ខេត្តកំពង់ចាម – Page 163

ខេត្តកំពង់ចាម៖គម្រោងកសាងកែលម្អសួនច្បារមាត់ទន្លេក្នុងកំពង់ចាម គិតត្រឹមថ្ងៃនេះ ក្រុមជាងបានបញ្ចប់ដំណើរការសាងសង់សួនច្បារ តាមជំហាននីមួយៗជាស្ថាពរ។ ដោយគោរពបានត្រឹមត្រូវតាមគំរូប្លង់ និងកិច្ចសន្យា ដែលមានការងារមួយចំនួនដូចជា ការងាររៀបចំខឿនច្រាំងទន្លេ ចាក់ដី និងរៀបចំប្រព័ន្ធលូ ការងាររៀបចំខឿនផ្លូវ និងចាក់សាប (ផ្នែកក្រាលការ៉ូឡាជំនួសដោយចាក់សាបទាំងអស់) ការងារដាំកូនឈើ ផ្កា ស្មៅ ការងាររៀបចំប្រព័ន្ធស្រោចស្រព ការងាររៀបចំបណ្តាញអគ្គិសនី បង្កោលភ្លេីង និងអំពូលភ្លើង និងការងាររៀបចំ និងបំពាក់សម្ភារសួនកុមារ។
សូមបញ្ជាក់ថានៅព្រឹកមិញ
លោក អ៊ុន ចាន់ដា អភិបាលខេត្តកំពង់ចាម រួមដំណើរជាមួយ លោក ញ៉ែម វ៉ាលី រដ្ឋលេខាធិការ ក្រសួងធម៌ការ និងសាសនា និងជាអគ្គលេខាធិកាក្រុមប្រឹក្សាជាតិ រណសិរ្សសាមគ្គីអភិវឌ្ឍមាតុភូមិកម្ពុជា អមដំណើរដោយមន្ត្រីជំនាញពាក់ព័ន្ធ និងប្រធានក្រុមហ៊ុនម៉ៅការសាងសង់ បានអញ្ជើញចុះពិនិត្យគុណភាពនៃគម្រោងកែលម្អសួនច្បារ ចាប់ពីចំណុចអតីតកំពង់សាលាឡាងចាស់ រហូតដល់គល់ស្ពាន គីហ្សូណា ស្ថិតនៅក្នុងសង្កាត់វាលវង់ ក្រុងកំពង់ចាម។
ក្នុងការចុះពិនិត្យគម្រោងនេះដែរ លោក អ៊ុន ចាន់ដា បានស្នើដល់ប្រធានក្រុមហ៊ុនម៉ៅការ ឲ្យជួយកែសម្រួលលើផ្នែកមួយចំនួនដែលសាងសង់រួច ដូចជាការដាំស្មៅលម្អ និងការជួសជុល កែលម្អនៅកន្លែងដែលរងការខូចខាតមួយចំនួនផងដែរ។
សុំជម្រាបផងដែរថា ការរៀបចំសួនច្បារនេះដើម្បីរួមចំណែកការពារការបាក់ស្រុតច្រាំងទន្លេ និងជាផ្នែកមួយធ្វើឲ្យប្រសើរឡើងនូវសោភណ្ឌភាពក្រុង ទុកជាទីកន្លែងសាធារណៈ សម្រាប់បងប្អូនប្រជាពលរដ្ឋ ដើរលម្ហែកាយ៕SRP

ខេត្តកំពង់ចាម៖សាខាកាកបាទក្រហមកម្ពុជាខេត្តកំពង់ចាម នៅព្រឹកមិញនេះ បានប្រជុំត្រួតពិនិត្យលទ្ធផលសកម្មភាពការងារប្រចាំឆមាសទី១ និងលេីកទិសដៅឆមាសទី២ ក្រោមវត្តមានលោក អ៊ុន ចាន់ដា ប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ចាម។

ថ្លែងក្នុងកិច្ចប្រជុំ លោក អ៊ុន ចាន់ដា បានធ្វេីការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ សមាជិក សមាជិកា នៃសាខាកាកបាទក្រហមកម្ពុជាខេត្ត ដែលបានចូលរួមចំណែកយ៉ាងសំខាន់ ក្នុងវិស័យមនុស្សធម៌ នាពេលកន្លងមក ដោយបានគៀងគរជំនួយមកពីគ្រប់មជ្ឈដ្ឋាន ដេីម្បីជួយសង្រ្គោះដល់ប្រជាពលរដ្ឋក្រីក្រ ជនងាយរងគ្រោះ និងជនរងគ្រោះផ្សេងៗ។ លោកប្រធាន ក៏បានធ្វើការសំណូមពរដល់ថ្នាក់ដឹកនាំ ក៏ដូចជាសមាជិកសាខាគ្រប់រូប ឲ្យមានការរួមចិត្តរួមគំនិតគ្នា ដេីម្បីទទួលបានភាពជោគជ័យក្នុងការត្រៀមលក្ខណៈរៀបចំផែនការ ដេីម្បីបម្រើដល់វិស័យមនុស្សធម៌បន្តទៅទៀត ។

ក្នុងកិច្ចប្រជុំនោះដែរ លោកប្រធានសាខា ក៏បានធ្វេីការដោះស្រាយនូវបញ្ហាប្រឈមមួយចំនួន ដែលមានដូចជាការដោះស្រាយបញ្ហារៀបចំបន្ទប់ប្រជុំVideo Conference ការជ្រេីសរេីសបុគ្គលិកជំនាញIT ការរៀបចំវេចខ្ចប់ សម្ភារប្រេីប្រាស់ឲ្យបានត្រឹមត្រូវមុននឹងបញ្ជូនទៅដល់ដៃជនរងគ្រោះ ការរៀបចំទុកដាក់ឯកសារផ្សេងៗឲ្យបានត្រឹមត្រូវ និងការជ្រើសរើសអ្នកស្ម័គ្រចិត្តភូមិ ដេីម្បីបម្រើដល់វិស័យមនុស្សធម៌នៅតាមមូលដ្ឋាននានាផងដែរ៕SRP

ខេត្តកំពង់ចាម៖លោក ហាន កុសល អភិបាលរងខេត្ត បានធ្វេីការកោតសរសើរ និងវាយតម្លៃខ្ពស់ ចំពោះមន្ទីរបរិស្ថាន ដែលកន្លងមកបានខិតខំបំពេញតួនាទីភារកិច្ចរបស់ខ្លួន ក្នុងការដាំឈេី និងការងារគ្រប់គ្រងសំរាម ទាំងការដោះស្រាយនូវបញ្ហាផ្សេងៗ បានយ៉ាងល្អប្រសើរ ។
លោកបានសង្កត់ធ្ងន់ថា ថ្នាក់ដឹកនាំដែលល្អ គឺត្រូវអោបក្រសោបអ្នកដែលមានចំណេះដឹង ហើយសូមកុំធ្វើនូវទង្វើណាដែលជាការចាប់កំហុសគ្នាទៅវិញទៅមក គឺត្រូវធ្វើជាកញ្ចក់ឆ្លុះបញ្ចាំងពីគ្នាទៅវិញទៅមក ដេីម្បីធ្វើការកែលម្អគ្នាទៅវិញទៅមក ដែលជាការរួមគ្នាបង្កើតនូវគំនិតច្នៃប្រឌិតថ្មី ដេីម្បីនាំឲ្យមានភាពជោគជ័យប្រកបដោយនិរន្តរភាព។
លោកថ្លែងយ៉ាងដូច្នោះនៅថ្ងៃ២២ ខែកក្កដា ឆ្នាំ២០២០ព្រឹកមិញក្នុងពិធីប្រកាសទទួលស្គាល់ប្រធាន អនុប្រធានការិយាល័យ និងអនុប្រធានមន្ទីរបរិស្ថានខេត្តកំពង់ចាម។

បើតាម លោក ហាន កុសល ថា កន្លែងធ្វើការជាកន្លែងធ្វើបទពិសោធន៍ មិនមែនជាសមរភូមិសម្រាប់ធ្វើការប្រកួតប្រជែងយកឈ្នះយកចាញ់ ដេីម្បីប្រយោជន៍ផ្ទាល់ខ្លួន ក្នុងការដណ្តើមយកតួនាទីមុខតំណែង និងលាភសក្ការៈនោះទេ តែជាកន្លែងសម្រាប់សហការីទាំងអស់រួមគ្នា ធ្វើការរិះគិតពិចារណា និងបញ្ចេញនូវគំនិតច្នៃប្រឌិត ដេីម្បីបង្កេីតសមិទ្ធផលថ្មីៗ នាំភាពរីកចម្រេីនមកឲ្យរដ្ឋបាលខេត្ត ផងដែរ។
លោក នួន គង់សល្យ ប្រធានមន្ទីរបរិស្ថានខេត្តកំពង់ចាម ក៏បានធ្វើការសំណូមពរ សូមឲ្យរដ្ឋបាលថ្នាក់ខេត្ត មានការលេីកទឹកចិត្ត ដល់ក្រុមហ៊ុនច្រើនសម្រាប់វិនិយោគ ការប្រមូលដឹកជញ្ជូន និងកែច្នៃសំណល់សំរាម ដើម្បីផ្តល់ឱកាសឲ្យក្រុមហ៊ុនច្រើន ចូលមក ប្រកួតនិងសូមឲ្យជួយជម្រុញបន្ថែមដល់រដ្ឋបាល ក្រុង ស្រុកឲ្យមានការទុកដាក់ សំណល់រឹង រាវ ជាពិសេស
សំរាមនៅតាមភូមិ ឃុំ ដោយឲ្យមានសោភ័ណភាពល្អប្រសើរ។ លោកក៏បានស្នើដល់រដ្ឋបាលថ្នាក់ខេត្ត ជួយសម្របសម្រួល ដល់ថ្នាក់មូលដ្ឋានក្រោមឱវាទ និងមន្ទីរអង្គភាពតាមវិស័យផ្សេងៗនៅពេលមន្ត្រី មន្ទីរចុះបំពេញបេសកកម្មក្នុងមូលដ្ឋាន ផងដែរ ។ គួរបញ្ជាក់ផងដែរថា ក្នុងពិធីនេះ គឺបានប្រកាសទទួលស្គាល់ថ្នាក់ដឹកនាំមន្ទីរបរិស្ថានចំនួន៨រូប ក្នុងនោះមាន អនុប្រធាន២រូប ប្រធានការិយាល័យ២រូប និងអនុប្រធានការិយាល័យ៤រូបផងដែរ៕SRP

ខេត្តកំពង់ចាម៖លោកស្រី ប៉ាង ដានី អនុប្រធានអចិន្ត្រៃយ៍សាខា តំណាង លោក អ៊ុន ចាន់ដា ប្រធានគណៈកម្មាធិការសាខា នៅរសៀលថ្ងៃទី២១ ខែកក្កដា ម្សិលមិញ
បាននាំយកសម្ភារ និងថវិកា ជូនជនរងគ្រោះ០២គ្រួសារ៖ ក្នុងនោះមាន ១/.ចូលរូម រំលែកទុក្ខគ្រួសារសពឈ្មោះ ដន គួយអេង ភេទស្រី អាយុ២២ ឆ្នាំ នៅភូមិត្នោតបាក់ ឃុំត្រពាំងគរ ស្រុកជើងព្រៃ។
២/.សួរសុខទុក្ខ ឈ្មោះ យាន សុខអ៊ាន់ ភេទស្រី អាយុ២២ឆ្នាំ ដែលរងរបួសកំពុងសម្រាកព្យាបាលនៅមន្ទីរពេទ្យស្រុកជើងព្រៃ។

គួរបញ្ជាក់ថា ជនរងគ្រោះទាំងពីរនាក់នេះ ជាកម្មការិនី ធ្វើការនៅ រោងចក្រផលិតស្បែកជើង ស្កាយណាយ ស្រុកជើងព្រៃ បានរងគ្រោះដោយត្រូវរន្ទះបាញ់ស្លាប់ម្នាក់ និងរបួសម្នាក់ កាលពីម៉ោង ៥ ល្ងាច ថ្ងៃទី ២០ ខែកក្កដា ឆ្នាំ ២០២០ ពេលចេញពីធ្វើការ ហើយជិះម៉ូតូឌុបគ្នា វិលត្រឡប់មកផ្ទះទាំងកំពុងភ្លៀង។
សម្ភារដែលចូលបុណ្យសព រួមមាន ៖ អង្ករ២៥គក្រ ទឹកត្រី ទឹកស៊ីអ៊ីវ ត្រីខ ទឹកសុទ្ធ ទឹកផ្លែឈើ និងបច្ច័យចំនួន ៥០០,០០០រៀល ។ ដោយឡែក អ្នករងរបួស កំពុងសម្រាកនៅមន្ទីរពេទ្យស្រុក ផ្តល់ជូន មី ត្រីខ និងថវិកាចំនួន ៣០០,០០០ រៀល ផងដែរ៕SRP

ខេត្តកំពង់ចាម៖លោកឡី មិច នាយករងរដ្ឋបាលសាលាខេត្ត បានអះអាងថាចំពោះអ្នកទទួលការទាំងអស់ ប្រសិនបើត្រូវរកឃើញថាអ្នកដេញថ្លៃមានការពាក់ព័ន្ធនឹងការឃុបឃិត ការក្លែងបន្លំ ការប្រព្រឹត្តអំពើពុករលួយ ឬបង្កការអុកឡុកណាមួយ គឺអ្នកដេញថ្លៃទាំងនោះនឹងត្រូវបានដាក់ក្នុងបញ្ជីខ្មៅជារៀងរហូត និងមិនត្រូវបានអនុញ្ញាតឲ្យដាក់សំណើដេញថ្លៃកិច្ចសន្យាឃុំ សង្កាត់ទាំងអស់នៅទូទាំងប្រទេសកម្ពុជា។
ការលេីកឡើងយ៉ាងដូច្នេះក្នុងកិច្ចប្រជុំ
បេីកសំណេីដេញថ្លៃគម្រោងមូលនិធិឃុំ ចំនួន៣គម្រោង នៅសាលាស្រុកកោះសូទិន នៅថ្ងៃទី២០ ខែកក្កដា ឆ្នាំ២០២០នេះ។
លោកលោក ឡី មិច បន្តថា ជុំវិញករណីខាងលើអាជ្ញាធរខេត្តបានចេញសេចក្តីសម្រេចមិនអនុញ្ញាតឲ្យក្រុមហ៊ុន អាន សុខលាង ប្រធានក្រុមហ៊ុនឈ្មោះ អាន សុខលាង ដែលបានចុះក្នុងបញ្ជីឈ្មោះជាអ្នកទទួលការក្នុងឆ្នាំ២០២០ លេខរៀងទី០៩ នៃខេត្តកោះកុង ចូលរួមដេញថ្លៃគម្រោងមូលនិធិឃុំ/សង្កាត់ ក្នុងខេត្តកំពង់ចាមទៀតទេ។ លោកថាមូលហេតុដោយក្រុមហ៊ុននេះមានចេតនា មកបង្កការអុកឡុកក្នុងកិច្ចប្រជុំបេីកសំណេីដេញថ្លៃនៅស្រុកចំការលើ កាលពីថ្ងៃទី១០ ខែកក្កដា ឆ្នាំ២០២០កន្លងទៅថ្មីៗនេះ។
សូមជម្រាបថាគម្រោងដែលបានដាក់ឲ្យដេញថ្លៃនៅព្រឹកមិញនេះ គឺមានផ្លូវចំនួន៣ខ្សែ ដែលត្រូវស្ថាបនា ជូនប្រជាពលរដ្ឋប្រើប្រាស់ ក្នុងនោះមាន
១-ឃុំកោះសូទិន សាងសង់ផ្លូវបេតុងអាមេ ប្រវែង ៤៥៤ ម ទទឹង៤ម កម្រាស់ ០.១៥ម នៅភូមិទី៣ ។
២-កំពង់រាប សាងសង់ផ្លូវបេតុងអាមេ ប្រវែង ៣១០ ម ទទឹង៤ម នៅភូមិកោះចិនលើ ។
៣-ឃុំមហាខ្ញូង សាងសង់ផ្លូវបេតុងអាមេ ប្រវែង ៤៩០ ម ទទឹង៥ម ននៅភូមិអង្គរជ័យ។
សូមរំលឹកថាកាលពីថ្ងៃទី១៦ខែកក្កដាឆ្នាំ ២០២០អាជ្ញាធរខេត្តកំពង់ចាម បានចេញសេចក្ដីសម្រេចមិនអនុញ្ញាតឲ្យក្រុមហ៊ុន អាន សុខលាង ប្រធានក្រុមហ៊ុន អាន សុខលាង មានសិទ្ធិចូលរួមដេញថ្លៃគម្រោងមូលនិធិឃុំ/សង្កាត់ ដោយផ្ទាល់ ឬដោយប្រយោល ឬជាតំណាងក្រុមហ៊ុនផ្សេងទៀតក្នុងខេត្តកំពង់ចាមជារៀងរហូត
បន្ទាប់ពីមានចេតនាបង្កការអុកឡុកក្នុងកិច្ចប្រជុំបេីកសំណេីដេញថ្លៃ៕SRP