ខេត្តសៀមរាប

អាជ្ញាធរខេត្តសៀមរាប ប្រាប់ក្រុមហ៊ុនដឹកជញ្ជូនតាមទម្ងន់កំណត់ ដើម្បីធានាគុណភាពផ្លូវឱ្យបានយូរអង្វែង

ក្នុងកិច្ចប្រជុំពិភាក្សាករណីសំណើសុំផ្ដល់កិច្ចអន្តរាគមន៍ ដើម្បីជួយទប់ស្កាត់រថយន្តដឹកលើសទម្ងន់លើសកម្រិតកំណត់ ធ្វើចរាចរណ៍លើផ្លូវពីឃុំតាសោម ទៅឃុំគោកដូង ស្រុកអង្គរជុំ នាថ្ងៃទី១៧ ខែតុលា ឆ្នាំ២០២៥ លោក លី សារី អភិបាលរងខេត្តសៀមរាប បានណែនាំ និងជំរុញដល់ក្រុមហ៊ុនដឹកជញ្ជូនវិស័យឯកជន ឱ្យចូលរួមសហការជាមួយអាជ្ញាធរមូលដ្ឋាន ក្នុងការដឹកជញ្ជូនទំនិញតាមទម្ងន់កំណត់ដែលច្បាប់បានចែង ដើម្បីធានាបាននូវគុណភាពផ្លូវឲ្យមានស្ថិរភាពយូរអង្វែង ពិសេសគឺផ្លូវដែលទើបស្ថាបនា ឬជួសជុលឡើងវិញ។

លោក លី សារី បានសង្កត់ធ្ងន់ថា ក្រុមដឹកជញ្ជូនវិស័យឯកជន ក្រុមហ៊ុនដឹកជញ្ជូនថ្ម គ្រួស និងក្រុមហ៊ុនផ្សេងៗទៀតដែលប្រកបអាជីវកម្មដឹកជញ្ជូន ត្រូវចូលរួមអនុវត្តតាមបទដ្ឋានច្បាប់ឲ្យបានត្រឹមត្រូវ។ លោកបានព្រមានថា «ករណីក្រុមហ៊ុនដឹកជញ្ជូនមិនសហការជាមួយអាជ្ញាធរមូលដ្ឋាន និងប្រព្រឹត្តល្មើសច្បាប់ដឹកជញ្ជូន ក្រុមការងារ មន្ត្រីជំនាញនឹងចាត់វិធានការ និងពិន័យទៅតាមច្បាប់ដែលបានកំណត់»។

លោកក៏បានសំណូមពរដល់អ្នកបើកបរដឹកជញ្ជូនទាំងអស់ ចូលរួមគោរពច្បាប់ចរាចរណ៍ឱ្យបានត្រឹមត្រូវ ដើម្បីកាត់បន្ថយគ្រោះថ្នាក់ចរាចរណ៍នៅក្នុងមូលដ្ឋាន។ ទាក់ទងនឹងការកំណត់ទម្ងន់ក្នុងការដឹកជញ្ជូន លោកបានណែនាំឱ្យគណៈបញ្ជាការឯកភាពស្រុកចុះអនុវត្ត និងចាត់វិធានការឲ្យបានឆាប់រហ័សចំពោះករណីដឹកលើសកម្រិតទម្ងន់។

លោក ភន់ សុខុម អភិបាលស្រុកអង្គរជុំ ក៏បានលើកឡើងអំពីបញ្ហាផ្លូវខូចខាតពីឃុំតាសោម ទៅឃុំគោកដូង តាមការលើកឡើងរបស់ប្រជាពលរដ្ឋ។ លោកបានសំណូមពរដល់មន្ទីរពាក់ព័ន្ធ ជួយជួសជុលជាបឋមនូវផ្លូវ១ខ្សែនេះ ដើម្បីសម្រួលដល់ការធ្វើដំណើររបស់ប្រជាពលរដ្ឋ និងសិស្សានុសិស្ស។ ជាការឆ្លើយតប គ្រប់មន្ទីរ-អង្គភាពពាក់ព័ន្ធទាំងអស់ នឹងលើកយកគម្រោងជួសជុលនេះមកពិភាក្សា និងស្នើសុំគោលការណ៍ពីថ្នាក់លើដើម្បីធ្វើការអនុវត្តបន្ត៕SRP

អត្ថបទ និងរូបភាព៖ លោក អោត រត់
កែសម្រួល៖ លោក អ៊ុន ណារាជ្យ
ប្រភពមន្ទីរព័ត៌មានខេត្តសៀមរាប

មេបញ្ជាការកងរាជអាវុធហត្ថខេត្តសៀមរាប លោកឧត្តមសេនីយ៍ត្រី សៀ ទីន​ ផ្ញើសារលិខិតជូនពរ សម្តេចមហាបវរធិបតី ហ៊ុន ម៉ាណែត ក្នុងឱកាសខួបកំណើតគម្រប់ ៤៨ ឈានចូល ៤៩ឆ្នាំ

ក្នុងឱកាសដ៏មង្គលសួស្តី នៃថ្ងៃខួបកំណើត សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា គម្រប់ ៤៨ឆ្នាំ ឈានចូល ៤៩ឆ្នាំ នាថ្ងៃទី២០ ខែតុលា ឆ្នាំ២០២៥, លោកឧត្តមសេនីយ៍ត្រី សៀ ទីន​ មេបញ្ជាការកងរាជអាវុធហត្ថខេត្តសៀមរាប សូមផ្ញើសារលិខិតគោរពជូនពរ សម្តេចមហាបវរធិបតី ទទួលបានសុខភាពល្អបរិបូរណ៍ បញ្ញាញាណភ្លឺថ្លា អាយុយឺនយូរ ដើម្បីបន្តបេសកកម្មដ៏ឧត្តុង្គឧត្តម ដើម្បីដឹកនាំកម្ពុជាឱ្យរីកចម្រើនរុងរឿងតទៅ។

នាឱកាសដ៏ថ្លៃថ្លានេះ យើងខ្ញុំទាំងអស់គ្នា សូមកោតសរសើរចំពោះ សម្តេចមហាបវរធិបតី ហ៊ុន ម៉ាណែត ដែលបានខិតខំប្រឹងប្រែងអស់ពីកម្លាំងកាយចិត្ត ប្រាជ្ញាស្មារតី ដោយមិនខ្លាចនឿយហត់ដឹកនាំរាជរដ្ឋាភិបាលបម្រើឧត្តមប្រយោជន៍ជាតិ និងប្រជាជន ជាពិសេសបន្តថែរក្សានូវសុខសន្តិភាព ស្ថិរភាពនយោបាយ ស្ថិរភាពម៉ាក្រូសេដ្ឋកិច្ច កំណើនសេដ្ឋកិច្ចខ្ពស់ ការពារបូរណភាពទឹកដី និងអធិបតេយ្យភាពជាតិ ដែលជាមូលដ្ឋានគ្រឹះដ៏សំខាន់ក្នុងការអភិវឌ្ឍប្រទេសជាតិលើគ្រប់វិស័យ។

ក្រោមការដឹកនាំរាជរដ្ឋាភិបាលបន្តវេន របស់សម្តេចមហាបវរធិបតី ប្រជាជនកម្ពុជាបន្តរួមរស់ជាមហាគ្រួសារ ប្រកបដោយសុភមង្គល វិបុលភាព, មោទនភាពជាតិ កិត្យានុភាពជាតិ និងឧត្តមភាព នៃរាជរដ្ឋាភិបាលកម្ពុជា កាន់តែត្រូវបានលើកកម្ពស់នៅក្នុងក្របខ័ណ្ឌតំបន់ និងពិភពលោក។

យើងខ្ញុំទាំងអស់គ្នា សូមបួងសួងដល់គុណបុណ្យព្រះរតនត្រ័យ គុណកែវទាំងបី ឫទ្ធិបារមីខ្លាំងក្លា វត្ថុស័ក្តិសិទ្ធិទាំងឡាយក្នុងលោក សូមមេត្តាតាមជួយបីបាច់ថែរក្សាប្រោះព្រំនូវសព្ទសាធុការពរជ័យ សិរីសួស្តី ជ័យមង្គល វិបុលសុខ គ្រប់ប្រការជូន សម្តេចមហាបវរធិបតី និងលោកជំទាវបណ្ឌិត ព្រមទាំងបុត្រាបុត្រី សូមមានជន្មាយុយឺនយូរ ជួបប្រទះតែសេចក្តី សុខចម្រើន មានសុភមង្គលក្នុងក្រុមគ្រួសារ មានសុខុមាលភាពល្អបរិបូរណ៍ និងសូមប្រកបដោយព្រះពុទ្ធពរដ៏ប្រពៃថ្លៃថ្លា បួនប្រការគឺ អាយុ វណ្ណៈ សុខៈ ពលៈ ជានិច្ចនិរន្តរ៍កុំបីឃ្លៀងឃ្លាតឡើយ៕⁩SRP

ឯកឧត្តម ទៀ សីហា អំពាវនាវកុំឱ្យមានការរើសអើងជាតិសាសន៍ចំពោះសិស្សខ្មែរកាត់ថៃ ឬជនជាតិថៃសុទ្ធ និងអ្នករកស៊ីថៃនៅកម្ពុជា

ក្នុងពិធីសំណេះសំណាលជាមួយមាតាបិតា អាណាព្យាបាល និងបេក្ខជនប្រឡងជាប់និទ្ទេស A និង B នៅខេត្តសៀមរាប នាថ្ងៃទី១៨ ខែតុលា ឆ្នាំ២០២៥នេះ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងារចុះជួយមូលដ្ឋានខេត្តសៀមរាប បានអំពាវនាវយ៉ាងទទូចដល់គណៈគ្រប់គ្រងសាលា លោកគ្រូ អ្នកគ្រូ និងសិស្សានុសិស្សទាំងអស់ សូមបញ្ឈប់ការរើសអើងជាតិសាសន៍ ចំពោះសិស្សដែលមានសញ្ជាតិខ្មែរកាត់ថៃ ឬជនជាតិថៃសុទ្ធ ដែលកំពុងសិក្សារៀនសូត្រជាមួយយើង។

ឯកឧត្តម ឧបនាយករដ្ឋមន្ត្រី ទៀ សីហា មានប្រសាសន៍ថា បើសិនជាមានសិស្សមានសញ្ជាតិខ្មែរកាត់ថៃ ឬក៏ជាតិថៃសុទ្ធកំពុងសិក្សារៀនសូត្រជាមួយ សូមកុំមានការរើសអើងជាតិសាសន៍គេ ព្រោះជាតិសាសន៍ខ្មែរយើង គឺជាជាតិសាសន៍ថ្លៃថ្នូរ ដូច្នេះសូមយើងកុំធ្វើដូចគេ។ ជាពិសេសអំពាវនាវទៅដល់អ្នកដែលកំពុងប្រកបរបរអាជីវកម្មជាជនជាតិថៃនៅក្នុងខេត្តសៀមរាប សូមមេត្តាបន្តរួមរស់ និងរកស៊ីជាមួយគ្នាដូចដើម ព្រោះយើងធ្លាប់រួមរស់ជាមួយគ្នារកស៊ីជាមួយគ្នារាប់ឆ្នាំ ហើយខ្លះក៏បានកសាងគ្រួសារជាមួយគ្នា ដោយមានស្វាម៉ី និងភរិយាជាជនជាតិខ្មែរ។

ឯកឧត្តម ឧបនាយករដ្ឋមន្ត្រី បានសង្កត់ធ្ងន់ថា ជនរួមជាតិទាំងអស់ រួមទាំងសិស្សានុសិស្ស យុវជន យុវនារី ត្រូវចេះស្រឡាញ់ រាប់អាន និងគោរពគ្នាទៅវិញទៅមក ដោយមិនត្រូវយកបញ្ហាពូជសាសន៍ ពណ៌សម្បុរ ជំនឿសាសនា ដើមកំណើត ឬនិន្នាការនយោបាយ មកធ្វើជាលេសក្នុងការបែងចែក ការរើសអើង ឬការបង្កើតជម្លោះឡើយ។ ឯកឧត្តម ក៏បានជំរុញឱ្យបងប្អូនទាំងអស់ បន្តចូលរួមអនុវត្តគោលនយោបាយរាជរដ្ឋាភិបាល និងខិតខំប្រឹងប្រែងធ្វើអំពើល្អ សាមគ្គីគ្នាជាធ្លុងមួយ ដើម្បីកសាងប្រទេសជាតិឱ្យកាន់តែរីកចម្រើន ស្របតាមមាគ៌ានៃការរួមរស់ដោយសុខដុមនីយកម្ម។

ក្នុងឱកាសនោះ ឯកឧត្តម ក៏បានសម្តែងការអបអរសាទរយ៉ាងស្មោះ ចំពោះសិស្សានុសិស្សខេត្តសៀមរាប ដែលបានប្រឡងជាប់ទទួលបាននិទ្ទេស A ចំនួន ២៤៧ នាក់ និងនិទ្ទេស B ចំនួន ៧៥៨ នាក់។ ឯកឧត្តម ក៏បានវាយតម្លៃខ្ពស់ចំពោះលោកគ្រូអ្នកគ្រូដែលបានខិតខំយកចិត្តទុកដាក់ក្នុងការបង្រៀន និងការចូលរួមអប់រំរបស់មាតាបិតា អាណាព្យាបាលកូនៗ ធ្វើឲ្យទទួលបាននូវធនធានមនុស្សប្រកបដោយគុណភាពខ្ពស់។ លទ្ធផលដែលក្មួយៗទទួលបានពេលនេះ ពិតជាកើតចេញពីការខិតខំរៀនសូត្ររបស់ក្មួយៗ ការខិតខំបង្ហាត់បង្រៀនរបស់លោកគ្រូ អ្នកគ្រូ និងការខ្នះខ្នែងផ្តល់ការបំពាក់បំប៉នសមត្ថភាពពីតួអង្គពាក់ព័ន្ធ ជាសំខាន់មាតាបិតា និងអាណាព្យាបាល ដែលបានជួយឲ្យពួកគេទទួលបានជ័យលាភីនៅក្នុងការប្រឡងយកសញ្ញាបត្រមធ្យមសិក្សាទុតិយភូមិនេះ។

បើតាម លោក លី ប៊ុនណា ប្រធានមន្ទីរអប់រំ យុវជន និងកីឡាខេត្ត បានឱ្យដឹងថា សម្រាប់ឆ្នាំសិក្សា ២០២៤-២០២៥នេះ ខេត្តសៀមរាប មានបេក្ខជនដែលបានមកប្រឡងសញ្ញាបត្រមធ្យមសិក្សាទុតិយភូមិសរុបចំនួន ១១ ១៦២ នាក់ ស្រី ៦ ៥១៤ នាក់។ ក្នុងនោះសិស្សដែលបានប្រឡងជាប់សរុបចំនួន ៩ ៨១៧ នាក់ ស្រី ៥ ៨៩២ នាក់។ សិស្សទទួលបាននិទ្ទេស A មានចំនួន ២៤៧ នាក់ ស្រី ១៣៥ នាក់, និទ្ទេស B ចំនួន ៧៥៨ នាក់, និទ្ទេស C ចំនួន ២ ៤៣៦ នាក់, និទ្ទេស D ចំនួន ៣ ៧៩៨ នាក់ និងនិទ្ទេស E ចំនួន ១១ ៣៣៩ នាក់៕SRP

អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
#មន្ទីរព័ត៌មានខេត្តសៀមរាប

បទពិសោធ និងសារសំខាន់ នៃការបន្ថែមប៉ុស្តិ៍នគរបាល ប្រចាំការអចិន្ត្រៃយ៍ ២៤ម៉ោង នៅសៀមរាប!

បន្ថែមលើប៉ុស្តិ៍នគរបាលរដ្ឋបាលឃុំ សង្កាត់ ចំនួន១០០ ប៉ុស្តិ៍នគរបាលចរាចរណ៍ផ្លូវគោក និងប៉ុស្តិ៍នគរបាលការពារបេតិកភណ្ឌមួយចំនួនទៀត លោកឧត្តមសេនីយ៍ទោ ហួត សុធី ស្នងការ នៃស្នងការដ្ឋាននគរបាលខេត្តសៀមរាប បានទទួលការឯកភាពពីអគ្គស្នងការនគរបាលជាតិ រៀបចំប៉ុស្តិ៍នគរបាលប្រចាំការអចិន្ត្រៃយ៍២៤ម៉ោង។ ប៉ុស្តិ៍នគរបាលប្រចាំការអចិន្ត្រៃយ៍២៤ម៉ោង ត្រូវបានកំណត់ដាក់បន្ថែមនៅតាមគោលដៅ និងភូមិសាស្រ្តមានហានិភ័យ ដើម្បីបម្រើបេសកកម្មធានាសន្តិសុខ និងសុវត្ថិភាពជូនភ្ញៀវទេសចរជាតិ និងអន្តរជាតិ ព្រមទាំងប្រជាពលរដ្ឋទូទៅ។

ក្រោយចូលកាន់តំណែងជាស្នងការជាង១ឆ្នាំ បច្ចុប្បន្ន លោកឧត្តមសេនីយ៍ទោ ហួត សុធី បានដាក់ឱ្យដំណើរការ ប៉ុស្តិ៍នគរបាលប្រចាំការអចិន្ត្រៃយ៍២៤ម៉ោង បានចំនួន៩គោលដៅរួចជាស្រេចហើយ រួមមាន នៅសង្កាត់ស្រង៉ែ ចំនួន១ប៉ុស្តិ៍ នៅសង្កាត់គោកចក ចំនួន១ប៉ុស្តិ៍ នៅសង្កាត់សាលាកំរើក ចំនួន២ប៉ុស្តិ៍ នៅសង្កាត់ស្វាយដង្គំ ចំនួន១ប៉ុស្តិ៍ នៅសង្កាត់ស្លក្រាម ចំនួន២ប៉ុស្តិ៍ នៅឃុំកណ្ដែង ចំនួន១ប៉ុស្តិ៍ និងឃុំចាន់ស ចំនួន១ប៉ុស្តិ៍ ខណៈផែនការបង្ហើយមុនដាច់ឆ្នាំង២០២៥ មាន២ប៉ុស្តិ៍ទៀត គឺនៅប៉ុស្តិ៍អំពិល និងប៉ុស្តិ៍ត្រពាំងធំ។

បើតាមលោកស្នងការ «យើងបានណែនាំកងកម្លាំង ដោយបានធ្វើភារកិច្ចប្រគល់ជូនកងកម្លាំង ដើម្បីឱ្យកងកម្លាំងយើងដែលប្រចាំការ២៤ម៉ោងលើ២៤ម៉ោងនេះ ធ្វើការរៀបចំបែងចែកសកម្មភាព ល្បាត ពួនស្ទាក់ ទប់ស្កាត់បទរាល់ល្មើសនានានៅក្នុងភូមិសាស្ត្រ ជាពិសេស គឺបានត្រៀមចេញអន្តរាគមន៍ក្នុងករណីមានគ្រោះថ្នាក់ផ្សេងៗ ដូចជាគ្រោះថ្នាក់ចរាចរណ៍ អគ្គីភ័យ ហិង្សាដែលកើតមាននៅក្នុងតំបន់ប្រចាំការ២៤ម៉ោង គឺចេញទៅដោយសហការជាមួយប៉ុស្ដិ៍នគរបាលរដ្ឋបាល»។

លោកស្នងការបន្ថែមថា ការដាក់ឱ្យមានប៉ុស្ដិ៍ប្រចាំការ២៤ម៉ោងនេះ ពិតជាផ្ដល់អត្ថប្រយោជន៍ជាច្រើនដល់បងប្អូនប្រជាពលរដ្ឋ ជាពិសេសនៅពេលយប់ ពេលមានបញ្ហាណាមួយកើតឡើងនោះ ប្រជាពលរដ្ឋអាច ដាក់ពាក្យបណ្ដឹងនៅប៉ុស្ដិ៍ប្រចាំការ២៤ម៉ោងដែលមានកងកម្លាំងប្រចាំការនៅទីនោះស្រាប់ ដើម្បីទទួលពាក្យបណ្ដឹង ដោះស្រាយបណ្ដឹង និងត្រៀមចេញអន្តរាគមន៍គ្រប់ពេលវេលា។

សូមបញ្ជាក់ថា ស្នងការដ្ឋាននគរបាលខេត្តសៀមរាប បានកំណត់លក្ខណៈសម្បត្តិ និងភារកិច្ចចំនួន៧ ដល់ប៉ុស្តិ៍នគរបាលប្រចាំការអចិន្ត្រៃយ៍២៤ម៉ោង ដូចខាងក្រោម៖

១. ប៉ុស្តិ៍ប្រចាំការអចិន្ត្រៃយ៍ត្រូវមានកម្លាំងប្រចាំការចាប់ពី ៤នាក់ឡើង មានវិទ្យុទាក់ទង ដើម្បីស្តាប់ទទួលព័ត៌មាន សេចក្តីរាយការណ៍ទាន់ហេតុការណ៍ផ្សេងៗ ពីប្រជាពលរដ្ឋ ២៤/៧ និងរងចាំទទួលបណ្តឹងពីប្រជាពលរដ្ឋ ដែលត្រូវការសុំជំនួយពីសមត្ថកិច្ច និងត្រៀមចាំអន្តរាគមន៍គ្រប់ពេលវេលា។ រាល់បណ្តឹងដែលទទួលបានត្រូវកត់ចូលសៀវភៅប្រចាំថ្ងៃ ពិនិត្យ និងរាយការណ៍បញ្ជូន ទៅតាមជំនាញ ដើម្បីជំនាញយកចាត់ចែង និងអនុវត្តតាមនីតិវិធី។

២. ត្រូវរៀបចំបែងចែកវេនធ្វើសកម្មភាពចេញល្បាតពួនស្ទាក់ បង្ការ ទប់ស្កាត់ និងបង្ក្រាប បទល្មើសជាក់ស្តែង ដែលកើតឡើងនៅក្នុងភូមិសាស្ត្រដែលបានកំណត់ជាក់លាក់ (ប៉ុស្តិ៍ ប្រចាំការអចិន្ត្រៃយ៍លេខ១ លេខ២ និងលេខ៣)។

៣. រាយការណ៍ទៅមន្ត្រីជំនាញ និងចេញអន្តរាគមន៍ជួយការពារកន្លែងកើតហេតុក្នុងករណី មានគ្រោះផ្សេងៗកើតឡើងជាយថាហេតុ (ដូចជាគ្រោះថ្នាក់ចរាចរណ៍ ករណីអគ្គិភ័យ អំពើហិង្សា ។ល។) ដែលកើតមាននៅក្នុងភូមិសាស្ត្រទទួលខុសត្រូវ និងការពារថែរក្សា វត្ថុតាងនៅកន្លែងកើតហេតុ សង្គ្រោះជនរងគ្រោះមុននឹងមន្ត្រីជំនាញទៅដល់កន្លែងកើតហេតុ។

៤. សហការស្ទាក់ចាប់មុខសញ្ញា និងមធ្យោបាយដែលបង្ក ហើយបានបើកបររត់គេចចេញពីកន្លែងកើតហេតុ (ក្នុងករណីមានសេចក្តីរាយការណ៍ សុំកិច្ចអន្តរាគមន៍)។

៥. ត្រូវយកចិត្តទុកដាក់ សហការគ្រប់គ្រងឱ្យបានហ្មត់ចត់នូវមុខសញ្ញាប្រព្រឹត្តបទល្មើស ព្រហ្មទណ្ឌសកម្មភាពក្មេងទំនើង អំពើហិង្សា ការជួញដូរប្រើប្រាស់គ្រឿងញៀន ប្រើប្រាស់អាវុធខុសច្បាប់ រួមទាំងបទល្មើសផ្សេងៗទៀត ដោយប្រើប្រាស់វិធានការជំនាញ។

៦. ប្រធានវេននីមួយៗ ត្រូវពិនិត្យគ្រប់គ្រងវត្តមានកងកម្លាំង សៀវភៅកំណត់ហេតុ វិទ្យុទាក់ទង និងមានការឆ្លើយតបទាន់ពេលវេលា ប្រមូលព័ត៌មានឱ្យបានគ្រប់ជ្រុងជ្រោយ រាយការណ៍ជូនថ្នាក់ដឹកនាំ ដើម្បីសុំគោលការណ៍អនុវត្តបន្ត។

៧. វេននីមួយៗត្រូវធ្វើអនាម័យបោសសម្អាតបរិវេណខាងក្នុង និងខាងក្រៅអគារជាប់ជាប្រចាំ៕SRP

បង្ក្រាបបារីម៉ាកអុីសេ ក្លែងក្លាយ នៅខេត្តសៀមរាប ដោយនគរបាលប្រឆាំងបទល្មើសសេដ្ឋកិច្ច

ខេត្តសៀមរាប៖តៃកុងរថយន្តនិងវត្ថុតាងត្រូវបានសមត្ថកិច្ចនគរបាលប្រឆាំងបទល្មើសសេដ្ឋកិច្ចខេត្តសៀមរាបឃាត់ខ្លួនបញ្ជូនទៅសាលាដំបូងខេត្តសៀមរាបដើម្បីអនុវត្តតាមពិធីច្បាប់ក្នុងករណីចែកចាយបារីក្លែងក្លាយ។

លោកឧត្តមសេនីយ៍ត្រី សឿន សេន ស្នងការរងនគរបាលខេត្តសៀមរាប បានបញ្ជាក់ប្រាប់សារព័ត៌មានសៀមរាប ប៉ុស្តិ៍ ថា ប្រតិបត្តិការបង្ក្រាបនេះធ្វើឡើង នៅវេលាម៉ោង​ ៨និង៣០ នាទីថ្ងៃទី១៥ ខែ​តុលា​ ឆ្នាំ២០២៥​ នៅចំណុចភូមិស្ពានជ្រាវ សង្កាត់សៀមរាប ក្រុងសៀមរាប ដោយកម្លាំងផែនការងារនគរបាលប្រឆាំងបទល្មើសសេដ្ឋកិច្ច ដោយមានការអនុញ្ញាតពីសំណាក់ លោកឧត្តមសេនីយ៍ទោហួតសុធីស្នងការនគរបាលខេត្តសៀមរាប និងក្រោមការដឹកនាំសម្របសម្រួលនីតិវិធី ពីឯកឧត្តម មាស​ ច័ន្ទ​ពិសិដ្ឋ​ ព្រះរាជ​អាជ្ញា​នៃ​អយ្យការ​អម​សាលា​ដំបូង​ខេត្ត​សៀមរាប។

លោកឧត្តមសេនីយ៍ត្រីសឿន សេន បានបន្តថា ករណីនេះ សមត្ថកិច្ចនគរបាលប្រឆាំងបទល្មើសសេដ្ឋកិច្ច បានចុះឃាត់រថយន្តហុីយ៉ាន់ដាយ (Hyundai) មួយគ្រឿង ពាក់ពន្ធនឹងករណីចែកចាយបារីម៉ាកអុីសេ ESSE ក្លែងក្លាយ ដែលម្ចាស់រថយន្តមានឈ្មោះ ជីប ចន្ថន អាយុ៣៨ឆ្នាំ។

បើតាមលោកឧត្តមសេនីយ៍ត្រី សឿន សេន ក្នុងករណីនេះកម្លាំងផែននគរបាលប្រឆាំងបទល្មើសសេដ្ឋកិច្ចបានធ្វើចំណាត់ការ៖

-ឃាត់ជនសង្ស័យ១នាក់
-ឃាត់ទុករថយន្ត ១គ្រឿង
– បារី ESSE ក្លែងក្លាយ ចំនួន២៤០សុង និង៥កញ្ចប់
-ទូរស័ព្ទ ២គ្រឿង និងសម្ភារ:ប្រើប្រាស់មួយចំនួនទៀត ជនសង្ស័យ និងវត្ថុតាងទាំងអស់ ត្រូវបានរៀបចំកសាងសំណុំរឿង បញ្ជូនទៅកាន់ស្ថាប័នអយ្យការ នៃសាលាដំបូងខេត្តសៀមរាប ដើម្បីអនុវត្តទៅតាមនីតិវិធីនៃច្បាប់ជាធរមាន៕SRP

ធ្វើស្គាល់គ្នានិយាយមួយសន្ទុះ សុំខ្ចីម៉ូតូទៅទិញបាយហូបអតមកវិញ

ខេត្តសៀមរាប៖អាវុធហត្ថខេត្តសៀមរាបបានឲ្យដឹងថា នៅវេលាម៉ោង ០៩ៈ៥៨នាទី ថ្ងៃទី១២ ខែតុលា ឆ្នាំ២០២៥ បានទទួលបណ្តឹងផ្ទាល់មាត់ពីប្រជាពលរដ្ឋតាមរយៈលេខទូរស័ព្ទបន្ទាន់ ១២៩៦ ដើម្បីសុំកិច្ចអន្តរាគមន៍លើករណីរំលោភលើទំនុកចិត្ត (ករណីបាត់ម៉ូតូ) ដោយជនសង្ស័យម្នាក់ បានចូលទៅក្នុងហាងមួយកន្លែង ស្ថិតនៅភូមិស្លក្រាម សង្កាត់ស្លក្រាម ក្រុងសៀមរាប ក៏បាននិយាយលេងជាមួយម្ចាស់ម៉ូតូមួយសន្ទុះ ជនសង្ស័យក៏បានសុំខ្ចីម៉ូតូរបស់ជនរងគ្រោះ ម៉ាកCBR ហុងដា ០១គ្រឿង ពណ៌ស ឆ្នាំ២០១៦ ផ្លាកលេខបន្ទាយមានជ័យ 1N.2700 ថាទៅទិញបាយហូប ជនរងគ្រោះ ជាម្ចាស់ម៉ូតូក៏បានអោយសោរម៉ូតូទៅជនសង្ស័យ ក្រោយពីបានសោរម៉ូតូ ជនសង្ស័យក៏ជិះទៅបាត់ដោយមិនបានយកម៉ូតូមកឲ្យជនរងគ្រោះជាម្ចាស់ម៉ូតូវិញនោះទេ។

អាវុធហត្ថខេត្តសៀមរាបបានបន្តថា បន្ទាប់ពីទទួលបានបណ្ដឹងពីជនរងគ្រោះ កម្លាំងការិយាល័យជំនាញ នៃកងរាជអាវុធហត្ថខេត្តសៀមរាប និងកម្លាំងមូលដ្ឋានអាវុធហត្ថក្រុងសៀមរាប បានចុះស្រាវជ្រាវ និងកំណត់មុខសញ្ញាជនសង្ស័យ រហូតនៅវេលាម៉ោង១៥:៤០នាទី ថ្ងៃខែឆ្នាំដដែល កម្លាំងជំនាញកងរាជអាវុធហត្ថក្រុងសៀមរាប បានឈានដល់ការឃាត់ខ្លួនជនសង្ស័យ ០១នាក់ ឈ្មោះ ប៊ូ ម៉េងរាជ ភេទប្រុស អាយុ២០ឆ្នាំ និងម៉ូតូ ០១គ្រឿង របស់ជនរងគ្រោះ នៅចំណុចលើផ្លូវបេតុង ស្ថិតនៅភូមិ៦ សង្កាត់ចុងឃ្នៀស ក្រុងសៀមរាប បញ្ជូនមកបញ្ជាការដ្ឋានកងរាជអាវុធហត្ថខេត្តសៀមរាប ដើម្បីចាត់ការតាមនីតិវិធី។

ក្រោមវិធានការជំនាញជនសង្ស័យខាងលើបានសារភាពឲ្យដឹងថា ខ្លួនពិតជាបានប្រព្រឹត្តអំពើដូចការរៀបរាប់របស់ជនរងគ្រោះ ពិតប្រាកដមែន ហើយកន្លងមកខ្លួនធ្លាប់ជាប់ពន្ធនាគាររយៈពេល ០១ឆ្នាំ ពាក់ព័ន្ធនឹងករណីលួច។

ជនសង្ស័យត្រូវបានការិយាល័យជំនាញកងរាជអាវុធហត្ថខេត្តសៀមរាប កសាងសំណុំរឿង បញ្ជូនទៅសាលាដំបូងខេត្តសៀមរាប ដើម្បីចាត់ការតាមនីតិវិធីច្បាប់ ឯម៉ូតូរបស់ជនរងគ្រោះ ត្រូវបានកម្លាំងអាវុធហត្ថខេត្តសៀមរាប ណែនាំឱ្យម្ចាស់ម៉ូតូធ្វើការផ្លាស់ប្ដូរបំពង់ស៊ីម៉ាំងដែលបំពាក់ខុសលក្ខណៈបច្ចេកទេសជាមុនសិន ទើបប្រគល់ឲ្យត្រឡប់ទៅវិញ។

អាវុធហត្ថខេត្តសៀមរាប អំពាវនាវដល់មហាជនសូមកុំឆាប់ទុកចិត្តអ្នកមិនស្គាល់គ្នា រហូតលង់ខ្លួនបាត់បង់ទ្រព្យសម្បត្តិមានតម្លៃ៕SRP

បច្ច័យប្រមាណជាង៣៧លានរៀល និងស្បងចីវ ដែលចេញពីអង្គកឋិនទានសាមគ្គី ត្រូវបានដង្ហែវេរប្រគេន ព្រះសង្ឃគង់ចាំព្រះវស្សាក្នុងវត្តព្រះសិអារ្យ សម្រាប់កសាងសាលាធម្មសភា

គណៈកម្មការ អាចារ្យ និងពុទ្ធបរិស័ទជិតឆ្ងាយចំណុះ វត្តព្រះព្រះសិអារ្យទាំងអស់ នៅរសៀលថ្ងៃទី១២ ខែ តុលា ឆ្នាំ២០២៥ បានស្រុះស្រួល មូលមតិគ្នាជាឯកច្ឆ័ន្ទ ប្រារព្ធធ្វើអង្គកឋិនទានសាមគ្គី ដើម្បីវេរប្រគេនព្រះសង្ឃ ដែលគង់ចាំព្រះវស្សាអស់ត្រីមាស ក្នុងខ័ណ្ឌសីមា និងដើម្បីប្រមូលបច្ច័យសម្រាប់ទ្រទ្រង់ចង្ហាន់ព្រះសង្ឃនិងកសាងសាលាធម្មសភា សាលាឆាន់ ក្នុងវត្តព្រះសិអារ្យ ដែលស្ថិតនៅ ភូមិគោកតាចាន់ សង្កាត់គោកចក ក្រុងសៀមរាប ដែលជាប្រយោជន៍រួមសម្រាប់ព្រះពុទ្ធសាសនា និងសង្គមជាតិទាំងមូលផងដែរ។

ព្រះគ្រូចៅអធិការ វត្តព្រះសិអារ្យ ព្រះយសោធរញ្ញាណ ឡោម សុឈាត បានមានថេរដីកាថា កឋិនទាន គឺជាបុណ្យប្រពៃណីព្រះពុទ្ធសាសនា ដែលមានសម្តែងទុកក្នុងព្រះវិន័យបិដក មហាវគ្គ កឋិនក្ខន្ធកៈ ជាបុណ្យដែលមានលក្ខណៈប្លែកពីបុណ្យដទៃ ៥យ៉ាង ទី១.ប្លែកដោយកាល គឺជាកាលទាន ក្នុងមួយឆ្នាំធ្វើបានតែ១ដង មានរយៈពេលកំណត់ត្រឹមតែ២៩ថ្ងៃ ហើយវត្តមួយទទួលបានកឋិនតែ១ដងប៉ុណ្ណោះ ទី២. ប្លែកដោយវត្ថុ គឺសំពត់ដែលជាវត្ថុកឋិននោះ មានតែស្បង់ ចីវរ និងសង្ឃាដី ដែលគេធ្វើត្រឹមត្រូវតាម ពុទ្ធប្បញ្ញត្តិ ទី៣.ប្លែកដោយអំពើ គឺបុគ្គលអ្នកធ្វើគម្បីធ្វើឱ្យត្រូវតាមវិន័យបញ្ញត្តិ ហើយព្រះសង្ឃត្រូវក្រាលគ្រង ឲ្យត្រូវតាមវិន័យបញ្ញត្តិ ទី៤.ប្លែកដោយបដិគ្គាហកៈ គឺអ្នកទទួលសំពត់កឋិន បានតែភិក្ខុដែលនៅចាំព្រះវស្សា គ្រប់៣ខែ ដោយមិនដាច់វស្សាទើបទទួលក្រាលគ្រងបាន ទី៥.ប្លែកដោយអានិសង្ស ជាបុណ្យមានផលានិសង្សច្រើន អ្នកធ្វើទទួលបានអានិសង្ស ៥យ៉ាងគឺ ១.មានប្រាជ្ញាក្លៀវក្លាមុះមុត ២.មានពណ៌សម្បុរល្អ ៣.មានរូបល្អ ៤.មាន ទ្រង់ទ្រាយល្អ ៥.នឹងបានជាស្តេចចក្រពត្តិក្នុងជាតិណាមួយពុំខានឡើយ។

ព្រះគ្រូចៅអធិការ វត្តព្រះសិអារ្យ បានបន្តថាក្រៅពីនេះ តាមរយៈកឋិនទាន វត្តនីមួយៗក៏មានលទ្ធភាពអាចទទួលបាន នូវបរិវាកឋិនរួមមាន សម្ភារៈ ថវិកា សម្រាប់បម្រើដល់ការកសាងទីសេនាសនៈផ្សេងៗមានដូចជា ព្រះវិហារ កុដិ ឧបដ្ឋានសាលា ការទំនុកបម្រុងវិស័យពុទ្ធិកសិក្សា ជួយឧបត្ថម្ភដល់ការកសាងសមិទ្ធផលសង្គម និង វិស័យ សង្គមកិច្ចជាដើមផងដែរ។

ព្រះតេជគុណ ឡោម សុឈាត បានមានថេដីកាបន្ថែមថា បុណ្យកឋិនសាមគ្គី គឺបង្ហាញពីការរួបរួមគ្នារបស់ពុទ្ធបរិស័ទចំណុះជើងវត្ត ឬញាតិញោមមកពីទីជិតឆ្ងាយ ក្នុងការរួមចំណែកកម្លាំងកាយចិត្ត និងថវិកា (បច្ច័យ) ដោយមិនប្រកាន់វណ្ណៈ ឬនិន្នាការនយោបាយណាមួយឡើយ។

សូមបញ្ជាក់ថានៅឆ្នាំនេះកឋិនទាន ចាប់ផ្តើមប្រព្រឹត្តទៅនៅថ្ងៃពុធ ១រោច ខែអស្សុជ ដល់ថ្ងៃពុធ ១៥កើត ខែកត្តិក ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី៨ ខែតុលា ដល់ថ្ងៃទី៥ ខែវិច្ឆិកា ឆ្នាំ២០២៥។

ចំពោះបុណ្យកឋិនទានគឺប្រារព្ធឡើង ក្នុងគោលបំណងសំខាន់ៗមួយចំនួន គឺ ដើម្បីបង្កើនសាមគ្គីភាពរវាងបុគ្គល គ្រួសារ និងសង្គមដើម្បីទ្រទ្រង់ព្រះពុទ្ធសាសនាឲ្យបានចម្រើនរុងរឿងគង់វង្សយូរអង្វែង.ដើម្បីផ្តល់កម្លាំងកាយចិត្តដល់ព្រះភិក្ខុសង្ឃ បុគ្គលជាសាសនទាយាទបន្តអាយុព្រះពុទ្ធសាសនាតទៅ.ដើម្បីបានថ្វាយឧបការៈទំនុកបម្រុងឧបត្ថម្ភព្រះភិក្ខុសាមណេរ ដែលជាមហាកុសលដ៏ប្រសើរនិងដើម្បីកុំឱ្យកើតសេចក្តីប្រមាទចំពោះមហាកុសលរបស់ខ្លួន៕SRP                                                                   ជន់ ពិទូ៖ ភ្នាក់ងារខេត្តសៀមរាប

ក្រុមក្មេងដើរលើសម៉ោងសារភាពថា ការដកខ្សែក្រវ៉ាត់កាន់នឹងដៃគឺដើម្បីការពារខ្លួន

ខេត្តសៀមរាប៖ក្រុមក្មេងទំនើង០២ មានគ្នា ចំនួន២៦នាក់ ក្នុងនោះស្រី៨នាក់ ត្រូវបានកម្លាំងការិយាល័យអន្តរាគមន៍ពិសេស បានសហការជាមួយកម្លាំងការិយាល័យជំនាញនិងអធិការដ្ឋាននគបាលក្រុងសៀមរាប ធ្វើការឃាត់ត្រួតពិនិត្យ ដើរហើរជាលក្ខណៈជាក្រុមលើសម៉ោង(ម៉ោង២ ម៉ោង៣ )មកធ្វើការត្រួតអប់រំ។

លោកឧត្តមសេនីយ៍ត្រីណុប សារ៉ាក់ ស្នងការរងនិងជាអ្នកនាំពាក្យ នៃស្នងការដ្ឋាននគរបាលខេត្តសៀមរាប បានប្រាប់ទីភ្នាក់ងារសារព័ត៌មាន សៀមរាប ប៉ុស្តិ៍ ក្រុមក្មេងទំនើងត្រូវបានឃាត់ខ្លួននៅវេលាម៉ោង៤ទៀបភ្លឺ ថ្ងៃទី១១ ខែតុលា ឆ្នាំ២០២៥ ចំណុចខាងកើតស្ពានថ្មព្រះរាជដំណាក់ ក្នុងភូមិស្លក្រាម សង្កាត់ស្លក្រាម ក្រុងសៀមរាប ទៅគល់ប្រគល់ជូនការិយាល័យនគរបាលព្រហ្មទណ្ឌកម្រិតស្រាល ដើម្បីធ្វើការសាកសួរនិងស្រាវជ្រាវតាមនីវិធី។

លោកឧត្តមសេនីយ៍ត្រី ណុប សារ៉ាក់ បានបន្តថាកម្លាំងការរិយាល័យជំនាញបានសួរលើបុគ្គលដែលមានកាន់ខ្សែក្រវ៉ាត់នៅក្នុងដៃជាក់ស្ដែងលើ ឈ្មោះ វាន់ វិសុទ្ធ (អ្នកកាន់ខ្សែក្រវ៉ាត់ និងជិះកណ្ដាល)បានសារភាពថា នៅវេលាម៉ោងម៉ោង៤:០០ទៀបភ្លឺ ថ្ងៃទី១១ ខែតុលា ឆ្នាំ២០២៥ ខ្លួននិងបក្ខពួក២នាក់ទៀត ឈ្មោះ ព្រាន ប្រុស (អ្នកបើកម៉ូតូ) និងឈ្មោះ កុង សីហៈ(អ្នកជិះក្រោយ) បានជិះម៉ូតូមួយគ្រឿងម៉ាក Honda Dream C125 ពណ៌ខ្មៅ ស៊េរីឆ្នាំ២០១៨ ផ្លាកលេខ សៀមរ4423 ធ្វើដំណើរទៅរកញ៊ាំបបរសរនៅមុខផ្សារលើធំថ្មី ពេលជិះតាមផ្លូវក៏មានក្មេងទំនើង២ម៉ូតូជិះតាមពីក្រោយពួកខ្លួន ទើបខ្លួនលូកដៃទាញយកខ្សែក្រវ៉ាត់ពីចង្កេះរបស់ឈ្មោះ ព្រាន ប្រុស រួចមួលកាន់នឹងដៃ ដាក់នៅខាងមុខខ្លួន ប្រឡោះភ្លៅ ដើម្បីទុកការពារខ្លួន លុះជិះដល់ចំណុចខាងកើតស្ពានព្រះរាជដំណាក់ ក៏ត្រូវបានសមត្ថកិច្ចឃាត់ខ្លួនតែម្ដង ។

ឈ្មោះ មឿន ដារ៉ាយុទ្ធ បានសារភាពថា ខ្លួននិងឈ្មោះ ប៉ា រិទ្ធរដ្ឋមុនី បានជិះម៉ូតូមួយគ្រឿងម៉ាក Honda Dream 125cc ពណ៌ខ្មៅ ស៊េរី២០២៣ ផ្លាកលេខ សៀមរាប 1AP-9873 ចេញពីក្លឹបកំសាន្តក្លាស៊ីច ពេលជិះដល់ម្ដុំផ្លូវមាត់ស្ទឹងខាងកើតមុខកាហ្វេប្រោន ស្រាប់តែមានក្មេងទំនើង៣ម៉ូតូជិះតាមពីក្រោយពួកខ្លួន ទើបខ្លួនដកខ្សែក្រវ៉ាត់ពីចង្កេះ មូលកាន់នឹងដៃលូកចូលក្នុងអាវ ទុកសម្រាប់ការពារខ្លួន បន្ទាប់មកក្មេងទំនើង៣ម៉ូតូបានជិះបង្ហួសពួកខ្លួនទៅបាត់ ហើយពួកខ្លួនក៏បន្តជិះទៅមុខទៀត លុះដល់ចំណុចខាងកើតស្ពានព្រះរាជដំណាក់ ក៏ត្រូវបានសមត្ថកិច្ចឃាត់ខ្លួនតែម្ដង។

បើតាមអ្នកនាំពាក្យស្នងការនគរបាលខេត្តសៀមរាប
លោកឧត្តមសេនីយ៍ត្រី ណុប សារ៉ាក់ បញ្ជាក់ថាដោយខេត្តសៀមរាបជាខេត្តទេសចរណ៍ ដើម្បីរក្សាសន្តិសុខសណ្ដាប់ធ្នាប់ សាធារណៈ និងបង្កាទប់ស្កាត់មិនអោយបទល្មើសកើតឡើង ក្នុងក្រុងសៀមរាប លោកឧត្ដសេនីយ៍ទោ ហួត សុធី បានសុំគោលការណ៍ទៅឯកឧត្ដមព្រះរាជអាជ្ញា នៃអយ្យការអមសាលាដំបូងខេត្តសៀមរាប ធ្វើការអប់រំ ឯកឧត្ដមព្រះរាជអាជ្ញា បានសម្របសម្រួល ឱ្យហៅអាណាព្យាបាលមកធានាទាំងមនុស្សនិងមធ្យោបាយត្រឡប់ទៅផ្ទះវិញដើម្បីធ្វើការអប់រំបន្ត។

សូមជម្រាបថា ប្រតិបត្តិការនេះអនុវត្តតាមបទបញ្ជាររបស់ឯកឧត្តមនាយឧត្ដមសេនីយ៍ ស ថេត អគ្គស្នងការនគរបាលជាតិ ការចង្អុលបង្ហាញរបស់ឯកឧត្ដម ប្រាក់ សោភ័ណ អភិបាលខេត្តនិងជាប្រធានគណៈបញ្ជាការរដ្ឋបាលខេត្តសៀមរាប និងការណែនាំរបស់លោកឧត្ដមសេនីយ៍ទោ ហួត សុធី ស្នងការនគរបាលខេត្តសៀមរាប៕SRP

បង្ក្រាបករណីចាប់មនុស្សដាក់ឡាន ឃាត់ខ្លួនមនុស្សចំនួន៤នាក់ និងរំដោះជនរងគ្រោះម្នាក់

នៅថ្ងៃទី១០ ខែតុលា ឆ្នាំ២០២៥វេលាម៉ោង១៧និង៣៥នាទីកម្លាំងប្រចាំការរបស់នាយកដ្ឋានព្រហ្មទណ្ឌ នៅខេត្តត្បូងឃ្មុំ បានទទួលព័ត៌មានថា មានករណីចាប់មនុស្សដាក់ក្នុងរថយន្ត ម៉ាកអាល់ហ្វាត ពណ៌ស ពាក់ស្លាកលេខភ្នំពេញ 2CF.1922 នៅត្រង់ចំណុចកន្លែង ប៉ះកង់ឡាន ស្ថិតភូមិទន្លេបិទ ឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំ។

បន្ទាប់ពីទទួលព័ត៌មានភ្លាម ដោយអនុវត្តតាមបទបញ្ជាលោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ, លោកឧត្ដមសេនីយ៍ទោ ស៊ិន រដ្ឋា បានដឹកនាំកម្លាំងជំនាញខេត្តត្បូងឃ្មុំ បើកការស្រាវជ្រាវ និងសហការជាមួយខេត្តបាត់ដំបង បន្ទាយមានជ័យ រហូតឈានឃាត់រថយន្តខាងលើ នៅវេលាម៉ោង23និង17នាទី ថ្ងៃខែឆ្នាំដដែល តាមបណ្ដោយផ្លូវជាតិលេខ56A ស្ថិតក្នុងឃុំទ្រាស ស្រុកស្វាយចេក ខេត្តបន្ទាយមានជ័យ និងជួយសង្គ្រោះបានជនរងគ្រោះឈ្មោះ Chen Noeuysin ភេទប្រុស អាយុ២៥ឆ្នាំ ជនជាតិចិន ឃាត់ ខ្លួនជនសង្ស័យចំនួន០៤នាក់។

ទី១៖ឈ្មោះ ចយ សាទី ភេទប្រុស អាយុ៣២ឆ្នាំ រស់នៅភូមិ គោករការ ឃុំតាបែន ស្រុកស្វាយ ចេក ខេត្តបន្ទាយមានជ័យ (អ្នកបើកបរ)
ទី២៖ឈ្មោះ ធី ចិត្ត ភេទប្រុស អាយុ៣០ឆ្នាំ រស់នៅភូមិទួលប្រាសាទ សង្កាត់ ប៉ោយប៉ែត ក្រុង ប៉ោយប៉ែត ខេត្តបន្ទាយមានជ័យ
ទី៣៖ឈ្មោះ រ៉ម សិរីវ័ន្ត ភេទប្រុស អាយុ៣៧ឆ្នាំ រស់នៅភូមិ ព្រៃកុប សង្កាត់ផ្សារអូឫស្សី ក្រុងប៉ោយប៉ែត ខេត្តបន្ទាយមានជ័យ
ទី៤៖ឈ្មោះ ឆុន សុភិន ភេទប្រុស អាយុ៣៥ឆ្នាំ រស់នៅភូមិវត្តចាស់ ឃុំតាលាស់ ស្រុកមោងឬស្សី ខេត្តបាត់ដំបង។ ដកហូតរថយន្ត០១គ្រឿង ម៉ាកអាល់ហ្វាត ពណ៌ស ពាក់ស្លាកលេខភ្នំពេញ 2CF-1922។

បច្ចុប្បន្នាយកដ្ឋាននគរបាលព្រហ្មទណ្ឌបានប្រគល់ជនសង្ស័យខាងលើទៅស្នងការរដ្ឋាននគរបាលខេត្តត្បូងឃ្មុំ ជាម្ចាស់ករណីដើម្បីកសាងសំណុំរឿងចាត់ការតាមនីតិវិធី៕SRP

អាជ្ញាធរខេត្តសៀមរាប ប្រកាសហាមឃាត់ការបញ្ជាក់ដឹងឮ ឬការយល់ព្រមលើឯកសារដីធ្លីជនជាតិដើមភាគតិចសម្រាប់ប្រតិបត្តិការហិរញ្ញវត្ថុ

អាជ្ញាធររខេត្តសៀមរាប នៅរសៀលថ្ងៃម្សិលមិញ
បានបើកកិច្ចប្រជុំផ្សព្វផ្សាយនូវវិធានការហាមឃាត់របស់ក្រសួងមហាផ្ទៃ ចំពោះការបញ្ជាក់ដឹងឮ ឬការយល់ព្រមលើឯកសារពាក់ព័ន្ធនឹងអត្តសញ្ញាណដីធ្លីរបស់សមាជិក ឬសហគមន៍ជនជាតិដើមភាគតិច សម្រាប់ធ្វើជាឯកសារទិញ លក់ បញ្ចាំ ឬសម្រាប់បម្រើដល់ប្រតិបត្តិការហិរញ្ញវត្ថុនានា ដឹកនាំដោយ លោក អ៊ឹង គឹមលាង អភិបាលរងខេត្តសៀមរាប។

ក្នុងឱកាសនោះ លោក អ៊ឹង គឹមលាង បានលើកឡើងថា រាជរដ្ឋាភិបាលកម្ពុជា តាមរយៈឯកសារគោលនយោបាយចុះបញ្ជីដីធ្លី និងសិទ្ធិប្រើប្រាស់ដីសហគមន៍ជនជាតិដើមភាគតិច បានចាត់ទុក “ការចុះបញ្ជីដីធ្លីជូនសហគមន៍ជនជាតិដើមភាគតិច គឺជាការធានានូវសុវត្ថិភាពនៃការកាន់កាប់ដីធ្លី និងបង្កលទ្ធភាពឱ្យសហគមន៍បានប្រើប្រាស់ដីកាន់តែមានផលិតភាពខ្ពស់”។

លោកបានបន្តថា កន្លងមកក្រសួងមហាផ្ទៃបានសង្កេតឃើញថា អាជ្ញាធរមូលដ្ឋានមួយចំនួន បានធ្វើការបញ្ជាក់លើឯកសារពាក់ព័ន្ធនឹងអត្តសញ្ញាណដីធ្លីសមូហភាពរបស់សហគមន៍ជនជាតិដើមភាគតិច សម្រាប់ធ្វើជាឯកសារទិញ លក់ បញ្ចាំ ឬសម្រាប់បម្រើដល់ប្រតិបត្តិការហិរញ្ញវត្ថុនានា ដែលសកម្មភាពទាំងនេះបានប៉ះពាល់ដល់ជីវភាពរស់នៅរបស់បងប្អូនជនជាតិដើមភាគតិច និងជាការអនុវត្តផ្ទុយពីបទបញ្ញត្តិនៃច្បាប់ជាធរមាន។

លោកបានសង្កត់ធ្ងន់ថា ដើម្បីធានាប្រសិទ្ធភាពក្នុងការអនុវត្តគោលនយោបាយជាតិ និងលិខិតបទដ្ឋានគតិយុត្តនានាពាក់ព័ន្ធសហគមន៍ជនជាតិដើមភាគតិចនៅកម្ពុជា ក្រសួងមហាផ្ទៃបានណែនាំដល់រដ្ឋបាលខេត្ត និងអាជ្ញាធរមូលដ្ឋានពាក់ព័ន្ធ ត្រូវបញ្ឈប់រាល់ការបញ្ជាក់ដឹងឮ ឬយល់ព្រមលើឯកសារទិញ លក់ ជួល ឬឯកសារផ្ទេរដីធ្លីសមូហភាពរបស់សហគមន៍ជនជាតិដើមភាគតិច ជាពិសេសចំពោះសហគមន៍ដែលបានចុះបញ្ជីនៅក្រសួងមហាផ្ទៃរួចហើយ។

លោកអភិបាលរងខេត្ត ក៏បានជំរុញដល់សមាជិកអង្គប្រជុំទាំងអស់ ត្រូវធ្វើការផ្សព្វផ្សាយខ្លឹមសារលិខិត ២៨០៨ ស.ជ.ណ របស់ក្រសួងមហាផ្ទៃ ឱ្យបានទូលំទូលាយដល់គ្រប់មន្ទីរ អង្គភាពពាក់ព័ន្ធ និងអាជ្ញាធរមានសមត្ថកិច្ចនៅមូលដ្ឋាន ព្រមទាំងតាមដានត្រួតពិនិត្យការអនុវត្តកិច្ចការនេះឱ្យមានប្រសិទ្ធភាព។

បើតាម លោក សឿ សីហរិទ្ធ អនុប្រធានមន្ទីរអភិវឌ្ឍន៍ជនបទខេត្តសៀមរាប បានឱ្យដឹងថា ក្នុងខេត្តសៀមរាប មានជនជាតិភាគតិចកួយ រស់នៅក្នុងឃុំស្រែណូយ ស្រុកវ៉ារិន ចំនួន ៧ភូមិ ស្មើនឹង ១៧៩គ្រួសារ ក្នុងនោះមាន ៥ភូមិទទួលស្គាល់ដោយក្រសួងអភិវឌ្ឍន៍ជនបទ និង ២ភូមិទៀតជាភូមិឧបសម្ព័ន្ធ៕SRP

អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
#មន្ទីរព័ត៌មានខេត្តសៀមរាប

ខេត្តសៀមរាប៖ស្នងការរងទទួលផែនការងារនគរបាលប្រឆាំងបទល្មើសសេដ្ឋកិច្ច លោកឧត្តមសេនីយ៍ត្រី សឿន សេន បានប្រាប់ពីភ្នាក់ងារសារព័ត៌មានសៀមរាប ប៉ុស្តិ៍ ថាកម្លាំងផែនការងារនគរបាលប្រឆាំងបទល្មើសសេដ្ឋកិច្ច បានសហការជាមួយកម្លាំងជំនាញខ័ណ្ឌរដ្ឋបាលព្រៃឈើសៀមរាប ក្រោមការដឹកនាំសម្របសម្រួលនីតិវិធី របស់ឯកឧត្តម មាស ច័ន្ទពិសិដ្ឋ ព្រះរាជអាជ្ញានៃអយ្យការអមសាលាដំបូងខេត្តសៀមរាប បានចុះត្រួតពិនិត្យការធ្វើសន្និធិឈើមូលចម្រុះ។

ការចុះបង្ក្រាបនៅថ្ងៃអង្គារ ទី៧ ខែតុលា ឆ្នាំ២០២៥ ស្ថិតនៅដីឡូត៌មួយកន្លៃងនៅភូមិវត្តស្វាយ សង្កាត់សាលាកំរើក ក្រុងសៀមរាប ដែលមានម្ចាស់ឈ្មោះ សាយ មេសា អាយុ ៥៥ឆ្នាំ។

លោកឧត្តមសេនីយ៍ត្រី សឿន សេន បានបន្តថា ប្រតិបត្តិការ បង្ក្រាបនេះកម្លាំងចម្រុះ បានធ្វើចំណាត់ការ៖ ចាប់យកឈើមូលចម្រុះលេខ១ (ផ្ចឹក សុក្រំ ឈ្លីក ក្រឡាញ់ កកោះ ) ចំនួន៤៩ដើម ស្មើ ៧ ម៉ែត្រត្រីគុណ ៨៩៧ គ្មានច្បាប់អនុញ្ញាតពីមន្រ្តីជំនាញ ដើម្បីអនុវត្តតាមនីតិវិធីតាមច្បាប់ ស្តីពីព្រៃឈើ៕SRP

ខេត្តសៀមរាប៖កម្លាំងអាវុធហត្ថខេត្តសៀមរាបបានបញ្ជូនខ្លួនជនសង្ស័យម្នាក់ទៅសាលាដំបូងពាក់ព័ន្ធករណី ហិង្សា​ដោយ​ចេតនាមានស្ថានទម្ងន់ទោស។

ការឃាត់ខ្លួននៅថ្ងៃទី០៥ ខែតុលា ឆ្នាំ២០២៥ នៅចំណុចតាមផ្លូវបេតុង ស្ថិតនៅភូមិសាលាកន្សែង សង្កាត់ស្វាយដង្គំ ក្រុងសៀមរាប។ ជនសង្ស័យ​ឈ្មោះ វ៉ាន់ សុខ​ថេប ភេទប្រុស អាយុ ១៨ឆ្នាំ មុខរបរគ្មាន មានទីនៅបច្ចុប្បន្នភូមិបឹងដូនប៉ា សង្កាត់ស្លក្រាម​ ក្រុងសៀមរាប។

អាវុធហត្ថខេត្តសៀមរាបបានឲ្យដឹងថា កាលពីថ្ងៃទី០៤ ខែតុលា​ ឆ្នាំ២០២៥ វេលាម៉ោង០០:២០ នាទីរំលងអធ្រាត ស្ថិតនៅចំណុចភូមិសាលាកន្សែង សង្កាត់ស្វាយដង្គំ ក្រុងសៀមរាប មានករណីហិង្សា​ដោយ​ចេតនាមានស្ថានទម្ងន់ទោស បង្កឡើង​ជនសង្ស័យឈ្មោះ វ៉ាន់ សុខថេប និងបក្ខពួកមានគ្នា០៣នាក់ បានជិះម៉ូតូដេញកាប់ទៅលើជនរងគ្រោះបណ្ដាលឲ្យរបួសធ្ងន់។

តាមការបំភ្លឺរបស់ជនសង្ស័យឈ្មោះ វ៉ាន់ សុខថេប បានឆ្លើយសារភាពថារូបខ្លួន និងបក្ខពួក ពិតជាបានជិះម៉ូតូដេញកាប់ទៅលើជនរងគ្រោះពិតប្រាកដមែន៕SRP