ស៊ើបអង្កេត នយោបាយ មិត្តអ្នកអាន

ខេត្តសៀមរាប៖យើងទាំងអស់គ្នា ប្រហែលជាធ្លាប់បានឮពាក្យចាស់ដែលបានពោលថា ” ប្រសិនបើយើងសែបគប់បណ្ឌិត យើងនឹងក្លាយជាបណ្ឌិត ប្រសិនបើយើងសែបគប់ ជាមួយពាល បើយើងមិនក្លាយជាជនពាល ប្រហែលជាអ្នកគាំទ្រអំពើរបស់ពាល ” ហេតុដូច្នេះហើយទើបយើងឃើញ ភាគច្រើនបំផុត ក្នុងលោកយើងនេះ អ្នកមានរាប់អានអ្នកមាន រីឯ អ្នកក្រ រាប់អានអ្នកក្រ ពីព្រោះពួកគេ ងាយស្រួលនិយាយចូលគ្នា ជាមួយនឹងគំនិតប្រហាក់ប្រហែលគ្នា ឬក៏យើងអាចនិយាយបានថា “ ផ្ទះរស់នៅក្នុងតំបន់់ប្លុកអ្នកមាន ឬផ្ទះរស់នៅ ក្នុងតំបន់ប្លុកអ្នកក្រ។

ចំណុចដែលត្រូវលើកយកមកពិចារណា ទៅលើអត្ថបទនេះ គឺចង់ឱ្យមិត្តអ្នកអាន ងាកមកគិតអំពីខ្លួនឯងផ្ទាល់វិញ អំពីឥទ្ធិពល នៃបរិស្ថានជុំវិញខ្លួន ឥទ្ធិពល នៃទំនាក់ទំនង ជាមួយនិងមនុស្សដទៃទៀត ព្រមទាំង បរិស្ថានរស់នៅផ្ទាល់ខ្លួន ដោយមានសំណួរខ្លះថាតើ :
1: អ្នកនឹងក្លាយជាអ្វីនៅពេលអនាគត? ហើយបរិស្ថានជុំវិញខ្លួន របស់អ្នក និងការរៀបចំខ្លួនរបស់អ្នក ជួយគាំទ្រអ្នកដែរឬទេ?

2: សកម្មភាពបច្ចុប្បន្ន និងទម្លាប់បច្ចុប្បន្ន ឆ្ពោះទៅអ្វីមួយសំរាប់អនាគតដែរឬទេ?

៣: តើអ្នកអាចកត់សម្គាល់ សកម្មភាពនិងឫកពា មួយ ណាជាពាល ហើយ និងឫកពា មួយ ណាជាបណ្ឌិត បានដែរឬទេ?

3 : តើអ្នកអាចកត់សម្គាល់អំពីសកម្មភាព និង ការងាររបស់អ្នក ស្ថិតនៅទីកន្លែងណាមកដល់បច្ចុប្បន្ននេះ?

ជាទូទៅ មនុស្សនៅក្នុងលោកយើងនេះ តែងតែមានភាពច្របូកច្របល់ នៅក្នុងចិត្តគំនិត ហើយបរាជ័យ មិនបានអភិវឌ្ឍខ្លួន ដើម្បីឲ្យបានសម្រេច នូវអ្វីដែលយើងចង់បាននោះទេ មានមនុស្ស មិនច្រើនគ្នាឡើយ ដែលបានដាក់ផែនការចំពោះខ្លួនច្បាស់លាស់ សម្រាប់ពេលអនាគត។
ភាគច្រើននៅក្នុងចំណោម ពួកយើង
បាត់ ភាពក្លាហាន និងជំនឿជឿ ជាក់លើខ្លួនឯង
ដោយសារតែមានសំលេង នៅជុំវិញខ្លួន រួមទាំងផ្នត់គំនិតពីមុនមក មិនឲ្យយើងអភិវឌ្ឍខ្លួន មានដូចជា :

1: ស្លឹកឈើជ្រុះមិនឆ្ងាយពីគល់
2: ពូជយើងជាអ្នកក្រ ឬពាក្យថា ធ្វើម្ដេចបើយើងអ្នកក្រ”
3 : អ្នកគ្មានសមត្ថភាពទេ!

តាមពិត : “ភាពមានបាន ស្តុកស្តម្ភ “មិនមែនជាកម្មសិទ្ធិរបស់អ្នកណាឡើយ”។

ទាំងអស់នោះអាស្រ័យលើគំនិតតែប៉ុណ្ណោះ ” ប្រសិនបើអ្នកផ្លាស់ប្ដូរវិធីគិត អ្នកនឹងមានគំនិតថ្មី ដែលធ្វើឲ្យ បរិស្ថានរស់នៅ និងអ្វីៗជុំវិញខ្លួនរបស់អ្នក មានភាពប្រសើរឡើង ជារៀងរាល់ថ្ងៃ”,៕

និពន្ធដោយ លោកសឿន តុលា
ស្ថាបនិកក្រុមហ៊ុន ផា ផា យ៉ា PAPAYA NEXT STEP CO,.LTD
* PAPAYA REAL ESTATE
( គម្រោងអភិវឌ្ឍន៍អចលនទ្រព្យ)
* PAPAYA HOMESTAY
( គម្រោងលើវិស័យទេសចរណ៍)
* PAPAYA GARDEN
( គម្រោងលើវិស័យកសិកម្មនិងចែកចាយអាហារ)

ខេត្តសៀមរាប៖”ប្រសិនបើអ្នកជឿខ្លួនឯងថា អ្នកនឹងរស់នៅក្នុងភាពស្តុកស្តម្ភ ភាពស្ដុកស្ដម្ភនឹងជឿអ្នក” អត្ថន័យខាងលើនោះ  សូមដៅឲ្យយើងការជឿទៅលើចំណុចវិជ្ជមាន ដែលខ្លួនយើងចង់បានជាពិសេស ឥទ្ធិពលនៃជំនឿ សម្រាប់់ជីវិតរស់នៅនិងការធ្វើអាជីវកម្ម។

រាល់ការធ្វើអាជីវកម្មទាំងអស់ ដែលទទួលបានភាពជោគជ័យ មិនអាចកើតឡើង ដោយធម្មជាតិ ដោយភាពងាយស្រួល ឬដោយភាពចៃដន្យនោះទេ។

គ្រប់យ៉ាងកើតឡើង ចេញពីភាពក្លាហាន ឬក៏យើងហៅថា”ការប្រថុយដែលមានកម្រិតគ្រប់គ្រងបាន” ចេញពីការសម្រេចចិត្ត  ចេញពីភាពប្រឹងប្រែងនិងការរៀនពីកំហុសជាប្រចាំ  ពីព្រោះយើងដឹងហើយថា  ” សូម្បីតែយើង អង្គុយស្ងៀមមិនធ្វើអ្វីមួយ ក៏មានកំហុសទៅលើហេតុផលអ្វីមួយរួចទៅហើយដែរ”។

ដូច្នេះហើយការកែប្រែកំហុសឲ្យមានប្រសិទ្ធភាព  ឱ្យឃើញផ្លែផ្កា រាល់ការងារ ដែលសហគ្រិនជោគជ័យបានធ្វើគឺស្ថិតនៅក្នុងគោលដៅយ៉ាងច្បាស់ ដោយឈរលើខ្សែបន្ទាត់នៃគុណភាព ទំនាក់ទំនង ហើយមិត្តអ្នកអាន សូមចងចាំថា” កម្រិតគុណភាពរបស់សហគ្រិនភាព  អាស្រ័យទៅលើ កម្រិតគុណភាព ទំនាក់ទំនង ដែលពួកគេបានធ្វើឡើង”។

សហគ្រិនដែលបានទទួលជោគជ័យជានិរន្តរ៍ ពួកគាត់បានកំណត់ចក្ខុវិស័យ យ៉ាងច្បាស់លាស់ ដើម្បីឲ្យក្លាយជាអ្វីមួយនៅពេលខាងមុខ   ហើយពួកគេជឿលើចក្ខុវិស័យរបស់ខ្លួន  “ប្រសិនបើអ្នកជឿលើខ្លួនឯង ជោគជ័យនិងចូលរួមជឿលើអ្នក” ពីព្រោះអ្នកជឿលើហេតុផលចេញ ពីក្នុងខ្លួនរបស់អ្នកមក។

ខាងក្រោមនេះ ជាគោលដៅចំបងចម្បង ៥ចំណុច សម្រាប់សហគ្រិនដើម្បីពង្រីកសមត្ថភាពរលើកធុរកិច្ចរបស់ខ្លួន។

១. គិតធំ “ខ្ញុំអាចធ្វើបាន”

“ប្រសិនបើអ្នកគិតថា អាចធ្វើបាន អ្នកនឹងមើលឃើញនូវវិធីជាច្រើនដើម្បីឲ្យសម្រេចបានចំពោះការគិតនោះ”

ការប្រកាន់នៅជំហរថា :គ្មានអ្វីដែលមិនអាចទៅរួចនោះទេ បើអ្នកមិនទាន់ធ្វើវានោះ ពាក្យពេចន៍ទាំងអស់នោះ  មានតម្លៃលើសពីអ្វីដែលអ្នកបានគិត  ក្នុងកម្រិតដែលអ្នកមានអំឡុងពេលពេលបច្ចុប្បន្ន ប៉ុន្តែអ្នកត្រូវ ចាប់ផ្ដើមធ្វើពីឥឡូវនេះទៅ “ប្រសិនបើអ្នកនៅតែបន្តការប្រៀបធៀបការវាយតម្លៃមកលើខ្លួនឯងអ្នកមិនអាចមានចិត្តក្លាហានគិតធំបានឡើយ ហើយការគិតធំនេះ ធ្វើឲ្យអ្នកមានវិន័យដាច់ខាតចំពោះខ្លួនឯង។

២. ប្រកាន់យកការគិតវិជ្ជមាន:

សហគ្រិនជោគជ័យ មានមូលហេតុដែល ពួកគេជោគជ័យ ពីព្រោះ ពួកគេផ្លាស់ប្ដូរផ្នត់គំនិត អវិជ្ជមាន ទាំងឡាយ នៅក្នុងផ្នត់គំនិតចាស់ៗរបស់ពួកគេដោយបញ្ចូលឬជំនួសមកវិញនៅ នូវផ្នត់គំនិតវិជ្ជមាន។

“ប្រសិនបើអ្នកមានការគិតអវិជ្ជមាន អ្នកនឹងមើលឃើញពីពន្លឺនៃភាពជោគជ័យរចេញពីក្នុងខ្លួនរបស់អ្នក “ដូច្នេះហើយ  សូមអ្នក ព្យាយាមកែប្រែគំនិតអវិជ្ជមានចោល ហើយទទួលយកឥរិយាបថល្អៗសម្រាប់ខ្លួនឯងវិញ ” ការ គិតអវិជ្ជមាន គឺជាឧបសគ្គរាំងផ្លូវរបស់អ្នកមិនឲ្យធ្វើដំណើរទៅ ដល់កន្លែងដែលអ្នកចង់ទៅ រីឯការគិតវិជ្ជមាន នឹងពាំនាំរូបអ្នក ទៅដល់ទីកន្លែងតើអ្នកចង់ទៅ ”

៣. គិតអំពី ឈ្នះឈ្នះរួមគ្នា

សហគ្រិនដែលទទួលបានផលធំៗពីព្រោះពួកគេបានគិតធំ ពួកគេតែងតែប្រកាន់យកនូវកិច្ចសហប្រតិបត្តិការ  ដែលជាស្នូលធំមួយក្នុងទិសដៅរួម “ឈ្នះឈ្នះទាំងអស់គ្នា “ប្រសិនបើខ្ញុំបានចំណេញ អ្នកក៏បានចំណេញ គឺគ្មានអ្នកណាខាតឡើយ។

ក្រុមហ៊ុនមួយជោគជ័យ នឹងស្ដុកស្ដម្ភទៅបាន មិនមែនអាស្រ័យទៅលើតែ អតិថិជន ក្នុងរយៈពេលខ្លីនោះទេ គឺការគិតឃើញវែងឆ្ងាយ សម្រាប់មនុស្សជំនាន់ក្រោយ ព្រមទាំង ការសហការជាមួយនឹងដៃគូផ្សេងៗ ដើម្បីចូលរួមភាព  រីកចម្រើនរយៈពេលយូរ ក្នុងទិសដៅ ឈ្នះរួមគ្នា ” ខ្ញុំឈ្នះ  , អ្នកឈ្នះ , យើងឈ្នះ WIN  WIN  ព្រមទាំង

ការបង្កើតវប្បធម៌ រីករាយ និងការសំរេចចិត្តលឿន របស់បុគ្គលិកគ្រប់ផ្នែកនៅក្នុងស្ថាប័នផងដែរដូច្នេះ ហើយ ការប្រកាន់យកភាពត្រឹមត្រូវ និង ការប្រកាន់យកភាពយុត្តិធម៌ គឺជាអ្វីដែលពួកគេត្រូវធ្វើក្នុងបុព្វហេតុនៃសហប្រតិបត្តិការ។

៤.ក្លាហានសារភាពចំពោះកំហុស

“កំហុសពិតប្រាកដរបស់សហគ្រិនគឺកំហុស ដែលបណ្ដោយអោយមានដដែលៗ “កំហុសវាមិនមែនជារឿងធំដែលធ្វើឱ្យអ្នកបាក់ មុខមាត់ដូចអ្នកបានគិតនោះទេ តាមការពិតកំហុសគឺជាគ្រាប់ពូជ នៃភាពវាងវៃ នៃភាពត្រឹមត្រូវ សម្រាប់ជំហានបន្ទាប់ ប្រសិនបើអ្នកទទួលស្គាល់នូវកំហុសនោះ។

នៅក្នុងលោកយើងនេះគ្មានអ្វីដែលឥតខ្ចោះនោះឡើយសូម្បីតែផ្ទាំងគំនូរដ៏ល្អមួយត្រូវបានឆ្លងកាត់ការប្រើខ្មៅដៃ ដែល ដែលត្រូវលុបច្រើនដងសូមមិត្តអ្នកអានចង់ចាំថា “ខ្មៅដៃដែលល្អ គឺខ្មៅដៃដែលមានជ័រលុប”។

៥. ផ្នត់គំនិតនិងការតាំងចិត្តត្រូវតែរឹងមាំ

“គ្មានផលធំទាំងឡាយណា កើតឡើងចំពោះអ្នកគិត ស្រាលៗ ឬលំៗ ដោយគ្មានការតាំងចិត្ត មុតមាំបានឡើយ”

នៅពេលដែលអ្នកដឹងច្បាស់ថា អ្នកចង់បានអ្វីឲ្យប្រាកដនោះ គ្មានអ្វីដែលជាឧបសគ្គសំរាប់អ្នកទៀតឡើយ ពីព្រោះភាពពិតប្រាកដ បានធ្វើឲ្យអ្នកក្លាហានជាងមុនបានធ្វើឲ្យអ្នកលះបង់ទម្លាប់ដែរអត់ប្រយោជន៍ ដើម្បីធ្វើកិច្ចការចាំបាច់ ៗ ហើយនៅពេលនោះនឹងជួបមនុស្សជាច្រើន ដែលមានជំនាញនិងមានគំនិតជួយដល់អ្នក លើកស្ទួយអ្នកឲ្យទទួលបានជោគជ័យ។

ប៉ុន្តែរឿងទាំងអស់នោះ “ពួកគេត្រូវការដំបូងគឺអ្នកត្រូវមានការតាំងចិត្តមុតមាំ”។

និពន្ធដោយ៖ លោកសឿន តុលា ស្ថាបនិកក្រុមហ៊ុនផាផាយ៉ា PAPAYA NEXT STEP CO,.LTD

*PAPAYA REAL ESTATE «គម្រោងអភិវឌ្ឍន៍អចលនទ្រព្យ»

* PAPAYA HOMESTAY «គម្រោងលើវិស័យទេសចរណ៍»

*PAPAYA GARDEN «គម្រោងលើវិស័យកសិកម្មនិងចែកចាយអាហារ»

ខេត្តសៀមរាប៖ “ប្រសិនបើអ្នកចង់បានផលឆាប់ ជាមួយគ្នារយៈពេលខ្លី សូមចាប់ការងារណាដែលធ្វើតែឯងបាន ប៉ុន្តែ ប្រសិនបើអ្នកគិតអំពីរយៈពេលយូរអង្វែង ជាមួយនឹងឱកាសរៀនជាច្រើន អំពីគ្នាទៅវិញទៅមក និងទំហំផ្ដល់ផលប្រយោជន៍ធំ សូមបង្កើត ការងារជាក្រុម នៅក្នុងប្រព័ន្ធ”

ជាបឋម នៅក្នុងអត្ថបទនេះសូមឱ្យមិត្តអ្នកអាន ជាពិសេសសហគ្រិន គិតនិងពិចារណា អំពីតម្លៃ នៃការធ្វើការរួមគ្នា ជាក្រុម ឬ ជាសហគមន៍ និង រក្សាកិច្ចសហប្រតិបត្តិការ ចេញពីបុគ្គល ស្ថាប័នតូច រឿងស្ថាប័នធំ ដែលស្ថិតក្នុងស្ថានការណ៍លំបាកនៃនៃវិបត្តិសេដ្ឋកិច្ចឬហានិភ័យផ្សេងៗ។

នេះគឺជាឧទាហរណ៍មួយ នៃរឿងនិទាន របស់ប្រទេសលោកខាងលិច។
“រដូវធ្លាក់ព្រិលនិង សត្វកាំប្រម៉ា”

សត្វកាំប្រម៉ា ជាធម្មតាពួកគេមានទម្លាប់រស់នៅដាច់ចេញពីគ្នាពីព្រោះដោយសារតែបន្លានៅជាប់ខ្លួនរបស់ពួកគេធ្វើឲ្យមុតគ្នាទៅវិញទៅមកប៉ុន្តែ គ្រាមួយដោយសារតែអាកាសធាតុប្រែប្រួល មានការធ្លាក់ព្រិលទឹកកក ខុសរដូវកាល ដែលធ្វើឱ្យសត្វកាំប្រម៉ាទាំងអស់ នៅក្នុងតំបន់ ទទួលរងការឈឺចាប់ដោយសារតែភាពត្រជាក់ខ្លាំង មិនត្រឹមតែប៉ុណ្ណោះពួកគេមិនបានរៀបចំទុកជាមុនចំពោះអ្វីៗ ដែលកំពុងកើតឡើង បែបអាក្រក់នោះឡើយ ពោលគឺគ្រាដូចសម័យ Covid 19 ដូច្នោះដែរ។
ដោយ សាតែការស្លាប់ជាបន្តបន្ទាប់ពីព្រោះអាកាសធាតុត្រជាក់នៅតែបន្ត សត្វកាំប្រម៉ាដែលនៅសេសសល់បានយល់ឃើញថា ” ពួកគេអាចរស់រៀនមានជីវិតប្រសិនបើពួកគេនៅផ្ដុំគ្នា ដើម្បីឲ្យមាន កុំដៅចេញពីក្នុងខ្លួនរបស់ពួកគេម្នាក់ៗ អាច ជា ឡកកំដៅ មួយសម្រាប់ កម្ដៅពួកគេម្នាក់ ប៉ុន្តែការលំបាកនោះគឺថា នៅពេលដែលពួកគេនៅកៀកជាប់គ្នា ពួកគេនឹងមុត ស្លាបបន្លា ដែលនៅជាប់ខ្លួនរបស់ពួកគេទៅវិញទៅមក តែទោះជាយ៉ាងណាក៏ដោយក្រុមសត្វកាំប្រម៉ាដែលនៅសល់ពីការស្លាប់បានតស៊ូនៅផ្ដុំគ្នា ដោយការមុតបន្លាប្រសើរជាងស្លាប់។

អត្ថន័យរៀបរាប់ខាងលើនោះបានបញ្ជាក់ឲ្យឃើញថា “ក្នុងគ្រាលំបាក ឬ ក្នុងគ្រាដែលមានវិបត្តិសេដ្ឋកិច្ច ឬវិបត្តិអ្វីមួយ ” ការធ្វើការតែឯងលំបាកហើយមិនបានវែងឆ្ងាយឡើយ ប៉ុន្តែប្រសិនបើយើងធ្វើការរួមគ្នា អ្វីទាំងអស់តែងតែប្រសើរឡើង”

ភាពជាក់ស្ដែង ចំពោះម្ចាស់អាជីវកម្មនៅក្នុងគ្រាលំបាកដោយសារតែវិបត្តិពិភពលោក នៃ Covid 19 ” បានកំពុងរីករាលដាល បែបនេះ: ចំនួនអតិថិជននិងចំនួននៃប្រាក់ចំណូលបានធ្លាក់ចុះ ជាសញ្ញាមួយឱ្យអ្នករៀនបត់បែន បំផុសឲ្យមានការជួបជាមួយ អ្នកដែលជាប់ពាក់ព័ន្ធជាមួយនឹងអាជីវកម្ម ដើម្បីស្វែងរកនូវតុល្យភាពនៃសភាពជាក់ស្ដែង ជាពិសេសនោះ ការថ្លឹងថ្លែងដើម្បីរក្សាកម្លាំងធនធានមនុស្ស តាមរយៈនៃការជួបនិងការចរចា សូមចងចាំថា: ” ការចរចារតែងតែនាំមកនូវគ្រាប់ ពូជ នៃការពិចារណា ដើម្បីឲ្យបានផលប្រយោជន៍ទាំងសងខាង ”
ការងារជាក្រុម ផ្ដល់ផលប្រយោជន៍ដូចខាងក្រោម:
១ : បង្កើន ការច្នៃប្រឌិត និងបង្កើន ការរៀន អំពីការងារ.
២ : នាំឲ្យបុគ្គលម្នាក់ៗ កសាង ទេពកុសល ជំនាញ ជាពិសេសម្ចាស់អាជីវកម្ម បង្កើនគុណភាពជំនាញចាត់ចែងធនធានមនុស្ស សូមចងចាំថា ” ទ្រព្យពិតប្រាករបស់ម្ចាស់អាជីវកម្មគឺធនធានមនុស្ស “។
៣ : ពង្រីកទំហំនៃភាពជឿជាក់ទំនាក់ទំនង និង ការជឿជាក់ក្នុងបុគ្គលនីមួយៗជាមួយនឹងទេពកុសល និងជំនាញរបស់ខ្លួននោះ នាំឲ្យមាននៅការជឿទុកចិត្តជាសាធារណៈ ” ទំហំនៃជំនឿជឿជាក់ចេញពីសាធារណជន អាស្រ័យទៅលើទំហំនៃជំនឿ ជឿជាក់ ខាងក្នុងអង្គភាពដែលចេញពីបុគ្គលម្នាក់ៗ “។
៤ .លុបបំបាត់នៅភាពសង្ស័យ:
នៅក្នុងការធ្វើអាជីវកម្ម ភាពសង្ស័យទៅលើបុគ្គល រឿងសង្ស័យស្ថានការណ៍អាក្រក់កើតឡើងនៅពេលខាងមុខ គឺមិនបានធ្វើឱ្យអាជីវកម្មរីកចម្រើនបានឡើយដូច្នេះហើយការធ្វើការជាក្រុម មានការបង្ហាញទឹកតាងអំពីស្នាដៃ ការងារបុគ្គលម្នាក់ត្រូវបំពេញប្រចាំថ្ងៃ ។
៥: មានដំណោះស្រាយចំពោះជម្លោះ
នៅក្នុងកាលដែលធ្វើការជាក្រុមបានជួយឲ្យបុគ្គលម្នាក់ៗមានដំណោះស្រាយជាមួយនឹងជម្លោះផ្សេងពីព្រោះការងារជាក្រុមជាទីកន្លែងដែលបុគ្គលម្នាក់យកបញ្ហាមកដាក់លើតុរួមគ្នាដើម្បីរៀនដើម្បីចែករំលែកការងារដែលពួកគេម្នាក់បានជួប។ការបើកចំហរមិនបិទបាំងចំពោះគ្នាទៅវិញទៅមកគឺជាកូនសោដ៏ធំដើម្បីដោះស្រាយជម្លោះដើម្បីដោះស្រាយជម្លោះ។
ស្ថាបនិកក្រុមហ៊ុន ផា ផា យ៉ា PAPAYA NEXT STEP CO,.LTD
* PAPAYA REAL ESTATE ( គម្រោងអភិវឌ្ឍន៍អចលនទ្រព្យ)
* PAPAYA HOMESTAY ( គម្រោងលើវិស័យទេសចរណ៍)
* PAPAYA GARDEN ( គម្រោងលើវិស័យកសិកម្មនិងចែកចាយអាហារ)

ខេត្តសៀមរាប៖ភាពរឹងមាំនៃជីវិតគ្មាននរណាម្នាក់ និយាយថា ងាយស្រួលនោះទេ ប៉ុន្តែទំហំការលំបាក និង ភាពឈឺចាប់ មានទំហំ ផ្សេងៗគ្នា និយាយរួមគឺមិនដូចគ្នាឡើយ គ្រាន់តែយើងអាចនិយាយបានថា ” មានអ្នកខ្លះយកការលំបាក មក និយាយរៀបរាប់ ស្រណោះខ្លួន រហូតដល់ក្លាយជាជនរងគ្រោះ ក្នុងជីវិត ហើយខ្លះទៀត យកការលំបាកជាឱកាស តស៊ូប្រឹងប្រែង ដើម្បីឲ្យបានសម្រេចអ្វីមួយ “។

ប្រសិនបើយើងវាយមនុស្ស តែសំបកក្រៅ យើងមិនអាច ស្គាល់រស់ជាតិជីវិត ដែលកើតឡើងលើខ្លួនពួកគេបានឡើយ។

ជាទូទៅមនុស្ស ដែលរឹងមាំ ពួកគេមិនដែលចុះចាញ់ ការលំបាក ដែលពួកគេ ប្រឈមមុខនោះទេ។ ពួកគេគិតថាការលំបាក ឬ ឧបសគ្គ តែងតែនាំឲ្យមាន គ្រាប់ពូជនៃកម្លាំង និងឱកាសដើម្បីឆ្លុះបញ្ចាំង សកម្មភាព ដែលបានធ្វើកន្លងមក និងយកពេលវេលា ដើម្បីពង្រឹងសម្មភាពបន្ថែម នោះមានន័យថា ប្រសិនបើអ្នកដួលហើយស្រែកយំស្រណោះខ្លួន ឬសោកស្តាយអ្នកនឹងឋិតនៅកន្លែងនោះ ជារៀងរហូត ប៉ុន្តែ ប្រសិនបើអ្នកដួលហើយ ដាក់កម្លាំងចិត្តងើបឡើងវិញ អ្នកនឹងមិនស្ថិតនៅកន្លែង ដដែលទៀតទេ ពីព្រោះអ្នកបានដឹងពីមូលហេតុដែល ធ្វើអោយ អ្នកដួល។

ជាទូទៅ អ្នកដែលបោះបង់ ដោយចាប់យកនេះបន្ទិច ដោយចាប់យកនោះបន្ទិច មិនដែលទទួលបានជោគជ័យទេ ហើយអ្នកដែលជោគជ័យមិនដែលបោះបង់ឡើយ។

តាមច្បាប់ធម្មជាតិ អ្វីៗទាំងអស់ លើភពភពផែនដីនេះ គ្មានទេសេក្តីសុខ ឬ ក៏សុវត្ថិភាពជីវិតដូចដែលពួកគេចង់បាន នោះ ពីព្រោះ ទាំងអស់នោះ តម្រូវអោយមាន ការហាត់ពត់លត់ដំខ្លួនឲ្យរឹងមាំ ហ៊ានបត់បែនសម្របខ្លួនតាមកាល:ទេស: និងហ៊ានប្រឈមគ្រប់បញ្ហាដែលកើតឡើងតាមដងផ្លូវ ដែលពួកគេត្រូវដើរ ពួកគេតែងតែសរសើរ ដោយស្មោះត្រង់នូវទំវើល្អរបស់អ្នកដទៃ និងមនុស្សជុំវិញខ្លួន ពីព្រោះ ពួកគេយល់ថា នៅក្នុងសង្គម សេចក្ដីសុខនិងសន្តិភាពមិនអាច កើតឡើងតែម្នាក់ឯងបានឡើយ។

យ៉ាងណាមិញ នៅក្នុងស្ថាប័ន ការងារ ឬផ្នែកជំនួញមេដឹកនាំល្អៗ តែងតែឲ្យឱកាសមនុស្សរបស់ខ្លួន ហ៊ានសម្រេចចិត្ត ហ៊ានទទួលខុសត្រូវ និង ហ៊ានប្រឈមជាមួយបញ្ហានៅក្នុង កម្រិតថ្នាក់របស់ខ្លួន ដើម្បីឲ្យពួកគេរឹងមាំ។ វាដូចគ្នាទៅនឹងឪពុកម្តាយ ឬ អាណាព្យាបាលតែងតែផ្តល់ឱកាសឲ្យកូនៗ រៀនសម្រេចចិត្ត ឲ្យបានច្រើន នូវអ្វីដែលពួកគេចូលចិត្ត អ្វីដែលពួកគេស្រលាញ់ និងអ្វីដែលពួកគេគិត ទាំងអស់នោះវាជាអាកាសសម្រាប់ ពួកគេ កសាងភាពរឹងមាំ។

សូមចងចាំថា ដើមឈើរឹងមាំ មិនដួលរលំជាមូយខ្សល់ព្យុះ ពីព្រោះវាដុះលើផ្ទាំងថ្ម ដែលបង្កភាពលំបាក ដល់ឫសទាំងឡាយ ក្នុងការរុករកចិញ្ជឹមនិងទប់លំនឹងរបស់ដើម។

យ៉ាងណាមិញ យើងអាចយល់បាន ថា អ្នកដែលខ្សោយ តែងតែនិយាយរិះគន់ប្រៀបធៀប និង ងាយវាយតម្លៃអ្នកដទៃ ហើយបន្តការរិះគន់ខ្លួនឯងជារឿយៗ នៅពេលខ្លះមានអារម្មណ៍ឯកាតែឯង រហូតឈានដល់ធ្វើអត្តឃាតលើខ្លួនឯង។ ទាំងអស់នោះមកពីការគិត ងាយៗ និងចង់បានអ្វីដែលងាយ ជំនួសឲ្យការរៀបចំខ្លួនឲ្យរឹងមាំដើម្បីទទួលបានផលរឹងមាំ សម្រាប់ជីវិតរបស់ខ្លួន។

នៅចុងបញ្ចប់ ខ្ញុំសូមក្រើនរំឭក ឲ្យលោកអ្នកពិចារណាថា បញ្ហាវានឹងមិនជាបញ្ហា ដូចដែលអ្នកគិតនោះទេ នៅពេលដែលអ្នកងើបឡើងប្រឈមជាមួយវា ពេលវេលាតែងតែជួយអ្នកឲ្យមើលឃើញផ្លូវទៅមុខជានិច្ច អ្វីដែលនៅសល់ជាប់ខ្លួនរបស់អ្នក គឺភាពរឹងមាំ ភាពសប្បាយរីករាយ និង ក្តីស្រលាញ់..។ ប្រសិនបើអ្នកដួលប្រាំពីរដង សូមឲ្យអ្នកងើបឈរឲ្យបានប្រាំបីដង..គ្មានអ្វីដែលអ្នកត្រូវយំ ឬ ស្តាយក្រោយឡើយ..អ្នកត្រូវតែងើបពីព្រោះពេលវេលានៃជីវិតតែងតែទៅមុខជានិច្ច។

និពន្ធដោយលោក សឿន តុលា ស្ថាបនិកក្រុមហ៊ុន ផា ផាយ៉ា PAPAYA NEXT STEP CO,.LTD.