ខេត្តបាត់ដំបង

ខេត្តបាត់ដំបង៖ក្នុងឱកាសអញ្ជើញដឹកនាំកិច្ចប្រជុំស្ដីពីការបង្រ្កាបល្បែងស៊ីសងខុសច្បាប់ និងការរៀបចំសន្តិសុខសណ្ដាប់ធ្នាប់ ក្នុងភូមិសាស្រ្ដខេត្តបាត់ដំបង នៅថ្ងៃសុក្រ ម្សិលមិញ លោកសុខ លូ អភិបាលខេត្តបាត់ដំបង បានលើកឡើងអំពីការបើកអាជីវកម្ម ល្បែងតាម ប្រព័ន្ធ អនឡាញ នៅតាមបណ្ដាក្រុង ស្រុក ដែលគ្មានអាជ្ញាប័ណ្ណ អនុញ្ញាតត្រឹមត្រូវ។

អភិបាលខេត្តបាត់ដំបង បានដាក់បញ្ជាឱ្យរដ្ឋបាលក្រុងស្រុក អធិការក្រុងស្រុក ត្រូវធ្វើការបង្រ្កាបជាបន្ទាន់ នូវរាល់អាជីវកម្ម ដែលបង្កប់នូវល្បែងស៊ីសងខុសច្បាប់ ដោយមិនមានអាជ្ញាបណ្ណ ឬច្បាប់អនុញ្ញាត ឱ្យបានទាន់ពេលវេលា ព្រោះបញ្ហាល្បែងនេះ ក៏ជាមេរោគ ក្នុងសង្គមមួយដែលត្រូវធ្វើការព្យាបាល ដែលល្បែង នាំឱ្យបង្កជារឿង អសន្ដិសុខ ជាច្រើនដូចជាការលួចឆក់ប្លន់ អំពើហិង្សាជាដើម។

នៅសាលប្រជុំ B2 សាលាខេត្តបាត់ដំបង លោក សុខ លូ បានថ្លែងថា មិនត្រឹមតែការងារបង្រ្កាបល្បែងស៊ីសង តែមួយមុខទេ ក្នុងនោះក៏នៅតែមិនភ្លេច ក្នុងការបន្តចុះបង្រ្កាប ការជួញដូរ និងប្រើប្រាស់គ្រឿងញៀន ដែលជាបញ្ហាមួយក្នុងចំណោម បញ្ហា ដែលកើតមាននៅក្នុងសង្គម ត្រូវធ្វើការដោះស្រាយ គ្រឿងញៀន អាចប្រែក្លាយសង្គម អសន្ដិសុខ បង្កភាពភ័យខ្លាចដល់ប្រជាពលរដ្ឋ។

អភិបាលខេត្តបន្តទៀតថា ក្នុងនោះដែរ ក៏ត្រូវតែបន្តកិច្ចការងាររបស់ខ្លួន បន្ថែមទៀត ពាក់ព័ន្ធទៅនឹង សន្ដិសុខ សណ្ដាប់ធ្នាប់ ក្នុងភូមិសាស្រ្ដ របស់ខ្លួន ឱ្យកាន់តែល្អប្រសើរបន្ថែមទៀត ដើម្បីធានា នូវរាល់សុខសុវត្ថិភាព ក្នុងការរស់នៅរបស់ប្រជាពលរដ្ឋ នៅក្នុងភូមិសាស្រ្ដ របស់ខ្លួនផងដែរ៕

ខេត្តបាត់ដំបង៖បុរសម្នាក់ត្រូវបានសមត្ថកិច្ចចាប់ខ្លួន ករណីឃាតកម្មគិតទុកជាមុន សម្លាប់មនុស្សដោយប្រើអាវុធ(កាំបិតផ្គាក់)។

ករណីឃាតកម្មនេះកើតឡើង កាលពីថ្ងៃទី១៤ ខែកុម្ភៈ ឆ្នាំ២០២៤ វេលាម៉ោង២៣,០០នាទីយប់ នៅចំណុចភូមិព្រែកក្រូច ឃុំព្រែកនរិន្ទ ស្រុកឯកភ្នំ ខេត្តបាត់ដំបង។

ជនសង្ស័យ ឈ្មោះឃន ចំរើនហៅងិត ភេទប្រុស អាយុ៣០ឆ្នាំ រស់នៅក្រុមទី១៧ភូមិព្រែកតាច្រែង ឃុំព្រែកនរិន្ទ ស្រុកឯកភ្នំ ខេត្តបាត់ដំបង ជាមនុស្សប្រើប្រាស់គ្រឿងញៀន(បែកថ្នាំ)។

ជនរងគ្រោះឈ្មោះសោម មេសា ភេទប្រុស អាយុ១៦ឆ្នាំ រស់នៅក្រុមទី១៦ ភូមិព្រែកក្រូច ឃុំព្រែកនរិន្ទស្រុកឯកភ្នំខេត្តបាត់ដំបង។

ប្រភពបានរាយការណ៍ថា ខណ:ពេលជនរងគ្រោះ កំពុងអង្គុយលេងក្រោមផ្ទះ មិត្តភ័ក្រ្ត ត្រូវជនសង្ស័យ លបមកកាប់ត្រូវចំសៀតផ្កា លើត្រចៀកខាងឆ្វេង បណ្តាលឲ្យស្លាប់ភ្លាមៗនៅកន្លែងកើតហេតុ។

ក្រោយកើតហេតុកម្លាំងអធិការដ្ឋានបានស្រាវជ្រាវស៊ើបអង្កេត លុះដល់ថ្ងៃទី១៥ ខែកុម្ភៈ ឆ្នាំ២០២៤ វេលាម៉ោង៧និង៥០នាទីព្រឹក នៅចំណុចក្រុមទី១៧ ភូមិព្រែកតាច្រែង ឃុំព្រែកនរិន្ទ ស្រុកឯកភ្នំ ខេត្តបាត់ដំបង ផ្នែកព្រហ្មទណ្ឌ សហការជាមួយ អន្តរាគមន៏បានបើកប្រតិបត្តិការ ចុះបង្រ្កាប និងឃាត់ខ្លួនយកមកសាកសួរនៅអធិការដ្ឋាននគរបាលស្រុកឯកភ្នំ។

បច្ចុប្បន្នកម្លាំងអធិការដ្ឋានបាននឹងកំពុងរៀបចំកសាងសំណុំរឿង ដើម្បី ចាត់ការតាមនីតិវិធីច្បាប់៕

ខេត្តបាត់ដំបង៖ទីតាំងរោងចិញ្ចឹមមាន់មួយកន្លែងបានរងការឆាប់ឆេះទាំងស្រុង រួមទាំងទ្រព្យសម្បត្តិ មួយចំនួនទៀត គិតជាទឹកប្រាក់ខ្ទង់ 20 ម៉ឺនដុល្លារ។

ហេតុការណ៍បានកើតឡើង នៅថ្ងៃទី១៣ ខែកុម្ភៈ ឆ្នាំ២០២៤  វេលាម៉ោង០៤ ទៀបភ្លឺ នៅចំណុចក្រុមទី១៤ ភូមិបត់សាលា ឃុំឈើទាល ស្រុកបាណន់។

របាយការណ៍របស់សមត្ថកិច្ច បានបង្ហាញថា ករណីអគ្គីភ័យនេះ បានឆេះរោងកសិដ្ឋានចិញ្ចឹមមាន់ របស់ឈ្មោះឌិប ផាឌីន ភេទប្រុសអាយុ ៤២ ឆ្នាំ។

របាយការណ៍បានបន្តថា ក្នុងហេតុការណ៍នេះ បណ្ដាលឱ្យ សម្ភារៈខូចខាត
-ឆេះរថយន្តចំនួន០២គ្រឿង
-ម៉ូតូចំនួន០៣គ្រឿង
-រោងមាន់ធ្វើអំពីឈើប្រក់សង្ក័សី ចំនួន០២ខ្នង ០៨គុណ៦០ម៉ែត្រ
-រោងឡានចំនួន០១ខ្នង១៥ម៉ែត្រគុណ១២ម៉ែត្រ។
-មាន់ពីរោង១២.០០០ក្បាល និងសម្ភារៈប្រេីប្រាស់មួយចំនួនធំ សរុបការខូចខាតគិតជាទឹកប្រាក់ប្រហែល ២០ ម៉ឺនដុល្លាអាមេរិក។ មូលហេតុ បណ្ដាលមកពីឆេះប្រពន័្ធហ្គាសកំដៅមាន់។ ករណីនេះបានប្រើប្រាស់ឡានទឹកចំនួន៤គ្រឿងទើបគ្រប់គ្រងបាន១០០%៕

លោកសុខ លូ អភិបាលខេត្តបាត់ដំបង និងជាប្រធានគណៈកម្មាធិការសាខាកាកបាទក្រហមកម្ពុជា ខេត្តបាត់ដំបង ព្រមទាំងសហការី នៅថ្ងៃពុធ ថ្ងៃទី២៤ ខែមករា ឆ្នាំ២០២៤ បានអញ្ជើញប្រគល់ផ្ទះមួយខ្នង ជូនគ្រួសារកុមារី ងាយរងគ្រោះ ឈ្មោះ អ៊ីម ស៊ីឃាង អាយុ១៤ឆ្នាំ ជាសិស្សថ្នាក់ទី៧ ដែលមានលោកពុក ឈ្មោះ ចក់ អ៊ីម អាយុ៤៤ឆ្នាំ ម្តាយឈ្មោះហោ ណារ៉ា អាយុ៣៦ឆ្នាំ កំពុងព្យាបាលជំងឺសតិអារម្មណ៍ មានកូន៣នាក់ក្មួយស្រី ជាកូនទី២ក្នុងចំណោមបងប្អូន ទាំង៣ ព្រមទាំងនាំយកអំណោយដល់គ្រួសារ ដែលងាយរងគ្រោះ ស្ថិតនៅភូមិបឹងទឹម ឃុំតាប៉ុន ស្រុកសង្កែ ខេត្តបាត់ដំបងផងដែរ។

លោកសុខ លូ បាននាំនូវប្រសាសន៍របស់សម្តេចកិត្តិព្រឹទ្ធ បណ្ឌិត ប៊ុន រ៉ានី ហ៊ុនសែន ដែលផ្តាំផ្ញើសួរសុខទុក្ខ ក្តីអាណិតអាសូរ និងការគិតគូរពីជីវភាពរស់នៅរបស់គ្រួសារ កុមារី អ៊ីម ស៊ីឃាង និងប្រជាពលរដ្ឋដែលងាយរងគ្រោះនាពេលនេះ។

លោកក៏បានក្រើនរម្លឹកដល់ក្រុមគ្រួសារ និងប្រជាពលរដ្ឋ ទាំងអស់សូមថែរក្សាសុខភាពខ្លួន ប្រសិនបើបងប្អូន និងកូនមានជំងឺ និងគ្រោះថ្នាក់ផ្សេងៗ សូមប្រញាប់បញ្ជូន ទៅមណ្ឌលសុខភាព ដែលនៅជិតបំផុត ជាសំខាន់នោះចំពោះសុខភាពកុមារ និងស្ត្រីមានផ្ទៃពោះ ព្រមទាំងមានការប្រុងប្រយ័ត្នចំពោះកុមារតូចៗ ដើមី្បជៀសវាងកើតឡើងនូវប្រការអាក្រក់ណាមួយ ចំពោះ ក្រុមគ្រួសារបងប្អូន និងធ្វើអនាម័យ បរិស្ថាននៅជុំវិញលំនៅដ្ឋាន និង បំបាត់ទីជម្រកមូសខ្លា ដែលជាភ្នាក់ងារជំងឺគ្រុនឈាម មកលើកុមារ ក៏ដូចមនុស្សគ្រប់វ័យផងដែរ ហើយសូមកុំទុកដីឱ្យនៅទំនេរចោល ដោយត្រូវដាំដំណាំជុំវិញផ្ទះធម្មជាតិ ដែលអាចជួយកាត់បន្ថយការចំណាយផ្សេងៗផងដែរ។

សូមបញ្ជាក់ថា ផ្ទះខាងលើខ្នងនេះ មានទំហំ ៤.៤០ម៉ែត្រ x ៦ម៉ែត្រ ជញ្ជាំងស៊ីម៉ង់តិ៍ ក្រាលការ៉ូ ដំបូលប្រក់សង្ក័សី មានបន្ទប់ទឹកមួយក្រោយផ្ទះតយ៉ាបខាងមុខ២.៥ម៉ត្រ ដោចំណាយថវិកាក្នុងការសាងសង់សរុប ៥.៥៥០ដុល្លារ (ប្រាំពាន់ប្រាំរយហាសិបដុល្លារអាមេរិកគត់)។

ក្នុងនោះដើម្បីជួយសម្រាលដល់ជីវភាព រស់នៅ សាខាកាកបាទក្រហមកម្ពុជាខេត្ត បានផ្តល់ជូន អំណោយជូនដល់ក្រុមគ្រួសារកុមារ អ៊ីម ស៊ីឃាង រួមមាន ៖ អង្ករ ១០០គីឡូក្រាម, មី៥កេស,ទឹកត្រី ៥យួរ ទឹកស៊ីអ៊ីវ៥យួរ ត្រីខ៥០កំប៉ុង, ឈុតគ្រឿងចានឆ្នាំង និងថវិកាមួយចំនួន។ ដោយឡែកសាខាកាកបាទក្រហមកម្ពុជាខេត្តបាត់ដំបង ក៏បានផ្ដល់អំណោយដល់ប្រជាពលរដ្ឋក្រីក្រ ដែលរស់នៅជិតខាងចំនួន ៥០គ្រួសារ ក្នុងដោយក្នុងមួយគ្រួសារទទួលបាន អង្ករ ២៥គីឡូក្រាម មី១កេស ត្រីខ១យួរទឹកស៊ីអ៊ីវ១យួរ ទឹក ទឹកបរិសុទ្ធ១កេស និងថវិកាមួយចំនួនផងដែរ៕

លោកសុខ លូ អភិបាលខេត្តបាត់ដំបង បានថ្លែងថា ពាក់ព័ន្ធនឹងសន្ដិសុខសណ្ដាប់ធ្នាប់ ក្នុងខេត្តបាត់ដំបងថាមួយរយ:ក្រោយ ល្បែងភ្នាល់ ល្បែងស៊ីសង ល្បែងពាណិជ្ជកម្ម ទាំងដែលបានចុះបញ្ជី និងមិនបានចុះបញ្ជី គឺមានការកើតឡើងដែលមិនស្របតាមច្បាប់ជាច្រើនករណី ដូចនេះអាជា្ញធរមានសមត្ថកិច្ច ត្រូវត្រួតពិនិត្យលើបញ្ហា អាជ្ញាបណ្ណ និងទីតាំងឱ្យបានច្បាស់លាស់ ស្របតាមច្បាប់ ក៏ដូចជាមានលិខិតបទដ្ឋាន របស់ ក្រសួងសេដ្ឋកិច្ច និងហិរញ្ញវត្ថុ និងត្រួតពិនិត្យលើបញ្ហានេះ ឲ្យហ្មតចត់ឡើងវិញ ព្រោះល្បែងពាណិជ្ជកម្ម ដែលមិនបានចុះបញ្ជីនេះ បានជ្រាប និងរីកសាយភាយនៅតាមភូមិស្រុកនីមួយៗ ជាពិសេសនៅក្នុងទីប្រជុំជន ដែលអាចមាននៅតាមហាងលក់អាហា រ កាហ្វេ និងភេសជ្ជៈជាដើម ហើយអាជ្ញាធរមានសមត្ថកិច្ច ត្រូវទទួលខុសត្រូវ លើដែនសមត្ថកិច្ចរបស់ខ្លួន ត្រូវស្រាវជ្រាវទៅលើល្បែងភ្នាល់ ព្រមទាំងល្បែងផ្សងសំណាង ផ្សេងៗ ព្រោះឥឡូវនេះ បច្ចេកវិទ្យកាន់តែទំនើប ការបង្កភាពអាណាធិបតេយ្យ ក៏កាន់តែច្រើនឡើងដូចគ្នា។

អញ្ជើញដឹកនាំកិច្ចប្រជុំប្រចាំខែរបស់រដ្ឋបាលខេត្តបាត់ដំបង នៅរសៀលថ្ងៃអង្គារ ទី២៣ ខែមករា ឆ្នាំ២០២៤ លោកសុខ លូ បានលើកឡើងថា បច្ចុប្បន្ន្ននេះយើងត្រូវបន្តយកចិត្តទុកដាក់ទៅលើគ្រឿងញៀន ដែលជាបញ្ហាធំចម្បង ព្រោះវាជាបញ្ហាស្មុគស្មាញ ក្នុងការទប់ស្កាត់ ក៏ដូចជាត្រូវលុបបំបាត់ផងដែរ។

លោកសុខ លូ បន្តថា អាជ្ញាធរមានសមត្ថកិច្ចត្រូវបន្តស្រាវជ្រាវ និងបង្ក្រាបឲ្យបានទាន់ពេលវេលា ដោយឡែកចំពោះ អ្នកញៀនគ្រឿងញៀន ត្រូវធ្វើការបន្សាបគ្រឿងញៀន នៅឯមជ្ឍមណ្ឌលបន្សាបគ្រឿងញៀន ដោយត្រូវបង្រៀនចំណេះ ជំនាញបច្ចេកទេសផ្សេងៗដល់ពួកគាត់ ឱ្យមានចំណេះជំនាញជាក់លាក់មួយ ដែលអាចប្រកបមុខរបរចិញ្ចឹមជីវិតបាន។

នៅឯសាលប្រជុំB២ សាលាខេត្តបាត់ដំបង សុខ លូ បញ្ជាក់បន្ថែមទៀតថា ក្រៅពីនោះបទល្មើសនេសាទក្នុងតំបន់អភិរក្ស និងសត្វព្រៃក្នុងតំបន់ព្រៃអភិរក្ស ក៏យើងត្រូវបន្តយកចិត្តទុកដាក់ផងដែរ ព្រោះនេះគឺជាធនធានធម្មជាតិ ដែលបន្សល់ទុក ឱ្យយើងជាអ្នកថែរក្សាមើលការខុសត្រូវ ហើយក៏ជាផ្នែកមួយដែលអាចទាក់ទាញភ្ញៀវទេសចរជាតិ និងអន្តរជាតិឲ្យចូលមកទស្សនាក្នុងតំបន់នោះផងដែរ ប្រសិនបើយើងធ្វើឲ្យមានការខូចខាត ឬបំផ្លាញទៅលើតំបន់ជម្រកធម្មជាតិទាំងអស់នោះ ឲ្យបាត់បង់កន្លែងទាក់ទាញទេសចរណ៍ ឲ្យចូលមកទស្សនានៅក្នុងតំបន់នោះ ដែលអាចធ្វើឲ្យប៉ះពាល់ដល់សេដ្ឋកិច្ច ក៏ដូចជាជីវភាពរស់នៅប្រចាំថ្ងៃរបស់ប្រជាជនទាំងមូលក្នុងសហគមន៍ផងដែរ៕