ភ្នំពេញ៖ជនសង្ស័យចំនួន៥នាក់ ត្រូវបាន
កម្លាំងនាយកដ្ឋាននគរបាលព្រហ្មទណ្ឌ បំបែកករណីលួចមានស្ថានទម្ងន់ទោស (គាស់ទូកុងទីន័រ) នៅចំណុចភូមិឃ្មួញ សង្កាត់ឃ្មួញ ខណ្ឌសែនសុខ រាជធានីភ្នំពេញ។

នគរបាលនាយកដ្ឋាននគរបាលព្រហ្មទណ្ឌ បានអះអាងថា កាលពីថ្ងៃទី២៥ ខែមិថុនាឆ្នាំ ២០២៣ វេលាប្រហែលម៉ោង០២រំលងអាធ្រាត មានជនសង្ស័យមួយក្រុម (មើលតាមកាមេរាសុវត្ថិភាព) បានធ្វើសកម្មភាពគាស់ ទំលុះទម្លាយកុងតឺន័រ ដែលចតទុកនៅក្នុងឃ្លាំងស្ថិតនៅភូមិឃ្មួញ លួចយកខ្សែភ្លើងបង្គុំតប្រព័ន្ធភ្លើងរថយន្ត ហើយគេចខ្លួនបាត់។ ក្រោយពីទទួលបានព័ត៌មាន កម្លាំងជំនាញរបស់នាយកដ្ឋាននគរបាលព្រហ្មទណ្ឌ បានធ្វើការស្រាវជ្រាវ និងកំណត់បានទីតាំងលាក់ខ្លួនរបស់ជនសង្ស័យ រហូតនៅថ្ងៃទី០៨ ខែកញ្ញា ឆ្នាំ២០២៣ កម្លាំងជំនាញរបស់នាយកដ្ឋាននគរបាលព្រហ្មទណ្ឌ បានដឹកនាំសហការជាមួយជំនាញអធិការដ្ឋាននគរបាលខណ្ឌសែនសុខ ធ្វើការឃាត់ខ្លួនជនសង្ស័យបានចំនួន០៥នាក់ រួមមាន៖

ទី១៖ឈ្មោះ នួន ឈុនលាង ភេទប្រុស អាយុ៣៨ឆ្នាំ, ទី២៖ឈ្មោះ សែ គន្ធា ភេទប្រុស អាយុ៤៥ឆ្នាំ, ទី៣៖ឈ្មោះ សុខ វណ្ណា ភេទប្រុស អាយុ៣៤ឆ្នាំ, ទី៤៖ឈ្មោះ អែម សំអុល ភេទប្រុស អាយុ៣៨ឆ្នាំ, ទី៥៖ឈ្មោះ ហេង ប៊ុនស ភេទប្រុស អាយុ៤៥ឆ្នាំ។

បច្ចុប្បន្នជនសង្ស័យ ត្រូវបាននាយកដ្ឋាននគរបាលព្រហ្មទណ្ឌ បានប្រគល់ឲ្យទៅអធិការដ្ឋានដ្ឋាននគរបាលខណ្ឌសែនសុខ ជាម្ចាស់ករណីដើម្បីចាត់ការបន្តតាមនីតិវិធី។

សូមជម្រាបថាប្រតិបត្តិការជាបន្ដបន្ទាប់នេះ ធ្វើឡើងដោយអនុវត្តតាមបទបញ្ជា របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ, អគ្គស្នងការរងទទួលផែន, ប្រធាននាយកដ្ឋានកណ្ដាលនគរបាលយុត្តិធម៌ និងបញ្ជារបស់ឯកឧត្តម ឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ និងបង្ក្រាបដឹកនាំដោយលោកឧត្តមសេនីយ៍ត្រី ហ៊ុន មុន្នីរ័ត្ន លោកវរសេនីយ៍ឯក ហែម បូណា អនុប្រធាននាយកដ្ឋាននគរបាលព្រហ្មទណ្ឌ បានដឹកនាំកម្លាំងជំនាញរបស់នាយកដ្ឋាននគរបាលព្រហ្មទណ្ឌ សហការជាមួយកម្លាំងអធិការដ្ឋាននគរបាលខណ្ឌសែនសុខ និងអធិការដ្ឋាននគរបាលស្រុកកណ្តាលត្រាំកក់៕

ខេត្តរតនគិរី៖សមត្ថកិច្ចបានចាប់ខ្លួនជនសង្ស័យម្នាក់ ក្រោយបានប្រើពូថៅ កាប់ទៅលើមិត្តភក្តិរបស់ខ្លួន ក្នុងពេលផឹកស៊ី។

ហេតុការណ៍នេះបង្កឲ្យមានការភ្ញាក់ផ្អើល ឆោឡោឡើងនៅម៉ោង៨ព្រឹក ថ្ងៃទី០៧ ខែកញ្ញាឆ្នាំ២០២៣ នៅភូមិ១ ឃុំត្រពាំងក្រហម ស្រុកកូនមុំ ខេត្តរតនគិរី។

សមត្ថកិច្ចបានស្រង់សម្ដីប្រពន្ធជនរងគ្រោះ ថា នៅល្ងាចថ្ងៃទី០៦ ខែកញ្ញា ឆ្នាំ២០២៣ ប្តីគាត់បានសុំទៅផឹកសុី ដោយបាត់មួយយប់ លុះព្រឹកឡើងម៉ោង០៨ គាត់ជាប្រពន្ធ បានតាមរកក៏ប្រទះឃើញសព ប្ដីដេកស្លាប់នៅក្នុងចម្ការដំឡូងក្រោយផ្ទះមិត្តភក្តិ ទៅហើយដោយមានស្នាមរបួសត្រង់ថ្គាម។

សមត្ថកិច្ចបន្តថា ជនរងគ្រោះឈ្មោះ សឿន ប៉េងហោង ហៅទូចភេទប្រុសអាយុ៣៥ឆ្នាំ ជនជាតិខ្មែរ រស់នៅភូមិ១ឃុំត្រពាំងក្រហម ស្រុកកូនមុំ ខេត្តរតនគិរី។ ជនសង្ស័យ ឈ្មោះ ណុប ណាវីត ហៅប៉េស ភេទប្រុសអាយុ២៥ឆ្នាំ ពួកគេជាកសិករ មានរស់នៅភូមិជាមួយគ្នា។

ករណីនេះសមត្ថកិច្ច បានធ្វើការពីនិត្យឃើញលើសាកសព ជនរងគ្រោះ ត្រូវរងការកាប់មួយពូថៅចំថ្គាមខាងឆ្វេង ស្លាប់នៅមុខផ្ទះជនសង្ស័យ ឃើញមានស្នាមអូសសព ទៅចោលក្នុងចម្ការដំឡូងខាងក្រោយផ្ទះប្រហែល៣០ម៉ែត្រ។ ពេលសមត្ថកិច្ចទៅដល់ជនសង្ស័យ បានកាន់ពូថៅមួយជាប់នៅដៃ រួចក្រវីចុះក្រវីឡើង មិនឲ្យចូលទៅក្បែរសាកសួរជុំវិញឃាតកម្មមនុស្សស្លាប់ នៅខាងក្រោយផ្ទះខ្លួននោះទេ។

ហេតុការណ៍នេះកម្លាំងកងរាជអាវុធហត្ថស្រុក សហការជាមួយនគរបាលស្រុកកូនមុំ បានព្យាយាមចូលទៅចាប់ខ្លួនជនសង្ស័យ នោះបានភ្លាមៗនិងស្រាវជ្រាវ រកអ្នកពាក់ព័ន្ធបញ្ជូន ទៅអធិការស្រុកកសាងសំណុំរឿងបញ្ជូនខ្លួនទៅតុលាការ ចាត់ការតាមនិតិវិធីច្បាប់។

បើតាម ឈ្មោះ ព្រឹប ដែលបានចូលរួមផឹកសុី បានប្រាប់សមត្ថកិច្ចថា មុនកើតហេតុម៉ោង ៤រសៀលជនរងគ្រោះ បានជិះម៉ូតូទៅផ្ទះគាត់ (ព្រឹប) ហើយបានជួបជុំគ្នាពីរបីនាក់ ផឹកសុីលុះដល់ម៉ោង៥ល្ងាច ក៏សុំទៅផ្ទះមុន ជិះម៉ូតូម្នាក់ឯងកាត់មុខផ្ទះជនសង្ស័យខាងលើ។

ជនរងគ្រោះ មិនបានទៅដល់ផ្ទះនោះទេ លុះព្រឹកឡើង ប្រពន្ធឆោឡោ ដើសួរគេឯង រកប្ដីគ្រប់ច្រកល្ហកហើយមានគេប្រាប់ថា យប់មុិញឃើញទៅជួបជុំផឹកសុីនៅចំណុចភូមិកើតហេតុ។ ពេលនោះប្រពន្ធជនរងគ្រោះ បានទៅដល់កន្លែងផឹកសុី ក៏ប្រទះឃើញសពប្ដីដេកស្លាប់ស្ដូកស្ដឹងក្នុងចម្ការដំឡូងរបស់ជនសង្ស័យឈ្មោះណុប ណាវីត រួចក៏រាយការណ៍ប្រាប់សមត្ថកិច្ចតែម្ដង៕

រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ លោកឌិត ទីណា បានអះអាងថា តម្លៃស្រូវនៅខេត្តបាត់ដំបង ហាក់មានតម្លៃខ្ពស់។

រដ្ឋមន្ត្រីក្រសួងកសិកម្ម លោកឌិត ទីណា បានអះអាងតាមបណ្ដាញសង្គមថា ៖ ថ្លៃស្រូវនៅបាត់ដំបង ជាក់ស្តែង ធៀបនឹងចលនាបំភ្លៃលើបណ្ដាញសង្គម។

រដ្ឋមន្ត្រីបន្តថា ស្រូវបានឡើងថ្លៃខ្ពស់ ហើយក៏បានចុះមកវិញ តែនៅតែជាតម្លៃខ្ពស់សម្រាប់ស្រូវស្រង៉ែ សមរម្យ ជូនកសិករមានប្រាក់ចំណេញ។ លោកថាទៅមុខ ស្រូវពូជសែនក្រអូប និងផ្ការំដួលរបស់ខ្មែរយើង នឹងទទួលការគាំទ្រខ្ពស់ ពីគោលនយោបាយពូជសុទ្ធ។

ជាមួយគ្នានេះ អ្នកនាំពាក្យក្រសួងកសិកម្ម លោកឃឹម ហ្វីណង់ ក៏បានបញ្ជាក់ផងដែរថា ៖ ថ្លៃស្រូវខែនេះ ឆ្នាំនេះ ថ្លៃជាងថ្លៃស្រូវខែនេះឆ្នាំមុន និងឆ្នាំណាៗទាំងអស់ ក្នុងរយៈពេល៣០ឆ្នាំចុងក្រោយនេះ។ សូម្បីតែថ្លៃជីឆ្នាំនេះ ក៏ថោកជាងឆ្នាំ២០២១ និង២០២២ដែរ។

អ្នកនាំពាក្យបន្តថា នេះគឺជាទិន្នន័យជាក់ស្តែង ចេញពីសហព័ន្ធស្រូវអង្ករកម្ពុជា។ សង្ឃឹមថាបងប្អូនប្រជាពលរដ្ឋ ដែលមិនស្ថិត នៅក្នុងវិស័យកសិកម្មនឹងអាចទទួលបានព័ត៌មានពិត ពីឯកឧត្តមរដ្ឋមន្ត្រី៕

ភ្នំពេញ៖នាយករដ្ឋមន្ត្រីកម្ពុជា សម្ដេចធិបតីហ៊ុន ម៉ាណែត បានបញ្ជាឲ្យអគ្គ​ស្នងការ​នគរបាល​ជាតិ​ ពិនិត្យ​ស្រាវជ្រាវ​ ករណី​តែងតាំង​មេប៉ុស្តិ៍​ហាក់បីមិន​ប្រក្រតី​។

តាមរយៈទំពកហ្វេសប៊ុកផ្លូវការ នៅ​ព្រឹក​ថ្ងៃទី​ ១០​ ខែ​ កញ្ញា​ ឆ្នាំ​ ២០២៣​ នេះ ​សម្ដេច​ធិបតី​ ហ៊ុន​ ម៉ាណែត​ បានសរសេរថា៖
ក្រោយពីបានទទួលព័ត៌មាន តាមប្រភពផ្សេងៗរួមទាំងប្រព័ន្ធផ្សព្វផ្សាយសង្គម ពាក់ព័ន្ធនឹងការតែងតាំង បុគ្គលម្នាក់ធ្វើជាមេប៉ុស្តិ៍នៅឃុំសំព្រោជ ស្រុកស្ទោង ខេត្តកំពង់ធំ ដែលធ្លាប់មានប្រវត្តិប្រព្រឹត្តបទឧក្រិដ្ឋ ខ្ញុំបានចេញបទបញ្ជាភ្លាមទៅ ឯកឧត្តម ស ថេត អគ្គស្នងការនគរបាលជាតិ ឱ្យពិនិត្យ ស្រាវជ្រាវជាមួយ ឯកឧត្តម ម៉ែន លី ស្នងការនគរបាលខេត្តកំពង់ធំ ជាបន្ទាន់។ ក្នុងករណីជារឿងពិត ត្រូវធ្វើការកែសម្រួលភ្លាម។

សម្ដេចនាយករដ្ឋមន្ត្រី បន្តថាខ្ញុំសូមឱ្យមានការត្រួតពិនិត្យនិងវាយតម្លៃ ឲ្យបានច្បាស់លាស់ នូវបុគ្គលិកលក្ខណៈ របស់បុគ្គលនីមួយៗ ឲ្យបានហ្មត់ចត់ មុននឹងធ្វើការតែងតាំង នៅតាមបណ្ដាស្ថាប័នរដ្ឋទាំងស៊ីវិល និងកងកម្លាំងប្រដាប់អាវុធ ទាំងថ្នាក់ជាតិនិងក្រោមជាតិ៕

ភ្នំពេញ៖ឯកឧត្តម មីហ្គែល ឌីយ៉ាស-ខាណែល ប៊ឺមូដេស (Miguel Diaz-Canel Bermudez) ប្រធានាធិបតី នៃសាធារណរដ្ឋគុយបា បានអញ្ជើញ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ធ្វើទស្សនកិច្ចផ្លូវការ នៅ សាធារណរដ្ឋគុយបា ក្នុងពេលសមស្របណាមួយ។ សម្តេច ហ៊ុន ម៉ាណែត បានថ្លែងអំណរគុណ និងបានគូសបញ្ជាក់ថា សាធារណរដ្ឋគុយបា ជាប្រទេសដែល សម្តេចធិបតី មានបំណងចង់អញ្ជើញទៅ ហើយ សម្តេចធិបតី នឹងកំណត់ពេលវេលាសមស្របណាមួយ ក្នុងពេលឆាប់ខាងមុខ។

ការអញ្ជើញធ្វើឡើងក្នុងជំនួបពិភាក្សាការងារតាមទូរស័ព្ទរវាង សម្តេច ហ៊ុន ម៉ាណែត និង ឯកឧត្តម មីហ្គែល ឌីយ៉ាស-ខាណែល ប៊ឺមូដេស។

នៅខុទ្ទកាល័យនាយករដ្ឋមន្ត្រី ក្រុងតាខ្មៅ
នាល្ងាច ថ្ងៃទី៩ ខែកញ្ញា ឆ្នាំ២០២៣
សម្តេចធិបតី ហ៊ុន ម៉ាណែត បានជួបពិភាក្សាការងារតាមទូរស័ព្ទ ជាមួយ ឯកឧត្តម មីហ្គែល ឌីយ៉ាស-ខាណែល ប៊ឺមូដេស ស្របពេលដែលចំណងមិត្តភាព និងកិច្ចសហប្រតិបត្តិការរវាងប្រទេសទាំងពីរ កាន់តែត្រូវបានពង្រឹង និងលើកកម្ពស់ ក្នុងរយៈកាលប៉ុន្មានឆ្នាំចុងក្រោយនេះ ដូចដែលឆ្លុះបញ្ចាំងតាមរយៈ ការផ្លាស់ប្តូរទស្សនកិច្ច និងការជួបពិភាក្សាការងារ ជាញឹកញាប់ រវាងថ្នាក់ដឹកនាំជាន់ខ្ពស់នៃប្រទេសទាំងពីរ។

ប្រធានាធិបតីគុយបា បានសម្តែងនូវការអបអរសាទរ ជូនចំពោះ
សម្តេចធិបតី ហ៊ុន ម៉ាណែត ដែលត្រូវបានជ្រើសតាំង ជានាយករដ្ឋមន្ត្រី នៃព្រះរាជាណាចក្រកម្ពុជា និងបានផ្តាំផ្ញើនូវការសួរសុខទុក្ខ និងអបអរសាទរជូន សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ដែលទទួលបានជ័យជម្នះ ក្នុងការបោះឆ្នោតជ្រើសតាំងតំណាងរាស្ត្រ សម្រាប់នីតិកាលទី៧ នៃរដ្ឋសភា កាលពីថ្ងៃទី២៣ ខែកក្កដា ឆ្នាំ២០២៣ កន្លងទៅ។

ក្នុងជំនួបនេះ, ឯកឧត្តម ប្រធានាធិបតី ក៏បានគូសបញ្ជាក់ឡើងវិញ អំពីការប្តេជ្ញាចិត្ត ក្នុងការបន្តកិច្ចសហប្រតិបត្តិការល្អជាមួយកម្ពុជា ដោយផ្អែកលើទំនាក់ទំនង ជាប្រវត្តិសាស្ត្រដ៏យូរលង់ និង អំពីការបន្តគាំទ្រគ្នាទៅវិញទៅមក នៅក្នុងវេទិកាពហុភាគីនានា។ ទន្ទឹមគ្នានេះ, ឯកឧត្តម ប្រធានាធិបតី ក៏បានរំឭកនូវអនុស្សាវរីយ៍ល្អៗ ក្នុងអំឡុងពេលនៃដំណើរទស្សនកិច្ចផ្លូវការ របស់ សម្តេចតេជោ នៅសាធារណរដ្ឋគុយបា កាលពីខែកញ្ញា ឆ្នាំ២០២២ ដែលត្រូវបានចាត់ទុកថា ជាឆ្នាំដ៏សំខាន់នៃការលើកកម្ពស់ទំនាក់ទំនងរវាងប្រទេសទាំងពីរ ដូចស្តែងឡើងតាមរយៈការចុះអនុស្សរណៈនៃការយោគយល់គ្នា លើវិស័យជាច្រើន ដូចជា កសិកម្ម, សុខាភិបាល, អប់រំ និងកីឡា ជាដើម។

សម្តេចហ៊ុន ម៉ាណែត បានថ្លែងអំណរគុណចំពោះការផ្តួចផ្តើម ឱ្យមានជំនួបតាមទូរស័ព្ទ, ការអបអរសាទរ និងបានជម្រាបជូន ឯកឧត្តម ប្រធានាធិបតី ផងដែរ នូវការផ្តាំផ្ញើសួរសុខទុក្ខពីសំណាក់ សម្តេចតេជោ។ បន្ថែមលើទំនាក់ទំនងប្រវត្តិសាស្ត្រល្អៗ, សម្តេចហ៊ុន ម៉ាណែត បានសម្តែងនូវការអរគុណចំពោះ ជំនួយឧបត្ថម្ភ និងការគាំទ្រ របស់គុយបា ក្នុងអំឡុងពេលដែលកម្ពុជា ជួបប្រទះនូវការលំបាកបំផុត ជាពិសេសនៅក្រោយថ្ងៃរំដោះចេញពីរបបខ្មែរក្រហម ដែលទាំងអស់នេះពិតជាបានឆ្លុះបញ្ចាំងអំពីទំនាក់ទំនងប្រកបដោយសាមគ្គីភាព និង មិត្តភាពដ៏រឹងមាំ រវាងប្រទេស និងប្រជាជនទាំងពីរ។

ក្នុងឋានៈជានាយករដ្ឋមន្ត្រី នៃព្រះរាជាណាចក្រកម្ពុជា, សម្តេច ហ៊ុន ម៉ាណែត បានអះអាងអំពីស្មារតីនៃការបន្ត និងពង្រឹងកិច្ចសហប្រត្តិការល្អនៅក្នុងវិស័យ ដែលមានស្រាប់ ព្រមជាមួយនឹងទិសដៅក្នុងពង្រីកបន្ថែម នៅក្នុងវិស័យសក្តានុពលផ្សេងៗទៀត។ ក្នុងន័យនេះ, សម្តេចធិបតី បានគាំទ្រ និងជំរុញឱ្យមានការរៀបចំកិច្ចពិគ្រោះយោបល់នយោបាយ លើកទី៣ រវាងក្រសួងការបរទេសនៃប្រទេសទាំងពីរ នៅក្នុងពេលឆាប់ៗខាងមុខ ដើម្បីជំរុញការអនុវត្តអនុស្សរណៈនៃការយោគយល់គ្នា និងកិច្ចព្រមព្រៀងនានា ដែលត្រូវបានចុះហត្ថលេខា រួច ឱ្យមានប្រសិទ្ធភាព និងប្រសិទ្ធផលខ្ពស់៕

ខេត្តបន្ទាយមានជ័យ៖សេចក្ដីរាយការណ៍បានឲ្យដឹងថា លោកវរសេនីយ៍ទោ លី ដារ៉ាវុធ នាយរងប៉ុស្តិ៍ច្រកទ្វារអន្តរជាតិស្តឹងបត់ មានវ័យខ្ទង់៤០ឆ្នាំ បានចងក.សម្លាប់ខ្លួន។

ការបញ្ចប់ជីវិតបែបនេះនៅក្នុងបន្ទប់ជួលមួយកន្លែង ស្ថិតនៅភូមិផ្សារកណ្ដាល សង្កាត់ផ្សារកណ្ដាល ក្រុងប៉ោយប៉ែត នៅថ្ងៃទី០៩ ខែកញ្ញា ឆ្នាំ២០២៣នេះ។ នេះបើតាមព័ត៌មានបឋម។ទោះជាយ៉ាងណាករណីនេះសមត្ថកិច្ចមិនទាន់បញ្ជាក់អំពីមូលហេតុនៅឡើយ៕

ថ្លែងក្នុងខេត្តកំពង់ស្ពឺ នៅសៅរ៍នេះ សម្ដេចធិបតី ហ៊ុន ម៉ាណែត នាយករដ្ឋមន្ត្រី បានណែនាំ ឱ្យមានការធ្វើលិខិតឆ្លងដែន នៅក្រៅប្រទេស ដោយត្រូវបង្កើតការិយាល័យអនុព័ន្ធ ដើម្បីចាត់បញ្ជូនមន្ត្រីទៅប្រចាំការ និងរៀបចំប្រតិបត្តិការ និងគ្រប់គ្រងទិន្នន័យ។ លើសពីនេះ ចំពោះលិខិតថ្កោលទោស គឺត្រូវរៀបចំធ្វើឡើងតាមប្រព័ន្ធអនឡាញ ដោយមានក្រសួងយុត្តិធម៌ ទទួលបន្ទុករៀបចំ និងអនុវត្ត។ បន្ថែមលើនេះផងដែរ សម្តេច ហ៊ុន សែន បានប្រគល់ភារកិច្ចជូនលោកនេត សាវឿន ឧបនាយករដ្ឋមន្ត្រី ដើម្បីធ្វើកិច្ចការជាមួយច្រកព្រំដែនចេញ-ចូលទាំងអស់ ដោះស្រាយរឿងកម្រៃក្រៅសេវា ពាក់ព័ន្ធការធ្វើលិខិតស្នាម សម្រាប់ការឆ្លងដែនទៅប្រទេសជិតខាង ដើម្បីសម្រួលការលំបាកក្នុងការឆ្លងកាត់ និងចេញ-ចូល របស់ប្រជាពលរដ្ឋ។

ក្នុងពិធីសំណេះសំណាល ជាមួយកម្មករ-និយោជិត តាមរោងចក្រ-សហគ្រាស នៅស្រុកសំរោងទង
សម្តេចហ៊ុន ម៉ាណែត បានណែនាំឱ្យផ្អាកជាបណ្តោះអាសន្ន ចំពោះការរៀបចំការប្រឡង ក្របខណ្ឌដាច់ដោយឡែក ក្នុងការជ្រើសរើស មន្ត្រីគ្រប់ក្រសួង ស្ថាប័នរបស់រាជរដ្ឋាភិបាល  ដើម្បីទុកពេលឱ្យមានការរៀបចំយន្តការរួម តាមរយៈគណៈកម្មាការ ដែលមានក្រសួងមុខងារសាធារណៈ ទទួលបន្ទុកក្នុងការដឹកនាំរៀបចំ ដោយនឹងមានការប្រឡងព្រមគ្នា ក្នុងក្របខណ្ឌថ្នាក់ជាតិតែម្តង។ នេះជាគោលការណ៍ ក្នុងការធ្វើកំណែទម្រង់លើការប្រឡង ចូលបម្រើការជាមន្ត្រីរាជការក្នុងក្របខណ្ឌទូទាំងប្រទេសដោយប្រកាន់គោលការណ៍​ “អ្នកចេះ​ គឺជាប់”។

សម្តេចហ៊ុន ម៉ាណែត បានគូសបញ្ជាក់យ៉ាងច្បាស់ថា រាជរដ្ឋាភិបាលថ្មី គឺនៅតែបន្តគោលនយោបាយ ការទូតរបស់ គណបក្សប្រជាជនកម្ពុជា គឺឈរលើភាពស្មើមុខស្មើមាត់គ្នា អព្យាក្រឹត្យ ស្របតាមរដ្ឋធមនុញ្ញ ផ្អែកលើច្បាប់ និងបម្រើផលប្រយោជន៍ជាតិ ដែលជាអាទិភាពចម្បង។

សម្ដេចហ៊ុន ម៉ាណែត ថ្លែងថា អំពីការងារសំខាន់ចំនួន ៣ ដែលសម្តេចបានធ្វើចំពោះជាតិ និងប្រជាជនគឺ៖ ទី១. ការងារការទូត ដើម្បីបន្តរក្សាកម្រិតស្មើភាព និងស្មើមុខស្មើមាត់លើការងារទំនាក់ទំនងការទូត ក្នុងនាមជាប្រទេស ដែលមានអធិបតេយ្យភាពពេញលេញ ទី២. ការជួបទ្វេភាគី ដើម្បីបន្តរក្សា និងពង្រឹងកិច្ចសហប្រតិបត្តិការជាមួយបណ្ដាប្រទេស ជាមិត្តបន្ថែមទៀត ដែលក្នុងនោះបណ្តាប្រទេសជាមិត្ត បានទទួលស្គាល់ និងធ្វើការសាទរចំពោះរាជរដ្ឋាភិបាលថ្មីរបស់កម្ពុជា ដែលប្រសូត្រចេញពីការបោះឆ្នោត ដែលមានប្រជាជនជាង ៨២% បានបោះឆ្នោតគាំទ្រ និងទី៣. ការងារសេដ្ឋកិច្ច ដើម្បីជំរុញការធ្វើពាណិជ្ជកម្ម និងការទាក់ទាញវិនិយោគមកកម្ពុជា តាមរយៈការ ផ្សព្វផ្សាយពីវិស័យ សំខាន់ៗមួយចំនួន ជាអាទិ៍ វិស័យកសិកម្ម, វិស័យទេសចរណ៍, វិស័យថាមពល និងវិស័យការងារជាដើម ទៅកាន់ឆាកអន្តរជាតិ៕

ភ្នំពេញ៖រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា បានចេញសេចក្ដីសម្រេចចាត់តាំង លោក ឃឹម ហ្វីណង់ និងលោកស្រី អ៉ឹម រចនា ជាអ្នកនាំពាក្យ ក្រសួងកសិកម្ម រុក្ខាប្រមាញ់ និងនេសាទ។ នេះបើតាមសេចក្សីសម្រេច ចុះហត្ថលេខាដោយ លោក ឌិត ទីណា៕ដោយនាគខៀវ

ភ្នំពេញ៖ឯកឧត្តម គីម ជីន ព្យូ បានសម្តែងនូវការអបអរសាទរជូនចំពោះ សម្ដេចធិបតី ដែលត្រូវបាន ជ្រើសតាំង ជានាយករដ្ឋមន្ត្រី នៃព្រះរាជាណាចក្រកម្ពុជា នីតិកាលទី៧ នៃរដ្ឋសភា កាលពីថ្ងៃទី២២ ខែសីហា ឆ្នាំ២០២៣ ហើយ ឯកឧត្តម ជឿជាក់ថា ក្រោមការដឹកនាំប្រកបដោយគតិបណ្ឌិតរបស់ សម្ដេចធិបតី កម្ពុជានឹងអាច សម្រេចបាននូវចក្ខុវិស័យឆ្នាំ២០៥០ ក្នុងការក្លាយជាប្រទេសមានចំណូលខ្ពស់។

នេះបើតាមសេចក្តីប្រកាសព័ត៌មានស្តីពីលទ្ធផលជំនួបរវាងសម្ដេចធិបតី ហ៊ុន ម៉ាណែត នាយករដ្ឋមន្តី នៃព្រះរាជាណាចក្រកម្ពុជា និងឯកឧត្តម គីម ជីន ព្យូ (Kim Jin Pyo) ប្រធានរដ្ឋសភា នៃសាធារណរដ្ឋកូរ៉ នៅថ្ងៃទី៨ ខែកញ្ញា ឆ្នាំ២០២៣ នៅវិមានសន្តិភាព៕ដោយនាគខៀវ

ខេត្តសៀមរាប៖យ៉ាងហោចណាស់មនុស្សចំនួន២នាក់បានស្លាប់ភ្លាមៗ និងម្នាក់ទៀតបានរងរបួសធ្ងន់ រវៀងម៉ូតូនិងម៉ូតូបុកគ្នា។

ហេតុការណ៍បានកើតឡើងនៅម៉ោង​ ១១ និង៤០នាទី ថ្ងៃទី០៦ ខែកញ្ញា ឆ្នាំ២០២៣ នៅចំណុចចន្លោះបង្គោលគីឡូម៉ែត្រ លេខ ៣៨-៣៩  ស្ថិត​ក្នុង​ភូមិខ្នាររង្វាស់ ឃុំឃុនរាម ស្រុកបន្ទាយស្រី ខេត្តសៀមរាប លើផ្លូវជាតិលេខ៦៧។

អាជ្ញាអាជ្ញាធរស្រុកបន្ទាយស្រីបានបន្តថា គ្រោះថ្នាក់ចរាចរណ៍នេះ ម៉ូតូមួយគ្រឿងម៉ាក ហុងដា HExcitor ពណ៌ខ្មៅ ផ្លាកលេខគ្មាន បើកបរដោយឈ្មោះ  ក្រង់ រ៉ាភេទប្រុស អាយុ ២៣ឆ្នាំ មានទីលំនៅភូមិគោក ស្រុក ឃុំវ៉ារិន ស្រុកវ៉ារិន ខេត្តសៀមរាប ស្លាប់នៅនឹងកន្លែងកើតហេតុ) ជាអ្នកបើកបរ។ ២. អ្នករួមដំណើរម្នាក់ឈ្មោះ រ៉ាត់ ស្រ៊ី ភេទប្រុស អាយុ ២២ឆ្នាំ (របួសធ្ងន់) ជាអ្នករួមដំណើរជាមួយ បានបុកម៉ូតូមួយគ្រឿងម៉ាក ហុងដាពណ៌ខ្មៅ ពាក់ផ្លាកលេខ កំពង់ស្ពឺ 1R-9802 បេីកបរដេាយឈ្មោះ ស៊ុន រិច ភេទស្រី អាយុ ៤១ឆ្នាំ មានទីលំនៅភូមិឃុនរាម ឃុំឃុនរាម ស្រុកបន្ទាយស្រី ខេត្តសៀមរាប ស្លាប់នៅនឹងកន្លែងកើតហេតុ) ជាអ្នកបើកបរម៉ូតូ។ ចំណែកម៉ូតូ ០២គ្រឿង (ធ្ងន់)។

បើតាមអាជ្ញាធរបន្តថា គ្រោះថ្នាក់នេះ មូលហេតុ​ អ្នកបើកបរម៉ូតូផ្លាកលេខកំពង់ស្ពឺ 1R-9802 បត់ឆ្វេងខ្វះការប្រុងប្រយ័ត្ន និងអ្នកបើកបរផ្លាកលេខ គ្មាន បើកបរក្នុងល្បឿនលឿន។ វត្ថុតាងត្រូវបានកម្លាំងជំនាញចរាចរណ៍ បានទៅមករក្សាទុកនៅអធិការដ្ឋាននគរបាលស្រុកបន្ទាយស្រីដើម្បីចាត់ការតាមនីតិវិធី៕