ខេត្តបាត់ដំបង

ខេត្តបាត់ដំបង៖លោកសុខ លូ អភិបាលខេត្តបាត់ដំបង បានជំរុញឲ្យមន្ត្រីជំនាញពាក់ព័ន្ធទាំងអស់បន្តទប់ស្កាត់បង្ក្រាបបទល្មើសគ្រប់ប្រភេទ។

លោក សុខ លូ បានបន្តមានប្រសាសន៍ថា សូមធ្វើឱ្យមានប្រសិទ្ធភាព ក្នុងការងារបង្ក្រាប បទល្មើសជួញដូរគ្រឿងញៀន ការប្រើប្រាស់គ្រឿងញៀន ការជួញដូរនិងប្រើប្រាស់អាវុធខុសច្បាប់ នៅតាមក្រុង ស្រុក ជាពិសេស តាមច្រកព្រំដែន ក៏នៅតែបន្តក្នុងការបង្រ្កាបរហូត មិនត្រូវបន្ធូរបន្ថយឡើយ ហើយបញ្ហាល្បែងស៊ីសង ក៏នៅតែបន្តនីវិធីបង្ក្រាបនិងការត្រួតពិនិត្យគ្រឿងស្រវឹង នាពេលយប់ក៏នៅតែបន្តផងដែរ។

លោកក៏បានជំរុញ ឲ្យអាជ្ញាធរពាក់ព័ន្ធទាំងអស់ ត្រូវបន្តធ្វើថែមទៀត គឺពង្រឹងនិងបង្រ្កាបរាល់បទល្មើសដូចជា បទល្មើសព្រៃលិចទឹក បទល្មើសនេសាទខុសច្បាប់ បទល្មើសរំលោភទន្ទ្រានយកដីរដ្ឋក្នុងតំបន់ហាមឃាត់ ដើម្បីធ្វើស្រែ និងឈានដល់ទាមទារយកដីរដ្ឋធ្វើជាកម្មសិទ្ធ ត្រូវបង្រ្កាបឲ្យទាន់ពេលវេលា ទំនាស់ដីធ្លីនៅតាមគ្រប់ទីកន្លែង និងជាពិសេសស្រុកជុំវិញបឹងទន្លេសាប។

អភិបាលខេត្តបាត់ដំបងជំរុញបែបនេះ នៅក្នុងកិច្ចប្រជុំគណៈបញ្ជាការឯកភាព រដ្ឋបាលខេត្តបាត់ដំបង នៅព្រឹកថ្ងៃពុធនេះ។

នៅក្នុងកិច្ចប្រជុំ លោកសុខ លូ ក៏បានមានប្រសាសន៍ ណែនាំឱ្យលោក អភិបាលក្រុង ស្រុក កងកម្លាំងទាំងបីបន្តនីតិវិធី និងបន្តការងារ រក្សាសន្តិសុខ សណ្ដាប់ធ្នាប់ ជូនប្រជាពលរដ្ឋ ក្នុងភូមិសាស្ត្ររបស់ខ្លួន ឱ្យបានកាន់តែល្អប្រសើរ តបតាមគោលនយោបាយភូមិ ឃុំ មានសុវត្ថិភាព ដោយបង្រ្កាបមិនឱ្យមានបញ្ហា ក្មេងទំនើង បង្កអសន្តិសុខ ដល់សង្គមបណ្តាល ឱ្យមានការភ័យខ្លាចរំខានដល់ការរស់នៅរបស់ប្រជាពលរដ្ឋឡើយ។

លោកសុខ លូ ក៏បានរំលឹកអំពី យុទ្ធនាការដាំដើមឈើនាពេលកន្លងមក ត្រូវបន្តយកចិត្តទុកដាក់ថែទាំទៅលើដើមឈើ ដែលបានដាំរួចហើយណែនាំនិង ប្រគល់ឲ្យម្ចាស់ផ្ទះ ប្រជាពលរដ្ឋនៅមុខផ្ទះនោះទទួលខុសត្រូវថែរក្សា ដើម្បីសោភ័ណភាពបរិស្ថាន ទេសចរណ៍ ទីក្រុងស្អាត យើងផងដែរ៕SRP

ខេត្តបាត់ដំបង៖លោកសុខ លូ អភិបាលខេត្តបាត់ដំបង បានណែនាំឱ្យ រដ្ឋបាល ក្រុង ស្រុកត្រូវខិតខំបន្តការរុះរើស្លាកយីហោ ផ្សព្វផ្យាយស្រាបៀគ្រប់ប្រភេទ និងរៀបចំសណ្តាប់ធ្នាប់ ការលក់ដូរ តាមដងផ្លូវដែលបំពានលើ ចិញ្ចើមផ្លូវ និងផ្លូវថ្មើរជើង ជាដើម។

ដឹកនាំកិច្ចប្រជុំគណៈបញ្ជាការឯកភាពរដ្ឋបាលខេត្តបាត់ដំបង នៅថ្ងៃព្រហស្បតិ៍ ទី១ ខែសីហា ឆ្នាំ២០២៤ នេះ លោកសុខ លូ ប្រធានគណៈបញ្ជាការឯកភាពរដ្ឋបាលខេត្តបាត់ដំបង ក៏បានជំរុញបន្ថែមទៀតឱ្យបន្តពង្រឹងវិធានការ បង្ការទប់ស្កាត់ និងបង្ក្រាបបទល្មើសគ្រប់ប្រភេទ ជាពិសេសបញ្ហាល្បែងស៊ីសង ក្មេងទំនើង ការជួញដូរមនុស្ស ឱ្យកាន់តែខ្លាំងក្លាថែមទៀត ដោយយកចិត្តទុកដាក់ទប់ស្កាត់ និងបង្ក្រាបឱ្យមាន ប្រសិទ្ធភាព ក្នុងសកម្មភាពជួញដូរពលករឆ្លងដែន និងចំណាកស្រុកខុសច្បាប់។ បង្កើនការបង្ក្រាបបទល្មើសគ្រប់ប្រភេទ ដោយបង្កើនការដាក់កម្លាំងតាមគោលដៅ និងបង្កើនកម្លាំងល្បាត ដើម្បីធានាសន្តិសុខសុវត្ថិភាពជូនប្រជាពលរដ្ឋ។ បន្តពង្រឹងការអនុវត្តគោលនយោបាយភូមិ ឃុំ សង្កាត់មានសុវត្ថិភាព ការងារផ្សព្វផ្សាយវេទិកាសាធារណៈ និងចលនាប្រជាការពារឱ្យកាន់តែសកម្មផុលផុស។

អភិបាលខេត្តបាត់ដំបង ក៏បានធ្វើការជំរុញឱ្យរដ្ឋបាលក្រុង ស្រុក ឃុំ សង្កាត់នៃខេត្តបាត់ដំបង ត្រូវរួមសហការគ្នា ជាមួយសមត្ថកិច្ចពាក់ព័ន្ធ បន្តសកម្មភាពចុះអប់រំផ្សព្វផ្សាយ ពីអំពីបញ្ហានៃគ្រោះថ្នាក់ចរាចរណ៍ និងផលប៉ះពាល់ នៃការប្រើប្រាស់គ្រឿងញៀន ឱ្យដល់ប្រជាជនគ្រប់ស្រទាប់វណ្ណៈ នៅតាមសហគមន៍នានា ដើម្បីឱ្យពួកគាត់មានការយល់ដឹងកាន់តែស៊ីជម្រៅ អំពីផលប៉ះពាល់នៃគ្រឿងញៀន ក្នុងគោលដៅ ដើម្បីឈានទៅបញ្ឈប់ការប្រើប្រាស់គ្រឿងញៀន ក្នុងនោះត្រូវតាមដានស្វែងរកមេក្លោងជួញដូរ ចែកចាយគ្រឿងញៀន ដើម្បីយកមកផ្តន្ទាទោសទៅតាមផ្លូវច្បាប់។

នៅឯសាលប្រជុំអគារE សាលាខេត្តបាត់ដំបង ដោយ
ការអញ្ជើញចូលរួមពីលោកអភិបាលរងខេត្ត លោកនាយករដ្ឋបាលសាលាខេត្ត លោក លោកស្រី ប្រធាន អនុប្រធានមន្ទីរអង្គភាពជុំវិញខេត្ត លោក លោកស្រីអភិបាល អភិបាលរងក្រុងស្រុក ព្រមទាំងអ្នកពាក់ព័ន្ធមួយចំនួនទៀត លោកសុខ លូ បានធ្វើការក្រើនរម្លឹកដល់រដ្ឋបាលក្រុង ស្រុក និងកម្លាំងសមត្ថកិច្ចពាក់ព័ន្ធ ត្រូវបន្តការបង្រ្កាប និងផ្សព្វផ្សាយពីផលប៉ះពាល់នៃគ្រឿងញៀនដល់ប្រជាពលរដ្ឋគ្រប់ទីកន្លែង នៅតាមសហគមន៍ក្នុងខេត្ត ដើម្បីទប់ស្កាត់ការប្រើប្រាស់ និងជួញដូរគ្រឿងញៀន ខណៈការជួញដូរ ចែកចាយ រក្សាទុក និងការប្រើប្រាស់គ្រឿងញៀននៅតែជាបញ្ហាប្រឈម ដែលត្រូវប្រយុទ្ធប្រឆាំងឱ្យបានម៉ឺងម៉ាត់បំផុត ស្របតាមបទបញ្ជាដ៏ខ្ពង់ខ្ពស់របស់ ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នាពេលថ្មីៗនេះ បានបញ្ជាឱ្យត្រួតពិនិត្យ និងបោសសំអាត​គ្រឿងញៀន​តាម​ខារ៉ា​អូខេ ក្លឹបរាត្រី ដោយទុកពេលឱ្យ១សប្ដាហ៍ក្នុងការអនុវត្ត៕SRP

លោកពិន ប្រាកដ អភិបាលរងខេត្តសៀមរាប ត្រូវបានផ្ទេរមកប្រកាសចូលកាន់មុខតំណែងជាអភិបាលរង ខេត្តបាត់ដំបង ជំនួស លោក អ៊ូ ដារី ដែលត្រូវបានជាប់ឆ្នោតទៅជាសមាជិកក្រុមប្រឹក្សាខេត្ត។

ពិធីប្រកាសតែងតាំងនេះ បានរៀបចំធ្វើឡើងនៅសាលប្រជុំសាលាខេត្តបាត់ដំបងក្រោមអធិបតីភាពលោក ញ៉ែម សំអឿន រដ្ឋលេខាធិការក្រសួងមហាផ្ទៃ តំណាងលោកអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃនិងមានការអញ្ជើញចូលរួមពីលោក សុខ លូ អភិបាលខេត្ត, អភិបាលរង, លោក អ៊ុយ រី ប្រធានក្រុមប្រឹក្សាខេត្ត, សមាជិកក្រុមប្រិក្សាខេត្ត ប្រធានមន្ទីរ អនុប្រធានមន្ទីរ អភិបាលក្រុងស្រុក កងកំលាំងទាំង៣ប្រភេទ និងមន្រ្តីពាក់ព័ន្ធជាច្រើនទៀត។

លោក សុខ លូ បានឡើងធ្វើរបាយការណ៍ស្វាគមន៍ និងបានបញ្ជាក់ ពីការ កសាង អភិវឌ្ឍ ខេត្តបាត់ដំបងកន្លងមកមានការរីកចម្រើន និងបានអបអរសាទការប្រកាសចូលកាន់មុខតំណែងអភិបាលរង ខេត្តបាត់ដំបងនៅថ្ងៃនេះ។

ថ្លែងក្នុងឱកាសនោះលោក ញ៉ែម សំអឿន បានកោតសរសើរ និងវាយតម្លៃខ្ពស់ចំពោះក្រុមប្រឹក្សាខេត្ត គណៈអភិបាលខេត្តបាត់ដំបង អាជ្ញាធរដែនដីគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ និងមន្ទីរ-អង្គភាពពាក់ព័ន្ធក្នុងខេត្តបាត់ដំបងទាំងអស់ ដែលបានរួមសាមគ្គីសហការគ្នាខិតខំប្រឹងប្រែងយ៉ាងសកម្មក្នុងការអនុវត្តកម្មវិធីនយោបាយ របស់រាជរដ្ឋាភិបាលកម្ពុជា ដោយបានជម្រុញការអភិវឌ្ឍខេត្ត ឲ្យមានការរីកចម្រើនលើគ្រប់វិស័យ និងរក្សាបាននូវសន្តិសុខ សណ្ដាប់ធ្នាប់សាធារណៈសង្គម បានល្អប្រសើរ នាពេលកន្លងមក។

លោកសង្ឃឹមថា អភិបាលរងដែលទើបប្រកាសចូលកាន់តំណែងត្រូវអនុវត្តតួនាទី ភារកិច្ច និងការទទួលខុសត្រូវរបស់ខ្លួនប្រកបដោយការសហការ សាមគ្គីភាព និងឯកភាពផ្ទៃក្នុងដើម្បីចូលរួមចំណែកធ្វើឱ្យការអនុវត្តការងារ ក្នុងជួរគណៈអភិបាលខេត្តកាន់តែមានប្រសិទ្ធភាពជាពិសេសការលើកកម្ពស់ការផ្ដល់ សេវាសាធារណៈជូនប្រជាពលរដ្ឋ និងការអភិវឌ្ឍខេត្តឲ្យកាន់តែមានការរីកចម្រើនថែមទៀត។

លោករដ្ឋលេខាធិការ បានផ្ដាំផ្ញើលោកអភិបាលរង ខេត្តបាត់ដំបងថ្មី ដែលទើបទទួលការតែងតាំងមុខតំណែងថ្មី ត្រូវប្រកាន់ខ្ជាប់នូវសាមគ្គីភាពផ្ទៃក្នុង និងត្រូវខិតខំប្រឹងប្រែងសហការ ចូលរួមក្នុងដំណើរការអភិវឌ្ឍន៍ខេត្តបាត់ដំបង ឲ្យមានការរីកចម្រើនបន្ថែមទៀត៕SRP

ខេត្តបាត់ដំបង៖លោកឧត្តមសេនីយ៍ទោ​ ដាញ់អេង​ ប៊ុន​ចាន់​ ស្នងការនគរបាលខេត្តបាត់ដំបង បានដឹកនាំកងកម្លាំងសួរសុខទុក្ខលោក​ រតន៍​ ម៉ូរ៉ា​ អតីតស្នងការរង​ កំពុងសម្រាកព្យាបាលជម្ងឺដល់លំនៅដ្ឋាន។

ការដឹកនាំលោក​ លោកស្រីស្នងការរង​និងថ្នាក់ដឹកនាំព្រមទាំងកងកម្លាំងនគរបាល​ក្នុងស្នងការដ្ឋាន​ ទៅសួរសុខ​ទុក្ខលោក​ រតន៍​ ម៉ូរ៉ា​ អតីតស្នងការរងនៃស្នងការដ្ឋាននគរ​បា​លខេត្តបាត់ដំបង​ជានិវត្តន៍ជន​ ខ​ណៈដែល​លោកមានជម្ងឺកំពុងសម្រាកព្យាបា​ល​ ក្នុងលំនៅ​ដ្ឋានស្ថិតនៅសង្កាត់ចំការសំរោង​ ក្រុង​បាត់ដំបង​ ខេត្តបាត់​ដដំបង នៅព្រឹកថ្ងៃទី២៣ខែ​ កក្កដា​ឆ្នាំ​២០​២៤​នេះ ដោយអនុវត្តតាមអនុ​សា​ស​ន៍​ណែនាំផ្តាំផ្ញេីរបស់ឯកឧត្តម​ នាយឧត្តមសេនីយ៍​ ស​ ថេត​ អគ្គស្នងការនៃអគ្គ​ស្នងការដ្ឋាននគរបាលជាតិ​។

លោកឧត្តមសេនីយ៍ទោ​ស្នងការ បានពាំនាំនូវប្រសា​សន៍​ផ្តាំផ្ញេីសាកសួរសុខទុក្ខពីសំណាក់ឯកឧត្តម​ នាយឧត្តមសេនីយ៍​ ស​ ថេត​ អគ្គស្នងការ​នៃអគ្គ​ស្នងការដ្ឋាននគរបាលជាតិ​ ក៏ដូចជាថ្នាក់ដឹកនាំព្រមទាំងកង​កម្លាំងនគរបាលជាតិ​ចំណុះស្នង​ការដ្ឋាននគរបាលខេត្តបាត់​ដំបងទាំងអស់​ ជាពិសេសមិនភ្លេចនូវគុណបំណាច់របស់លោកនៅក្នុងពេលដែលលោករួមចំ​ណែកក្នុងការ​ បម្រេីជាតិ​ មាតុភូមិតាំងពីប្រទេសជាតិស្ថិតក្នុងគ្រា​ លំបាក​ឆ្លងកាត់ច្រេីនដំណាក់កាល​ រហូតមក​ដល់ពេលនេះ​។ បេីទោះបីលោកបានចូល​និវត្តន៍ពីការងារហេីយក្តីតែ​ គុណបំណាច់មិនអាចកាត់ថ្លៃបានរបស់លោកគឺជាវីរៈភាពសម្រាប់អ្នកបន្តវេននៅថ្ងៃនេះ​ និងសូមឱ្យអការៈជម្ងឺរបស់លោក​ បានធូរស្បេីយ​ ប្រសេីរឡេីងវិញ។

ជាមួយនឹងការ​សាក​សួរសុខទុក្ខនេះលោក​ស្នង​ការ​បាននាំ​យកនូវថវិកា ដែលបាន​ពីការចូលរួមរបស់បងប្អូនកងកម្លាំងនគរបាលចំណុះស្នងការដ្ឋាន​ ផ្លែផល្លានិងភេសជ្ជៈមួយចំនួន​យក​ទៅប្រគល់ជូនលោក​ រតន៍​ ម៉ូរ៉ា​និងក្រុមគ្រួសារផងដែរ។

លោករតន៍​ ម៉ូរ៉ា​ និងក្រុ​មគ្រួសារ​ បានថ្លែងនូវអំ​ណរគុណយ៉ាងជ្រា​លជ្រៅចំពោះទឹកចិត្តរបស់ឯក​ឧត្តម​ នាយឧត្តមសេនីយ៍​ ស​ ថេត​ អគ្គស្នងការនៃអគ្គ​ស្នងការដ្ឋាននគរបាលជាតិក៏ដូចទឹកចិត្តរបស់លោក​ឧត្តមសេនីយ៍ទោស្នងការ​ លោក​ លោកស្រីស្នងការរងនិងកងកម្លាំងនគរបាលទាំងអស់ដែលអញ្ជេីញមកសួរ​សុខទុក្ខនិងផ្តល់នូវថវិកា​ផ្លែផល្លានិងភេសជ្ជៈផង​ ដល់រូបលោក​និងក្រុមគ្រួសារក្នុងពេលដែលកំ​ពុងមានជម្ងឺ​ ជួបការលំបាក​ដល់លំនៅដ្ឋាន ជាមួយនេះលោកនិងក្រុមគ្រួសារ​សូមជូនពរដល់ឯក​ឧត្តមនាយឧត្តមសេនី​យ៍អគ្គ​ស្នង​ការនគរបាលជាតិលោកស្នងការ​ លោ​ក​​ លោកស្រីស្នងការរងព្រមទាំប​កងកម្លាំងនគរបាលទាំងអស់សូម​ប្រកបដោយសុខភាពល្អ​ ទ​ទួល​ បានជោគជ័យគ្រប់ភារកិច្ចក្នុងការបម្រេីជាតិ​ បម្រេីប្រជាពលរដ្ឋនិង មានសុខសុភមង្គល​ ក្នុងក្រុមគ្រួសារ៕SRP

ខេត្តបាត់ដំបង៖មេប៉ូលិសខេត្តបាត់ដំបងនិងត្រូវធ្វើការផ្លាស់ប្ដូរ នៅថ្ងៃទី១៩ខែ កក្កដាឆ្នាំ២០២៤។ នេះប្រសិនពុំមានអ្វីប្រែប្រួលនោះទេ។

តាមប្រភពព័ត៌មានបានបង្ហើបថា លោកឧត្តមសេនីយ៍ត្រី ដាញ់ អេងប៊ុនចាន់ ត្រូវបានតែងតាំងជាស្នងការនគរបាលខេត្តបាត់ដំបង ជំនួសលោកឧត្តមសេនីយ៍ទោ សាត គឹមសាន ដែលត្រូវចូលនិវត្តន៍។

ពិធីធ្វើឡើងក្រោមអធិបតីភាព នាយឧត្តមសេនីយ៍ ស ថេត អគ្គស្នងការនគរបាលជាតិ និងលោក សុខ លូ អភិបាលខេត្តបាត់ដំបង៕SRP