ភ្នំពេញ

ក្រោមគម្រោងថវិកាទឹកប្រាក់រាប់លាន របស់ធនាគារពិភពលោក (world banks ) ដែលក្រុមហ៊ុនប៉ូលី ចិន្តា បានសិទ្ធិកសាងស្ពានឡើងវិញទាំងអស់តាមបណ្តោយផ្លូវជាតិលេខលេខ៤ សរុបប្រមាណជាង៤០ស្ពាននោះ ត្រូវបានមហាជននិងក្រុមអ្នកបច្ចកទេសស្ពាននៃក្រសួងសារធារណការនិងដឹកជញ្ចូនលួចបង្ហើបអោយដឹងថា គ្រប់ការដ្ឋានហាក់មិនមានសកម្មភាពទៅមុខឡើយ មិនដឹងមកពីបញ្ហថវិកាឬបញ្ហាបច្ចេកទេសឡើយ.. ? បណ្តាលអោយគ្រប់ការដ្ឋានស្ពានដែលកំពុងសាងសង់ត្រូវស្ទះដំណើរការរាប់ខែឆ្នាំមកហើយមិនទៅមុខឡើយ.. ។

គួរបញ្ចាក់ថារយៈពេលជិត១ឆ្នាំមកនេះ ក្រុមហ៊ុនប៉ូលីចិន្តា បានសាងសង់ស្ពាន បានប្រមាណចំនួន៣ទៅ៤ស្ពាន ប៉ុណ្ណោះក្នុងចំណោមស្ពានជាង៤០ តាមបណ្តោយផ្លូវជាតិលេខ៤ ដែលក្រុមហ៊ុនបានសិទ្ធកសាងកន្លងមក ក្រោមគម្រោងថវិការរាប់លានដុល្លារអាមេរិក ដែលរដ្ឋាភិបាលកម្ពុជាបានកម្ចីពីធនាគារពិភពលោក។

មហាជននិងអ្នកធ្វើដំណើរតាមផ្លូវលេខ៤ នេះមានការខកចិត្តយ៉ាងខ្លាំង ចំពោះការសាងសង់ស្ពានតាមផ្លូវជាតិលេខ៤ នេះ ដោយសារគ្រប់ការដ្ឋានស្ទើរទាំងអស់ បង្ករការរំខានស្ទះចរាចរណ៍ផងខាតពេលវេលាផង ពិសេសពេលមានភ្លៀងម្តងៗ ធ្វើអោយគ្រប់រថយន្តឆ្លងកាត់មានភាពរអិលពិបាកធ្វើដំណើរយ៉ាងខ្លាំង រហូតបង្ករគ្រោះថ្នាក់ចរាចរណ៍ស្លាប់មនុស្សជាច្រើនលើក នៅពេលរថយន្តឆ្លងកាត់និងវាងលើការដ្ឋានទាំងនះទៀតផង ..តើក្រសួងសារធារណការនិងដឹកជញ្ចូន ដែលជាក្រសួងជំនាញមានបានជ្រាបបញ្ហានេះទេ ? ពិសេសម្ចាស់ថវិកាផ្ទាល់គឺធនាគារពិភពលោក តើបានដឹងបញ្ហានេះដែរឬទេ …?។

តាមប្រភពព័ត៌មានពីមន្ត្រីជាន់ខ្ពស់នៃក្រសួងសារធារណការនិងដឹកជញ្ជូនអោយដឹងថា ក្រុមហ៊ុនប៉ូលី ចិន្តា នេះ ត្រូវបានគេលួចបង្ហើបអោយដឹងថា ក្រុមហ៊ុនមួយនេះ បានគម្រោងធ្វើផ្លូវ ស្ពានថ្នល់ជាច្រើនកន្លែងក្នុងប្រទេសកម្ពុជា ដែលសុទ្ធតែគម្រោងថវិកាបរទេសក្រោមឥណ្ឌទានពីធនាគារពិភពលោក រាប់សុិបលានដុល្លារ តែគ្រប់គម្រោងមិនត្រូវបានធ្វើអោយបានចប់ឡើយ ប្រៀបបានធ្វើនំឥតម្សៅដូចឆ្នេះដែរ ។

បើទោះបីកន្លងមកក្រុមហ៊ុននេះ ធ្លាប់មានបញ្ហាដោយលក្ខណៈបច្ចេកទេស ឬមិនមានលក្ខណៈគ្រប់គ្រាន់ក៏ដោយ ក៏ក្រុមហ៊ុននេះ ដាក់ដេញថ្លៃជាប់ បានគម្រោងអន្តរជាតិធ្វើដែរ…។ ដូចរកណីគម្រោងធ្វើស្ពានតាមបណ្តោយផ្លូវជាតិលេខ៤ ជាដើម មិនដំណើរទៅមុខរាប់ខែ .. ហេតុអ្វីបានក្រសួងសារធារណការនិងធនាគារពិភព មិនមានចំណាត់ការចំពោះក្រមហ៊ុនមួយនេះ ..? បញ្ហាការខកខាននិងសកម្មភាពធ្វើមិនទៅមុខតាមគម្រោង..ការដ្ឋានបើកខ្វះលក្ខណៈបច្ចេកទេសជាដើម..ល ឬ មួយក្រុមហ៊ុនប៉ូលី ចិន្តានេះ មានករណីពិសេសអីហើយ បានគ្មានស្ថាបន័សមត្ថកិច្ចណាហ៊ានចំណាត់ការ..? មិនខុសពាក្យស្លោក « ជិៈសេះមើលផ្កា» ដូចប្រសាសាន៍សម្តេចតេជោហ៊ុន សែន តែងតែលើឡើងចំពោះមន្ត្រីអសកម្មមួយចំនួនកន្លងមកនោះទេ .។

ប្រភពពីមន្ត្រីជាន់ខ្ពស់ក្នុងក្រសួងសារធារណបានបង្ហើបអោយដឹងថាក្រុមហ៊ុនប៉ូលី ចិន្តា នេះធ្លាប់មានទំនាក់ទំនងយ៉ាងជិតស្និត ជាមួយលោក ស វាសនា ដែលជាមន្ត្រីជាន់ខ្ពស់និងជាមនុស្សមានឥទ្ធិពលម្នាក់នៅធនាគារពិភពលោកប្រចាំនៅកម្ពុជា ទើបបានរាល់គម្រោងរបស់world banks តែងតែបានក្រុមហ៊ុនមួយនេះសាងសង់ជាហូរហែរមក.. ហិហិ.។

មហាជនគ្រប់អ្នកអ្នកធ្វើដំណើរ ដែលបានឆ្លងកាត់ការដ្ឋានផ្លូវជាតិលេខ៤ ពួកគាត់ស្នើរសុំដល់ក្រសួងសារធារណការ និងធនាគារពិភពលោក ដែលជាម្ចាស់ថវិកាគម្រោង គួរត្រួតពិនិត្យឡើងវិញចំពោះក្រុមប៉ូលី ចិន្តា ដែលបានទទួលគម្រោងសាងសង់ស្ពាននេះ ហេតុអីបានជាការសាងសង់មានការយុីតយ៉ាវយ៉ាងដូច្នេះ ពិសេសគ្រប់ផ្លូវវៀងឆ្លងកាត់ដូចជាផ្លូវចុះឋាននរកអីចុឹង សូមអោយធនាគារពិភពលោក ដែលជាឥណ្ឌទាន គួរពិនិត្យបញ្ហារបស់ក្រុមហ៊ុនប៉ូលី ចិន្តា ឡើងវិញ ពីព្រោះប្រជាជនលោកមិនបានយល់ពេលឃើញមានបញ្ហាបែបបនេះ ពួកគាត់បន្ទោសតែរដ្ឋាភិបាលតែប៉ុណ្ណោះ ។

ជុំវិញករណីនេះ ទីភ្នាក់ងារសារព័ត៌មានសៀមរាប ប៉ុស្តិ៍ នៅមិនទាន់ទទួលបានការបំភ្លឺពី ក្រុមហ៊ុនប៉ូលី ចិន្តា បាននៅឡើយទេរហូតដល់ម៉ោងផ្សាយនេះ៕SRP

ភ្នំពេញ៖ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ លោកស សុខា បានបញ្ជាដល់អាជ្ញាធរសមត្ថកិច្ចពាក់ព័ន្ធទាំងអស់ចាប់ខ្លួនជនដែលក្លែងព័ត៌មានមួយនេះ។

ការបញ្ជារបស់រដ្ឋមន្ត្រីក្រសួងមហាផ្ទៃ លោកស សុខា ធ្វើឡើងភ្លាមៗ បន្ទាប់ពីមានអ្នកក្លែងព័ត៌មាន ថា រូបលោកឡើងងារជាសម្ដេច។

តាមរយៈទំព័រអាខោន facebook ផ្លូវការរបស់លោកស សុខា រដ្ឋមន្ត្រីក្រសួងមហាផ្ទៃ បានសរសេរថា៖ ខ្ញុំសូមបដិសេធចំពោះព័ត៌មានក្លែងក្លាយនេះ និងសូមអាជ្ញាធរមានសមត្ថកិច្ចស្រាវជ្រាវដើម្បីនាំខ្លួនជនល្មើសយកមកផ្តន្ទាទោសទៅតាមច្បាប់៕ដោយទីភ្នាក់ងារសារព័ត៌មាន សៀមរាប ប៉ុស្តិ៍ SRP

លោកប៉ែន បូណា ប្រធានអង្គភាពអ្នកនាំពាក្យរដ្ឋាភិបាល បានបកអាក្រាតចរិកពិតរបស់លោកសម រង្ស៊ី។

ការបកអាក្រាតចរិករបស់លោកសម រង្ស៊ី បែបនេះ បន្ទាប់ពីលោកសម រង្ស៊ី បានបង្ហោះសារមួយពីបញ្ហាមង្គលព្រំដែន ដោយលើកយក Google Map មកផ្សព្វផ្សាយ ក្នុងគោលបំណងមូលបង្កាច់និងរិះគន់រដ្ឋាភិបាលកម្ពុជា។

បើតាមលោកប៉ែន បូណា បានសរសេរបង្ហោះនៅលើ facebook ផ្ទាល់ខ្លួនថា

ការបោកប្រាសដែលមិនចេះខ្មាសអៀន

ទោះបីជាក្រុមអ្នកបច្ចេកទេសបានពន្យល់ច្បាស់លាស់អំពីផែនទី Google Map ថាជាផែនទីរបស់ក្រុមហ៊ុនឯកជនដែលគេបង្កើតឡើងក្នុងគោលដៅធ្វើពាណិជ្ជកម្ម និងមិនមែនជាឧបករណ៍សម្រាប់វាស់វែងព្រំដែនរវាងរដ្ឋនិងរដ្ឋក៏ដោយ ក៏បុគ្គលរូបនេះនៅតែនិយាយដដែលដោយមិនចេះអៀនខ្មាសទាល់តែសោះ។ នេះដោយសារតែមនោគមន៍វិជ្ជានយោបាយប្រឆាំងជ្រុលនិយមបានដុះស្លែក្រាស់ពេកក្នុងប្រព័ន្ធគំនិតរហូតមិនអាចកែបាន។

យើងសាកស្រមៃថា ប្រសិនបើបុគ្គលបែបនេះឡើងកាន់អំណាចដឹកនាំរដ្ឋាភិបាល ហើយស្រាប់តែប្រកាសយកផែនទី Google Map ដើម្បីវាស់វែងខណ្ឌសីមា និងការបោះបង្គោលព្រំដែន ពេលនោះប្រទេសជិតខាងច្បាស់ជាអស់សំណើចផង ឆ្ងល់ផងថា មិនគួរមានមេដឹកនាំបែបនេះនៅក្បែរខាងទាល់តែសោះ។ កុំថាឡើយតែផែនទី Google Map ទោះបីជាផែនទីណាក៏ដោយដែលផលិតដោយក្រុមហ៊ុនឯកជនហើយមានគោលដៅពាណិជ្ជកម្មគឺគ្មានតម្លៃសម្រាប់ការងារកំណត់ព្រំដែនរវាងរដ្ឋនិងរដ្ឋឡើយ។

នៅលើពិភពលោកនេះ ការងារខណ្ឌសីមានិងការបោះបង្គោលព្រំដែន គេពឹងផ្នែកតែទៅលើផែនទីដែលមានការទទួលស្គាល់ជាអន្តរជាតិ ហើយដែលប្រទេសជិតខាងពាក់ព័ន្ធព្រមព្រៀងទទួលយកទាំងអស់គ្នា។ បើគ្រាន់តែរឿងប៉ុណ្ណឹងមិនអាចយល់បានផង តើខំធ្វើនយោបាយដើម្បីអ្វី? ឬចង់បានត្រឹមកុំឱ្យគេភ្លេចឈ្មោះទោះជាត្រូវគេសើចចំអកយ៉ាងណាក៏មិនខ្ចីឈឺ?

នេះជាមនោគមន៍វិជ្ជានយោបាយជ្រុលនិយមដ៏អាក្រក់បំផុតដែលយើងទាំងអស់គ្នាត្រូវរួមគ្នាលុបបំបាត់ឱ្យអស់ពីកម្ពុជា៕SRP

ភ្នំពេញ៖លោក ឡាយ ម៉ារីវ៉ូ និងប្រពន្ធស បានម្រេចដាក់បណ្តឹងទៅអាជ្ញាធររាជធានីភ្នំពេញ និងមន្ទីរជំនាញ រឿងលោក អ៉ឹង ដារ៉េត និងប្រពន្ធឈ្មោះ ង៉ូវ រ៉ាដែត សាងសង់ខុនដូរ រំលោភលើដីគាត់ និងសង្ស័យខុសលក្ខណៈបច្ចេកទេស។

ការដែលប្រជាពលរដ្ឋជាម្ចាស់ដីពីរនាក់ប្តីប្រពន្ធខាងលើ សម្រេចចិត្តដាក់ពាក្យបណ្តឹងទៅ អភិបាលរាជធានីភ្នំពេញ និង ប្រធានមន្ទីររៀបចំដែនដីនគរូបនីយកម្មសំណង់និងសុរិយោដីរាជធានីភ្នំពេញ ខណៈដែលភាគីម្ខាងទៀត កំពុងតែធ្វើការសាងសង់អាគារខ្ពស់ (ខុនដូរ) រំលោភលើដីរបស់គាត់ មិនតែប៉ុណ្ណោះសង្ស័យសាងសង់ខុសលក្ខណៈបច្ចេកទេសថែមទៀតផង។ សូមឱ្យអាជ្ញាធរ ខណ្ឌ រាជធានីភ្នំពេញ និងជំនាញពាក់ព័ន្ធមេត្តាចុះពិនិត្យដល់ទីតាំងជាក់ស្តែងផង ដែលមានអាសយដ្ឋានផ្ទះលេខ៦ ផ្លូវលេខ៥៧៦ ភូមិ៤ សង្កាត់បឹងកក់ទី២ ខណ្ឌទួលគោក រាជធានីភ្នំពេញ។

បើយោងតាមពាក្យបណ្តឹងរបស់ម្ចាស់ដី ខ្ញុំបាទឈ្មោះ ឡាយ ម៉ារីវ៉ូ ភេទ ប្រុស អាយុ ៦៣ឆ្នាំ ជនជាតិ ខ្មែរ និងប្រពន្ធឈ្មោះ និល សុគុន្ធារី អាយុ ៦១ឆ្នាំ ជនជាតិ ខ្មែរ មានអាសយដ្ឋានផ្ទះ លេខ ៦ ផ្លូវលេខ ៥៧៦ ភូមិ៤ សង្កាត់បឹងកក់ទី២ ខណ្ឌទួលគោក រាជធានីភ្នំពេញ ជាម្ចាស់ផ្ទះជាប់ការដ្ឋានសាងសង់។

សូមគោរពជូន

លោកប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី រាជធានីភ្នំពេញ

កម្មវត្ថុ÷ សុំប្តឹងឈ្មោះ អ៉ឹង ដារ៉េត ភេទ ប្រុស អាយុ ៥៣ឆ្នាំ ជនជាតិខ្មែរ និងប្រពន្ធឈ្មោះ ង៉ូវ រ៉ាដែត អាយុ ៤៧ឆ្នាំ ជនជាតិខ្មែរ មាន អាសយដ្ឋានផ្ទះលេខ ១៩២៦ ផ្លូវជាតិលេខ៥ ភូមិផ្សារតូច សង្កាត់ទួលសង្កែ ខណ្ឌឫស្សីកែវ រាជធានី ភ្នំពេញ ជាម្ចាស់សំណង់អគារខ្ពស់ ជាប្រភេទអគារខុនដូរ មានទីតាំងស្ថិតនៅក្នុងក្បាលដីលេខ៧៤ ភូមិ១៧ សង្កាត់ស្រះចក ខណ្ឌដូនពេញ រាជធានីភ្នំពេញ បានសាងសង់ខុសបទដ្ឋានស្តង់ដារ បច្ចេកទេស ធ្វើឲ្យប៉ះពាល់ដល់សន្តិសុខសុវត្ថិភាព រំលោភលើដីឡូតិ៍លំនៅដ្ឋានរបស់យើងខ្ញុំជាម្ចាស់ គឺជាប់ខាង។

តបតាមកម្មវត្ថុ÷ ដូចបានជម្រាបជូនខាងលើ សូម លោកប្រធានមន្ទីរ មេត្តាជ្រាបថា ម្ចាស់ដីឡូតិ៍ ខាងលើកំពុងសាងសង់អាគារខុនដូរលើដីរបស់ខ្លួន បានបង្កបញ្ហាលើរបងព្រំដី ជាហេតុបណ្តាលឲ្យខុស បទដ្ឋានបច្ចេកទេសសំណង់អាគារខ្ពស់ដោយពុំដឹងថាមាន ឬ ពុំមានការអនុញ្ញាតិពីអាជ្ញាធរតាមលំដាប់ថ្នាក់ ហើយ ឬ នៅ? ដោយពុំបានជូនដំណឹងមកយើងខ្ញុំអំពីគ្រោងប្លង់សាងសង់ ដែលកន្លងមកធ្វើឲ្យប្រេះស្រាំ ស្រុតជញ្ជាំងផ្ទះយើងខ្ញុំដោយកន្លែង។ ប៉ុន្តែនៅពេលបច្ចុប្បន្ននេះ ភាគីអ្នកសាងសង់ អាគារបានយករបងព្រំដី ដោយចាក់បេតុងអាមេរថាស់ជណ្តើរ និងសាងសង់ពីលើរបងព្រំដីតែម្តង ដែលអាចនឹងក្លាយទៅជាជញ្ជាំង អាគារក៏ថាបាន ដែលធ្វើឲ្យប៉ះពាល់ដល់សុវត្ថិភាព សន្តិសុខ បរិស្ថានអ្នករស់នៅជាប់ វិឡូតិ៍ភូមិផងរបង រួមជាមួយ។

ខ្ញុំបាទស្នើសុំសំណូមពរឲ្យម្ចាស់ដីឡូតិ៍ សាងសង់សំណង់ ខុនដូរ ខាងលើ ឲ្យគោរពតាមបទដ្ឋាន បច្ចេកទេសសំណង់លំនៅដ្ឋាន ដោយពុំប៉ះពាល់ដល់សុខសុវត្ថិភាពអ្នករស់នៅជុំវិញ ក៏ដូចជាប៉ះពាល់ដល់ សង្គមសាធារណៈ ដោយធ្វើការកែសម្រួលគ្រោងសំណង់ដូចខាងក្រោម៖

• កាត់បន្ថយចម្ងាយគំលាតពីជញ្ជាំងអាគារ ដែលកំពុងសាងសង់ ទៅដល់របងព្រំដីឲ្យបានជាអតិបរិមា តាមតែអាចធ្វើបាន ក្នុងន័យថា ថាស់វ៉េរ៉ង់ដារលៀនចេញពីជញ្ជាំងអាគារដែលកំពុងសាងសង់អោយខ្លីបំផុត។

២-មិនត្រូវយកប្លង់សេនៃជាន់អាគារនីមួយៗ ទៅភ្ជាប់នឹងរបងព្រំដី ធ្វើជាគ្រឿងបង្គុំសំណង់អាគារ ឡើយ ត្រូវមានគំលាតជាអតិបរិមាតាមដែលអាចធ្វើបាន។

៣-មិនត្រូវយកបេតុងថាសជណ្តើរភ្ជាប់នឹងរបងព្រំដីជាជន្ទូលទប់ទ្រ និង ជាគ្រឿងបង្គុំសំណង់ អាគារឡើយ។

៤- មិនអាចយករបងព្រំដីធ្វើជាជញ្ជាំងអាគារ ខុនដូរ ដែលកំពុងសាងសង់នេះឡើយ។

សេចក្តីដូចបានជម្រាបជូនខាងលើ សូម លោកប្រធានមន្ទីរ មេត្តាទទួលនូវពាក្យបណ្ដឹង ដោយផ្អាក
ដំណើរការក្នុងការដ្ឋាន ខុនដូរ ដើម្បីងាកមកពិភាក្សាគ្នា ឲ្យបានត្រឹមត្រូវតាមបទដ្ឋានបច្ចេកទេសសំណង់ លំនៅដ្ឋាន និងមេត្តាជួយដោះស្រាយដល់កង្វល់របស់យើងខ្ញុំដោយអនុគ្រោះ។

លោក ឡាយ ម៉ារីវ៉ូ បញ្ជាក់ថា ក្រោយពីលោកបានដាក់ពាក្យបណ្តឹងរួច។ នៅព្រឹកថ្ងៃទី១៦ ខែសីហា ឆ្នាំ២០២៤នេះ អាជ្ញាធរខណ្ឌ និងមន្ទីរជំនាញបានចុះដល់ទីតាំងដើម្បីពិនិត្យ និងបានធ្វើកំណត់ហេតុដើម្បីឱ្យបញ្ឈប់ការសាងសង់អាគារខុនដូរនោះ ដោយមានភាគីដើមបណ្តឹងចូលរួមផ្តិតមេដៃ ដោយឡែក ភាគីម្ចាស់ខុនដូរ ដែលគេដឹងថាពាក់ផ្កាយ៣លើស្មារនោះ មិនចូលរួមផ្តិតមេដៃឡើយ។

លោក ឡាយ ម៉ារីវ៉ូ ធ្វើការសំណូមពរដល់អាជ្ញាធរ និងជំនាញពាក់ព័ន្ធមេត្តាជួយអន្តរាគមន៍ និងឱ្យម្ចាស់អគារខុនដូរ ដែលសាងសង់រំលោភយ៉ាបចូលមកលើដីរបស់គាត់ចំនួន៧តឹកនោះ កាត់ចេញវិញផង ដោយសារតែរំលោភចូលលើដីរបស់គាត់ ជណ្តើរក៏រំលោភលើដីរបស់គាត់ដែរ។

ម្ចាស់ដី និងជាដើមបណ្តឹងសង្ឃឹមយ៉ាងមុតមាំថា អាជ្ញាធរខណ្ឌ រាជធានី និងមន្ទីរជំនាញពាក់ព័ន្ធនិង ជួយអននតរាគមន៍ដោះស្រាយ រកយុត្តិធម៌ដល់ពួកគាត់ជាម្ចាស់ដីដែលគេរំលោភផងទាន។

ជុំវិញពាក់ព័ន្ធទៅនឹងការប្ដឹងពីសំណាក់ពលរដ្ឋពីរអ្នកប្ដីប្រពន្ធ ដែលបានប្ដឹង លោក អ៉ឹង ដារ៉េត និងប្រពន្ធឈ្មោះ ង៉ូវ រ៉ាដែត យ៉ាងដូច្នេះ ទីភ្នាក់ងារសារព័ត៌មាន សៀមរាប ប៉ុស្តិ៍ នៅពុំទាន់ទទួលបានការបំភ្លឺពី លោក អ៉ឹង ដារ៉េត នៅឡើយទេរហូតដល់ម៉ោងផ្សាយនេះ ខណ:ទំនាក់ទំនងតាមប្រព័ន្ធតេឡេក្រាមមិនមានការឆ្លើយតប៕SRP

ភ្នំពេញ៖នៅទីបំផុតតុលាការក្រុងភ្នំពេញ បានសម្រេចចោទប្រកាន់លោក គុយ វ៉ាត ថៅកែហាង Park Coffee ពីបទ មិនបំពេញកាតព្វកិច្ចចំពោះឧបករណ៍អាចជួញដូរបាន។ ការសម្រេចបើកការស៊ើបសួរនេះ បានធ្វើឡើងនៅថ្ងៃទី២៧ ខែសីហា ឆ្នាំ២០២៤។

អ្នកនាំពាក្យអយ្យការអមសាលាដំបូងរាជធានីភ្នំពេញ បានប្រាប់អ្នកសារព័ត៌មាន នៅរសៀលថ្ងៃទី២៧ ខែសីហា នេះថា “តំណាងអយ្យការសម្រេចបើកការស៊ើបសួរលោក គុយ វ៉ាត ថៅកែហាង Park Coffee ពីបទ មិនបំពេញកាតព្វកិច្ចចំពោះឧបករណ៍អាចជួញដូរបាន”។ កម្លាំងសមត្ថកិច្ចនាយកដ្ឋានព្រហ្មទណ្ឌ នៃក្រសួងមហាផ្ទៃ បានចាប់ខ្លួនលោក គុយ វ៉ាត ពាក់ព័ន្ធបទល្មើសឆបោកប្រាក់រាប់លានដុល្លារ។

គួរបញ្ជាក់ថាការចាប់ខ្លួនបានធ្វើឡើងកាលពីថ្ងៃទី២៤ ខែសីហា ឆ្នាំ២០២៤។ ការចាប់ខ្លួនបន្ទាប់ពី ជនរងគ្រោះជាច្រើននាក់បានដាក់ពាក្យប្ដឹង។

សូមជម្រាបថា លោកគុយ វ៉ាត អគ្គនាយកក្រុមហ៊ុន VTrust Group ចាប់ផ្តើមអាជីវកម្ម នៅឆ្នាំ២០០៣។ ក្រុមហ៊ុនដំបូងដែលលោកបើកដំណើរការ គឺក្រុមហ៊ុន Atech IT Solutions បន្ទាប់មកភោជនីយដ្ឋាន Park Cafe Foods and Beverages, ក្រុមហ៊ុនអចលនទ្រព្យ VTrust Property Co., Ltd រោងម៉ាស៊ីន កិនថ្ម នៅខេត្តកំពង់ស្ពឺ Kamhwa Stone Crushing និងក្រុមហ៊ុន Vtrust Appraisal Co., Ltd។ នាឆ្នាំ ២០០៨ លោកបានវិនិយោគ ទៅលើក្រុមហ៊ុនចំនួន ២បន្ថែមទៀត គឺក្រុមហ៊ុន Impact Digital Advertising និង ក្រុមហ៊ុន Phnom Penh Security Plc៕SRP

ភ្នំពេញ៖កម្លាំងសមត្ថកិច្ចបានឃាត់ខ្លួន​លោកផ្កាយបី​ ស៊ុន​ ហួរ​ ទីប្រឹក្សា​ក្រសួង​មហាផ្ទៃ​ ពាក់ព័ន្ធ​ រំលោភ​ទំនុកចិត្ត​ លុយ​ជាង​ ៣លានដុល្លារ​។

មន្ត្រីជាន់ខ្ពស់អគ្គ​ស្នងការដ្ឋាន​នគរបាល​រជាតិ​ បាន​ឲ្យដឹងថា​ កម្លាំងសមត្ថកិច្ច​នគរបាល​ការិយាល័យ​ព្រហ្មទណ្ឌ​កម្រិត​ស្រាល​ នៃ​ ស្នងការដ្ឋាន​នគរបាល​រាជធានី​ភ្នំពេញ​ បាន​ឃាត់​ខ្លួន​លោក​ឧត្តមសេនីយ៍ឯក ​ស៊ុន​ ហួរ​ ទីប្រឹក្សា​ក្រសួង​មហាផ្ទៃ​ ​ ពាក់ព័ន្ធ​បណ្ដឹង​របស់​ជនរងគ្រោះ​ ម្នាក់​ ដែល​បានប្ដឹង​ចោទប្រកាន់​ពី​បទ​ រំលោភ​ទំនុកចិត្ត​ ប្រេីប្រាស់​ឯកសារ​ក្លែងក្លាយ​ និង​ក្លែងបន្លំឯកសារសាធារណៈ​ លក់ដីខ្យល់​មាន​ទំហំ​ទឹកប្រាក់ជាង៣លានដុល្លារ​អាមេរិក​។

បើតាមប្រភពដដែលបានបន្តថា នៅព្រឹកថ្ងៃទី២៧ ខែសីហា ឆ្នាំ២០២៤ នេះ​សមត្ថកិច្ច​កំពុងរៀបចំ​សំណុំរឿង​បញ្ជូន​លោក​ឧត្តមសេនីយ៍ឯក ​ស៊ុន​ ហួរ​ ទៅ​អយ្យការអមសាលាដំបូងរាជធានីភ្នំពេញ​ចាត់ការតាមច្បាប់​៕SRP

ភ្ភ្នំពេញលោកគុយ​ វ៉ាត​ ត្រូវបានសមត្ថកិច្ចឃាត់ខ្លួនពាក់ព័ន្ធ​បទល្មើស​ឆបោក​ប្រាក់​រាប់​លាន​ដុល្លារ​។ នេះបើតាមបណ្ដាញសង្គមហ្វេសប៊ុក បានបង្ហោះចែកចាយជាសារធារណៈនៅថ្ងៃអាទិត្យ ទី២៥ ខែសីហា ឆ្នាំ២០២៤នេះ។

បណ្ដាញ Facebook បានបង្ហោះថា សមត្ថកិច្ច​នគរបាល​នាយកដ្ឋាន​ព្រហ្មទណ្ឌ​ ក្រសួង​មហាផ្ទៃ​ នៅថ្ងៃទី​ ២៤​ សីហា​ ឆ្នាំ​ ២០២៤​ បាន​ឃាត់ខ្លួន​លោក គុយ​ វ៉ាត​ ពាក់ព័ន្ធ​បទល្មើស​ឆបោក​ប្រាក់​រាប់​លាន​ដុល្លារ​។

បើកតាម Facebook បញ្ជាក់ថា ជ​នរងគ្រោះជាច្រេីន​បានដាក់​ពាក្យ​បណ្ដឹង​ប្ដឹងលោកគុយ វ៉ាត។

ជុំវិញព័ត៌មាន ការឃាត់ខ្លួនលោក គុយ​ វ៉ាត​ យ៉ាងដូច្នេះ សមត្ថកិច្ចនៅពុំទាន់បញ្ជាក់លំអិតនៅឡើយចំពោះករណីនេះ។

ពីភ្នាក់ងារសារព័ត៌មានសៀមរាប ប៉ុស្តី នៅពុំទាន់ទទួលបានការបំភ្លឺពីសមត្ថកិច្ចពាក់ព័ន្ធ ជុំវិញការឃាត់ខ្លួនលោក គុយ​ វ៉ាត​ បាននៅឡើយទេរហូតដល់ម៉ោងផ្សាយនេះ៕SRP

ភ្នំពេញ៖សម្ដេចតេជោហ៊ុន សែន ប្រធានព្រឹទ្ធសភាជាតិកម្ពុជា នៅថ្ងៃព្រហស្បតិ៍នេះ បានសរសេរសំណេររៀបរាប់និងបង្ហោះរូបភាពចំនួន 5 សន្លឹក។

សម្ដេចតេជោហ៊ុន សែន បានសរសេរថា (ត្រូវលោតទៅក្នុងទឹក ទើបចេះហែលទឹក ជាទ្រឹស្តីនៅតែត្រឹមត្រូវ)។ ឯទ្រឹស្តី (ក្មេងមានកម្លាំងចាស់ស្គាល់ផ្លូវ) ហាក់លេងស្របជាមួយ សភាពការណ៍បច្ចុប្បន្នហើយដែលអាចកែទៅជា (ក្មេងមានកម្លាំង និងស្គាល់ផ្លូវឯចាស់មានបទពិសោធន៍)។

សម្ដេចតេជោហ៊ុន សែន បានបន្តថា ថ្ងៃ២២ ខែសីហា ឆ្នាំ២០២៤នេះជាខួបមួយឆ្នាំនៃថ្ងៃជំនាន់ថ្មីចាប់ផ្តើមកាច់ចង្កូតនាវាកម្ពុជា ជាមួយការចាកចេញរបស់ U.90 U.80 និង U.70 សំដៅដល់អ្នកមាន អាយុជាង៨០ ជាង៧០ និងជិត៧០ឆ្នាំ។

ជំនាន់ថ្មីបានដឹកនាំដោយស្វាហាប់ និងការទទួលខុសត្រូវដែលខ្ញុំសូមលើកតែចំណុចគន្លឹះមកកត់សំគាល់គឺ៖

១. រក្សាបានសន្តិភាព ស្ថេរភាពនយោបាយ សន្តិសុខសណ្តាប់សង្គម។
២. រក្សាបានស្ថេរភាពម៉ាក្រូសេដ្ឋកិច្ច ទប់ស្កាត់បានអតិផរណារក្សាបានកម្លាំងទិញនៃប្រាក់រៀល។
៣. រក្សាបាននូវកំណើនសេដ្ឋកិច្ច ទោះបីសេដ្ឋកិច្ចតំបន់ និងសកលលោកជួបការលំបាកក៏ដោយ។
៤. ប្រាក់ចំណូលជាតិរក្សាបានល្អ ពិសេសសាច់ប្រាក់នៅរតនាគារជាតិ សម្រាប់ចំណាយចរន្តមិនមានការថយចុះទេ បើទោះជាការចំណាយកើនឡើង ដោយការដំឡើងបៀវត្សរ៍ ចំណាយលើការជួយប្រជាជនក៏ដោយ។

សម្ដេចតេជោហ៊ុន សែន បានបញ្ជាក់ថា បទពិសោធន៍របស់ខ្ញុំ សាច់ប្រាក់សម្រាប់បើកបៀវត្សរ៍ និងចំណាយចរន្តផ្សេងទៀត វាសំខាន់ណាស់សម្រាប់រដ្ឋាភិបាលប្រទេសមួយ។

ខ្ញុំនិងថ្នាក់ដឹកនាំផ្សេងទៀតចាកចេញដោយបន្សល់ទុកឲ្យជំនាន់ថ្មី មានសាច់ប្រាក់គ្រប់គ្រាន់ប្រើប្រាស់ច្រើនខែ ហើយជំនាន់ថ្មីក៏មិនមែនជា ស្រីកញ្ជើធ្លុះនោះឡើយ ពួកគេខិតខំប្រមូលចំណូលដើម្បីបំរើឱ្យការចំណាយដែលចេះតែកើនឡើង និងរក្សាបាននូវសាច់ប្រាក់ក្នុងរតនាគារមិនឱ្យថយចុះ។

ខ្ញុំដាក់អំរែកចុះបន្ទាប់ពីបំពេញការងារខាងនីតិប្រតិបត្តិរយៈពេលជាង៤៤ឆ្នាំ ក្នុងនោះកាន់មុខតំណែងជានាយករដ្ឋមន្ត្រីជាង៣៨ឆ្នាំ មានពេលសមល្មម ដើម្បីរក្សាសុខភាពក្នុងវ័យ៧២ឆ្នាំ។ កិច្ចការសព្វថ្ងៃនៅប្រមាណ 50% ប្រៀបធៀបពេលធ្វើកិច្ចការជានាយករដ្ឋមន្ត្រី។

ពាក្យក្មេងមានកម្លាំង ចាស់ស្គាល់ផ្លូវ ល្មមដូរចេញហើយ ព្រោះមនុស្សចាស់ខ្លះដូចមេក្រុមប្រឆាំងជ្រុលនិយម នាំក្មេងវង្វេងផ្លូវរហូតហើយ៕SRP

ភ្នំពេញ៖នៅទីបំផុតសមត្ថកិច្ចបានបញ្ជូនខ្លួនស្ដ្រីជនសង្ស័យឈ្មោះ ម៉េង លីហ័រ ហៅ Yubee Ly ទៅកាន់សាលាដំបូងរាជធានីភ្នំពេញ បន្ទាប់ពីបានបញ្ចប់ការសាកសួរនៅរសៀលថ្ងៃទី២២ ខែសីហា ឆ្នាំ២០២៤នេះ។

នាយកដ្ឋាននគរបាលព្រហ្មទណ្ឌ បានអះអាងថា អំពីចំណាត់ការតាមផ្លូវច្បាប់លើស្ដ្រីម្នាក់ ដែលបានប្រើប្រាស់គណនី Facebook ឈ្មោះ Yubee Ly ហើយបង្ហោះវីដេអូប្រើប្រាស់អាវុធដោយខុសច្បាប់ ដោយភ្ជាប់ជាមួយខ្លឹមសារ «អូនកាចចឹងធ្វើប្រពន្ធបងបាននៅ»។

ក្រោយឃើញការបង្ហោះបែបនេះ ដោយអនុវត្តតាមបទបញ្ជារបស់ឯកឧត្តម ឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ, កម្លាំងការិយាល័យព្រហ្មទណ្ឌកម្រិតស្រាល នៃនាយកដ្ឋាននគរបាលព្រហ្មទណ្ឌ ដឹកនាំដោយលោកឧត្តមសេនីយ៍ត្រី វុទ្ធី វង្សវិបុល និងលោកវរសេនីយ៍ទោ វុធ ស៊ែ អនុប្រធាននាយកដ្ឋាន និងលោកវរសេនីយ៍ឯក ឡេង ប៊ុនហួរ នាយការិយាល័យ បានធ្វើការស្រាវជ្រាវបន្ទាន់ភ្លាមៗប្រកបដោយការយកចិត្តទុកដាក់ខ្ពស់។

ប្រហែល១ម៉ោងក្រោយការបង្ហោះ ក្រោមការសម្របសម្រួលនីតិវិធីពីលោកព្រះរាជអាជ្ញារង នៃតំណាងអយ្យការអមសាលាដំបូងរាជធានីភ្នំពេញ កម្លាំងជំនាញកំណត់បានទីតាំងស្នាក់នៅ និងឈានដល់ការនាំខ្លួនស្ដ្រីម្នាក់ឈ្មោះ ម៉េង លីហ័រ អាយុ២៤ឆ្នាំ មកធ្វើការសួរនាំទាំងយប់ថ្ងៃទី២០ ខែសីហា ឆ្នាំ២០២៤ នៅនាយកដ្ឋាននគរបាលព្រហ្មទណ្ឌ ដើម្បីចាត់ការបន្ដតាមនីតិវិធី។

ផ្អែកតាមការសាកសួរជំហ៊ានដំបូង ស្ដ្រីឈ្មោះ ម៉េង លីហ័រ បានសារភាពថា វីដេអូបាញ់ឡើងលើមួយគ្រាប់នេះតាំងពីឆ្នាំ២០២២មកម្ល៉េះ ប៉ុន្ដែគេទើបយកមកបង្ហោះឡើងវិញ នៅក្នុងគណនីក្លែងក្លាយដែលប្រើប្រាស់ឈ្មោះ Yubee Ly។

ដោយឡែក ម្ចាស់អាវុធខ្លីដែលបានផ្ដល់ឲ្យស្ដ្រីខាងលើប្រើប្រាស់បាញ់បោះនោះ ត្រូវបានកម្លាំងនគរបាលចាប់ខ្លួនកាលពីពេលកន្លងទៅ ហើយក៏ត្រូវសាលាដំបូងរាជធានីភ្នំពេញ សម្រេចផ្ដន្ទាទោសដាក់ពន្ធនាគារ ពាក់ព័ន្ធការកាន់កាប់អាវុធដោយខុសច្បាប់ និងករណីគ្រឿងញៀន។

នាយកដ្ឋាននគរបាលព្រហ្មទណ្ឌ សូមថ្លែងអំណរគុណចំពោះសាធារណៈ និងអ្នកសារព័ត៌មាន ទាំងអស់ ដែលបានផ្ដល់កិច្ចសហការល្អក្នុងការផ្ដល់ព័ត៌មាន៕SRP

ភ្នំពេញ៖ព្រះមហាក្សត្រ ព្រះរាជាណាចក្រកម្ពុជា បានចេញព្រះរាជក្រឹត្យមួយ ត្រាស់បង្គាប់បន្ថយឋានន្តរស័ក្តលោកឧត្តមសេនីយ៍ត្រី ឈឹម រត្ថា អនុប្រធាននាយកដ្ឋានច្រកទ្វារទី១ នៃអគ្គនាយកដ្ឋានអន្តោប្រវេសន៍ មកត្រឹមជាថ្នាក់វរសេនីយ៍ឯក នៅក្នុងក្របខណ្ឌមន្រ្តីនគរបាលជាតិ នៃក្រសួងមហាផ្ទៃ៕SRP

សម្ដេចនាយករដ្ឋមន្ត្រីហ៊ុន ម៉ាណែត បានអះអាងថា ផ្លូវ គឺ​ជាអាទិភាពគន្លឹះទី២ នៅក្នុងអាទិភាពគន្លឹះទាំង៥ “មនុស្ស ផ្លូវ ទឹក ភ្លើង និងបច្ចេកវិទ្យា” នៃយុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាលកម្ពុជា នីតិកាលទី ៧ ដោយកិច្ចការអាទិភាពទី២ ក្នុងបញ្ចកោណទី២ គឺការលើកកម្ពស់ការតភ្ជាប់ និងការបង្កើនប្រសិទ្ធភាព នៃវិស័យដឹកជញ្ជូន បានផ្តោតគោលដៅយុទ្ធសាស្ត្រលើការបង្កើនប្រសិទ្ធភាពហេដ្ឋារចនាសម្ព័ន្ធគាំទ្រ, ការកសាង និងការអភិវឌ្ឍហេដ្ឋារចនាសម្ព័ន្ធថ្មី ដើម្បីជាប្រយោជន៍ដល់ប្រជាពលរដ្ឋ ក្នុងការធ្វើដំណើរ និងបង្ខិតឱ្យកាន់តែជិតរវាងខេត្ត និងខេត្ត តាមរយៈការតភ្ជាប់ប្រព័ន្ធផ្លូវ ដែលប្រៀបបានដូចជាសរសៃឈាម និងមានសារៈសំខាន់ក្នុងការលើកកម្ពស់សេដ្ឋកិច្ចជាតិ។

សម្ដេចនាយករដ្ឋមន្ត្រីបានបញ្ជាក់ថា គម្រោងស្ថាបនាផ្លូវជាតិលេខ១០ ដែលតភ្ជាប់ខេត្តកោះកុង ខេត្តពោធិ៍សាត់ និងខេត្តបាត់ដំបង សម្រេចវឌ្ឍនភាពសាងសង់បានចំនួន ៨៩,៥៦% គិតត្រឹមចុងខែកក្កដា ឆ្នាំ២០២៤នេះ។

សម្ដេចបានបញ្ជាក់បន្ថែមថា ផ្លូវជាតិលេខ១០ គឺជាប្រភេទផ្លូវ Grade III ក្រាលកៅស៊ូពីរស្រទាប់ (DBST) មានប្រវែងសរុប ១៩៨,៥១ គីឡូម៉ែត្រ និងទទឹង ៩ម៉ែត្រ ដោយតភ្ជាប់ខេត្តចំនួន៣ រួមមាន៖ខេត្តកោះកុង ខេត្តពោធិ៍សាត់ និងខេត្តបាត់ដំបង។ គម្រោងសាងសង់ផ្លូវនេះ មានរយៈពេល ៦៦ខែ និងបានចាប់ផ្ដើមសាងសង់ពីថ្ងៃទី១៨ ខែធ្នូ ឆ្នាំ២០១៩ ហើយគ្រោងនឹងបញ្ចប់នាខែមិថុនា ឆ្នាំ២០២៥ ខាងមុខនេះ ។ ប្រវែងសរុបផ្លូវសរុបនៃគម្រោងផ្លូវជាតិលេខ១០ មានចំនួន ១៩៨,២១៨ គីឡូម៉ែត្រ រាប់ចាប់ពីផ្លូវជាតិលេខ 57-7 ត្រង់ចំណុច PK35+900 នៅភូមិកញ្ចាំង ឃុំស៊ុង ស្រុកសំឡូត ខេត្តបាត់ដំបង ឆ្លងកាត់ឃុំប្រម៉ោយ ស្រុកវាលវែង ខេត្តពោធិ៍សាត់ រហូតដល់ផ្លូវជាតិលេខ៤៨(ចាស់) ត្រង់ចំណុច PK1+700 ក្នុងសង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង៕SRP

រាជរដ្ឋាភិបាលកម្ពុជា ធានាការពារជាដាច់ខាត នូវសន្តិភាព ស្ថិរភាពនយោបាយ អធិបតេយ្យភាពជាតិ និងបូរណភាពទឹកដី ទោះក្នុងតម្លៃណាក៏ដោយ

ប៉ុន្មានថ្ងៃចុងក្រោយនេះ ខ្ញុំបានឆ្លើយសំណួរអ្នកសារព័ត៌មានជាច្រើនពាក់ព័ន្ធនឹងការអំពាវនាវរបស់ក្រុមប្រឆាំងជ្រុលនិយមមួយក្តាប់តូចនៅក្រៅប្រទេសដែលយកបញ្ហានៅប្រទេសបង់ក្លាដេសមកបំផុសឱ្យមានចលនាបដិវត្តន៍ពណ៌ផ្តួលរំលំរាជរដ្ឋាភិបាលស្របច្បាប់នៅកម្ពុជាតាមការស្រមើស្រមៃរបស់ខ្លួន។

ខ្ញុំសូមបញ្ជាក់ជូនជាថ្មីដូចតទៅ៖ ការប៉ុនប៉ងបំផុសចលនាបដិវត្តន៍ពណ៌នៅកម្ពុជាគឺជាអំពើប្រឆាំងនឹងច្បាប់ ប្រឆាំងនឹងសន្តិភាព ប្រឆាំងនឹងការបោះឆ្នោតតាមបែបប្រជាធិបតេយ្យ និងប្រឆាំងឆន្ទៈក៏ដូចជាបំណងប្រាថ្នារបស់ប្រជាពលរដ្ឋខ្មែរ។ ហេតុអ្វី?

ទី១. រាជរដ្ឋាភិបាលដឹកនាំដោយគណបក្សប្រជាជនកម្ពុជាកើតចេញពីការបោះឆ្នោត ស្របច្បាប់ដោយប្រជាពលរដ្ឋខ្មែរ។ ដូច្នេះ ការប៉ុនប៉ងផ្តួលរំលំរាជរដ្ឋាភិបាលស្របច្បាប់ដោយប្រើមធ្យោបាយហិង្សា មិនប្រជាធិបតេយ្យគឺជាអំពើល្មើសច្បាប់។ នេះសបញ្ជាក់ថា ក្រុមជ្រុលនិយមមួយក្តាប់តូចនេះតែងប្រព្រឹត្តខុសច្បាប់ជារៀងរហូតមក ហើយទោសដែលពួកគេមានជាប់ខ្លួនគឺជាឧទាហរណ៍ស្រាប់។

ទី២. ប្រទេសកម្ពុជាមានសន្តិភាពពេញលេញចាប់ពីឆ្នាំ ១៩៩៨ មកក្រោមនយោបាយឈ្នះៗរបស់សម្តេចតេជោ ហ៊ុន សែន។ សន្តិភាពមានតម្លៃខ្ពស់ណាស់មិនអាចកាត់ថ្លៃបានពីព្រោះវាបានអនុញ្ញាតឱ្យប្រទេសជាតិស្គាល់ការអភិវឌ្ឍមិនធ្លាប់មានពីមុន និងបានផ្តល់ក្តីសុខនិងអត្ថប្រយោជន៍ដល់ប្រជាពលរដ្ឋខ្មែរគ្រប់គ្នា។ ដូច្នេះ ការប៉ុនប៉ងអូសទាញប្រទេសឱ្យធ្លាក់ក្នុងសភាពវឹកវរ ហិង្សា បង្ហូរឈាម ដែលបើកផ្លូវឱ្យសង្គ្រាមស៊ីវិលកើតឡើងសារជាថ្មីគឺជាអំពើប្រឆាំងសន្តិភាពដែលអាជ្ញាធររាជរដ្ឋាភិបាលមិនអនុញ្ញាតជាដាច់ខាត។

ទី៣. កម្ពុជាពីអតីតកាលដែលរងការបំផ្លិចបំផ្លាញខ្ចេចខ្ទាំ រហូតដល់ធ្លាក់ចូលក្នុងរបបប្រល័យពូជសាសន៍ កាប់សម្លាប់គ្នាស្ទើរផុតរលត់ពីផែនដី ដោយសារអ្នកនយោបាយខ្មែរប្រើវប្បធម៌នយោបាយដណ្តើមអំណាចគ្នាដោយចុងកាណុង។ ប៉ុន្តែ ក្រោមការដឹកនាំរបស់រាជរដ្ឋាភិបាលដែលកើតចេញពីគណបក្សប្រជាជនកម្ពុជា វប្បធម៌នយោបាយនេះត្រូវបានផ្លាស់ប្តូរមកជាការជ្រើសរើសមេដឹកនាំតាមរយៈការបោះឆ្នោតតាមបែបប្រជាធិបតេយ្យវិញ។ ដូច្នេះ ការប៉ុនប៉ងណាមួយចង់ផ្តួលរំលំរាជរដ្ឋាភិបាលតាមមធ្យោបាយបដិវត្តន៍ពណ៌គឺជាអំពើប្រឆាំងនឹងការបោះឆ្នោតតាមបែបប្រជាធិបតេយ្យដែលមិនអាចទទួលយកបាន។

ទី៤. ប្រជាពលរដ្ឋខ្មែរបាននិងកំពុងទទួលផលពីសុខសន្តិភាពនិងការអភិវឌ្ឍហើយពួកគេដឹងច្បាស់ថា សន្តិភាពនិងការអភិវឌ្ឍគឺស្នាដៃដឹកនាំរបស់រាជរដ្ឋាភិបាលដែលកើតចេញពីគណបក្សប្រជាជនកម្ពុជា។ ហេតុនេះហើយបានជាពួកគេបោះឆ្នោតគាំទ្រគណបក្សប្រជាជនកម្ពុជាឱ្យដឹកនាំប្រទេសរហូតមក។ ជាក់ស្តែង ការបោះឆ្នោតចុងក្រោយនេះ គណបក្សប្រជាជនកម្ពុជាទទួលបានសំឡេងគាំទ្រជាង ៨២% នៃចំនួនអ្នកបោះឆ្នោតដែលជាអត្រាគាំទ្រខ្ពស់បំផុត។ ដូច្នេះ អំពើរបស់ជនជ្រុលនិយមមួយក្តាប់តូចដែលប៉ុនប៉ងផ្តួលរំលំរាជរដ្ឋាភិបាលគឺផ្ទុយស្រឡះពីឆន្ទៈនិងបំណងប្រាថ្នារបស់ប្រជាពលរដ្ឋខ្មែរដែលចង់រស់នៅក្នុងសុខសន្តិភាពនិងមិនចង់ភ្លក់រសជាតិនៃភាពវឹកវរ អសន្តិសុខ និងសង្គ្រាមស៊ីវិលម្តងទៀតឡើយ។

ទី៥. រាជរដ្ឋាភិបាលដឹកនាំដោយគណបក្សប្រជាជនកម្ពុជាដែលមានសម្តេចតេជោ ហ៊ុន សែន អតីតនាយករដ្ឋមន្ត្រី និងសម្តេចធិបតី ហ៊ុន ម៉ាណែត នាយករដ្ឋមន្ត្រីបច្ចុប្បន្នមានគោលជំហរច្បាស់លាស់ ម៉ឺងម៉ាត់ ឥតងាករេ គឺការពារឱ្យបានជាដាច់ខាតនូវសុខសន្តិភាព ស្ថិរភាពនយោបាយ អធិបតេយ្យភាពជាតិ និងបូរណភាពទឹកដី ទោះជាក្នុងតម្លៃណាក៏ដោយ។ នេះគឺជាភាពកក់ក្តៅដែលរាជរដ្ឋាភិបាលធានាជូនជាតិនិងប្រជាពលរដ្ឋខ្មែរទាំងក្នុងអតីតកាល បច្ចុប្បន្ន និងតទៅអនាគត៕

អត្ថបទដោយ ឯកឧត្តម ប៉ែន បូណា អ្នកនាំពាក្យរាជរដ្ឋាភិបាល