប់។

ពាក់ព័ន្ធករណីនេះ អាជ្ញាធរមូលដ្ឋាន និងជំនាញ មន្ត្រីស៊ីម៉ាក់ និងក្រុមមុជទឹក បានមកពិនិត្យទីតាំងបូមខ្សច់នោះ ជម្រៅប្រមាណជា១៩ម៉ែត្រ។ ក្រុមជំនាញបានពិនិត្យឃើញទ្រង់ទ្រាយជា ម៉ារីន (នាវាចម្បាំង) មួយគ្រឿងនេះ។

ជាមួយគ្នានោះ លោក អ៊ុន ចាន់ដា អភិបាលខេត្តកំពង់ចាម ក៏បានស្នើសុំគោលការណ៍ ពីសំណាក់ប្រមុខរាជរដ្ឋាភិបាល កម្ពុជា សម្តេចតេជោ ហ៊ុន សែន ដេីម្បី បង្កេីតក្រុមការងារ អន្តរក្រសួង ចុះសិក្សា និងដោះស្រាយ លើករណីនេះ៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម បានអញ្ជើញជួបជាមួយប្រតិភូ ក្រសួងកសិកម្ម រុក្ខាប្រមាញ់ និងនេសាទ ដេីម្បីរៀបចំនីតិវិធីស្តីពីការស្នើសុំធ្វើប័ណ្ណកម្មសិទ្ធិ គ្រប់គ្រងដីធ្លី ពីប្រជាពលរដ្ឋ ដែលកំពុងអាស្រ័យផលលេីដីរបស់រដ្ឋ ក្នុងភូមិសាស្ត្រ ខេត្តកំពង់ចាម។

កិច្ចជំនួបពិភាក្សានេះ ធ្វេីឡើង នៅថ្ងៃទី២៥ ខែមករា ព្រឹកមិញនេះ នៅសាលាខេត្តកំពង់ចាម ដោយមានការចូលរួមពីអភិបាលរងខេត្ត នាយករដ្ឋបាល ប្រធានមន្ទីរកសិកម្ម រុក្ខាប្រមាញ់ និងនេសាទ រួមនឹងមន្ត្រីពាក់ព័ន្ធផងដែរ។

គួររំលឹកផងដែរថា ក្នុងអំឡុងដើមខែមករា ឆ្នាំ២០២១ កន្លងទៅថ្មីៗនេះ អភិបាលខេត្តកំពង់ចាម បានធ្វើការណែនាំដល់មន្ត្រីជំនាញ ក៏ដូចជាអាជ្ញាធរពាក់ព័ន្ធ ឲ្យបន្តរួមគ្នា ដេីម្បីការពារដីធ្លីជាកម្មសិទ្ធិ របស់រដ្ឋ ក៏ដូចជាផ្ទៃបឹងធម្មជាតិនានា ដែលថ្នាក់ដឹកនាំគ្រប់ជំនាន់ បានរក្សាទុក្ខ សម្រាប់ជាប្រយោជន៍ ដល់កូនចៅជំនាន់ក្រោយៗ ដោយមិនត្រូវអនុញ្ញាត ឲ្យជនឆ្លៀតឱកាស រំលោភបំពាន យកបានឡេីយ៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម នៅថ្ងៃទី២៣ ខែមករា ម្សិលមិញ បានដឹកនាំក្រុមការងារ អញ្ជេីញចុះពិនិត្យ កសិដ្ឋានចិញ្ចឹមសត្វ ស្ថិតនៅក្នុងឃុំស្រក ស្រុកកំពង់សៀម នឹងផ្លូវក្រាលកៅស៊ូប្រភេទDBSផងដែរT

បេីតាមមន្ត្រីរដ្ឋបាលសាលាខេត្តកំពង់ចាម បានបញ្ជាក់ថា លោក អ៊ុន ចាន់ដា រួមជាមួយអភិបាលរងខេត្ត និងមន្ទីរពាក់ព័ន្ធ អ្នកបច្ចេកទេស និងអាជ្ញាធរមូលដ្ឋាន បានចុះពិនិត្យផ្លូវដែលជាសមទ្ធិផល របស់រាជរដ្ឋាភិបាលតាមរយ: ក្រសួងអភិវឌ្ឍន៍ជនបទ នៅក្នុងខេត្តកំពង់ចាម ដោយបានចុះពិនិត្យផ្លូវប្រវែង២៨គីឡូម៉ែត្រ ពីភ្នំហាន់ជ័យ ឃុំហាន់ជ័យ ស្រុកកំពង់សៀម ដល់ផ្លូវ៧១C កាត់ឃុំទួលព្រះឃ្លាំង និងឃុំសូភាស ស្រុកស្ទឹងត្រង់ ដែលកំពុងអនុវត្តដោយក្រាលកៅស៊ូប្រភេទDBST (ជាថវិកាពហុឆ្នាំរបស់នាយកដ្ឋាន)។

គួរបញ្ជាក់ថា ទន្ទឹមនឹងការចុះពិនិត្យផ្លូវខាងលេីនេះ លោកអភិបាលខេត្ត ក៏បានដឹកនាំក្រុមការងារ ជាមួយនឹងមន្ត្រីពាក់ព័ន្ធ ចុះពិនិត្យទីតាំងចិញ្ចឹមសត្វជ្រូក និងសត្វមាន់ និងការដាំដុះដំណាំផ្សេងៗ របស់ប្រជាពលរដ្ឋ នៅក្នុងភូមិសាស្ត្រ ឃុំស្រក ស្រុកកំពង់សៀមផងដែរ៕SRP

ខេត្តកំពង់ចាម៖ក្នុងពិធីបេីកការដ្ឋានស្ថាបនាផ្លូវកៅស៊ូពីរជាន់ប្រភេទDBST ១ខ្សែ ប្រវែង៦.៥៥០ម៉ែត្រ ពីភូមិបឹងបាសាក់ សង្កាត់សំបួរមាស ក្រុងកំពង់ចាម ដល់ភូមិអូរឈ្លេីង ឃុំកោះរការ ស្រុកកំពង់សៀម និងសម្ពោធដាក់ឲ្យប្រេីប្រាស់ជាផ្លូវការ ផ្លូវក្រាលកៅស៊ូប្រភេទAC ចំនួន៤ខ្សែ ប្រវែង៤៤១៥ម៉ែត្រ ក្នុងក្រុងកំពង់ចាម នៅថ្ងៃទី២១ ខែមករា ព្រឹកមិញនេះ
លោក អ៊ុន ចាន់ដា អភិបាលខេត្តកំពង់ចាម បានថ្លែងថា មានផ្លូវមានក្តីសង្ឃឹម ទីណាមានការអភិវឌ្ឍ ទៅដល់ ទីនោះ តែងតែមានការរីកចម្រើន ដោយជីវភាព ប្រជាពលរដ្ឋ កាន់តែប្រសើរឡើង ព្រោះផ្លូវគឺជាសរសៃឈាម នៃសេដ្ឋកិច្ចយ៉ាងសំខាន់។

លោក អ៊ុន ចាន់ដា បានថ្លែងថា ដោយសារប្រទេសជាតិ យើងមានសុខសន្តិភាព ក្រោមការដឹកនាំប្រកបដោយគតិបណ្ឌិត របស់សម្តេចតេជោ ហ៊ុន សែន ទេីបមានការអភិវឌ្ឍ រីកចម្រើនជាបន្តបន្ទាប់។ ដូច្នេះទេសូមពុកម៉ែបងប្អូន ជឿទុកចិត្តគ្នា ទៅវិញ ទៅមក ជាមួយអាជ្ញាធរនៅទីនេះចុះ ដេីម្បីយេីងបន្តរួមគ្នា ធ្វើការអភិវឌ្ឍ រីកចម្រើន តទៅមុខទៀត ដោយមិនមានការភូតកុហកបោកប្រាស់ ឬមួយរត់ចោលពុកម៉ែបងប្អូននោះឡើយ។

អភិបាលខេត្ត បានធ្វេីការណែនាំ ដល់មន្ត្រីបច្ចេកទេស ក៏ដូចជាអាជ្ញាធរពាក់ព័ន្ធ ដោយលេីកឡើងថា ផ្លូវ១ខ្សែនេះយេីងអាចចាត់ទុកជាផ្លូវក្រវ៉ាត់ក្រុង។ ដូច្នេះត្រូវធ្វើឲ្យបានឆាប់រួចរាល់ មិនឲ្យផុតពីឆ្នាំ២០២១នេះទេ ហេីយធ្វើយ៉ាងណាត្រូវឲ្យបានស្អាតល្អ ទាំងមានគុណភាពរឹងមាំ ប្រយោជន៍ ដល់ការប្រេីប្រាស់ បានយូរអង្វែងផង ហេីយសូមធ្វើចលនា ដល់ប្រជាពលរដ្ឋ ឲ្យចូលរួមដាំដេីមឈេីលំអរតាមដងផ្លូវផងដែរ។

អភិបាលខេត្ត ក៏បានសំណូមពរ ដល់បងប្អូនប្រជាពលរដ្ឋថា ផ្លូវនេះជាផ្លូវរបស់ពុកម៉ែបងប្អូនហេីយ ដូច្នេះសូមប្រេីប្រាស់តាមតំរូវការចុះ តែសូមចូលរួមថែទាំផង ជាពិសេស ពេលបានផ្លូវល្អហើយ សូមអប់រំកូនចៅឲ្យបេីកបរ ដោយមានការប្រុងប្រយ័ត្នផងដែរ៕SRP

ខេត្តកំពង់ចាម៖នៅទីស្នាក់ការសាខាកាកបាទក្រហមកម្ពុជា ខេត្តកំពង់ចាម នាថ្ងៃទី២០ ខែមករា ឆ្នាំ២០២១ នេះ បានកិច្ចប្រជុំបូកសរុប លទ្ធផល សកម្មភាព ប្រចាំឆ្នាំ២០២០ និងទិសដៅ សម្រាប់អនុវត្តការងារ ឆ្នាំ ២០២១ ក្រោមវត្តមាន លោក អ៊ុន ចាន អភិបាលខេត្ត និងជាប្រធានគណៈកម្មាធិការសាខាកាកបាទក្រហមខេត្ត។

ក្នុងកិច្ចប្រជុំនេះដែរ លោក អ៊ុន ចាន់ដា បានសម្តែងការកោតសរសើរ និងវាយតម្លៃខ្ពស់ ចំពោះថ្នាក់ដឹកនាំ រួមទាំងមន្ត្រីក្រុមប្រតិបត្តិ ដែលបានខិតខំបំពេញភារកិច្ចយ៉ាង សកម្ម ធ្វើជាសេនាធិការ អោយគណៈ កម្មាធិការសាខា ក្នុងការដឹកនាំជំរុញ ធ្វើអោយវិស័យស្នូលទាំង ៤ របស់កាកបាទក្រហមកម្ពុជា រយៈពេល ១ឆ្នាំ នេះ ទោះបីមានការរំខានពីវិបត្តិកូវីដ១៩ យ៉ាងណាក្តី ក៏សាខា បានពុះពារធ្វើសកម្មភាព រហូតសម្រេចបានលទ្ធផល គួរជាទីមោទនភាព។ ពិសេស ការផ្តល់ជំនួយសង្រ្គោះ ផ្តល់អំណោយមនុស្សធម៌ ជូនជនរងគ្រោះ ដោយមហន្តរាយផ្សេងៗ និងជនងាយរងគ្រោះ ដែលខ្វះខាតជីវភាព បានទាន់ពេលវេលា ស្របតាមទិសស្លោក” ទីណាមានទុក្ខលំបាក ទីនោះ មានកាកបាទក្រហមកម្ពជា “។
ជាមួយនេះ សាខា ក៏បានរួមចំណែកជាមួយរដ្ឋាភិបាលកម្ពុជា ក្នុងកិច្ចសហការ ដឹកនាំកម្លាំងយុវជនកាកបាទក្រហមកម្ពុជា និងអ្នកស្ម័គ្រចិត្ត ចុះ អប់រំផ្សព្វផ្សាយអំពីសុវត្ថិភាពចរាចរណ៍ផ្លូវគោក រួមជាមួយការ អប់រំសុខភាព ពាក់ព័ន្ធទៅនឹងវិធានការកាត់បន្ថយហានិភ័យ នៃការឆ្លងជម្ងឺកូវីដ19 – ជម្ងឺគ្រុនឈីក គ្រុនឈាម នៅតាមភ្លើងស្តុបនានាក្នុងក្រុង និងនៅតាមមូលដ្ឋាន នានា ក្នុងទូទាំងខេត្ត ផងដែរ។

លោកបានបញ្ជាក់បន្ថែមថា ចំពោះផែនការអភិវឌ្ឍសកម្មភាព ឆ្នាំ២០២១ នេះ គឺ សាខា បានរៀបចំ មាន ១៩គោលដៅ និង ៣៩ សកម្មភាព ដើម្បីអោយសម្រេច បាននូវទិសយុទ្ធសាស្ត្រទាំង ៤ របស់កាកបាទក្រហមកម្ពុជា ស្របទៅនឹងលទ្ធភាពថវិកា របស់សាខា។ យើងរៀបចំបាន នូវផែនការ មានន័យថា យើងសម្រេចលទ្ធផល បាន ៤០% ហើយ នៅសល់ ៦០% ទៀត គឺជាការប្រតិបត្តិជាក់ស្តែង និង ទេពកោសល្យដឹកនាំ របស់មន្ត្រីយើង តែប៉ុណ្ណោះ។

លោកក៏បានណែនាំអំពីការងារមួយចំនួន សម្រាប់អនុវត្តបន្ត ពិសេស ត្រូវយកចិត្តទុកដាក់ បន្តការអប់រំផ្សព្វផ្សាយអំពីសុវត្ថិភាពចរាចរណ៍ផ្លូវគោក រួមជាមួយការបន្តចូលរួមអនុវត្ត វិធានការរបស់ក្រសួងសុខាភិបាល ដើម្បី ទប់ស្កាត់ការឆ្លងរាលដាលនៃជម្ងឺកូវីដ19 អោយបានជាប្រចាំ – ត្រូវពង្រឹងភាពម្ចាស់ការរបស់សាខា-អនុសាខាក្រុង ស្រុក រួមជាមួយការ ពង្រឹង និងពង្រីកបណ្តាញយុវជន អ្នកស្ម័គ្រចិត្ត កាកបាទក្រហមកម្ពុជា ក្នុងការឆ្លើយតប ត្រៀមបង្ការ និងកសាងភាពធន់មាំនៅសហគមន៍។ ទន្ទឹមនោះ ត្រូវពង្រឹងការគ្រប់គ្រងមូលនិធិ គ្រប់គ្រង ចំណូល ចំណាយ ការទូទាត់ អោយមាន តម្លាភាព និងគណនេយ្យភាព៕SRP