ភ្នំពេញ៖សម្ដេចស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានមានប្រសាសន៍ប្រាប់ រដ្ឋបាលរាជធានីភ្នំពេញ ត្រូវខិតខំពង្រឹងការគ្រប់គ្រងប្រមូលសំរាម និងសំណល់រឹង ព្រមទាំងសម្អាតទីក្រុង ឱ្យស្របតាមកំណើនប្រជាពលរដ្ឋ។
ក្នុងពិធីបិទសន្និបាត បូកសរុបលទ្ធផលការងារ ប្រចាំឆ្នាំ២០២២ និងលើកទិសដៅការងារ ប្រចាំឆ្នាំ២០២៣ របស់រដ្ឋបាលរាជធានីភ្នំពេញ ថ្ងៃម្សិលមិញ សម្ដេចស ខេង ក៏បានបញ្ជាក់ថា «ត្រូវបន្តលើកកម្ពស់សោភ័ណភាព សណ្តាប់ធ្នាប់ អនាម័យ និងបរិស្ថានក្នុងទីក្រុង ដោយខិតខំពង្រឹងការគ្រប់គ្រងការប្រមូលសំរាម និងសំណល់រឹង និងការសម្អាតទីក្រុង ឱ្យស្របតាមកំណើន ប្រជាពលរដ្ឋ និងការរីកចម្រើនផ្នែកនគររូបនីយកម្ម ដែលមានការកើនឡើងយ៉ាងឆាប់រហ័ស»។
សម្ដេចបន្ដថា ទន្ទឹមនេះ ត្រូវយកចិត្តទុកដាក់ថែទាំ និងដាំដើមឈើនៅតាមដងផ្លូវសាធារណៈ ការរៀបចំសួនច្បារសាធារណៈ ព្រមទាំងខិតខំផ្សព្វផ្សាយឱ្យបានទូលំទូលាយដល់ ប្រជាពលរដ្ឋ ដើម្បីលើកកម្ពស់ការចូលរួម រៀបចំសណ្តាប់ធ្នាប់ សាធារណៈតាមដងផ្លូវ ទីផ្សារ និងទីកន្លែងសាធារណៈឱ្យមានរបៀបរៀបរយល្អបន្ថែមទៀត។
សម្ដេចស ខេង បានរំលឹកថា រាជធានីភ្នំពេញ បានចូលជាសមាជិកបណ្តាញទីក្រុងឆ្លាតអាស៊ានតាំងពី ឆ្នាំ២០១៨មក។ ការគ្រប់គ្រងអភិវឌ្ឍទីក្រុងតាមប្រព័ន្ធទីក្រុងវៃឆ្លាត កំពុងត្រូវបានអនុវត្តនៅទីក្រុងនៃប្រទេសនានាជាច្រើន រួមទាំងតំបន់អាស៊ាន សំដៅប្រើប្រាស់បច្ចេកវិទ្យាព័ត៌មាន និងឌីជីថល សម្រាប់លើកកម្ពស់ការផ្តល់សេវា នានាជូនប្រជាពលរដ្ឋ ការថែរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ព្រមទាំងការងារផ្សេងៗទៀត ដើម្បីសម្រួលដល់ជីវភាពរស់នៅ របស់ប្រជាពលរដ្ឋ និងការគ្រប់គ្រងការអភិវឌ្ឍទីក្រុង៕SRP
