ខេត្តបាត់ដំបង

ខេត្តបាត់ដំបង៖លោក សុខ លូ អភិបាលខេត្តបាត់ដំបង បានមានប្រសាសន៍ថា ពាក់ព័ន្ធទៅនឹងការអញ្ជើញទៅពិនិត្យ វត្តដូនទ្រី ដែលព្រះគ្រូចៅអធិការវត្តដូនទ្រីបានស្នើដល់រដ្ឋបាលខេត្ត ដើម្បីសុំធ្វើការកាត់ប្លង់ សម្រាប់ជាទ្រព្យសម្បត្តិរបស់វត្ត ក៏ប៉ុន្តែដោយសារវត្តនេះ ស្ថិតនៅក្នុងតំបន់២ ដែលមិនអាចកាត់ប្លង់បាន ហើយវត្តនេះជាប្រភេទវត្តបុរាណក កើតឡើងរាប់រយឆ្នាំមកហើយ ស្ថិតនៅក្នុងភូមិចាស់បុរាណ រដ្ឋបាលខេត្ត បានរៀបចំឯកសារជូនរាជរដ្ឋាភិបាលកម្ពុជា ដើម្បីរៀបចំកាត់ប្លង់ជូនវត្ត និងប្រជាពលរដ្ឋដែលរស់នៅភូមិចាស់បុរាណ ដែលស្ថិតនៅតំបន់២នេះ មកជាតំបន់១វិញ។

លោកបានលើកឡើងថា ការអភិរក្ស ត្រូវពាក់ព័ន្ធទៅនឹងការអភិវឌ្ឍ ដោយមុននឹងធ្វើការអភិវឌ្ឍសំណង់បុរាណ អ្វីមួយត្រូវមានការសិក្សា ឱ្យល្អិតល្អន់ជាមុនសិន នូវបច្ចេកទេសក្នុងការសាងសង់ ឬជួសជុល ដែលមិនធ្វើឱ្យមានផលប៉ះពាល់សំណង់បុរាណ ដើម្បីចៀសវាង ការទុកសំណង់បុរាណ ចោល មិនហ៊ានអភិវឌ្ឍន៍ ខ្លាចប៉ះពាល់ ធ្វើឱ្យសំណង់បុរាណ មួយចំនួនរងការខូចខាត ដោយសារគ្មានការថែរក្សាត្រឹមត្រូវ។

លោក សុខ លូ ក៏ធ្វើការអំពាវនាវដល់ព្រះសង្ឃ តាជី យាយជី ជួយក្នុងការបញ្ជៀបស្មារតីប្រជាពលរដ្ឋ ឱ្យចូលរួមគោរពច្បាប់ចរាចរណ៍ ណែនាំដល់ប្រជាពលរដ្ឋ កុំឱ្យបើកបរក្នុងស្ថានភាពស្រវឹង បើងងុយត្រូវសំរាកសិន រួចចាំបន្តដំណើរទៅមុខទៀត ព្រោះអត្រាគ្រោះថ្នាក់ចរាចរណ៍ នៅតែបន្តគំរាមកំហែង ដល់ ប្រជាពលរដ្ឋ អត្រាការស្លាប់ ជនពិការ ដោយសារគ្រោះថ្នាក់ចរាចរណ៍នៅតែជាហានិភ័យដែលប្រជាពលរដ្ឋ ត្រូវតែចូលរួមទាំងអស់គ្នា ទើបអត្រាគ្រោះថ្នាក់ចរាចរណ៍មានការថយចុះ។

លោកក៏បានស្នើសូមឲ្យចូលរួមលុបបំបាត់ការប្រើប្រាស់ និងជួញដូរគ្រឿងញៀន ខុសច្បាប់ ដែលសង្គមស្អប់ខ្ពើម គ្រឿងញៀន នឹងធ្វើឱ្យអ្នកប្រើប្រាស់បាត់បង់ស្មារតី លែងស្គាល់អ្វីល្អ អ្វីអាក្រក់បង្កភាពអសន្ដិសុខដល់ប្រជាពលរដ្ឋផងដែរ។

លោក សុខ លូ មានប្រសាសន៍ថាយ៉ាងដូច្នេះ ក្នុងពិធីបិទការផ្សព្វផ្សាយខ្លឹមសារ អនុសំវច្ឆរមហាសន្និបាតមន្រ្ដីសង្ឃទូទាំងប្រទេសលើកទី២៩ នៅរសៀលថ្ងៃពុធ ម្សិលមិញ នៅសាលប្រជុំអគារE សាលាខេត្តបាត់ដំបង៕SRP

ខេត្តបាត់ដំបង៖អភិបាលខេត្តបាត់ដំបង លោក សុខ លូ បានថ្លែងប្រាប់ដល់ប្រជាពលរដ្ឋ ដែលទទួលបានក្បាលដីហើយ សូមបន្តនិតិវិធីរបស់ខ្លួនជាបន្តទៀត តាមការណែនាំរបស់មន្រ្ដីជំនាញរបស់មន្ទីររៀបចំដែនដី នគរូបនីយកម្ម សំណង់ និងសុរិយោដី ដើម្បីបានសិទ្ធិស្របច្បាប់លើម្ចាស់កម្មសិទ្ធិដីដែលប្រជាពលរដ្ឋទើបទទួលបាននាពេលនេះ។

លោក សុខ លូ បានមានប្រសាសន៍ថា បើទោះបីជាការប្រគល់នេះមានភាពយឺតយ៉ាវមែន តែការកាត់ដីចេញពីសារពើភ័ណ្ឌទ្រព្យសម្បត្តិរដ្ឋ មិនមែនជារឿងងាយស្រួលទេ ដោយត្រូវការនិតិវីធីជាច្រើន ទើបអាចធ្វើការកាត់ចេញពីទ្រព្យសម្បត្តិរដ្ឋ ដើម្បីប្រគល់ជូនប្រជាពលរដ្ឋ។

លោកសុខ លូ មានប្រសាសន៍យ៉ាងដូច្នេះ ក្នុងពិធីប្រគល់ដីជូនប្រជាពលរដ្ឋចំនួន៣៤ក្បាលដី ស្មើនឹង៣៤គ្រួសារ ដែលស្ថិតនៅភូមិវត្តលៀប សង្កាត់ចំការសំរោង ក្រុងបាត់ដំបង នៅថ្ងៃពុធនេះ។

សូមជម្រាបថាចំពោះក្បាលដីចំនួន៣៤ក្បាលដីដែលប្រគល់ជូនដល់ប្រជាពលរដ្ឋចំនួន៣៤គ្រួសារនេះ ត្រូវបានរាជរដ្ឋាភិបាលកម្ពុជា តាមរយៈក្រសួងសេដ្ឋកិច្ច និងហិរញ្ញវត្ថុ បានឯកភាពជាគោលការណ៍កាត់ឆ្វៀលផ្ទៃដីទំហំ ៤,៤៦៧ ម៉ែត្រការ៉េ ចេញពីបញ្ជីសារពើភ័ណ្ឌ ទ្រព្យសម្បត្តិរដ្ឋរបស់ក្រសួងពាណិជ្ជកម្ម (អង្គភាពប្រើប្រាស់មន្ទីរពាណិជ្ជកម្មខេត្តបាត់ដំបង) ដើម្បីប្រគល់ជូនប្រជាពលរដ្ឋចំនួន៣៤គ្រួសារ ស្ថិតនៅភូមិវត្តលៀប សង្កាត់ចំការសំរោង ក្រុងបាត់ដំបង និងកាត់ផ្ទៃដីទំហំ ២,១៥៥ម៉ែត្រការ៉េ សម្រាប់ធ្វើជាផ្លូវសាធារណ:៕SRP

ខេត្តបាត់ដំបង៖សម្ដេច ស ខេង បានមានប្រសាសន៍ថា នៅលើពិភពលោក មិនអាច គណបក្សណាយកបានការគាំទ្រ ពីប្រជាពលរដ្ឋ មួយរយភាគរយនោះទេ ពោលគឺតែងតែមានសំឡេងភាគច្រើន និងភាគតិច។ យ៉ាងណាក៏ដោយ សម្ដេចបានសង្កត់ធ្ងន់ថា ការចុះជាប់ជាមួយប្រជាពលរដ្ឋ ដើម្បីដឹងសុខទុក្ខប្រជាពលរដ្ឋ គឺជាចំណុចខ្លាំងមួយក្នុងការទទួលបានការគាំទ្រពីពលរដ្ឋ។

សម្ដេចក្រឡាហោម​ ស ខេង ប្រធានស្ដីទីគណបក្សប្រជាជនកម្ពុជា និងជាប្រធានក្រុមការងារគណបក្សប្រជាជនកម្ពុជាចុះមូលដ្ឋានខេត្តបាត់ដំបង និងព្រៃវែង មានប្រសាសន៍យ៉ាងដូច្នេះ នៅរសៀលថ្ងៃសៅរ៍ ម្សិលមិញ ក្នុងឱកាសសំណេះសំណាល និងដឹកនាំយុទ្ធនាការឃោសនា បោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ នៅស្រុកបាណន់ ខេត្តបាត់ដំបង។
​​
សម្ដេចស ខេង បញ្ជាក់ថា ការបោះឆ្នោតនេះ គឺជាការកសាងលទ្ធិប្រជាធិបតេយ្យ ភាពសុខដុមរមនា នៅមូលដ្ឋាន ធ្វើឱ្យមូលដ្ឋានមានស្ថិរភាព ជំរុញការអភិវឌ្ឍសេដ្ឋកិច្ច សង្គមឱ្យកាន់តែរីកចំរើន តាមរយៈការផ្ទេរសិទ្ធិអំណាច ដើម្បីឱ្យ ក្រុមប្រឹក្សាឃុំ សង្កាត់មានការទទួលខុសត្រូវ មានទឹកចិត្ត មានមធ្យោបាយ និងធនធានដឹកនាំការអភិវឌ្ឍមូលដ្ឋានជាមួយ ប្រជាពលរដ្ឋ ពោលគឺពលរដ្ឋ នៅមូលដ្ឋានជាម្ចាស់ក្នុងការកំណត់ ជោគវាសនារបស់ខ្លួន តាមរយៈការជ្រើសរើសមេដឹកនាំ និងការរួមគ្នាសម្រេចចិត្តលើគម្រោងអភិវឌ្ឍជាក់ស្ដែង។

សម្ដេច បានមានប្រសាសន៍ទៀតថាតាមរយៈយន្តការ បោះឆ្នោតនេះ ក្រុមប្រឹក្សាឃុំ សង្កាត់ ត្រូវទទួលខុសត្រូវចំពោះមុខប្រជាជននៅមូលដ្ឋានមុនគេ ដ្បិតពលរដ្ឋជាម្ចាស់នៃអំណាច ហើយការគ្រប់គ្រងដឹកនាំឃុំ សង្កាត់ ល្អឬមិនល្អ ពលរដ្ឋនៅមូលដ្ឋានគឺជាអ្នកតាមដាន និងវាយតម្លៃដោយផ្ទាល់។ ជាមួយគ្នានេះ ក្រុមប្រឹក្សឃុំ សង្កាត់ ក៏មានការទទួលខុសត្រូវចំពោះរាជរដ្ឋាភិបាល ក្នុងការធានាឱ្យពលរដ្ឋក្នុងមូលដ្ឋាន របស់ខ្លួនគោរពច្បាប់ទម្លាប់ ឱ្យបានត្រឹមត្រូវ ដ្បិតថ្នាក់ជាតិជាអ្នកផ្ទេរនូវថវិកា សិទ្ធអំណាច និងការទទួលខុសត្រូវ ឱ្យរដ្ឋបាលឃុំ សង្កាត់ អនុវត្ត។

សម្ដេចស ខេង បានណែនាំឱ្យប្រមូលសមិទ្ធផល និងស្នាដៃសំខាន់ៗ ដែលសម្រេចបានយកទៅជម្រាបជូន ប្រជាពលរដ្ឋ ដោយបង្ហាញជូនពួកគាត់ឱ្យយល់ងាយៗ រួមទាំងផែនការថ្មីៗ បន្ថែមទៀត ដើម្បីផ្ដល់ភាពជឿជាក់ និងក្ដីសង្ឃឹមជូន ប្រជាពលរដ្ឋ ពោលគឺពលរដ្ឋនឹងបានដឹងថា តើពួកគាត់ទទួលបានផលប្រយោជន៍អ្វីខ្លះក្នុងរយៈកាល៥ឆ្នាំ កន្លងមក និងត្រូវទទួលបានអ្វីខ្លះទៀត សម្រាប់រយៈពេល៥ឆ្នាំបន្ត បន្ទាប់ពីបានបន្តបោះឆ្នោតគាំទ្រគណបក្សប្រជាជនកម្ពុជា សម្រាប់អាណត្តិថ្មីនេះ៕SRP

ខេត្តបាត់ដំបង៖អភិបាលខេត្តបាត់ដំបង លោក សុខ លូ និងជាប្រធានក្រុមការងាររាជរដ្ឋាភិបាល ចុះមូលដ្ឋានក្រុងបាត់ដំបង

នៅថ្ងៃព្រហស្បតិ៍ នេះបានអញ្ជើញ ជួបសំណេះសំណាលជាមួយប្រជាពលរដ្ឋដែលរស់នៅភូមិអណ្ដូងចេញ សង្កាត់អូរចារ ក្រុងបាត់ដំបង ចំនួន ៨២៨នាក់ នៅផ្សារទំនើបភួពុយ។

ឆ្លៀតក្នុងឱកាសនោះដែរ លោកសុខ លូ បាននាំយក ប្រសាសន៍ផ្ដាំផ្ញើសួរសុខទុក្ខពីសំណាក់សម្ដេចក្រឡាហោម ស ខេង ឧបនាយករដ្ឋមន្រ្ដី រដ្ឋមន្រ្ដីក្រសួងមហាផ្ទៃ និងជាប្រធានក្រុមការងាររាជរដ្ឋាភិបាល ចុះមូលដ្ឋានខេត្តបាត់ដំបង និងលោកជំទាវ ដែលសម្ដេចតែងតែគិតគូរដល់សុខទុក្ខប្រជាពលរដ្ឋ នៅក្នុងខេត្តបាត់ដំបងជានិច្ច និងបានផ្ដាំផ្ញើដល់ប្រជាពលរដ្ឋទាំងអស់ ចូរថែរក្សាសុខភាពឱ្យបានល្អ តាមរយៈការហូបស្អាត រស់នៅស្អាត និងពិសារទឹកស្អាត និងត្រូវបន្តសំអាតបរិស្ថានសណ្ដាប់ធ្នាប់ផ្ទះឱ្យស្អាតជានិច្ច ។

លោក បានមានប្រសាសន៍បន្តទៀតថា សម្រាប់ការបោះឆ្នោតក្រុមប្រឹក្សា ឃុំ សង្កាត់ នាពេលខាងមុខនេះ សូមប្រជាពលរដ្ឋទាំងអស់ ចូលរួមបោះឆ្នោតឲ្យបានគ្រប់ៗគ្នាចំពោះប្រជាពលរដ្ឋគ្រប់អាយុបោះឆ្នោត ដើម្បីបំពេញតួនាទីក្នុងនាមជាប្រជាពលរដ្ឋគំរូសម្រាប់សង្គមជាតិ ។ ឯកឧត្តម បានបន្តទៀតថា សម្រាប់ប្រជាពលរដ្ឋណាដែលគ្មាន ឬបាត់អត្តសញ្ញាណប័ណ្ណ សូមរាយការណ៍មកអាជ្ញាធរមូលដ្ឋាន ដើម្បីរៀបចំធ្វើអត្តសញ្ញាណប័ណ្ណថ្មីជូន ឬដើម្បីរៀបចំឯកសារបញ្ជាក់អត្តសញ្ញាណប័ណ្ណ សម្រាប់ត្រៀមលក្ខណៈក្នុងការងារបោះឆ្នោតខាងមុខនេះ ព្រោះបើគ្មានអត្តសញ្ញាណប័ណ្ណទេ ក៏មិនអាចបោះឆ្នោតបានដែរ។

លោក សុខ លូ បានអំពាវនាវដល់ប្រជាពលរដ្ឋទាំងអស់សូមថែរក្សាសន្ដិភាព ដែលរាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់ សម្ដេចតេជោ ហ៊ុន សែន នាយករដ្ឋមន្រ្ដីនៃព្រះរាជាណាចក្រកម្ពុជា ដែលសម្ដេចខិតខំស្វែងរកមធ្យោបាយគ្រប់បែបយ៉ាងដើម្បីប្រទេសមានសុខសន្ដិភាព ហើយបើសិនជារក្សាបាននូវសុខសន្ដិភាពនេះ នឹងធ្វើឱ្យប្រទេសកម្ពុជាកាន់តែមានការរីកចម្រើន អភិវឌ្ឍន៍ឈានទៅមុខបន្តទៀត ជាពិសេសនឹងក្លាយជាប្រទេសអភិវឌ្ឍន៍នាឆ្នាំ២០៥០ ខាងមុខនេះ ។

លោក ក៏បានធ្វើការអំពាវនាវដល់ប្រជាពលរដ្ឋទាំងអស់ ដែលបានចាក់វ៉ាក់សាំងកូវីដ-១៩ដូសទី៣ ឬដូសជំរុញរួចរាល់ សូមរួសរាន់ទៅបន្តទទួលការចាក់វ៉ាក់សាំងកូវីដ-១៩ ដូសទី៤ ក្រោយរយៈពេល៣-៤ខែបន្ទាប់ពីចាក់ដូសទី៣រួចរាល់ នៅតាមមណ្ឌលចាក់វ៉ាក់សាំងកូវីដ-១៩ ដែលនៅជិតផ្ទះប្រជាពលរដ្ឋរស់នៅ ឬអាចមកទទួលការចាក់វ៉ាក់សាំងកូវីដ-១៩បានភ្លាមៗ ដោយរដ្ឋបាលខេត្តបាត់ដំបងបានធ្វើការរៀបចំក្រុមគ្រូពេទ្យចាក់វ៉ាក់សាំងកូវីដ-១៩ នៅទីកន្លែងសំណេះសំណាលផ្ទាល់តែម្ដង ដោយប្រជាពលរដ្ឋមិនពិបាកវិលត្រឡប់មកចាក់សារជាថ្មីម្ដងទៀត៕SRP

ខេត្តបាត់ដំបង៖លោកសុខ លូអភិបាលខេត្តបាត់ដំបង មានប្រសាសន៍ថា សូមកុំឱ្យមានការភ័យខ្លាចថា វ៉ាក់សាំងកូវីដ-១៩ នឹងធ្វើឲ្យប៉ះពាល់ដល់សុខភាពប្រជាពលរដ្ឋ តាមការរយៈការញុះញង់ពីជនអគតិមួយចំនួនឡើយ។

លោក សុខ លូ បន្តថា ទោះបីមានការធូរស្បើយ នូវជំងឺកូវីដ-១៩ហើយក្ដី សូមប្រជាពលរដ្ឋទាំងអស់ បន្តទទួលការចាក់វ៉ាក់សាំងកូវីដ-១៩ នៅតាមមណ្ឌលចាក់វ៉ាក់សាំង ដែលនៅជិត ពិសេសសម្រាប់ប្រជាពលរដ្ឋដែលបានចាក់វ៉ាក់សាំងកូវីដ-១៩ ដូសទី៣ ឬដូសជំរុញរួចរាល់បន្ទាប់ពី៣-៤ខែ សូមបន្តទទួលការចាក់វ៉ាក់សាំងកូវីដ-១៩ដូសទី៤ និងដូសបន្តបន្ទាប់ទៀត តាមកាលកំណត់ជាក់ស្ដែង។

លោកសុខ លូ ប្រសាសន៍បែបនេះ ក្នុងពិធីសម្ពោធដាក់ឲ្យប្រើប្រាស់ជាផ្លូវការនូវអគារចត្តាឡីស័កមួយខ្នង នៃមណ្ឌលសុខភាពត្រាង ស្រុកកំរៀង ខេត្តបាត់ដំបង
នៅថ្ងៃអង្គារនេះ។

លោក សុខ លូ បានមានប្រសាសន៍ថា ការងារប្រយុទ្ធប្រឆាំងនឹងជំងឺកូវីដ១៩ ក្នុងក្របខណ្ឌ ទូទាំងប្រទេស រួមទាំងការចាក់វ៉ាក់សាំងកូវីដ ផងនោះ យើងពិតជាទទួលបានជោគជ័យ យ៉ាងត្រចះត្រចង់នៅលើសមរភូមិកូវីដ ប៉ុន្តែតម្រូវឱ្យយើងបន្ត រៀនរស់ក្នុងប្រក្រតីភាពថ្មី ជាមួយនឹងកូវីដ និងចេះទទួលខុសត្រូវក្នុងសង្គម ដោយត្រូវការពារខ្លួនយើង គ្រួសារយើង និងសហគមន៍របស់យើងកុំឱ្យឆ្លងជំងឺកូវីដ ពីព្រោះ ជំងឺកូវីដ-១៩ មិនទាន់ទៅណាឆ្ងាយពីយើងនៅឡើយនោះទេ ហើយនៅក្នុងប្រទេសនានានៅលើសកលលោក គឺនៅតែមានការឆ្លងជំងឺនេះនៅឡើយ។

លោកបានបន្តទៀតថា បើទោះបច្ចុប្បន្នថ្វីត្បិតតែជំងឺកូវីដ-១៩បានធូរស្បើយច្រើន មិនមានអ្នកធ្វើចត្តាឡីស័កទៀតនោះ ក៏អគារមណ្ឌលចត្តាឡីស័កនេះមិនទុកចោលដែរ ពោលគឺយើងនឹងធ្វើការប្រើប្រាស់ មណ្ឌលនេះ ជាមណ្ឌលសំរាក ព្យាបាលជំងឺទូទៅ ដោយមិនប្រកាន់ជំងឺអ្វីឡើយ ហើយបើសិនជាមានការផ្ទុះជំងឺកូវីដ-១៩ដោយប្រការណាមួយ នឹងប្រើប្រាស់មណ្ឌលនេះជាមណ្ឌលចត្តាឡីស័កវិញម្ដង។

លោកសុខ លូ ក៏បានថ្លែងអំណរគុណយ៉ាងជ្រាលជ្រៅចំពោះ លោក ឯកអគ្គរដ្ឋទូតសាធារណរដ្ឋកូរ៉េប្រចាំព្រះរាជាណាចក្រកម្ពុជា ក្រសួងសុខាភិបាល និងសុខុមាលភាពសាធារណរដ្ឋកូរ៉េ និងអង្គការមូលនិធិកូរ៉េសម្រាប់ការថែទាំសុខភាពអន្តរជាតិ KOFIH ប្រចាំប្រទេសកូរ៉េ ដែលតែងតែចូលរួមវិភាគទានយ៉ាងច្រើន ក្នុងការរួមចំណែកកសាង និងអភិវឌ្ឍន៍វិស័យសុខាភិបាល នៅប្រទេសកម្ពុជា ជាក់ស្ដែងអង្គការក៏បានជួយសម្របសម្រួល និងផ្ដល់អំណោយដ៏ថ្លៃថ្លា នូវអគារចត្តាឡីស័កនៃមណ្ឌលសុខភាពត្រាងដ៏ថ្មីសន្លាងមួយនេះ៕SRP

ខេត្តបាត់ដំបង៖សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក៏បានមានប្រសាសន៍ ថា ព្រះរាជាណាចក្រកម្ពុជាយើង និយាយជារួម ហើយដោយឡែក នៅខេត្តបាត់ដំបង មកដល់ពេលនេះយើងមានសុខសន្តិភាពពេញទី គ្មានជម្លោះប្រដាប់អាវុធ គ្មានកម្លាំងឧទាមក្រៅច្បាប់ ដើម្បីប្រឆាំងនិងរដ្ឋាភិបាលនោះទេ។

ការអះអាងរបស់សម្ដេច ស ខេង ធ្វើឡើងនៅររសៀលថ្ងៃចន្ទ ម្សិលមិញ ក្នុងពិធីជួបសំណេះសំណាលជាមួយគ្រូបង្រៀន គ្រូពេទ្យ និងសិល្បករ សិល្បការិនី នៅខេត្តបាត់ដំបង។

សម្ដេច ស ខេង បន្តថារាជរដ្ឋាភិបាលដែលដឹកនាំដោយគណបក្សប្រជាជន បានគ្រប់គ្រងទឹកដី នៃព្រះរាជាណាចក្រកម្ពុជាទាំងស្រុង ហើយនេះជាមោទភាពណាស់របស់យើងទាំងអស់គ្នា បើប្រៀបធៀបនិងប្រវត្តិសាស្ត្រនៃកម្ពុជា ក្នុងចន្លោះពីក្រោយអាណានិគមនិយមបារាំងដែលត្រួតត្រាកម្ពុជារហូតមកទល់ពេលនេះ។ ស្ថិរភាពនយោបាយនាពេលបច្ចុប្បន្នគឺ តាមរយៈការដែលកម្ពុជាបានអនុវត្តនូវរដ្ឋធម្មនុញ្ញឆ្នាំ១៩៩៣ ដែលរដ្ឋធម្មនុញ្ញនោះ បានដាក់បញ្ចូលនូវកិច្ចព្រមព្រៀងទីក្រុងប៉ារីសឆ្នាំ១៩៩១ ហើយបានប្រកាន់យក នូវរបបនយោបាយសម្រាប់កម្ពុជា គឺរបបប្រជាធិបតេយ្យ សេរីពហុបក្ស។ ឥស្សរជន ឬក៏ប្រជាពលរដ្ឋខ្មែរ គ្រប់រូបគ្រប់មជ្ឈដ្ឋាន មានសិទ្ធិសេរីភាពក្នុងការធ្វើសកម្មភាពនយោបាយ តាមរយៈការបង្កើតគណបក្សនយោបាយ ដើម្បីប្រគួតប្រជែងក្នុងពេលបោះឆ្នោត ដណ្តើមអំណាចគ្រប់គ្រងទាំងនៅថ្នាក់ជាតិ ទាំងនៅថ្នាក់ក្រោមជាតិ។ នេះគឺជាកត្តាសំខាន់ដែលនាំអោយយើងមានស្ថិរភាព ហើយក៏នាំអោយយើងមានសន្តិសុខ សន្តិភាព ដូច្នេះយើងអាចចាត់ទុកថារបបនយោបាយ ដែលយើងបានជ្រើសរើសប្រកាន់យកសព្វថ្ងៃនេះ ដោយគូរភាគីជម្លោះនៅកម្ពុជា ដែលក្នុងនោះ គណបក្សប្រជាជនកម្ពុជា គឺជាតួអង្គ សំខាន់ដែលប្រកាន់យករបបប្រជាធិបតេយ្យ សេរីពហុបក្សនេះ គឺពិតជាត្រឹមត្រូវ សមស្រប ហើយក៏គ្មានរបបនយោបាយណាដែលសមស្រប ជាងនេះនោះទេ ដោយសារនៅក្នុងប្រវត្តិសាស្ត្រយើង ក្នុងរយៈពេលបើយើងគិតពីឆ្នាំ១៩៥៣ មកទល់ឆ្នាំ២០០២នេះមានប្រមាណជិត៧០ឆ្នាំ របបនយោបាយយើងបានឆ្លងកាត់ច្រើនណាស់ ប៉ុន្តែកម្ពុជាយើងមិនបានសុខទេ មិនមានសន្តិភាពេញលេញទេ ហើយបើមិនបានសុខ មិនមានសន្តិភាពទេ យើងពិតជាគ្មានឱកាស ដើម្បីនិងកសាងជីវភាពរស់នៅរបស់យើងទេ អភិវឌ្ឍន៍ប្រទេសជាតិរបស់យើងទេ អញ្ចឹងហើយកត្តាគន្លឹះដើម្បីយើងមានការអភិវឌ្ឍន៍ នោះកត្តាសន្តិភាព ស្ថិរភាពនយោបាយ គឺជាកត្តាកំណត។ ទន្ទឹមនេះ សព្វថ្ងៃយើងដឹងទាំងអស់គ្នាថា ព្រះរាជាណាចក្រកម្ពុជាមានការរីកចម្រើនផ្នែកសេដ្ឋកិច្ចសង្គម ជីវភាពរស់នៅរបស់ប្រជាពលរដ្ឋ មានការប្រែប្រួល រីកចម្រើន ដែលស្ថិតក្នុងប្រទេសមានចំណូលមធ្យមកម្រិតទាប នេះជាមោទភាពរបស់យើងពីព្រោះថា ប្រសិនជាយើងគ្មានសន្តិភាពទេនោះមិនមានការអភិវឌ្ឍន៍បានឡើយ។

សម្តេចស ខេង មានប្រសាសន៍ រំលឹក និងសំណូមពរ ដល់ឯកឧត្តម អស់លោក លោកស្រី លោកឧកញ៉ា និងអង្គពិធីទាំងមូលយកចិត្តទុកដាក់រួមសាមគ្គីគ្នាជាធ្លុងមួយ ដើម្បីការពារនូវសន្តិភាពឲ្យបានដាច់ខាត បើទោះបីជាត្រូវលះបង់ដោយតម្លៃ ណាក៏ដោយ ពីព្រោះថា យើងបានឆ្លង កាត់ការលំបាក និងពុះពារឧបសគ្គច្រើនណាស់ ទំរាំតែទទួលបានសន្តិភាព ដូចសព្វថ្ងៃ។ យើងទាំងអស់គ្នាប្តេជ្ញារួមគ្នាត្រូវយកជ័យជំនះអោយបានពីរក្នុងពេលតែមួយ ជ័យជំនះទី១ ដែលយើងត្រូវការនោះ គឺជ័យជំនះសម្រាប់គណបក្សប្រជាជនឈ្នះឆ្នោត ជ័យជំនះទី២ គឺដោយសារគណបក្សយើង រដ្ឋាភិបាលយើងជាអ្នកគ្រប់គ្រង់ប្រទេស អញ្ចឹងហើយការចាត់តាំងការបោះឆ្នោត ដែលប្រព្រឹត្តទៅដោយសេរី ត្រឹមត្រូវ យុត្តិធម៌ គ្មានអំពើហិង្សា នោះក៏ជាជោគជ័យមួយទៀត របស់គណបក្សប្រជាជនផង ហើយរបស់ប្រទេសជាតិផង កិត្យានុភាពរបស់កម្ពុជានៅលើឆាកអន្តរជាតិវានិងលើកកម្ពស់ នៅពេលនោះឯង៕SRP

ខេត្តសៀមរាប៖ប៉ូលិសខេត្តសៀមរាប បានឲ្យដឹងថា៖ តាមការសាកសួរបំភ្លឺឈ្មោះហ៊ុន គីមហេង ភេទប្រុសអាយុ 14 ឆ្នាំទៅជាបងរបស់ឈ្មោះ ហ៑ុន វិសាលភេទប្រុសអាយុ 9ឆ្នាំ បានឆ្លើយបំភ្លឺថា៖ មិនមែនជាករណីចាប់ជំរិត ឬក៏ចាប់ចូលក្នុងឡានទេជាការគេចចេញពីផ្ទះ។ ដោយក្នុងថ្ងៃទី 12 ខែឧសភាឆ្នាំ 2022 ពេលព្រឹកឈ្មោះហ៊ុន គីមហេង បានបោកកូនជ្រូកបានប្រាក់ប្រាំបីម៉ឺនប្រាំពាន់រៀលនិងបានលក់កង់បានមួយម៉ឺនរៀល ទៅទិញសំបុត្ររថយន្តក្រុងដឹកអ្នកដំណើរឈ្មោះ សុ គាន់នៅមុខបុរីសៀងណាំទាំងពីរនាក់តម្លៃ 25000រៀល ជិះទៅក្រុងភ្នំពេញ ហើយចំពោះទូរស័ព្ទបានដោះស៊ីម ក្រវាត់ចោល មិនបានលក់ឬបាត់ទៅណាទេ។ ពេលដល់រាជធានីភ្នំពេញយប់ទីមួយ ក្នុងថ្ងៃទី 12 ខែឧសភាដេក នៅក្នុងវត្តមិនស្គាល់ឈ្មោះ។ -យប់ទី 2 ក្នុងថ្ងៃទី 13 ដេកនៅជិតរូបសំណាក់សម្ដេចតា ។ -យប់ទី 3 និងទី 4 ថ្ងៃទី១៤,១៥ ដេកនៅក្រោមស្ពានមិនស្គាល់ឈ្មោះ។ ចំពោះពេលថ្ងៃឈ្មោះហ៊ុន គីមហេង ដើររកសុំការងារគេធ្វើ។

សូមបញ្ជាក់មូលហេតុដែលគេចចេញពីផ្ទះដោយឈ្មោះហ៊ុន គីមហេង រៀនអត់ចេះហើយប្រលងធ្លាក់ខ្លាចឪពុកម្ដាយស្ដីបន្ទោសក៏នាំប្អូនគេចេញពីផ្ទះ។ ចំពោះ ការបំភ្លឺ មានការចូលរួម ពីឪពុកម្ដាយ និងលោកមេភូមិផងដែរ។

នេះបើយោងតាមរបាយការណ៍ដែលអង្គភាពសារព័ត៌មានសៀមរាបប៉ុស្តិ៍ ទទួលបានពីលោកភឹង ចិន្តារ៉េត ស្នងការរងខេត្តសៀមរាប ទទួលផែនព្រហ្មទណ្ឌ នៃស្នងការនគរបាលខេត្តសៀមរាប នៅយប់ថ្ងៃទី 16 ឧសភានេះ ឆ្នាំ២០២២នេះ។

សូមជម្រាបថា ក្មេងទាំងពីរនាក់ត្រូវបាន រកឃើញនៅព្រឹកថ្ងៃទី 16 ខែឧសភា វេលាម៉ោង 6:30 ព្រឹកនាទីនៅ ចំណុចកោះពេជ្រសង្កាត់ទន្លេបាសាក់ រាជធានីភ្នំពេញ ហើយផ្ទះបានមកដល់ខេត្តសៀមរាប ម៉ោង៤រសៀលថ្ងៃនេះ៕SRP

ខេត្តបាត់ដំបង៖សម្តេច ស ខេង បានថ្លែងថាទីណាមានការឈ្លានពាន មានការជិះជាន់ កាប់សម្លាប់ ទីនោះត្រូវ តែមាន ការតស៊ូ រើបម្រាស់ដាច់ខាត។

សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាអនុប្រធានសមាគមអតីតយុទ្ធជនកម្ពុជា មានប្រសាសន៍យ៉ាងដូច្នេះនៅថ្ងៃចន្ទ នេះ ក្នុងពិធីសំណេះសំណាល ជាមួយនិវត្តន៍ជនស៊ីវិលចំនួន១៦០៥នាក់ និងនិវត្តន៍ជនអតីតយុទ្ធជន ចំនួន ១៤៤៧នាក់ ខេត្តបាត់ដំបង។

សម្តេចស ខេង មានប្រសាសន៍ថា កម្ពុជាធ្លាប់បានឆ្លងកាត់នូវដំណាក់កាលបត់បែនជាប្រវត្តិសាស្ត្រជាច្រើន និងបានទទួលរងនូវមហាវិនាសកម្ម បំផ្លិចបំផ្លាញជាតិ ទុក្ខសោកដោយ អំពើរំលោភឈ្លានពានពីសំណាក់មជ្ឈដ្ឋានខាងក្រៅជាបន្តបន្ទាប់ ដោយ ឡែកក្នុងរបប០៣ឆ្នាំ ០៨ខែ និង២០ថ្ងៃ ប៉ុលពតបានធ្វើឱ្យកម្ពុជា វិនាសហិនហោច ខ្ទេចខ្ទី ទាំងសេដ្ឋកិច្ច សង្គមកិច្ច ទាំងវប្បធម៌ អរិយធម៌ ដែលជាដួងព្រលឹងរបស់ជាតិ ព្រមទាំងហេដ្ឋារចនាសម្ព័ន្ធនានា។ល។ ប្រជាជន កម្ពុជាគ្រប់ស្រទាប់វណ្ណៈ ត្រូវទទួលរងនូវទារុណកម្មលើសសត្វធាតុ បង្អត់អាហារ បង្ខំឱ្យធ្វើការជាទម្ងន់ទាំងថ្ងៃទាំងយប់ និងត្រូវបានកាប់សម្លាប់ យ៉ាងសាហាវព្រៃផ្សៃបំផុត ធ្វើឱ្យគ្រប់ ក្រុមគ្រួសារត្រូវរងទុក្ខ វិនាស បែកបាក់ ព្រាត់ប្រាស់ និងឈឺចាប់ខ្លោចផ្សារគ្មានអ្វីប្រៀបផ្ទឹម។ ការទទួលរងទុក្ខបុកម្នេញ កាប់សម្លាប់យ៉ាងសាហាវព្រៃផ្សៃនេះហើយ ទើបមានចលនា តស៊ូ រណសិរ្ស២ធ្នូ ១៩៧៨ បានចាប់បដិសន្ធិឡើង ដើម្បីផ្តួលរំលំរបបដ៏សែនយង់ឃ្នងនេះ តាមរយៈការធ្វើចលនាតស៊ូរំដោះជាតិ រំដោះអាយុជីវិតទាំងអស់នេះហើយ ដែលបានបន្សល់ទុកកេរមរតកដ៏ថ្លៃថ្ល ជាសច្ចធម៌ប្រវត្តិសាស្ត្រដ៏មានតម្លៃមិនអាចកាត់ថ្លៃបានសម្រាប់ប្រជាជាតិ និងប្រជាជនកម្ពុជាទាំងមូលនោះគឺថ្ងៃជ័យជំនះជាប្រវត្តិសាស្ត្រ ៧មករា ១៩៧៩ ដែលជាការបើកនូវទំព័រសករាជថ្មីនៃកម្ពុជា។ វិនាសកម្មដែល បន្សល់ពីរបបដ៏សាហាវ និងសង្គ្រាមអូសបន្លាយជិតពីរទសវត្សបានបន្សល់ ទុកនូវកុមារកំព្រា ស្ត្រីមេម៉ាយ ជនពិការ និងការបែកបាក់ ព្រាត់ប្រាស់គ្រួសារ ជាច្រើនរាប់មិនអស់។

សម្តេច បានលើកឡើងថា ពិតមែនតែប្រទេសជាតិត្រូវបានរំដោះ និងប្រជាជន បានរស់រានឡើងវិញក៏ដោយ ក៏ប្រទេសជាតិនាពេលនោះស្ថិតក្នុងស្ថានភាព មានសន្តិភាពផង និងសង្គ្រាមស៊ីវិលផង ដែលជាដំណាក់កាលត្រូវការពារស្តារ និងអភិវឌ្ឍន៍ជីវភាពរស់នៅ លើកកម្ពស់សិទ្ធិសេរីភាព ជូនប្រជាពលរដ្ឋ។

សម្តេច ស ខេង មានប្រសាសន៍បន្ថែមថា រាជរដ្ឋាភិបាលក្រោមការដឹកនាំប្រកបដោយគតិបណ្ឌិតរបស់ សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានដាក់ចេញនូវគោលនយោបាយឈ្នះ ឈ្នះ ១៩៩៨ ធ្វើឱ្យកម្ពុជាទាំងមូលបានឯកភាពទាំងស្រុង គ្រប់កម្លាំងប្រដាប់អាវុធ និងអតីតយុទ្ធជន នៃភាគីទាំងអស់នៅក្នុងជម្លោះបានធ្វើសមាហរណកម្មមក ក្រោមដំបូល រាជរដ្ឋាភិបាលកម្ពុជាតែមួយ ដែលជាមូលដ្ឋានគ្រឹះបង្កើតបាននូវ សុខសន្តិភាពមានស្ថិរភាពនយោបាយពេញលេញគ្របដណ្ដប់លើផ្ទៃប្រទេស ជាលក្ខណៈសម្បត្តិមូលដ្ឋាន សំខាន់បំផុត សម្រាប់បន្តការអភិវឌ្ឍលើគ្រប់វិស័យ និងបានបង្កលក្ខណៈឱ្យរាជរដ្ឋាភិបាល អនុវត្តគោលនយោបាយជាតិ ដើម្បីតបស្នងចំពោះគុណបំណាច់ដ៏ថ្លៃថ្លារបស់និវត្តន៍ជនស៊ីវិល និងនិវត្តន៍ជនអតីតយុទ្ធជន ដែលបានធ្វើពលិកម្មក្នុងបុព្វហេតុជាតិមាតុភូមិ និងប្រជាជន។

សម្តេចស ខេង បានគូសបញ្ជាក់ថា រាជរដ្ឋាភិបាល បានដាក់ចេញ និងអនុវត្តគោលនយោបាយលើកស្ទួយវិស័យ និវត្តជនស៊ីវិល និងនិវត្តន៍ជន អតីតយុទ្ធជន រួមមានៈការផ្តល់សម្បទានដីសង្គមកិច្ច, ការផ្តល់ប្រាក់បេឡាមរណៈសង្គ្រោះ, ការផ្តល់ប្រាក់ធានារ៉ាប់រងសង្គម, ប្រាក់បូជាសព និងប្រាក់ឧបត្ថម្ភមួយលើកដំបូង, ការបង្កើតមជ្ឈមណ្ឌលអភិវឌ្ឍន៍យោធិនពិការ, ការកសាងផ្ទះជូនអតីតយុទ្ធជននិងគ្រួសារអតីតយុទ្ធជនក្រីក្រ, គោលការណ៍ប្រឡងប្រណាំង ៣ល្អ, ការបង្កើតគណៈកម្មការអភិវឌ្ឍន៍សហគមន៍អតីត យុទ្ធជនតាមមូលដ្ឋាន, ការបង្កើតសមាគមមនុស្សចាស់សម្រាប់ប្រជាជនទូទៅ។

សម្តេច មានប្រសាសន៍បញ្ជាក់បន្តថា បងប្អូននិវត្តន៍ជន និងអតីតយុទ្ធជន ដែលបានមានវត្តមាននៅទីនេះក្តី មិនមានវត្តមាននៅទីនេះក្តី គឺសុទ្ធជាអ្នកដែលបានចូលរួមចំណែកដើម្បីបញ្ចប់សង្គ្រាម ឬក៏ថាដើម្បីទប់ស្កាត់ការវិលត្រឡប់មកវិញនៃរបបប្រល័យពូជសាសន៍ ហើយឈានទៅបញ្ចប់សង្គ្រាម តាមបន្ទាត់នយោបាយ ឬក៏តាមគោលការណ៍ ឆន្ទៈនយោបាយរបស់គណបក្សប្រជាជនកម្ពុជា។

សម្តេច បញ្ជាក់បន្ថែមថា ក្រោយពីរបបប្រល័យពូជសាសន៍ ប៉ុលពត ត្រូវបានដួលរលំ នៅឆ្នាំ១៩៧៩ កម្លាំងដែលនៅសេសសល់ បានទៅប្រមូលផ្តុំដើម្បីតស៊ូប្រឆាំងនិងរបបសាធារណៈរដ្ឋប្រជាមានិតកម្ពុជា ប៉ុនប៉ងនាំរបបប្រល័យពូជសាសន៍នេះវិលត្រឡប់មកវិញ បងប្អូននិវត្តន៍ និងអតីតយុទ្ធជន ទាំងអស់ដែលបានសម្រេចចិត្ត ដើម្បីចូលរួមតស៊ូ ក្នុងការទប់ស្កាត់ប្រឆាំង និងការវិលត្រឡប់មកវិញ នៃរបបប៉ុលពត របបប្រល័យពូជសាសន៍ ហើយនិងចូលរួមដើម្បីបញ្ចប់សង្គ្រាម កសាងសន្តិភាព នោះគឺជាការសម្រេចចិត្តដ៏ត្រឹមត្រូវហើយក៏បញ្ជាក់អំពីទឹកចិត្តឧត្តមគតិស្នេហាជាតិ ច្បាស់លាស់របស់បងប្អូន ហើយអាចនិយាយបានថាអ្វីៗ ដែលយើងមានសព្វថ្ងៃនេះគឺមិនបានកាត់ថ្លៃបាននូវគុណនូវសក្ការរបស់អស់លោក លោកស្រី ដែលជាមន្ត្រីចូលនិវត្តន៍ ហើយជាអតីតយុទ្ធជននោះទេ។

សម្តេច បន្តថា យើងប្រើពាក្យថាអតីយុទ្ធជន មានន័យថាបងប្អូនយុទ្ធជនខ្លះដែលគាត់មិនទាន់ចូលនិវត្តន៍ ប៉ុន្ដែដោយសារពិការ បាត់បង់ កាយសម្បទាវិជ្ជាជីវៈ អ៊ីចឹងហើយគាត់មិនអាច បន្តធ្វើជាយុទ្ធជនកងទ័ព ឬក៏ជានគរបាលបានទៀតទេ ត្រូវសម្រាក នេះហើយដែលយើងហៅថាអតីតយុទ្ធជន ប៉ុន្តែវាខុសពី យោធាចូលនិវត្តន៍ បានន័យថាគាត់នៅមានកាយសម្បទាគ្រប់គ្រាន់តែអាយុរបស់គាត់ដល់ឆ្នាំដែលត្រូវចូលនិវត្តន៍ មន្ត្រីរាជការស៊ីវិលក៏ដូចគ្នាដែរមានមន្ត្រីរាជការស៊ីវិលខ្លះដែលគាត់បាត់បង់សមត្ថភាពលកម្ម កាយសម្បទាវិជ្ជាជីវៈ ក៏សម្រាកមុនពេលចូលនិវត្តន៍ អ្នកមួយចំនួនទៀតចូលនិវត្តន៍ ប៉ុន្តែទាំងអស់នេះ រាជរដ្ឋាភិបាលដែលកើតចេញពីគណបក្សប្រជាជន គឺមិនបានបោះបង់ចោលទេ គឺបានយកចិត្តទុកដាក់ដើម្បីជួយសម្រាល នូវការលំបាកក្នុងជីវភាពបងប្អូនពីព្រោះថា នេះជាការនឹកគុណដល់អ្នកដែលបានចូលរួមចំណែក ក្នុងបុព្វហេតុជាតិ ចឹងហើយបានខ្ញុំបញ្ជាក់អម្បាញ់មិញថាសមិទ្ធផលដែលយើងមានថ្ងៃនេះគឺមិនអាច មិនរំឭកដល់គុណបំណាច់របស់អស់លោក លោកស្រីទាំងអស់នោះបានទេ នេះគឺជាសច្ចធម៌ជាក់ស្តែង អ៊ីចឹងហើយបានជាការឆ្លើយតប រាជរដ្ឋាភិបាល ដែលកើតចេញពីគណបក្សប្រជាជន ត្រូវតែយកចិត្ត ទុកដាក់ដើម្បីដោះស្រាយ កន្លងទៅ ក៏ដូចបច្ចុប្បន្ននេះ យើងមានគណៈកម្មការ ឬមានយន្តការនានាជាច្រើន ដើម្បីនឹងជួយដោះស្រាយបញ្ហានេះ ហើយហ្នឹងយើងបន្តធ្វើបញ្ហានេះ តទៅទៀត៕SRP

ខេត្តបាត់ដំបង៖ក្នុងពិធីសំណេះសំណាលសួរសុខទុក្ខ ជាមួយប្រជាពលរដ្ឋ ចំនួន៥៨២ គ្រួសារ ដែលរស់ក្នុងសង្កាត់អូរចារ ក្រុងបាត់ដំបង នៅផ្សារទំនើបភួ ពុយ នៅរសៀលថ្ងៃព្រហស្បតិ៍នេះ លោកសុខ លូ អភិបាលខេត្តបានថ្លែងប្រាប់ពលរដ្ឋថា៖ សម្រាប់ការបោះឆ្នោតក្រុមប្រឹក្សា ឃុំ សង្កាត់ នាពេលខាងមុខនេះ សូមប្រជាពលរដ្ឋទាំងអស់ ចូលរួមបោះឆ្នោតឲ្យបានគ្រប់ៗគ្នាចំពោះប្រជាពលរដ្ឋ គ្រប់អាយុបោះឆ្នោត ដើម្បីបំពេញតួនាទីក្នុងនាមជាប្រជាពលរដ្ឋគំរូសម្រាប់សង្គមជាតិ។លោក សុខ លូ បានមានប្រសាសន៍ផ្ដាំផ្ញើប្រជាពលរដ្ឋឲ្យថែរក្សាសុខភាព ដោយការរស់នៅស្អាត ហូបស្អាត និងផឹកស្អាត ព្រមទាំងរៀបចំសំអាតបរិស្ថាន សណ្ដាប់ធ្នាប់ជុំវិញផ្ទះសំបែងឲ្យបានស្អាតជានិច្ច។លោក ក៏បានធ្វើការអំពាវនាវដល់ប្រជាពលរដ្ឋទាំងអស់ ដែលបានចាក់វ៉ាក់សាំងកូវីដ-១៩ដូសទី៣ ឬដូសជំរុញ សូមរួសរាន់ទៅទទួលការចាក់វ៉ាក់សាំង។ លោកថាបើសិនជាបានចាក់វ៉ាក់សាំងកូវីដ-១៩ ដូសទី៣រយៈពេល៤-៥ខែហើយ សូមបន្តទទួលការចាក់វ៉ាក់សាំងកូវីដ-១៩ ដូសទី៤បន្តទៀត នៅតាមមណ្ឌលចាក់វ៉ាក់សាំងកូវីដ-១៩ ដែលនៅជិតផ្ទះប្រជាពលរដ្ឋរស់នៅ៕SRP

ខេត្តបាត់ដំបង៖លោក សុខ លូ បានថ្លែងណែនាំដល់ក្រុមការងារ រៀបចំការដាក់ទង់ជាតិ ទង់សាសនា និងរៀបចំប៉ាដាពាក្យស្លោក និងពុទ្ធឱវាទរបស់ព្រះពុទ្ធ នៅតាមទីសាធារណៈ ដើមឈើនានា នៅក្នុងក្រុង សម្រាប់ឲ្យពុទ្ធបរិស័ទមានការយល់ដឹងបន្ថែមទៀត អំពីពុទ្ធឱវាទទូន្មានល្អៗ របស់ព្រះពុទ្ធ ដែលបានប្រៀនប្រដៅដល់មនុស្សលោក។

លោក សុខ លូ ក៏បានមានប្រសាសន៍ណែនាំដល់ក្រុមការងារទាំងអស់ ត្រូវរៀបចំសមាសភាព សម្រាប់មន្ទីរអង្គភាពជុំវិញខេត្ត ចូលលរួមឲ្យបានច្បាស់លាស់ ដើម្បីងាយស្រួលរៀបចំក្បួនសម្រាប់ធ្វើការដង្ហែ និងត្រូវមានអ្នកទទួលខុសត្រូវតាមផែននីមួយៗ ក៏ដូចជាត្រូវមានការរៀបចំក្រុមគ្រូពេទ្យ និងរថយន្តគិលានសង្រ្គោះឲ្យបានហើយស្រេច ដើម្បីត្រៀមលក្ខណៈក្នុងការមានការសង្រ្គោះបឋម ពេលកំពុងដង្ហែរក្បួនវិសាខបូជា។

លោក បានមានប្រសាសន៍ ដល់ពុទ្ធបរិស័ទទាំងអស់ ដែលមានសទ្ធាជ្រះថ្លា ចង់ចូលរួមក្នុងពិធីបុណ្យវិសាខបូជា ដែលក្នុងនោះមានការដង្ហែក្បួន លោក ស្វាគមន៍ជានិច្ចដល់ពុទ្ធបរិស័ទដែលមានបំណងចូលរួមក្នុងពិធីនេះ ឲ្យកាន់តែមានភាពអធិកអធមក្រៃលែង ដែលឆ្នាំនេះ ជាឆ្នាំដំបូងក្នុងការដំណើរការហែក្បួនបុណ្យវិសាខបូជានេះ បន្ទាប់ពីមានការអាក់ខានអស់រយៈពេលជាង២ឆ្នាំ ដោយសារតែវិបត្តិជំងឺកូវីដ-១៩។ ដោយឡែកនៅឆ្នាំនេះ ដោយសារតែគោលនយោបាយ ចាក់វ៉ាក់សាំងកូវីដ-១៩ បានសម្រេចជោគជ័យ ស្របពេលដែលរាជរដ្ឋាភិបាលសម្រេច ឲ្យមានការរៀបចំពិធីបុណ្យធំៗផ្សេងៗទៀត ដែលអនុញ្ញាតដល់រដ្ឋបាលខេត្តបាត់ដំបង អាចដំណើរការរៀបចំពិធីបុណ្យវិសាខបូជា នាពេលខាងមុខនេះបាន។

លោក សុខ លូ អភិបាលខេត្តបាត់ដំបង មានប្រសាសន៍យ៉ាងដូច្នេះ នៅថ្ងៃព្រហស្បតិ៍នេះក្នុងឱកាសដឹកនាំកិច្ចប្រជុំពិភាក្សាការងារ ក្នុងការរៀបចំពិធីបុណ្យវិសាខបូជា និងដង្ហែក្បួនទៅតាមផែនទាំងបី ១.ផែនប្រសូត ២.ផែនត្រាស់ដឹង ៣.ផែនបរិនិព្វាន និងពិធីរាប់បាត្រព្រះសង្ឃចំនួន ១,០៦៦អង្គ ដែលនឹងធ្វើការរៀបចំនៅបរិវេណវត្តពោធិ៍វាល ក្រុងបាត់ដំបង ខេត្តបាត់ដំបង៕SRP

ខេត្តបាត់ដំបង៖លោកសុខ លូ អភិបាលខេត្តបាត់ដំបង បានថ្លែងអំពាវនាវ ដល់ប្រជាពលរដ្ឋទាំងអស់ ត្រូវចូលរួមទាំងអស់គ្នាក្នុងការគោរព និងអនុវត្តនូវគោលនយោបាយ ភូមិឃុំមានសុវត្ថិភាព ឲ្យបានម៉ឺងម៉ាត់។ លោកក៏បានប្រាន់អាជ្ញាធរមានសមត្ថកិច្ច ឲ្យធានានិងរក្សាបាននូវសុខសន្តិភាព សុវត្ថិភាព ក្នុងការថែរក្សាសន្តិសុខ សណ្តាប់ធ្នាប់សង្គម ក្នុងមូលដ្ឋានរបស់ខ្លួន កុំឲ្យកើតឡើងបានផងដេរ។ 

លោកសុខ លូ អភិបាលខេត្តបាត់ដំបង និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត

មានប្រសាសន៍បែបនេះ ក្នុងឱកាសលោកនិងលោកជំទាវ ព្រមទាំងមានការចូលរួមពីពាក់ព័ន្ធ អញ្ជើញសំណេះសំណាល សួរសុខទុក្ខ និងនាំយកអំណោយមនុស្សធម៌របស់សាខាកាកបាទក្រហមកម្ពុជា ផ្តល់ជូន ប្រជាពលរដ្ឋ ដែលងាយរងគ្រោះបំផុត ជនចាស់ជរាឥតទីពឹង ជនមានពិការភាព ស្ត្រីមេម៉ាយកូនច្រើនមានជីវភាពខ្វះខាតមកពីភូមិចំនួន ៣៥ភូមិនៃឃុំចំនួន៥ ក្នុងស្រុកឯកភ្នំ ខេត្តបាត់ដំបង  សរុបចំនួន ៣២០គ្រួសារ នៅថ្ងៃអង្គារ នេះ។

លោក ក៏បានបន្តអំពាវនាវដល់ប្រជាពលរដ្ឋ ឲ្យចូលរួមសហការជាមួយអាជ្ញាធរនិងសមត្ថកិច្ចពាក់ព័ន្ធ ក្នុងការរាយការណ៍ពេលជួបនឹងសកម្មភាពនានាពីការជួញដូរ ចែកចាយ និងប្រើប្រាស់គ្រឿងញៀន នៅតាមសហគមន៍ និងត្រូវបន្តការអប់រំកូនចៅ បុត្រា បុត្រីរបស់ខ្លួន គេចឲ្យឆ្ងាយអំពីគ្រឿងញៀន ដែលគ្រឿងញៀនជាឈ្លើងនៃសង្គម សង្គមមិនត្រូវការឡើយ។ ក្នុងនោះ សូមឱ្យប្រជាពលរដ្ឋចូលរួមបន្តអប់រំណែនាំកូនចៅរបស់ខ្លួនឱ្យបានជាប់ជាប្រចាំ ដើម្បីឱ្យពួកគេគោរពច្បាប់ចរាចរណ៍ ពិសេសក្នុងពេកបើកបរសូមកុំសេពគ្រឿងស្រវឹង ត្រូវពាក់មួកសុវត្ថិភាពរាល់ពេលបើកបរម៉ូតូ ទោះទៅណាជិតឬឆ្ងាយ និងពាក់ខ្សែក្រវ៉ាត់ឱ្យបានត្រឹមត្រូវពេលបើកបររថយន្ត ដើម្បីកាត់បន្ថយអត្រាគ្រោះថ្នាក់ចរាចរណ៍សម្រាប់ខ្លួនឯងនិងអ្នកដទៃ។

លោក សុខ លូ  នាំយកការផ្ដាំផ្ញើសួរសុខទុក្ខពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន  ប្រធានកាកបាទក្រហមកម្ពុជា  ដែលសម្ដេចតែងតែមានការគិតគូរដល់ប្រជាពលរដ្ឋគ្រប់ៗរូប ពិសេសប្រជាពលរដ្ឋងាយរងគ្រោះនានា ពីសុខទុក្ខ និងជីវភាពរស់នៅប្រចាំថ្ងៃ ជាពិសេសផ្ញើ នូវក្តីនឹករលឹកចំពោះលោកតាលោកយាយ បងប្អូនប្រជាពលរដ្ឋផងដែរ។ 

ឆ្លៀតក្នុងឱកាសនោះផងដែរដែរ

លោក សុខ លូ ក៏បានថ្លែងអំណរគុណយ៉ាងជ្រាលចំពោះសប្បុរសជនគ្រប់មជ្ឈដ្ឋាន  ជាពិសេស សម្តេចក្រឡាហោម  ស  ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបាត់ដំបង  ដែលបានបរិច្ចាគធនធានថវិកាប្រកបដោយទឹកចិត្តជ្រះថ្លាជូនកាកបាទក្រហមកម្ពុជា ក្នុងឱកាសទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ដើម្បីឱ្យសាខាកាកបាទក្រហមកម្ពុជាខេត្ត អាចចុះបំពេញប្រតិបត្តិការមនុស្សធម៌បានដូចនាពេលនេះ និងជាបន្តបន្ទាប់ទៀត។ 

លោក សុខ លូ ក៏រំលឹកដល់ប្រជាពលរដ្ឋទាំងអស់ ដែលមិនទាន់បានចាក់វ៉ាក់សាំងកូវីដ-១៩ ដូសជំរុគទី៣ ឬដូសជំរុញទី៤ សូមនាំគ្នារួសរាន់ចាក់ នៅតាមមណ្ឌលចាក់វ៉ាក់សាំងដែលនៅជិតភូមិ ឃុំរបស់ ប្រជាពលរដ្ឋរស់នៅ និងសូមកុំឲ្យមានការភ័យខ្លាចថាវ៉ាក់សាំងបង្កជាហានិភ័យដល់សុខភាព តាមរយៈការញ៉ុះញ៉ុងពីជនអគតិមួយចំនួន ដែលមិនចង់ឲ្យប្រទេសជាតិគេចផុតពីជំងឺកូវីដ-១៩ ព្រោះវ៉ាក់សាំង ជួយដល់ប្រជាពលរដ្ឋដែលមានសុខភាពខ្សោយ និងជួយពង្រឹងអង់ទីករបន្ថែមទៀត ដើម្បីឲ្យមានភាពស៊ាំក្នុងខ្លួនពីជំងឺកូវីដ-១៩។ 

សូមបញ្ជាក់ថា អំណោយដែលសាខាកាកបាទក្រហមកម្ពុជាខេត្ត ត្រូវបានផ្តល់ជូនដល់គ្រួសារនីមួយៗនូវ ៖ អង្ករ ២៥គីឡូក្រាម, មី ១កេស, ត្រីខ ១០កំប៉ុង, ទឹកបរិសុទ្ធ១កេស,ទឹកត្រី១យួរ ទឹកស៊ីអ៉ីវ១យួរ និងជែល១ដបផងដែរ៕SRP

ខេត្តបាត់ដំបង៖លោកសុខ លូ អភិបាលខេត្តបាត់ដំបង និងជាប្រធានគណៈកម្មាធិការសាខាកាកបាទក្រហមកម្ពុជាខេត្តបាត់ដំបង និងលោកជំទាវ និងក៏មានការអញ្ជើញចូលរួមពីឯកឧត្តម លោកជំទាវ លោក លោកស្រី គណៈកិត្តិយសសាខា គណៈកម្មាធិការសាខា អនុសាខា សប្បុរសជន នៅថ្ងៃសុក្រ នេះបានចុះសំណេះសំណាល សួរសុខទុក្ខ និងផ្ដល់ជូនអំណោយមនុស្សធម៌របស់សាខាកាកបាទក្រហមកម្ពុជា ផ្តល់ជូនប្រជាពលរដ្ឋដែលងាយរងគ្រោះបំផុត ចាស់ជរាឥតទីពឹង ជនមានពិការភាព ស្ត្រីមេម៉ាយកូនច្រើនមានជីវភាពខ្វះខាតចំនួន៦១០គ្រួសារ ក្នុងស្រុកចំនួន៣។

លោក សុខ លូ  បានសម្តែងនូវក្តីសប្បាយរីករាយ និបាននាំយកការផ្ដាំផ្ញើសួរសុខទុក្ខពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន  ប្រធានកាកបាទក្រហមកម្ពុជា ដែលផ្តាំផ្ញើសួរសុខទុក្ខ ដោយក្តីអាណិតស្រឡាញ់ និងតែងតែធ្វើការគិតគូរពីសុខទុក្ខ និងជីវភាពរស់នៅប្រចាំថ្ងៃ ព្រមទាំងបានផ្ញើនូវក្តីនឹករលឹកចំពោះលោកតាលោកយាយ បងប្អូនប្រជាពលរដ្ឋទាំងអស់ ដែលរស់នៅតំបន់ដាច់ស្រយាលនេះប្រកបដោយមនោសញ្ចេតនាដ៏ជ្រាលជ្រៅបំផុត។ 

លោក សុខ លូ បានអំពាវនាវដល់ប្រជាពលរដ្ឋទាំងអស់ សូមបន្តថែទាំសុខភាពឱ្យបានល្អ ពិសាទឹកដាំឆ្អិនល្អ មានអនាម័យ ក្នុងការរស់នៅ និងប្រុងប្រយ័ត្ន ចំពោះការប្រែប្រួល អាកាសធាតុ ដូចជាគ្រោះធម្មជាតិ ខ្យល់ព្យុះ ខ្យល់កន្ត្រាក់ រន្ទះបាញ់ជាដើម និងសូមបន្តចូលរួមទប់ស្កាត់ជំងឺកូវីដ-១៩ និងចូលរួមចាក់វ៉ាក់សាំងដូសទី៣ ឬដូសទី៤ ឱ្យបានគ្រប់ៗគ្នា ជាពិសេសត្រូវចេះសាមគ្គីគ្នា ស្រឡាញ់គ្នាដូចបងប្អូន កាត់បន្ថយអំពើហិង្សាក្នុងគ្រួសារ និងត្រូវថែរក្សាសន្តិភាពដែលបានមកយ៉ាងលំបាកឱ្យបានគង់វង្ស ។ លោកក៏បានបន្តអំពាវនាវដល់ប្រជាពលរដ្ឋទាំងអស់ចូលរួមសហការ ជាមួយអាជ្ញាធរមានសមត្ថកិច្ចពាក់ព័ន្ធ ក្នុងការរាយការណ៍ពេលជួបនឹងសកម្មភាពនានា ពីការជួញដូរ ចែកចាយ និងប្រើប្រាស់គ្រឿងញៀន នៅតាមសហគមន៍ ការចំណាកស្រុកខុសច្បាប់ ដើម្បីមានការអន្តរាគមន៍បង្រ្កាប បានទាន់ពេលវេលា ព្រមទាំងចូលរួមក្នុងការលុបបំបាត់ការប្រើប្រាស់ និងជួញដូរគ្រឿងញៀនខុសច្បាប់ ក្នុងនោះ បន្តអប់រំកូនចៅ របស់ខ្លួនឱ្យបានជាប់ជាប្រចាំ ដើម្បីឱ្យពួកគេគោរពច្បាប់ចរាចរណ៍ ពិសេសក្នុងពេកបើកបរសូមកុំសេពគ្រឿងស្រវឹង ត្រូវពាក់មួកសុវត្ថិភាពរាល់ពេលបើកបរម៉ូតូ ទោះទៅណាជិតឬឆ្ងាយ និងពាក់ខ្សែក្រវ៉ាត់ឱ្យបានត្រឹមត្រូវពេលបើកបររថយន្ត ដើម្បីកាត់បន្ថយអត្រាគ្រោះថ្នាក់ចរាចរណ៍សម្រាប់ខ្លួនឯងនិងអ្នកដទៃ។ 

លោកសុខ លូ  បានថ្លែងអំណរគុណយ៉ាងជ្រាលចំពោះសប្បុរសជនគ្រប់មជ្ឈដ្ឋាន ដែលបានបរិច្ចាគធនធានថវិកា ក៏ដូចជាសម្ភារៈមួយចំនួន ដល់សាខាកាកបាទក្រហមកម្ពុជា ប្រកបដោយទឹកចិត្តជ្រះថ្លា ក្នុងឱកាសទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ដើម្បីឱ្យសាខាកាកបាទក្រហមកម្ពុជាខេត្ត អាចចុះបំពេញប្រតិបត្តិការមនុស្សធម៌បានដូចនាពេលនេះ និងជាបន្តបន្ទាប់ទៀត។ 

សូមបញ្ជាក់ថាពិធីនេះរៀបចំឡើងនៅទីតាំងចំនួន៣កន្លែងផ្សេងគ្នារួមមាន៖ 

-ទីតាំងទី ១ នៅសាលាស្រុកកំរៀង មានចំនួន២០០គ្រួសារ។

– ទីតាំងទី២ នៅសាលាឃុំមានជ័យ នៃស្រុកសំឡូត មានចំនួន ២១០គ្រួសារ។

-ទីតាំងទី៣ នៅបរិវេណវត្តស្តៅខាងកើត ឃុំស្តៅ ស្រុករតនមណ្ឌល ចំនួន២០០គ្រួសារ ដោយ

គ្រួសារនីមួយៗនូវ ៖ អង្ករ ២៥គីឡូក្រាម, មី ១កេស, ត្រីខ ១០កំប៉ុង, ទឹកបរិសុទ្ធវីឃែរ១កេស,ទឺកត្រី១យួរ ទឹកស៊ីអ៊ីវ១យួរ និងជែល១ដបផងដែរ៕SRP