ព័ត៌មានជាតិ

ឯកឧត្តមអ៊ុន ចាន់ដា អភិបាល នៃគណៈអភិបាល ខេត្តកំពង់ចាម សូមគោរពជូនពរពីសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសប្រារព្ធខួបកំណើត គម្រប់៦៩ឈានចូល៧០ឆ្នាំ

ខេត្តសៀមរាប៖ ក្លាយជាទំនាស់សម្ដី បង្កជាហិង្សា កាប់គ្នា បណ្ដាលឲ្យរបួស។ ចំណែកជនសង្ស័យបានរត់គេចខ្លួន។ ហេតុការណ៍បានកើតឡើងវេលាម៉ោង១៨និង០០នាទី ថ្ងៃទី០២ ខែមេសា ឆ្នាំ២០២០ នៅចំណុចភូមិព្រៃលាន ឃុំពពេល ស្ upរុកសូទ្រនិគម ខេត្តសៀមរាប។
ជនរងគ្រោះឈ្មោះជូរ ម៉ាប់ ភេទប្រុស អាយុ៣៥ឆ្នាំ ទីលំនៅភូមិ,ឃុំកើតហេតុ។ ជនសង្ស័យឈ្មោះជូរ ចាន់នី ភេទប្រុស អាយុ៣២ឆ្នាំ ទីលំនៅភូមិ ឃុំកើតហេតុ។ សមត្ថកិច្ចបានឲ្យដឹងថាករណីនេះមូលហេតុស្រវឹងស្រាទាស់សម្ដីគ្នា វាយប្រវាយប្រតប់គ្នា ហើយកាប់គ្នាទៅវិញទៅមកតែម្ដង។ ក្រោយកើតហេតុ ជនរងគ្រោះបញ្ជូនទៅមន្ទីរពេទ្យស្រុក។ ដោយឡែក ជនសង្ស័យរត់កេចខ្លួន៕SRP

ខេត្តកំពង់ចាម៖ដើម្បីចូលរួមជាមួយរាជរដ្ឋាភិបាលក្នុងការប្រយុទ្ធប្រឆាំងនឹងមេរោគកូវីដ១៩ (COVID-19) ដែលបាននឹងកំពុងរីករាលដាលក្នុងព្រះរាជាណាចក្រកម្ពុជា លោកអ៊ុន ចាន់ដា អភិបាលខេត្តកំពង់ចាម សម្រេចផ្តល់ប្រាក់បៀវត្ស ជាអភិបាលខេត្តកំពង់ចាម​ ចំនួន០៧ខែ​ ចាប់ពីខែមេសា​ ដល់ខែតុលា​ ឆ្នាំ​២០២០​ ជូនគណ:កម្មការ​ជាតិប្រយុទ្ធនឹងជំងឺកូវីត១៩៕SRP

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានសរសេរនៅលើទំព័រហ្វេស ប៊ុកថា៖ឆ្នាំនេះជាខួបលើកទី៥០ដែលខ្ញុំ បានប្រើប្រាស់ថ្ងៃ៤មេសាជាថ្ងៃកំណើត ដែលជាពេលវេលាសមស្របសម្រាប់ ការបកស្រាយដើម្បីដោះស្រាយចម្ងល់ របស់បងប្អូនមួយចំនួនដែលតែងឆ្ងល់ថា ហេតុអី លោក ហ៊ុន សែន មានថ្ងៃកំណើត ពីរនិងថ្ងៃមួយណាជាថ្ងៃកំណើតពិតប្រាកដ?។ តាមពិតខ្ញុំកើតម៉ោង១២យប់ថ្ងៃអង្គារ ១៥កើតខែស្រាពណ៍ឆ្នាំរោងចត្វាស័ក ព.ស ២៤៩៦ ត្រូវនឹងថ្ងៃអង្គារទី៥ខែសីហា ឆ្នាំ១៩៥២។ ហេតុអ្វីបានជាមានថ្ងៃ៤មេសាជាថ្ងៃ កំណើតទៅវិញ? ៥០ឆ្នាំមុនគឺនៅថ្ងៃ ៤ មេសា ១៩៧០ ខ្ញុំចូល ព្រៃម៉ាគីធ្វើការតស៊ូតាមការអំពាវនាវរបស់ សម្តេចព្រះ នរោត្តម សីហនុ ដើម្បី ប្រឆាំងជាមួយពួកធ្វើរដ្ឋប្រហារខុសច្បាប់និងការឈ្លានពានរបស់បរទេស។ ពេលចូលដល់ជំរំក្នុងព្រៃជ្រៅមេដឹកនាំ បានឱ្យពួកខ្ញុំប្រហែលជាង៣០០នាក់ធ្វើ ប្រវត្តិរូប។ខ្ញុំពុំចាំថ្ងៃខែកំណើតទេដូចនេះ ខ្ញុំបានយកថ្ងៃ៤មេសាដែលជាថ្ងៃខ្ញុំចូល តស៊ូធ្វើជាថ្ងៃកំណើតតែម្តងគឺថ្ងៃ៤មេសា ១៩៥២។

ខ្ញុំប្រើថ្ងៃ៤មេសា១៩៥២ជាថ្ងៃកំណើត តាំងពីថ្ងៃ៤មេសា១៩៧០រហូតដល់ថ្ងៃ ៨ខែមករា១៩៧៩ទើបដូរឆ្នាំមក១៩៥១វិញ។
ហេតុអ្វីបានជាដូរឆ្នាំពី១៩៥២មក១៩៥១ វិញ? បន្ទាប់ពីរំដោះកម្ពុជាចេញពីរបប ប៉ុល ពតថ្ងៃ៧មករា១៩៧៩ថ្ងៃ៨មករា១៩៧៩
យើងបានបង្កើតក្រុមប្រឹក្សាប្រជាជន បដិវត្តន៍កម្ពុជាដែលជាឈ្មោះរដ្ឋាភិបាល នាពេលនោះឡើង។ខ្ញុំត្រូវបានតែងតាំង
ជារដ្ឋមន្ត្រីក្រសួងការបរទេសក្នុងវ័យមិន ទាន់គ្រប់២៧ឆ្នាំផង។

ការដូរពីឆ្នាំ១៩៥២មក១៩៥១មានហេតុផលពីរទី១អ្នកវាយអង្គុលីលេខវាយខុស ហើយយកទៅផ្សព្វផ្សាយតាមវិទ្យុផ្សាយសម្លេងរួចទៅហើយ។ទី២ខ្ញុំមិនព្រម ធ្វើការកែតម្រូវដោយសារអាយុជាង២៦ ឆ្នាំពិតជាក្មេងពេកប្រៀបជាមួយរដ្ឋមន្ត្រី ផ្សេងទៀតដែលមានអាយុសុទ្ធតែជាង ៤០ឬជាង៥០ឆ្នាំ។

ពេលខ្ញុំកាន់តំណែងជានាយករដ្ឋមន្ត្រី នៅថ្ងៃ១៤មករា១៩៨៥ខ្ញុំក៏មិនព្រមកែ ទៀតដោយសារពេលនោះខ្ញុំក៏ទើបមាន អាយុជាង៣២ឆ្នាំដែលជានាយករដ្ឋមន្ត្រី ក្មេងជាងគេនៅលើលោកនេះនាពេល នោះ។ នេះជាការបំភ្លឺប្រវត្តិនៃថ្ងៃ៤មេសាដែល
ខ្ញុំរក្សាទុកថ្ងៃនេះជាថ្ងៃកំណើតផ្លូវការ ព្រោះជាថ្ងៃដែលខ្ញុំតាំងចិត្តចូលធ្វើ កងទ័ពតាមការអំពាវនាវរបស់ព្រះបិតា ជាតិសម្តេចព្រះនរោត្តមសីហនុ៕SRP

ខេត្តកំពង់ចាម៖លោក អ៊ុន ចាន់ដា អភិបាល នៃ គណៈ អភិបាល ខេត្តកំពង់ចាម អមដំណើរ ដោយ អភិបាល រង ខេត្ត ថ្នាក់ដឹកនាំ មន្ទីរអង្គភាព ពាក់ព័ន្ធ ជុំវិញខេត្ត និង អាជ្ញាធរ ក្រុង នាព្រឹក ថ្ងៃ ទី ០២ ខែមេសា ឆ្នាំ ២០២០នេះ បាន ផ្ដល់ជា អំណោយ ជូន សាលា សង្កាត់ ទាំង ៤ ក្នុង ក្រុង កំពង់ចាម សម្រាប់ ចែក ជូនបន្តដល់ បងប្អូន ប្រជាពលរដ្ឋ ប្រមាណ ជា ៥៦៦គ្រួសារ ដែល រងការខូចខាត និង បងប្អូន ពលករដែល ទេីបតែ ត្រឡប់ មក ពី ក្រៅប្រទេសវិញ ផងដែរ ។

ថ្លែង ក្នុង ឱកាស នោះ លោក អ៊ុន ចាន់ដា អភិបាលខេត្តកំពង់ចាម បាន ផ្តាំផ្ញេី ដល់ ចៅសង្កាត់ និង មន្ត្រី ពាក់ព័ន្ធ ដែល ត្រូវ យក អំណោយ ទៅ ចែក ជូន ដល់ ខ្នង ផ្ទះ បងប្អូន ប្រជាពលរដ្ឋ គឺត្រូវ យកចិតទុកដាក់ ក្នុង ការ ផ្សព្វផ្សាយ ណែនាំ អំពី វិធានការ ការពារ ទប់ស្កាត់ ការ រីករាលដាល នៃ ជំងឺ កូវីដ១៩ ដេីម្បីរួមគ្នាទប់ស្កាត់ ការរីករាលដាល នៃ ជំងឺ ដ៏ កាច សាហាវ នេះ ជា ពិសេស ត្រូវ ផ្សព្វផ្សាយ ដល់ បងប្អូនពលករ ដែលទើបតែត្រឡប់មកពីក្រៅប្រទេស វិញ ឲ្យ ពួក គាត់ ស្វែងយល់ អំពី ការ ដាក់ ឲ្យ នៅដាច់ដោយ ឡែក រយៈពេល ១៤ថ្ងៃ ដេីម្បី សុខសុវត្ថិភាពក្នុងគ្រួសារយើង ដល់សហគមន៍ និងសង្គមជាតិទាំងមូល ផងដែរ។

ជាមួយគ្នា នោះ លោក អភិបាលខេត្ត ក៏ បាន លេីក ឡើង ដែរថា អំណោយដែលបានប្រគល់ជូននាពេលនេះ គឺជាការរួមចំណែកក្នុងសកម្មភាពនានា ដើម្បីប្រយុទ្ធនឹងជំងឺកូវីដ១៩ ដែលជាការជួយ រំលែក ទុក្ខ លំបាក ការ ខ្វះខាត របស់ បងប្អូន ប្រជាពលរដ្ឋ ជា ពិសេស បងប្អូន ពលករ ដែល ទើប តែ ត្រឡប់ មក ពី ក្រៅប្រទេសវិញ និង ក្រុម ការងារ ចុះបំពេញបេសសកម្ម ការពារទប់ស្កាត់ ការ រីករាលដាល នៃ វីរុស កូរ៉ូណា ផង ខណៈដែលរាជរដ្ឋាភិបាលកម្ពុជាបាន នឹងកំពុងយកចិត្តទុកដាក់ ក្នុង ការ អំពាវនាវ និងណែនាំ ដល់គ្រប់ស្ថាប័នរដ្ឋ វិស័យឯកជន អង្គការជាតិ អន្តរជាតិ និង បងប្អូន ប្រជាពលរដ្ឋ ដេីម្បី រួមគ្នាប្រយុទ្ធ ទប់ស្កាត់ ការ រីករាលដាល នៃ វីរុស កូរ៉ូណា (កូវីដ១៩) ដែលជាជំងឺរាតត្បាតលេីសកលលោក។

គួរ បញ្ជាក់ ផង ដែរថា អំណោយ មនុស្សធម៌ ដែល ត្រូវ ប្រគល់ ជូននោះ ១-សង្កាត់ សំបួរ មាស មានចំនួន ១៨១ គ្រួសារ ២-សង្កាត់ វាលវង់ មាន ចំនួន ១៦២ គ្រួសារ ៣-សង្កាត់ កំពង់ចាម មាន ចំនួន ១០២គ្រួសារ និង ៤-សង្កាត់បឹងកុក មានចំនួន១២១ គ្រួសារ ។ ដោយ ក្នុងមួយគ្រួសារ ទទួលបាន អង្ករ ចំនួន២៥គីឡូក្រាម ត្រីខ១២កំប៉ុង ក្រម៉ា០១ និង សាប៊ូលាងដៃ០១ដប ផងដែរ ៕SRP

ខេត្តសៀមរាប៖កម្លាំងនគរបាលព្រហ្មទណ្ឌកម្រិតស្រាល នៃស្នងការដ្ឋានខេត្តសៀមរាប បានឃាត់ខ្លួនក្រុមចោរ
ចោរឆក់កាបូប០៦នាក់។

លោកវរសេនីយ៍ឯក ហង្សសូផាតភីរម្យ នាយការិយាល័យ ព្រហ្មទណ្ឌកម្រិតស្រាល បានឲ្យដឹងនៅព្រឹកនេះថាដោយទទួលបានផែនការការពារ និងល្បាតក្នុងខេត្តសៀមរាបជាប្រចាំ របស់លោកឧត្តមសេនីយ៍ទោ ទិត្យ ណារ៉ុង ស្នងការនគរបាលខេត្តសៀមរាប និងលោកឧត្តមសេនីយ៍ត្រីភឹង ចិន្តារ៉េត ស្នងការរងទទួលផែនកណ្តាលព្រហ្មទណ្ឌខេត្តសៀមរាប នៅថ្ងៃទី៣១ខែមីនាឆ្នាំ២០២០កន្លងទៅថ្មីៗនេះកម្លាំងនគរបាលព្រហ្មទណ្ឌកម្រិតស្រាល បានល្បាតតាមគោលដៅ ឃាត់ខ្លួនជនសង្ស័យម្នាក់ទៅតាមបណ្តឹងស្ត្រីម្នាក់ករណីឆក់កាបូបនៅតាមផ្លូវទៅអង្គរវត្ត។ក្នុងនោះកម្លាំងរបស់លោក បានដេញប្រផាប់ចាប់ប្រផីងបណ្តាលឲ្យជនសង្ស័យម្នាក់ធ្លាក់ពីលើម៉ូតូ ឯ២នាក់ទៀតរត់រួចខ្លួន។ជនសង្ស័យដែលឃាត់បាននោះ ឈ្មោះដោ រ៉ូស៊ីញ ភេទប្រុស អាយុ១៨ឆ្នាំរស់នៅភូមិ ស្វាយដង្គំ សង្កាត់ស្វាយដង្គំ ក្រុងសៀមរាប។
លោកបន្តថា លុះដល់ថ្ងៃទី០១ ខែមេសា ម្សិលមិញ នគរបាល ព្រហ្មទណ្ឌកំរិតស្រាលបានបើកការស្រាវជ្រាវ រហូតឈានដល់ឃាត់ខ្លួនជនសង្ស័យបានចំនួន៥នាក់បន្ថែមដែលជាបក្ខពួកនិង ជនដៃដល់ខាងលើ។
ជនសង្ស័យទី១ ឈ្មោះ សេង ដាវី ភេទប្រុសអាយុ១៦ឆ្នាំស្នាក់នៅភូមិគ្រួស សង្កាត់ស្វាយដង្គំ ក្រុងសៀមរាប ពាក់ព័ន្ធនឹងករណីឆក់កាបូប ។
ទី២ឈ្មោះ ចាន់សុធា ភេទប្រុសអាយុ១៧ឆ្នាំស្នាក់នៅភូមិតាភុលសង្កាត់ស្វាយដង្គំ ក្រុងសៀមរាប ពាក់ព័ន្ធនឹងករណីឆក់កាបូប។
ទី៣ ឈ្មោះ រិទ្ធី ឡាយហួ ភេទប្រុសអាយុ១៦ ឆ្នាំស្នាក់នៅភូមិតាភុល សង្កាត់ស្វាយដង្គំក្រុងសៀមរាប ករណីឆកកាបូប។
ទី៤ ឈ្មោះ ហឿត សុផាត ភេទប្រុសអាយុ១៧ ឆ្នាំស្នាក់នៅភូមិវត្តដំណាក់ សង្កាត់សាលាកំរើក ក្រុងសៀមរាប ករណីឆក់កាបូប ។
ទី៥ឈ្មោះ ឆោម រតនា ភេទប្រុសអាយុ២៨ ឆ្នាំស្នាក់នៅភូមិបន្ទាយចាស់ សង្កាត់ស្លក្រាម ក្រុងសៀមរាប ករណីឆក់កាបូប ។
លោកបញ្ជាក់ថា សម្ភារៈបាត់បង់មានដូចជា៖+ កាបូបស្ពាយពណ៌ខ្មៅមានខ្សែដែកពណ៌ស + ទូរសព្ទដៃម៉ាកវីវ៉ូពណ៌ក្រហមមួយគ្រឿង + ទូរសព្ទដៃម៉ាក់អិនចុចពិលមួយគ្រឿង
+ អត្តសញ្ញាណប័ណ្ណសញ្ជាតិខ្មែរចំនួន១+ ប័ណ្ណបសសចំនួន១និងសម្ភារៈមួយចំនួនទៀត និងលុយ។
លោកបន្ថែមថា ដកហូតជាក់ស្ដែងមកវិញមានដូចជា៖១ទូរស័ព្ទដៃមួយគ្រឿងម៉ាក vivo ក្រហមក្រមៅ មួយគ្រឿងដែលជារបស់ជនរងគ្រោះ,កាតអត្តសញ្ញាណប័ណ្ណសញ្ជាតិខ្មែរចំនួន១ ដែលជារបស់ជនរងគ្រោះ។ កាបូបស្ពាយចំហៀងពណ៌ខ្មៅចំនួនមួយដែលជារបស់ជនរងគ្រោះ។
តាមចម្លើយសារភាពរបស់ពួក ជនសង្ស័យទាំង៥នាក់ បានឆ្លើយសារភាពថាពួក ខ្លួនពិតជាបានធ្វើសកម្មភាពឆក់កាបូបនៅក្នុងក្រុងសៀមរាប ពិតប្រាកដមែន។
ករណីនេះសមត្ថកិច្ចបានរៀបចំសំណុំរឿងបញ្ជូនខ្លួនទៅតុលាការចាត់ការបន្តតាមផ្លូវច្បាប់។
ចំណែកសម្ភារៈដែលជារបស់ជនរងគ្រោះបាន ប្រគល់ជូនជនរងគ្រោះវិញហើយ៕SRP

ភ្នំពេញ៖លោកហ៊ុយ វណ្ណៈ រដ្ឋលេខាធិការក្រសួងមហាផ្ទៃ និងជាប្រធានសហភាពសហព័ន្ធអ្នកសារព័ត៌មានកម្ពុជា បានសរសេរសំណេរពន្យល់ពាក្យ «សេរីភាព & សិទ្ធិ» ។

លោកហ៊ុយ វណ្ណៈ សរសេរថា៖
«សេរីភាព & សិទ្ធិ» តើខុសគ្នាដូចម្តេច?
១- ពិតជានៅមានការយល់ច្រឡំរវាង «សេរីភាព & សិទ្ធិ» ដែលគួរត្រូវបាន បកស្រាយ បំភ្លឺ។
– សេរីភាព៖ មានព្រំដែន និងមានដែនកំណត់។
– សិទ្ធិ៖ មនុស្សគ្រប់រូបមានសិទ្ធិពីកំណើត ហើយមិនអាចនរណារំលោភបំពានបានទេ។ ពាក្យ២នេះជួនកាលគេប្រើផ្គួបចូលគ្នា។ តែការពិត វាមិនដូចគ្នាទេ។ ក៏សូមចាំថា៖ «សេរីភាព» មិនអាចបំពាន «សិទ្ធិ» បានទេ។ ហើយក៏មិនអាចយក សិទ្ធិ ទៅខ្ទប់ សេរីភាព ទាំងបំពានបានដែរ។ ទាំង២នេះ ត្រូវគោរពគ្នា ប៉ុន្តែ គោរពសិទ្ធិខ្ពស់បំផុត។
២- គេអាចដាក់សំណួរថា៖ ចុះរវាង «សេរីភាពសារព័ត៌មាន» និង «សិទ្ធិមនុស្ស» តើគោរពមួយណាមុនគេបំផុត? គឺត្រូវតែបំពេញការងារដោយគោរពសិទ្ធិមនុស្សមុនគេបំផុត។
៣- បងប្អូនសារព័ត៌មានខ្លះប្រើប្រាស់ «សេរីភាព» ផ្សាយ Live អត្ថាធិប្បាយ វិនិច្ឆ័យ… ដែលពេលខ្លះជ្រុល ក៏ឈានទៅ «រំលោភសិទ្ធិជាមូលដ្ឋានរបស់បុគ្គល និង តម្លៃ សេចក្តីថ្លៃថ្នូររបស់មនុស្ស»។ អង្គការសិទ្ធិមនុស្សខ្លះ ភ្លេចខ្លួន ក៏ថែមប៊ីចេង និងកាន់ជើងទៅទៀត។ សួរថា ហេតុម្តេចក៏អ៊ីចឹង? គឺមកពីច្រឡំ ឬយល់មិនដល់។
៤- ចុះសួរថា៖ អ្នកកាសែត អាចប្រើប្រាស់សេរីភាព ផ្សាយចំពោះបុគ្គលណាម្នាក់តាមតែចិត្តបានទេ? ចម្លើយដដែល៖ គឺមិនបានទេ។ កាសែត គឺជាមុខរបរ ទេតើ។ បើនៅតែយល់ខុសថា កាសែតធ្វើអ្វីក៏បាន នោះអ៊ីចឹង នគរបាល គ្រូបង្រៀន គ្រូពេទ្យ ក៏ពួកគាត់អាចធ្វើអ្វីតាមតែចិត្តបានដូចគ្នា… មនុស្សដូចគ្នាតើ! តែបែបនេះគឺខុសបាត់។ បើនិយាយមិនស្តាប់គ្នា អ្នកកាសែត ប្រយ័ត្នជួបស្ថានភាពជាមួយគ្រូពេទ្យ៖ អ្នកឯង Live អញ! អញចាប់ឯង ចាក់ថ្នាំវិញ! ជំនាញមានរៀងខ្លួនតើ! ចាំមើល អ្នកណាសន្លប់មុន!? នេះជាឧទាហរណ៍ទេ 😄
៥- អ៊ីចឹងហើយ ដែលគ្រប់គ្នាត្រូវអនុលោមតាមក្រមសីលធម៌វិជ្ជាជីវៈ តួនាទីភារកិច្ច និងត្រូវគោរពសិទ្ធិមនុស្ស និងតម្លៃមនុស្សមុនគេបំផុត។ បើប៉ាតណាប៉ាតណី គឺស្លាប់សុជីវធម៌សង្គមហើយ។ ក៏សូមចងចាំទុកថា ក្នុងសង្គមនីតិរដ្ឋ បើប្រើប្រាស់ សេរីភាពហួសព្រំដែន ឈានទៅរំលោភសិទ្ធិគេដោយប្រការណាមួយ គឺគេអាចមានសិទ្ធិហាមឃាត់ និងប្តឹងបាន ហើយកុំស្រែកថា គេរំលោភសិទ្ធិមនុស្ស ព្រោះអ្នកទេដែលប្រើសេរីភាពជ្រុលទៅរំលោភសិទ្ធិគេមុន។
៦- បងប្អូនសារព័ត៌មាន និងបណ្តាញសង្គម! សូមបន្តប្រើប្រាស់សេរីភាព ចូលរួមចំណែកគោរពសិទ្ធិមនុស្សជាសកលផង និងជាពិសេសគឺលើកកម្ពស់តម្លៃ កិត្តិនាម និងសិទ្ធិពលរដ្ឋខ្មែរយើង ជាចម្បងបំផុត!
Cambodia First 🇰🇭

ខេត្តសៀមរាប៖បុរសម្នាក់ត្រូវបានគេប្រទះឃើញលង់ទឹកស្លាប់នៅស្រុកស្វាយលើនៅថ្ងៃទី០១ ខែមេសានេះ។
ហេតុការណ៍បានកើតឡើង នៅវេលា នាក់នៅចំណុចទំនប់ម្រះ ភូមិខ្នាក្រៅ​ ឃុំកន្ទួត​ ស្រុកស្វាយលេី។
ជនរងគ្រោះ​ឈ្មោះ ហម​ ផ្លក់​ ភេទ​ប្រុស​ អាយុ​ ២៨​ ឆ្នាំ​ មុខរបរ​ជាកសិករ​ នៅភូមិត្រពាំងថ្ម​ ឃុំ​ ឃុនរាម​ ស្រុកបន្ទាយស្រី​ មកស្នាក់នៅបណ្ដោះអាសន្ន​ ភូមិខ្នាក្រៅ​ឃុំកន្ទួត​ ស្រុុកស្វាយលើ។
តាមការបំភ្លឺរបស់សាច់ញាត្តិឈ្មោះ​ សន​ ធី​ ភេទ​ប្រុស​អាយុ​៣៨រស់នៅភូមិជាមួយគ្នា​ ត្រូវជាបងថ្លៃ​បានអោយដឹងថា​ ជនរងគ្រោះជាមនុស្សមានជំងឺប្រចាំកាយ(ស្កន់ជាន់)​ធ្លាប់លង់ទឹកច្រេីនដងហេីយតែសង្គ្រោះទាន់​។ហេីយតាមការពិនិត្យរបស់ប្រធានមណ្ឌលសុខភាពកកន្ទួតបានសន្និដ្ឋានថា​ សពពិតជាស្លាប់ដោយការលង់ទឹកពិតប្រាកដមែន​៕SRP

ភ្នំពេញ៖សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅរសៀលថ្ងៃនេះ បានអញ្ជើញជាអធិបតីក្នុងពិធីប្រកាសផ្ទេរ និងចូលកាន់មុខតំណែងរដ្ឋមន្ត្រីក្រសួងយុត្តិធម៌ ប្រារព្ធនៅទីស្ដីការក្រសួងយុត្តិធម៌។ សម្ដេចបានមានប្រសាសន៍ថាការកកស្ទះសំណុំរឿង កាន់តែមានភាពស្មុគស្មាញ បន្ទាប់ពីការដាក់ឱ្យដំណើរការយុទ្ធនាការប្រយុទ្ធប្រឆាំងគ្រឿងញៀន។ គិតមកដល់ពេលនេះ ចំនួនអ្នកជាប់ឃុំក្នុងសំណុំរឿងគ្រឿងញៀនមានជាង២ម៉ឺន២ពាន់នាក់ ។ ដោយឡែកបញ្ហាខ្វះទីតាំងសម្រាប់បំពេញការងារក៏ជាបញ្ហាប្រឈមដែរ ។ សម្ដេចសង្ឃឹមជឿជាក់ថាឯកឧត្តមរដ្ឋមន្ត្រីថ្មីនឹងដោះស្រាយបញ្ហានេះនាពេលខាងមុខ ពិសេសបន្ទាប់ពីបញ្ហាកូវីដ១៩មានភាពធូរស្រាល ។
សម្ដេចក្រឡាហោម បានមានប្រសាសន៍អំពីការពង្រឹងប្រព័ន្ធយុត្តិធម៌ ដោយបានស្នើឱ្យក្រសួងយុត្តិធម៌ត្រូវបង្កើនការលើកកម្ពស់សេវាយុត្តិធម៌ ការពង្រឹងជំនឿទុកចិត្ត និងការទប់ស្កាត់ការបំពានដោយអយុត្តិធម៌ក្នុងសង្គម តាមរយៈការពង្រឹងការអនុវត្តច្បាប់ ការពង្រឹងភាពស្អាតស្អំ និងក្រមសីលធម៌មន្ត្រី ការពង្រឹងយន្តការវិន័យ និងការធ្វើទំនើបកម្មរដ្ឋបាលយុត្តិធម៌ ។

សម្ដេចក៏បានណែនាំឱ្យក្រសួងយុត្តិធម៌ បន្តពង្រឹងការលើកកម្ពស់ការផ្ដល់សេវាយុត្តិធម៌នៅមូលដ្ឋាន ការកែលម្អរយន្តការដោះស្រាយវិវាទដើម្បីឆ្លើយតបនឹងស្ថានភាពជាក់ស្ដែងរបស់សង្គមប្រកបដោយប្រសិទ្ធភាព ហើយដើម្បីសម្រេចបានគោលបំណងខាងលើ សម្ដេចបានបន្តថាក្រសួងយុត្តិធម៌ ត្រូវពង្រឹងការអនុវត្តយុទ្ធសាស្ត្រកំណែទម្រង់ច្បាប់ និងវិស័យយុត្តិធម៌ និងកំណែទ្រង់ប្រព័ន្ធយុត្តិធម៌ឱ្យបានត្រឹមត្រូវ ។

យ៉ាងណាក៏ដោយទន្ទឹមនឹងសមិទ្ធផលជាច្រើននោះ សម្ដេចក្រឡាហហោម ក៏បានបង្ហាញការកត់សំគាល់ដូចគ្នាដែរ អំពីចំណុចខ្វះខាតមួយចំនួនដែលពាក់ព័ន្ធនឹងកង្វះខាតធនធានមនុស្សក្នុងពេលមានកំណើនសំណុំរឿង ពោលគឺបច្ចុប្បន្ននេះ មិនមានតុល្យភាពឡើយរវាងចំនួនសំណុំរឿង និងចំនួនមន្ត្រីតុលាការនៅកម្ពុជា ។

ជាមួយគ្នានេះដែរ សម្ដេចក៏បានមានប្រសាសន៍អំពីតុលាការជំនាញនៅថ្នាក់សាលាដំបូង ដែលច្បាប់បានចែងឱ្យមានតុលាការរដ្ឋប្បវេណី តុលាការព្រហ្មទណ្ឌ តុលាការពាណិជ្ជកម្ម និងតុលាការការងារ ។ ប៉ុន្តែពេលនេះនៅសាលាដំបូងរាជធានីខេត្តមិនទាន់ដំណើរការនៅឡើយទេ។
សម្ដេចបានណែនាំឱ្យក្រសួងខិតខំឱ្យអស់លទ្ធភាពដើម្បីឱ្យតុលាការជំនាញនេះអាចដំណើរការទៅបាន ដើម្បីឆ្លើយតបនឹងការកកស្ទះសំណុំរឿង ។

ពាក់ព័ន្ធនឹងបញ្ហាកកស្ទះសំណុំរឿង សម្ដេច ស ខេង ក៏បានសម្ដែងការគាំទ្រចំពោះគម្រោងរបស់ក្រសួងយត្តិធម៌ ដែលនឹងបើកយុទ្ធនាការដោះស្រាយការកកស្ទះសំណុំរឿងតាមសាលាជំនុំជម្រះក្ដីនាពេលឆាប់ៗខាងមុខ ដោយសម្ដេចបានប្រកាសផ្ដល់កិច្ចការគាំទ្រនូវរាល់បញ្ហាណាដែលទាក់ទងនឹងសមត្ថកិច្ចរបស់ក្រសួងមហាផ្ទៃ ។

សម្ដេចបានបន្ថែមថានៅក្នុងការដ្ឋានកំណែទម្រង់ទាំង៤របស់រាជរដ្ឋាភិបាល គឺមានកំណែទម្រង់វិមជ្ឈការ វិសហមជ្ឈការ កំណែទម្រង់ហិរញ្ញវត្ថុសាធារណៈ និងកំណែទម្រង់រដ្ឋបាលសាធារណៈ ដែលបានបង្កើតលេខាធិការដ្ឋានសម្របសម្រួលមួយ។
ដូច្នេះសម្ដេចសូមឯកភាព និងគាំទ្រការបញ្ចូលកំណែទម្រង់ប្រព័ន្ធយុត្តិធម៌ទៅក្នុងលេខាធិការដ្ឋាននោះ៕SRP

ភ្នំពេញ៖ក្នុងឱកាសចូលកាន់មុខតំណែង រដ្ឋមន្ត្រីក្រសួងយុត្តិធម៌ នៅរសៀលថ្ងៃនេះ លោក កើត រិទ្ធ បានប្ដេជ្ញាចិត្តស្មោះត្រង់ជានិច្ចចំពោះជាតិ សាសនា ព្រះមហាក្សត្រ បន្តអនុវត្តគោលនយោបាយ យុទ្ធសាស្ត្ររាជរដ្ឋាភិបាល ពិសេសកម្មវិធីកំណែទម្រង់ច្បាប់ និងយុត្តិធម៌ដើម្បីលើកកម្ពស់ទំនុកចិត្តពីប្រជាជន ពង្រឹងប្រព័ន្ធអភិបាលកិច្ចល្អ សុច្ចរិតភាព និងភាពត្រឹមត្រូវនៃមន្ត្រីតុលាការ ដើម្បីពង្រឹងជំនឿទុកចិត្ត ហើយលោកសង្ឃឹមថាថ្នាក់ដឹកនាំ និងមន្ត្រីពាក់ព័ន្ធទាំងអស់នឹងចូលរួមយ៉ាងសកម្មដើម្បីបុព្វហេតុពង្រឹងនីតិរដ្ឋនៅកម្ពុជា។

លោក កើត រិទ្ធ រដ្ឋមន្ត្រីក្រសួងយុត្តិធម៌ ក៏ បានរំលឹកអំពីកិច្ចការជាច្រើនដែលក្រសួងសម្រេចបានក្រោមការដឹកនាំរបស់លោកទេសរដ្ឋមន្ត្រី អង្គ វង្សវឌ្ឍនា រួមមានការកសាងច្បាប់ ការបណ្ដុះបណ្ដាលធនធានមនុស្ស ការលើកទឹកចិត្តមន្ត្រី ការកសាងអគារក្រសួង និងអគារតុលាការ ការកែលម្អរការផ្ដល់សេវាយុត្តិធម៌ ការដោះស្រាយវិវាទក្រៅប្រព័ន្ធតុលាការ និងសមិទ្ធផលជាច្រើនទៀត ។
រដ្ឋមន្ត្រីថ្មីក៏បានមានប្រសាសន៍ថា សមិទ្ធផលកំណែទម្រង់សំខាន់ៗជាច្រើនក្នុងវិស័យយុត្តិធម៌ ពិសេសការកសាងច្បាប់ដ៏មានសារៈសំខាន់ៗ ដូចជាក្រមព្រហ្មទណ្ឌ ក្រមរដ្ឋប្បវេណី និងច្បាប់សំខាន់នានា ក្រោមការដឹកនាំរបស់លោក អង្គ វង្សវឌ្ឍនា កន្លងមក គឺជាសមិទ្ធផលដ៏ធំធេង ដែលនឹងត្រូវចារិកទុកក្នុងប្រវត្តិសាស្ត្រនៃវិស័យច្បាប់ និងយុត្តិធម៌ នៅកម្ពុជា ។

លោកកើត រិទ្ធក៏បានសម្ដែងការដឹងគុណប្រកបដោយកត្តញ្ញូតាធម៌ជូនចំពោះសម្ដេចក្រឡាហោម ស ខេង ដែលសម្ដេចតែផ្ដល់អនុសាសន៍ដឹកនាំ បណ្ដុះបណ្ដាល តម្រង់ទិស និងផ្ដល់ឱកាសឱ្យរួមអនុវត្តការងារទាំងការងារបច្ចេកទេស និងនយោបាយ និងលោក អង្គ វង្សវឌ្ឍនា ដែលបានផ្ដល់ឱកាស ការណែនាំ ការតម្រង់ទិស និងការចែករំលែកបទពិសោធន៍ ទាំងទិដ្ឋភាពការងារ នយោបាយ និងសង្គម រួមទាំងបទពិសោធន៍ជីវិត ជាប្រទីបនៃការបំពេញភារកិច្ចបំរើជាតិ និងប្រជាជន។
ពិធីនេះធ្វើឡើងក្រោមវត្តមានរបស់សម្ដេចស ខេង តំណាងសម្តេចតេជោហ៊ុន សែន នាយករដ្ឋមន្ត្រី នៅទីស្ដីការក្រសួងយុត្តិធម៌ ដោយលោក អង្គ វង្សវឌ្ឍនា ទទួលមុខតំណែងថ្មី ទេសរដ្ឋមន្ត្រីទទួលបន្ទុកបេសកកម្មពិសេស។
លោក អង្គ វង្សវឌ្ឍនា ទេសរដ្ឋមន្ត្រីទទួលបន្ទុកបេសកកម្មពិសេស បានអញ្ជើញថ្លែងរបាយការណ៍ស្វាគមន៍ជូនសម្ដេចក្រឡាហោម និងអង្គពីធី ដោយជាកិច្ចចាប់ផ្ដើម លោកបានសម្ដែងសេចក្ដីគាវរកិច្ចដ៏ខ្ពង់ខ្ពស់ជូនសម្ដេច និងបានជូនពរលោក កើត រិទ្ធ ឱ្យបំពេញភារកិច្ចបម្រើជាតិ និងប្រជាជនប្រកបដោយភាពជោគជ័យ ក្នុងភារកិច្ចថ្មីជារដ្ឋមន្ត្រីក្រសួងយុត្តិធម៌ ។
លោកទេសរដ្ឋមន្ត្រីក៏បានរំលឹកអំពីសមិទ្ធផលសំខាន់ៗដែលក្រសួងយុត្តិធម៌សម្រេចបានក្នុងរយៈពេលនៃការដឹកនាំរបស់លោក១៦ឆ្នាំមកនេះ និងថ្លែងអំណរគុណថ្នាក់ដឹកនាំ និងមន្ត្រីរាជការទាំងអស់ចំពោះការខិតខំបំពេញភារកិច្ចកន្លងមក។
លោកក៏ទទួលស្គាល់នូវចំណុចខ្វះខាតជាច្រើនទៀត ដោយសង្ឃឹមថាលោក កើត រិទ្ធ នឹងខិតខំដោះស្រាយបញ្ហាបន្តដោយមានការចូលរួមគាំទ្រពីថ្នាក់ដឹកនាំ និងមន្ត្រីរាជការនៃក្រសួងយុត្តិធម៌៕SRP

ភ្នំពេញ៖សម្តេចតេជោ ហ៊ុន សែន នាយករដ្ឋមន្ត្រី នៅថ្ងៃនេះបានសម្រេចដោយសមានចិត្តស្ម័គ្រចិត្តជូននូវប្រាក់បៀវត្សរ៍នាយករដ្ឋមន្ត្រីចំនួន៧ខែ ទៅគណៈកម្មការជាតិប្រយុទ្ធប្រឆាំងកូវីដ១៩ ដោយគិតចាប់ពីខែមីនា រហូតដល់ខែកញ្ញា ឆ្នាំ២០២០៕SRP

ភ្នំពេញ៖សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃនៅរសៀលថ្ងៃ០១ ខែមេសានេះ បានអញ្ជើញជាអធិបតីតំណាងដ៏ខ្ពង់ខ្ពស់សម្តេចអគ្គមហាសេនបតីតេជោ ហ៊ុន សែន ក្នុងពិធីប្រកាសផ្ទេរ និងចូលកាន់មុខតំណែង ឯកឧត្តម កើត រិទ្ធ ជារដ្ឋមន្រ្តីថ្មីក្រសួងយុត្តិធម៌ ជំនួស ឯកឧត្តម អង្គ វង្សវឌ្ឍានា អតីតរដ្ឋមន្រ្តីក្រសួងយុត្តិធម៌ ដែលត្រូវបានព្រះមហាក្សត្រ ត្រាស់បង្គាប់តែងតាំងជាទេសរដ្ឋមន្រ្តី ទទួលបន្ទុកបេសកកម្មពិសេស។

ពិធីប្រកាសផ្ទេរមុខតំណែងនេះ ត្រូវបានធ្វើឡើងនៅទីស្តីការក្រសួងយុត្តិធម៌ ដោយមានការអញ្ជើញចូលរួមពី ថ្នាក់ដឹកនាំ និងមន្ត្រីជាន់ខ្ពស់រាជរដ្ឋាភិបាល ព្រមទាំងថ្នាក់ដឹកនាំស្ថាប័នពាក់ព័ន្ធជាច្រើនរូបផងដែរ៕SRP