ខេត្តកំពង់ចាម – Page 20

ខេត្តកំពង់ចាម៖ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានថ្លែងប្រាប់ បងប្អូនប្រជាកសិករ ឱ្យសន្សំសំចៃរក្សាទឹកទុក សម្រាប់ប្រេីប្រាស់ពេលអាកាសធាតុរាំងស្ងួត ក្នុងកូនរដូវប្រាំងឆ្នាំនេះ ពោលគឺកុំឱ្យមានការបង្ហូរទឹកចោលឱ្យសោះ ព្រោះកូនរដូវប្រាំងឆ្នាំនេះ អាចកើតឡើង នឹងអូសបន្លាយពេលយូរ។

លោកថ្លែងបែបនេះក្នុងពិធីបើកការរដ្ឋានស្ថាបនាផ្លូវក្រាលកៅស៊ូ ប្រភេទ DBST ចំនួន ៤ខ្សែ សរុបប្រវែង២២,៥៣គម ក្នុងក្របខណ្ឌគម្រោងពិពិធកម្មកម្ពុជា នៅភូមិក្រដាស (ខ) ឃុំតាំងក្រសាំង ស្រុកបាធាយ ខេត្តកំពង់ចាម នៅថ្ងៃអង្គារនេះ។

រដ្ឋមន្ត្រីក្រសួងកសិកម្ម បានថ្លែងថា រាជរដ្ឋាភិបាលតែងតែមានការគិតគូរ ចង់ឱ្យបងប្អូនប្រជាពលរដ្ឋ ធ្វើស្រែទទួលបានផលច្រើន និងមានតម្លៃខ្ពស់ ប៉ុន្តែកសិផលយេីងមានតម្លៃខ្ពស់ពេក កូនចៅយេីងក៏គ្មានអីហូបចុកដែរ ព្រោះអ្នកដែលធ្វើការរោងចក្រ ឬអ្នករៀនសូត្រនៅរាជធានី តែងតែទិញចំណីអាហារពីគេហូបដូចតែគ្នាហ្នឹង អញ្ចឹងហើយបានជាយេីងរៀបចំធ្វើគម្រោងពិពិធកម្ម វិស័យកសិកម្មកម្ពុជា ដេីម្បីឱ្យបងប្អូនប្រជាពលរដ្ឋ មានការចំណេញ តាមរយៈការធ្វើដំណើរបានស្រួល ក៏ដូចជាការផ្លាស់ប្តូរពាណិជ្ជកម្ម និងការដឹកកសិផលទៅកាន់ទីផ្សារ បស់ប្រជាកសិករ សំដៅជំរុញការអភិវឌ្ឍន៍សេដ្ឋកិច្ច មូលដ្ឋាន លើកកម្ពស់កម្រិតជីវភាពប្រជាជន នៅតាមជនបទ ដើម្បីបង្ខិតជនបទ ឱ្យមានជីវភាពប្រហាក់ប្រហែលនឹងទីប្រជុំជនផងដែរ។

លោក សាន វិសាល រដ្ឋលេខាធិការក្រសួងអភិវឌ្ឍន៍ជនបទ និងជាប្រធានសម្របសម្រួលគម្រោងពិពិធកម្មវិស័យកសិកម្មកម្ពុជា បានថ្លែងថា សម្តេចតេជោ ហ៊ុន សែន បានណែនាំដល់ក្រសួងអភិវឌ្ឍន៍ជនបទ ឱ្យអនុវត្តការងារជួសជុល កែលំអផ្លូវសរុបជាង២២គីឡូម៉ែត្រនេះ ឱ្យធានាបានគុណភាពល្អ ដេីម្បីឱ្យបងប្អូនប្រជាពលរដ្ឋ បានធ្វើចរាចរដោយងាយស្រួល ដេីម្បីដឹកជញ្ជូនកសិផល ទៅកាន់ទីផ្សារ ហើយផ្លូវទាំង៤ខ្សែខាងលើនេះដែរ គឺត្រូវប្រេីប្រាស់ថវិកាអស់ប្រមាណជាង ២លានដុល្លារ និងប្រេីប្រាស់រយៈពេល១៥ខែ ដេីម្បីស្ថាបនាឱ្យបានរួចរាល់ជាស្ថាពរ ព្រោះនេះគឺជាកញ្ចប់ទី១ នៃគម្រោងជួសជុលកែលំអ ផ្លូវចំនួន ៤ខ្សែ សរុបប្រវង ២២,៥៣គ.ម ដែលមានមូលដ្ឋានស្រុកចំនួន ៤ទទួលផល គឺមានស្រុកស្ទឹងត្រង់ ស្រុកជេីងព្រៃ ស្រុកព្រៃឈរ និងស្រុកបាធាយ។

លោកអ៊ុន ចាន់ដា អភិបាលខេត្តកំពង់ចាម ក៏បានថ្លែងថា ដោយសារប្រទេសជាតិយើងមានសុខសន្តិភាព ក្រោមការដឹកនាំប្រកបដោយគតិបណ្ឌិតរបស់ សម្តេចតេជោ ហ៊ុន សែន ទើបមានការអភិវឌ្ឍន៍រីកចម្រើនជាបន្តបន្ទាប់ដូចសព្វថ្ងៃនេះ។ ជាក់ស្ដែងការស្ថាបនាពីផ្លូវដី ទៅជាផ្លូវកៅស៊ូខាងលើនេះ ពិតជាមានសារៈសំខាន់ខ្លាំងណាស់ សម្រាប់បម្រើឱ្យការធ្វើដំណើរ។

អភិបាលខេត្ត ក៏បានអំពាវនាវដល់ប្រជាពលរដ្ឋទាំងអស់ សូមចូលរួមការពារសុខសន្តិភាព ឱ្យបាននៅគង់វង្ស ស្ថិតស្ថេរជារៀងដរាប ដេីម្បីបន្តការអភិវឌ្ឍរីកចម្រើនទៅមុខទៀត ជាពិសេសសូមដឹកនាំបងប្អូនកូនចៅ និងញាតិមិត្តជិតខាង អញ្ជើញទៅបោះឆ្នោតជ្រើសតាំងតំណាងរាស្ត្រ នីតិកាលទី៧ នាថ្ងៃទី២៣ ខែកក្កដា ឆ្នាំ២០២៣ ឱ្យបានគ្រប់ៗគ្នា ផងដែរ៕ដោយនាគខៀវ

ខេត្តកំពង់ចាម៖អភិបាលខេត្តំពង់ចាម លោក អ៊ុន ចាន់ដា បានថ្លែងប្រាប់ថ្នាក់ដឹកនាំសភាពាណិជ្ជកម្មមណ្ឌលកំពង់ចាម ឱ្យបន្តធ្វើការទំនាក់ទំនង ជាមួយដៃគូវិនិយោគ កាន់តែច្រើនឡើងថែមទៀត មកធ្វើការអភិវឌ្ឍ និងបង្កើនមុខរបរលក់ដូរ ជូនបងប្អូនអាជីវករ នៅខេត្តកំពង់ចាម ខណៈក្នុងអាណត្តិថ្មីនេះ សភាពាណិជ្ជកម្ម បានទំនាក់ទំនងជាមួយដៃគូវិនិយោគ ដេីម្បីជួយដល់អាជីវករយើង បានច្រើន។

លោកថ្លែងបែបនេះក្នុងពិធីពិសាអាហារសាមគ្គីជាមួយបងប្អូនអាជីវករ ក្នុងក្រុងកំពង់ចាម នាល្ងាចថ្ងៃទី១៧ ខែមិថុនា ឆ្នាំ២០២៣ នៅមជ្ឈមណ្ឌលយៀកថៃក្រុងកំពង់ចាម។

អភិបាលខេត្តកំពង់ចាម បានថ្លែងថា កត្តាជំនឿពិតជាសំខាន់ណាស់ ទាំងក្នុងអង្គភាព និងអតិថិជន ដូច្នេះហើយដេីម្បីឱ្យមានការរីកចម្រើនលើមុខជំនួញរកស៊ីទទួលទាន ជូនបងប្អូនអាជីវករយើងនោះ ថ្នាក់ដឹកនាំសភាពាណិជ្ជកម្ម ដែលមាន លោកឧកញ៉ា ហួត ឈឿន ជាប្រធាន មណ្ឌលខេត្តកំពង់ចាម-មណ្ឌលគិរី ទេីបជាប់ឆ្នោតក្នុងអាណត្តិទី៣នេះ ត្រូវបង្កើនឱ្យមានការជឿទុកចិត្តពីសំណាក់ អ្នកវិនិយោគិនជាមុនសិន ពីព្រោះថាបេីមានគេជឿជាក់លើយេីងហើយនោះ គេនឹងមកចាប់ដៃគូសហការរកស៊ីវិនិយោគជាមួយយើងមិនខាន ពេលនោះហើយដែលបងប្អូនអាជីវករបានទទួលអត្ថប្រយោជន៍ពីសភាពាណិជ្ជកម្មយើង។

លោក អ៊ុន ចាន់ដា បានថ្លែងថា បច្ចុប្បន្នរាជរដ្ឋាភិបាលកម្ពុជា បានផ្តល់សិទ្ធិ សម្រាប់ធ្វើការវិនិយោគ ដោយអាជ្ញាធរខេត្ត មានសិទ្ធិសម្រេច ក្រោមទុន៥លានដុល្លារ ខណៈដែលរាជរដ្ឋាភិបាលកម្ពុជា បានបង្កើតឱ្យមានសភាពាណិជ្ជកម្ម ដើម្បី ធ្វើជាអាណាព្យាបាល និងជាតំណាងឱ្យអាជីវករ ក្នុងការផ្ដល់អត្ថប្រយោជន៍សម្រាប់បងប្អូនអាជីវករ ដើម្បីធ្វើការទំនាក់ទំនង ស្វែងរកដៃគូវិនិយោគគិន ទាំងក្នុង និងក្រៅប្រទេស មកបណ្ដាក់ទុនវិនិយោគនៅកម្ពុជា ក្នុងការធ្វើជំនួញផ្សេងៗ។ ជាមួយគ្នានោះអាជ្ញាធរខេត្ត នៅតែបន្តសកម្មភាព ជួយដល់សភាពាណិជ្ជកម្ម ដើម្បីបន្តបង្កើតនូវទំនាក់ទំនង ជាមួយដៃគូវិនិយោគ ឱ្យកាន់តែច្រើនឡើងថែមទៀត មកធ្វើការអភិវឌ្ឍ នៅខេត្តកំពង់ចាម ផងដែរ៕ដោយនាគខៀវ

ទេសរដ្ឋមន្ត្រី ស៊ុន ចាន់ថុល ៖ សុខសន្តិភាពផ្តល់ឱកាសឱ្យរដ្ឋាភិបាលកសាង ប្រព័ន្ធចម្រោះទឹកកខ្វក់ ប្រមាណ២២លានដុល្លារ នៅក្រុងកំពង់ចាម

ខេត្តកំពង់ចាម៖អនុគម្រោងសាងសង់ប្រព័ន្ធលូ និងស្ថានីយប្រព្រឹត្តកម្មទឹកកខ្វក់ នៃគម្រោងអភិវឌ្ឍន៍ក្រុងរបៀងមហា អនុតំបន់មេគង្គជំហានទី៤ ដែលមានតម្លៃប្រមាណ២២លានដុល្លារអាមេរិក ត្រូវបានបើកការដ្ឋានសាងសង់។

ការបើកការដ្ឋានសាងសង់នេះនៅថ្ងៃសុក្រម្សិលមិញ ក្រោមវត្តមានលោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន។

ថ្លែងក្នុងពិធីបើកការដ្ឋាន លោកស៊ុន ចាន់ថុល បានថ្លែងថា មានសុខសន្តិភាព រាជរដ្ឋាភិបាលយេីងមានឱកាសទាក់ទាញអ្នកវិនិយោគ មកដាក់ទុននៅកម្ពុជា មានសុខសន្តិភាព យេីងមានឱកាសទាក់ទាញភ្ញៀវទេសចរ រាប់លាននាក់មកលេងនៅកម្ពុជា មានសុខសន្តិភាព យេីងមានឱកាសយកកសិផល ផលិតផលយេីងទៅលក់នៅបរទេស បង្កើតការងារជូនបងប្អូនប្រជាពលរដ្ឋយើងធ្វើ ពោលគឺសុខសន្តិភាព ជាកត្តាមួយដ៏សំខាន់ដែលមិនអាចកាត់ថ្លៃបាន ក្នុងការកសាងជាតិមាតុភូមិយេីង។ ដូច្នេះសូមបងប្អូនប្រជាពលរដ្ឋទាំងអស់ មេត្តាចូលរួមជាមួយរាជរដ្ឋាភិបាល ដេីម្បីថែរក្សាសុខសន្តិភាព ស្ថេរភាពនយោបាយនេះ ឱ្យខាងតែបាន ទោះក្នុងតម្លៃណាក៏ដោយ ដេីម្បីយេីងកសាងជាតិមាតុភូមិរបស់យើងឱ្យបានរុងរឿងថែមទៀត។

លោក អ៊ុន ចាន់ដា អភិបាលខេត្តកំពង់ចាម បានថ្លែងថា ការបើកការដ្ឋានសាងសង់ប្រព័ន្ធលូរំដោះទឹកភ្លៀង និងលូទឹកកខ្វក់ នៅក្រុងកំពង់ចាមនេះ ជាសក្ខីភាពថ្មីមួយដែលបង្ហាញពីការគិតគូរយកចិត្តទុកដាក់របស់រាជរដ្ឋាភិបាលកម្ពុជា ដែលមានសម្តេចហ៊ុន សែន ក្នុងការអភិវឌ្ឍន៍ ហេដ្ឋារចនាសម្ព័ន្ធក្រុងកំពង់ចាម សំដៅលើកកម្ពស់ សុខមាលភាព ការរស់នៅរបស់បងប្អូនប្រជាពលរដ្ឋ ក្រុងកំពង់ចាម និងការការពារបរិស្ថានប្រកបដោយនិរន្តភាព។

អភិបាលខេត្តបន្តថា តាមរយៈគម្រោងសាងសង់ប្រព័ន្ធលូ ខ្វាត់ខ្វែង ក្នុងភូមិសាស្ត្រសង្កាត់កំពង់ចាម សង្កាត់វាលវង់ និងផ្នែកខ្លះនៃសង្កាត់បឹងកុក, សង្កាត់សំបួរមាស និងកសាងស្ថានីយប្រព្រឹត្តកម្មទឹកកខ្វក់ មុននឹងបង្ហូរទៅកាន់បឹងធម្មជាតិ។ បន្ទាប់ពីគម្រោងនេះ សាងសង់បញ្ចប់ក្រុងកំពង់ចាម នឹងបញ្ចៀសបានការជន់លិចដោយសារទឹកភ្លៀង និងមានការបែងចែក ច្បាស់លាស់រវាងប្រព័ន្ធលូរំដោះទឹកភ្លៀង និងប្រព័ន្ធលូទឹកកខ្វក់ផងដែរ។

អភិបាលខេត្តបានបញ្ជាក់ថា គម្រោងនេះនឹងសាងសង់ប្រព័ន្ធលូរំដោះទឹកភ្លៀង ប្រវែង ៤,១៦គ.ម រួមនឹងស្ថាននីយបូម ចំនួន ១កន្លែង សាងសង់ប្រព័ន្ធលូទឹកកខ្វក់ ប្រវែង ៨៥,៤គម។ ក្នុងនោះប្រព័ន្ធប្រមូល ប្រវែង ៣៤,៤គ.ម បណ្តាញតភ្ជាប់ទឹកកខ្វក់តាមផ្ទះ និងអគារការិយាល័យផ្សេងៗ ចូលក្នុងប្រព័ន្ធ ប្រវែង ៥១គ.ម។ បន្ថែមពីនេះ គម្រោងនឹងសាងសង់ស្ថានីយប្រព្រឹត្តិកម្មទឹកកខ្វក់ ដែលមានសមត្ថភាពចម្រោះទឹកកខ្វក់ ចំនួន ៥.០០០ម៉ែត្រគូប ក្នុង១ថ្ងៃ និងស្ថានីយបូមមេ ១កន្លែង និងស្ថានីយបូមរង ២កន្លែង បម្រើឱ្យការ ចម្រោះទឹកកខ្វក់ តាមផ្ទះ និងអគារការិយាល័យប្រមាណ ៣.៩៦៥កន្លែង ក្នុងសង្កាត់ទាំង៤ នៃក្រុងកំពង់ចាម៕ដោយនាគខៀវ

សម្ដេចតេជោហ៊ុន សែន បានបញ្ជាក់ថា បេក្ខភាពនាយករដ្ឋមន្រ្ដីរបស់ឯកឧត្ដម ហ៊ុន ម៉ាណែត បើទោះបីជាមិនមែនជាកូនរបស់សម្ដេច ក៏ត្រូវបានជ្រើសរើស ដោយគណបក្សប្រជាជនកម្ពុជាដែរ ពីព្រោះការជ្រើសរើសនេះ គឺត្រូវពឹងផ្អែកទៅលើសមត្ថភាពផ្ទាល់ និងការជ្រើសរើសពី គណបក្សប្រជាជនកម្ពុជា។

សម្តេចតេជោ ហ៊ុន សែន បានមានប្រសាសន៍បញ្ជាក់ថា គណបក្សប្រជាជនកម្ពុជា មិនដែលសន្យាខ្យល់ ដូចគណបក្សនយោបាយមួយចំនួននោះទេ។ គណបក្សប្រជាជនកម្ពុជាដឹកនាំរាជរដ្ឋាភិបាលមានគោលដៅជាក់លាក់ឆ្ពោះទៅមុខ ទោះបីជាជំហានគីង្គក់តែទៅមុខជានិច្ច។ គណបក្សប្រជាជនកម្ពុជា ធ្វើសន្សឹមៗទៅតាមអ្វីដែលអាចធ្វើទៅរួច ប៉ុន្ដែបើងាកទៅក្រោយវិញកម្ពុជាមានការផ្លាស់ប្ដូរច្រើនណាស់ ក្រោយទទួលបានសុខសន្តិភាពរយៈពេលប៉ុន្មានឆ្នាំចុងក្រោយនេះ។

សម្តេចតេជោ ហ៊ុន សែន បានមានប្រសាសន៍បញ្ជាក់ថា សេចក្ដីព្រាងវិសោធនកម្មច្បាប់បោះឆ្នោត បានបញ្ជូនទៅដល់រដ្ឋសភាតាំងពីថ្ងៃទី១៥ ខែមិថុនា ឆ្នាំ២០២៣រួចហើយ។

សម្តេចតេជោ ហ៊ុន សែន លើកឡើងយ៉ាងដូច្នេះ ក្នុងឱកាស ចុះជួបសួរសុខទុក្ខកម្មករ កម្មការិនី នៅស្រុកជើងព្រៃ ខេត្តកំពង់ចាម នៅថ្ងៃសុក្រនេះ៕ដោយនាគខៀវ