ខេត្តកំពង់ចាម – Page 35

ខេត្តកំពង់ចាម៖លោក លី ម៉េងសាន ប្រធានមន្ទីរអប់រំយុវជននិងកីឡាខេត្តកំពង់ចាម បានឲ្យដឹងថា សិស្សានុសិស្សដែលរៀនថ្នាក់ទី១២ ហេីយត្រូវប្រលងបាក់ឌុបឆ្នាំ២០២១នេះ សម្រាប់ទូទាំងខេត្ត មានចំនួនជាង៧ពាន់នាក់ ដែលចំនួនបេក្ខជនដែលបានដាក់ពាក្យប្រលងទុតិយភូមិឆ្នាំ២០២១នេះ មានការថយចុះច្រេីន បេីប្រៀបធៀបទៅនឹងឆ្នាំកន្លងទៅ ដោយមណ្ឌលប្រលងក្នុងខេត្តកំពង់ចាម បានបែងចែកជា២ផ្នែក ក្នុងនោះមានថ្នាក់វិទ្យាសាស្ត្រមានចំនួនបេក្ខជន២៨៣០នាក់ ដែលមាន៥មណ្ឌល ស្មេីនឹង១១៥បន្ទប់ និងថ្នាក់វិទ្យាសាស្ត្រសង្គម មានចំនួន៤២៨១នាក់ ដែលមាន៧មណ្ឌល ស្មេីនឹង១៧២បន្ទប់ផងដែរ។

សូមជម្រាបថានៅព្រឹកមិញអភិបាលខេត្តកំពង់ចាម លោក អ៊ុន ចាន់ដា បានអញ្ជើញកាត់បើកវិញ្ញាសារប្រឡងមធ្យមសិក្សាទុតិយភូមិ នាសម័យប្រឡង ថ្ងៃទី២៧ ខែធ្នូ ឆ្នាំ២០២១នេះ នៅវិទ្យាល័ ព្រះសីហនុ ស្ថិតក្នុងក្រុងកំពង់ចាម។

ក្នុងឱកាសនោះ លោក អ៊ុន ចាន់ដា បានជូនពរដល់បេក្ខជនទាំងអស់ ឲ្យបានទទួលលទ្ធផលជាប់និងជោគជ័យ ហើយកុំភ័យខ្លាចអ្វីឡើយ ត្រូវតាំងអារម្មណ៍ គិតតែខិតខំប្រឹងប្រែងសរសេរដើម្បីយកនិទ្ទេសល្អ ដើម្បីឈានដល់ទទួលបានអាហាររូបករណ៍ និងបន្តទៅរៀននៅមហាវិទ្យាល័យបន្ថែមទៀត៕SRP

ខេត្តកំពង់ចាម៖លោកស្រី តោ ពិឡា ទីប្រឹក្សាក្រសួងពាណិជ្ជកម្ម និងជាប្រធានក្រុមការងាររាជរដ្ឋាភិបាលចុះមូលដ្ឋានឃុំបឹងណាយ ស្រុកព្រៃឈរ ខេត្តកំពង់ចាម នៅថ្ងៃទី២៦ ខែធ្នូ ម្សិលមិញ បានចែកភួយជូនប្រជាពលរដ្ឋចំនួន៦ភូមិ និងផ្ដល់ថវិកាមួយចំនួនជូនស្ត្រីទេីបសម្រាលកូនផងដែរ។

ឆ្លៀតក្នុងឱកាសនោះដែរ លោកស្រី តោ ពិឡា បានលេីកឡេីងថា ជារៀងរាល់ឆ្នាំនៅពេលធ្លាក់ខ្យល់ត្រជាក់ ប្រជាពលរដ្ឋមានការឆ្លងនូវជំងឺផ្តាសាយ ក៏ប៉ុន្តែឆ្នាំកន្លងមក ក៏ដូចឆ្នាំនេះ កម្ពុជាក៏ដូចជាពិភពលោកទាំងមូល មានការគំរាមកំហែងដោយជំងឺកូវីដ-១៩ ហើយនៅពេលចុះត្រជាក់ប្រជាជនយើងអាចប្រឈមនឹងជីងឺផ្តាសាយ ។ ដូច្នេះយើងត្រូវការគ្រប់គ្រងជំងឺស្តាសាយ និងជំងឺកូវីដ-១៩ទាំងអស់គ្នា។ តាមការព្យាករណ៍កម្ពុជា មានការចុះត្រជាក់ជាងឆ្នាំកន្លងមក ទើបសម្តេចតេជោបានធ្វើការណែនាំដល់អាជ្ញាធរមូលដ្ឋានយកអាវរងារ ភួយ ចែកជូនចាស់ជរា និងប្រជាពលរដ្ឋក្រីក្រនៅតាមមូលដ្ឋាន ដើម្បីទប់ទល់នឹងភាពត្រជាក់ ហើយនេះជាការគិតគូរគ្រប់ជ្រុងជ្រោយរបស់ សម្តេចតេជោ ជូនចំពោះចាស់ជរា និងប្រជាពលរដ្ឋក្រីក្រនៅទូទាំងប្រទេស ក៏ជាការឆ្លុះបញ្ចាំងពីការយកចិត្តទុកដាក់ និងដោះស្រាយឆ្លើយតបបានទាន់ពេលវេលា។

លោកស្រី បានកោតសរសើរអាជ្ញាធរឃុំបឹងណាយ ដែលតែងតែគិតគូរពីការងារសន្តិសុខ សុវត្ថិភាព និងបរិស្ថាននៅមូលដ្ឋាន ជាពិសេស គឺសុខទុក្ខរបស់បងប្អូនប្រជាពលរដ្ឋក្រីក្រ និងចាស់ជរានៅក្នុងមូលដ្ឋាន និងឈ្វេងយល់ពីការលំបាក ការខ្វះខាតរបស់លោកយាយ លោកតា គ្រប់ពេលវេលា សូមលោកតា លោកយាយ បន្តគាំទ្រដល់ពួកគាត់ ដើម្បីគាត់មានលទ្ធភាពបម្រើបងប្អូនបន្តទៀត។

គួរបញ្ជាក់ថា អំណោយភួយផ្តល់ជូនប្រជាពលរដ្ឋក្រីក្រ និងចាស់ជរាគ្មានទីពឹងចំនួន ៧០នាក់ មកពី៦ភូមិ ក្នុងឃុំបឹងណាយ និងជូនថវិកាដល់ស្ត្រីទើបសម្រាលកូនចំនួន ១៣នាក់ និងជូនគ្រួសារមរណៈភាព ២គ្រួសារ ដោយក្នុង១គ្រួសារ ទួលថវិកា ១០០.០០០រៀល ផងដែរ៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម បានប្រាប់អាជ្ញាធរស្រុកស្រីសន្ធរ ត្រូវបន្តការថែរក្សាសន្តិសុខសណ្តាប់ធ្នាប់ ជូនប្រជាពលរដ្ឋ ឲ្យបានល្អប្រសើរ ពោលគឺត្រូវខិតខំលប់បំបាត់រាល់សកម្មភាពបទល្មើស ល្បែងស៊ីសងខុសច្បាប់គ្រប់ប្រភេទ ដែលមានដូចជាការបញ្ជល់មាន់ ឬល្បែងកន្ទុយលេខជាដើម ព្រោះវាមិនចំណេញដល់ប្រជាពលរដ្ឋ និងគោលនយោបាយ ភូមិឃុំ មានសុវត្ថិភាពឡេីយ។

លោក អ៊ុន ចាន់ដា ក៏បានណែនាំដល់មន្ត្រីត្រូវបង្រួមនីតិវិធីធ្វើយ៉ាងណា ឲ្យបានស្រួលក្នុងការបម្រើសេវារដ្ឋបាលជូនប្រជាពលរដ្ឋ ឲ្យបានលឿន ប្រកបដោយប្រសិទ្ធភាព គុណភាព និងការជឿទុកចិត្ត។

ការលើកឡើងដូច្នេះក្នុងពិធីសម្ពោធដាក់ឲ្យប្រើប្រាស់ជាផ្លូវការនូវអគារស្នាក់ការគណបក្សប្រជាជនកម្ពុជា ឃុំកោះអណ្ដែត ស្រុកស្រីសន្ធរ នៅព្រឹកមិមិញនេះ។

លោក អ៊ុន ចាន់ដា ក៏បានណែនាំដល់អាជ្ញាធរមូលដ្ឋាន ឲ្យបន្តការយកចិត្តទុកដាក់ ក្នុងការបង្កើននូវប្រសិទ្ធភាព និងគុណភាព នៃការផ្ដល់សេវារដ្ឋបាលថ្នាក់ឃុំ ជំរុញធ្វើយ៉ាងណាកុំឲ្យប្រជាពលរដ្ឋ មានការត្អូញត្អែរ ព្រោះតែអូសបន្លាយពេលវេលា ដេីម្បីចង់បានលាភសក្ការៈមិនសមស្រប ទៅតាមការកំណត់នៃច្បាប់ ពោលគឺត្រូវបង្រួមនីតិវិធីឲ្យបានស្រួល ដោយស្រួលទាំងការផ្តល់សេវា ហេីយប្រជាពលរដ្ឋក៏ស្រួលក្នុងការទទួលសេវាផងដែរ។

អភិបាលខេត្ត ក៏បានប្រកាសផ្តល់ផ្លូវបេតុងអាមេមួយខ្សែជូនប្រជាពលរដ្ឋ ក្នុងឃុំកោះអណ្ដែត ព្រមទាំងជំរុញដល់មន្ត្រីពាក់ព័ន្ធ ឲ្យបន្តធ្វើការកសាងផ្លូវបេតុងបន្ថែមទៀត និងស្តារច្រាំងទន្លេដែលរងការបាក់ស្រុត ដេីម្បីដោះស្រាយបញ្ហាប្រឈមនៅមូលដ្ឋាន។

ក្នុងនាមសមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានគណៈកម្មាធិការគណបក្សខេត្តកំពង់ចាម លោក អ៊ុន ចាន់ដា បានថ្លែងអំណរគុណ និងវាយតម្លៃខ្ពស់ចំពោះ លោក លោកស្រី ប្រធាន អនុប្រធាន សមាជិកក្រុមការងារចុះជួយឃុំកោះអណ្ដែត និងសប្បុរសជន ដែលមានស្មារតីលះបង់ក្នុងការបរិច្ចាគថវិកាផ្ទាល់ខ្លួន ដេីម្បីរួមគ្នាដំណើរការកសាងស្នាក់ការបក្ស ដែលសរុបជាង៥០ម៉ឺនដុល្លារ ដេីម្បីសាងសង់សមិទ្ធផលអគារនេះ និងរបងការពារផងដែរ៕SRP

ភ្នំពេញ៖សម្ដេចស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក បានមានប្រសាសន៍ទទួលស្គាល់ថា ប៉ូលិសចរាចរណ៍ ពិតជាមានភាពលំបាក ដោយសារពួកគាត់ធ្វើការទាំងយប់ ទាំងថ្ងៃ ហើយហាលភ្លៀង ហាលក្តៅ ទោះបីប្ដូរវេនគ្នាក៏ដោយ ហើយមានភាពតស៊ូ។

សម្ដេចស ខេង មានប្រសាសន៍បញ្ជាក់បន្តថា «ប៉ូលិសចរាចរណ៍ គ្នាពិបាកណាស់ ហើយប៉ូលិសចរាចរណ៍ហ្នឹងមែនទែនទៅ គឺធ្វើការទាំងយប់ និងទាំងថ្ងៃ នៅប្រចាំការ ភ្លៀងផងក៏នៅនឹង ពេលក្ដៅក៏នៅនឹង ហើយមានអ្នកប្ដូរវេន ហើយពេលខ្លះវេនយប់ ចឹងទៅ អ្នកខ្លះក្រោកពីព្រលឹមឃើញថា តស៊ូ»។

សម្ដេចបានបញ្ជាក់ថា កត្តាផ្លូវខ្វះស្លាកសញ្ញា គំនូសសញ្ញា នៅតាមដងផ្លូវជាតិ និងផ្លូវជនបទ បានបង្កជាការលំបាកដល់ការបើកយានយន្ដ បញ្ហាទាំងនេះដោយសារតែខ្វះថវិកា ប៉ុន្ដែទោះបីយ៉ាងណាក៏ដោយ ត្រូវដោះស្រាយ ហើយកិច្ចការនៅសេសសល់ក្រសួងសាធារណការ និងដឹកជញ្ជូន ក៏ដូចជា រដ្ឋបាលរាជធានី-ខេត្ត ខិតខំបន្ដទៀត ពីព្រោះបញ្ហានឹងជាចំណុចមួយសំខាន់ផងដែរ។

សម្ដេចបានពន្យល់បន្ថែមថា បើនៅតាមដងផ្លូវអត់មានស្លាកសញ្ញា នៅពេលប៉ូលិសចរាចរណ៍ទៅចាប់ គេសួរថា មានអ្វីជាសម្អាងមកឃាត់ខ្ញុំ ពីព្រោះផ្លូវនឹងអត់ស្លាកសញ្ញាផង។ សម្ដេចក្រឡាហោម ក៏បានស្នើដល់ក្រសួងសាធារណការ និងដឹកជញ្ជូន ដើម្បីពិនិត្យនឹងជំរុញការងារបន្ដទៀត ក្នុងការដាក់ស្លាកសញ្ញាចរាចរណ៍ និងគំនូសសញ្ញាចរាចរណ៍បន្ថែមទៀត។

សម្ដេចស ខេង មានប្រសាសន៍ទទួលស្គាល់បែបនេះ ក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងពិធីទិវាអន្តរជាតិរំលឹកដល់ជនរងគ្រោះ ដោយគ្រោះថ្នាក់ចរាចរណ៍ផ្លូវគោក លើកទី១៦ នៅស្រុកជើងព្រៃ ខេត្តកំពង់ចាម នាព្រឹកមិញនេះ៕SRP

ខេត្តកំពង់ចាម៖សម្ដេចស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពជាតិចរាចរណ៍ផ្លូវគោក ក្នុងឱកាសអញ្ជើញជាអធិបតីនៃពិធី «ទិវាអន្តរជាតិរំលឹកដល់ជនរងគ្រោះដោយគ្រោះថ្នាក់ចរាចរណ៍ផ្លូវគោកលើកទី១៦» ប្រារព្ធនៅស្រុកជើងព្រៃ ខេត្តកំពង់ចាម នៅព្រឹក នៅតែបង្ហាញក្ដីបារម្ភចំពោះកំណើនគ្រោះថ្នាក់ជាក្រុម ដូចជាការបាត់បង់ជីវិតគ្រួសារចំនួន៧នាក់នៅស្រុកជំគិរី និងការបាត់បង់ជីវិត៥នាក់នៅផ្លូវជាតិលេខ៣ក្រុងបូគោ ខេត្តកំពត ការបាត់បង់ជីវិត៥នាក់នៅផ្លូវជាតិលេខ៥ស្រុកមោងឬស្សី និងករណីគ្រោះថ្នាក់ចរាចរណ៍រថយន្តដឹកកម្មករតាមបណ្ដាខេត្តមួយចំនួន។ សម្ដេចកត់សំគាល់ថាមូលហេតុនៃគ្រោះថ្នាក់នេះ គឺបណ្ដាលមកពីបើកបរលើសល្បឿនកំណត់ មិនគោរពសិទ្ធិអាទិភាព និងការមិនប្រកាន់ស្ដាំ។

សម្ដេច ស ខេង បន្តថាពិធីនេះមិនត្រឹមតែរួមចំណែករំលែកទុក្ខជនរងគ្រោះប៉ុណ្ណោះទេ ប៉ុន្តែក៏ជាជាព្រឹត្តិការណ៍ក្រើនរំលឹកអ្នកប្រើប្រាស់ផ្លូវឱ្យមានការយល់ដឹងអំពីហានភ័យនៃគ្រោះថ្នាក់ចរាចរណ៍ ដែលបណ្ដាលមកពីការបើកបរលើសល្បឿនកំណត់ មិនគោរពសិទ្ធិអាទិភាព បើកបរវ៉ាជែងដោយប្រថុយប្រថាន បើកបរមិនប្រកាន់ស្ដាំ បើកបរក្នុងស្ថានភាពស្រវឹង និងមានសារធាតុញៀនជាដើម ដើម្បីឱ្យកែប្រែឥរិយាបទទាំងនោះ ហើយងាកមកគោរពច្បាប់ និងមានការប្រុងប្រយ័ត្នវិញ។

សម្ដេច ស ខេង ក៏បានរំលឹកថាបើប្រៀបធៀបនឹងឆ្នាំ២០១៩ គឺនៅក្នុងឆ្នាំ២០២០កន្លងទៅនេះ កម្ពុជាកាត់បន្ថយគ្រោះថ្នាក់ចរាចរណ៍បានចំនួន៩៤២លើកស្មើនឹង២៣ភាគរយ កាត់បន្ថយអ្នកស្លាប់៣៥៥នាក់ស្មើនឹង១៧ភាគរយ និងអ្នករបួស១៤៥៥នាក់ស្មើនឹង២៤ភាគរយ។ ដោយឡែកក្នុងរយៈពេល១១ខែឆ្នាំ២០២១ ធៀបនឹងឆ្នាំ២០២០ កម្ពុជាបានកាត់បន្ថយគ្រោះថ្នាក់ចរាចរណ៍បាន៥៣៣លើកស្មើនឹង១៨ភាគរយ អ្នកស្លាប់១៦៧នាក់ស្មើនឹង១១ភាគរយ និងអ្នករបួសបាន១១២០នាក់ស្មើនឹង២៦ភាគរយ។

សម្ដេច ក៏បានឆ្លៀតគូសបញ្ជាក់អំពីភាពចាំបាច់និងសារៈសំខាន់នៃការអនុវត្តគោលនយោបាយភូមិ ឃុំ សង្កាត់ មានសុវត្ថិភាព រួមមាន ១.ផ្ដល់សេវាសាធារណៈ ជាពិសេសេវារដ្ឋបាលប្រកបដោយគុណភាព តម្លាភាព និងទទួលបានជំនឿទុកចិត្ត, ២.គ្មានបទល្មើស លួច ឆក់ ប្លន់ គ្រឿងញៀន ល្បែងស៊ីសងខុសច្បាប់ និងបទល្មើសគ្រប់ប្រភេទ, ៣.មានសណ្ដាប់ធ្នាប់សាធារណៈ ជាពិសេសគ្មានគ្រោះថ្នាក់ចរាចរណ៍, ៤.គ្មានអំពើអនាចារ គ្មានការជួញដូរមនុស្ស ពិសេសស្រ្តី និងកុមារ គ្មានអំពើហិង្សាក្នុងគ្រួសារ និងគ្មានក្មេងទំនើង, ៥.ដុះស្រាយវិវាទនៅមូលដ្ឋានក្រៅប្រព័ន្ធតុលាការប្រកបដោយគុណភាព និងប្រសិទ្ធភាព, ៦.មានអនាម័យ មានសោភណ្ឌភាពល្អ និងមានបរិស្ថានល្អ និង៧.ឆ្លើយតបបានទាន់ពេលវេលាចំពោះគ្រោះមហាន្តរាយ និងរាល់ជំងឺឆ្លងរាតត្បាតកាចសាហាវប្រកបដោយប្រសិទ្ធភាព៕SRP

Sponsored

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម បានថ្លែងថា ខេត្តកំពង់ចាម ជាខេត្តមួយដែលមានសក្ដានុពល ដោយវិស័យកសិកម្ម មានការរីកចម្រើន មិនត្រឹមតែផ្គត់ផ្គង់ក្នុងប្រទេសទេ គឺមានលទ្ធភាពសម្រាប់នាំចេញទៅកាន់ទីផ្សារបរទេសផងដែរ។
ការលើកឡើងយ៉ាងដូច្នេះក្នុងឱកាសជួបសំដែងការគួរសម របស់លោក SUDIRMAN HASENG ឯកអគ្គរដ្ឋទូតឥណ្ឌូនេស៊ី ប្រចាំព្រះរាជាណាចក្រកម្ពុជា នៅព្រឹកមិញនេះ។

លោក អ៊ុន ចាន់ដា បានថ្លែងថា រដ្ឋបាលខេត្តនឹងរង់ចាំស្វាគមន៍ជានិច្ចចំពោះ អ្នកវិនិយោគទុនឥណ្តូនេស៊ី ដែលមានបំណងធ្វើការវិនិយោគលើវិស័យកសិកម្ម ឬអាជីវកម្មអ្វីមួយ ដែលជាការផ្តល់ផលប្រយោជន៍ល្អឲ្យគ្នាទៅវិញទៅមក ព្រោះថាការទំនាក់ទំនងល្អរវាងប្រទេសទាំងពីរ កម្ពុជា ឥណ្ឌូណេស៊ី មិនមែនបានកេីតមានឡេីងត្រឹមពេលនេះនោះទេ គឺតាំងពីមុនឆ្នាំ៩៣មកម្ល៉េះ គ្រាដែលអ៊ុនតាក់មានវត្តមាននៅកម្ពុជា ក្នុងនោះកងរក្សាសន្តិភាពឥណ្ឌូណេស៊ី ក៏មានវត្តមាននៅកម្ពុជាផងដែរ។

លោកអភិបាលខេត្តបានបញ្ជាក់ថា ទោះបីជាប្រទេសកម្ពុជាមានព្រះពុទ្ធសាសនាជាសាសនារបស់រដ្ឋ ក្នុងនោះក៏មានសាសនាឥស្លាម និងសាសនាផ្សេងៗទៀតដែរ ប៉ុន្តែកម្ពុជាមិនដែលមានជម្លោះរឿងសាសនាទេ។ ជាក់ស្ដែងកាលពីពេលកន្លងមកនេះ ជនជាតិឥណ្ឌូណេស៊ី ៨នាក់ បានមកស្រុកកងមាស ដេីម្បីផ្សព្វផ្សាយកិច្ចការសាសនា ទាំងខ្លួនមានផ្ទុកជំងឺកូវីដ-១៩ ហើយត្រូវបានរាជរដ្ឋាភិបាលកម្ពុជា អនុញ្ញាតឲ្យធ្វើការព្យាបាលដោយមិនយកប្រាក់កម្រៃទៀតផង។

លោក SUDIRMAN HASENG ឯកអគ្គរដ្ឋទូតឥណ្ឌូនេស៊ី បានលេីកឡេីងថា ថ្នាក់ដឹកនាំទាំងពីរ គឺសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងលោកប្រធានាធិបតី ឥណ្ឌូណេស៊ី លោកតែងតែធ្វើការពិភាក្សាគ្នា ទៅវិញទៅមកទាំងក្នុងនិងក្រៅប្រទេស ដោយបានលេីកឡេីងថា ប្រទេសយើងទាំងពីរ គឺគ្មានបញ្ហានយោបាយដែលធ្វើឲ្យល្អក់កករគ្នាទេ ដែលបច្ចុប្បន្ននេះយើងរក្សាបាននូវការទំនាក់ទំនងល្អ វិស័យពាណិជ្ជកម្ម ការបណ្តាក់ទុន ក៏ដូចជាវិស័យទេសចរណ៍ ផ្សេងៗទៀត បានយ៉ាងល្អប្រសើរ ក្នុងនោះក៏បានលេីកស្ទួយដល់វិស័យអប់រំផងដែរ៕SRP

ខេត្តកំពង់ចាម៖អតីតCNRPថ្នាក់ដឹកនាំមូលដ្ឋាននៃអតីតគណបក្សសង្គ្រោះជាតិ ចំនួន៤រូបរួមមាន៖១-លោកស្រី ទឹង សុភាព អតីតសមាជិកក្រុមប្រឹក្សាសង្កាត់វាលវង់។
២-លោកស្រី ទឹង គាលីវ អតីតសមជិកបម្រុក្រុមប្រឹក្សាងសង្កាត់វាលវង់។
៣-លោក សោ សុន អតីតសមាជិកក្រុមប្រឹក្សាឃុំមៀនស្រុកព្រៃឈរ។
៤-លោក ប៉ោ ងន់ អតីតសមាជិកបម្រុងក្រុមប្រឹក្សាសង្កាត់វាលវង់។ បានសុំចូលរួមជីវភាពនយោបាយ ជាមួយ គណបក្សប្រជាជនកម្ពុជា។

ការចុះចូលនៅរសៀលថ្ងៃទី២០ ខែធ្នូ ម្សិលមិញ ក្រោមការទទួលពីសំណាក់ លោក អ៊ុន ចាន់ដា ប្រធានគណ:កម្មាធិការគណបក្សប្រជាជនកម្ពុជា ខេត្តកំពង់ចាម។

លោក អ៊ុន ចាន់ដា បានថ្លែងនូវការស្វាគមន៍ចំពោះសមាជិកថ្មី ដែលបានភ្ញាក់រលឹកចូលមករួមជីវភាពនយោបាយ ជាមួយគណបក្សប្រជាជនកម្ពុជា ដោយបានមើលឃើញនូវការដឹកនាំដ៏ត្រឹមត្រូវប្រកបដោយគតិបណ្ឌិតរបស់គណបក្សប្រជាជនកម្ពុជា ដែលមានសម្តេច ហ៊ុន សែន ប្រធានគណបក្ស និងជា នាយករដ្ឋមន្ត្រីនៃព្រះរាជាណាចក្រកម្ពុជា ដែលសម្តេចតែងតែនាំមកនូវសុខសន្តិភាព និងការអភិវឌ្ឍរីកចម្រើនលើគ្រប់វិស័យដល់ប្រទេសជាតិ។ លោកប្រធាន ក៏បានអំពាវនាវសូមឲ្យបងប្អូនចូលរួមជាមួយគណបក្ស និងរាជរដ្ឋាភិបាល ដោយទឹកចិត្តស្មោះត្រង់ ជាពិសេសកុំភ្លេចបោះឆ្នោតជូនគណបក្សប្រជាជនកម្ពុជា តាមទិសស្លោក “សមាជិកគណបក្សម្នាក់ ជាសម្លេងឆ្នោតមួយសន្លឹក” និងសូមជួយចលនាបងប្អូនជាអតីតសមាជិកCNRPផ្សេងៗទៀត ឲ្យចូលរួមជាមួយគណបក្សប្រជាជនកម្ពុជា និងចូលរួមបោះឆ្នោតជូនគណបក្សប្រជាជនកម្ពុជាឲ្យបានច្រើនថែមទៀត ដោយគណបក្សប្រជាជនកម្ពុជាត្រៀមទទួលបងប្អូនជានិច្ច ដើម្បីចូលរួមបម្រើជាតិ និងប្រជាជនកម្ពុជា៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម បានថ្លែងថាថ្ងៃនេះយើងបានបេីកការដ្ឋានស្ថាបនាផ្លូវក្រាលកៅស៊ូប្រវែងជិត៣គីឡូម៉ែត្រ គិតជាថវិកាប្រមាណ ៣១ម៉ឺនដុល្លារ ដើម្បីកាត់បន្ថយភាពក្រីក្រ របស់ប្រជាពលរដ្ឋ ស្របតាមគោលនយោបាយជាតិ។

ក្នុងពិធីបេីកការដ្ឋានស្ថាបនាផ្លូវក្រាលកៅស៊ូ ១ខ្សែ ប្រវែង២.៦៩៧ម៉ែត្រ ទទឹង៥ម៉ែត្រ ស្ថិតនៅក្នុងឃុំពង្រ និងឃុំមហាលាភ ស្រុកកោះសូទិន នៅព្រឹកមិញលោក អ៊ុន ចាន់ដាបានថ្លែងប្រាប់ប្រជាពលរដ្ឋថា សូមឲ្យមានការជឿទុកចិត្តលេីអាជ្ញាធរ ដែលបានខិតខំប្រឹងប្រែងធ្វើការបម្រើពុកម៉ែបងប្អូន ដោយមិនគិតពីការនឿយហត់ ដេីម្បីចូលរួមអភិវឌ្ឍន៍មូលដ្ឋានយេីងឲ្យមានការរីកចម្រើន។

លោក អ៊ុន ចាន់ដា បានថ្លែងថា គម្រោងស្ថាបនាផ្លូវកៅស៊ូនេះ ពិតជាសារៈប្រយោជន៍សំខាន់ខ្លាំងណាស់ សម្រាប់បងប្អូនប្រជាពលរដ្ឋនៅក្នុងមូលដ្ឋាន ក៏ដូចជាអ្នកប្រើប្រាស់ផ្លូវថ្នល់ទាំងអស់ ជាពិសេសបម្រើឲ្យការដឹកជញ្ជូនកសិផលទៅកាន់ទីផ្សារ ដែលងាយស្រួលក្នុងការធ្វើដំណើរ។ ដោយការស្ថាបនាផ្លូវក្រាលកៅស៊ូ ១ខ្សែនេះមានរយ:ពេល៥ខែ ដូច្នេះសូមឲ្យពុកម៉ែបងប្អូនមានការយោគយល់ និងចូលរួមដោះស្រាយបញ្ហាផលប៉ះពាល់ខ្លះៗផង។ លេីសពីនោះពេលដែលបានផ្លូវល្អប្រេីប្រាស់ហើយ សូមលោកយាយលោកតា ជួយអប់រំណែនាំដល់កូនចៅ ឲ្យគាត់បេីកបរដោយគោរពច្បាប់ចរាចរណ៍ផង ព្រោះប្រសិនបេីយេីងបេីកបរមិនគោរពច្បាប់ចរាចរណ៍ទេនោះ គឺផ្លូវនេះនឹងមិនបានកាត់បន្ថយភាពក្រីក្រទេ ព្រោះត្រូវចំណាយថវិកាព្យាបាលរបួស និងខាតបង់ទ្រព្យសម្បត្តិទៀតផង។

គួរបញ្ជាក់ថា នេះជាគម្រោងស្ថាបនាផ្លូវក្រាលកៅស៊ូពីជាន់ប្រភេទ(DBST) ប្រវែង២.៦៩៧ ម៉ែត្រ ទទឹង៥ម៉ែត្រ ឆ្លងកាត់៦ភូមិ ក្នុងឃុំពង្រ និងឃុំមហាលាភ ស្រុកកោះសូទិន ក្រោមក្របខ័ណ្ឌកាត់បន្ថយភាពក្រីក្រ និងអនុវត្តកសិកម្មខ្នាតតូច តំបន់ទន្លេសាបជំហាន២ ដែលមានអ្នកទទួលផល សរុប ៣.៤៥៩នាក់ ស្មើនឹង ៩៤៦គ្រួសារ៕SRP

ខេត្តកំពង់ចាម៖ប្រជាពលរដ្ឋ នៅក្នុងឃុំកោះសូទិន ស្រុកកោះសូទិន បានសម្តែងការត្រេកអរសាទរ ដោយលែងមានការព្រួយបារម្ភចំពោះបញ្ហាធ្វើដំណើរ មិនថាពេលយប់ឬក៏ពេលថ្ងៃ បន្ទាប់ពីទទួលបានការបំពាក់អំពូលភ្លើងបំភ្លឺផ្លូវខ្វាត់ខ្វែង ខណៈ រាជរដ្ឋាភិបាលបានកសាងស្ពានឆ្លងកាត់ទន្លេមេគង្គ និងផ្លូវយ៉ាងល្អប្រណិតនៅគ្រប់មូលដ្ឋាន។

ជាក់ស្ដែងនៅថ្ងៃទី១៩ ខែធ្នូ ម្សិលមិញលោកហ៊ាប សេរីវុធ សមាជិកក្រុមជំនួយការលេខាធិការដ្ឋាននៃយុវជនគណបក្សប្រជាជនកម្ពុជាថ្នាក់កណ្ដាល និងជាស្ថាបនិកអង្កការមូលនិធិគាំទ្រកុមារ សហការជាមួយអជ្ញាធរឃុំកោះសូទិន និងក្រុមយុវជន ស ស យ ក បានធ្វើការបំពាក់ អំពូលភ្លើងសូឡាបំភ្លឺផ្លូវ ជាច្រើនបង្គោល នៅភូមិទី ៥ និងភូមិទី ៦ ក្នុងឃុំកោះសូទិន។

លោកហ៊ាប សេរីវុធ បានឲ្យដឹងថា ដេីម្បីចូលរួមចំណែក ធ្វើការអភិវឌ្ឍន៍ជាមួយរាជរដ្ឋាភិបាល លោកបានបរិច្ចាគថវិកាផ្ទាល់ខ្លួន ដោយមានការចូលរួមពីសប្បុរសជន ក្នុងការដំឡើងបង្គោលសូឡា ចំនួន ៦២២ដេីម ដែលរហូតមកដល់ពេលនេះ ដាំបានចំនួន ៣៨៥ដេីមហេីយ ពោលគឺសម្រេចបានប្រមាណជា៦០% ហេីយ បង្គោលដែលនៅសេសសល់នឹងដាំនៅតាមភូមិជាបន្តបន្ទាប់ទៀត។

លោកហ៊ាប សេរីវុធ បានបន្តថា រាជរដ្ឋាភិបាលបានកសាងស្ពាន និងផ្លូវបេតុងខ្វាត់ខ្វែងហើយ តែបញ្ហាភ្លើងបំភ្លឺផ្លូវនៅមានកំរិត ដោយភ្លើងរបស់វត្តអារាមត្រូវបិទនៅម៉ោង៩យប់ ដូច្នេះក៏បានផ្តួចផ្តើមបំពាក់អំពូលភ្លើងសូឡា សម្រាប់បំភ្លឺពេញមួយយប់ ដេីម្បីជាការងាយស្រួលឲ្យបងប្អូនប្រជាពលរដ្ឋធ្វេីដំណើរ ជាពិសេសអ្នកជំងឺត្រូវការទៅរកសេវាព្យាបាលនៅមន្ទីរពេទ្យផងដែរ។

លោកស្រី ស៊ុន ចន្ថា មេឃុំកោះសូទិន ក៏បានអំពាវនាវដល់បងប្អូនប្រជាពលរដ្ឋ ឲ្យចូលរួមជួយថែរក្សាភ្លេងបំភ្លឺផ្លូវនេះ ប្រយោជន៍ដល់ការប្រើប្រាស់បានយូរអង្វែង ពោលគឺត្រូវចាត់ទុកជាទ្រព្យសម្បត្តិខ្លួនឯង និងបម្រើដល់ផលប្រយោជន៍រួមផងដែរ។

គួរបញ្ជាក់ថាការដាំបង្គោលភ្លេីងបំភ្លឺផ្លូវខាងលើនេះ ដោយមានការចូលរួមពីប្រជាពលរដ្ឋក្នុងមូលដ្ឋាន ក្នុងនោះ លោក សុទ្ធ ពុទ្ធិ ម៉ានីន ដែលធ្វើដំណើរឆ្លងកាត់ លោកក៏បានជួយឧបត្ថម្ភថវិកា៥០ម៉ឺនរៀល សម្រាប់ផ្គត់ផ្គង់ភេសជ្ជៈ ដល់ក្រុមការងារផងដែរ៕SRP