ខេត្តកំពង់ចាម – Page 160

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម នៅថ្ងៃទី៣១ ខែកក្កដាម្សិលមិញ បានដឹកមន្ត្រីជំនាញពាក់ព័ន្ធ ចុះពិនិត្យការងារបង្កបង្កើនផលស្រូវវស្សា នៅភូមិប្រវ៉ាស់ ឃុំបឹងណាយ ស្រុកព្រៃឈរ ដែលកំពុងប្រមូលផលប្រមាណ៥១២ហិកតា ដោយតំបន់នេះប្រេីប្រាស់ប្រភពទឹកចេញពីអាងទឹកឆា។
លោកអ៊ុន ចាន់ដា កក៏បានបន្តពិនិត្យផ្ទៃដីរងផលប៉ះពាល់នៅភូមិឈូក ឃុំគោករវៀង ស្រុកជើងព្រៃ ដែលបច្ចុប្បន្នកំពុងរងផលប៉ះពាល់ ចំនួន៩៤ហិចតា ដោយសារនៅក្នុងភូមិសាស្រ្តនេះពុំមានប្រភពទឹកសម្រាប់ស្រោចស្រព។
ក្នុងដំណើរចុះពិនិត្យស្រូវរបស់កសិករ លោកអ៊ុន ចាន់ដា បានជម្រុញលើកទឹកចិត្តដល់ ប្រជាកសិករឲ្យបន្តខិតខំធ្វើការបង្កបង្កើនផលដាំដំណាំស្រូវ និងដំណាំរួមផ្សំផ្សេងៗ ដើម្បីជួយទ្រទ្រង់ដល់ជីវភាពគ្រួសារឲ្យកាន់តែល្អប្រសើរ។ ចំពោះតំបន់ដែលរងផលប៉ះពាល់ លោក បានធ្វើការណែនាំដល់មន្ទីរជំនាញ ឲ្យធ្វើការសិក្សាលើកជាគម្រោងកសាងប្រព័ន្ធធារាសាស្ត្រ ដើម្បីបង្កលក្ខណៈ ងាយស្រួលជូនដល់ប្រជាពលរដ្ឋ៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម នៅព្រឹកមិញ បានអញ្ជើញចុះពិនិត្យតំបន់អភិរក្ស
រមណីយ៍ដ្ឋានក្បាលទឹក(ទឹកឆា)ស្ថិតក្នុងព្រំប្រទល់ឃុំក្រូច និងឃុំបឹងណាយ ស្រុកព្រៃឈរ និងឃុំសំព័រ ស្រុកចំការលើ ដើម្បីរៀបចំសណ្តាប់ធ្នាប់ កែលម្អសោភ័ណភាព និងកំណត់ទីតាំងព្រំប្រទល់ តំបន់រមណីយ៍ ដ្ឋានឲ្យបានច្បាស់ ព្រមទាំងចុះពិនិត្យការបង្ករបង្កើនផលដំណាំស្រូវ នៅឃុំបឹងណាយ ស្រុកព្រៃឈរផងដែរ។
លោក អ៊ុន ចាន់ដា បានធ្វើការណែនាំដល់អាជ្ញាធរពាក់ព័ន្ធ ត្រូវបិទការឆ្លងចូលតំបន់ហាមឃាត់ ដែលជាប្រភពទឹកផុស ព្រោះវាអាចនាំឲ្យមានការរាំងស្ទះដល់ចរន្តទឹកផុសចេញពីដី ហើយក៏អាចប៉ះពាល់ដល់ការបង្កបង្កេីនផលលេីដំណាំរបស់ប្រជាពលរដ្ឋ នៅតំនៅតំបន់ខាងក្រោម។
គួរបញ្ជាក់ថា រមណីយដ្ឋានទឹកឆា មានទេសភាពស្អាត ដោយមានខ្សែទឹក ផុសព្រុចៗ ផុសចេញពីក្នុងដីថ្លាឈ្វេង ត្រជាក់ស្រេប ជម្រៅត្រឹមកំភួនជើង កំពុង ក្លាយជាទីឋានកម្សាន្ដពេញនិយមបំផុត មួយនៅក្នុងទឹកដីក្រហមនៃខេត្ដកំពង់ចាម ។ ក្បាលហុងទឹករមណីយដ្ឋាន ចុះបញ្ជីក្នុង ឆ្នាំ២០១១ គឺជាទឹកផុសត្រជាក់ ដែល ជ្រាបចេញពីប្រភពអាងស្ដុកទឹកថ្មដា ស្ថិតក្នុងឃុំបឹងណាយ ស្រុកព្រៃឈរ ចម្ងាយ ប្រមាណជាង៣០គីឡូម៉ែត្រ ពីក្រុងកំពង់ចាម ទទួលភ្ញៀវ រាប់រយនាក់រៀងរាល់ថ្ងៃ ដោយ
ចំនួនបានកើនឡើងរាប់ពាន់ក្នុងរដូវ បុណ្យទាន។
ជាមួយគ្នានោះ រដូវបុណ្យទាន មនុស្សមកលេងទីនេះ ពាសពេញគ្រប់ ទីកន្លែង។ ប៉ុន្ដែបើទោះបីជាភ្ញៀវទេសចរ មកកម្សាន្ដរមណីយដ្ឋាននេះយ៉ាងណាក្ដី ក៏ភាគច្រើនពួកគេគ្រាន់ តែងមកអង្គុយ ក្នុងក្យូស ទទួលទានអាហារថ្ងៃត្រង់ ខណៈ ភ្ញៀវមួយចំនួនត្រូវដើរទៅកាន់ប្រភពទឹកផុសព្រុចៗ ចេញពីក្នុងដីគួរឲ្យក្បង់ ស្រោចប្រាណ។ ចំពោះបញ្ហាភ្ញៀវឈូឆរទៅជ្រំ ប្រភពក្បាលទឹក មជ្ឈដ្ឋានមួយចំនួនបានចោទថា ទង្វើនេះ បង្កឲ្យផ្ទៃ ទឹកស្ងប់ អត់ហូរ និងល្អក់ កខ្វក់ នៅផ្នែកខាងក្រោម ដែលជះ ក្លិនអសោចដល់ភ្ញៀវទេសចរ៕SRP

ខេត្តកំពង់ចាម៖នគរបាលខេត្តកំពង់ចាមបានធ្វើការច្រានចោលចំពោះព័ត៌មានដែលផ្សាយថានៅស្រុកព្រៃឈរមានល្បែងស៊ីសងជល់មាន់និងអាប៉ោង។
ភ្នាក់ងារ សៀមរាបប៉ុស្តិ៍ បានរាយការណ៍ថា ក្រុមការងារប្រតិកម្មរហ័ស នៃស្នងការដ្ឋាននគរបាលខេត្តកំពង់ចាម សូមជម្រាបជូនសាធារណជន និងអ្នកនិយមប្រើប្រាស់នូវបណ្តាញទំនាក់ទំនងសង្គមហ្វេសប៊ុក ជ្រាបជាព័ត៌មានថា៖ ដោយមួយរយៈពេលនេះ មានគេហទំព័ររបស់អ្នកសារព័ត៌មានមួយចំនួន បានយករូបភាពចាស់ៗ ពាក់ព័ន្ធនិងករណីមានក្រុមអ្នកញៀនល្បែងលួចលេងល្បែងសុីសងខុសច្បាប់ ដែលករណីលើកឡើងខាងលើនេះ សមត្ថកិច្ចយើងខ្ញុំបានធ្វើការបង្រ្កាបជាយូរមកហើយ។

ស្នងការដ្ឋាននគរបាលខេត្តកំពង់ចាមយើងខ្ញុំ ក្រោមការដឹកនាំបញ្ជាផ្ទាល់ពីលោកឧត្តមសេនីយ៍ទោ ឯម កុសល ស្នងការនគរបាលខេត្ត បានដាក់បទបញ្ជាយ៉ាងមឹុងម៉ាត់ ដល់គ្រប់គណៈជំនាញទាំងថ្នាក់ខេត្ត និងថ្នាក់ស្រុក ចុះអនុវត្តគោលនយោបាយភូមិ-ឃុំ មានសុវត្ថិភាព ដោយធ្វើការបង្រ្កាបបាន បទល្មើសជាច្រើនករណីមកហើយដែរ កន្លងមកនេះ។

សូមបញ្ជាក់ថា ចំពោះការចុះផ្សាយរបស់ជនខិលខូច តាមរយៈគេហទំព័រអ្នកសារព័ត៌មាន ដែលមិនគោរពវិជ្ជាជីវៈមួយចំនួនតូចនោះ មានចេតនាមិនល្អ ក្នុងរូបភាពចង់បានការទាក់ទាញប្រជាប្រិយភាពតាមរយៈគេហទំព័ ក្នុងបណ្ដាញសង្គមរបស់ខ្លួន ដែលធ្វើឲ្យមានការប៉ះពាល់យ៉ាងធ្ងន់ធ្ងរដល់កិត្តិយសរបស់អង្គភាពស្នងការដ្ឋាននគរបាលខេត្ត ក៏ដូចជាកិត្តិយសរបស់នគរបាលជាតិទាំងមូល។

អាស្រ័យដូចបានជម្រាបជូនខាងលើនេះ ក្រុមប្រតិកម្មរហ័ស នៃស្នងការដ្ឋាននគរបាលខេត្តកំពង់ចាម សូមអំពាវនាវដល់សាធារណជនទាំងអស់ សូមកុំមានការយល់ច្រឡំ ចំពោះការចុះផ្សាយ ដោយគ្មានមូលដ្ឋានច្បាស់លាស់ ក្នុងរូបភាពមិនពិត ជាចេតនាបំពុលព័ត៌មាន ធ្វើឲ្យមានភាពអាណាធិបតេយ្យក្នុងសង្គម និងសូមបន្ដការសហការជាមួយកម្លាំងសមត្ថកិច្ចយើងខ្ញុំ រាល់បទល្មើសដែលកើតមានឡើងក្នុងមូលដ្ឋានរបស់បងប្អូន ដើម្បីយើងខ្ញុំចុះជួយអន្តរាគមន៍បានទាន់ពេលវេលា។
សុំបញ្ជាក់ថារយៈពេលប៉ុន្មានថ្ងៃកន្លងទៅនេះគេហទំព័រសារព័ត៌មានមួយចំនួននិងបណ្ដាញសង្គម បានធ្វើការបង្ហោះរូបភាព និងខ្លឹមសារថា នៅស្រុកព្រៃឈរខេត្តកំពង់ចាម មានល្បែងស៊ីសងជល់មាន់និងអាប៉ោង បានបើកលេងយ៉ាងអនាធិបតេយ្យ។ ការផ្សាយបែបនេះត្រូវបាននគរបាលខេត្តកំពង់ចាម ចេញសេចក្ដីបដិសេធ ជាករណីមិនពិត៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម និងលោក ខ្លូត ផន ប្រធានក្រុមប្រឹក្សាខេត្ត កាលពីរសៀលថ្ងៃទី២៩ ខែកក្កដា ឆ្នាំ២០២០នេះ បានដឹកនាំមន្រ្តីរាជការ អញ្ជើញចូលរួមគោរពវិញាណក្ខន្ធសព ឧបាសក សុខ សារឿន ត្រូវជាស្វាមី របស់លោកស្រី សម ផល្លា ប្រធានមន្ទីរព័ត៌មាន ខេត្តកំពង់ចាម ដែលបានទទួលមរណៈភាព កាលពីថ្ងៃទី២៨ ខែកក្កដា ឆ្នាំ២០២០ ក្នុងជន្មាយុ៦៧ឆ្នាំ ដោយរោគាពាធ ហើយត្រូវបានតម្កល់ទុកធ្វើបុណ្យនៅគេហដ្ឋានស្ថិតនៅក្នុងភូមិជង្ហុក ឃុំអំពិល ស្រុកកំពង់សៀម ខេត្តកំពង់ចាម។

នៅក្នុងឱកាសនោះដែរ លោក អ៊ុន ចាន់ដា និងលោក ខ្លូត ផន ព្រមទាំងសមាជិកក្រុមប្រឹក្សាខេត្ត អភិបាលរងខេត្ត និងថ្នាក់ដឹកនាំមន្ត្រីរាជការ បានចូលរួមសម្ដែងនូវសមានទុក្ខយ៉ាងគ្រៀមក្រំ ជាមួយគ្រួសារសព និងអញ្ជើញអុចធូប បួងសួងសូមឲ្យឌួងវិញាណក្ខន្ធសព ឧបាសក សុខ សារឿន បានសោយសុខទៅកាន់ដ្ឋានបរមសុខ
កុំបីភ្លាំងភ្លាត់ឡើយ ។
ជាមួយគ្នានោះ លោកអភិបាលខេត្ត ក៏បាននាំយកថវិកា ចំនួន២លានរៀល លោកស្រី ញួង ចរិយា អ៊ុន ចាន់ដា ១០០ដុល្លារ លោកលោកស្រី ប៉ាង ដានី អភិបាលរងខេត្ត ៥០ម៉ឺនរៀល លោកស្រី អន ហេងលក្ខិណា ៣០ម៉ឺនរៀល ដេីម្បីចូលរួមក្នុងពិធីរៀបចំបុណ្យសពនេះផងដែរ ។
សូមបញ្ជាក់ថា ក្រុមគ្រួសារសព ក៏បានមូលមតិគ្នា ដង្ហែរទៅបូជា នៅបរិវេណ វត្តនគរបាជ័យក្រៅ ស្ថិតនៅឃុំអំពិល ស្រុកកំពង់សៀម វេលាម៉ោង ៧ព្រឹកថ្ងៃទី៣០ ខែកក្កដានេះ ហើយគ្រោងប្រារព្ធធ្វើបុណ្យទក្ខិណានុប្បទាន គម្រប់ខួប ៧ថ្ងៃ និង១០០ថ្ងៃ ទៅតាមកិច្ចសាសនា ដើម្បី ឧទ្ទិសកុសលផលបុណ្យ ដល់ឌួងវិញ្ញាណក្ខ័ន្ធ របស់ឧបាសក សុខ សារឿន នៅថ្ងៃទី០២ ខែសីហា ឆ្នាំ២០២០ ខាងមុខនេះ៕SRP

ខេត្តកំពង់ចាម៖នៅសៀលថ្ងៃទី២៩ ខែកក្កដា ឆ្នាំ២០២០ នេះ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន អមដំណើរ ដោយ លោក រដ្ឋលេខាធិការ លោក ជាអគ្គនាយក និងឯកឧត្ដម ជាទីប្រឹក្សាក្រសួងព័ត៌មាន បានអញ្ជើញគោរពវិញាណក្ខន្ធសព ឧបាសក សុខ សារឿន ត្រូវជាស្វាមី របស់លោកស្រី សម ផល្លា ប្រធានមន្ទីរព័ត៌មាន ខេត្តកំពង់ចាម ដែលបានទទួលមរណៈភាព កាលពីថ្ងៃទី២៨ ខែកក្កដា ឆ្នាំ២០២០ ក្នុងជន្មាយុ ៦៧ឆ្នាំ ដោយរោគាពាធ ។
នៅក្នុងឱកាសនោះដែរ លោក រដ្ឋមន្ត្រី ខៀវ កាញារីទ្ធ និងប្រតិភូអមដំណើរ បានចូលរួមសម្ដែងនូវសមានទុក្ខយ៉ាងគ្រៀមក្រំ ជាមួយគ្រួសារសព និងអញ្ជើញអុចធូប បួងសួងសូមឲ្យឌួងវិញាណក្ខន្ធសព ឧបាសក សុខ សារឿន បានសោយសុខទៅកាន់ដ្ឋានបរមសុខ
កុំបីភ្លាំងភ្លាត់ឡើយ ។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន និងប្រតិភូអមដំណើរ ក៏បាននាំយកថវិកា ១លានរៀល ចូលរួមក្នុងពិធីរៀបចំបុណ្យសព ខាងលើផងដែរ។
សូមបញ្ជាក់ថា បច្ចុប្បន្ន សពរបស់ឧបាសក សុខ សារឿន ត្រូវបានក្រុមគ្រួសារ សាច់ញ្ញាតិ តម្កល់ទុកនៅគេហដ្ឋាន នៅគេហដ្ឋានសព ស្ថិតនៅក្នុងភូមិជង្ហុក ឃុំអំពិល ស្រុកកំពង់សៀម ខេត្តកំពង់ចាម។ ក្រុមគ្រួសារ ក៏បានមូលមតិគ្នា ដង្ហែរទៅបូជា នៅបរិវេណ វត្តនគរបាជ័យក្រៅ ស្ថិតនៅឃុំអំពិល ស្រុកកំពង់សៀម វេលាម៉ោង ៧.០០នាទី នាព្រឹកថ្ងៃទី៣០ ខែកក្កដានេះហើយគ្រោងប្រារព្ធធ្វើបុណ្យទក្ខិណានុប្បទាន គម្រប់ខួប ៧ថ្ងៃ និង ១០០ថ្ងៃ ទៅតាមកិច្ចសាសនា ដើម្បី ឧទ្ទិសកុសលផលបុណ្យ ដល់ឌួងវិញ្ញាណក្ខ័ន្ធ របស់ឧបាសក សុខ សារឿន នៅថ្ងៃទី០២ ខែសីហា ឆ្នាំ២០២០ខាងមុខ។ អាស្រ័យហេតុនេះ សូមគោរពអញ្ជើញសម្ដេច ទ្រង់ ឯកឧត្ដម លោកឧកញ៉ា លោកជំទាវ លោក លោកស្រី អ្នកនាងកញ្ញា ញ្ញាតិនិមិត្តជិតឆ្ងាយ អញ្ជើញចូលរួមដង្ហែរ និងពិធីបុណ្យនេះ ឲ្យបានអធិកអធម ដើម្បី អនមោទនា ទទួលយកផល្លានិសង្ឃ តាមកម្លាំងសទ្ធាជ្រះថ្លា រៀងៗខ្លួន៕SRP