ព័ត៌មានជាតិ

ភ្នំពេញ៖លោកហ៊ុយ វណ្ណៈ រដ្ឋលេខាធិការក្រសួងមហាផ្ទៃនិងជាប្រធានសហភាពសហព័ន្ធអ្នកសារព័ត៌មានកម្ពុជា បានសរសេរសារមួយនៅរសៀលថ្ងៃនេះថា «ខ្ញុំមានការចម្លែកចិត្ត ដែលឃើញមាន អង្គភាព និងគណៈកម្មការខ្លះ បានប្រើសិទ្ធិអំណាចចេញដីកាជាបន្តបន្ទាប់ កោះហៅអ្នកសារព័ត៌មាន ឬចាងហ្វាងសារព័ត៌មាន ឱ្យទៅបំភ្លឺចំពោះអត្ថបទដែលកាសែតបានចុះផ្សាយ។

តាមគណនីហ្វេសប៊ុក លោក ហ៊ុយ វណ្ណៈ បានសរសេរបន្តថា ១- តើយើងកំពុងចង់បង្ហាញអ្វី? ការពារផលប្រយោជន៍អ្វី? តើយើងបានយល់ដឹងថាមាន ច្បាប់ស្តីពីរបបសារព័ត៌មាន ដែរទេ? ហើយតើយើងកំពុងចង់យកច្បាប់នេះទៅទុកឯណា?
២- ខ្ញុំមិនគាំទ្រការបញ្ចេញមតិនិងការផ្សាយមួលបង្កាច់ ញុះញង់ បំផ្លិចបំផ្លាញសង្គមជាតិនោះទេ។ ប៉ុន្តែ ដីកាដែលចេញជាបន្តបន្ទាប់នេះ គឺជាការប៉ុនប៉ងរបស់បុគ្គល១ក្រុម កំពុងព្យាយាមបង្ខំឱ្យ កាសែត លុបចេញនូវអត្ថបទដែលលាតត្រដាងទង្វើណាមួយ ដែលខ្លួនគ្មានភាពស្មោះត្រង់ក្នុងការបំភ្លឺ និងបកស្រាយ។

សូមជម្រាបផងដែរថា កន្លងមកមានករណីប្ដឹងអ្នកសារព័ត៌មាន នឹងប្ដឹងចាងហ្វាងការផ្សាយសារព័ត៌មានមួយចំនួន ទៅអាជ្ញាធរនឹងទៅស្ថាប័នតុលាការ ដោយចោទពីបទផ្សេងៗគ្នា។ យ៉ាងណាក៏ដោយករណីបែបនេះ សុំសាមីខ្លួនអាចសុំការបំភ្លឺឬការបកស្រាយពីអង្គភាពសារព័ត៌មានទាំងនោះបានមុនឈានដល់ការប្ដឹង។ ដូចគ្នានេះដែរសុំស្ថាប័នច្បាប់និងអាជ្ញាធរពាក់ព័ន្ធ មេត្តាយក ច្បាប់ស្តីពីរបបសារព័ត៌មាន មកដោះស្រាយផងដែរ៕SR

ខេត្តព្រះវិហារ៖ទីតាំងស្តុកឈើដែលឈ្មួញ បានប្រើរូបភាពយកឈើទៅផ្ញើរ តាមផ្ទះប្រជាពលរដ្ឋ ជាច្រើនផ្ទះ ដើម្បីបន្លំភ្នែកសមត្ថកិច្ច រួចឈ្មួញយកគោយន្តដើរប្រមូលឈើនោះ តាមផ្ទះប្រជាពលរដ្ឋ ដើម្បីដឹកយកទៅលក់នៅខេត្តស្ទឹងត្រែង ត្រូវបាន លោក វុធ សាវី ព្រះរាជអាជ្ញារង និងជាអ្នកនាំពាក្យនៃអយ្យការអមសាលាដំបូងខេត្តព្រះវិហារ បានដឹកនាំសម្របសម្រួលកំលាំងចម្រុះ ចុះបង្ក្រាប។

ការបង្ក្រាបធ្វើឡើងនៅថ្ងៃ១៩.២០ ខែកក្កដា ឆ្នាំ២០២២ នៅស្រុកឆែប ខេត្តព្រះវិហារ។

ប្រតិបត្តិការពីរថ្ងៃជាប់គ្នានេះ ត្រូវបានលោក វុធ សាវី ព្រះរាជអាជ្ញារងដឹកនាំកំលាំងរឹបអូសឈើជាច្រើនម៉ែត្ររគូប ស្ថិតនៅភូមិណារ៉ុង ឃុំឆែបពីរ ស្រុកឆែប ខេត្តព្រះវិហារ។ បច្ចុប្បន្នវត្ថុតាងត្រូវបានប្រគល់ឲ្យមន្ត្រីជំនាញ ដើម្បីចាត់ការតាមនីតិវិធីនៃច្បាប់៕SRP

ខេត្តកំពង់ចាម​៖អភិបាលខេត្តកំពង់ចាម លោក អ៊ុន ចាន់ដា និង​លោក​ ខ្លូត​ ផន​ ប្រធាន​ក្រុមប្រឹក្សា​ខេត្ត​ នៅអង្គារ ម្សិលមិញ បានដឹកនាំមន្ត្រី​ពាក់ព័ន្ធ​ និង​អាជ្ញាធរ​មូលដ្ឋាន​ ចុះសួរសុខទុក្ខ​ ក្រុមការងារចម្រុះ និងពិនិត្យការងារគ្រប់គ្រងការធ្វេីអាជីវកម្មខ្សាច់ ក្នុងភូមិសាស្រ្តស្រុកចំនួនពីរ គឺស្រុកស្រីសន្ធរ​ និងស្រុកកងមាស​។

សូមជម្រាបថា​ លោក អ៊ុន ចាន់ដា ក៏បាន​ដឹកនាំ​ក្រុម​ការងារ​ បន្តចុះពិនិត្យ សិក្សាទីតាំងបាក់ស្រុតច្រាំងទន្លេ ១កន្លែង ស្ថិតក្នុងឃុំឬស្សីស្រុក ស្រុកស្រីសន្ធរ ដើម្បីធ្វើការស្តារ និងជួសជុសឡើងវិញ ឲ្យបានទាន់ពេលវេលា​ ចៀសវាងការបាក់ស្រុតដល់សាលារៀន​ ​ក៏ដូចជា​លំនៅឋាន​បងប្អូន​ប្រជាពលរដ្ឋ​ផងដែរ​។

បើតាមភ្នាក់ងារ សៀមរាបប៉ុស្ដិ៍ បានរាយការណ៍នៅព្រឹកនេះថា កន្លងមក លោក អ៊ុន​ ចាន់ដា​ អភិបាលខេត្តកំពង់ចាម​​ ​ធ្លាប់បានលេីកឡេីងថា មានព័ត៌មានទាក់ទង នឹងការធ្វើអាជីវកម្មបូមខ្សាច់ល្មើសច្បាប់ ក្នុងស្រុកមួយចំនួន ដែលក្រសួងរ៉ែ​ និងថាមពល​ បានអនុញ្ញាតច្បាប់ឲ្យពួកគាត់ធ្វើអាជីវកម្មបូមខ្សាច់។ ប៉ុន្តែម្ចាស់អាជីវកម្មមិនបាន បូមខ្សាច់នៅតាមទីតាំងដែលក្រសួងបានកំណត់នោះទេ ពោលគឺបូមនៅទីតាំងដែលមានខ្សាច់ល្អ តម្រូវទៅតាមទីផ្សារ ដែលបានបង្កឲ្យមានការបាត់បង់នូវសួយសារជាច្រើន ធ្វើ​ឲ្យ​រដ្ឋាភិបាល មានការខាតបង់ចំណូលសម្រាប់ថវិកាជាតិ។

ដូច្នេះ​លោកអភិបាលខេត្ត​ ក៏បានសម្រេច ដាក់ចេញនូវវិធានការបន្ទាន់ រៀបចំមធ្យោបាយ និងកម្លាំងសមត្ថកិច្ច ដើម្បីចុះអនុវត្តការងារបង្ក្រាប និងពង្រឹងសកម្មភាពអាជីវកម្ម បូមសាច់ទាំងអស់ ដែលមាននៅតាមដងទន្លេមេគង្គ​ ក្នុងភូមិសាស្ត្រ ខេត្តកំពង់ចាម ដោយតម្រូវឲ្យម្ចាស់អាជីវកម្ម ចូលបូមខ្សាច់ ទៅតាមទីតាំង ដដែលក្រសួងរ៉ែនិងថាមពល បានកំណត់ក្នុងច្បាប់អនុញ្ញាត នឹងឈានទៅលុបបំបាត់ឲ្យអស់នូវភាពអាណាធិបតេយ្យផងដែរ៕SRP

ខេត្តសៀមរាប៖បុរសម្នាក់ត្រូវបានសមត្ថកិច្ចការិយាល័យនគរបាលព្រហ្មទណ្ឌកម្រិតស្រាល ឃាត់ខ្លួនពាក់ព័ន្ធក្នុងករណី ឆបោក។

ជនសង្ស័យ ដែលត្រូវសមត្ថកិច្ចឃាត់ខ្លួនឈ្មោះ សុខ យ៉ន ភេទប្រុស អាយុ៤៤ឆ្នាំ ទីលំនៅភូមិចុងកៅស៊ូ សង្កាត់ស្លក្រាម ក្រុង/ខេត្តសៀមរាប។

នគរបាលព្រហ្មទណ្ឌកម្រិតស្រាលនៃស្នងការនគរបាលខេត្តសៀមរាបបានប្រាប់សារព័ត៌មានសៀមរាបប៉ុស្ដិ៍ ថា ការឃាត់ខ្លួនធ្វើឡើង នៅថ្ងៃទី១៨ ខែកក្កដា ឆ្នាំ២០២២ ដោយយោងតាមពាក្យបណ្តឹង លេខ៥៤/២២ ព្រ.ទ.ក.ស ចុះថ្ងៃទី១៧ ខែឧសភា ឆ្នាំ២០២២ របស់ឈ្មោះ សុខ រ៉ាដែន ភេទប្រុស អាយុ៥៣ឆ្នាំ ប្ដឹងពីបទកករណី ឆបោក ប្រព្រឹត្តនៅភូមិចុងកៅស៊ូ សង្កាត់ស្លក្រាម ក្រុង/ខេត្តសៀមរាម កាលពីថ្ងៃទី០៦ ខែមករា ឆ្នាំ២០២១។

នគរបាលបានបន្តថា ប្រតិបត្តិការនេះ គឺអនុវត្ត តាមដីកាសម្រេចអោយបើកកាស៊ើបអង្កេតបឋមលេខ៣៦២ អយក/២២ ចុះថ្ងៃទី២៤ ខែឧសភា ឆ្នាំ២០២២ របស់ឯកឧត្តម មាស ច័ន្ទពិសិដ្ឋ ព្រះរាជអាជ្ញានៃអយ្យការសាលាដំបូងខេត្តសៀមរាប។

បើតាមប្រភពពីមន្ត្រីនគរបាលបានបញ្ជាក់ថាកាលពីថ្ងៃទី០៦ ខែមករា ឆ្នាំ២០២១ ឈ្មោះ សុខ រ៉ាដែន ភេទប្រុស ឆ្នាំកំណើត ១៩៦៩ បានប្រគល់ប្រាក់ចូលហ៊ុនចំនួន ២០,០០០ដុល្លារ អោយទៅឈ្មោះ សុខ យ៉ន ភេទប្រុស ឆ្នាំកំណើត ១៩៧៨ និង ប្រពន្ធឈ្មោះ សុិន ផល្លា ឆ្នាំកំណើត ១៩៨១ ដើម្បីធ្វើប្រតិបត្តិការទិញត្រីពីវារីវប្បកម្ម កម្ពុជា និងអាជីវកម្មនាំចូលត្រី ជាក់ស្តែង ប៉ុន្តែពីរនាក់ប្តីប្រពន្ធខាងលើនេះយកប្រាក់ទៅប្រើប្រាស់ផ្ទាល់ខ្លួន ព្រមទាំងខ្លួនគ្មានប្រាក់ដាក់ទុនចំនួន ២០០០០ដុល្លារជាមួយនឹងឈ្មោះ សុខ រ៉ាដែន ផងដែរ។

នគរបាលបានបញ្ជាក់ទៀតថា ផ្អែកតាមចម្លើយនិងសារភាព កាលពីថ្ងៃទី០៦ ខែមករា ឆ្នាំ២០២១ ខ្លួនពិតជាបានទទួលប្រាក់ចំនួន ២០,០០០ដុល្លារ ពី សុខ រ៉ាដែន ដែលចូលហ៊ុនធ្វើអាជីវកម្ម ទៅប្រើប្រាស់ផ្ទាល់ខ្លួនអស់ព្រមទាំងខ្លួនគ្មានប្រាក់ដាក់ទុនចូលហ៊ុនជាមួយឈ្មោះសុខ រ៉ាដែន ពិតប្រាកដមែន។

ពាក់ព័ន្ធករណីនេះ ជនសង្ស័យត្រូវបានតុលាការខេត្តសៀមរាប សម្រេចឃុំខ្លួនហើយនៅព្រលប់ម្សិលមិញ៕SRP

ខេត្តសៀមរាប៖មន្ត្រីយោធាមួយរូបដែលយករថយន្ត ពណ៌ត្រីអ៉ីដឹកឈើខុសច្បាប់ត្រូវបានសមត្ថកិច្ចខេត្តសៀមរាបបង្ក្រាប។

ការបង្ក្រាបធ្វើឡើងស្ថិតនៅត្រង់ចំណុចភូមិត្រពាំងស្វាយ ឃុំស្វាយលើ ស្រុកស្វាយលើ ខេត្តសៀមរាប នៅយប់ថ្ងៃទី ១៧ ខែកក្កដា ឆ្នាំ២០២២ ដោយក្រុមអន្តររាគមន៍បង្ក្រាបបទល្មើសព្រៃ និងសត្វព្រៃ របស់ខណ្ឌរដ្ធបាលព្រៃឈើសៀមរាប សហការណ៍ជាមូយនគរបាលប្រឆាំងបទល្មើសសេដ្ធកិច្ច នៃស្នងការនគរបាលខេត្តសៀមរាប។

ប្រភពបានឲ្យដឹងថា រថយន្តដែលដឹកឈើខុសច្បាប់ម៉ាក DONG  FONG ពណ៌ត្រីអ៊ី ចំណុះ៥តោនពាក់ស្លាកលេខ ខេមរភូមិន្ទ01  3-4759 បានដឹកជញ្ជូនឈើអារប្រភេទលេខ០២ (ថ្លុង ត្បែង) ចំនួន៦ម៥៤៥(ប្រាំមួយមួយម៉ែត្រត្រីគុណប្រាំរយសែសិបប្រាំ)ដោយគ្មានលិខិតអនុពា្ញត្តិពីរដ្ធបាលព្រៃឈើ។

ប្រភពបន្តថាម្ចាស់ឈើមានឈ្មោះ អូន អៀត ភេទប្រុស អាយុ៦១ឆ្នំា មុខរបរជាយោធា។ ករណីនេះវត្ថុតាងនៃបទល្មើស ត្រូវបានក្រុមការងារយកមករក្សាទុក នៅស្នាក់ការផ្នែករដ្ធបាលព្រៃឈើបន្ទាយស្រី ដែលមានទីតាំងស្ថិតនៅភូមិព្រះដាក់ ឃុំព្រះដាក់ ស្រុកបន្ទាយស្រី ខេត្តសៀមរាប ជាបណ្តោះអាសន្នដើម្បីរៀបចំចងក្រងសំណុំរឿងទៅតាមនីតិវិធីច្បាប់ស្តីពីព្រៃឈើ៕SRP