ខេត្តបន្ទាយមានជ័យ

ខេត្តបន្ទាយមានជ័យ៖ក្នុងពិធីប្រកាសផ្ទេរភារកិច្ច​ និងបំពាក់ឋានន្តរស័ក្តិ​ ជូនមន្ត្រីនគរបាលជាតិ​ អធិការដ្ឋាននគរបាលក្រុងប៉ោយប៉ែត នៅរសៀល ថ្ងៃទី ០៨ ខែ តុលា ឆ្នាំ២០២០នេះ លោកឧត្តមសេនីយ៍ត្រី សិទ្ធិ ឡោះ ស្នងការនគរបាលខេត្តបន្ទាយមានជ័យ បានសម្ដែងនៅសាទរ និងផ្តាំផ្ញើដល់កម្លាំងទាំងអស់បន្តខិតខំ ប្រឹងប្រែង យកចិត្តទុកដាក់ក្នុងការងារ និងបម្រើប្រជាពលរដ្ឋ អោយបានល្អ។
លោក ឧត្ដមសេនីយ៍ត្រី សិទ្ធិ ឡោះ
បានផ្ដល់អនុសាសន៍ដល់អធិការនគរបាលក្រុងប៉ោយប៉ែត និងមន្រ្តីនគរបាលទាំងអស់ អោយបំរើប្រជាពលរដ្ឋដោយស្មោះត្រង់ ហើយលោកបាន ដាក់ចេញទិសដៅអនុវត្តចំនួន ០៤ មាន៖
១- ខិតខំប្រឹងប្រែងបន្តអោយមានសន្តិសុខសណ្ដាប់ធ្នាប់ និងការពារសន្តិភាព។
២- ពង្រឹងអនុវត្តគោលនយោបាយ ភូមិ ឃុំ មានសុវត្ថិភាព។
៣- ដោះស្រាយក្តីកង្វល់ចំពោះមុខរបស់ប្រជាពលរដ្ឋ ០៣ មាន៖
ក/ ក្តីកង្វល់រឿងគ្រោះថ្នាក់ចរាចរណ៍ (នគរបាលខេត្តបន្ទាយមានជ័យនឹងចូលរួមអប់រំ ផ្សព្វផ្សាយ អោយប្រជាពលរដ្ឋគោរពច្បាប់ចររាចរណ៍ និងពង្រឹងបន្ថែមទៀតដើម្បីអោយប្រជាពលរដ្ឋពាក់មួកសុវត្ថិភាព ដាក់ខ្សែក្រវ៉ាត់សុវត្ថិភាព គោរពតាមល្បឿនកំណត់ បង្ការថ្ងៃនេះថ្ងៃស្អែក មិនអោយមានគ្រោះចរាចរណ៍។)
ខ/ ក្តីកង្វល់រឿងគ្រឿងញៀន (នគរបាលខេត្តបន្ទាយមានជ័យ នឹងចូលរួម ខិតខំ បង្ការ ទប់ស្កាត់ បង្រ្កាប កាប្រើប្រាស់ និងចែកចាយដាំដុះ គ្រឿងញៀនដើម្បីអោយភូមិឃុំ ងាកចេញឆ្ងាយពីគ្រឿងញៀន។)
គ/ ក្តីកង្វល់រឿង បទល្មើស លួចទ្រព្យសម្បត្តិឆក់ ប្លន់គ្រប់ប្រភេទ (នគរបាលខេត្តបន្ទាយមានជ័យនឹងចូលរួម អនុវត្តវិធានការរដ្ឋបាល បង្ការ ល្បាត ពួនស្ទាក់ និងបង្រ្កាប ដើម្បីអោយភូមិឃុំមានសុវត្ថិភាព។)
៤- សាមគ្គីភាព ឯកភាពផ្ទៃក្នុង ចូលរួមសហការជាមួយគ្រប់អជ្ញាធរដែនដីពាក់ព័ន្ធទាំងអស់ដើម្បីសំរេចជោគជ័យគ្រប់ភារកិច្ច។

វិធានការទាំងនេះ ស្នងការនគរបាលខេត្ត នឹងដាក់ចេញទៅលើអធិការនគរបាលស្រុក/ក្រុងទាំង៩ និងប៉ុស្តិ៍រដ្ឋបាលឃុំ/សង្កាត់ ទាំង៦៥ នៅក្នុងភូមិសាស្រ្តខេត្តបន្ទាយមានជ័យ ដើម្បីអនុវត្តទាំងអស់គ្នា៕SRP

ខេត្តឧត្តរមានជ័យ៖ប្រកាសលោក ហួត សុធី ស្នងការរងនគរបាលខេត្តសៀមរាប ជាស្នងការនគរបាលខេត្តឧត្តរមានជ័យ  នៅព្រឹកថ្ងៃទី០៩ ខែកញ្ញា ឆ្នាំ២០២០ នេះ ជំនួសលោក ម៉ែន លី ផ្ទេរភារទៅជាស្នងការនគរបាលខេត្តកំពង់ធំ។

សូមបញ្ជាក់ថាពិធីនេះរៀបចំឡើងក្រោមវត្តមានលោកនាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងមានការចូលរួមពីលោក ប៉ែន កុសល្យ អភិបាលខេត្តឧត្តរមានជ័យ ព្រមទាំងថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធជាច្រើនរូបទៀតផងដែរ៕SRP

ខេត្តបន្ទាយមានជ័យ៖ក្នុងពេលអញ្ជើញប្រកាសផ្ទេរភារកិច្ច និងតែងតាំងមុខតំណែងស្នងការ នៃស្នងការដ្ឋាននគរបាលខេត្តបន្ទាយមានជ័យ នៅសាលាខេត្តបន្ទាយមានជ័យ នាថ្ងៃទី០៧ ខែកញ្ញា នេះ លោកនាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ បានថ្លែងថាដើម្បីរក្សាបាននូវសន្តិសុខ និងសុវត្ថិភាពជូនប្រជាពលរដ្ឋ ស្នងការដែលទើបទទួលតំណែងថ្មី ត្រូវរឹតបន្តឹងសភាពការនៅតាមបន្ទាត់ព្រំដែន ដោយត្រូវសហការជាមួយភាគីថៃ ទប់ស្កាត់អោយបានរាល់បទល្មើសផ្សេងៗតាមបន្ទាត់ព្រំដែន ពិសេសករណីរត់ពន្ធគ្រឿងញៀន ដែលលជាចំណុចមួយដែលសមត្ថកិច្ចត្រូវធ្វើការទប់ស្កាត់ បង្ក្រាបអោយបានកុំអោយមានការហូរចូលមកទឹកដីកម្ពុជា នឹងត្រូវបន្តក្តាប់អោយបាននូវសភាពការតាមព្រំដែន ទប់ស្កាត់ការរត់ពន្ធទំនិញខុសច្បាប់ផ្សេងៗ ពិសេសការលួចឆ្លងដែនខុសច្បាប់របស់ពលករកម្ពុជា ដើម្បីទៅធ្វើការនៅប្រទេសថៃ។

នាយឧត្តមសេនីយ៍ នេត សាវឿន បានជំរុញអោយស្នងការដែលតែងតាំងថ្មីត្រូវចាត់ទុកខេត្តបន្ទាយមានជ័យ ជាខេត្តគំរូមួយ ទាំងការអនុវត្តវិន័យ ទាំងកងកម្លាំងអន្តរាគមន៍ ការចល័តទ័ព និងមធ្យោបាយប្រើប្រាស់ ជាពិសេសកម្លាំងនគរបាលខេត្តបន្ទាយមានជ័យ ជាគំរូល្អមួយក្នុងការចុះជួយប្រជាពលរដ្ឋ នៅពេលមានគ្រោះអាសន្នអន់ក្រ ដូចជាខ្យល់ព្យុះ ទឹកជំនន់ ប្រក់ផ្ទះ លើកផ្ទះ ជួយច្រូតស្រូវក្នុងទឹកជាដើម។

ក្នុងនាមជាស្នងការថ្មីត្រូវជួយដោះស្រាយទុកកង្វល់របស់ប្រជាពលរដ្ឋ អ្វីដែលជាទុក្ខព្រួយរបស់ប្រជាពលរដ្ឋ ករណីបទល្មើស លួច ឆក់ ប្លន់នៅក្នុងមូលដ្ឋាន ត្រូវតែអនុវត្តនូវគោលនយោបាយភូមិ ឃុំ មានសុវត្ថិភាព ជួយទប់ស្កាត់បញ្ហាគ្រឿងញៀន ទប់ស្កាត់កុំអោយមានការរីករាលដាល ជាពិសេសខេត្តនៅជាប់ព្រំដែនផងនោះ ត្រូវជួយដោះស្រាយសំដៅកាត់បន្ថយអត្រាគ្រោះថ្នាក់ចរាចរណ៍ដែលជាក្តីកង្វល់របស់ប្រជាពលរដ្ឋ ត្រូវជួយផ្សព្វផ្សាយអប់រំច្បាប់ និងអប់រំដល់អ្នកដែលកាន់ចង្កូតផ្ទាល់ ដើម្បីអោយពួកគាត់បានយល់រួមចំណែកក្នុងការកាត់បន្ថយគ្រោះថ្នាក់ចរាចរណ៍។

សូមជម្រាបថា លោកឧត្តមសេនីយ៍ត្រី សិទ្ធិ ឡោះ ស្នងការរងនគរបាលខេត្តបន្ទាយមានជ័យ ត្រូវបានតែងតាំងជាស្នងការថ្មី នៃស្នងការដ្ឋាននគរបាលខេត្តបន្ទាយមានជ័យ ជំនួសលោកឧត្តមសេនីយ៍ទោ អាត់ ខែម ដែលត្រូវបានដាក់អោយចូលនិវត្តន៍ និងត្រូវបានតែងតាំងជាទីប្រឹក្សាក្រសួងមហាផ្ទៃ៕SRP

ខេត្តបន្ទាយមានជ័យ៖លោកឧត្តមសេនីយ៍ត្រី សិទ្ធិ ឡោះ ស្នងការរងនគរបាលខេត្ត ត្រូវចូលកាន់តំណែងជាស្នងការថ្មី នៃស្នងការដ្ឋាននគរបាលខេត្ត។ ជំនួសលោកឧត្តមសេនីយ៍ទោ អាត់ ខែម ត្រូវបានតែងតាំងជាទីប្រឹក្សាក្រសួងមហាផ្ទៃ ឋានៈស្មើអនុរដ្ឋលេខាធិការ។

ពិធីប្រកាសផ្លាស់ប្ដូរតំណែងស្នងការនគរបាលខេត្តបន្ទាយមានជ័យ ត្រូវធ្វើឡើងជាផ្លូវការនៅថ្ងៃទី០៧ ខែកញ្ញា ឆ្នាំ២០២០ ក្រោមអធិបតីនាយឧត្តមសេនីយ៍សន្ដិបណ្ឌិត នេត សាវឿន អគ្គស្នងការនគរបាលជាតិ លោក ខេង ស៊ុម ប្រធានក្រុមប្រឹក្សាខេត្តនិង លោក អ៊ុ រាត្រី អភិបាលខេត្ត៕SRP

ខេត្តបន្ទាយមានជ័យ៖មានការលើកឡើងថាយ៉ាងហោចណាស់មានក្រុមជនរងគ្រោះចំនួន ១០នាក់ បានសម្រេចនាំគ្នាដាក់ពាក្យប្តឹងចូលសាលាដំបូងខេត្តបន្ទាយមានជ័យ ដើម្បីទាមទាររកយុត្តិធម៌ពាក់ព័ន្ធករណីទំនាស់ដីធ្លីទំហំ១១៣ហិកតា ស្ថិតនៅចំណុចអូរស្វារអិល សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។

យោងតាមពាក្យបណ្តឹងចុះថ្ងៃទី០៥ ខែសីហា ឆ្នាំ២០២០ បានបញ្ជាក់ថា ជនរងគ្រោះបានប្តឹងមនុស្សចំនួន ១៧នាក់ ដែលនៅក្នុងចំណោមនោះក៏មានលោក ប៉ាល់ សេដ្ឋា អតីតចៅសង្កាក់និមិត្ត, លោក ង៉ោ ម៉េងជ្រួន អតីតអភិបាលក្រុងប៉ោយប៉ែទ, លោក ប្រាក់ ប៉ូលី អតីតប្រធានមន្ទីរសុរិយោដីខេត្តបន្ទាយមានជ័យ (អតីតប្រធានការិយាល័យភូមិបាលក្រុងប៉ោយប៉ែត) និងលោក លី សារី អភិបាលរងខេត្តបន្ទាយមានជ័យ (អតីតប្រធានសុរិយោដីខេត្តបន្ទាយមានជ័យ) ផងដែរ។

 ក្រុមប្រជាពលរដ្ឋ បានប្តឹងអ្នកទាំង ១៧នាក់ពីបទ ក្លែងបន្លំឯកសារ, បទ ប្រើប្រាស់ឯកសារសាធារណៈក្លែង, បទ បំភាន់មន្ត្រីសុរិយោដីក្នុងការចុះបញ្ជីដីធ្លី, បទ សមគំនិតក្នុងអំពើក្លែងបន្លំឯកសារ, បទ សមគំនិតក្នុងអំពើប្រើប្រាស់ឯកសារសាធារណៈក្លែង និងបទ សមគំនិតក្នុងអំពើបំភាន់មន្ត្រីសុរិយោដីក្នុងការចុះបញ្ជីដីធ្លី។

យោងតាមពាក្យបណ្តឹងរបស់ប្រជាពលរដ្ឋ បញ្ជាក់ថា ប្រជាពលរដ្ឋចំនួន ៥១គ្រួសារ បានទទួលដីទាំងអស់នោះពីរដ្ឋចែក និងកាន់កាប់ចាប់តាំងពីឆ្នាំ១៩៩៧មកម្ល៉េះ លុះដល់ឆ្នាំ២០១៥ឈ្មោះ ទុយ វ៉ាន់នី ជាមេក្លោង និងបក្ខពួក បានលួចធ្វើប្លង់រឹងយកដីរបស់ប្រជាពលរដ្ឋ ដោយមានមន្ត្រីមូលដ្ឋាន និងមន្ត្រីជំនាញខាងលើជាអ្នកជួយជ្រោមជ្រែង សហការគប់គិតគ្នាបំភាន់ និងបន្លំឯកសារលួចចុះបញ្ជីយកដីរបស់ប្រជាជនទំហំ ១១៣ហិកតា យកទៅធ្វើជាកម្មសិទ្ធិដោយទុច្ចរិត។ពាក់ព័ន្ធករណីនេះបណ្ដាញសៀមរាបប៉ុស្ដិ៍នៅមិនទាន់ទទួលបានការបំភ្លឺពីមនុស្សទាំង១៧នាក់ដែលរងបណ្ដឹងពីពលរដ្ឋនៅឡើយទេដោយមិនមានលេខទូរស័ព្ទ៕SRP