ខេត្តកំពង់ចាម៖អភិបាលខេត្តំពង់ចាម លោក អ៊ុន ចាន់ដា បានថ្លែងលេីកទឹកចិត្តដល់យោធិន នៃកងរាជអាវុធហត្ថ ទេីបជ្រេីសរេីសថ្មី ឱ្យខិតខំហ្វឹកហាត់ ដេីម្បីយកជំនាញ មកថែរក្សាសន្តិសុខ សណ្តាប់ធ្នាប់ សាធារណៈ ជូនប្រជាពលរដ្ឋ និងប្រទេសជាតិ។
លោកថ្លែងបែបនេះក្នុងពិធីសំណេះសំណាល និងជូនដំណើរយោធិន នៃកងរាជអាវុធហត្ថខេត្តកំពង់ចាម ដែលទើបជ្រើសរើសថ្មី ចំនួន ៤០នាក់ ទៅហ្វឹកហ្វឺន នៅភ្នំជុំរាយ នៅថ្ងៃទី១៧ ខែមេសា ឆ្នាំ២០២៣។
អភិបាលខេត្តកំពង់ចាម បន្តថាកម្លាំងយោធិន នៃកងរាជអាវុធហត្ថទាំង ៤០នាក់ ដែលត្រូវទៅហ្វឹកហ្វឺនរយៈពេល ១ឆ្នាំ ត្រូវខិតខំហ្វឹកហាត់លត់ដំខ្លួន ឱ្យក្លាយទៅជានាយទាហាន មានកាយសម្បទា រឹងមាំ និងមានលក្ខណៈសម្បត្តិ គ្រប់គ្រាន់ ដេីម្បីខ្លួនឯង ដេីម្បីគ្រួសារ ក៏ដូចជាការការពារ ប្រជាពលរដ្ឋ ឱ្យរស់នៅប្រកបដោយ ភាពសុខដុមរមនា ក្នុងការប្រកបមុខរបរចិញ្ចឹមជីវិត ពោលគឺធ្វេីយ៉ាងណាកុំបោះបង់ចោលការហ្វឹកហាត់នេះឱ្យសោះ។
បើតាមលោកឧត្តមសេនីយ៍ត្រី សោ សាវឿន មេបញ្ជាការកងរាជអាវុធហត្ថខេត្តកំពង់ចាម បានផ្តាំផ្ញេីដល់កម្លាំងយោធិន នៃកងរាជអាវុធហត្ថ ទើបជ្រើសរើសថ្មី(ជាប់ជាស្ថាពរ) ក្នុងការប្រឡង ដែលត្រូវចូលហ្វឹកហ្វឺន នៅមជ្ឈមណ្ឌលហ្វឹកហ្វឺនកងរាជអាវុធហត្ថ(ភ្នំជំរាយ) សូមឱ្យខិតខំរៀនសូត្រ និងបំពេញតួនាទី ភារកិច្ច និងបេសកកម្មកងរាជអាវុធហត្ថ ឱ្យទទួលបានជោគជ័យ និងត្រូវគោរពច្បាប់លក្ខន្តិកៈនៃកងយោធពលខេមរភូមិន្ទ បទវិន័យទូទៅសម្រាប់កងយោធពលខេមរភូមិន្ទ បទបញ្ជា និងការចាត់តាំង របស់ឯកឧត្ដម នាយឧត្តមសេនីយ៍ អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស ពេលបញ្ចប់វគ្គ។
គួរបញ្ជាក់ថា ក្នុងពិធីនោះដែរ អភិបាលខេត្តកំពង់ចាម បាននាំអំណោយ សម្ដេចតេជោ ហ៊ុន សែន និងសម្ដេចគតិព្រឹទ្ធបណ្ឌិត ផ្ដល់ជូនដល់កម្លាំងយោធិន នៅកងរាជអាវុធហត្ថទាំង ៤០នាក់ ដោយក្នុងម្នាក់ៗទទួលបាន ៖ មី ២កេស ត្រីខកំប៉ុង ២យួរ ក្រម៉ា ១ និងថវិកា ២០ ម៉ឺនរៀលផងដែរ៕SRP
