ខេត្តសៀមរាប៖ឯកឧត្តម ហុក វ៉ាន់ធីណា ប្រធានសាលាដំបូងខេត្តសៀមរាប, ឯកឧត្តម មាស ច័ន្ទពិសិដ្ឋ ព្រះរាជអាជ្ញានៃអយ្យការអមសាលាដំបូងខេត្តសៀមរាប បានដាស់តឿន និងជំរុញអង្គសន្និបាត ក្នុងឆ្នាំ២០២៥ ត្រូវចាត់ការសំណុំរឿងរដ្ឋប្បវេណី និងសំណុំរឿងព្រហ្មទណ្ឌ ឱ្យបានលឿន ឆាប់រហ័ស ត្រឹមត្រូវ និងយុត្តិធម៌ ជាពិសេសសំណុំរឿង អាទិភាពទាំង៣ (គ្រឿងញៀន, ចរាចរណ៍ និងអត្រានុកូលដ្ឋាន) និងសំណុំរឿងពាក់ព័ន្ធនឹងក្មេងទំនើងផងដែរ។
ឯកឧត្តមទាំងពីរមានប្រសាសន៍ជំរុញយ៉ាងដូច្នេះ នាថ្ងៃទី៦ ខែមករា ឆ្នាំ២០២៥ នៅសាលាដំបូង និងអយ្យការអមសាលាដំបូងខេត្តសៀមរាប ក្នុងឱកាសរៀបចំសន្និបាតបូកសរុបលទ្ធលផលការងារឆ្នាំ២០២៤ និងកំណត់ទិសដៅ ការងារសម្រាប់អនុវត្តបន្តនៅឆ្នាំ២០២៥ ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ហុក វ៉ាន់ធីណា ប្រធានសាលាដំបូង, ឯកឧត្តម មាស ច័ន្ទពិសិដ្ឋ ព្រះរាជអាជ្ញានៃអយ្យការអមសាលាដំបូង, លោក ច័ន្ទ សត្ថា អគ្គនាយករង នៃអគ្គនាយកដ្ឋានរដ្ឋបាលតុលាការនៃក្រសួងយុត្តិធម៌ ដោយមានការចូលរួមពីសំណាក់ លោកអនុប្រធានសាលាដំបូង លោក-លោកស្រីព្រះរាជអាជ្ញារង លោក-លោកស្រីចៅក្រម ចៅក្រមកម្មសិក្សា លោក-លោកស្រីក្រឡាបញ្ជី លោកអាជ្ញាសាលា លោកប្រធាន-អនុប្រធានលេខាធិការដ្ឋាន និងមន្ត្រីទាំងអស់នៃលេខាធិការដ្ឋានរដ្ឋបាលសាលាដំបូងខេត្តសៀមរាប តាមរបៀបវារៈនៃអង្គសន្និបាត។
ឯកឧត្តមប្រធានសាលាដំបូង និងឯកឧត្តមព្រះរាជអាជ្ញា ក៏បានណែនាំឱ្យបន្តអនុវត្តតាមផែនការរបស់ក្រសួងយុត្តិធម៌ ដែលបានដាក់ចេញកាលពីថ្ងៃទី១០ ខែមករា ឆ្នាំ២០២៤ ស្តីពីការអនុវត្តយុទ្ធនាការជំរុញ និងពន្លឿនការដោះស្រាយ រឿងក្តី នៅតាមតុលាការ និងយុទ្ធនាការត្រួតពិនិត្យ និងដោះស្រាយភាពមិនប្រក្រតីនៅតាមតុលាការ។
អង្គសន្និបាតបានប្រព្រឹត្តទៅដោយរលូន ដោយបានបង្ហាញពីលទ្ធផលការងារឆ្នាំ២០២៤ និងពិភាក្សាលើបញ្ហាប្រឈមក្នុងឆ្នាំចាស់ សំណូមពរមួយចំនួនជូនក្រសួងយុត្តិធម៌ ព្រមទាំងលើកទិសដៅការងារ សម្រាប់ឆ្នាំ២០២៥ ដូចមានក្នុងរបាយការណ៍សន្និបាតឆ្នាំ២០២៥។
អង្គសន្និបាតបានបញ្ចប់នៅវេលាម៉ោង១២ និង៣០នាទីព្រឹក ប្រកបដោយលទ្ធផលល្អគាប់ប្រសើរ និងពេលល្ងាចបានរៀបចំអាហារសាមគ្គី ជូនដល់មន្រ្តីរាជការ និងបុគ្គលិកហាត់ការទាំងអស់ នៃសាលាដំបូង និងអយ្យការអមសាលាដំបូងខេត្តសៀមរាប ប្រកបដោយសេចក្តីរីករាយបំផុតផងដែរ៕SRP