ភ្នំពេញ

ភ្នំពេញ៖លោកឧត្តមសេនីយ៍ឯក ស ថេត អគ្គស្នងការរងនគរបាលជាតិនិងជាស្នងការរាជធានីភ្នំពេញថ្លែងក្នុងកិច្ចប្រជុំបូកសរុបការងាររបស់ក្រុមការងារព័ត៌មាននិងប្រតិកម្មរហ័សស្នងការរាជធានីភ្នំពេញនៅព្រឹកថ្ងៃទី៣០ ខែកក្កដា ឆ្នាំ២០២០ បានព្រមានចាត់វិធានការតាមផ្លូវច្បាប់ចំពោះអ្នកបង្ហោះព័ត៌មានបំផ្លើសបំភ្លៃខុសពីការពិតបង្កប៉ះពាល់ សន្តិសុខ សណ្តាប់ធ្នាប់សុវត្ថិភាពសង្គម ប៉ះពាល់កិត្តិយសនគរបាលជាតិ និងការជំរុញឱ្យក្រុមការងារព័ត៌មាននិងប្រតិម្មហ័ស
បន្តយកចិត្តទុកដាក់ពង្រឹងតាមដានត្រួតពិនិត្យផេកឬអាខោនហ្វេសប៊ុកក្លែងក្លាយដែលបង្ហោះព័ត៌មានតាមបណ្តាញសង្គមមានចេតនាបំផ្លើសបំភ្លៃនិងបំពុលសង្គមបង្កភាពវឹកវរត្រូវស្រាវជ្រាវឆ្លើយតបវាយបកឱ្យលឿនឆាប់រហ័សដើម្បីបន្សាបព័ត៌មាននោះឱ្យទាន់ពេលវេលាកុំឱ្យមហាជនមានការយល់ច្រឡំ។

ការព្រមាននេះបន្ទាប់ពីក្នុងរយៈពេលចុងក្រោយនេះមានការបង្ហោះព័ត៌មានតាមផេកនិងអាខោនហ្វេសប៊ុកខ្លះនៅក្រៅប្រទេសបានបង្ហោះព័ត៌មានករណីចងកសម្លាប់ខ្លួនឯងនៅខណ្ឌដូនពេញបំភ្លៃចោទថាដោយសារជំពាក់បំណុលធនាគារវ័ណ្ឌក និងក៏ត្រូវបានក្រុមការងារព័ត៌មាននិងប្រតិកម្មរហ័សស្នងការប្រញ៉ាប់បកស្រាយនិងបំភ្លឺជូនមហាជនឡើងវិញដើម្បីកុំឱ្យមានការភាន់ច្រឡំនិងករណីម្ចាស់អាខោនហ្វេសប៊ុកមួយចំនួនទៀតនៅក្នុងប្រទេសបានបង្ហោះឬនិយាយព័ត៌មានចបំភ្លៃពីការពិតប៉ះពាល់សន្តិសុខសណ្តាប់សង្គមនិងនិយាយចោទប្រកាន់សមត្ថកិច្ចនគរបាលគ្មានមូលដ្ឋានច្បាស់លាស់បង្កប៉ះពាល់កិត្តិយសសេចក្តីថ្លៃថ្នូរនិងក៏បាននាំខ្លួនម្ចាស់អាខោនហ្វេសប៊ុកទាំងនោះមកអប់រំជាបន្តបន្ទាប់និងឱ្យធ្វើកិច្ចសន្យាដើម្បីបញ្ចប់សកម្មភាពផងដែរ។

ពាក់ព័ន្ធនិងបញ្ហាការបង្ហោះព័ត៌មានបំផ្លើសបំភ្លៃខុសពីការពិតនេះផងដែរ លោក ស ថេត ក៏បានលើកឡើងគ្រោងនិងរកអ្នកច្បាប់ប្រចាំស្នងការរាជធានីភ្នំពេញដើម្បីពិនិត្យទៅលើអង្គហេតុដែលត្រូវចាត់វិធានការតាមផ្លូវច្បាប់ចំពោះអ្នកបង្ហោះទាំងនោះផងដែរ។ ពីព្រោះគ្រាន់តែការអប់រំអ្នកខ្លះនៅមិនរាងចាលនោះទេ។
លោក ស ថេត ក៏បានណែនាំដល់ អធិការទាំង១៤ខណ្ឌនិងនាយប៉ុស្ថិ៍នគរបាលរដ្ឋបាលទាំងអស់និងការិយាល័យជំនាញ ត្រូវបន្តខិតខំដោះស្រាយទុក្ខកង្វល់របស់ប្រជាពលរដ្ឋ ដែលបានប្តឹងរាយការណ៍សរសេរសារខំមិន (comment)ចូលក្នុងផេកស្នងការដ្ឋាននគរបាលរាជធានីភ្នំពេញឬផេករបស់លោក ដែលឱ្យជួយដោះស្រាយការងារសន្តិសុខ និងការផ្តល់សេវារដ្ឋបាល។

សូមបញ្ជាក់ថាក្នុងកិច្ចប្រជុំបូកសរុបលទ្ធផលការងារ របស់ក្រុមការងារព័ត៌មាននិងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ មន្រ្តីសមាជិកក្រុមការងារក៏បានលើកឡើងពីលទ្ធផលការងារដែលសម្រេចបានរយៈពេលកន្លងមកក្នុងការឆ្លើយតបវាយបកបន្សាបព័ត៌មានបំពុលសង្គម និងក៏បានដោះ ស្រាយបញ្ហាមួយចំនួននូវការប្តឹងរាយការណ៍របស់ប្រជាពលរដ្ឋសរសេរសារចូលក្នុងផេកស្នងការរាជធានីភ្នំពេញ និងផេករបស់លោកស្នងការពាក់ព័ន្ធការងារសន្តិសុខសណ្តាប់ធ្នាប់និងការផ្តល់សេវារដ្ឋបាលនិងមានការលើកឡើងនូវចំណុចប្រឈមមួយចំនួនទៀតដើម្បីលើកយកមកពិភាក្សានិងបន្តរួមគ្នាដោះស្រាយជូនដល់ប្រជាពលរដ្ឋ៕SRP

ភ្នំពេញ៖ លោក ដួង តារា ជំនួយការសម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា និងជាអនុរដ្ឋលេខាធិការ ទីស្តីការគណៈរដ្ឋមន្ត្រីនៅថ្ងៃទី៣១ ខែកក្កដា ឆ្នាំ២០២០ បានសរសេរសារនៅលើទំព័រផេកហ្វេសប៊ុកថា៖មុននេះបន្តិចខ្ញុំមកសុំបញ្ជាក់ក្រដាសស្នាម សំបុត្រកំណេីត សំបុត្រអាពាហ៍ពិពាហ៍ និងអត្តសញ្ញាណប័ណ្ណនៅច្រកចេញចូលតែមួយ របស់ខណ្ឌមួយ នៅភ្នំពេញ។

លោក ដួង តារា បានបន្តថា៖ ខ្ញុំពិតជាខកចិត្តនិងសោកស្តាយចំពោះសេវាកម្មបម្រេីប្រជាលរដ្ឋនៅទីនោះដែលខ្វះភាពរស់រាយរាក់ទាក់ នឹងមិនបានបង្ហាញខ្ញុំអោយច្បាស់ថាត្រូវទៅតុណាមួយ …ជួបអ្នកណា…។

លោក ដួង តារា ក៏បានលើកឡើងទៀតថា៖ មន្រ្តីក្មេងៗក្រៅពីសមត្ថភាពចំណេះដឹង តត្រូវមានសមត្ថភាពសុជីវធម៌ និងគុណធម៌ក្នុងខ្លួនហេីយមានបេះដូងថ្លេីមប្រម៉ាត់រីករាយក្នុងការបម្រេីប្រជាពលរដ្ឋពិតប្រាកដ។

លោកបន្តទៀតថា៖ យើងចូលរួមកសាងអំពើល្អ ចែករំលែកក្តីស្រឡាញ់និងស្នាមញញឹម និង សូមមានចិត្តអាណិតស្រឡាញ់ពលរដ្ឋយើងគ្រប់ទីកន្លែង។
សូមរម្លឹកថាជារើយៗគេតែងតែសង្កេតឃើញមន្ត្រីមួយចំនួនតូចមិនបានកែប្រែចរិកការងារ ឱ្យមានសីលធម៌ វិជ្ជាជីវៈ បម្រើរាស្ត្រពិតប្រាកដនោះទេ ច្រើនមានវប្បធម៌រើសអើង មាកងាយ មិនយកចិត្តទុកដាក់ចំពោះពលរដ្ឋ ប្រើសំដីមិនសមរម្យ ធ្វើឱ្យប្រជាពលរដ្ឋថ្នាំងថ្នាក់ សុទ្ធតែជាបច្ច័យមិនល្អ ប៉ៈពាល់ដល់សតិអារម្មណ៍ពលរដ្ឋ ផងដែរ៕SRP

ភ្នំពេញ៖ លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ បានចេញសេចក្តីសម្រេចមួយ ផ្អាកការងារជាបណ្តោះអាសន្នចំពោះមន្ត្រីនគរបាលជាតិចំនួន០៧រូប នៃស្នងការដ្ឋាននគរបាលខេត្តព្រៃវែង ក្រោយយុវជន២នាក់ ចោទប្រកាន់ ថា បានប្រើអំពើហិង្សាជំរិតទារប្រាក់។ នេះយោងតាមសេចក្ដីសម្រេចចុះនៅថ្ងៃទី២៧ ខែកក្កដា ឆ្នាំ២០២០។

យោងតាមសេចក្តីសម្រេច ដែលអង្គភាពសារព័ត៌មានសៀមរាបប៉ុស្តិ៍ ទើបទទួលបាននៅរសៀលថ្ងៃទី២៨ ខែកក្កដា ឆ្នាំ២០២០ នេះ លោកនាយឧត្តមសេនីយ៍នេត សាវឿន បានផ្អាកការងារជាបណ្តោះអាសន្នចំពោះលោកឧត្តមសេនីយ៍ត្រី ថោង វណ្ណឌី ស្នងការរងនគរបាលខេត្តព្រៃវែងទទួលផែនប្រឆាំងគ្រឿងញៀន និង កូនចៅតាមឋានានុក្រុមចំនួន៦នាក់ ផ្សេងទៀត៕SRP

ភ្នំពេញ៖ រាជរដ្ឋាភិបាល និងសង្គមស៊ីវិល រួមគ្នាជំរុញឱ្យអ្នក បើកបរដែលប្រើប្រាស់រថយន្តដឹកទំនិញសម្រាប់ដឹកញ្ជូនកម្មករ និយោជិតនៅតាមរោងចក្រកាត់ដេរសម្លៀកបំពាក់ និងផលិតស្បែកជើង ធ្វើការផ្លាស់ប្តូររថយន្តមានស្តង់ដារត្រូវត្រឹម ដើម្បីធានាដល់សុវត្ថិភាពក្នុងពេលធ្វើដំណើរ។

លោក ហេង សុផាន់ណារិទ្ធ ប្រធានការិយាល័យគោលនយោបាយ និងជាអ្នកនាំពាក្យបេឡាជាតិសន្តិសុខ សង្គម (ប.ស.ស) បានឱ្យដឹងថា រាជរដ្ឋាភិបាលបាននិងកំពុងសិក្សាពីលទ្ធភាពពីការប្រើប្រាស់រថយន្តដឹកជញ្ជូនកម្មករ និយោជិតប្រកបដោយសុវត្ថិភាព។

ថ្លែងក្នុងសិក្ខាសាលាជាមួយថ្នាក់ដឹកនាំសហជីពកម្មករស្តីពី ការលើកកម្ពស់សុវត្ថិភាពចរាចរណ៍ សម្រាប់កម្មករ និយោ ជិត ដែលធ្វើឡើងនៅក្នុងរាជធានីភ្នំពេញ ព្រឹកថ្ងៃទី២៨ ខែកក្កដានេះ លោកបានបញ្ជាក់ថា សុវត្ថិភាពធ្វើដំណើររបស់កម្មករក្នុងវិស័យកាត់ដេរនៅតែប្រឈមនឹងគ្រោះថ្នាក់ ចរាចរណ៍ខ្ពស់ដោយសារកត្តាអ្នកបើកបរមិនគោរពច្បាប់ និងការដឹកលើសទម្ងន់ ខណៈយានយន្តមិនត្រឹមត្រូវតាម លក្ខណៈស្តង់ដារបច្ចេកទេស។

លោក គឹម បញ្ញា នាយកប្រតិបត្តិអង្គការមូលនិធិបង្ការ របួសអាស៊ីប្រចាំកម្ពុជា បានឱ្យដឹងថា ការសិក្សាពីលទ្ធភាពដែលនឹងអាចអ្នកបើកបររថយន្តដឹកញ្ជូនកម្មករ ងាកទៅប្រើប្រាស់យានយាន្តមានកៅអីអង្គុយត្រឹមត្រូវ និងមានចំនួនផ្ទុកតាមការកំណត់នឹងចេញលទ្ធផលនៅចុងឆ្នាំនេះ។ លោកបានឱ្យដឹងថា មកដល់បច្ចុប្បន្ន មានរថយន្តដឹកញ្ជូនកម្មករ ត្រឹមត្រូវតាមលក្ខណៈបច្ចេកទេសចំនួន៤០គ្រឿង ក្នុងចំណោមប្រហែល៥០០គ្រឿងហើយ ដែលត្រូវបានផ្លាស់ប្តូរពីរថយន្តដឹកទំនិញ។

គួរកត់សម្គាល់ថា កម្មករមួយភាគធំបានធ្វើដំណើរពីផ្ទះទៅកន្លែងធ្វើការ តាមរថយន្តជជុសពីប្រទេសកូរ៉េ ដែល មានលក្ខណៈចាស់ៗ និងដឹកលើសចំណុះដោយការឈរតោងខាងក្រោយនៃរថយន្ត ខណៈក្នុងចំណោមអ្នកបើកបរ ទាំងនោះគ្មានបណ្ណបើកបរ និងរថយន្តក៏មិនបានចុះបញ្ជីត្រឹមត្រូវ និងកែច្នៃខុសបច្ចេកទេស ដែលអាចកើតមានគ្រោះថ្នាក់នៅលើដងផ្លូវគ្រប់ពេលវេលា។

យោងតាមរបាយការណ៍របស់ប.ស.ស បានឱ្យដឹងថាកាលពីឆ្នាំ២០១៩ មានគ្រោះថ្នាក់ចរាចរណ៍មកលើកម្មករ និយោជិតវិស័យកាត់ដេរសម្លៀកបំពាក់ និងផលិតស្បែក ជើងចំនួន៦៩៨លើក ដោយបណ្តាលឱ្យកម្មករនិយោជិត ចំនួន១៥នាក់ស្លាប់ និងរងរបួសធ្ងន់ស្រាលជាងមួយពាន់នាក់។ កត្តាគ្រោះថ្នាក់ដោយសារការវ៉ាជែងប្រថុយប្រថាន ការមិនគោរពច្បាប់ចរាចរណ៍ បើកបរធ្វេសប្រហែស ការផ្ទុកចំនួនមនុស្សលើសចំណុះ និងការបើកបរក្រោមឥទ្ធិពលស្រវឹង ជាដើម៕SRP

ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានផ្តល់ជូនម៉ាស៊ីនចម្រុះទឹកស្អាតដែលប្រើបច្ចេកវិទ្យាខ្ពស់ចំនួន ០៥គ្រឿង ដល់មន្ទីរពេទ្យចំនួន ៥ខាងក្រោម៖

១-).មន្ទីរពេទ្យគន្ធបុប្ផា០១ គ្រឿង
២-).មន្ទីរពេទ្យកាល់ម៉ែត០១ គ្រឿង
៣-).មន្ទីរពេទ្យមិត្តភាពកម្ពុជា-ចិន ព្រះកុសុមៈ ០១ គ្រឿង
៤-).មន្ទីរពេទ្យមិត្តភាពខ្មែរ-សូវៀត០១ គ្រឿង និង
៥-).កាកបាទក្រហមកម្ពុជា០១គ្រឿង (រួមជាមួយរថយន្តចល័ត និងម៉ាស៊ីងភ្លើងមួយឈុត ក្នុងការធ្វើសកម្មភាពមនុស្សធម៌នៅតាមមជ្ឈដ្ឋានទីសាធារណៈក្នុងប្រទេសកម្ពុជា ដែលអាចនឹងជួបគ្រោះរាំងស្ងួត ឬមានតម្រូវការប្រើប្រាស់ទឹកស្អាតជាចាំបាច់)។

ការសម្រេចផ្ដល់នេះដោយ សម្ដេចតេជោហ៊ុន សែន មើលឃើញអំពីតម្រូវការទឹកស្អាតចាំបាច់បំផុតសម្រាប់មន្ទីរពេទ្យ ជាពិសេសសម្រាប់ពលរដ្ឋ និងអ្នកជំងឺដែលមកសម្រាកព្យាបាលនៅក្នុងមន្ទីរពេទ្យ។

សូមបញ្ជាក់ថានៅព្រឹកថ្ងៃទី ២៨ កក្កដា នេះ លោក ស៊ុន ចាន់ថុល រដ្ឋមន្រ្តីក្រសួងសាធារណការ តំណាងដ៏ខ្ពង់ខ្ពស់ សម្តេចហ៊ុន សែន បានអញ្ជើញប្រគល់ម៉ាស៊ីនចម្រោះទឹកខាងលើជូនទៅតំណាងមន្ទីរពេទ្យដើម្បីយកទៅប្រើប្រាស់ជាប្រយោជន៍សាធារណៈ។

ម៉ាស៊ីនផលិតទឹកបរិសុទ្ធដោយបរិយាកាសធម្មជាតិ- WATERGEN (ប្រភេទ GEN-M) គឺជាបច្ចេកវិទ្យារបស់ប្រទេសអ៊ីស្រាអែល មានសមត្ថភាពផលិតទឹកបរិសុទ្ធដោយស្វ័យប្រវត្តិពីខ្យល់ក្នុងបរិយាកាស (បានប្រមាណ ៨០០ លីត្រ ក្នុងមួយថ្ងៃ) ប្រកបដោយគុណភាព និងសុវត្ថិភាពខ្ពស់ ដែលអាចចូលរួមកាត់បន្ថយផលប៉ះពាល់បរិស្ថានផ្សេងៗ ថែមទៀតផង៕SRP

ភ្នំពេញ៖រដ្ឋមន្រ្តីក្រសួងព័ត៌មាន ជំរុញដល់ប្រពន្ធ័ផ្សព្វផ្សាយរបស់រដ្ឋ ផលិតព័ត៌មានពីរបៀបសម្ងួតស្រូវ និងដំឡូងមី ដោយយកគំរូពីឡតិ៍សម្ងួតធំៗនៅកម្ពុជា ដើម្បី ផ្តល់ចំណេះដឹងដល់ប្រជាកសិករ។

ក្នុងកិច្ចប្រជុំសាមញ្ញប្រចាំសប្តាហ៍ របស់ថ្នាក់ដឹកនាំក្រសួងព័ត៌មាន ចុងខែកក្កដា ឆ្នាំ២០២០ លោក ខៀវ កាញារីទ្ធ រដ្ឋមន្រ្តីក្រសួងព័ត៌មាន បានជំរុញដល់ប្រពន្ធ័ផ្សព្វផ្សាយបស់ជាតិទាំងអស់ បន្តផលិតកម្មវិធីថ្មីៗ ទាក់ទងចំណេះទូទៅ ក៏ដូចរបៀបធ្វើកិច្ចការងារថ្មីៗបន្ថែមទៀត ដើម្បីផ្តល់នូវការយល់ដឹងជូនដល់សាធារណៈជន បានកាន់តែប្រសើរឡើង។

លោក បានអោយក្រុមការងារព័ត៌មាន ត្រូវចុះថត និងសរសេរអត្ថបទ ទាក់ទងនឹងទីតាំង សម្ងួតស្រូវ ដំឡូងមីជាដើមដែល មានទីតាំងធំទូលាយ ដែលមានកន្លែងរក្សា និងសម្ងួត ស្រូវ ឬ ដំឡូង បានរាប់សិបតោន បានយូរមិនមានខូចគុណភាព ដើម្បីផ្សាយអោយប្រជាពលរដ្ឋបានដឹង និងធ្វើតាម ។

លោក រដ្ឋមន្រ្តី បានក្រើន រំលឹកដល់អ្នកសរសេរអត្ថបទព័ត៌មាន ត្រូវរំលេចនូវអ្វីដែលជាចំណុចសំខាន់ជាងគេ ជាមុនសិន ដោយមិនត្រូវ ដាក់ចំណុចសំខាន់នៅកណ្តាលអត្ថបទ ឬនៅចុងបញ្ចប់នៃអត្ថបទនោះទេ។

លោក រដ្ឋមន្រ្តី ខៀវ កាញារីទ្ធ បានលើកទឹកចិត្ត ដល់ថ្នាក់ដឹកនាំ និងមន្រ្តី គ្រប់ផ្នែកពាក់ពន្ធ័ បន្តអនុវត្តន៍អោយបាននូវផែនការ និងសកម្មភាពការងារនានា របស់ក្រសួងព័ត៌មាន មានការទទួលខុសត្រូវខ្ពស់ ហើយធ្វើកិច្ចសហការល្អ ជាមួយគ្រប់ផ្នែកពាក់ពន្ធ័ទាំងអស់ ដើម្បីពន្លឿនការងារបានឆាប់ទៅមុខទៀត៕SRP

ភ្នំពេញ៖​មន្រ្តី​ជាន់ខ្ពស់មួយបានបង្ហើបអោយដឹងថា​ ពាក់ព័ន្ធ​នឹង​ការទន្ទ្រានដី​រដ្ឋ យកមកធ្វើជាកម្មសិទ្ធិ​ផ្ទាល់ខ្លួន​ នៅ​ខេត្ត​មណ្ឌលគិរី​ យ៉ាង​ហោច​ណាស់​មានមន្ត្រី​ជាង​១០​នាក់​ ត្រូវ​បាន​គណៈរដ្ឋមន្ត្រី​ ស្នើសុំ​គោលការណ៍​ពី​សម្ដេច​តេជោ​ ហ៊ុន​ សែន​ នាយករដ្ឋមន្ត្រី ដកហូតតួនាទី​ និង​បណ្ដេញ​ចេញ​ពី​ គណបក្ស​។

យោងតាម​របាយការណ៍​របស់​ទីស្ដីការ​គណៈរដ្ឋមន្ត្រី​ចុះថ្ងៃទី​ ១២​ ខែ​ មិថុនា​ឆ្នាំ​ ២០២០​ លោក​ឧបនាយករដ្ឋមន្ត្រី​ ប៊ិន​ ឈិន​ បានគោរព​ស្នើសុំ​គោលការណ៍​ពី​សម្ដេច​តេជោ​ ហ៊ុន​ សែន​ មានចំណាត់ការទៅលើ​ មន្រ្តី​មួយចំនួន ​ដូចខាងក្រោម​៖​

១-​ គួរសម្រួល​ភារកិច្ច​លោក ស្វាយ​ សំអ៊ាង ពី​ អភិបាល​ខេត្ត​មណ្ឌលគីរី​ ដោយហេតុថា​លោកមិនបាន​អនុវត្តតួនាទីនិង​ភារកិច្ច​របស់​ខ្លួន​ជាប្រធាន​គណៈបញ្ជាការឯកភាព​ខេត្តក្នុងការចាត់វិធានការចាំបាច់នានាដើម្បីទប់ស្កាត់​ និង​បង្ក្រាប​បទល្មើស​ធនធាន​ធម្មជាតិ​នៅក្នុង​ភូមិ​សាស្ត្រ​ខេត្ត​អោយមានប្រសិទ្ធិភាព​ និង​មាន​ឯកសារ​ខ្លះ​លោកបានចូលរួមចុះហត្ថលេខាទទួលស្គាល់​ការទន្ទ្រានយកដីព្រៃដោយខុសច្បាប់​។

២-​ គួរបញ្ចប់ដំណែង​ លោក​ សេង​ សុវណ្ណារ៉ា​ ពី​ សមាជិក​គណៈកម្មការ​កណ្តាល​គណបក្សប្រជាជន​កម្ពុជា​ ដោយហេតុថា​ លោកបានឃុបឃិតគ្នាជាមួយ​អាជ្ញាធរ​មូលដ្ឋាន​ ក្នុង​ការ​រៀប​ចំ​ឯកសារ​ជាច្រើន​ដើម្បី​យកដី​ព្រៃរបស់រដ្ឋ​ មកគ្រប់គ្រងជាកម្មសិទ្ធិផ្ទាល់ខ្លួន​ទោះបី​ជាត្រូវ​បានដកដំណែងចេញពី​អនុរដ្ឋលេខាធិការ​ក្រសួង​យុត្តិធម៌​ និង​ ពី​សមាជិក​ក្រុម​ការងារ​រាជរដ្ឋាភិបាល​ចុះមូលដ្ឋានខេត្តមណ្ឌលគីរីក៏ដោយ​ ក៏លោក​នៅតែបន្តព្យាយាមស្នើសុំកាន់កាប់ដីព្រៃដែលរដ្ឋបាលខេត្តបានចេញលិខិតនិរាករណ៍រួចហើយ​។

៣-​ គួរចាត់​វិធានការបញ្ចប់ដំណែង​លោក ណយ​ ស្រូន​ ពី​សមាជិក​ព្រឹទ្ធសភា​ភូមិ​ភាគ​ទី​៨​ ដោយហេតុថា​លោក មានការ​ពាក់ព័ន្ធ​នឹង​ការ កាន់កាប់ដីព្រៃដោយខុសច្បាប់ ​ជាច្រើន​ហិកតា​។

៤-​ គួរចាត់​វិធានការបញ្ចប់ដំណែង​ លោក​ ស៊ិន​ វណ្ណវុឌ្ឍ​ ពី​អភិបាល​ស្រុក​កោះញែក​ និង​ធ្វើ​ការស៊ើបអង្កេត​ និង​អនុវត្ត​វិធានការ​ច្បាប់​បន្ថែម​ទៀត​ចំពោះ​រូប​លោក​ ដោយហេតុថា​ លោក​អភិបាល​ស្រុក​រូប​នេះ​ មានការជាប់​ពាក់ព័ន្ធ​ការកាប់រាន​ទន្ទ្រាន​យកដី​ព្រៃដោយខុសច្បាប់​ជាច្រើន​កន្លែង​ នៅក្នុង​ដែនជម្រកសត្វព្រៃ​កែវសីមា​ និង​ជម្រកដែនសត្វព្រៃស្រែពក​ ចាប់​តាំង​ពី​លោកកាន់តំណែង​ជា​អភិបាល​ស្រុក​កែវសីមា​ រហូត​ដល់ជា​ អភិបាល​ស្រុក​កោះញែក​នាពេល​បច្ចុប្បន្ន​។

៥-​ គួរចាត់​វិធានការ​បញ្ចប់​តំណែង​លោក​ សៀក​ មុន្នី​ ពី​ អភិបាល​ស្រុក​អូររាំង​ ដោយហេតុថា​ លោក​អភិបាល​ស្រុក​រូប​នេះ​មានការជាប់​ពាក់ព័ន្ធ​ និង​ឃុបឃិត​គ្នា​ទន្ទ្រាន​ដីព្រៃ​ ក្នុង​ដែនជម្រកសត្វព្រៃ​កែវសីមា​ ដើម្បី​យកទៅលក់និងធ្វើកម្មសិទ្ធិដោយតម្រូវអោយ​មេភូមិ​ មេឃុំ​ ចុះហត្ថលេខា​លើការបញ្ជាក់កម្មសិទ្ធិដីធ្លីដោយខុសច្បាប់​ជាច្រើន​។

៦-​ គួរចាត់វិធានការ​បញ្ចប់​តំណែង​លោក​ស្រី​ ថ្វាន់​ ត្រែល​ ពី​ចៅសង្កាត់​ សែន​មនោរម្យ​ ស្រុក​អូររាំង​ ដោយហេតុថា​ ចៅសង្កាត់​រូបនេះ​តែងតែ​ចុះហត្ថលេខា​ដឹងឮលើការលក់ដូរដីព្រៃដោយខុសច្បាប់​ និង​ធ្វើ​លិខិត​បញ្ជាក់​ផ្សេងៗ​ជាមួយឈ្មោះ​ញ៉ាង​ ម្យក់​ មេភូមិ​ ពូហ្សាម​ ទោះបីមានការណែនាំ​ និង​ព្រមាន​ជាច្រើន​ដង​។

៧-​ គួរចាត់វិធានការ​បញ្ចប់​តំណែង​លោក​ ប៊ុត​ សំអ៊ែល​ ពី​ឃុំ​ស្រែខ្ទុម​ ព្រោះហេតុថា​ មេឃុំ​រូបនេះ​ មានការចូលរួមឃុបឃិតរៀបចំផែនការ ផ្សេងៗក្នុងការកាប់រានទន្ទ្រានយកដីព្រៃ​ ពិសេស​បានចូលរួមញុះញង់ ប្រជាពលរដ្ឋ អោយតវ៉ា​ទាមទារ​ និង​កាន់​កាប់​ដី​ព្រៃ ដោយខុសច្បាប់​។

៨-​ គួរចាត់វិធានការ​បញ្ចប់​តំណែង​លោក​ ព្យើប​ ពេ​ មេឃុំ​ ស្រៃព្រះ​ ដោយហេតុថា​ មេឃុំ​រូបនេះ​ ជាអ្នកឃុបឃិតដ៏សកម្មក្នុងការទន្ទ្រានដីព្រៃសហគមន៍​ ដោយមានការចាត់ចែងពីថ្នាក់ខេត្ត​ និង​ បង្ករការងាយស្រួលអោយមានការទន្ទ្រានយកដីព្រៃដោយខុសច្បាប់​ និង​ បែងចែក​ដីព្រៃ​យ៉ាង​អនាធិបតេយ្យ​អោយប្រជាពលរដ្ឋ​មកពី​តំបន់​ផ្សេងៗ​ដោយមិនខ្លាចញញើតច្បាប់ឡើយ​ ។ មេឃុំ​រូបនេះ​ បានឃុបឃិតជាមួយ​អតីត​អភិបាល​ស្រុក​កែវសីមា​ លោក​ ស៊ិន​ វណ្ណវុឌ្ឍ​ និង​លោក​ សុខ​ សេរា​ បើកដៃអោយមានការទន្ទ្រានកាន់កាប់ដីព្រៃដោយខុសច្បាប់​ ។

៩-​ គួរចាត់វិធានការ​បញ្ចប់​តំណែង​លោក​ សុខ​ សេរា​ ពី​នាយករងរដ្ឋបាល​សាលា​ខេត្ត​មណ្ឌលគិរី​ ដោយហេតុថា​ រូប​លោក​ជាអ្នកសម្របសម្រួល​ការងារ​ និង​ ប្រើប្រាស់​រូបភាព​ស្នើសុំ​ដីសម្បទានសង្គមកិច្ច​ដែល​បង្កអោយ​មានការកាប់រាន​ទន្ទ្រាន​ដីព្រៃ​ដោយខុសច្បាប់ក្នុងតំបន់ការពារ​ធម្មជាតិ​យកទៅលក់អោយ​ឈ្មួញ​ជាបន្តបន្ទាប់​។

១០​-​ គួរចាត់វិធានការ​បញ្ចប់​តំណែង​ ឧត្ដមសេនីយ៍​ ជេត​ ហ៊ាង​ មេបញ្ជាការ​រង​កងឯកភាពស្ថាបនាថ្នល់លេខ​៧១៦​ ជាប្រធាន​ការដ្ឋាន​ខ្សែ​ក្រវ៉ាត់​ព្រំដែន​ និង​ នាយទាហាន​ នាយទាហាន​រង​ចំនួន​១២​រូប​ទៀត​ ដែល​បាន​ប្រើប្រាស់​តួនាទី​បេសកកម្ម​ និង​ គ្រឿងចក្រ​ របស់​អង្គភាព​ ធ្វើ​សកម្មភាព​ កាប់​រានទន្ទ្រានកាន់កាប់ដីព្រៃខុសច្បាប់​ តាមដងផ្លូវ​ក្រវ៉ាត់ព្រំដែន​ ក្នុង​ភូមិ​សាស្ត្រ​ភូមិ​ស្រែខ្ទុម​ ស្រុក​កែវសីមា​ ខេត្ត​មណ្ឌល​គិរី​។

១១​-​ គួរចាត់វិធានការ​បញ្ចប់​តំណែង​លោក​ ថាន​ ប៊ុន​ធឿន​ ពី​មេបញ្ជាការ​សឹករងស្រុកកោះញែក​ ដោយសារតែតាម​ភរិយា​របស់​ខ្លួន​ឈ្មោះ​ ខេង​ សុខនី​ បានទិញដី​ជាច្រើន​ហិកតា​ពី​ប្រជាពលរដ្ឋ​ដែល​ទន្ទ្រាន​កាន់កាប់​ដោយ​ខុសច្បាប់​ក្នុង​ដែនជម្រកសត្វព្រៃ​កែវសីមា​។

​ករណី​នេះសម្ដេចតេជោ​ ហ៊ុន​ សែន​ បានចារ​លើរបាយការណ៍របស់​ទីស្ដីការ​គណៈរដ្ឋមន្ត្រី​ បញ្ជូន​ទៅ​សម្ដេច​ក្រឡា​ហោម​ ស​ ខេង​ ដើម្បី​ដឹកនាំការប្រជុំ​ និង​លើកយោបល់មកសម្ដេចតេជោ​ ហ៊ុន​ សែន​ វិញ​។

សូមរម្លឹកថាកាលនៅថ្ងៃទី​២២​ខែ​កក្កដា​ឆ្នាំ​២០២០​ សម្ដេច​ ស​ ខេង​ បានសម្រេច​បង្កើតក្រុម​ការងារ​អន្តរក្រសួង​មួយដែលមាន​ក្រសួង​មហាផ្ទៃ​ ក្រសួងរៀបចំដែនដី​ នគរ​រូបនីយកម្ម​ និង​សំណង់​ ក្រសួង​បរិស្ថាន​ និង​ ក្រសួង​កសិកម្ម​ រុក្ខា​ប្រម៉ាញ់​ និង​ នេសាទ​ ដែល​មាន​ លោក​ អង្គ​ មង្គល​ រដ្ឋលេខាធិកា​រ​ក្រសួង​មហាផ្ទៃ​ ជាប្រធាន​។ ក្រុមការងារ​អន្តរក្រសួង​នេះ​មានតួនាទី​ និង​ ភារកិច្ច​ ចុះសិក្សាស្រាវជ្រាវ​ លើករណី​នីមួយៗ​នៃ​ការកាប់រាន​ទន្ទ្រាន​យកដី​ព្រៃដោយខុសច្បាប់​ក្នុងតំបន់​ការពារ​ធម្មជាតិ​ ស្ថិតក្នុង​ខេត្ត​មណ្ឌលគិរី​ តាម​របាយការណ៍​របស់​ទីស្ដីការ​គណៈរដ្ឋមន្ត្រី​ចុះថ្ងៃទី​ ១២​ ខែ​ មិថុនា​ ឆ្នាំ​ ២០២០​ អោយបានជាក់ស្ដែង​ និង​ ប្រមូល​ឯកសារ​ និង​ភស្តុតាង​នានា​ពាក់ព័ន្ធ​ជា​មួយនឹងមន្ត្រី​ និង​អ្នក​ពាក់ព័ន្ធ​នឹងសកម្មភាពទាំងនោះ​។

សូមបញ្ជាក់ថាខេត្តមណ្ឌលគិរី ក្រៅពីល្បីមានការកាប់ទន្រ្ទានវាតយកដីរដ្ឋដោយខុសច្បាប់ក៏ល្បីល្បាញរឿងសកម្មភាពកាប់បំផ្លាញព្រៃឈើយ៉ាងអនាធិតេយ្យផងដែរ៕SRP

ភ្នំពេញ៖សៀវភៅវិជ្ជាជីវៈសារព័ត៌មាន ដំណឹង​ក្លែង​ក្លាយ និងព័ត៌មានមិនពិត ក្នុងកិច្ចសហការ រវាងក្រសួងព័ត៌មាន និងអង្គការ យូណេស្កូ ត្រូ​វ​​​បា​នប្រារព្ធពិធីសម្ពោធដាក់ឱ្យប្រើប្រាស់ជា ផ្លូវការនៅព្រឹកថ្ងៃទី២៣ខែកក្កដា ឆ្នាំ២០​២​០ នាស​ណ្ឋា​គារ សូហ្វីតែល ភ្នំពេញភូគីត្រា ក្រោមអធិបតីភាព លោក ខៀវ កាញារីទ្ធ រដ្ឋមន្រ្តីក្រសួ​ង​ព័ត៌មាន លោក Sardar Umar Alan តំណាង អង្គការអប់រំ វិទ្យាសាស្ត្រ និងវប្បធម៌ នៃ​ស​ហប្រជាជាតិ យូណេស្កូ ប្រចាំកម្ពុជា និង លោក Magnus Saemundsson លេខាទីមួយ នៃ​ស្ថា​នទូតស៊ុយអែតប្រចាំកម្ពុជា។

សៀវភៅនេះ ជាមេរៀនសម្រាប់ការអប់រំ និងការបណ្តុះបណ្តាលផ្នែកវិជ្ជាជីវៈសារ ព័ត៌​មាន”ជូនដល់អ្នកសារព័ត៌មាននិងអ្នកអប់រំផ្នែកវិជ្ជាជីវៈសារព័ត៌មាននៅប្រទេសកម្ពុជាដែលជាមធ្យោបាយ ដើម្បីប្រយុទ្ធប្រឆាំងនឹងព័ត៌មានមិនពិត។

នៅក្នុងឱកាសនោះ លោក Sardar Umar Alan តំណាងអង្គការយូណេស្កូ ប្រចាំកម្ពុជា បា​ន​គួ​ស​បញ្ជាក់ថា សៀវភៅនេះគឺជាឯកសារដែលផ្តល់ធនធានផ្នែកចំណេះដឹងដ៏ជឿនលឿន និង ទំ​នើ​​​បចុងក្រោយបង្អស់។ ការបោះពុម្ពផ្សាយនេះគឺជាផ្នែកមួយនៃ «គំនិតផ្តួចផ្តើមជា សក​ល​​ស​ម្រា​​ប់ឧត្តមភាព ក្នុងវិស័យអប់រំវិជ្ជាជីវៈ សារព័ត៌មាន»ដែលជាការផ្តោតលើ កម្មវិធីអន្ត​រ​ជា​​​តិ​​រ​បស់អង្គការយូណេស្កូ សម្រាប់អភិវឌ្ឍន៍វិស័យសារគមនាគមន៍។ គំនិតផ្តួចផ្តើមនេះ មា​ន​​​​គោ​​លបំណង ផ្សារភ្ជាប់ការបង្រៀន ជាមួយការអនុវត្ត និងការស្រាវជ្រាវ ផ្នែកវិជ្ជាជីវៈ សា​រ​ព័​ត៌​​​​​មា​​នពីទស្សនៈជាសកល ដោយរួមបញ្ចូលការចែករំលែកគំរូល្អនៅថ្នាក់អន្តរជាតិ។

លោក Magnus Saemundsson លេខាទីមួយនៃស្ថានទូតស៊ុយអែតប្រចាំកម្ពុជា ក៏បាន បង្ហា​ញ​នូវចំណាប់អារម្មណ៏ ទាក់ទងសៀវភៅនេះ ដែលមានសារសំខាន់សម្រាប់សេរីភាពសា​រ​​ព័ត៌មាននៅកម្ពុជា។

កម្មវិធីសិក្សាគំរូនេះផ្តល់នូវគោលការណ៍ណែនាំទ្រឹស្តី និងបរិបទស​ម្រា​​​ប់​អ្ន​កសារព័ត៌មាន និងអ្នកអប់រំផ្នែកវិជ្ជាជីវៈសារព័ត៌មាន ព្រមទាំងនិស្សិត ក្នុងការអនុវត្តកិ​ច្ច​កា​រ​សា​រព័ត៌មានដែលមានវិជ្ជាជីវៈនិងក្រមសីលធម៌ ដែលបម្រើជាជម្រើសមួយដែលមាន តម្លៃ​​ខ្ព​ស់​​​និង គួរឱ្យទុកចិត្ត ក្នុងការប្រឆាំងនឹងព័ត៌មានមិនពិតនិងព័ត៌មានខុស។
លោក ខៀវ កាញារីទ្ធ បានសំដែងការរីករាយដែលអង្គការ យូណេស្កូ បាន​ធ្វើ​​ការបកប្រែសៀវភៅនេះ ជាភាសាខ្មែរ ក្រោមកា​រជួយពី​រដ្ឋាភិបា​លនៃ​ប្រទេស​ស៊ុ​យ​អ៊ែត ដោ​យ​​បានបោះពុម្ពជាសៀវភៅវិជ្ជាជីវៈសារព័ត៌មាន ដំណឹងក្លែងក្លាយ និងព័ត៌មានមិនពិត ដែល ផ្ត​​​ល់​សារ:សំខាន់សម្រាប់សារណ:ជន និងអ្នកសារព័ត៌មាន ។

រដ្ឋមន្រ្តីបានលើ​ក​ឡើ​​ងថា ការប្រយុទ្ធប្រឆាំងព័ត៌មានក្លែងក្លាយ ព័ត៌មានមិនពិត ទាមទារឱ្យមាន ចូល​រួម​ស​ហ​​កា​រគ្នាទាំងរដ្ឋ ឯកជន សមាគមអ្នកសារព័ត៌មាន ទើបអាចធ្វើឱ្យមានល​ក្ខណ:កាន់តែល្អប្រសើរ ហើយត្រូវធ្វើអ្វីមួយ កុំដាក់ជាស្វ័យប្រវត្តិ នៅពេលដែលមានគេលើកជាព័ត៌មាន មួ​យ​ម​​ក ដែលហាក់បីដូចជាអវិជ្ជមាន តែជាស្វ័យប្រវត្តិ ចោទគេថាប្រឆាំង ។លោក បានបញ្ជាក់ ពី​​ភា​ពខុសគ្នា រវាងដំណឹងគឺជាផ្នែកមួយ តែព័ត៌មានជាចង្កោមនៃដំណឹង តែបើដំណឹង ក្លែ​ង​ក្លា​យ​កាន់តែច្រើនទៅៗ វាប្រែទៅជាព័ត៌មាន មួយ ហើយដំណឹងនឹងក្លាយទៅជាចរន្តមួយ ដែ​ល​ប​ង្ក​ការមិនទុកចិត្ត បង្កភាពចលាចល ជ្រួលច្របល់ នៅក្នុងសង្គម។

ជាក់ស្តែងក្នុងពេល ដែ​ល​មា​ន​ការឆ្លងរីករាលដាលនៃជំងឺកូវីដ ១៩ មានការផ្សព្វផ្សាយនៅប្រទេសខ្លះ ថាជំងឺនេះ ជារឿ​ង​ធ​ម្មតា តែចុងក្រោយមានអ្នកស្លាប់ដោយសារជំងឺនេះ នៅទូទាំងពិភពលោក រាប់លាន នាក់ ហើ​យសម្រាប់ប្រទេសដែលមានការជឿជាក់ និងមានព័ត៌មានពិត មានវិធានការ ការពារ ច្បា​ស់​លា​ស់ មិនមានអ្នកស្លាប់ ឬស្លាប់តិចតួចតែប៉ុណ្ណោះ។ ដូច្នេះព័ត៌មានក្លែងក្លាយ វាបាន ធ្វើ​ឱ្យ​ប៉ះ​ពាល់ ខ្លាំងមិនមែនត្រឹមតែ នយោបាយ នោះទេ វាប៉ះពាល់ដល់សេដ្ឋកិច្ច និងគ្រប់ ជីវ​ភា​ព​ក្នុ​ង​សង្គម ។

ដូច្នេះសម្រាប់សៀវភៅនេះ គឺមានសារសំខាន់ដល់សាធារណ:ជន និង អ្ន​ក​សា​រ​ព័​ត៌​មាន ក្នុងការប្រយុទ្ធប្រឆាំងព័ត៌មានក្លែងក្លាយឱ្យកាន់តែមានប្រសិទ្ធភាព ហើ​យស​ម្រា​ប់​ក្រ​សួង ព័ត៌មាន មិនបានយល់ស្របទៅនិងគំនិត ដែលចង់ឱ្យ​បង្កើតច្បាប់ ប្រឆាំងព័ត៌មា​ន​ក្លែ​ង​ក្លា​យនោះទេ ព្រោះការធ្វើច្បាប់នេះ វាពិបាកក្នុងការកំណត់ណាស់ ហើយ មិនបាន ការពា​រ​ផ​ល​ប្រ​យោជន៍រួមនោះទេ តែវាអាចការពារផលប្រយោជន៏បុគ្គល ហើយអាច ក្លាយទៅ ជាកា​រ​រំ​លោ​ភ​សិទ្ធិក្នុងការបញ្ចេញមតិ ទៅវិញ៕SRP

ភ្នំពេញ៖ប្រមុខដឹកនាំកម្ពុជា សម្ដេចតេជោ ហ៊ុន សែន នាយករដ្ឋមន្ត្រីបានធ្វើការអះអាងជាថ្មីថាកម្ពុជា មានមាស ដែលជាទុនបម្រុងរបស់ជាតិ ជាង៣០តោន។

សាររបស់មេដឹកនាំកម្ពុជា សម្ដេចតេជោ ហ៊ុន សែន តាមរយ:ទំព័រផេកផ្លូវការនៅព្រហស្បតិ៍ទី២៣ខែកក្ដដាឆ្នាំ២០២០នេះបានសរសេរថា៖មួយរយៈពេលចុងក្រោយនេះ
មានបងប្អូនយើងមួយចំនួនចង់ដឹងអំពី
មាសដែលជាទុនបម្រុងរបស់ជាតិ។
ការចង់ដឹងរបស់បងប្អូនមួយចំនួនធំមាន
ភាពសុចរិតពីព្រោះវាជារបស់ជាតិតែនៅ
មានជនអាក្រក់មួយចំនួនតូចបាននិង
កំពុងប្រើប្រាស់ការបាត់បង់ដំណឹងអំពី
មាសដើម្បីវាយប្រហាររាជរដ្ឋាភិបាល
ថាចង់បន្លំយកមាសក្នុងពេលមានជំងឺ
ឆ្លងកូវីដ១៩ព្រោះមិនដែលឮលោក
ហ៊ុន សែននិយាយពីមាសនេះទៀតទេ។
ដើម្បីច្បាស់ពីមាសសូមមើលការពន្យល់
របស់ធនាគារជាតិកម្ពុជានោះបងប្អូន
ប្រាកដជាយល់និងអបអរសាទរជាមួយ
ទុនបម្រុងរបស់ជាតិយើងដែលកើនឡើង
ជាលំដាប់។

នាយករដ្ឋមន្រ្តីកម្ពុជា បានបញ្ជាក់បន្ថែមថា
ប្រហែលមួយឆ្នាំមុនខ្ញុំធ្លាប់ប្រកាសថា
មាសរបស់យើងមាន៣០តោនតែតាម
តួលេខថ្មីនេះមាសរបស់យើងមានដល់៣៦,៥តោន។ នាយករដ្ឋមន្ត្រីថា នេះមិនមែនជាមារយាទ
ស្រីកញ្ជើធ្លុះក្នុងការគ្រប់គ្រងសេដ្ឋកិច្ច
ជាតិនោះទេ៕SRP

ភ្នំពេញ៖ក្រុមសកម្មជនការពារព្រៃឈើ និងបរិស្ថាន បានចេញសេចក្តីថ្លែងការរួមមួយ ទាមទារឲ្យរដ្ឋាភិបាលកម្ពុជាបិទអាជីវកម្មរបស់ក្រុមហ៊ុនវចំនួន២ ដែលកំពុងធ្វើអាជិវកម្មក្នុងតំបន់ព្រៃធម្មជាតិ ជាពិសេសតំបន់ព្រៃឡង់ ដែលការពារដោយរដ្ឋាភិបាល និង ជំនួយបរទេស។
សេចក្តីថ្លែងការណ៍រួមដែលចេញនៅព្រឹកថ្ងៃទី២០ ខែកក្កដា ឆ្នាំ២០២០ នេះ បានធ្វើឡើងបន្ទាប់ពីការស្លាប់របស់លោក សែម សុទ្ធា ដែលសកម្មជនការពារព្រៃឈើដែលបានស្លាប់ដោយសារជិះម៉ូតូដួលពេលគេច ពីការដេញតាមរបស់ពួកសន្តិសុខការពារក្រុមហ៊ុន Think Biotech និង Angkor flywood បន្ទាប់ពួកគេបានធ្វើស៊ើបអង្កេត សកម្មភាពរបស់ក្រុមហ៊ុនទាំងពីរ។ ខាងក្រោមនេះជាសេចក្តីថ្លែងការរួមរបស់ក្រុមសកម្មជនការពារព្រៃឈើ និងបរិស្ថាន ៖

សេចក្តីថ្លែងការណ៍រួម បិទអាជីវកម្មឈើរបស់ក្រុមហ៊ុន Think Biotech (Cambodia) Co., Ltd / Angkor Plywood Co. Ltd ចេញពីព្រៃធម្មជាតិ “ឈុត វុទ្ធី លះបង់ជីវិតដើម្បីបិទរោងចក្រវល្លិរមៀតនៅកោះកុង ខ្ញុំក៏សុខចិត្តលះបង់ជីវិតដើម្បីបិទអាជីវកម្មឈើរបស់ក្រុមហ៊ុន Think Biotech (Cambodia) Co., Ltd / Angkor Plywood Co. Ltd នៅព្រៃឡង់ ឲ្យទាល់តែបានដែរ” នេះជាសារបណ្តាំ និងការប្តេជ្ញាចិត្តចុងក្រោយ របស់លោក សែន សុធា។
ព្រះសង្ឃ សកម្មជន សហគមន៍ សមាគម អង្គការ សង្គមស៊ីវិល ធ្វើកិច្ចការខាងព្រៃឈើ សម្តែងនូវភាពអស់សង្ឃឹម និងគ្មានលទ្ធភាពដែលអាចជួយចូលរួមការពាព្រៃឈើ តទៅទៀតបានទេ នៅពេលដែលមានការរារាំង ហាមឃាត់យើងខ្ញុំ មិនឲ្យចូលទៅក្នុងតំបន់ការពារនៃដែនជំរកសត្វព្រៃ ដើម្បីស៊ើបអង្កេតបទល្មើសព្រៃឈើ និងល្បាតព្រៃ ដែលការហាមឃាត់នេះ ត្រូវបានផ្តល់ឳកាសដ៏ល្អ សម្រាប់ឧក្រិដ្ឋជនព្រៃឈើ ជាពិសេសក្រុមហ៊ុនអាជីវកម្មឈើនានា សំរុកកាប់ និងដឹកជញ្ជូនឈើ ចេញពីតំបន់ការពារ ដោយរលូន និងយ៉ាងគឃ្លើន ថែមទៀតផង។ ទឹកភ្នែករបស់យើងខ្ញុំ បានហូរស្រក់ដោយមិនដឹងខ្លួន និងមានការឈឺចាប់យ៉ាងខ្លាំង នៅពេលដែលបានឃើញដើមឈើធំៗគ្រប់ប្រភេទ ពិសេសដើមច្បោះ ត្រូវបានគេកាប់យ៉ាងរង្គាល និងដឹកជញ្ជូនយ៉ាងគគ្រឹកគគ្រេង នៅនឹងមុខ យកទៅផ្គត់ផ្គង់ឲ្យក្រុមហ៊ុន Think Biotech (Cambodia) Co., Ltd ដើម្បីធ្វើអាជីវកម្មនាំឈើចេញទៅទីផ្សារអន្តរជាតិបន្តទៀត តាមរយៈក្រុមហ៊ុនដៃគូរឈ្មោះ Angkor Plywood Co., Ltd បើទោះបីជាគ្រឿងចក្ររោងចក្រអារឈើ និងផលិតក្តារបន្ទះរបស់ក្រុមហ៊ុនទាំងពីរនេះ បានរុះរើ បញ្ឈប់សកម្មភាពផលិតឈើ នៅដើមឆ្នាំ២០២០នេះ ក៏ដោយ ក៏អាជីវកម្មឈើចេញពីព្រៃធម្មជាតិ ក៏នៅតែបន្តឥតឈប់ឈរ ជារៀងរាល់ថ្ងៃដដែល។ អាជីវកម្មឈើរបស់ក្រុមហ៊ុនទាំងនេះ នៅតែបន្តក្នុងអំឡុងពេលការរីករាលដាលនៃជំងឺ កូវីឌ ១៩ ស្របពេលដែល សកម្មជនព្រៃឈើ ពិសេសបណ្តាញព្រៃឡង់ ព្រមទាំងបណ្តាញព្រៃឈើដទៃទៀត ត្រូវបានរារាំង ធ្វើទុក្ខបុកម្នេញ គំរាមកំហែង ចាប់ខ្លួនពីសំណាក់អាជ្ញាធរ ហាមឃាត់ មិនឲ្យចូលទៅក្នុងតំបន់ស្នូលព្រៃឡង់ នាពេលកន្លងមក។ យើងខ្ញុំនៅតែសង្ស័យថា តើមូលហេតុអ្វីបានជារដ្ឋាភិបាល មិនព្រមបិទអាជីវកម្ម អាជីវកម្មឈើរបស់ក្រុមហ៊ុនទាំងនេះ សូម្បីតែម្ចាស់ជំនួយ USAID/ Greening Prey Lang អង្គការជាតិ អន្តរជាតិ និងបណ្តាញសហគមន៍ព្រៃឡង់ ក៏ធ្លាប់បានចេញជារបាយការណ៍ជាផ្លូវការ និយាយអំពីការកាប់បំផ្លាញព្រៃឈើនៅក្នុងដែនជំរកព្រៃឡង់ មានការពាក់ព័ន្ធនឹងក្រុមហ៊ុនទាំងនេះ ជាច្រើនលើក ច្រើនសារដែរ តែទៅជាយ៉ាងណា ក៏អាជីវកម្មឈើរបស់ក្រុមហ៊ុនទាំងពីរនេះ នៅតែអាច បន្តសកម្មភាពបានដដែល ។ ក្នុងរយៈពេលនៃការហាមឃាត់ពីសំណាក់អាជ្ញាធរ សកម្មជនព្រៃឈើ ក៏បានរកឃើញ ការកាប់ឈើ និងដឹកជញ្ជូនឈើឃ្លុំ មានដូចជា បេង សុក្រម ផ្តៀក កកោះ ជាពិសេស ឈ្លីក ត្រសេក ឈើទាល ស្រឡៅ ជាតម្រូវការរបស់ក្រុមហ៊ុន ដែលដឹកដោយគោយន្តរាប់រយគ្រឿង ហើយនៅពេលថ្មីៗនេះ ក្រុមហ៊ុន បានប្រើយុទ្ធសាស្ត្រថ្មី ដោយមិនមានរោងចក្រអារឈើ មិនមានដេប៉ូ ឬ គំនរឈើ មិនមានឃ្លាំងស្តុកឈើ តទៅទៀតទេ ដើម្បីកុំឲ្យបន្សល់ទុកនូវភស្តុតាងបង្ហាញពីឧក្រិដ្ឋកម្មព្រៃឈើ នៅក្នុងក្រុមហ៊ុនទាំងនេះ នៅពេលមានក្រុមការងារអធិការកិច្ចថ្នាក់ជាតិ ចុះមកស៊ើបអង្កេតម្តងៗ។ មេការក្រុមហ៊ុនបានពង្រាយកម្មករ ចូលទៅក្នុងព្រៃរកឈើ ដោយកាប់ ប្រមូលឈើ ពីក្នុងដែនជំរក ដឹកចូលទៅក្នុងបរិវេណរដ្ឋបាល Think Biotech (Cambodia) Co., Ltd នៅភូមិ អាជេន ស្រុកសំបូរ រួចវាស់វែង និងទូទាត់ប្រាក់កំរៃដល់អ្នករកឈើ តាមរូបមន្ត មេគុណ ៨០ ក្នុងតម្លៃ ៤០ ០០០០រៀល (សែសិបម៉ឺនរៀល) ក្នុង១ម៣។ អ្នករកឈើភាគច្រើន ទទួលបានការឧបត្ថម្ភផ្នែកសំភារៈ បរិក្ខា និងហិរញ្ញវត្ថុ ព្រមទាំងត្រូវបានធានាផ្នែកច្បាប់ ពីសំណាក់ក្រុមហ៊ុន ថែមទៀតផង។ ជាក់ស្តែងកាលពីថ្ងៃទី១២ ដល់ ១៦ ខែកក្កដា ឆ្នាំ២០២០ ថ្មីៗនេះ ក្រុមសកម្មជនស៊ើបអង្កេត បានឃើញគំនរឈើឃ្លុំ ថ្មីៗជាច្រើនដុំ គរ រាយប៉ាយ នៅខាងក្រោយអាគាររោងចក្រអារឈើ Think Biotech (Cambodia) Co., Ltd ស្របពេលដែលមានក្បួនឡានដឹកឈើ ប្រភេទV1 ចំនួនប្រាំបីគ្រឿង បានចូលទៅដឹកឈើនៅក្នុងក្រុមហ៊ុន ហើយដឹកចេញឈើមកវិញ មានគ្របបិទជិតឈឹងចំនួនបួនឡាន ដែលអ្នកភូមិ និងអ្នកអារឈើ អះអាងថាជាប្រភេទឈើឃ្លុំ និង២ឡានទៀត ដឹកឈើអុស ដោយមិនមានគ្របអ្វីឡើយ។ នៅពេលមានការដឹកជញ្ជូនឈើម្តងៗ យើងឃើញមានការជួយសម្រួល និងការពារពីសំណាក់មន្ត្រីពាក់ព័ន្ធ អាជ្ញាធរគ្រប់លំដាប់ថ្នាក់ ព្រមទាំងបណ្តាញ ភ្នាក់ងារក្រុមហ៊ុន និងអ្នកប្រចាំការ បានដាក់ពង្រាយតាមបែប ភ្នែកសេក ភ្នែករលក នៅគ្រប់តាមច្រកផ្លូវធំចូលពីចំងាយ រហូតដល់ក្រុមហ៊ុន ដោយមានកំលាំងសន្តិសុខ បានដាក់កំលាងពង្រាយ គ្រប់ទីកន្លែង គ្រប់ច្រកល្ហក យាមកាមយ៉ាងតឹងរ៉ឹងបំផុត ដើម្បីកុំឲ្យអ្នកកាសែត សកម្មជន អង្គការ ឬ អ្នកចម្លែក ចេញចូល ទៅក្នុងតំបន់អាជីវកម្មឈើ នោះ បានឡើយ។ កាលពីថ្ងៃទី១៦ ខែកក្កដា ឆ្នាំ២០២០ លោក សែន សុធា បានចូលទៅស៊ើបអង្កេតអាជីវកម្មឈើរបស់ក្រុមហ៊ុនទាំងនេះ លោកបានថតក្បួនគោយន្តដឹកឈើ កាត់តាមភូមិកំភ្លុក ចូលទៅរោងចក្រអារឈើ លោកក៏បានជួបជាមួយ មេសន្តិសុខក្រុមហ៊ុន ហើយ លោកក៏ត្រូវបាន ណែនាំឲ្យចេញពីតំបន់នោះ បើចេញមិនទាន់ពេលទេ ក្រុមហ៊ុននឹងដាក់សន្តិសុខព័ទ្ធចាប់ខ្លួន ជាមិនខានឡើយ ដោយភ័យខ្លាចខ្លាំងពេក លោក សែន សុធា ក៏បាន ជិះម៉ូតូចាកចេញពីទីនោះ ទាំងយប់ម៉ោង ៨ រហូតធ្លាក់គ្រលុក ដួលមានរបួសធ្ងន់ រហូតដល់ស្លាប់ នៅយប់នោះតែម្តង។ ជាថ្មីម្តងទៀត យើងខ្ញុំទទូចម្តងហើយ ម្តងទៀត សូមឲ្យរាជរដ្ឋាភិបាល បិទអាជីវកម្មឈើរបស់ក្រុមហ៊ុនខាងលើនេះ ជាស្ថាពរ ដើម្បីបញ្ជាក់ជំហរឲ្យបានច្បាស់លាស់ អំពីឆន្ទៈការពារ និងអភិរក្សព្រៃឈើ ពិតប្រាកដមែននោះ ដើម្បីទុកជាកេរ្តិ៍មរតកដូនតា យើងផង ទុកជាប្រព័ន្ធការពារបរិស្ថានដ៏រឹងមាំផង និងទុកជាប្រយោជន៍ដ៏ចាំបាច់បំផុតសំរាប់អាយុមនុស្សលោក យើងទាំងអស់គ្នាផង។ ជាពិសេស រាជរដ្ឋាភិបាល ត្រូវតែបើកឳកាសឲ្យយើងខ្ញុំទាំងអស់គ្នា បានចូលទៅក្នុងតំបន់ការពារ ដើម្បីបន្តល្បាតព្រៃ និង ស៊ើបអង្កេត ស្រាវជ្រាវបទល្មើសព្រៃឈើ ឡើងវិញ ដើម្បីបង្ហាញពីកិច្ចសហការ ចូលរួមការពារព្រៃឈើ ទាំងអស់គ្នា។ រាជធានីភ្នំពេញ ថ្ងៃទី ២១ ខែកក្កដា ឆ្នាំ២០២០

ភ្នំពេញ៖មានការលើកឡើងថារថយន្តដឹកទំនិញផ្ទុកធ្ងន់លើសទម្ងន់មួយចំនួន ត្រូវបានមន្ត្រីលួចទម្លាយថា មិនបានចូលថ្លឹងក្នុងស្ថានីយ៍ជញ្ជីងថ្លឹងរថយន្តមានជ័យ ផ្លូវជាតិលេខ៧ ស្រុកស្នួល ខេត្តក្រចេះ ខណៈមានទំនាក់ទំនងល្អជាមួយគ្នា រវាងអ្នកគ្រប់គ្រងនៅទីនោះ ជាមួយឈ្មួញ ពិសេសក្រុមហ៊ុនដឹកជញ្ជូនទំនិញពីវៀតណាមតាមច្រកអន្តរជាតិ ត្រពាំងស្រែ-វ៉ាលឺ ភាគតិចណាស់ត្រូវបានចូលថ្លឹងតាមច្បាប់កំណត់ ឬតាមផែនការរបស់ក្រសួងសាធារណការ និងដឹកជញ្ជូន ជាតម្រុយមួយដែលគេដាក់ភាពសង្ស័យថា អាចមានអំពើពុករលួយ ណាមួយពីក្រុមឈ្មួញដឹកជញ្ជូនផ្ទុកលើសទំងន់។ ផ្ទុយទៅវិញបើ លោក សាំង ប៊ុនថេន និងលោក នូ សុវណ្ណា ប្រធាន-អនុប្រធានមន្ទីរសាធារណការ និងដឹកជញ្ជូនខេត្តក្រចេះ ទំនងជាប់ពាក់ព័ន្ធនឹងផលប្រយោជន៍នោះ ផងដែរ។ នេះបើយោងតាមសារព័ត៌មាន នគរដ្រេហ្គន បានចុះផ្សាយនៅព្រឹកមិញនេះ។

គេហទំព័រ នគរដ្រេហ្គន បានបញ្ជាក់ថាក្រសួងសាធារណការ និងដឹកជញ្ជូន បានបញ្ជាក់យ៉ាងច្បាស់ថា៖ «ម្ចាស់រថយន្តដឹកទំនិញត្រូវដឹងថាការដឹកលើសទម្ងន់គឺជាការបំផ្លាញផ្លូវជាតិ» ដូច្នេះមន្ត្រីណាជាប់ពាក់ព័ន្ធនឹងម្ចាស់រថយន្តដឹកទំនិញ ដឹងថាការដឹកលើសទម្ងន់ ហើយអនុញ្ញាតឱ្យដឹកទៅ គឺស្មើ(បំផ្លាញផ្លូវជាតិ=បំផ្លាញជាតិ) ។ បញ្ហានេះគួរថ្នាក់លើពិនិត្យឡើងវិញ ថាតើ លោក សាំង ប៊ុនថេន ប្រធានប្រធានមន្ទីរសាធារណការ និងដឹកជញ្ជូនខេត្តក្រចេះ និងលោក នូ សុវណ្ណា អនុប្រធានមន្ទីរទទួលបន្ទុកគ្រប់គ្រងស្ថានីយ៍ជញ្ជីងថ្លឹងរថយន្តមានជ័យ ផ្លូវជាតិលេខ៧ មានភាពមិនប្រក្រតីដូចមន្ត្រីខ្លះបានបង្ហើបឬមួយយ៉ាងណា .?
មន្ត្រីបានគូសបញ្ជាក់ថា៖ ខាងក្រសួងសាធារណការ និងដឹកជញ្ជូន បានកំណត់យ៉ាងច្បាស់ពីប្រភេទរថយន្ត ទម្ងន់តាមភ្លៅអនុញ្ញាត ទម្ងន់សរុបអនុញ្ញាត ពិន័យលើសទម្ងន់ ក្នុងនោះលើសទម្ងន់ពិន័យពី១០ម៉ឺនរៀល ទៅ៣០ម៉ឺនរៀលក្នុង១តោន ។ មន្ត្រីនៅទីនោះលួចបង្ហើបថា៖ មាន១០ប្រភេទរថយន្ត ទម្ងន់តាមភ្លៅអនុញ្ញាត និងទម្ងន់សរុបអនុញ្ញាត។ ក្នុងនោះ ទី១-រថយន្តភ្លៅ២ អនុញ្ញាតឱ្យផ្ទុក ១៦តោន ។ ទី២-រថយន្តភ្លៅ៣ មានន័យថា៖ ផ្នែកកាប៊ីនមុខផ្ទុកទម្ងន់១១តោន ទ្រុងខាងក្រោយភ្លៅ១ ផ្ទុកទម្ងន់១០តោន ដូច្នេះទម្ងន់អនុញ្ញាត គឺ២១តោន ។ ទី៣-រថយន្តភ្លៅ៣ ដែលមានកន្លែងកាប៊ីនភ្លៅ១ ផ្ទុកទម្ងន់៦តោន ហើយផ្នែកខាងទ្រុងក្រោយមានភ្លៅ២ អាចផ្ទុកទម្ងន់១៩តោន ដូច្នេះទម្ងន់អនុញ្ញាត គឺ២៥តោន។ ទី៤-រថយន្តភ្លៅ៤ ផ្នែកកាប៊ីនភ្លៅ២ មានទម្ងន់១១តោន និងទ្រុងមានភ្លៅ២ ផ្ទុកទម្ងន់១៩តោន ដូច្នេះទម្ងន់អនុញ្ញាត គឺ៣០ តោន។ ទី៥-រថយន្តមានភ្លៅ៥ ខាងកាប៊ីនភ្លៅ២ ផ្ទុកទម្ងន់១១តោន ផ្នែកខាងក្រោយមានទ្រុងភ្លៅ៣ ផ្ទុកទម្ងន់២៤តោន ដូច្នេះទម្ងន់អនុញ្ញាត គឺ៣៥តោន។ ទី៦-រថយន្តសណ្តោងមានភ្លៅ៥ ផ្នែកកាប៊ីនភ្លៅ១ផ្ទុក៦តោន ផ្នែកទ្រុងក្រោយភ្លៅ១ផ្ទុក១០តោន និងកន្ទុយសណ្តោងមានភ្លៅ២ផ្ទុក២០តោន ដូច្នេះទម្ងន់អនុញ្ញាត គឺ៣៥តោន។ ទី៧-រថយន្តសណ្តោងកាប៊ីនភ្លៅ១ផ្ទុក៦តោន ទ្រុងក្រោយភ្លៅ២ផ្ទុក១៩តោន កន្ទុយសណ្តោងភ្លៅ២ផ្ទុក១៦តោន ដូច្នេះទម្ងន់អនុញ្ញាត គឺ៤០តោន។ ទី៨-រថយន្តកុងតឺន័រ មានក្បាលនិងកាប៊ីនភ្លៅ២ផ្ទុក១៦តោន ផ្នែកកុងតឺន័រមានភ្លៅ២ផ្ទុក១៩តោន ដូច្នេះទម្ងន់អនុញ្ញាត គឺ៣៥តោន។ ទី៩-រថយន្តកុងតឺន័រមានភ្លៅ៥ ផ្ទុក៤០តោន និងទី១០-រថយន្តកុងតឺន័រមានភ្លៅ៥ ក្បាលនិងកាប៊ីនផ្ទុកភ្លៅ២ផ្ទុក១៦តោន កុងតឺន័រភ្លៅ៣ផ្ទុក២៤តោន ដូច្នេះទម្ងន់អនុញ្ញាត គឺ៤០តោន។ ផ្ទុយទៅវិញតើ លោក សាំង ប៊ុនថេន ប្រធានមន្ទីរសាធារណការ និងដឹកជញ្ជូនខេត្តក្រចេះ និងលោក នូ សុវណ្ណា អនុប្រធានមន្ទីរទទួលបន្ទុកគ្រប់គ្រងស្ថានីយ៍ជញ្ជីងថ្លឹងរថយន្តមានជ័យ ផ្លូវជាតិលេខ៧ អនុវត្តតាមការកំណត់នេះបានទេ..! ពួកគាត់ពិន័យតិចតួចបំផុត តែបើអំពើឃុបឃិតគ្នា ទាញយកប្រយោជន៍ពីឈ្មួញដឹកផ្ទុកលើសទម្ងន់នោះអាចជាវប្បធម៌សេដ្ឋកិច្ចឆ្នាំងបាយរបស់ពួកគាត់ នឹងគិតគូរដល់ថ្នាក់លើពាក់ព័ន្ធ។
មន្ត្រីបានបង្ហើបបន្តថា៖ នៅស្ថានីយ៍ជញ្ជីងថ្លឹងរថយន្តមានជ័យ ផ្លូវជាតិលេខ៧ ស្រុកស្នួល ខេត្តក្រចេះ មានសមាសភាពច្រើនស្ថាប័ន ក្នុងនោះ មានខាងក្រសួង៣រូប ខាងមន្ទីរ៣រូប ខាងតំណាងសាលាខេត្ត១រូប ខាងកម្លាំងកងរាជអាវុធហត្ថខេត្ត២រូប និងខាងកម្លាំងនគរបាលខេត្ត២រូប សរុបចំនួន ១១រូប នោះក៏ពិតមែន ប៉ុន្តែភាពមិនប្រក្រតីក្នុងការទាញយកប្រយោជន៍ពីឈ្មួញដឹកផ្ទុកលើសទម្ងន់នៅតែមានដដែល។
មន្ត្រីបានធ្លោយថា៖ ភាគច្រើនការដឹកទំនិញមកពីច្រកអន្តរជាតិត្រពាំងស្រែ-វ៉ាលឺ ត្រូវផ្ទុកលើសទំងន់ដើម្បីចំណាយលើខាងជញ្ជីង សមត្ថកិច្ចតាមផ្លូវ ។ ក្រៅពីនោះឡានដឹកដំឡូង ឡានដឹកឈើនេះជាដើម។ លើកលែងតែឡានដឹកថ្មម៉ាតទេ មិនផ្ទុកលើសទម្ងន់បើក្នុងទិសដៅពីស្រុកស្វាយជ្រះ មកកាន់រាជធានីភ្នំពេញ ព្រោះបើផ្ទុកលើសពិបាកលើកចេញ។ ប៉ុន្តែឡានដឹកថ្មម៉ាតពីស្រុកស្វាយជ្រះ ទៅកាន់វៀតណាមឆ្លងកាត់ច្រកអន្តរជាតិត្រពាំងស្រែ-វ៉ាលឺ គឺ១០០%ផ្ទុកលើសទំងន់តែម្តង។
ពាក់ព័ន្ធនឹងការរិះគន់ខាងលើនេះ បណ្ដាញសៀមរាបប៉ុស្ដិ៍ នៅមិនទាន់ទទួលបានការបកស្រាយបំភ្លឺពីលោក សាំង ប៊ុនថេន ប្រធានប្រធានមន្ទីរសាធារណការ និងដឹកជញ្ជូនខេត្តក្រចេះ បាននៅឡើយទេ។ ដោយឡែកលោក នូ សុវណ្ណា អនុប្រធានមន្ទីរទទួលបន្ទុកគ្រប់គ្រងស្ថានីយ៍ជញ្ជីងថ្លឹងរថយន្តមានជ័យ ផ្លូវជាតិលេខ៧ តាមទូរស័ព្ទជាមួយសារព័ត៌មានក្នុងស្រុកមួយថា» លោកបញ្ជាក់ថា «ឡានផ្ទុកធ្ងន់ដែលមិនចូលថ្លឹង មកពីឡាននោះបើកគេច ពីកន្លែងជញ្ជីង ហើយខាងក្រុមការងារដេញចាប់ និងតម្រូវឱ្យបង់ពិន័យ..» រួចក៏បិទទូរស័ព្ទតែម្តង។
លោក គង់ វិមាន អ្នកនាំពាក្យក្រសួងសាធារណការ និងដឹកជញ្ជូន ពាក់ព័ន្ធការលើកឡើងខាងលើនោះ លោកមិនអាចបកស្រាយបានទេ តាមទូរស័ព្ទលោកបញ្ជាក់ថា៖ គួរតែសួរទៅកាន់ លោក ឯក រ័ត្ន អនុរដ្ឋលេខាធិការ ទទួលបន្ទុកផ្នែកស្ថានីយ៍ជញ្ជីងថ្លឹងរថយន្ត។ ទោះយ៉ាងណាសៀមរាបប៉ុស្ដិ៍  មិនអាចទាក់ទងសុំការបំភ្លឺបានទេ ពីលោក ឯក រ័ត្ន អនុរដ្ឋលេខាធិការ ក្រសួងសាធារណការ និងដឹកជញ្ជូន នៅរសៀលថ្ងៃដដែលនេះ ដោយគ្មានលេខទូរស័ព្ទ។
មន្ត្រីបានលួចបង្ហើបថា៖ លោក នូ សុវណ្ណា អនុប្រធានមន្ទីរទទួលបន្ទុកគ្រប់គ្រងស្ថានីយ៍ជញ្ជីងថ្លឹងរថយន្តមានជ័យ ផ្លូវជាតិលេខ៧ ឆ្លៀតពុករលួយបាន អាចប្រើក្នុងរូបភាព ទី១-ក្នុងហេតុផលថ្នាក់លើបានណែនាំ មិនឱ្យថ្លឹងរថយន្តទាំងអស់ទេ បើមើលទៅឃើញថា មិនផ្ទុកធ្ងន់ ឱ្យទៅ ចៀសវាងការថ្លឹងច្រើនញឹកញាប់ពេក អាចបណ្តាលអោយជញ្ជីងខូច(អេរើជញ្ជីង)។ ចំណុចនេះហើយដែលធ្វើឱ្យអ្នកគ្រប់គ្រងស្ថានីយ៍ជញ្ជីងថ្លឹងរថយន្តមានឱកាស ឱ្យរថយន្តផ្ទុកលើសទម្ងន់ដែលត្រូវដងត្រូវផ្លែ មិនបាច់ចូលថ្លឹង។ ទី២-មានការណែនាំពីថ្នាក់លើ បើផ្ទុកលើសត្រឹម០.៥% មិនបាច់ពិន័យទេ តែធាតុពិតមិនលើសទម្ងន់០.៥%ឯណា គឺលើសទម្ងន់ច្រើនៗ។ ដូចជាគោលការណ៍លើសទម្ងន់ពិន័យពី១០មុឺនរៀល ទៅ៣០មុឺនរៀលក្នុង១តោន ឃើញថា អនុវត្តបានតិចតួចបំផុត ។

សូមរំលឹកថា៖ ក្នុងខែមិថុនា ឆ្នាំ២០២០ លេខាធិការដ្ឋានរបស់គណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ ចាប់បានរថយន្តដឹកទំនិញលើសទម្ងន់កម្រិតកំណត់ ចំនួន ២២៨គ្រឿង និងពិន័យបានថវិកាសរុបចំនួន ៤០៤ ៨៤០ ០០០រៀល។ តាមរបាយការណ៍ ចំនួនរថយន្តដែលចាប់បានមានការថយចុះចំនួន ៤៨គ្រឿង បើប្រៀបធៀបទៅនឹងតួលេខខែមេសា ឆ្នាំ២០២០ ដែលមានចំនួន ២៧៦គ្រឿង៕SRP

ភ្នំពេញ៖ក្រុមមន្ត្រីជាន់ខ្ពស់ នៃរដ្ឋបាលព្រៃឈើ ក្រសួងកសិកម្មចំនួន០៨រូប
បានចុះពង្រឹងការអនុវត្តច្បាប់ ពិនិត្យស្រាវជ្រាវ និងផ្ទៀងផ្ទាត់ព័ត៌មានបទល្មើសព្រៃឈើនៅក្នុងក្រុមហ៊ុន សៀ ម៉ុន (ខេមបូឌា) អេហ្គ្រីខលឈ័រ ខមប្រេអេនស៊ីវ.ឌីវេឡុបម៉ិន ឯ.ក
ដែលមានទីតាំងស្ថិតក្នុងខេត្តស្ទឹងត្រែង ក្រោយបែកធ្លាយភាពមិនប្រក្រតីតាមបណ្ដាញសារព័ត៌មានថា ក្រុមហ៊ុន សៀម៉ុន បានបង្វែរឈើឲ្យស្របច្បាប់។
នេះបើយោងលិខិតបញ្ជាបេសកកម្មលេខ៣៧៩ រ ព.នរផ.ប ចុះថ្ងៃទី១៣ ខែកក្តដា ឆ្នាំ២០២០ របស់រដ្ឋបាលព្រៃឈើ ដែលមានចុះហត្ថលេខាដោយ លោកបណ្ឌិត កែវ អូម៉ាលីស្ស ប្រតិភូរាជរដ្ឋាភិបាលទទួលបន្ទុកជាប្រធានរដ្ឋបាលព្រៃឈើ។
សូមរំលឹកថាការចាត់តាំងមន្ត្រីរដ្ខបាលព្រៃឈើឲ្យចុះទៅស្រាវជ្រាវបទល្មើសក្នុងក្រុមហ៊ុនសៀ ម៉ុន បន្ទាប់ពីមានបណ្តាញព័ត៌មានជាច្រើនបានធ្វើការផ្សព្វផ្សាយថា មានការសង្ស័យមានឈ្មួញឈើដែលមានងារជាឧកញ៉ាម្នាក់ បានកាប់ឈើពីខាងក្រៅក្រុមហ៊ុនរួចដឹកជញ្ជូនចូលក្នុងដីក្រុមហ៊ុន សៀ ម៉ុន ទីតាំងស្ថិតក្នុង ឃុំព្រែកមាស ស្រុកសៀមប៉ាង ខេត្តស្ទឹងត្រែង ឲ្យក្លាយជាឈើស្របនិងច្បាប់។
ពាក់ព័ន្ធទៅនឹងបណ្ដាញសារព័ត៌មានបានផ្សព្វផ្សាយពីភាពមិនប្រក្រតីរបស់ក្រុមហ៊ុន សៀ ម៉ុន កាលពីថ្ងៃទី១០ ខែកក្កដា ឆ្នាំ២០២០ ក្រុមហ៊ុន សៀ ម៉ុន បានចេញលិខិតបំភ្លឺ តាមរយៈលោកមេធាវី ហេង សុទ្ធារ៉ា ដោយបានធ្វើការបដិសេធ និងបញ្ជាក់ថា ក្រុមហ៊ុនមិនបានប្រព្រឹត្តដូចការចោទប្រកាន់នេះទេ គឺក្រុមហ៊ុនបានអនុវត្តយ៉ាងខ្ជាប់ខ្ជួន តាមលិខិតអនុញ្ញាតលេខ ៤៥១ សជណ.កស ចុះថ្ងៃទី០៨ខែមិថុនា ឆ្នាំ២០១៧ របស់ទីស្តីការគណៈរដ្ឋមន្ត្រី និងលិខិតលេខ ៥០៦៩ សកស ចុះថ្ងៃទី២៥ ខែឧសភា ឆ្នាំ២០១៨ របស់ក្រសួងកសិកម្ម រុក្ខាប្រមាញ់ និងនេសាទ ដោយឈូសឆាយសំអាតដីប្រមូលផលឈើ និងអនុផលព្រៃឈើ តែក្នុងតំបន់១ និងតំបន់៦B នៃស្ថានីយដាំឈើសៀមប៉ាងតែប៉ុណ្ណោះ ដើម្បីរៀបចំសម្រាប់ដាំដើមឈើឡើងវិញ តាមផែនការរបស់ក្រុមហ៊ុន។
ជុំវិញមន្ត្រីរដ្ឋបាលព្រៃឈើចុះទៅស្រាវជ្រាវរកបទល្មើសក្នុងក្រុមហ៊ុនសៀ ម៉ុន នៅមិនទាន់ដឹងថាលទ្ធផលនៃការចុះពង្រឹងការអនុវត្តច្បាប់ ពិនិត្យស្រាវជ្រាវ និងផ្ទៀងផ្ទាត់ព័ត៌មានបទល្មើសព្រៃឈើនៅក្រុមហ៊ុន សៀ ម៉ុន ចាប់ពីថ្ងៃទី១៤ រហូតដល់ថ្ងៃទី២៤ ខែកក្កដា ឆ្នាំ២០២០ នឹងទទួលបានលទ្ធផលយ៉ាងណានោះឡើយ៕SRP