ខេត្តកំពង់ចាម – Page 33

ខេត្តកំពង់ចាម៖ក្នុងកិច្ចប្រជុំគណៈបញ្ជាការឯកភាពរដ្ឋបាលខេត្ត ដើម្បីណែនាំអំពីវិធានការបង្រ្កាបការលេងល្បែងស៊ីសងគ្រប់ប្រភេទ ក្នុងមូលដ្ឋានខេត្តកំពង់ចាម អភិបាលខេត្តកំពង់ចាម បានបញ្ជាឲ្សមត្ថកិច្ចពាក់ព័ន្ធ ធ្ធ្វើការបង្ក្រាបល្បែងស៊ីសង ខុសច្បាប់គ្រប់ប្រភេទ ឲ្យអស់ពីមូលដ្ឋានរបស់ខ្លួន។

ក្នុងកិច្ចប្រជុំ នៅថ្ងៃពុធនេះ លោក អ៊ុន ចាន់ដា អភិបាលខេត្តកំពង់ចាម បានណែនាំដល់គណៈអភិបាលក្រុង-ស្រុក ទាំង១០ ត្រូវបេីកកិច្ចប្រជុំ ឲ្យបានឆាប់រហ័ស ដេីម្បីជំរុញដល់មេឃុំ ចៅសង្កាត់ និងមេភូមិ ទាំងអស់ ឲ្យចូលរួមអនុវត្តការបង្ក្រាប ល្បែងស៊ីសង ខុសច្បាប់គ្រប់ប្រភេទឲ្យមានប្រសិទ្ធភាពខ្ពស់។

អភិបាលខេត្តបន្តថាការបង្ក្រាបនេះត្រូវអនុវត្តឲ្យដូចភ្លៀងរលឹម ចំពោះម្ចាស់ទីតាំងបេីកអាជីវកម្មល្បែងស៊ីសង តាមអនឡាញទាំង ៣៩០កន្លែង ក៏ដូចជាអ្នកប្រកបរបរល្បែងស៊ីសងខុសច្បាប់ផ្សេងៗទៀត ត្រូវធ្វេីកិច្ចសន្យាបញ្ឈប់ជាស្ថាពរ បេីពុំដូច្នោះទេនឹងត្រូវប្រឈមចំពោះមុខច្បាប់ជាធរមាន។

អភិបាលខេត្ត ក៏បានជំរុញដល់ថ្នាក់ដឹកនាំ ប្រធានអង្គភាព ត្រូវណែនាំមន្រ្តី ឬសមត្ថកិច្ចក្រោមឱវាទ ព្រមទាំងក្រុមគ្រួសារ ឲ្យដកខ្លួនចេញពីបទល្មើស (ប្រសិន បើមានការពាក់ព័ន្ធ) និងហាមដាច់ខាត មិនឲ្យមានការពាក់ព័ន្ធ កុំអន្តរាគមន៍ កុំនៅពីក្រោយ និងកុំលាក់បាំង អប់រំណែនាំ ពោលគឺត្រូវកែប្រែចិត្តគំនិត ចាប់ពីពេលនេះតទៅ ដោយឡែករឿងរ៉ាវពីមុនគឺមិនចាប់ទោសអូសដំណេីរអ្វីឡេីយ។

លោក វង្ស ប៊ុនវិសុទ្ធ ជាព្រះរាជអាជ្ញា នៃអយ្យការអមសាលាដំបូងខេត្តកំពង់ចាម បានលេីកឡេីងថា ការបង្ក្រាបល្បែងស៊ីសងខុសច្បាប់ គឺជាការជួយសង្គ្រោះ ដល់ប្រជាពលរដ្ឋ ឲ្យរួចផុតពីភាពក្រីក្រ ក៏ដូចជាការលេីកស្ទួយដល់ជីវភាពគ្រួសារ ព្រមទាំងធ្វើឲ្យភូមិ-ឃុំមានសុវត្ថិភាពទៀតផង។

លោកបញ្ជាក់ថាដូច្នេះអាជ្ញាធរមានសមត្ថកិច្ច ត្រូវធ្វើការដោយមានការយកចិត្តទុកដាក់ ដើម្បីចាត់វិធានការ បង្ក្រាបបទល្មើសទាំងនោះ ចំពោះទីតាំងលេងល្បែងស៊ីសងតាមអនឡាញ ត្រូវធ្វើការពិនិត្យឲ្យបានច្បាស់លាស់ បេីមិនមានការលេងល្បែងភ្នាល់ដាក់ប្រាក់ទេ គឺយើងត្រូវអនុញ្ញាតឲ្យគាត់បេីកលក់ដូរ ឬលក់កាហ្វេ ដោយមេីលព័ត៌មាន ឬមេីលរឿងផ្សេងៗ តាមទូរទស្សន៍បាន ដោយពុំមានការហាមឃាត់ទេ។

សូមជម្រាបថា កិច្ចប្រជុំនេះធ្វើឡើងបន្ទាប់ពីប្រមុខរដ្ឋាភិបាលកម្ពុជា សម្ដេចតេជោហ៊ុន សែន បានដាក់បទបញ្ជាឲ្យអាជ្ញាធរគ្រប់ខេត្តក្រុងបង្ក្រាបល្បែងស៊ីសុងឲ្យអស់ពីមូលដ្ឋាន។ ក្នុងនោះសម្ដេចតេជោ បានព្រមានដកថ្នាក់ដឹកនាំមូលដ្ឋានមួយចំនួនដែលមិនបង្ក្រាបទល្មើសល្បែងស៊ីសងផងដែរ៕SRP

ខេត្តកំពង់ចាម៖លោកវរសេនីយ៍ឯក ជា ជួន អធិការនគរបាលស្រុកកងមា នៅពីថ្ងៃទី១៩ ខែកញ្ញា ឆ្នាំ២០២២ បានចាត់តាំងលោកវរសេនីយ៍ទោ ថុង ភូរីវុធ អធិការរងទទួលផែនការងារយុត្តិធម៌ ដឹកនាំកំលាំងអធិការដ្ឋាននគរបាលស្រុកកងមាស ជាមួយកំលាំងប៉ុស្តិ៍នគរបាលរដ្ឋបាលព្រែកក្របៅ ចុះបង្រ្កាបបទល្មើសនេសាទខុសច្បាប់ លូស្បៃម៉ុង នៅចំណុចបឹងចង្កែងទួយ ស្ថិតនៅភូមិពាមក្នុង ឃុំព្រែកក្របៅ ស្រុកកងមាស ខេត្តកំពង់ចាម។

សមត្ថកិច្ចបានឲ្យដឹងថា ក្នុងប្រតិបត្តិការនេះ កម្លាំងជំនាញបានធ្វើការរឹបអូសបាន លូស្បៃមុងចំនួន៤៣មាត់ វះបំផ្លាញព្រួលប្រវែង២៥០០ម៉ែត និងបង្គោលឈើ បង្គោលឫស្សីចំនួន៣០០ដើម ព្រមទាំងបានចាក់លែងកូនត្រីចូលបឹងធម្មជាតិវិញ ចំនួន៣៥គីឡូក្រាម។ ចំពោះឯឧបករណ៍ ត្រូវបានដុតចោល តាមបញ្ជារបស់ លោក ហាក់ ហ៊ាន់ ព្រះរាជអាជ្ញាររងអមសាលាដំបូងខេត្តកំពង់ចាម។

សូមបញ្ជាក់ថាក្នុងរដូវទឹកទន្លេមេគង្គហក់ឡើងនេះ គេសង្កេតឃើញថា មានបទល្មើសនេសាទ កេីនឡេីងព្រមជាមួយផងផងដែ៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មាធិការសាខាកាកបាទក្រហមខេត្ត បានអះអាងថា មានតែការបណ្តុះបណ្តាល កសាងធនធានមនុស្សទេ ទេីបនាំមកនូវការរីកចម្រើន ដូច្នេះសូមឲ្យក្មួយៗ ត្រូវខិតខំសិក្សារៀនសូត្រ ដេីម្បីយកចំណេះដឹង ទៅកសាងអនាគតខ្លួនឯង និងចូលរួមចំណែកកសាងសង្គមជាតិយើងឲ្យកាន់តែមានការរីកចម្រើន ចំពោះការបណ្ដុះបណ្ដាលធនធានមនុស្ស យេីងក៏ត្រូវជ្រេីសរេីសកម្រិតជំនាញ វិជ្ជាសាស្ត្រ បច្ចេកទេសជាកត្តាសំខាន់ ផងដែរ។

លោកថ្លែងបែបនេះក្នុងពិធីសំណេះសំណាល និងបំពាក់កន្សែងយុវជនកាកបាទក្រហមកម្ពុជា នៃសាខាកាកបាទក្រហមកម្ពុជាខេត្តកំពង់ចាម សរុប ២០០នាក់ នៅថ្ងៃទី១៥ ខែកញ្ញា ឆ្នាំ២០២២។

ក្នុងពិធី លោក អ៊ុន ចាន់ដា បានពាំនាំអនុសាសន៍ទាំង ៧ចំណុច របស់សម្តេចកិត្តិព្រឹទ្ធបណ្ឌិត ប្រធាន ជូនគណ:អធិបតី និងអង្គពិធី ពិសេស ក្រើនរំលឹកដល់ក្មួយៗ ជាយុវជនកាកបាទក្រហមថ្មី ទាំងអស់ ត្រូវខិតខំប្រឹងប្រែងរៀនសូត្រ លត់ដំខ្លួន ឲ្យក្លាយជា កូនល្អ សិស្សល្អ មិត្តល្អ និងពលរដ្ឋល្អ ហើយ ពង្រឹង និង ពង្រីកសមត្ថភាព អោយក្លាយជា ធនធានមនុស្ស ដែលមានគុណភាព ប្រកបដោយ ទឹកចិត្តមនុស្សធម៌ ស្ម័គ្រចិត្តលះបង់កម្លាំងកាយ ចិត្ត និង ពេលវេលា ដើម្បីធ្វើជាកម្លាំងចលករ និងជាប្រតិបត្តិករដ៏ពិតប្រាកដ របស់កាកបាទក្រហមកម្ពុជា ក្នុងការជួយដល់ជនរងគ្រោះនិងងាយរងគ្រោះបំផុត ប្រកបដោយការទទួលខុសត្រូវខ្ពស់ ស្របតាមទិសស្លោក ” ទីណាមានទុក្ខលំបាកទីនោះមានកាកបាទក្រហមកម្ពុជា ” និង ” កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា មិនទុកនរណាម្នាក់ចោល “។

បេីតាមរបាយការណ៍ស្វាគមន៍លោកទូច ឆៃ នាយកសាខា បានគូសបញ្ជាក់ ថា សាលាគោលដៅ ទូទាំងខេត្ត សរុប មាន៥០ ក្នុងនេះ មានសកលវិទ្យាល័យ ៧ និង វិទ្យាល័យ ៤៣ – មានទីប្រឹក្សាយុវជន ៨៦នាក់ និងយុវជនកាកបាទក្រហម ២,១៨៥នាក់។ ចំពោះយុវជនកាកបាទក្រហមកម្ពុជា ទាំង ២០០នាក់ ដែលបានបំពាក់កន្សែងក្នុងពិធីនេះ គឺមកពីវិទ្យាល័យ ចំនួន ៤ ក្នុងក្រុងកំពង់ចាម និងស្រុកកំពង់សៀម រួមមាន វិទ្យាល័យតេជោហ៊ុនសែន បឹងកុក- វិទ្យាល័យព្រះសីហនុ វិទ្យាល័យដីដុះ និង វិទ្យាល័យសម្តេច ជួនណាត។ ជាមួយនឹង ការបំពាក់កន្សែង និងមួក , លោក អ៊ុន ចាន់ដា ក្នុងនាម ប្រធានគណ:កម្មាធិការ សុវត្ថិភាពចរាចរណ៍ផ្លូវគោកខេត្ត ក៏បានផ្តល់ជូនដល់ យុវជន កាកបាទក្រហម ទាំង ២០០នាក់- ទីប្រឹក្សាយុវជន ៤នាក់, នាយកវិទ្យាល័យ ៤នាក់ និងអ្នកស្ម័គ្រចិត្ត ២០ នាក់នូវ មួកសុវត្ថិភាព ម្នាក់ ១ ផងដែរ៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម បានជំរុញដល់សមត្ថកិច្ច ក៏ដូចជាអាជ្ញាធរមូលដ្ឋាន ឲ្យសហការជាមួយមប្រជាពលរដ្ឋ ដេីម្បីរួមគ្នាទប់ស្កាត់ បង្រាបនូវបទល្មើសគ្រឿងញៀន ដេីម្បីការពារសហគមន៍យេីង ពីការបំពានដោយគ្រឿងញៀនខុសច្បាប់។

ការស្នេីឡេីងបែបនេះក្នុងកិច្ចប្រជុំសាមញ្ញលើកទី៤០ អាណត្តិទី៣ របស់ក្រុមប្រឹក្សាខេត្តកំពង់ចាម នៅថ្ងៃទី១៣ ខែកញ្ញា ឆ្នាំ២០២២នេះ។

ក្នុងកិច្ចប្រជុំ លោក អ៊ុន ចាន់ដា បានថ្លែងថា ដើម្បីជីវិត និងសហគមន៍គ្មានគ្រឿងញៀន គឺត្រូវមានការចូលរួមគ្រប់ភាគី ដេីម្បីរួមគ្នាធ្វើការលុបបំបាត់គ្រឿងញៀន ដូច្នេះយើងត្រូវសំណូមពរដល់ប្រជាពលរដ្ឋ និងប្អូនៗសិស្សានុសិស្ស ឲ្យផ្តល់កិច្ចសហការ ជាពិសេសសូមឲ្យថ្នាក់ដឹកនាំអាជ្ញាធរមូលដ្ឋាន ក្រុមព្រឹក្សាឃុំ សង្កាត់ទាំងអស់ ត្រូវចូលរួមផ្ដល់កិច្ចសហប្រតិបត្តិការណ៍ ដេីម្បីរួមគ្នាទប់ស្កាត់ បង្ក្រាបបទល្មើសគ្រឿងញៀន ឲ្យមានប្រសិទ្ធភាពខ្ខ្ពស់តាមរយៈ ការរាយការណ៍ជាសម្ងាត់។

បេីតាមរបាយការណ៍ ស្តីពីការអនុវត្តការងាររបស់រដ្ឋបាលខេត្តកំពង់ចាម ប្រចាំខែសីហា និងលើកទិសដៅការងារប្រចាំខែកញ្ញ ឆ្នាំ២០២២ ក្នុងនោះក៏មានការងារយុទ្ធនាការប្រឆាំងគ្រឿងញៀនខុសច្បាប់ផងដែរ ដោយកម្លាំងជំនាញបានចុះបង្ក្រាប ៤៩ករណី ចាប់បាន ១៤៥នាក់ ដកហូតបានថ្នាំញៀនប្រភេទក្រាមពណ៌ស ១៤៧កញ្ចប់ ស្មើ ២៩៤,៤៤ក្រាម ថ្នាំញៀនគ្រាប់ ពណ៌ផ្កាឈូក (WY) ចំនួន ១៥គ្រាប់ ស្មើ ៣,៥៩ក្រាម ទូរស័ព្ទ ១១៨គ្រឿង ម៉ូតូ ០២គ្រឿង រថយន្ត ០២គ្រឿង ដាវ ០១ដើម កណ្ដៀវ ០១ ដែកចុងស្រួច ០១ដើម ជញ្ជីងអេឡិចត្រូនិច ០៤គ្រឿង និងសម្ភារសេពគ្រឿងញៀនមួយចំនួនផងដែរ។

ក្នុងកិច្ចប្រជុំនេះផងដែរ លោក ខ្លូត ផន ប្រធានក្រុមប្រឹក្សាខេត្តកំពង់ចាម បានលើកយកសេចក្តីព្រាងរបៀបវារៈសំខាន់ៗ មកពិភាក្សា រួមមាន៖ ១-ពិនិត្យ និងអនុម័តសេចក្តីព្រាងកំណត់ហេតុនៃកិច្ចប្រជុំសាមញ្ញលើកទី៣៩ អាណត្តិ ទី៣ របស់ក្រុមប្រឹក្សាខេត្តកំពង់ចាម។ ២-ពិនិត្យ ពិភាក្សា និងអនុម័តសេចក្តីព្រាង របាយការណ៍បូកសរុបលទ្ធផលការងារប្រចាំ ខែសីហា និងទិសដៅការងារប្រចាំខែកញ្ញា ឆ្នាំ២០២២ របស់រដ្ឋបាលខេត្តកំពង់ចាម។ ៣.បញ្ហាផ្សេងៗមួយចំនួនផងដែរ៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម បានអះអាងថា រដ្ឋបាលខេត្ត នឹងរៀបចំដង្ហែអង្គកឋិនទានមួយ ចូលវត្តជោតនារាម បឹងកុក ក្នុងពេលឆាប់ៗ ខាងមុខនេះ ដេីម្បីគៀងគរបច្ច័យ ឧបត្ថម្ភគាំទ្រដល់ការងារកសាងកុដិ ឲ្យ សាមណសិស្ស និស្សិតស្នាក់អាស្រ័យ នៅបួសរៀន ខណៈគម្រោងកសាងនេះ នៅខ្វះថវិកាប្រមាណជាង១០ម៉ឺនដុល្លារ។

ការថ្លែងបែបនេះក្នុងឱកាសនាំយកទេយ្យទាន ចង្ហាន់បិណ្ឌបាត្រ និងបច្ច័យ វេរប្រគេនដល់ព្រះសង្ឃ សម្រាប់បិណ្ឌវេនទី២ នៅវត្តចំនួន២ ក្នុងក្រុងកំពង់ចាម ។

គួរបញ្ជាក់ថា នៅព្រឹកថ្ងៃទី១២ ខែកញ្ញា ឆ្នាំ២០២២នេះ លោក អ៊ុន ចាន់ដា អភិបាលខេត្តកំពង់ចាម និងលោក ខ្លូត ផន ប្រធានក្រុមប្រឹក្សាខេត្ត បានដឹកនាំ លោកជំទាវ ជាសមាជិក សមាជិកាក្រុមប្រឹក្សាខេត្ត ឯកឧត្ដម លោកជំទាវ ជាអភិបាលរងខេត្ត និងលោក លោកស្រី ជាថ្នាក់ដឹកនាំ មន្ត្រីរាការ មន្ទីរ អង្គភាព ស្ថាប័ន ក្នុងខេត្ត និងអាជ្ញាធរមូលដ្ឋាន បាននាំយកទេយ្យទាន ចង្ហាន់ បិណ្ឌបាត្រ វេរប្រគេនដល់ព្រះសង្ឃ នៅវត្តខេមវ័ន្តបឹងស្នាយ «ហៅវត្តថ្មី» ស្ថិតនៅក្នុងសង្កាត់សំបួរមាស និងវត្តជោតនារាមបឹងកុក «ហៅវត្តបឹងកុក» ស្ថិតនៅសង្កាត់បឹងកុក ក្រុងកំពង់ចាម ខេត្តកំពង់ចាម។

នាឱកាសនោះដែរ លោក ខ្លូត ផន និងលោក អ៊ុន ចាន់ដា ព្រមទាំង សហការី បាននាំយកទេយ្យវត្ថុប្រគេន ដល់វត្តទាំង ២ខាងលើ ដោយក្នុង ១វត្ត ៖ អង្ករ ១០០គីឡូក្រាម ទឹកសុទ្ធ ៥កេស ទឹកក្រូច ៥កេស ទឹកដោះគោខាប់ ១កេសធំ តែ ៥កញ្ចប់ ស្ករស ៥គ.ក្រ មី ១កេសធំ ត្រីខ ១យួរ និងបច្ច័យកសាង ចំនួន ៥លាន.៨១ម៉ឺនរៀល ចំពោះព្រះសង្ឃ ៧អង្គ ក្នុង ១អង្គៗ ប្រគេន ទេយ្យវត្ថុ ចំនួន ១ បច្ច័យ ១០ម៉ឺនរៀល ចង្ហាន់ ១ស្រាក់ និងផ្លែឈើ ១កន្ត្រកផងដែរ៕SRP

ខេត្តកំពង់ចាម៖ក្នុងឱកាសប្រកាសជាផ្លូវការ លើសេចក្តីសម្រេចចាត់តាំង ជាអនុប្រធានទី១ក្រុមការងារគណបក្សចុះមូលដ្ឋានខេត្តកំពង់ចាម លោក ហ៊ុន ម៉ានិត បានអះអាងថា រូបខ្ញុំបាទ និងក្រុមការងារ សូមបេ្តជ្ញាបន្តកិច្ចខិតខំប្រឹងប្រែងបម្រេីការងារជូនគណបក្សប្រជាជនកម្ពុជា បម្រេីប្រជាជន ដើម្បីជាប្រយោជន៍ដល់ភូមិ ឃុំ និងប្រទេសជាតិយើងទាំងមូល។

ក្នុងពិធី លោកហ៊ុន ម៉ានិត សូមថ្លែងអំណរគុណដល់ថ្នាក់ដឹកនាំ និងគណៈអចិន្រ្តៃយ៍គណៈកម្មាធិការកណ្តាលគណបក្សប្រជាជនកម្ពុជា ដែលផ្តល់សេចក្តីទុកចិត្ត និងចាត់តាំងរូបខ្ញុំ ដើម្បីបំពេញការងារដ៏សំខាន់ជូនគណបក្សប្រជាជនកម្ពុជា។

លោកហ៊ុន ម៉ានិត បានបន្តថា កាលពីការបោះឆ្នោតជ្រេីសរើសក្រុមប្រឹក្សាឃុំ សង្កាត់កន្លងទៅ ខេត្តកំពង់ចាមរបស់យើង បានទទួលលទ្ធផលជាទីគាប់ចិត្ត។ លទ្ធផលទាំងនេះ គឺជាស្នាដៃ កិច្ចខិតខំប្រឹងប្រែង ឆន្ទៈ ការលះបង់ពេលវេលា ការចំណាយថវិកាផ្ទាល់ខ្លួន និងការចូលរួមយ៉ាងសកម្ម ពីសំណាក់ក្រុមការងារគណបក្ស និងមន្ត្រីគណៈកម្មាធិការគណបក្សគ្រប់ជាន់ថ្នាក់ ដែលបានសហការគ្នា រួមគ្នា និងបង្កើនសាមគ្គីភាព ធ្វើការបម្រើប្រជាជន ស្វែងរកផលប្រយោជន៍ជូនមូលដ្ឋាន និងប្រជាជន។

សូមថ្លែងអំណរគុណដល់បងប្អូន ពូមីង លោកយាយលោកតា ប្រជាពលរដ្ឋទាំងអស់ ដែលតែងតែគាំទ្រ និងបោះឆ្នោតជូនគណបក្សប្រជាជនកម្ពុជា។ ការសម្រេចចិត្តរបស់ប្រជាពលរដ្ឋ គឺបានសរបញ្ជាក់ពីការស្រលាញ់ពេញចិត្ត ជឿទុកចិត្ត ទៅលើការការដឹកនាំរបស់រាជរដ្ឋាភិបាល និងការខិតខំរបស់គណបក្សប្រជាជនកម្ពុជា ដែលបានកាច់ចង្កូតនាវាកម្ពុជាឆ្ពោះទៅរកការអភិវឌ្ឍជានិរន្តរ៍ ប្រកបដោយស្ថិរភាព និងសុខសន្តិភាពពេញលេញ។

សូមជម្រាបថាកិច្ចប្រជុំផ្សព្វផ្សាយសេចក្តីសម្រេច ស្តីពីផែនការួមឆ្ពោះទៅកាន់ការបោះឆ្នោតជ្រើសតាំងតំណាងរាស្រ្តនីតិកាលទី៧ ឆ្នាំ២០២៣ បានធ្វើឡើងនៅព្រឹកមិញនេះ ក្រោមអធិបតីភាព លោក យឹម ឆៃលី ប្រធានក្រុមការងារគណបក្សចុះមូលដ្ឋានខេត្តកំពង់ចាម៕SRP

ខេត្តកំពង់ចាម៖ មានប្រសាសន៍ក្នុងកកិច្ចប្រជុំលោកឧបនាយករដ្ឋមន្ត្រី យឹម ឆៃលី បានណែនាំដល់សមាជិក សមាជិកាគណបក្ស ដើម្បីធានាភាពឈ្នះ ក្នុងការបោះឆ្នោតជ្រើសតាំងតំណាងរាស្រ្ត នីតិកាលទី៧ ឆ្នាំ២០២៣ ខាងមុខនេះ គឺត្រូវខិតខំធ្វើសកម្មភាពឆ្ពោះទៅកាន់មូលដ្ឋាន រក្សាឲ្យបាននូវសំឡេងគាំទ្រគណបក្សយើងដែលមានក្នុងការបោះឆ្នោតឃុំ សង្កាត់ ឆ្នាំ២០២២ កន្លងទៅថ្មីៗនេះ និងឈានទៅកសាងកម្លាំងគាំទ្រថ្មី ជាពិសេសក្នុងស្រទាប់យុវជនដែលគ្រប់អាយុបោះឆ្នោត ក្រៅពីនោះត្រូវពង្រឹងស្មារតីទទួលខុសត្រូវរបស់ក្រុមប្រឹក្សាឃុំ សង្កាត់របស់គណបក្សយើងដែលទើបជាប់ឆ្នោតក្នុងអាណត្តិថ្មី ត្រូវខិតខំបម្រើដោះស្រាយរាល់បញ្ហាអសកម្មផ្សេងៗ ជូនប្រជាពលរដ្ឋ និងបន្តជំរុញការកសាងក្រុមបក្សភូមិ និងពង្រីកសមាជិកថ្មីបន្ថែមផងដែរ។

ក្នុងកិច្ចប្រជុំផ្សព្វផ្សាយសេចក្តីសម្រេចស្តីពីផែនការរួមឆ្ពោះទៅកាន់ការបោះឆ្នោតជ្រើសតាំងតំណាងរាស្ត្រនីតិកាលទី៧ ឆ្នាំ២០២៣ ដែលបានធ្វើឡេីងនៅសាលប្រជុំសសរ១០០សម្តេចតេជោ ក្រុងកំពង់ចាម នៅថ្ងៃទី១១ ខែកញ្ញា ឆ្នាំ២០២២ នេះលោក ឧបនាយករដ្ឋមន្ត្រី យឹម ឆៃលី ប្រធានក្រុមការងារថ្នាក់កណ្តាល ចុះជួយខេត្តកំពង់ចាម ក៏បានផ្តាំផ្ញេីដល់សមាជិក សមាជិកាគណបក្ស ត្រូវជំរុញកំណែទម្រង់ស៊ីជម្រៅនៅគ្រប់ មន្ទីរអង្គភាព រដ្ឋបាលខេត្ត ក្រុង ស្រុក ដើម្បីធានានូវអភិបាលកិច្ចល្អ តាមរយៈការផ្ដល់សេវាសាធារណៈ ប្រកបដោយតម្លាភាព គណនេយ្យភាព ប្រសិទ្ធភាព ដោយមានភាពជឿទុកចិត្ត ពីប្រជាជន និងធានាយុត្តិធម៌សង្គម ជាពិសេសត្រូវបន្តរៀបចំការងារឲ្យបានល្អ សម្រាប់ការបោះឆ្នោត ជ្រើសតាំងតំណាងរាស្ត្រនីតិកាលទី៧ ឆ្នាំ២០២៣ និងការបោះឆ្នោតជ្រើស តាំងសមាជិក ព្រឹទ្ធសភា នីតិកាលទី៥ និងការបោះឆ្នោតជ្រើសរើសក្រុមប្រឹក្សាខេត្ត អាណត្តិទី៤ ឆ្នាំ២០២៤ ជាបន្តទៀត។

គួរបញ្ជាក់ថា ក្នុងពិធីនេះ ក៏មានការប្រកាសសេចក្ដីសម្រេចទទួលស្គាល់ លោក ហ៊ុន ម៉ានិត ជាអនុប្រធានទី១ នៃក្រុមការងារគណបក្ស ចុះមូលដ្ឋានខេត្តកំពង់ចាមផងដែរ៕SRP

ខេត្តកំពង់ចាម៖ក្នុងពិធីសំណេះសំណាល និងផ្សព្វផ្សាយខ្លឹមសារសន្និបាត គណៈកម្មាធិការកណ្តាលគណបក្សប្រជាជនកម្ពុជា ជូនសមាជិកគណបក្សស្រុកកោះសូទិន នៅថ្ងៃចន្ទនេះ ឧបនាយករដ្ឋមន្ត្រី យឹម ឆៃលី សមាជិកគណៈអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារថ្នាក់កណ្ដាលចុះជួយខេត្តកំពង់ចាម
បានផ្តល់នូវអនុសាសន៍ណែនាំចំនួន១៦ចំណុច សម្រាប់សមាជិកសមាជិការគណបក្សស្រុកកោះសូទិន យកទៅអនុវត្តដើម្បីត្រៀមយកជ័យជម្នះក្នុងការបោះឆ្នោតជ្រើសរើសតំណាងរាស្ត្រអាណត្តិទី៧ ឆ្នាំ២០២៣ ខាងមុខឲ្យខាងតែបាន។

ពិធីនេះការចូលរួម លោកអ៊ុន ចាន់ដា សមាជិកគណៈកម្មធិការកណ្តាល -ប្រធាគណបក្សប្រជាជនកម្ពុជា ខេត្តកំពង់ចាម លោក ខៀវ កាញារីទ្ធ ប្រធានក្រុមការងារថ្នាក់កណ្ដាលចុះជួយស្រុកកោះសូទិន និងថ្នាក់ដឹកនាំ សមាជិក សមាជិកាគណបក្សប្រជាជន៣ចូលរួមប្រមាណជាង ៣០០នាក់ផងដែរ។

ក្នុងកម្មវិធី លោក អ៊ុន ចាន់ដា ប្រធានគណបក្សប្រជាជនកម្ពុជាខេត្តកំពង់ចាម បានឡើងអានលទ្ធផលសន្និបាតវិសាមញ្ញរបស់គណៈកម្មាធិការកណ្តាលគណបក្សប្រជាជនកម្ពុជា ដែលទើបនឹងបញ្ចប់កាលពីពេលថ្មីៗកន្លងទៅនេះ។

លោក ហេង ហ៊ុន អនុប្រធានគណៈកម្មាធិការបក្សស្រុកកោះសូទិន បានឲ្យដឹងថា លទ្ធផលនៃការបោះឆ្នោតក្រុមប្រឹក្សាឃុំ សង្កាត់អាណត្តិទី៥ ឆ្នាំ២០២២កន្លងទៅ ប្រជាជននៅស្រុកកោះសូទិន មានឈ្មោះបោះឆ្នោតចំនួន ៣៨,៨៤២នាក់ និងបានអញ្ជើញទៅបោះឆ្នោតចំនួន ២៩,៧០៧នាក់ ស្មើ ៧៦% នៃចំនួនអ្នកមានឈ្មោះក្នុងបញ្ជីបោះឆ្នោត ក្នុងនោះបោះឆ្នោតជូនគណបក្សប្រជាជនកម្ពុជា មានចំនួន ២០,១៨៤ សម្លេង ស្មើនឹង ៧០%៕SRP