ខេត្តសៀមរាប៖សម្តេច ទៀ បាញ់ បានបញ្ជាក់ថា បើសិនជាគ្មានការប្រែប្រួលទេនោះ ផ្លូវទាំង៣៨ខ្សែនេះ និង ត្រូវបើកការដ្ឋានស្ថាបនាជាផ្លូវការដោយ សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជណាចក្រកម្ពុជា នៅថ្ងៃទី១៦ខែវិច្ឆិកាឆ្នាំ២០២០ខាងមុខនេះ ។ ម៉្យាងទៀតនៅ ពេលដែលយើងកំពុងជួបវិបត្តិជម្ងឺកូវិដ១៩ យើងក៏មិនបន្ធូរក្នុងកិច្ចអភិវឌ្ឍន៍ប្រទេសឡើយ ហើយពេលនេះក៏ជាឱកាស មួយដ៏ល្អសម្រាប់ខេត្តសៀមរាប ក្នុងការរៀបចំស្តារឡើងវិញ នូវហេដ្ឋារចនាសម្ព័ន្ធផ្លូវថ្នល់ក្នុងក្រុងសៀមរាប ក្នុងការ ស្តារឡើងវិញលើវិស័យទេសចរណ៍ នៅតំបន់អង្គរយើងនេះ។
សម្តេចទៀ បាញ់បញ្ជាក់ទៀតថា សម្រាប់ការអនុវត្តគម្រោងស្ថាបនាហេដ្ឋារចនាសម្ព័ន្ធផ្លូវចំនួន៣៨ខ្សែ នៅក្រុងសៀមរាប ខេត្តសៀមរាបនេះ គ្រោងបញ្ចប់ឲ្យបានរួចរាល់នៅឆ្នាំ២០២១ខាងមុខនេះ។ សម្តេចក៏បានអំពាវនាវ និងថ្លែងអំណរគុណទុកជាមុននូវស្មារតីចូលរួមរបស់ប្រជាពលរដ្ឋទាំងការុះរើសំណង់ ឬផលប៉ះពាល់នានាក្នុងពេលចាប់ដំណើរការអនុវត្តគម្រោង។
សូមជម្រាបថាកាលពីថ្ងៃទី២៣ខែកញ្ញាឆ្នាំ២០២០គណៈកម្មការអន្តរក្រសួងបានបើកកិច្ចប្រជុំលើកទី១ ដើមី្បសិក្សានិងអនុវត្តគម្រោងស្ថាបនាហេដ្ឋារចនាសម្ព័ន្ធផ្លូវចំនួន៣៨ខ្សែ នៅក្រុងសៀមរាបក្រោមអធិបតីភាពសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មការអន្តរក្រសួង ដើម្បីពិភាក្សា និងអនុវត្តគម្រោងស្ថាបនាហេដ្ឋារចនាសម្ព័ន្ធផ្លូវនៅ ខេត្តសៀមរាប។
កិច្ចប្រជុំក្រុមការងារបច្ចេកទេសរបស់ក្រសួងមក អង្គប្រជុំបានសម្រេច៖
-ជ្រើសរើសខ្សែផ្លូវសរុបចំនួន ៣៨ខ្សែ មានការកែសម្រួលមួយចំនួន ដោយពិនិត្យទៅលើអាទិភាពលើលើហេដ្ឋារនាសម្ព័ន្ធស្របទៅតាមប្លង់គោល ប្រើប្រាស់ដីក្រុងសៀមរាប ចក្ខុវិស័យឆ្នាំ ២០៣៥ ដែលត្រូវ បានដាក់ឱ្យប្រើប្រាស់ ដោយសេចក្តីសម្រេច លេខ ០០៤ សសរ ចុះថ្ងៃទី៥ ខែកញ្ញា ឆ្នាំ ២០១៨ របស់ គណៈកម្មាធិការរៀបចំដែនដី និងនគរូបនីយ កម្ម ថ្នាក់ជាតិ និង ផែនការមេ នៃការអភិវឌ្ឍហេដ្ឋារចនាសម្ព័ន្ធ ផ្លូវថ្នល់នៅក្រុងសៀមរាប ខេត្តសៀមរាប ។
-កិច្ចប្រជុំបានពិភាក្សា និង សម្រេចក្នុងគោលដៅ លើកកម្ពស់ការបម្រើសេវាជូនប្រជាពលរដ្ឋនិង អ្នកទេសចរនៅក្នុងក្រុងសៀមរាប និងធ្វើឱ្យ ក្រុងសៀមរាបក្លាយ ទៅជាទីក្រុងទេសចរណ៍កម្រិតពិភពលោក
-ខ្សែផ្លូវ ដែល ត្រូវធ្វើការស្ថាបនា និង កែលម្អឡើងវិញ ទាំងអស់នឹងត្រូវធ្វើឱ្យក្លាយទៅជាផ្លូវដែលមានមេត្រីភាព ជាមួយវប្បធម៌ ប្រវត្តិសាស្រ្ត និង ទេសចរណ៍ និងស្របតាមរូបសាស្រ្តទីក្រុង
-ផ្លូវទាំងអស់ត្រូវគិតគូរជាប្រព័ន្ធ និងលើគ្រប់ទិដ្ឋភាព មានជាអាទិ៍ ប្រព័ន្ធ លូទឹកកខ្វក់ លូទឹកភ្លៀង ចិញ្ចើមផ្លូវ ផ្លូវថ្មើរជើង ផ្លូវ សម្រាប់ជនមានពិការភាព ផ្លូវជិះកង់ ចំណតរថយន្ត ប្រព័ន្ធបំភ្លឺផ្លូវសាធារណៈ ផ្លាកសញ្ញានិងគំនូស ចរាចរណ៍ ប្រព័ន្ធកាមេរ៉ា សុវត្ថិភាព អាងចម្រោះទឹក កខ្វក់ និងការធ្វើសួន និងដាំដើមឈើ ។
-ត្រូវពន្លឿនការងាររៀបចំស្ថាបនាផ្លូវ៣៨ខ្សែដែល សម្តេច ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា បានប្រកាសបញ្ចេញកញ្ចប់ថវិកាជាតិចំនួន១៥០លានដុល្លារសម្រាប់ស្ថាបនានេះឲ្យបានលឿនជាទីបំផុត
-ផ្លូវដែលបានកំណត់ហើយនោះ គឺមានបញ្ហាមួយចំនួនដែលត្រូវចាត់វិធានការដោះស្រាយឲ្យបានលឿន ហើយប្រជាពលរដ្ឋទៅសង់សំណង់លើដីផ្លូវ ដែលត្រូវអាជ្ញាធរធ្វើការជូនដំណឹងទៅដល់ពួកគាត់ឲ្យធ្វើការរុះរើចេញ ឲ្យបានឆាប់ផងដែរ ។
-រាល់ផលប៉ះពាល់ដីរបស់បងប្អូនក្នុងការស្ថាបនាផ្លូវនេះ គឺបងប្អូនបានធ្វើកិច្ចសន្យាជាមួយអាជ្ញាធរហើយ ដែលមានភ្ជាប់ខ្លឹមសារនៅប័ណ្ណកម្មសិទ្ធិដីធ្លីដែលបងប្អូនបានកាន់កាប់នោះ ដែលជា ឯកសារមួយដ៏ត្រឹមត្រូវដែលរដ្ឋបានផ្តល់ជូន ។
-គណៈកម្មការក៏សូមអំពាវនាវឲ្យប្រជាពលរដ្ឋដែលបានសាងសង់សំណង់នៅលើដីផ្លូវរបស់រដ្ឋ គឺត្រូវប្រញាប់រុះរើឲ្យបានលឿនយ៉ាងយូររយៈពេល១៥ថ្ងៃ ទៅតាមការព្រមព្រៀងក្នុងដំណាក់កាលនីតិវិធីចុះបញ្ជីដីធ្លីលក្ខណៈជាប្រព័ន្ធថា នៅពេលរដ្ឋត្រូវការធ្វើផ្លូវពួកគាត់ និងរុះរើចេញដោយខ្លួនឯង៕SRP
