ខេត្តកំពង់ចាម – Page 168

ខេត្តកំពង់ចាម៖គម្រោងមូលនិធិឃុំ-សង្កាត់ ឆ្នាំ២០២០ របស់គណៈកម្មការជាតិសម្រាប់ការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ ចំនួន៥គម្រោង ស្មើនឹង៥ឃុំ របស់ស្រុកកងមាស ត្រូវបានប្រកាសដាក់ដេញថ្លៃ ដេីម្បីអនុវត្តការងារសាងសង់ នាព្រឹកថ្ងៃទី០៨ ខែកក្កដា ឆ្នាំ២០២០ នៅសាលាស្រុកកងមាស ក្រោមវត្តមានលោក លោក ម៉ុក រ៉ាសឿន អភិបាលរងស្រុកកងមាស លោកឡី មិច នាយករងរដ្ឋបាលសាលាខេត្តកំពង់ចាម និងលោកពោយ សុខជា នាយករងទីចាត់ការផែនការនិងវិនិយោគខេត្ត ព្រមទាំងគណៈកម្មការម្ចាស់លទ្ធកម្ម និងតំណាងក្រុមហ៊ុន អ្នកទទួលការ ជាច្រើនរូប។
ឆ្លៀតក្នុងឱកាសនោះដែរ លោក ម៉ុក រ៉ាសឿន បានធ្វើការសំណូមពរដល់គណៈកម្មការលទ្ធកម្ម និងក្រុមហ៊ុន អ្នកទទួលការទាំងអស់ ត្រូវអនុវត្តការងារគម្រោងឲ្យមានតម្លាភាព ហេីយធ្វើការសាងសង់ឲ្យត្រូវតាមបទដ្ឋានលក្ខណៈបច្ចេកទេស ប្រយោជន៍ដល់ការប្រើប្រាស់ជាសាធារណៈ។
ក្នុងនាមតំណាងឲ្យអាជ្ញាធរខេត្តកំពង់ចាម លោក ឡី មិច មានមតិលេីកឡើងថាការដេញថ្លៃគម្រោងមូលនិធិឃុំ-សង្កាត់ ត្រូវតែធ្វើឡើង ជាសាធារណៈ នៅចំពោះមុខអ្នកចូលរួមដេញថ្លៃទាំងអស់ ដើម្បីតម្លាភាព និងចៀសវាងជាដាច់ខាតនូវភាពអនាធិបតេយ្យ ក្នុងអំឡុងពេលដំណើរការនីតិវិធីដេញថ្លៃ ជាពិសេសត្រូវលុបបំបាត់ឲ្យខានតែបាន ចំពោះជនឆ្លៀតឱកាស ដោយឡែកអ្នកទទួលការ ដែលឈ្នះក្នុងការដេញថ្លៃត្រូវគោរពឲ្យបានត្រឹមត្រូវ ទៅតាមបទដ្ឋានលក្ខខណ្ឌបច្ចេកទេស និងរយៈពេលកំណត់ នៃកិច្ចសន្យា។

គួរបញ្ជាក់ផងដែរថា គម្រោងដែលបានដាក់ឲ្យដេញថ្លៃខាងលើនេះ គឺមានផ្លូវចំនួន៥ខ្សែ ដែលត្រូវស្ថាបនា ជូនប្រជាពលរដ្ឋប្រើប្រាស់ ក្នុងនោះមាន ១-ឃុំពាមជីកង សាងសង់ផ្លូវបេតុងអាមេ ប្រវែង ០.៤៥០ គ.ម ទទឹង៥ម កម្រាស់០.១៥ ម នៅភូមិសំបួរមាស(ក) ។
២-ឃុំព្រែកកុយ សាងសង់ផ្លូវបេតុងអាមេ ប្រវែង ០.៦២៥ គ.ម ទទឹង ៥ម នៅភូមិគោហេរ ។
៣-ឃុំរកាគយ សាងសង់ផ្លូវបេតុងអាមេ ប្រវែង ០.១២៥ គ.ម ទទឹង ៤ម នៅភូមិស្វាយតាហែន ។
៤-ឃុំរកាអារ សាងសង់ផ្លូវបេតុងអាមេ ប្រវែង ០.៦៧៥ គ.ម ទទឹង ៤ម នៅភូមិព្រែកលីវទី៤ ។
៥-ឃុំស្តៅ សាងសង់ផ្លូបបេតុងអាមេ ប្រវែង ០.៥៣៦ គ.ម ទទឹង ៤ម នៅភូមិស្តៅ ។
ដោយនីតិវិធីនៃការដេញថ្លៃនេះប្រព្រឹត្តទៅដោយរលូននោះ ប្រធានគណៈកម្មាការម្ចាស់លទ្ធកម្មទាំង៥ឃុំ បានធ្វើការប្រកាសទទួលយកទាំង៥គម្រោង ព្រមទាំងបានធ្វើការផ្តាំផ្ញើដល់ក្រុមហ៊ុនអ្នកទទួលការទាំងនោះ សូមឲ្យអនុវត្តន៍ការងារសាងសង់ផ្លូវ ឲ្យមានគុណភាពល្អ និងធ្វើឲ្យត្រូវតាមស្តង់ដារ លក្ខណៈបច្ចេកទេស ជាប្រយោជន៍ដល់ការប្រើប្រាស់ផងដែរ៕SRP

ខេត្តកំពង់ចាម៖លោក ប៊ិន ឡាដា អភិបាលស្រុកកំពង់សៀម នាព្រឹកថ្ងៃទី៧ ខែកក្កដា ឆ្នាំ២០២០នេះ បានអញ្ជើញចូលរួមដំណើរការដាក់ដេញថ្លៃគម្រោងមូលនិធិឃុំ-សង្កាត់ ឆ្នាំ២០២០ របស់គណៈកម្មការជាតិសម្រាប់ការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ ចំនួន៥គម្រោង ស្មើនឹង៥ឃុំ ដែលបានធ្វេីឡើងនៅសាលាស្រុកកំពង់សៀម ក្រោមវត្តមានលោក ពោយ សុខជា នាយករងទីចាត់ការផែនការនិងវិនិយោគខេត្តកំពង់ចាម ដោយមានការចូលរួមពី អភិបាលរងស្រុក គណៈកម្មការម្ចាស់លទ្ធកម្ម និងតំណាងក្រុមហ៊ុន អ្នកទទួលការ ជាច្រើនរូបផងដែរ។

ឆ្លៀតក្នុងឱកាសនោះដែរ លោក ប៊ិន ឡាដា បានធ្វើការសំណូមពរដល់គណៈកម្មការលទ្ធកម្ម និងក្រុមហ៊ុន អ្នកទទួលការទាំងអស់ សូមឲ្យការអនុវត្តគម្រោងធ្វើយ៉ាងណា ត្រូវឲ្យមានតម្លាភាព ហេីយធ្វើការសាងសង់ឲ្យត្រូវតាមបទដ្ឋានលក្ខណៈបច្ចេកទេស ប្រយោជន៍ដល់ការប្រើប្រាស់បានយូរអង្វែង។
ជាមួយគ្នានោះ ពោយ សុខជា ក៏បានស្នើដល់ក្រុមហ៊ុនអ្នកទទួលការទាំងអស់ ឲ្យមានការគោរពតាមក្រមសីលធម៌នៃការដេញថ្លៃ និងកុំបង្កភាពរញ៉េរញ៉ៃក្នុងកំឡុងពេលដាក់ដេញថ្លៃ ដោយឡែកចំពោះបងប្អូនប្រជាពលរដ្ឋ ក៏អាចមានសិទ្ធិចូលរួមពិនិត្យការដេញថ្លៃនេះដែរ តែមិនមានសិទ្ធិរារាំង ឬចាត់ចែងលេីនីតិវិធីនៃការដេញថ្លៃនោះបានឡើយ។

គួរបញ្ជាក់ផងដែរថា គម្រោងដែលបានដាក់ឲ្យដេញថ្លៃខាងលើនេះ គឺមានផ្លូវចំនួន៥ខ្សែ ដែលត្រូវស្ថាបនា ជូនប្រជាពលរដ្ឋប្រើប្រាស់ ក្នុងនោះមាន ១-ឃុំកោះរកា សាងសង់ផ្លូវបេតុងអាមេ ប្រវែង ០.៤២៥ គ.ម ទទឹង ៤ មែត្រ កម្រាស់០.១៥ម៉ែត្រ នៅភូមិកោះគល់(១) ។
២-ឃុំរអាង សាងសង់ផ្លូវបេតុងអាមេ ប្រវែង ០.៤៨០គ.ម ទទឹង ៤ មែត្រ នៅភូមិទួលរកា និងភូមិរអាងលើ ។
៣-ឃុំគគរ សាងសង់ផ្លូវបេតុងអាមេ ប្រវែង ០.៣៦៦ គ.ម ទទឹង ៤ មែត្រ នៅភូមិគគរ១ ។
៤-ឃុំរំចេក សាងសង់ផ្លូវបេតុងអាមេ ប្រវែង ០.៥១០ គ.ម ទទឹង ៣ មែត្រ នៅភូមិរំលេច ។
៥-ឃុំក្រឡា សាងសង់ផ្លូវបេតុងអាមេ ប្រវែង ០.៥១៦ គ.ម ទទឹង ៤ មែត្រ នៅភូមិត្រពាំងជ្រៃ ។

ដោយនីតិវិធីនៃការដេញថ្លៃនេះប្រព្រឹត្តទៅដោយរលូននោះ ប្រធានគណៈកម្មាការម្ចាស់លទ្ធកម្មទាំង៥ឃុំ បានធ្វើការប្រកាសទទួលយកទាំង៥គម្រោង ព្រមទាំងបានធ្វើការផ្តាំផ្ញើដល់ក្រុមហ៊ុនអ្នកទទួលការទាំងនោះ សូមឲ្យអនុវត្តន៍ការងារសាងសង់ផ្លូវ ឲ្យមានគុណភាពល្អ និងធ្វើឲ្យត្រូវតាមស្តង់ដារ លក្ខណៈបច្ចេកទេស ជាប្រយោជន៍ដល់ការប្រើប្រាស់ ផងដែរ៕SRP

ខេត្តកំពង់ចាម៖អភិបាលខេត្តកំពង់ចាម លោក អ៊ុន ចាន់ដា បានថ្លែងថា ថ្នាក់ដឹកនាំដែលល្អ គឺត្រូវមានលក្ខណៈសម្បត្តិគ្រប់គ្រាន់ក្នុងការច្នៃប្រឌិត និងភាពប៉ុនប្រសព្វ ប៉ុន្តែមិនអាស្រ័យលើខ្លួនឯងតែម្នាក់ទេ គឺត្រូវទាមទារឲ្យមានការចូលរួមសហការពីមន្ត្រីក្រោមឱវាទផងដែរ។ ព្រោះថាការយកចិត្តទុកដាក់ចំពោះមន្ត្រីក្រោមឱវាទ គឺជាគន្លឹះដ៏សំខាន់ ដើម្បីកៀរគរប្រមែប្រមូលនូវកម្លាំងសរុប មធ្យោបាយសរុប វិធានការសរុប ជួយដោះស្រាយរបស់អង្គភាព ហើយធ្វើឲ្យមន្ត្រីរាជការយេីងគោរព និងមានស្មារតីចូលរួមបំពេញការងារប្រកបដោយឆន្ទៈខ្ពស់។
ថ្លែងយ៉ាងដូច្នេះក្នុងពិធីប្រកាសចូលកាន់មុខតំណែងប្រធានមន្ទីរកិច្ចការនារីខេត្តកំពង់ចាម នាព្រឹកថ្ងៃទី០៦ ខែកក្កដា ឆ្នាំ២០២០ ក្រោមវត្តមាន លោកស្រី វេជ្ជបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី និងលោក ខ្លូត ផន ប្រធានក្រុមប្រឹក្សាខេត្ត ដោយមានការអញ្ជើញចូលរួមពី ប្រតិភូអមដំណើរ អភិបាលរងខេត្ត ថ្នាក់ដឹកនាំ មន្ទីរ អង្គភាព អភិបាលក្រុង-ស្រុក និងមន្ត្រីពាក់ព័ន្ធជាច្រើនរូប។

លោក អ៊ុន ចាន់ដា អភិបាលខេត្តកំពង់ចាម បានលេីកឡើងថា បច្ចុប្បន្ននេះ រាជរដ្ឋាភិបាលកម្ពុជា បានកំពុងកំណែទម្រង់ស៊ីជម្រៅគ្រប់ជ្រុងជ្រោយនោះ ក្នុងនាមជាថ្នាក់ដឹកនាំមន្ទីរជំនាញ ត្រូវតែមានការធានារ៉ាប់រងនូវតួរនាទី និងភារកិច្ចស្នូលរបស់អង្គភាព គឺជាប្រការសំខាន់ ដែលត្រូវយកចិត្តទុកដាក់ នឹងបំពេញតួនាទី ភារកិច្ច ឲ្យបានខ្ជាប់ខ្ជួនជាប្រចាំ គ្រប់ពេលវេលា និងហ្មត់ចត់បំផុត។
លោកស្រីប្រធានមន្ទីរ ដែលទើបទទួលបានការប្រគល់ភារកិច្ចថ្មី ត្រូវខិតខំបំពេញការងារឲ្យអស់ពីសមត្ថភាព លទ្ធភាព ទេពកោសល្យ ការប៉ិនប្រសប់ និងគំនិតច្នៃប្រឌិតខ្ពស់រស់រវើក ក្នុងស្មារតីយកចិត្តទុកដាក់ ក្នុងការដឹកនាំ និងភាពទទួលខុសត្រូវខ្ពស់។

លោកស្រីរដ្ឋមន្ត្រីក្រសួងកិច្ចការនារី ក៏បានធ្វើការណែនាំដល់ប្រធានមន្ទីរថ្មី ត្រូវខិតខំពង្រឹងការសាមគ្គីភាព ឯកភាពផ្ទៃក្នុងឲ្យបានល្អ ដើម្បីធានានិរន្តរភាពការងារប្រកបដោយប្រសិទ្ធភាព និងត្រូវយកចិត្តទុកដាក់គ្រប់គ្រង ដឹកនាំមន្ត្រីរាជការក្រោមឱវាទឲ្យបានល្អប្រសើរ ប្រកបដោយការ ទទួលខុសត្រូវខ្ពស់ ព្រមទាំងត្រូវមានការសហការល្អជាមួយរដ្ឋបាលដែនដីគ្រប់លំដាប់ថ្នាក់ មន្ទីរ អង្គភាពនានា ក្នុងការរួមចំណែកលើកកម្ពស់ជីវភាពរស់នៅ និងសុខុមាលភាពរបស់ប្រជាពលរដ្ឋ និងការអភិវឌ្ឍខេត្តឲ្យកាន់តែមានការរីកចម្រើនផងដែរ៕SRP

ខេត្តកំពង់ចាម៖លោកឧបនាយករដ្ឋមន្ត្រី យឹម ឆៃលី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ និងជាប្រធានក្រុមការងារថ្នាក់ជាតិចុះមូលដ្ឋានខេត្តកំពង់ចាម និងលោកស្រី ព្រមទាំងបុត្រា បុត្រី រួមជាមួយ លោក អ៊ុន ចាន់ដា អភិបាលខេត្តកំពង់ចាម នៅថ្ងៃទី០៥ ខែកក្កដា ម្សិលមិញបានអញ្ជើញប្រគេនទៀនព្រះវស្សា និងទេយ្យទានដល់វត្តចំនួន០៩វត្ត និមន្តមកពីវត្តក្នុងក្រុងកំពង់ចាម ស្រុកកំពង់សៀម និងស្រុកកោះសូទិន។

ដោយក្នុងមួយវត្តៗទទួលបានទៀនព្រះវស្សា ទេយ្យទាន រួមជាមួយថវិកា២០០ដុល្លារ និង១៨ម៉ឺនរៀល ព្រមទាំងគ្រឿងឧបភោគបរិភោគមួយចំនួន។ ដោយឡែកលោកយាយ លោកតា ពុទ្ធបរិស័ទ ចំនួន៥៣នាក់ ក្នុងម្នាក់ៗទទួលបានថវិកាចំនួន៣ម៉ឺនរៀល គ្រូអាចារ្យធំ ចំនួន២នាក់ក្នុងម្នាក់១០ម៉ឺនរៀល រួមទាំងតាអាចារ្យ អញ្ជើញមកពីតាម វត្តផ្សេងៗក្នុងម្នាក់ទទួលបាន៥ម៉ឺនរៀល ផងដែរ៕SRP

ខេត្តកំពង់ចាម៖ លោកជំទាវ ញូង ចរិយា អ៊ុន ចាន់ដា ប្រធានកិត្តិយសមាគមនារីកម្ពុជា ដើម្បីសន្ភិភាព និងការអភិវឌ្ឍន៍សាខាខេត្ត និងលោកស្រី ប៉ាង ដានី អភិបាលរង ខេត្តកំពង់ចាម
នៅថ្ងៃទី០៤ កក្កដាម្សិលមិញ បាននាំយកបច្ច័យ និងទៀនចំណាំព្រះវស្សា ទៅវេរប្រគេនព្រះសង្ឃ នៅវត្តខែលជ័យ ស្រុកកំពង់សៀម និងវត្តស្វាយទាប ស្រុកចំការលើ។
ដោយមានការអញ្ជើញចូលរួមពីលោកស្រី ស្រី គឹមឆយ តំណាងរាស្រ្តមណ្ឌលកំពង់ចាម ព្រមទាំង លោកស្រី សមាជិកក្រុមប្រឹក្សាខេត្ត និងសហការី ជាច្រើនរូបទៀត។
សូមបញ្ជាក់ថាបច្ច័យ គ្រឿងបរិក្ខា និងទៀនចំណាំព្រះវស្សា ទៅវេរប្រគេនព្រះសង្ឃគង់ចាំព្រះវស្សា ក្នុងវត្តចំនួន២គឺ៖ ១.វត្តខែលជ័យ ផ្កាស្រស់ ៤កន្ត្រក់ សាដក់៨ អង្ករ៨បេ ទៀន២គូ ទឹកសុទ្ធ២កេស ទឹកក្រូច៨កេស ទឹកត្រី១៥យួរ ទឹកស៊ីអ៊ីវ១៥យួរ មី១០កេស ត្រីខ១២យួរ បច្ច័យកសាងវត្ត ២លាន៥សែនរៀល និងជូនថវិកាតាយាយ១លានរៀល ២.វត្តស្វាយទាប ផ្កាស្រស់ ៤កន្ត្រក់ សាដក់៨ អង្ករ៨បេ ទៀន២គូ ទឹកសុទ្ធ២កេស ទឹកក្រូច ៨កេស ទឹកត្រី ១៥យួរ ទឹកស៊ីអ៊ីវ១៥យួរ មី ១០កេស ត្រីខ១២យួរ បច្ច័យកសាងវត្ត២លាន៥សែនរៀល ផងដែរ៕SRP